1 John

Chapter 1

¹ Ako, si Juan, misulat kaninyo mahitungod sa usa nga anaa na kaniadto sa wala pa ang bisan unsa nga mga butang! Siya mao ang usa diin kami nga mga apostoles naminaw kaniya samtang siya nagtudlo kanamo! Kami nakakita kaniya! Kami mismo mitan-aw kaniya ug nakahikap kaniya! Siya mismo ang nagtudlo kanamo sa mensahe mahitungod sa kinabuhing walay kataposan. ² (Tungod kay siya mianhi dinhi sa kalibotan ug kami nakakita kaniya, kami tin-aw nga nagmantala diha kaninyo nga ang usa nga among nakita mao ang usa nga kanunayng buhi. Uban siya kaniadto sa iyang Amahan nga atoa sa langit, apan siya mianhi aron nga magpuyo taliwala kanato.) ³ Nagmantala kami sa mensahe mahitungod kang Jesus diha kaninyo, ang usa nga among nakita ug nadungog, aron nga kamo mahimong mahiusa uban kanamo. Ang usa nga among gihiusahan mao ang Dios nga atong Amahan ug ang iyang Anak nga si Jesu-Cristo. ⁴ Ako misulat kaninyo mahitungod niining mga butanga aron nga kamo makasiguro nga kini tinuod, ug tungod niini kita hingpit nga magmalipayon. ⁵ Ang mensahe nga among nadungog gikan sa Dios ug gimantala namo diha kaninyo mao kini: Siya wala makasala. Sama siya sa masanag nga kahayag nga wala gayoy kangitngit. ⁶ Kung kita moangkon nga nahiusa na sa Dios, apan kita naglihok sa atong kinabuhi sa hugaw nga paagi, sama kana sa pagkinabuhi sa daotan ug diha sa kangitngit. Kita namakak. Kita wala nagkinabuhi sa atong kinabuhi sumala sa tinuod nga mensahe sa Dios. ⁷ Apan pagkinabuhi sa putli nga paagi, sama sa pagkinabuhi diha sa kahayag sa Dios, ingon nga ang Dios buhi sa putli nga paagi ug sa matag pamaagi. Kung buhaton nato kana, kita nagkahiusa uban sa matag-usa, ug ang Dios mipasaylo kanato ug midawat kanato tungod kay si Jesus namatay alang kanato. ⁸ Kadtong nagsulti nga sila wala gayod nakasala naglimbong sa ilang kaugalingon ug midumili sa pagtuo kung unsa ang giingon sa Dios mahitungod kanila. ⁹ Apan ang Dios kanunay magbuhat kung unsa ang iyang himoon, ug kung unsa ang iyang gibuhat kanunay nga insakto. Busa kung kita moangkon kaniya nga kita nakasala, siya mopasaylo kanato sa atong mga sala ug mopalingkawas kanato gikan sa tanan natong kasal-anan nga nabuhat. Tungod niana, kinahanglan moangkon kita kaniya nga kita nakasala. ¹⁰ Tungod kay ang Dios miingon nga ang tanan nakasala, kadtong nagsulti nga sila wala gayod nakasala, kadtong nagsulti nga ang Dios bakakon! Ilang gisalikway kung unsa ang gisulti sa Dios mahitungod kanato!

