Kapitulo

Chapter 1

¹ Ang Panan-awon ni Isaias ang anak nga lalaki Amoz, nga gipakita ni Yahweh kaniya mahitungod sa Juda ug Jerusalem sa mga tuig nila Uzia, Jotam, Ahaz, ug Hezekia, nga mga hari sa Juda. ² Dungga O kalangitan, paminaw O kalibotan, kay mao kini ang giingon Yahweh: "Gipadako ko ang katawhan sukad sa ilang pagkahimugso, apan nagsupak sila batok kanako. ³ Nasayod ang mga baka sa mga nanag-iya kanila, ug nasayod ang mga asno kung kinsa ang nagpakaon kanila, apan wala nasayod ang Israel; wala nakasabot ang Israel." ⁴ Makalilisang nga mga butang ang mahitabo niining makasasala nga nasod, kining pundok sa katawhan nga gibug-atan sa ilang sala, kining mga anak sa mga tawo nga nagabuhat sa daotang mga butang, dili makataronganon kining mga anak nga lalaki. Gibiyaan nila si Yahweh, ang Usa ka Balaan sa Israel. Nagpalayo sila gikan kaniya. ⁵ Nganong buhaton man ninyo ang mga butang nga masilotan kamo ni Yahweh? Nganong nagpadayon man kamo sa pagsupak kaniya? Nahisama kamo sa usa ka tawo nga nagmasakiton ang tibuok hunahuna ug kasingkasing. ⁶ Gikan sa lapalapa hangtod sa alimpulo, wala gayoy maayo. Adunay mga samad ug mga kabahong nga wala nahinloan o nabugkosan, ug walay nagbutang ug lana niini aron tambalan sila. ⁷ Gigun-ob sa mga kaaway ang inyong nasod; gisunog nila ang inyong mga lungsod, ug walay usa nga nahibilin. Giilog sa mga langyaw ang mga abot sa inyong kaumahan samtang nagtan-aw kamo; gigun-ob nila ang tanang butang nga ilang nakita. ⁸ Sama ka gamay sa payag sa usa ka magbalantay sa karnero ang siyudad sa Jerusalem. Nahisama kini sa usa ka silonganan nga anaa sa parasan; nahisama kini sa payag nga anaa sa melonan. Usa kini ka siyudad nga gipalibotan sa iyang mga kaaway nga nagpaabot sa pagsulong niini. ⁹ Kung dili tugotan ni Yahweh nga pangulo sa kasundalohang anghel nga adunay mabuhi nga pipila sa iyang katawhan, mangalaglag kitang tanan, sama sa mga siyudad sa Sodoma ug Gomora nga nalaglag. ¹⁰ Paminaw kung unsa ang isulti ni Yahweh kaninyo, kamo nga mga tigdumala sa Sodoma! Paminaw sa balaod sa atong Dios, kamong katawhan sa Gomora! Miingon si Yahweh; ¹¹ "Unsa may bili sa daghan ninyong mga halad ngari kanako?" Dili na gayod ako gusto sa mga halad nga sinunog nga mga karnero, o tambok nga mga baka. Dili makalipay kanako ang dugo sa mga baka, mga karnero o mga kanding. ¹² Sa dihang moadto kamo sa akong templo aron sa pagsimba kanako, kinsa man ang nag-ingon kaninyo sa pagtunob libot sa akong hawanan samtang nagbuhat kamo niadtong tanang mga tulomanon? ¹³ Undanga ang pagdala nganhi kanako niadtong mga halad, kay wala kini pulos nganhi kanako; gidumtan ko ang insenso nga sunogon sa mga pari! Ug ang inyong mga kasaulogan sa bag-ong subang sa bulan matag bulan ug ang inyong mga Adlaw nga igpapahulay ug sa ubang mga kapistahan— Gikasilagan ko kini tungod sa daotang mga butang nga inyong gibuhat! ¹⁴ Gikasilagan ko ang tanan ninyong mga kasaulogan sa bag-ong subang sa bulan ug ang ubang mga kapistahan nga inyong gisaulog. Nahisama kini sa bug-at nga palas-onon nga gikapoyan ako sa pagdala. ¹⁵ Busa sa dihang ipataas ninyo ang inyong mga kamot aron sa pag-ampo dinhi kanako, dili ako motan-aw kaninyo. Bisan kung mag-ampo kamo sa makadaghan dinhi kanako, dili ako maminaw kaninyo, tungod kay daw napuno sa dugo ang inyong mga kamot sa mga tawo nga inyong gipatay. ¹⁶ Hinloi ang inyong kaugalingon! Biyai ang daotan ninyong pamatasan! Undanga ang pagbuhat sa mga butang nga sayop! ¹⁷ Pagtuon sa pagbuhat ug maayo ug ipabuhat sa mga tawo kung unsa ang makataronganon. Badlonga ang mga tawo gikan sa pagdaugdaog sa uban, ug dapigi ang mga ilo ug ang mga balo sa dihang dad-on sila sa mga tawo didto sa hukmanan." ¹⁸ Miingon si Yahweh, "Kinahanglan nga hunahunaon ninyo kung unsa ang inyong buhaton. Bisan pa ug sama sa dagtom pula ang inyong mga sala, mahimo kining puti sama sa nyebe; bisan pa ug pula kaayo kini, mahimo kining puti sama sa balahibo sa karnero. ¹⁹ Kung magmasinugtanon kamo sa pagsunod kanako, makakaon kamo sa maayong abot sa yuta. ²⁰ Apan kung magpalayo kamo gikan kanako ug mosupak batok kanako, pamatyon kamo sa inyong mga kaaway." Mahitabo kana kay si Yahweh ang nagsulti niini. ²¹ Sa usa ka higayon kamo nga katawhan sa Jerusalem magmatinud-anon sa pagsimba lamang kang Yahweh, apan karon nahisama kamo sa mga nagbaligya ug dungog nga dili matinud-anon sa bana. Kanunay nga nagmakiangayon ug nagbuhat sa matarong ang mga tawo didto, apan karon ang inyong siyudad napuno sa mga mamumuno. ²² Dili na lunsay ang inyong plata, ug sinagolan sa tubig ang inyong bino. ²³ Mga rebelde ang inyong mga pangulo; mga higala sila sa mga kawatan. Gusto silang tanan nga makakwarta ug pahatagon nila ug mga gasa ang uban ngadto kanila aron sa paghukom ug mga kaso diha sa hukmanan alang sa ilang pabor. Wala nila dapigi ang mga ilo diha sa hukmanan, ug wala nila tabangi ang mga balo nga maangkon ang angay nilang madawat. ²⁴ Busa miingon si Yahweh, nga pangulo sa kasundalohang anghel, ang gamhanang Dios sa Israel. "Panimaslan ko kadtong nakigbatok kanako, ug panimaslan ko mismo ang akong mga kaaway. ²⁵ Ipataas ko ang akong kumo aron sa pagsumbag kaninyo, ug silotan ko kamo sa hilabihan, ingon nga kamo plata nga kinahanglan nakong painiton pag-ayo aron matunaw kamo, ug sa paghawa sa mga taya. ²⁶ Human nga mahitabo kana, hatagan ko kamo ug maayo nga mga maghuhukom sama sa inyong nabatonan kaniadto. Aduna kamoy maalamong mga magtatambag sama sa inyong nabatonan sa dugay na nga panahon. Unya pagatawgon sa mga tawo ang inyong siyudad ug matinud-anong siyudad, usa ka siyudad diin nagbuhat ug matarong ang mga tawo." ²⁷ Kay buhaton sa katawhan sa Jerusalem kung unsa ang makiangayon, ipabalik ni Yahweh ang ilang siyudad, ug luwason niya kadtong naghinulsol tungod sa ilang pagkamatarong. ²⁸ Apan laglagon niya ang mga masinupakon ug mga makasasala, ug mahanaw kadtong mibiya kaniya. ²⁹ Maulawan kamo kay nagsimba kamo sa mga diosdios ilalom sa mga kahoyng akasya nga inyong gihunahuna nga sagrado, ug maulawan kamo tungod kay nagsimba kamo sa mga diosdios nga anaa sa mga tanaman nga inyong gihigugma pag-ayo. ³⁰ Mahisama kamo sa dakong kahoy nga nangalaya ang mga dahon, sama sa nauga nga tanaman tungod kay wala kini tubig. ³¹ Kadtong kusgan kaayo uban kaninyo mahisama sa uga nga kahoy, ug mahisama sa siga ang bulohaton nga ilang gibuhat. Masunog silang duha ug ang daotang mga butang nga ilang gibuhat, ug walay makapalong sa kalayo."

Chapter 2

¹ Mao kini ang mensahe ni Yahweh nga gihatag kang Isaias ang anak nga lalaki ni Amoz, sa usa ka panan-awon mahitungod sa Juda ug Jerusalem. ² Sa umaabot, mahimong labing mahinungdanon nga dapit sa kalibotan ang bungtod diin gitukod ang templo ni Yahweh. Mahisama kini sa pinakataas nga bukid, daw mobarog kini labaw sa tanang kabungtoran, ug moadto didto ang mga tawo nga naggikan sa nagkalainlaing dapit sa kalibotan. ³ Mag-ingnanay ang katawhan nga gikan sa daghang mga pundok, "Dali, manungas kita sa bungtod, didto sa templo ni Yahweh, aron sa pagsimba sa Dios nga gisimba ni Jacob. Tudloan niya kita didto kung unsa ang iyang gitinguha nga atong masayran, aron ang atong pamatasan makapahimuot kaniya." Tudloan nila kita didto sa Jerusalem; makakat-on kita didto kung unsa ang gitinguha ni Yahweh nga isulti kanato. ⁴ Maminaw si Yahweh sa mga panaglalis sa mga nasod, ug husayon niya ang ilang mga panaglalis. Unya, imbis nga mag-away batok sa matag usa, himoon nila ang ilang mga espada nga mga lipya sa daro, ug himoon nila ang ilang mga bangkaw nga mga garab. Dili na gayod mag-away ang mga kasundalohan sa kanasoran, ug dili na nila bansayon ang mga lalaki aron sa pagpakig-away sa gubat. ⁵ Kamo nga mga kaliwat ni Jacob, magkinabuhi kita sa paagi nga atong gikinahanglan kay nag-uban si Yahweh kanato! ⁶ Gibiyaan nimo kami, Yahweh nga imong katawhan nga mga kaliwat ni Jacob, tungod kay bisan asa ang imong katawhan magbuhat sila sa mga nabatasan sa mga tawo nga nagpuyo sa sidlakang bahin sa Israel. Nagbuhat usab sila ug mga tulomanon aron masayran kung unsa ang mahitabo sa umaabot, sama sa gibuhat sa mga Filistihanon. Nagbuhat sila ug mga kasabotan uban sa mga langyaw nga wala makaila kang Yahweh. ⁷ Napuno sa plata ug bulawan ang Israel; adunay daghang mga bahandi dinhi. Napuno ang yuta sa panggubat nga mga kabayo ug panggubat nga mga karwahe. ⁸ Apan napuno usab ang yuta sa mga diosdios; ang mga butang nga gisimba sa mga tawo nga gibuhat sa kaugalingon nilang mga kamot. ⁹ Busa karon ipaubos sila; pakaulawan sila ni Yahweh. Ayaw sila pasayloha Yahweh! ¹⁰ Panago kamong tanan nga katawhan ngadto sa mga langob nga kabatoan diha sa pangpang! Kinahanglan nga motago kamo sa mga bangag diha sa yuta kay mahadlok kamo kang Yahweh ug sa iyang mahimayaon ug kahibulongang gahom. ¹¹ Himoon kamo ni Yahweh nga dili na magmapahitas-on ug paundangon niya kamo gikan sa pagkagarboso. Nianang adlawa daygon ug pasidunggan lamang sa katawhan si Yahweh. ¹² Nagpili ug usa ka adlaw si Yahweh, nga pangulo sa kasundalohang anghel, nga hukman niya kadtong mga mapahitas-on, ug ipaubos niya sila. ¹³ Putlon niya kadtong tanan nga naghunahuna nga kinahanglan daygon sila sa uban, sama sa tag-as nga kahoyng sedro sa Lebanon, ug sama sa dagko nga kahoyng akasya sa rehiyon sa Bashan. ¹⁴ Patagon niya kadtong tanan nga naghunahuna nga sama sila kadako sa habog nga mga kabungtoran ug kabukiran. ¹⁵ Gun-obon niya kadtong tanan nga naghunahuna nga sama sila sa tag-as nga mga tore ug sama sa tag-as ug lig-on nga mga pader nga luwas sila sa sulod niini. ¹⁶ Laglagon niya kadtong mga dato kay nanag-iya ug dagko nga mga barko nga nagdala ug mga pagkaon ngadto sa laing mga nasod ug nanag-iya usab sa laing nindot nga mga barko. ¹⁷ Himoon niya ang katawhan nga dili na magmapahitas-on, ug undangon niya sa pagkagarboso. Nianang adlawa si Yahweh lamang ang daygon ug pasidunggan sa katawhan. ¹⁸ Unya mawala ang tanang mga diosdios. ¹⁹ Sa dihang moabot si Yahweh aron sa paghadlok sa katawhan sa kalibotan, managan sila aron motago didto sa mga langob sa kabatoan diha sa pangpang ug diha sa mga bangag sa yuta, kay nahadlok sila kang Yahweh ug sa iyang mahimayaon ug katingalahang gahom. ²⁰ Nianang adlawa, gun-obon sa mga tawo ang tanan nilang mga diosdios nga bulawan ug plata nga ilang gisimba, ug ilabay nila kini ngadto sa mga kabog ug mga ilaga. ²¹ Unya mangamang sila ngadto sa mga langob ug motago sa mga bangag diha sa pangpang. Mosulay sila ug ikyas gikan kang Yahweh, nga moabot aron sa pagsilot kanila; mahadlok sila kung unsa ang iyang buhaton kay mahimayaon ug katingalahan siya, sa dihang moabot siya aron sa paglisang sa mga katawhan sa kalibotan. ²² Busa ayaw pagsalig nga luwason kamo sa mga tawo, kay wala silay gahom sama sa tawo nga nagginhawa. Dili gayod makatabang ang mga tawo kaninyo!

Chapter 3

¹ Si Yahweh, nga pangulo sa kasundalohang anghel, ang magkuha gikan sa Jerusalem ug sa ubang mga dapit sa Juda sa tanan ninyong gisaligan—ang tanang pagkaon ug tubig. ² Kuhaon niya ang mga bayani ug ang mga sundalo, mga maghuhukom ug mga propeta, kadtong mga nanagna kung unsa ang mahitabo sa umaabot ug ang mga kadagkoan, ³ mga opisyal sa kasundalohan ug ang ubang mahinungdanong mga tawo, mga magtatambag, mga hanas nga maghihimo, ug kadtong nagabuhat ug salamangka. ⁴ Miingon si Yahweh nga, "motudlo ako ug mga batang lalaki nga mahimong mga pangulo; ang mga bata maoy modumala. ⁵ Tagdon sa mga tawo ang matag usa uban sa kabangis: makig-away ang mga tawo batok sa ilang mga silingan. Mosulti ang batan-ong mga tawo ug makauulaw nga mga butang batok sa mga tawo nga magulang kanila, ug moyam-id ang yanong mga tawo ngadto sa uban nga kasagarang gipasidunggan. ⁶ Nianang panahona, gunitan sa usa ka tawo ang usa sa iyang mga igsoon nga lalaki diha sa balay sa iyang amahan ug moingon siya kaniya, 'Aduna gihapon kay kupo; motahod ang mga tawo tungod niana. Busa mahimo ka namong pangulo! Dumalahi kining siyudad nga karon usa ka tapok sa mga ginuba.' ⁷ Apan motubag ang igsoon niyang lalaki, 'Dili, dili ako makatabang kaninyo, kay wala akoy subrang pagkaon o mga sinina niining balaya. Busa ayaw ako himoa nga inyong pangulo!"' ⁸ Misupak sa Dios ang katawhan sa Jerusalem ug ang ubang mga lungsod sa Juda, tungod kay ang tanan nga gibuhat ug gisulti sa katawhan didto batok man kang Yahweh, ang gamhanan ug mahimayaon, ug midumili sila sa pagsunod kaniya. Nagrebelde sila batok kaniya. ⁹ Gipakita nila diha sa ilang mga nawong nga nagsukol sila kang Yahweh. Nagpasigarbo sila sa ilang mga sala, sama sa katawhan sa Sodoma sa dugay nang panahon; wala sila nagsulay sa pagtago sa ilang mga sala; naghisgot sila mahitungod niini. Tungod sa ilang mga sala, makalilisang gayod nga mga butang ang mahitabo ngadto kanila. ¹⁰ Kamo nga katawhan kinahanglan nga sultihan ninyo ang matarong nga mga tawo nga maayo nga mga butang ang mahitabo ngadto kanila; magpahimulos sila sa mga panalangin nga ilang madawat tungod sa maayo nilang mga binuhatan. ¹¹ Apan makalilisang nga mga butang ang mahitabo ngadto sa daotang mga tawo; balosan sila ni Yahweh sa daotang mga butang nga ilang nabuhat. ¹² Tagdon sa mga batan-on nga mahimong mga pangulo ang akong katawhan pinaagi sa kabangis, ug mga babaye ang magdumala sa akong katawhan. Gipahisalaag kamo, sa inyong mga pangulo akong katawhan; gipabuhat nila kamo sa tanang matang sa daotang mga butang. ¹³ Daw miadto si Yahweh sa hukmanan ug andam na sa pag-akusar sa iyang katawhan tungod sa paglapas nila sa kasabotan tali kaniya. ¹⁴ Motindog siya aron sa pagmantala nganong kinahanglan silotan niya ang mga kadagkoan ug mga tigdumala sa iyang katawhan; miingon siya, "Nahisama sa usa ka parasan ang katawhan sa Jerusalem nga akong gitanom, apan kamo nga mga pangulo ang hinungdan nga dili kini mamunga. Napuno ang inyong mga balay sa mga butang nga inyong kinawat gikan sa mga kabos. ¹⁵ Kinahanglan nga undangon ninyo ang pagpaantos sa akong katawhan. Sama lamang nga inyong giduot ang mga nawong sa mga kabos ngadto sa yuta." Mao kini ang giingon ni Yahweh nga pangulo sa mga kasundalohang anghel. ¹⁶ Miingon si Yahweh niini: "Mapahitas-on ang mga babaye sa Jerusalem; hambog kaayo silang molakaw, ug nag-inigat sila sa mga lalaki pinaagi sa ilang mga kidhat. Naglakaw sila nga hinay aron motagingting ang mga alahas nga anaa sa ilang tiil." ¹⁷ Busa panukahan sa Ginoo ang ilang mga ulo, ug upawan niya kadtong maanyag nga mga babaye. ¹⁸ Sa dihang buhaton kana sa Ginoo nianang panahona, ipakuha usab niya sa uban gikan sa mga babaye sa Jerusalem ang tanang nindot nga mga butang nga gusto nilang suoton—ang mga dayandayan nga anaa sa ilang mga tiil ug sa ulo, ang ilang mga kuwentas, ¹⁹ ang ilang mga ariyos ug mga pulsiras ug mga tabon sa nawong, ²⁰ ang ilang mga panyo ug mga alahas nga anaa sa tiil ug mga bakos, ang ilang mga pahumot ug ang mga habak. ²¹ Ipatanggal niya sa lain ang mga singsing sa mga babaye ug mga singsing nga anaa sa ilong, ²² ang nindot nilang mga kupo ug mga kapote ug mga tabon sa nawong, ug mga puntil, ²³ ang ilang mga samin ug nindot nga mga sinina nga lino, ang mga dayandayan sa ilang mga ulo, ug ang dakong mga panyo. ²⁴ Imbis nga humot sila pinaagi sa pahumot, manimaho sila; imbis nga nindot nga mga bakos, mga pisi ang ilibot sa ilang mga hawak. Imbis nga maayong pagkasudlay sa ilang mga buhok, mangaopaw hinuon sila. Imbis nindot nga mga kupo, magsuot sila ug sako, imbis nga kaanyag, mga ulat sa pagpaso. ²⁵ Mangamatay ang inyong mga lalaki pinaagi sa mga espada sa ilang mga kaaway, ug mangamatay usab ang inyong mga sundalo didto sa gubat. ²⁶ Magbangotan ug maghilak ang mga tawo diha sa mga ganghaan sa siyudad. Mahisama ang siyudad sa usa ka babaye nga naglingkod sa yuta tungod kay gibiyaan siya sa tanan niyang mga higala.

Chapter 4

¹ Sa dihang mahitabo kana, pipila na lamang ang mga lalaki nga wala pa naminyo. Busa pito ka mga babaye nga wala naminyo ang mogunit sa usa ka lalaki ug moingon, "'Tugoti kami nga makigminyo kanimo! Mangita kami sa kaugalingon namong mga pagkaon ug mga sinina. Ang gusto lamang namo nga dili na kami maulawan pinaagi sa pagpabiling dalaga.'' ² Apan sa umaabot, mahimong maanyag kaayo ug bantogan ang Israel. Magpasigarbo sa maayong abot sa ilang yuta ang mga tawo sa Israel nga nahibilin didto. ³ Mahisakop sa Ginoo ang tanang mga tawo nga mahibilin sa Jerusalem, nga wala namatay sa dihang gilaglag sa kaaway ang Jerusalem—kadtong tanang mga ngalan nga nalista taliwala niadtong nagpuyo didto. ⁴ Mahitabo kana sa dihang hinloan sa Ginoo ang sala sa mga babaye sa Jerusalem, ug sa dihang undangon niya ang kasamok diha sa kadalanan sa Jerusalem pinaagi sa pagsilot sa katawhan sa Jerusalem. Sa dihang buhaton niya kana, mahisama kini sa kalayo nga mosunog sa tanang hugaw nga mga butang. ⁵ Unya magpadala si Yahweh ug panganod nga aso panahon sa adlaw ug nagdilaab nga kalayo panahon sa kagabhion aron sa pagtabon sa Jerusalem ug sa tanan nga nagtigom didto; mahisama kini sa tabon ibabaw sa mahimayaong presensya sa Dios diha sa siyudad. ⁶ Motabon kini sa katawhan gikan sa kainit sa adlaw ug mosalipod kanila kung adunay mga bagyo ug ulan.

Chapter 5

¹ Karon moawit ako ug usa ka awit mahitungod kang Yahweh, ang gihigugma nakong higala, ug mahitungod sa iyang parasan. Anaa ang parasan sa tabunok kaayo nga bakilid. ² Gidaro sa akong higala ang yuta ug gipangkuha ang mga bato. Unya gitamnan niya ug pinakamaayong paras ang maong yuta. Sa taliwala sa parasan, gitukoran niya ug bantayang tore, ug nagkalot siya ug pug-anan sa ubas. Unya nagpaabot siya matag tuig aron sa pagpupo ug pipila ka maayo nga mga ubas, apan namunga lamang ang paras ug aslom nga mga ubas. ³ Karon kini ang giingon sa akong higala nga si Yahweh: "Kamo nga katawhan sa Jerusalem ug uban nga mga dapit sa Juda, sama kamo sa akong parasan; busa hukmi kami kung kinsa kanamo ang nagbuhat ug matarong. ⁴ Unsa pa man ang akong buhaton alang kaninyo nga wala pa nako nabuhat? Nagdahom ako kaninyo nga mobuhat ug maayong mga binuhatan, apan dulomtanan gayod nga nagbuhat lamang kamo ug daotan nga mga binuhatan sama sa parasan nga namunga lamang ug aslom nga mga ubas! ⁵ Busa, sultihan ko kamo karon kung unsa ang akong buhaton sa Juda, ang dapit nga sama sa akong parasan. Putlon ko ang mga koral, ug mahimong sibsibanan ang akong parasan. Gun-obon ko ang mga pader sa mga siyudad ug tugotan ko ang ihalas nga mga mananap aron sa pagtunobtunob sa yuta. ⁶ Himoon ko kini nga kamingawan diin dili na pul-ongan ang mga paras ug dili na bungkalon ang yuta. Mahimo kining dapit diin moturok ang mga sampinit ug mga tunok. Ug magmando ako nga dili na kini maulanan." ⁷ Sama sa parasan ni Yahweh nga pangulo sa kasundalohang anghel ang nasod sa Israel. Sama sa tanaman nga nakapahimuot kaniya ang katawhan sa Juda. Nagdahom siya kanila nga mobuhat kung unsa ang maayo, apan nakita niya nga gipatay sa mga tawo ang uban. Nagdahom siya nga mobuhat sila ug maayo nga mga binuhatan, apan nadungog niya ang singgit sa pagpakitabang, kay gisulong sila sa uban. ⁸ Makalilisang nga mga butang ang mahitabo niadtong nagpadaghan ug mga balay ug mga uma nga wala naghatag ug pagtagad sa mga balaod mahitungod sa nanag-iya sa yuta. Gigamit ninyo ang inyong mga bahandi aron sa pag-angkon sa daghang mga kabtangan, ug sa dili madugay wala nay kabtangan aron paliton sa uban, ug kamo na lamang ang manag-iya sa yuta nianang dapita. ⁹ Apan nadungog nako si Yahweh nga pangulo sa kasundalohang anghel, nga maligdong nga mipahayag niini: "Sa umaabot, daghang mga balay nga wala nay mopuyo niini, bisan ang dako ug nindot nga mga balay. ¹⁰ Ang yuta nga tamnan ug mga paras niini nga dapit nagkinahanglan ug napulo ka paris nga mga baka sa pagtrabaho niini, apan dili na mohatag ug igong abot nga ubas kini nga yuta aron himoon nga bisan lamang 20 ka litro nga bino. Sa dihang itanom ang napulo ka bukag nga trigo niana nga yuta, moani lamang kana nga yuta ug usa ka bukag panahon sa ting-ani. ¹¹ Makalilisang nga mga butang ang mahitabo niadtong magsayo ug bangon matag buntag aron sa pagsugod ug inom sa makahubog nga mga ilimnon, ug kadtong dugay matulog panahon sa kagabhion aron sa pag-inom ug daghang bino hangtod nga mahubog sila pag-ayo. ¹² Aduna silay dakong mga kombira ug aduna silay daghang bino. Sa ilang mga kombira, adunay mga tawo nga nagpatugtog ug mga alpa ug mga lira ug mga tamborin ug mga plawta, apan wala sila naghunahuna kung unsa ang gibuhat ni Yahweh o gidayeg kung unsa ang iyang gibuhat. ¹³ Busa bihagon ang akong katawhan sa halayong dapit kay wala sila nasayod mahitungod kanako. Kadtong mahinungdanon kaayo ug pinasidunggan karon magutman, ug mamatay sa kauhaw ang ubang mga tawo. ¹⁴ Ingon nga nagtinguha ang dapit diin mahimutang ang patay nga mga tawo sa pagpangita sa daghang Israelita, nga nagnganga aron sa paglamoy kanila, ug ilabay niana nga dapit ang daghan kaayong mga tawo, apil ang ilang mga pangulo ingon man ang masaba nga pundok sa katawhan nga malipayong nagpuyo sa Jerusalem. ¹⁵ Ipaubos ni Yahweh ang tanan; ipaubos niya ang tanan nga mga garboso. ¹⁶ Apan pasidunggan si Yahweh sa tanan, ang pangulo sa kasundalohang anghel, ang Usa ka Balaan, kay nagbuhat siya ug makiangayon. Ipakita sa Dios nga balaan siya pinaagi sa pagbuhat ug maayo nga mga binuhatan. ¹⁷ Unya ang mga karnero ug ang mga nati makakita ug maayong sagbot aron sibsibon; moagi sila sa guba nga mga dapit aron manibsib. ¹⁸ Daghan nga mga tawo ang nagpakasala pag-ayo, sama nga nagkugi sila sa pagguyod sa sayop ug walay pulos nga mga butang nga ilang gibuhat. Makalilisang nga mga butang ang mahitabo ngadto kanila! ¹⁹ Gibugalbugalan nila ang Dios ug nag-ingon ngadto kaniya, "Paghimo dayon ug usa ka butang aron sa pagsilot kanamo! Gusto kami nga makakita kung unsa ang imong buhaton. Ikaw, nga Usa ka Balaan sa Israel, kinahanglan nga imong buhaton kung unsa ang imong giplano nga buhaton, kay gusto kaming masayod kung unsa kini." ²⁰ Makalilisang nga mga butang ang mahitabo niadtong nag-ingon nga maayo ang daotan, ug daotan ang maayo, ug ang kangitngit ingon nga kahayag ug ang kahayag ingon nga kangitngit, ug ang pait ingon nga tam-is ug kung unsa ang tam-is mao ang pait. ²¹ Makalilisang nga mga butang ang mahitabo niadtong naghunahuna nga maalamon ug maabtik kaayo ang ilang hunahuna. ²² Makalilisang nga mga butang ang mahitabo niadtong naghunahuna nga mga bayani sila kay makahimo sila sa pag-inom ug daghang bino, ug kadtong nagpahambog nga makahimo sila sa pagtimpla ug maayong ilimnon nga makahubog. ²³ Kung tanyagan sa mga tawo ug kwarta kining daotan nga mga maghuhukom aron dili nila silotan ang daotan, dawaton nila ang kwarta. Mao lamang kini nga mga maghuhukom ang nagsilot sa walay sala nga mga tawo. ²⁴ Busa, ingon nga ang kalayo mougdaw sa dagami ug mauga ang mga sagbot ug dali masunog sa kalayo, daw adunay mga gamot nga nadugta ug nalaya nga mga bulak kadtong mga tawhana. Mahitabo kana kay gisalikway nila ang mga balaod ni Yahweh, nga pangulo sa kasundalohang anghel; gitamay nila ang mga mensahe sa Usa ka Balaan sa Israel. ²⁵ Mao nga hilabihan ang kasuko ni Yahweh sa iyang katawhan; nga daw gipataas niya ang iyang kamot ug andam na siya aron sa pagdapat kanila. Sa dihang buhaton niya kana, mokurog ang kabukiran, ug magkatag sa kadalanan ang mga patayng lawas sa mga tawo sama sa hugaw sa mananap. Apan bisan mahitabo kana, masuko gihapon pag-ayo si Yahweh; moandam siya aron sa pagsilot pag-usab sa iyang katawhan. ²⁶ Mopadala si Yahweh ug timailhan aron ipadala ang kasundalohan sa halayong mga nasod; daw taghoyan niya kadtong mga sundalo nga anaa sa halayong mga dapit sa kalibotan. Moabotay sila nga kusog kaayo padulong sa Jerusalem. ²⁷ Dili sila kapoyan o mapandol. Dili sila mohunong aron mopahulay o matulog. Walay usa kanila nga moluag ang iyang bakos, ug walay usa kanila nga mabugto ang mga liston sa iyang mga sandalyas, busa andam na silang tanan aron sa pagpakig-away sa gubat. ²⁸ Hait ang ilang mga udyong, ug andam na nga mopana ang mga udyong diha sa gubat ang ilang mga pana. Kay kusog nga nagguyod ug mga karwahe ang ilang mga kabayo, mogawas ang mga gilak sa mga koko niini, ug ang mga ligid sa mga karwahe motuyok sama sa mga alimpulos. ²⁹ Mongulob sila sama sa bangis nga mga liyon nga nagpaghot ug unya gukdon ang mga mananap nga gusto nilang patyon; tangagon nila kini, ug walay makaluwas niini. ³⁰ Sa samang paagi, magngulob ang inyong mga kaaway ibabaw sa mga tawo nga ilang patyon, sama sa dagat nga nagngulob. Nianang adlawa, kung motan-aw ang usa ka tawo ibabaw sa yuta, makita lamang niya ang mga tawo nga anaa sa kangitngit nga nag-antos; ingon nga ang kahayag sa adlaw matabonan pinaagi sa mga dag-om.

