Waraga Ne Egiorok Yokobo

Chapter 1

¹ Yokobo, hegiamani lo Hollum ojo la Habu lohoi Yesu Kristo, to woyojin inne Isaraile hunna tomon ha arik; Efonya naŋ. ² Itumune do hiji ho hitigemita innahatai halasira hanaŋ lobore hitigemita innahatai, ³ eijo itai eyen hijo eyani hicemiti dihan. ⁴ Isiara dihan esahak igem nohonyie hijo anyar ogolo huruk nahatai obe nobo sehin olitari itai. ⁵ Ati lawak lobo lahatai ofioroho, isiara hefia Hollum lesiara to himorot obe hiririŋa do luha ille efia, ojo iso inyeja ette hisio. ⁶ Ati ifia to huruk eijo itai ibe ikuya, ara tihoni lekuya iya hifoliaha no hifioŋ no ohut oyami to nobo hikoi ojo inyie ette huruk epwoŋori. ⁷ Hotobiaŋa tihoni le egigilo hijo ahu iso inyie ŋamoju hifia nara honyie tere Habu; ⁸ nyo eriaha higigilo no tihoni le, ojo hidofe ololok te ikoita innohonyie bi daŋ ta mai ⁹ Isiara halasi olociaŋ hetidarai da mai honyie no owon to hide, ¹⁰ ojo halasi hasamani herruŋoi ta nyalami nohonyie, nyo olita iso inyeja to tim iya odwa. ¹¹ Edoŋ holoŋ no onok ette hiswak yani, man ohuyun turiena afau ette hilahaman nohonyie yei. To hikoi nia, olita iso hasamak to hiji he igemita inne hosie. ¹² Hotowana jaha do tihoni lo odi icemiti, lelaŋ inyeja ciama, efwotu iso inyeja tamu no waran nafa otiorohini do luha illo omuno Hollum. ¹³ Hotobiaŋa lobo lowon to ciama ero hijo, "Ottu ciama inna tere Hollum," nyo obe Hollum run oremik hicem Hollum, ojo Hollum to kwan nohonyie obe eremik hisio icemiti do lobo. ¹⁴ Orrumu tihoni icemiti innohonyie te iwahiti innohonyie inno orru ette ŋeyari inyeja ade. ¹⁵ Niya lowodi iwahiti inno hiyau, ette hiyau ne ŋesiuni, ati lobolo hiyata, ette hiyata inne yite aye. ¹⁶ Ibaŋa eruk hinyaba, halasira hoti hulloŋ. ¹⁷ Afanu hisiorita inno olibo ojo hidofe hisiori no obis to hide, nottu aŋolon tere Monye lo calai. Obe inyeja eremik hiloito iya hidisi. ¹⁸ Anyimu ifa Hollum to hisio to nohonyie iyohoi waran to hiram no bisan, hijo hetera iyohoi iya hosiere inno haŋer to hiji ho hirro innafa oyieu inyeja. ¹⁹ Liyen itai inna, halasira hoti hullo dede. Isiara yohe inno huwo hehawa to hitira kwak, heyassa hiro, heyassa jore, ²⁰ nyo obe jore no tihoni eremik hilwak bisan no Hollum. ²¹ Iyane, ibusak daŋ hibotita ojo iruti inno owon ta massik daŋ, ati ta nyalami ifwotu hidula no hiram, no oremik etulwahu oyiriha innahatai. ²² Itibaŋ hiram, ibaŋa hamai etira, eijo itai enyaba kwaite innahatai. ²³ Letira lobo hiram ojo inyie obe egiamari, ara inyeja iya tihoni loriŋa homom nohonyie to miraya. ²⁴ Owolo homom nohonyie, leno ade tere miraya kwak ette ŋagwe rijori nohonyie. ²⁵ Ojo tihoni loriŋa dee do hafihai inna nalanyar, hifahi no bolioŋ, ojo inyie odule baŋi, obe ara to hetirani logweta, ajaha iso tihoni legiamari hiram. ²⁶ Legigilo lobo to kwan nohonyie hijo ara inyie atihoni le ikelesia, ojo inyie obe enief ŋadief nohonyie, enyaba inyeja taji nohonyie ojo huruk nohonyie ara assai. ²⁷ Ara manya to hiram no Hollum no olibo, no obe ebwot do hosiere ho Hollum ojo Monye inna: hotolwak hohio iko ihidahi tere hitigemita innohose ojo hidofe eriria kwaite innohosie tere himumuna na fau.

