TÖPÖ SAIPALÖ NOI I TÖPÖ NÖ TÖ TAMA JAIO NOI ITÖ

Capitulo 1

¹ Teofilo, ipa wajeta töna sa tö tosokama somata noi, i tökö na Jesus nö tö tama noi itö, tö wapama naio noi itö ina kipi satö tosokopalö ma. ² Jutumösökö pata namö Jesús a ju ko onö piasalo, kamani i töpö simawi i töpö saipalö nö, Jesus kama janepolepö lotete epi, itö pi na kamani i töpö saipalöwi, i töpö nö tö tama jaio pö tö kule itö wösö ma. ³ Jesus nomasowi itö nojana, cuarenta (40) wakala töna kamani i töpö saipalö noi i töpö na sateje epi a pi tapamo kuati ma, pitili töna Jesus “toia” totia apa kopaso ma, ina töpö pi ku totio opa pö töna. Ia i töpö na, Tiosö kaikanamowi itö wösö naio ma. ⁴ Ai tö wakala na kamani i töpö saipalö noi, i töpö kai na a iapalo naio pa: -- Ji Jerusalen tö uli na makö opio paio pökö, jisia makö opilata ipa pöa pata nö kamaka na tö toto piale, itö tota totia apa paitakö pökö. I töna kamaka na sa japalo waikio ma. ⁵ Juan nö ma tu na makö mai oma sisa ma maike, ji makö liki waia pi tatejeto ta Tiosö janepolepö nö makö mai oma piasalo--. ⁶ Ina i töpö na Jesus ku ia, töpö japalo jötöta nö: --¿Kaikana, jukiki Israel wa töpö kaikana lotetea palama apa ko pia alukule?--. ⁷ Ina töpö ku ia, Jesus a japalo jöto kota nö: --Itö wakala liki ipa pöa pata nö itö wakala taö öpa sisa, kamaka nö itö wakala taöpo pi topa apa naio ti; ⁸ Maike, waia kamaka na Tiosö Janepolepö lotete epi itö titikö ia, makö loteteapalo opa ia, Jerusalen tö uli pata na sa wösö pökö. Judea tö ulina sa wösö pökö. Samaria tö uli na naiwö. Itö uli pewö pata na kamaka nö sa wösö jötöpo totio opa pökö--. Ina Jesus ku ma. ⁹ Itö nojana, i töpö pewö mamo tateja apa soa ta, a ösöpo ko onöma, i töpö nö a mö jituja jaia sotia taja ai ilasi tö nö a sosa totia apa kotakö laso ma. ¹⁰ Jesus sua ösa kopalö ia, ia na töpö mamo tateja jaia soa ta, jalo ösö ausi ipi ösö na polakapi ai töpö jalokö nö töpö öpa soa pötakö solö ma. ¹¹ I töpö japalo sota nö: --Galilea tili pö, ¿Wina makö pi ku salo jutumösökö pata na ma tö mö jaitia köle?, Ji Jesus jua kua kona sole, ina a ju kua kota solö piasalo--. Ina töpö ku ma. ¹² Ina tö kua ia, jiima tö Olivos jilowi ia töpö sapa kopalo nö, Jerusalen tö uli na töpö jua sapa kopa solö ma. Jerusalen tö uli na i jiima tö kuo jöka apa sota ma. ¹³ Saia na töpö kutawi ia töpö waloa kokö ma, töpö mita pasiowi i jösöka a sai kuo pasio ma, ia töpö tua kopölö ma. Ia Jesus nö töpö saipalö noi i töpö kokamo ma: Pedro, Juan, Santiago, Andres, Felipe, Tomas, Bartolome, Mateo, Santiago liki Alfeo pilupa kuo pasio ma, Simon liki Celote tö kuo pasio ma, Jacobo pilupa Judas. Ina kipi töpö kokamo ma. ¹⁴ I topö liki, itö wakala pewö na Tiosö na töpö nako kokamo totio opati ma. I töpö japalo piasalo, töpö kokamotati pa, Jesus po oso töpö, Jesus pöpöna Maria, ai tiko töpö su naiwö; ina kipi töpö kokamota naitio ma. ¹⁵ Ina tö kua ta, ai tö wakala na ciento veinte (120) Jesus na sanöma töpö sötapalowi töpö kokamoti pa Pedro öpa sotalo nö, a japalo sota ma: ¹⁶ --Ipa ai pö. Sutu upa David na Tiosö Janepolepö japaloma Judas nö Jesus a totokö noi i töna ina Tiosö Wajeta tö tosokama kuti köle. Itö tosokama ku pöle itö pewö kua waikipaso ma. ¹⁷ I Judas liki, kama samakö pewö kuo sotama, kamisamakö na a ju naitio ma. ¹⁸ Ia nö wanisana tö tama noi itö pi na, kamani sitipa sua jötölö noi itö nö ai masita tö uli noa tapalö ma; ia, pila je nö a kea wölöpaso ma, a pewö waniapalo nö a isiki pewö jalaso ma. ¹⁹ Itö liki Jerusalen tili töpö nö i tö jininö nö, masita te uli noa tapalö noi itö uli Acéldama tö uli jiloa sopalö ma, itö jilo liki, “ii tö uli” ina tö uli jilo kuaö. ²⁰ Tiosö Wajeta tö Ama tö jilowi, pina itö kuti köle: "Poke epi a sai kutio pökö, ai tö kuo ma apa pökö". Ina tö ku naia sota köle: "Ia wani tatapajo tö liki i ai tö nö tö tatapajo sua nomonö pökö”. Ina Ama tö tosokama na, ina tö kuti köle. ²¹ Ina tö kua kötönö, Judas pi na kamaka na aitö söta naia kopaso pökö, kamaka kaina, Jesus toia kopaso noi itö wösö naio pö töna. Jisia Jesus kua soata kamaka kai pewö na a nokapalo naio sotio ma a aki. ²² Juan nö Jesus mai opamanö noi, i taja kamisa makö na a nokapalo kolo kua naipalo nö, a nokapalo naio sotio pa, jutumösökö pata namö Jesus ösa kopasolö noi ia aki. Ai wa saipaso wi, i wa nö kamisamakö kai na Jesus toia kopaso noi, i wa tö wösö naio piasalo--. ²³ Ina a ku ia, polakapi töpö jimöpalö ma; Jose a jilowi a maike Barsabas a jilo naiowi a ia na Justo töpö kuto naio ma, Matias, polakapi i töpö jimöpalö ma. ²⁴ Ina tö kuanö Jesus na töpö nokapalowi i Tiosö na töpö japalo sota nö:--Kaikana, kau nö sanöma wa töpö osi taö öpa sisa köle. Ina tö kua kötönö kau nö, Judas tatapajamo pia noi itö tatapajo tama pö a namo simöpa. ²⁵ Jesus nö wa wösö pö töna Judas saipalö ma, maike, wanisana tö tama pasio nö, wa kili taö pasio ma apama, ina a kua pasio nö, kama julasolö pö töna kamani itö uli saia pasipalö ma--. ²⁶ Ina töpö japalo ku ia, Matias a namo sima jötökö ma. Ia doce (12) töpö kua ko sopaso ma.

Capitulo 2

¹ Polakapi mama asawösö na Tiosö pata nö, kama pata simowi itö tosokokö nö Moises na tö totokö ia, Moises nö judío tili töpö na itö totokö noi itö wakala pi na töpö pi mönajapalo sinimowi itö wakala Pentecostes tö wakala jilowi itö wakala na Jesus na töpö nokapalowi i töpö pewö kokamo ma. ² Töpö kokamo ta, jutumusökö pata na ipoko tö pata tululumo kuawina ina tö kua soa pötakö ma, ina tö kuanö saia osimö pewö na töpö lojotia ta, tö pata jino opa ma. ³ Itö nojana, koataka si kulena ina tö kui sami ipö töpö jösöka na tö sölöja jötöja apöle itö tapa apa ma. ⁴ Ina tö kuanö, Tiosö Janepolepö lotete epi itö nö töpö osi masökö pewö manököa totia opökö ma. Ina tö kuanö, tiko töpö kai na töpö japalo totio opa soa pötakö ma. Tiosö Janepolepö japalo ia, sami ipö töpö japalo tolea nomatalo opa ma. ⁵ Itaja Jerusalen tö uli pata na, tikiamö judio töpö pewö kuomö kuowi töpö nö, Tiosö simowi itö tamatiwi i töpö kutio ma. ⁶ Tö tululumo pöle itö jininö nö, sateje epi ai töpö kokamonaso ma, kamani itö kai na, Jesus na töpö nokapalowi i töpö japalo totio opa ia, töpö pewö pi ku monöpalo totio opa ma. ⁷ Ina tö kuaia, töpö pi kilijio opa nö: --Ji töpö japalo pöle ¿I Galilea tili töpö maikötö? ⁸ ¿Wina pi ku salo kamisa makö kaina töpö japalo jino totia pikia apa köle? ⁹ Jisia samakö pewö ju pöle, tiko tö ulina samakö kuomö kuowi i samakö pewö. Ai samakö liki Partia tili samakö, Media tili samakö, Elam tili samakö. Mesopotamia tö uli, Judea tö uli, Capadocia tö uli, Ponto tö uli, Asia tö uli ina köpöli töpö ulinamö ai samakö ju pasio taso ma. ¹⁰ Frigia tili töpö, Panfilia tili töpö, Egipto tili töpö, Cirene tö ulina Libia tili töpö kua jököka apöle i töpö sola. Sateje epi Roma tili töpö ju naioma. ¹¹ Creta tili töpö, Arabia tili töpö. Ai samakö liki judío tili samakö, ai töpö pasi liki Israel tili töpö pasi mi ipö maike, judío samakö kua kuawina ina töpö kua naiowi töpö. I töpö uli pewö namö samakö kuomö kuo tasowi i samakö, maike, kama samakö itö kai na i töpö nö Tiosö toita api itö wösö nomatalo pöle i samatö pewö jini totia talo opa köle--. Ina töpö kupalo opa ma. ¹² Ina tö kua ia töpö pi kilijio opöla nö: --¿Wina tö kua nö itö kua köle?--. Ina kama töpö kupalo opa ma. ¹³ Maike, ai töpö pi kilijipo pasio ma apa pasio nö: --Amitu nö töpö poleamapalo pitia alukule --. Ina töpö kupalo opa pasio ma. ¹⁴ Ina töpö kupalo opa ia, Pedro nö kamani once (11) töpö kai öpapalo nö, a japalo loteteapalo sota nö:-- Ipa judío tili pö, Jerusalen tö ulina makö pewö kua naile ipö, kamaka na sa ku piale itö jini totio opa. ¹⁵ I töpö poleamapalo ti köle, makö pi kupalo opöle ina tö kua ma apöle, jukiki ipi tö jalu wakalapalo pasitia köle. ¹⁶ Jitö kua pöle itö na Tiosö japalowi itö wösö toleawi ia Joel a jilo noi ia nö itö wösö nö: ¹⁷ “Ina Tiosö ku köle: tö wakala pewö mapo pölati itaja sanöma töpö pewö na sa Janepolepö titiki piasalo. Wano töpö, su töpö, ina kipi töpö nö sa japalowi itö wösö tolea totio opa piasalo, jisa töpö na aipa apawi sa tö möma piasalo, patasipö töpö na mani töna satö wösö naio piasalo. ¹⁸ Itaja itö wakala na nai sotawö, kamisa pi na, wano töpö, su töpö ina kipi töpö tatapajamo wi i töpö na, sa Janepolepö titia naia sotakö ia, i töpö nö sa japalowi itö wösö tolea totio opa piasalo. ¹⁹ Sa lotete epi itö liki jutumösökö pata na i satö möma totio opa piasalo, masita tö uli pata na i satö möma naio sota piasalo: iitö, koataka, wakisi tö, ina kipi tö kuo totio opa piasalo. ²⁰ Kaikana pata itö wakala toita api tö wakala walo pailata kunumai, pila motoko muma totikö piasalo, iitö kulena ina pulipulia kua pasi paso piasalo. ²¹ Ina tö kuaia, kamisa nö, “Kaikana, kawa liki ipa Tiosö wa” ina makö pewö kutowi i makö löa ko piasalo”. Ina a ku ma. ²² Sa jini totio opa, kamaka na Jesus na tö kuawi i töna sa japalo pia köle, Nazaret tö uli na a kutio pili ia. Kamaka nö, Tiosö pata nö ia simöpalö noi i matö taö öpa waikia köle. Tiosö pata nö ia na lotete epi tö totokö noi i matö taö öpa naia waikia köle. Wina pi ku salo, Jesus nö tö aipa apawi tö tama totio opa noi i matö ta totio opa waikio ma kötönö. ²³ Tiosö pata nö tö saia waikipalö noi itö pi na, kamaka na Jesus totokö ma, ina tö kuanö kamaka nö sanöma töpö wanisana apawi töpö na ma totokö ia, i töpö nö jiti na a saumakö nö a sopalö ma. ²⁴ Jesus noma totia apösoma maike, Tiosö pata nö a toia totia apa kopa manöma, wina pi ku salo ia na tö nömatamawi itö lotete pasi mi ipö kötönö, itö pi na nomatamawi itö nö a jupö opimo ma apama. ²⁵ Sutu upa, Jesus na tö kua piale, itö pi na kaikana David a japalo nö: “Itö wakala pewö na kauna sa pi tao sotia köle. Kamisa na wa ju sötapalo kukema, kamisa na ai wanisana tö kua maikötö. ²⁶ Itö pi na sa osi pi monaja apa köle, itö pi na sa pi kilijita pölanö kunumai sa kua toitia köle. ²⁷ Kawa lotete epi itö pi na, nomawö töpö tititawi ia sateje epi wakala töna sa titio pasio maikötö, wina pi ku salo kamisa liki kau nö sa saia pasipalö ma kötönö. ²⁸ Kau nö sa kua pö wa tö pi ipawi, ina kau nö sa wapama tama sota ma. Kamisa na wa kuo söto naio kukema pe epi sa pi monajapalo totio opaö”. Ina a ku ma. ²⁹ Ipa Israel tili pö jitö jinia toitalö. Kaikana David a nomaso ia a patiliki ma. Kamaka pewö nö ia patilile i ma tö taö öpa waikia köle. ³⁰ David nö Tiosö japalo ia tö wösö tolea löatalo opa kötönö, Tiosö pata nö kamani ai ola tö saipalö pö tö taö öpa waikio ma. Ia saipalöwi ia kaikanamo piasalo. ³¹ A saipalöwi ia toia kopaso pö David nö tö taö öpa waikia salo: “Nomawö töpö tititawi ia a titia ta alö ma apa ma, a sai jote naio na apa ma”. Ina a ku ma. ³² Tiosö pata nö Jesus noma totia apa pölaso noia maike, a toia totia apa kopamanö ma. I sa ma tö pewö ta totio opa waikio köpöli. ³³ Jitö jitu patamö Tiosö pata nö Jesus sua ösa kopalölö ma, jukiki kateja poko kuomö kuopamö a loa köle. Ina tö kua nö, sa tö totopö kötö kamani pöa pata ku noi, i kama Janepolepö lotete epi itö tota sotakö ma, Jesus nö kamisa makö osimö na itö titia jötö jökö ke; kamaka nö i matö tapa apa, i ma tö jini ipa ina makö kua köle. ³⁴ Jutumösökö pata na a ösa kopasolö noi i David kuo manoi kötö, i matö taö öpa waikia köle, David kama japalo nö: "Pina Tiosö pata ku ma, ipa Kaikana töna: Kateja sa poko kuomö kuopamö a lo ki. ³⁵ Wa wanipo opawi i sa töpö utitia totia apa paitalö kötö". Ina a ku sota ma. ³⁶ Ina tö kua kötönö, Israel tili makö pewö nö i matö taö totio opa pökö, jiti na wano matö saumakö nö, ma söpalö noi, Tiosö pata nö ia liki a saipalöwi ia, kaikana tö, ina ia ta tapalö ma" --. Ina i töpö na a ku ma. ³⁷ Itö pewö jinia totia apölö nö, töpö pi jonipo opa ma. Töpö pi jonipo opa salo, Pedro, Jesus nö töpö saipalö noi i töpö pewö na töpö japalo jöto nö: --Ipa aipö, ¿Kapili sa matö tama piasalo?--, ina töpö kupalo opa jöto ko ma. ³⁸ Pedro japalo jöto kota nö: --Tiosö pata na pö ote tamo ko, ia pata simowi itö tama totia talo opa ko, ina makö kua nö kamisa makö na Jesus jilo pi na pö mai opamono. Ina makö kua kukema Tiosö pata nö makö ote ta konö nö, kamaka na kama Janepolepö toto naio kötö. ³⁹ Ina Tiosö pata ku noi, i kamaka itö, kamaka ulu töpö itö, Tiosö pata nö jitö uli pewö pata na ai töpö löa pi topa apa naio ko wi i töpö pewö itö nai sotawö--. I töpö na ina a ku ma. ⁴⁰ Pitilita sanöma töpö pi ku totio opa pö Pedro nö tö pi totia apa salo, a japalo totio opa soa alö nö: --Sanöma töpö wanisana apawi, itö töpö na wanisana tö kua pö tö kulati itö na pö soka pasia kopalo--. Ina a ku ma. ⁴¹ Pedro japalo pöle itö na pitilita töpö pi ku upa pöle i töpö pewö mai opamonaso ma. Itö wakala na Jesus na töpö sötapalowi i töpö na tres mil (3000) tö kotö na sanöma töpö koka naia kopaso ma. ⁴² Jesus nö töpö saipalö noi, i töpö nö tö wapamawi itö na töpö wapo totio opa sisa ma. Kama töpö pewö kua kuawi na ina töpö pewö kua toitio nö, ai tö tama pia kukema i töpö pewö nö tö tama koka totia talo opati ma. Ina töpö kua nö Jesus sai uni oa koni, pila iipö uni koa koni, ina töpö kua naia soatalo opati ma, Tiosö na töpö pewö japalo kokamo totia talo opati ma. ⁴³ Jesus nö töpö saipalö noi i töpö nö tö aipa apawi tö tama totio opa ia sanöma töpö pewö nö itö ta apa nö töpö pi kilijo totia talo opati ma. ⁴⁴ Jesus na töpö sötapalowi töpö kupasowi i töpö pewö kua kokamo totia talo opati ma. Kamani wani tö kule itö toto jötöjo totia talo apati ma. ⁴⁵ Kamani wani tö noa tama nö, i sitipa liki kamani ai töpö nö tö pi ipawi i töpö na tö tota totia talo opati ma. ⁴⁶ Tiosö Japalowi ia sai pata na töpö kokamo sinimo opati ma. Kama töpö saipö na Jesucristo sai uni oa koni, pila iipö uni koa koni, ina tö tama jötöpo totia talo opa naitio ma. Ia töpö iapalo kokamo soatalo opati ma. Töpö pi mönajapalo totio opati ma. ⁴⁷ Tiosö na töpö japalo pi mönajapalo totio opati ma, ina tö kuaia itö uli na töpö pewö kule i töpö nö töpö pi ipa naio ma. Ina tö kuanö itö wakala pewö na Tiosö pata nö kamani i töpö na, ai töpö löa naia konaso pö töpö kokama naio ko soatalo opati ma.