Chapter 6

¹ Sa tuig nga namatay si Haring Uzia, nagpakita ug panan-awon si Yahweh kanako. Sa panan-awon, nakita ko si Yahweh nga naglingkod sa usa ka trono, hataas labaw sa tanan. Nagbisti siya ug taas kaayo nga kupo nga milukop sa salog sa templo. ² Sa ibabaw niya adunay naglupadlupad nga pipila ka mga binuhat nga adunay pako. Ang matag usa kanila adunay unom ka mga pako. Nagtabon ang duha ka pako sa ilang mga nawong, ug ang duha ka mga pako nagtabon sa ilang mga tiil, ug naglupad sila gamit ang duha nila ka mga pako. ³ Nagtinawagay sila sa usag usa, nga nag-ingon, "Yahweh, pangulo sa kasundalohang anghel, balaan; hingpit siya nga balaan! Nalukop ang tibuok kalibotan sa iyang himaya." ⁴ Sa dihang misulti sila, ang tingog sa ilang panaghilak nakapauyog sa kinahiladman sa patukoranan sa pultahan sa templo, ug napuno sa aso ang templo. ⁵ Unya miingon ako, "Makalilisang nga mga butang ang mahitabo kanako, tungod kay sala ang tanan nakong gipanulti, ug nagpuyo ako uban sa mga tawong kanunay nagsulti ug makasasalang mga butang. Malaglag ako tungod kay nakita ko si Yahweh, ang pangulo sa kasundalohang mga anghel!" ⁶ Unya mikuha ang usa sa mga binuhat nga adunay pako ug init nga uling gikan sa halaran, gamit ang paris nga kumpit. Milupad siya paingon kanako ⁷ ug gidapat niya ang uling sa akong mga ngabil. Unya miingon siya, "Tan-awa, kini nga uling midapat sa imong mga ngabil. Karon nawala na ang imong kalapasan, ug gipasaylo na ang imong mga sala." ⁸ Unya nadungog ko nga nangutana si Yahweh, "Kinsa man ang akong ipadala aron mamahimong mensahero alang sa akong katawhan? Kinsa man ang molakaw ug mosulti alang kanato?" Mitubag ako, "Ania ako. Ako ang ipadala!" ⁹ Unya miingon siya, "Lakaw ug sultihi ang katawhan sa Israel, 'Paminawa pag-ayo kung unsa ang akong isulti, apan dili kamo makasabot niini. Motan-aw kamo pag-ayo, apan dili kamo makasabot.' ¹⁰ Himoon ko kamong katawhan nga dili na manumbaling, dili na makadungog, ug dili na makakita. Kon ugaling makakita kamo ug makabalo kung unsa ang inyong gitan-aw, ug makadungog ug makasabot kung unsa ang inyong nadunggan, ug matinud-anon kamong nanumbaling inubanan sa pagsabot, ug basin mobalik kamo kanako aron sa pagluwas kaninyo ug dili kamo silotan." ¹¹ Unya miingon ako, "Hangtod kanus-a mo man ako gusto nga magpadayon sa paghimo niana?" Mitubag siya, "Buhata kini hangtod gun-ubon sa ilang mga kaaway ang ilang mga siyudad, hangtod wala nay mamuyo sa ilang mga balay, buhata kini hangtod kawaton ang ilang mga tanom gikan sa ilang kaumahan ug madaot na ang ilang mga uma. ¹² Buhata kini hangtod abogon ni Yahweh sa layong dapit ang tanan, ug mahimong biniyaan ang tibuok yuta sa Israel. ¹³ Bisan pa ug adunay makalingkawas nga 1/10 ug magpuyo didto, sulongon pag-usab sa ilang mga kaaway ang yuta ug sunogon ang tanang butang. Apan sama sa dihang putlon nila ang kahoy nga akasya ug magpabilin ang tuod, ug manalingsing ang bag-ong mga sanga gikan niana, ang katawhan nga nahibilin niining yutaa mahimong usa ka pundok nga gitagana alang kanako."

Chapter 7

¹ Si Ahaz mao ang anak nga lalaki ni Jotam ug ang apo nga lalaki ni Uzia. Sa panahon nga si Ahaz mao ang hari sa Juda, nagmartsa si Haring Rezin sa Aram ug si Haring Peka sa Israel uban sa ilang kasundalohan aron sa pagsulong sa Jerusalem. Apan dili nila kini mapildi. ² Sa wala pa sila misulong, nabalitaan sa tanan nga anaa sa palasyo sa Jerusalem nga kaabin na ang Aram ug ang Israel. Busa nahadlok pag-ayo si Haring Ahaz ug ang katawhan nga iyang gidumalahan; nangurog sila sama sa mga kahoy nga nangauyog sa alimpulos. ³ Unya miingon si Yahweh kanako, "Dad-a ang imong anak nga lalaki nga si Shear Jashub, ug lakaw aron makig-istorya kang Haring Ahaz. Anaa siya sa tumoy sa agianan sa tubig ngadto sa ibabaw nga pundohanan sa tubig, duol sa dalan diin nagalaba ang mga kababayen-an ug mga sinina. ⁴ Sultihi si Ahaz nga dili maguol. Sultihi siya nga dili siya angay mahadlok niadtong duha ka mga hari, nga si Rezin ug si Peka. Nasuko sila pag-ayo sa Juda, apan dili nila malaglag ang iyang nasod nga labaw pa sa napalong nga baga nga magpasakit kaniya. ⁵ Oo, nagplano sila batok kaniya ug miingon, ⁶ 'Sulongon nato ang Juda ug pildihon kini. Unya pilion nato ang anak nga lalaki ni Tabeel aron mahimong hari sa Juda.' ⁷ Apan mao kini ang gisulti ni Yahweh, ang Ginoo: 'Dili kini mahitabo; Dili nila mapildi ang Jerusalem! ⁸ Ang sentrong siyudad sa Aram mao ang Damascus, apan gidumalahan lamang ang Damascus sa dili mahinungdanong hari nga si Rezin. Ug alang sa Israel, mapildi kini sulod sa 65 ka mga tuig ug malaglag sa hingpit. ⁹ Ang sentro sa Israel mao ang Samaria, ug gidumalahan lamang ang Samaria sa dili mahinungdanong hari nga si Peka. Busa dili kamo angay mahadlok niadtong duha ka mga nasod! Apan kinahanglan nga mosalig kamo kanako, kay kung dili kamo mosalig kanako sa hingpit, mapildi gayod kamo.'" ¹⁰ Pagkataodtaod, gihatagan na usab ako ug laing mensahe ni Yahweh aron isulti kang Haring Ahaz. ¹¹ Miingon siya aron nga isulti kaniya, "Paghangyo kanako, si Yahweh nga imong Dios, nga magbuhat ug butang aron masiguro ninyo nga motabang ako kaninyo. Makahimo ka sa pagpangayo kanako sama ka taas sa langit o sama kaubos sa dapit sa mga patay." ¹² Apan sa dihang gisulti ko kana ngadto sa hari, nagdumili siya. Miingon siya, "Dili, dili ako mangayo kang Yahweh aron pagbuhat sa butang nga magpamatuod nga motabang siya kanato." ¹³ Unya miingon ako kaniya, "Kamong katawhan nga kaliwat ni Haring David, paminaw! Gikapoy na ako sa pagpailob kaninyo. Himoon ba usab ninyo ang akong Dios nga moundang sa pagpailob kaninyo? ¹⁴ Mobuhat si Yahweh ug butang alang kaninyo aron sa pagpamatuod nga tabangan kamo niya. Paminaw niini: Magmabdos ang batan-ong babaye ug manganak ug usa ka batang lalaki. Nganlan niya siya ug Immanuel, nagpasabot nga 'Ang Dios uban kanato.' ¹⁵ Sa panahon nga makahimo na sa pagkaon ug keso ug dugos ang bata, makahimo na siya sa pagsalikway kung unsa ang daotan ug sa pagpili kung unsa ang maayo. ¹⁶ Ug sa dili pa makahimo ang bata aron sa pagbuhat niana, mahimo nang biniyaan ang mga yuta sa duha ka mga hari nga inyong gikahadlokan. ¹⁷ Apan tugotan ni Yahweh nga makasinati ang imong pamilya ug ang imong tibuok nasod sa makalilisang nga mga katalagman. Kadto nga mga kalatalagman mas hilabihan pa kaysa bisan unsang katalagman nga nahitabo sukad mibulag ang nasod sa Israel gikan sa Juda. Tugotan ni Yahweh ang kasundalohan sa hari sa Asiria aron sa pagsulong kanimo!" ¹⁸ Nianang taknaa, daw motaghoy si Yahweh aron sa pagpatawag sa kasundalohan gikan sa habagatan sa Ehipto lakip usab ang kasundalohan sa Asiria. Moabot sila ug palibotan ang imong nasod sama sa mga langaw ug mga buyog. ¹⁹ Moabot sila ug mopuyo bisan asa—sa sigpit nga mga walog ug mga langob diha sa kabatoan nga mga pangpang, sa yuta diin adunay mga sampinitan ug ingon usab sa tabunok nga yuta. ²⁰ Nianang panahona suholan ni Yahweh ang hari sa Asiria aron sa pag-adto uban sa iyang kasundalohan gikan sa sidlakan nga bahin sa Suba sa Eufrates. Panglaglagon nila ang tanang butang diha sa imong yuta—ang mga tanom ug katawhan. Gun-obon nila sa hingpit ang tanang butang; mahisama kini sa usa ka tigtupi nga kiskisan dili lamang ang buhok sa ulo sa lalaki apan ang iyang bangas ug ang balahibo sa iyang mga paa. ²¹ Sa dihang mahitabo kana, makabuhi lamang ang mag-uuma ug usa ka nating baka ug duha ka mga kanding. ²² Bisan pa niana, mohatag kadto nga mga hayop ug daghang gatas, hinungdan nga aduna nay mga keso ang mag-uuma aron makaon. Ug tungod kay gamay na lamang ang katawhan nga nahibilin sa yuta, ang tanang katawhan nga nahibilin didto adunay daghang gatas ug dugos. ²³ Karon adunay daghang mga dapit nga adunay mga parasan nga nagkantidad ug 1,000 ka mga plata, apan niana nga panahon mga sampinit ug mga tunok lamang ang anaa sa kaumahan. ²⁴ Aduna lamang mga sampinit ug mga tunok sa tibuok yuta, ug ihalas nga mga mananap, hinungdan nga magdala ang kalalakin-an sa ilang mga pana ug moadto didto aron mangayam ug mopatay sa mga hayop. ²⁵ Wala nay moadto sa dapit nga kaniadto mga tanaman sa tabunok nga kabungtoran, tungod kay lukopon sa mga sampinit ug mga tunok kadto nga mga bungtod. Adunay mga dapit nga pipila na lamang ka mga baka, mga karnero, ug mga kanding nga naglatagaw ug nangitag pagkaon.

Chapter 8

¹ Unya miingon si Yahweh kanako, "Paghimo ug dakong papan nga bato ug sulati kini ug, 'Maher Shalal Hash Baz' nga nagpasabot 'iloga dayon ug kawata ang tanang butang'." ² Busa gihangyo ko si Uria ang labaw nga pari ug ang anak nga lalaki ni Jeberekia nga si Zacarias, mga lalaki nga matinud-anong mga saksi, sa pagbantay kanako samtang nagbuhat ako niana. ³ Unya nakigdulog ako sa akong asawa, nga usa ka propeta, ug nagmabdos ug gihimugso niya ang usa ka lalaki. Unya miingon si Yahweh kanako, "Panganli siya ug Maher Shalal Hash Baz, ⁴ tungod kay sa dili pa siya makahimo sa pagsulti ug 'amahan' o 'inahan', moabot ang hari sa Asiria uban ang iyang kasundalohan ug kuhaon ang tanang bililhong mga butang sa Damascus ug sa Samaria." ⁵ Nakigsulti pag-usab si Yahweh kanako ug miingon, "Sultihi ang katawhan sa Juda. ⁶ Giatiman ko kamo nga katawhan, apan gisalikway ninyo kana, nga naghunahuna nga diyutay lamang ang akong tabang, sama sa gamay nga kanal diin modagayday ang tubig gikan sa tuboran sa Gihon paingon sa Jerusalem. Hinuon, gikalipay ninyo ang pagpangayo ug tabang gikan kang Haring Rezin ug Haring Peka. ⁷ Busa, ako nga Ginoo, motugot sa kusgang kasundalohan sa hari sa Asiria, nga sama sa dakong baha gikan sa Suba sa Eufrates, aron sa pagsulong sa katawhan sa Juda. Ang ilang kasundalohan maanaa sa bisan asa sa inyong nasod, sama sa suba nga moawas sa tanang mga agianan niini. ⁸ Moadto kadto nga mga sundalo sa tibuok Juda, sama sa suba nga mitaas ang tubig nga moabot hangtod sa liog sa usa ka tawo. Mokatag dayon ang ilang kasundalohan sa tibuok yuta, sama sa agila, ug lukopon nila ang tibuok ninyong yuta! Apan ako, nga inyong Dios, magauban kaninyo!" ⁹ Paminaw, kamong tanang katawhan sa layong mga nasod! Pangandam kamo aron sa pagpakig-away, ug pagsinggit kamo alang sa pakiggubat, apan mangapukan ang inyong mga kasundalohan! ¹⁰ Makaandam kamo kung unsa ang inyong buhaton aron sa pagsulong sa Juda, apan walay pulos ang inyong plano nga buhaton! Dili kamo magmalampuson, tungod kay ang Dios magauban kanamo! ¹¹ Nagpahimangno pag-ayo si Yahweh kanako nga dili mobuhat sama sa gibuhat sa katawhan sa Juda. Miingon siya kanako, ¹² "Ayaw pagsulti nga ang tanang butang nga gibuhat sa katawhan sukwahi batok sa panggamhanan, sama sa gisulti sa ubang katawhan, ug ayaw kahadlok sa mga butang nga gikahadlokan sa mga tawo. ¹³ Ako, si Yahweh, ang pangulo sa kasundalohang anghel, ako lamang ang angay ninyong ilhon nga balaan. Ako ang angay ninyong kahadlokan, ang angay ninyong dalangpanan. ¹⁴ Panalipdan kamo ni Yahweh. Apan alang sa ubang katawhan sa Israel ug sa Juda, mahisama si Yahweh sa bato nga mahimong kapandolan sa katawhan. Ug alang sa katawhan sa Jerusalem, mahisama siya sa lit-ag o bitik. ¹⁵ Daghang katawhan ang mapandol ug matumba ug dili na makabangon pagbalik. Makasinati sila ug hilabihang mga kalisdanan; mabihag sila sa ilang mga kaaway." ¹⁶ Busa sultihan ko kamo nga akong mga tinun-an, selyohi kining linukot nga basahon nga akong gisulatan sa mga mensahe nga gihatag sa Dios kanako, ug sa paghatag sa iyang mga panudlo ngadto sa uban nga mikuyog kanako. ¹⁷ Mohulat ako aron makita ang buhaton ni Yahweh. Gisalikway niya ang mga kaliwat ni Jacob, apan mosalig ako nga tabangan niya ako. ¹⁸ Ako ug ang kaanakan nga gihatag ni Yahweh kanako sama sa mga timailhan aron pagpahimangno sa katawhan sa Israel; mga pahimangno kita gikan kang Yahweh, ang pangulo sa kasundalohang anghel, siya nga nagpuyo sa iyang templo didto sa Bukid sa Zion sa Jerusalem. ¹⁹ Pipila ka mga tawo ang modasig kaninyo aron magpakigsayod niadtong makaistorya sa mga espiritu sa patay nga mga tawo o niadtong moingon nga nakadawat sila ug mga mensahe gikan niadto nga mga espiritu. Maghunghong ug magyamyam sila mahitungod sa angay natong buhaton sa umaabot. Apan ang Dios lamang ang angay natong pangutan-on aron sa paggiya kanato! Kataw-anan kini alang sa katawhan nga buhi pa nga mangutana sa mga espiritu sa patay nga mga tawo mahitungod sa unsa ang angay natong buhaton! ²⁰ Hatagi ug pagtagad ang mga panudlo sa Dios ug ang iyang mga pagtulon-an! Kung dili magsulti ang katawhan sa mga butang nga uyon sa gitudlo sa Dios kanato, walay pulos ang ilang gipanulti. Daw anaa sa kangitngit kadto nga katawhan. ²¹ Maglatagaw sila sa yuta nga magul-anon ug gipanggutom. Sa dihang gutomon sila pag-ayo, mahimo silang masuk-anon pag-ayo. Mohangad sila sa langit ug tunglohon ang Dios ug tunglohon usab ang ilang hari. ²² Molantaw sila palibot sa yuta ug makita lamang ang kalisdanan ug kangitngit ug mga butang nga maoy hinungdan sa ilang kagul-anan. Ug ilabay sila didto sa hilabihan nga kangitngit.

Chapter 9

¹ Bisan paman niana, kadtong anaa sa kasakit diha sa Juda dili na magpadayon sa pag-antos. Kaniadto, gipaubos ni Yahweh ang katawhan sa yuta diin nagpuyo ang mga tribo ni Zebulun ug Neftali. Apan sa umaabot pasidunggan niya ang katawhan nga nagpuyo sa rehiyon sa Galilea, subay sa dalan taliwala sa Suba sa Jordan ug sa Dagat sa Mediteraneo, diin namuyo ang mga langyaw. ² Sa umaabot, ang katawhan nga daw naglakaw diha sa kangitngit makakita na ug kahayag. Oo, modan-ag ang kahayag niadtong nagpuyo sa yuta diin adunay dakong kalisod karon. ³ Yahweh, pagalipayon mo kami nga katawhan sa Israel; malipay gayod kami pag-ayo. Maglipay kami tungod sa imong gibuhat sama sa katawhan nga naglipay sa dihang nag-ani sila sa ilang mga tanom, o sama sa mga sundalo nga naglipay sa dihang nagbahin-bahin sila sa mga butang nga ilang nailog sa gubat. ⁴ Dili na nimo kami himoon nga mga sulugoon niadtong mibihag kanamo; pagakuhaon mo ang bug-at nga mga palas-anon gikan sa among mga abaga. Ingon nga daw imong gub-on ang mga hinagiban niadtong nagdaugdaog kanamo, sama sa imong gibuhat sa dihang imong gilaglag ang kasundalohan sa katawhan sa Midian. ⁵ Pagasunogon ang mga botas nga gisuot sa kaaway nga kasundalohan ug ang ilang mga bisti nga adunay mga mantsa sa dugo niini; himoon silang sugnod alang sa dakong kalayo. ⁶ Laing hinungdan nga maglipay kita mao nga matawo ang usa ka pinasahi nga bata alang kanato, manganak ang usa ka babaye ug usa ka batang lalaki, ug mahimo nato siyang tigdumala. Ug ang iyang ngalan mao ang 'Kahibulongang Magtatambag,' 'Dios nga Makagagahom,' 'Atong Amahan sa Walay Kataposan,' ug 'Ang Hari nga maghatag kanato ug Kalinaw.' ⁷ Dili matapos ang iyang pagdumala ug ang kalinaw nga iyang gidala. Makiangayon ug makataronganon ang iyang pagdumala, sama sa gibuhat sa iyang katigulangan nga si Haring David. Mahitabo kini tungod kay si Yahweh, nga pangulo sa kasundalohang anghel, nagtinguha pag-ayo nga mahitabo kini. ⁸ Gipahimangnoan sa Ginoo ang mga kaliwat ni Jacob; miingon siya nga iyang silotan ang Israel. ⁹ - ¹⁰ Ug masayod niana ang tanang katawhan sa Samaria ug sa ubang mga dapit sa Israel, apan hilabihan na karon ang ilang pagkamapasigarbohon ug pagkamapahitas-on. Miingon sila, "Nalaglag ang atong siyudad, apan kuhaon nato ang mga buak nga mga tisa gikan sa mga naguba ug ilisan kini ug maayong tinabas nga mga bato. Gipamutol sa atong mga kaaway ang atong sikamoro nga mga kahoy, apan magtanom kita ug sedro nga mga kahoy puli niini." ¹¹ Apan pagadad-on ni Yahweh ang kasundalohan sa Asiria, ang kaaway ni Haring Rezin sa Aram, aron sa pagpakig-away batok sa Israel ug sa pag-awhag sa laing mga nasod aron sa pagsulong sa Israel. ¹² Moabot gikan sa sidlakan ang kasundalohan sa Aram, ug moabot gikan sa kasadpan ang kasundalohan sa Filistia, ug laglagon nila ang Israel sama sa ihalas nga hayop nga magkunis-kunis sa laing hayop ug lamoyon kini. Apan bisan ug nahitabo kana, hilabihan pa gihapon ang kasuko ni Yahweh kanila. Andam siya sa pagsilot kanila pag-usab. ¹³ Apan bisan pa man ug silotan ni Yahweh ang iyang katawhan ug sama niana, dili gihapon sila mobalik ug mosimba kaniya. Dili gihapon sila mohangyo kang Yahweh, ang pangulo sa kasundalohang angel, sa pagtabang kanila. ¹⁴ Busa, pagapatyon ni Yahweh kadtong sama sa ulo sa Israel ug kadtong sama sa ikog niini sa usa lamang ka adlaw; kadtong sama sa tumoy ug sa ilalom sa palmera nga kahoy. ¹⁵ Ang mga pangulo sa Israel mao ang ulo, ug ang mga propeta nga nagasulti ug bakak mao ang ikog. ¹⁶ Gipahisalaag sila sa mga pangulo sa katawhan; gilibog nila ang mga tawo nga ilang gidumalahan. ¹⁷ Hinungdan niana, wala nahimuot si Yahweh sa mga batan-ong kalalakin-an sa Israel, ug wala siya nagpakita ug kaluoy niadtong mga balo ug mga ilo, tungod kay silang tanan dili diosnon ug mga daotan, ug nagsulti sila sa binuang nga mga butang. Apan nasuko gihapon si Yahweh kanila; andam siya sa pagsilot kanila pag-usab. ¹⁸ Sa dihang maghimo ang katawhan ug daotang mga butang, sama kini sa kalayo diha sa kasagbotan nga dali mokuyanap. Dili lamang ang mga sampinit ug mga tunok ang gisunog niini; nagsugod kini sa pagsilaob diha sa kalasangan diin moulbo ang panganod sa aso gikan niini. ¹⁹ Daw naugdaw ang tibuok yuta tungod kay si Yahweh, ang pangulo sa kasundalohang anghel, nasuko pag-ayo sa mga Israelita. Sila sama sa sugnod alang sa dakong kalayo, ug walay bisan usa nga mosulay sa pagluwas bisan pa ang iyang kaugalingong igsoon gikan niana nga kalayo. ²⁰ Sulongon sa mga Israelita ang ilang mga silingan nga nagpuyo sa tuong bahin nga mga balay aron sa pagkuha ug pagkaon gikan kanila, apan gutomon gihapon sila. Pamatyon nila ug pangaonon ang mga unod niadtong nagpuyo sa walang bahin nga mga balay, apan dili gihapon sila mabusog. ²¹ Magsinulongay ang mga Israelita nga tribo ni Manases ug Efraim, ug unya sulongon nila ang katawhan sa Juda. Apan bisan nahitabo na kana, hilabihan pa gihapon ang kasuko ni Yahweh kanila; Andam siya sa pagsumbag kanila pag-usab.

