1 Thesalonika: Waraga hitieri no Paulo te Ikelesia no Thessalonika

Chapter 1

¹ Paulo, Silvano ojo Timoteyo, te ikelesia no Thesalonika ne lowon to Hollum Monye, Habu lohoi Yesus Kristo. Hotowana hamehini ho himora no Hollum da hatai. ² Edule iyohoi hisiara humo to Hollum ebe te itai, iya elioto iyohoi itai to mojo nohoi. ³ Errasa iyohoi to hosiere Hollum Monye hohoi hiyen huruk nahatai, igem nahatai, mune nahatai, hitila no hiŋere hatai to moi nyie lowon da Habu lohoi Yesu Kristo. ⁴ Halasira, hullo lomuno Hollum, eyen iyohoi heliloŋini nahatai nolobe ara to hiro assai ati to golon no Loyiri lo Olibo. ⁵ Te hikoi ne liyen itai daŋ iyohoi ifa beren to hiji hatai. ⁶ Eticelu itai iyohoi ho Habu, iya efotu itai hiram no Hollum to hitigiama ojo hidofe to mune no Loyiri lo Olibo. ⁷ Te hiram nia, ira itai hetimijak to heruhok illo Masedonia ojo Acaia. ⁸ Etalini hiram no Hollum te itai, obe lara to Masedonia ho Acaia hamai ati ta massiok innafa ligiamari itai esarik huruk nahatai to Hollum. Iyane enye iyohoi heremik hiro innamuk hirro. ⁹ Isieja to kwaite innohosie elimak hafanu nohosie da hatai. Ero isieja hiloito nahatai tere rijorihien do Hollum lo bis. ¹⁰ Elima isieja hijo etila itai Lonyi honyie lottu tere ido. Letidietu inyeja tere hayok. Inya lia Yesu Kristo lolohou iyohoi tere jore nolottu.

Chapter 2

¹ Eyen itai ta kwaite innahatai, halasira, hijo obe ifa ŋawoŋ nohoi da hatai ara assai. ² Eyen ifa itai hijo obolo hitigiama nohoi many ottohoi iyohoi irri to Philippi, eyen ifa itai. eŋere ifa iyohoi hiro hiram no Hollum to hiji ho hitigiama. ³ Obe ifa hitito nohoi ara to hipali, he iboti, to hinyaba, ⁴ ati eruhu Hollum iyohoi esiarari doohoi hiram nohonyie hijo anyar ero iyohoi saye inno olibo, inya nia ero iyohoi. Ero iyohoi hijo hotobiaŋa iyohoi etumuno huwo, ati Hollum nyo Hollum hamai eremik hicem ojo hidofe loyen taji innohoi. ⁵ Iya ara Hollum a sut lohoi, ebe ifa iyohoi ero dahatai to teler kuya hidofe to nobo far hijo anyar edaya iyohoi hirro innahatai. ⁶ Ebe iyohoi esiaha lohwo nohoi tere huwo, kuya hidofe tere itai kuya tere ilamuk. Nara ida ane, newak iyohoi idumuti innohoi te hira nohoi lefahat. ⁷ Ati enyalam ifa iyohoi da hatai iya anyalam hotonye to durre innohonyie. ⁸ To hikoi nia, emuno ifa iyohoi itai. Ebe ifa iyohoi ebwany hiram no Hollum hatai hamai ati eisio ifa iyohoi kwaite innohoi da hatai. ⁹ Edule itai hiyen igem iko hitigema nafa hohoi, halasira, egiama ifa iyohoi ta tari ojo te iŋalio hijo hotobiaŋa iyohoi etigem itai. Da far nyie, etiyana ifa iyohoi itai saye inno Hollum. ¹⁰ Ira itai a suti inno hirro inne. Liyen itai liboi, bisan ojo imanyiti innohoi nafa ewanari iyohoi he itai eijo iyohoi emanya he itai illafa eruk. ¹¹ Liyen itai hitigolo nafa hohoi da hatai iya monye ho durre innohonyie, etito ejo hidofe etigolo itai. Etito iyohoi ¹² hijo anyar emanya itai iya lawak Hollum to lohwo nohonyie iya eliloŋu inyeja itai to lobie ojo lohwo nohonyie. ¹³ To hiram nia edule iyohoi hisiara to Hollum humo, To nafa efwotuni itai hiram no Hollum tere hohoi, obe ifa itai eruk hijo ara hiram no tihoni, ati efwotu ifa itai ane, hijo ara Hiram no Hollum, Inyeja hiram nyia ne egiama do hiji hatai ille leruk. ¹⁴ Halasira, eyalu itai ikelesiaha inno Hollum inno lowon de Yesu Kristo nia to Yudeya. Errumu itai hitigemita tere huwo illo doŋee nahatai hirro innafa orrumu isieja tere huwo illo Judei. ¹⁵ Illafa otohoi Habu lohoi Yesu Kristo ojo hekilak ette hidofe ŋefuhai iyohoi ade. Obe etumuno Hollum ojo hidofe odule aŋerejak to huwo daŋ hijo hotobiaŋa iyohoi ero do huwo illo ara halufak hijo hotobiaŋa isieja etilohini. ¹⁶ Te hikoi ne, aŋadumu isieja ette ŋafonik hiyata innohose ati ŋawoŋ jore no Hollum dahalu do hosie. ¹⁷ Halasira, elama ida hido iyohoi tere hatai kai ta tajia, ewak iyohoi bino ta tajia innohoi hiwolo itai to homomite. ¹⁸ Nyo ewak iyohoi ŋafanu dahatai-naya Paulo, edas ati etihita sitan iyohoi. ¹⁹ Nyo ara hitidara nohoi to heyik to tamu tere Habu lohoi, da ŋawoŋ nohonye. Obe ara itai? ²⁰ Itai era ohwo ojo mune nohoi.

