Лукастар

Драге пграла те пгєня!

Тумен канакє лікєрен андро васта Єванґеліє, Радишаґоскєро Гійрос. Ода гійрос вакєрел пало ода, со дуй езера берш одалескє пре пгув авля Ісус Хрістос, Саво відчінеласпес Светоскєро Спасітеліс. Ов джівелас аменца, сасарелас те сікавелас ле манушен, пребачінелас ленґєре бійне, мувля важо саворе мануша і джівділя аврі. Ов пгендя, со минґ єкгвар вісарелапес андре ада светос. Єванґелії першівар есас пісіме андро першо векос про грєчесько чіб. Штар Єванґелії, кніжка ле «Апостоленґєрі бувті» пало ода, сар увліля і баролас кганґейрі, саві патялас андро Дейл те андро Ісус, ліла, саве есас пісіме ле Ісусоскєре сікаденца, а те «Откровєніє», — саворе кадала кніжкі есас іскінде андре єкг, і дадіве амен прінджярас лен сар «Нейво Заветос».

Пало чірлатуно вакєрібе, єванґеліє, саво тумен лікєрен андро васта, пісіндя Лука, патівало докторіс. Кана о Лука авля ко Дейл, ов ачіля єкг одалендар, саво савора їлега патялас андро Дейл, і на єкгвар провадзінелас ле апостоліс Павлос андро лескєро місіонєрсько совґалніпе. Радишаґоскєро Гійрос Лука пісінелас першівар ко ґодявер грєкос Теофіл, гой те сікавен лескє, ко айсо есас Ісус, і со Ов кєрдя пріґ о мануша. Лука постаріндяпес те пгучкєрен ле манушендар, ко дикгля о джівіпе те совґалніпе ле Ісусоскєро пре пгув, гой те іскіден андре єкг саворо, со пісіме пал Лесте. Саворо, со ов доджянляпес, Лука пісіндя андро пескєро Єванґеліє машкар 60-65 берша пало увліпе Хрістоскєро. Єкг анґледер андре кніжка єванґелістас вакєрел пало Іоанноскєро Боладоскєро совґалніпе те пало ода, со обачіляпес, кана увліля Ісус Хрістос. Лука вакєрел пало ода, сар джівелас Ісус Спасітеліс, і спгандел одалега, со обачіляпес андре одала берша. Авка ов сікавел, со Дейл ачіля манушега андро пескєро тган і андре пескєрі овра.

Амен їлестар палікєрас саворенґє, ко кєрелас бувті, гой те мукєн аврі каді кніжка, одаленґє, ко преліджялас ла і ко предикгєлас ла, і буте роменґє, саве доджянлепес пале каді кніжка і дотгоде пескєрі ґовді, гой ой тийл кійсно. Іґєн туменґє палікєрас!

Те благословінел тумен о Дейл!

Патівага кє туменде,

Організація «Перекладачі Біблії України»

Chapter 1

¹ Авка, сар іма бутджяне кєздинде те пісінкєрен пал ода, со обачіляпес машкар аменде, ² сар аменґє передине одала, саве дикгле ода анґлунестар і саве есас совґі про Лав. ³ Авка, те ме рішиндьом міште те предикгєн аґорестар шорос-шоростар те пісінен тукє, драго Теофіл, ⁴ гой ту те джянес ода сікавібе, саво ту хундял, ода гін чачібе.

О анґєлос вакєрел ко Захарія, со увльола Іоанн

⁵ Андро одала дівеса, кана есас о Ірод краліс андре Іудєя, джівелас єкг рашай про нав Захарія. Ов есас ле Авіоскєре рашаєндар. А лескєрі ромні есас ле Аароноскєре файтостар, нав лакє есас Єлізавета. ⁶ Оне дувджяне санас чачібнаскєре анґлал о Дейл, і іґєн фес долікєренас саворе заповіді Раєскєре, і джівенас пал Лескєро лав. ⁷ Кє ленде на есас чаве: Єлізавета наший ачіля пгарі, і дувджяненґє есас іма бут берша. ⁸ Єкгвар, кана есас овра те совґалінен ле Захаріяскєре рашаєнґє, ов совґалінелас анґлал о Дейл. ⁹ Пал пескєро обичай, рашая чіде жрєбій, і Захарія маїндя те заджян андро Раєскєро храмос те тгувінен сагошно тгув. ¹⁰ І акор, сар тгувінелас о сагошно тгув ле Девлескє, саворо нийпос модлінеласпес аврунестар. ¹¹ А сікадяпес лескє анґєлос Раєскєро, і тердьолас пре чачі сийра ле алтаріскє кай тгувісальолас. ¹² Сар лес дикгля о Захарія, чудаліндяпес і іґєн даранділя. ¹³ Та о анґєлос лескє пгендя: — На дара, Захарія, бо тийрі молітва шунді, а те тийрі ромні Єлізавета ловтярела тукє ле час, і ту дега лескє о нав Іоанн. ¹⁴ І ейла тут барі бахт те радишаґос. І бутджяне радисальона, сар ов увльола, ¹⁵ бо ов ейла баро анґлал о Рай. І на пієла е мол, ані нісаво матяркєрдо піїбе. А іма андрал о пгер пескєра дакєро ейла пгердо ле Свентне Духога. ¹⁶ А бутджянен ле Ізраєльоскєре нийпостар вісарела ко ленґєро Рай, о Дейл. ¹⁷ Ов джяла анґлал Лесте андро духос те андре зор Іліяскєрі, гой те вісарен о їле даденґєре ко чаве, а кадален, саве на шунен, — ґодяверіпе ле чачібнаскєре манушен, те кійсітинен о нийпос кє оди оврі, сар авела о Рай. ¹⁸ Та о Захарія пгендя ле анґєлоскє: — Пал состе ме ода прінджярава? Бо ме іма сом пгуро, і мійрі ромні іма андро берша. ¹⁹ Акор лескє о анґєлос отпгендя: — Ме сом анґєлос Гавріїл, ода, саво тердьол анґлал о Дейл. І ме бічадо важ ода, гой те вакєрав туга, і те пгенав тукє када Радишаґоскєро Гійрос. ²⁰ А канакє ту ейга нємо, і на ейга гонно те вакєрен джі кє ода дівес, адик ода ейла, важ ода, кай ту на патянлял мійре лавенґє, саве обаченапес андре пескєрі овра. ²¹ А о нийпос ужарелас ле Захаріяс і чудалінеласпес, соске ов авка буталік залікєрдяпес андро храмос. ²² Та сар авля аврі, на бійріндя кє ленде те превакєрен. І оне ахаліле, со ов дикгля знаменіє андро храмос. Ов сікавелас ленґє ле вастенца, бо ачелас нємо. ²³ А сар преґейле лескєре дівеса те совґалінен, Захарія отґейля андро пескєро кгєр. ²⁴ Пал одала дівеса лескєрі ромні Єлізавета ачіля пгарі, і панч чон на сікавеласпес ле манушенґє, і пгенелас: ²⁵ — Авка манґє кєрдя о Рай, сар закамля те лен мандар е ладж анґлал о мануша!

О анґєлос пгенел, сар увльола Ісус

²⁶ Про шовто чон есас бічадо анґєлос про нав Гавріїл ле Девлестар андро галілєйсько фоврос, со вічінелпес Назарет, ²⁷ кє чай Марія. Ой есас манґаді ле ромескє про нав Йосип, саво есас андало родос ле Давідоскєро. ²⁸ І сар заавля анґєлос кє лате, пгендя лакє: — Бахт тукє, ту хундял благіпе! О Рай туга! ²⁹ А ой чудаліндяпес лескєре лавенґє, і думінелас, со шай обозначінел ода палікєрібен. ³⁰ І акор анґєлос лакє пгендя: — На дара, Марія, бо о Дейл сікадя кє туте благіпе! ³¹ А канакє ту ачега пгарі, і ловтярега ле Час, і дега лескє нав Ісус. ³² Ов ейла баро, і Лес вічінкєрена о Ча Майопрунескєро. І дела Лескє о Рай о Дейл о тронос лескєре дадескєро Давідоскєро. ³³ І кралінела про саворо родос ле Яковскєро міндик, і Лескєре краліпнаскє на ейла ніґда аґор. ³⁴ А Марія пгендя ле анґєлоскє: — Сар ме шай авав пгарі, те ме минґ ромес на джянав? ³⁵ А анґєлос лакє отпгендя: — О Свентно Духос авела пре туте, е зор Майопрунескєрес учарела тут андре. Важ ода те чаворо, со тутар увльола, ейла Свентно, і вічінена Лес о Ча ле Девлескєро. ³⁶ Дикг, акєс, тийре файтостар Єлізавета. Пре лате пгенен, со ой наший ловтярел, а ой іма гіні шовто чон пгарі, і ой гіні андро берша. ³⁷ Бо пріґ о Дейл нане нісаво лав айсо, саво Ов те на бійріндялас те кєрен. ³⁸ І акор отпгендя Марія: — Ме сом ле Раєскєрі совґалкіня, мі ачелпес манґє пал тийро лав. І акор анґєлос латар отґейля.

Е Марія джял кє Єлізавета

³⁹ Андре одала дівеса е Марія скіндяпес і ґейля сіґ андро фоврос, саво есас машкар Іудєякєре брегі. ⁴⁰ Заавля андро кгєр ко Захарія і палікєрдя ле Єлізаветакє. ⁴¹ Сар шундя е Єлізавета о палікєрібен ле Маріякєро, закгелдя андре лате о чаворо, і Єлізавета есас пгердярді Свентне Духога, ⁴² і пгендя зорале ганґога: — Ту сал бахталі машкар саворе ромня, і бахтало ода Чаворо, со гіно андре туте! ⁴³ Ко ме сом айсі, со мійре Раєскєрі дай авля кє манде? ⁴⁴ Сар ме шундьом тийро палікєрібен, радишаґога закгелдя о чаворо андро мійро пгер! ⁴⁵ Бахталі ту сал, бо патянлял, і ачелапес тукє ода, со пгендя о Рай! ⁴⁶ Марія отпгендя: — Мійрі вовді барарел ле Раєс,

         ⁴⁷ а мійро духос радисальол важо Дейл, Саво ратинел ман, ⁴⁸ бо дикгля пре Пескєрі цікні совґалкіня. А канакєстар ман саворо родос вічінела бахталі, ⁴⁹ Майзораледер кєрдя манґє баро! І Лескєро нав свентно! ⁵⁰ Девлескєро лачіпе сікавелпес про саворе роди, про одала, со Лестар пес даран. ⁵¹ Лескєре вастега кєрде баре бувтя: Ов розтранля баріканен, кай тговенаспес аврі андро пескєро їло, ⁵² ле зорален чідя тейле пал ленґєро тронос, а ваздня чоре манушен. ⁵³ Ле бокгален чалярдя лачіпнага, а ле барвален бічадя нісога, ^54-55 лепердя о лав, саво диня амаре даденґє, ле Авраамоскє і лескєре чавенґє, гой мієл міндик лачоїлескєро про векі, і поможіндя ле Ізраєльоскє, Пескєре совґаскє. ⁵⁶ Марія ачіля ле Єлізаветага варекай трін чон, а паліш вісаліля кгєйре кє песте.

Сар увліля Іоанн Боладо

⁵⁷ Кана Єлізаветакє авля овра те ловтярен, і ой ловтярдя ле час. ⁵⁸ Сар доджянле лакєре сомсійди те о файтос, со о Рай сікадя лакє Пескєро лачіпе, радисальонас лага. ⁵⁹ Про охтото дівес ґейле те обчінен ле чаворес, і камле лескє те ден о нав пало лескєро дад, Захарія. ⁶⁰ Та лескєрі дай Єлізавета пгендя: — Наа, лескєро нав ейла Іоанн. ⁶¹ Акор лакє отпгенде: — Ніко нане андре тийро файтос, кас увлягас айсо нав! ⁶² І оне кєздинде те сікавен, і пгученас ле вастенца ле дадес, саво нав ов камел те ден ле часкє. ⁶³ Ов пескє манґля дескіца і пісіндя пре лате: «Лескєро нав Іоанн». І саворе чудаліненаспес. ⁶⁴ І єкгваресте кє лесте вісаліля вакєрібе, і ов кєздиндя те вакєрен і те ашарен ле Девлес. ⁶⁵ Акор саворен обхундя е дар, со паж ленде джівенас. А пало цейлі партоскєрі Іудєйсько пгув есас лав пало ода. ⁶⁶ Саворе, ко ода шунде, думіненас андро пескєро їло: — Ко ейла када чаворо? А ле Раєскєро васт есас пре лесте.

Захарія вакєрел лав ле Девлестар

⁶⁷ Захарія, о дад ле Іоанноскєро, пгердісаліля ле Свентне Духога і пророкінелас авка: ⁶⁸ — Ашардо Рай, о Дейл ле Ізраєльоскєро, саво авля те дикгєн Пескєро нийпос і ціндя лен аврі. ⁶⁹ Андал родос Давідоскєро, Пескєре совґас, Ов бічадя аменґє зоралес, саво анела аменґє ратипе, ⁷⁰ авка, сар Ов іма чірлатунестар вакєрелас пріґ свентне пророка. ⁷¹ Ов ратинела амен ле амаре врагендар, те андало васта саворен, ко амен мержінел. ⁷² Ов сікадя о лачіпе амаре даденґє, і на забістердя Пескєро свентно заветос, ⁷³ кошкєрібен, саво Ов диня амаре дадескє ле Авраамоскє, ⁷⁴ те ратинен амен андало васта врагенґєре, гой те совґалінен Лескє бі е дар, ⁷⁵ і те авас анґлал Лесте чачібнаскєре і свентне саворо амаро джівіпе. ⁷⁶ А ту, чаворея, ейга вічіме пророкос Майопрунескєро, бо джяга анґлал о Рай, гой Лескє те кійсітинен о дром, ⁷⁷ гой те ден Лескєре нийпоскє те джянен, со Ов одмукєла ленґє о бійні і ратинела лен. ⁷⁸ Амаро Дейл гіно іґєн лачоїлескєро, Ов бічавела аменґє Тосарутно Шветлос пало нєбос. ⁷⁹ гой мі ачел шветлос одаленґє, ко бешел андре цма те андре дар мерібнаскєрі, гой те анен амен про дром, саво анел ко мірос. ⁸⁰ Чаворо баролас і зоральолас духога. Ов джівелас андре пустиня джі кє ода дівес, адик на сікадяпес Ізраєльоскєре нийпоскє.

Chapter 2

Сар увліля Ісус

¹ Андре одала дівеса імператоріс Авґуст диня аврі о законос, гой те прееґєнен і те перепісінен ле манушен пал цейло Рімсько пгув. ² Кана есас о Квіріній владаріс андре Сірія, кади перепісь кєрде першивар. ³ А сако єкг ґейля те запісіненпес андро пескєро фоврос. ⁴ Ґейля те о Йосип андал галілєйсько фоврос Назарет андро Іудєя, андро фоврос ле Давідоскєро, со вічінелпес Віфлієм, бо ов есас андал родос ле Давідоскєро. ⁵ Ов ґейля те запісіненпес ле Маріяга, саві есас лега манґаді і ужарелас ле Чаворес. ⁶ Ачіля авка, гой адик ой одя есас, авля лакє овра те ловтярен. ⁷ Ой увліля пескєре перше Чаворес, патярдя Лес андро пгерноре і тгодя Лес андре ясля, бо на есас лен тган андре гостіно соба.

О анґєла джян ко пастера

⁸ Надур есас пастера, саве джівенас пре маля і відязіненас раті пескєре бакрен. ⁹ Акор ачіля ле Раєскєро анґєлос анґлал ленде, а ле Раєскєрі слава лен заучардя. І хундя лен барі дар. ¹⁰ Та анґєлос ленґє пгендя: — На даран, бо авльом туменґє те пгенен Радишаґоскєро Гійрос, саво анела радишаґос саворе нийпоскє! ¹¹ Дадіве туменґє увліля андро фоврос ле Давідоскєро Ратипен, саво гіно Хрістос, о Рай! ¹² Акєс туменґє знаменіє: аракгєна цікне Чаворес андро пгерноре, саво пашльола андре ясля. ¹³ Єкгваресте сікадяпес ле анґєлога буте нєбоскєре суґлядя. Оне ашаренас ле Девлес і вакєренас: ¹⁴ — Ашаріпе ле Девлескє опре про нєбос, а пре пгув мірос ле манушенґє, ко саве Ов сікавел Пескєрі лачі воля! ¹⁵ Кана анґєла лендар отґейле про нєбос, пгенде єкг аврескє о пастера: — Ноча, джяс джі андро Віфлієм те дикгєн, со пес одя обачіля пал ода лав, пал саво пгендял аменґє о Рай. ¹⁶ Сідяріндос, ґейле одя, і аракгле ле Марія те ле Йосип і ле Чаворес, саво пашльолас андре ясля. ¹⁷ Сар оне Лес дикгле, акор кєздинде те вакєрен саворо, со ленґє есас пгендо пало ода Чаворо. ¹⁸ Саворе, ко ода шунде, чудаліненаспес одалескє, со ленґє о пастера вакєренас, ¹⁹ а Марія ґарувелас саворе кадала лава андро пескєро їло і думінелас пало ода. ²⁰ Пастера вісаліле пале, те ашаренас і вазденас опре ле Девлес важ саворо, со оне шунде те дикгле. Саворо есас авка, сар ленґє есас пгендо.

Ле Ісус анен андро храмос

²¹ Сар преґейля охто дівес і кампіля Лес те обчінен, дине Лескє нав Ісус, саво Лескє диня о анґєлос минґ сіґєредер, сар Лескєрі дай ачіля пгарі. ²² Сар преґейле одала дівеса, со обжувжаренпес пало Моїсєйоскєро Законос, Марія те о Йосип анде ле Чаворес андро Єрусалім, гой Лес те отден ле Раєске. ²³ Бо андро Раєскєро Законос гін пісіме: «Доґдо єкг муршоро, со першо увльол, маїнел тейн солахардо ле Раєскє». ²⁴ Пало Законос Раєскєро ленґє кампіля те анен андре жертва дує горлічкєн або дує цікне голубен.

Сімеон і Анна вакєрен лав ле Девлестар

²⁵ Андро Єрусалім джівелас єкг мануш про нав Сімеон. Ов есас чачібнаскєро мануш, кай даралас ле Девлестар, і ужарелас, кана о Дейл подлікєрела ле Ізраєль. І Свентно Духос есас пре лесте. ²⁶ Лескє есас сікадо ле Свентне Духога, со ов на мерела джі кє оди овра, адик на дикгєла ле Раєскєро Хрістос. ²⁷ І ліґєндо ле Духога, авля андро храмос. А е дай те о дад анде ле Чаворес, ле Ісус, гой те кєрен лега ода, со кєрелпес пало Законос. ²⁸ Сімеон іля Лес пре пескєре васта, ашардя ле Девлес і пгендя: ²⁹ — Владаріс! Авка, сар Ту динял о лав, канакє Ту одмукєс Пескєре совґас ле мірога, ³⁰ бо мійре якга дикгле Тийро ратипе,

         ³¹ саве Ту кійсітиндял анґлал саворе мануша. ³² Ов гіно шветлос, саво прешвецінела пгувакєре манушен, і анела ашаріпе Тийре нийпоскє Ізраєльоскє! ³³ Ле Ісусоскєре дад те е дай чудаліненаспес одале лавенґє, со есас пгендо пал Лесте. ³⁴ Сімеон благословіндя лен і пгендя ле Маріякє, Лескєра дакє: — Пріґ када Чаворо, саво пашльол аде, бутджяне андало Ізраєль перена і вазденапес опре. Ов ейла знаменіє, саво бутджяне мануша на прелена. ³⁵ Те тукє коркоракє е шабля преджяла пріґ тийрі вовді. Акор ейла пгутердо думішоґос, со буте манушенґє гін андро їло. ³⁶ Есас одя минґ пророкіня Анна, ле Фануілоскєрі чай, ле Асіроскєре файтостар. Лакє есас бут берша. Кана ой ґейля роместе, ой есас минґ терні чайорі, і преджівділя пескєре ромега ефта берш. ³⁷ А паліш ачіля вдова, і авка доджівділя ко охтовардеш те штар берш. Ой ніґда на авелас аврі андал о храмос, а рат і дівес совґалінелас ле Девлескє андро постос те андре молітві. ³⁸ Андре оди овра авля те ой оде, і ашарелас ле Девлес. І вакєрелас пало Чаворо саворенґє, ко ужарелас, со авела ратипе пріґ Єрусалім. ³⁹ Кана Ісусоскєре дада кєрде саворо, со пгенел ле Раєскєро Законос, оне вісаліле пале андре Галілєя, андро пескєро фоврос Назарет. ⁴⁰ Чаворо баролас, те кіделас андре Песте зор те е ґовді, а ле Девлескєро благіпе есас пре Лесте.

Дешудуй бершенґєро Ісус андро храмос

⁴¹ Сако берш про патрадякєро ійнепос ле Ісусоскєре дада пгіренас андро Єрусалім. ⁴² Сар Лескє есас дешудуй берш, ґейле андро Єрусалім, авка, сар міндик кєренас про ійнепос. ⁴³ Пало ійнепос саворе ґейле кгєйре. А чаворо Ісус ачіля андро Єрусалім, та Лескєре дада пал ода на джяненас. ⁴⁴ Оне думіненас пескє, со Ов джял варекай машкар ола нийпос, со ленца джянас єкгєтане. Сар преґейле єкгєдівесескєро дром, хунде Лес те роден машкар пескєро файтос те машкар о прінджяркутне. ⁴⁵ Сар Лес на аракгле, ґейле пале андро Єрусалім і роденас Лес одя. ⁴⁶ А пало трін дівес ле Ісус аракгле андро храмос. Ов бешелас машкар танітова, шунелас і пгучкєрелас лендар. ⁴⁷ А саворе, со Лес шуненас, чудаліненаспес, саво Ов ґодявер, і сар ленґє отпгенелас. ⁴⁸ Сар Лес дикгле Лескєре дада, чудаліндепес, а е дай Лескє пгендя: — Чаворея, соскє Ту авка кєрдял? Тийро дад те ме Тут родагас, і іґєн дарагас важ Туте. ⁴⁹ Ов ленґє пгендя: — Соске тумен Ман роденас? Чі тумен на джяненас, со Ме мушінав те авен андро Мійре Дадескєро кгєр? ⁵⁰ Та оне на ахаліле ола лава, со ленґє Ов пгендя. ⁵¹ Акор Ов вісаліля ленца, авля андро Назарет, і шунелас лен. А лескєрі дай ґарувелас саворо ода андро пескєро їло. ⁵² Ісус баролас і ачелас ґодяведер. Лес каменас мануша те о Дейл.