Chapter 10

¹ Makalilisang nga mga butang ang mahitabo kaninyo nga mga maghuhukom nga naghimo ug dili makataronganon ug dili makiangayon nga mga balaod. ² Nagdumili kamo sa pagtabang sa mga kabos nga katawhan, ug wala ninyo sila tugoti sa pagkuha sa mga butang nga angay nilang kuhaon. Gitugotan ninyo ang katawhan sa pagkawat ug mga butang gikan sa mga balo ug paghimo sa dili makiangayon nga mga butang ngadto sa mga ilo. ³ Sa dihang silotan ko kamo pinaagi sa pagpadala ug mga tawo gikan sa layong dapit aron magdala kaninyo ug mga katalagman, kang kinsa man kamo mangayo ug tabang? Makawat gayod ang inyong bililhong mga kabtangan bisan asa ibutang. ⁴ Madagma ka lamang samtang ang imong mga kaaway magdala kanimo uban sa laing mga binilanggo, o kondili magbuy-od sa yuta ang inyong mga patayng lawas uban sa mga tawo nga gipamatay. Apan human kana mahitabo, masuko pa gihapon pag-ayo si Yahweh kaninyo; Andam siya sa pagsumbag pag-usab kaninyo. ⁵ Miingon si Yahweh, "Mahitabo ang makalilisang nga mga butang sa Asiria. Tinuod nga ang ilang kasundalohan sama sa sungkod o bunal nga akong gigamit sa pagsilot sa ubang mga nasod tungod kay nasuko ako pag-ayo niadto nga mga nasod. ⁶ Usahay ipadala ko ang mga taga-Asiria aron sa pagsulong sa kanasoran nga walay dios, aron sa pagpakig-away batok sa ubang katawhan nga nagpasuko kanako. Gipadala ko sila aron sa pagbihag sa katawhan ug sa pagkuha sa ilang mga kabtangan, ug sa pagtamak-tamak kanila sama sa katawhan nga naglakaw diha sa lapok sa kadalanan. ⁷ Apan wala nakasabot ang hari Asiria; wala siya masayod nga sama lamang siya sa hinagiban sa akong kamot. Gusto lamang siya mopatay sa katawhan, sa paglaglag sa daghang kanasoran. ⁸ Miingon siya, 'Mahimong mga hari ang tanan nakong mga pangulo sa kasundalohan niini nga mga nasod nga akong napildi! ⁹ Gilaglag namo ang siyudad sa Calno ingon sa among paglaglag sa siyudad sa Carkemis. Gilaglag namo ang siyudad sa Hamat ingon sa among paglaglag sa siyudad sa Arpad; gilaglag namo ang Samaria sama sa among paglaglag sa Damascus. ¹⁰ Nalaglag na namo ang tanang gingharian nga puno sa mga imahe sa ilang mga dios, mga gingharian nga mas kusgan pa ang mga dios kaysa sa mga dios sa Jerusalem ug Samaria. ¹¹ Busa pildihon nato ang Jerusalem ug gub-on ang mga imahe sa mga dios nga anaa didto, sama sa atong paglaglag sa Samaria ug sa mga imahe nga anaa didto!' ¹² Apan ako ang Ginoo, ug human ko gamita ang Asiria sa paghuman sa akong gusto buhaton aron sa pagsilot sa katawhan sa Jerusalem, pagasilotan ko ang hari sa Asiria tungod kay mapasigarbohon kaayo siya ug mapahitas-on. ¹³ Miingon siya, 'Nabuhat ko kining mga butanga pinaagi sa akong dakong gahom. Nabuhat ko kini tungod kay maalamon ug utokan kaayo ako. Gikuha sa akong kasundalohan ang mga babag sa mga utlanan sa kanasoran ug gidala ang tanan nilang bililhong mga butang. Gipakaulawan sa akong kusgang kasundalohan ang tanan nilang katawhan. ¹⁴ Sama sa usa ka tawo nga nakakab-ot sa salag sa langgam aron sa pagkuha sa mga itlog niini, gikuha usab namo ang mga bahandi sa ubang mga nasod. Dili sama sa mga langgam ang katawhan nga mokapakapa sa ilang mga pako o mopiyak aron makiglalis mahitungod sa ilang mga itlog nga gikawat; wala gayod mikontra ang mga tawo nga gipangkawatan sa ilang mga bahandi.' ¹⁵ Apan ako si Yahweh, ug miingon ako nga ang usa ka atsa dili gayod makapasigarbo nga kusgan labaw pa sa tawo nga naggamit niini, ug ang gabas dili labaw sa tawo nga naggamit niini. Dili makapugong ang sungkod sa tawo nga naggunit niini, ug ang kahoy nga bunal dili makaalsa sa usa ka tawo. Busa dili angay magpasigarbo ang hari sa Asiria nga gibuhat niya kining mga butanga pinaagi lamang sa iyang kaugalingong kaalam ug kusog. ¹⁶ Ako si Yahweh nga Ginoo, ang pangulo sa kasundalohang anghel, nga magpadala ug hampak taliwala sa pinakamaayong mga sundalo sa Asiria; sama kini sa kalayo nga mopatay kanila ug molaglag sa ilang himaya. ¹⁷ Sama sa kahayag si Yahweh alang sa katawhan sa Israel, sama sa kalayo; ang Balaang Dios nga nagdumala sa Israel sama sa dilaab sa kalayo. Ang kasundalohan sa Asiria sama sa mga tunok ug mga sampinit, ug pagasunogon sila ni Yahweh sa usa lamang ka adlaw. ¹⁸ Adunay mahimayaong kalasangan ug tabunok nga kaumahan sa Asiria, apan pagalaglagon kini ni Yahweh sa hingpit; sama sila sa masakiton kaayo nga tawo nga nagtinga ug unya namatay. ¹⁹ Pipila na lamang ka mga kahoy ang mahibilin niadto nga kalasangan; bisan pa ang bata makahimo sa pag-ihap niini." ²⁰ Sa umaabot pipila na lamang ang mahibilin sa katawhan sa Israel; diyutay na lamang ang buhi sa mga kaliwat ni Jacob. Apan dili na sila magsalig pa sa hari sa Asiria, ang hari sa nasod nga misulay sa paglaglag kanila. Hinuon, magmatinud-anon sila sa pagsalig kang Yahweh, Siya nga Balaan nga nagdumala sa Israel. ²¹ Mobalik kadto nga mga Israelita sa ilang Dios nga makagagahom. ²² Karon, ang katawhan sa Israel daw sama kadaghan sa mga lugas sa mga balas sa baybayon, apan pipila lamang kanila ang mobalik gikan sa mga nasod diin sila bihagon. Nakahukom na si Yahweh sa paglaglag sa halos tanang Israelita, ug mao kana ang angay niyang buhaton tungod kay makiangayon gayod siya. ²³ Oo, nakahukom na si Yahweh nga Ginoo, ang pangulo sa kasundalohang anghel sa paglaglag sa tibuok yuta sa Israel. ²⁴ Mao kini ang gisulti ni Yahweh nga Ginoo, ang pangulo sa kasundalohang anghel: "Akong katawhan sa Jerusalem, ayaw kahadlok sa kasundalohan sa Asiria sa dihang bunalan kamo pinaagi sa mga tungkod ug mga bunal, sama sa gibuhat kaniadto sa katawhan sa Ehipto ngadto sa inyong katigulangan. ²⁵ Sa dili madugay mawala na ang akong kasuko kaninyo, ug unya masuko na ako sa katawhan sa Asiria ug pagalaglagon sila!" ²⁶ Si Yahweh, ang pangulo sa kasundalohang anghel, molatos kanila pinaagi sa iyang latigo. Buhaton niya ngadto kanila ang sama sa iyang gibuhat sa dihang gipildi niya ang kasundalohan sa mga Midianhon, ug sama sa iyang gibuhat sa dihang iyang gitugotan ang kasundalohan sa Ehipto nga malumos sa Dagat sa Kabugangan. ²⁷ Sa umaabot nga adlaw, pahunongon ni Yahweh ang kasundalohan sa Asiria sa pagdaugdaog kaninyo, kamo nga iyang katawhan; taposon niya ang inyong mga pag-antos ug ang inyong pagkaulipon sa katawhan sa Asiria; mahimo kamong mas kusgan pa kay kanila. ²⁸ Usa ka adlaw sa umaabot mao kini ang mahitabo: misulod ang kasundalohan sa Asiria didto sa amihanang bahin sa Juda duol sa Ayat; nangagi sila sa Migron ug gibilin ang ilang mga gamit sa Micmas, sa amihanang bahin sa Jerusalem. ²⁹ Nangagi sila sa bukid ug nagtukod sa ilang mga tolda sa Geba. Magkurog ang katawhan sa Rama tungod kay nahadlok sila. Miikyas ang katawhan sa Gibea, diin gihimugso si Haring Saul. ³⁰ Magpakitabang kamong katawhan sa Galim! Maninggit sila sa katawhan sa siyudad sa Lais duol sa Jerusalem aron sa pagpahimangno kanila! Mag-antos pag-ayo ang katawhan sa Anatot. ³¹ Nanagan ang katawhan sa Madmena nga gikan sa amihanang bahin sa Jerusalem, ug misulay sa pagtago ang katawhan sa Gebim duol sa Jerusalem. ³² Mohunong ang kasundalohan sa Asiria diha sa siyudad sa Nob gawas sa Jerusalem. Magkurog ang ilang mga kinumo samtang hulgaon nila ang katawhan sa Bukid sa Zion didto sa Jerusalem. ³³ Apan paminaw niini! Si Yahweh, ang pangulo sa kasundalohang anghel, maoy molaglag sa kusgan nga kasundalohan sa Asiria pinaagi sa iyang dakong gahom. Ingon nga daw kini usa ka dakong kahoy nga iyang pagaputlon. ³⁴ Laglagon niya ang kasundalohan sa Asiria sama sa kalalakin-an nga naggamit sa dagkong mga atsa aron sa pagputol sa taas nga mga kahoy diha sa kalasangan sa Lebanon.

Chapter 11

¹ Sama sa bag-ong sanga nga kanunay manalingsing gikan sa tuod sa kahoy, adunay kaliwat ni Haring David nga mahimong bag-ong hari. ² Kanunay mag-uban kaniya ang Espiritu ni Yahweh. Himoon siya sa Espiritu nga maalamon ug makasabot sa daghang mga butang; Himoon siya sa Espiritu nga makahukom kung unsa ang maayong buhaton ug hatagan siya ug dakong gahom. Himoon siya sa Espiritu nga makaila kang Yahweh ug motahod kaniya. ³ Ikalipay niya ang pagtuman kang Yahweh. Dili siya mohukom kung ang usa ka tawo matarong o dili sumala lamang sa pagtan-aw kung unsa ang hitsura, o pinasikad sa pagpaminaw sa gisulti sa uban mahitungod nianang tawhana. ⁴ Patas ang iyang hukom sa mga sumbong sa mga timawa nga katawhan; ug magmakiangayon siya ngadto sa mga tawong kabos. Silotan niya ang daotang mga tawo ingon nga resulta sa ilang gihukom; pamatyon niya ang daotang mga tawo tungod sa daotang mga butang nga ilang gihimo. ⁵ Magbuhat siya kanunay nga makataronganon; ang maayong mga butang nga iyang gihimo sama sa bakos nga gipalibot sa iyang hawak. Mosulti siya kanunay kung unsa ang tinuod; ang tinuod nga mga pulong nga iyang gisulti sama sa bakos palibot sa iyang hawak. ⁶ Sa dihang mahimo na siyang hari, magpuyo nga malinawon ang mga lobo ug mga nating karnero; mga leopardo, imbis patyon ang mga gagmayng mga kanding, modulog hinuon uban kanila. Sama nga ang tambok ug himsog nga mga nating baka ug mga liyon magdungan ug kaon; ug atimanon sila sa usa ka bata. ⁷ Magdungan ug kaon ang mga baka ug mga oso; magdulog ang mga batan-ong oso ug mga nating baka. Dili na mokaon ug laing mga hayop ang mga liyon; hinuon, mokaon sila ug dagami sama sa gihimo sa mga baka. ⁸ Luwas nga magdula ang mga gagmayng bata duol sa bangag diin nagpuyo ang mga kobra; ug ibutang sa gagmayng bata ang ilang mga kamot ngadto sa mga salag sa malalang mga bitin, ug dili sila pasakitan niini. ⁹ Walay mga binuhat nga mopasakit o mopatay sa laing mga binuhat sa Bukid sa Zion, ang akong balaan nga bungtod; ug malukop ang kalibotan sa mga tawo nga nakaila kanako, sama sa mga dagat nga napuno sa tubig. ¹⁰ Nianang panahona, ipataas sa kaliwat ni Haring David ang bandera ingon nga timailhan sa katawhan ug sa tanang pundok sa katawhan nga kinahanglan magtigom sila palibot kaniya; moduol sila kaniya aron mangayo ug tambag, ug mahimong mahimayaon ang dapit nga iyang gipuy-an. ¹¹ Nianang panahona, ituy-od ni Yahweh ang iyang kamot sama sa iyang gibuhat kaniadto; paulion niya sa ilang mga panimalay kadtong mga binihag gikan sa Israel, gikan sa Asiria, gikan sa amihanan sa Ehipto, gikan sa habagatan sa Etiopia, gikan sa Elam, gikan sa Babilonia, gikan sa Hamat, ug gikan sa mga lagyong dapit sa mga nasod nga duol sa dagat. ¹² Iisa ni Yahweh ang iyang bandera taliwala sa mga pundok sa katawhan, ug tigomon niya ang katawhan sa Israel nga nabihag kaniadto. Tigomon niya gikan sa lagyong mga dapit sa kalibotan ang katawhan sa Juda nga iyang gipatibulaag niadtong mga dapita. ¹³ Unya ang katawhan sa Israel ug ang katawhan sa Juda dili na masina sa usag usa, ug dili na sila mag-away. ¹⁴ Mag-uban ang ilang kasundalohan aron mosulong sa mga Filistihanon ngadto sa kasadpan. Ug sulongon nila ang mga nasod sa sidlakan; pildihon nila kadtong mga nasora ug kuhaon ang tanan nga bililhon nilang mga kabtangan. Ilogon nila ang mga dapit sa Edom ug Moab, ug dumalahan nila ang pundok sa katawhan sa Amon. ¹⁵ Mohimo ug mala nga dalan si Yahweh tabok sa dagat duol sa Ehipto. Nga daw kini miwarawara sa iyang kamot ibabaw sa Suba sa Eufrates ug nagpadala ug makusog nga hangin nga maoy hinungdan nga nabahin kini ngadto sa pito ka mga sapa, mao nga nakatabok ang katawhan niadtong mga sapaa. ¹⁶ Tungod kay maghimo siya ug lapad nga dalan alang sa iyang katawhan nga nagpuyo sa Asiria, aron makahimo na sila sa pagbalik ngadto sa ilang kaugalingong yuta, sama kaniadto nga naghimo siya ug dalan alang sa katawhan sa Israel aron makatabok sila sa tubig sa dihang nibiya sila sa Ehipto.

Chapter 12

¹ Nianang panahona, kamong katawhan sa Jerusalem moawit niini nga alawiton: "Daygon ka namo, Yahweh! Kaniadto, nasuko ka kanamo, apan wala kana masuko kanamo karon ug gihupay mo kami. ² Kahibulongan gayod, nga mianhi ka aron pagluwas kanamo, busa mosalig kami kanimo ug dili mahadlok. Yahweh nga among Dios, gihimo mo kaming kusgan; ikaw ang among awitan; giluwas mo kami gikan sa among mga kaaway." ³ Kamo, iyang katawhan, magmaya pag-ayo tungod kay giluwas niya kamo, sama nga nalipay kamo sa pag-inom ug tubig nga gikan sa tuboran. ⁴ Nianang panahona moingon kamo, "Angay natong pasalamatan si Yahweh! Angay nato siyang daygon! Angay natong isugilon ngadto sa katawhan ug sa tanang pundok sa katawhan kung unsa ang iyang nabuhat; kinahanglan nga masayran nila nga bantogan kaayo siya! ⁵ Angay natong awitan si Yahweh, tungod kay naghimo siya ug katingalahang mga butang. Angay nato kining ipahibalo sa tanan nga anaa sa kalibotan! ⁶ Kamong katawhan sa Jerusalem, singgit nga malipayon sa pagdayeg kang Yahweh, tungod kay siya ang bantogan ug Balaan nga gisimba sa mga Israeilta, ug nagpuyo siya uban kanato!"

Chapter 13

¹ Ako, si Isaias ang anak nga lalaki ni Amoz, nakadawat sa mensahe ni Yahweh mahitungod sa siyudad sa Babilonia: ² Iisa ang usa ka bandera didto sa hawanan sa tumoy sa bungtod, aron timailhan nga kinahanglan mosulong na ang kasundalohan ngadto sa Babilonia. Singgit ug iwarawara ang inyong mga kamot sa pagpaila nga kinahanglan na sila magmartsa padulong sa mga ganghaan sa siyudad ngadto sa mga palasyo sa mga garboso nga mga tigdumala sa Babilonia! ³ Miingon si Yahweh, "Gisugo ko na kadtong gitagana alang sa pagbuhat niini nga bulohaton alang kanako— Gipatawag ko na ang mga manggugubat nga akong pinili aron sa pagsilot sa katawhan sa Babilonia tungod kay nasuko ako pag-ayo kanila, ug kadto nga mga sundalo mapasigarbohon kaayo sa ilang pagbuhat niana." ⁴ Paminawa ang kasaba sa kabukiran, nga mao ang kasaba sa nagmartsa nga mga kasundalohan! Mao kini ang panagsinggit nga gihimo sa daghang pundok sa katawhan. Si Yahweh, ang pangulo sa mga kasundalohang anghel, ang nagpatawag niini nga kasundalohan aron magtigom. ⁵ Gikan sila sa lagyong mga nasod, gikan sa suok nga mga dapit sa kalibotan. Nahisama sila sa mga hinagiban nga gigamit ni Yahweh aron sa pagsilot sa katawhan nga iyang gikasuk-an pag-ayo, ug aron laglagon ang tibuok nasod sa Babilonia. ⁶ Managsinggit kamong katawhan sa Babilonia tungod sa kalisang, tungod kay mao na kini ang takna nga gitagana ni Yahweh, ang takna alang sa labing makagagahom nga Dios aron sa paglaglag sa inyong siyudad. ⁷ Tungod kay mahitabo kana, mahadlok pag-ayo ang tanan ninyong mga katawhan, hinungdan nga dili na nila mapataas ang ilang mga kamot. ⁸ Malisang kamong tanan. Makabati kamo ug hilabihang kasakit sama sa babaye nga nagbati. Magtinan-away kamo sa usag usa nga walay paglaom, ug makita sa inyong mga dagway nga nahadlok kamo. ⁹ Paminawa kini, kamong katawhan sa Babilonia: Ang adlaw nga gipili ni Yahweh alang sa pagbuhat haduol na, ang adlaw sa iyang mapintas ug hilabihan nga kasuko sa pagsilot kaninyo tungod kay nasuko siya pag-ayo kaninyo. Himoon niyang awaaw ang inyong yuta sa Babilonia, ug laglagon niya ang tanang makasasala nga anaa niini. ¹⁰ Sa dihang mahitabo kana, wala nay bituon nga mosidlak. Sa dihang mosubang ang adlaw, mangitngit kini, ug wala nay kahayag gikan sa bulan panahon sa kagabhion. ¹¹ Miingon si Yahweh, "Silotan ko ang tanan nga anaa sa kalibotan tungod sa daotang mga butang nga ilang gihimo; silotan ko ang daotang mga tawo alang sa mga sala nga ilang nahimo. Pahunongon ko ang garbo sa mga tawong mapahitas-on, ug pahunongon ko ang mabangis nga katawhan gikan sa ilang pagkamapahitas-on. ¹² Ug tungod kay patyon ko ang daghang katawhan, lisod na pangitaon ang katawhan kaysa bulawan, lisod pa pangitaon kaysa lunsay nga bulawan nga gikan sa Ofir sa Arabia. ¹³ Uyogon ko ang kalangitan, ug matay-og usab ang kalibotan gikan sa nahimutangan niini. Mahitabo kana sa dihang ako, si Yahweh, ang pangulo sa kasundalohang anghel, mosilot sa daotang mga tawo, sa dihang ipakita ko ang hilabihan nakong kapungot kanila. ¹⁴ Mokalagiw ang tanang langyaw sa Babilonia sama sa binaw nga gipangayam, sama sa karnero nga walay magbalantay. Mosulay sila sa pagpangita ug laing mga tawo gikan sa ilang mga nasod, ug moikyas sila gikan sa Babilonia ug mobalik sa ilang kaugalingong nasod. ¹⁵ Ang tanan nga madakpan didto sa Babilonia patyon pinaagi sa mga espada sa ilang mga kaaway. ¹⁶ Pinu-pinohon ang ilang mga anak sa mga bato sa atubangan sa ilang mga ginikanan; kawaton sa ilang mga kaaway ang bililhong mga butang gikan sa ilang mga balay ug lugoson ang ilang mga asawa. ¹⁷ Tan-awa! akong danihon ang katawhan sa Media aron sa pagsulong sa Babilonia. Sulongon sa kasundalohan sa Media ang Babilonia, bisan pa ug mohanyag sila ug plata ug bulawan kung mosaad sila nga dili sila mosulong niini. ¹⁸ Pana-on sa kasundalohan sa Media ang mga batan-ong lalaki sa Babilonia; wala silay kaluoy bisan sa mga masuso o mga bata!" ¹⁹ Matahom kaayo ang siyudad sa Babilonia; gipasigarbo pag-ayo sa tanang katawhan nga taga-Babilonia, ang ilang sentrong siyudad; apan laglagon sa Dios ang Babilonia, sama sa iyang paglaglag sa Sodoma ug Gomora. ²⁰ Wala nay mopuyo pag-usab sa Babilonia. Mahimo kining biniyaan hangtod sa kahangtoran. Ang walay permanenting balay magdumili sa pagtukod sa ilang mga tolda didto; dili na dad-on sa magbalantay ang iyang panon sa karnero aron mopahulay didto. ²¹ Atoa didto ang mga hayop nga nagpuyo sa disyerto; ang mga ihalas nga mga iro magpuyo sa mga tipun-og nga mga balay. Magpuyo ang mga ngiwngiw sa mga tipun-og, ug maglukso-lukso didto ang mga ostrits ug ihalas nga mga kanding. ²² Mag-uwang ang mga hyenas sa tipun-og nga mga tore, ug maghimo ang mga ihalas nga mga iro sa ilang mga lungib sa tipun-og nga mga palasyo nga kanhing matahom kaayo. Haduol na ang panahon nga laglagon ang Babilonia; dili na magdugay ang Babilonia.

Chapter 14

¹ Apan nagmaluloy-on si Yahweh ngadto sa mga Israelita; pilion niya pag-usab ang mga Israelita ingon nga iyang katawhan, ug tugotan niya sila nga mobalik dinhi ug magpuyo sa ilang kaugalingong yuta. Unya moanhi ang katawhan gikan sa ubang kanasoran ug makighiusa uban sa mga Israelita. ² Tabangan sila sa katawhan sa ubang mga nasod sa pagpahiuli sa ilang kaugalingong yuta, ug motrabaho alang sa mga Israelita kadtong naggikan sa ubang mga nasod. Bihagon sa kasundalohang mga Israelita ang mga tawo nga mibihag sa Israel, ug dumalahan sa katawhan sa Israel ang katawhan nga nagdaugdaog kanila kaniadto. ³ Moabot ang adlaw nga ipalingkawas kamong mga Israelita ni Yahweh gikan sa mga pag-antos, kasamok, ug pagkahadlok, ug gikan sa pagkaulipon. ⁴ Sa dihang mahitabo kana, biay-biayon ninyo ang hari sa Babilonia pinaagi sa pag-awit sama niini nga awit: "Gidaugdaog nimo kami pag-ayo, apan natapos na kana! Giinsulto nimo ang uban ug gipaantos sila, apan dili ka na makabuhat pa niini! ⁵ Ikaw nga daotang tigdumala, gilaglag ni Yahweh ang imong gahom, ug dili ka na makadaugdaog pa sa mga tawo! ⁶ Gisulong nimo sa makadaghan ang katawhan tungod kay nasuko ka pag-ayo kanila, ug gigun-ob nimo ang ubang mga nasod pinaagi sa pagpaantos kanila sa walay hunong. ⁷ Apan sa dili madugay mahilom ug magmalinawon na ang tanang butang sa kalibotan. Moawit pag-usab ang tanan! ⁸ Ingon nga daw bisan ang mga kahoy sa kalasangan malipayong mag-awit niini nga awit, moawit niini ang sipres ug sedro nga mga kahoy sa Lebanon: 'Gilaglag na ikaw, ug wala nay moanhi aron sa pagputol kanamo.' ⁹ Mainiton nga naghulat kanimo ang tanang nangamatay nga moadto ka sa dapit diin atua sila. Malipay ang espiritu sa mga pangulo sa kalibotan ug kadtong mga hari sa daghang mga nasod sa wala pa sila mamatay aron sa pag-abiabi kanimo. ¹⁰ Maninggit silang tanan diha kanimo, 'Karon huyang ka na sama kanamo!' ¹¹ Mapasigarbohon ka ug gamhanan, apan natapos kanang tanan sa dihang namatay ka na, uban sa tingog sa mga alpa nga gitugtog sa imong palasyo. Karon adunay mga ulod sa imong lubnganan nga daw imong higdaan ug motabon kanimo sama sa habol.' ¹² Nahanaw ka gikan sa kalibotan sama sa bituon nga nahulog gikan sa kalangitan; ilado kaayo ka, sama sa bituon sa kabuntagon nga makita sa tanan; gilaglag nimo ang daghang kanasoran, apan karon ikaw na ang nalaglag. ¹³ Mapasigarbohon kang misulti sa imong kaugalingon, 'Mokayab ako sa langit, sa akong trono ibabaw sa kabituonan sa Dios. Magdumala ako sa bukid diin nagtigom ang mga dios, sa layong dapit sa amihanan. ¹⁴ Mokayab ako ibabaw sa kapanganoran ug mahimong sama sa Dios!' ¹⁵ Apan wala ka nakabuhat niana; Hinuon, gidala ka paubos sa imong lubnganan, ug miadto ka sa dapit sa mga patay. ¹⁶ Mitutok kanimo ang ubang patay nga mga tawo; nahibulong sila kung unsa ang nahitabo kanimo. Miingon sila, 'Mao ba kini ang tawo nga nahimong hinungdan sa pag-uyog sa kalibotan ug sa pagpangurog sa katawhan sa daghang mga gingharian? ¹⁷ Mao ba kini ang tawo nga misulay sa kalibotan nga mahimong sama sa disyerto, ang tawo nagbuntog sa mga siyudad niini ug wala nagtugot sa katawhan nga iyang binihag sa pagpauli sa ilang mga puloy-anan?' ¹⁸ Gipasidunggan pag-ayo ang tanang mga hari sa kalibotan sa dihang gilubong sila. ¹⁹ Adunay tawo nga motambog kanimo, apan dili ngadto sa lubnganan, sama sa sanga nga ilang gilabay. Tabonan ka sa mga patayng lawas sama sa panapton, kadtong nangamatay pinaagi sa espada, nga miadto sa ilalom aron makig-uban sa mga bato diin nagpahulay ang mga patay. ²⁰ Dili ilubong ang imong patayng lawas uban kanila tungod kay gilaglag mo ang imong yuta ug maoy hinungdan sa kamatayon sa imong katawhan. Dili na gayod pagahisgotan ang mga kaliwat sa daotang mga tawo nga sama kanimo." ²¹ Moingon ang katawhan, "Patya ang mga anak niining tawhana tungod sa mga sala nga gibuhat sa iyang mga katigulangan! Ayaw sila tugoti nga mahimong mga tigdumala, ug mobuntog sa tanang kanasoran sa kalibotan, ug malukop ang kalibotan sa mga siyudad nga ilang gidumalahan!" ²² Mao kini ang gisulti ni Yahweh, ang pangulo sa kasundalohang anghel: "Himoon ko nga mapildi ang Babilonia. Laglagon ko ang Babilonia ug ang katawhan niini ug ang ilang mga kaliwat. ²³ Himoon ko ang Babilonia nga dapit nga puy-an sa mga ngiwngiw, usa ka dapit diin puno sa nagpundo nga mga tubig; laglagon ko kini sa hingpit ingon nga gisilhigan ko kini. Mao kana ang akong gisulti nga si Yahweh, ang pangulo sa kasundalohang angel." ²⁴ Si Yahweh, ang pangulo sa kasundalohang anghel, matinud-anong nanaad niini: "Mahitabo gayod ang mga butang nga akong giplano. ²⁵ Pamatyon ko ang kasundalohan sa Asiria sa dihang anaa sila sa akong yuta sa Israel. Ingon nga daw gitamakan ko sila diha sa akong kabukiran. Dili na maulipon sa katawhan sa Asiria ang akong katawhan; sama nga gikuha ko ang mga palas-anon nga anaa sa ilang mga abaga. ²⁶ Adunay plano alang sa tanan dinhi sa kalibotan, usa ka plano nga magpakita sa gahom ni Yahweh aron sa pagsilot sa tanang kanasoran. ²⁷ Nagsulti si Yahweh, ang pangulo sa kasundalohang anghel ug walay makausab sa iyang hunahuna. Sa dihang idapat na ni Yahweh ang iyang kinumo ngadto sa Asiria, wala nay makapugong kaniya." ²⁸ Nadawat ko kini nga mensahe gikan kang Yahweh sa tuig nga namatay na si Haring Ahaz. ²⁹ Ayaw paglipay, kamong tanang katawhan sa Filistia, nga napildi na ang kaaway nga kasundalohan nga misulong kaninyo ug namatay na ang ilang hari. Makuyaw siya sama sa bitin, apan adunay mamahimong laing hari, nga mas makuyaw pa kaysa kobra; sama siya sa paspas ug malala nga bitin. ³⁰ Atimanon sa akong labing kabos nga katawhan ang ilang mga panon sa karnero, ug ang timawa maghigda nga luwas, apan pamatyon ko sa kagutom kamong katawhan sa Filistia nga buhi pa. ³¹ Busa, kamong katawhan sa Filistia, pagdangoyngoy diha sa mga ganghaan sa inyong mga siyudad! Angay kamong mahadlok pag-ayo, tungod kay moabot ang gamhanan kaayo nga kasundalohan nga naggikan sa amihanan aron sa pagsulong kaninyo; magdagan ang ilang mga karwahe sama sa panganod sa aso. Ang ilang matag sundalo andam na aron makig-away. ³² Kung moabot kanatong mga Israelita ang mga mensahero gikan sa Filistia, kini ang angay natong isulti kanila: 'Gibuhat ni Yahweh ang Jerusalem, dili ang Filistia, ug maluwas sulod sa mga pader sa Jerusalem ang iyang katawhan nga gidaugdaog."