Capitulo 3

¹ Wisatia Judio tili töpö otamo pö töna töpö kokamota sinimo wi tö kötönö, aitö wakala na, wisatia kokamotawi ia sai pata na Pedro, Juan ina kipi töpö julasolö ma. ² Itö wakala pewö na, ai sanöma tö utiti ipi a juatalo mi ipi ina a kuawi, kokamatawi ia sai pata na ai töpö nö a jilata sinimo opa taso ma, ia sai pata na “Toita toti ipö” ai takataka kolo jilo kuowi taka kolo kuo pa ia lotama sinimo opati ma, ia nö ia sai pata na sanöma töpö lisipo pöle i töpö na sitipa naka löapalo opati ma. ³ Ia wani nö, Juan, Pedro ina kipi töpö ju talalö nö i töpö na sitipa naka sota ma. ⁴ Pedro, Juan i töpö nö ia mö salilia totia apöla nö:-- Samakö mö totio opa--. Töpö ku sota ma. ⁵ Ia nö töpö mö totio opa jöto ma, ai sitipa toto pia alukule a pi ku upa salo. ⁶ Maike: --Ipa sitipa mi ipö, ipa oro tö mi ipö naiwö maike, kamisa na tö kule kauna i sa tö toto jöto pia köle: “Nazaret tili tö Jesucristo jilo pi na, wa öpa kopalo nö, a jupalo ko”--. Ina ia na Pedro ku puo ma. ⁷ Pedro nö, ia kateja amösö jua sotalö nö a öpa ko sota manö ma, ia kö sotawö ia konona pewö lotetea totia apa ko sotaso ma. ⁸ I wano tö jilua sotaso ma, a öpa ko sotakö nö a jupalo ko sota ma. A jupalo, a jilijilimo opa, Tiosö na a japalo pi mönaja totio opa, ina a kua pölanö, Pedro, Juan i töpö kai na kokamotawi ia sai pata na a lisia naia sota solö ma. ⁹ A jupalo opa, Tiosö na a japalo pi mönajapalo opa, ina a kua pöle i sanöma töpö pewö nö itö ta totio opa ma. ¹⁰ Ia wani liki kokamotawi ia sai pata na ai takataka kolo “Toita toti ipö” taka kolo jilo kuawi ia a lota sinimota nö sitipa naka sinimo opati noi itö taö öpa kötönö, itö na sanöma töpö pi kilijo totio opa ma. ¹¹ A nö löa konaso noi ia nö lotete epi Pedro, Juan ina kipi töpö jupo totio opa ma. Sanöma töpö pewö pi kilijo totia apöla nö, ai takataka kolo “Salomon” taka kolo jilo kuawi i taka kotö na Pedro, Juan ina kipi töpö öpa pölati iamö töpö pewö walopa totio opa taso ma. ¹² Ina tö kua ia, i töpö na sa japalo sota koo, Pedro a ku nö: --Ipa Israel tili pö, ¿Kapili tö na makö pi kilijo opa köle? ¿Kamisa makö na makö mamo tateja apö likia, kama töpö lotete epi itö nö ia wani löa konö ke, makö pi ku upa pawikia? ¹³ Abraham i Tiosö, Isaac i Tiosö, Jacob i Tiosö, kamaka kolo pata töpö i Tiosö; i Tiosö pata nö kamaka na kamani ula Jesus lotete epi itö taöpamanö ke. Ji Jesus liki kamaka nö ma pi ma apa nö, Pilato nö a julapa pi topa apa ko pölata maike, kamaka nö ma totoma satia totio opa noi, ia sowö. ¹⁴ Jesus nö Tiosö pata somowi itö tama totia talo opa, toita api tö tama sotio ina a kuawi i ma pi ma apa nö, Pilato na kanene ma toni jula asa kopamanö ma. ¹⁵ Makö toi ipa pö tö totomawi, kamaka nö i ma söpalöma maike, Tiosö pata nö a toia kopamanö ma, i samatö ta totio opa sota ma, samakö. ¹⁶ Pitilita Jesus jilo na samakö pi ku totio opawi itö pi na, ji wano tö juataloti ma apa noi ia löa konaso ke. Pitilita Jesus jilo na samakö pi ku upawi itö pi na, kamakö mamotalö na a nö löa totia apa kopalö ke. ¹⁷ Ipa aipö, jukiki ipi satö taö öpa köle, kamakö, kamakö kaikana töpö ina kipi makö nö Jesus ma söpalö noi, i matö taö pölanö kunumai i matö tama ma. ¹⁸ Ina tö kuanö, Tiosö Japalowi itö wösö toleawi i töpö na Tiosö ku noi, itö kupaso ma: “Sa saipalöwi ia pepelama apa kötö, a söpaso kötö”, ina Tiosö ku noi itö kua waikipaso köpöli. ¹⁹ Ina tö kua kötönö, makö wanisana apawi i matö josalö nö, Tiosö pata simowi itö tama totia talo opa nomo ko. Ina makö kua kukema ia pata nö makö wanisana apa noi itö pewö taö ma kopaso kötö, toita api kamakö na tö toto totio opa nö, ²⁰ kamakö na Jesus a saipalö noi ia simöpalö kötö, sutu upa ia wösö waikitio ma. ²¹ Maike, jutumösökö pata na Jesus opia pasia pailata, Tiosö pata nö jitö uli pewö pata liki tute tö uli pewö pata ta totia apa ko paipalö piasalo. Itö na Tiosö japalo ia tö wösö toleawi i töpö japalo waikio ma. ²² Moises liki Tiosö japalo ia, tö wösö tolewi i aia kuo ma, ia a ki: “Tiosö pata nö kamakö ai tö saipalö piasalo, ia liki, kamisa nö Tiosö japalo ia sa tö wösö tolea kua kuawi na ina ia kua naio piasalo. Ia japalo ia matö tama totia talo opa piasalo. ²³ Ai wa nö, i wa jini pasio ma apa kukema, kamisa makö na i wa soka pasi paso piasalo”. Kamani i töpö na ina a ku ma. ²⁴ Jukiki tö kuati pöle itö na, Samuel, ai töpö nö Tiosö japalo ia tö wösö tolea naiowi i töpö, ina kipi töpö pewö nö itö wösö naio ma. ²⁵ Kamakö liki, Tiosö japalo ia tö wösö tolea noi i töpö ulu makö ola, ina tö kua kötönö kamakö kolo pata töpö na Tiosö pata japaloti noi i kamakö itö. Wina pi ku salo, Abrahan na: “Awö ulu töpö ola pi na, jitö uli na sanöma töpö pewö kule i töpö na toita api satö tama totio opa piasalo”. Ina Tiosö pata ku sota ma kötönö. ²⁶ Tiosö pata nö kamani ula Jesus toia ko waikipalö nö, jukiki kamakö na a sima somata köle, toita api kamakö na tö tama pö töna, wanisana matö tama wi i matö josa nailö pö töna--. Ina sanöma töpö na a ku ma.

Capitulo 4

¹ Sanöma töpö na Pedro, Juan ina kipi töpö japalo soa ta, Tiosö pata saia totiapalawi i ai töpö kaikana, Saduceos töpö, Tiosö pata saia löapalawi ia kaikana, ina kipi ia töpö walopakö solöma. ² Pedro, Juan ina kipi töpö nö sanöma töpö na Jesus toia kopaso noi itö wösöti nö, ina sanöma töpö nomapowi i töpö kua naio ko piasalo, ina töpö ku pöle itö na i töpö jiso totio opa pasio solö ma. ³ I töpö nö Pedro, Juan i töpö jua sotalö nö pöka kasötawi ia töpö titia sotakö taso ma, tö wisa apa waikia kötönö ia töpö titia soa paia pötakö ma. ⁴ Ina tö kua köle maike, Pedro, Juan ina kipi töpö japalo noi itö na pitilita sateje toti ipi ai sanöma töpö pi ku totia apöpaso ma. I töpö pewö na wano töpö sino katea sisapalö ma, cinco mil (5000) tö kotö na töpö katea wöa totia apö palö taso ma. ⁵ Aitö jenata, Jerusalen tö ulina, judío tili töpö na töpö kaikanamo wi i töpö, ia pata töpö kule i töpö, judío töpö na Tiosö simo noi itö na töpö wapo totio apawi i töpö, ina kipi töpö kokamo ma. ⁶ Ia, Tiosö pata saia totiapalawi i töpö kaikana pata tö Anas a jilowi ia nö kamani ai töpö kai lo naio ma. Caifas, Juan, Alejandro, ina kipi töpö kokamo naio ma. ⁷ I töpö pewö kokamo pa, Pedro, Juan ina kipi töpö jila sotakö taso ia, i töpö nö, Pedro, Juan, i töpö na tö jini sota nö: --¿Witipila pi na sanöma töpö na matö wapamati köle? ¿Witipila jilo pi na i wano matö löa konö ma?--. Ina töpö ku ma. ⁸ Ina töpö ku ia, Tiosö Janepolepö nö Pedro osimö masökö manököa apa jöta kötönö: -- Kaikana pö, pata pö pewö: ⁹ “Kamisa makö na, wano tö utiti ipi a juataloti ma apa noi, wina i ma löa ta konö ma, makö ku köle. ¹⁰ Ina tö kua kötönö, kamakö pewö na, Israel tili töpö pewö na samakö ku pia köle, kamakö mötalö na ji wano tö öpale ia liki Nazaret tili tö Jesucristo jilo pi na ia löa konaso ma. I Jesus liki kamaka nö jiti na ma saumakö nö ma sopalö ma maike, Tiosö pata nö a toia kopamanö noi ia sowö. ¹¹ Kamaka liki ji töpö kuawina ina makö kuawi makö, sanöma töpö nö saia ta wi, i töpö nö mama josalö nö, ji mama wanisana apö pasiwö töpö ku ma maike, i mama nö saia opa lototo totiowi i mama kuo jato ma, itö kua kuanoi na ina, i Jesus na makö kua ma. ¹² Tö löa ko pu töna Jesus na lotete epi tö kua sisa. Tiosö pata nö ia sima sisapalö ma, jitö uli pata na makö löa ko pö töna ia na lotete epi tö kua sisa--". Ina a ku jöto ma. ¹³ Pedro, Juan i töpö liki, töpö pilapalo mi ipö, töpö wajetamo pasio ma apa ma ina i töpö na tö kua köle maike, töpö japalo toita apö, töpö pi kilijita mi ipö ina töpö kua ia kaikana töpö pi kilijo opa nö, Jesus na ji töpö nokapalo totio opa ma, töpö pi ku upa ko ma. ¹⁴ Ina tö kua naia ta, i töpö kotö na a löa konaso noi ia öpa naia sotale itö pi na, makö wani jolisi ipö, töpö ku satia apa pö tö ma apa ma. ¹⁵ Ina tö kuanö kaikana töpö sino japalo sisa piasalo, Pedro, Juan ina kipi töpö atua pasia paipamanö nö: ¹⁶ --¿Wina makö kua pö? I töpö nö a utiti ipi ia löa kopalö ma, i Jerusalen tili töpö nö itö ta apa waikio ma. Ina tö kua kötönö, töpö jolisi ipö, makö ku pasio maikötö. ¹⁷ Ai töpö nö itö jini naio kota ma apa pö töna matö tama mi ipö salo. Jesus lotete epi itö wösö kota ma apa pö töna, ma pö wani kilima mi ipö salo--. Ina töpö ku ma. ¹⁸ Itö nojana, Pedro, Juan töpö lisia kopamanö nö, Jesus jilo na pö japalo kota jatoti, ia jilo pi na tö wapama naio kota jatoti, töpö ku ma. ¹⁹ Maike, Pedro, Juan töpö japalo jöto nö:-- Kamaka nö tö saipalö, Tiosö ku ia samatö tama nö jato, kamaka ku ia samatö tama nö jato. ²⁰ Samatö tapa noi, samatö jini noi, itö na samakö japalo mapo maikötö--. Ina töpö ku jöto ma. ²¹ Kaikana töpö nö i töpö kilia satia apa komanö ma, itö nojana töpö lisia atua kopamanö ma. A utiti ipi ia löa konö noi itö tapa apa nö, Tiosö pata na sanöma töpö japalo pi mönajapalo totia apa pöle, itö tapa apa kötönö, töpö pöka kasöma ma apa ma. ²² A utiti ipa noi ia na, cuarenta (40) inama tö toleje lata tö kuo waikio ma. ²³ Pedro, Juan töpö lisia kopalo nö, kamani ai töpö na, kaikana töpö ku noi itö wösö ko sota taso ma. ²⁴ Itö jininö nö Tiosö na töpö pewö japalo sota nö: --Kamisa makö Tiosö pata, kaunö masitatö uli pata, jutumösökö pata, mötati tu pata, jitö uli pewö pata na tö pewö pata kule, i wa tö pewö tapalö ma. ²⁵ Ina kamisa makö kolo pata tö, kaikana David a ku ma, kawa janepolepö ku ia a japalo tolea jöto ma: “¿Wina tö kua ia, sanöma töpö söso totia apa köle? ¿Wina töpö pi ku salo, Tiosö pata japalo wi itö tama ma apa pö töna töpö pi kupalo opa köle? ²⁶ Masitatö uli na sanöma töpö kaikana pewö kokamo opa köle, töpö söso pö töna. Tiosö pata, kamani ula saipalö noi ia, ina kipi töpö na sanöma töpö kaikana pewö waitilimo opa köle”, ina David ku ma. ²⁷ Ina wa ku noi i pitilita. Jitö uli na kaikana Herodes Antipas pata, kaikana Poncio Pilato, judio tili töpö, Roma tili töpö; ina kipi töpö kokamo ma, awö ula Jesus wa Saipalö noi, ia söpalö pö töna. ²⁸ Maike, i töpö nö, sutu upa wa tö tama pi topa apa noi itö tama jöto puo ma. ²⁹ Kamisa makö Tiosö pata, jukiki i töpö nö samakö kilimanö ke, ina tö kua kötönö, samakö kili pölanö kunumai wa japalowi i sama tö wösö pö töna samakö pasilipalö. ³⁰ Tö aipa apawi samatö tama, töpö kamakali ipi i sama töpö löa ko, ina samakö kua pö töna samakö pasilipalö. Ina wa tö tama ia, sanöma töpö nö wa lotete epi itö tapa totio opa piasalo --, ina töpö ku ma. ³¹ Tiosö na töpö japalo mataso ia, i töpö kokamo pole ia tö uli kalipalo laso ma. I töpö osimö pewö na Tiosö Janepolepö masökö manöka totia apökö ma. Ina tö kua ia, ia i töpö kili pölanö kunumai Tiosö japalowi itö wösö kolo kua sopaso ma. ³² Jesus na töpö sötapalowi i töpö pewö kua kokapalo totio opati nö, sami ipi töna töpö pewö pi ku totio opa sisa ma. Kamani wani töna, ipa tö sisawö ai tö ku totio pasio ma apa ma, kamani wani tö tota jötöja totia talo opati ma. ³³ Töpö saipalo noi, i töpö osimö na Tiosö Janepolepö lotete epi itö titia totia opa kötönö, Jesus toia kopaso noi itö wösö totio opa ma. Tiosö pata nö i töpö na toita api tö tama totio opa ma. ³⁴ Jesus na töpö pewö sötapalowi i töpö pepalo ma apa ma, ai töpö saia jato, masita tö uli jato, kamani itö kule, itö noa tama soatalo opa ma. ³⁵ I sitipa liki, töpö saipalö noi i töpö na tö toto soatalo opa ma, ai töpö pepalo opa wi i töpö na tö toto jötöpo pö töna. ³⁶ Ina ai wano tö Levita tili tö ola kua naio ma, ia liki mötati tu mötalö pata na ai tö uli kuowi Chipre tö uli jilowi ia a kua pasi pasö ma. Jose a jilo kuoma maike, ia na Bernabe, töpö saipalö noi i töpö kuto pasio ma, itö jilo liki (pi jonipo mapama löatalowi ia) tö kuto pasiowi tö. ³⁷ Bernabe nö kamani ai masita tö uli noa tapamanö nö, i sitipa pewö liki, töpö saipalö noi i töpö na tö pewö tota sotakö ma.

Capitulo 5

¹ Ai sanöma tö Ananias a jilowi a kuo ma, kamani pusupa Safira a jilo pasio ma. Ia nö kamani ai masita tö uli noa tapamanö ma. ² Maike kamani ai sitipa sua jia konö nö, töpö saipalö noi i töpö na ai tö jia kopaso noi itö tota sotakö ma, itö liki kamani pusupa nö tö taö öpa waikia köle maike a japalo ma apa ma. ³ Ina tö kua ia, Ananias na Pedro japalo nö: -- ¿Wina wa pi ku salo, sai tö ku ia wa tö tama pasio pikio opa ma? Tiosö Janepolepö nö tö ta jato maikötö wa pi ku upa pawi, ai sitipa wa sua jia pasia pikia apölö no. ⁴ I masita wa tö uli noa tapama pailata kunumai awö tö uli kuo ma, ina tö kua naia ta, i sitipa nö wa tö tama pi topa apawi i wa tö tama pasio ma apa no, ¿wina wa pi ku salo i wa tö tama pasia köle? Kaunö samakö mönama ma apöle, Tiosö wa pata mönama köle--. Ina a ku ma ⁵ Ananias nö itö pewö jini matalo nö, a noma api a kea sotaso ma. Itö liki ai töpö nö, itö jininö nö töpö kilipalo opa ma. ⁶ Itö nojana, ai jisa töpö nö a noma jalopalö nö, a patiliamö jua sota solö ma. ⁷ Tö pi tatejeto ta kamani pusupa Safira lisia nomöpaso ma, kamani panopa kua noi itö taimi ipa pasio ma. ⁸ Pedro nö ia na tö jini sota nö: --¿Kamakö masita ma tö uli noa tapamanö ia, sitipa ma pewö sulö noi, jitö pewö waikiwö?--. A kuia, i su tö japalo jöto nö: --Awa ji sitipa pewö waikiwö--, a ku jöto ma. ⁹ Ia na Pedro japalo nomo ko sota nö: ¿Wina makö pi ku salo, Tiosö ma Janepolepö wapa pi topa apa pasio nö, i matö tama pasio ma? Awö panopa patiliki taso noi i töpö ju ko kölati, i töpö nö jukiki wa sua nomo sota piakö mati --. ¹⁰ Ina a ku mataso ia, ia kö sotawö Pedro amösö öpale itö kotö na, Safira noma kea sotaso ma. Jisa töpö waloa noma ko sotakösolö nö, su tö noma sua noma ko sotalölö ma, kamani panopa patilile itö kotö na a patilia naia ko sotakö taso ma. ¹¹ Ina tö kua noi, Jesus na töpö sötapalowi i töpö, ai töpö naiwö ina kipi töpö nö itö jininö nö töpö kilipalo opa ma. ¹² Tiosö pata nö, töpö saipalö noi i töpö na lotete epi tö totoma ia, i töpö nö sanöma töpö na aipa apawi tö tama totio opa ma. Itö wakala pewö na kokamotawi ia sai pata na, ai takataka kolo “Salomon” taka kolo jilo kuawi ia Jesus na töpö sötapalowi i töpö kokamo sinimota toitio ma. ¹³ I töpö kokamo pa, ai sanöma töpö ju jöka kili totio opa ma, maike, i töpö kuawi itö na töpö japalo toita apa sisatio ma. ¹⁴ Itö wakala pewönamö Jesus na pitilita wano töpö, su töpö ina kipi töpö pi ku upa wi, töpö pala totio opa alö ma. ¹⁵ Sanöma töpö ai töpö kamakali ipi, Pedro nonosi nö i töpö löa konaso kötö, kama töpö pi ku totio opa jöto kötönö, ia jaso pia pa kamani i töpö kamakali jila löatalo opa ma, ¹⁶ Jerusalen tö uli kotö na ai töpö uli kuo jökökö öpi i töpö nö ia, kamani ai töpö kamakali ipi, ai töpö osimö na sai töpö titija apa pasia, ina tö kulata töpö jilapa naio solö ma, i töpö löo totio opa ko ma. ¹⁷ Ina tö kua ia, Tiosö pata saia totiapalawi i pata tö kaikana, Saduceos töpö kaikana, i töpö nö itö ta wani ipa ma. ¹⁸ Ina töpö kua nö, töpö saipalö noi i töpö julö nö töpö pöka kasömakö pö töna ai töpö simökö ma. ¹⁹ Maike, mumaia Tiosö pata nö a Simötawi ia walokö solö ma, ia nö takataka kolo jakoa kopalö nö, töpö lisia kopamanö nö: ²⁰ --Kokamotawi ia sai pata na makö julolö nö, Jesus nö tö palimöpawi, i sanöma töpö na itö wösö ko tö--. Ina a ku ma. ²¹ Ina tö kua ia, janasaita kokamotawi ia sai pata na, i töpö lisipalo nö ia, sanöma töpö na itö wösö kolo kua jöta sopaso ma. Ina tö kua pasi lata, Tiosö pata saia totiapalawi i pata tö kaikana nö kamani ai töpö kai na, kaikana töpö pewö, pata töpö pewö ina kipi töpö kai kokamo pasio ma. Itö nojana, i töpö nö töpö pöka kasölati i töpö nakalö taso pö töna ai töpö sima sotalö ma. ²² Maike, töpö poka kasökö noi i töpö titio ma apa ma, ina tö kua ia töpö sapa kopalo nö, tö wösö ko taso ma: ²³ --Takataka kolo la lotota totia apa, takataka kolo löpowi i töpö mamo löa totia apa, ina tö kua totia apö lata, sama taka jaköpalö ke, maike, i töpö titio ma apa ke--. Ina töpö ku ko taso ma. ²⁴ Kokamotawi ia sai pata löapalawi ia kaikana, Tiosö pata saia totiapalawi i töpö kaikana, ina kipi töpö nö itö jininö nö, töpö pi ku monöpalo opa ma, wina tö kua totio opa ma töpö kupaso totio opa naio ma. ²⁵ Ina tö kua ta ai tö waloa pasitakö nö: -- Kamaka nö ai sanöma ma töpö pöka kasömakö noi i töpö nö, kokamotawi ia sai pata na sanöma töpö wapamati kölai--. A ku pasio ma. ²⁶ Itö jininö nö, kakamotawi ia sai pata löapalawi ia kaikana nö, iamö kamani i töpö kai jua kononö nö, i töpö jua konö taso ma. Mama nö sanöma töpö nö töpö sösö pö töna töpö kili ipa kötönö, töpö wasisama pölanö kunumai töpö sua konö taso ma. ²⁷ Kaikana töpö pewö kokamo pa, töpö kai waloa kokö taso ia, i töpö na Tiosö pata saia totiapalawi i pata tö kaikana japalo sota nö: ²⁸ --Sanöma töpö na Jesus wani wösö kota jatoti, kamakö na samakö ku totia apa waikio köpöli, maike matö tama satimo opa köle. Jerusalen tili töpö pewö na Jesus ma wösö totia apötia köle, ina makö kua nö, i töpö nö Jesus söpalö ma, ina sanöma töpö na makö ku totia apa pasitia köle--. Ina ia ku ma. ²⁹ Pedro, kamani i töpö, töpö japalo jöto nö: -- Tiosö pata simowi i samatö tama somatalo opa nö, itö nojana sanöma töpö simowi i samatö tama pasiowi tö. ³⁰ Kamaka nö jiti na Jesus ma saumakö nö, ma söpalö ma maike, kamakö pewö kolo pata töpö kuo soma noi i töpö Tiosö pata nö a toia kopalö ma. ³¹ Tiosö kama kateja poko pata kuomö kuo pa Jesus lomakö ma, ia liki kaikana tö, löa kö pö a, ina a tapalö ma. Israel tili töpö nö wanisana tö josalö nö Tiosö na töpö pi wasiso naio ko pö töna itö tama ma. ³² Ina tö kua noi i samatö pewö ta totio opa ma samakö, Tiosö pata simo ia tö tamawi i töpö pewö na Tiosö Janepolepö titile ia nö itö taö öpa naia sota köle--. Ina töpö ku jöto ma. ³³ Itö jininö nö, kaikana töpö pi jisuapalo opa ma, ina töpö kua nö i töpö söpalö pö töna töpö pi kupalo opa ma. ³⁴ Maike ia, ai kaikana tö Fariseo tö Gamaliel a jilo kuawi a lo naio ma, ia liki judío tili töpö na Tiosö pata simo noi itö na a wapo totio opawi a kuo ma, itö pi na sanöma töpö nö a kili taö totio opa ma. Ia öpapalo nö, ji wano töpö lisia atua paipama nö a ku ia, töpö lisia jota paipamanö ma. ³⁵ Itö nojana kamani ai kaikana töpö na: -- Israel tili pö: “Ji wano töpö na matö tama pi topa apöle itö na pö pi kupalo topa totio opa paio. ³⁶ Ai sanöma tö Teudas a jilo kuawi a na tö kua noi i ma tö taö a opa waikia köle. Sa toita api sa, ina sanöma töpö na a kuti ia, ia na cuatrocientos (400) sanöma töpö nokapalo ma, maike a sopalö ia, kamani i töpö nokapalowi i töpö pewö ju salakea kopaso ma, ina tö kua nö, sanöma töpö nö ia taimia totia apa kopaso ma. ³⁷ Itö nojana Israel tö uli na sanöma töpö kule i töpö jilo pewö tosokama ko wi, itaja ai sanöma tö Judas a jilo kuawi a nö sateje epi sanöma töpö nokapala ma totio opa nomo ma, maike ia söa naipalö ma, ina tö kua ia kamani i töpö nokapalowi i töpö pewö salekea naia kopaso ma. ³⁸ Ina tö kua kötönö, ma töpö tama wanisana pölanö kunumai ma töpö julapa ko mi ipö salo, ina sa pi ku upa pasia köle. Kama töpö pi na töpö kua pitio kukema, itö pewö ma kopaso kötö. ³⁹ Maike, Tiosö pi pata na töpö kua kukema, kamaka nö i matö mapama ko maikötö. Ina tö kua kötönö pö pi mosaia totia apö kö, ina makö kua nö Tiosö pata sola makö söso ma apa pökö”--. Kama ai töpö na ina Gamaliel a ku ia, pitilita töpö ku jötöso ma. ⁴⁰ Itö nojana, töpö saipalö noi i töpö naka konö ma, to toto pata nö töpö soapalö nö, Jesus na tö kuawi tö wösö kota jatoti, töpö ku ko sota ma. Itö nojana töpö jula kopalö ma. ⁴¹ Ia, töpö saipalö nöi i töpö pi mönajapalo opa pölanö töpö lisia atua kopaso ma. Jesus simo ia samatö tama totia talo opa pasio kötönö, Tiosö pi pata na samakö jamia apöso ke, ina töpö pi ku upa salo. ⁴² Itö wakala pewö na, kokamotawi ia sai pata na i töpö nö, Tiosö pata nö Jesus saipalö noi itö wösö satimo totio opati ma, saia pewö na töpö ju jötöpo totio opa nö, itö wösö totio opa naio ma.

