Лыл кэ Ти́то

Шэро 1

¹ Па́вло, слуга́ Дэвлэ́ско, и апо́столо Христо́ско, апо́столо савэ́с приджиндэ́ мануша́ савэ́н выкэдыя́ Дэвэ́л, ² и кай тэгалёва́с чачибэ́н сыр тэджива́с пир Лэ́ско Лав саво́ лыджя́л кэ ве́чно джюипэ́н, пал саво́ ракирэ́лас гара́ Дэвэ́л, ³ а Ёв на хохавэ́л, и сыр явья́ одова́ дэвэ́с, то откэрдя́ Пэ́скиро Лав саво́ мэ лыджя́в манушэ́нгэ, кай пхэндя́ ма́нгэ амаро́ Спаси́тилё Дэвэ́л, ⁴ Тито́скэ, чачюнэ́ чавэ́скэ дэ патябэ́н: бах и ми́ро Дэвлэ́стэр Дадэ́стэр и Иисусо́стэр Христо́стэр, амарэ́ Спасителёстэр. ⁵ Ваш дава́ ачадём тут дэ Кри́то, кай ту тэдокэрэ́с буты́ и тэчивэ́с до фо́ры пхурэдырэ́н пшалэ́н, сыр мэ ту́кэ прыпхэндём: ⁶ сыр исы́н одова́ пшал саво́ би доша́киро, екхэ́ ромня́ко ром, чаворэ́ лэ́стэ кандунэ́, нанэ́ шундо́ пал лэ́ндэ дылыно́ лав. ⁷ Пал дова́ со пхурэды́р пшал трэ́би тэявэ́л би доша́киро, сыр дэ Дэвлэ́скиро кхэр хула́й, ёв на сыкавэ́л холы́, нанэ́ матима́рё, на кошэ́лпэ манушэ́нса, и народэ́л сыр тэхохавэ́л манушэ́н, ⁸ нэ ёв йилэ́са прылэ́л манушэ́н, камэ́л тэкэрэ́л миштыпэ́н, патывало́, годяви́р, чачюно́, ⁹ пхирэ́л анги́л Дэвлэ́стэр, рикирэ́л пэс до васта́, пририкирэ́лпэ чачюно́ лав саво́ ракирэ́л, Дэвэ́л, соб тэявэ́л зор тэсыклякирэ́л адя́кэ сыр трэ́би манушэ́н, и тэвракирэ́л одолэ́н савэ́ на прылэ́н лав. ¹⁰ Дя́кэ сыр бут исы́н манушэ́н савэ́ на камэ́н тэшунэ́н, ракирэ́н бут, хоханэ́, буты́р сарэ́ндыр ада́ иуде́и обчиндэ́, ¹¹ савэ́нгэ трэ́би тэзакэрэ́ муй, бо ёнэ́ улыджя́н се́мьи Дэвлэ́стэр, сыклякирэ́н одова́ со на трэ́би, ёнэ́ закэрэ́н пэ дава́ и на ладжя́н. ¹² Варико́н лэ́ндэр савэ́с ёнэ́ гинэ́н пророко́са пхэндя́, со Критя́ни исы́н хоханэ́, захалэ́ сыр джюкэла́, накамэ́н тэкэрэ́ буты́. ¹³ И ада́ исы́н чачибэ́н. Пал адава́ ра́кир лэ́нгэ на́дар, соб ёнэ́ тэпатя́н, ¹⁴ на́шун иуде́йска ба́сни и со припхэнэ́н мануша́, савэ́ отгинэ́ чачибнастэ́р. ¹⁵ Кон жужо́ йилэ́са, ваш лэ́нгэ саро́ жужо́, а кон джювэ́л до бэзэха́, ваш лэ́нгэ саро́ нанэ́ лачо́, бо лэ́ндэ нанэ́ ни лач, ни паты́в. ¹⁶ Ёнэ́ ракирэ́н со джинэ́н Дэвлэ́с, нэ лэ́нгиро джюипэ́н ракирэ́л ави́р, со ёнэ́ на джинэ́н и накандэ́н Дэвлэ́с, и лачипэ́н лэ́ндэ нанэ́.