Chapter 2

¹ Kamo nga gihigugma nako sama sa akong kaugalingong mga anak, nagsulat ako niini kaninyo aron nga kamo makalikay sa pagpakasala. Apan kung si bisan kinsa kaninyo nga mga magtutuo makabuhat ug sala, hinumdomi nga si Jesu-Cristo, nga matarong, mohangyo uban sa Amahan alang kaniya aron pasayluon kita. ² Kabubut-on ni Jesu-Cristo nga gihalad ang iyang kaugalingong kinabuhi alang kanato, aron nga pinaagi niini ang Dios mopasaylo sa atong mga sala. Oo, ang Dios makahimo sa pagpasaylo sa atong mga sala, apan dili lamang kanato! Makahimo usab siya sa pagpasaylo sa mga sala sa katawhan bisan asa nga dapit! ³ Sultihan ko kamo kung unsaon nato pagsiguro nga kita nakaila sa Dios. Kung tumanon nato unsa ang iyang gimando nga atong pagabuhaton, kana mopakita kanato nga kita nahiusa uban kaniya. ⁴ Kadtong nagsulti "Nakaila kami sa Dios," ug wala motuman kung unsa ang mga mando nga ipabuhat sa Dios kanato, mga bakakon. Wala sila nagpahigayon sa ilang mga kinabuhi sumala sa tinuod nga mensahe sa Dios. ⁵ Apan kadtong nagtuman sa mando sa Dios kung unsa ang ilang buhaton mao ang katawhan nga nahigugma sa Dios sa matag paagi. Kini mao ang pagsiguro nga kita nakighiusa sa Dios. ⁶ Kung kita magsulti nga kita nahiusa sa Dios, kinahanglan magpahigayon kita sa atong mga kinabuhi sama sa gibuhat ni Cristo. ⁷ Hinigugmang mga higala, wala ako nagsulat nga kinahanglan kamo magbuhat ug bag-o. Hinuon, ako nagsulat kaninyo ug usa ka butang nga inyong nahibaloan nga buhaton sukad sa una ninyong pagtuo kang Cristo. Kini bahin sa mensahe nga kanunay ninyong nadungog. ⁸ Apan sultihan ko kamo pag-usab niining mao gihapon nga hisgutanan: ako makasulti nga ako nag-ingon kaninyo nga mobuhat ug usa ka bag-ong butang. Kini bag-o tungod sa kung unsa ang gibuhat ni Cristo kay bag-o, ug kung unsa ang inyong gibuhat bag-o. Kini tungod kay kamo mihunong sa pagbuhat ug daotan ug kamo nagbuhat ug labi pang maayo. Sama kini sa dihang ang kagabhion molabay ug ang adlaw mohayag na, ang tinuod nga adlaw ni Cristo. ⁹ Kadtong nag-angkon nga sila sama sa mga tawo nga nagpuyo sa kahayag, apan nagdumot sa ilang isigka magtutuo, nagpabilin gihapon nga sama sa mga tawo nga nagpuyo sa kangitngit. ¹⁰ Apan kadtong mga tawo nga naghigugma sa ilang isigka magtutuo nagkinabuhi sama sa mga tawo nga nagpuyo sa kahayag; wala silay katarongan aron mopakasala. ¹¹ Kadtong nagdumot sa ilang isigka magtutuo nagpabiling sama sa mga tawo nga nagkinabuhi diha sa kangitngit, wala nasayod kung unsa ang kamatuoran mahitungod sa Dios. ¹² Nagsulat ako kaninyo niini nga akong mga hinigugma ingon sa akong kaugalingon nga mga anak. Gipasaylo sa Dios ang inyong mga sala tungod sa gibuhat ni Cristo alang kaninyo. ¹³ Nagsulat ako kaninyong mga magtutuo nga hamtong kaysa uban. Nakaila na kamo kang Cristo, nga buhi kanunay. Nagsulat usab ako niini kaninyong mga bantan-on; napildi ninyo si Satanas, ang daotan. Ug nagsulat ako niini kaninyong mga bata, tungod kay kamo nakaila sa Dios nga Amahan. ¹⁴ Isulti ko kini pag-usab: Nagsulat ako niini kaninyo nga mga hamtong tungod kay kamo mianhi aron makaila kang Cristo, nga mao ang buhi sa kanunay. Ug nagsulat ako kaninyong mga batan-on, tungod kay kamo lig-on ug nagpadayon kamo sa pagtuman kung unsa ang mga sugo sa Dios, ug tungod kay inyong gipildi si Satanas, nga mao ang daotan. ¹⁵ Ayaw pagkinabuhi nga sama sa mga tawo niining kalibotana nga wala mopasidungog sa Dios. Ayaw pagtinguha sa mga butang