Chandano
Chapter 11
1 Lino umwi mwalumi walikutegwa Lazalo wakalikuchiswa. Wakali kuzwa ku Bbetani, igunzi mwakali kukkala Meli a amuchizi wakwe Maata. 2 Meli nguwe oyo iwakananika Mwami amuunde akumusinda mawulu akwe amasusu, ngula mukulana Lazalo wakachisidwe. 3 Bachizi bakananizya mulumbe kuli Jesu kabaamba kuti, 'Mwami, Langa, ooyo ngoyandisya wachiswa.'' 4 Jesu nakamvwa eezi, wakati, ''Óku kuchiswa tekwakufwa pe, pesi nkwabulemu bwa Leza kuti akonzye kulemekwa kuli nzizyo.'' 5 Lino Jesu wakali kuyandisya Maata, mwanike wakwe, a Lazalo. 6 Nakamvwa kuti Lazalo wachiswa, Jesu wakakkala kwamazuba aabili lubo kubusena oobo nkwakabede. 7 Mpawo nikwakiinda eezi, wakati kuli basikwiiya bakwe, ''Tubwede lubo ku Judiya.'' 8 Basikwiya bakati kuli nguwe, ''Muyiisyi, lino lino bama Juda balokwezezya kuti bakutulule alimwi uyanda kubweda luubo?'' 9 Jesu wakavwila, ''Taakuli mahoola alikkumi aabili na amumuuni mubuzuba bumwi? Na umwi weenda izuba kaliliwo, takonzyi pe kuti aligubbule, nkambo unobona amumuni wenyika. 10 Nikuba boobo, kuti weenda mansiku, ulawaa nkambo mudima tuli anguwe.'' 11 Wakaamba zintu ezi, nakamana kwamba ezi, wakati kuli mbabo, imuzyalwama Lazalo ulookona, pesi njankuko kuchitila kuti nkamubusye kuzwa mukoona.'' 12 Basikwiya mpawo bakati kuli nguwe, ''Mwaami na kali ulokoona, ulabuka.'' 13 Lino Jesu wakalaambide akufwa kwakwe, pesi bakayeya aanga wakali kwambula akoona kwakulyokezya. 14 Mpawo Jesu wakabambila kanzambwenene kuti, ''Lazalo wafwa. 15 Ndabotelwa, nkambo kandinywe, kuti tendaliwope pe kuchitila kuti musyome. Twende kulinguwe. 16 Tomasi, ooyo walikwitwa kuti Didimasi, wakati kuli basikwiyanyina ''Twiinke andiswe kuchitila kuti tukafwe a Jesu.'' 17 Nakasika Jesu wakajana kuti Lazalo wakali mukabanda kwamazuba aane. 18 Lino Bbeteli yakali afwifwi a Jelusalema, mweelwe walikusika kumamayila obile. 19 Bama Juda biingi bakalizide kuli Maata a Meli, kuzobaambulizya atala amuchizi wabo. 20 Eelyo Maata, nakamvwa kuti Jesu wasika, wakayinka wakuswanana awe, pesi Meli wakali kkede mungánda. 21 Mpawo Maata wakati kuli Jesu, ''Mwami, aanoli wakaliwo, mukulana wangu tayinofwa pe. 22 Nikuba lino, ndilizi kuti kufumbwa nchokumbila kuli Leza, ulakupa. 23 Jesu wakati kulinguwe, ''Mukulana wako ulabuka lubo.'' 24 Maata wakati kulinguwe, ''Ndizi kuti ulabuka lubo kububuke muzuba lyakumamanino.'' 25 Jesu wakati kulinguwe, ''Ndendime bubuke abuumi, Ooyo uusyoma mulindime nikuba kuti wafwa, uyopona; 26 alimwi kufumbwa oyo upona akusyoma mulindime takoyofwa pe. Ulazisyoma na eezi ?'' 27 Wakati kulinguwe, ''Iyii, Mwami, ndilasyoma kuli nduwe Kkilisito, Mwana wa Leza, ooyo utazosike munyika.'' 28 Naakamba ezi wakazwa waya kukwita Meli chakusisilikizya. Wakati, ''Muyiisyi ulaano alubo ulokukwiita.'' 29 Mpakamvwa ezi, wakanyampuka achakufwambana akwinka kulinguwe. 30 Li no Jesu takalina kusika pe mumunzi pesi wakachili kubusena ooko Maata nkwakamuswene. 31 Mpawo awo ba Juda, bakalanguwe mungánda bakali kumumbulizya nibakabona Meli kanyampuka chakufwambana kaaya aanze bakamutobela kabayeeya aanga wakali kuya kuchuumbwe kukuyolila. 