Chapter 2

¹ Halasira hoti, ibaŋa etuhutek higigiala iya ewon itai do huruk na Habu lohoi Yesu Kristo, Habu lo obie to higigiala ne hilak huwo. ² Lajiŋak lobo tihoni de hiwaha nahatai ojo inyie eciefita bilet inno yiel ojo boŋojin inno opipiak, ojo hidofe tihoni la ara olociaŋ ŋajiŋak daŋ da hatai ho boŋojin inne ebwot, ³ ette itai ŋatuhok honyehite do tihoni leciefita boŋojin inno olibo ette itai hijo dohonyie, "Illa woŋ tohunyie da mai no olibo," ejo itai ette hijo do olociaŋ, "Toweitai ade," kuya, "Tohunyie de hejek hoti," ⁴ ibe itai iyane eŋoto kwaite innahatai to kwaite innahatai, ette itai hira haŋotok to higigilita inno orru? ⁵ Itira, halasira hoti, obe ifa ara Hollum onyimu lociaŋak illa fau hijo hetera isieja hasamak do huruk ette hidofe ŋarutak obie nafa otiorok inyie do luha illo lomuno inyeja? ⁶ Ati ibe itai limuno lociaŋak! obe ara hasamak ille odurra itai, obe ara isieja ille epihita itai a massiok inno okiko? ⁷ Obe ara hasamak ille lomoro fure no tihoni lafa eliloŋu itai? ⁸ Ati, legiem itai hafihi nafa hittok, iya egioro do buk, "Emuno iso iye onyihari hoi iya inna emunori iye kwan nohoi," igiemai nalanyar. ⁹ Ati legigiala iye hilak huwo, ette iso iye ŋeyau, eniefu iso hifahi iye, nyo ira itai hawurok illo hifahi. ¹⁰ Labaŋi lobo hifahi daŋ ta mai, ojo hidofe ekos to sehin nobotie, enyiak iso inyeja hira hepalani lowur hifahi daŋ tamai! ¹¹ Nyo ojo Hollum hijo, "Baŋa eyau noŋorwo no lobo tihoni," edas hijo, "Baŋa lottohoi." Libe iye eyau noŋorwo no lobo, eijo iye ettohoi, ewur iye hifahi no Hollum. ¹² Irara eijo hidofe ebaŋ iya luha illo lofwo okiko tamai no oŋotori hifahi huwo. ¹³ Ottu ŋoto nobe omehini do luha illo lobe etuhutek hamehini. Agalik hamehini ŋoto! ¹⁴ Holibo ati inyie iso jei, halasira, lojo lobo hijo awon inyie ho huruk, ojo higemita obe tere honyie? Oremik iso huruk ne ŋetilohu inyeja? ¹⁵ Lawak lobo ilasi kuya hanasi lwaha no boŋojin ojo ŋiria inna to holoŋi, ¹⁶ ette lobo lahatai hijo do hosie, "Inno nalanyar, todule nohon , tadahai hidofe daŋ nalanyar," ati ibe itai eisio do hosie hirro inno kwan, hara hati libe nohonyie nyo? ¹⁷ te hikoi ne, lobe huruk to kwan nohonyie owon he igemita, ara no oye. ¹⁸ Ati odule iso lobo hiro hijo, "Ewon iye ho huruk, ajo naŋ awon he igemita." Ituhutek deti huruk nohoi nobe egiama, ajo naŋ etuhutek dohoi huruk neti to higiemita. ¹⁹ Iruk iye hijo ara Hollum lobotie; ebis iye. Ati eruk hidofe meniaŋa daŋ ette hikikiro. ²⁰ Liwak iye hiyen, iye lobolit lo huwo, ejo bahati iye hijo ara huruk assai lobe igiemita? ²¹ Hobe ifa Abramo hohonyi hohoi etibisahini te igiemita ta nafa ahafahini inyie lonyi honyie Isako hatara a hisiori to hide haltari? ²² Ewolo itai hijo egiemu huruk igemita innohonyie, ojo te igemita, ŋarrumu huruk ilibiti innohonyie. ²³ Ero hiram no Hollum hijo, "Eruk Abramo Hollum, man orrumuni inyeja bisan." Era ifa Abramo a mote do Hollum. ²⁴ Ewolo itai hijo etibisahini tihoni te igemita, obe ara to huruk hamai. ²⁵ Obe ifa Rahab isomo etibisahini te igemita, tanafa efwotuni inyie lefahat ette ŋefahak isieja ade to nobo hiko nolufa? ²⁶ Iya lowon kwan hamai tere loyiri owon no oye. Owon ane, lobe huruk owon he igem, ara no oye.

