13. Israel hnianga Pathian Thuthlung

Pathianin Israel hei chu Tuipui sena a hruai kâi zoi hnung han, Thlalera a hruai tlung nawk ta a. Ma hmun hi Mosian hruichîmbka mei chok a hmuna ha a chang. Ma tlâng ṭhuta chun mipui hei chun an puan hei an zar ta a.

Pathianin Mosia nih mipui hei hnianga chun thu a hril a, “Ki thupêk hi nin zawma, ki thuthlung hi nin pom phot chun ka roihlu, lal ram Puithiam hei nih hnam inthiang chang nin tih,” a ti a.

Ni inthumka hnungin mipui hei chu thlaraua an hmin chêt hnung chun Pathian chu Sinai tlânga chun a rivân inrûm ri nih kawlinlek nih meikhu nih tongtawrawt ri nânsa vaika ni chun a hong ṭum a. Mosia chai chu tlânga chun hang kai dingin a phal a.

Pathianin a thuthlung chu a pêk a, “Jehova, nin Pathian Aigupta ram sala inthoka nangni ân hruaisuakpu ha ke chang, pathian dang rêng rêng hei chu biak naw roi,” a ti a.

“Milêm chu siamin anni hei chu biak naw roi, Keima hi Jehova, Pathian thîkthu sia chu ke chang. Ki rihming hi sâm mai mai naw roi, cholni chu thianginhlim vaikan hmang unla, ni rukka sûng chu sin thaw nin ti a, a ni sari ni raw chu ni nin ngham ding a chang.

"Ni nu nih ni pa chawimawi rawh. Tual that naw rawh. Uire naw rawh. Iru naw rawh. Khêl hril naw rawh. Ni tualbawm hei nupui chu zuk naw rawh. Ni tualbawmhei thil hrim hrim chu izuk naw rawh,” a ti a.

Kachun Pathianin thupêk sawmka hei chu lung phêk inhnika chunga chun ân zia pêk a, Mosia hniangah chun a pêk a. Ma loi hom chu Pathianin thupêk dang nih inthawi dân an hmang dân ding a pêk sa dên a. Ma dân hei chu an zuia an zawm phot chun Pathianin mal sawm a tia, vênghim tlat a tih ti ân tiam sa den a. Chun ma dân hei chu an zawm naw raw chun Pathianin a hrem ding a chang.

Pathianin Israel hei chu puan in bawl dân ding a riruang angkatak chun a pêk a. Intongkhawmna puan in ti changa ti a, pindan inhnika chu puanzar lian fêka chun a dan a, ma hmuna chun tuhom puanzar lian fê sunga chun Puithiam lal chem ti chai loi chu lût thei naw nih; ma hmuna chun Pathian a om leiin.

Mi tupai Pathian dân inbawsepu chun Pathian hniangah intongkhawmna puan ina chun inthawi dingin ran a hong chawi ding a chang. Ran chu Puithiamin that a ti a, mâichâm chunga chun hâl a ti a, inhlân a tih. Inthawina thisen chun mi anin sualna hei chu inkhum a ti a, Pathian mithmua chun hongin thiang tâng a tih. Pathianin Mosia nih a unâipa Arona chu Putihiam dingin a thlang ta a.

Pathianin ani chu Pathian taka biak ding nih a hnam thlang chang ding nih dân a siam pêk hei chu mipui hei chun zawm an tih ti anin tiam a. Changhomsiala hun tawika hnung chun Pathian thupêk zawm dinga anin tiamna chu inbawse in nânsa vaikan anin sual nawk ta zawk a.

Ni tamka chu Sinai tlânga chun Mosia chu Pathian rêk insawn dingin a thanga. Mosia chu a hong kîr viak tâk naw leiin mipui hei chu an loi hnawng a. Kachun an rângkachak hei chu Arona hnianga chun an hong chawia milem siampêk dingin an ngên ta a.

Kachun Arona chun sehrâtte hmêl inpu milêm a siam pêk ta a. Mipuihei chun inthlaw fêkan thlak milêm hei chu pathian angkan an loi biaka, a hnianga chun an loi inthawi ta a. An chunga chun Pathian chu a ning a thik ta fê a, that rît a tum ta a. Changhomsiala, Mosian Pathian hnianga chun that rît loi dingin ngên a. Pathianin a ṭongiṭaina chu a ngaithlak pêka, kachun that loiin a om ta a.

Tlânga ṭanga a hong ṭumin milêm an isiamhei chu a hmu in Mosia chu a ning a thik ta fê a. Pathianin lungphêk inhnika chunga thu sawmpêk a pêkhei ha hnuaiah a khawng khoi nawi nenga.

Mosia chun milêm a innawitir neng a phit hei chu tuia a chia a, tui chu mipuihei chu ân intir a, Pathianin an chunga hri ân lêngtr a, mi tamka an thi pha ta a.

Mosia chu tlânga chun ân hlui nawk a, mipuihei chu ngaidam dingin Pathian hniangah a ṭonginṭai a. Chun Mosia chun lungphêk a innawitir thlengna dingin a thar lungphêk inhnika a lâka, ma chunga chun thusawmpêk chu ân zia ta a.Ma zoia chun Pathianin Israel hei chu a loi intiamna ram panin a hruai nawk ta a.

Bible chanchin aṭanga lâksuok: Exodas bung 19-34