1. Ja jas kꞌulaxiꞌiꞌ

Jach ek' ja b'a sb'ajatanil jastik ch'ak k'ulaxuki'. Bꞌa wakeꞌ kꞌakꞌuj ja Dyosiꞌ chꞌak skꞌuluk ja lu´umkꞌinaliꞌ sok spetsanil jastik yi´ojiꞌ. Jaxa tiwa ti cho skꞌulan ja luꞌmiꞌ, kꞌikꞌinalni ay ajyiꞌa sok meyni ay sbꞌaꞌalaꞌ sok mini jas kꞌulubꞌal ja bꞌa sat luꞌuma´. Pe jaxa yespiritu ja Dyosi´ tini wan nijkel ekꞌ bꞌa sat jaꞌaꞌ.

Jaxa tiwa ti yalaꞌ ja Dyosiꞌ: "Aꞌa kꞌulaxuk ja lijpumiꞌ" Ti lijpiꞌaꞌ. Ja Dyosi´yila´ ke lijpumiꞌ ke jelni lekaꞌ ya´ sbꞌi´iluk "kꞌakꞌuj". Ti spilaꞌ ja bꞌa kꞌikꞌinaliꞌ, jaxa kꞌikꞌinaliꞌ ya´ sbꞌi´iluk "Aꞌkwal". Ja Dyosi´ skꞌulan ja lijpumiꞌ ja bꞌa sbꞌajtanil kꞌakꞌuj ja bꞌa jastik chꞌak skꞌulukiꞌ.

Ja bꞌa xchabꞌil kꞌakꞌujiꞌ , ja Dyosiꞌ skꞌulan ja satkꞌinal ja xchaꞌanil ja luꞌumi´. Ja yeꞌni skꞌulan ja satkꞌinali´ spilaꞌ ja jaꞌi.

Ja b'a yoxil k'ak'uji', ja Dyosiꞌ kꞌumaniꞌ sok ti spilaꞌ ja jaꞌ ja bꞌa jas takiniꞌ. Ja bꞌa takin ayiꞌ yaꞌ sbꞌiꞌiluk "luꞌum", jaxa jaꞌi yaꞌ sbꞌi´iluk "niwan pamapaja.ꞌ" Ya Dyosiꞌ yilaꞌ ke jel lek ja jas skꞌulaniꞌ.

Jaxa tiwa ja Dyosi' yala': "Ja b'a lu'umi' a'a ch'ak ajyuk spetsanil tik'e' te' jumasa' sok yal k'ul jumasa'." Jachni ek' jastal ita'. Ja Dyosi' yila' ke ja jas sk'ulani' lekni'a'.

Ja b'a xchanil k'ak'uji ja b'a jas k'ulaxi', ja Dyosi' k'umani' sok sk'ulan ja k'a'uji', ja nan ixawi' sok ja k'anal jumasa'. Ja Dyosi' ch'ak sk'uluk b'a oj ya' yijlab' ja lu'umi', b'a oj spil ja sat k'ak'uji' sok ja a'kwali', ja yixawil ja jab'ili' sok ja jab'il jumasa'. Ja Dyosi' yila' ke ja jas sk'ulani' lekni'a'.

Ja b'a sjo'il k'ak'uji, Ja Dyosi' k'umani' sok sk'ulan spetsanil ja sb'a'al ja ja'i' sok spetsanil ja yal chan jumasa'. Ja Dyosi' yila' ke lekni'a' sok sk'ulan bendisyar.

Ja b'a swakil k'ak'uji ja b'a jas k'ulaxi, Ja Dyosi' yala': "A'ch'ak k'ulaxuk spetsanil tik'e' chante' jumasa' ja b'a lu'umi'" Sok jachni ek'a ja jastal yala' ja Dyosi'. Jujuntik chante' b'a korral, jujuntik wa skicha sb'aje' b'a sat lu'um sok jujuntik chnate' b'a yoj k'ul. Jaxa Dyosi' yila' ke lekni'a'.

Jaxa tiwa', ja Dyosi' ti yala'a': "La jk'ultik ja winiki' ja jastalotiki', nab'al junxta oj ajyuke' jastal ke'ntik. Ja ye'nle'i' ye'naka ay sk'ab'e' ja jastik ay ja b'a satlu'umi' sok spetsanil ja chante' jumasa'."