32 Meli nakasika abusena aawo Jesu mpakabede akumubona wakawida kundyato zyakwe akwamba kuti, ''Mwami aanoli walaano, Mukulana wangu natafwide pe.'' 33 Jesu nakamubona kalila, abaJuda mbakazide aabo kabalila, wakeetelela, wakatazikana akujatwa mumoyo wakwe. 34 Wakati, ''nkokuli nkumwakakumulazika?'' Bakati kuli nguwe, ''Mwami, boola uzobone.'' 35 Jesu wakalila. 36 Mpawo ba Juda bakati, ''Boona kuti Lazalo walikumuyanda biyeni!'' 37 Pesi bamwi baabo bakaamba kuti, ''Talikukonzya na ooyu mwalumi wakajula meso amuntu moofu, kuchitila kuti ooyu muntu atafwi?'' 38 Mpawo Jesu, kachizwide kukatazikana mulinguwe, wakayinka kuchuumbwe. Lino chumbwe yakali mpako, nkabela kwakasinkidwe ibbwe mpawo. 39 Jesu wakati, ''Mugwisye ibbwe, ''Maata muchizi wa Lazalo, ooyo iwakafwide wakati kuli Jesu, ''Mwami, kuli eechi chiindi mubili unoli wabola, nkambo waba amazuba aane kafwide. 40 Jesu wakati kulinguwe, ''Tendakwambila na kuti,wasyoma ulabona bulemu bwa Leza?'' 41 Mpawo bakagwisya ibbwe balibikka kumbali. Jesu wakalanga kujulu akwamba kuti, ''Taata, ndakulumba kuti wandiswilizya. 42 Ndalizi kuti ulandiswilizya chiindi choonse, pesi nkambo kankamu yabantu bayimvwi akati kangu nchindamba eezi, kuchitila kuti basyome kuli nduwe nuwakandituma.'' 43 Nakamana kwambula ezi, wakawompolola ajwi lilaajulu, ''Lazalo, zwida aanze!'' 44 Mwalumi wakafwide wakazwida aanze, mawulu akwe amaboko akali zambilidwe asila. Jesu wakati kuli mbabo, ''Amumuzambanune mumuleke ayeende.'' 45 Mpawo bamaJuda biingi bakazide kuli Meli akubona ezyo Jesu nzyakachita, bakasyoma mulinguwe; 46 pesi bamwi baabo bakaya kuba Falisi bakubabuzya izintu Jesu nzyakali wachita. 47 Mpawo bapati babapayizi abaFalisi bakabungania bwendelezi amwi akwamba kuti, ''Niinzi nchitutachite? Ooyu mwalumi uchita zitondezyo zyiingi. 48 Kuti tumusiye alikke kali boobu, boonse balasyoma kuli nguwe; ma Loma balaza akututolela busena bwesu achisi chesu.'' 49 Nikuba oobo, umwi mwalumi akati kabo, Kkeyifasi, wakali mupayizi mupati ooyo munyaka, wakati kuli mbabo, Taakwe nchimuzi pe. 50 Tamulangisisyi na kuti nchibotu kuli ndinywe kuti kufwe umwi muntu kafwida bantu kwinda kuti nyika yoonse ifwidilile.'' 51 Lino eechi wakachaamba kachitazwide mulinguwe anukuti wakali mupayizi mupati oyo munyaka, wakasinsima kuti Jesu welede kufwida nyika; 52 kutali chisi luzutu, pesi kuchitila kuti baana baLeza abo basanseene babunganisigwe aamwi babe umwi. 53 Mpawo kuzwa eelyo izuba kaziya kunembo bakalangula inzila yakuti Jesu bamujaye. 54 Jesu takachili kweenda antanganana pe akati kaba Juda, pesi wakeenda wazwa waya kuli imwi inyika afwifwi akunkaanda mudolopo litegwa Efulemu. Nkuko nkwakakkala abasikwiiya bakwe. 55 Lino ipasika lyabama Juda lyakali lyaba afwifwi, mpawo biingi bakaya ku Jelusalema kabazwa kuzisi bayinka kuti bakalisalazye beni. 56 Bakali kuyandula Jesu, kabalo kwambula umwi awumwi kabayimvwi muchikombelo, ''Muyeyayi loko? kuti ulaleka kusika kupobwe?'' 57 Lino bapayizi bapati aba Falisi bakali bapa malayilile akuti kufumbwa muntu unoli ulizi ooko Jesu nkwanobede, uyelede kuzyamba kuchitila kuti bamujate.