Chapter 3

¹ Nafa ebe iyohoi heremik hidi, eruk iyohoi hijo hediahari isieja iyohoi ta Athens hamai. ² Ette iyohoi ŋefahak Timoteyo halasi ojo ara hidofe hegiamani iko hoi to saye inno Yesu Kristo, ³ hijo hetigolo inyie huruk nahatai, hijo hotobiaŋa lobo tere hatai orrwa de hitigemita inne. Eyien itai to kwaite innahatai hijo ara isieja innohoi. ⁴ Dede, nafa helewon iyohoi he itai, elimak ifa iyohoi itai beren hijo efu iso iyohoi ŋarrumu hitigemita iya owanari isieja iya egonyu itai eijo itai eyien. ⁵ To hiram to nia, ifa ewolo naŋ hijo enyei iso naŋ heremik hidi ahosiere, ette naŋ ŋefahak hijo anyar layen naŋ huruk nahatai, egigilo naŋ ifa hijo enyob mahu henyabani itai ette igem nohoi ŋeno assai. ⁶ Hetek Timoteyo ŋawoŋ dohooi tere hatai ette hidofe ŋeyani dohooi saye inno olibo no huruk ojo mune nahatai. Elimak hidofe inyeja iyohoi hijo edule itai higigilo iyohoi nalanyar, ojo ewak itai egonyu iyohoi iya ne ewahari hidofe iyohoi egonyu itai daŋ. ⁷ Halasira, te hitigemita innohoi daŋ, egol ifa iyohoi te itai ojo te huruk ta nahatai. ⁸ Emanya iyohoi iyane to weita ta nahatai no ta Habu. ⁹ Hesio iso iyohoi to Hollum humo tetai jai to mune nohooi nolowon to hosiere ho Hollum. ¹⁰ Emojo iyohoi to far iko te iŋalio hijo anyar egonyu iyohoi itai eijo hidofe eremik hitigol huruk nahatai. ¹¹ Iyane, isiara Hollum Monye hohoi to kwan nohonye Habu lohoi Yesu hehuhumak dohooi hikoi neremik iyohoi ŋafanini dahatai. ¹² Hotofonik Habu mune nahatai hotoloŋori te ilak ojo do huwo daŋ ta mai iya ara nohoi dahatai daŋ. ¹³ Isiara inyeja hetigolo tajia innahatai anyar obe nobo hipali dahatai do hosiere ho Hollum Monye hohoi lacohini Habu lohoi Yesu iko halibok illohonye daŋ.