Chapter 3

Іоанн Боладо кійсітинел о дром ле Ісусоскє

¹ Про дешупанчто берш, кана Тіберій есас імператоріс, Понтій Пілат управлінелас андро Іудєя, а о Ірод есас владаріс-тетрархос ^[1] андре Галілєя, а лескєро пграл о Філіпп есас владаріс-тетрархос андре Ітурея те андро Трахоніцько пгув, а о Лісіній есас владаріс-тетрархос андро Авілінея. ² Кана есас єкг баредер рашая о Аннас те о Каяфа, есас о лав ле Девлескєро ко Іоанн, Захаріяскєро ча, андре пустиня. ³ І преґейля ов пал цейлі пгув паже ріка Іордан. Іоанн проповідінелас ле манушенґє, гой те покаїненпес і те болавенпес, гой о Дейл те одмукєл ленґє о бійні. ⁴ Сар пісіме андре кніжка ко пророкос Ісая: «Шундьол ганґос андре пустиня: "Кійсітинен о дром ле Раєскє, ровнярен о дром прекал Лесте! ⁵ Сако яркос мі зачівен, і сако брегос те о грункос мі помукєнпес тейле, а банґє дрома мі ачен ровне, а харакєре дрома мі ачен гладке. ⁶ І сако джівдо дикгєла ратипе ле Девлескєро"». ⁷ Акор Іоанн вакєрелас ле бутенґє, саве авенас кє лесте те болавенпес: — Родос сапенґєро! Ко диня туменґє те джянен, гой тумен те денашен ле холятар, саві авел пре туменде? ⁸ А канакє сікавен тумаро покаяніє одалега, со тумен кєрен. І на думінен те вакєрен андре песте: «Амаро дад Авраам». Бо пгенав туменґє, со о Дейл шай кадале барендар ваздел чавен ле Авраамоскє. ⁹ Іма те о тговер пажо кореня дубоскєре пашльол. Сако єкг дубос, саво на анел лачо плодос, ейла чінґєрдо, і чівена лес андре яґ. ¹⁰ І пгучелас лестар о нийпос: — Со аменґє те кєрен? ¹¹ А ов ленґє отпгендя: — Кє касте гін дуй ґада, мі дел єкг одалескє, кас нане, і кє касте гін о хабен, мі кєрел те ов авка. ¹² Мануша, саве іскіден налогі, авле те болавенпес кє лесте, і пгучле лестар: — Танітов, со аменґє те кєрен? ¹³ А ов ленґє пгендя: — На марен аврі ле манушендар бутередер, сар туменґє тгодо. ¹⁴ І пгученас лестар те о суґлядя: — А аменґє со те кєрен? Іоанн ленґє пгендя: — Нікастар ле зорага на зален о лове, і на вінінен нікас, те ода на чачібе, а радисальон одалескє, со тумен зароден. ¹⁵ Нийпос іґєн ужарелас, кана авела Хрістос, і думінелас андро пескєро їло, чі на Іоанн гіно Хрістос ^[2] . ¹⁶ Іоанн про ода саворенґє пгендя: — Ме болавав тумен ле панєга, но авел Зораледер мандар, Савонескє ме на сом достойно те пгутерен о сірімос про Лескєре камашлі. Ов болавела тумен Свентне Духога те ле яґага. ¹⁷ Андре Лескєро васт гіні лопата, і Ов жувжарела Пескєро дів. І скідела е дів андре Пескєрі комора, а о пгуса лабарела ле яґага, саві ніґда на мурдальол. ¹⁸ Бут со ов акор вакєрелас, і убіждінелас ле нийпос, і вакєрелас Радишаґоскєро Гійрос. ¹⁹ Кана ов кєздиндя те вакєрен андро якга ле Іродоскє, саво есас владаріс-тетрархос, кай ов іля пескє важ ромні ле Іродіада, пгралескєра ромня, і важ саворо авер подліпе, саво ов кєрдя. ²⁰ А Ірод ко саворо ода подліпе додиня минґ єкг, со ле Іоанн тгодя те бешен андре тюрма.

Ісусоскєро болавіпе

²¹ Акор, сар боладяпес саворо нийпос, а те Ісус боладяпес ленца. Ов терділя андре молітва пало болавіпе, і акор пгутердяпес о нєбос, ²² і Свентно Духос авля пре Лесте андро тєлоскєрі подоба, сар голубос. І шунділя о ганґос андал о нєбос: — Ту сал Мійро Чаворо камадо, Ту сал Мійро радишаґос!

Ісусоскєро родос

²³ Кана Ісус кєздиндя Пескєро совґалніпе, Лескє есас вай транда берш. Сар думінде, Лескєро дад есас Йосип, а лескєре папі есас Ілій, ²⁴ Матфат, Лєвій, Мелхій, Іаннай, Йосип, ²⁵ Маттафія, Амос, Наум, Еслій, Наггей, ²⁶ Мааф, Маттафія, Шімій, Іосіх, Іодай, ²⁷ Іоаханан, Рісай, Зоровавель, Шеалтііл, Нірій, ²⁸ Мелхій, Аддій, Косам, Елмадам, Ір, ²⁹ Іосій, Елієзер, Іорім, Матфат, Лєвій, ³⁰ Сімеон, Іуда, Йосип, Іонам, Еліакім, ³¹ Мелєай, Маінай, Маттафай, Нафан, Давід, ³² Ієссей, Овід, Боаз, Сала, Нахшон, ³³ Амінадав, Адмін, Арній, Хецрон, Парец, Іуда, ³⁴ Яков, Ісаак, Авраам, Тєрах, Нахор, ³⁵ Сєруґ, Реу, Фалєґ, Євер, Шелах, ³⁶ Каінан, Арпахшад, Сім, Ной, Ламех, ³⁷ Мафусал, Єнох, Іаред, Малєлєіл, Каінан, ³⁸ Єнос, Сіф, Адам, Дейл.

Chapter 4

О бинґ спокушінел ле Ісус

¹ Ісус, пгердярдо Свентне Духога, вісаліля пало Іордан, і акор о Духос ліґєндя Лес андре пустиня, ² кай есас саранда дівес пробаліме аврі ле бинґестар. І на халас ніч андре одала дівеса, а про аґор Ов іґєн бокгаліля. ³ І пгендя Лескє о бинґ: — Те Ту сал о Ча ле Девлескєро, акор пген кадале барескє, мі ачел марескє. ⁴ Но Ісус лескє отпгендя: — Пісіме: «На єкгєга марега джівела о мануш». ⁵ І акор іля Лес о бинґ і ваздня про увчо брегос, і єкгваресте сікадя Лескє саворе светоскєре краліпена. ⁶ І пгендя Лескє о бинґ: — Тукє дава ленґєрі влада те слава. Важ ода бо ой предині манґє, а ме каскє камав, одалескє дава ла. ⁷ А канакє, те Ту бандьога анґлал манде, акор када саворо ейла Тийро. ⁸ І акор Ісус отпгендя лескє: — Пісіме: «Бандю ле Раєскє Девлескє тийрескє і Лескє коркорескє совґалін». ⁹ І ов ліґєндя Лес андро Єрусалім, і тгодя Лес про єкг увчедер тган храмоскєро і пгендя Лескє: — Те Ту сал о Ча ле Девлескєро, хуті тейле адарік. ¹⁰ Важ ода бо пісіме: «Пескєре анґєленґє дела аврі, гой те меркінен пал Туте», ¹¹ і «про васта ліджяна Тут, гой те на демес ко бар Пескєре піндрега». ¹² І отпгендя лескє Ісус: — Пісіме: «На пробалін аврі ле Раєс Девлес тийрес». ¹³ І сар преачіля о бинґ те пробалінен Лес аврі, отґейля Лестар пре варесаві овра.

Ісус совґалінел андре Галілєя

¹⁴ І акор вісаліля о Ісус андро Духоскєрі зор андре Галілєя, і розґейляпес пал Лесте баро вакєрібе пал цейлі пгув. ¹⁵ Ов сікавелас лен андро сінаґоґа, і есас ашардо саворе манушенца.

Ле Ісус на прелен андро Назарет

¹⁶ Єкгвар Ов авля андро Назарет, кай Ов баріля аврі, і, пал пескєро обичай, Ов заавля сомбатоне андре сінаґоґа і ушіля, гой те еґєнен. ¹⁷ І дине Лескє кніжка ле пророкоскєрі Ісая. І сар пгутердя ла, Ов аракгля о тган, кай есас пісіме: ¹⁸ «О Духос ле Раєскєро пре Манде, бо Ов помакгля Ман те вакєрен ле чоренґє Радишаґоскєро Гійрос. О Дейл бічадя Ман те вакєрав ле спганленґє, гой оне ейна свободне, а ле коренґє, со оне дикгєна, те мукєн пре воля одален, кас дикгєн тейле, ¹⁹ те розвакєрен берш пало Раєскєро лачіпе». ²⁰ Сар запганля е кніжка, отдиня ла ле совґаскє і бешля Пескє. Акор саворе мануша андре оди сінаґоґа дикгєнас пре Лесте. ²¹ Ов кєздиндя ленґє те вакєрен: — Дадіве, кана тумен шуненас, обачілепес одала пісіме лава! ²² Саворе ашаренас Лес те чудаліненаспес ле благіпнакєре лавенґє, саве Ов вакєрелас. — Ов со, на ле Йосипоскєро Ча? — пгучкєренас оне. ²³ А Ов пгендя ленґє: — Га, тумен пгенена Манґє када вакєрібе: «Докторея, сасар коркоро тут! Амен шундям, со кєрдял андро Капернаум, кєр те аде, андро пескєро власно фоврос». ²⁴ Чачібе пгенав туменґє, со ані єкгєс пророкос на прелен андре пескєро власно пгув. ²⁵ Чачібе пгенав туменґє: бут есас вдові андро Іліяскєре дівеса андро Ізраєль, кана нєбос есас запганло про трін берш те шов чон, і есас акор барі бокг пал цейлі пгув. ²⁶ І ані кє єкг лендар на есас бічадо Ілія, а чак кє вдова андре Сарепта пажо Сідон. ²⁷ І бут есас андро Ізраєль прокажоне мануша, кана джівелас пророкос Єлісєй, та ані єкг лендар на жувжардяпес, чак єкг сірійцос Нааман. ²⁸ Сар шунде кадала лава, барі руш авля пре саворенде андре сінаґоґа. ²⁹ Оне хутіле ле тганендар і транле Лес аврі андало фоврос. І ліґєнде Лес про аґор ко брегос, кай тердьолас ленґєро фоврос, гой те чівен Лес тейле. ³⁰ Та Ов преґейля машкар ленде і отґейля лендар.

Ісус традел аврі нажувже духос

³¹ Ов авля андро Капернаум, фоврос галілєйсько. І сако сомбат сікавелас ле нийпос. ³² Оне чудаліненаспес Лескєре сікавібнакє, важ ода бо андро Лескєро лав есас влада. ³³ Акор андре сінаґоґа есас о мануш, андро саво есас духос нажувже дємоностар. Ов завріскіндя баре ганґога: ³⁴ — Яй! Со Тукє кампел амендар, Ісус андал Назарет? Ту авлял те пгаґєрен амен? Джянав Тут, Ко Ту — Свентно Девлескєро! ³⁵ — Заціхісалю! — строгонес диня аврі лескє Ісус. — Джя аврі лестар! Дємон чідя одале манушега машкар сінаґоґа і авля аврі андал лесте, і на кєрдя лескє нісаві чкода. ³⁶ Саворе чудаліненаспес і вакєренас єкг аврескє: — Со ода за сікавібе, кай гін Лес влада те е зор, кай Ов нажувже духенґє дел аврі, і оне джян аврі? ³⁷ Розґейляпес о вакєрібе пал Лесте пало саворі оди пгув.

Ісус сасарел ле Сімоноскєра сасуй

³⁸ Сар ґейля аврі андал сінаґоґа, Ов заавля андро кгєр ко Сімон. Сасуй Сімонескєрі есас андре баре лазі, і оне манґєнас Лес важ лате. ³⁹ Сар Ісус подавля кє лате, Ов диня аврі ле лазенґє те мукєн ла, і ой одмукля ла. Єкгваресте ой ушіля опре і ачіля те совґалінен ленґє. ⁴⁰ Кана авелас тейле о кгам, саворе, кє касте есас насвале мануша про любо насвалібе, аненас лен ко Ісус. А Ов тговелас про сако мануш о васта і сасарелас лен аврі. ⁴¹ Бутендар авенас аврі дємони ле вріскішаґога: — Ту сал о Ча ле Девлескєро! Ов диня аврі ленґє, гой оне те на вакєрен. Бо оне джяненас, со Ов гіно Хрістос.

Ісус сікавел андре Іудєя

⁴² Кана ачіля о дівес, Ов ґейля андало ода фоврос андро біманушенґєро тган. А о мануша роденас Лес, а сар аракгле, на каменас те одмукєн Лес. ⁴³ Та Ов пгендя ленґє: — Те авер фовренґє Ме маїнав те вакєрен Радишаґоскєро Гійрос пало Краліпе ле Девлескєро, бо пре када Ме сом бічадо. ⁴⁴ І Ов проповідінелас андре Іудєякєре сінаґоґі.

Chapter 5

Сікаде худен бут мача

¹ Єкгвар Ісус тердьолас пажо озеро Генісарет, а нийпос іскікіндяпес машкар Лесте і шунелас Девлескєро лав. ² І дикгля Ов дуй шіфі, со тердьонас пажо брегос. Галаса, саве авле андал пескєре шіфі, блійтиненас сіткі. ³ Сар заґейля андре єкг шіфа, кай есас Сімоноскєрі, Ісус манґля лес те одландьон надур ле брегостар. Паліш Ов бешля і андал е шіфа кєздиндя те сікавен ле нийпос. ⁴ А кана Ов преачіля те вакєрен, пгендя ле Сімоноскє: — Преландю, кай баро пані, і зачів тийрі сітка, гой те худен е мачі. ⁵ Сімон отпгендя: — Танітов, цейло раті амен пгарес кєрагас, та те авка ніч на хундям. Та пал Тийро лав ме зачівава е сітка. ⁶ А кана кєрде ода, оне хунде айці бут мача, кай ленґєрі сітка чіндьолас. ⁷ Оне кєздинде те сікавен ле вастенца баратенґє андал авер шіфа, гой мі авен те поможінен ленґє. Оне подланділе і пгердярде дуй шіфі авка, гой шіфі кєздинде те ташльон. ⁸ Сар дикгля ода о Сімон Петро, пейля ко піндре Ісусоскєре і пгендя: — Мук ман, Раєя, бо ме сом бійношно мануш! ⁹ Ов пгендя авка важ ода, бо іґєн даранділя. І саворе, ко есас лега, предарадепес одалестар, кай оне хунде айці бут мача. ¹⁰ А лега даранділе те лескєре барата: Яков те Іоанн, о чаве Зеведєйоскєре. Ісус пгендя ле Сімоноскє: — На дара, адале дівесестар ту худега ле манушен. ¹¹ Сар цірдне про брегос о шіфі, оне мукле саворо і ґейле пало Ісус.

Ісус сасарел прокажоне манушес

¹² Єкгвар, кана Ов есас андро єкг фоврос, єкг мануш, саво есас прокажоно, дикгля ле Ісус, пейля про муй і іґєн манґєлас Лес: — Раєя! Те Ту камес, Ту шай ман жувжарес! ¹³ Ісус прецірдня о васт, тгодя пре лесте і пгендя: — Камав, ав жувжо! І єкгваресте проказа ґейля лестар тейле. ¹⁴ Акор Ісус диня аврі одале манушескє нікаскє те на вакєрел пал када, а федер пгендя: — Джя і сікавпес ле рашаєскє. А важ ода, кай обжувжардялпес, ан е жертва, авка, сар пгендя Моїсєй, ленґє про свідєтєльство. ¹⁵ О вакєрібе пало Ісус розґейляпес минґ дуредер, і бут нийпос авенас те шунен Лес і те сасарен пескєро насвалібе. ¹⁶ А Ов джялас андро біманушенґєро тган і одя модлінеласпес.

Ісус сасарел ле паралізіме манушес

¹⁷ Єкгвар, кана Ов сікавелас, бешенас оде фарісєї а те танітова Законоскєре, саве авле пал саворе Галілєякєре те Іудєякєре фовра, а те андал Єрусалім. І зор ле Раєскєрі есас про Ісус, і Ов сасарелас насвале манушен. ¹⁸ Акор паруджяне мануша анде про тган ле манушес, саво на бійрінелас пега те чалавен. Оне іґєн фес каменас те заліджян лес андро кгєр і те тговен лес анґлал Ісус. ¹⁹ А сар на аракгле, катар те заліджян лес, бо бут есас мануша оде, вазднепес про падос, розкінде черепіца, і пріґ падос мукле лес ле тганега машкар мануша анґлал Ісус. ²⁰ Кана Ісус дикгля ленґєро патябе, пгендя одале манушескє: — Манушея, одмукєнпес тукє тийре бійні! ²¹ А танітова Законоскєре і фарісєї подуміненде андре песте: «Ко Ов айсо, кай вакєрел айсе бійношне лава? Ко шай одмукєл о бійне, те на чак єкг о Дейл?» ²² Ісус джянелас, со ленґє гін пре ґовді, і важ ода пгендя: — Пал состе думінен андре тумаре їле? ²³ Со ловкєдер те пгенен: «Одмукєнпес тукє тийре бійне», або те пгенен: «Уші те пгір»? ²⁴ Но тумен маїнен те джянен, гой ко Ча ле Манушенґєро гін влада пре пгув те одмукєн о бійне. Акор Ов пгендя насвалескє: — Тукє пгенав: уші, ле тийро тган і джя андро тийро кгєр. ²⁵ Ов єкгваресте ушіля анґлал ленде, іля ода, пре состе пашльолас, те ґейля, ашаріпнага ле Девлес, андро пескєро кгєр. ²⁶ Саворе чудаліненаспес і кєздинде те ашарен ле Девлес. Ле бара даратар оне вакєренас: — Дадіве амен дикглям ода, со наший айсо ейл.

Ісус вічінел ле Матфіюс те совґалінен

²⁷ Пало ода Ісус ґейля одарік і дикгля ле манушес, саво іскіделас налогі, про нав Лєвій, саво бешелас про тган, кай іскіден налогі, і пгендя лескє: — Ав пал Манде. ²⁸ Ов ушіля, мукля саворо і ґейля пал Лесте. ²⁹ Паліш о Лєвій кєрдя андро пескєро кгєр баро дийлос прекал Ісус. Оде есас бут мануша, саве іскіденас налогі, а те авер мануша, саве есас ленца пажо скамін. ³⁰ А танітова Законоскєре те о фарісєї дудріненас про Ісусоскєре сікаден і вакєренас: — Соске тумен хан те пієн ле манушенца, саве іскіден налогі, а те ле бійношненца? ³¹ Ісус ленґє отпгендя: — На ле састенґє кампел докторіс, а насваленґє. ³² Ме авльом те звічінен на чачібнаскєрен, а ле бійношнен, гой те розвісаренпес ле бійнендар.

Пгучен Лестар пало постос

³³ Акор оне пгенде ле Ісусоскє: — Соске Іоанноскєре сікаде бутвар гіне андро постос і міндик модліненпес, авка те о фарісєєнґєре, а Тийре хан те пієн? ³⁴ Та Ісус отпгендя ленґє: — Чі шай тумен заставінен ле манушен те лікєрен постос, кана гіне про біяв, адик ленца гіно о терно? ³⁵ Та авена айсе дівеса, кана залелапес лендар о терно, акор андро одала дівеса і лікєрена о постос. ³⁶ І розвакєрдя Ов ленґє єкг вакєрібе: — Ніко, сар отчінел, на пресівел о котор андал нейве голмі ко пгуране, бо акор те нейве голмі чінґєрсальона, і ко пгурано на подджял нейво котор. ³⁷ І ніко на чорел терні мол андро пгуране ґовне, бо акор чіндьона о ґовне ле терня молятар. І акор саворо чуляла аврі, а о ґовне проперена. ³⁸ Терні мол кампел те зачорен андре нейве ґовне. ³⁹ Та ніко, ко пробаліндя пгурані мол, на закамела нейві, бо пгенела: «Пгурані мол федер».

Chapter 6

Ісус гіно о Рай те про сомбат

¹ Єкгвар сомбатоне Ісус преджялас пріґ шеїме маля, а Лескєре сікаде чінґєркєренас е дів, і ле вастенца жувжаренас і ханас. ² Вареко фарісєєндар пгучле лендар: — Соске тумен кєрен ода, со наший те кєрен сомбатоне? ³ Ісус ленґє отпгендя: — Тумен со, на еґєндян, со кєрдя о Давід, кана бокгаліля коркоро, а те одала, ко есас лега? ⁴ Ов заавля андро Девлескєро кгєр, іля маро, саво тговенас анґлал о Дейл, саво наший есас те хан нікаскє, ча єкгє рашаєнґє, і халас ов, і диня одаленґє, ко есас лега. ⁵ А паліш додиня: — О Ча ле Манушенґєро гіно Хулай те ле сомбатоскєро!

Ісус сасарел сомбатоне ле манушескє насвало васт

⁶ Про авер сомбат Ов заґейля андре сінаґоґа і сікавелас. Одя есас єкг мануш, ко саво есас чачо васт шувко. ⁷ Танітова Законоскєре те о фарісєї дикгєнас пал Лесте, чі на сасарела Ов сомбатоне, важ ода бо роденас, сар ленґє те засудзінен Лес. ⁸ Ісус джянелас, пал состе оне думінен, і важ ода пгендя ле манушескє, ко саво есас шувко васт: — Уші і тердю про машкар. Ов ушіля і терділя. ⁹ Акор Ісус пгендя ленґє: — Пгучав тумендар: со шай те кєрен сомбатоне — лачіпе чі подліпе, те ратинен джівіпе чі те мурдарен? ¹⁰ Ов дикгля про саворе і акор пгендя манушескє: — Прецірде пескєро васт. Ов авка кєрдя, і ачіля лескєро васт цалком сасардо. ¹¹ А оне ачіле іґєн холяме і кєздинде те довакєренпес єкг аврега, со ленґє те кєрен ле Ісусога.

Ісус кідел аврі дешудуй апостолен

¹² Обачіляпес але дівесенца: ваздняпес Ісус про брегос, гой те модліненпес, і есас цейло раті андро молітва ко Дейл. ¹³ А кана ачіля о дівес, Ісус ізвічіндя Пескєре сікаден і іскіндя лендар дешудуєн, савен Ов і вічіндя апостоленца: ¹⁴ ле Сімон, савескє диня нав Петро, те ле Андріюс, лескєре пгралес, ле Яковс те ле Іоанн, ле Філіпп те ле Варфоломіюс, ¹⁵ ле Матфіюс те ле Фомас, ле Яковс, саво есас о ча ле Алфіюскєро, те ле Сімон, савес вічіненас Зілот, ¹⁶ ле Іудас, саво есас Яковскєро ча, і ле Іудас Іскаріот, саво паліш бікєндя ле Ісус.

Ісус вакєрел пало бахт те пале біда

¹⁷ Кана авля тейле, Ов терділя ленца про ровно тган. Одя іскіндепес пгердо Лескєре сікаде і іґєн бут нийпос андал саворі Іудєя, те андал Єрусалім, і пало фовра Тір те Сідон, саве тердьонас пажо морьос. ¹⁸ Оне авле те шунен Лес і те сасаренпес пескєре насвалібнендар. Те одала, саве есас мучіме нажувже духендар, і сасаренаспес аврі. ¹⁹ Сако єкг бутджянендар камелас те дохуденпес кє Лесте, бо Лестар авелас аврі зор, саві сасарелас саворен. ²⁰ Ісус дикгля про Пескєре сікаде і кєздиндя те вакєрен: — Бахтале тумен, чоре, важ ода кай тумаро гіно о Краліпе ле Девлескєро. ²¹ Бахтале тумен, бокгале дадіве, бо чальона. Бахтале тумен, кай ровен дадіве, бо тумен асанапес. ²² Бахтале тумен, кана мануша тумен мержінена, кана традкєрена тумен і кєрена тумендар ладж, кана джюнґлярена аврі тумаре нава, і са када кєрена туменца важо Ча ле Манушенґєро. ²³ Радисальон андро ода дівес і кгєлен радишаґостар. Барі награда тумарі про нєбос! Авка кєренас ле пророкенца кадале манушенґєре дада. ²⁴ А туменґє, барвале, біда! Бо тумен іма хундян тумаро радишаґос. ²⁵ Біда туменґє, чаленґє дадіве, бо тумен ейна бокгале. Біда туменґє, ко асал канакє, бо іґєн фес ровена. ²⁶ Біда туменґє, кана саворе мануша вакєрена пал туменде лачіпе, бо авка кєренас ле лжепророкенца ленґєре дада.

Ісус сікавел те камен ле враген

²⁷ — Туменґє, ко шунел, пгенав: камен ле враген тумарен, кєрен лачіпе одаленґє, ко мержінел тумен, ²⁸ благословінен одален, ко кошкєрел тумен, і модліненпес важ одала, ко джюнґлярел тумен. ²⁹ Одалескє, ко дикгєла тут тейле і марел тут пале чам, подтгов те авер, а одалестар, ко залел тутар опруне голмі, домук, мі залел те о ґад. ³⁰ Саконескє, ко манґєл тутар, де; а одалестар, ко залел тийро, на манґ пале. ³¹ Кєрен ле манушенґє авка, сар тумен камен, гой оне те кєрен туменґє. ³² Те тумен камен чак одален, ко камел тумен, акор важ соске туменґє те палікєрен? Бо те о бійношне мануша камен одален, ко камел лен. ³³ Те тумен кєрен лачіпе чак одаленґє, ко кєрел лачіпе туменґє, акор важ соске туменґє те палікєрен? Бо те о бійношне мануша авка кєрен. ³⁴ Те тумен дена камібе чак одаленґє, кастар бійзіненпес те худен о камібе пале, акор важ соске туменґє те палікєрен? Бо те о бійношне мануша ден о камібе бійношне манушенґє, гой те худен пале айці. ³⁵ Та тумен камен ле враген тумарен, кєрен ленґє лачіпе, і ден о камібе, та на ужарен, со вісарелапес. Акор ейла туменґє барі награда, і ейна тумен чаве Майопрунескєрес. Ов гіно лачо ко напатівале і ко холяме. ³⁶ Авен лачеїлескєре авка, сар те о Дад тумаро лачоїлескєро.