Шэро 2

¹ А ту ра́кир манушэ́нгэ одова́, со чиндо́ до Лав Дэвлэ́ско, ² соб пхурэды́р пшала́ тэавэ́н годяви́р, патывалэ́, тэрикирэ́н пэс до васта́, дя́кэ сыр трэ́би тэпатя́н дэ Дэвлэ́ско Лав, до камлыпэ́н, тэрикирэ́нпэ коли́ лэ́нгэ пхаро́. ³ Адя́кэ и пхурэды́р пхэня́ — тэдживэ́н сыр свэ́нта мануша́: тэна́хохавэн, тэна́прыдчюрдэнпэ кэ ви́но, а тэсыклякирэ́н лачипэ́н ⁴ и тэдэ́н годы́ тэрнэнгэ́ пхэненгэ́, соб ёнэ́ тэкамэ́н пэ́скирэн ромэ́н и пэ́скирэн чаворэ́н, ⁵ тэзрикирэ́н пэс, тэна́кэрэн бэзэ́х, и тэдыкхэ́н пало́ кхэр, тэавэ́н ковлэ́, тэкандэ́н пэ́скирэн ромэ́н, соб ни кон тэна́пхэнэл дылныпэ́н пэ Дэвлэ́скиро Лав. ⁶ Адя́кэ и тэрнэ́н чавэ́н сыкля́кир тэрикирэ́н пэс до васта́. ⁷ Кокоро́ сыка́в дэсаро́ сыр трэ́би тэлыджя́ пэс: коли́ сыклякирэ́с кэр ада́ адя́кэ, соб тэявэ́л пир Дэвлэ́скиро Лав, патыва́са, ⁸ и тэавэ́л дэ саро́ лав здра́во и ада́саво сыр трэ́би, соб одова́ кон на́лачэстэр тэавэ́л ладжя́кирдо, кай лэ́скэ тэнаявэл со тэпхэнэ́л пал амэ́ндэ нисо́ на́лачо. ⁹ Бутярнэ́нгэ припхэ́н тэавэ́н кандунэ́ пэ́скирэ хулае́нгэ, тэкэрэ́н саро́ сыр ёнэ́ камэ́н и тэна́обракирэнпэ лэ́нса, ¹⁰ тэна́чорэн кэ ёнэ́, нэ дя́кэ сыр трэ́би тэкэрэ́н буты́, соб дэ саро́ тэявэ́л душло́ гожипэ́н Дэвлэ́ско сыр сыклякирэ́л амэ́н Спасителё Дэвэ́л. ¹¹ Пал одова́ кай явья́ Дэвлэ́скири бах, сави́ зракхэ́л сарэ́н манушэ́н ¹² и сыклякирэ́л амэ́н, соб амэ́ тэачава́с бэзэха́ и со камэ́л адава́ свэ́то и тэджива́с дадэвэ́с годяви́р, пра́видно и дэ дар Дэвлэ́ски ¹³ и тэдожакира́с бах Дэвлэ́ски, сави́ явэ́ла сы́го, сави́ Ёв сыкавэ́ла дэ Дадэ́ски Дэвлэ́скири и Христо́скири сла́ва. ¹⁴ Ёв отдыя́ Пэс пало́ амэ́ндэ, соб тэвыкинэ́ амэ́н всарэ́ндыр бэзэхэ́ндэ и тэвыморэ́л амэ́н ваш Пэ́скэ, соб тэкэрэ́л амэ́н авирэ́нса манушэ́нса, савэ́ дрыва́н камэ́н тэкэрэ́н лачипэ́н. ¹⁵ Ра́кир адава́, прыкха́р кэ дава́ и ра́кир пал дова́ со кэрэ́н нанэ́ дя́кэ, ра́кир на́дарпэ яв мурш, соб ёнэ́ тэкандэ́н тут.