Capitulo 6

¹ Itaja, Jesus na töpö sötapalowi töpö pala totio opa alö ma, ina tö kuanö, hebreo tö kaina judío tili töpö japalo pasio wi i töpö na, griego tö kaina judío tili töpö japalo pasiowi i töpö japalo wanisana apa ma, kamani su töpö panopa noma pasi sö noi i töpö su na kamani ni tö walo tomöpo pasio mi ipi itö pi na. ² Ina tö kua ia, töpö saipalönoi i töpö nö, Jesus na töpö sötapalowi i töpö pewö nakalö nö: --Tiosö pata wösö wi i kamisa makö tatapajo tö sai toti pasiwö, ina tö kua kötönö, ni tö, sitipa, i samatö totoma jötöpowi itö toita mi ipö. ³ Itö na ai töpö tatapajamo pasio pö töna siete (7) ai töpö saipalö, töpö pi ku toita api ma töpö taö öpa wi töpö ki, Tiosö Janepolepö lotete epi itö nö töpö osimö masökö manököa apö lata, töpö pi tao totio opawi, ina töpö kuawi ma töpö saipalö ia, i töpö na i samatö tatapajo totokö piasalo. ⁴ Ina tö kuanö, kamisa makö pasi liki Tiosö pata na samakö japalo sisa, Tiosö pata japalowi sanöma töpö na i samatö wösö sisa, ina samakö kua sisa pasio pia köle--. Ina töpö ku ma. ⁵ Ina töpö ku ia, pitilita sanöma töpö pi ku jöto nö, Esteban saipalö ma, ia liki pitilita Tiosö pata na a pi ku totio opaö, Tiosö Janepolepö nö a osi masökö manököa totia apa, ina ia na tö kuowi tö kuo ma; Felipe, Procoro, Nicanor, Timon, Parmenas, ina kipi töpö saia naipalö ma, Nicolas a jilowi ia liki Antioquia tili tö maike, judío tili tö kua naipaso ma a, ia saia naipalö ma. ⁶ Itö nojana, töpö saipalö noi i töpö na, i töpö kai ikua sotakö ia, i töpö jösöka na töpö saipalö noi i töpö amosö walija sotakö nö, Tiosö na töpö japalo sota ma. ⁷ Töpö saipalö noi i töpö nö Tiosö japalowi itö wösö totio opa soa alö ma, ina tö kuanö sateje toti ipi Jerusalen tö uli na Jesus na töpö sötapalowi töpö pala totio opa alö ma, ina tö kua ia pitilita Jesus na sateje epi Tiosö pata saia totiapalawi i töpö kaikana pi ku totio opa naio ma. ⁸ Ina tö kua ta, Esteban liki pitilita Tiosö na a pi ku totio opaö, Tiosö lotete epi itö nö a asimö matija totia apa, ia na ina tö kua kötönö, sanöma töpö na aipa apawi tö tama totio opa ma. ⁹ Maike, ai kokamotawi a sai Libertos a sai jilo kuawi ia, ai judío tili töpö kokamota pasiowi, i töpö nö itö pi ma apa pasio ma. I ai judío tili töpö liki, Cirene tili töpö, ai töpö liki Alenjandria tili töpö, i töpö na Cilicia tili töpö, Asia tili töpö ina kipi töpö koka naipalo nö, Esteban sola töpö noa tapaso ma. ¹⁰ Maike, Tiosö Janepolepö ku ia Esteban japalo tolea jöto nö, a japalo pi tao totio opa ia, ia na i töpö japalo satimo jöto kota pö tö ma apa ma. ¹¹ Ina tö kua ia, i judío tili töpö nö, ai töpö na tö noa komakö ma: --Kamisa makö nö, Moises, Tiosö pata, ina kipi töpö na Esteban japalo wanisana apawi samatö jini totio opa ke--. Ina töpö jolisi ku pö töna. ¹² Ina töpö ku nö, sanöma töpö, pata töpö, judío tili töpö na Tiosö pata simo noi itö na töpö wapo totio opawi töpö, ina kipi töpö pewo pi jisua totia apö pamanö ma. Töpö pewö pi jisua totia apa kötönö, Esteban jua sotalö nö, kaikana pata töpö kulati ia sai pata na a sua sota lölö ma. ¹³ Ia, pata töpö na i töpö japalo ko sota nö: -- Ji wano tö liki, Tiosö pata saia pata na a japalo wanisana totio opa sotio, Moises simo noi itö na a japalo wanisana apa naio sotio. ¹⁴ Nazaret tili tö Jesus a jilowi ia nö, Tiosö pata saia pata waniapalö piasalo, Moises simo noi itö pewö liki tiko tö pewö ta kopalö piasalo, ina a ku ia samatö jinia nailö ke--. Ina töpö jolisi ku ko sota ma. ¹⁵ Kaikana pata töpö pewö, ia ai töpö loa naile i töpö, ina kipi töpö nö Esteban juko mö totio opa kukema, Tiosö pata nö a simötawi ia juko kuina a juko mömo kuo totio opa ma.

Capitulo 7

¹ Tiosö pata saia totiapalawi i pata tö kaikana nö, Esteban na tö jini sota nö: -- ¿Ji töpö ku pöle, i pitilita?--. A ku sota ma. ² Ina a ku ia, Esteban japalo jötö nö: --Ipa ai pö, pata pö, sa jinije: “Mesopotamia tö uli na kamakö kolo pata tö Abraham kua soa ta, ia na kamakö Tiosö pata lotete epi ia pata tapamonaso ma, Haran tö uli na a ju pailata kunumai itö kua ma. ³ Ia na Tiosö pata japalo nö: “Wa kule i wa tö uli ta ko kölö, awö ai wa töpö ta soa pöta köli, ina wa kua nö, kau na sa tö uli möma piale iamö a julolö”. Ina a ku ma. ⁴ Ina a kua jöto ma, caldeos töpö itö uli ta ko kölö nö, a jua sota solö ma, Haran tö uli na a kukö taso ma. Ia a kutio pa kamani pöa nomaso ia, Tiosö pata nö jitö uli na a suamo ta noma sota kösölö ma, jukiki itö uli na makö kua köle. ⁵ Jitö uli na Abrahan kuo jöto ma, maike Tiosö pata nö ia na tö uli sai toto totio ma apa ma, a amösö öpale itö uli oso wai toto pöta ma apa ma. Maike, Abraham na Tiosö pata ki, wa noma pasi so noia, awö ulu töpö ola na ji sa tö uli tota totikö piasalo, ina a pata ku satia titio opa ma, ina Tiosö ku noi itaja Abraham ai ula ma totio opa soa paio ma. ⁶ Abraham na Tiosö pata japalo nö: “Awö ola töpö liki, tiko tö uli na töpö kuo piasalo, ia töpö wasisama totio opati piasalo, cuatrocientos (400) inama töna. ⁷ Maike, kamisa nö itö uli na töpö kule, i sa töpö wasisama totio opa jöto piasalo, ina sa tö tama ia, itö uli na töpö soka jöta kopalo nö, jitö uli na i töpö nö sa ku ia tö tama totio opa nomo ko piasalo”. Ina a ku naio ma. ⁸ Ina Abrahan na Tiosö pata ku nö, circunsicion tö jilo kuawi Abraham nö kamani ulu töpö na itö tama jöto pö töna, Tiosö pata simo jöto ma. Ina tö kua nö Abraham ula Isaac kupaso ia, ocho (8) wakala töna ia na itö tama sota ma, Isaac nö kamani ula Jacob na itö tama nomo sota ma, Jacob nö kamani doce (12) ulu töpö na itö tama tolea nomo sota ma, I doce (12) töpö liki, Israel tili töpö pewö pö töpö kupaso ma. ⁹ Jacob ulu töpö, kamakö kolo pata töpö kuo noi i töpö, i töpö nö kamani po osa Jose nisi taö öpa nö, ai töpö na a noa tapamanö ma, i töpö nö Egipto tö uli na a kai julasolö ma, maike Tiosö pata nö Jose pi ipawi a kuo ma. ¹⁰ Ina tö kua kötönö, Jose peamati pölata maike, Tiosö pata nö a totiapala apa jöto ma, a pi tao opa pö tö totokö ma. Egipto tö uli na kaikana Faraon pata jilowi ia nö Tiosö pi na, Jose pi ipa ma. A pi ipa nö Egipto tö uli pewö na a kaikana tapalö ma, kamani saia pewö na a kaikanamo pö a ta naipalö ma. ¹¹ Itö nojana, Egipto tö uli pewö, Canaan tö uli, ina kipi töpö uli na tö oi wasiso totio opa ma, töpö pi jonipo totio opa ma, ina tö kuanö, kamakö kolo pata töpö ni tö ma totio opa ma. ¹² Maike, Jacob nö Egipto tö uli na ni tö kulati itö jininö nö, kamani ulu töpö, i töpö liki kamakö kolo pata töpö, iamö i töpö sima sotalö ma, ai ni tö noa tapalö taso pö töna, ia töpö juatalo taimi ipi, sami ipi töpö pi ju somata taso ma. ¹³ Itö nojana polakapi töpö pi ju kua nomo kota lati, ia kamani papala töpö na Jose mömo ko ma, ina tö kua nö Faraon pata nö Jose ai töpö taöa naipaso ma. ¹⁴ Itö nojana, kamani pöa Jacob, kamani ai töpö, ina kipi töpö naka konö taso pö töna Jose nö ai töpö simönö ma, i töpö pewö liki setenta y cinco (75) töpö kuo ma. ¹⁵ Ina tö kuanö, Egipto tö uli na Jacob kua jötökö taso ma, ia a nomaso ma, ia kamakö kolo pata töpö noma naiso ma. ¹⁶ Siquem tö uli na Jacob noma sua konönö nö, Abraham nö Hamor ulu töpö na sitipa nö, tö uli noa komakö noi itö uli na a patilia kokötaso ma. ¹⁷ Abraham na Tiosö pata ku noi itö kupaso pö tö wakala jököpo opa waikio olö kötönö, Egipto tö uli na pe epi kamakö ai töpö pala totio opa ma. ¹⁸ Ina tö kua ta, Egipto tö uli na ai tiko tö kaikanamo nomo ko ma, ia nö Jose kua noi itö jini taimi ipa pasio ma. ¹⁹ Ia kaikana nö, kamakö ai töpö mönama totio opati ma, kamakö kolo pata töpö wasisama totio opa ma; ina a kuanö, kamani ulu pö oso wai ositi ipi pö sö soatalo opa naio ma, töpö pala kota ma apa pö töna. ²⁰ Itaja Moises oso wai kupaso ma, a oso wai toita totio opa ma, kamani pö töpö nö kamani saia na tres (3) pulipulia na a totiapalati ma. ²¹ Itö nojana, a oso wai josalö ma, maike kaikana Faraon pata patea nö a oso wai sulö nö, kamani ula sai wai kua kuawina a tapalati pa a patamanö ma. ²² Ina tö kuanö, Egipto tili töpö kuawi itö pewö na Moises wapo totio opa ma, a japalo pi tao totia apö paso, tö pewö tamawi itö pewö tama pi tao totia apö paso, ina a kua ma. ²³ Moises na cuarenta (40) inama tö kupaso ia, kamani Israel tili töpö na a noimo pi topa apa taso ma. ²⁴ Ai Egipto tili tö nö, Israel tili tö wasisama pole itö talalö nö, Moises a lopaso ma, ia nö kamani ia noama jöto nö, Egipto tili tö sopalö ma. ²⁵ Ipa Israel tili töpö pi ki, Tiosö pata nö samakö löa kopalö pö töna ia simöpalö ma, töpö pi ku upa jatolö kötö, ina Moises pi ku upa köle maike, ina i töpö pi ku pasio ma apa ma. ²⁶ Itö janata Moises nö, polakapi Israel tili töpö sosö ta tö talalö ma, töpö söso ma kopaso pö tö pi ipa salo: “Kama makö pewö pasiwö ¬¿Wina tö kua ia, makö söso pasia köle?”. A ku ma. ²⁷ Ina a ku ia, kamani ai tö sö ti pöle ia nö, Moises a pi jasiapalö nö: “¿Witi pila nö kamisa makö na wa kaikanamo pö wa tapalöma?”. ²⁸ Ina a kutalo nö: --¿Jitö wisa Egipto tili wa tö söpalö pili ina kaunö sa tama pi topa apa noma alukule?--. A ku nomo sota ma. ²⁹ Moises nö itö jininö nö, Madian tö ulinamö a tokösölö ma. Ia jama tö kutio kuawi na ina a kutio taso ma, ia polakapi kamani ulu pö wai takö ma. ³⁰ Ina tö kua nö, cuarenta (40) inama tö jasupaso noia, sanöma töpö ma apö lati iamö Sinai tö jiima pata öpa jöka apö lati, iamö jiti oso wai na koataka jiliso wi i taka mötalö na Tiosö pata nö a simötawi, Moises na ia tapamonaso ma. ³¹ Itö aipa apöle itö na Moises pi kilijo opa pölanö maike, tö mö topa pi topa apa salo a ikua jöka toitakö ma, ia Tiosö japalo jininö ma: ³² “Kamisa liki, awö kolo pata töpö i Tiosö sa. Kamisa liki, Abrahan, Isaac, Jacob ina kipi töpö i Tiosö sa”. Ina a ku ia, Moises kili ipa salo a satitimo totio opa ma, ina a kua nö jiti wai jili pöle iti mö kili totio opa ma. ³³ Itö nojana, Tiosö pata japalo nomo ko sota nö: “Wa öpale i ipa tö uli ausi ipi tö uli pasi kötönö, wa amösö jalole i tökö jasupalö. ³⁴ Egipto tö uli na ipa sonöma töpö kule i töpö pepalama toitile i sa tö tapa totia apa köle. Töpö lalupalo pi jonipo opöle i sa tö jini ipa köle, i sa töpö sua konö pö töna sa itopaso ke. Ina tö kua kötönö, sa jini, Egipto tö uli na wa sima sapapa ko pia köle”. Ina Moises na a ku ma. ³⁵ Ina tö kua nö, Israel tili töpö nö a pi ma apa nö: “¿Witi pila nö kaikana wa tapalö ma?”. Töpö ku waikio noi, Tiosö pata nö ia liki, kamani i töpö na a kaikanamo wi a, löa kopalö pö a, ina ia tapalö ma. Itö liki jiti oso wai na Moises na Tiosö pata nö a simötawi ia tapamonaso noi, ia na Tiosö pata simo ia, ia ku tolea jöto nö, a kaikana ta jötöpalö ma. ³⁶ I Moises nö Egipto tö uli na kamani i töpö suakonö ma. Egipto tö uli na tö aipa apawi tö tama totio opa ma, mötati tu pata janaja apö tu jilo kuawi i tu pata na tö aipama totio opa naio ma, itö nojana sanöma töpö ma apölati ia tö aipama totio opa soa ma, ina a kuati pa cuarenta (40) inama tö kupaso ma. ³⁷ Ji Moises liki, Israel tili töpö na a japalo nö: “Kamisa nö Tiosö pata japalo ia sa tö wösö kua kuawi na, ina kamakö ai ola tö kua pö Tiosö pata nö a saipalö piasalo”. A ku ma. ³⁸ Sanöma töpö ma apö lati ia kamakö kolo pata töpö kai na Moises pata kuo naio sota ma, Sinai jiima tö jösöka jilo pata kuawi ia, Moises pata na Tiosö pata nö a simötawi ia japalo noi, i Moises pata nö sanöma töpö na itö wösö toleati ma. Moises nö toi ipa sotio pö tö japalo jininö noi, kamakö na itö pewö wösö tolea jötötio ma. ³⁹ Maike, kamakö kolo pata töpö nö, Moises jini wani ipa nö, a pi ma apa naio sota ma. Egipto tö uli na töpö sapapo pi topa apa ko sisa alö salo. ⁴⁰ Moises papala Aaron na töpö japalo nö: “Moises nö Egipto tö uli na samakö sua konö ma, maike wina Moises na tö kua ma kunumai. Ina tö kua kötönö, kamisa makö ai Tiosö tapalö, ia nö makö kai ju, makö löapalaö ina ia kua pökö”. Ina töpö ku ma. ⁴¹ Ina tö kua nö, i töpö nö jaka nu pata tapalö ma, ia nu pi na salo pö wani sö sota nö, töpö pi mönajapalo totio opa ma. Kama töpö amösö nö tö tapalöwi tö na töpö pi mönajapalo totio opa ma. ⁴² Ina tö kua ia, i töpö na Tiosö pata sokapalo nö, töpö josalö ma, sitikali pö liki kamani i Tiosö tapalö nö töpö pi mönajapalo pasio pö töna; Tiosö pata japalo ia tö wösö tolea noi i töpö nö tö tosokopalö noi, ia ina tö ku sota: “Israel tili pö, ¿Sanöma töpö ma apölati ia salo mapö wani sö toitio pili, i kamisa na i ma pö wani toto ma pa noi kia?. ⁴³ Ma, kamaka nö Moloc saia ma suapala sisatio ma, Renfan tiosö nu jilo kuawi ia nu wani sitikalia sola, i ma pö nu wani tapalö nö, i pö nu pi na makö pi mönajapalo totio opa ma. Ina tö kua kötönö Babilonia tö uli kulati i toleamö makö jilakö taso piasalo”. Ina Tiosö pata ku ma. ⁴⁴ Sanöma töpö ma apölati iamö kamakö kolo pata töpö nö, Tiosö pata saia oso wai suapala sota ma. Tiosö pata nö Moises na a sai nu möma ia, ina a sai wai kui a sai ta jötöpalö ma. ⁴⁵ Tiosö pata nö ia sai totokö wi, itö nojana, Tiosö pata nö ai tiko töpö na masita tö uli pewö juköpo pöle, itö uli na Josue kai na kamakö kolo pata töpö nö, ia sai kai jua sota solö ma. Ina tö kuati pa David kaikanamo ösöja totia apö paso ma. ⁴⁶ Tiosö pata nö David pi ipa ma, ina tö kua ia, ia nö Jacob Tiosö pata saia takö pö töna a nako ma. ⁴⁷ Maike, Salomon nö Tiosö pata saia takö ma. ⁴⁸ Ina tö kua köle maike, sanöma töpö nö saia takö ma töna a kuo pasio maikötö. Itö na Tiosö pata japalo ia tö wösö toleawi ia japalo nö: ⁴⁹ “Jutumösökö pata na sa lota pasiowi itö, masita tö uli na sa amösö öpa pasiowi itö. ¿Wina saia kui ma sai ta pia köle? Ina Tiosö pata kuti köle. ¿Wina makö kua nö sa mota mapo pö ma tö uli ta jötökö piasalo? ⁵⁰ ¿Kamisa nö i sa tö pewö tapa pasio ma apa pa noi kia?”. Ina a ku ma. ⁵¹ Makö wani moi toti ipö, makö pi wani ku lotete toti ipö, makö sömöka pewö komi ipö, ina makö wani kua köle. Kamakö kuawi na ina kamakö kolo pata töpö kua totio opa naio sota ma, Tiosö janepolepö nö tö tama pi topa a pöle i ma tö wanipo löatalo opa sotia köle. ⁵² Kamakö kolo pata töpö nö Tiosö japalo ia tö wösö toleawi i töpö nasö suapala toitio ma. “A Toita Api” a ju piale itö wösöwi i töpö sö toitio ma. Ia liki kamaka nö i ma namo simökö nö ma söpamanö ma. ⁵³ Kamakö kolo pata töpö nö tö tama pö, Tiosö pata nö a simötawi ia nö tö namo simökö ma, maike i ma tö tama jötö mi ipö--. Ina i töpö na a ku jöto ma. ⁵⁴ Itö jininö nö töpö pi jisuapalo totio opa ma, pili pö juku na töpö jöla totia apöle itö tapamo titio opa ma. ⁵⁵ Maike, Tiosö Janepolepö nö Esteban osimö masökö manököa totia apökö nö, jutumösökö pata mö kukema, koataka si kui na ina Tiosö kui a tapa ma; kateja poko kuomö kuopamö Jesus öpa naio sota ma. ⁵⁶ Ina tö kua ia, Esteban japalo nö: --Jutumösökö pata jakolali i sa tö tapa apa köle. Tiosö kateja poko kuomo kuopamö “Sanöma Tö Ula” öpa kölali--. Ina a ku ma. ⁵⁷ Ina a ku ia, i töpö lalupalo totia apöla nö, töpö sömöka la löatalo opa ma, itö nojana ia namo kea sotakö ma. ⁵⁸ A jasiama kai ju ulö pamö, a kai ulijipa solö ma, ia mama nö a sösaja ma. A namo simökö noi i töpö nö Saulo ai jisa tö jilo kuawi a kotö na Esteban jalo noi ösö pa sota kölö ma. ⁵⁹ Mama nö a sösaja pasi lata, Tiosö pata na Esteban japalo nö: -- Jesus kau nö sa janepolepö sua konö pökö --. A ku ma. ⁶⁰ Itö nojana a maiko pewö jitata sotakö nö, a japalo lalupalo sota nö:-- Tiosö pata, i töpö nö ji wanisana tö tama pöle i töpö ote ta konö--. Ina a kutalo nö a söa sotaso ma.