На судзінен

³⁷ На судзінен, і на ейна судзіме. На осудзінен, і тумен на ейна осудзіме. Пребачінен, і тумен ейна пребачіме. ³⁸ Ден, і дена туменґє, лачі міра, тапошіме, разіме і препгердярді чівена туменґє андре брек тумаро. Бо сар тумен мійрінен авренґє, авка ейла мійріме те туменґє. ³⁹ Ісус розвакєрдя ленґє єкг вакєрібе: — Чі шай о коро ліджял ле корес? Чі на перена со дуйджяне андре хар? ⁴⁰ Сікадо нане баредер пескєре танітовстар, та сако, ко сікльолапес аврі, ейла айсо, сар лескєро танітов. ⁴¹ Со ту дикгєс про шмецос андре якг тийре пгралескє, а о ційло андре пескєрі якг на дикгєс? ⁴² Бо сар шай пгенес пескєре пгралескє: «Пграла, де, мі лав аврі о шмецос андал тийрі якг», кана на дикгєс о ційло андре пескєрі якг? Буджяндо, ле аврі анґлал о ційло андал пескєрі якг, а паліш дикгєга, сар те лен аврі о шмецос андал якг пескєре пгралескє.

Пало лаче те на лаче плоди

⁴³ Бо нане лачо дубос, саво шай анел кірно плодос, і нане о дубос кірно, саво шай анел лачо плодос. ⁴⁴ Бо сако дубос прінджярелапес пал пескєро плодос. Бо кгандрендар на іскіден інжірос, і ле тернячкєндар на іскіден дракга. ⁴⁵ Лачо мануш андал лачі сокровіщніца пескєре їлестар анел аврі лачіпе, а налачо мануш андал налачі сокровіщніца пескєре їлестар анел аврі подліпе. Бо ле манушескє пре чіб ода, сога пгердярдо лескєро їло.

Кгєр про бар

⁴⁶ Соске тумен Ман вічінен: «Раєя, Раєя!», а на кєрен ода, со Ме вакєрав? ⁴⁷ Сако, ко авел кє Манде, шунел Мійре лава і долікєрел лен, пгенава туменґє, пре касте ов пес марел. ⁴⁸ Ов марелпес про мануш, саво строїнел о кгєр, саво ваїнелас, і кєрдя барі хар, і тгодя фундаментос про бар. А кана обачіляпес, со авля барі ріка і савора зорага чулялас про ода кгєр, ой на бійрінелас лес те чалавен, бо ов есас міште строїме. ⁴⁹ А ко шунел і на долікєрел, ода марелпес про мануш, саво строїнел о кгєр пре пгув бі фундаментос. Про саво авля барі ріка, і ов єкгваресте пейля тейле, і лескєро пгаґєрдіпе есас баро.

Chapter 7

Ісус сасарел ле сотнікоскєре совґас

¹ Сар довакєрдя Пескєре лава ко нийпос, Ісус заґейля андро Капернаум. ² Одя ко єкг сотнікос есас насвало совґас, саво пашльолас про мерібе. Ода совґас есас іґєн драго ле сотнікоскє. ³ Кана ов шундя пало Ісус, ов бічадя кє Лесте іудєєнґєре пгуредерен те манґєн Лес, гой Ов те авел те сасарен лескєрес совґас. ⁴ А оне, сар авле ко Ісус, іґєн фес манґєнас Лес і пгенде: — Ов засовґаліндя, гой Ту те кєрес када лескє, ⁵ важ ода бо ов камел амаро нийпос, і ода ов строїндя аменґє сінаґоґа. ⁶ Ісус ґейля ленца. Кана Ов есас іма надур ле кгєрестар, о сотнікос бічадя кє Лесте ле баратен те пгенен Лескє: — Раєя, на мучін Тут, бо ме на засовґалінав, гой Ту те заавес андро мійро кгєр. ⁷ Ме подуміндьом, со ме на засовґаліндьом те авен кє Туте. Та пген о лав, і ейла сасардо мійро совґас. ⁸ Бо ме сом о мануш і подчінінавман преказенґє, і гін кє манде суґлядя, саве ман шунен. І пгенав єкгєскє: «Джя», — і ов джял, і аврескє: «Ав», — і ов авел. Те ле совґаскє мійрескє пгенав: «Кєр ода», — і ов кєрел. ⁹ А сар Ісус шундя када, чудаліндяпес лескє, і вісаліля ко нийпос, саво джялас пал Лесте, і пгендя: — Пгенав туменґє, минґ андро Ізраєль ме на аракгльом айсо патябе! ¹⁰ Кана одала бічаде вісаліле кгєйре, акор аракгле, со совґас есас іма сасардо.

Ісус джівдісарел вдовакєре чаворес

¹¹ Сіґ Ісус ґейля андро фоврос, со вічінелпес Наїн. І джянас Лега Лескєре сікаде і іґєн бут нийпос. ¹² Кана Ов доавля кє фовроскєрі капура, одарік аненас аврі ле мувлес, саво есас єкг ча кє пескєрі дай, а ой есас вдова. І іґєн бут нийпос джянас лага андал фоврос. ¹³ Сар о Рай ла дикгля, іґєн ла посаїндя і пгендя лакє: — На ров. ¹⁴ Ов подґейля і хундяпес ко мохто. А одала, со ліджянас, терділе. І Ов пгендя: — Чаворея, тукє пгенав: уші! ¹⁵ Мувло бешля і хундя те вакєрен. А Ісус перединя лес ле дакє. ¹⁶ Барі дар авля про саворе, і оне ашаренас ле Девлес, вакєрібнага: — Баро пророкос ачіля машкар аменде, бо о Дейл авля те поможінен Пескєре нийпоскє! ¹⁷ Ода лав розґейля пал Лесте пал саворі Іудєя те пало саворе пашуне фовра.

Іоанн бічавел ле сікаден ко Ісус

¹⁸ Ле Іоанноскєре сікаде розвакєрде лескє пал саворо ода, со ачіля. Акор Іоанн вічіндя кє песте дуєн пескєре сікадендар ¹⁹ і бічадя лен ко Рай те пгучен: — Чі Ту сал Ода, Саво маїнел те авен, вай аменґє те ужарен аврес? ²⁰ Одала мануша подавле ко Ісус і пгенде: — Іоанн Боладо бічадя амен кє Туте те пгучен: чі Ту сал Ода, кай маїнел те авен, вай аменґє те ужарен аврес? ²¹ Андре оди овра Ов сасардя буте джянен ле насвалібнендар те мучішаґостар, і одален, андре касте есас налаче духі, те буте коренґє пгутердя о якга, гой те дикгєн. ²² Ісус ленґє отпгендя: — Джян, розвакєрен ле Іоанноскє, со тумен дикглян те шундян: коре ачен те дикгєн, банґє пгірен, прокажоне ачен жувже, кашукє шунен, мувле ачен джівде, чоренґє вакєрелпес Радишаґоскєро Гійрос. ²³ Бахтало ода, ко на демелапес тейле пал дром важ Манде!

Ісусоскєро вакєрібе пало Іоанн Боладо

²⁴ Кана ола, кас бічадя Іоанн, отґейле, Ісус кєздиндя те вакєрен ле нийпоскє пало Іоанн: — Пре состе тумен джянас те дикгєн анде пустиня? Про тростнікос, кай о барвал лес пгурдел? ²⁵ Та пре касте тумен джянас те дикгєн? Талам, про мануш, саво есас урадо андро раїкане голмі? Та одала, ко кіделпес андро барвале голмі і джівел андро барваліпе, гіне андро кралєнґєре палаца. ²⁶ Акор пре касте тумен пгіренас те дикгєн? Про пророкос? Га, пгенав туменґє, і бутер, сар про пророкос! ²⁷ Ов гіно пал, касте гін пісіме: «А канакє Ме бічавав Мійре бічадес анґлал Туте, саво кійсітинела Тийро дром анґлал Туте». ²⁸ Пгенав туменґє: нане айсо, саво увліля ромнятар, саво увлялас баредер, сар Іоанн. Та єкг цікнедер андро Краліпе ле Девлескєро гіно баредер лестар. ²⁹ Саворо нийпос, саво шунелас Лес, а те одала, саве іскіденас налогі, прінджярде Девлескєро чачібе, і боладепес ле Іоанноскєра болавіпнага. ³⁰ А фарісєї те танітова Законоскєре отпгендепес лестар те болавен, і отчіде Девлескєрі воля. ³¹ Ісус пгендя: — Кага шай ровнярав када манушенґєро родос? Пре касте оне пес марен? ³² Оне маренпес про чаве, саве бешен про піяціс і вріскінен єкг аврескє: «Амен башавагас туменґє пре дудка, а тумен на кгєленас; амен ґілявагас туменґє парушаґоскєре ґіля, та тумен на ровенас». ³³ Авля Іоанн Боладо, на хал о маро, на пієл е мол. А тумен вакєрен: «Андре лесте о дємон». ³⁴ Авля о Ча ле Манушенґєро, хал те пієл, а тумен вакєрен: «Акєс мануш бокгалярдо і матяркєрдо, баратос одаленґє, ко іскідел налогі, те бійношненґє». ³⁵ Та ґодяверіпе гіні оправдіме саворе лакєре чавенца.

Бійношні ромні помакгєл о піндре ле Ісусоскє

³⁶ Єкг фарісєй вічіндя ле Ісус кє песте про дийлос. Ісус заавля андро кгєр ко фарісєй і захундя тган пажо скамін. ³⁷ Андро ода фоврос есас єкг ромні, пал саві саворе джяненас, со ой есас бійношні. Кана ой доджянля, гой Ісус хал о дийлос андро кгєр ко фарісєй, андя алабастрово флаконос драге духенца. ³⁸ Ой тердьолас палал паж Лескєре піндре і ровелас, а лакєре асва перенас про Лескєре піндре. Ой кєздиндя пескєре баленца те коскєрен Лескєре піндре, і чумідкєрелас лен, і акор кєздиндя те макгєн лен ле духенца. ³⁹ Фарісєй, саво вічіндя Лес, дикгля ода і пгендя андре песте: «Те Ов увлягас пророкос, акор джянлялас, саві ромні худелпес Лестар, со ой бійношні». ⁴⁰ Акор Ісус пгендя кє лесте: — Сімон, маїнав тукє варесо те пгенен. А ов Лескє пгенел: — Пген, Танітов. ⁴¹ Ісус пгендя: — Єкг мануш диня камібе дує манушенґє: єкг камелас лескє панчшел дінарія, а дуйто — пенда. ⁴² Та ані єкг лендар на бійрінелас те вісарен лескє камібе, і ов одмукля со дувджяненґє. Сар пал тийро, ко лендар бутер лес камела? ⁴³ Сімон отпгендя Лескє: — Ме думінав, ода, каскє бутер камібе одмукля. Ісус лескє пгендя: — Міште ту ахалілял. ⁴⁴ І акор вісаліля кє ромні і пгендя Сімоноскє: — Дикгєс кадала ромня? Ме заавльом кє туте андро кгєр, ту пані Манґє про піндре на подинял, а ой пескєре асвенца обмордя Мійре піндре і кгосля пескєре баленца. ⁴⁵ Ту на чуміндял Ман, а ой, отканастар Ме авльом, на преачел те чуміден Манґє о піндре. ⁴⁶ Шейро Мійро ту на помакглял Манґє, а ой духенца помакгля Манґє о піндре. ⁴⁷ Важ ода пгенав тукє: лакє одмукєнпес бут бійні, бо ой бут закамля. А каскє фріма пребачіме, ода фріма камел. ⁴⁸ Акор Ісус пгендя ла ромнякє: — Одмукєнпес тукє тийре бійні. ⁴⁹ А саворе, ко есас Лега пажо скамін і ханас о дийлос, кєздинде те вакєрен андре песте: «Та ко Ов айсо, кай одмукєл о бійні?» ⁵⁰ Ісус пгендя ла ромнякє: — Патябе тийро ратиндя тут. Джя ле мірога.

Chapter 8

Ромня джян пало Ісус

¹ Пало ода Ісус преджялас пало фоврос те пало ґава, і вакєрелас Радишаґоскєро Гійрос пало Краліпе ле Девлескєро. Лега пгіренас дешудуй апостоли, ² а минґ варесаве ромня, саве есас сасарде ле налаче духендар і насвалібнендар: е Марія, саві есас про нав Магдаліна, андал саві авля аврі ефта дємони, ³ те Іоанна, ромні Хузаскєрі, саво додикгєлас пало Іродоскєро кгєр, Сусанна і авер бутджяне, саве совґалінелас ленґє пескєра хулаїпнага.

Ісус вакєрел пало мануш, саво шіїнелас

⁴ Андал сако фоврос ко Ісус авенас мануша. Кана кє Лесте іскіндепес бут мануша, Ов розвакєрдя ленґє єкг вакєрібе: ⁵ — Авля аврі мануш те шіїнен дів. Кана ов шіїнелас, єкг попейля пажо дром і есас тапошіме, і чірікле нєбоскєре хале саворо опре. ⁶ Авер попейля про баруно пгув, а кана авля аврі, шутіля, важ ода кай хібінелас лакє ціндіпе. ⁷ Тріто попейля машкар кгандре, а кана кгандре баріле опре, на дине, гой дів те барол. ⁸ Минґ авер попейля пре лачі пгув, а, кана баріля аврі, андя плодос про шелвар бутер. Сар када пгендя, Ов додиня: — Кас гін кгана те шунен, мі шунел! ⁹ Сікаде пгучле ле Ісусостар: — Со шай обозначінел када вакєрібе? ¹⁰ Ов пгендя: — Туменґє дино те джянен ґарувіпе пало Краліпе ле Девлескєро, а авренґє вакєрелпес андро вакєрібе, гой «сар дикгєна, те на дикгєн, і сар шунена, те на ахальон». ¹¹ Шунен, со обозначінел када вакєрібе: дів гіно Девлескєро лав. ¹² Ода, со пейля пажо дром, — гіне одала, саве шунен о лав; а паліш авел о бинґ і човрел о лав андал ленґєро їло, гой оне те на патян і те на авен ратиме. ¹³ Дів, саво пейля про бара, — ода одала, саве шунен і ле радишаґога прелен о лав, та нане лен кореньос. Варесаві овра оне патян, а кана пробаліненпес аврі, акор отперен. ¹⁴ Дів, саво пейля андро кгандре, — ода одала, саве шунде о лав, та сакодівесескєре заботи, барваліпе і тєлоскєрі жадоба тасавен о лав, і важ ода ленґєро плодос на добарол. ¹⁵ А дів, саво пейля андре лачі пгув, — ода одала, саве шунен о лав, лікєрен лес андро жувжо лачо їло, і тийріпнага оне анен плодос.

На ґарувен тумаро шветлос

¹⁶ Ніко залабарді лампа на тговел толо дийньос вай толо тган, а тговел ла опре, гой одала, саве авена андре, те дикгєн о шветлос. ¹⁷ Бо нане ніч ґарудо, гой паліш те на увлялас пгутердо аврі, а ода, со запганло, гой те на доджянляласпес і на авлялас аврі, бо те авка ейла пгутердо аврі. ¹⁸ Меркінен, сар тумен шунен; кас е гін, одалескє доделапес, а кас нане, одалестар одлелапес минґ те ода, со ов думінел, гой кє лесте гін.

Ко гіно чачуно файтос ле Ісусоскє

¹⁹ Авля ко Ісус Лескєрі дай те лескєре пграла, і на бійріненас те подджян кє Лесте, важ ода кай паж Лесте есас бут мануша. ²⁰ Мануша дине Лескє те джянен: — Овкєс Тийрі дай те о пграла тердьон аврі і камен Тут те дикгєн. ²¹ Акор Ов ленґє отпгендя: — Мійрі дай те Мійре пграла — ода одала, саве шунен і долікєрен Девлескєро лав.

Ісус ціхісарел е барвал

²² Андре єкг дівес Ов заґейля Пескєре сікаденца андре шіфа і пгендя ленґє: — Преландювага пре дуйто сийра панєскє. Оне кєздинде те преландьон. ²³ Адик оне ландьонас, Ісус засувтя. Акор про пані ваздняпес іґєн барі барвал, і пані кєздиндя те зачорен ленґєрі шіфа, авка со оне ачіле андре барі біда. ²⁴ Сікаде подґейле, уштаде ле Ісус і пгенде Лескє: — Танітов, Танітов! Мерас! Ов ушіля опре і диня аврі ле барвалякє те ле панєскє те преачен. Оне преачіле, і ачіля ціхонес. ²⁵ Ісус пгендя ленґє: — Кай тумаро патябен? Оне ле дарага чудаліндепес і вакєренас єкг аврескє: — Та ко Ов гіно Айсо, со ле панєскє те ле барвалякє дел аврі, а оне шунен Лес?

Ісус традел аврі нажувже духен андал о мануш

²⁶ Ісус те Лескєре сікаде преланділе кє пгув Герасінсько, кай гіні некі Галілєякє. ²⁷ Кана Ісус авля про брегос, некі Лескє авля єкг мануш андало ода фоврос, саво есас бут берша мучіме дємоненца. Ов іма чірла на гординелас голмі і джівелас на андро кгєр, а андро гробніці. ²⁸ Кана ов дикгля ле Ісус, пейля анґлал Лесте і зорале ганґога завріскіндя: — Со Тукє кампел мандар, Ісус, о Ча ле Девлескєро Майопрунескєрес? Манґав Тут, на мучін ман! ²⁹ Важ ода Ісус диня аврі нажувже духоскє, мі джял аврі андал ода мануш. Дємон буталік мучінелас лес. Одалескє манушескє іспганденас ле ланценца о васта те о піндре, і меркіненас пре лесте. Та ов чінґєрелас о ланці, і дємон традкєрелас лес пало біманушенґєре тгана. ³⁰ Ісус лестар пгучля: — Сар тукє нав? Ов Лескє пгендя: — Лєґіон! Важ ода кай бут дємони заґейле андре лесте. ³¹ Оне кєздинде Лес те манґєн, гой Ов те на традел лен андре бездна. ³² Надур про брегос пасіненаспес бут баліча. Дємони манґєнас ле Ісус, гой Ов те домукєл ленґє те заджян андро баліча. Ов домукля ленґє. ³³ Акор дємони авле аврі ле манушестар і заґейле ко баліча. Акор одала бале чідепес тейле пало баро брегос андро пані і ташліле. ³⁴ Сар дикгле пастера, со обачіляпес, денашле і розвакєрде саворо андро фоврос те пало ґава. ³⁵ Авле о мануша, гой те дикгєн, со одя обачіляпес. Оне подавле ко Ісус і аракгле ле манушес, андал саво авле аврі о дємони, саво бешелас ле Ісусоскє пажо піндре, урадо і сасардя ґовдяга, і лен обхундя дар. ³⁶ А одала, саве дикгле ода, со пес обачіля, розвакєрде ленґє, сар есас сасардо захундо дємонога. ³⁷ Саворо нийпос герасінсько манґєлас ле Ісус, гой Ов мі джял гет лендар, важ ода кай барі дар авля пре ленде. Акор Ов бешля андре шіфа і вісаліля пале. ³⁸ Мануш, андал саво ґейле аврі дємони, манґєлас ле Ісус, гой мі лел лес Пега. Та Ісус одмукля лес і пгендя: ³⁹ — Вісар тут пале ко тийро кгєр і розвакєр, со кєрдя прекал туте о Дейл. Ов ґейля і вакєрелас пал цейло фоврос, со кєрдя лескє Ісус.

Ісус джівдісарел ле Іаіроскєра чайора і сасарел ле ромня

⁴⁰ Кана Ісус вісаліля кє Галілєя, о нийпос палікєренас Лескє, бо саворе ужаренас пре Лесте. ⁴¹ Акор авля єкг мануш про нав Іаір. Ов есас єкг баредер пре сінаґоґа. Ов пейля про коча анґлал Ісус і манґєлас Лес те заджян кє лесте андро кгєр. ⁴² Кє лесте есас чак єкг оди чайорі, варекай дешудуй бершескєрі, і ой мерелас. Ісус джялас одя, і нийпос кікіделас Лес. ⁴³ Оде есас єкг ромні, кє саві іма дешудуй берш чулялас рат. Ой розкєрдя про доктора саворо, со ла есас, та те авка ніко на бійрінелас ла те сасарен. ⁴⁴ Ой подґейля ко Ісус палал і хундяпес ко аґор Лескєре голмендар, і єкгваресте рат преачіля латар те чулян. ⁴⁵ Ісус пгендя: — Ко дохундяпес кє Манде? Кана ніко на прінджяреласпес, Петро пгендя: — Танітов! О нийпос обтерділе і кікіден Тут саворе сийрендар. ⁴⁶ Ісус пгендя: — Вареко хундяпес кє Манде, бо Ме шундьом, сар зор авля Мандар аврі. ⁴⁷ Кана ромні дикгля, со ой на бійрінелпес те ґарувен, акор бара дарага подґейля, пейля анґлал Ісус і розвакєрдя Лескє анґлал саворо нийпос, соске дохундяпес кє Лесте і сар єкгваресте есас сасарді. ⁴⁸ Акор Ов лакє пгендя: — Чайоріє, патябе тийро ратиндя тут! Джя ле мірога. ⁴⁹ Кана Ісус минґ вакєрелас, авля о мануш андало кгєр, саво есас єкг пгуредер пре сінаґоґа, і пгендя лескє: — Чайорі тийрі мувля. Бутер на чалав ле Танітов. ⁵⁰ Кана Ісус шундя, акор пгендя Іаіроскє: — На дара, чак патя, і ой сасарелапес аврі. ⁵¹ Кана авля андро кгєр, на домукля нікас те заджян Пега. А Лега есас чак о Петро, Яков, те Іоанн і ле чайоракєро дад те е дай. ⁵² Саворе іґєн ровенас, і барі жаля пал лате есас. Та Ісус пгендя: — На ровен! Ой на мувля, а совел. ⁵³ Акор саворе кєздинде те асанпес Лестар, бо оне джяненас, со ой мувля. ⁵⁴ А Ов іля ла пало васт те пгендя лакє: — Чайоріє, уші! ⁵⁵ І вісаліля лакєро духос андре лате, і ой єкгваресте ушіля. Ісус пгендя, гой мі ден лакє те хан. ⁵⁶ Радишаґостар о дад те е дай на джяненас, со те пгенен. Та Ісус диня аврі ленґє, гой нікаскє те на вакєрен пало ода, со пес обачіля.

Chapter 9

Ісус бічавел пескєре дешудуй апостолен те вакєрен Радишаґоскєро Гійрос

¹ Ісус вічіндя дешудуєн, і диня ленґє зор те е влада те траден аврі саворе дємонен і те сасарен насвалібе. ² Ов бічадя лен те вакєрен пало Девлескєро Краліпе і те сасарен ле насвален. ³ Ов пгендя ленґє: — На лен ніч пега андро дром: ані паца, ані ташка, ані маро і нісаве лове, і на лен пега авер голмі. ⁴ Андро саво кгєр заджяна, одя те ачен, а паліш одарік джян дуредер. ⁵ Те варекай мануша на прелена тумен, акор, сар авена аврі андало ода фоврос, разінен аврі о прахос пал тумаре піндре про свідєтєльство протів одала мануша. ⁶ Сікаде ґейле дромега. Оне пгіренас ґав ґавестар, вакєренас Радишаґоскєро Гійрос і вшадзік сасаренас ле насвале манушен.