nga gusto nilang maangkon. Kung adunay magkinabuhi sama sa ilang pagkinabuhi, nagapamatuod sila nga wala sila mahigugma sa Dios nga atong Amahan. ¹⁶ Nagsulat ako niini, tungod kay ang tanang sayop nga mga butang nga gibuhat sa mga tawo, ang tanang butang nga makita sa mga tawo ug gisulayan nga maangkon alang sa ilang mga kaugalingon, ug ang tanang butang nga ilang gipanghinambog–tanan niining mga butanga walay kalambigitan uban sa atong Amahan sa langit. Nahisakop sila sa kalibotan. ¹⁷ Ang mga tawo sa kalibotan nga wala mopasidungog sa Dios, uban sa tanang butang nga ilang gitinguha, mangahanaw. Apan kadtong nagbuhat kung unsa ang gustong ipabuhat sa Dios kanila mabuhi sa kahangtoran! ¹⁸ Kamo nga akong gihigugma pag-ayo, mao kini karon sa dili pa mobalik si Jesus sa kalibotan. Nakadungog na kamo ang tawo nga magpakaaron-ingnon nga mao ang Cristo moabot; ang tinuod, daghan na ang maong mga tawo nga nangabot–apan silang tanan batok kang Cristo. Tungod niini, kita nasayod nga hapit na ang pagbalik ni Cristo. ¹⁹ Kining mga tawhana nagdumili sa pagpabilin sa atong mga panagtigom, apan sila dili gayod uban kanato. Sa dihang mibiya sila kanato, nakita nato sa klaro nga sila dili gayod uban kanato. ²⁰ Apan alang kaninyo, si Cristo, nga mao ang balaan, naghatag kaninyo sa iyang Espiritu; ang iyang Espiritu ang nagtudlo kaninyo sa tanang kamatuoran. ²¹ Ako nagsulat kaninyo, dili tungod kay wala kamo nasayod sa kamatuoran mahitungod sa Dios, apan tungod kay nasayod kamo kung unsa kini. Nasayod usab kamo nga ang Dios wala nagtudlo kanato ug sayop; hinuon, gitudloan niya kita kung unsa lamang ang tinuod. ²² Ang labing daotan nga mga bakakon mao ang naglimod nga si Jesus mao ang Cristo. Ang tanan nga nagbuhat niini supak kang Cristo, tungod kay nagdumili sila sa pagtuo sa Amahan ug sa Anak. ²³ Kadtong nagdumili sa pag-ila nga si Jesus anak sa Dios wala nahiusa uban sa Amahan, apan kadtong nag-ila nga si Cristo anak sa Dios nahiusa usab sa Amahan. ²⁴ Busa, alang kaninyo, kinahanglan nga magpadayon kamo sa pagtuo sa kamatuoran mahitungod kang Jesu-Cristo nga una ninyong nadungog, ug magkinabuhi sumala niini. Kung inyo kanang pagabuhaton, kamo magpabilin nga mahiusa diha sa Anak ug sa Amahan. ²⁵ Ug kung unsa ang gisulti sa Dios kanato kana mao nga siya ang hinungdan nga mabuhi kita sa kahangtoran! ²⁶ Ako nagsulat niini kaninyo aron sa pagpasidaan kaninyo mahitungod niadtong gusto nga molingla kaninyo mahitungod sa kamatuoran ni Cristo. ²⁷ Alang kaninyo, ang Espiritu sa Dios, nga inyong nadawat gikan kang Cristo, magpabilin kaninyo. Busa dili na kamo mokinahanglan kang bisan kinsa nga mahimong inyong magtutudlo. Ang Espiritu sa Dios motudlo kaninyo sa tanan nga angay ninyong masayran. Kanunay siyang nagatudlo sa kamatuoran ug dili gayod mosulti ug bisan unsa nga sayop. Busa padayon sa pagkinabuhi sa paagi nga iyang gitudlo kaninyo, ug pabilin sa pagkahiusa kaniya. ²⁸ Karon, akong mga hinigugma, naghangyo ako kaninyo sa pagpadayon sa pagpakighiusa kang Cristo. Kinahanglan nato kanang buhaton aron nga kita magmasaligon nga iya kitang dawaton sa dihang mobalik siya pag-usab. Kung buhaton nato kana, dili kita maulawan sa pag-atubang kaniya sa dihang mobarog kita sa iyang atubangan inig-abot niya. ²⁹ Tungod kay nasayod kamo nga ang Cristo kanunay nagbuhat kung unsa ang maayo, nasayod kamo nga ang tanan nga nagpadayon sa pagbuhat kung unsa ang maayo mao ang nahimong mga anak sa Dios.

