హబక్కూకు

Chapter 1

హబక్కూకు ఫిర్యాదు

¹ ప్రవక్త అయిన హబక్కూకు దగ్గరికి దర్శనరీతిగా వచ్చిన దేవోక్తి.

² <<యెహోవా, నేను సహాయం కోసం మొర్రపెట్టినా నీవెన్నాళ్లు ఆలకించకుండా ఉంటావు?

బలాత్కారం జరుగుతున్నదని నేను నీకు మొర్రపెట్టినా నువ్వు రక్షించడం లేదు.

³ నన్నెందుకు దోషాన్ని చూడనిస్తున్నావు?

బాధను నీవెందుకు చూస్తూ ఉండిపోతున్నావు?

ఎక్కడ చూసినా నాశనం, బలాత్కారం కనబడుతున్నాయి.

జగడం, కలహం రేగుతున్నాయి.

⁴ అందువలన ధర్మశాస్త్రం నిరర్థకమై పోయింది.

న్యాయం జరగకుండా ఆగిపోయింది.

భక్తి హీనులు నీతిపరులను చుట్టుముడుతున్నారు.

న్యాయం చెడిపోతున్నది.

యెహోవా జవాబు

⁵ అన్యజనుల్లో జరుగుతున్నది చూడండి, ఆలోచించండి. నిర్ఘాంతపొండి.

మీ కాలంలో నేనొక కార్యం చేస్తాను. అలా జరుగుతుందని ఎవరైనా మీకు చెప్పినా మీరు నమ్మరు.

⁶ కల్దీయులను ^[1] నేను రేపుతున్నాను. వినండి. వారు తమవి కాని ఉనికిపట్టులను ఆక్రమించాలని భూదిగంతాలదాకా సంచరించే ఉద్రేకం గల క్రూరులు.

⁷ వారు ఘోరమైన భీకర జాతి.

వారు ప్రభుత్వ విధులను తమ ఇష్టం వచ్చినట్టు ఏర్పరచుకుంటారు.

⁸ వారి గుర్రాలు చిరుతపులుల కంటే వేగంగా పరుగులెత్తుతాయి.

రాత్రిలో తిరుగులాడే తోడేళ్లకంటే అవి చురుకైనవి.

వారి రౌతులు దూరం నుండి వచ్చి తటాలున చొరబడతారు.

ఎరను పట్టుకోడానికి గరుడ పక్షి వడిగా వచ్చేలా వారు వస్తారు.

⁹ వెనుదిరిగి చూడకుండా దౌర్జన్యం చేయడానికి వారు వస్తారు.

ఇసుక రేణువులంత విస్తారంగా వారు జనులను చెర పట్టుకుంటారు.

¹⁰ రాజులను అపహాస్యం చేస్తారు.

అధిపతులను హేళన చేస్తారు.

ప్రాకారాలున్న దుర్గాలన్నిటిని తృణీకరిస్తారు.

మట్టి దిబ్బలు వేసి వాటిని పట్టుకుంటారు.

¹¹ తమ బలమే తమ దేవుడనుకుంటారు.

గాలి కొట్టుకుని పోయేలా వారు కొట్టుకు పోతూ అపరాధులౌతారు.

హబక్కూకు రెండవ ఫిర్యాదు

¹² యెహోవా నా దేవా, నా పరిశుద్ధ దేవా, ఆదినుండి నువ్వున్న వాడవు కావా?

మేము మరణించము.

యెహోవా, తీర్పుకే నువ్వు వారిని నియమించావు.

ఆశ్రయ దుర్గమా, మమ్మల్ని దండించడానికే వారిని పుట్టించావు.

¹³ నీ కనుదృష్టి దుష్టత్వం చూడలేనంత నిష్కళంకమైనది గదా.

బాధించేవారు చేసే దుర్మార్గతను బాధను నువ్వు చూడలేవు గదా.

కపటులను నువ్వు చూసి కూడా,

దుర్మార్గులు తమ కంటే ఎక్కువ నీతిపరులను నాశనం చేయగా చూసి కూడా ఎందుకు ఊరుకున్నావు?