Chapter 17
1 Jesu nakamana kwamba zintu eezi, wakatambya meso akwe kumajulu akwamba kuti, ''Taata, chiindi chasika, mupe bulemu Mwanaako kuchitila kuti alakwe Mwana akupe bulemu - 2 mbuli mbwakamupa bwendelezi atala ailengwa zyoonse kuchitila kuti azope buumi butamani kuli woonse ooyo ngwakapa kuli nguwe. 3 Mbuli ibuumi butamani kuti bakuzibe, nduwe Leza wakasimpe, akuli nguwe ooyo ngwakatuma, Jesu Kkilisito. 4 Ndakakupa bulemu anyika. Ndakamaninsya mulimo oyo nguwakandipa kuti nguuchite. 5 Lino, Taata, kondilemya antomwe ayebo abulemu obo mbendali kujusi nkechili ayebo, inyika kitanaanzwa. 6 Ndakayubununa izina lyako kubantu aabo mbwakandipa kuzwa kunyika. Bakali bako, wakabapeda kuli ndime bakabamba ijwi lyako. 7 Lino bakaziba kuti zyoonse eezyo nzwakandipa zizwa kuli nduwe, 8 Nkambo ndakabapa woonse majwi ayo ngwakandipa. Bakaatambula mpawo akuziba bwini bwakuti ndakazwa kuli nduwe mpawo bakasyoma kuti wakandituma. 9 Ndabakombela. Nsikombeli banyika pe pesi aabo mbwakandipa nkambo mbibako. 10 Choonse eecho changu nchichaako mpawo chako nchichangu mpawo mpegwa bulemu mulimbabo. 11 Nsichili munyika, pesi aaba bantu balimunyika, mpawo ndikuza kuli nduwe. Taata Uusalala, babambe muzina lyako elyo nduwe wakandipa kuchitila kuti babe bamwi mbuli mbutuli bamwi. 12 Nindakachili ambabo, ndakabambide kabotu muzina lyako, eelyo ndwakandipa. Ndakaba kwabilila, mpawo takwe nikuba umwi wakanyonyoka, kusiya mwana wabajayi, kuchitila malembe kuti azuzikizigwe. 13 Lino ndaboola kulinduwe, pesi ndikwamba zintu eezi munyika kuchitila kuti lukondo lwangu luzozuzikizigwe muli mbabo. 14 Ndakabapa ijwi lyako, mpwao nyika yakabasula nkambo tabali benyika eeyi, mbuuli mbuntali wenyika. 15 Nsilokukumbila kuli nduwe kuti ubagwisye munyika, pesi kuti babambwe kabotu kulibaabo batalomene. 16 Tembanyika pe mbuli mbentali wenyika ambebo. 17 Mubaanzanisye kwinda kukasimpe. Ijwi lyako ndayakasimpe. 18 Mbuli mbowakandituma munyika ndabatuma ambebo munyika. 19 Akambo kambabo, ndalibamba lwangu kuchitila kuti abalabo babambwe mukasimpe. 20 Nsikombeli aaba luzutu pe, pesi abaabo batakasyome mulindime kwinda kujwi lyaako 21 Kuchitila kuti boonse bakabe umwi mbuli nduwe. Taata mbuli muli ndime, andime ndimuli nduwe. Aabalabo abaabe muli ndiswe kuchitila kuti inyika ikasyome kuti nduwe nuwakandituma. 22 Ibulemu oobo mbuwakandipa, ndakabupa kuli mbabo, kuchitila kuti babe uumwi, mbuli mbundi umwi. 23 Ime muli mbabo, mpawo iwe muli ndime - kuti mpobazulila mulukamantano, kuti inyika izibe kuti wakandituma akuti wakabayanda mbuli mbuwakayanda ndime. 24 Taata, njanda aabo mbwakandipa kuti baabe andime ooko nkuumbede, mpawo akubona bulemu mbwakandipa nkambo wakandiyanda intalisyo yenyika kitana kubambwa. 25 Taata ululeme, inyika teyaka kwizi pe, pesi mebo ndakali kwizi, mpawo aaba balizi kuti wakandituma. 26 Ndakachita kuti izina lyako lizibinkane kuli mbabo, nkabela ndichiyolizibya kuchitila kuti luyando ndwakandiyanda aalo lukabe muli mbabo, mpawo nooli muli mbabo.''