Chapter 3

¹ Hotobiaŋa hilak arria tere hatai hatara a hetiyenak, halasira hoti, eyien hijo efanu iso ŋefwotu ŋoto nettok. ² Epal iyohoi daŋ te hinak hikota arria. Lobe lobo epal to hirro to nohonyie, ara inyeja tihoni lobis, nyo oremik inyeja hinief kwan nohonyie daŋ tamai. ³ Iyane lefitak iyohoi hofi do hutuhien inno himari abaŋ iso isieja iyohoi, ette iyohoi hiloit kwaite innohosie daŋ tamai. ⁴ Itiyen hijo obolo babur ojo hidofe ogol ati oremik oyami nefiriwa hiyir, oremik hidofe hiyirit letiŋ hiloit inyeja a mai no ohuye hesuhoni. ⁵ Ara ŋadief kwan letiŋ do kwan no tihoni, ati etidarari to hirro inno hittaha. Itiwolo, oremik hima ediehini ette hisok tutur! ⁶ Ara hidofe ŋadief a hima, fau nefut ho hiyata lowon do hiji ho kwaite innohoi, oremik hitibwot kwan ette ŋediek hima de ikoi no waran, ojo inyeja to kwan ŋaswahahini to hima nosio fur. ⁷ Oremik tihoni ŋehuhumu ciaŋi hahonyak, cieŋ, ojo hirro inna amanya do hifioŋ. ⁸ Ati obe lobo tihoni oremik ŋeniefu ŋadief; ara run nobe oyiri, efut ho hiyieri no ye. ⁹ Ta ŋadief, etihabwo iyohoi Habu lohoi iko Monye, ojo hidofe te inyie eittor iyohoi huwo, illafa oyeuni to rijori no Hollum. ¹⁰ Afanu hidofe ijohiti daŋ to hutuk nara ottoro. halasira hoti, hotobiaŋa hirro inne ara ania. ¹¹ Heremik hati luŋa hifioŋ inno olibo ojo inno orru ŋafanu tere hari nobotie? ¹² Halasira hoti, heremik iso ŋaboli eŋarak haŋer innohonyie a hukwa, kuya hukwai eŋarak innohonyie aŋaboli? Obe hidofe osiru da hari no onyieta a mile iko hifioŋ amatat. ¹³ ŋai to hiji hata lowon ho ofiorioho ojo hiyien? Isiara tihoni hetuhutek manya no olibo te igemita innohonyie ta nyalami nottu tere ofioroho. ¹⁴ Ati lewon iye ho haini nodwa eijo hidofe taji nohoi errute, baŋa etidara eijo hidofe eteler do hirro hunna ara dede. ¹⁵ Obe inna ara genyan nottu afau te ido, ati ara nafa, nobe ara no Hollum, efut ho meniaŋa. ¹⁶ Lowon haini ojo iwahiti inno kwan efut, owon iso hiharra iko igemita inno orru. ¹⁷ Ati obis genyan nottu to hide hosiere, ette hati himwara no mune, nyalami, mune na tajia, nefut hamehini ojo haŋer inno olibo, nobe higigiala ne hialk huwo. ¹⁸ Ojo haŋer inno bisan edulahini to himwara do luha ille ehuma himwara.