Ірод шунел пало Ісус

⁷ Кана Ірод владаріс-тетрархос шундя пал саворо када, ов іґєн чудалінеласпес. Варесаве вакєренас, со ода Іоанн ушіля андал о мерібе, ⁸ авер вакєренас, гой сікадяпес Ілія, а минґ варесаве мануша вакєренас, гой єкг чірлатуно пророкос ушіля андало мерібе. ⁹ Ірод пгендя: — Ле Іоанноскє ме отчіндьом о шейро. Акор ко ода Мануш, пал Касте ме шунав айсо? Ов іґєн камелас те дикгєн ле Ісус.

Ісус чалярел панч езера манушен

¹⁰ Кана апостоли вісаліле, оне розвакєрде Лескє, со кєрде. А паліш Ов іля чак лен Пега, і оне ґейле коркоре андро фоврос, саво вічінелпес Віфсаїда. ¹¹ Та нийпос доджянляпес пал ода і ґейле пал Лесте. Ов преіля лен і вакєрелас ленґє пало Краліпе ле Девлескєро, а ле насвален сасарелас. ¹² Кана аврі ратісаліля, акор дешудуя подґейле ко Ісус і вакєренас Лескє: — Одмук ле нийпос, мі джян андре пашуне цікне те баре ґава те пресовен і те аракгєн пескє хавібе, бо амен андро біманушенґєро тган. ¹³ Акор Ісус ленґє отпгендя: — Ден тумен ленґє те хан. А оне пгенде: — Кє аменде ніч нане, чак панч маре і дуй мача. Чі аменґє те джян, те цінен хавібе пре кадала саворе мануша? ¹⁴ Чак ле муршен одя есас варекай панч езера манушен. Та Ов пгендя пескєре сікаденґє: — Тговен лен те бешен копенца по пенда мануша. ¹⁵ Оне кєрде авка і розтгоде те бешен саворен. ¹⁶ Ісус іля панч маре і дуй мача, дикгля про нєбос, палікєрдя, препгаґля і диня ле сікаденґє, те розден ле нийпоскє. ¹⁷ Саворе ханас те чаліле, а одале которендар, саве на дохале, іскінде минґ дешудуй кошара.

Петро прінджярел, гой Ісус гіно Хрістос

¹⁸ Єкгвар, кана Ісус модлінеласпес коркоро, і надур Лестар есас Лескєре сікаде, Ов пгучля лендар: — Важ касте прелел Ман о нийпос? ¹⁹ Оне отпгенде Лескє: — Єкг пгенен, со Ту сал Іоанн Боладо, а авер пгенен, со Ту сал Ілія, а вареко пгенел, со єкг чірлатуно пророкос ушіля андало мерібен. ²⁰ Та Ов пгучля лендар: — А тумен важ касте Ман прелен? Акор Петро отпгендя Лескє: — Важо Хрістос Девлескєро.

Ісус вакєрел, гой Ов мерела, а паліш джівісальола

²¹ Акор Ов ленґє диня аврі нікаскє те на вакєрен пало ода, ²² вакєрібнага: — Ле Манушенґєро Ча маїнел іґєн бут те семвединен. Ов ейла отчідо ле пгуредеренца, єкг баредер рашаєнца те ле танітовенца Законоскєре. І маїнел тейн мурдардо, а про тріто дівес ушела андал о мерібе. ²³ А паліш Ісус пгендя ленґє: — Те вареко тумендар камел те авен пал Манде, акор отпген тут пестар, сако дівес ле пескєро кєрестос і ав пал Манде. ²⁴ Ко камел те ратинен пескєро джівіпе, ода нашавела лес, а ко нашавела пескєро джівіпе важ Манде, ода ратинела лес. ²⁵ Саві хасна ле манушескє те захудела саворо светос, та коркоро пескє мосарела джівіпе і доліджяла лес ко мурдаріпе? ²⁶ Важ ода ко ладжялапес Мандар і Мійре лавендар, одалестар ладжяла те о Ча ле Манушенґєро, кана Ов авела андре Пескєрі слава, андре слава ле Дадескєрі і свентне анґєленґєрі. ²⁷ Та чачес пгенав туменґє: гін мануша машкар туменде, саве тердьон аде, саве на мерена, адик на дикгєна о Краліпе ле Девлескєро.

Ісус вакєрел ле Моїсєйога те Іліяга

²⁸ Варекай толо охто дівес, сар Ісус пгендя адала лава, Ов іля ле Петрос, ле Іоанн те ле Яковс і ваздняпес ленца про партос те модліненпес. ²⁹ А кана Ов есас андре молітва, о муй Лескєро чіріндяпес, а Лескєре голмі ачіле парне і іґєн фес бліскіненас. ³⁰ Акор варекатар сікадепес дуй мурша і вакєренас Лега, ода есас Моїсєй те Ілія. ³¹ Оне сікадепес андре слава те вакєренас пало ода, сар Ов отджяла адале светостар андал Єрусалім. ³² Акор про Петрос те про одален, ко есас лега андре єкг, авля совібе. А кана оне ушіле опре андал совібе, дикгле Лескєрі слава а те дує муршен, саве тердьонас пашес паж Лесте. ³³ Ачіля авка, кана одала дувджяне іма джянас Лестар, акор Петро пгендя ле Ісусоскє: — Танітов, міште аменґє аде! Домук аменґє, і амен кєрага аде трін шатрі: Тукє єкг, Моїсєйоскє єкг те ле Іліяскє єкг, — та ов коркоро на ахальолас, со вакєрел. ³⁴ Кана ов минґ вакєрелас, сікадяпес е хмара і зучардя лен, і авля пре ленде барі дар, кана ачіле андре хмара. ³⁵ І есас ганґос андал е хмара, саво вакєрелас: — Када Мійро Ча іскіндно. Лес шунен! ³⁶ Кана ганґос ціхісаліля, Ісус ачіля Коркоро. А оне нікаскє на вакєренас андро одала дівеса пало ода, со оне дикгле.

Ісус сасарел терне чаворес, захундес нажувже духога

³⁷ Про авер дівес, кана оне авле тейле пало партос, одя ле Ісус ужаренас іма бут мануша. ³⁸ Акор єкг мануш андал ода нийпос кєздиндя те вріскінен: — Танітов, манґав Тут, дикг про мійро чаворо, бо ов кє манде чак єкг! ³⁹ О духос худел лес, і ов єкгваресте кєздинел те річінен. Ов разінел лес авка, со андал лескєро муй джял е пена. Духос мучінел лес і лєду біду одмукєл лес. ⁴⁰ Ме манґльом Тийре сікаден те траден лес аврі, та оне на бійрінде. ⁴¹ Ісус отпгендя: — О, біпатябнаскєро те спорціме родос! Кєці Манґє минґ тейн туменца і те тийрінен тумен? Ан аде тийре чаворес. ⁴² Кана чаворо подавля капка пашедер, акор дємон чідя лега пре пгув і кєздиндя лега іґєн фес те разінен. Та Ісус диня аврі нажувже духоскє, сасардя ле чаворес і диня лес ле дадескє. ⁴³ Саворе, ко одя есас, чудаліненаспес, саво баро Дейл.

Ісус дуйтовар вакєрел пал Пескєро мерібе А кана саворе чудаліненаспес саворескє, со кєрдя Ісус, Ов пгендя пескєре сікаденґє:

⁴⁴ — Шунен міште, со Ме канакє туменґє пгенава: о Ча ле Манушенґєро маїнел тейн предино андро васта ле манушенґєре. ⁴⁵ Та оне на ахаліле када лав, бо ода лав есас ґарудо лендар. Оне на ахаліле Лес, та даранас Лестар те пгучен пало ода.

Ко гіно баредер

⁴⁶ Акор есас машкар ленде о спорос: ко лендар ейла баредер? ⁴⁷ Ісус джянелас, со оне думінен, і важ ода Ов іля ле чаворес і тгодя лес паж Песте. ⁴⁸ І пгендя ленґє: — Ко прелела кадале чаворес андро Мійро нав — Ман прелел, а ко Ман прелел — прелел Одалес, Ко бічадя Ман. А ко гіно єкг цікнедер машкар туменде, ода гіно баредер. ⁴⁹ Акор Іоанн пгендя Лескє: — Танітов, амен дикглям єкгє манушес, саво Тийре навега траделас аврі манушендар ле дємонен. Амен пгендям, гой те на кєрел када, бо ов аменца на пгірел. ⁵⁰ Та Ісус ленґє отпгендя: — На запріщінен лескє, бо ко нане протів туменде, ода важ туменде.

Ле Ісус на прелен андре Самарія

⁵¹ Кана ле Ісусоскє подавля овра, і Лес маїндяпес те лен про нєбос, Лескє есас про їло те джян андро Єрусалім. ⁵² Акор анґлал Песте Ов бічадя ле бічаден, і оне ґейле андро єкг самарійсько ґав, гой те прікєрен саворо. ⁵³ Та ґавутуне мануша на преіле ле Ісус, бо Ов джялас андро Єрусалім. ⁵⁴ Сар дикгле када Лескєре сікаде, о Яков те Іоанн, пгенде Лескє: — Раєя, камес, амен манґага, мі авел е яґ пало нєбос те мурдарел лен? ^55-56 Та Ісус вісаліляпес кє ленде і диня ленґє аврі. ^[1] Акор оне ґейле андро авер ґав.

Ко шай ейл Ісусоскєро сікадо

⁵⁷ Кана оне джянас андро дром, вареко пгендя Лескє: — Ме джява пал Туте, кай Ту те на ґейлялас! ⁵⁸ Ісус лескє отпгендя: — Ле ліскен гін пескєре хара, а ко чірікле нєбоскєре гін пескєре гнізда, а ко Ча ле Манушенґєро нане кай о шейро те тговен. ⁵⁹ Те дуйтонескє пгендя: — Ав пал Манде. Та ов пгендя: — Раєя! Мук ман єкгвар, мі джяв те парунен мійре дадес. ⁶⁰ Ісус лескє пгендя: — Мук, гой мувле мі парунен пескєре мувлен. А ту джя і розвакєр пало Краліпе ле Девлескєро. ⁶¹ Минґ єкг пгендя Лескє: — Ме джява пал Туте, Раєя! Та єкгвар домук манґє, те джяв пошлєдньо раз те дикгав мійро чаладос. ⁶² Та Ісус лескє пгендя: — Сако, ко тгодя пескєро васт про плугос, а дикгєл минґ палал, нане гонно пріґ о Краліпе ле Девлескєро.

Chapter 10

Ісус бічавел ефтавардеш сікаден

¹ Пал ода о Рай іскіндя авер ефтавардеш сікаден і бічадя лен по дувджяне анґлал Песте андро сако єкг фоврос те о ґав, кай Ов Коркоро камелас те джян. ² Ов пгендя ленґє: — Увліпе баро, а бувтякєрен фріма. Важ ода манґєн ле увліпнакєре Хулаєс, гой Ов мі бічавел ле бувтякєрен те іскіден Пескєро увліпе. ³ Джян! Ме бічавав тумен, сар бакрорен машкар о рува. ⁴ На лен пега ані тарца, ані ташка, ані камашлі і пало дром нікаскє на палікєрен. ⁵ Кана тумен заджяна андро кгєр, акор анґлал пгенен авка: «Мірос одале кгєрескє!» ⁶ Те одя джівел о мануш міроскєро, акор тумаро мірос ачела пре лесте; те наа, акор ов вісальола кє туменде. ⁷ Ачен андро ода кгєр; хан і пієн ода са, со кє ленде гін. Бувтякєро засовґалінел, гой лескє те потінен. На преджян андал єкг кгєр андро авер. ⁸ Те тумен заджяна андро фоврос і оне тумен оде прелена, хан одя саворо, со оне туменґє дена. ⁹ Сасарен ленґєре насвален, і вакєрен ленґє: «Краліпе Девлескєро іма пашес кє туменде!» ¹⁰ А те тумен заджяна андре варесаво фоврос і одя тумен на прелена, акор джян пало фовроскєре уці і пгенен: ¹¹ «Минґ о прахос тумаро фовроскєро, со захундяпес амаре піндрендар, амен разінас пре туменде. Та джянен: Краліпе Девлескєро іма пашес!» ¹² Пгенав туменґє, со андро ода дівес Содомоскє ейла ловкєдер, сар адале фовроскє. ¹³ Біда тукє, Хоразін! Біда тукє, Віфсаїда! Бо те андро Тір те андро Сідон увлянас сікаде чудєса, саве есас сікаде кє туменде, то оне чірла покаїндянаспес, і урдянас пре песте лепеди, і бешлянас андро прахос. ¹⁴ Та Тіроскє те ле Сідоноскє ейла ловкєдер про судос, сар туменґє. ¹⁵ А ту, Капернаум, думінес, со ейга ваздно ко нєбос? Наа, ту ейга чідо андро адос! ¹⁶ Ко тумен шунел — Ман шунел, і ко на прелел тумен — Ман на прелел, а ко на прелел Ман — на прелел Бічадес Ман!

Ефтавардеш сікаде вісальон ле радишаґога

¹⁷ Ефтавардеш сікаде вісаліле ко Ісус ле радишаґога і пгенде: — Раєя, минґ те о дємони аменґє покорне, кана амен преказінас ленґє Тийре навега! ¹⁸ Ісус ленґє отпгендя: — Ме дикгльом ле сатана, саво, сар кана перумос, пейля пало нєбос! ¹⁹ Ме диньом туменґє влада те тердьон про сапа те про скарпіони, те пре саворі врагоскєрі зор, і ніч туменґє на анела чкода. ²⁰ Но радисальон на одалескє, кай туменґє духі подчініненпес, а одалескє, со тумаре нава запісіме про нєбос. ²¹ Андре оди овра Ісус радисаліля андро Свентно Духос і пгендя: — Ашарав Тут, Даде, Рай ле нєбоскєро і ле пгувакєро! Ту таґадиндял ода ле ґодяверендар те аврі сікадендар, а пгутердял цікноре чаворенґє. Га, Дадея, ода есас Тийрі лачі воля! ²² Мійро Дад саворо прединя Манґє. Ніко на джянел, ко гіно о Ча, чак єкг о Дад. І ніко на джянел, ко гіно о Дад, чак єкг Лескєро Ча і ода, каскє о Ча закамела те пгутерен Лес. ²³ Паліш Ов вісаліля ко Пескєре сікаде і пгендя ленґє авка, гой чак оне те шунен: — Бахтале якга, кай дикгєн ода, со тумен дикгєн! ²⁴ Пгенав туменґє, бут пророка те о краля каменас те дикгєн ода, со тумен дикгєн, та на дикгле, те шунен ода, со тумен шунен, та на шунде.

Вакєрібе пало лачо самарянос

²⁵ Аде ушіля єкг танітов Законоскєро і задиня ле Ісусоскє пгучібе, гой Лес те пробалінен аврі: — Танітов, со манґє те кєрен, гой те худав вечно джівіпе? ²⁶ Ісус лескє отпгендя: — Андро Законос со пісіме? Сар еґєнес? ²⁷ Ов отпгендя: — «Кам ле Раєс, Девлес пескєрес, саворе тийре їлега, савора тийра вовдяга, савора тийра зорага і савора тийра ґовдяга», і «пашунес тийрес авка, сар коркоро пес». ²⁸ Ісус лескє пгендя: — Міште ту пгендял. Авка кєр, і акор джівега. ²⁹ Та о танітов Законоскєро камля те оправдиненпес і важ ода пгучля Ісусостар: — Ко гіно манґє пашуно? ³⁰ Акор Ісус лескє отпгендя: — Єкг мануш джялас андал Єрусалім андро фоврос Єріхон. Пало дром хутіле пре лесте жівана, саве розкінде лес, ізмарде, про єпаш мувлес мукле лес і ґейле гет. ³¹ Обачіляпес авка, со пало ода дром преджялас о рашай. Ов дикгля одалес манушес і обґейля лес пало дуйто дромескєрі сийра. ³² Авка кєрдя те о лєвіт. Сар подавля ко ода тган, дикгля ле ізмардес, ов обґейля лес ле сийрага. ³³ Пало ода дром преджялас і єкг самарянос. Ов дикгля одалес чорес і іґєн лес посаїндя. ³⁴ Ов подґейля, премордя лескєре рані олєйога і ле моляга, перепганкєрдя лен. А паліш тгодя лес про пескєро сомаріс, андя лес андре гостіно двовра і додикгєлас дуредер пал лесте. ³⁵ Про дуйто дівес, сар джялас одарік дуредер, іля аврі дуй дінарія, диня ле хулаєскє і пгендя: «Дикг пал лесте, а те розкєрега бутередер, та акор, сар вісалювава пале, вісарава тукє». ³⁶ Сар ту думінес, ко ачіля пашуно одале трінендар одалескє, саво попейляпес ле жіваненґє? ³⁷ Танітов Законоскєро отпгендя: — Ода, саво есас кє лесте їлескєро! Акор о Ісус пгендя лескє: — Джя, а те ту авка кєр.

Совґалніпе Марфакєро те ле Маріякєро

³⁸ Пало дром Ісус авля сікаденца андро єкг ґав. Одя есас єкг ромні про нав Марфа, саві преіля Лес андре пескєро кгєр. ³⁹ Ла есас пгєнь, сава вічіненас Марія. Ой бешелас пажо піндре ле Раєскє і шунелас, со Ов вакєрелас. ⁴⁰ А Марфа есас занято одалега, гой федер те кєрен о дийлос. Ой подґейля ко Ісус і пгендя Лескє: — Раєя, Тут на ердекєлінел, со мійрі пгєнь мукля саворі бувті пре манде єкга? Пген лакє, мі поможінел манґє! ⁴¹ Та о Рай лакє отпгендя: — Марфо, Марфо, ту старінестут бут сога і холярестут, ⁴² а кампел чак єкг. Марія іскіндя ода, со єкг федер, і ода на одлелапес латар.

Chapter 11

Ісус сікавел, сар те модліненпес

¹ Єкгвар, кана Ісус модлінеласпес про єкг тган і преачіля, акор єкг Лескєре сікадендар пгендя Лескє: — Раєя, сікав амен те модліненпес, сар Іоанн сікадя пескєре сікаден. ² Ов ленґє пгендя: — Кана модліненпес, пгенен авка: Даде, мі ашарелпес Тийро свентно нав! Мі авел Тийро Краліпе! ³ Маро амаро сакодівесескєро де аменґє про сако дівес! ⁴ Одмук аменґє амаре бійні, бо те амен одмукас саконескє, ко аменґє камел. І на пробалін амен аврі. ⁵ Паліш Ісус пгендя ленґє: — Пгенага, кє варекасте тумендар гін баратос, і ту джяга кє лесте про єпаш рат і пгенега лескє: «Баратона, де манґє про кейчен трін маре, ⁶ бо авля мійро баратос пало дром кє манде, і манґє нане, со лескє те ден». ⁷ Чі пгенела ов андрунестар: «Де манґє смійром! О вудар іма запганло, чаве мійре манца совен про тган, на бійрінав ме канакє те ушен і те ден тукє о маро»? ⁸ Пгенав туменґє, те ов на ушела і на дела лескє, со оне гіне барата, та важ ода, со ов на преачел те манґєн, ов ушела і дела лескє айці, кєці ов манґєл. ⁹ Важ ода Ме пгенав туменґє: манґєн — і дена туменґє, роден — і аракгєна, дуркінен — і пгутерена туменґє. ¹⁰ Бо сако, ко манґєл, худел, а ко родел, ода аракгєл, а одалескє, ко дуркінел, пгутерена. ¹¹ Чі аракгєлапес машкар туменде айсо дад, саво дела пескєре чаворескє ле сапес, кана ода манґєла мачі? ¹² Або, те ода манґєл о андро, дела лескє ле скарпіонос? ¹³ Те тумен сан подле, а джянен те ден пескєре чаворенґє лаче дарункі, та акор Нєбоскєро Дад минґ федер дела Свентне Духос одаленґє, ко Лестар манґєл!

Кгєр, саво розуладяпес, на тердьола аврі

¹⁴ Ачіля, со Ісус транля аврі ле нємоскєре дємон. І кана дємон авля аврі, мануш, саво есас нємо, завакєрдя. А о нийпос чудалінеласпес. ¹⁵ Та вареко лендар пгендя: — Ов традел аврі ле дємонен Вельзєвулоскєра зорага, хулай дємоненґєро! ¹⁶ Авер камле те пробалінен ле Ісус аврі і манґєнас Лестар, гой Ов мі сікавел ленґє знаменіє пало нєбос. ¹⁷ Та Ісус джянелас, пал состе оне думінен, і пгендя ленґє: — Сако краліпе, саво розуладо андрунестар, чувчісальола. І о кгєр, саво розуладяпес коркоро андре песте, перела. ¹⁸ Те о сатана коркоро андре песте розуладяпес, акор, сар тердьола аврі лескєро краліпе? Тумен вакєрен, со Ме Вельзєвулоскєра зорага традав аврі ле дємонен. ¹⁹ Те Ме Вельзєвулоскєра зорага традав аврі ле дємонен, акор тумаре чаве кага траден аврі лен? Важ ода оне ейна судзі туменґє. ²⁰ Те Ме Девлескєра зорага традав аврі ле дємонен, акор Краліпе ле Девлескєро авля кє туменде. ²¹ Кана зорало і міште оружоно мануш меркінел про пескєрі двовра, акор лескєро хулаїпе на проперела. ²² Та кана вареко, ко зораледер мануш, хутєла пре лесте і марела лес, акор залела лестар лескєро оружіє, про саво есас бійзошно о хулай, і акор розулавела лескєро хулаїпе. ²³ Ода, ко на Манца, ода джял протів Манде, і ко на іскідел Манца, ода розчівкєрел.

Шуладо аврі кгєр

²⁴ Кана нажувжо духос авел аврі ле манушестар, акор блудзінел пало біпанєскєре тгана і родел о тган те спочовінен, та на аракгєл лес. Акор ов пгенел: «Вісалювава ме андро кгєр, катар ме авльом аврі». ²⁵ Кана авел пале, акор аракгєл ода кгєр шуладо аврі і жувжо. ²⁶ Акор ов джял і лел пега авер ефта духі, саве минґ холяредер, сар ов. І кана оне авен, то ачен одя те джівен. І ода ачел минґ хужедер одалестар, со есас чірла.

Ко гіно бахтало

²⁷ Ісус минґ вакєрелас, кана єкг ромні ле буте нийпостар завріскіндя: — Бахталі оди дай, саві ловтярдя Тут і годовіндя Тут аврі! ²⁸ Ісус отпгендя: — Бахталедер одала, ко шунел Девлескєро лав і кєрел авка!

Ле Іонаскєро знаменіє

²⁹ Кана іскіденаспес минґ бутередер мануша, акор Ісус кєздиндя те вакєрен: — Када родос — подло. Оне чак роден знаменіє, та ода на делапес ленґє, чак о знаменіє ле Іонаскєро. ³⁰ Бо сар о Іона ачіля знаменьога прекал мануша андро Ніневія, авка ейла те о Ча ле Манушенґєро кадале родоскє. ³¹ Кралєвна югостар тердьола про судос кадале родоскєре манушенца і судзінела лен. Ой пало авер пгувакєро аґор авля те шунен Соломоноскєро ґодяверіпе. А канакє туменца аде Ода, Саво гіно баредер Соломоностар! ³² Мануша андал Ніневія тердьона про судос кадале родоскєре манушенца і засудзінена лен, бо оне покаїндепес, кана шунде Іонаскєре лава. А канакє туменца Ода, Ко баредер Іонастар!

Пало шветлос

³³ Кана вареко залабарел е лампа, на тговен ла те тердьол андро ґарудо тган або толо чаро, а чак про лампакєро тган, гой одала, саве заавен, мі дикгєн о шветлос. ³⁴ Тийрі якг — лампа тийре тєлоскє. Кана якг тийрі жувжі, акор цейло тийро тєлос ейла пгердо ле шветлога. Те кє туте тийрі якг подло, акор те саворо тийро тєлос ейла цма. ³⁵ Важ ода дикг, гой шветлос, саво андре туте, те на ейл цма. ³⁶ Те тийро саворо тєлос пгердярдо ле шветлога і нане андре лесте нісаві цма, акор саворо тєлос ейла шветло, авка, сар кана е лампа ошвецінел тут пескєре віланіга.