Chapter 4

¹ Hucuŋi nohonyie, halasira, etigolo eijo hidofe etito itai da Habu lohoi Yesu. Iya emoju itai hituhututa tere hohoi inno loton eijo itai etumuno Hollum, hidofe to loton nia, itudule higiama ahosiere. ² Nyo liyen itai hijo esio iyohoi hituhututa inne tere Habu Yesu. ³ Ara inna wahan no Hollum: lewak itai libe ibwara hirro inno somon, ⁴ hijo anyar otoŋ lobo oŋorwo honyie nalanyar to libe ojo to baŋi. ⁵ Ibaŋa ladaya ŋorwo inno hilak huwo iya huwo illo lobe loye Hollum. ⁶ To hiram ne, hotobiaŋa lobo eturwo kuya etipala ilasi honyie. Abak iso Habu huwo ille ehuma hirro inne. Elimak ifa iyohoi hiram ne da hatai beren. ⁷ Obe ifa Hollum eliloŋu iyohoi hijo hotoduloi hihuma hirro inne ebot. Onyimu ifa inyeja iyohoi hijo hotobwanyari iyohoi tere hirro inno lorru. ⁸ Iyane, lebo lobo abaŋ hiram inna, obe inyeja ebo huwo, ati Hollum lesio Loyiri lolibo nohonyie da hatai. ⁹ Ati abe naŋ awak egiorok da hatai hemuno itai heruhok jai. Etiyenak Hollum to kwan nohonye hijo itumune kwaite innahatai. ¹⁰ Dede, emuno itai heruhok daŋ ta Masedonia. Ati efia iyohoi itai motiarak hijo, itumune kwaite innahatai binno. Hotobiaŋa itai etidiotok nobo hiram do lobo. Igemai hirro innahatai to kwaite innahatai, obe ara ho hirro inno huwo. Igemai ta has te innahatai. ¹¹ Elimak ifa iyohoi itai hijo igemai hirro inne. Legem itai hirro inne, egigilo so illamuk huwo nalanyar te itai, egigilo iso huwo illo lobe eruk Kristo nalanyar dahatai. Oyien iso isieja hijo eruk itai binno ette hijo elibo itai. ¹² Hidofe legem itai hirro inne, ebe iso itai eak lobo hotolwak itai innamuk hirro. ¹³ Halasira, awak naŋ anyar liyen itai hiram na hayok illafa oye. Hijo hotobiaŋa itai emumuha isieja iya inna omumuhari illak hayok illohose. Omumuha huwo luhe nyo obe isieja owon ho nobo heyik ta halu ho ye no tihoni. ¹⁴ Leruk iyohoi hijo oye ifa Yesu ette ŋebuhu to ye, Eruk iyohoi daŋ hijo otuba huwo illo oye iko Kristo. ¹⁵ Eruk iyohoi hijo eyani iso Hollum huwo luhe lawoŋ Habu, ebe iso iyohoi eremik efie ahosiere tere luha illafa ojotori. ¹⁶ Da far nyie, eyorro iso Hollum to hilohitok, ojo huwo ette ŋetiru hutuk no Anjilo la agalik. Etiru iso isieja kwatan ne ikakan. Ette Habu to wan nohonyie ŋawoŋ te ido afau. ¹⁷ Ette luha illafa otuba ho Kristo ŋebuhu, ette isieja diote to hosiere. Ta halu, ette iyohoi hawarak illafa daŋ diote ahide ette ŋefie ahidwe. Ette Hollum ŋeyari iyohoi ahide otubari he isieja de itiran. Eyari iso inyeja iyohoi heboŋohini ha Habu to oyami. Ewon iso iyohoi iko Habu holoŋitek daŋ. ¹⁸ Iyane, ititok hirro inne te illamuk.