Chapter 18
1 Jesu nakamana kwambula majwi aaya, wakainka kuli aanze abasikwiiya bakwe kuli bumwi busena mumusena wa Kkidiloni, oko kwakali chilili mwakakunjila abasikwiya bakwe. 2 Lino Judasi ooyo wakali sikuyo mwaba, alakwe wakalibwizi busenobu nkambo Jesu wakali kuswanana absikwiya bakwe nkuko. 3 Mpawo Judasi wakazulwida inkamu yabasilumamba abamwi bendelezi bazwa kubapayizi bapati akubaFalisi, abasizyuno, bakayinka nkukoko amalampi, azimunisyo, azilwanisyo. 4 Mpawo Jesu, iwakazi zyoonse zintu ezyo zyakali kuyochitika kulinguwe, wakaya kunembo wababuzya kuti, ''Ngwani ngomulokuyanduula ?'' 5 Bakamusandula, ''Jesu waku Nazaleta.'' Jesu wakati ndamwambila kuti, ''Ndime.'' Judasi ooyo wakamuzya wakaliimvwi abasiliumamba. 6 Nakaamba kuli mbabo kuti, ''Ndime,'' bakabwedela musule bawidaansi. 7 Wakababuzya lubo, ''Ngwani ngomulokuyanduula?'' Lubo bakindulula bati, ''Jesu waku Nazaleta.'' 8 Jesu wakasandula, ''Ndamubuzya kuti ndime. Na kamulokuyandula ndime, amubaleke aaba beende.'' 9 Ezi zyakachitika kuti ijwi ndyakaamba lizuzikizigwe: ''kuti kulibaabo mbwaakandipa takwe ngundakasowa pe.'' 10 Alimwi Sayimoni Pita, wakali akafulo, wakakasomona wagonka mulanda wamupayizi mupati wamugonka kutwi kwakuchilisyo. Lino izina lyamulanda oyu wakali Malukkasi. 11 Jesu wakati kuli Pita, ''Bweedezya ikafulo munkomo. Nsyelede kunywa muchinywido eecho Taata nchaakandipa mebo ?'' 12 Awo inkamu yabasilumamba amupati wabo, ababelesi babaJuda, bakajata Jesu akumwaanga. 13 Kutanguna bakamutola kuli Aanasi, nkambo wakali yisizyala wa Kkefasi, wakali mupayizi mupati munyokoyo. 14 Lino Kkefasi wakali nguwe wakapede lulayo kubaJuda kuti nichali chibotu kuti umwi muntu afwide bantu boonse. 15 Sayimoni Pita wakatobela Jesu, alimwi awumwi sikwiiya. Lino ooyu sikwiiya wakazibinkene kubapayizi bapati, aboobo wakanjila a Jesu munkuta yabapayizi bapati. 16 Pesi Pita wakaliimvwi amulyango kalaanze, mpawo umwi sikwiya, wakazibinkene kubapayizi bapati, wakazwa aanze kuyowambuula abalinda amulyango, mpawo wakanjizya Pita mukati. 17 Mpawo mulanda wachikayintu, wakalikubamba amulyango, wakabuzya Pita kuti, ''Tooli umwi wabaabo basikwiiya bayooyu mwalumi na, wakasikuti, ''teensi ndime pe.'' 18 Lino balanda abasikubeleka muwofesi bakalimvwi awo, nkabela bakali bakutilizya mulilo nkambo kwakali kutontola, bakali kuyota. Pita ambabo kayimvwi kalikuyota alakwe. 19 Mupayizi mupati wakabuzya Jesu aatala abasikwiiya bakwe anjiisyo yakwe. 20 Jesu wakamusandula, ''Ndakambuula entanganana kunyika. Choonse chiindi ndakali kuyiisya muzitumba amuzikombelo akoko baJuda nkubakali kuswanana. Taakwe pe nchindakaamba mukusisikizya. 