Ісус судзінел буджяндіпе фарісєйсько те Законоскєре танітовен

³⁷ Кана Ісус авка вакєрелас, єкг фарісєй вічіндя Лес кє песте про дийлос. Ісус авля і захундя о тган пажо скамін. ³⁸ Фарісєй чудаліндяпес, кана дикгля, со Ісус на мордя о васта анґлал о хавібе. ³⁹ Акор о Рай лескє пгендя: — Тумен, фарісєї, жувжарен кувча те о чаре аврунестар, а андрунестар тумен пгерде сан гамішаґога а те подліпнага. ⁴⁰ Дилине! Чі Ода, Ко кєрдя аврунескєро, на кєрдя те андрунескєро? ⁴¹ Ода, со андрунесте, ден сар мілостиня, і акор саворо прекал туменде ейла жувжо! ⁴² Біда туменґє, фарісєї! Тумен анен дештато котор андал е мята те андал е рута і андал шільяко чар, а чачібе те Девлескєро камібен тумен обджян! Кампел те кєрен те ода, та наший те бістерен те пало дуйто. ⁴³ Біда туменґє, фарісєї! Тумен камен те бешен про єкг федер тгана андре сінаґоґа і камен, кана туменґє палікєрен про піяціс. ⁴⁴ Біда туменґє! Тумен маренпес про нєобозначіме гробі, пал саве пгірен о мануша і на джянен пал ода! ⁴⁵ Акор єкг танітов Законоскєро пгендя Лескє: — Танітов, Ту Тийре лавенца шіртинес те амен. ⁴⁶ Ісус отпгендя: — Біда туменґє, танітова Законоскєре! Тумен тговен про мануша пгарібена, саве пгарес те гординен, а тумен коркоре ані анґуштега на дотговена ко ода. ⁴⁷ Біда туменґє! Тумен строїнен памятніка ле пророкенґє, савен тумаре дада мурдарде. ⁴⁸ Одалега тумен сікавен, со подлікєрен ода, со кєренас тумаре дада. Оне мурдарнас ле пророкен, а тумен строїнен ленґє памятніка. ⁴⁹ Важ ода ґодяверіпе Девлескєро і пгендя: «Бічавава Ме ленґє ле пророкен те ле апостолен, єкгє лендар мурдарена, а дуйтонен лендар традкєрена». ⁵⁰ Важ ода дадівесескєре родостар пгучелапес важо рат саворе пророкенґєро, саво есас чьордо отканастар сотворіме есас о светос, ⁵¹ ле Авельоскєре ратестар джі ко Захаріяскєро рат, саво есас мурдардо машкар о алтаріс те о храмос. Га, пгенав туменґє, адале родостар пгучелапес важ саворо. ⁵² Біда туменґє, Законоскєре танітова! Тумен заілян е клєя ґодяверіпнастар; та коркоре на заґейлян, а те одаленґє, ко заджялас, на динян. ⁵³ Кана Ісус авля аврі андал о кгєр, танітова Законоскєре а те о фарісєї кєздинде те худенпес кє Лесте і бут со пгучкєренас Лестар. ⁵⁴ Оне камле те худен Лес про лав.

Chapter 12

Меркіненпес ле буджяндіпнастар

¹ Андре оди овра іскіндепес іґєн бут нийпос авка, гой кікіденас єкг аврес. Ісус кєздиндя те вакєрен єкгвар ко Пескєре сікаде: — Меркіненпес фарісєйсько закваскатар, саві гіні буджяндіпе. ² Нане ніч ґарудо, со паліш те на увлягас пгутердо, ані нане ніч, со човрал пес кєрел, гой паліш те на пгутерелпес аврі. ³ Ода, со тумен вакєрен андре цма, шунена про шветлос, а со ціхонес пгендян андре андруні соба, ейла розвакєрдо пало кгєрескєре пади.

Даранпес чак ле Девлестар

⁴ Пгенав туменґє, Мійре баратенґє: на даран одалендар, ко мурдарел тєлос, і бутер ніч на бійрінел те кєрен. ⁵ Ме пгенава туменґє, Кастар те даран: даран Одалестар, кє Касте гін влада те мурдарен і те чівен андре ґєєна. Га, пгенав туменґє, Лестар даран. ⁶ Чі на панч цікне чірікле бікєнен важо дуй цікне копейкі? Та ані єкг лендар нане бістердо ле Девлега. ⁷ А кє туменде те о бала про шейро гіне прееґєнде! На даран, бо тумен кучедер ле буте чіріклендар.

На ладжянпес ле Ісусостар

⁸ Пгенав туменґє: саконес, ко пгутердонес прінджярел Ман анґлал о мануша, одалес те о Ча ле Манушенґєро прінджярела анґлал анґєла ле Девлескєре, ⁹ а ко отпгенелапес Мандар анґлал о мануша, одалестар те Ме отпгенавапес анґлал анґєла ле Девлескєре. ¹⁰ Саконескє, ко пгенела хоч єкг лав налачо про Ча ле Манушенґєро, одмукєлапес. А одалескє, ко вакєрела джюнґіпе про Свентно Духос, одалескє на одмукєлапес. ¹¹ Кана анена тумен про судос андре сінаґоґі, ко пгуредера те ко владара, на думінен пало ода, сар туменґє кампел те заачен важ песте або со туменґє те вакєрен. ¹² Свентно Духос андре оди овра сікавела тумен, со кампел те вакєрен.

Вакєрібе пало наґодявер барвало мануш

¹³ Вареко ле нийпостар пгендя Лескє: — Танітов, пген мійре пгралескє, гой ов те розулавел манца ода, со мукляпес аменґє амаре дадестар. ¹⁴ Та Ов лескє отпгендя: — Манушея, ко Ман тгодя, гой Ме те авав судзас туменґє або те розулавав варесо машкар туменде? ¹⁵ І Ов пгендя ленґє: — Дикгєн, гой тумен те на авен бокгмарде. Сар те на увлягас барвало о мануш, лескєро джівіпе одалестар нане завісімо. ¹⁶ Ов розвакєрдя ленґє єкг вакєрібе: — Ко єкг барвало мануш есас баро увліпен пре маля. ¹⁷ Ов думінелас андре песте: «Со манґє те кєрен? Нане ман, кай те іскідав саворо увліпе». ¹⁸ І пгендя: «Кєрава авка: пгаґєрава мійре шопі і кєрава баредер, і акор іскідава одя мійро саворо дів і саворо мійро барваліпе. ¹⁹ Акор пгенава пескє: "Джівіпе мійро, канакє кє туте бут барваліпе про бут берша! Кгіню, ха, пій і радисалю!"» ²⁰ Та о Дейл лескє пгендя: «Ту наґодявер! Дадіве раті залена тутар тийро джівіпе. Акор каскє ачела саворо, со ту кійсітиндял?» ²¹ Авка ейла саконега, ко іскідел барваліпе прекал песте, а на барвальол пріґ о Дейл.

На даран пал тумаро джівіпе

²² Паліш пгендя Ісус Пескєре сікаденґє: — Важ ода пгенав туменґє: на даран пал тумаро джівіпе, со туменґє те хан, ані пал пескєро тєлос, андре состе туменґє пес те кіден. ²³ Джівіпе кучедер ле хавібнастар, і тєлос важнедер голмендар. ²⁴ Дикгєн про човкі: оне на шіїнен ані на іскіден; нане лен коморі ані о шопі, та о Дейл дел лен те хан. Та тумен кучедер одале чіріклендар! ²⁵ Ко тумендар, сар те на пережівінел, бійрінел те доден ко пескєро джівіпе хоча єкг оврі? ²⁶ Те тумен на бійрінен минґ када те кєрен, акор, со тумен думінен пало авер? ²⁷ Дикгєн про лілії, сар оне барон: оне бувті на кєрен, ані на сівен. Та пгенав туменґє, со минґ о Соломон андре саворі пескєрі слава на кіделаспес авка, сар єкг лендар. ²⁸ Те о Дейл авка кідел е чар пре маля, саві дадіве гіні, а тайса ла чівена андре яґ, та чі на кідела Ов те тумен, фріма патябнаскєре? ²⁹ На думінен пало ода, со туменґє те хан, со те пієн, на пережівінен пало ода. ³⁰ Бо када саворо роден нийпа светоскєре, а тумаро Дад джянел, со тумен нуждиненпес андро ода. ³¹ Єкг федер роден Лескєро Краліпе, і ода саворо доделапес минґ туменґє. ³² На дара, цікно стадос! Бо тумаро Дад коркоро камля те ден туменґє Краліпе! ³³ Бікєнен тумаро барваліпе і розден ле чоренґє. Кєрен пескє айсе тарці, саве на гординенпес тейле, барваліпе саво на фрімісальол, одя, кай о човрашіс кє ленде на подджял, а о кірме на хана лен опре. ³⁴ Бо одя, кай тумаро гіно барваліпе, одя ейла те тумаро їло.

Вакєрібе пало лачо совґас

³⁵ Авен міндик кійсітиме: голмі про дерекос препганле, і тумаре лампі мі лабон. ³⁶ Авен сар мануша, саве ужарен ле хулай, кана авела пало біяв, і кана авела і дуркінела, акор єкгваресте лескє пгутерена. ³⁷ Бахтале одала совґі, каскєро хулай, кана вісальола, аракгєла лен, со оне на совен. Чачібе пгенав туменґє, ов коркоро препгандела дерекос і сікавела ленґє тган пажо скамін і кєздинела ленґє те совґалінен. ³⁸ Бахтале одала, ко на совела акор, кана ов авела про єпаш рат, чі анґлал ода, сар дівісальол. ³⁹ Джянен, гой те джянлялас о хулай ле кгєрескєро, андре саві овра авела човрашіс, ов на домуклялас лескє те заджян андро пескєро кгєр. ⁴⁰ Те тумен маїнен тейн кійсітиме, бо о Ча ле Манушенґєро авела андре айсі овра, кана тумен на ужарена пре Лесте. ⁴¹ Акор пгучля Лестар о Петро: — Раєя! Ту вакєрес када вакєрібе чак аменґє вай саворенґє? ⁴² Рай лескє отпгендя: — Акор ко ейла патівало і ґодявер управітеліс, савес о хулай тгодя про саворе авер совґі, гой кана авела овра те роздел ленґє о маро? ⁴³ Бахтало ода совґас, савес лескєро хулай, кана авела, аракгєла, со кєрел авка. ⁴⁴ Чачібе пгенав туменґє, со ов допатяла лескє саворо пескєро хулаїпе. ⁴⁵ Та те ода совґас пгенела андро пескєро їло: «На сіґ авела мійро хулай», — і кєздинела те марен ле совґен те ле совґалкінєн, те хан, те пієн і те мулатинен, ⁴⁶ авела лескєро хулай андро ода дівес, кана ов на ужарел, а те андре оди овра, кана ов на джянел. Акор чінґєрела лес про єпаш і опреділінела лескє тган біпатябнаскєренца. ⁴⁷ Ода совґас, саво джянелас хулаєскєрі воля і на есас кійсітиме, і на кєрелас ода, со камелас хулай, мардьола іґєн бут. ⁴⁸ А ода, саво на джянел, а кєрел айсо, со засовґалінел, гой лес те покарінен, ейла мардо фрімедер. Одалескє, каскє есас дино бутередер, одалестар бутередер пгучена. І каскє есас бут допатянло, кадалестар бутередер те пгучена.

Мануша враждинен машкар песте важо Ісус

⁴⁹ Ме авльом яґ те анен пре пгув, і сар Ме камльомас, гой ов іма те розлабол! ⁵⁰ Та Манґє минґ кампел те преджян болавіпе; і сар Манґє пгарес, адик ода на ачела! ⁵¹ Тумен думінен, со Ме авльом те анен мірос пре пгув? Наа, пгенав туменґє, на мірос, но розулавіпе. ⁵² Чаладос панч манушендар розулавелапес, трінджяне некі дуєджяненґє, дувджяне некі трінджяненґє. ⁵³ Розулавелапес о дад ле чага і о ча ле дадега; а е дай — ле чайорага, а е чай — ле даяга; сасуй — боврага, а е боврі — ле сасага.

На прінджярен векоскєро знаменіє

⁵⁴ Ісус пгендя те ле нийпоскє: — Кана тумен дикгєн, со вазделпес хмара западостар, тумен єкгваресте пгенен: «Ейла брішинд», — і чачес, перел брішинд. ⁵⁵ А кана пгурдел барвал югостар, тумен пгенен: «Ейла іґєн татес», — і ачел авка. ⁵⁶ Буджянде! Ода, со ачел пре пгув а те про нєбос, тумен прінджярен, акор соске тумен на джянен, сар те прінджярен оди оврі? ⁵⁷ Соске тумен коркоре на розсудзінен, андре состе чачібе? ⁵⁸ Кана ту джяс тийре врагога ко начальнікос, постарінтут те пріміріненпес лега, адик сал лега минґ про дром, а те на, та акор ов анела тут ко судзас, а о судзас отдела тут сторожіскє, а ода чівела тут андре тюрма. ⁵⁹ Пгенав тукє: на авега одарік аврі, адик на отдега лескє саворо джі кє єкг копейка.

Chapter 13

Те на покаїненапес, акор мерена

¹ Андре оди овра авле варесаве мануша і розвакєрде Лескє пало галілєянє, савен Пілат диня преказіс лен те мурдарен, кана оне аненас е жертва. ² Пре када Ісус ленґє пгендя: — Тумен думінен, гой кадала галілєянє есас єкг бійношнедер саворендар андре Галілєя, со авка пострадинде? ³ Пгенав туменґє: Наа! Та те на покаїненапес, акор те тумен авка саворе мерена. ⁴ А адала дешуохто мануша, пре саве пейля башня андро Сілоам і мурдардя лен? Чі тумен думінен, со оне санас єкг бійношнедер андро Єрусалім? ⁵ Пгенав туменґє: Наа! Та те на покаїненапес, акор те тумен саворе авка мерена. ⁶ Паліш розвакєрдя ленґє єкг вакєрібе: — Ко єкг мануш андро дракгєнґєро садос баролас єкг інжіріко дубос. Єкгвар ов ґейля те роден, чі нане пре лесте плодос, та ніч на аракгля. ⁷ Акор ов пгендя ле дракгаріскє: «Іма тріто берш ме авав аде, гой те аракгєн плодос пре када інжіріко дубос, та на аракгав. Чінґєр лес тейле, соске ов захудел е пгув?» ⁸ Та ов отпгендя Лескє: «Хулай, мук лес минґ пре єкг берш. Ме обкопалінава лес і обтговава ле гнойога. ⁹ Те про авер берш анела о плодос, акор міште. А те на анела, акор ту чінґєрега лес тейле».

Ісус сасарел ле ромня сомбатоне

¹⁰ Сомбатоне Ісус сікавелас андре єкг сінаґоґа. ¹¹ Одя есас ромні, андре саві есас духос насвалкєрдо, ой есас ізбандярді і на бійрінелас те ровняренпес аврі дешуохто берш. ¹² Сар дикгля ла о Ісус, вічіндя ла і пгендя лакє: — Ромніє! Ту сал свободно тийре насвалібнастар! ¹³ Ов тгодя пре лате о васта, і ой єкгваресте ровнярдяпес аврі і ачіля те ашарен ле Девлес. ¹⁴ Та пгуредерес пре сінаґоґа іґєн розхолярдя ода, со Ісус сасардя сомбатоне, і ов пгендя ле нийпоскє: — Гін шов дівес, андре саве шай те кєрен. Андре адала дівеса авен і сасаренпес, а на сомбатоне. ¹⁵ Про ода Рай лескє отпгендя: — Буджянде! Чі на отпганден тумен сомбатоне андал о хлівос пескєре ґурувес чі ле сомаріс і на ліджян лес те поїнен? ¹⁶ Ой гіні ле Авраамоскєрі чай, сава о сатана лікєрелас іспганля іма дешуохто берш. Чі на кампіля лакє те пгутерен ланці андре сомбатоскєро дівес? ¹⁷ Кана Ов пгендя када, саворенґє, ко джялас протів Лесте, ачілепес те ладжян, а саворо нийпос радисальолас славне бувтякє, со Ов кєрелас.

Вакєрібе пало Девлескєро Краліпе

¹⁸ Паліш Ов пгендя: — Пре состе пес марел Краліпе ле Девлескєро? Сога шай лес те зровнярен? ¹⁹ Ов сар горчічно дів, саво іля о мануш і шіїндя андро пескєро садос. Дів баріля, і кєрділяпес лестар о дубос, і о чірікле нєбоскєре ачіле те джівен андре лескєре конаркі. ²⁰ Ов минґ пгендя: — Пре состе пес марел Краліпе ле Девлескєро? ²¹ Ода сар дрожі, саве іля е ромні і дювріндя хумер андре трін баре чаре, гой саворо те барол опре.

Узкі капура

²² Сар лікєрелас дром андро Єрусалім, Ісус преджялас пало фоврі те пало ґава і сікавелас ле нийпос. ²³ Вареко Лескє пгендя: — Раєя, со, чак набутджяне ейна ратиме? Ов ленґє пгендя: ²⁴ — Старіненпес те заавен пріґ узкі капура. Пгенав туменґє: бутджяне пробалінена те заджян, та на бійрінена. ²⁵ Кана о хулай ле кгєрескєро ушела і запгандела о вудар, акор тумен тердьона аврунестар, дуркінена андро вудар і вакєрена: «Раєя! Пгутер аменґє!» Акор Ов туменґє пгенела: «На джянав тумен, катар сан». ²⁶ Акор тумен пгенена: «Амен хагас те піягас анґлал Туте, і Ту сікавегас амен пре амаре уці». ²⁷ Та Ов отпгенела: «Ме на джянав тумен, катар сан. Отджян Мандар саворе, ко кєрел подліпе!» ²⁸ Одя ейла ровібе і рандена ле данденца, кана тумен дикгєна ле Авраам, ле Ісаак, ле Яковс те саворен пророкен андро Краліпе ле Девлескєро, а коркоре тумен ейна транле аврі. ²⁹ Авена мануша пало восток і запад, і пало север і юг, і акор бешена про біяв андро Краліпе ле Девлескєро. ³⁰ І палуне ейна перше, а перше ейна палуне.

Ісус ровел пало Єрусалім

³¹ Акор ко Ісус подавле варесаве фарісєї і пгенде: — Джя адарік, бо Ірод камел Тут те мурдарен. ³² Ісус отпгендя ленґє: — Джян і пгенен одала ліскакє: «Дадіве і тайса ме традав ле дємонен і сасарав ле манушен, а про тріто дівес Ме докєрава Мійрі бувті». ³³ Дадіве, тайса і палтайсаскєро Ме маїнав те джян дуредер, важ ода кай пророкос наший мерел на андро Єрусалім. ³⁴ Єрусалім, Єрусалім! Ту мурдарес ле пророкен і ле баренца марес бічаден кє туте! Кєцівар Ме камльом те іскіден тийре чаворен авка, сар чірікло іскідел пескєре чіріклорен толо пескєре кридлі, та тумен на закамлян! ³⁵ Канакє тумаро кгєр ачелпес туменґє чувчо! Пгенав туменґє, со тумен Ман бутер на дикгєна, адик на пгенена: «Ашаріпе Одалескє, Ко авел андро Раєскєро нав!»

Chapter 14

Со шай те кєрен сомбатоне

¹ Єкгвар сомбатоне ачіля авка, гой Ісус заавля андро кгєр ко єкг баредер фарісєй про дийлос, а оне дикгєнас пал Лесте. ² Анґлал Ісус бешелас о мануш, насвало про панєскєро насвалібе. ³ Акор Ісус пгучля ле танітовен Законоскєрен те ле фарісєєн: — Чі шай те сасарен сомбатоне, вай наа? ⁴ Оне ціхісаліле. Акор Ісус хундяпес ко мануш, сасардя лес і одмукля лес. ⁵ Паліш Ов ленґє пгендя: — Те кє варекасте тумендар о чаворо чі ґурув перела андре ханік, чі тумен на цірдена лес аврі єкгваресте, те ода ейла сомбат? ⁶ Оне ніч на бійрінде пре када те отпгенен.

Федер кіден аврі туменґє палуне тгана

⁷ Акор Ісус кєздиндя те вакєрен о вакєрібе ко ізвічіме мануша, бо дикгля, сар сако пескє роделас анґлуне тгана. Ов пгендя ленґє: ⁸ — Кана тут вареко вічінела про біяв, на беш про першо тган, бо шай ачел авка, гой машкар вічіме гіно вареко, ко патіваледер, сар ту. ⁹ І акор о хулай, саво вічіндя тут те лес, подавела кє туте і пгенела: «Одмук о тган кадале манушескє». І тукє кампела андре ладж те захуден єкг палуно тган. ¹⁰ Важ ода, кана тут вічінен, джя, беш тукє палал, гой о хулай мі подавел і те пгенел тукє: «Баратона, преджя про федер тган». Акор ейла тукє сікадо баро патів анґлал саворе гості. ¹¹ Бо сако єкг, ко вазделпес опре, дикгєна лес тейле, а ко дикгєлапес тейле, ода ейла ваздно опре. ¹² І акор Ісус пгендя ле хулаєскє: — Кана кєрес о дийлос чі раті, на вічін пескєре баратен, ле пгрален, ані пескєро файтос, ані ле барвале сомсійден, важ ода гой оне паліш тут те на вічінен і авка туга те на потіненпес аврі. ¹³ Кана ту кєрега гостіна, вічін пре лесте ле чорен, калікєн, банґєн, ле корен. ¹⁴ Акор ту ейга бахтало, бо оне на бійрінен те вісарен тукє, і ту худега награда, кана чачібнаскєре джівдісальона.

Вакєрібе пале барвалі гостіна

¹⁵ Кана єкг одалендар, саве ханас о дийлос, шундя када, ов пгендя ле Ісусоскє: — Бахтало ода, ко хала о маро андро Краліпе ле Девлескєро! ¹⁶ Ісус лескє пгендя: — Єкг мануш кєрдя барі гостіна і вічіндя бутджянен. ¹⁷ Кана авля овра, гой те бешен пажо скамін, ов бічадя пескєре совґас ко вічіме те пгенен: «Авен, бо іма саворо кійсно». ¹⁸ Акор саворе сар єкг кєздинде те отпгененпес. Першо лескє пгендя: «Ме ціндьом е малі, і манґє кампел те джян те дикгєн ла. Манґав тут, пребачін манґє». ¹⁹ Дуйто пгендя: «Ме ціндьом панч парі ґурува і канакє джяв те пробалінен лен аврі. Манґав тут, пребачін манґє». ²⁰ Тріто пгендя: «Ме ільом манґє ромня і важ ода на бійрінав те авен». ²¹ О совґас вісаліля і розвакєрдя саворо пескєре хулаєскє. Акор о хулай ле кгєрескєро холісаліля і пгендя ле совґаскє: «Джя сіґєредер пало баре те пало цікне уці і ан аде ле чорен, ле калікєн, ле корен те банґєн». ²² І пгендя о совґас: «Хулай, саворо кєрдьом авка, сар ту манґє пгендял, та гін минґ аде о тгана». ²³ Акор пгендя о хулай ле совґаскє: «Джя пало дрома те пало саворе аґора фовроскєре і преманґ саворен, те авен пре гостіна, гой мієл пгердо мійро кгєр. ²⁴ Пгенав туменґє, гой одале манушендар, савен ме вічінавас анґлал ада, ніко на хала манца о дийлос».

Ко шай авел ле Ісусоскєро сікадо

²⁵ Ле Ісусога джянас бут мануша, і Ов вісаліля кє ленде і пгендя: ²⁶ — Те вареко авел кє Манде, но камел пескєре дадес, да, ле ромня, ле чавен, ле пгрален, ле пгєнєн, а минґ пескєро джівіпе бутер, сар Ман, ода наший ейл Мійро сікадо. ²⁷ Ода, ко на ліджял пескєро кєрестос і на авел пал Манде, наший ейл Мійро сікадо. ²⁸ Представінен туменґє, со вареко тумендар камел те строїнен е башня. Чі на бешела ов анґлал і на подиґєнела, кєці лестар джяна о лове, чі гін лес айці, гой те доліджян ко аґор оди бувті? ²⁹ Бо сар ов тговела фундаментос, а дуредер на бійрінела те докєрен стройка ко аґор, акор саворе, ко дикгєла ода, асана лес аврі. ³⁰ І пгенена: «Хундял те строїнен, а те доліджян ко аґор на бійрінел». ³¹ Саво краліс, кана джял про марібе про авер краліс, на бешела анґлал, гой те обвакєрен, чі шай джял ов деш езеренца про ода, саво джял пре лесте біше езеренца? ³² Те наший джял, та кана ода минґ дур, бічавел пескєре манушен те манґєн пало мірос. ³³ Авка те ода ко тумендар на отпгенелапес саворестар, со лес гін, наший ейл Мійро сікадо. ³⁴ Лон гіно лачо, но кана лон нашавел пескєро лондіпе, акор, со шай тє кєрен ле лондіпнага? ³⁵ Ой нане валовшно ані андре пгув, ані андре гнойоскєрі копа, а чак те чівен ла аврі. Кас гін кгана те шунен, мі шунел!