Capitulo 8

¹ Saulo na, ia söpalöwi itö toita apa ma. Itö wakala na, Jesus na töpö pewö sötapalowi Jerusalen tö uli na i töpö nasö suapala kolo kua sopakö ma, ina tö kua ia Samaria tö uli na ai töpö tokö solö ma, Judea tö uli na ai töpö toka naisolö ma, töpö saipalö noi i töpö jia sisapaso ma. ² Tö pi tatejepaso noia, ai töpö nö Tiosö kili pata taö öpawi töpö nö, Esteban noma patilia kokö nö, pi sateje epi wakala töna ia pi na töpö ököti ma. ³ Saulo nö, Jesus na tö kuawi itö pewö mapama pi topa apa ma, ina a kua nö saipö pewö na a lisipo jötöpo totio opa nö, Jesus na töpö sötapalowi i töpö jua nö, pöka kasötawi ia töpö titia suatalo opa ma. ⁴ Maike, Jesus na töpö sötapalowi i ai töpö ju salekekö noi, i töpö ju pa Tiosö pata japalowi itö wösö soatalo opati ma. ⁵ Samaria tö uli na Felipe julasolö ma, ia Tiosö pata nö a saipalö noi, ia wösö sota ma. ⁶ Felipe japalo jini pö töna sanöma töpö pewö kokamota totio opati ma, Felipe nö aipa apawi tö tamawi itö ta pi topa apa salo. ⁷ Sateje epi töpö osimö na sai töpö titija apöle ipö wani atupo titio opa ko ma, pö wani lalupalo pöla nö, pö wani atupö totio opa ko ma. Töpö kalipalo mi ipö, töpö juatalo mi ipö, ina töpö kuawi töpö nö löa totio opa naio ko ma. ⁸ Ina tö kua ia, itö uli na töpö pewö pi mönajapalo totio opati ma. ⁹ Ia, ai sanöma tö Simon a jilo kuawi a sapili ipi a kuo ma. Ia nö, aipa apa kilia, Samaria tili töpö pi tama sinimö opati ma, sa lotete epi sa a pi ku totio opa ma. ¹⁰ Ia japalo ia, sanöma töpö pewö, ulu töpö pewö, pata töpö pewö, ia na ina kipi töpö pewö sömöka ta totiatalo apati ma, ina töpö kua nö: --Ji wano tö liki, “Tiosö pata lotete epi itö” töpö kutowi ia--. Ina töpö kupaso sinimo opati ma. ¹¹ Aipa apawi ia nö tö tama tatea totia apa waikipaso ma kötönö, sanöma töpö nö, a japalo ia tö jini pi topa totia talo opa ma. ¹² Maike, Felipe nö Tiosö pata kaikanamowi itö wösö ma, Jesucristo kuawi itö wösö naio ma, itö jininö nö, Jesus na pitilita sateje epi Samaria tili töpö pi ku totia apö paso ma. Wano töpö, su töpö ina kipi Felipe na töpö mai omonaso ma. ¹³ Pitilita Simon pi ku totia apa nailo nö, a mai omo naiso ma. Ina a kua nö Felipe ju pa a ju totiatalo opa naitio nö, Felipe nö, tö aipama totio opa ia, a pi kilijo opa ma. ¹⁴ Jerusalen tö uli na, töpö saipalö noi i töpö kua pasi lati, i töpö nö, pitilita Jesus na Samaria tili töpö pi kulaso noi itö jininö nö, iamö Pedro, Juan ina kipi töpö simönö ma. ¹⁵ Ia töpö walotakö nö, i töpö na Tiosö janepolepö tikikö pö töna, Tiosö pata na töpö japalo sota ma. ¹⁶ Itaja i töpö na Tiosö Janepolepö titio paio ma apa ma tö kuo ma, Jesus jilo pi na töpö mai omo sisaso ma tö kuo sisa ma. ¹⁷ Ina tö kua ia, i töpö jösöka na Pedro, Juan ina kipi töpö amösö walitakö ma, Tiosö Janepolepö titio soatalo opa ma. ¹⁸ I töpö amösö walitakö ia, Tiosö Janepolepö titio soatalo opöle, i Simon nö itö ta apa nö, Pedro, Juan ina kipi töpö na sitipa totoma nö: ¹⁹ --Kamisa na itö lotete epi itö tota naipa, ai sanöma töna sa amösö walitakö ia, Tiosö Janepolepö titita naio pokö--. A ku ma. ²⁰ Ina a ku ia, Pedro japalo jöto nö: -- Tiosö pata nö tö totomawi, sitipa nö i wa tö noa tapa pi topa apa pasia köle, ina tö kua kötönö, au sitipa kai wani mota pasilo. ²¹ Tiosö pata nö wa pi ku wanisana api itö tapa apa kötönö, sa makö tatapajamo pöle itö na wa tatapajamo naio pö tö ma apa pasile. ²² Wanisana wa tö josalö nö, Tiosö pata na a ote tamo ko, ina wa kua kukema, Tiosö pata nö wa pi ku wanisana api itö ote ta jöta ko jatolö kötö. ²³ Wina pi ku salo, ai töpö itö toita api tö kule i wa tö pi ipa salo wa pi jisuapalo opatiwi, i sa tö tapa apa köle. Wanisana tö nö wa okapo toitia köle --. Ina a ku ma. ²⁴ Simon japalo jöto kota nö: --Kamisa pi na Tiosö na pö japalo. Kamisa na makö kuti pöle itö kupo ma apa pö töna--. Ina a ku ma. ²⁵ Pedro, Juan ina kipi töpö nö Tiosö Japalowi itö wösö mapalo nö, Jerusalen tö uli patanamö töpö jua sapa ko sota solö ma. Samaria tö ulinamö ai töpö uli kuo wi, ia Tiosö japalowi itö wösö jötöpo totio opa koonö ma. ²⁶ Ina tö kua ta, Felipe na Tiosö pata nö a simötawi ia japalo nö: -- Pila motoko lepuku pata kuomö kuopa mö, wa julasolö pö töna a öpapalo, i tiso liki Jerusalen tö uli na tiso kolo pakö nö, Gaza tö uli na tiso waloa tasa, i tiso pata liki sanöma töpö ma apölati ia i tiso jasua tasa--. Ina a ku ma. ²⁷ Felipe a öpa jötöpalo nö, a jua jötö solö ma, a ju ulö pamö ai Etiope tili tö talalö ma, ia liki eunuco a kuo pasio ma. Ia nö, Etiopia tili töpö kaikana tö su Candace a jilo kuawi ia sitipa pewö tapo pasiowi a kuo ma. Jerusalen tö uli na, kama nö Tiosö pata pi ipawi itö möma taso piasalo a ju naio taso ma tö kuo ma. ²⁸ Katoa na kamani saia na a pi ju kotilipamö, Tiosö pata japalo ia tö wösö toleawi Isaias a jilo kua noi ia nö, tö tosokopalö noi, itö katea kai ju koonö ma. ²⁹ Felipe na Tiosö Janepolepö japalo nö: -- Wa jutalonö nö, ji katoa na a waloa jökötakö tö --. Ina a ku ma. ³⁰ Ina a ku ia, lope epi Felipe ikua jötötakö ma, katoa na a titile ia nö, Tiosö pata japalo ia tö wösö toleawi Isaias a jilo kua noi ia nö, tö tosokopalö noi itö kateati pöle itö jininö nö: -- ¿Wa tö katea ti pöle i wa tö jini jöta alukule?--. A ku ma. ³¹ Ina a kuia, Etiopia tili tö ku jöto sota ma: --¿Ai tö nö, tö wösö pasio mi ipö ta, wina sa tö jinia ta pasili piasalo? -- Ina a ku nö, kamisa kotö na a loa naikö so, Felipe na a ku sota ma. ³² Tö tosokama kateati noi, ina itö tosokama ku ma: -- Oveja wai söpalö piasalo a wai sua talölö kuawina, ina a sua talölö ma, oveja koiki wai janö köle maike a lalupalo mi ipö kulena, ina a kua ma. ³³ A pepalama totio opa ma maike, aitö nö a löapala ma apa ma. ¿Wöti pila nö, kamani ulu töpö ola katea jaio piasalo? Aitö ma apöle, wina pi ku salo a jisa toti so ia, ji masita tö uli na a söa pasi palö noi itö pi na --. Ia nö itö kateati ma. ³⁴ Felipe na, ia japalo sota nö: --Wina jitö ku pasia köle, ¿Kama na, Isaias ku ko jato ma, ai tiko töna a ku puo jato ma?--. Ina a ku ia. ³⁵ Felipe japalo sota ma. Tö katea noi ia tö katea kolo kupalo nö, ia na Jesus kuawi itö pewö wöa totia apa sokö ma. ³⁶ Töpö ju ulöpamö, matu kuo pa töpö walöpakö ma, ina tö kua ia, i Etiope tili tö japalo nö: -- Jisia matu kua köle, ¿Sa mai omonaso pö töna, kamisa na kapili tö ma apa soa köle? --. A ku ia. ³⁷ Felipe japalo jöto nö: --Pitilita wa pi ku totio opa könaja, a mai omono--. A ku ia. Ia japalo jöta ko sotalo nö: --Pitilita Jesus, a saipalö noi, ia liki Tiosö pata ula sai totiwö, ina sa pi ku totia apa köle--. Ina a ku jöto sota nö. ³⁸ Katoa opia sotamakö ma, ia matu na polakapi i töpö itua sotaso ma, iakö sotawö Felipe nö ia mai oa sotamanö ma. ³⁹ Matu na töpö ju pasököa kopaso noia, Tiosö Janepolepö nö Felipe sua ko sotalölö ma. Etiope tili tö nö a tapa kota ma apa ma maike, a pi mönaja totio opa koonö ma. ⁴⁰ Azoto tö uli na, Felipe tapamo konaso taso ma, ia ai töpö uli na toita api tö wösö totio opa koonöpamö Cesarea tö uli na a waloa kokö taso ma.