21 Nkambonzi nimundibuzya? Kabuzye kuli bakandimvwa ataala azezyo nzindakaamba. Boona, aaba bantu balizizi nzindakaamba.'' 22 Jesu nakamana kwamba eezi, umwi wababelesi wakayimvwi wakawuma Jesu wati, ''Mbubo na mboyelede kusandula mupayizi mupati ?'' 23 Jesu wakatikuli nguwe, ''kuti nkendi ndaambula bubi, paa bukamboni atala abubi, pesi kuti kakuli kabotu, unduuminayi? 24 Mpawo Aanasi wakamutola kaangidwe kuli Kkayifasi mupayizi mupati. 25 Lino Sayimoni Pita wakalimvwi kayoota mulilo. Bantu bakati kulinguwe, ''Sena tenduwe umwi wabasikwiiya bakwe na? Wakakaka akwamba kuti, ''Tensindime pe.'' 26 Umwi wabalanda bamupayizi mupati, wakali munyina wamwalumi ulakutwi Pita nkwakagonkede, wakati, ''Tooli nduwe na ngundakabwene muchilili anguwe ?'' 27 Mpawo Pita wakakaka lubo, mpawo mukuku wakakokolika. 28 Eelyo bakatola Jesu kuzwa kuli Kkayifasi kuya kukubetekwa. Kwakachili kuseni loko, nkabela tebakanjila pe mubbetekelo kuchitila kuti tabasofwazigwi pe pesi bakakonzye kulya pasika. 29 Awo Pilato wakazwa aanze waya kuli mbaboo wasikuti, ''Nguuli mulandu ngumweeta ayoyu mwalumi ?'' 30 Bakasandula kabati kulinguwe, ''Aanoli ooyu mwalumi tesimuchita zibi, Tetwayinomweeta kuli nduwe pe.'' 31 Mpawawo Pilato wakati kulimbabo, ''mumutole ndinywe, akuyomubeteka kwinda mumulawu wanu.'' MaJuda bakati kulinguwe, ''Tachili mumulawu pe kulindiswe kubikka kufumbwa umwi muntu kulufu.'' 32 Bakaamba ezi kuchitila kuti ijwi lya Jesu lizuzikizigwe eelyo ndyakaamba kutoondezya atala amusyobo walufu ndwayizofwa. 33 Mpawo Pilato wakanjila mungánda yakubetekela lubo wayita Jesu wamubuzya kuti, ''Nduwe Mwami waba Juda na?'' 34 Jesu wakasandula, ''Ulokulyambwida na, nakuti kuli bamwi bakambula atala andime kuli nduwe?'' 35 Pilato wakasandula, ''Nsili muJuda pe me, ndinguwe na? Bantu bako abapayizi bapati bakupeda kuli ndime. Niinzi nchiwachita?'' 36 Jesu wakasndula, ''Bwami bwangu tabuli bweenyika eeyi pe. Aanoli bwami bwangu bwali bwachimwi chipanzi chenyika eeyi, balanda bangu bayinokulwana kuchitila kuti nkindeka kwabwa kuba Juda. Pesi lino bwami bwangu tabuzwidi aano pe. 37 Pilato wakati kulinguwe, ''Uli mwami na?'' Jesu wakamusandula , ''wamba kuti ndimwami. Kuuli aya makanze ndakazyaligwa, akuli aya makanze ndakasika munyika, kuti ngaambe bukamboni mukasimpe. Woonse ooyo uuli mukasimpe ulaswilizya kujwi lyaangu.'' 38 Pilato wakati kulinguwe, ''niinzi kasimpe?'' Ndakazwa kwaamba eezi, wakayinka kumaJuda wamba kuli mbabo, Takwe mulandu pe ngundajana mumwalumi ooyu. 39 Pesi mulachiyanza chakuti ndiwangunune umwi muntu kuli ndinywe apasika. Aabobo mulayandana kuti ndimulekezezye mwami waba Juda ?'' 40 Mpawo bakoompolola lubo akwamba kuti, pepe oyu mwalumi, pesi Bbalabbasi.'' Lino oyu Bbalabbasi wakaali mubbi.