Chapter 15

Вакєрібе пало нашадо бакро

¹ Ле Ісус авенас те шунен саворе, ко іскіделас налогі, те авер бійношне мануша. ² А фарісєї те танітова Законоскєре дудріненас і вакєренас: — Ов прелел бійношне манушен і хал андре єкг ленца. ³ Акор Ов розвакєрдя ленґє єкг вакєрібе: ⁴ — Пгенага авка, со кана кє туменде гін шел бакре і єкг лендар нашадяпес. Чі на мукєла ов ейнявардеш те ейня андре пустиня і чі на джяла те роден ола, саві пес нашадя, джі акор, адик на аракгєла? ⁵ Кана ов аракгєла ла, акор ле радишаґога лела ла про пескєре пійкє. ⁶ І кана авела кгєйре, вічінела пескєрен баратен те сомсійден і пгенела ленґє: «Радисальон манца, бо ме аракгльом мійре нашаде бакрес!» ⁷ Пгенав туменґє, со про нєбос ейла бутер радишаґос важо єкг бійношно мануш, саво пес каїнел, сар важо ейнявардеш те ейня чачібнаскєре, саве на нуждиненпес андро покаяніє.

Вакєрібе пало нашаді драхма

⁸ Те кє ромні гін деш драхмі, і ой нашавела єкг лендар, чі на залабарела лампа, чі на шулавела аврі саворо кгєр, чі на родела, адик на аракгєла ла? ⁹ А сар аракгєла ла, вічінела пескєре камараткен те ле сомсійден і пгенела: «Радисальон манца, бо ме аракгльом драхма, саві ме нашадьом!» ¹⁰ Канакє Ме пгенав туменґє, со Девлескєре анґєла радисальон важо сако єкг бійношно мануш, саво пес каїнел.

Вакєрібе пало нашадо чаворо

¹¹ Ісус дуредер вакєрелас: — Ко єкг мануш есас дуй мурша. ¹² Тернедер пгендя ле дадескє: «Даде, де манґє мійро котор барваліпнастар, саво ейла мійро». Акор о дад розуладя машкар ленде о хулаїпе. ¹³ Пріґ варесаве дівеса тернедер чаворо іскіндяпес і ґейля дур пре авер пгув. Одя ов розкєрдя саворо пескєро барваліпе, авка сар ліджялас тровґеріко джівіпе. ¹⁴ Кана кє лесте іма на ачіляпес ніч, пре оди пгув кєздиндяпес барі бокг, і ов ачіля андро баро чоріпе. ¹⁵ Акор ов ґейля і манґляпес пре бувті ко єкг мануш, саво джівелас пре оди пгув, а ов бічадя лес пре пескєре маля те додикгєн пало бале. ¹⁶ Ов авка бокгальолас, кай радо есас те пгердярен пескєрі дьомра ле ціпенца, саве денас ле баленґє, та лескє минґ те ода на денас. ¹⁷ Кана ахаліля, со кєрдя, пгендя: «Кєці гін бувтякєре андро кгєр ко мійро дад, і кє ленде те хан пгердо, а ме аде мерав ле бокгатар! ¹⁸ Ушава, джява манґє ко мійро дад і пгенава лескє: "Даде! Кєрдьом бійнос анґлал о нєбос те анґлал туте. ¹⁹ Ме бутер на сом достойно те вічіненпес тийре чаворега. Ліджяпес манца авка, сар єкгєга пескєре совґендар"». ²⁰ Ов ушіля і ґейля ко пескєро дад. Кана ов есас минґ дур, дад дикгля і іґєн фес посаїндя ле чаворес. Ов подденашля кє лесте, обхундя і кєздиндя те чумідкєрен лес. ²¹ О ча лескє пгендя: «Даде! Кєрдьом бійнос анґлал о нєбос те анґлал туте. Ме бутер на сом достойно те вічіненпес тийре чаворега». ²² Та о дад пгендя пескєре совґенґє: «Джян сіґєредер, анен єкг федер голмі і кіден лес. Тговен анґрушні про лескєро анґушто і урен лес андро камашлі. ²³ Анен годовіме целятос, дочінен лес. Канакє хага те радисалювага! ²⁴ Бо када мійро чаворо есас мувло, а канакє джівдо, нашліля, а канакє аракгляпес!» І оне кєздинде те радисальон. ²⁵ А пгуредер ча есас акор пре маля. Кана ов подавля пашедер ко кгєр, шундя ґіля те о кгелібе. ²⁶ Ов вічіндя єкгєс совґас і пгучля лестар: «Со пес аде обачіля?» ²⁷ Ов лескє пгендя: «Тийро пграл авля, і тийро дад дочіндя годовіме целятос, бо лескєро ча вісаліля джівдо те здраво». ²⁸ Та пгуредер ча холісаліля і на камелас те заджян андро кгєр. Акор о дад авля аврі і преманґєлас лес. ²⁹ Та ов отпгендя пескєре дадескє: «Ме айці берш кєравас пре туте, сар совґас, і міндик кєравас ода, со ту манґє пгенегас. Ту ніґда на динял манґє минґ козльонкос, гой ме те радисалював ле баратенца. ³⁰ А сар вісаліля акада тийро чаворо, саво прехаля саворо тийро барваліпе ле лубнєнца, ту дочіндял прекал лесте годовіме аврі целятос!» ³¹ Та о дад лескє пгендя: «Чаворея, ту сал міндик манца, і саворо, со гін кє манде, ода саворо тийро. ³² Амен маїнас те кгєлен і те радисальон, бо тийро пграл есас мувло, а канакє джівдо, есас нашадо, а канакє аракгляпес!»

Chapter 16

Вакєрібе пало напатівало бувтяріс

¹ Ісус пгендя Пескєре сікаденґє: — Есас єкг барвало мануш. Кє лесте есас єкг бувтяріс, саво ліджялас бувті андро лескєро хулаїпе. Єкгвар лес обвінінде, со ов розкєрел хулаїпе пескєре хулаєс. ² Акор ода хулай вічіндя лес і пгендя лескє: «Со када ме шунав пал туте? Ізде пескєрі бувті. Ту іма на дикгєга пал мійро хулаїпе». ³ Ода бувтяріс подуміндя: «Со канакє манґє те кєрен? О хулай чівел ман тейле пале бувті. Те джян, те ваїнен нане ман зор, а те манґавкєрен ладжявман. ⁴ Канакє джянав, со кампел те кєрен, гой вареко мі лел ман кє песте андро кгєр, кана ачава бі е бувті». ⁵ Акор ов кєздиндя те вічінкєрен саконе єкгєс, ко ачіля те камен лескєре хулаєскє. Ов пгучля першонестар: «Кєці ту камес мійре хулаєскє?» ⁶ Ода отпгендя: «Шел гордова олівково олєйос». Бувтяріс пгендя лескє: «Ле тийрі розпіска, і сіґєредер беш і пісін пенда». ⁷ Паліш пгендя те дуйтонескє: «А ту кєці камес?» Када отпгендя: «Езерос ґовне дів». Те лескє пгендя: «Ле тийрі розпіска, а пісін охтошел». ⁸ І хундя хулай те ашарен біпатівакєре бувтяріс, важ ода кай ов авка ґодяверонес кєрдя. Кале векоскєре чаве федер пес ахальон, сар те ліджянпес ле манушенца, сар о чаве ле шветлоскєре. ⁹ Ме туменґє пгенав, аракгєн пескє ле баратен нажувже барваліпнага, гой, кана лес на ейла, мі прелен тумен андро вечне кгєра. ¹⁰ Ко патівало андро цікно, ода патівало те андро баро, а ко напатівало андро цікно, ода напатівало те андро баро. ¹¹ Те тумен андро нажувжо барваліпе на санас патівале, акор ко туменґє допатяла чачуно? ¹² Те тумен на санас патівале андро цузо, акор ко дела туменґє тумаро? ¹³ Нісаво совґас наший совґалінел дує хулаєнґє. Ов єкгєс кєздинела те мержінен, а дуйтонес камела, або єкгєга ліджялапес патівалонес, а дуйтонес дикгєла тейле. Тумен наший совґалінен те ле Девлескє, те ле барваліпнаскє. ¹⁴ Фарісєї, саве каменас о лове, шуненас саворо ода і асанас ле Ісусостар. ¹⁵ А Ісус ленґє пгендя: — Тумен тговенпес аврі анґлал о мануша, со тумен сан чачібнаскє, та о Дейл джянел тумаре їле. Ода, со мануша цінінен, джюнґіпе андро Девлескєре якга.

Ісус вакєрел пало Девлескєро Законос

¹⁶ Законос те о пророка есас джі ко Іоанн, а акадала овратар вакєрелпес Радишаґоскєро Гійрос пало Краліпе ле Девлескєро, і сако дотговел пескєрі зор, гой те заджян андре лесте. ¹⁷ Сіґєредер о нєбос те е пгув проперена, сар кана хоч єкг чорточка нашльола андало Законос! ¹⁸ Сако єкг, ко мукєл пескєра ромня, а паліш лел пескє авра ромня, кєрел лубіпен. І сако єкг, ко лел пескє ромня, саві розґейляпес пескєре ромега, кєрел лубіпен.

Барвало те о Лазар

¹⁹ Есас єкг барвало мануш. Ов кіделаспес андре єкг кучедер і андро єкг раїканедер голмі і сако дівес іґєн мулатинелас. ²⁰ Одя есас єкг чоро мануш про нав Лазар, саво пашльолас паж лескєрі капура, а ле насвалібнастар на есас жувжо тєлос пре лесте. ²¹ Ов іґєн камелас те чальон ле которенца пало скамін, кай бешелас барвало. Руконе авенас і чаркєренас лескє рані. ²² Ачіляпес, со мувля чоро мануш, і одліґєнде лес о анґєла пашес ко Авраам. Мувля те о барвало, те лес парунде. ²³ Кана барвало есас андро адос, андре барі дукг, ов ваздня пескєре якга і дуралестар дикгля ле Авраам, а паж лесте те ле Лазар. ²⁴ Ов завріскіндя і манґляпес: «Даде Авраам! Посаїн ман і бічав ле Лазар, мі ціндярел пескєро анґушто андро пані, гой те шілісальол манґє е чіб, бо ме аде мучінавпес андре аді яґ». ²⁵ Та Авраам отпгендя: «Чаворея! Лепер, ту іма хундял са лачо андро тийро джівіпе, а Лазар дикгля єкг подліпе. Канакє ов аде радисальол, а ту семвединес. ²⁶ Та те авка машкар аменде гіні барі ховр, і важ ода, ко камел те преджян адарік кє туменде, на бійрінел, а те одарік кє аменде на авен». ²⁷ Барвало пгендя: «Акор ме тут іґєн манґав, дадорея, бічав ле Лазар ко мійро дадескєро кгєр, ²⁸ бо кє манде минґ гін панч пграла. Мі джял, мі пгенел ленґє анґлал, гой те оне те на поперен андре ада мучішаґоскєро тган». ²⁹ Авраам лескє отпгендя: «Кє ленде гін Моїсєй те о пророка, лен мі шунен». ³⁰ Та ов лескє пгендя: «Наа, даде Авраам, те вареко ле мувлендар авела кє ленде, покаїненапес». ³¹ Про ода Авраам лескє отпгендя: «Те оне ле Моїсєй те ле пророкен на шунен, та хоч ушілялас вареко опре ле мувлендар, оне те авка на патяна».

Chapter 17

Сар те одмукєн бійнос, те патян і те совґалінен

¹ Ісус пгендя ко пескєре сікаде: — Андро светос міндик ейла ода, со ле манушен цірдел ко бійнос, та біда одалескє, прекал касте ода авел. ² Федер увлягас, гой лескє те фійґінен мельнічно бар андре мен і те чівен лес андро морьос, сар спокушінела хоча єкгєс кадале цікнендар. ³ Меркінен пал туменде. Те кєрела тийро пграл бійнос, повакєр лега, а те покаїнелапес, одмук лескє. ⁴ Минґ те ефтавар про дівес кєрела о бійнос протів туте і ефтавар про дівес манґєла тутар, гой те одмукєс лескє, і пгенела тукє: «Каїнав ман», — одмук лескє. ⁵ Апостоли пгенде ле Раєскє: — Барар андре аменде патябе! ⁶ Рай ленґє отпгендя: — Те кє туменде гін патябе андро горчічно дів і тумен пгенена ле тутовскєре дубоскє: «Цірде тут аврі ле коренєнца і садзін тут андро морьос», — акор ов шунела тумен. ⁷ Домукага, со кє туменде гін о совґас, саво оврінел або пасінел ле бакрен. Чі пгенена тумен лескє, кана ов вісальола пале маля: «Ав сіґєредер і беш пажо скамін»? ⁸ Сіґєредер пгенена лескє авка: «Кєр манґє варесо те хан пре раті, а паліш препганд дерекос і совґалін манґє, адик ме хава те піява, а паліш коркоро хага те пієга». ⁹ Чі палікєрел о хулай ле совґаскє важ ода, со ода кєрел, со лескє есас пгендо? ¹⁰ Авка те тумен, кана кєрен ода, со туменґє есас преказіме, пгенен: «Амен сам совґі, саве ніч на тердьон, амен кєрдям чак ода, со маїндям те кєрен».

Деш прокажоне

¹¹ Кана Ісус джялас андро Єрусалім, то преджялас машкар Самарія те Галілєя. ¹² Кана Ов заджялас андро єкг баро ґав, одя Лес ужаренас деш прокажоне мануша. Оне тердьонас надур ¹³ і фес вріскіненас: — Ісус, Танітов! Посаїн амен! ¹⁴ Кана Ісус лен дикгля, Ов ленґє пгендя: — Джян і сікавенпес ле рашаєнґє. Оне ґейле і пало дром ачіле жувже. ¹⁵ Єкг лендар, сар дикгля, со ов гіно сасардо, вісаліля і баре ганґога ашарелас ле Девлес. ¹⁶ Ов пейля ко Ісусоскєре піндре і палікєрелас Лескє. Ода мануш есас самарянос. ¹⁷ Ісус пгучля: — Чі на деш мануша пес жувжарде? Та кай гіне авер ейняджяне? ¹⁸ Хіба на аракгляпес ані єкг, ко вісалілялас, гой те ашарен ле Девлес, чак када єкг цузопгувакєро? ¹⁹ І пгендя Ісус лескє: — Уші і джя, патябе тийро ратиндя тут.

Сар авела о Краліпе ле Девлескєро

²⁰ Єкгвар фарісєї пгучле Лестар, кана авела Краліпе ле Девлескєро. Ов отпгендя ленґє: — На авела Краліпе ле Девлескєро авка, со шай ейла лес те дикгєн. ²¹ Ніко на ейла гонно те пгенен: «Акєс гіно», або: «Одя гіно». Бо Краліпе ле Девлескєро гіно машкар туменде. ²² Паліш пгендя Ов ле сікаденґє: — Авела айсі овра, кана тумен камена те дикгєн хоча бі єкг дівес ле Час Манушенґєрес, но на дикгєна. ²³ Туменґє вакєрена: «Акєс гіно» або «Одя гіно», та тумен на денашен те дикгєн. ²⁴ Бо, сар о перумос бліскінел пало єкг аґор нєбоскєро ко авер, авка ейла о Ча ле Манушенґєро андро дівес, кана Ов вісальола. ²⁵ Та єкгвар Ов мушінел іґєн бут те семвединен, а паліш ейла отчідо кадале родога. ²⁶ Сар есас андро Нойоскєре дівеса, авка ейла андро дівеса ле Час Манушенґєрес: ²⁷ мануша ханас, пієнас, ленас пескє ромня, джянас роместе джі ко ода дівес, сар о Ной заґейля андро ковчег. Акор авля баро пані і саворен мурдардя. ²⁸ Авка есас те андро дівеса, кана джівелас о Лот: мануша ханас, пієнас, цінкєренас, бікєнкєренас, садзінкєренас і кєренас о кгєра. ²⁹ Та андро дівес, кана Лот авля аврі андал Содом, акор кєздиндя те перен брішиндескєро яґ те сіра пало нєбос і саворен мурдардя. ³⁰ Авка ейла те андро ода дівес, кана сікавелапес о Ча ле Манушенґєро. ³¹ Андро ода дівес, ко ейла про падос, а ренті лескєре андро кгєр, те на мукєлпес тейле пал ленде. І ко ейла пре маля, те на вісальол пале. ³² Паматинен Лотоскєра ромня! ³³ Сако, ко камела те ратинен пескєрі вовді, ода нашавела ла, а ко нашавела пескєрі вовді, ода сохранінела ла. ³⁴ Пгенав туменґє: андре оди раті дуйджяне ейна про єкг тган, єкгєс залена, а дуйтонес мукєна. ^35-36 Дуй ромня андре єкг ірнінена е дів, та єкга залена, а дуйтона мукєна ^[1] . ³⁷ Сікаде пгучле Лестар: — Кай, Раєя? Ов ленґє пгендя: — Одя, кай трупос, одя ейна те орли.

Chapter 18

Вакєрібе пало вдова, саві на делас смійром ле судзаскє

¹ Акор Ісус розвакєрдя ленґє єкг вакєрібе пал ода, со кампел міндик те модліненпес і те на мукєн тейле о васта: ² — Андро єкг фоврос есас судзас, саво Девлестар на даралас а ле манушендар на ладжялас. ³ Андро ода фоврос есас вдова, саві пгірелас кє лесте і вакєрелас: «Заач важ манде мійре врагостар». ⁴ Ов буталік на камелас, а паліш пгендя коркоро андре песте: «Хоч ме ле Девлестар на дарав, а ле манушендар на ладжяв, ⁵ та важ ода, кай кади вдова на дел манґє смійром, заачава важ лате, гой те преачел те пгірен кє манде, те мучінен ман». ⁶ І пгендя о Рай: — Тумен шунен, со вакєрел када біпатівало судзас? ⁷ А о Дейл? На заачела важ одала, кас Ов кіндя аврі, саве вічінен кє Лесте дівесе те ратяга? Чі Ов буталік ужарела? ⁸ Пгенав туменґє, со Ов сіґ заачела важ ленде. Та кана авела о Ча Манушенґєро, чі аракгєла патябе пре пгув?

Вакєрібе пало фарісєй те пало мануш, саво іскідел налогі

⁹ Одаленґє, ко есас бійзошно андро пескєро чачібен і дикгєнас тейле саворен манушен, Ісус розвакєрдя айсо вакєрібе: ¹⁰ — Дуй мануша авле андре храмос те модліненпес — єкг есас фарісєй, а дуйто ода, саво іскідел налогі. ¹¹ Фарісєй тердьолас і модліндяпес важ песте авка: «Девла, палікєрав Тукє, кай ме на сом айсо, сар авер мануша: човраша, напатівале, одала, саве кєрен лубіпен, або сар када мануш, саво іскідел налогі. ¹² Дувар про курко лікєрав о постос, а саворестар, со зародав, дав дештато». ¹³ А ода, саво іскіделас налогі, тердьолас пре сийра і даралас те вазден пескєре якга про нєбос, мареласпес андро колін і вакєрелас: «Девла, посаїн ман, бійношнес». ¹⁴ Пгенав туменґє, со чак када мануш ґейля кгєйре оправдіме, а на першо. Сако, ко ваздел пескє опре, дикгєна лес тейле, а ко дикгєлпес тейле, ода ейла ваздно опре.

Ісус благословінел ле чавен

¹⁵ Ко Ісус анде цікне чавен, гой Ов те тговел Пескєре васта пре ленде. Та кана дикгле сікаде када, на каменас лен те домукєн. ¹⁶ Акор Ісус вічіндя лен і пгендя: — Мукєн ле чавен, мі авен кє Манде. На запріщінен ленґє те авен, бо Краліпе Девлескєро гіно ленґєро. ¹⁷ Чачібе вакєрав туменґє: ко на прелела Краліпе Девлескєро, сар о чаворо, на заджяла андре лесте.

Ісус те о барвало мануш

¹⁸ Єкг ле пгуредер манушендар пгучля Лестар: — Лачо танітов, со манґє те кєрен, гой те худав вечно джівіпе? ¹⁹ Ісус лескє пгендя: — Соске ту вічінес Ман лачо? Ніко нане лачо, ча єкг о Дейл. ²⁰ Ту джянес е заповіді: на кєр лубіпен, на мурдар, на човр, на свідчін начачібе, кам пескєре дадес те пескєра да. ²¹ Ов Лескє пгендя: — Саворо акада ме долікєрав мійре терне бершендар. ²² Сар шундя када, Ісус пгендя лескє: — Єкг тукє хібінел — саворо, со тут гін, бікєн і розде ле чоренґє, і ейла тут барваліпе про нєбос. Акор ав пал Манде. ²³ Сар ов шундя саворо када, забаїндяпес, бо есас іґєн барвало. ²⁴ Ісус дикгля, со ов забаїндяпес, і пгендя: — Сар пгарес барваленґє те заджян андро Краліпе ле Девлескєро! ²⁵ Ловкєдер верблюдоскє те преджян пріґ сувакєро кганоро, сар барвалескє те заджян андо Краліпе Девлескєро. ²⁶ Одала, ко ода шунелас, пгучле: — Акор ко шай ратинелпес? ²⁷ Ісус ленґє отпгендя: — Ода, со наший манушенґє, ода шай ле Девлескє. ²⁸ Акор Петро пгендя: — Дикг, саворо, со кє аменде есас, амен муклям і ґейлям пал Туте. ²⁹ Ісус пгендя ленґє: — Чачібе пгенав туменґє: сако, ко мукля пескєро кгєр, вай ромня, вай ле пгрален, вай ле даден, вай ле чавен важо Краліпе ле Девлескєро, ³⁰ худела бутередер андре аді овра, а андро авер векос — вечно джівіпе.

Ісус трітовар пгенел анґлал пал Пескєро мерібе

³¹ Акор Ов вічіндя пескєре дешудуєн сікаден і пгендя ленґє: — Канакє амен джяс андро Єрусалім, і обачелапес одя саворо, со гін пісіме пріґ пророка пало Ча ле Манушенґєро. ³² Ов ейла отдино манушенґє, саве на джянен ле Девлес. Оне асана Лес аврі, джюнґлярена Лес і чунґаркєрена пре Лесте, ³³ а пало марібе ле чупняга мурдарена Лес, та про тріто дівес Ов джівдісальола. ³⁴ Сікаде ніч одалестар на ахаліле, бо када лав есас запганло лендар, і оне на джяненас, пал состе джялас вакєрібе.

Ісус сасарел ле корес

³⁵ Кана Ісус авелас пашедер ко Єріхон, єкг коро мануш бешелас пажо дром і манґєлас о лове. ³⁶ Сар шундя, со паж лесте преджял нийпос, пгучля лендар: — Со пес обачіля? ³⁷ Лескє пгенде: — Ісус андал Назарет преджял. ³⁸ Акор о коро завріскіндя: — Ісус, о Ча ле Давідоскєро, посаїн ман! ³⁹ А одала, саве джянас анґлал, кєздинде те вакєрен лескє, гой ов те ціхісальол, та о коро минґ федер вріскінелас: — Ча Давідоскєро, посаїн ман! ⁴⁰ Ісус терділя і пгендя: — Анен лес кє Манде. Кана ов подавля кє Лесте, Ісус пгучля лестар: ⁴¹ — Со ту камес, гой Ме тукє те кєрав? А о коро Лескє пгендя: — Раєя! Камав те дикгєн! ⁴² Ісус лескє пгендя: — Пгутер о якга! Тийро патябе сасардя тут аврі! ⁴³ Коро єкгваресте ачіля те дикгєн і ґейля пало Ісус, ле ашаріпнага ле Девлес. А саворо нийпос, саво дикгля када, ашарелас ле Девлес.