Chapter 15

¹ Nadawat ni Isaias kini nga mensahe gikan kang Yahweh mahitungod sa mga pundok sa katawhan sa Moab: Sa usa lamang ka gabii laglagon ang duha ka mahinungdanong siyudad sa Moab, ang Ar ug Kir. ² Moadto ang katawhan sa Dibon, ang sentrong siyudad, sa ilang templo ug magbangotan; moadto sila sa hataas nga mga dapit sa tumoy nga mga bungtod, ug didto sila mohilak. Magdangoyngoy sila tungod sa nahitabo sa Nebo ug Medeba sa habagatan; magpaupaw sila, ug kiskisan sa kalalakin-an ang ilang mga bangas aron pagpakita sa ilang pagsubo. ³ Diha sa kadalanan magbisti ug sako ang katawhan, ug magdangoyngoy ang tanang tawo sa ilang mga atop ug sa mga plasa sa siyudad inubanan sa nagdagayday nga luha diha sa ilang mga nawong. ⁴ Manghilak ang katawhan sa siyudad sa Heshbon ug sa mga lungsod sa Eleale sa amihanan sa Moab; madungog sa katawhan nga sama kalayo sa lungsod sa Jahas sa habagatan ang ilang pagdangoyngoy. Busa mangurog ang kasundalohan sa Moab ug managtiyabaw, ug mahadlok sila pag-ayo. ⁵ Naluoy pag-ayo si Yahweh sa mga Moabinhon; miikyas sila paingon sa mga lungsod sa Zoar ug Eglat Shelishiya sa layong bahin sa habagatan. Maghilak sila nga maglakaw patungas sa lungsod sa Luhit. Magbangotan diha sa tanang kadalanan sa lungsod sa taga-Horonaim ang katawhan tungod kay nalaglag ang ilang nasod. ⁶ Mohubas ang tubig sa Walog sa Nimrim. Mangalaya ang mga sagbot; mahanaw ang mga lunhaw nga mga tanom, ug wala nay mabilin nga mga lunhaw. ⁷ Kuhaon sa katawhan ang ilang mga kabtangan ug dad-on kini tabok sa lugot sa mga poplars. ⁸ Maghilak ang katawhan sa tibuok nasod sa Moab, madunggan sa katawhan ang ilang pagdangoyngoy bisan sama kalayo sa Eglaim sa habagatan ug Beer Elim sa amihanan. ⁹ Mahimong pula ang suba nga duol sa Dibon gikan sa dugo sa katawhan nga nangamatay, apan tugotan ko pa nga makasinati ang katawhan sa Moab ug daghan pang kagubot: tukbon sa mga liyon kadtong mosulay sa pag-ikyas gikan sa Moab ug sulongon usab ang mga tawo nga nahibilin niana nga nasod.

Chapter 16

¹ Magsultihanay sa usag usa ang mga tigdumala sa Moab, "Kinahanglan nga magpadala kita ug mga nating karnero gikan sa siyudad sa Sela ingon nga gasa ngadto sa tigdumala sa Juda aron sa pagpugos nga dili na niya tugotan ang iyang kasundalohan nga mosulong kanato. Kinahanglan nga ipadala nato kini agi sa disyerto ngadto sa hari sa Jerusalem." ² Mahibilin ang mga babaye sa Moab nga walay kauban nga anaa sa mga tabokanan sa Suba sa Arnon; mahisama sila sa mga langgam nga giabog gikan sa ilang mga salag. ³ Mohilak sila, "Tabangi kami! Sultihi kami kung unsa ang angay namong buhaton. Panalipdi kami sa hingpit, kami nga nagdagan palayo gikan sa among mga kaaway, ug ayaw kami budhii. ⁴ Tugoti kami nga nagkalagiw gikan sa Moab nga mopuyo uban kaninyo; tagoi kami gikan sa among mga kaaway nga buot molaglag kanamo! Moabot ang adlaw nga wala nay magdaugdaog kanamo, ug mohunong na ang among mga kaaway sa pagdaot sa among yuta." ⁵ Unya mopili si Yahweh ug tawo nga usa ka kaliwat ni Haring David aron mahimong hari. Sa pagdumala niini nga tawo, magmaluloy-on ug magmatinud-anon siya. Kanunay siyang magbuhat kung unsa ang makiangayon ug maabtikon nga mobuhat kung unsa ang matarong. ⁶ Nakadungog kami nga mga katawhan sa Juda mahitungod sa katawhan sa Moab; nadungog namo nga garboso kaayo ug hambogiro sila; mabiaybiayon sila, apan dili tinuod ang ilang gisulti mahitungod sa ilang mga kaugalingon. ⁷ Moabot ang adlaw nga manghilak ang tanang katawhan sa Juda. Magsubo silang tanan, tungod kay wala na unyay mga pan nga adunay pasas diha sa siyudad sa Kir Hareset. Apan labaw pa sa mga pan, magsubo sila alang sa katawhan nga nagpuyo didto, nga gipamatay tanan. ⁸ Mangalaya ang mga tanom sa kaumahan sa Heshbon, ug mangalaya usab ang kaparasan sa Sibma. Laglagon sa mga kasundalohan sa ubang mga nasod ang Moab, nga sama sa maanyag nga parasan nga mikatay ang mga sanga ngadto sa amihanang bahin sa Jazer, ug sa sidlakang bahin ngadto sa disyerto. Mikatay ang mga sanga niini sa halayo kaayo nga kasadpang bahin, ngadto sa kasadpang bahin daplin sa Patay nga Dagat. ⁹ Busa mohilak ako alang sa Jezer ug alang sa kaparasan. Mohilak ako alang kaninyong tanan. Mohilak ako tungod kay dili na mosinggit sa kasadya ang katawhan, sama sa naandan nila nga gibuhat sa dihang nagtapok sila ug mga bunga nga mahinog panahon sa ting-init ug uban pa nga mga abot. ¹⁰ Dili na gayod magmalipayon ang katawhan panahon sa ting-ani. Wala nay moawit diha sa kaparasan; wala nay mosinggit sa kasadya. Wala nay mopuga ug mga ubas aron makahimo ug bino; wala na gayoy mosinggit mahitungod sa pagsadya. ¹¹ Mohilak ako sa kinasingkasing alang sa Moab, ang akong pagdangoyngoy sama sa masulob-on nga awit nga dinuyogan sa alpa. Nagsubo ang akong kasingkasing alang sa Kir Hareset. ¹² Moadto ug mag-ampo ang katawhan sa Moab didto sa hataas nila nga mga dapit, apan dili kana makatabang kanila. Motuaw sila ngadto sa ilang mga dios diha sa ilang mga templo, apan wala gayoy usa nga makahimo sa pagluwas kanila. ¹³ Gisulti na ni Yahweh kadtong mga butanga mahitungod sa Moab. ¹⁴ Apan karon gisulti niya kana nga sulod gayod sa tulo ka tuig gikan karon, laglagon niya ang tanang mga butang nga gipasigarbo sa katawhan sa Moab. Bisan tuod aduna silay daghang mga tawo sa Moab karon, diyutay na lamang nga mga tawo ang mahibiling buhi, ug mangahuyang na sila.

Chapter 17

¹ Nadawat ni Isaias kini nga mensahe gikan kang Yahweh mahitungod sa Damascus, ang sentro sa Aram: "Paminaw ug maayo! Dili na mahimong usa ka siyudad ang Damascus; mahimo na kining tipun-og sa mga nagun-ob. ² Mabiyaan ang mga lungsod nga duol sa siyudad sa Aroer. Manibsib ug sagbot diha sa kadalanan ang mga panon sa karnero ug mohigda didto, ug walay bisan usa nga mogukod niini palayo. ³ Mawala ang mga pader sa mga siyudad sa Israel nga nakapalibot niini aron mosalipod kanila. Taposon ang gahom sa gingharian sa Damascus, ug maulawan ang pipila nga mga tawo nga mahibilin sa Aram sama nga naulawan ang katawhan sa Israel." Mao kini ang giingon ni Yahweh nga pangulo sa kasundalohang anghel. ⁴ Nianang panahona, mahimong dili na mahinungdanon ang Israel. Mahisama kini sa tambok nga tawo nga miniwang pag-ayo. ⁵ Mahisama sa uma ang tibuok yuta diin gipamutol tanan sa mga mag-aani ang trigo; wala na gayoy mahibilin, sama sa kaumahan diha sa Walog sa Refaim human giani ang tanang mga tanom. ⁶ Diyutay na lamang ang mahibiling mga Israelita, sama sa diyutay nga nahibiling mga olibo didto sa tumoy sa kahoy human giuyog sa mga trabahante ang ubang mga olibo ug nahulog diha sa yuta. Adunay duha o tulo lamang nga olibo ang anaa sa tumoy sa mga sanga, o upat o lima nga olibo ang anaa sa laing mga sanga." Mao kini ang giingon ni Yahweh nga pangulo sa kasundalohang anghel. ⁷ Unya nianang panahona, kamo nga katawhan sa Israel mosalig sa Dios nga inyong magbubuhat, ang Usa nga Balaan sa Israel. ⁸ Dili na kamo mangita aron sa pagpakitabang gikan sa inyong mga diosdios o magsimba sa mga diosdios nga inyong gihimo pinaagi sa inyong kaugalingong mga kamot. Dili na gayod kamo moyukbo pag-usab sa atubangan sa mga poste diin gisimba ninyo ang diyosa nga si Asera. Dili na kamo mosimba pag-usab didto sa hataas nga mga dapit nga inyong gitukod aron sunogan ug insenso alang sa mga diosdios. ⁹ Mahimong biniyaan ang pinakadako nga mga siyudad sa Israel, sama sa yuta nga gibiyaan sa mga pundok sa katawhan sa Hiv ug Amor sa dihang gisulong sila sa mga Israelita kaniadto. Walay katawhan nga mopuyo didto. ¹⁰ Mahitabo kana tungod kay miundang kamo sa pagsimba sa Dios, nga sama sa dako nga bato nga anaa sa ibabaw nga maoy makaluwas kaninyo. Gilimtan ninyo siya nga maoy manalipod kaninyo. Busa karon nagtanom kamo ug labing maayo nga mga paras ug bisan ang mga talagsaon nga gikan sa ubang mga nasod. ¹¹ Apan bisan pa ug mosalingsing kini sa adlaw sa pagtanom ninyo niini, ug bisan pa ug mamulak kini sa sama nga kabuntagon, sa panahon sa ting-ani, wala gayoy mga ubas nga inyong mapupo. Hilabihan nga kasakit ug pag-antos lamang ang inyong mahiagoman. ¹² Paminaw! Modahunog ang kasundalohan sa mga nasod sama sa dinahunog sa dagat. Motingog kini sama sa haguros sa mga balod. ¹³ Apan bisan pa ug kusog ang ilang pagdahunog sama sa tingog sa haguros sa mga balod, mopahilayo gayod sila sa dihang hinginlan sila ni Yahweh. Mokalagiw sila sama sa tahop nga magkatibulaag didto sa kabungtoran sa dihang mohangin, sama sa mga sagbot nga matibulaag sa dihang moagi ang alimpulos. ¹⁴ Ug bisan pa ug malisang kamong katawhan sa Israel, sa pagkabuntag mahanaw ang inyong mga kaaway. Mao kana ang mahitabo niadtong mosulong sa atong yuta ug mokawat sa atong mga gipanag-iyahan.

Chapter 18

¹ Makalilisang nga mga butang ang mahitabo diha kaninyo katawhan sa Etiopia! Daghan ang mga bangka sa inyong yuta nga anaa sa taas nga bahin sa Suba sa Nilo. ² Magpadala ang inyong mga tigdumala ug mga tigpamaba nga nagdali ug lawig sa papyrus nga mga bangka diha sa suba. Sultihi ang inyong mga mensahero nga magdali ug adto! Adto didto sa mga tawo nga tag-as ug adunay hamis nga mga panit. Mahadlok ang katawhan sa bisan asa niadto nga mga tawo, tungod kay buntogon ug laglagon nila ang ubang mga nasod; sila ang mga tawo nga nagpuyo sa yuta nga gibahin sa mga suba. ³ Kamong mga mensahero kinahanglan magsulti ngadto sa katawhan sa kalibotan, ngadto sa tanang katawhan sa bisan asa, "Pagtan-aw sa dihang ipataas ang bandera sa gubat ngadto sa ibabaw sa bukid, ug paminaw sa dihang ipatingog ang sungay sa torong karnero nga timaan nga mosugod na ang gubat. ⁴ Paminaw tungod kay miingon si Yahweh niini kanako: "Magpakahilom ako nga magtan-aw diin ako nagpuyo. Magpakahilom ako sama sa nag-anam nga kainit sa adlaw panahon sa ting-init. Mamuhat ako sa hingpit sama sa gabon nga mialisngaw panahon sa kainit sa ting-ani. ⁵ Sa dili pa ang ting-ani, makita sa mag-uuma ang mga paras nga mamulak ug ang mga bulak mahimo nang mga ubas, ug masayran niya nga husto na ang panahon aron pul-ongon ang bag-ong tubo ug ipakatay ang mga sanga aron mahimong lig-on ang kahoy gikan sa pagtubo. Sa samang paagi nasayod ako sa dihang husto na ang panahon aron mamuhat batok niana nga nasod, ug mopadala ako ug kasundalohan aron mosulong niini. ⁶ Pamatyon ang tanan nga kasundalohan niana nga nasod, ug magbuy-od ang ilang mga patayng lawas diha sa kaumahan aron kaonon sa mga boitre ang ilang unod panahon sa ting-init. Unya usapon sa ihalas nga mga mananap ang ilang mga bukog panahon sa ting-tugnaw." ⁷ Niana nga panahon, mohatag ug mga gasa ngadto kang Yaweh sa Jerusalem ang katawhan sa nasod nga gibahin sa mga suba. Kadtong mga tawo nga tag-as ug adunay hamis nga mga panit; mahadlok ang katawhan sa bisan asa niadto nga mga tawo, tungod kay pildihon ug gun-obon nila ang ubang mga nasod, ug mohatag sila ug mga gasa ngadto sa Jerusalem, ang siyudad diin nagpuyo si Yahweh nga pangulo sa kasundalohang anghel.

Chapter 19

¹ Nadawat ni Isaias kini nga mensahe gikan kang Yahweh mahitungod sa Ehipto: "Paminawa kini! Ako, si Yahweh, moabot diha sa Ehipto, nga magsakay sa makusog nga panganod. Mangurog ang mga diosdios sa Ehipto sa dihang magpakita ako, ug mahadlok sa hilabihan ang katawhan sa Ehipto. ² Himoon kong mag-unayg away ang katawhan sa Ehipto batok sa usag usa: makig-away ang kalalakin-an batok sa ilang mga igsoong lalaki, makig-away ang mga silingan batok sa usag usa, makig-away ang katawhan sa siyudad batok sa katawhan sa laing siyudad, makig-away ang katawhan sa usa ka probinsya batok sa katawhan sa laing probinsya. ³ Mawad-an ug paglaom ang katawhan sa Ehipto, ug pakgangon ko ang ilang mga plano aron dili molampos. Mohangyo sila sa mga diosdios ug mga salamangkiro ug niadtong nakigsulti sa mga espiritu sa patay nga mga tawo aron sa pagsulti kung unsay angay nilang buhaton. ⁴ Unya mohatag ako ug usa nga modala kanila nga hilabihan kabangis nga mahimo nilang hari. Mao kana ang akong giingon, ako si Yahweh, nga pangulo sa kasundalohang anghel. ⁵ Moabot ang adlaw nga mahubas ang Suba sa Nilo, ug mauga pag-ayo ang agianan sa suba. ⁶ Mahubas ang tanang tuboran sa suba. Mobaho ang mga kanal nga daplin sa suba tungod sa pagkalaya ug pagkalata sa mga bugang ug tag-as nga mga sagbot. ⁷ Mangalaya ang mga tanom nga anaa sa daplin sa suba ug ang tanang mga tanom nga anaa sa kaumahan nga utlanan sa suba; paliron kini palayo ug mahanaw. ⁸ Moitsa ang mga mangingisda ug mga taga ug mga pukot ngadto sa suba, ug unya moagulo ug mawad-an sila ug paglaom; maguol sila tungod kay wala nay isda sa suba. ⁹ Wala masayod kadtong naghimo ug panapton gikan sa lanot kung unsay angay nilang buhaton tungod kay wala nay hilo nga ilang pagahimoon. ¹⁰ Mawad-an silang tanan ug paglaom ug mawad-an gayod ug kadasig. ¹¹ Buangbuang ang mga opisyal diha sa siyudad sa Zoan nga amihanang bahin sa Ehipto. Walay bili ang mga tambag nga ilang gihatag sa hari. Nganong mipadayon man sila sa pagsulti sa hari nga maalamon sila, ug mga kaliwat sila sa maalamon nga mga hari kaniadto? ¹² Hari, asa naman ang imong maalamon nga mga magtatambag karon? Kung aduna kay laing maalamon nga mga magtatambag, makasulti sila kanimo kung unsay plano nga buhaton ni Yahweh nga pangulo sa kasundalohang anghel ngadto sa Ehipto! ¹³ Oo, nahimong buangbuang ang mga opisyal sa Zoan, ug nanglimbong sa ilang kaugalingon ang mga pangulo diha sa siyudad sa Memfis nga amihanang bahin sa Ehipto. Ang tanan nga pangulo sa katawhan maoy hinungdan nga nagbuhat ug sayop nga mga butang ang ilang katawhan. ¹⁴ Gihimo sila ni Yahweh nga hilabihan kabuangbuang, ang resulta sa tanan nilang gibuhat, nahisama sa katawhan sa Ehipto nga mibarag sama sa tawong hubog nga nagsusapinday ug nadigyas sa iyang kaugalingong suka. ¹⁵ Walay bisan usa sa Ehipto nga dato o kabos, mahinungdanon o dili mahinungdanon, nga makahimo sa pagtabang kanila. ¹⁶ Nianang panahona, mahimong sama sa pinasagdan nga mga babaye ang katawhan sa Ehipto. Mangurog sila, ug malisang tungod kay nasayod sila nga daw gipataas ni Yahweh nga pangulo sa kasundalohang anghel ang iyang kamot aron sa pagsumbag kanila. ¹⁷ Mahadlok ang katawhan sa Ehipto ngadto sa katawhan sa Juda, ug malisang sila kung adunay molitok sa Juda, tungod kay mao kana ang magpahinumdom kanila kung unsa ang plano nga buhaton ni Yahweh nga pangulo sa kasundalohang anghel ngadto kanila. ¹⁸ Nianang panahona, manumpa ang katawhan sa lima ka siyudad diha sa Ehipto nga moalagad sila ngadto kang Yahweh. Tun-an nila ang pagsulti sa Hebreo nga pinulongan. Usa niadto nga mga siyudad pagatawgon nga "Siyudad sa Adlaw." ¹⁹ Nianang panahona, adunay usa ka halaran alang sa pagsimba kang Yahweh taliwala sa Ehipto, ug adunay usa ka haligi aron sa pagpasidungog kang Yahweh nga anaa sa utlanan taliwala sa Ehipto ug Israel. ²⁰ Mao kana ang mahimong timailhan aron ipaila nga gisimba si Yahweh nga pangulo sa kasundalohang anghel diha sa yuta sa Ehipto. Ug sa dihang magtuaw ang katawhan ngadto kang Yahweh aron tabangan sila tungod kay gidaugdaog sila sa uban, padad-an niya sila ug usa ka tawo nga maoy manalipod ug moluwas kanila. ²¹ Ipaila ni Yahweh sa katawhan sa Ehipto kung kinsa siya. Nianang panahona modawat sila nga Dios siya. Mosimba sila kaniya ug magdala ngadto kaniya ug mga halad nga trigo ug uban pang mga halad. Manumpa sila nga buhaton ang mga butang alang kang Yahweh, ug buhaton gayod nila kung unsa ang ilang gisaad. ²² Human gisilotan ni Yahweh ang Ehipto, taposon niya ang ilang mga kasakit. Mobalik ngadto kang Yahweh ang katawhan sa Ehipto, ug maminaw siya sa dihang magpakitabang sila ngadto kaniya, ug undangon niya ang ilang mga kasakitan. ²³ Nianang panahona, adunay agianan taliwala sa Ehipto ug sa Asiria. Tungod niini, mahimong sayon nalang ang pag-adto sa katawhan sa Ehipto ngadto sa Asiria, ug mahimong sayon nalang usab ang pag-adto sa katawhan sa Asiria ngadto sa Ehipto. Ug mosimba kang Yahweh ang katawhan sa duha ka nasod. ²⁴ Ug makigdait kanila ang Israel. Mahimong managhigala sa usag usa ang tulo ka siyudad, ug mahimong panalangin ang katawhan sa Israel ngadto sa katawhan sa tibuok kalibotan. ²⁵ Panalanginan sila ni Yahweh nga pangulo sa kasundalohang anghel; moingon siya, "Katawhan ko na kamo karon katawhan sa Ehipto. Kamong katawhan sa Asiria, gibuhat ko ang inyong nasod. Kamong katawhan sa Israel ang katawhan nga akong gipili nga mahisakop kanako."

Chapter 20

¹ Usa ka tuig gipadala ni Haring Sargon sa Asiria ang pangulo sa iyang kasundalohan nga modala sa iyang kasundalohan aron ilogon ang siyudad sa Ashdod sa Filistia. ² Nianang panahona, giingnan ni Yahweh si Isaias, "Huboa ang sako nga imong gisul-ob ug huboa ang imong sandalyas." Busa gihimo kana ni Isaias, ug unya naglakawlakaw siya nga hubo ug nagtiniil sulod sa tulo ka tuig. ³ Unya gisulti kini ni Yahweh ngadto sa katawhan sa Juda, "Naglakawlakaw nga hubo ug nagtiniil ang akong sulugoon nga si Isaias sa miaging tulo ka tuig. Nagpakita kadto sa makalilisang nga mga katalagman nga akong ipasinati sa katawhan sa Ehipto ug Etiopia. ⁴ Ug ang mahitabo mao nga sulongon ang kasundalohan sa hari sa Asiria kadto nga mga nasod ug dakpon ang daghan nga mga tawo ug dad-on sila palayo ingon nga ilang mga piniriso. Pugson nga maglakaw nga hubo ug magtiniil silang tanan, lakip ang batan-on ug mga tigulang. Pugson usab nila sila nga huboon ang mga tabon sa ilang mga sampot, ug mahimong hinungdan nga maulawan ang katawhan sa Ehipto. ⁵ Unya nalisang pag-ayo ug nahadlok ang katawhan sa ubang mga nasod nga nagsalig nga makatabang kanila ang mga kasundalohan sa Ehipto ug Etiopia. ⁶ Moingon sila, 'Naghunahuna kita nga makatabang ug makapanalipod kanato ang kasundalohan sa Ehipto ug Etiopia, apan nangalaglag sila, busa wala gayoy paagi nga makaikyas kita gikan sa paglaglag sa kasundalohan sa hari sa Asiria!"'

Chapter 21

¹ Gihatag kini nga mensahe ni Yahweh mahitungod sa yuta nga sa dili madugay mamahimong disyerto: Sa dili madugay moabot ang kasundalohan nga gikan sa habagatang bahin sa kamingawan sa Judea aron pagsulong niana nga yuta; sila ang kasundalohan nga makapalisang sa ilang mga kaaway, ang kasundalohan nga mohaguros sa kamingawan gikan sa makalilisang nga yuta. ² Gipakita ni Yahweh kanako ang makalilisang nga panan-awon: Sa panan-awon, nakita ko ang kasundalohan nga mobudhi sa katawhan ug mokawat sa ilang mga gipanag-iyahan human nila sila mapildi. Miingon si Yahweh, "Kamong mga kasundalohan nga gikan sa Elam ug sa Media, paliboti ang Babilonia ug pag-andam aron sa pagsulong niini! Pahunongon ko ang mga agulo ug pag-antos nga gimugna sa Babilonia!" ³ Tungod niana, napuno sa kasakit ang akong lawas; ang akong kasakit sama sa kasakit sa babaye nga nagbati. Nakurat ako sa dihang nadungog ug nakita ko kung unsa ang giplano sa Dios nga buhaton. ⁴ Nakulbaan ang akong kasingkasing, ug nangurog ako sa kahadlok. Sayo sa kagabhion ang akong pinakagusto nga oras sa adlaw, apan karon nagpatigbabaw ang akong tumang kahadlok. ⁵ Sa panan-awon nakita ko nga nag-andam ang mga pangulo sa Babilonia ug usa ka dako nga kombira. Nagbuklad sila ug mga hapin aron lingkoran sa katawhan; nangaon ug nag-inom ang tanan. Apan kinahanglan mobangon kamo ug andama ang inyong mga taming, kamo nga mga prinsipe sa Babilonia, tungod kay pagasulongon na kamo! ⁶ Unya miingon si Yahweh kanako, "Pagbutang ug tigbantay sa pader sa Jerusalem, ug sultihi siya nga mosinggit kung unsa ang iyang makita. ⁷ Sultihi siya sa pagbantay sa mga karwahe nga gibira pinaagi sa nagparisparis nga mga kabayo, ug kalalakin-an nga nagsakay sa mga kamelyo ug mga asno, nga naggikan sa Babilonia. Sultihi ang tigbantay sa pagbantay ug sa pagpaminaw pag-ayo!" ⁸ Busa gibuhat ko kana, ug usa ka adlaw misinggit ang tigbantay, "Adlaw-adlaw nagtindog ako ibabaw niining bantayanang tore, ug nagpadayon ako sa pagbantay panahon sa adlaw ug gabii. ⁹ Nagpadulong ang usa ka tawo nga nagsakay sa karwahe nga gibira sa duha ka kabayo. Misinggit ako kaniya, ug mitubag siya, 'Nagun-ob ang Babilonia! Nangadugmok sa yuta ang mga diosdios sa Babilonia!'" ¹⁰ Akong katawhan sa Juda, gipaantos gayod kamo sa kasundalohan sa Babilonia nga daw kamo lugas nga gigiok ug gitaphan. Apan karon gisultihan ko na kamo kung unsa ang gisulti ni Yahweh, ang pangulo sa mga kasundalohang anghel, nga ginasimba nato nga mga Israelita, mahitungod sa Babilonia. ¹¹ Gihatag kini nga mensahe ni Yahweh mahitungod sa Edom: Adunay usa ka tawo nga gikan sa Edom nga nagtawag kanako ug miingon, "Tigbantay, kanus-a pa man mobuntag?" ¹² Mitubag ang tigbantay, "Hapit na mobuntag, apan human niana, mogabii pag-usab. Kung aduna kay pangutana, pangutana na karon, ug unya balik pag-usab." ¹³ Gihatag kini nga mensahe ni Yahweh mahitungod sa Arabia: Ihatag kini nga mensahe ngadto sa katawhan nga nagpanon ug panaw gikan sa lungsod sa Dedan sa amihanang kasadpan nga bahin sa Arabia, mga magpapanaw nga nagkampo sa kamingawan sa Arabia. Sultihi sila sa pagdala ug tubig alang niadtong gipang-uhaw. ¹⁴ Ug kamong katawhan nga nagpuyo sa siyudad sa Tema sa amihanang kasadpang bahin sa Arabia, kinahanglan magdala ug pagkaon alang sa mga dinakpan nga miikyas gikan sa ilang mga kaaway. ¹⁵ Miikyas sila aron nga dili sila mamatay sa mga espada sa ilang mga kaaway ug aron dili mapana pinaagi sa mga udyong diha sa pagpakiggubat. ¹⁶ Miingon si Yahweh kanako, sulod gayod sa usa ka tuig gikan karon, matapos na ang tanang kabantog sa rehiyon sa Kedar sa Arabia. ¹⁷ Pipila lamang sa ilang mga sundalo nga hanas sa pagpana ang mahibilin nga buhi. Mahitabo gayod kana tungod kay Ako, si Yahweh, ang miingon niini."