Capitulo 9

¹ Ina tö kua ta, Saulo nö Jesus na töpö sötapalowi i töpö sö pi topa apa soa ma. Ina a kua nö, Tiosö pata saia totiapalowi i pata tö kaikana na a ikua satokö ma. ² Damasco tö uli na judío töpö kokamotawi ia sai pewö na töpö kaikana kule, i töpö na, ia kaikana nö, wajeta tö tosokopalö nö, i tiso na, töpö nokapalowi Saulo nö i töpö jua ia, i töpö nö a pasiliapala naio pö töna, Saulo nö tö pi ipa salo itö na a nako ma. Wano töpö, su töpö, ina kipi töpö oka lata Jerusalen tö uli na töpö suapala ko pö töna Saulo nö tö pi ipa ma. ³ Damasco tö uli na Saulo ju jöka apa ta, jutumösökö pata na tö wakala kuowi tö nö, a jösöka totio opa soa pöta ma. ⁴ Ina tö kua ia, masita tö na a kelaso ma, ia tö japalo sota nö: -- Saulo, Saulo, ¿Wina tö kua ia, kau nö sa nasö suapala köle?--. Ina tö ku pöle itö jininö ma. ⁵ Saulo japalo jöto nö: --Pata, ¿Witi pili wa?--. A ku ia. Tö japalo ko sotalo nö: --Kamisa liki Jesus sa, sa nasö suapalati pöle i sa. ⁶ Maike, wa öpa kopalo nö, itö uli na a lisipalo tö, wa kua pö ia tö wösö piasalo--. Ina tö japalo pöle itö ku ma. ⁷ Ia na ai töpö nokapalo naile i töpö nö, tö japalo jini totia apa köle maike, ai tö tapa ma apöle itö na töpö pi kilijo totio opa salo, töpö japalo mi ipi töpö öpaja totio opa pasio ma. ⁸ Itö nojana, Saulo öpa kopalo nö a mamo tatea kopakö ma maike, tö mö ma apa ma. Ina tö kua ia, a poko tuta konönö nö, Damasco tö uli na a jilakö taso ma. ⁹ Saulo nö, tö mö mi ipö, a lapalo mi ipö, pili tu koa naio mi ipö, ina a kuati pa tres (3) wakala tö jasupaso ma. ¹⁰ Damasco tö uli na, Jesus na ai tö sötapalowi Ananias a jilo kuawi a kuo ma. Ia na, tö aipa apawi tö mötalö na, Jesus japalo nö: --Ananias--. A ku ia. Ananias japalo jöto nö:--Pata kapili tö--. A ku jöto ia: ¹¹ --Wa öpapalo nö, “salili ipi tiso”, tiso jilo kuawi ia wa julolö nö, Judas saia na a walotakö tö. Ia wa walotakö nö, ai Tarso tili tö Saulo a jilo kuawi wa wani tai sota pökö, jukiki ipi Tiosö pata na ia japaloti köle. ¹² Tö aipa apawi tö mötalö na, ai tö Ananias a jilo kuawi, ia na a amösö walitakö nö, a mamo tatea komaköwi, ia na i sa tö möma waikio ke--. Ina ia na Jesus ku sota ma. ¹³ Ina a ku ia, Ananias japalo jöto nö:-- Pata, Jerusalen tö uli na, au sanöma töpö na ia wani nö wanisana tö tama sotile i sa tö jini sotia köle. ¹⁴ Ina tö kua naia ta, jisia Damasco tö uli na wa jilo kateawi i töpö pewö jua pö töna, Tiosö pata saia totiapalawi i pata töpö kaikana nö, ia na wajeta tö tosokama tota totia apa naia waikikö ma--. Ina a ku jöto ma. ¹⁵ Maike, Ananias na: --A jululö, Saulo nö kaikana pata töpö, Israel tili töpö, sanöma tiko töpö pewö, ina kipi töpö na, sa japalowi itö wösö totio opa pö töna, kamisa nö i sa saia waikipalö ma a. ¹⁶ Kamisa jilo pi na a wasisama totio opa pö tö kulati, kamisa nö Saulo na i sa tö möma totio opa sota piasalo--. Ina Jesus ku ma. ¹⁷ Ina tö kua ia, iamö Ananias julasö ma, ia Saulo kuo pa a waloa jötökö taso ma, ia jösöka na Ananias amösö walia sotakö nö:-- Saulo, ipa ai tö, jisimö wa ju tasa taja kau na Jesus tapamonaso noi ia nö, wa tö mö kokö pö töna, kawa osimö na Tiosö Janepolepö titia naikö pö töna sa simöpalö ke--. Ina a ku sota ma. ¹⁸ Iakö sotawö, salaka jöösö mösököpö kuina ina tö kui, ia mamo na tö kea konaso ia, tö mö ko sota ma. Itö nojana a öpa kopalo nö, a mai omo sotaso ma. ¹⁹ Itö nojana, wani ipi a iapalo ko nö, a lotetea kopaso ma. Damasco tö uli na, Jesus na töpö sötapalowi töpö kule i töpö kotö na sateje epi wakala tö na Saulo kuo naitio ma. ²⁰ Judio töpö kokamotawi ia sai na, lope epi Jesus kuawi tö wösö kolo kua sota alö nö:-- Ia liki Tiosö pata ula--. A ku totio opa ma. ²¹ Ai töpö nö a jini pöle i töpö pi kilijo opa pöla nö: -- ¿Ji ia wani liki, Jerusalen tö uli na, Jesus na pitilita töpö pi ku upawi i töpö söpalö pö töna töpö nasö suapala totio opa pili ia wani pasi maikötö? Ia wani nö jitö uli na, pitilita töpö pi ku upawi i töpö jua nö, Jerusalen tö uli na, Tiosö pata saia totiapalawi i pata töpö kaikana na töpö totoma ko taso pö, tö pi na jisömö a ju pasio kösölö ma--. Ina töpö kupalo opa ma. ²² Maike, Saulo japalo loteteapalo satia totio opa jöto nö, Damasco tö uli na Judio töpö kule i töpö pi ku monöpalama apa ma, ia liki Tiosö pata nö a saipalö ma a, a kuto pöle itö pi na. ²³ Sateje epi tö wakala jasupaso noia, Judio töpö nö Saulo söpalö piasalo töpö kokamonaso ma. ²⁴ Saulo nö itö jinia jötölö ma. Itö uli na takataka kolo pata kule i taka kolo pata na, wakala ia töpö mamo löapalo, muma ia töpö mamo löapalo, ina töpö kuati ma, a söpalö piasalo. ²⁵ Ina tö kua ia, Saulo nö tö wösö ia pitilita töpö pi kulaso noi i töpö nö, wöa na Saulo titikö nö, itö uli pewö pata jokolole itö julu pata na, muma ia a pi itoa jöta kopamanö ma. ²⁶ Jerusalen tö uli na Saulo walopakö nö, Jesus na töpö sötapalowi i töpö na a noimo pi topa apa ma maike, ia na i töpö kilipalo opa ma. Jesus na pitilita a pi ku totia apö paso ma a, i töpö pi ku totio ma apa ma. ²⁷ Maike, töpö saipalö noi i töpö na Bernabe nö Saulo kai ikukö nö, Damasco tö uli na a ju ulö ta Jesus tapamano nö, Saulo na a japalo noi, i töpö na itö pewö wösö jöto ma. Damasco tö uli na Saulo pi kilijita pölanö kunumai Jesus wösö totio opa noi itö wösö naio ma. ²⁸ Ina tö kua nö, Jerusalen tö uli na i töpö kotö na Saulo kua opia naia sotakö ma. Ia a kuo naio pa, a pi kilijita pölanö kunumai, Jesus kuawi itö wösö totio opa ma. ²⁹ Griego tö kai na ai judío töpö japalowi töpö, Saulo ina kipi töpö japalo jitupaso laso ma, ina tö kua ia, i töpö nö Saulo sapalö pö töna töpö pi kupalo opa ma. ³⁰ Jesus na töpö sötapalowi i töpö nö itö jininö nö, Cesarea tö uli na Saulo kai julolö nö, ia Tarso tö uli na a sima tolea noma sotalö ma. ³¹ Ina tö kua nö, Judea tö uli, Galilea tö uli, Samaria tö uli ina kipi tö uli pewö na Jesus na töpö sötapalowi i töpö pewö pi moti kuo totio opa ko ma; töpö loteteapalo totio opati nö, Jesus kili taö öpawi tö möma totio opati ma. Tiosö Janepolepö nö töpö pasiliapalati ia, töpö pala totio opa alö ma. ³² Itö uli pewö na Pedro ju jötöpo totikö nö, Lida tö uli na Jesus na töpö sötapalowi töpö kulati i töpö na a noimo jua noma sota solö ma. ³³ Ia, ai sanöma tö Eneas a jilo kuawi a talalö ma, ia liki a juatalo mi ipö kötönö, a mita pasiowi itö na ocho (8) inama töna a papalo toitiowi tö kuo ma. ³⁴ Ia na, Pedro japalo nö: --Eneas, Jesuscristo nö wa löa konö ke. Wa öpa kopalo nö, wa mitawi itö jaloa kopalö--. Ina a kutaso ia, a öpa ko sotaso ma. ³⁵ Ina tö kua pöle, Lida tili töpö, Saron tili töpö ina kipi töpö nö itö ta nö, Jesus na pitilita töpö pewö pi ku totilaso ma. ³⁶ Jope tö uli na, Jesus na ai su tö sötapalowi Tabita a jilo kuawi a kutio ma, Griego tö kai na ia jilo na Dorcas tö kuto ma. Ai töpö na ia nö, toita api tö tama apati, töpö pepalo opawi töpö pasiliapala apati, ina a kuati ma. ³⁷ Ia kamakalimono nö, a nomaso ma, ina tö kua ia a noma saloa kopalö nö, jitua ai saia kuowi ia a noma takö laso ma. ³⁸ Maike, Jesus na töpö sotapalowi i töpö nö, Lida tö uli na Pedro kule itö jininö nö, iamö polakapi ai töpö simönö ma: --Jope tö uli na, lope epi kamisa makö na a noka naipalo--. Ina töpö ku taso pö töna. ³⁹ Ina töpö ku ia, i töpö na Pedro noka naia jötösolö ma, töpö walokö taso ia, jitua a sai kulali ia a naka sotalölö ma. Pedro kotö na su töpö panopa nomasö noi i töpö su öpakö nö, Dorcas toi ipö so ia jalo ösö pö ta ti noi, Pedro na ösö pö möma pölanö töpö ököpalo totio opa ma. ⁴⁰ Pedro nö ia töpö pewö atua kopamanö ma, itö nojana a maiko pewö jitata sotakö nö Tiosö pata na a japalo sota ma. Ia noma na a mamo tatea sotakö nö: --Tabita a öpa kopalo--. Ina a kutaso ia, a mamo tatea kokö ma, Pedro talalö nö a loa sotakö ma. ⁴¹ Ia amösö na Pedro amösö walia sotakö nö, a öpa kopamanö ma. Itö nojana Jesus na töpö sötapalowi töpö, su töpö panopa nomaso noi i töpö su pewö, töpö nakalö nö i töpö na, a toi ipi a möma ko ma. ⁴² Itö liki Jope tö uli pewö na itö jino totio opa ma, ina tö kua ia, Jesus na pitilita sateje toti ipi töpö pi ku totikö ma. ⁴³ Itö uli na sateje epi tö wakala na ai sanöma tö Simon a jilo kuawi a nö saloa jöösö totiamawi ia saipö na Pedro kuo paitio ma.

Capitulo 10

¹ Ina tö kua ta, Cesarea tö uli na ai sanöma tö Cornelio a jilo kuawi a kutio ma. Ia liki sateje epi cien (100) waitili töpö "Italiano" töpö jilo kuawi töpö na a kaikanamowi a kuo ma. ² Ia pi ku toita apa ma. Tiosö kili pata taö öpawi a kuo ma, kama ai töpö pewö sola. Ia nö judio töpö pepalo opawi i töpö na pe epi sitipa totoma sinimo opati ma. Itö wakala pewö na Tiosö pata na a japalo sotio ma. ³ Ina tö kua nö, ai tö wakala na, tö motoko kaöjöpo ta, Cornelio kutio pa Tiosö pata nö a simötawi ia lisipalo nö: --Cornelio--. A ku ma. ⁴ Ina a ku ia, a kilipalo opa ma, a mö jötöla nö: --¿Pata, kalipili tö?--. A ku jöto ia, Tiosö pata nö a simötawi ia japalo sota nö:--Tiosö pata nö, wa japaloti wi itö jini ipa waikia köle. Sanöma töpö pepalo opawi i wa töpö pasiliapala apatiwi itö ta apa naia waikia köle--. Ina a ku nö, a ku nomo ko sota ma: ⁵ --Jope tö uli na ai sanöma töpö simöpalö. Ia ai toni Simon a jilo kuawi ia na Pedro töpö kuto naiowi, ia nakalö tasö pökö. ⁶ Ia liki ai sanöma tö Simon a jilo kuawi a nö saloa jöösö totiamawi, ia wani saia na a kutia tasa, mötati tu kasö pata na ia sai öpa tasa, wa tö tama pö ia nö tö wösö piasalo--. Ina a ku ma ⁷ Tiosö pata nö a simitawi ia jua konasolö noia, Cornelio nö polakapi kamani ai tatapajo tili töpö naka sotalö ma, ia na kamani ai waitili tö tatapajamo sötapalowi ia naka nailö ma, i waitili tö nö Tiosö kili pata taö öpawi a kuo ma. ⁸ I töpö na itö pewö wöa sotakö nö, Jope tö uli na töpö sima sotalö ma. ⁹ Itö jenata pilitiso na i töpö ju soa pölanö itö uli na töpö ju jöka apa pasi lata, janasaita saia jösöka na aia sai kulali iamö Tiosö pata na Pedro japalo piasalo, a jemopa solö ma. ¹⁰ Pedro oi ipö salo a iapalo pi topa apa ma, ni tö tapala pasi lata, tö aipa apawi tö mö pasio ma. ¹¹ Tö mö kukema jutumösökö pata jakolaso ma, jalo ösö pata kuina ina tö kui tö ito laso ma, ösö ola pewö pata oka totio opa ma. ¹² I jaloösö pata na salo pö pewö wani titio totio opa ma, pö joleawi pö wani, pö katöwi pö wani, ina kipi kökö pewö titio ma. ¹³ Ina tö kua ta, tö japalo pasio nö: --Pedro wa öpapalo nö, au ai salo wa söpalö nö a oa lö--. Ina tö ku ma. ¹⁴ Pedro japalo jöto nö: --Ma, Pata. Tö oamo mi ipi sa tö oa pasio maikötö. Tö sami ipi i sa tö oa pasio maikötö--. ¹⁵ Ina a ku ia. Tö japalo jöto kota nö: --Tiosö pata nö tö salu waikio noi itö na, tö sami ipö a kuto pasio ti--. Ina tö japalo ku ma. ¹⁶ Tres (3) itö pi kua kupaso ma, Itö nojana jalo ösö pata ösa kopasolö ma. ¹⁷ Ina tö kua ia, Pedro pi kupalo opa ma:-- ¿Wina tö kua pö töna, itö tapamo pasio ke?--. Ina a pi kupalo opa pasi lata, Cornelio nö töpö simöpalö taso noi, takataka kolo na i töpö öpakö nö, ¿witia Simon saia kua? Töpö ku pasio solö ma. ¹⁸ Takataka kolo sö nö: --¿Jisia Simon ai tö jilo kuawi a na Pedro töpö kuto naiowi ia kua köle? --. Ina töpö ku ma. ¹⁹ Pedro pi kupalo opa sola ta, Tiosö Janepolepö japalo kota nö: --Pedro, tres (3) sanöma töpö nö wa tai köle. ²⁰ Wa pi ku opimo pölanö kunumai i töpö na a noka totia apa naita lolö. Kamisa nö i sa töpö simöpalö ke--. Ina a ku ma. ²¹ Pedro itua ko sotalo nö. A tai pöle i töpö na: --Ma tai pöle i sa. ¿Kapili ma tö tamo ju ke?-- Ina a ku sota ma. ²² Ina a ku ia, topö japalo jöto nö: --Cornelio na Tiosö pata nö a simötawi ia japalo nö Pedro nakalö tö, au saia na a ju kösölö nö a japaloia wa tö jini pökö, ina a ku ia samakö ju köle. Cornelio liki waitili töpö na a kaikanamowi a, Tiosö kili pata taö öpawi a, judio töpö nö a pi ipawi a--. Töpö ku jöto ma. ²³ Pedro nö töpö lisipamanö ma. Ia töpö kuo jalu ma, töpö juso jana ko ia, i töpö na Pedro noka naia sota solö ma, Jope tö uli na ai töpö kuo naio wi töpö sola. ²⁴ Itö jenata, Cesarea tö uli na töpö waloa sotakö taso ma. Ia Cornelio nö kamani ai töpö kai na i töpö walo tati ma; kamani ai töpö noimo totio opawi töpö naka nailö ma. ²⁵ Ina tö kua ta, Cornelio saipö na Pedro talaso ia, Cornelio ikua lökö nö, masita töna pila maiko jitata löa sotakö nö, Tiosö kili pata taö kua kuawina ina a kua luo ma. ²⁶ Ina a kua ia, Pedro nö, a öpa kopamanö nö: --A öpa kopalo. Sanöma sa nai pötawö--. A ku ma. ²⁷ Töpö japalo opa pasi lata, saia na Pedro lisia sotasolö ma. Ia sateje epi töpö kokamo opöle, itö ta sotalalö ma. ²⁸ Ia a japalo sota nö: --Judio makö pasi mi ipi i makö na judio samakö noimo kili ipaö, kamakö saipö na samakö lisipo kili ipa naio. Ina judio samakö kuawi i ma tö taö öpa waikiaköle. Maike, "Ai sanöma tiko tö sami taö jato ti, ai tö nisi taö jato ti", ina kamisa na Tiosö pata kuti köle. ²⁹ Kamaka nö sa naka ia, sa pi kupalo pölanö kunumai sa ju sota köle. ¿Kapili tö pi na kamaka nö sa naka ma? --. ³⁰ Ina a ku ia, Cornelio japalo jötöta nö: --Cuatro (4) wakala tö kuo pili ita ipa saia na wisatia Tiosö pata na sa japaloti ta, kamisa na ai sanöma tö mömo ma, kamani jalo ösö wakala totio opa köpöli. ³¹ Ia liki, kamisa na a japalo nö: "Cornelio, Tiosö pata nö wa japalotiwi itö jini ipa waikia köle. Sanöma töpö pepalo opaia wa töpö pasiliapalatiwi itö taö öpa naia waikia köle. ³² Jope tö ulinamö ai sanöma töpö simönö. Ai toni Simon a jilo kuawi a na Pedro töpö kuto naiowi ia nakalö taso pökö, ia liki, ai tö Simon a jilo kuawi a nö salo pö jöösö totiamawi ia saipö na a kua tasa, mötati tu kasö pata na ia sai öpa tasa. I wa nakalö ia kau na ia japalo piasalo". Ina kamisa na Tiosö pata nö a simötawi ia ku köpili. ³³ Ina a ku ia, lope epi kau na ai sa töpö sima sotalö köpöli. Ina tö kua kötönö wa ju pöle itö topa apa köle. Jukiki Tiosö pata nö makö ta totia apö lata, kau na kaikana tö simo noi i sa ma tö jini piasalo samakö pewö kokamo köle. --. Ina Pedro na a ku jöto ma. ³⁴ Pedro japalo jöto sota nö: --Jukiki sa tö taö öpa waikiaköle. Tiosö pata na ai sanöma tiko tö kua pasia maikötö. I makö pewö sotawö. ³⁵ Ina tö kua kötönö Tiosö pata nö ai sanöma tö wanipo pasio maikötö. Tiosö kili taö öpawi i töpö, Tiosö pata simowi itö tamawi i töpö pewö pi ipa soa pöta kötö. ³⁶ Tiosö pata nö Israel tili töpö na kama japalowi tö simöpalö ma, makö pewö kuo topa apa pö töna, Jesucristo nö tö wösö jöto solö ma. Ia liki itö pewö na pata tö sai pata totiwö. ³⁷ Kamaka nö Judea tö uli na Jesus na tö kua noi i ma tö taö öpa waikia köle. Juan nö tö mai omawi itö wösö noi itö nojana, Galilea tö uli na tö kolo kua kupaso ma. ³⁸ Tiosö pata nö Jesus na kama Janepolepö lotete epi itö totokö ma. Ia liki itö uli pewö na a ju jötöpo totio opa ma, toita api tö tama kai ju totio ma, Ia na Tiosö pata nokapalo sotio kötönö, sai töpö nö sanöma töpö pepalama apatiwi i töpö löa totio opa kotio ma. ³⁹ Ia nö, Judea tö uli na tö tama noi itö, Jerusalen tö uli na tö tama noi itö, kamisa makö nö i sama tö pewö ta totio opa ma samakö. Ia liki jiti na a saumakö nö a söpalö ma. ⁴⁰ Maike tres (3) tö wakala na, Tiosö pata nö a toia kopalö nö, a möma totio opa ko ma. ⁴¹ Maike sanöma töpö pewö na kunumai, Tiosö pata nö töpö saia sisa palö noi i töpö nö a mö ko sisa ma. Kamisa makö nö i samatö wösö wi i samakö, a toia konaso noia ia kai na samakö iapalo koo, sama tu koa koo, ina samakö kua totio opa ko ma. ⁴² Sanöma töpö na tö toita api i samatö wösö pö töna Jesus nö samakö sima ma. Töpö toi ipi i töpö, töpö noma api i töpö, ina kipi töpö na Tiosö pata nö Jesus a kaikana tapalö ma, i sama tö wösö naio pö töna samakö sima naio ma. ⁴³ Itö na, Tiosö pata japalo ia tö wösö tolea noi i töpö pewö japalo totio opa soma nö: “Jesus na pitilita wa pi ku upawi, ia jilo pi na i wa wanisana apawi itö ote ta ko piasalo”. Ina töpö ku ma. --. I töpö na ina a ku ma. ⁴⁴ Itö na Pedro japalo sola taja, a japalo jini pöle i töpö pewö na Tiosö Janepolepö titia jötaja sotakö ma. ⁴⁵ Pedro na judio töpö nokapalo pöle i töpö nö itö ta nö, töpö pi kilijo totio opa ma. Judio topö pasi mi ipi i töpö na Tiosö Janepolepö titia naiköwi itö na. ⁴⁶ I töpö liki, tiko töpö kaina töpö japalo soa pötakö nö, Tiosö pata na töpö japalo pi mönajapalo totio opa ma. ⁴⁷ Ina tö kua ia, Pedro japalo sota nö: -- Kamaka na Tiosö Janepolepö titia kulena ina i töpö na tö titia kua naikö ke ¿I töpö mai opamonaso pö töna, ai wa nö ma wa tu umapo pasio pia alukule?--. A ku sota ma. ⁴⁸ Ina a ku nö, Jesucristo jilo pi na töpö mai opamanö pö töna a simo sota ma. Itö nojana, kamisa makö kotö na wa kuo opio paio misalo, Pedro na töpö ku sota ma.