Chapter 5

¹ Motiarak, ebe iyohoi egiorok da hatai da far ojo holoŋitek inno lofuye hirro hunna hebarari. ² Eyen itai bino ŋacohini na Habu. Etubur iso far nyie huwo binno iya ŋawoŋ no lohoho ahahalari huwo ta tari. ³ Da far nyie, ero iso huwo hijo, 'ewon iyohoi ta mai nalanyar, ojo hidofe nobo run obe.' Ati obe isieja odiarak kwaite innohose, ojo diahai iko irruti ette hidoŋ do hosie. Edoŋ iso hitihara nyia iya diahai no hito noŋorwo tetadori. Ogolo iso do lobo hebusari tere run nyia. ⁴ Ojo dahatai huwo ille ira dohoi halasira, ojo hanasira, eyien itai hirro inne. Ebe itai era iya huwo illa amanya de idumele. Hotobiaŋa ŋacohini na Habu etubur itai. Hotobiaŋa far nyie etubur itai iya hawoŋ no lohoho ahahalari huwo. ⁵ Era itai daŋ a durre illo calai ojo durre illo far Ibe itai era lonyirok illo harie kuya illo hiriohi. ⁶ Hotobiaŋa iyohoi ejoto iya illamuk. ⁷ Ati hetudule hiriria ojo hosi odule ŋa. Luha illo lojoto, ojoto isieja ta tari, ojo luha eboto, eboto daŋ ta tari. ⁸ Ati iya eria iyohoi lonyirok illo far, anyar ehum iyohoi riŋa eijo hidofe egigilo na anyar. Anyar ecofok iyohoi buhu no suhe no huruk ojo no mune, ojo tamu no etilohini no moi. ⁹ Obe ifa Hollum iyohoi hijo hetera iyohoi illo jore, ati hijo anyar errumu iyohoi etilohini ta Habu lohoi Yesu Kristo. ¹⁰ Inyeja ifa oye te iyohoi hijo kuya eriŋa iyohoi kuya hidofe efer iyohoi, anyar emanya iyohoi daŋ he inyeja. ¹¹ Ilimak hirro innia te illamuk anyar obe kwaite innahatai elik. Itulwak kwaite iya ne egiamari itai iyane. ¹² Iyane, efia iyohoi itai halasira, iruho luha ille egiama do hiji hatai ojo hidofe ara eitaha da hatai ta Habu ojo hidofe etiyana itai. ¹³ Ewak hidofe iyohoi anyar emuno itai isieja binno te igem nohose. Ituwanai to himora to hiji hatai. ¹⁴ Etito iyohoi itai, halasira: Itisor heturwok, itulwak ille etaban to hiji hatai, itulwak ille elik, isiara hidi nahatai to huwo. ¹⁵ Hotobiaŋa lobo odumak run ho run to lobo, hati itudule siaha hirro inno olibo te illak ojo huwo daŋ. ¹⁶ Tomune holoŋitek daŋ. ¹⁷ Itudule mojo. ¹⁸ Isiara humo to Hollum to hirro daŋ. Nyo ara nia wahan no Hollum do hoi to Kristo Yesu. ¹⁹ Baŋa etuduny Loyiri. ²⁰ Baŋa olisa hikilita. Iticem hirro bi daŋ. ²¹ Iniefa hirro inno olibo. ²² Ibusak igemita inno orru. ²³ Isiara Hollum lo himora hototubak itai halibok. Isiara oyiri nahatai daŋ tamai, oholio, ojo kwaite innahatai hototubahini obe hipali da ŋawoŋ na Habu lohoi Yesu Kristo. ²⁴ Agalik libe no lie lafa eliloŋu itai, ojo lie lohu hidofe higem. ²⁵ Halasira, itimoje daŋ hidofe te iyohoi. ²⁶ Itifonyak halasira daŋ to hijujura no hutuk. ²⁷ Efia naŋ itai to fure na Habu hijo anyar ehianak itai waraga inna ta halasira daŋ. ²⁸ Isiara hamehini na Habu lohoi Yesu Kristo hotowana he daŋ he itai.