Chapter 19

Ісус авел андро кгєр ко Закхей

¹ Ісус заавля андро Єріхон і преджялас пріґ о фоврос. ² Одя есас мануш про нав Закхей. Ов есас пгуредер про одала, саве іскіденас налогі, і есас барвало. ³ Ов іґєн камелас те дикгєн ле Ісус, ко Ов айсо, та прекал ода, со оде есас бут мануша, на бійрінелас, важ ода бо ов есас цікно мануш. ⁴ Акор ов денашля анґлал, гой те вазденпес про тутовакєро дубос, гой одарік те дикгєн ле Ісус, кана Ов одарік преджяла. ⁵ Кана Ісус подавля пашедер ко ода тган, Ов дикгля опре про Закхей і пгендя лескє: — Закхей, ав сіґєредер тейле. Дадіве Ме маїнав те авен андро тийро кгєр! ⁶ Ов єкгваресте авля тейле і ле радишаґога преіля ле Ісус. ⁷ Саворе, ко дикгля ода, хунде те дудрінен: — Ов ґейля андро гості ко бійношно мануш! ⁸ Акор Закхей ушіля і пгендя ле Раєскє: — Раєя! Єпаш мійро барваліпе ме роздава чоренґє, а те варекастар ме ільом опрал, ме вісарава лескє штарвал бутередер! ⁹ Акор Ісус лескє пгендя: — Дадіве авля ратипе андре када кгєр, бо те ов гіно о ча ле Авраамоскєро! ¹⁰ О Ча ле Манушенґєро авля те аракгєн і те ратинен ода, со есас нашадо.

Вакєрібе пало драхмі

¹¹ Одаленґє, ко ода шунелас, Ісус розвакєрдя єкг вакєрібе. Оне есас надур ле Єрусалімостар, і мануша думіненас, гой сіґ маїнел те пгутеренпес о Краліпе ле Девлескєро. ¹² Важ ода Ов ленґє пгендя: — Єкг раїкано мануш джялас дур пре авер пгув, гой те прелен краліпе, а паліш те вісальон пале. ¹³ Ов вічіндя пескєре дешен совґен, диня ленґє по шел драхмі і пгендя ленґє: «Кєрен лендар хасна, адик ме авава пале». ¹⁴ Но мануша лескєра пгуватар мержіненас лес і бічаде анґлал ле манушен, гой мі пгенен: «Амен на камас, гой ада мануш те ачел амаро краліс». ¹⁵ Кана ов преіля пескєро краліпе, то диня аврі те вічінен кє лесте совґен, савенґє ов допатяндя серебро, гой те пгучен лендар, ко кєці зарондя. ¹⁶ Першо сікадяпес і пгендя: «Хулай, тийре шел драхмі андя манґє езерос драхмі». ¹⁷ О хулай лескє пгендя: «Міште, ту сал лачо совґас. Ту салас патівало андро цікно, важ ода ту ейга баредер про деш фовра». ¹⁸ Авля дуйто совґас і пгендя: «Хулай! Тийре шел драхмі анде манґє панчшел драхмі». ¹⁹ О хулай те лескє пгендя: «Те ту ейга баредер про панч фовра». ²⁰ Паліш авля те тріто совґас і пгендя: «Хулай! Акєс тийре шел драхмі, ме ґарудьом ла андро запатярдо кгосноро. ²¹ Ме дарандільом тутар, авка сар ту жестоко мануш. Ту лес одя, кай ту на тгодял, і іскідес одя, кай на шіїндял». ²² Акор о хулай лескє пгендя: «Тийра чібага тут судзінава, налачо совґас! Ту джянлял, со ме жестоко мануш, со ме лав одя, кай на тгодьом, іскідав одя, кай ме на шіїндьом. ²³ Соскє ту на муклял мійро серебро андро дєлос, гой, кана ме вісалювава, те вісарес манґє бутередер?» ²⁴ І ов пгендя одаленґє, ко одя тердьолас: «Лен лестар лескєре шел драхмі і ден одалескє, кє касте гін езерос». ²⁵ Лескє пгенде: «Хулай! Кє лесте те авка гін іма езерос драхмі». ²⁶ О хулай отпгендя: «Пгенав туменґє: саконескє, кас гін, доделапес минґ, а кє касте нане, одлелапес минґ те ода, со лес гін. ²⁷ А мійре враген, саве на каменас, гой ме те ачав краліс пре ленде, анен лен аде і анґлал манде мурдарен».

Ісус заджял андро Єрусалім

²⁸ Сар Ісус розвакєрдя када, Ов ґейля дуредер ко Єрусалім. ²⁹ Кана авелас пашедер ко Віффагія і Віфанія, пажо Олівково партос, Ов бічадя анґлал дує сікаден, ³⁰ вакєрібнага: — Джян андро баро ґав, саво анґлал туменде, і сар заавена андре лесте, тумен аракгєна препганле терне сомаріс, про саво минґ ніко на бешелас. Розпганден лес і анен лес аде. ³¹ А те вареко тумендар пгучела: «Соске тумен лес отпганден?» — пгенен лескє авка: «Ов кампел ле Раєскє». ³² Сікаде, савен Ов бічадя, ґейле і аракгле саворо авка, сар Ісус ленґє пгендя. ³³ Кана оне розпганле терне сомаріс, акор лескєре хулая пгучле лендар: — Соске тумен розпганден ле сомаріс? ³⁴ Оне отпгенде: — Ов кампел ле Раєскє. ³⁵ Оне анде ле сомаріс ко Ісус і хунде те ракінен пре лесте пескєре голмі, а паліш тгоде те бешен пре лесте ле Ісус. ³⁶ Кана Ов джялас, о мануша лачаренас пескєре голмі про дром. ³⁷ Кана Ов авля пашедер ко тган, про дром, саво мукєлпес тейле пало Олівково партос, акор іґєн бут сікаде кєздинде ле радишаґога баре ганґога те ашарен ле Девлес важ саворе чудєса, саве оне дикгле. ³⁸ Оне вакєренас: — Ашаріпе ле Краліскє, саво авел андро Раєскєро нав! Мірос про нєбос і слава опре андро увчібе! ³⁹ Варесаве фарісєї машкар о нийпос пгенде Лескє: — Танітов, пген пескєре сікаденґє, мієн ціхо! ⁴⁰ Ов ленґє отпгендя: — Пгенав туменґє, те оне ейна ціхо, акор о бара кєздинена те вріскінен.

Ровібе пало Єрусалім

⁴¹ Кана Ов авля пашедер і дикгля про фоврос, Ов кєздиндя те ровен пал лесте ⁴² і пгендя: — О, те ту прінджярдялас андре када тийро дівес, со шай анел тукє мірос! Та дадіве када ґарудо тийре якгендар. ⁴³ Авена дівеса, кана тийре врагі окружінена тут барікаденца і пал сако єкг сийра кікідена тут. ⁴⁴ Оне унічтожена тут і саворен, ко андре туте джівел, і на мукєна бар про бар, важ ода кай ту на прінджярдял оди овра, кана о Дейл авля кє туте.

Ісус традел аврі ле торгашен андал о храмос

⁴⁵ Паліш Ісус заґейля андро храмос і кєздиндя те траден аврі ле торгашен ⁴⁶ і вакєрелас ленґє: — Пісіме: «Мійро кгєр ейла молітвено кгєр», а тумен кєрдян лестар о кгєр прекал о жівана. ⁴⁷ Ісус сако дівес сікавелас андро храмос. А єкг баредер рашая, танітова Законоскєре і пгуредера нийпоскєре роденас овра, гой Лес те мурдарен. ⁴⁸ Та оне на джяненас, сар ода те кєрен, бо саворе мануша шуненас ле Ісус і на каменас те премукєн ані єкг лав.

Chapter 20

Пгучібе пало Ісусоскєрі влада

¹ Ачіляпес андро єкг дівес, кана Ісус сікавелас андро храмос ле нийпос і вакєрелас ленґє Радишаґоскєро Гійрос, кє Лесте подавле єкг баредер рашая, танітова Законоскєре, а те пгуредера. ² І пгучле Лестар: — Пген аменґє, сава владага Ту када саворо кєрес? І ко диня Тукє кади влада? ³ Акор Ов ленґє пгендя: — Те Ме пгучава тумендар, а тумен пгенен Манґє — ⁴ катар Іоанн хундя пескєрі влада те болавен, пало нєбос вай ле манушендар? ⁵ Оне кєздинде те вакєрен машкар песте: «Те амен пгенага: "Пало нєбос", акор Ов пгучела: "Акор соске тумен на патянділян Лескє?" ⁶ Те пгенага: "Ле манушендар", акор саворо нийпос марела амен ле баренца, бо оне патян, со Іоанн есас пророкос». ⁷ Акор оне отпгенде: — На джянас, катар. ⁸ Акор те Ісус ленґє пгендя: — І Ме на пгенава туменґє, сава владага Ме када кєрав.

Вакєрібе пало бувтякєре андре дракгуні

⁹ Ов кєздиндя те розвакєрен ле нийпоскє када вакєрібе: — Єкг мануш садзіндя дракгєнґєро садос. Ов диня лес важо лове ле бувтякєренґє, а коркоро ґейля пре цузо пгув про бутенґєрі овра. ¹⁰ Кана авля овра, ов бічадя ле совґас ко дракгара, гой оне мі ден лескє ода, со поперелпес лескє ле увліпнастар. Та бувтяра ізмарде ле совґас і бічаде лес чувче вастенца. ¹¹ Акор ов бічадя минґ єкгєс совґас, та оне те лес ізмарде і кєрде лега пре ладж, а паліш бічаде лес чувче вастенца. ¹² Акор ов бічадя трітонес, та оне те лес фес ізмарде і чіде лес аврі андало садос. ¹³ Акор о хулай дракгєнґєро пгендя: «Со манґє те кєрен? Бічавава мійре камаде чаворес, талам, лестар оне ладжянапес». ¹⁴ Та кана бувтяра дикгле ле час, кєздинде те вакєрен єкг аврескє: «Саворо када хулаїпе маїнел те ачен лескє. Авас, мурдарага лес, гой ада саворо те ачел аменґє». ¹⁵ Акор оне чіде лес аврі андало садос і мурдарде. Со канакє кєрела ленца дракгєнґєро хулай? ¹⁶ Ов авела і мурдарела одален бувтякєрен, а садос отдела авренґє. А одала, кай шунде када, пгенде: — Те на ейл айсо! ¹⁷ Та Ісус дикгля пре ленде і пгендя: — Сар те ахальон када пісіме: «Бар, саво отчіде мурніка, ачіля єкг главнедер андро углос»? ¹⁸ Сако єкг, ко перела про ода бар, розмарелапес, а пре касте ов перела, одалес затасавела. ¹⁹ Танітова Законоскєре те єкг баредер рашая ахаліле, со ода вакєрібе Ісус розвакєрдя пал ленде, і важ ода камле єкгваресте те пганден тейле Лес, та даранас ле нийпостар.

Пгучібе пало ода, чі кампел те потінен налогі

²⁰ Важ ода оне кєздинде те дикгєн пало Ісус і бічаде кє Лесте ле манушен, саве сікавнаспес, со оне гіне чачібнаскєре, гой те худен ле Ісус про лав і те ден Лес аврі ле владакє андро васта рімоскєре владаріскє. ²¹ Оне пгучле Лестар: — Танітов, амен джянас, со Ту міште вакєрес і міште сікавес, і на дикгєс про муя, а чачес сікавес Девлескєро дром. ²² Чі сабано аменґє те ден налогос імператоріскє вай наа? ²³ Ісус дикгля ленґєро буджяндіпе і важ ода пгендя ленґє: ²⁴ — Сікавен Манґє дінарій. Каскєро муй і каскєро нав пре лесте? Акор оне отпгенде: — Імператоріскєро. ²⁵ А Ов ленґє пгендя: — Важ ода ле імператоріскє ден імператоріскєро, а Девлескєро — ле Девлескє. ²⁶ Оне на бійріненас Лес те хунде про лав анґлал о нийпос, чудаліненаспес, сар Ов отпгендя, і заціхісаліле.

Пало ода, сар ушена опре ле мерібнастар о мувле

²⁷ Акор подавле ко Ісус варесаве саддукєї (оне вакєренас, со нане уштавібе мувленґєро) і пгучле Лестар: ²⁸ — Танітов, Моїсєй пісіндя аменґє, те кє варекасте мерела о пграл, ко саво есас ромні, но на есас ла о чаве, акор ов маїнел те лен ла ромнякє і важ пескєро пграл те ден лакє ле чавен. ²⁹ Есас ефта пграла. Першо пграл іля пескє ромня і мувля бі о чаве. ³⁰ Паліш те дуйто. ³¹ Те тріто іля ла пескє важо ромня; авка саворе ефтаджяне. Оне саворе мувле і на мукле пал песте ле чавен. ³² Паліш мувля те е ромні. ³³ Важ ода, пало уштавібе ле мувленґєро, каскєрі ой ейла ромні? Бо ой есас ефтаджяненґє важе ромні. ³⁴ Ісус ленґє отпгендя: — Кале векоскєре мануша лен пескє ромнєн і джян роместе. ³⁵ А одала, саве ейна достойне те джівен андро авер векос і ейла уштадо опре андал о мерібе, на лена пескє ромнєн і роместе на джяна. ³⁶ І на бійрінена іма те мерен, бо оне ейна подобне про анґєла. Оне гіне Девлескєре чаве, бо лен участіє андро уштавібе мувленґєро. ³⁷ А ода, со мувле ушена андал о мерібе, Моїсєй сікадя пажо тернячкєнґєро кущос, саво лаболас, кана вічіндя ле Раєс, со ов гіно о Дейл Авраамоскєро, о Дейл Ісаакоскєро і о Дейл Яковскєро. ³⁸ Ов о Дейл на ле мувленґєро, а ле джівденґєро, бо пріґ Лесте саворе джівде. ³⁹ Акор варесаве танітова Законоскєре пгенде: — Танітов, Ту міште отпгендял! ⁴⁰ І ніко іма на тромалас те пгучен Лестар ні пал состе.

Ко гіно о Ісус?

⁴¹ Паліш Ісус пгучля лендар: — Соске вакєрен авка, со Хрістос гіно о Ча ле Давідоскєро? ⁴² Та Давід коркоро вакєрел андро кніжка Псалмі: «Пгендя о Рай мійре Раєскє: Беш пре чачі сийра паж Манде,

         ⁴³ адик на тговава Тийре враген Тукє толо піндре». ⁴⁴ Давід вічінел Лес ле Раєга. Та акор, сар шай Ов авел лескєро Чаворо?

Ісус вакєрел пало буджянде мануша

⁴⁵ Саворо нийпос шунелас ле Ісус, а Ов пгендя Пескєре сікаденґє: ⁴⁶ — Меркіненпес ле танітовен Законоскєрен. Оне камен те пгірен андро діндярдо шукар уравіпе і камен, кана ленґє палікєрен про фовроскєре піяца. Оне бешен про єкг федер тгана андро сінаґоґа і про вічіме дийлос. ⁴⁷ Оне зален пескє ле вдовенґєре кгєра і про якга ле манушенґє буталікпес модлінен. Айсе прелена єкг баредер судос.

Chapter 21

Вдовакєре дуй хурде копейкі

¹ Ісус дикгєлас, сар барвале чівкєренас пескєре дари андре храмоскєрі скарбнічка. ² Одя Ов дикгля єкга чора вдова, саві чідя дуй хурде копейкі. ³ Акор Ісус пгендя: — Чачібе пгенав туменґє, со кади чорі вдова чідя єкг бутередер саворендар. ⁴ Бо кадала саворе денас андал пескєро барваліпе, а ой айсі чорі, і чідя саворо, со ла есас про джівіпе.

Ісус вакєрел пало ода, со ейла

⁵ Кана завакєрде варесаве мануша пало храмос, со ов гіно обракіме шукар бароренца те барваліпнага, саве аненас ле Девлескє, Ов пгендя: ⁶ — Авена дівеса, со одалестар, со тумен канакє дикгєн, на ачела бар про бар, — саворо ейла розмардо. ⁷ Оне пгучле Лестар: — Танітов, кана ода обачелапес? І саво знаменіє сікавела про ода, кана ода маїнел те ачен? ⁸ Ов ленґє пгендя: — Меркінен, гой ніко тумен те на дилинярел. Бо бутджяне, ко авена андро Мійро нав і пгенена: «Ода Ме» і «Овра іма обачіля». На джян пал ленде! ⁹ Кана тумен шунена пало войни те пал ода, со мануша ачен аврі єкг протів авересте, на даран. Бо саворо када маїнелпес те обачен анґлал, та аґор ачелапес на єкгваресте. ¹⁰ Ов дуредер вакєрелас кє ленде: — Джяла нийпос про нийпос і краліпе про краліпе. ¹¹ Акор разінелапес е пгув, і андро бут тгана ейла барі бокг те баро насвалібен, а про нєбос ейна страшне і баре знаменія. ¹² Та анґлал ода, сар маїнел са када те ачен, тговена пре туменде пескєре васта і кєздинена тумен те траден, предена тумен андре сінаґоґі і андре тюрмі, і ліджяна тумен ко краля те ко владара. Саворо када туменца кєрена важ Мійро нав. ¹³ Акор ейла тумен возможность те свідчінен. ¹⁴ Но на думінен анґлал пало ода, со туменґє те отпгенен. ¹⁵ Бо Ме дава туменґє айсі ґовді те о лава, со ані єкг тумаре врагендар на бійрінела те отпгенен чі те тердьон аврі анґлал туменде. ¹⁶ Акор предена тумен тумаре дада, пграла, тумаро чаладос і тумаре барата, а варекас тумендар мурдарена. ¹⁷ Важ Мійро нав саворе тумен мержінена. ¹⁸ Та ані єкг бал пал тумаро шейро на проперела! ¹⁹ Тийрінен, і авка ратинена пескєрі вовді. ²⁰ Кана тумен дикгєна Єрусалім, захундо буте суґлядєнца, акор джянен, гой авля овра, кана ов маїнел тейн розрушіме. ²¹ Акор одала, саве гіне андре Іудєя, мі денашен про брегі; ко андро фоврос, мі денашен андал лесте, одала, ко пре маля, те на джян пре лесте, ²² бо андре одала дівеса о Дейл воздела ле манушенґє, і акор обачелапес саворо, со гіно пісіме. ²³ Біда пгаре ромнєнґє і одаленґє, ко дел чувчі те пієн, андро одала дівеса, бо баро пгарібе ейла пре пгув, і руш зчордьолапес пре када нийпос! ²⁴ Єкг мануша меркєрена ле шаблятар, а авер манушен спгандена і отліджяна про авер пгув. Єрусалім тапошінена піндренца шільяка мануша, адик на преджяла ленґєрі овра.

Ісус вакєрел пало ода, гой Ов минґ вісальола

²⁵ І ейла знаменіє про кгам, про чон те про черхеня, нийпі пгувакєре шунена ровібе морьоскєро ле волнендар і ейна андро смуткос, і на джянена, со те кєрен. ²⁶ Акор мануша слабісальона ле даратар, анґлал ода, со авел про цейло светос. Акор те нєбоскєрі зор разісальола. ²⁷ Акор дикгєна ле Час Манушенґєрес, саво авел про хмара ле зорага те андре барі слава. ²⁸ Кана када саворо кєздинелапес те обачен, ушен і вазден о шейре, важ ода, бо іма пашес тумаро ратипе. ²⁹ Паліш Ов розвакєрдя ленґє айсо вакєрібе: — Дикгєн про інжірос і про саворе дубі. ³⁰ Кана пре ленде сікавенпес прайтя, тумен дикгєн ода і джянен, гой пашес о нілай. ³¹ Авка те тумен, кана дикгєна, со када саворо обачелапес, джянен, со іма пашес о Краліпе ле Девлескєро. ³² Чачібе пгенав туменґє, минґ на шажнінела када родос, сар када саворо ачела. ³³ О нєбос те пгув преджяна, а Мійре лава на преджяна.

На совен

³⁴ Меркінен пре туменде, гой тумаре їле те на замаренпес чак ле мулатипнага, піїбнага і джівіпнаскєре заботамі, гой ода дівес те на авел пре туменде акор, кана тумен лес на ужарен, ³⁵ сар сітка. Ов авела про саворе мануша, саве джівен пре цейлі пгув. ³⁶ Міндик авен бодре і модліненпес, гой тумен мієл зор те преджян са, со маїнелпес те ачен, і те тердьон анґлал о Ча ле Манушенґєро. ³⁷ Сако дівес Ісус сікавелас андро храмос, а ратяга джялас про Олівково партос і преліджялас одя е раті. ³⁸ А сіктосарастар саворо нийпос іскіделаспес андро храмос, гой те шунен Лес.

Chapter 22

Іуда довакєрелпес ле рашаєнца, сар те преден ле Ісус

¹ Авелас пашедер Маріклєнґєро ійнепос, саво вічінеласпес Патраді. ² Єкг баредер рашая те танітова Законоскєре роденас, сар те мурдарен ле Ісус, та даранас ле нийпостар. ³ Акор о сатана заґейля андро Іудас, саво вічінеласпес Іскаріот, ов есас єкг ле дешудуєндар. ⁴ Ов ґейля ко єкг баредер рашая а те ко храмоскєре сторожа і довакєрдяпес ленца, сар те преден аврі ленґє ле Ісус. ⁵ Оне радисаліле і дине лав те ден лескє лове. ⁶ Іуда диня ленґє лав і кєздиндя те роден овра, сар те ден ленґє аврі ле Ісус, кана Лега на ейла ле нийпос.

Ле Ісусоскєре сікаде кійсітиненпес кє Патраді

⁷ Ачіля о дівес Маріклєнґєро, андро саво кампіля те дочінен патрадякєре бакрорес. ⁸ Акор Ов бічадя ле Петрос те ле Іоанн і пгендя ленґє: — Джян і кійсітинен аменґє патрадякєро хавібе. ⁹ Та оне Лестар пгучле: — Кай Ту камес, гой амен те кійсітинас? ¹⁰ Ов ленґє отпгендя: — Кана тумен заджяна андро фоврос, тумен одя аракгєна ле манушес, саво ліджяла пані андро канчовс. Джян пал лесте андро ода кгєр, андро саво ов заджяла, ¹¹ і пгенен ле кгєрескєре хулаєскє авка: «Танітов пгучел тутар: "Кай соба, андре саві Ме те мійре сікаде хага Патраді?"» ¹² Ов сікавела туменґє опре барі соба, андре саві іма саворо прікєрдо. Одя і кійсітинен. ¹³ Оне ґейле і аракгле саворо авка, сар ленґє пгендя Ісус, і кійсітинде патрадякєро хавібе.

Пошлєдньо ратютно хавібе Ісусоскєро ле сікаденца

¹⁴ Кана авля овра, Ісус і Лескєре апостоли іскіндепес пажо скамін. ¹⁵ Ов ленґє пгендя: — Ме іґєн камльом те хан кади Патраді туменца анґлал Мійро мучішаґос. ¹⁶ Пгенав туменґє, со Ме іма на хава ла джі ко ода, адик ой на обачелапес андро Краліпе ле Девлескєро. ¹⁷ Акор Ов іля е кувчі, палікєрдя важ лате ле Девлес і пгендя: — Лен і розулавен ла машкар туменде. ¹⁸ Пгенав туменґє, со Ме бутер на піява андал дракгєнґєро плодос, адик на авела о Краліпе ле Девлескєро. ¹⁹ Паліш іля маро, палікєрдя важ лесте ле Девлескє, препгаґля лес і диня ленґє ле лавенца: — Када Мійро тєлос, кай важ туменґє отделпес. Кєрен ада, кана леперена пал Манде. ²⁰ Авка те пало ода, сар отхале, іля е кувчі і пгендя: — Кади кувчі — нейво заветос, спганло Мійре ратега, саво важ туменде чордьолпес. ²¹ Та о васт одалескєро, ко предел Ман, про єкг скамін Мійрега. ²² Та о Ча ле Манушенґєро джял авка, сар пал Лесте пісіме, та війґос одале манушескє, саво Лес предел. ²³ Акор сікаде кєздинде єкг аврестар те пгучен, ко машкар аменде шай айсо кєрел.