¹⁴ పాలించే వారెవరూ లేని చేపలతో, పాకే పురుగులతో నువ్వు మనుషులను సమానులనుగా చేశావు.

¹⁵ వాడు గాలం వేసి మనుషులందరిని గుచ్చి లాగుతున్నాడు.

ఉరులు పన్ని చిక్కించుకుంటున్నాడు.

వలతో వారిని వేసుకుని సంతోషంతో గంతులు వేస్తున్నాడు.

¹⁶ కాబట్టి వలల వలన మంచి రాబడి, పుష్టినిచ్చే భోజనం తనకు దొరుకుతున్నాయని వాడు తన వలకు బలులు అర్పిస్తున్నాడు.

తన వలలకు సాంబ్రాణి వేస్తున్నాడు.

¹⁷ వాడు అస్తమానం తన వలలో నుండి దిమ్మరిస్తూ ఉండాలా? ఎప్పటికీ మానకుండా వాడు జాతులను దయలేకుండా హతం చేస్తూ ఉండాలా?>>

Chapter 2

¹ ఆయన నాకు ఏమి సెలవిస్తాడో, నా వాదం విషయమై నేనేమి చెబుతానో చూడడానికి నేను నా కావలి స్థలంపైనా గోపురంపైనా కనిపెట్టుకుని ఉంటాననుకున్నాను.

యెహోవా జవాబు

² యెహోవా నాకు ఇలా చెప్పాడు. చదివేవాడు పరిగెత్తేలా,

నీవు ఆ దర్శన విషయాన్ని పలక మీద స్పష్టంగా రాయి.

³ ఆ దర్శన విషయం రాబోయే కాలంలో జరుగుతుంది. అది ఎంత మాత్రం విఫలం కాదు.

అది ఆలస్యమైనా తప్పక నెరవేరుతుంది. దాని కోసం కనిపెట్టు.

అది ఆలస్యం చేయక వస్తుంది.

⁴ మనిషి ఆత్మ తనలో తాను ఉప్పొంగుతుంది. అది యథార్థంగా ఉండదు.

అయితే నీతిమంతుడు తన విశ్వాసమూలంగా బ్రదుకుతాడు.

⁵ ద్రాక్షారసం ^[1] గర్విష్టి యువకుణ్ణి మోసం చేసి నిలవననీయకుండా చేస్తుంది.

అతని ఆశలను పాతాళమంతగా విస్తరింప జేస్తుంది. మరణం లాగా అది తృప్తినొందదు.

అతడు సకలజనాలను వశపరచుకుంటాడు. ప్రజలందరినీ తన కోసం సమకూర్చుకుంటాడు.

⁶ తనది కాని దాన్ని ఆక్రమించి అభివృద్ధి పొందిన వాడికి బాధ.

తాకట్టు సొమ్మును నీవు ఎంతకాలం పట్టుకుంటావు?

వాడు ఎన్నాళ్లు నిలుచును అని చెప్పుకుంటూ వీరంతా ఇతని విషయం ఉపమానరీతిగా అపహాస్యపు సామెత ఎత్తుతారు గదా.

⁷ పళ్ళు కొరికే వారు హటాత్తుగా వస్తారు.

నిన్ను హింస పెట్టబోయేవారు లేస్తారు.

నీవు వారికి దోపుడు సొమ్ముగా ఉంటావు.

⁸ నువ్వు అనేక రాజ్యాలను దోచుకున్నావు కాబట్టి మిగిలిన ప్రజలంతా నిన్ను దోచుకుంటారు.

పట్టణాలకు వాటిలోని నివాసులకు నీవు చేసిన హింసాకాండను బట్టి, బలాత్కారాన్ని బట్టి, నిన్ను కొల్లగొడతారు.

⁹ తనకు అపాయం రాకుండా తన నివాసాన్ని ఎత్తుగా చేసుకుని,

తన యింటివారి కోసం అన్యాయంగా లాభం సంపాదించుకొనే వాడికి బాధ.

¹⁰ నీవు చాలా మంది జనాలను నాశనం చేస్తూ నీ మీద నీవే అవమానం తెచ్చుకున్నావు.