Chapter 19
1 Mpawo Pilato wakatola Jesu akuyomunabba. 2 Basilumamba bakalunda ingowani yamamvwa. Bakayibikka amutwe waJesu bamuzwatika asila lyamusyobo wantuumbula. 3 Bakasika kulinguwe basikuti, wabonwa, ''Mwami waba Juda!'' mpawo basikumuma. 4 Pilato wakabbuda aanze lubo wasikuti kulimbabo, ''Mubone, ndikumweeta anze kulindinywe kuchitila kuti muzibe kuti nsijene mulandu pe aalinguwe.'' 5 Awo Jesu wakabbuda aanze, kazweete musini wamamvwa asiila lyachikobela chamusyobo wantumbula. Pilato wakati kulimbabo, ''Mubone ngooyu mwalumi!'' 6 Mpawo awo bapayizi bapati ababelesi nibakabona Jesu, bakoompololesya bati, ''Aababmbulwe, abambulwe!'' Pilato wakati kuli mbabo, ''Mumutole ndinywe mukamubambule nkambo nsijene mulandu pe kulinguwe.'' 7 Ba Juda bakamusandula, ''Tulijisi mulawu, alubo kwinda mumulawu oyoo, welede kufwa nkambo wakali kulyaamba kuti Mwana waLeza.'' 8 Aawo Pilato nakamvwa nkani eeyi, wakayoweesya loko. 9 Wakanjila mungánda yakubetekela lubo wati kuli Jesu, ''Uuzwa kuli? Pesi Jesu takwakasandula pe. 10 Mpawo Pilato wakati kulinguwe, ''Towambuli na kulindime?'' Toozi na kuti ndilenguzu zyakukwangununa aanguzu zyakukubambula? 11 Jesu wakamusandula, ''Tojisi pe kupanguzu alindime kusiya eecho nchiwakapegwa kuzwa kujulu, nikuba oobo, ooyo wandipedya kuli nduwe ulaachibi chipati.'' 12 Kunsandulo eeyi, Pilato wakeezya kumwangununa pesi bama Juda bakawompoolola kabati, ''kuti wangununa mwalumi ooyu, ''Tooli muzolwani wa Siza. Woonse ulichita mwami uuwambula ataala a Siza. 13 Pilato nakamvwa makani aaya wakeeta Jesu aanze wakkala aachuno chakubetekela mubusena bwiitwa kuti ''Ibbuwa lyamabwe,'' pesi mumulaka wachi Hibbulu, ni ''Gabbata.'' 14 Lino lyakali izuba lyakubambililwa kwapasika, chiindi chamahola aali musanu alimwi. Pilato wakati kuba Juda, ''Mulange ngoyu mwami wenu!'' 15 Bakawompolola, ''Kuule anguwe, kule anguwe,'''Abambulwe!'' Pilato wakati kuli mbabo, ''Mubambule na mwami wenu?'' Bapayizi bapati bakasandula, ''Tatukwe mwami pe, pesi Siiza.'' 16 Mpawo Pilato wakapedekezya Jesu kuli mbabo kuti abambuulwe. 17 Mpawo bakatola Jesu, bayinka aanze, kalibwezelede chiingano, kubusena butegwa ''Kaanza,'' chiitwa kuti ''Gologota.'' mumulaka wachi Giliki. 18 Bakamubambula Jesu nkuko, antomwe abamwi baalumi babili umwi kuli eeli bbazu, umwi kuli eeli, Jesu kali akati. 19 Pilato wakalemba chitondezyo wachibika achiingano. Chakalembedwe obu: JESU, MWAMI WABA JUDA. 20 BaJuda biingi bakalikuchibala chitondezyo eechi nkambo busena Jesu nkwakabambwidwe bwakali afwifwi adolopo. Chitondezyo chakalembedwe mumilaka eyi, chi Hibbulu, Latini, antomwe amuchi Giliki. 21 Eelyo bapayizi bapati babaJuda bakati kuli Pilato, ''Utalembi kuti, ''Mwami wabaJuda, pesi utedi, ''Ooyu uulyamba kuti , ''Ndimwami wabamaJuda.'''' 22 Pilato wakasandula kuti nzindalemba, ndalemba.'' 