19. Tenabi-nabi

Lamai tepamulaong tetoo-too nuꞌIsrael, teꞌAlataꞌala nonuju tenabi-nabi eisiira. Tenabi-nabi nopoꞌinepea tetutuunong-tutuunong lamai teꞌAlataꞌala ane nonjaritaa heꞌua eitoo-too.

SiꞌElia heꞌua sotoo tenabi watu siꞌAhab najari tepuang nutoo-too nuꞌIsrael. SiꞌAhab heꞌua tetoo sanu majaat ane nonuju tetoo-too untuk manyomba tedewa tetopenya siBaꞌal. SiꞌElia nonjarita eisiꞌAhab, “Jio umai oujang atau ongolu eiꞌIsrael jaok utuju.” Tegauk eini nogutu siꞌAhab nongoungkul tutuu.

Lamai heꞌua teꞌAlataꞌala nonuju siꞌElia mencoyok eitana sanu jio pinomoiai nutoo moꞌosuk tengees karna siꞌAhab seilu momateinya. Titieleo ane beimbengi, temamanuk nongomuna teroti ane teꞌanes. SiꞌAhab ane tetantaranya nelolo siꞌElia, tapi jio jinaok niira siia. Tesilo watu heꞌua tututuu najari ane tengees jiongo oogo.

Jadi siꞌElia umaꞌo eitana ntaninya. Eitana heꞌua umai sotoo tetimbala ane teunganya sanu notouꞌong sanu noꞌinang karna teondak heꞌua nonyabaaꞌomo moꞌoroꞌong. Tapi siira nonarima siꞌElia, ane teꞌAlataꞌala nogutua teꞌurong pongisiong telabu ane tebotol nulatab antau jio motouꞌong. Siira jio notouꞌong sanu noꞌinang eꞌende nuondak heꞌua. SiꞌElia nomoia ampi heꞌua lasiantoung.

Touk toluntoung satanga, teꞌAlataꞌala nonuju siꞌElia metencile umaꞌo eiꞌIsrael ane monjarita eisiꞌAhab karna Siia kana menyauaꞌonye teujang. Watu siꞌAhab neꞌita siꞌElia siia nonjarita, “Siꞌoo tetoo sanu majaat!” SiꞌElia nonyimbat, “Siꞌoo boi tetoo sanu majaat! Siꞌoo nolinjoꞌimo teꞌAlataꞌala sanu tutuu ane nanyomba teBaꞌal. Omung jojoo tetoo-too nuꞌIsrael umaꞌo eiBuut nuKarmel.”

Jojoo tetoo-too nuꞌIsrael, concoono apagatus limampulutoo tenabi nuBaꞌal, najaok eiBuut nuKarmel. SiꞌElia nonjarita, “Jaok siambengi siꞌemiu kana mombalik teꞌaparcayaong niꞌemiu? Ane teSiopu sanu tutuu, boi Siia nosomba! Ane teBaꞌal sanu tutuu, boi siia nosomba!”

Lamai heꞌua siElia nonjarita einabi-nabi nuBaꞌal, “Sambale sambaang tebengga ane sadiaa tepombee, tapi inyaa metuvu teapi. Siaꞌu kana mogutu sanu selilio. Tedewa atau teꞌAlataꞌala sanu monyimbat mepake teapi, heꞌua sanu kanaboi nosomba.” Karna heꞌua teꞌimam-imam nuBaꞌal nonyadiaa tepombee tapi jio metuvu teapi.

Touk heꞌua tenabi-nabi nuBaꞌal nonggane eiBaꞌal. “Poꞌinepea siꞌami, boBaꞌal!” Seseeleo siira nonggane ane neroroa. Siira valii nomaꞌiti teꞌalae niira, tapi teBaꞌal jio nonyimbat.

Watu beimbengi heꞌua, siꞌElia nonyadiaa tepombee eiꞌAlataꞌala. Siia nonuju tetoo-too nuꞌIsrael nondidiga teogo tolungkaning eipombee heꞌua antau teꞌanes, teꞌayu, ane tetana valii eipapalit nuporampunong heꞌua tututuu monjou.