నీ దురాలోచన వలన నీకు వ్యతిరేకంగా నీవే పాపం చేశావు.

¹¹ గోడల్లోని రాళ్లు మొర్ర పెడుతున్నాయి.

దూలాలు వాటికి జవాబిస్తాయి.

¹² రక్తపాతం మూలంగా పట్టణం కట్టించే వారికి బాధ.

దుష్టత్వం మూలంగా ఊరిని స్థాపించే వారికి బాధ.

¹³ జాతులు ప్రయాసపడతారు గాని అగ్ని పాలవుతారు.

వ్యర్థమైన దాని కోసం కష్టపడి ప్రజలు క్షీణించిపోతారు.

ఇది సేనల ప్రభువు యెహోవా చేతనే అవుతుంది.

¹⁴ ఎందుకంటే సముద్రం జలాలతో నిండి ఉన్నట్టు భూమి యెహోవా మహాత్మ్యాన్ని గూర్చిన జ్ఞానంతో నిండి ఉంటుంది.

¹⁵ తమ పొరుగు వాణ్ణి నగ్నంగా చూడాలని విషం కలిపి వారికి తాగించి వారిని మత్తులుగా చేసేవారికి బాధ.

¹⁶ ఘనతకు మారుగా అవమానంతో నిండిపోతావు.

నీవు కూడా తాగి నీ నగ్నత కనపరచుకుంటావు.

యెహోవా కుడిచేతిలోని పాత్ర నీ చేతికి వస్తుంది.

అవమానకరమైన వాంతి నీ ఘనత మీద పడుతుంది.

¹⁷ లెబానోనునకు నీవు చేసిన బలాత్కారం నీ మీదికే వస్తుంది.

నీవు పశువులను చేసిన నాశనం నీ మీదే పడుతుంది.

దేశాలకు, పట్టణాలకు, వాటి నివాసులకు, నీవు చేసిన హింసాకాండను బట్టి, ఇది సంభవిస్తుంది.

¹⁸ చెక్కిన విగ్రహం వల్ల నీకు ప్రయోజనమేమిటి?

బొమ్మను చెక్కిన శిల్పి, పోత పోసిన వాడు కేవలం అబద్ధాలు బోధించే వాడు.

తాను చేసిన పోత విగ్రహాలపై నమ్మిక ఉంచడం వలన ప్రయోజనమేమిటి?

¹⁹ కర్ర విగ్రహాలను చూసి మేలుకో అనీ, మూగరాతి ప్రతిమలను చూసి లే అనీ చెప్పేవాడికి బాధ.

అవి ఏమైనా బోధించగలవా?

దానికి బంగారంతో, వెండితో పూత పూశారు గానీ దానిలో శ్వాస ఎంత మాత్రం లేదు.

²⁰ అయితే యెహోవా తన పరిశుద్ధాలయంలో ఉన్నాడు.

లోకమంతా ఆయన సన్నిధిలో మౌనంగా ఉండు గాక.

Chapter 3

హబక్కూకు ప్రార్థన

¹ ప్రవక్త అయిన హబక్కూకు చేసిన ప్రార్థన (వాద్యాలతో పాడదగినది).

² యెహోవా, నిన్ను గూర్చిన వార్త విని నేను భయపడుతున్నాను.

యెహోవా, ఈ సంవత్సరాల్లో నీ కార్యం నూతన పరచు.

ఈ రోజుల్లో నీ పనులు తెలియచెయ్యి.

కోపంలో కనికరం మరచిపోవద్దు.

³ దేవుడు తేమాను ^[1] లో నుండి వచ్చాడు.

పరిశుద్ధ దేవుడు పారాను ^[2] లో నుండి వేంచేస్తున్నాడు (సెలా).

ఆయన మహిమ ఆకాశమండలమంతటా కనబడుతున్నది.

భూమి ఆయన స్తుతితో నిండి ఉంది.

⁴ ఆయన హస్తాలనుండి కిరణాలు వెలువడుతున్నాయి.

అక్కడ ఆయన తన బలం దాచి ఉంచాడు.

⁵ ఆయనకు ముందుగా తెగుళ్లు నడుస్తున్నాయి.