Capitulo 11

¹ Ina tö kua taja, töpö saipalö noi i töpö, Judea tö uli na Jesus na töpö sötapalowi töpö pewö kule i töpö, ina kipi töpö nö, judío töpö pasi mi ipi i töpö nö Tiosö pata japalowi itö jinia nailö noi itö jininö ma. ² Jerusalen tö uli pata na Pedro koakopö ma. Ina tö kua ia, Jesus na töpö sötapalowi töpö nö Tiosö pata simo noi circuncisión tö jilo kuawi itö tama totia talo opatiwi i töpö nö, Pedro wanipo luo nö: ³ --¿Wina wa pi ku salo, judio töpö pasi mi ipi i töpö na wa noimo pö töna wa ju pasio taso ma? ¿I töpö kai na wa iapalo naio pasio pikio opa taso noi kia? Ina töpö ku luo ma. ⁴ Ina töpö kua ia, Pedro nö, tö kua noi itö pewö wösö jöto nö: ⁵ --Jope tö uli na sa kutio ma. Ia Tiosö pata na sa japaloti taja tö aipa apa soa pöta ma. Jalo ösö pata kulena ina tö kui jutumasökö pata na tö itipo laso köpöli, ösö ola pewö oka totilata. ⁶ Ina tö kua ia, sa tö mö totio opa kukema, i jaloösö pata na salo pö pewö pata titio köpöli, pö joleawi pö wani, pö waitili ipi pö wani, pö katöwi pö wani, ina kipi kökö pewö titio köpöli. ⁷ Ia tö japalo sota nö: "Wa öpapalo nö, au ai saloa söpalö nö a oalö". Ina tö ku ia. ⁸ Sa japalo jöto nö: "Ma, Pata. Tö oamo mi ipi sa tö oa pasio maikötö. Tö sami ipi sa tö oa pasio maikötö". ⁹ Ina sa ku ia, tö japalo jöto kota nö: "Tiosö pata nö tö salu waikio noi itö na, tö sami ipi kötö a ku pasio ti". Ina tö ku sota köpöli. ¹⁰ Tres (3) itö pi kua kupalo nö, itö nojana jalo ösö pata ösa kopasolö köpöli. ¹¹ Ina tö kua taja, Cesarea tö uli na tres (3) sanöma töpö kuomö kuo taso ma, töpö nö sa nakalö solö pö töna, ipa saia sika na töpö öpa solö köpöli. ¹² I töpö liki judío töpö pasi mi ipö pölata maike, i töpö na a noka nailolö. Ina kamisa na Tiosö Janepolepö ku köpöli. Ji seis (6) sanöma töpö ju naile, Cornelio saia na kamisa na i töpö ju naio köpöli. ¹³ Ia nö kamisa makö na, ia na Tiosö pata nö a simötawi ia japalo nö: “Jope tö uli na ai töpö simöpalö, ai toni Simon a jilo kuawi a na Pedro töpö kuto naiowi ia nakalö taso pökö. ¹⁴ Makö löa konaso pö ia nö kamaka na tö wösö piasalo, ina tö kua nö kawa, au saia na töpö kule i töpö, ina kipi makö pewö löa ko piasalo”. Ina a ku noi itö wösö jöto köpöli. ¹⁵ Ina tö kua ia, i töpö na sa japalo kolo kupo jötöta taja. I töpö na Tiosö Janepolepö titia sotakö köpili. Kamaka na Tiosö Janepolepö titia kukö pöli ina tö kua naio köpöli. ¹⁶ Ina tö kua ia Jesus japalo nö: "Juan nö töpö mai oma noi matu nö i töpö mai oma pasio ma, maike kamakö liki Tiosö Janepolepö nö makö mai omo pasio piasalo". Ina a ku pöli i sa tö taöa kopaso köpöli. ¹⁷ Kaikana Jesucristo na pitilita makö pi kulaso ia Tiosö pata nö kamakö na kama janepolepö titia takö kuanoi na ina i töpö na tö tama naio köpöli. Ina tö kua kötönö ¿Wina sa kua nö Tiosö pata na, tama ti, sa ku pasio piasalo?--. Ina a ku jöto ma. ¹⁸ Jesus na töpö sötapalowi i töpö nö itö jininö nö, töpö japalo jöto kota ma apa ma, Tiosö pata toita api itö na töpö japalo nomo ko sisa nö: --Ina tö kua salo Judio töpö pasi mi ipi Tiosö pata nö i töpö ote ta naia konö ma, wanisana apawi itö josa konö ia Tiosö pata nö i töpö na temö ipö tö tota naikö piasalo--. Ina töpö kutö ma. ¹⁹ Esteban söpalö ia, Jesus na töpö sötapalowi i töpö nasö suapala kolo kua noma sotakö ia tikiamö töpö tokopa noi, i töpö nö Fenicia tö uli na, mötati tu mötalö pata na tö uli kuowi itö uli Chipre tö uli jilo kuawi itö ulinamö, Antioquia tö uli na; iamö judio töpö kuowi i töpö na Jesus wösö sisa ma. ²⁰ Maike, i töpö kai na ai töpö toka naiso ma, Chipre tö uli, Cirene tö uli, ina kipi töpö uli na töpö kuomö kuo pasiowi töpö, Antioquia tö uli na i töpö walopakö nö, ia judio töpö pasi mi ipi i töpö na Jesus kuawi tö wösö sota ma. ²¹ Tiosö pata nö i töpö pasiliapala totio opa ma, ina tö kua ia, pitilita Jesus na sateje epi töpö pi ku totilaso ma. ²² Jerusalen tö uli pata na Jesus na töpö sötapalowi töpö pewö kule i töpö nö, Antioquia tö uli na sateje epi pitilita Jesus na töpö pi kulaso noi itö jininö nö, itö uli pata na Bernabe a simönö ma. ²³ Ia a waloa jötökö taso nö, tö mö kukema i töpö na Tiosö pata nö tö pewö totokö noi itö tapa apa nö a pi mönajapalo opa salo, Jesus na pitilita töpö pi ku loteteapalo totio opa pö töna i töpö na Bernabe japalo sota ma. ²⁴ Bernabe liki a pi ku toita apö, pitilita a pi ku totio opaö, Tiosö Janepolepö nö a osimö masökö manököa totia apa, ina ia na tö kua kötönö pititita sateje epi ai töpö pi ku totilaso ma. ²⁵ Ina tö kua nö Bernabe nö Tarso tö uli na Saulo taimo jua konasolö ma. ²⁶ Ia a ta konanö nö, Antioquia tö uli na a kai jua sapa ko sotasolö ma. Ia sami inama töna töpö kutio ma. Töpö kutikö nö, sateje epi sanöma töpö wapama toitio ma. Ia Antioquia tö uli na Jesus na töpö sötapalowi i töpö liki "Cristo tili töpö" töpö jilo ta kolo kua sopalö ma. ²⁷ Itaja, Jerusalen tö uli pata na Tiosö pata japalo ia tö wösö toleawi töpö kule, Antioquia tö uli pata na i töpö julasolö ma. ²⁸ Itaja Tiosö pata japalo ia tö wösö toleawi Agabo a jilo kuawi Tiosö Janepolepö pi na ia japalo nö: --Jitö uli pewö pata na ni tö ma apa pö tö wakala walokö piasalo--. Ina a ku ma. Claudio kaikanamo noi itaja, itö wakala kupaso ma. ²⁹ Jesus na töpö sötapalowi i töpö nö itö jininö nö, Judea tö uli na Jesus na ai töpö sötapalowi töpö kulati i töpö pasilipalö pö töna töpö japalo nö. ³⁰ Bernabe, Saulo; ina kipi töpö na sitipa simöpalö ma. Judea tö uli na pata töpö kaikana nö Jesus na töpö sötapalowi i töpö pewö totiapalawi, i pata töpö na i sitipa pewö tota jötökö taso ma.

Capitulo 12

¹ Itaja, Herodes kaikana pata nö Jesus na ai töpö sötapalowi töpö wasisama piasalo töpö julö ma. ² Ia nö, poa nö Juan pepala Santiago a söpalö ma. ³ Ia söpalö ia, judio töpö pi mönajapalo opöle, Herodes pata nö itö ta nö, Pedro julö pö töna a nasö suapala nomo sota ma. Itaja judio töpö pi mönajapalo opa nö oveja tialö pö töna isai namomawi tö wakala kuo pasio ma. ⁴ Kaikana Herodes pata nö Pedro a julö nö, a pöka kasökö ma, cuatro (4) waitili töpö ösöja jötöjöpalö nö, ia töpö löa sotamakö ma. Itö pewö na dieciséis (16) waitili töpö löo kuo ma. Judío töpö pewö kokamo pa a sua kösölö nö ¿Sa wani söpalö? A ku pö töna, Pascua tö wakala pewö ma toitaso pö töna Herodes a opio paio ma. ⁵ Pedro pöka kasöa pasi latita, Jesus na töpö nokapalowi i töpö nö itö wakala pewö na Tiosö pata na a wösö totio opa ma. ⁶ Jenata Herodes kaikana nö Pedro a totokö pö tö mumi na, Pedro kotöna polakapi waitili töpö löo söto totio jalu ma, polakapi söpalasö totoko pata nö a oka totilata a mio toitio ma. Takataka kolo na polakapi waitili töpö löo naio sota ma. ⁷ Ina tö kulata, Tiosö pata nö a simötawi ia waloa soa pötakö ma, saia osimö pewö wakala totia apötakö ma, ia nö Pedro lepuku jöpa sotalö nö a na sotamanö ma, a japalo sota nö: -- Lope epi a öpapalo --. Ina a kutaso ia a okale i totoko pata kusa ko sotaso ma. ⁸ Tiosö pata nö a simötawi ia japalo ko sota nö: --Awö jalo ösö löa konö, a amösö jaloa kokö--. Ina a ku ia, Pedro nö ina tö tama jöto ma. Tiosö pata nö a simötawi ia japalo ko sotalo nö:-- Jalo ösö nö wa pi sokö nö kamisa na a nokapalo ko--. A ku sota ma. ⁹ Tiosö pata nö a simötawi ia ju ko sota alö ma, ia nojana Pedro jua naia ko sotasolö ma. Ina tö kua pöle itö na pitili tö maikötö, sa manimo pöa alukule ina Pedro pi ku upa ma. ¹⁰ Waitili töpö löa somatale i töpö, itö nojana ai waitili töpö löa noma sotale i töpö pewö jasua toita makö nö, söpalasö taka kolo pata öpale ia töpö waloa kopakö ma, ia kama tö pi na i taka kolo pata jakoa ko soa pötaso ia töpö lisia ko sotasolö ma. Töpö ju pi pasököa kopaso ia, Tiosö pata nö a simötawi ia nö Pedro ju ta ko sotakölö ma. ¹¹ Itö nojana, Pedro pi jatuka jaia kopalo nö: --Herodes pata, judio töpö; ina kipi töpö nö kamisa na wanisana tö tama pia noi itö na sa nö löa kopalö pö töna Tiosö pata nö a simötawi ia jöto ma--. Ina a pi ku upa ko ma. ¹² Ina a ku nö, Juan na Marcos töpö kuto naiowi a wani pöpöna Maria saipö na a jua sotasolö ma. Ia sateje epi Jesus na töpö sötapalowi töpö kokamo nö Tiosö na töpö japalo jaluti ma. ¹³ Ia Pedro walokö taso nö, takataka kolo sö sota ma, ia ai moko tö Rode a jilo kuawi a nö tö möamo julasolö ma. ¹⁴ Ia nö Pedro japalo jinia sotalö nö, a pi mönaja apa salo, takataka jakopa paila nö kunumai, a jua sapa ko sota lolö nö: --Takataka kolo na Pedro öpa kölai --. Ina kamani ai töpö na a kupalo ko sota taso ma. ¹⁵ Ina a ku köle maike: --Ma, a jolisimöpalo opa ti--. Ina töpö ku puo ma. Maike: --Pitili tö sai na sa ku köle--. A ku satia apa jöta köle maike: --Ma. Pedro maikötö. Kama janepolepö wani pöwö--. Töpö ku satia apa puo ma. ¹⁶ Ina töpö kupalo pasi lata, Pedro nö takataka sö joleapalo opa pasio ma. Taka jakoa jötöpalö ma, Pedro ta sotalalö nö, töpö pi kilijo totio opa ma. ¹⁷ Maike, pila amösö nö töpö japalo pöle itö wasu nö, Tiosö pata nö a atua kopamanö noi itö wösö sota ma, tö pewö wösö matalo nö: --Itö liki, Jacobo, Jesus na töpö sötapalowi i töpö pewö; ina kipi töpö na i ma tö wösö pökö--. Ina a ku nö, tikiamö a jua nomo ko sotasolö ma. ¹⁸ Itö nojana tö jalua konaso ia, waitili töpö nö Pedro taipala koa köle maike, a tapa ko mi ipö salo, töpö kilipalo opa ma. ¹⁹ Ina tö kua ia, Herodes pata nö Pedro taipalama ko ma maike, a tapa ko ma apa ma. Ina tö kua ia, Pedro na waitili töpö mamo löo noi i töpö na Herodes pata nö tö jini ko ma, tö jini mapalo nö i töpö söpalö pö töna, ai töpö sima sotakö ma. Ina tö kua ia, Judea tö uli na Pedro jusa kono nö, Cesarea tö uli na a jua nomösolö ma, ia a kua opia sotakö taso ma. ²⁰ Ina tö kua ta, Tiro tili töpö, Sidon tili töpö; ina kipi töpö na Herodes a pi pata jisiuapalo opa ma, ina tö kua ia, Herodes pata na töpö ikukö pö töna töpö japalo jöto ma. Blasto liki Herodes pata na a kaikanamo sötapalowi a kuo ma, ia na i töpö nö sitipa totokö nö: -- Kaikana Herodes pi pata na kamisa makö itö uli na ni tö walo naio pöo kötönö, ia pata sola samakö japalo sösoti wani ipö--. Ina ia na töpö ku ma. ²¹ Ina tö kua ia, i töpö na Herodes japalo piasalo töpö nakalö ma, itö wakala na kamani jalo ösö toita api ösö nö, a jaloa lija totia apökö nö, kamani lotawi ti na a loa sotakö ma. Ia a japalo sota ma. ²² Sanöma töpö pewö japalo lalupalo opa nö: --Ji tiosö sai japalo totia apa köle, Sanöma tö japalo ma apöle--. Ina Herodes pata na töpö kuto ma. ²³ Tiosö pata na sanöma töpö japalo pi mönajapalo kuawi na ina Herodes na ina i töpö kua ia, Tiosö pata na pö japalo pi mönajapalo sisa, a ku mö ipi, itö pi na Tiosö pata nö a simötawi ia nö, kamakali tö tota sotakö ma. Mosa pö wani nö a oati pa a nomasö ma. ²⁴ Maike, Jesus na töpö sötapalowi i töpö nö itö uli pewö na, sanöma töpö na Tiosö japalo wi itö wösö jötöpo totio opa soa alö ma, ina tö kua nö, Jesus na töpö sötapalowi i töpö pala totio opa alö ma. ²⁵ Ina tö kua ta, Jerusalen tö uli pata na Bernabe, Saulo; ina kipi töpö nö kamani tatapajo tö tama ma toitalo nö, töpö jua sapa konasölö ma. I töpö nö Juan na Marcos töpö kuto naiowi ia noka naima nönö ma.

Capitulo 13

¹ Ina tö kua ta, Antioquia tö uli na Jesus na töpö sötapalowi töpö pewö kule ia, Tiosö pata japalo ia tö wösö toleawi töpö, wapamawi töpö, i töpö kuo naio ma. I töpö liki, Bernabe, Simon ia na usima töpö kutowi a kuo ma, Cirene tili tö Lucio, Manaen ia liki Herodes sola pö oso pata pasio noi ia, Saulo, i töpö kuo ma. ² Ina tö kuata, ai tö wakala na Tiosö na töpö pi mönajapalo ti, töpö iapalo paio mi ipö, ina töpö kuatita, Tiosö Janepolepö japalo nö: --Ai tatapajo tö tama pö töna Bernabe, Saulo, i sa töpö saipalö noi itö tatapajo tama pö töna i töpö soka pasipalö--. Ina a ku ma. ³ Ina a ku ia, Tiosö pata na töpö japalo mapaso, töpö iapalo mi ipö; ina töpö kua nö, itö nojana Bernabe, Saulo ina kipi töpö jösöka na töpö amösö walija satakö ma, itö nojana töpö sima sotalö ma. ⁴ Ina tö kua nö, Bernabe, Saulo, töpö nö Tiosö Janepolepö japalo ia, tö jini jöto nö Seleucia tö uli na töpö jua sota solö ma. Ia kutiata pata na töpö titia noma sotakö nö, mötati tu mötalö pata na ai tö uli kulati, Chipre tö uli jilo kuawi, ia töpö pi julasulö ma. ⁵ Iamö Salamina tö uli na töpö pi walopakö taso ma. Ia judio töpö kokamotawi ia saipö pewö na Tiosö japalowi tö wösö jötöpo sota ma. I töpö na Juan nokapalo naio ma, töpö pasiliapala naitio ma. ⁶ Itö uli na töpö ju jötöpo sotio olöpamö, Pafos tö uli na töpö walopakö taso ma. Ia ai sapili tö talalö ma. Ia liki judio tö Barjesus a jilo kua ma, Ia jolisimöpalo totio opati nö: "Kamisa na Tiosö pata a japalo ia sa tö wösö toliawi sa", ina a kuti ma. ⁷ Kaikana Sergio Paulo na, ia noimo jökapalo totio opati ma, ia kaikana pi tao opawi a kuo ma, ia nö Tiosö pata japalowi itö jini pi topa apa salo, Bernabe, Saulo; ina kipi töpö nakalö ma. ⁸ Maike, Elimas griego tö kaina ina i sapili tö jilo kuo pasio ma, ia nö pitilita Jesus na i kaikana tö pi ku ma apa pö töna tö pi ipa ma. ⁹ Ina tö kua ia, Tiosö Janepolepö lotete epi itö nö Saulo maike, jukiki Pablo a jilo kua nomöle ia osimö masökö manököa totia apa kötönö, Elimas a mö salilia totia apöla nö: ¹⁰ --Kawa liki saitö pilupö wa, wa monimo totio opaö, wa wanisana totio opaö, ina wa kuawi wa. Toita api wa tö wanipo opawi wa. ¿Witi ta Tiosö pata pilitiso na, jolisi öpö, wa ku ma pasi paso piasalo? ¹¹ Jukiki Tiosö pata nö wa peama nö, wa jöpö pöpa pia köle. Pili wa tö motoko wakala mö jaita ko ma apa piasalo--. A ku ma. Ina a ku mataso ia, ia na mumimumi tö kea sotakö ma. Ia ju asokapalo opa sota nö, a poko tuta konönö pö töna aitö taipala apa sota ma. ¹² Ina tö kua pöle i kaikana tö nö itö ta nö, Tiosö pata kuawi tö wösö pöle itö na a pi kilijo totia apa kötönö, Jesus na pitilita a pi ku totio opa ma. ¹³ Itö nojana, Panfilia tö uli pata na, Perge tö uli kulati iamö polakapi kamani i töpö nokapalo pöle i töpö kai na Pablo pi jua noma sotasolö ma. Ia i töpö na Juan soka pasipalo nö, Jerusalen tö uli pata na a sapa pasia kopa solö ma. ¹⁴ Perge tö uli na Pablo, Bernabe, töpö jasua pasikö nö, Pisidia tö uli na Antioquia tö uli kua jöka apöle, ia töpö walokö taso ma, ia mota mapowi tö wakala na judio töpö kokamoti ta töpö lisia naipalo nö, töpö loa naikö ma. ¹⁵ Moises nö Tiosö pata simowi tö tosokopalö noi itö, Tiosö pata japalo ia tö wösö tolea noi i töpö nö tö tosokopalö noi itö, itö pewö katea matalo nö, i töpö na: --Ipa ai pö, ji sanöma töpö na ai ma tö wapama pö tö kuo ia, pö japalo nomöta--. Ina i töpö na, ia pata töpö kaikana kule i töpö ku ia. ¹⁶ Pablo öpa sotalo nö, pila amösö nö töpö lalupalo pöle itö wasu sota nö: --Israel tili pö, Israel tili makö pasi mi ipö maike, Tiosö ma kili pata taö öpawi i makö, i makö pewö nö tö jini totio opa: ¹⁷ “Israel tili töpö Tiosö pata nö kamakö kolo pata töpö saia somapalö nö, Egipto tö uli pata na töpö kua ta, ia pata nö töpö pala totia apömanö ma. Ina tö kua nö Tiosö pata lotete epi itö nö, ia töpö ta kopalö ma. ¹⁸ Sanöma töpö ma apölati ia, töpö wanisana toitia pölata maike Tiosö pata nö töpö totiapala satia apa jötötio pa cuarenta (40) inama tö kupaso ma. ¹⁹ Tiosö pata nö, Canaan tö uli pata na siete (7) sanöma töpö itö uli pewö juka totilö nö, Israel tili töpö na Canaan tö uli pewö pata tota totikö ma. ²⁰ Itö pewö kuati pa cuatrocientos cincuenta (450) inama tö kupaso ma. Itö nojana, waitili töpö kaikana nö Israel tili töpö löapala pö töna Tiosö pata nö töpö löama kolo kua nomo sota alöpamö, Samuel nö Tiosö pata japalo ia tö wösö toleawi ia na tö waikipaso taso ma. ²¹ Itö nojana, i töpö nö ai kaikana tö sai naka nomo ia, Tiosö pata nö Cis pilupa Saul kaikana tö kuo pö töna a tota jötökö ma. Ia liki Benjamin tili tö ola kuo pasio ma. Ia kaikanamoti pa cuarenta (40) inama tö kupaso ma. ²² Itö nojana Tiosö pata nö Saul kaikana ma kopamanö nö, ia David kaikana ta nomökö ma. David kuawi tö na Tiosö pata japalo nö: “Sa tö pi ipawi i Isai ula David nö tö tamawi i sa talalö ke; sa simo ia, ia nö tö pewö tama totia talo opa piasalo”. Ina a ku ma. ²³ Tiosö pata nö sami ipi David ai ulu tö ola saipalö nö, Israel tili töpö löa ko pö töna a tötokö ma, ia liki Jesus. Kamakö kolo pata töpö, David, i töpö na a ku noi itö tama totio opa jöto ma. ²⁴ Jesus ju pailata kunumai, Juan nö tö mai omawi ia nö tö wösö tolejapalo soma nö, makö wanisana apawi i ma tö josalö nö Tiosö pata na makö ote tamo ko nö, pö mai omo no, sanöma töpö na ina a ku tolejapaloti ma. ²⁵ Juan tatapajamo mapaso pö tö wakala atea apa waikiolö kötönö: "¿Sa ma walo ta pöle ia waikiwö kamisa na makö pi ku upa alukule? Ia liki kamisa maikötö. Maike sa jini, kamisa nojana aitö ju jaile ia lotete epi ia, kamisa nö maike ia amösö jalole i sa tö jasupalö pö tö mi toti kötö". Ina Juan ku ma. ²⁶ Ipa aipö, Abrahan ola pö, ai makö nö Tiosö ma kili pata taö öpa naiowi i pö, makö pewö löa ko pö töna Tiosö pata nö ji japalowi tö simöpalö ma. ²⁷ Jesus liki ia saipalöma a, Jerusalen tili töpö, kamani kaikana töpö, i töpö pi ku ma apa nö a söpalö ma, ina töpö kua nö Tiosö pata japalo ia tö wösö toleawi i töpö nö tö tosokama noi itö pewö tapalö ma, kamaka nö mota mapowi itö wakala pewö na i ma tö katea sinimo opaö. ²⁸ I töpö nö Jesus wanisana apawi tö tapa mi ipö pölata maike, Pilato pata nö a söpalö pö töna töpö nako satia apa ma. ²⁹ Jesus kua pö tö pewö tosokama noi, i töpö nö itö pewö ta jötöta toitalö ma itö nojana, jitina Jesus noma itoa kopamanö nö nomawö tö tititawi ia a titikö ma. ³⁰ Maike, Tiosö pata nö a toia kopalö ma. ³¹ Itö nojana Jesus kai na Galiea tö uli na töpö jumö kua naio nö Jerusalen tö uli na töpö walo naio noi i töpö nö sateje epi wakala töna Jesus mö sotio ma. Jukiki i töpö nö sanöma töpö na ia wösö jötöpoti köle. ³² Juki ipi kamaka na itö toita api i sama tö wösö köle. Ina tö kua kötönö kamakö kolo pata töpö na Tiosö pata ku noi itö tama waikio ma, kamaka na i sama tö wösö pi topa apa köle. ³³ Kamisa makö kolo pata töpö na Tiosö pata japalo noi i kama ola samakö na Tiosö pata nö itö möma jöto ma, itö liki Tiosö pata nö Jesus toia kopamanö ia itö kupaso ma. Salmo dos (2) töna itö tosoka naia sota köle: ”Kawa liki ipa ulu wa, jukiki kamisa liki awö pö sa kupaso ke”. ³⁴ Tiosö pata nö Jesus toia kopalö ma, ia noma kota maikötö. Kamakö kolo pata töpö na Tiosö japalo nö: "Tö toita api kau na sa tö toto kö piasalo David na sa ku pöli kamaka na i sa tö toto pia köle". Ina a ku ma. ³⁵ Itö pi na ai Salmo töna ina tö tosokama ku naia sota köle: "Kau nö nomawö tö tititawi ia awö ula nö wanisana tö tama mi ipi i wa jotema ma apa piasalo". ³⁶ Tiosö pata nö tö pi ipawi ina kamani i töpö na David kaikanamo kua jöto ma, maike a nomaso ia kamani kolo pata töpö patilio pa a patilia naia kokö ma, ia a sai pewö jotiso ma. Ina tö kua kötönö kama kua pö töna ia japalo totio ko ma apa ma. ³⁷ Maike, Tiosö pata nö a töia kopalö noi, ia jote pasio ma apa ma. ³⁸ Ipa ai pö, kamakö na sa tö taöpama pi topa apa köle, Jesus pi na Tiosö pata nö makö ote taö ko sisaö, Jesus na makö nako kukema Tiosö pata nö makö ote taö ko kötö. ³⁹ Moises nö tö tosokopalö noi itö pewö tama ia ai wa ote ta pasio ko maikötö, maike Jesus na pitilita makö pewö pi ku upawi i makö ote ta ko sisa piasalo. ⁴⁰ Ina tö kua kötönö pina Tiosö pata japalo ia tö wösö toleawi i töpö ku noi kamaka na itö kupo pasio ma apa pö töna pö pi mosaia totikö: ⁴¹ “Pitilita makö pi ku wani ipi i makö nö tö jini totio opa, aipa apa kili ia makö kuto toitakö nö, pö pewö wani noma no. Wina pi ku salo kamakö itö wakalana, kamisa nö toita api sa tö tama totia apa pölata maike, pitilita makö pi kupo ma apa piasalo, aitö nö tö wösö pölata maike pitilita makö pi kupo naio ma apa piasalo”. Ina tö tosokama ku köle--. Ina i töpö na Pablo ku ma. ⁴² Ina tö kua ta töpö kokamo ma toitasoia, Pablo nö kama ai töpö kai lisipo koonöma. Lisipo koonö taja, judio töpö sai totipasi mi ipi ĩ töpö kupasioma: Ai motamapowi tö wakalana sa makö wapamapasia kotasolö pökö. Ina töpö kuma. ⁴³ Ina tö kua ta judio töpö kokamotawi ia sai pata na töpö lisa atoa kopasoma. Kopasö ia, sateje epi judio töpö, ĩ ai judio töpö kua kuawina ina töpö kuawi ĩ töpö; ina kipi töpö nö Pablo, Bernabe ina kipi töpöna töpö noka sotasolöma. Ĩ töpöna Pablo, Bernabe ina kipi töpönö Tiosö toita api tö wösö totio opama; Tiosö na pitilita pö pi ku totikö ina i töpö na Pablo, Bernabe ina kipi töpö kutima. ⁴⁴ Ina tö kua ta ai motamapowi tö wakalana sanöma töpö kule ĩ töpö pewö pata kokamo totio opama, Tiosö japalowi itö jini pi topa apa salo. ⁴⁵ Ina töpö kuaia, judio töpönö ĩ tö ta apanö, Pablo a mö asöpo opama. Mö asöpo opa nö töpö japalo wanisana apama, Pablo japalo pöle i töna jolisi töpö ku löatalo opama. ⁴⁶ Ina töpö kua pölata maike, Pablo, Bernabe ina kipi töpö pi kilijitalanö kunumai töpö japalo jötoma; töpö japalo jötonö: --Kamaka judio maköna Tiosö japalowi sa ma tö wösö somata pi topa apa ma maike, ma tö jini wani ipama. Samakö palimö kopaso kötö makö pi ku mi ipö kötönö. Judio töpöpasi mi ipi ĩ töpöna sa ma tö wösö nomaköle. ⁴⁷ Wina pi ku salo ina Kaikana Jesucristo nö sa makö sima tama pasioma kötönö. Pina a kuma: "Kamisanö wa saipalöma. Judio töpöpasi mi ipi ĩ töpö na koataka si nö tö jösöka kuawina ina wa kua nö töpö löa ko pö töna pili wa tiso möma löa talo pökö, itö uli pewö pata na wa töpö pi jatukama pökö"--. Ina Pablo a kuma. ⁴⁸ Judio töpöpasi mi ipi ĩ töpönö a japalo jini ipanö, töpö pi mönajapalo opama: --Tiosö japalowi itö toita apö-- Töpö kutoma. Pitilita ia sateje epi töpö pi ku totia apa sotaköma, pitita ia töpö pi kupasonoi i töpö na Tiosö temö ipi itö toto pö töna Tiosö pata nö i töpö saia sotalöma. ⁴⁹ Ina tö kuanö i töpö nö itö ulina tö uli pewö kua jököka apöle itö uli pewöna Tiosö Japalowi itö wösö totia apa sopaköma. ⁵⁰ Maike, ai su töpö nö Tiosö Japalonoi ina tö tama totia talo opa wi töpö su, itö ulina töpö kaikanamowi i töpö, Judio töpö nö ina kipi töpö na Pablo, Bernabe ina kipi töpö nasö suapalamanö itö ulina töpö sasua kopalöpö töna, Judio töpö japalo pasitima. ⁵¹ Töpö sasu koia, pila amösö na masitatö kopeke sutiale itö somösöpalöma, i töpö nö ia masitatö kopeke kuo wi tö sua alö wani ipa ma. Ina töpö kuanö, Iconio tö uli pata na töpö jua noma sotasolöma. ⁵² Maike, Jesus na töpö nokapalowi töpö liki ĩ töpö pi mönaja apama. Pili töpö osina Tiosö Janepolepö titele ĩ tönö töpö loteteapalama totio opama.