Ко маїнел лендар тейн баредер

²⁴ Паліш оне кєздинде те споріненпес, ко лендар маїнел тейн єкг баредер. ²⁵ Ісус акор ленґє пгендя: — О краля нийпоскєре гіне хулая про мануша, а нийпоскєре рая вакєрен, со оне кєрен лачіпе. ²⁶ А тумен на кєрен авка, сар оне. Та єкг баредер машкар туменде мі ачел єкг цікнедер, а ко тумендар начальнікос — мієл айсо, сар совґас. ²⁷ Бо ко баредер: ода, ко бешел пажо скамін, вай ода, ко совґалінел? На ода, саво бешел? Та Ме машкар туменде, сар совґас. ²⁸ Тумен санас Манца міндик, кана сомас пробаліме аврі. ²⁹ Сар Мійро Дад диня Манґє Краліпе, авка Ме канакє дав лес туменґє, ³⁰ гой тумен те бійрінен те хан і те пієн пажо Мійро скамін андро Мійро Краліпе. Тумен бешена про трона і судзінена дешудуй роди Ізраєльоскєре.

Ісус пгенел анґлал, сар Петро отпгенелапес Лестар

³¹ І пгендя о Рай: — Сімон, Сімон! Акєс о сатана манґля Ман те прешіїнен тумен, сар дів. ³² Та Ме ман модліндьом пал туте, гой ту те на нашавес патябе. Ту коркоро, кана вісарегатут кє Манде, зорісалю пескєре пгрален. ³³ Петро Лескє отпгендя: — Раєя! Та ме Туга кійсітиме сом те джян те андре тюрма, те про мерібе! ³⁴ Та Ісус лескє пгендя: — Пгенав тукє, Петро, минґ дадіве на заґілявела кугутос, сар ту трівал пгенега, со на джянес Ман. ³⁵ Ісус пгучля лендар: — Кана Ме тумен бічававас бі е тарца, бі е ташка і бі е камашлі, чі хібінелас туменґє варесо? А оне Лескє отпгенде: — Наа. ³⁶ Акор Ов ленґє пгендя: — А канакє, те кє туменде гін е тарца, мі лел ла пега. Лен те е ташка. Те кє туменде нане шабля, мі бікєнел пескєро голмос і мі цінел е шабля. ³⁷ Ме вакєрав туменґє, со ода, со гіно пісіме, маїнелпес те ачен Манца: «Ко жівана Лес зарахінде». Бо ода, со пал Манде пісіме, сіґ обачелапес. ³⁸ Оне пгенде: — Раєя! Дикг, акєс дуй шаблі. Ов ленґє пгендя: — Дос іма.

Ісус модлінелпес про Олівково брегос

³⁹ Пал Пескєро обичай, Ісус ґейля про Олівково партос, і Лескєре сікаде ґейле Лега. ⁴⁰ Сар авля про тган, Ов ленґє пгендя: — Модліненпес, гой тумен те на авен пробаліме аврі. ⁴¹ А коркоро отґейля лендар варекай пре айці, пре кєці шай те чівен о бар, терділя про коча і кєздиндяпес те модлінен. ⁴² І вакєрелас: — Даде, те Ту камес, кади кувчі мі обджял Ман! Но мієл на авка, сар Ме камав, а авка, сар Ту камес! ⁴³ Акор сікадяпес Лескє анґєлос пало нєбос і додиня Лескє зор. ⁴⁴ Ісус минґ бутер модлінеласпес андро мучішаґос. Ачіля Лескєро кгамліпе, сар краплі ратескєре, саве перенас пре пгув. ⁴⁵ Кана Ов ушіля опре ле молітватар і подґейля ко сікаде, Ов аракгля лен, со оне совен, бо оне сас мучіме ле жалятар. ⁴⁶ Ісус пгучля лендар: — Со тумен совен? Ушен і модліненпес, гой те на авен пробаліме аврі.

Іуда предел ле Ісус

⁴⁷ Ов минґ вакєрелас, кана авля бут нийпос, а ленца Іуда, єкг дешудуєндар. Ов джялас анґлал ленде і подавля ко Ісус, гой те чуміден Лес. ⁴⁸ Та Ісус лескє пгендя: — Іуда, ту ле чумібнага бікєнес ле Час Манушенґєрес? ⁴⁹ Кана одала, ко есас ле Ісусога, дикгле, со одя кєрелпес, пгучле Лестар: — Раєя, а со, те амен демага шабляга? ⁵⁰ Єкг лендар демадя єкг баредере рашаєскєрес совґас і отчіндя лескє о чачо кган. ⁵¹ Та Ісус ленґє отпгендя: — Доста! Преачен! Ов дотгодя паліш Пескєро васт кє лескєро кган і сасардя лес. ⁵² Паліш Ісус пгендя ко єкг баредер рашая те ко храмоскєре сторожа а те пгуредеренґє, саве авле пал Лесте: — Сар про жіванос тумен авлян пре Манде ле шабленца те ле паценца. ⁵³ Сако дівес, кана Ме сомас машкар туменде андро храмос, тумен на тговенас пре Манде тумаре васта; но канакє тумарі овра і цмакєрі влада.

Петро отпгенелпес ле Раєстар

⁵⁴ Акор оне хунде ле Ісус і анде Лес ко єкг баредер рашай андро кгєр. А Петро дуралестар джялас пал ленде. ⁵⁵ Кана розракінде яґ машкар е двовра, о Петро авер манушенца бешля пажо яґ. ⁵⁶ Єкг совґалкіня дикгля ле Петро андре яґакєро шветлос, міште предикгляпес пре лесте і пгендя: — Те ов есас Лега! ⁵⁷ Но Петро отпгендя: — Ромніє, ме Лес на джянав! ⁵⁸ Паліш минґ єкг лес дикгля і пгендя: — Те ту сал лендар. Та Петро лескє отпгендя: — Наа, манушея! ⁵⁹ Преґейля варекай єкг овра, кана минґ єкг патябнага пгендя: — Чачес, те када есас Лега, бо ов гіно галілєянос. ⁶⁰ Та о Петро лескє пгендя: — Манушея, ме на джянав, пал состе ту вакєрес! І єкгваресте, кана ов минґ вакєрелас, о кугутос заґілядя. ⁶¹ Акор о Рай вісаліля і задикгля про Петрос. Акор Петро лепердя Раєскєре лава, саве Ов лескє вакєрелас: «Анґлал ода, сар дадіве заґілявела о кугутос, ту трівал пгенега, со на джянес Ман». ⁶² Акор Петро ґейля аврі одарік і хундя андре барі жаля те ровен. ⁶³ Мануша, саве лікєренас ле Ісус, бандяркєренаспес пре Лесте і маренас Лес. ⁶⁴ Оне запганле Лескє о якга і пгученас: — Пророкін, ко Тут демадя? ⁶⁵ І бут джюнґ лава вакєренас пре Лесте.

Ле Ісус судзінен

⁶⁶ Кана ачіля дівес, іскіндепес пгуредера ле нийпоскєре, єкг баредер рашая і танітова Законоскєре, одліґєнде Лес андро Сінєдріон ⁶⁷ і пгенде: — Те Ту сал о Хрістос, пген аменґє. Ов ленґє отпгендя: — Те Ме туменґє пгенава, тумен на патяна. ⁶⁸ А те Ме тумендар пгучава, на отпгенена Манґє. ⁶⁹ Ада дівесестар о Ча ле Манушенґєро бешела чачо сийратар ле Девлескєра зоратар. ⁷⁰ Акор саворе кєздинде те пгучкєрен: — Та Ту сал о Ча ле Девлескєро? Ов ленґє отпгендя: — Тумен міште пгенен, со ода Ме сом. ⁷¹ Акор оне пгенде: — Со аменґє минґ кампел? Амен коркоре саворо шундям Лескєре муєстар, со Ов пгендя!

Chapter 23

Ісус анґлал о Пілат

¹ Оне саворе ушіле і одліґєнде ле Ісус ко Пілат. ² Одя оне кєздинде те обвінінен Лес і пгенде: — Амен шундям, со Ов ваздел амаро нийпос. Ов на домукєл манушенґє те ден налогі ле імператоріскє і вакєрел, со Ов гіно Хрістос, о Краліс. ³ Пілат Лестар пгучля: — Ту сал Краліс іудєєнґєро? Та Ов лескє отпгендя: — Ту коркоро авка вакєрес. ⁴ Акор Пілат пгендя єкг баредер рашаєнґє те ле нийпоскє: — Ме на аракгав нісаві віна андре Када Мануш. ⁵ Та оне те авка тердьонас про пескєро і вакєренас: — Ов бунтінел ле манушен і сікавел лен пал саворі Іудєя, андал Галілєя і джі ко амаро фоврос.

Ісус анґлал о Ірод

⁶ Сар Пілат шундя када, акор пгучля: — Када Мануш галілєянос? ⁷ Кана Пілат доджянляпес, со Ісус гіно андал е пгув, саві есас подвласно ле Іродоскє, акор ов бічадя Лес ко Ірод, саво есас андре одала дівеса андро Єрусалім. ⁸ Сар дикгля Ірод ле Ісус, іґєн радисаліля, бо ов чірла камелас Лес те дикгєн. Ов бутвар шундя пало Ісус і бійзінелапес, со Ов кєрела варесаво знаменіє пріґ лесте. ⁹ Ов заделас Лескє бут пгучібе, та Ісус лескє ніч на отпгенелас. ¹⁰ А єкг баредер рашая те танітова Законоскєре тердьонас одя і зоралес обвініненас Лес. ¹¹ Ірод пескєре суґлядєнца дикгля Лес тейле і асандя Лес аврі, а паліш диня пре Лесте шукар голмі і бічадя Лес пале ко Пілат. ¹² Одале дівесестар о Пілат те о Ірод ачіле барата; а ко ода оне враждиненас.

Пілат судзінел ле Ісус

¹³ Акор Пілат ізвічіндя єкг баредер рашаєн, ле пгуредерен те ле нийпос ¹⁴ і пгендя ленґє: — Тумен андян кє манде Кадале Манушес, сар Айсес, Саво ваздел ле нийпос. Дикгєн, ме допгучльом Лес анґлал туменде і на аракгльом нісаво подліпе, андре состе тумен Лес обвінінен. ¹⁵ Те о Ірод на аракгля андре Лесте нісаві віна і вісардя Лес минґ єкгвар кє аменде. Сар дикгєн, Ов на кєрдя ніч, важ состе Лес шай те мурдарен. ^16-17 Важ ода ме дава Лес те марен ле чупняга, а паліш одмукава. ^{[1] 18} Та саворо нийпос ачіля те вріскінен: — Мурдар Лес! Мук аменґє аврі ле Вараввас! ¹⁹ Варавва бешелас андре тюрма важ ода, кай ов кєрдя андро фоврос бунтос, а те мурдаріпе. ²⁰ Пілат камелас те мукєн аврі ле Ісус і важ ода минґ єкгвар пгучля лендар. ²¹ Та оне дуредер вріскінас: — Премар, премар Лес! ²² Пілат трітовар пгендя ленґє: — Саво подліпе Ов кєрдя? Ме на аракгльом нісаві віна, важ саві Лес шай те мурдарен. Ме дава Лес те марен ле чупняга, а паліш Лес одмукава! ²³ Та оне минґ хужедер кєздинде те вріскінен і те манґєн, гой Лес те премарен. А пескєре вріскішаґога домардепес пескєро. ²⁴ Акор Пілат кєрдя авка, сар оне манґєнас. ²⁵ Ов одмукля ленґє аврі ле тюрмашіс, саво бешелас важо бунтос і важо мурдаріпе, а ле Ісус диня пре ленґєрі воля, авка, сар оне манґєнас.

Ле Ісус ліджян про мерібе

²⁶ Кана ле Ісус ліджянас те премарен, хунде варесавес Сімон андало Кірінєя, саво джялас пале маля, і тгоде пре лесте кєрестос, гой те ліджял пало Ісус. ²⁷ Машкар буте нийпостар, саве джянас пало Ісус, есас те о ромня, саве маренаспес андре колін і ровенас пал Лесте. ²⁸ Ісус вісаліля і пгендя кє ленде: — Чаяле єрусалімське, на ровен пал Манде. Федер ровен пал песте те пал тумаре чаве. ²⁹ Бо авен айсе дівеса, кана пгенена: «Бахтале бічавенґєре, саве на ловтярде і на денас чувчі те пієн». ³⁰ Акор мануша вакєрена брегенґє: «Перен пре аменде!» а ле грункєнґє: «Учарен амен!» ³¹ Те терне і желєне дубога кєрен айсо, акор со ейла шувкєга?

Ле Ісус премарен ко кєрестос

³² Ле Ісусога ліджянас про мерібе минґ дує жіванен. ³³ Кана оне авле про тган, саво вічінелпес Черепос, одя премарде Лес, а те ле жіванен, єкгєс пре чачі сийра, а дуйтонес пре балоґно сийра. ³⁴ Ісус вакєрелас: — Даде! Одмук ленґє, важ ода, бо оне на джянен, со кєрен! Суґлядя чівкєренас о жрєбій і розуладе машкар песте Лескєре голмі. ³⁵ О нийпос тердьолас і дикгєлас, а пгуредера асанас Лестар і вакєренас: — Ратинелас аврен, а канакє мі ратинелпес Коркоро, те Ов гіно Хрістос, аврі кіндо ле Девлега! ³⁶ Минґ те о суґлядя асанаспес Лестар. Оне подавенас і денас Лескє шут. ³⁷ І вакєренас: — Те Ту сал о Краліс іудєєнґєро, ратин Тут Коркоро! ³⁸ Опрал Лесте есас пісіме: «Ода гіно Краліс іудєєнґєро». ³⁹ Єкг ле жіванендар, кай фійґінелас про кєрестос, джюнґлярелас Лес і вакєрелас: — Ту со, на сал Хрістос? Ратин Тут, а те амен! ⁴⁰ А дуйто препгендя Лескє і вакєрелас: — Ту со, на дарас ле Девлестар? Та те ту авка судзіме сал! ⁴¹ Амен наказіме сам пало чачібе і хундям ода, пре состе засовґаліндям. А када Мануш на кєрдя нісаво подліпе. ⁴² Акор ов пгендя: — Ісус, лепер ман, кана авега андро Тийро Краліпе! ⁴³ Ісус лескє отпгендя: — Чачібе пгенав тукє: дадіве ейга ту Манца андро райос.

Ісусоскєро мерібе про кєрестос

⁴⁴ Есас варекай дешудуй оврі, кана пре саворі пгув ачіля цма, і авка есас джі ко трін оврі. ⁴⁵ Акор цма заучардя о кгам, і похтан ^[2] андро храмос чінділя про єпаш. ⁴⁶ Ісус завріскіндя баре ганґога: — Даде! Андро васта Тийре отдав Мійро духос! Сар пгендя ада, Ов отдиня Пескєро духос. ⁴⁷ Кана сотнікос дикгля, со пес ачіля, кєздиндя те ашарен ле Девлес і пгендя: — Чачес Када Мануш есас чачібнаскєро! ⁴⁸ А саворе мануша, саве авле те дикгєн, со обачіляпес одя, маренаспес андро колін і вісальонас пале. ⁴⁹ Дуредер пре сийра тердьонас і дикгєнас саворе, ко джянелас ле Ісус. Те о ромня, саве джянас Лега андал Галілєя, дикгєнас, со одя пес кєрдьол.

Ле Ісусоскєро парушаґос

⁵⁰ Одя есас лачо і чачібнаскєро мануш про нав Йосип, саво есас єкг андало Сінєдріон, ⁵¹ но ов на подлікєрелас ленґєре лава те ода, со оне кєренас. Ов есас андал іудєйсько фоврос Арімафея і ужарелас ле Девлескєро Краліпе. ⁵² Ов авля ко Пілат і манґєлас лестар ле Ісусоскєро тєлос. ⁵³ Ов іля тейле о тєлос, обучардя Лес андро льоново похтан і тгодя андре гробніца, со есас кєрді андре скала, андре саві минґ джі ко ода нікас на паруненас. ⁵⁴ Ода есас дівес, кана кійсітиненпес ко сомбат, саво іма авелас. ⁵⁵ Пало Йосип ґейле о ромня, саве авле ле Ісусога андал Галілєя. Оне дикгле гробніца і ода, сар тговенас Лескєро тєлос андре лате. ⁵⁶ Сар вісаліле пале, оне кійсітинде сагошне олєї і духі. А сомбатоне кгіньонас, авка, сар пгенел заповідь.

Chapter 24

Ісус джівдісаліля мерібнастар

¹ Андро першо куркєскєро дівес, сіктосара, ромня іле преготовіме сагошне олєї і авле кє гробніца. ² Одя оне аракгле, со о бар отчідо ле гробніцатар. ³ Сар заавле андре, оне на аракгле о тєлос ле Раєскєро Ісусоскєро. ⁴ Ачіля, кана оне на ахальонас, со пес одя обачіля, дуй мурша терділе паж ленде андро бліскаце голмі. ⁵ Бара даратар ромня мукле пескєре муя кє пгув, та одала ленґє пгенде: — Со тумен роден джівдес машкар о мувле? ⁶ Лес аде нане — Ов джівдісаліля мерібнастар! Леперен чак, сар Ов вакєрелас туменґє, кана есас минґ андре Галілєя, ⁷ кана пгендя, со о Ча ле Манушенґєро маїнел тейн предино андро васта ле бійношне манушенґє і маїнел тейн премардо про кєрестос, а про тріто дівес те джівдісальон мерібнастар. ⁸ Акор оне леперде Лескєре лава. ⁹ Кана вісаліле ле гробніцатар, оне розвакєрде саворо дешуєкг апостоленґє і саворе авренґє. ¹⁰ Ода есас Марія Магдаліна, Іоанна, Марія Яковскєрі дай і авер ромня. Оне розвакєрде ода ле апостоленґє, ¹¹ та оне на патянділе ле ромнєнґє, ленґє дичолас, со ода чак чувче лава. ¹² Та о Петро ушіля і єкгваресте денашля кє гробніца. Ов банділя і дикгля одя чак о похтан. Акор ов вісаліля кє песте і чудаліндяпес одалестар, со пес одя обачіля.

Ісус сікавелпес ле сікаденґє про дром андро Еммаус

¹³ Андре ода же дівес дувджяне лендар джянас андро фоврос Еммаус, саво есас вай дешудуй кіломейтрі ле Єрусалімостар. ¹⁴ Оне вакєренас пал саворо, со пес обачіля. ¹⁵ Кана оне вакєренас і думіненас, коркоро Ісус подавля кє ленде і ґейля ленца андре єкг. ¹⁶ Та оне на прінджярде Лес, бо ленґєре якгендар ода есас запганло. ¹⁷ Ісус лендар пгучля: — Пал состе тумен вакєрен машкар туменде пало дром? Оне терділе смутне муєнца. ¹⁸ Єкг лендар, савес вічіненас Клеопа, отпгендя: — Одалендар, ко авля андро Єрусалім, Ту єкг на джянес ода, со обачіляпес андре адала дівеса? ¹⁹ Ов пгендя ленґє: — Пал состе Ме на джянав? І оне розвакєрде Лескє: — Пало ода, со пес обачіля ле Ісусога андал Назарет. Ов есас пророкос, зорало андро ода, со кєрелас, те андро лав анґлал о Дейл те анґлал саворе мануша. ²⁰ Лес дине аврі єкг баредер рашая а те амаре пгуредера, гой те засудзінен Лес про мерібе, а паліш премарде Лес про кєрестос. ²¹ А амен самас бійзошне, гой Ов гіно Ода, Саво маїнел те ратинен ле Ізраєль. Та канакє тріто дівес, сар када саворо ачіля. ²² Але варесаве амаре ромнєндар зачудалінде амен. Оне ґейле дадіве тосара кє гробніца ²³ і, сар на аракгле Лескєро тєлос, оне вісаліле і розвакєрде аменґє, со ленґє сікадепес анґєла, саве пгенде, со Ов гіно джівдо. ²⁴ Паліш вареко амаре баратендар ґейле ко гробніца і аракгле одя саворо авка, сар вакєренас о ромня, а Лес одя оне на дикгле. ²⁵ Паліш Ов ленґє пгендя: — Саве тумен наґодявер, сар половкєс тумен патян саворескє, со вакєренас пророка! ²⁶ Чі на маїндя Хрістос те преджян саворо када семведипе, а паліш те заджян андре Пескєрі слава? ²⁷ Паліш кєздиндя ле Моїсєйостар і саворе пророкендар, і пгутердя ленґє саворо, со есас пісіме пал Лесте андро Пісаніє. ²⁸ Кана оне пашес авле ко ода ґав, кай оне джянас, Ісус диня ленґє те джянен, гой Ов камел те джян дуредер. ²⁹ Та оне іґєн манґєнас Лес і вакєренас: — Ач аменца. Аврі іма ратісальол і ачел цма! І Ов заавля андро кгєр і ачіля ленца. ³⁰ Кана Ісус бешелас ленца пажо скамін, Ов іля маро, палікєрдя, препгаґля і диня ленґє. ³¹ Акор пгутердепес ленґєре якга, і оне прінджярде Лес. Та Ов ачіля пріґ ленде надикгадо. ³² Оне кєздинде те вакєрен єкг аврескє: — Чі на лаболас андре аменде о їло, кана Ов вакєрелас аменца пало дром і кана пгутерелас аменґє Пісаніє? ³³ Оне єкгваресте ушіле і ґейле минґ єкгвар андро Єрусалім. Одя оне аракгле андро єкг тган дешуєкг апостолен і саворен, ко есас ленца. ³⁴ Одала ленґє пгенде, со о Рай те чачес джівдісаліля мерібнастар і сікадяпес ле Сімоноскє. ³⁵ Паліш одала дувджяне розвакєрде саворо, со ленца есас про дром, і сар оне прінджярде ле Ісус, кана Ов препгаґля о маро.

Ісус сікавелпес ле сікаденґє

³⁶ Оне минґ вакєренас, кана Коркоро Ісус сікадяпес машкар ленде і пгендя ленґє: — Мірос туменґє! ³⁷ А оне ле даратар аж замувле, бо думіненас, со дикгєн ле духос. ³⁸ Та Ов ленґє пгендя: — Состар сан айсе предараде, і соске тумен на патян? ³⁹ Дикгєн, акєс Мійре васта те Мійре піндре. Ода Ме сом! Худенпес Мандар і дикгєн, бо ко духос тєлос і кокала нане, а, сар дикгєн, кє Манде гін. ⁴⁰ І сар ода пгендя, сікадя ленґє о васта те о піндре. ⁴¹ Та оне радисальонас і чудаліненаспес, та нісар на патянас. Акор Ов лендар пгучля: — Чі гін тумен аде варесо те захан? ⁴² Оне подине Лескє котор пейка мачатар. ⁴³ Ов іля і халас анґлал ленде. ⁴⁴ Паліш Ов пгендя ленґє: — Пало ода Ме вакєравас туменґє, кана минґ сомас туменца: саворо, со гін пісіме пал Манде андро Моїсєйоскєро Законос, ко пророка і андро псалмі, маїнелпес те обачен. ⁴⁵ Акор Ов пгутердя ленґє е ґовді, гой те ахальон Пісаніє, ⁴⁶ і пгендя ленґє: — Пісіме, со Хрістос маїнел те семвединен, а про тріто дівес те джівдісальон ле мерібнастар. ⁴⁷ Анґлал андро Єрусалім, а паліш машкар саворе нийпі андро Лескєро нав вічінена ле манушен те покаїненпес, гой те одмукєнпес ленгє о бійне. ⁴⁸ Тумен вакєрена пало ода саворе манушенґє. ⁴⁹ А канакє Ме бічавав туменґє ода, со обіціндя Мійро Дад. Та тумен ачен андро фоврос, адик на авела пре туменде е зор опрунестар.

Ісус вазделпес про нєбос

⁵⁰ Паліш Ісус ліґєндя лен андал о фоврос кє Віфанія. Одя Ов ваздня Пескєре васта і благословіндя лен. ⁵¹ І обачіляпес авка, кана Ов благословінелас лен, Ов ачіля те дурісальон лендар і кєздиндя те вазденпес про нєбос. ⁵² Акор оне банділе анґлал Лесте і баре радишаґога вісаліле андро Єрусалім. ⁵³ Оне міндик аченас андро храмос і ашаренас ле Девлес.