23 Basilumamba nibakabambula Jesu, bakatola zisamo zyakwe, bazyabana akati kabo muzibeela zyoone, kuti baabane umwi awumwi, achilacho chibaki. Lino chibaki chakali abusumyo buumwi kuzwida ajulu. 24 Mpawo bakati kuli umwi awumwi, ''Tatuchideluli pe, pesi aatusonde kuchitila kuti chilyaambe kuti chilaaba chani. Eechi chakachitika kuchitila kuti malembe azuzikizigwe awamba kuti, ''Bakaabana zikobela zyangu akati kaabo akusonda zisamo zyangu. Eezi nzibakachita basilumamba.'' 25 Lino ibakayimvwi afwifwi achiingano cha Jesu, kwakali banyina Jesu, kwakali mukulana wabanyina, Meli muka Kkilopasi, a Meli Magadalina. Aaba bamakayintu bakalimvwi afwifwi achiingano cha Jesu. 26 Jesu nakabona banyina asikwiiya ooyo ngwakali kuyandisya kabimvwi afwifwi, wakati kuli banyina, ''Yomwanakazi, ''Langa, mwanako!'' 27 Mpawo wakati kuli sikwiiya, ''Langa banyoko.'' Kuzwa kuchiindi echo sikwiya wakabatola banyina kungánda yakwe. 28 Nikwakayinda ezi Jesu, nkambo wakaziba kuti zyonse lino zyakali zyamana, akuchitila kuti malembe ayelede kuzuzikizigwa, Jesu wakati, ''Ndaaba enyota'' 29 Chibikilo chakazwide wayini upanyuka chakaliwo, mpawo bakabika akasamu kakaangidwe chisana chakazwide wayini upanyuka bamutambikizya amulomo wakwe. 30 Jesu nakanywa wayini upanyuka wakati ''Kwamana.'' wakalanzya mutwe aansi akupedya muuya wakwe. 31 Mpawo baJuda, akambo kakuti lyakali izuba lyakulibambila, akuti mibili teyakali kuchaala aachingano kuchindi chasabata ( elyo Sabata yakali mpati loko), bakakumbila Pilato kuti atyole mawulu aabo akubagwisya. 32 Mpawo basilumamba bakasika akutyola mawulu amwalumi wakutanguna awabili wabo bakabambwidwe a Jesu. 33 Nibakasika kuli Jesu, bakabona kuti wakali wafwa kale, aboobo tebakamutyola pe mawulu akwe. 34 Nikuba obo, umwi wabasilumamba wakamuyasa limwi bbazu esumu, mpawo kwakazwa iganzi amaanzi. 35 Ooyo wakabona eechi wakaamba bukamboni, abukamboni bwakwe mbwakasimpe. Ulizi kuti nzyawamba ninchobeni kuchitila kuti anduwe usyome. 36 Nkambo eezi zintu zyakachitika kuchitila kuzuzikizya malembe, ''Takwe nikuba limwi fuwa lyakwe litakatyolwe.'' 37 Alubo, aamwi malembe aamba kuti, ''Bayolanga kulinguwe ooyo ngubakayasa.'' 38 Nikwakamana ezi zintu, Josefa waku Alimatiya mbuli kuti wakali sikwiiya ( pesi mukusisikizya akuyoowa baJuda) wakakukumbila kuli Pilato kuti atoole mubili waJesu, Pilato wakamuzumizya. Aboobo Josefa wakaboola akuutola mubili waJesu. 39 Nikkodimasi alakwe wakasika, nguwe wakazide kutangna kuli Jesu mansiku. Wakeeta tununkilizyo tuvwelene twamuula atwatyati, mweelwe wamuyanda umwi wampondo. 40 Mpawo bakatola mubili wa Jesu bawuvungilizya zisani zituba atununkilizyo mbuli muchaanza chaba maJuda kukuvwikka mubili. 41 Lino mubusena mwakabambwidwe kwakali chilili, omu muchilili mwakali kabanda kakatalina kulazikwa muntu naba umwi pe. 42 Nkambo kakuti lyakali izuba lyakuli bambilila lyabama Juda alimwi akambo kakuti kabanda kakali afwifwi, bakamulazika mumo Jesu.
