Baltic Romani: Обычный

Updated ? hours ago # views See on DCS

Лыл кэ Тито

Шэро 1

1 Павло, слуга Девлэско, и апостоло Христоско, апостоло савэс приджиндэ мануша савэн выкэдыя Дэвэл, 2 и кай тэгалёвас чачибэн сыр тэдживас пир Лэско Лав саво лыджал кэ вечно джуипэн, пал саво ракирэлас гара Дэвэл, 3 а Ёв на хохавэл, и сыр явья одова девес, то откэрдя Пэскиро Лав саво мэ лыджяв манушэнгэ, кай пхэндя мангэ амаро Спаситилё Дэвэл, 4 Титоскэ, чачунэ чавэскэ дэ патябэн: бах и миро Дэвлэстэр Дадэстэр и Иисусостэр Христостэр, амарэ Спаситилёстэр. 5 Ваш дава ачадём тут дэ Крито , кай ту тэдокэрэс буты и тэчивэс до форы пхурэдырэн пшалэн, сыр мэ тукэ прыпхэндём: 6 сыр исын одова пшал саво би дошакиро, екхэ ромняко ром, чаворэ лэстэ кандунэ, нанэ шундо пал лэндэ дылыно лав. 7 Пал дова со пхурэдыр пшал трэби тэявэл би дошакиро, сыр дэ Дэвлэскиро кхер хулай, ёв на сыкавэл холы, нанэ матимарё, на кошэлпэ манушэнса, и народэл сыр тэхохавэл манушэн, 8 нэ ёв йилэса прылэл манушэн, камэл тэкэрэл миштыпэн, патывало, годявир, чачуно, 9 пхирэл ангил Дэвлэстэр, рикирэл пэс до васта, пририкирэлпэ чачуно лав саво ракирэл, Дэвэл, соб тэявэл зор тэсыклякирэл адякэ сыр трэби манушэн, и тэвракирэл одолэн савэ на прылэн лав. 10 Дякэ сыр бут исын манушэн савэ на камэн тэ шунэн, ракирэн бут, хоханэ, бутыр сарэндыр ада иудеи обчиндэ, 11 савэнгэ трэби тэзакэрэ муй, бо ёнэ улыджян семьи Дэвлэстэр, сыклякирэн одова со на трэби, ёне закэрэн пэ дава и на ладжян. 12 Варикон лэндэр савэс ёнэ гинэн пророкоса пхэндя, со Критяни исын хоханэ, захалэ сыр джюкэла, накамэн тэкэрэ буты. 13 И ада исын чачибэн. Пал адава ракир лэнгэ надар, соб ёнэ тэпатян, 14 нашун иудейска басни и со припхэнэн мануша, савэ отгинэ чачибнастэр. 15 Кон жужо йилэса, ваш лэнгэ саро жужо, а кон джювэл до бэзэха, ваш лэнгэ саро нанэ лачо, бо лэндэ нанэ ни лачь, ни патыв. 16 Ёнэ ракирэн со джинэн Дэвлэс, нэ лэнгиро джюипэн ракирэл авир, со ёнэ на джинэн и накандэн Дэвлэс, и лачипэн лэндэ нанэ.

