Иона
Шэро 1
О Иона нашэл катар Дэл
1 О Сагбус о Яхвэ пхэнляс э Ионаски, чявэски э Амиттаески: 2 — Ущи, джя андэ бари диз ки Ниневия тай пхэн манушэнги, о габэри лэнги джюнгалимастар ало джи Мандэ. 3 Ай о Иона кидиняспэс тэ нашэл катар Сагбус Яхвэ андэ Таршыш. Ов гело андэ Яффа, аракхляс карабляс, кай джял андэ Таршыш, покиндяс андар дром, бэшло опэр лэстэ, тэ джял катар Сагбус Яхвэ. 4 Ай о Сагбус о Яхвэ ваздиняс опэр пани бари зорали балвал, тай ваздиндило аякха лачес о пани, кай о карабляс сас газыри тэ хурдёл. 5 О марякя трашанилэ, тай кажни лиляс тэ мангел пэ дэвлэс. Он читэ андэ пани алаи о шэя, савэ сас опэр карабляс, ов тэ локёл. Ай о Иона мукляспэс андэ трюми, пашлило отхэ тай лачес суто. 6 О капитани ало лэстэ тай пхэнляс: — Со сан суто? Ущи, манг тэ Дэвлэс! Файма, Ов кан дикхел амэн, тай амэ на кан мэрас. 7 О марякя пхэнлэ екхаврэски: — Эла чяс жреби тай галяс, андар кастэ амэндэ уло адава хатас. Он читэ жреби, тай о жреби пэло опэр Иона. 8 Дэчи он пхучлэ лэс: — Пхэн амэнги, кон эси дошало адалэ хатаски? Соса казандиес? Катар авэс? Со пхуятар ту сан? Андар со дюнястэ? 9 Ов пхэнляс: — Мэ евреи тай гинав э Сагбус э Яхвэс, э Дэвлэс опрунэс, Саво кердяс о пани тай э пху. 10 О Иона пхукавдяс лэнги, кай ов нашэл катар Сагбус Яхвэ. Кана он адалэстар галилэ, он бут трашанилэ тай пхучлэ: — Со ту кердян? 11 Ай о пани ваздиндёлас май лачес тай лачес, тай дэчи он пхучлэ лэс: — Со амэнги тэ керас туса, тэ тэрдёл о пани ангал амэндэ? 12 — Лэн ман тай чен андэ пани, — пхэнляс ов, — тай ов кан тэрдёл ангал тумэндэ. Мэ джянав, кай адая бари зорали балвал пэли опэр тумэндэ андар мандэ. 13 Ай он лилэ май зоралэс тэ дэн джялдави, тэ пашон ки пху, ай он адава нащи кердэ, вай о пани ваздиндёлас май лачес тай лачес. 14 Дэчи он лилэ тэ манген э Сагбус э Яхвэс: — Сагбус Яхвэ, ма дэ тэ мэрас андар адалэ манушэстэ. О мэрипэ э бидошалэ манушэско мэ на овэл опэр амэндэ, вай Ту, Сагбус Яхвэ, керэс одова, со мангес Ту. 15 Дэчи он лилэ э Ионас, читэ лэс андэ пани, тай о пани тэрдило. 16 О марякя лачес трашанилэ катар Сагбус Яхвэ, кердэ э Сагбуски э Яхвэски курбани тай халэ совля. 17 О Сагбус о Яхвэ бичялдяс барэ мачес, тай ов накхавдяс э Ионас. О Иона сас андэ маческо пэр трин дес тай трин ратя.Шэро 2
О Иона мангел э Дэвлэс
1 Кана сас андэ маческо пэр, о Иона мангелас пэ Дэвлэс э Яхвэс. 2 Ов пхэнляс: — Андэ хурлуки мэ манглём э Сагбус э Яхвэс,тай Ов пхэнляс манги. Андар хорипэ ко дюняс ки мулэнго [1]
мэ динём бэбэря —
тай Ту шунлян ми бэбэря. 3 Ту читян ман андэ хорипэ,
андэ ило ки панеско;
агорадылар ман о паня. Алаи Тэ кубукенги паня
накхлэ опрал мандэ. 4 Мэ пхэнлём:
«Кувдимэ мэ Тэ якхендар;
ай мэ генэ кан дикхав о шужо храми Тинро». 5 О паня учярдэ ман,
о хорипэ агорады ман,
тай э панески чяря колисаилэ мэ шэрэстэ. 6 Ко днас, ко кориня ки горадэнги мэ фулистинём,
о клидя э пхуяки пханлилэ пал мандэ алаи э вахытески, ай Ту, Яхвэ, Дэл минро,
никалдян ман андар хорипэ дживиндэс! 7 Кана о бэшыпэ бытиелас андэ мандэ,
мэ катар Сагбус Яхвэ тюшундым,
тай гело мо мангипэ джи Тутэ,
андэ шужо храми Тинро. 8 Одола, кон гинэл э чюче дэвлэн,
ачявдэ по пакяпэ Туки. 9 Ай мэ лошанэ гиленца кан анав Туки курбанен.
Кай халём совля — кан керав. О кутардипэ — катар Сагбус Яхвэ! 10 О Сагбус о Яхвэ пхэнляс э мачески, тай ов читяс э Ионас опэр пху.