ఆయన అడుగుజాడల్లో అరిష్టాలు వెళ్తున్నాయి.

⁶ ఆయన నిలబడి భూమిని కొలిచాడు. రాజ్యాలను కంపింప జేశాడు.

నిత్య పర్వతాలు బద్దలైపోయాయి.

పురాతన గిరులు అణిగి పోయాయి. ఆయన మార్గాలు శాశ్వత మార్గాలు.

⁷ కూషీయుల డేరాల్లో ఉపద్రవం కలగడం నేను చూశాను.

మిద్యాను దేశస్థుల గుడారాల తెరలు గజగజ వణికాయి.

⁸ యెహోవా, నదుల మీద నీకు కోపం కలిగిందా?

నదుల మీద నీకు ఉగ్రత కలిగిందా?

సముద్రం మీద నీకు ఆగ్రహం కలిగిందా? నువ్వు నీ గుర్రాల మీద స్వారీ చేస్తూ నీ రక్షణ రథం ఎక్కి రావడం అందుకేనా?

⁹ విల్లు వరలోనుండి తీశావు. బాణాలు ఎక్కుపెట్టావు.

భూమిని బద్దలు చేసి నదులు ప్రవహింపజేశావు.

¹⁰ పర్వతాలు నిన్ను చూసి మెలికలు తిరిగాయి.

జలాలు వాటిపై ప్రవాహాలుగా పారుతాయి.

సముద్రాగాధం ఘోషిస్తూ తన కెరటాలు పైకెత్తుతుంది.

¹¹ నీ ఈటెలు తళతళలాడగా ఎగిరే నీ బాణాల కాంతికి భయపడి సూర్యచంద్రులు తమ ఉన్నత నివాసాల్లో ఆగిపోతారు.

¹² బహు రౌద్రంతో నీవు భూమి మీద సంచరిస్తున్నావు.

మహోగ్రుడివై జాతులను అణగదొక్కుతున్నావు.

¹³ నీ ప్రజలను రక్షించడానికి నీవు బయలుదేరుతున్నావు.

నీవు నియమించిన అభిషిక్తుణ్ణి రక్షించడానికి బయలు దేరుతున్నావు.

దుష్టుల కుటుంబికుల్లో ప్రధానుడొకడైనా ఉండకుండాా వారి తలను మెడను ఖండించి నిర్మూలం చేస్తున్నావు (సెలా).

¹⁴ పేదలను రహస్యంగా మింగివేయాలని ఉప్పొంగుతూ తుఫానులాగా వస్తున్న యోధుల తలల్లో వారి ఈటెలే నాటుతున్నావు.

¹⁵ నీవు సముద్రాన్ని తొక్కుతూ సంచరిస్తున్నావు.

నీ గుర్రాలు మహాసముద్ర జలరాసులను తొక్కుతాయి.

¹⁶ నేను వింటుంటే నా అంతరంగం కలవరపడుతున్నది. ఆ శబ్దానికి నా పెదవులు వణుకుతున్నాయి. నా ఎముకలు కుళ్లిపోతున్నాయి. నా కాళ్లు వణకుతున్నాయి. జనాలపై దాడి చేసే వారు సమీపించే దాకా నేను ఊరుకుని బాధ దినం కోసం కనిపెట్టవలసి ఉంది.

¹⁷ అంజూరపు చెట్లు పూత పట్టకపోయినా,

ద్రాక్షచెట్లు ఫలింపక పోయినా,

ఒలీవచెట్లు కాపులేక ఉన్నా,

చేనులో పైరు పంటకు రాకపోయినా,

గొర్రెలు దొడ్డిలో లేకపోయినా, కొట్టంలో పశువులు లేకపోయినా,

¹⁸ నేను యెహోవా పట్ల ఆనందిస్తాను.

నా రక్షణకర్తయైన నా దేవుణ్ణి బట్టి నేను సంతోషిస్తాను.

¹⁹ ప్రభువైన యెహోవాయే నాకు బలం.

ఆయన నా కాళ్లను లేడికాళ్లలాగా చేస్తాడు.

ఉన్నత స్థలాల మీద ఆయన నన్ను నడిపిస్తాడు.