Chapter 22

¹ Gihatag kini nga mensahe ni Yahweh mahitungod sa Jerusalem, mahitungod sa walog diin gipakita kanako ni Yahweh kini nga panan-awon. Nganong nagkabuang man ug dagan ang matag usa ngadto sa ilang lapad nga mga atop? ² Daw nanagsinggit ang matag usa. Adunay daghang patay nga lawas sa siyudad, apan wala sila namatay pinaagi sa espada sa ilang mga kaaway. Wala sila namatay sa pakiggubat; hinuon, namatay sila gikan sa mga sakit ug kagutom. ³ Mikalagiw ang tanan nga mga pangulo sa siyudad. Apan nadakpan gihapon sila tungod kay wala man silay mga pana ug mga udyong aron sa pagpanalipod sa ilang mga kaugalingon. Misulay sa pagkalagiw ang imong mga sundalo samtang anaa sa layo ang kaaway nga kasundalohan, apan nadakpan gihapon sila. ⁴ Mao nga miingon ako, "Tugoti ako nga mohilak nga mag-inusara; ayaw ako hupaya mahitungod sa gipang-ihaw nakong katawhan." ⁵ Si Yahweh nga pangulo sa mga kasundalohang anghel, nagpili ug panahon sa dihang adunay usa ka dako nga pagpangngulob, nagmartsa nga mga sundalo, ug nangalisang nga katawhan sa walog diin nadawat ko kini nga panan-awon. Panahon kini sa dihang magun-ob ang atong mga pader sa siyudad ug ang mga hilak sa pagpakitabang sa katawhan madungog didto sa kabukiran. ⁶ Mosulong ang mga kasundalohan nga gikan sa Elam ug sa Kir sa Media, magmaneho sa mga karwahe ug magdala ug mga taming. ⁷ Mapuno ang atong maanindot nga walog sa mga karwahe sa atong mga kaaway, ug magtindog sa gawas sa atong mga ganghaan sa siyudad ang mga tigmaneho sa mga karwahe. ⁸ Gun-obon sa Dios ang mga pader nga nagapanalipod sa mga siyudad sa Juda. Managan kamong katawhan sa Jerusalem aron sa pagkuha sa mga hinagiban nga nakabutang sa gambalay nga gitawag ug "ang Hawanan sa Kalasangan." ⁹ Makita ninyo nga adunay daghang mga gubang bahin didto sa mga pader sa Jerusalem. Magtigom kamo ug tubig sa ubos nga pundohanan ug tubig sa siyudad. ¹⁰ Susihon ninyo ang mga balay sa Jerusalem, ug pagagun-obon ninyo ang pipila niini aron gamiton ang mga bato aron sa pag-ayo sa mga pader sa siyudad. ¹¹ Maghimo kamo ug pundohanan ug tubig taliwala sa mga pader sa siyudad aron pundohan ug tubig nga gikan sa karaan nga pundohanan. Apan dili gayod kamo mangayo ug tabang gikan sa tawo nga nagbuhat sa siyudad; wala gayod kamo nagsalig kang Yahweh, nga nagplano niini nga siyudad kaniadto. ¹² Miingon kaninyo si Yahweh, ang pangulo sa mga kasundalohang anghel, sa paghilak ug pagbangotan; miingon siya kaninyo sa pagkiskis sa inyong mga ulo ug sa pagsul-ob sa bisti nga sako aron sa pagpakita nga nagbasol kamo sa mga sala nga inyong nabuhat. ¹³ Apan imbis nga buhaton kana, naglipay hinuon kamo ug nagsaulog; nag-ihaw kamo ug mga baka, ug mga karnero aron nga lutoon ang mga karne niini ug kaonon kini ug moinom ug bino. Miingon kamo, "Mangaon kita ug mag-inom kutob sa atong gusto, tungod kay mahimong mamatay na kita ugmang adlawa!" ¹⁴ Busa si Yahweh, ang pangulo sa mga kasundalohang anghel, mipadayag niini kanako: "Dili ko gayod mapasaylo ang akong katawhan nga nagpakasala nga sama niini!" ¹⁵ Si Yahweh, nga pangulo sa mga kasundalohang anghel, miingon niini kanako: "Lakaw ngadto kang Shebna, ang opisyal nga nagdumala sa mga trabahante sa palasyo, ug ihatag kini nga mensahe ngadto kaniya: ¹⁶ 'Kinsa ka ba sa imong hunahuna? Kinsa man ang naghatag kanimo ug katungod sa paghimo ug maanindot nga lubnganan diin ka ilubong, nga nagkalot sa batoon nga pangpang ibabaw niini nga walog?'" ¹⁷ Naghunahuna ka nga bantogan ka nga tawo, apan isalibay ka ni Yahweh palayo. Ingon nga daw gisakmit ka niya, ¹⁸ gituyoktuyok ka ingon nga bola, ug ilabay ka sa halapad ug layo nga dapit. Mamatay ka ug ilubong didto, ug magpabilin ang imong maanindot nga mga karwahe didto sa mga kamot sa imong mga kaaway. Ug tungod sa nahitabo kanimo, maulawan ang imong agalon nga hari. ¹⁹ Miingon si Yahweh, "Pugson ko ikaw sa pag-undang ug trabaho sa palasyo; pugson ka sa pagpahawa gikan sa imong mahinungdanon nga katungdanan. ²⁰ Unya ipatawag ko ang anak nga lalaki ni Hilkia nga si Eliakim, nga nag-alagad kanako pag-ayo, aron mopuli kanimo. ²¹ Ipasul-ob ko kaniya ang imong kupo ug itaod ang imong bakos ngadto kaniya, ug ihatag ko kaniya ang katungod nga anaa kanimo. Mahisama siya sa amahan ngadto sa katawhan sa Jerusalem ug sa ubang mga lungsod sa Juda. ²² Ihatag ko kaniya ang katungod kung unsa ang mahitabo sa palasyo diin nagpuyo si Haring David; sa dihang makahukom siya sa usa ka butang, walay usa nga makahimo sa pagsupak niini; sa dihang modumili siya sa pagbuhat sa usa ka butang, walay usa nga makahimo sa pagpugos kaniya sa pagbuhat niini. ²³ Himoon ko nga tinahod pag-ayo ang iyang pamilya, tungod kay ibutang ko siya sa lig-on nga katungdanan ingon nga tigdumala sa mga trabahante sa palasyo, sama sa lansang nga gilansang ug tarong sa bongbong. ²⁴ Himoon siya sa uban nga adunay daghang kaakohan, hinungdan nga tahoron ang tanang miyembro sa iyang pamilya, bisan ang dili kaayo mahinungdanon. ²⁵ Miingon usab si Yahweh, ang pangulo sa mga kasundalohang anghel nga, "Sama si Shebna sa ugsok nga gitaod diha sa bongbong. Apan adunay panahon sa dihang kuhaon ko siya gikan sa iyang katungdanan; mawad-an siya sa iyang gahom, ug mapakyas ang tanan nga iyang gipausbaw." Mahitabo gayod kana tungod kay si Yahweh ang miingon niini.

Chapter 23

¹ Ako, si Isaias, nakadawat niini nga mensahe gikan kang Yahweh alang kaninyo, nga katawhan sa siyudad sa Tyre: Panghilak kamong mga manlalawig sa mga barko gikan sa Tarshis, tungod kay nagun-ob ang pantalan sa Tyre ug ang tanang mga balay sa siyudad. Tinuod ang nadungog ninyo nga balita sa Isla sa Cyprus mahitungod sa Tyre. ² Pagbangotan sa hilom kamong katawhan nga nagpuyo sa baybayon, kamong tigpatigayon sa siyudad sa Sidon. Mitabok ang inyong manlalawig sa kadagatan aron mahimo kamong adunahan, diha sa Tyre. ³ Maglawig sila tabok sa lalom nga kadagatan aron pagpalit ug mga lugas didto sa Ehipto, ug lugas nga gikan sa Walog sa Shihor. Kini nga katigayonan miabot sa Suba sa Nilo, ug ikaw, Tyre, mao ang dapit diin nagpatigayon ang mga katawhan sa tanang kanasoran. ⁴ Apan karon kinahanglan maulaw kamo nga katawhan sa Sidon, tungod kay misalig kamo sa Tyre, nga nahimong lig-on nga salipdanan ngadto sa isla sa dagat. Ang Tyre sama sa usa ka babaye nga nag-ingon, "Karon ingon nga daw wala ako nanganak, o bisan magpadako ug anak nga mga lalaki o mga babaye." ⁵ Sa dihang madungog sa katawhan sa Ehipto kung unsa ang nahitabo ngadto sa Tyre, magsubo sila pag-ayo. ⁶ Paglawig ngadto sa Tarshis ug sultihi sila kung unsa ang nahitabo; paghilak, kamong katawhan nga nagpuyo daplin sa baybayon. ⁷ Malipayon kaniadto ang katawhan sa karaan kaayo nga siyudad sa Tyre. Nagtukod ang mga tigpatigayon nga gikan sa Tyre ug mga panon ngadto sa daghan nga layong mga nasod. ⁸ Nagtuboy ang katawhan nga gikan sa Tyre ug hari sa ubang mga dapit; mga dato ang ilang mga tigpatigayon; mga gamhanan sila ug mga dato sama sa mga hari. Kinsa man ang hinungdan nga nakasinati ang katawhan sa Tyre niini nga katalagman? ⁹ Si Yahweh, ang pangulo sa mga kasundalohang anghel, mao ang nagbuhat niini; gibuhat niya kini aron nga kamong katawhan sa Tyre dili na gayod mapasigarbohon, aron ipaubos kamong kalalakin-an nga tinahod sa tibuok kalibotan. ¹⁰ Kamong katawhan sa Tarshis, kinahanglan nga magtanom kamo sa inyong yuta imbis nga magpatigayon; lukopa ang tibuok ninyo nga yuta sama sa Suba sa Nilo nga molukop ngadto sa yuta sa Ehipto sa dihang magbaha kini, tungod kay wala nay pantalan sa Tyre alang sa inyong mga barko karon. ¹¹ Nga daw gibakyaw ni Yahweh ang iyang kamot ngadto sa dagat ug giuyog ang mga gingharian sa kalibotan. Nagsugo siya nga kinahanglan gun-obon ang tanang salipdanan didto sa Fenicia. ¹² Miingon siya ngadto sa katawhan sa Sidon, "Dili na gayod kamo magmalipayon pag-usab, tungod kay pagadukmokon kamo; bisan pa ug mokalagiw kamo ngadto sa isla sa Cyprus, dili kamo makaikyas gikan sa mga kagubot; wala kamoy kalinaw." ¹³ Hunahunaa kung unsa ang nahitabo sa Babilonia: nangawala ang katawhan nga anaa diha nga yuta. Ang mga kasundalohan sa Asiria ang naghimo niana nga yuta nga mahimong dapit nga puy-an sa ihalas nga mga hayop gikan sa disyerto. Nagbuhat sila ug mga hagdanan padulong sa ibabaw sa mga pader sa siyudad sa Babilonia; unya misulod sila sa siyudad ug gipangguba ang mga palasyo ug nahimong usa ka tipun-og ang siyudad. ¹⁴ Busa pagdangoyngoy, kamong manlalawig sa mga barko sa Tarshis, tungod kay nagun-ob na ang pantalan nga dunggoanan sa inyong mga barko! ¹⁵ Sulod sa 70 ka tuig, nga daw sama kadugayon sa kasagaran nga pagpuyo sa mga hari, malimtan sa katawhan ang mahitungod sa Tyre. Apan unya pagatukoron kini pag-usab. Mahisama ang mahitabo didto sa nahitabo sa mga nagbaligya ug dungog niini nga awit: ¹⁶ Ikaw bigaon, nga nahikalimtan sa katawhan, tugtoga ug maayo ang imong alpa, ug pag-awit ug mga alawiton, aron nga mahinumdoman ka pag-usab sa katawhan. ¹⁷ Tinuod gayod nga human sa 70 katuig ipahiuli ni Yahweh ang Tyre. Makaangkon pag-usab ug daghang kwarta ang mga tigpatigayon pinaagi sa pagpamalit ug mga butang ug pagbaligya sa mga butang ngadto sa laing mga nasod. ¹⁸ Apan ihatag ang ilang mga ginansya ngadto kang Yahweh. Dili tipigan sa mga tigpatigayon ang ilang mga kwarta; hinuon, ihatag nila kini ngadto sa katawhan ni Yahweh, kay magkinabuhi sila sa iyang presensya, aron nga makapalit sila ug pagkaon ug nindot nga mga bisti.

Chapter 24

¹ Sa umaabot pagalaglagon ni Yahweh ang kalibotan. Gubaon niya kini ug mahimo kini nga disyerto, ug ipatibulaag niya ang katawhan niini. ² Ipatibulaag niya ang matag usa: ang mga pari ug ang kasagarang mga tawo, ang mga sulugoon ug ang ilang mga agalon, ang mga babayeng katabang ug ilang mga babayeng agalon, ang mga mamalit ug mga tigbaligya, ang mga tigpautang ug ang mga mangutang, ang mga tawo nga nakautang ug kwarta ug ang mga tawo nga giutangan ug kwarta. ³ Wala nay mahibilin nga mga bililhong butang sa kalibotan; magun-ob ang tanang bililhon nga mga butang. Mahitabo gayod kana tungod kay miingon si Yahweh niini. ⁴ Mauga ug mamatay ang tanang butang sa kalibotan; maluya ang mahinungdanon nga katawhan ug dili na mahimong mahinungdanon. ⁵ Dili na angayan ang kalibotan ngadto kang Yahweh tungod kay misupak sa iyang balaod ang katawhan nga nagpuyo niini; gisalikway nila ang kasabotan nga gitinguha niya nga molungtad hangtod sa kahangtoran. ⁶ Busa, tunglohon ni Yahweh ang kalibotan; kinahanglan nga silotan ang katawhan nga nagpuyo niini tungod sa nabuhat nila nga mga sala. Malaglag sila pinaagi sa kalayo, ug pipila na lamang ang katawhan nga mahibiling buhi. ⁷ Malaya ang mga parasan, ug wala na gayoy ubas aron himoong bino. Mag-agulo ug magbangotan na karon ang tanang katawhan nga malipayon kaniadto. ⁸ Dili na gayod magpatugtog ug malipayon nga mga awit uban ang mga piyangpiyang, ug dili na gayod magpatingog ug malipayon ang katawhan sa ilang mga alpa, ug dili na gayod maghugyaw ang mga tawo panahon sa ilang mga kasaulogan. ⁹ Dili na gayod mag-awit ang katawhan samtang mag-inom sila ug bino, ug mapait ang lasa sa tanan nilang mga ilimnon. ¹⁰ Mamingaw ang mga lungsod ug ang mga siyudad; trangkahan ang matag balay aron nga dili makasulod ang mga kawatan, kay walay usa nga magpuyo niini. ¹¹ Magtapok ang mga magubotong panon diha sa mga kalsada, nagtinguha ug bino; wala na gayoy tawo nga magmalipayon pa sa kalibotan. ¹² Maguba ang mga siyudad, ug madugmok sa pino ang tanan nilang mga ganghaan. ¹³ Mahisama niana ang tibuok kalibotan: adunay pipila na lamang nga mabiling buhi, sama sa dihang pupuon sa mga trabahante ang tanang mga olibo gikan sa punoan ug pipila lamang ang mahibilin, o sa dihang mag-ani sila sa mga ubas ug pipila lamang ang mabilin sa mga punoan. ¹⁴ Mag-awit uban sa dakong kalipay kadtong anaa sa kasadpan; ipahayag nila nga bantogan kaayo si Yahweh. ¹⁵ Magdayeg usab ngadto kang Yahweh kadtong anaa sa sidlakan sa Israel; magdayeg kang Yahweh kadtong anaa sa baybayon sa dagat, ang Dios nga ginasimba sa katawhan sa Israel. ¹⁶ Makadungog kami sa mga pag-awit sa katawhan sa layo nga mga dapit sa kalibotan alang kang Yahweh, ang tinuod nga matarong. Apan karon, nasubo ako pag-ayo. Paghilak alang kanako, tungod kay naniwang ug naluya na ako. Makalilisang nga mga butang ang nahitabo! Nagpabilin sa pagluib ngadto sa uban ang maluibon nga mga tawo sa bisan asa. ¹⁷ Malisang kamong katawhan sa tibuok kalibotan, ug mahulog kamo ngadto sa lalom nga mga bangag ug mga lit-ag. ¹⁸ Mahulog ngadto sa lalom nga mga bangag kadtong mosulay sa pag-ikyas tungod kay nahadlok, ug dakpon pinaagi sa mga lit-ag kadtong mokatkat pagawas sa mga bangag. Maabli ang kalangitan ug mobundak ang kusog nga ulan; mauyog ang mga patukoranan sa kalibotan. ¹⁹ Mangliki ug mabahin ang yuta; mauyog kini sa makusog. ²⁰ Nga daw magsusapinday ang kalibotan sama sa usa ka hubog; mauyog kini sama sa duyan sa kusog nga hangin. Mahugno kini ug dili na makahimo sa pagbangon pag-usab, tungod kay hilabihan kadako ang sala sa katawhan nga misupak kang Yahweh. ²¹ Nianang panahona, silotan ni Yahweh ang daotang makagagahom nga mga binuhat nga anaa sa kalangitan ug ang daotang mga hari sa kalibotan. ²² Pagatigomon silang tanan ug ilabay ngadto sa prisohan. Pagasirad-an sila ngadto sa prisohan, ug silotan sila sa kaulahian. ²³ Nianang panahona mohinay ang kahayag sa bulan ug sa adlaw; nga daw naulaw sila sa presensya ni Yahweh, tungod kay siya, si Yahweh, ang pangulo sa mga kasundalohang anghel, mahimayaong magdumala sa Bukid sa Zion, sa atubangan sa tanang mga pangulo sa iyang katawhan.

Chapter 25

¹ Yahweh, ikaw ang akong Dios, pasidunggan ug pagadaygon ko ikaw. Gibuhat mo ang kahibulongang mga butang; miingon ka kaniadto nga buhaton mo kadtong mga butanga, ug nahuman na nimo kini karon sama sa imong gisulti nga imong buhaton. ² Usahay gigun-ob nimo ang mga siyudad aron mahimong tipun-og sa guba, mga siyudad nga napalibotan ug lig-on nga mga pader. Gibungkag mo ang mga palasyo sa mga langyaw nga mga nasod; dili na gayod kini matukod pag-usab. ³ Busa, ipahayag sa katawhan sa gamhanang mga nasod nga ikaw ang labing gamhanan, ug tahoron ka sa katawhan sa kanasoran niadtong mga pangulo wala mipakita ug kaluoy kang bisan kinsa. ⁴ Yahweh, sama ka sa lig-on nga tore nga kadangpan sa mga tawong kabos, ang dapit diin makaadto ang mga tawo nga nanginahanglan sa dihang nagkalisod sila. Sama ka sa dapit diin makakaplag ug dalangpanan ang katawhan sa panahon sa bagyo ug diin makapahulay sila sa landong, gikan sa kainit sa adlaw. Gidaugdaog kita sa katawhan ug wala kita kaloy-i, sama sila sa bagyo nga mihampak ngadto sa pader, ⁵ ug sama sa kainit diha sa disyerto. Apan gipahilom mo ang kaguliyang sa katawhan gikan sa mga langyaw nga mga nasod. Sama sa hangin nga nabugnaw sa dihang motabon na ang panganod, pahunongon mo gikan sa pag-awit ug mga alawiton mahitungod sa ilang pagkagamhanan ang mga walay kaluoy nga katawhan. ⁶ Mag-andam ug maanindot nga kombira dinhi sa Jerusalem, si Yahweh nga pangulo sa mga kasundalohang anghel alang sa tanang katawhan sa kalibotan. Bangkite kini uban sa daghang maayo nga mga karne ug labing maayong bino. ⁷ Masulob-on ang katawhan dinhi; masulob-on kaayo sila nga sama sa ngitngit nga panganod nga mitabon kanila, sama sa ilang kasinatian sa dihang adunay usa ka tawong mamatay. Apan kuhaon ni Yahweh ang ilang pagkamasulob-on. ⁸ Wad-on niya ang kamatayon hangtod sa kahangtoran! Si Yahweh nga atong Dios ang naghimo sa katawhan nga dili na gayod magbangotan tungod kay namatay ang usa ka tawo. Pahunongon niya ang ubang katawhan sa pagtamay ug pagbiay-biay sa iyang yuta ug kanamo nga iyang katawhan. Mahitabo gayod kana tungod kay miingon si Yahweh niini! ⁹ Nianang panahona, imantala sa katawhan nga "Si Yahweh ang atong Dios! Nagsalig kita kaniya, ug giluwas niya kita! Si Yahweh nga atong gisaligan ang nagbuhat niini; kinahanglan nga magmaya kita tungod kay giluwas kita niya!" ¹⁰ Panalipdan ug panalanginan ni Yahweh ang Jerusalem. Apan dugmokon niya ang katawhan sa yuta sa Moab; sama sila sa mga dagami nga giyatak-yatakan diha sa mga hugaw sa hayop ug biyaan aron madunot. ¹¹ Ipasukamod ni Yahweh ang katawhan sa Moab, sama sila sa manlalangoy nga nagkabya sa tubig pinaagi sa iyang mga kamot; gamiton nila ang ilang mga kamot sa pagtuklod apan dili na gayod sila makagawas gikan sa hugaw. Hunongon niya ang ilang pagkamapasigarbohon ug ipakita niya nga walay pulos ang tanang butang nga ilang gihimo. ¹² Ipagun-ob niya sa kasundalohan ang mga habog nga mga pader palibot sa mga siyudad sa Moab; malumpag kini ug madugmok ug masagol sa abog.

Chapter 26

¹ Moabot ang adlaw nga moawit ang Juda niini nga awit: "Lig-on ang atong siyudad sa Jerusalem! Panalipdan ni Yahweh ang atong siyudad; Sama siya sa pader nga nagpalibot niini. ² Ablihi ang mga ganghaan sa siyudad alang sa mga tawo nga matarong; tugoti ang katawhan nga matinud-anong nagtuman kang Yahweh sa pagsulod sa siyudad. ³ Yahweh, kadtong nagsalig kanimo, kadtong mapaninguhaon nga dili magduhaduha kanimo, himoon nimong magmalinawon sa hingpit ang ilang mga kasingkasing. ⁴ Busa salig kanunay kang Yahweh, tungod kay hangtod sa kahangtoran mahisama siya sa dakong bato nga anaa sa ibabaw diin luwas kita. ⁵ Gipaubos niya ang mga mapasigarbohon nga katawhan ug gilaglag ang mga siyudad nga mapahitas-on ang katawhan. Gitugotan niya nga matumpag kadto nga mga siyudad ug mahimong abog. ⁶ Kung mahitabo kana, motunob ang kabos ug dinaugdaog sa mga tipun-og. ⁷ Apan alang sa mga matarong nga katawhan, Yahweh, gibuhat nimo kung unsa ang husto; sama nga imong gipahapsay ang mga dalan diin sila naglakaw. ⁸ Yahweh, pinaagi sa pagtuman sa imong mga balaod, nagpakita kami nga nagsalig kami nga imong tabangan; ug ang gitinguha sa among mga kasingkasing mao ang pagpasidungog kanimo. ⁹ Gitinguha ko nga mas masayran ka sa tanang kagabhion, ug gusto gihapon ako mag-uban kanimo sa kabuntagon. Sa dihang moabot ka aron sa paghukom ug sa pagsilot sa katawhan nga nagpuyo sa kalibotan, makat-onan nila ang pagbuhat kung unsa ang matarong. ¹⁰ Apan ang pagkamaayo nimo sa daotang mga tawo wala naghimo kanila sa pagbuhat sa maayo. Bisan pa sa mga dapit nga diin ang mga tawo nagbuhat sa matarong, nagpadayon gihapon sa pagbuhat ug daotan ang daotang mga tawo, ug wala sila makaamgo nga bantogan ka, Yahweh. ¹¹ Yahweh, ingon nga daw ang imong kinumo gipataas ug andam na sa pagsilot kanila, apan wala sila nakaamgo niana. Ipakita kanila nga gusto gayod ka nga motabang sa imong katawhan. Kung makaamgo ang imong kaaway niana, maulaw sila; sunoga sila sa imong kalayo tungod kay imo silang mga kaaway. ¹² Yahweh, nagtinguha kami nga tugotan nimo ang mga butang nga mamaayo alang kanamo; ang tanan namong gibuhat mao ang mga butang nga imong gipabuhat kanamo. ¹³ Yahweh, nga among Dios, nagdumala kanamo ang ubang mga agalon, apan ikaw lamang ang among gipasidunggan. ¹⁴ Nangawala na karon kadtong nagdumala kanamo; nangamatay na sila; mibiya na ang ilang mga espiritu dinhi sa kalibotan ug dili na sila mabuhi pag-usab. Gisilotan nimo kadto nga mga tigdumala ug gipamatay sila, ug wala na gani sila nahinumdoman sa katawhan. ¹⁵ Yahweh, gihimo nimong bantogan ang among nasod; daghan na kami karon, ug daghan na ang yuta nga among gipanag-iyahan, busa nagpasalamat kami kanimo. ¹⁶ Yahweh, sa dihang anaa kami sa kalisod, mangayo kami ug tabang kanimo; sa dihang pantonon nimo kami, dili man gani kami makasulti sa among pag-ampo diha kanimo. ¹⁷ Sama sa nagmabdos nga mga babaye nga nagbati ug naghilak sa dihang nanganak sila, nag-antos usab kami pag-ayo. ¹⁸ Nagmabdos kami ug adunay grabeng sakit, apan wala gayoy maayong resulta gikan niini. Wala kami nakaluwas ug bisan kinsa nga mga tawo o nakapugong sa ilang mga kaaway gikan sa paglupig kanila, ug wala napildi diha sa gubat ang atong mga kaaway nga anaa sa kalibotan. ¹⁹ Apan mabuhi pag-usab ang katawhan ni Yahweh nga patay na, mabuhi pag-usab ang ilang patayng lawas! Kamo nga gilubong ang lawas sa lubnganan, bangon ug singgit sa kalipay! Ang iyang kahayag sama sa yamog nga nahulog kaninyo, iyang katawhan nga nangamatay na, kamo nga anaa na sa dapit diin anaa ang mga patay; banhawon niya kamo. ²⁰ Apan karon, akong kaubanang mga Israelita, pauli sa balay ug trangkahi ang inyong mga pultahan! Tago sa makadiyot, hangtod nga mawala na ang kasuko ni Yahweh. ²¹ Paminaw niini: monaog si Yahweh gikan sa langit aron sa pagsilot sa tanang katawhan sa kalibotan alang sa ilang nabuhat nga mga sala. Makita sa mga tawo ang dugo niadtong gipamatay; masayod na gayod ang tanan sa mga pagpamatay.