Lamai heꞌua siꞌElia nonggane, “BoSiopu, teꞌAlataꞌala niꞌAbraham, niꞌIshak ane niYakub, popoꞌitaa eisiꞌami eieleo eini ane Siꞌoo teꞌAlataꞌala nuꞌIsrael ane siaꞌu eini tetoponuut-Mu. Simbati siaꞌu antau tetoo-too eini moꞌotoi, Siꞌoo sanu tututuu.”

Selengaan teapi nenyau lamai telangit norampung teꞌanes, teꞌayu, tevatu, tetana ane teogo sanu eipapalit nuporampunong heꞌua. Watu tetoo-too neꞌita heꞌua, siira noposuncul eitana ane nonjarita, “TeSiopu heꞌua sanu tututuu! TeSiopu heꞌua sanu tututuu!”

Lamai heꞌua siꞌElia nonjarita, “Inyaa nopatuvaya maampo sotoo lamai tenabi-nabi nuBaꞌꞌal heꞌua monyalamata teꞌalaenya!” Tetoo-too heꞌua neraꞌop tenabi-nabi nuBaꞌal. Lamai heꞌua siꞌElia nongomung siira lamai ampi heꞌua umaꞌo eiselibok telembok ane nomate siira nonuruꞌi teparenta nuꞌAlataꞌala.

SiꞌElia nonjarita eisiꞌAhab tepuang, “Petencilemo eꞌeini umaꞌo tekota, karna teujang menyaumo.” Beimbengi heꞌua telangit najari meitong, ane nenyaua teujang sanu morombak tutuu. TeꞌAlataꞌala nonouka teondak ane nepopoꞌitaa Siia tututuu teꞌAlataꞌala.

Touk siNabi Elia neteengkat lamai tejuniaa, teꞌAlataꞌala nomile siꞌElisa majari tenabi-Nya. TeꞌAlataꞌala nepake siꞌElisa nogutu mabari tegauk sanu mabaraka. Sangkaning, siNaꞌaman, tetopomimpin nutantara numusu, umai tepees teꞌuli. Siia neꞌeepemo sima siꞌElisa, jadi siia umaꞌo ane nomongi eisiꞌElisa mepeꞌeondok siia. SiꞌElisa nonuju siia umaꞌo moleep pitungkaning eiBangkalang nuYordan.

Watu tepamulaongnya siNaꞌaman nongoungkul ane jio seilu monggauka heꞌua karna siia nomikir teparenta heꞌua modoyo. Tapi siia netencile tepikiran ane noleep pitungkaning eiBangkalang nuYordan. Gananya pitungkaning, siia noleep teꞌalaenya tutuu neondoko! TeꞌAlataꞌala neondoka siia.

TeꞌAlataꞌala nonuju mabari tenabi ntaninya. Siira jojoo nonuju tetoo-too inyaa manyomba tebarhala. Monggauka sanu maꞌadil ane sanu mombosi. Tenabi-nabi nolambota eitoo-too, ane siira jio mengondok monggauka sanu majaat ane jio monuruk teparenta nuꞌAlataꞌala, teꞌAlataꞌala kana majaok, ane Siia mehukum siira.

Biasa tetoo-too jio nonuruk teꞌAlataꞌala. Siira nonggauka sanu majaat einabi-nabi ane sasangkaning nomate siira. Sangkaning sNabi Yeremia inavua eilalong nubumbun antau siia maate. Siia mentama eilalong nugogor sanu umai eilalong nubumbun. Tapi tepuang nongagalani siia ane nonuju tevotuang-votuangnya nonggiur siYeremia nesuvung lamai tebumbun jijiompo siia maate.

Tenabi-nabi heꞌua tatarus nonjaritaa sima teꞌAlataꞌala, maampo tetoo-too nengkeles siira. Siira nolambota eitoo-too, ane siira jio matoba, teꞌAlataꞌala kana mopoꞌoropu siira. Siira nolambota valii eitoo-too sima teMesias sanu jinanjia nuꞌAlataꞌala kana majaok.

Eini tejarita nuꞌAlataꞌala lamai 1 teRaja-raja 16-18; 2 teRaja-raja 5; siYeremia 38.