Chapter 3

¹ Hunahunaa kung unsa kadako ang gugma sa atong Amahan kanato! Gitugotan niya kita sa pagsulti nga kita iyang mga anak! Ug kini tinuod gayod! Apan ang mga tawo nga dili magtutuo wala makasabot kung kinsa ang Dios. Busa wala sila nakasabot kung kinsa kita, nga kita mga anak sa Dios. ² Pinalangga nga mga higala, bisan kung sa kasamtangan kita mga anak sa Dios, wala pa niya gipakita kanato kung unsa kita sa umaabot. Bisan pa niana, kita nasayod nga kung si Cristo mobalik pag-usab, kita mahisama kaniya, tungod kay makita nato siya diha sa atubangan. ³ Busa tanan niadtong masaligon nga naglaom nga makakita kang Cristo, magpalayo sa ilang mga kaugalingon gikan sa pagpakasala, sama kang Cristo, nga walay sala. ⁴ Apan ang tanan nga magpadayon sa sala nagdumili sa pagtuman sa mga balaod sa Dios, tungod kay mao kana ang sala, ang pagdumili sa pagtuman sa mga balaod sa Dios. ⁵ Kamo nasayod nga si Cristo miabot aron hingpit nga matanggal ang atong mga sala. Nasayod usab kamo nga siya wala nakasala. ⁶ Kadtong nagpadayon sa pagbuhat kung unsa ang gusto ni Cristo nga ilang buhaton, wala nagpadayon sa pagbalikbalik ug pagpakasala. Apan kadtong nagbalikbalik sa pagpakasala wala nasayod kung kinsa si Cristo, ni sila adunay tinud-anay nga panaghiusa uban kaniya. ⁷ Busa giawhag ko kamo akong mga gipalangga pag-ayo, ayaw tugoti ang si bisan kinsa nga molimbong kaninyo pinaagi sa pagsulti kaninyo nga insakto ang magpakasala. Kung kamo magpadayon sa pagbuhat kung unsa ang insakto, kamo matarong, sama nga si Cristo matarong. ⁸ Apan si bisan kinsa nga magpadayon sa pagbalikbalik ug pagpakasala sama sa yawa, tungod kay ang yawa kanunay nagpakasala sukad pa sa pagsugod sa kalibotan. Ug ang hinungdan nganong ang Anak sa Dios nahimong tawo mao ang pagguba kung unsa ang gibuhat sa yawa. ⁹ Dili na magpadayon sa pagbalikbalik ug pagpakasala ang mga tawo kung sila nahimo nang mga anak sa Dios. Dili na sila makapadayon sa pagpakasala tungod kay gihimo na sila sa Dios nga iyang mga anak, ug iyang gibutang diha kanila kung unsa gayod siya. ¹⁰ Kadtong mga anak sa Dios tin-aw nga lahi gikan niadtong mga anak sa yawa. Ang paagi nga kita masayod kung kinsa ang mga anak ni Satanas mao kini: Kadtong wala nagbuhat kung unsa ang insakto dili mga anak sa Dios. Ug kadtong wala mahigugma sa ilang isig ka magtutuo dili mga anak sa Dios. ¹¹ Ang mensahe nga inyong nadunggog sa dihang kamo unang mituo kang Cristo mao nga kita kinahanglan mahigugma sa matag usa. ¹² Kinahanglan nga dili kita magdumot sa uban sama sa anak ni Adan, nga si Cain, nga sakop ni Satanas, ang daotan. Tungod kay si Cain nagdumot sa iyang manghod, gipatay niya siya. Sultihan ko kamo kung unsay hinungdan nganong iyang gipatay ang iyang igsoon. Kini tungod kay si