Chapter 27

¹ Nianang panahona, silotan ni Yahweh ang Leviatan, ang paspas molihok nga mapintas nga mananap sa dagat, ang nagluko nga bitin nga nagpuyo sa dagat. Patyon kini ni Yahweh uban sa iyang hait, dako, ug gamhanang espada. ² Nianang panahona, moingon si Yahweh, "Kamong mga Israelita, nga sama sa mabungahong parasan, kinahanglan moawit! ³ Panalipdan ko kamo sama sa usa ka mag-uuma nga nagpatubig sa iyang mga tanom aron maayo ang ilang pagtubo. Bantayan ko kamo adlaw ug gabii, aron nga walay makapasakit kaninyo. ⁴ Wala na ako masuko sa akong katawhan; kung mosulay sa pagdagmal kaninyo ang inyong mga kaaway sama sa mga sampinit ug mga tunok nga makasamad sa mga tawo, atakihon ko sila sa gubat; laglagon ko sila sa hingpit, ⁵ gawas lamang kung mohangyo sila nga panalipdan ko sila; dapiton ko gayod sila nga makigdait uban kanako!" ⁶ Adunay panahon nga mouswag ang mga kaliwat ni Jacob sama sa usa ka tanom nga adunay maayong mga gamot; mahisama sila sa mga kahoy nga mosalingsing ug mamulak ug mamunga ug daghan; makapanalangin sa tanang mga tawo sa kalibotan ang ilang gibuhat. ⁷ Gisilotan ba kita ni Yahweh sama sa pagsilot niya sa atong mga kaaway? Gisilotan ba niya kita labaw pa sa iyang pagsilot kanila? ⁸ Wala, wala niya kana gibuhat, apan gisilotan kita nga mga Israelita ug gipabihag kita; gidala kita palayo gikan sa atong yuta ingon nga gipalid kita sa alimpulos nga gikan sa sidlakan. ⁹ Gibuhat kana ni Yahweh aron sa pagsilot kanato alang sa atong mga sala ug sa pagpapas sa atong kalapasan. Ingon nga resulta sa atong pagkabihag, gubaon ang tanan nga mga halaran sa laing mga dios diha sa Israel, ug pasayloon kita sa mga sala nga atong nabuhat. Wala na unyay mga poste ni diosa Ashera nga simbahon o mga halaran sa insenso alang sa laing mga dios; maguba kining tanan ug madugmok sa pino. ¹⁰ Mahimong walay sulod ang mga siyudad nga adunay lig-on nga mga pader; sama sa disyerto, nga walay mopuyo niini. Biyaan ang mga balay, ug mapuno sa mga sagbot ang kadalanan. Manibsib ang mga baka ug mohigda didto; usapon niini ang tanang mga dahon sa mga kahoy. ¹¹ Nahisama sa uga nga mga sanga sa kahoy ang Israelita; balion kini sa mga babaye aron isugnod ilalom sa mga kaldero. Walay pagbati ang atong katawhang Israelita; busa si Yahweh, nga nagbuhat kanila, dili na magmaluloy-on ngadto kanila o magbuhat ug maayo ngadto kanila. ¹² Bisan pa niana, adunay panahon nga tigomon sila pag-usab ni Yahweh; lainon niya sila gikan sa mga tawo nga nagpildi kanila, sama sa mga tawo nga naglain sa trigo gikan sa tahop niini. Dad-on niya sila pagbalik sa Israel, ang matag usa nga gikan sa yuta nga tungatunga sa Suba sa Eufrates sa amihanang sidlakan ug sa sapa nga anaa sa utlanan sa Ehipto sa habagatang kasadpan. ¹³ Nianang panahona, patingogon ug kusog kaayo ang trumpeta. Ug kadtong gibihag sa Asiria ug sa Ehipto ug kadtong hapit na mamatay didto mobalik sa Jerusalem, aron sa pagsimba kang Yahweh didto sa Zion, ang balaan niyang bungtod.

Chapter 28

¹ Modangat ang makalilisang nga mga butang sa siyudad sa Samaria, ang sentrong siyudad sa Israel! Anaa kini didto sa bungtod ibabaw sa tabunok nga walog; garboso kaayo ang mga tawo nga nagpuyo didto, nga nangahubog pinaagi sa pag-inom ug daghan nga bino; maanyag ug matahom kini nga siyudad, apan sa dili madugay mawala ang kaanyag niini sama sa bulak nga nalawos ug nalaya. ² Paminawa kini: Ipasulong ni Yahweh ang daghang kasundalohan dinhi. Sama sa mabaga nga ulan nga yelo ang ilang kasundalohan o kusog nga haguros sa hangin; anaa sila sa bisan asa, sama sa tubig sa dako nga baha, ug pagadugmukon nila ang mga tinukod sa Samaria. ³ Garboso ang katawhan sa Samaria, apan yatakyatakan sa ilang mga kaaway ang tanang nindot nga gihunahuna sa tanang palahubog didto. ⁴ Oo, Matahom ang Samaria, nga napahiluna didto sa bungtod ibabaw sa tabunok nga walog, apan mahanaw kana nga katahom sama sa bulak nga nalawos ug nalaya. Sa dihang adunay usa ka tawo nga makakita ug maayong igos sa pagsugod sa panahon sa dihang mahinog na ang mga igos, puniton dayon niya kini ug kaonon; sa samang paagi, sa dihang makita sa mga kaaway sa Israel ang tanang matahom nga mga butang diha sa Samaria, sakopon dayon nila ang maong siyudad ug panguhaon kadtong tanang mga butanga. ⁵ Nianang taknaa, si Yahweh, nga pangulo sa kasundalohang anghel, mahisama sa matahom nga koronang bulak alang kanamong katawhan sa Israel nga buhi hangtod karon human kami mabihag. ⁶ Siya maoy hinungdan nga magbuhat ang among maghuhukom sa kung unsa ang angay sa dihang mohukom sila sa mga sumbong sa katawhan. Tugotan niya sa pagbarog ang mga kasundalohan diha sa mga ganghaan aron sa pagpanalipod sa siyudad sa dihang mosulong na ang atong mga kaaway. ⁷ Apan karon, nagsusapinday ang atong mga pangulo, ug nagsusapinday usab ang mga pari ug ang mga propeta tungod sa pag-inom ug daghang bino ug uban pang makahubog nga mga ilimnon. Dili sila makahunahuna ug tarong; nakakita sila ug mga panan-awon, apan dili sila makasabot kung unsa ang ipasabot niini; dili sila makahimo sa paghukom sa hustong mga butang. ⁸ Nalukop sa ilang suka ang tibuok nilang mga lamesa; ug nagkatag bisan asa ang mga hugaw. ⁹ Kinsa man ang iyang tudloan aron makakat-on sila mahitungod sa kahibalo? Kinsa man ang maminaw kaniya aron nga makatudlo siya ug mga pagtulon-an kanila aron nga makakat-on sila? Naghunahuna ba siya nga sama kami sa gagmayng mga bata nga wala na nag-inom ug gatas, ug nga sama kami sa mga gagmayng bata nga bag-o pang nalutas? ¹⁰ Nagpadayon siya sa pagsulti kanamo, 'Buhata kini, buhata kana;' una gisulti niya kanamo ang una nga balaod, dayon ang uban nga balaod, apan nagsulti lamang siya ug usa ka linya sa pulong." ¹¹ Busa karon, kinahanglan pugson sila ni Yahweh aron sa pagpaminaw sa mga isulti sa taga Asiria sa pinulongan nga dili nila masabtan. ¹² Giingnan ni Yahweh ang iyang katawhan kaniadto, "Mao kini ang dapit nga makapahulay kamo; gikapoy gayod kamo gikan sa tanan ninyong mga panaw didto sa disyerto, apan makahimo kamo sa pagpahulay niining yutaa." Apan nagdumili sila sa pagpaminaw sa iyang gisulti. ¹³ Busa nagpadayon si Yahweh sa pagpakigsulti sa katawhan sa Samaria, usa ka linya sa usa ka higayon, "Buhata kini, buhata kana," sugod sa una nga balaod ug dayon ang uban nga balaod. Apan tungod kay gipakawalay bili nila ang gisulti sa Dios, sulongon sila ug mapildi; masamdan sila, mabitik ug madakpan. ¹⁴ Paminaw sa mga pulong nga isulti ni Yahweh, kamong nagdumala taliwala sa katawhan sa Jerusalem, kamong nagtamay ug nagbiaybiay kanako! ¹⁵ Nanghambog kamo ug miingon, "Nanaad kami tali sa gahom sa kamatayon aron sa pagsiguro nga dili kini makakuha kanamo, kung molabay na kini. Gisulayan namo sa paghimo nga dalangpanan ang among bakak nga mga pulong ngadto sa puloy-anan nga among katagoan. ¹⁶ Busa, nagsulti niini si Yahweh nga atong Ginoo: "Paminawa kini! Ipahimutang ko diha sa Jerusalem ang usa nga sama sa patukoranan nga bato, sama siya sa bato nga nasulayan na ang kalig-on niini. Sama siya sa bililhong bato kung asa luwas kini nga tukoran ug balay; ug si bisan kinsa nga mosalig kaniya dili gayod mapakyas. ¹⁷ Sulayan ko kamo katawhan sa Jerusalem aron mahibaloan ko kung nagbuhat ba kamo sa makiangayon ug sa matarong, sukdon ko ang inyong kinaiya sama sa panday nga naggamit ug pangsukod nga linya aron sa pagsuta kung tul-id ug pantay ba ang pader. Ug unya moulan ug mga yelo! Ug moguba kini sa tanan nga inyong nabatonan. Maguba ang inyong mga puloy-anan tungod kay natukod kini sa patukoranan nga bakak, ug ang tubig gikan sa bagyo maoy mobanlas sa maong puloy-anan. ¹⁸ Dili ko ipadayon ang kasabotan nga inyong gihimo tali sa kamatayon, ug tapuson ko na ang kasabotan nga inyong gibuhat tali sa dapit nga nahimutangan sa mga patay. Apan sa dihang moabot ang dakong baha, mabubo kini diha kaninyo ug kada adlaw molabay kini. ¹⁹ Sa dihang moabot ang baha, moagi kini diha kaninyo sama sa sapa sa dihang moawas kini sa pangpang ug mobaha sa bisan asa. Kung hingpit na gayod kamo nga makasabot sa mensahe ni Yahweh, makapahadlok kini kaninyo, ug dili kini makahupay. Kay mubo lamang ang higdaan aron katuy-oran sa usa ka tawo, ug dili halapad ang habol aron ibukot sa iyang kaugalingon. ²⁰ Nadungog ninyo nga nagsulti ang katawhan, "Mubo kaayo ang imong higdaanan; dili ka makahimo sa pagtulog niini; dili halapad ang imong habol; dili kini makabukot kanimo!" ²¹ Moanha si Yahweh ug pildihon kamo; buhaton niya kaninyo ang iyang gibuhat sa kasundalohan sa Filistia didto sa Bukid sa Perizim, ug sama sa iyang gibuhat sa mga taga Amon didto sa Walog sa Gibeon. Magbuhat siya ug talagsaon ug katingalahan. ²² Si Yahweh, nga pangulo sa kasundalohang anghel, nagsulti kanako nga gun-obon niya ang tibuok yuta. Busa ayaw gayod tamaya kung unsa ang akong isulti, tungod kay kung buhaton ninyo kana, silotan niya kamo sa hilabihan pa gayod. ²³ Paminawa ang akong isulti; paminawa pag-ayo. ²⁴ Kung magdaro ang mag-uuma sa yuta, dili ba siya magpugas ug binhi? Magpadayon ba siya sa pagdaro niini ug walay itanom nga binhi? ²⁵ Dili, patagon niya ang yuta, ug unya pugasan niya kini sa mga binhi— binhi sa lunga, anis, trigo ug sebada. Gipugas niya ang mga binhi sa hustong paagi. Wala siya magpugas ug usa lamang ka klase nga binhi sa dili angay nga paagi niini. ²⁶ Gibuhat niya kana tungod kay gitudloan siya sa Dios sa hustong paagi sa pagpugas niini. ²⁷ Bisan paman nga wala pa magiok ang binhi sa lunga pinaagi sa balsa, o bisan nagaling sa lubukanan niini ang anis; apan gibunalan ang lunga sa kahoy, ug ang anis sa sungkod. ²⁸ Ug gidugmok pag-ayo ang lugas alang sa pagbuhat ug tinapay, busa wala nagpadayon ang mga mag-uuma sa paglubok niini sa dugay nga panahon. Usahay ginapaguyod nila sa kariton ang ilang mga kabayo aron magiok kini, apan sa pagbuhat niana wala gihapon nagaling ang lugas. ²⁹ Si Yahweh, nga pangulo sa kasundalohang anghel, naghatag kanamo ug maanindot nga tambag mahitungod kung unsaon namo pagbuhat niining butanga; gihatagan niya kami ug hilabihan nga kaalam. Busa maalamon gayod ang gibuhat sa mga mag-uuma, apan nagbuhat sa walay pulos ang inyong mga pangulo.

Chapter 29

¹ Mao kini ang mensahe gikan kang Yahweh: Mahitabo ang makalilisang nga mga butang sa Jerusalem, ang siyudad nga gipuy-an ni Haring David. Kamong mga katawhan nga nagpadayon sa pagsaulog sa inyong mga kasaulogan sa matag tuig. ² Apan ipasinati ko kaninyo ang hilabihan nga katalagman, ug kung mahitabo na kana, manghilak ang katawhan ug magbangotan pag-ayo. Mahimong sama sa halaran ang inyong siyudad alang kanako kung asa pagasunogon ang katawhan ingon nga mga sakripisyo. ³ Ipasulong ko ang inyong mga kaaway ug magkampo sila libot sa tibuok ninyong siyudad; libotan nila kini pinaagi sa mga tinukod nga mga tore ug ipahiluna ang ubang mga butang alang sa pagsulong kaninyo. ⁴ Unya mag-istorya kamo ingon nga gilubong didto sa ilalom sa yuta; madungog kini sama nga adunay naghunghung gikan sa ilalom sa yuta, sama sa kalag nga nag-istorya gikan sa lubnganan. ⁵ Apan sa kalit lamang mangapadpad ang inyong mga kaaway sama sa abog; mangahanaw ang ilang mga kasundalohan sama sa uhot nga gipadpad sa hangin. Mahitabo kini sa kalit lamang: ⁶ Moabot si Yahweh, nga pangulo sa kasundalohang anghel, aron sa pagtabang kaninyo uban ang dalugdog ug ang linog ug ang makusog nga dahunog, uban ang kusog nga hangin ug dako nga bagyo ug ang kalayo nga mosunog sa tanang butang. ⁷ Unya mahanaw sa kalit lamang ang kasundalohan sa tanang mga nasod nga mosulong sa Jerusalem sama sa damgo sa kagabhion. Mangahanaw sa kalit lamang kadtong mosulong sa Jerusalem. ⁸ Ang mga tawo nga nangatulog nagdamgo nga nagkaon sila, apan sa dihang nakamata sila, gigutom gihapon sila. Ang mga tawo nga giuhaw nagdamgo nga adunay giinom, apan sa dihang nakamata sila giuhaw gihapon sila. Ingon niini ang mahitabo sa dihang mosulong ang inyong mga kaaway sa Bukid sa Zion; nagdamgo sila sa pagsakop kaninyo, apan sa dihang nakamata sila, nakaamgo sila nga wala sila nagmalampuson. ⁹ Kamong katawhan sa Jerusalem, kahibulong ug katingala mahitungod niini! Ayaw tuohi ang akong isulti! Ug pagdayon sa pagpakabuta mahitungod sa kung unsa ang gibuhat ni Yahweh. Buangbuang kamo, apan dili tungod kay nahubog kamo sa bino. Magsusapinday kamo, apan dili gikan sa pag-inom ug makahubog nga mga ilimnon. ¹⁰ Tungod kay gipugngan ni Yahweh ang mga propeta gikan sa pagsabot ug sa pagsulti sa iyang mga mensahe diha kaninyo, ingon nga gipatulog dayon niya kamo. ¹¹ Gipadaygan ako ni Yahweh ug mga panan-awon; apan alang kaninyo, mga pulong lamang kini nga nasilyohan diha sa linukot nga basahon. Kung ihatag ninyo kini niadtong makabasa ug mohangyo nga basahon kini, moingon sila, "Dili kami makabasa niini tungod kay nasilyohan ang linukot nga basahon." ¹² Kung ihatag ninyo kini ngadto sa uban nga dili makabasa, moingon sila, "Dili kami makabasa niini tungod kay dili kami makahibalo mobasa." ¹³ Busa moingon ang Ginoo, "Kining mga tawhana nagpakaaron-ingon lamang nga nagsimba kanako. Nagsulti sila ug maayong mga butang aron magpakaaron-ingnon nga nagpasidungog sila kanako, apan wala sila maghunahuna kung unsa ang akong gitinguha. Sa dihang nagsimba sila kanako, ang pagbatbat lamang sa balaod nga hinimo sa tawo ug nga ilang namemorya ang ilang ginabuhat. ¹⁴ Busa, magbuhat ako pag-usab ug kahibulongang mga butang alang niining mga tawhana; magbuhat ako ug daghang mga milagro. Ug akong ipakita nga dili gayod tinuod nga maalamon ang katawhan nga nagsulti sa uban nga maalamon sila ug akong ipakita nga dili gayod tinuod nga adunay daghan nga nahibaloan ang katawhan nga nagsulti sa uban nga aduna silay daghan nga kahibalo. ¹⁵ Mahitabo ang makalilisang nga mga butang alang niadtong mosulay sa paglimod kanako, si Yahweh, ang daotang mga butang nga ilang giplano nga buhaton; gibuhat nila ang maong mga binuhatan diha sa kangitngit ug naghunahuna sila nga, 'Dili gayod kita makita ni Yahweh; dili niya mahibaloan ang atong ginabuhat!' ¹⁶ Hilabihan sila kabuangbuang! Namuhat sila daw sama nga sila ang magkukolon ug ako mao ang lapok! Ang binuhat dili gayod makahimo sa pag-ingon ngadto sa nagbuhat kaniya nga, 'Wala mo ako buhata!' Dili gayod moingon ang tadyaw nga, 'Ang magkukolon nga nagbuhat kanako wala masayod sa iyang gipangbuhat!'" ¹⁷ Sa dili madugay mahimong tabunok nga yuta ang kalasangan sa Lebanon, ug manubo didtong yutaa ang daghang mga abot, ug mahitabo kana sa dili madugay. ¹⁸ Nianag taknaa, makadungog ang tawong bungol; makadungog sila kung adunay usa ka tawo nga mobasa gikan sa basahon; ug makakita ang tawong buta; makakita sila sa mga butang nga anaa sa dulom ug bisan pa anaa sa kangitngit. ¹⁹ Lipayon pag-usab ni Yahweh ang mapaubsanong katawhan. Magmaya ang pobri nga katawhan mahitungod sa gibuhat sa Balaang Dios sa Israel. ²⁰ Wala nay mga tawo nga magtamay sa uban ug wala nay mga garboso nga tawo. Ug pamatyon kadtong nagplano sa pagbuhat ug daotang mga butang. ²¹ Mangahanaw kadtong nagsaksi sa bakak aron nga danihon ang mga maghuhukom sa pagsilot sa mga tawong walay sala. Mahitabo ang sama nga mga butang niadtong namakak diha sa hukmanan aron danihon ang mga maghuhukom nga magbuhat ug dili makatarunganon nga mga paghukom. ²² Mao nga si Yahweh, nga maoy nagluwas kang Abraham, miingon ngadto sa katawhan sa Israel, "Dili na gayod maulawan ang akong katawhan; dili na gayod makita diha sa ilang panagway nga naulawan sila. ²³ Sa dihang makita nila nga gipanalanginan ko sila pinaagi sa paghatag kanila ug daghang mga anak, ug sa tanan nga akong gibuhat kanila, pasidunggan nila ang balaang ngalan sa Balaang Dios sa Israel, ug magtamod sila kanako, ang Dios nga maoy kagikan sa kaliwat ni Jacob. ²⁴ Kung mahitabo kana, makasabot na kadtong nangalibog, ug dawaton niadtong nagbagulbol kung unsa ang akong gitudlo kanila."

Chapter 30

¹ Miingon si Yahweh, "Mahitabo diha kaninyo ang makalilisang nga mga butang, akong katawhan nga nagmasupilon kanako. Nagplano kamo, apan dili kana ang gusto nakong mahitabo. Nakig-abin kamo uban sa mga pangulo sa Ehipto, apan wala kamo magpakisayod sa akong Espiritu kung unsa ba ang angay ninyo nga buhaton. Pinaagi sa pagbuhat niana, gidungagan hinuon ninyo ang inyong mga kasal-anan. ² Miadto kamo sa Ehipto aron mangayo ug tabang sa mga pangulo, ug wala nangayo sa akong tambag. Nagsalig kamo sa kasundalohan sa hari sa Ehipto nga maoy mopanalipod kaninyo; nagsalig kamo kanila sama sa mga tawo nga nagpasilong sa landong aron panalipdan ang ilang kaugalingon gikan sa kainit sa adlaw. ³ Apan napakyas hinuon kamo ug naulawan sa inyong pagsalig sa hari sa Ehipto; tungod kay misalig kamo kaniya, maulawan gayod kamo. ⁴ Nagbuhat ug panagsabot ang mga opisyal gikan sa Juda ngadto sa mga siyudad sa Zoan ug Hanes didto sa Ehipto, ⁵ apan maulawan gayod ang tanan nga misalig sa hari sa Ehipto, tungod kay kana nga nasod dili makahimo sa pagtabang kaninyo; walay pulos ang gibuhat ninyong panagsabot sa pagpangayo ug tabang gikan kanila, ug tungod niana naulawan hinuon kamo." ⁶ Nadawat kini nga mensahe ni Isaias gikan kang Yahweh mahitungod sa mga mananap didto sa sidlakang bahin sa Juda, ang disyerto nga dapit: Kana nga dapit mao ang dapit kung asa nakasinati ang katawhan ug daghang kagubot ug mga kalisdanan, ang dapit nga adunay mga laki ug baye nga mga liyon ug bisan unsang matang sa mga malalang bitin. Miagi didtong dapita ang mga panon sa karwahe nga nagdala ug mga asno ug mga kamelyo nga puno sa karga sa mga bililhong butang. Dad-on nila kini didto sa Ehipto tungod kay naglaom sila nga basin panalipdan sila sa kasundalohan sa Ehipto, apan wala kiniy pulos. ⁷ Kawang lamang ang mga gisaad sa Hari sa Ehipto; busa gitawag ko ang Ehipto nga 'Walay pulos nga Rahab, ang mapintas nga mananap sa dagat nga walay nabuhat.' ⁸ Giingnan ako ni Yahweh nga magsulat ug mensahe sa linukot nga basahon, aron nga mahimo kining saksi sa katawhan sa Juda nga molungtad hangtod sa hangtod. ⁹ Magpahinumdom kini kanila nga malimbongon sila ug kanunay nga nagmasupilon batok kang Yahweh, ug nagdumuli sila sa pagpaminaw sa kung unsa ang iyang gisulti kanila. ¹⁰ Giingnan nila ang katawhan nga makakita ug mga panan-awon gikan kang Yahweh, "Hunong na sa pagkakita ug mga panan-awon! Giingnan nila ang mga propeta, "Ayaw ipadayag kanamo kung unsa ang husto! Sultihi lamang kami ug maayong mga butang; ayaw kami sultihi sa mga panan-awon mahitungod sa mga tinuod nga butang! ¹¹ Hunong na sa pagbuhat kung unsa man ang inyong ginabuhat; hunong na sa pagsulti kung unsa man ang gisulti sa Balaang Dios sa Israel mahitungod kanamo!" ¹² Busa, mao kini ang gisulti sa Balaang Dios sa Israel: "Gisalikway ninyo ang akong mensahe, ug midangop kamo niadtong naglutos ug nanglimbong sa uban. ¹³ Busa, tungod sa inyong pagsalikway kanako makasinati kamo ug mga katalagman; mahitabo nga sama kamo sa naliki nga pader nga natumpag lamang sa kalit." ¹⁴ Mangadugmok kamo sama sa nadugmok nga tadyaw sa dihang nahulog kini ug nabuskag sa hingpit, ug tungod niana walay bisan usa nga tipik niini ang hingpit nga makapalid sa mga abo gikan sa lutoanan o masag-oban ug bisan gamay nga tubig gikan sa balon. ¹⁵ Nagsulti usab niini si Yahweh, nga among Dios, ang Balaang Dios sa Israel: "Luwason ko kamo gikan sa inyong mga kaaway kung maghinulsol lamang kamo ug mosalig sa akong pagabuhaton alang kaninyo; magmakusgan lamang kamo kung mohunong na kamo sa pagkabalaka ug mosalig kanako. Apan dili kamo gusto mobuhat niana. ¹⁶ Miingon kamo, 'Dili, moikyas kami pinaagi sa mga kabayo nga gihatag kanamo sa kasundalohan sa Ehipto!' Busa mosulay kamo sa pag-ikyas. Miingon kamo, 'Moikyas kami gikan sa kasundalohan sa Asiria pinaagi sa pagsakay sa paspas nga mga kabayo!' Apan nagsakay usab sa paspas nga kabayo kadtong naggukod kaninyo. ¹⁷ Tungod niini, liboan kaninyo ang mokalagiw sa dihang usa na lamang ang maggukod kaninyo! Sa dihang hulgaon kamo nga patyon sa lima ka mga sundalo, mokalagiw kamong tanan. Diyutay na lamang ang mahibilin kaninyo, sama sa nag-inusara nga poste sa bandera tumoy sa bukid, o sama sa usa ka timaan nga bandera didto sa tumoy sa bungtod." ¹⁸ Apan buot ni Yahweh magbuhat ug maayo diha kaninyo; bantogan siya tungod kay nagtinguha siya nga maluoy kaninyo. Ayaw kalimot nga siya ang Dios nga makiangayon; mahimuot si Yahweh niadtong mapailubon nga nagsalig kaniya. ¹⁹ Kamong katawhan nga nagpuyo sa Jerusalem, moabot ang adlaw nga dili na kamo manghilak pa. Maluoy si Yahweh kaninyo kung magpakitabang kamo kaniya. Motubag siya kaninyo sa dihang motawag kamo kaniya. ²⁰ Bisan karon ug gipasinati ni Yahweh kaninyo ang kapobrihon, siya nga inyong magtutudlo, dili mohikaw sa iyang kaugalingon diha kaninyo. Tudloan niya kamo sa daghan pang mga butang. ²¹ Ug madungog ninyo siya nga mosulti aron sa paggiya kaninyo. Diha sa imong kiliran mosulti siya, "Mao kini ang dalan nga angay ninyong lakwan; lakaw niini nga dalan!" ²² Kung mahitabo kana, gub-on ninyo ang tanan ninyong mga diosdios nga naputos sa plata o bulawan. Ilabay ninyo kini sama nga naglabay kamo ug hugaw nga trapo, ug moingon kamo kanila, "Wala na kami nagkinahanglan pa kaninyo!" ²³ Kung buhaton ninyo kana, panalanginan kamo ni Yahweh pinaagi sa paghatag kaninyo ug maayong ulan sa panahon nga magpugas kamo. Makabaton kamo ug maayong abot ug lapad nga mga kaumahan uban ang mga sagbot aron kasibsiban sa inyong mga baka. ²⁴ Human mapalid sa hangin ang uhot, makabaton ug maayong abot nga kan-on sa inyong mga baka ug mga asno nga maoy nagdaro sa inyong kaumahan. ²⁵ Nianang taknaa, sa dihang pamatyon ang inyong mga kaaway ug mangatumpag ang ilang mga tore, adunay mga sapa nga modagayday gikan sa bungtod ug sa bukid sa Juda. ²⁶ Mosidlak ang bulan sama sa kahayag sa adlaw, ug mosidlak ang adlaw sama sa kahayag sa pito ka pilo nga siga kaniadto. Mao kana ang mahitabo kung pahunongon na ni Yahweh ang pag-antos sa iyang katawhan; sama nga iyang gibugkusan ang ilang mga samad ug nangaayo sila. ²⁷ Sama nga nakita namo si Yahweh gikan sa halayo; nasuko siya pag-ayo, ug adunay baga nga mga panganod nga naglibot kaniya. Pinaagi sa iyang gisulti iyang gipakita nga nasuko siya; sama sa makalilisang nga kalayo ang iyang gisulti. ²⁸ Ang iyang gininhawa sama sa baha nga naglukop sa iyang mga kaaway hangtod sa ilang mga liog. Ilain niya ang mga nasod aron laglagon ang pipila kanila; ingon nga gibutangan niya ug rinda ang ilang mga baba aron nga giyahan sila padulong sa kalaglagan. ²⁹ Apan mag-awit sa kalipay ang iyang katawhan sama sa ilang pag-awit matag gabii sa dihang magsaulog sila sa balaang kasaulogan. Magmaya sila pag-ayo, sama sa dakong panon sa iyang katawhan nga nagmalipayon sa dihang motungas sila sa Bukid sa Zion sa Jerusalem, uban sa mga kalalakin-an nga nagtugtog ug mga plawta sa dihang mangadto silang tanan aron magsimba kang Yahweh. Sama siya sa dakong bato nga anaa sa bungtod kung asa luwas kaming katawhan sa Israel. ³⁰ Ug padunggon kita ni Yahweh sa iyang pagpanulti uban ang dakong gahom. Ipakita niya kanato nga makagagahom siya. Makita namo nga dugmokon niya ang iyang mga kaaway. Tungod sa iyang hilabihan nga kasuko, mokanaog siya sama sa dakong bagyo ug kilat ug ulan nga yelo aron sa pagsilot kanila. ³¹ Mangahadlok ang mga kasundalohan sa Asiria sa dihang madungog nila ang tingog ni Yahweh ug sa dihang bunalan sila ni Yahweh sa iyang sungkod. ³² Ug samtang bunalan sila ni Yahweh aron sa pagsilot kanila, magsaulog ang iyang katawhan pinaagi sa pagtugtog sa mga tamborin ug mga alpa. Ingon nga gituboy ni Yahweh ang iyang makagagahom nga kamot ug gibuntog ang kasundalohan sa Asiria sa gubat. ³³ Dugay na nga giandam ang Walog sa Tofet gawas sa Jerusalem; giandam kini alang sa hari sa Asiria; taas ug halapad ang sunoganan sa patayng lawas sa tawo, ingon nga si Yahweh maoy magsindi sa kalayo pinaagi sa iyang gininhawa, nga mobugwak sama sa sapa sa nagdilaab nga asupre.

