1. Sernak Kong

Zeizong vialte hram an i thawk ning cu hitihin a si. Pathian nih van le vawlei le, cu chung i a ummi vialte, ni ruk chung ah a ser dih hna. Pathian nih vawlei a rak ser dih tik ah, vawlei cu a rak mui demdum i a kawlawng pi a rak si, a chung ah zei hmanh a rak um lo. Nain Pathian Thlarau cu ti cung ah a rak um.

Cun Pathian nih, "Ceunak um seh!" a ti. Cuticun ceunak cu a hung um. Pathian nih ceunak cu a zoh i a ṭha a ti i, "chun" tiah a ti. Cu ceunak cu muihnak in a ṭhen, muihnak cu "zan" tiah a ti. Pathian nih ceunak cu sernak a thawk a ni khatnak ah a ser.

Sernak a ni hnihnak ni ah, Pathian nih a kaachuak bia in van khi a ser. Cuti van a ser tikah cunglei i a ummi ti le tanglei i a ummi ti cu a ṭhen hna.

A ni thumnak ni ah, Pathian nih a kaachuak bia in ti cu vawlei ro in a ṭhen. Vawlei ro cu "vawlei" a ti i, ti cu "rili" tiah a ti. Pathian nih a thilser cu a zoh i, a ṭha a ti.

Cun Pathian nih, "Vawlei nih hin thingkung phunkip le thlaikung phunkip khohter seh," a ti. Cuticun thil cu an hung um. Pathian nih a thilser cu a zoh i, a ṭha a ti,

Sernak a ni linak ni ah, Pathian nih a kaachuak bia in nika, thlapa, le arfi vialte khi a ser hna. Pathian nih, cu thil vialte cu, hi vawlei ceunak a petu ding ah le chun le zan, khuacaan le kumcaan ṭhennak ah a ser hna.

A ni nganak ni ah, Pathian nih a kaachuak bia in ti chung i ti aa lio khomi vialte le va vialte a ser hna. Pathian nih a thilser cu a ṭha a ti i, thlua a chuah hna.

Sernak a ni ruknak ni ah, Pathian nih, "Vawlei ah hin leitlong saram phuntling um hna seh!" a ti. Pathian chim ning te in thil cu an hung um. A cheu cu zuatkhalh khawhmi, a cheu cu vawlei i a lawnmi, a cheu cu ramlak sahrang phun an si. Cun, cuti a hung ummi cu Pathian nih a ṭha a ti.

Cun Pathian nih, "Kanmah a kan lomi minung kan ser hna lai. Vawlei ah hin le saram vialte cung ah nawl an ngei lai," a ti.

Cuticun Pathian nih leidip aa lak i, minung ah a ser i, a chung ah nunnak thaw a chuahhnawh. Cu minung i a min cu Adam ti a si. Pathian nih Adam a umnak ding ah dum pakhat a ser i, cu dum zohkhenhtu ding ah, cu dum ah cun a chiah.

Cu dum laifang ah Pathian nih thingkung phungdang ngai pahnih—nunnak thingkung le a ṭha le a chia hngalhkhawhnak thingkung—a chiah hna. Pathian nih Adam cu a ṭha le a chia thleidankhawhnak thingkung dah tilo thingkung dang theitlai cu a ei khawh dih ko hna kong a chimh. Ei lo ding thingkung i a theitlai a ei ahcun a thih lai kong a chimh.

Cun Pathian nih, "Mipa amah telawng um hi a ṭha lo," a ti. Saram zeibantuk hmanh Adam bawmchantu an si kho lo.

Cu ruang ah Pathian nih Adam cu thu hluahmah in a hngelhter. Cun Pathian nih Adam hnakruh pakhat a lak i, minu pakhat ah a ser i, Adam sin ah a ratpi.

Adam nih minu cu a hmuh tikah, "Ehe! Mah hi pei keimah bantuk a si hi! Mipa in sermi a si i, 'Minu' tiah auh si seh," a ti. Cucahcun pei pa nih a pa le a nu kal tak in a nupi he pum khat an si hi a si cu.

Pathian nih mipa le minu cu amah mui lo in a ser hna. Thlua a chuah hna i, "Tefa le hrinsor tampi in ngei u law vawlei hi khahter u!" a ti hna. Cuticun Pathian nih a thilser vialte cu a zoh i, a ṭha tuk, a ti i, a thilser vialte kong ah aa lawm tuk hringhran.Cu vialte cu sernak a ni ruknak ni i a cangmi an si.

A ni sarihnak ni a hung phanh tikah Pathian nih a rian a lim dih cang. Cucahcun Pathian cu thil vialte a sernak a rian in aa din. Ni sarihnak ni cu thlua a chuah i, cu ni cu a rian in aa dinh ni a si ruang ah ni thiang ah a ser. Pathian nih van le vawlei le a chung i a ummi vialte a ser ning cu cuticun a si.

//Baibal tuanbia laknak: Genesis 1-2//