Capitulo 14

¹ Ina tö kuanö, Iconio tö ulina Pablo, Bernabe, ina kipi töpö tapo sotalanö, judio töpö kokamotawi ia saina töpö lisia sotasolöma. Lisia sotalo nö, ia Jesus toita api itö wösö loteteapalo totio opa sotama. I töpö japalo toita toti kötönö, sateje epi judio töpö, ai judio töpö pasi mi ipi ina kipi Jesus na pitilita töpö pi ku totia apö pasoma. ² Maike, pitilita ai judio töpö pi ku pasio ma apa noi i töpö nö judío töpö pasi mi ipi i töpö nö Jesus na töpö pewö nokapalowi i töpö mö wanipo opa pö töna tö tama pasioma. ³ Ina tö kua nö Pablo, Bernabe, ina kipi Iconio tö ulina sateje epi wakala töna töpö kuo toitioma. Tiosö na pitilita töpö pi ku totio opa kötönö, Jesus toita api itö wösö kili ma apama. Pitilita sanöma töpö pi ku titio opa pö töna, Tiosö lotete epi itö pi na i töpö nö tö aipama totio opama. ⁴ Ina tö kua ia, Iconio tö ulina sanöma töpö pi ku salekepasoma. Pitilita Judio töpö pi ku pasio mi ipi i töpöna ai töpö löo pasioma, Jesus na töpö nokapalowi i töpö na ai töpö löo pasioma. Ina tö kuanö itö ulina töpö pewö kua salekea toitioma. ⁵ Ina tö kuanö, judio töpö, judio töpö pasi mi ipi ĩ töpö, ina kipi kaikana töpö na töpö japaloma. Pablo, Bernabe, mama nö i töpö sösa nö töpö söpalö pö töna. ⁶ Itö jininö nö, Pablo, Bernabe ina kipi töpö tokösolö ma. Licaonia tö ulina, ia Listra tö uli kule ia Derbe tö uli kua naia sotale, iamö töpö tokösolö ma. ⁷ Ia ai töpö uli kuo sölöjowi ĩ töpö ulina Jesus wösö jötöpo totio opa alöma. ⁸ Listra tö ulina ai sanöma tö ju mi ipi a kuoma. Ina a utiti kui a ta sopalöma. Ia juataloti ma apama. ⁹ Ia lotio pa, Pablo japalo pöle itö jini toitioma. Ina tö kuaia Pablo nö a mö salilia toitio opa kukema, Tiosö pata nö sa löa konö kötö a pi ku totia apöle i Pablo nö itö tapa apama. ¹⁰ A pi ku totio opanö, ia na a lotete japalo sotasoma: --A öpa salilia kopalo--. Ina a kuia a öpa salilia kopalonö a jilua sotalo nö, a ju ko sotama. ¹¹ Ina tö kua pöle sanöma töpö nö itö ta nö, kama Licoania tili töpö kaina, töpö japalo lalupalo opama. Opanö, pina töpö kutoma: --Sanöma töpö kulena ina Tiosö töpö kupalonö kamisamakö na töpö walopaköma--. Ina töpö kutoma. ¹² Ina töpö ku nö, töpö jiloa sotalöma: Bernabe liki Zeus a jilopalöma, Pablo a japalo opa pasio kötönö, Hermes a jiloa pasipalöma. ¹³ Licaonia tö uli kotöna ai wano tö nu wani Zeus a nu jilowi ia saia öpama. Zeus saia totiapalawi ia kaikana nö jaka pö, jolejole töjö, ina kipi itö uli kotöna tö suapala ma. Pablo, Bernabe ina kipi töpö na töpö pi mönaja apa salo i pö pina jakapö löpöpalönö, jolejole tö pewö kai na Pablo, Bernabe ina kipi töpö na tö toto pi topa apa salo itö kai pewö walokö solöma. ¹⁴ Ina tö töpö kua piale, ĩ tö ta apanö Bernabe, Pablo ina kipi töpö pi jonipo opanö. Kamani jalo osökö kaka sopalöma. Sanöma töpö mötalöna pö tikiliapalo opanö, pö japalo lalupalo opa jötoma, jötonö: ¹⁵ -- Ipa ai pö. ¿Wina makö pi ku salo ĩ ma tö taö pasio pikio opa piaköle? Kamaka kulena ina samakö ku jötö pötawö. Tiosö sa maköpasi maikötö. Ji sa makö juti pöle ĩ samökö nö makö pi kupalo janoa apatiwi ĩ tönö makö löa pasio maikötö, ĩ sa ma tö josapamanö piasalo toita api sa ma tö wösö pö töna, samakö jutiköle. A palimö ipi ĩ Tiosö, Iana makö pi wasisopamanö pö töna, sa makö juti köle. Ia nö jutumösökö pata, masita tö uli, mötati tu pata; Ina tö kule, itö pewö tapalöma. ¹⁶ Sutu upa sanöma töpö nö tö tama pi topa apawi itö tama soa pöatalo opati pölata maike tö tama pasio pökö ina Tiosö ku so pöatalo opatima. ¹⁷ Ina tö kua köle maike, sanöma töpö pewö na Tiosö mamo löapalo sotioma. A mamo löapalo ti pöle i sanöma töpö nö itö tapa jöto pö töna; töpö totia pala sotioma, matu jölöma sotioma, masita tö na nitö jaö toita apa nö pe epi sanöma töpö nitö kuo totio opa nö, töpö pi mönajapalo opa ti pö töna, Tiosö pata nö itö pewö tama sotioma--. Ina Pablo a kuma. ¹⁸ Ina Pablo a kuia, ĩ töpö nö jakapö löpöpalönö, jolejole tö pewö kai na Pablo, Bernabe ina kipi töpö na tö mai tota totia apö köma. Tö tama pi topa satea totio opa ma, maike tö tama jöto ma apa ma. ¹⁹ Itö nojana, Antioquia tö uli, Iconio tö uli, ina kipi tö ulina judio töpö kuomö kuowi Pablo, Bernabe ina kipi töpö kule itö ulina töpö walokö solöma. I töpö nö itö ulina sanöma töpö kule i töpö nö Pablo nisi taö öpa pö töna töpö japaloma. Ina töpö kuanö, mama nö Pablo a sösöma. A sösö nö, "a wani noma waikilaso aluke". Ina töpö pi kunö, somaia a löka ulia sopalöma ia a pa ta sotakölöma. ²⁰ Ina tö kua köle maike, Pablo kotöna Jesus na ai töpö nokapalowi töpö öpa sotakösölöma. Ina tö kua ia, Pablo joka ko sotasoma. Sotalonö, i tö ulina a jua ko sotasolöma. Itö janata Derbe tö ulinamö Pablo nö Bernabe kai jua noma ko sotasolöma. ²¹ Iamö pö talaso tasoma. Ia toita api Jesus wösötima. Wösöia itö jini ipanö, sateje epi Tiosö na töpö pi wasisolasoma. Itö nojana, töpö jua sapa ko sotalolönö. Listra tö uli, Iconio tö uli, Antioquia tö uli ina kipi töpö ulina töpö jasömo ko tasoma. ²² I töpö ulina Pablo, Bernabe ina kipi töpö nö Jesus na töpö nokapalowi i töpö pewö pi ku lotetea totio opa pö töna töpö japalo totio opa ko onöma. Pitilita makö pewö pi ku totio opa pökö, ina töpö ku nö, töpö ku sotama: --Tiosö kaikanamo wi itö ulina makö lisipo pi topa apa ko lasowi i makö pepalo totio opa paio kötö--. Ina Jesus na töpö nokapalowi i töpöna Pablo a kuma. ²³ Pablo, Bernabe ina kipi töpö nö kokamotawi ia sai löapalai, sanöma töpö totiapalai ina töpö kua pö töna kokamotawi i töpö sai pewö na ai sanöma töpö löa jötöja totia apö makö ma. Itö nojana, töpö iapalo pailanö kunumai Tiosö na töpö japalo nö Jesus na töpö namo sima sotaköma, töpö pi tao opa pö töna. ²⁴ Ina tö kuanö, Pisidia tö uli jilo lati, iamö töpö jasuma kotalo tasonö, Panfilia tö ulina töpö talasotasoma. ²⁵ Talalonö, Perge tö ulina Jesus wösö sotama. Wösö sotanö, töpö jasua noma ko sotakönö, Atalia tö ulina töpö ta noma sotaso tasoma. ²⁶ Ia Jesus wösö pö töna Tiosö pata nö töpö sima noi itö uli pewö na Pablo, Bernabe ina kipi töpö nö Jesus wösö jötöta toitalo nö kutiata pata na Antioquia tö ulina, töpö pi jua ko sotasolöma. Ji tö ulina Pablo, Bernabe ina kipi töpö kuataja kamani ai töpö nö Jesus wösö pö töna töpö simanoi itö uli. ²⁷ Töpö kopö ia, Jesus na töpö nokapalowi i töpö kokamo luoma. Pablo, Bernabe ina kipi töpö japalo sotama. Sotanö, Tiosö pata nö ĩ töpö kai na tö tama noi ĩ töpönö itö pewö wösö totia apa jöto ko solöma. Judio töpöpasi mi ipi ĩ Jesucristo nö ĩ töpö pi jatukupamanö ma. Jatukupamanö nö, Tiosö na töpö pi wasiso sotama. Ina töpö kua noi itö pewö wösö kosolöma. ²⁸ Ina tö kuanö, Ia Jesus na töpö nokapalowi i töpö kotö na Pablo, Bernabe ina kipi töpö kua tatea totia apa naipasoma.