Chapter 31

¹ Modangat ang makalilisang nga mga butang niadtong midangop sa Ehipto aron sa pagtabang kanila, imbes nga mosalig kang Yahweh, ang Balaang Dios sa Israel nga maoy motabang kanila, nagsalig hinuon sila sa mga kabayo sa kasundalohan ug sa ilang mga karwahe ug sa daghan nilang mga mangangarwahe. ² Maalamon kaayo si Yahweh, apan tugotan niya nga makasinati ug katalagman ang katawhan! Ug kung makahukom siya sa pagbuhat niana, dili na niya usbon pa ang iyang hunahuna! Bunalan niya ang daotang katawhan ug ang tanan nga nagtabang kanila. ³ Tawo lamang ang kasundalohan sa Ehipto nga inyong gidangpan katawhan sa Juda ug dili Dios! Ug mga kabayo lamang ang ilang mga kabayo; dili sila gamhanan nga espiritu! Busa sa dihang ituboy na ni Yahweh ang iyang kumo aron isumbag sa kasundalohan sa Ehipto nga inyong gilaoman nga maoy motabang kaninyo dagmalan usab niya kamong naghunahuna nga matabangan, mangadam-ag kamo ug mangalaglag; ug mangamatay kamong tanan. ⁴ Apan mao kini ang gisulti ni Yahweh kanako: "Sa dihang moabot ang liyon ug mongulob diha sa lawas sa karnero nga iyang gipatay, bisan pa kung moabot ang daghan nga mga panon sa magbalantay sa karnero aron sa pag-abog sa liyon, bisan pa ug magsinggit sila ug kusog, dili mahadlok ang liyon ug dili mobiya. Sa samang paagi, ako, si Yahweh, ang pangulo sa kasundalohang anghel, mokanaog aron makig-away sa akong mga kaaway didto sa Bukid sa Zion, ug walay makapugong kanako. ⁵ Si Yahweh, ang pangulo sa kasundalohang anghel, maoy mopanalipod sa Jerusalem sama sa inahan nga langgam nga mitabon sa iyang mga piso diha sa iyang salag. Panalipdan niya ang siyudad ug luwason sila gikan sa ilang mga kaaway." ⁶ Akong katawhan, bisan ug nagmasupilon kamo pag-ayo batok kang Yahweh, balik kaniya. ⁷ Kung buhaton ninyo kana, ang matag usa kaninyo molabay sa iyang mga diosdios nga gibuhat sa inyong makasasala nga kamot, mga diosdios nga naputos sa plata ug bulawan. ⁸ Mangamatay ang kasundalohan sa Asiria, apan dili pinaagi sa espada nga ginamit sa tawo. Mangapukan sila pinaagi sa espada sa Dios; ug kadtong wala nangamatay mangaratol ug mokalagiw. Ug ang uban kanila madakpan ug mapugos nga mahimong ulipon. ⁹ Bisan pa ang ilang isog nga mga sundalo mangahadlok; biyaan sa mga pangulo ang ilang paglaom ug modagan palayo gikan sa gahom ni Yahweh! Sama sa kalayo ang presensya ni Yahweh nga anaa sa Bukid sa Zion, sama sa nagdilaab nga kalayo didto sa Jerusalem. Mao kini ang gisulti ni Yahweh mahitungod sa kasundalohan sa Asiria!

Chapter 32

¹ Paminaw kamo niini! Sa umaabot nga panahon adunay matarong nga hari nga moabot, ug tabangan siya sa iyang mga opisyal sa paghari nga makiangayon. ² Mahisama ang matag-usa kanila sa usa ka dalangpanan nga gikan sa hangin ug usa ka salipdanan gikan sa bagyo. Mahisama sila sa mga sapa sa tubig didto sa disyerto, sama sa landong ilalom sa dako nga bato sa hilabihan kainit ug mala nga yuta. ³ Sa dihang mahitabo kana, ipasabot niadto nga mga pangulo ang kamatuoran sa Dios ngadto sa katawhan nga wala nakasabot niini, ug himoon nila nga hatagan ug pagtagad niadtong wala nagtagad sa kamatuoran sa Dios. ⁴ Bisan paman niadtong madalidalion sa pagbuhat mahatagan gayod ug maayong panabot, ug bisan paman niadtong dili makasulti ug tarong makahimo na sa pagsulti ug klaro. ⁵ Niadtong taknaa, dili na gayod kahimut-an ang buangbuang nga katawhan, ug dili na gayod tahuron ang mga daotan. ⁶ Ang mga buangbuang nga mga katawhan mosulti sa mga butang nga walay pulos, ug nagplano sila sa pagbuhat ug daotang mga butang. Makauulaw ang ilang pamatasan, ug nagsulti sila ug bakak nga mga butang mahitungod kang Yahweh. Wala nila hatagig pagkaon ang mga gipanggutom, ug wala nila hatagig tubig ang mga gipang-uhaw. ⁷ Ang tawong daotan mobuhat ug mga daotang butang ug maoy molimbong sa katawhan; nagplano sila sa pagbuhat ug daotang mga butang; pinaagi sa pagsultig bakak sa hukmanan gihasol nila ang mga kabos, bisan tuod ug makataronganon ang hangyo sa mga tawong kabos. ⁸ Apan nagplano ang halangdong katawhan sa pagbuhat ug halangdong mga butang, ug gihimo gayod nila kini ug nagmalampuson sila. ⁹ Kamong kababayen-an sa Jerusalem, nga naghunahuna nga layo sila sa piligro, ug naghunahuna nga maayo ang dangatan sa tanang butang, paminaw sa akong isulti! ¹⁰ Human ang usa ka tuig, magapangurog gayod kamo karon nga wala mabalaka mahitungod sa bisan unsang butang, tungod kay wala na kamoy mapupo nga mga ubas ug wala nay laing tanom nga pagaanihon. ¹¹ Busa pangurog karon, kamong kababayen-an nga wala nabalaka mahitungod sa bisan unsang butang! Huboa ang maanindot ninyong mga bisti ug isul-ob ang bisti nga sako libot sa inyong mga hawak. ¹² Magdangoyngoy kamo tungod sa kasubo mahitungod sa mahitabo sa tabunok ninyo nga kaumahan ug sa mabungahon ninyo nga ubasan, ¹³ tungod kay tunok na lamang ug sampinit ang moturok sa inyong yuta. Mawala ang inyong panimalay kung diin kamo nagasaulog ug ang inyong siyudad kung diin kamo naglipay. ¹⁴ Wala na gayoy mabilin sa palasyo sa hari; wala nay mga tawo nga magbanha sa siyudad. Naglatagaw ang ihalas nga mga asno ug mosibsib ang mga panon sa karnero sa mga sagbot ngadto sa walay sulod nga kota ug sa bantayanang tore. ¹⁵ Mahisama gayod kini niana hangtod nga ibubo sa Dios ang iyang Espiritu kanato gikan sa langit. Kung mahitabo kana, mahimo gayong tabunok nga kaumahan ang disyerto, ug motubo ang daghang pananom niadtong tabunok nga kaumahan. ¹⁶ Makiangayon nga mamuhat ang katawhan niadtong disyerto nga mga dapit, ug magbuhat ug matarong ang katawhan niadtong anaa sa tabunok nga kaumahan. ¹⁷ Adunay kalinaw tungod sa ilang matarong nga binuhatan, ug ang katawhan maluwas hangtod sa hangtod. ¹⁸ Magpuyo nga malinawon ang akong katawhan sa ilang panimalay, nga luwas, nga walay kasamok, didto sa dapit sa pahulayanan. ¹⁹ Bisan pa ug mangatumba ang kakahoyan ngadto sa kalasangan ug malumpag ang tanang dagkong mga balay, tungod sa hilabihang kakusog nga pag-ulan sa yelo, ²⁰ panalanginan kamog dako ni Yahweh; motanom kamo ug binhi didto sa kaumahan ug sa daplin sa mga sapa ug aduna gayoy madagayaong abot. Sayon alang sa inyong mga asno ug baka ang pagpangita ug sagbot aron masibsib sa dihang pagawason mo sila.

Chapter 33

¹ Makalilisang nga mga butang ang mahitabo kaninyo katawhan sa Asiria! Ikaw nga nagguba sa uban, apan wala makasinati sa pagkaguba. Nagluib kamo sa uban, apan wala pa gayod kamo makasinati nga giluiban. Sa dihang mohunong kamo sa pagguba sa uban, kamo na usab ang gun-ubon sa uban. Kung mohunong ka sa pagbudhi sa uban, ikaw na usab ang ilang pagabudhian. ² Yahweh, kaluy-i kami, tungod kay mapailubon kami nga naghulat sa imong tabang. Lig-ona kami sa matag-adlaw, ug luwasa kami sa panahon nga anaa kami sa mga kalisdanan. ³ Managan ang among kaaway sa dihang madungog nila ang imong tingog. Sa dihang motindog ka ug mopakita nga ikaw gamhanan, mokagiw gayod ang tanang katawhan sa mga nasod. ⁴ Ug human mabuntog ang among mga kaaway, kami, nga imong katawhan, maoy mokuha sa tanang kabtangan sa among kaaway, sama sa mga dagkong ulod ug mga dulon nga nagkaon sa tanang dahon sa mga tanom. ⁵ Labaw si Yahweh kaysa kang bisan kinsa, nagpuyo siya sa langit, ug makiangayon ug matarong siya nga nagmando sa Jerusalem. ⁶ Sa dihang mahitabo kana, hatagan kamo niya ug puloy-anan nga layo sa kakuyaw; panalipdan niya sa hingpit ang inyong kabtangan, himoon niya kamong maalamon aron masayran ninyo ang kinahanglang masayran; ug mahimong daw bililhong bahandi ang pagtahod kang Yahweh nga iyang gihatag kaninyo. ⁷ Apan karon, tan-awa, nanghilak ang among mga mensahero sa kadalanan; nanghawa ug miadto sa laing nasod ang among mga tigpamaba aron sa pagpatunhay ug kalinaw, apan maghilak hinuon sila pag-ayo tungod kay dili man sila magmalampuson. ⁸ Walay bisan usa nga mopanaw sa among kadalanan. Gilapas sa mga pangulo sa Asiria ang kasabotan uban kanamo; gitamay nila ang katawhan nga nagbuhat sa pagpatunhay sa kalinaw, ug wala sila nagtahod kang bisan kinsa. ⁹ Nauga ug dili na matuboan ug tanom ang yuta sa Juda. Nangalaya ug nangagabok ang mga kahoy nga sidro didto sa Lebanon. Nahimo na karon nga lapad nga disyerto ang patag sa Sharon nga daplin sa baybayon. Wala nay mga dahon ang mga kahoy didto dapit sa Bashan ug sa Carmel. ¹⁰ Miingon si Yahweh, "Karon mobarog ako ug ipakita nga angayan ako sa pagpasidungog sa tanan. ¹¹ Walay bili ang mga plano ninyong katawhan sa Asiria sama lang kini sa tahop ug uhot. Mahimong kalayo ang inyong gininhawa nga maoy magsunog kaninyo. ¹² Mangasunog ang inyong katawhan hangtod nga mahimo kining abo, sama sa gipamutol ug gisunog nga mga sampinit. ¹³ Kamong katawhan nga namuyo sa layo ug anaa sa duol nga dapit, hatagig pagtagad ang akong gibuhat ug pamanlandongi nga gamhanan gayod ako." ¹⁴ Mangurog ang mga makakasala sa Jerusalem tungod sa ilang hilabihan nga kahadlok; mangalisang ang dili diosnon nga katawhan. Moingon sila, "Walay usa kanato nga mabuhi tungod kay pagasunogon niini nga kalayo ang tanan; sama kini sa kalayo ni Yahweh nga dili mapalong ang pagsiga diha sa halaran!" ¹⁵ Kadtong nagbuhat nga matinud-anon ug nagsulti kung unsa ang tinuod, ug kadtong wala naninguha nga maadunahan pinaagi sa pagpanlimbong sa salapi gikan sa katawhan, kadtong wala nagtinguha sa suborno, ug kadtong nagdumili sa pagpaminaw sa katawhan nga nagtinguha sa pagpatay sa usa ka tawo, kadtong wala nakig-uban sa uban ug nag-awhag kanila sa pagbuhat ug daotan, ¹⁶ sila ang katawhan nga magpuyo sa luwas nga dapit; makakita sila ug dapit nga luwas sama sa mga langub sa kabukiran. Dili sila mahutdan sa pagkaon ug tubig. ¹⁷ Kamong katawhan sa Juda makita ninyo ang hari nga magsul-ob sa tanan niyang maanindot nga mga kupo, ug makita ninyo ang kalapad sa yuta nga iyang giharian. ¹⁸ Sa dihang makita ninyo kana, mahunahunaan ninyo ang inyong pagkalisang kaniadto, ug makasulti kamo, "Nangahanaw ang mga opisyal sa Asiria nga nag-ihap sa buhis nga nagpugos pagkuha gikan kanamo ug salapi alang sa buhis! Nangahanaw gayod kadtong mga kalalakin-an nga maoy nag-ihap sa among tore! ¹⁹ Nangahanaw kadtong mapahitas-on nga katawhan nga nagasulti sa pinulongan nga wala namo nasabtan!" ²⁰ Nianang taknaa, makita na gayod ninyo ang Bukid sa Zion, ang dapit diin kita nagasaulog sa atong mga kasaulogan; Makita ninyo nga ang Jerusalem mahimo nang malinawon ug luwas. Mahimo kining layo sa piligro, sama sa tolda nga dili gayod molihok tungod kay hugot ang mga pisi ug ang mga ugsok niini nakalubong pag-ayo sa yuta. ²¹ Si Yahweh ang mahimo natong gamhanan nga Dios; sama siya sa dakong tubig nga manalipod kanato tungod kay dili kini matabok sa atong mga kaaway; walay makabugsay patabok niini ug walay barkong panggubat ang makalayag patabok niini. ²² Si Yahweh ang atong maghuhukom; siya ang naghatag kanato ug mga balaod, ug siya ang atong hari. Luwason niya kita. ²³ Luag ang mga pisi sa barko sa atong mga kaaway, dili gayod lig-on ang poste nga sab-itanan sa layag, ug dili mabukhad ang layag niini. Pagabahinbahinon namo ang mga bahandi nga ilang gisakmit, katawhan sa Dios, ug bisan ang mga bakol nga mga tawo makakuha pa niini. ²⁴ Ug dili na gayod moingon ang katawhan sa Jerusalem, "Nagsakit kami," tungod kay gipasaylo man ni Yahweh ang mga kasal-anan nga nabuhat sa katawhan nga nagpuyo didto.

Chapter 34

¹ Kamong katawhan sa kanasoran, duol kamo ug paminaw; hatagi kinig insaktong pagtagad. Buot nako nga madunggan sa kalibotan ug sa tanan nga ania niini ang akong isulti. ² Nasuko pag-ayo si Yahweh sa katawhan sa tanang kanasoran; nasuko siya pag-ayo sa tanan nilang mga kasundalohan. Nakahukom siya nga kinahanglan silang pukanon, ug pamatyon niya sila. ³ Dili gayod ipanglubong ang ilang mga patayng lawas, ug tungod niana, manimaho ang ilang patayng lawas, ug malumpag ang kabukiran tungod sa ilang dugo. ⁴ Mahanaw ang kalangitan sama sa linukot nga basahon nga gilukot ug gilabay. Mangahulog ang mga kabituonan gikan sa kawanangan sama sa nalaya nga mga dahon nga nangahulog gikan sa kaparasan, o sama sa igos nga nangahulog gikan sa mga kahoy nga igera. ⁵ Sa dihang nahuman na si Yahweh sa pagguba sa tanang butang didto sa kawanangan, pagasilotan niya ang katawhan sa Edom, ang pundok sa katawhan nga iyang gisulti nga kinahanglan gayod nga laglagon. ⁶ Ingon nga si Yahweh adunay espada nga naputos sa dugo ug tambok— ang dugo sa mga nating karnero ug mga kanding ug ang tambok sa mga rinyon sa torong mga karnero aron ihalad. Ingon kini nga si Yahweh maghalad didto sa Bozra ug pamatyon ang daghang katawhan sa ubang mga siyudad sa Edom. ⁷ Bisan ang mga ihalas nga mga baka pamatyon, uban ang mga nating baka ug ang mga torong baka. Mabasa ug dugo ang yuta, ug ang hugaw maputos sa tambok niadtong mga mananap. ⁸ Ug mao kana ang panahon nga makapanimalos si Yahweh sa katawhan nga nagdaugdaog sa Juda. ⁹ Mapuno gayod ug sunog nga alkitran ang mga sapa sa Edom, ug maputos ang yuta sa nasunog nga asupre ug sunog nga alkitran. ¹⁰ Dili gayod undangan ni Yahweh sa pagsilot ang Edom pinaagi sa kalayo; moutbo ang aso hangtod sa hangtod. Walay bisan usa nga mopuyo nianang yutaa, ug walay moagi niini. ¹¹ Puy-an na lamang kini sa mga uwak ug sa nagkalainlaing matang sa mga kuwago ug sa gagmay nga mga mananap. Tarongon gayod ni Yahweh ug sukod ang maong yuta; sukdon niya kini aron sa paghukom kung asa sugdan ang kagubot ug kalaglagan. ¹² Wala na gayoy mga prinsipe; ang katawhan nga adunay katungod wala nay gingharian nga dumalahan; mangahanaw na gayod ang mga prinsipe. ¹³ Mapuno sa mga sampinit ug tunok ang mingaw nga mga palasyo ug lig-on nga mga dagkong balay. Ug ang guba nga mga dapit mahimong puy-anan sa mga ihalas nga mga iro ug mga ostrits. ¹⁴ Ang mga mananap nga nagpuyo sa disyerto ug mga hayno atua usab didto, ug ang mga ihalas nga mga kanding manawag sa usag-usa. Adunay mga mananap usab nga maglibotlibot sa kagabhion ug mopahulay didto. ¹⁵ Magsalag didto ang mga kuwago ug mangitlog; ug sa dihang namusa na kini, tabonan kini sa inahan pinaagi sa iyang mga pako. Aduna usab mga mandadagit nga langgam didto, uban sa ilang mga paris. ¹⁶ Kung inyong basahon ang nahisulat niana nga libro nga gisulatan sa mensahe ni Yahweh, mahibal-an ninyo kung unsa ang iyang gibuhat sa Edom. Ang tanang mga mananap ug mga kalanggaman atua didto, ug adunay paris ang matag-usa, tungod kay mao kana ang gisaad ni Yahweh, ug ang iyang espiritu ang maghiusa kanila didto. ¹⁷ Nakahukom siya kung asa nga mga bahin sa yuta sa Edom ang puy-an sa matag-usa, ug mao kadtong mga dapita ang puy-an sa matag langgam ug mananap. Panag-iyahon kini sa ilang mga kaliwat hangtod sa hangtod, hangtod sa tanang mga kaliwatan.

Chapter 35

¹ Moabot ang takna, nga magmaya ang disyerto ug ang mga dapit nga nag-uga; malipay ang disyerto ug ang mga kabulakan mamulak. Sama sa rosas, ² mohatag ug madagayaong mga bulak ang disyerto; ug mahitabo nga ang tanan magmaya ug mag-awit! Ang kaanindot sa disyerto mahimong sama kaanindot sa mga kahoy sa Lebanon, sama katabunok sa kapatagan sa Sharon ug dapit sa Carmel. Makakita ang katawhan sa himaya ni Yahweh; makakita sila nga siya mahimayaon. ³ Busa dasiga kadtong gikapoy ug naluya. ⁴ Ingna kadtong nahadlok, "Pagmalig-on ug ayaw kahadlok, tungod kay ang atong Dios moabot ug manimalos sa iyang mga kaaway; balusan niya sila sumala sa ilang nabuhat, ug luwason kamo niya." ⁵ Sa dihang buhaton niya kana, himoon niya nga makakita ang mga tawo nga buta ug ang mga bungol nga tawo makadungog. ⁶ Ang bakol nga tawo makalukso sama sa binaw, ug kadtong dili makahimo sa pagsulti moawit sa kalipay. Mobugwak ang tubig sa disyerto, ug modagayday kini ngadto sa disyerto. ⁷ Ang uga ug labihang kainit nga yuta mahimong linaw, ug ang mga tubod mopatubig sa nauga nga yuta. Motubo ang mga sagbot, mga bugang ug mga papiros sa dapit kung asa nagpuyo ang mga ihalas nga iro. ⁸ Butangan ug dalan kining yutaa; ug pagatawgon kini nga 'Balaan nga Dalan.' Ang katawhan nga dili modawat sa Dios dili makaagi niana nga dalan; alang lamang kini niadtong nagkinabuhi subay sa kabubut-on sa Dios, ug walay buangbuang nga moagi niana nga dalan. ⁹ Didto walay mga liyon o mga bangis nga mananap nga anaa sa daplin sa dalan. Bugtong kadto lamang anaa kang Yahweh ang makalakaw niini. ¹⁰ Kadtong mga gipalingkawas ni Yahweh mobalik sa Jerusalem; mag-awit sila samtang mosulod sa siyudad, ug dayag kaayo sila nga malipayon hangtod sa hangtod. Wala nay maguol o manghupaw; magmalipayon sila sa hingpit.

