21. Messiah Lámlu naTaishong Dzongkham
Aphang ajangna, Taishong raq ummangtaq Messiah ikaimá. Mángkhúna dzonghkam thautaq ipra Adam nai a Eve lumaq Messiah ikai chhing. Taishong dzongkham taq ipra Eve phán va achhangvan lum ipra raq poutám khúpo ihin vánlot, pou raq Eve má lautaq ipra satan. Dzongkham ngaulaq ipra Messiah raq satan thúmla atángvan.
Taishong dzongkham vantaq Abraham má apaiq lumaq múngkáng maiqsà raq holo pra lapvan chhing. Ará holo lapvan chhing pra umrakaq akhing na Messiah thau prakaq axhúng vàng. Apaiq raq maiq tám má axhal lángna imaq múngkang va phan ipra pangh má.
Taishong dzongkham vantaq Mose má jai na ahan sammá Mose ipahim ixhung van jing ang. Ara ahan dzongkham van jektaq Messiah pra langna haúba athau akhing ashi jaina
Taishong dzongkham David hokhámva má ipra juq apaiq maiqma phánva hokhám ipahim vashiraq Taishong maiq tám thakna pattup arémvan phaú. Ipra Messiah pra David apaiq phán múngva ajáng.
Sammá Jeremiah, lumaq Taishong raq dzongkham anyal khamkuqvan taq, raú juq min Taishong raq umra ba Sinai maq Israel nuk jámna dzong kham taq pahim jángmuq. Dzongkham anyal múng prajuq, Taishong raq apaiq maiq dzin múngna shoi awaiqkuqvan, maiqtám raq maiqma múngtham maq shoi Taishong pra ashanvan, chinghaq pra apaiq maiqshoi ajángvan, ipramaq Taishong raq ching haq ngaraí axhang kuqvan. Messiah raq dzongkham ará anyal phangvan taq.
Taishong sammá raq min lé chhungtaq Messiah (ilingkítai) ipra sammá ajáng, rimva ashi, ipramaq hokhám. Sammá ashi ipra maiq haú umrátaiba Taishongdzong tailum maiqmá chhúngkítai. Pra Messiah Taishong raq ikai má dzongkham taq pra rakhakla sammá.
Israel nuk rimva raq Taishong má shomna shomkuq taq maiqraq ngarai shimtaq pra lumaq chinghaq ichamchaú chhing pra langna. Rimva raq min kechú chhaútaq Taishong jakva maiqtám langna. Pra Messiah rakhakla rimvajúng haú umrá tairaqba maiqma pim pra axhalva Taishong má shomna akuq pahim
Hokhám ashi ngaulaq ipra múngrem tai nai a múng maiqsà khaphong kítai. Messiah ngaulaq pra thukchúm kaiq hokhám hauba David hokhám bunchhing na buntai. Apaiq ipra múngkáng thúmlana pattup remvan tai, ipra maq akhingtek na axhal phongdzam kítai nai rakhaklaq ummang kítai.
Taishong sammá támraq Messiah (ilingkí tai) langna aphán aphán maq ithíchhúng thátaq. Sammá Malachi raqmin chhungthá taq Messiah mángthau níngna sammá ajúng athau phau ngaulum. Isaiah sammá raqmin ithírám taq jincha nyaulumaq Messiah pra achháng. Micah sammá raq chhúngtaq paiq pra Bethlehem Kal (Town) na achháng phoú.
Sammá Isaiah raq chhúngtaq Messiah pra Galilee na atháphaú, dzinba múngta taimá dzin ishìng kívan tai pramaq acham achaútai nai akhal abin maiqsà má dzángshon kítai. Apaiq raq ithirám jaítaq Messiah lumaq adzá tai maiq pàngxhal ixhalkuq phaú nai haú ba nabáng, mikdzok, nóngting, imaq jakóng tam then mìn ixhal.
Isaiah sammá raqmin chhúngtaq Messiah pra chhámshut ahong nabán ashaúngéng phaú pra maq raumuq ajángphaú. Ahan sammá raqmin chhúngtaq haúraqbaq Messiah pra adzat idzi pra maq akhaí ipra lapmá tar atar phaú pra maq akungtai raq paiqmá asàngphaú. Sammá Zechariah raqmin ithítaq akungtai raqbán kímsà 30 (30 silver coins) patan thang na Messiah pra asàngphaú.
Samma bíraqmin chhungtaq Messiah chhámhim ba adzaiphaú. Isaiah sammá va raqmin ithítaq maiqraq Messiah má thómaq athóphaú, ashil màlphaú, imaq abauqtak phaú . Chinghaqraq adzat idziphaú paiq má ichám chaúlum, paiq chhámlai min shutmuq him.
Pra sammá raqmin chhungtaq Messiah athuk achóm, ngarai ahong. Apaiq raq adzí khamtaq pra maiqhan tám ngarai ningkhán na. A paiq chamchaú húltaq ipra Taishong nai a maiqsà xhailna nungmi ijangmá. Ipra ningkhan na, Messiah hanngám pra binchhing ajang ngaulum Taishong va ummàng jángtaq.
Pra sammá raqmin chhungvan taq pra Messiah adzí are pramaq Taishong raq apaiq amángva isam. Messiah pra lumaq amángva ajing, Taishong raq ummang taq iprajuq shiptaq ipra maiq ngarai va pangh má pramaq thúng alai anyal phangmá.
Taishong raq sammá bi lumaq Messiah matuna pàngxhal ikhoi chhung kuqtaq, raú juqmin pra sammá tám akhingna Messiah thau muqning jángtaq. Pang sablai(400) chan jaikaú nashoi akhing khak la na, ití kuqvan taq, Taishong raq ipra Messiah Múngkáng na ikaitaq.
Asang manphan: Aphanglik 3:15; 12:1-3; Lolik 18:15; 2 Samuel 7; Jeremiah 31; Isaiah 59:16; Daniel 7; Malachi 4:5; Isaiah 7:14; Mich 5:2; Isaiah 9:1-7; 35:3-5; 61;53; Asai lik 22:18;35:19;69:4;41:9 ;Zechariah 11:12-13; Isaiah 50:6; Asai lik16:10-11