Chapter 4

¹ Ottu rija ho ŋalafa to hiji hatai taji? Hobe obe afanu tere iwahiti innahatai inno orru inna aŋalafa da kwaite innahatai? ² Lidaya itai hirro inne libe itai iremik ŋarrumu. Ettohoi itai ette itai hitiŋatta hirro inne ibe itai eremik ŋarrumu. Eŋalafa itai ette rija, ati libe itai errumu nyo libe itai efi Hollum. ³ Efi itai ejo itai ibe efwotu nyo efia itai to hirro inno orru, hijo anyar etiharari itai to hirro innahatai inno orru. ⁴ Itai harotok, ibe itai liyien hijo lomuno hilak huwo fau, ara isieja miorok illo Hollum? Lie lemotia ha fau, ara inyeja mereni to Hollum. ⁵ Egigilo itai hijo ero hiroita assai ta nafa erarari isie hijo, "Omuno Loyiri lowon dohooi iyohoi ta wahan nara ahaini." ⁶ Ati esio inyeja hamehini nalagalik. Nia ero higierita hijo, "Ebo Hollum hetidarak ati omehini inyeja ta nyalamak." ⁷ Itiniŋe Hollum, ibwara hetisiahani ette iso inyeja hirwata ade tere hatai. ⁸ Ihutok aŋati to Hollum, ojo iso Hollum ette ŋehutok aŋati da hatai. Itilibo has innahatai itai heyak, itilibo tajia innahatai itai ille eriok tajia. ⁹ Ititarihai tajia, ititarihai, eijo hidofe eyio, anyar oyito hilohita nahatai tariha, ojo mune nahatai oyito no odiŋ. ¹⁰ Inyaha kwaite innahatai ahalu to hosiere na Habu, ette iso inyeja hitibolo itai. ¹¹ Halasira hoti, ibaŋa omwaŋa lobo tihoni. Lia lomwaŋa ilasi honyie kuya ojo hidofe oŋot inyeja norru te ifahita ati oŋot inyeja hifahita. Ati leŋot iye hifahita, ibe iye era ahehuhumani he ifahita, ati ira iye haŋotoni lo hosie. ¹² Owon hesiarani le hifahita lobotie lara haŋotoni, inyie lia loremik etilohu ojo hidofe oremik ŋatohoi. Ati ŋai iye lewon a haŋotoni lo onyihari hoi? ¹³ Igigiloi iyane itai ille eijo, "Ena kuya motie efi iso iyohoi a doŋe nobo, emanya iso iyohoi de hiŋa nobotie nyo efwo iso iyohoi hitinyaŋa eijo hidofe epoco ibariti. ¹⁴ Ibe itai eyien nyo nia ottu motie. Ara waran nahatai iya nyo. Ara inyeja iya itiran no olew iyane, ojo kwak ette ŋalitek. ¹⁵ Anyar eijo itai hijo, lawak Hollum, ewar iso iyohoi ette iyohoi hihuma tiji, kuya iya nyia. ¹⁶ Ati iyane etidara itai to hirro inne ehuma itai. Orru hitidara iya inna. ¹⁷ Iyane, lia loyien hihumita inno olibo, atati hibo hihuma, eyau inyeja.

Chapter 5

¹ Ifanu iyyania itai habarak, itiyye eijo hidofe eluluo to hitigemita inna afanu iso dahatai. ² Omurai ibariti innahatai ojo hidofe hiyyu essok boŋojin innahatai. ³ Obe yieli iko arobiyaha innahatai osiru nyo ero iso murai nohosie norru da hatai atta hissok wati innahatai iyya hima. Ettunak iso itai ibariti innahatai to hucuŋi inno holoŋitek. ⁴ Itiwolo, oyyio hegiamak illo odioŋo matta innahatai te idumuti innohosie, nyo eduma itai isieja to hoho, ati eba yio na hadioŋok many da Habu lo oseŋer. ⁵ Emanya itai te imuniti inno fau ejio hidofe ejufuta iwahiti inno wati innahatai, etidaha itai tajia innahatai man do holoŋ no toho. ⁶ Eŋotok itai yee da habisak atta itai ŋattohe inyeja ati obe inyeja ebo itai. ⁷ Halasira hoti, itilau to dihan na ŋawoŋ na Habu. Itirriŋe, iyya etila haromoni dioŋo na mana, etila inyeja to dihan nohonyie haŋer inna awak inyeja binno man ottuni hai hitieri iko inna ottu halu. ⁸ Itai hidofe, itidihu eijo hidofe itigolo tajia innahatai, nyo eliaha ŋacohini na Habu. ⁹ Halasira hoti, ibaŋa eŋuŋunuta atta itai mwaŋa lobo tihoni hijio hotobiaŋa ŋoto ottu da hatai. Itiwolo, oweta haŋotoni de ikat. ¹⁰ Halasira hoti, itiwolo dihan no hekilak illafa ero to fure na Habu. ¹¹ Itiwolo, elliloŋo iyyohoi luha illo odi, "lowuon ha jaha." Etiru ifa itai dihan no Job, ejio hidofe itai eyyien igem na Habu to Job, nyo efut ifa Habu iko nyalami iko hamehini.