Cain makanunayon nga nagbuhat sa daotang paagi, ug nagdumot sa iyang manghod tungod kay ang iyang manghod nagbuhat sa insakto nga paagi. ¹³ Kamo dili kinahanglan nga mahibulong kung ang mga dili magtutuo magdumot kaninyo. ¹⁴ Tungod kay nahigugma kita sa atong isig ka magtutuo, nasayod kita nga ang Dios naghimo kanato nga mopuyo sa walay kataposan uban kaniya. Apan giisip sa Dios nga patay ang si bisan kinsa nga wala mahigugma kanila. ¹⁵ Isipon sa Dios ang bisan kinsa nga magdumot sa ilang isig ka magtutuo ingon nga sila nakabuhat ug usa ka butang nga sama ka daotan sa pagpatay. Ug kamo nasayod nga walay mamumuno ang makabaton sa kinabuhi nga walay kataposan. ¹⁶ Ang paagi nga atong masayran karon kung unsaon nato ang tinuoray nga paghigugma sa atong isig ka magtutuo mao ang paghinumdom nga si Cristo namatay alang kanato sa iyang kaugalingong kabubut-on. Busa sa samang paagi, kinahanglan mobuhat kita sa bisan unsa alang sa atong isig ka magtutuo, bisan ang mamatay alang kanila. ¹⁷ Daghan kanato ang adunay mga butang nga gikinahanglan aron kita mabuhi niining kalibotan. Kung masayod kita nga bisan kinsa sa atong isig ka magtutuo adunay panginahanglanon ug kung magdumili kita sa paghatag kanila, kini dayag nga kita wala mahigugma sa Dios ingon nga atong giangkon nga gibuhat. ¹⁸ Sultihan ko kamo nga akong gipalangga pag-ayo, dili lamang kita mosulti nga atong gihigugma ang matag usa; maghigugma kita sa matag usa pinaagi sa pagtabang sa matag usa! ¹⁹ Kung kita tinuoray nga nahigugma sa atong isig ka magtutuo, makasiguro kita nga nagakinabuhi kita sumala sa tinuod nga mensahe mahitungod kang Cristo. Tungod niini, dili kita mobati nga sad-an diha sa atubangan sa Dios. ²⁰ Makaampo kita nga masaligon, tungod kay bisan kita mobati nga kita sad-an tungod kay nakabuhat kita ug sayop, ang Dios angayan sa atong pagsalig. Nasayod siya sa tanang butang mahitungod kanato. ²¹ Pinalangga nga mga higala, kung ang atong mga hunahuna wala nagbatok kanato nga nakasala, unya makaampo kita nga masaligon diha sa Dios. ²² Ug kung masaligon kita nga moampo diha kaniya ug mangayo sa bisan unsa gikan kaniya, madawat nato kini tungod kay nagbuhat kita kung unsa ang iyang mga gisugo kanato nga buhaton, ug tungod kay mibuhat kita kung unsa ang makapahimuot diha kaniya. ²³ Sultihan ko kamo kung unsa ang iyang mga gisugo kanato nga buhaton: Kinahanglan kita motuo nga si Jesu-Cristo mao ang iyang Anak. Kita usab kinahanglan mahigugma sa matag usa, ingon nga iyang gisugo kanato nga buhaton. ²⁴ Kadtong mga mobuhat kung unsa ang mga gisugo sa Dios mao ang mga nahiusa uban sa Dios, ug ang Dios nahiusa kanila. Ug kini tungod kay anaa kanato ang iyang Espiritu, nga iyang gihatag kanato, nga kita makasiguro nga ang Dios nahiusa kanato.