Шэро 2

1 А ту ракир манушэнгэ одова, со чиндо до Лав Дэвлэско, 2 соб пхурэдыр пшала тэавэн годявир, патывалэ, тэ рикирэн пэс до васта, дякэ сыр трэби тэпатян дэ Дэвлэско Лав, до камлыпэн, тэ рикирэнпэ коли лэнгэ пхаро. 3 Адякэ и пхурэдыр пхэня -- тэдживэн сыр свэнта мануша: тэ нахохавэн, тэ напрыдчурдэнпэ кэ вино, а тэсыклякирэн лачипэн 4 и тэдэн годы тэрнэнгэ пхэненгэ, соб ёнэ те камэн пэскирен ромэн и пэскирэн чаворэн, 5 тэ зрикирэн пэс, тэ накэрэн бэзэх, и тэдыкхэн пало кхер, тэавэн ковлэ, тэкандэн пэскирэн ромэн, соб ни кон тэ напхэнэл дылныпэн пэ Дэвлэскиро Лав. 6 Адякэ и тэрнэн чавэн сыклякир тэрикирэн пэс до васта. 7 Кокоро сыкав дэсаро сыр трэби тэлыджя пэс: коли сыклякирэс кэр ада адякэ соб тэявэл пир Дэвлэскиро Лав, патываса, 8 и тэавэл дэ саро лав здраво и адасаво сыр трэби, соб одова кон налачэстэр тэавэл ладжякирдо, кай лэскэ тэ наявэл со тэпхэнэл пал амэндэ нисо налачо. 9 Бутярнэнгэ припхэн тэавэн кандунэ пэскирэ хулаенгэ, тэкэрэн саро сыр ёнэ камэн и тэнаобракирэнпэ лэнса, 10 тэ начорэн кэ ёнэ, нэ дякэ сыр трэби тэкэрэн буты, соб дэ саро тэявэл душло гожипэн Дэвлэско сыр сыклякирэл амэн Спасителё Дэвэл. 11 Пал одова кай явья Дэвлэскири бах, сави зракхэл сарэн манушэн 12 и сыклякирэл амэн, соб амэ тэачавас бэзэха и со камэл адава свэто и тэдживас дадэвэс годявир, правидно и дэ дар Дэвлэски 13 и тэдужакирас бах Дэвлэски, сави явэла сыго, сави Ёв сыкавэла дэ Дадэски Дэвлэскири и Христоскири слава. 14 Ёв отдыя Пэс пало амэндэ, соб тэвыкинэ амэн всарэндыр бэзэхэндэ и тэвыморэл амэн ваш Пэскэ, соб тэкэрэл амэн aвирэнса манушэнса, савэ дрыван камэн тэкэрэн лачипэн. 15 Ракир адава, прыкхар кэ дава и ракир пал дова со кэрэн нанэ дякэ, ракир надарпэ яв мурш, соб ёнэ тэкандэн тут.

Шэро 3

1 Ракир лэнгэ кай тэавэн кандунэ пэскирэ властенгэ и начальникэнгэ, соб дэ саро тэкэрэн лачипэн, 2 никонэс тэнакошен, тэявэн мирна и кротка сарэнса манушэнса. 3 Пал одова кай и амэ вариколи исыс нанэ годявир, нанэ кандунэ, на поласас нисо, кэрасас со камэласпэ и со амэнгэ чалёлас, дживасас дэ хохаибэн и дэ холы, исыс якхалэ пэ чужо, ек екхэс накамнэ тэдыкхас. 4 Нэ коли явья лачипэн и камлыпэн амарэ Спасителёско Дэвлэско, 5 Ёв зракхья амэн нанэ пал амарэ лачипэн саво амэ керасас, нэ пир Пэскири милость, вымордя амэн Свентонэ Духоса и биандя амэн нэвэ манушэнса, 6 Духоса Савэс Ёв вычюдя пэ амэнгэ через Иисусостэ Христостэ, амарэ Спасилестэ, 7 соб Лэскири милость тэзлэл амэндэр бангипэн, и соб амэ пал одова кай патяс тэявас наслидникэнса дэ вечно джюипэн. 8 Лав кадава чачё, и мэ камав, соб ту лав адава тэракирэс, соб долэ кон пятян дэ Дэвлэстэ тэавэн патывалэ дэ лачипэн саво камэн тэкэрэ, пал одова кай ада куч и трэби вашэ манушенгэ. 9 Нанэ годявир ракирибнастэр, пал кодова кон савэ родостэр и кошибэн пало законо кэ скандало, ада тукэ на треби, уджя далэстэр, ада нисо лачо надэл. 10 Мануш саво ракирэл нанэ чачё лав, екхвар авир моло лэскэ припхэн, а тэнче отджя лэстэр, 11 джин, со адасаво мануш кердяпэ налачо, кэрэл бэзэх и ёв ужэ сындякирдо кокоро дэ пэстэ. 12 Коли бичавава кэ ту Артемос и Тихикос сыгэдыр яв кэ мэ дэ Никополё, адякэ сыр мэ камав тэпролыджяв одой мразы. 13 Дык тэпролыджяс джинглэс дэ законо Зинас и Аполосос адякэ, соб лэндэ саро тэфтылэл. 14 Мэк и амарэ сыклён тэкэрэн лачипэн, соб тэподрикирэн эк экхэс сыр пхаро, соб ёне тэнадживэн йивья. 15 Приветствуют тут сарэ кон манса. Приветствуй долэн кон амэн полэл дэ пятябэн. Тэавэл сарэнса тумэнса Дэвлэскири бах. Аминь.