Шэро 3

¹ Ра́кир лэ́нгэ кай тэавэ́н кандунэ́ пэ́скирэ власте́нгэ и начальникэ́нгэ, соб дэ саро́ тэкэрэ́н лачипэ́н, ² никонэ́с тэна́кошэн, тэявэ́н ми́рна и кро́тка сарэ́нса манушэ́нса. ³ Пал одова́ кай и амэ́ варико́ли исы́с нанэ́ годяви́р, нанэ́ кандунэ́, на пола́сас нисо́, кэра́сас со камэ́ласпэ и со амэ́нгэ чялёлас, джива́сас дэ хохаибэ́н и дэ холы́, исы́с якхалэ́ пэ чю́жо, ек екхэ́с накамнэ́ тэдыкха́с. ⁴ Нэ коли́ явья́ лачипэ́н и камлыпэ́н амарэ́ Спасителёско Дэвлэ́ско, ⁵ Ёв зракхья́ амэ́н нанэ́ пал амарэ́ лачипэ́н саво́ амэ́ кэра́сас, нэ пир Пэ́скири ми́лость, вымордя́ амэ́н Свэнтонэ́ Духо́са и биандя́ амэ́н нэвэ́ манушэ́нса, ⁶ Духо́са Савэ́с Ёв вычюдя́ пэ амэ́нгэ че́рез Иисусо́стэ Христо́стэ, амарэ́ Спасителёстэ, ⁷ соб Лэ́скири ми́лость тэзлэ́л амэ́ндэр бангипэ́н, и соб амэ́ пал одова́ кай патя́с тэява́с наследникэ́нса дэ ве́чно джюипэ́н. ⁸ Лав кадава́ чачё, и мэ кама́в, соб ту лав адава́ тэракирэ́с, соб долэ́ кон пятя́н дэ Дэвлэ́стэ тэавэ́н патывалэ́ дэ лачипэ́н саво́ камэ́н тэкэрэ́, пал одова́ кай ада́ куч и трэ́би ва́шэ манушэ́нгэ. ⁹ Нанэ́ годяви́р ракирибна́стэр, пал кодова́ кон савэ́ родо́стэр и кошибэ́н пало́ зако́но кэ сканда́ло, ада́ ту́кэ на трэ́би, уджя́ далэ́стэр, ада́ нисо́ лачо́ надэ́л. ¹⁰ Ману́ш саво́ ракирэ́л нанэ́ чачё лав, е́кхвар ави́р мо́ло лэ́скэ припхэ́н, а тэ́нче отджя́ лэ́стэр, ¹¹ джи́н, со адасаво ману́ш кэрдя́пэ на́лачо, кэрэ́л бэзэ́х и ёв ужэ́ сындякирдо́ кокоро́ дэ пэ́стэ. ¹² Коли́ бичава́ва кэ ту Артемо́с и Тихико́с сыгэды́р яв кэ мэ дэ Ни́кополё, адя́кэ сыр мэ кама́в тэпролыджя́в одо́й мра́зы. ¹³ Дык тэпролыджя́с джинглэ́с дэ зако́но Зина́с и Аполосо́с адя́кэ, соб лэ́ндэ саро́ тэфтылэ́л. ¹⁴ Мэк и амарэ́ сыклён тэкэрэ́н лачипэ́н, соб тэподрикирэ́н ек екхэ́с сыр пхаро́, соб ёнэ́ тэна́дживэн йивья́. ¹⁵ Приве́тствуют тут сарэ́ кон ма́нса. Приве́тствуй долэ́н кон амэ́н полэ́л дэ пятябэ́н. Тэавэ́л сарэ́нса тумэ́нса Дэвлэ́скири бах. Ами́нь.