Chapter 4

¹ Hinigugmang mga higala, daghang tawo nga adunay bakak nga mensahe nga nagtudlo niini sa katawhan. Apan kinahanglan nga maghunahuna kamo pag-ayo kung unsa ang inyong nadungog nga ilang gipangtudlo, aron masayod kamo kung sila nagatudlo ba sa kamatuoran nga naggikan sa Dios o wala. ² Sultihan ko kamo kung unsaon pag-ila kung ang usa ka tawo nagtudlo ba sa kamatuoran nga naggikan sa Espiritu sa Dios. Kadtong nagpamatuod nga si Jesu-Cristo mianhi gikan sa Dios nga nahimong tawo sama kanato nagtudlo sa mensahe nga nagagikan sa Dios. ³ Apan kadtong wala mopamatuod sa kamatuoran mahitungod kang Jesus wala motudlo sa mensahe nga gikan sa Dios. Sila mga magtutudlo nga nagsupak kang Cristo. Inyo nang nadungog nga ang mga tawo nga sama niana moabot diha kaninyo. Bisan karon ania na sila dinhi! ⁴ Ug alang kaninyo nga akong gihigugma pag-ayo, kamo nahisakop sa Dios, ug kamo midumili sa pagtuo kung unsa ang gipanudlo niadtong mga tawhana, tungod kay ang Dios, nga makapahimo kaninyo sa pagbuhat kung unsa ang iyang gusto, nga mas labaw pa. ⁵ Alang niadtong nagtudlo unsa ang sayop, sila nahisakop sa mga katawhan nga nagdumili sa pagpasidungog sa Dios. Mao nga kung unsa ang ilang gisulti naggikan sa mao ra gihapong mga tawo, ug kadtong mao ra gihapong mga tawo ang maminaw kanila. ⁶ Alang kanato, kita nahisakop sa Dios. Si bisan kinsa nga nakaila sa Dios maminaw kung unsa ang atong gitudlo, apan si bisan kinsa nga wala nahisakop sa Dios dili maminaw kung unsa ang atong gitudlo. Ingon niini ang atong pag-ila tali sa mga tawo nga nagtudlo sa kamatuoran mahitungod sa Dios, ug niadtong nanglimbong sa uban. ⁷ Hinigugmang mga higala, kinahanglan nga maghigugmaay kita sa usag-usa, ug tungod kay ang Dios naghimo kanato aron sa paghigugma sa usag-usa, ug tungod kay kadtong nahigugma sa iyang mga isigka magtutuo mahimong mga anak sa Dios ug nakaila kaniya. ⁸ Gipakita sa Dios ang iyang gugma ngadto sa katawhan. Busa kadtong wala mahigugma sa ilang mga isigka magtutuo wala makaila sa Dios. ⁹ Sultihan ko kamo kung giunsa pagpakita sa Dios ang iyang paghigugma kanato: Iyang gipadala ang iyang bugtong Anak aron nga magpuyo sa kalibotan aron himoon kitang mabuhi sa kahangtoran tungod kaniya. ¹⁰ Ug ang Dios nagpakita kanato kung unsa ang ipasabot sa tinuod nga paghigugma sa ubang tawo: Kini wala mopasabot nga kita nahigugma sa Dios, apan tungod kay ang Dios naghigugma kanato. Busa iyang gipadala ang iyang Anak aron ihalad ang iyang kaugalingon, aron nga siya—ang Dios—mopasaylo kanato sa dihang kita nakasala. ¹¹ Hinigugmang mga higala, tungod kay gihiguma man kita sa Dios nga sama niana, kita kinahanglan gayod nga maghigugmaay sa usag-usa! ¹² Walay pay bisan kinsa nga nakakita sa Dios. Bisan pa niana, kung gihigugma nato ang usag-usa, kini klaro nga ang Dios nagpuyo uban kanato ug kita nga nahigugma sa uban sama sa iyang tumong nga ipabuhat kanato. ¹³ Sultihan ko kamo kung unsaon nga makasiguro kita nga nahiusa kita uban sa Dios ug ang Dios nahiusa kanato. Iyang gibutang ang iyang Espiritu uban kanato. ¹⁴ Kami nga mga apostoles nakakita