Capitulo 15

¹ Ina tö kua ta, Antioquia tö ulina ai judío tili töpö talasotasoma. Talalonö, ia Jesus na töpö nokapalowi töpö kule ĩ töpö wapama sotama. Wapamanö, pina töpö ku sotama:--Moises na Tiosö simonoi i Moises nö kamakö kolo pata töpöna tö wösönoi itö circunsicion tö jilowi i matö tama pasio ma apa kukema Tiosö pata nö makö löa pasio maikötö--. ² Ina i töpö nö tö wapama tama pöle i Pablo, Bernabe ina kipi töpö nö itö jini wani ipa pasioma. Itö wapama pöle i töpö sola töpö noa tapaso totio opama, ina tö kuanö Pablo, Bernabe, Jesus na ai töpö nokapalowi töpö ina kipi Jerusalen tö ulina töpö julolönö ia pata töpö kule i töpö, Jitö uli jösöka na Jesus kua soata Tiosö wösö pö töna töpö sai palönoi i töpö ina kipi töpö na tö jini taso pö töna töpö pewö japaloma. ³ Jerusalen tö ulina i töpö ju ulöpamö Fenicia tö uli, Samaria tö uli ina kipi töpö ulina i töpö jasömo onöma. Töpö jasömo pölanö Judio töpö pasi mi ipi i töpö liki Jesus na pitilita töpö pi ku naio noi, itö wösö ia itö ulina Jesus na töpö nokapalowi töpö kule i töpö pi mönaja apama. ⁴ Ina tö kuanö, Jerusalen tö uli pata na Pablo, Bernabe ia ai töpö nokapalo naile i töpö ina kipi töpö walo ia, jitö uli jösöka na Jesus kua soata Tiosö wösö pö töna töpö sai palönoi i töpö, ia pata töpö kule i töpö, Jesus na pitilita, töpö pi ku upawi i töpö ina kipi töpö pewö pi mönaja apama. Ina tö kuaia, Pablo, Bernabe, ia ai töpö nokapalo naile i töpö ina kipi töpö nö i töpö na Tiosö pata nö tö tamanoi itö pewö wösö sotama. ⁵ Ina töpö ku matasoia, ai fariseo tili töpö kuoma maike Jesus na töpö nokapalowi töpö kua noma kopa soma töpö, i töpö japaloma: --Judio töpöpasi mi ipö pölata maike, Tiosö simonoi circuncisión tö jilowi itö tama totia talo opa naio pökö. Moises nö tö tosokopalönoi itö tama totiatalo opa naio pökö--. Ina töpö kuma. ⁶ Ina töpö kuia, jitö uli jösöka na Jesus kua soata Tiosö wösö pö töna töpö sai palönoi i töpö, ia pata töpö kule i töpö; ina kipi töpönö itö topama ko piasalo, töpö kokamoma. ⁷ Töpö kokamonö, töpö japalo pi tateja toitaso noia, Pedro a öpapasoma. Öpapalonö, a japalo sotama: --Ipa ai pö. Kamakönö ma tö taö waikiaköle. Judio töpöpasi mi ipi i töpö löa naio pö töna, toita api sa tö wösö pö töna, sutu upa Tiosö pata nö sa saipalöma. ⁸ Tiosö pata nö sanöma töpö pi kupalo opawi itö taö öpa waikiaköle. Ina tö kua kötönö, judio töpöpasi mi ipi ĩ töpönö Tiosö pi ipa naile itö tapa apanö, kamisa maköna Tiosö Janepolepö toto kua kua noi nia ina ĩ töpöna Ina tö kua naioma. ⁹ Judío töpö pasi mi ipi i töpö, judio makö ina kipi Tiosö na tiko makö pasi maikötö. Wina pi ku salo, Jesus na pitilita töpö pi ku ko ia Tiosö pata nö töpö kosiomopö osi salua naia kopalöma kötönö. ¹⁰ Ina tö kuama maike, ¿wina makö pi ku salo Tiosö pata nö tö tama noi itö na makö pi jisuapalo pasiaköle? Moises simo noi itöna kamisa makö, kolo pata töpö, ina kipi sa makö sima totio opama maike, sa ma tö tama tomöpoti ma apama. Ina tö kua pasia köle maikia, ¿wina makö pi ku salo itöna ji Jesus na töpö nokapalowi i töpö nö itö tama pö töna matö pi totia apaköle? ¹¹ Ina tö kua maikötö. Pina samakö pi ku pasiaköle: “Toita api tönö kaikana Jesucristo nö noami ipi samakö löama. Itö kulena ina Judio töpöpasi mi ipö ĩ töpö löa kua naioma”--. Ina ĩ töpöna Pedro a kuma. ¹² Ina Pedro kuia töpö japalo jöto kota ma apama. Japalo jöto kota ma apanö, Bernabe, Pablo, ina kipi töpö japalo jini totio opama. Ina tö kuanö, judio töpö pasi mi ipi ĩ töpöna Tiosö pata nö tö aipama apa noi itö pewö wöa totia apököma. ¹³ Töpö japalo ma toitasöia, Santiago japalo nomo sotama: --Ipa aipö. Sa japalo jini: ¹⁴ Kamakana Pedro a japaloke. Jukiki judio töpö pasi mi ipi ĩ töpöna Tiosö pata nö toa apaköle. Jukiki judío töpö pasi mi ipi i töpö liki Tiosö pata nö kamani ai töpö ta naipalöke. ¹⁵ Itö liki, Tiosö kai wösö toleawi ĩ töpönö itö tosoka somapalöma. Pina itö wajeta tosokama kutiköle: ¹⁶ “Waia sa ju kotakötö. Ĩ sanö David nö saia takö noi ia sai waniapo opöle ĩ tute sa sai ta kopalösolökötö, Sa sai totia kopalökötö. ¹⁷ Ina satö tamaia kamisana tiko sanöma töpö walo totio opa piasalo, ina tö kuaia i töpö liki ipa satöpö saipalöwi i töpö kupaso piasalo. ¹⁸ Ina Tiosö sa kuti köle kamisa nö i satö pewö wapamawi sa, sutu upa satö wapama sotakönoi i sa pasiwö”. Ina tö ku pöle, Tiosö kai wösöwi ĩ töpönö itö tosokopalöma--. ¹⁹ Ina tö kua kötönö, pina sa ku piaköle: --Judio töpö pasi mi ipi ĩ töpö liki Tiosö na töpö pi wasiso opanö, kama töpö pi na töpö wanisana apa noi itö josalöma; ĩ töpö na Moises a simo noi itöna töpö sima jato ti, töpö noa taö jato ti. ²⁰ Ina makö kua pölanö kunumai wajeta ma tö tosokama simöpalö nökö. Pina tö kulatakö; Ai nutö Tiosö pina saloa löpöpalöma a oa jatoti. Awö pusupa pasi mi ipi ia na a mai saka so pöatalo jatoti. Ai saloa nasö tupasoma a oa jatoti, ai saloa sai na i itu kua solata a oa naio maikötö. ²¹ Wina pi ku salo Moises nö tö tosokopalönoi itö liki kokamotawi itö sai pewöna, mota mapowi itö wakala pewö na sanöma töpö na itö wapama sotia köle”. Ĩ töpöna ina Santiago a kuma. ²² Ina a kuia, Jitö uli jösöka na Jesus kua soata Tiosö wösö pö töna töpö sai palönoi i töpö, ia pata töpö kule i töpö, Jesus na töpö nokapalowi i töpö pewö; ina kipi töpönö polakapi ai kama töpö saipalöma. Saipalönö, Pablo, Bernabe ina kipi töpöna Antioquia tö uli pata namö töpö nokamanönö pö töna, töpö saipalöma: Judas Barsabas a jilo naio sotawi ia, Silas; ina kipi töpö saipalöma. Ĩ töpö liki kokamotawi ia saina sanöma töpö pewö nö töpö taö totio opama. ²³ I töpö na pina tö tosokama kuwi tö simöpalöma: "Jitö uli jösöka na Jesus kua soata Tiosö wösö pö töna samakö sai palönoi i samakö, ia pata samakö kule i samakö, ia Jesus na samakö nokapalo naiowi i samakö; ina kipi samakönö. Antioquia tö uli, Siria tö ulina tö uli pewö kule i töpö uli pewö, Silicia tö ulina tö uli pewö kule i töpö uli pewö; ina kipi töpö ulina judío makö pasi mi ipi maike Jesus na pitilita makö pi ku upawi i maköna ji wajeta samatö tosokama simöpalöke. ²⁴ Kamisa makö nö kamaka saipöna ai töpönö makö wapamati noi, ĩ sa ma töpö sima ma noikötö, kama töpö pina töpö jupasioma. Ina tö kua kötönö makö pi monöpalama apatima. ²⁵ Itö pina ji samakö kokamotiköle. Kokamonö ai sa ma töpö saipalöke. Kamaköna töpö julasolö pö töna. Ĩ töpöna Pablo, Bernabe ina kipi sa töpö pi ipawi ĩ töpö noka naipasolöke. ²⁶ I töpö nö Jesus wösö öpawi tö pina töpö mai söa totia apalöma. ²⁷ Kamakana, Judas, Silas ina kipi töpö jupiaköle. Ĩ töpönö kamakana jitö tosokama wösö naio kötö. ²⁸ Tiosö Janepolepö, kamisa makö, ina kipi pina samakö kutiköle. Ai matö tama tolea kota lanö kunumai, pina matö tama sisa pö töna samatö pi ipa sisaköle: ²⁹ Ai nutö Tiosö pina saloa löpöpalöma a oa jatoti. Awö pusupa pasi mi ipi ia na a mai saka so pöatalo jatoti. Ai saloa nasö tupasoma a oa jatoti, ai saloa sai na i itu kua solata a oa naio maikötö. Ina ma tö tama kukema, makö topa totia apökökötö. Ina samakö ku pi topa apa pöta köle. Pie.” Ina tö tosokama ta tapalöma. ³⁰ Tapalönö, töpö saipalö noi ĩ töpö sima sotalöma. Antioquia tö ulina i töpö talasotasoma. Ia Jesus na töpö nokapalowi i töpö pewö kokamo sotama. Sota ta, wajeta tö tosokama tota sotaköma. ³¹ Tö tosokama katea sota nö tö jinia sotalönö, toita api töna töpö loteteapalama pö tö tosokama kuo sotaia, töpö pi mönajapalo opama. ³² Ina tö kuanö, Judas, Silas ina kipi Tiosö wösö toleawi i töpö nai kötönö sanöma töpö pewöna töpö japalo ia Jesus na töpö pewö nokapalowi i töpö pi ku loteteapalo opanö töpö pi mönajapalo opama. ³³ Ina tö kuanö, tö pi tatejetalonö kama töpönö, töpö simöpalö tasonoi itö ulina töpö ju koonö piama. Ina tö kuaia, "toita api pö jua kotalolo" ina töpö kuma. ³⁴ Maike, Silas a jia pasipasoma. ³⁵ Ia Pablo, Bernabe ina kipi töpö jia naipasoma. Jia naipalonö, Jesus na töpö nokapalowi i töpöna töpö tikilia palo naionö, Tiosö japalowi i tö na sanöma töpö wapama totio opa jaioma. ³⁶ Ina tö kuanö, tö tatea apösoia, Bernabe na Pablo a japaloma, a japalonö pina a kuma: --Makö jama ju kotanökö. Sutu upa Kaikana Tiosö ma wösöti pili ĩ ma töpö mö jötöpo kota misalo. ¿Wina kama kö ĩ töpö kuati kunumai?-- Ina Pablo a kuma. ³⁷ A kuia, Bernabe nö Juan Marcos a jilo kua naiowi, ia nokapalama pi topa apama. ³⁸ Maike, Pablo nö a nokapalama wani ipa pasioma. Sutu upa a nokamanönöma maike, Panfilia tö ulina a sapa kopasoma a tatamo nokapalo wanio opama; ina a kua noi ĩ tö pina a nokapalama wanio opama. ³⁹ Ina tö kuaia Pablo, Bernabe ina kipi töpö japalo jötöpaso loteteapalo totio opama. Ina tö kuaia töpö salekepasoma. Salekepalonö, Chipre tö ulina kutitasö pata na Bernabe nö Marcos kai jua sotasolöma. ⁴⁰ Ina tö kuaia, Pablo nö, Silas a saia pasipalöma. Ĩ tö nojana Pablo, Silas ina kipi Tiosö pata nö töpö totia palapö töna Tiosö na töpö japalo matasoia töpö jua ko sotasolöma. ⁴¹ Siria tö uli, Cilicia tö uli pewö ina kipi töpö ulina Pablo, Silas ina kipi töpö jua sotasolöma. Ia töpö walokö tasonö ia Jesus na töpö nokapalowi i töpö pewö pi ku loteteapalama totio opama.

Capitulo 16

¹ Itö nojana, Derbe tö uli, Listra tö uli ina kipi töpö ulina Pablo waloa nomököma. Ia Jesus kuawi itö na a wapowi ia Timoteo jilowi a kuoma. Kamani pöpöna liki judío tilitö su Jesus na pitilita a pi ku upawi a kuoma, maike kamani pöa pasi liki griego tilitö kuo pasioma. ² Listra tö uli, Iconio tö uli, ina kipi töpö ulina Jesus na töpö nokapalowi töpö kule, Timoteo na i töpö japalo toita apama. ³ Pablo nö ia nokapalama pi topa apama. Ina tö kuaia, Tiosö simonoi circuncisión tö jilowi itö tapalöma. Judio töpönö a wanipo ma apa pö töna. Ĩ töpönö Timoteo pöa liki griego tö pasiwi, itö taö öpa waikia kötönö. ⁴ Ina tö kuanö, itö uli pewönamö Pablo, ia ai töpö nokapalo naile i töpö ina kipi töpö jasömo onöpamö, ia pitilita Jesus na sanöma töpö pi ku upawi i töpö pewöna, Jerusalen tö ulina jitö uli jösöka na Jesus kua soata Tiosö wösö pö töna töpö sai palönoi i töpö, ia patatöpö kule i töpö ina kipi töpö japalo noi itö tama pö töna tö wösö jötöpo totio opama. ⁵ Ina tö kuaia, pitilita, Jesus na töpö pewö nokapalowi i töpö pi ku lotete apalo totio opama. Ina tö kuanö, itö wakala pewöna Jesus na sanöma töpö nokapalowi i töpö pala totio opama. ⁶ Ina tö kuanö Asia tö ulina Pablo nö Tiosö japalowi tö wösö pi topa apa kölati maike, Tiosö Janepolepö nö a wasu luoma. A wasuia, Frigia tö uli, Galacia tö uli, ina kipi töpö ulina töpö julasolöma. ⁷ Misia tö uli waikio tasopa töpö walokötasoma. Ia Bitinia tö ulina töpö ju pi topa apa köle maike, Jesucristo Janepolepö nö töpö wasu luoma. ⁸ Wasu luo ia, Misia tö ulina töpö jasua soa pötakönö. Troas tö ulina töpö jua sotasolöma. ⁹ Ia mumaia Pablo nö tö aipa apawi tö tapama. Tö tapanö, Macedonia tö ulina ai sanöma tö öpatakönö: "japo, ji Macedonia tö ulina samakö pasilipalöso", Ina a kuma. ¹⁰ Ina a kuia, samakö jusupalo sotama. Sotanö, samakö pi kupalo opa sotama: Tiosö pata nö samakö nakaköle. Ia toita api Jesucristo wösö pö töna, samakö nakaköle. Ina samakö pi kupalo opama. ¹¹ Troas tö ulina samakö jusa kononö kutiata pata na samakö titia sotakönö Samotracia tö ulina samakö pi jua salilia totia sota solöma. Itö janata Neapolis tö ulina samakö pi jua noma ko sota solöma. ¹² Ia Macedonia tö ulina, Filipos aitö uli jilowi ia samakö ta noma ko sotasotasoma. Roma tili töpö nö itö uli jukölönö ia romano tili töpö kaikanamo pasiowi tö uli kuo pasioma. Ia pi sateje epi tö wakalanö samakö kuo paioma. ¹³ Mota mapowi tö wakalana samakö kule itö uli kotöna matu pata kuowi ia samakö julasolöma. Ia ai judío tili töpö kokamonö Tiosö na töpö japalo jatolatö kötö samakö pi ku upa salo. Ia ai su töpö kokamo lötioma, ina tö kuaia ia samakö loa naia sotakönö i su töpöna samakö japalo sotanö. ¹⁴ Ia ia su tönö samakö jini naile ia liki Lidia a jilo ma, Tiatita tö ulina a kuomö kuo pasiowi a kuo pasioma, ia nö jalo ösö ösö takaka toita toti ipi ösökö noa tamawi a kuoma, ia nö Tiosö pi ipa ma. Lidia nö Pablo japalo pöle itö jini totio opa pö töna Tiosö pata nö tö tama ma. ¹⁵ Ia liki a mai opamonasoma. Kama ai töpö pewö sola. Itö no jana ia nö samakö naka sotama. Naka sotanö ina a ku sotama: --Ia liki pitilita Jesus na a pi ku totia apa köle, makö pi ku upa könaja ipa saiana pö kua paiköso--. Ina a kuma. A kuia; auie samakö ku jötonö, ia saipöna samakö kua jötököma. ¹⁶ Aitö wakalana Tiosö na japalotawi iamö Pablo kai na samakö ju ulöpamö moko sama talalöma, ia osimöna saitö titikönö tö kua piale itö wösö löapalotiwi a kuoma. Ina tö tama nö a tapo pöle i töpö na sitipa totoma soatalotima, ina tö kuanö pe epi i töpö sitipa kuo totio opama. ¹⁷ Ĩ su te liki, kamisa makö noanamö a lalupalo kai nokapalo jaioma. Pina a ku pölane: --Ji wano töpö liki, ĩ töpönö jitö jitu patamö Tiosö kulali ia tatao tatiwi ĩ töpö. Ĩ töpönö makö löa pö töna, makö wapamatiköle--. Ina a ku lalupalo opama. ¹⁸ Sateje epi tö wakalana a ku koapalo opati ia, Pablo nö a jini wani ipama. A jini wanipalonö, moko töna saiatö titile ia wani na Pablo japalo sotama, sotanö: --Jesucristo jilo pina a wani lisia kopalo--. Ina a kulaso ia, lope epi i saitö lisia ko sotasolöma. ¹⁹ Ina tö kuaia, sitipa sua kota pö tö mapaso ia, i sua tapo pöle ĩ töpönö Pablo, Silas ina kipi töpö jua sotalönö, sapona kulati, ia kaikana töpö kule, ĩ töpöna töpö tota sotakötasoma. ²⁰ Ina tö kuanö, ia töpö löapalowi ĩ töpöna töpö japalo sotama. Pina töpö kuma: --Ji Judio töpö liki, ĩ töpönö ji tö ulina tö wanisanama apaköle. ²¹ Ina töpö kuanö, tiko töna samakö wapama apaköle; Ina tö kuawi ĩ sa ma tö pi ma apaköle. Tiko samakö pasiwö, Roma tili samakö pasi kötönö--. Ina töpö kuma. ²² Sanöma töpö nö Pablo, Silas ina kipi töpö wanipo totio opa naio sotama. Ina tö kuaia i polakapi töpö jalo ösö jasupalönö jiti nö töpö sö pö töna, ia töpö löapalowi i töpö nö sanöma töpö sima sotama. ²³ Pe epi töpö jamia toita manönö, pöka kasötawi ia töpö pöka kasöa sotaköma. Kasöa sotakönö: --ji töpöna a mamo löa totia apa jaiki-- Ina töpö ku sotasolöma. ²⁴ Ina tö kuaia, pöka kasötawi i taka löpowi, ianö töpö lisia tolea totia apöpa manötasoma; ia jiti konona asa wösö pata jute toti ipi ti konona na pö konona oka söta lotota totiköma. ²⁵ Ina tö kuanö, mömi tute ia Tiosö na Pablo, Silas ina kipi töpö japalo, töpö amamo ina töpö kuatima. Ĩ töpö kuati pöle, ia ai töpö pöka kasöa naile, itöpönö itö jini ipama. ²⁶ Ina tö kua ta, pe epi tö uli pata lakölakömo totia apa soa pötasoma. Pöka kasöle ia sai pewö pata kalipalo totio opama. Ina tö kuanö, töpö pöka kasöle ĩ taka taka pewö jakoa kopasoma. Itö nojana töpö pöka pewö kasöle i töpö pewö okale i söpalasö totoko pewö kusa totia kopasoma. ²⁷ Ina tö kuaia pöka kasötawi i taka löpowi, ia na konasoma. A na kononö, taka taka pewö mö ko sota köle maike, taka pewö jako totio opa ko ma. Ina tö kuaia, "töpö toka konasolöma" ina a pi ku upa salo, kamani poa nö a mai tiuja kopasoma. ²⁸ Maike, Pablo lalupalo opa luoma: --Ina a kua ti, jisa samakö pewö kua soaköle--. A ku luoma. ²⁹ A kuia, taka löapalawi ia nö koataka si naka sotalöma. Sotalönö, a lisia löla sotaköma, a kili satitimo opa salo, Pablo, Silas ina kipi töpö konona öpaja pa, pila maiko jitita sotaköma. ³⁰ Ina a kuanö, ia nö töpö lisia kopamanöma. Lisia kopamanönö, a ku sotama: --¿Wina sa kuanö, sa nö löo pö?--. A kuma. ³¹ A kuia, töpö ku jötötama:--Jesucristo na wa pi wasiso totio opa kukema, wa nö löa ko kötö, awö ai töpö nai solakö--. Ina töpö kuma. ³² Pablo, Silas ina kipi töpö nö pöka kasötawi i taka löpowi ia, kamani saiana kamani i töpö pewö kua nai sotale ĩ töpö pewö na Tiosö japalowi itö wösö sotama. ³³ Itö mumina sotawö, pöka kasötawi a sai löpowi ianö Pablo, Silas ina kipi töpö nini ninitö salua kopalönö tö löa konöma. Ia kö nai sotawö pöka kasötawi a sai löpowi ia, kama ai töpö pewö ina kipi töpö mai oma sotasoma. ³⁴ Itö nojana pöka kasötawi a sai löpowi ia nö kamani saia na Pablo, Silas ina kipi töpö kai jua ko sotasolöma ia töpö iapalama sotama. Tiosö na ia, kamani ai töpö ina kipi pitilita töpö pi kulasowi i töna töpö pi mönajapalo opama. ³⁵ Ina tö kua ta, ia töpö löapalowi i töpö nö, pöka kasötawi a sai löpowi ia na ai töpö simöpalöma. Pablo, Silas ina kipi töpö lisia kopa manöpö töna. ³⁶ Pablo na pöka kasötawi a sai löpowi ia japalo sotama: --Kaikana töpö nö makö lisia kopa manöpö töna, sa sima waikiaköle. Ina tö kua kötönö, pö lisia kopalonö toita api pö jua kononö--. Ina a ku sotama. ³⁷ A ku köle maike, pöka kasötawi a sai löpowi ĩ töpöna Pablo a japalo sotama: --Kaikana töpö nö kamisamakö na wanisana tö tapa pölanö kunumai sanöma töpö pewö mamo löa totilata samakö sö pö töna kaikana töpö simo köpöli. Roma tili samakö pölata maike jisia samakö pöka kasömakö solöma, maike jukiki samakö japalo pölanö kunumai samakö lisia kopasopö töna töpö japalo pasia pikia apaköle. “Ma. Ina samakö kua soa pöta maikötö”. Kaikana töpö sai ju kösölönö samakö lisia kopamanö solö pökö--. Ina Pablo a kuma. ³⁸ A kuia, kaikana töpö na itö wösö ko jöto tasoma. Pablo, Silas i töpö liki Roma tili töpö kuo noi itö jinia konönö, töpö kilipalo opama. ³⁹ Ina tö kuaia, Pablo, Silas ina kipi töpö na kaikana töpö japalo taso pö töna töpö julasolöma, töpö ote tamo konönö töpö lisia kopamanönö kamani itö uliamö töpö sima konöma. ⁴⁰ Ina tö kuanö, Pablo, Silas ina kipi töpö jua ko sotasolöma. Lidia saipöna töpö lisia ko sotasö tasoma. Sotaso noia, ia Jesus na ai töpö nokapalowi töpö talalönö töpö pi lotetea totipamanönö, töpö jua ko sotasolöma

Capitulo 17