8.

Tãra ruy wachabu, Jakob chuepurãmbu, buema mondo dja tay Josepe. Gogiperõ idja by gatueche. Buema wechãwã dja pawe wywy, go rõ warõ reko wachupurãndji.

Jose pawe wywy rõ byllãeche Josedji, idja apã by gatuechedjiwa idjape, emi Jose ikẽ pou rupi wechã buare idja ymachidjawerã idja pawe wywydji. Jose dja pawe endape wẽmbu, gogi wywy idjape pychyma, emi mema bue pepyatygipe, rekopytygi nonga ekõwã.

Jose pawe wywy djewy nondje idja chupape, wiroma Jose tyruwe llabuwagi, mĩma bechepe pirãpe. Gobu rama dja apãpe wechãwã, gobu idja apã inawã, we djarõ Josepe porõma. Gobu Jakob uryllãechema, chinga tãrama.

Go bue pepyatygi rama Josepe Egiptope. Egipto rõ etakrã ekõandy neina wachu, chidjaechegi, go rõ ypurã Nilo embe djiwa. Bue pepyatygi Josepe pepyma butadji etakrã kbe’epe ymachidja buta tãrangipe, rekopytygi ekõwã. Jose bita gatu ekõ dja rekoatygi chupape, gobu Apã Wachu kuwẽ gatu reko Josedji.

Dja rekoatygi breko puka Josepe idja djãwẽ djenowã. Jose rõ djapo djuellã bue buchã Apã Wachu chã ruwa. Go kudjã prandjã buchã Josedji, idjape kaina emi mĩ buchãma, idjape pychywã emi pypywã tapy djawãllãpe. Tapy djawãllãpe ĩmbu djepe, Apã Wachu kuere wedjallã. Gobu Apã Wachu idjape kuwẽ gatu reko.

Mirõ ruy wachabu, Jose ĩ wyche tapy djãwãllãpe, bue buchã djapollãmbu djepe. Etakrã chãwãmbu faraon, go Egipto pua wywy pukaty nonga ymachidjawachugi, go ikẽ poubu mirõ bue wechãma. Gobu okryrallã buchã roma ĩ. Ĩllã go bue kua gatugi wywy bychepe kiuwã ikẽ poudjiwa, bue idja wechãwe kua gatugi.

Apã Wachu Josepe mẽwe, kiu gatuwã, bue rõ inambyty ikẽ pou djiwa. Go buare faraon pukama Josepe tapy djawãllã puare. Gobu Jose djawuma idjape, bue rõ bue ikẽ poudjiwa inambyty. Gobu inama: "Apã Wachu buewerã djypetã ruybu bue ã’ã pechepyregi wẽ gatuwã. Gobu Apã Wachu buewerã emi djypetã ruybu, bue uwã ĩllã bechewerã.“

Jose inama Egipto pua wywype bue ã’ã tãra noãwã, mĩmbawã emi tapy wachupe djypetã ruybu tãra bue uwã ĩmbuare. Gobu Jose bue uwã mema Egipto puagipe djypetã ruy llellã wachubu. Go nonga bue upyrã go pua wywy rekopama.

Go buãma idja pawe wywype, kua djue, ekõ buchã wyche ko. Gobu rõ gogi wywype Jose inama: "Cho rõ pendje pawe Jose! Krymballãeme, pendje chope reko buchã buare, mewe rekopytygi nonga. Apã Wachu rõ bue buchãndji djapoma bue gatu. Pendje wẽ ga bu, Egiptope ekõwã, cho rõ kuwẽwã pendjepe emi pendje tapypuagi wywype.

Djawu mewe emi Apã Wachu djawu membyre Abrahampe emi membyre Isaakpe, gobu Jakobpe, gobu go etakrã mirõ Jakob tay wywype, dja tapy puagi wywype emi. Go etakrã mirõ tay tapy puagi wywyndi wẽma go etakrã mirõ Israel irõndy.

__