sa Anak sa Dios, ug kami ligdong nga nagsulti sa uban nga ang Amahan nagpadala kaniya aron pagluwas sa katawhan sa kalibotan gikan sa walay kataposang pag-antos sa ilang mga sala. ¹⁵ Busa ang Dios nagpabilin nga nahiusa uban niadtong nagsulti sa kamatuoran mahitungod kang Jesus. Sila nagsulti nga, "Siya ang Anak sa Dios." Ug busa sila nagpabilin nga nahiusa uban sa Dios. ¹⁶ Atong nasinati kung giunsa kita paghigugma sa Dios ug nagtuo kita nga siya nahigugma kanato. Tungod niini, kita nahigugma sa uban. Tungod kay ang kinaiya sa Dios mao ang paghigugma sa katawhan, kadtong nagpadayon sa paghigugma sa uban nahiusa sa Dios, ug ang Dios nahiusa uban kanila. ¹⁷ Kinahanglan nga kita mahigugma sa uban sa hingpit. Ug kung ato kanang buhaton, inig abot sa panahon nga ang Dios maghukom kanato, magmasaligon kita nga dili niya kita pagasilotan. Kita magmasaligon tungod kay nagkinabuhi kita niining kalibotana nga nahiusa sa Dios, ingon nga si Cristo nahiusa sa Dios. ¹⁸ Dili kita angay mahadlok sa Dios kung matinud-anon kita nga nahigugma kaniya, tungod kay kadtong nahigugma sa Dios sa hingpit dili mahimong mahadlok kaniya. Mahadlok lamang kita kung naghunahuna kita nga siya mosilot kanato. Busa kadtong nahadlok gayod sa Dios wala gayod mahigugma sa Dios sa hingpit. ¹⁹ Nahigugma kita sa Dios ug sa atong mga isigka magtutuo tungod kay ang Dios ang unang nahigugma kanato. ²⁰ Busa kadtong nag-ingon nga, "Gihigugma ko ang Dios" apan nagdumot sa iyang isigka magtutuo nagbakak. Kay kadtong wala mahigugma sa usa sa ilang mga isigka magtutuo, nga ilang nakita, dili gayod makahigugma sa Dios, nga wala nila makita. ²¹ Ibutang sa inyong hunahuna nga mao kini ang gisugo sa Dios kanato: kung higugmaon nato siya, kinahanglan nga higugmaon usab nato ang atong mga isigka magtutuo.

Chapter 5

¹ Ang tanan nga motuo nga si Jesus mao ang Cristo mao ang mga anak sa Dios, nahimugso gikan sa Dios. Ug si bisan kinsa nga nahigugma gayod sa Amahan nahigugma usab sa mga anak sa Amahan, atong mga isig ka magtutuo. ² Ang paagi nga atong masiguro nga nahigugma gayod kita sa mga anak sa Dios sa dihang atong gihigugma ang Dios ug gibuhat ang iyang mga sugo nga iyang gipabuhat kanato. ³ Gisulti ko kini tungod kay ang paghigugma sa Dios nagpasabot gayod nga atong buhaton ang iyang mga sugo. Ug dili lisod buhaton ang iyang mga sugo. ⁴ Kitang tanan nga gihimo sa Dios nga mahimong iyang mga anak nakahimo sa pagbalibad sa pagbuhat sa gustong ipabuhat kanato sa mga dili magtutuo; mas labi pa kitang kusgan sa tanang butang nga batok sa Dios. Makahimo kita sa pagbalibad sa pagbuhat ug sayop tungod kay nagsalig kita kang Cristo. ⁵ Kinsa ang tawo nga mas kusgan pa sa tanang butang nga batok sa Dios? Kini mao si bisan kinsa nga motuo nga si Jesus ang Anak sa Dios. ⁶ Paghunahuna mahitungod kang Jesu-Cristo. Siya ang mianhi sa kalibotan gikan sa Dios. Gipakita sa Dios nga siya gayod ang nagpadala kang Jesus sa dihang gibawtismohan ni Juan si Jesus sa tubig, apan sa dihang miagas usab ang dugo ni Jesus gikan sa iyang lawas sa dihang namatay siya. Ug ang Espiritu sa Dios