Jaxa Dyosi' ti syama' t'un ts'ub'il lu'uma', ti stojb'es jun winika' sok yani' ya och yik'a' b'a ojni ajyuk sak'anila'. Ja winik iti' sb'i'ilan Adán. Ja Dyosi' ya ajyuk jun werto ja b'a oj ajyuk ja Adani', tini ya ajyuk tiwa b'a oj stalna' ja werto'.

Ja bꞌa snalan ja werto, ja Dyosiꞌ stsꞌunuꞌ chꞌabꞌ tikꞌeꞌ teꞌ jumasaꞌ: ja teꞌ bꞌa ay sakꞌaniliꞌ sok ja teꞌ bꞌa oj jnaꞌtik jastik lekiꞌ sok ja jas mi lekukiꞌ. Ja Dyosiꞌ yalyabꞌ ja Adaniꞌ ke oj bꞌobꞌ sloꞌ chikan jas sat teꞌilukaꞌ ja bꞌa werto, kechan mi oj bꞌobꞌ sloꞌ ja sat te bꞌa oj jnaꞌtik jastik lekiꞌ sok ja jas mi lekukiꞌ. Ta sloꞌonikꞌa ja sat teꞌ itiꞌ, ojni chamukaꞌ.

Jaxa Dyosiꞌ ti yalaꞌaꞌ: "Mini lekuk ja lom stuchꞌilniꞌ ja winikaꞌ". Yuj mini juneꞌ ja chanteꞌ jumasaꞌ oj bꞌobꞌ koltajuk yuj ja Adaniꞌ.

Ja yuj ja Dyosiꞌ yaꞌ ochyilek swayel ja Adaniꞌ. Jaxa tiwa ja Dyosiꞌ ti yaꞌ elyiꞌ junuk ja xaꞌax ja Adaniꞌ sok xaꞌaxiꞌ skꞌulan jun ixuk sok ti yi´ajan yi´aj.

Ja yajni yilaꞌ ja Adaniꞌ ti yalaꞌaꞌ: "¡Lekꞌaylek!" ¡Ja yeꞌni jach jastal keꞌna! Keꞌa sbꞌiꞌiluk ꞌwinikꞌ, yuj ti kꞌulaxiꞌ bꞌa winik." Ja yuj ja jawiꞌ, jun winik wa xyakan ja snan statiꞌ sok junetaniꞌ oj ajyuk sok ja xcheꞌumaꞌ.

Ja Dyosiꞌ skꞌulan ja winik sok ixuk jastalniꞌ ja yeꞌni. Skꞌulan bendisyar sok ti yalyabꞌyeꞌa:"¡Aꞌa ayjuk jitsan ja wuntikilex sok ja wijex sok bꞌutꞌuwik ja luꞌumkꞌinali!" Ja Dyosiꞌ yilaꞌ ke ja jasnakaꞌ skꞌulunejiꞌ jelnakaꞌ lek sok jelni gusto ay sok jasnakaꞌ skꞌulunejiꞌ. Spetsanil ja itiꞌ janiꞌ ekꞌ ja bꞌa swakil kꞌakꞌuj ja bꞌa jas kꞌulaxi´iꞌ.

Yajni eljul ja sjukil kꞌakꞌujiꞌ , ja Dyosiꞌ chꞌaktani skꞌuluk ja yaꞌtelaꞌ. Ja yuj ja Dyosiꞌ jijliniꞌ bꞌa spetsanil ja jasnaka wan skꞌulajeliꞌ. Ja yeꞌni skꞌulan bendisyar ja sjukil kꞌakꞌujiꞌ sok spilaniꞌaꞌ, yuj ja bꞌa skꞌakꞌujil itiꞌ ja Yeꞌni jijiliniꞌ sok ja bꞌa yaꞌtela´. Ja Dyosiꞌ jachni chꞌak skꞌul ja jastal iti ja luꞌumkꞌinalaꞌ sok spetsanil ja jastiknakaꞌ ay ja bꞌa lu´umiꞌ.

Xcholjel bꞌa jas ekꞌel ja bꞌa Sjuꞌunil ja Dyosiꞌ bꞌa Génesis 1-2