nagpahayag nga matud-anon nga si Jesu-Cristo miabot gikan sa Dios. ⁷ Kining tulo ka butang sama sa tulo ka tawo nga mga pamatuod: ⁸ ang Espiritu sa Dios, ang tubig sa dihang gibawtismohan ni Juan si Jesus, ug ang dugo ni Jesus nga niagas gikan sa iyang lawas sa dihang namatay siya didto sa krus. Kining tulo ka butang nagsulti kanato sa sama lamang nga butang, nga si Jesus gikan sa Dios. ⁹ Kasagaran motuo kita kung unsa ang isulti sa ubang tawo kanato. Apan sigurado kitang makasalig ug mas labaw pa kung unsa ang isulti sa Dios. Ug nagpamatuod gayod siya sa iyang Anak. ¹⁰ Kadto misalig sa Anak sa Dios nakahibalo sa ilang kinasuloran nga pagkatawo kung unsa ang kamatuoran mahitungod kaniya. Apan kadtong dili motuo sa gisulti sa Dios nagtawag kaniya nga bakakon, tungod kay wala sila mituo sa gipamatud-an sa Dios mahitugod sa iyang Anak. ¹¹ Mao kini ang gisulti sa Dios kanato: "Gihatagan ko kamo ug kinabuhing walay kataposan!" Mabuhi kita hangtod sa kahangtoran kung mahiusa kita sa iyang Anak. ¹² Kadtong nahiusa sa Anak sa Dios mabuhi hangtod sa kahangtoran uban sa Dios. Kadtong wala nahiusa kaniya dili mabuhi hangtod sa kahangtoran. ¹³ Gisulat ko kining maong sulat nganha kaninyo nga nagtuo nga si Jesus ang Anak sa Dios, aron nga makahibalo kamo nga mabuhi kamo hangtod sa kahangtoran. ¹⁴ Tungod kay nahiusa kamo kaniya, masaligon kaayo kita nga siya naminaw kanato sa dihang maghangyo kita nga buhaton niya ang mga butang nga iyang uyonan. ¹⁵ Ug kung nakahibalo kita nga naminaw siya kanato--bisan unsa ang atong pangayoon--unya makasiguro kita nga madawat nato ang kung unsa ang atong gipangayo gikan kaniya. ¹⁶ Pananglit nakit-an ninyo ang atong isig ka magtutuo nga nagpakasala sa paagi nga dili makapahilayo kanila sa Dios, ug sa dihang nakita ninyo nga nagpakasala, kinahanglan hangyoon ninyo ang Dios ug mag-ampo nga ang Dios maghatag nianang tawhana ug kinabuhi--mao kini, ngadto sa tawo nga wala nagbuhat ug sala nga makapahilayo kaniya sa Dios. Apan adunay pipila ka mga tawo nga nagpakasala sa paagi nga mahilayo sila sa Dios sa kahangtoran. Wala ako nag-ingon nga hangyoon ninyo ang Dios nga tabangan ang mga tawo nga nagpakasala niana nga paagi. ¹⁷ Ang tanang butang nga sayop sala batok sa Dios, apan dili ang tanang daotang butang nga atong buhaton makapahilayo kanato sa Dios sa kahangtoran. ¹⁸ Nakahibalo kita nga kung ang usa ka tawo anak sa Dios, dili siya magbalikbalik sa pagpakasala. Hinuon, ang Anak sa Dios manalipod kaniya aron nga si Satanas, ang daotan, dili makapanakit kaniya. ¹⁹ Nakahibalo kita nga sakop kita sa Dios, ug nakahibalo kita nga ang tibuok kalibotan ilalom sa pagdumala sa daotan. ²⁰ Nakahibalo usab kita nga ang Anak sa Dios miabot uban kanato ug naghimo kanato nga makasabot sa kamatuoran; nahiusa kita kaniya nga tinuod, ang Anak sa Dios si Jesu-Cristo. Si Jesu-Cristo tinuod nga Dios, ug siya ang naghimo kanato nga makabaton ug kinabuhing walay kataposan. ²¹ Mag-ingon ako kaninyo nga gihigugma nako pag-ayo, bantayi ang inyong kaugalingon gikan sa pagsimba sa mga dios-dios nga walay tinuod nga gahom!