Chapter 36

¹ Sa ika-14 ka tuig sa paghari ni Haring Hezekia sa Juda, miabot si Haring Senakerib sa Asiria uban ang iyang mga kasundalohan aron sulongon ang siyudad sa Juda nga adunay mga pader nga nakapalibot. Wala nila napildi ang Jerusalem, apan napildi nila ang ubang mga siyudad. ² Unya nagpadala ug dakong pundok sa mga kasundalohan ang hari sa Asiria uban ang iyang mga opisyal gikan sa siyudad sa Lakis aron pugson si Haring Hezekia sa pagtugyan sa iyang kaugalingon. Sa pag-abot nila sa Jerusalem mipundo sila duol sa agianan sa tubig nga midagayday sa ibabaw nga pundohanan sa tubig sa Jerusalem, duol daplin sa dalan paingon sa labahanan sa mga kababayen-an. ³ Ang mga opisyal sa Isrealita nga migawas sa siyudad aron makigsulti kanila mao sila Eliakim nga anak ni Hilkia, ang tigdumala sa palasyo, si Shebna nga sekretaryo sa hari, ug si Joa nga anak ni Asaf, nga maoy tigsulat sa mga hukom sa gobyerno. ⁴ Unya gisultihan sila sa usa sa mahinungdanon nga pangulo ni Senakerib nga dalahon nila ang mensahe ngadto kang Hezekia nga gikan sa hari sa Asiria, ang bantogan nga hari. Didto sa mensahe, ang hari nag-ingon ngadto sa katawhan sa Jerusalem, "Unsa bay inyong gisaligan nga moluwas kaninyo? ⁵ Nagsulti kamo nga aduna kamoy hinagiban aron sa pagpakig-away kanamo ug nga nagsaad ang ubang nasod nga tabangan kamo, apan istorya lamang kana. Kinsa man sa hunahuna ninyo ang motabang kaninyo aron sa pagpakigbatok sa akong mga kasundalohan nga gikan sa Asiria? ⁶ Paminaw kamo kanako! Nagsalig kamo ngadto sa kasundalohan sa Ehipto. Apan sama kini sa buak nga bagakay nga gisungkod sa tawo. Apan matusok ang kamot niadtong motukod niini! Ingon niana usab ang hari sa Ehipto kung adunay magsalig sa iyang tabang. ⁷ Apan basig moingon kamo kanako nga misalig kamo kang Yahweh nga inyong Dios aron sa pagtabang kaninyo. Kung ingon niana, motubag ako nga si Yahweh mao ang gipakaulawan ni Hezekia pinaagi sa pagguba sa taas nga mga dapit ug sa mga halaran ug gipugos ang tanan sa Jerusalem ug sa ubang mga dapit sa Juda nga magsimba lamang atubangan sa halaran sa Jerusalem." ⁸ Nagpadayon sa pagpakigsulti ang opisyal sa Asiria atubangan sa siyudad: "Busa isugyot ko kaninyo ang pagbuhat ug kasabotan uban sa akong agalon, nga hari sa Asiria. Hatagan ko kamog duha ka libo nga mga kabayo, apan wala ako maghunahuna nga makakita kamo ug duha ka libo nga mga kalalakin-an nga mosakay kanila! ⁹ Nagdahom kamo nga padad-an kamo sa hari sa Ehipto ug mga karwahe ug mga kalalakin-an nga mosakay sa mga kabayo aron sa pagtabang kaninyo. Apan dili gayod nila mabuhat ang pagsukol bisan pa sa dili mahinungdanon kaayo nga opisyal sa mga kasundalohan sa Asiria! ¹⁰ Sa dugang pa, ayaw ninyo hunahunaa nga mianhi kami aron sa pagsulong ug paglaglag niining yutaa nga walay pagtugot ni Yahweh! Si Yahweh mismo ang nagsulti kanamo nga moanhi aron sa paglaglag niining yutaa!" ¹¹ Busa gisultihan ni Eliakim, ni shebna, ug ni Joa ang opisyal sa Asiria, "Palihog pakigsulti kanamo sa Aramico nga pinulongan, tungod kay makasabot kami niini. Ayaw pakigsulti kanamo sa pinulongan sa Hebreo, tungod kay makasabot ang katawhan nga nitindog sa paril ug mangahadlok." ¹² Apan mitubag ang opisyal, "Naghunahuna ba kamo nga gipadala ako sa akong agalon aron sa pagsulti niining mga butanga alang lamang kaninyo, ug dili alang niadtong nitindog sa paril? Kung isalikway ninyo kini nga mensahe, mahitabo gayod nga ang katawhan niining siyudara mokaon sa ilang mga hugaw ug moinom sa ilang mga ihi, ingon sa inyong pagbuot, tungod kay wala man kamoy makaon." ¹³ Unya mitindog ug misinggit ang opisyal gamit ang sinultihang Hebreo atubangan sa katawhan nga naglingkod didto sa paril. Miingon siya, "Paminaw niining mensahe nga gipadala sa labawng hari, ang hari sa Asiria! ¹⁴ Miingon siya, 'Ayaw ninyo tugoti nga limbongan kamo ni Hezekia! Dili siya makaluwas kaninyo! ¹⁵ Ayaw ninyo siya tugoti nga pugson kamo niya sa pagsalig kang Yahweh, pagsulti nga si Yahweh moluwas kaninyo, ug nga kining siyudara dili gayod mailog sa kasundalohan sa Asiria! ¹⁶ Ayaw ninyo hatagi ug pagtagad ang ipangsulti ni Hezekia! Mao kini ang giingon sa hari sa Asiria: "Gawas kamo gikan sa siyudad ug itugyan ang inyong kaugalingon kanako. Kung buhaton ninyo kini, hatagan ko ang matag-usa kaninyo ug mainom nga bino gikan sa inyong kaugalingong ubasan ug pagkaon sa igos nga gikan sa inyong tinanom nga kakahoyan, ug pag-inom ug tubig gikan sa inyong atabay. ¹⁷ Mabuhat gayod ninyo kini hangtod nga dad-on namo kamo sa yuta nga sama sa inyong kayutaan— ang yuta nga daghag trigo, aron makahimo ug pan, ug kaparasan nga makahatag ug bino, aron paghimo ug daghang tinapay." ¹⁸ Ayaw ninyo tugoti nga malimbongan kamo sa mga gipangsulti ni Hezekia nga, "Luwason kita ni Yahweh." Ang mga dios sa katawhan sa ubang mga nasod nga ilang gisimba wala gayod makaluwas kanila gikan sa gahom sa hari sa Asiria! ¹⁹ Nganong wala man makahimo ang dios sa Hamat ug sa Arpad nga mga siyudad, ug ang mga dios sa Sefarvaim wala makaluwas sa Samaria gikan sa akong gahom? ²⁰ Wala, walay dios sa bisan asang kanasoran nga gisulong sa among mga kasundalohan ang miluwas sa ilang katawhan gikan kanako. Busa nganong naghunahuna man kamong katawhan sa Jerusalem nga luwason kamo ni Yahweh gikan sa akong gahom?" ²¹ Apan naminaw lamang ang kasundalohan sa Hebreo. Walay usa nga misulti, tungod kay gimandoan man sila ni Haring Hezekia, "Sa dihang makigsulti kaninyo ang opisyal sa Asiria, ayaw siya tubaga." ²² Unya namalik sila Eliakim ug si Shebna ug si Joa ngadto kang Hezekia uban ang ilang gisi nga mga bisti tungod kay nabalaka na gayod sila pag-ayo. Giingnan nila siya sa giingon sa opisyal nga gikan sa Asiria.

Chapter 37

¹ Sa dihang nadungog ni Haring Hezekias ang ilang gibalita, gigisi niya ang iyang mga bisti ug nagsul-ob ug bisti nga hinimo sa gaspang nga sako tungod kay naguol siya pag-ayo. Unya miadto siya sa templo ni Yahweh ug nag-ampo. ² Unya iyang gipadala si Eliakim, si Shebna, ug ang mga mas hamtong nga mga pari, nga nagsul-ob usab ug mga bisti nga hinimo sa gaspang nga sako, aron sa pagpakigsulti kang Isaias nga propeta, anak nga lalaki ni Amos. ³ Gisultihan niya sila, "Isulti kini ngadto kang Isaias: 'Nag-ingon si Haring Hezekias nga mao kini ang adlaw nga aduna kitay dakong kaguol. Giinsulto ug gipakaulawan kita sa ubang mga nasod. Sama kita sa usa ka babaye nga hapit nang manganak, apan wala siyay igong kusog sa pagbuhat niini. ⁴ Apan tingali ug nadungog ni Yahweh nga atong Dios ang gisulti sa opisyal sa Asiria. Tingali ug nasayod ang Dios nga nagpadala ug opisyal ang hari sa Asiria aron sa pag-insulto kaniya, ang labing gamhanang Dios. Tingali ug silotan ni Yahweh ang hari sa Asiria tungod sa iyang gisulti. Ug ako si Hezekias, naghangyo nga iampo mo kami nga nahibiling buhi dinhi sa Jerusalem." ⁵ Human gihatag kadto nga mensahe sa mga kalalakin-an ngadto kang Isaias, ⁶ gisultihan niya sila nga ingnon ang hari nga nag-ingon si Yahweh: "Nagsulti ug daotang mga butang bahin kanako kadtong sulugoon nga gikan sa hari sa Asiria. Apan ayaw tugoti nga mabalaka ka kanila. ⁷ Paminawa kini: Himoon ko nga makadungog si Senakerib ug pipila ka mga balita nga gikan mismo sa iyang kaugalingong nasod nga maghimo kaniya nga mabalaka pag-ayo. Aron nga mobalik siya didto, ug magpadala ako ug ubang mga lalaki aron sa pagpatay kaniya gamit ang ilang mga espada." ⁸ Unya ang opisyal nga gikan sa Asiria nakabantay nga nibiya sa siyudad sa Lakis ang iyang hari ug ang kasundalohan sa Asiria ug karon misulong sa Libna, usa ka kasikbit nga siyudad. Busa mibiya ang opisyal sa Jerusalem ug miadto sa Libna aron sa pagbalita sa hari kung unsa ang nahitabo sa Jerusalem. ⁹ Sa wala madugay pagkahuman niadto, nakadawat ug balita si Haring Senakerib nga si Haring Tirhaka sa Etiopia nangulo sa iyang mga sundalo aron sa pagsulong kanila. Busa nagpadala siya ug laing mga mensahero ngadto kang Hezekias uban ang usa ka sulat. Sa sulat gisulat niya kini ngadto kang Hezekias: ¹⁰ "Ayaw tugoti ang imong dios, nga imong gisaligan, sa paglimbong kanimo pinaagi sa saad nga iyang babagan ang akong kasundalohan sa pag-ilog sa Jerusalem." ¹¹ Nadungog mo gayod kung unsa ang gipangbuhat sa mga kasundalohan sa mga hari sa Asiria ngadto sa ubang mga kanasoran; hingpit gayod silang gipukan sa among mga kasundalohan. Busa ayaw gayod paghunahuna nga makalingkawas ka kanako, naghunahuna ka ba? ¹² Nakaluwas ba niadtong mga nasora ang ilang mga dios? Naluwas ba nila ang rehiyon sa Gozan, o ang mga siyudad sa Haran ug Rezef sa amihan sa Aram, o ang mga katawhan sa rehiyon sa Eden sa siyudad sa Telasar? ¹³ Unsa man ang nahitabo sa hari sa Hamat ug sa hari sa Arpad? Unsa man ang nahitabo sa mga hari sa siyudad sa Sefarvaim, Hena, ug Iva? Nakaluwas ba kanila ang ilang mga dios?" ¹⁴ Nadawat ni Hezekias ang sulat nga gihatag sa mga mensahero kaniya, ug gibasa niya kini. Unya mitungas siya ngadto sa templo ug gibukhad ang maong sulat ngadto kang Yahweh. ¹⁵ Unya nag-ampo si Hezekias niini: ¹⁶ "Yahweh, Pangulo sa kasundalohang anghel, ang Dios nga diin nahisakop kaming mga Israelita, naglingkod ka diha sa imong trono ibabaw sa estatuwa nga kerubim, ibabaw sa sagradong sudlanan sa kasabotan. Ikaw lamang ang matuod nga Dios. Naghari ka sa tanang mga gingharian dinhi sa kalibotan. Ikaw mao ang nagbuhat sa tanang mga butang dinhi sa kalibotan ug sa kawanangan. ¹⁷ Busa Yahweh, palihog paminaw sa akong gipangsulti, ug tan-awa kung unsa ang mga nagapanghitabo! Ug paminawa ang gisulti ni Senakerib aron sa pag-insulto kanimo, ang labing gamhanang Dios! ¹⁸ Yahweh, tinuod gayod nga hingpit nga gipanglaglag sa mga kasundalohan sa mga hari sa Asiria ang daghang kanasoran ug gipangguba ang ilang mga yuta. ¹⁹ Ug ilang gipanglabay ngadto sa kalayo ang tanang diosdios niadtong mga nasora. Apan dili gayod sila tinuod nga mga dios. Mga diosdios lamang sila nga hinimo sa kahoy ug sa bato, maong maguba gayod sila. ²⁰ Busa karon, Yahweh nga among Dios, palihog luwasa kami gikan sa gahom sa hari sa Asiria, aron nga ang tanang mga katawhan sa tibuok gingharian sa kalibotan masayod nga ikaw, Yahweh, ang bugtong matuod nga Dios." ²¹ Unya nagpadala ug mensahe si Isaias ngadto kang Hezekias aron sa pag-ingon nga si Yahweh, nga gisimba sa mga Israelita, nag-ingon niini ngadto kaniya: "Tungod kay nag-ampo ka man kanako mahitungod sa gisulti sa Hari sa Asiria nga si Senakerib, ²² mao kini ang akong isulti kaniya: 'Nagtamay kanimo ang katawhan sa Jerusalem ug naghimo kanimo nga kataw-anan. Maglingolingo sila aron sa pagbiaybiay kanimo samtang mopalayo ka gikan dinhi. ²³ Sa imong hunahuna kinsa man sa imong tan-aw ang imong gipakaulawan ug gitamay? Kinsa man sa imong tan-aw ang imong gisinghagan? Sa imong hunahuna kinsa man ang imong ginapasigarbohan? Dili ba ako, ang Balaang Dios nga gisimba sa mga Israelita! ²⁴ Gibiaybiay ako sa mga sulugoon nga imong gipadala. Miingon ka, "Pinaagi sa daghan nako nga mga karwahe nahiabot ako sa labing taas nga mga kabukiran sa Lebanon. Gipamutol namo ang labing katag-as nga mga kahoyng sedro ug ang labing maayong mga sipres. Nakaabot kami sa kinatumyan ug sa kinabagaang kalasangan niini. ²⁵ Nakakalot na kami ug daghang mga atabay sa nagkadaiyang mga nasod ug miinom sa mga tubig niini. Ug sa pagpanon agi sa mga sapa sa Ehipto, gipahubsan namo kining tanan!" ²⁶ Apan gitubag ko siya, 'Wala ka ba makadungog niana sa dugay na nga panahon nga gitakda ko nang daan kanang mga butanga; dugay ko na kanang giplano, ug karon ipatuman ko na kini. Giplano ko na nga gub-on sa imong mga kasundalohan ang mga siyudad ug himoon sila nga pundok sa mga guba. ²⁷ Walay gahom ang katawhan niadtong mga siyudara, ug ang resulta, nadismaya sila ug nawad-an ug kadasig. Nangalawos sila sama sa mga sagbot ug sa mga tanom sa kaumahan, nangalawos sama sa mga sagbot nga nanubo sa mga atop sa kabalayan ug gihuypan sa init nga hangin nga gikan sa sidlakan. ²⁸ Apan nasayod ako sa tanan mahitungod kanimo; Ug nasayod ako kung anaa ka sa imong balay ug kung mogawas ka; Nasayod usab ako nga makigbatok ka kanako. ²⁹ Tungod kay nakigbatok ka man kanako ug tungod kay nadungog ko nga nagmagarbohon ka sa imong pagsulti, sama nga butangan ko ug kaw-it ang imong ilong ug rinda ang imong baba aron nga madumalahan taka, ug pugson ko ikaw sa pagbalik sa imong nasod, agi sa dalan nga imong giagian paingon dinhi, ug dili mo mailog ang Jerusalem.'" ³⁰ Usa kini ka pamatuod alang kanimo, Hezekias nga ako si Yahweh, maghimo niining mga butanga: Niing tuiga, magkaon lamang kamo ug mga abot nga wala gitanom, ug sa sunod nga tuig mao gihapon ang mahitabo. Apan sa ikatulo nga tuig magtanom kamo ug mag-ani; atimanon ninyo ang inyong mga kaparasan ug magkaon sa mga ubas niini. ³¹ Kamo nga katawhan nga ania pa dinhi sa Juda, mahimong lig-on ug magmauswagon kamo pag-usab. ³² Makalahutay ang tanan nga diyutayng pundok sa katawhan, ug lukpon nila ang Jerusalem. Mahitabo gayod kana tungod kay si Yahweh, ang pangulo sa kasundalohang mga anghel, nagtinguha pag-ayo sa pagtuman niini." ³³ Mao kini ang gisulti ni Yahweh mahitungod sa hari sa Asiria: 'Dili makasulod sa Jerusalem ang iyang mga kasundalohan; dili sila makapana bisan ug usa nalang ka udyong ngadto sa sulod niini. Dili makadala ang iyang mga kasundalohan ug usa ka taming ngadto sa Jerusalem, ug dili sila makatapok ug mga yuta diha sa mga pader niini aron himoong hagdanan aron nga makasulod sila sa siyudad. ³⁴ Hinuon, mopauli sa iyang nasod ang ilang hari agi sa samang dalan nga iyang giagian sa iyang pag-anhi dinhi. Dili siya mosulod niining siyudara! Mahitabo gayod kana tungod kay Ako, si Yahweh, ang nagsulti niini!. ³⁵ Alang sa akong kaayohan ug tungod sa akong gisaad kang Haring David, nga nag-alagad kanako pag-ayo, panalipdan ko kining siyudara ug ilikay kini sa pagkalaglag.'" ³⁶ Nianang gabhiona, migawas ang anghel ni Yahweh ug miadto sa dapit nga gikampohan sa kasundalohan sa Asiria ug gipamatay ang 185,000 sa iyang kasundalohan. Sa dihang nangmata na ang nahibilin nga mga sundalo sa pagkabuntag, nakita nila ang nagkatag nga mga patayng lawas sa bisan asang dapit. ³⁷ Unya mibiya ug mipauli si Haring Senakerib ngadto sa Nineve sa Asiria ug nagpabilin didto. ³⁸ Usa ka adlaw niana, samtang nagsimba siya didto sa templo sa iyang dios nga si Nisrok, gipatay siya sa iyang duha ka anak nga lalaki nga, si Adramelek ug si Sharezer, gamit ang mga espada. Unya misibat sila ug miadto ngadto sa rehiyon sa Ararat sa amihanang bahin sa Nineve. Ug ang laing anak ni Senakerib nga si Esarhadon maoy nahimong hari sa Asiria.

Chapter 38

¹ Mahitungod niadtong taknaa, nagsakit pag-ayo si Hezekias ug hapit na gayod mamatay. Busa miadto si Isaias kaniya ug gihatag kini nga mensahe, "Mao kini ang giingon ni Yahweh; 'Kinahanglan nga sultihan mo ang imong katawhan diha sa imong palasyo kung unsa ang buot mong ipabuhat kanila human ka mamatay ug tungod kay dili kana maulian sa imong sakit. Hapit kana gayod mamatay'" ² Unya miatubang si Hezekias sa bongbong, ug nag-ampo kini: ³ "Yahweh, ayaw kalimti nga sa tibuok kung kasingkasing matinud-anon akong nag-alagad kanimo, ug gibuhat ko ang mga butang nga makapahimuot kanimo!" Mihilak ug kusog si Hezekias. ⁴ Unya gihatag ni Yahweh kini nga mensahe kang Isaias: ⁵ "Balik ngadto kang Hezekia ug sultihi siya nga ako, ang Dios diin nahisakop ang iyang katigulangan nga si David, nag-ingon: 'Nadungog ko ang imong pag-ampo, ug nakita ko ang imong paghilak. Busa paminaw: Dugangan ko pa ug kinsi ka tuig ang imong kinabuhi. ⁶ Ug luwason ko kining nasora gikan sa gahom sa hari sa Asiria. Panalipdan ko kini nga siyudad. ⁷ Ug mao kini ang akong buhaton aron sa pagpamatuod nga ako gayong buhaton ang akong gisaad karon. ⁸ Akong paatrason ug napulo ka tikang ang anino sa adlaw diha sa hagdanan nga gitukod ni Haring Ahas.'" Busa miatras ug napulo ka tikang ang anino sa adlaw diha sa hagdanan. ⁹ Sa dihang hapit na maulian pag-usab si Haring Hezekia, nagsulat siya niini: ¹⁰ "Giingan ko ang akong kaugalingon, "Sa tungatunga sa akong kinabuhi hapit na ako molakaw agi sa mga ganghaan sa kamatayon, ug kuhaon ni Yahweh ang nahibilin sa akong mga tuig. ¹¹ Miingon ako, "Dili ko na makita pag-usab si Yahweh niining kalibotana diin buhi ang mga tawo. Dili ko na makita pag-usab ang akong mga higala, o makig-uban sa ubang mga tawo nga buhi karon niining kalibotana. ¹² Gikuha ang akong kinabuhi sama sa tolda nga giibot sa magbalantay sa karnero ang mga tukod ug gidala palayo. Kinahanglan nga akong ipataas pagbalik ang akong kinabuhi sama sa maghahabi, sama sa usa ka bahin sa tela nga giputol sa tighabi ug gilukot, giputol usab ni Yahweh ang akong kinabuhi." Taliwala sa buntag ug gabii patyon niya ako. ¹³ Nagpaabot ako nga mapailubon panahon sa kagabhion, apan ang akong kasakit sama nga gikuniskunis ako sa mga liyon. Taliwala sa buntag ug gabii patyon niya ako. ¹⁴ Naghinamhinam ako; nagatingog ako sama sa abtik nga sayaw ug nagtingog sama sa salampati. Gikapoy ang akong mata sa paghangad sa langit aron sa pagpakitabang. Nag-ampo ako, 'Yahweh, tabangi ako, tungod kay nasubo ako pag-ayo!' ¹⁵ Apan wala gayod akoy masulti ug mahangyo nga tubagon ako niya, tungod kay siya mismo ang nagpadala niini nga balatian. Busa karon magkinabuhi ako nga mapainubsanon sa nahibilin ko nga mga katuigan tungod kay nag-antos ako pag-ayo sa akong kaugalingon. ¹⁶ Yahweh, maayo ang mga pag-antos nga imong gihatag kanako, tungod kay ang imong gibuhat ug gisulti nagdala ug bag-ong kinabuhi ug kahimsog kanako. Ug giayo mo ako ug gitugotan nga mabuhi pa! ¹⁷ Tinuod, nga ang akong mga pag-antos makaayo kanako; gihigugma mo ako, ug tungod niini giluwas mo ako gikan sa kamatayon ug gipasaylo mo usab ang tanan kong mga sala. ¹⁸ Dili makadayeg kanimo ang patayng mga tawo; dili sila makaawit aron sa pagdayeg kanimo. Kadtong miadto na sa ilang mga lubnganan dili makalaom kanimo nga magbuhat ug maayong mga butang alang kanila. ¹⁹ Ang mga buhi nga tawo lamang nga sama kanako ang makadayeg kanimo. Ang mga amahan mosulti sa ilang mga anak kung unsa ka kamatinud-anon, ug kung magpabilin ako nga buhi, buhaton ko usab ang sama niini nga mga butang. ²⁰ Hingpit ako nga ayohon ni Yahweh, busa mag-awit kita kaniya ug mga pagdayeg samtang ang uban magdayeg kaniya pinaagi sa pagtugtog ug mga tulonggon. Buhaton ta kana sa matag adlaw sa atong kinabuhi diha sa templo ni Yahweh." ²¹ Giingnan ni Isaias ang mga sulugoon ni Hezekias, "Pag-andam ug haplas gikan sa gidukdok nga mga igera, ug ipahid kini sa iyang mga hubag ug mamaayo siya." Busa gibuhat nila kana, ug naayo si Hezekias. ²² Ug nangutana si Hezekias, "Unsa man ang buhaton ni Yahweh aron sa pagpamatuod nga mamaayo ako ug makahimo na nga moadto sa iyang templo?"

Chapter 39

¹ Sa wala madugay human niana, nakabalita si Merodac Baladan nga anak nga lalaki ni Baladan, nga hari sa Babilonia, nga nagsakit pag-ayo si Hezekia apan naayo na siya. Busa nagsulat siya ug pipila ka mga sulat uban ang gasa, ug gihatag kini sa mga mensahero aron nga dad-on ngadto kang Hezekia. ² Sa pag-abot sa mga mensahero, malipayon sila nga giabiabi ni Hezekia. Unya gipakita niya kanila ang tanang butang nga anaa sa sulod sa tipiganan sa iyang mga bahandi—ang plata, ang bulawan, ang mga pahumot, ug ang mga mahumot nga lana sa olibo. Gidala usab sila ni Hezekia aron ipakita kanila ang dapit nga tipiganan sa mga hinagiban sa ilang kasundalohan, ug gipakita usab niya kanila ang ubang bililhong mga butang nga anaa sa mga lawak nga tipiganan. Gipakita ni Hezekia kanila ang tanang butang nga anaa sa palasyo o sa laing mga dapit. ³ Unya miadto si Isaias kang Haring Hezekia ug nangutana kaniya, "Asa man gikan kadtong mga tawhana, ug unsa man ang ilang gusto?" Mitubag si Hezekia, "Gikan sila sa layong nasod sa Babilonia." ⁴ Nangutana si Isaias kaniya, "Unsa man ang nakita nila diha sa imong palasyo?" Mitubag si Hezekia, "Nakita nila ang tanan. Gipakita ko gayod kanila ang tanan nga akong gipanag-iya—ang tanan nakong bililhon nga mga butang." ⁵ Unya miigon si Isaias ngadto kang Hezekia, "Paminaw niining mensahe nga gikan kang Yahweh, nga pangulo sa kasundalohang anghel: ⁶ Moabot ang higayon nga ang tanang butang diha sa imong palasyo, ang tanang bililhong butang nga gitigom sa imong mga katigulangan hangtod niining higayona, pagadad-on ngadto sa Babilonia, ug walay mahibilin sumala sa giingon ni Yahweh. ⁷ Dugang pa niana, ang pipila sa imong mga anak nga lalaki mapugos sa pag-adto sa Babilonia. Pangkapunon sila aron nga mamahimong mga sulugoon diha sa palasyo sa hari sa Babilonia." ⁸ Unya mitubag si Hezekia ngadto kang Isaias, "Maayo ang mensahe ni Yahweh nga imong gisulti kanako." Gisulti niya kana tungod kay naghunahuna siya nga, "Bisan pa kung mahitabo kana, adunay kalinaw ug siguridad dinhi sa kapanahonan nga ako buhi pa."

Chapter 40

¹ Nag-ingon ang among Dios, "Dasiga ang akong katawhan! Dasiga sila! ² Sultihi ninyo nga may kalinaw ang katawhan sa Jerusalem; ug ingna sila nga matapos na ang ilang mga pag-antos kay gipasaylo na sila ni Yahweh sa mga sala nga ilang nabuhat. Gisilotan na gayod sila ni Yahweh sa ilang mga sala. ³ Adunay nagsinggit nga usa ka tawo, "Diha sa patag sa disyerto himoang tul-id ang dalan alang kang Yahweh aron sa pag-anha kanimo; paghimo ug hapsay nga agianan alang sa atong Dios. ⁴ Tambaki ug yuta ang mga walog; pataga ang matag bungtod ug bukid. Himoang hapsay ang libaong nga yuta, ug ang mga lubaklubak nga mga dapit. ⁵ Kung buhaton mo kana, mabantog nga mahimayaon si Yahweh, ug makaamgo usab ang mga tawo niini. Mahitabo gayod kanang mga butanga tungod kay si Yahweh mao man ang nagsulti niini." ⁶ Adunay usa ka tawo nga miingon kanako, "Singgit!" Mitubag ako, "Unsa man ang akong isinggit?" Mitubag siya, "Isinggit nga sama sa sagbot ang mga tawo; dali nga mahanaw ang ilang pagkamatinud-anon sama kadali sa mga bulak sa kaumahan. ⁷ Malawos ang mga sagbot ug mangalarag ang mga bulak sa dihang pahoypan sila ni Yahweh ug init nga hangin nga gikan sa desyerto. Ug sama niana ang tanang tawo. ⁸ Malawos ang mga sagbot ug mangalawos ang mga bulak, apan molungtad hangtod sa kahangtoran ang mga saad sa Dios." ⁹ Kamong tanan nga nagdala ug maayong balita ngadto sa Zion, isinggit kini gikan sa taas nga bukid! Matag-usa kaninyo nga nagdala ug maayong balita ngadto sa mga tawo nga nagpuyo sa Jerusalem, isinggit ug kusog ang mensahe nga imong isulti! Isinggit kini! Ayaw ug kahadlok! Ingna ang katawhan nga nagpuyo sa mga siyudad sa Juda, "Ania ang imong Dios!" ¹⁰ Moabot si Yahweh nga imong Dios uban ang gahom, magdumala siya uban ang dakong gahom. Sa dihang moabot siya, dalhon niya ang katawhan nga iyang gipalingkawas gikan sa pagkaulipon sa Babilonia. ¹¹ Atimanon niya ang iyang katawhan sama sa magbalantay nga nag-atiman sa iyang mga karnero, ug nagkugos sa nating mga karnero. Gikugos niya sila paduol sa iyang dughan ug malumo siya nga naggiya sa bayeng karnero nga nagapatutoy sa iyang mga nati. ¹² Walay sama kang Yahweh! Kinsa paman ang nagsukod sa katubigan diha sa kadagatan pinaagi sa palad sa iyang kamot? Kinsa pa man ang nagsukod sa kawanangan? Kinsa pa man ang nasayod kung pila kabuok ang yuta sa kalibotan? Kinsa pa man ang nagtimbang sa mga kabukiran ug sa kabungtoran diha sa timbangan? ¹³ Kinsa pa man ang makatambag kang Yahweh? Kinsa man ang makatudlo kaniya o makatambag kung unsa ang angayan niyang buhaton? ¹⁴ Aduna bay gipangayoan si Yahweh ug tambag? Nagkinahanglan ba siya ug usa ka magtatambag aron mosulti kaniya kung unsa ang hustong buhaton ug unsaon pagbuhat nga makiangayon? ¹⁵ Giila ni Yahweh nga dili bililhon ang mga nasod sama sa usa ka tinulo nga tubig diha sa puno nga balde. Dili sila mahinungdanon sama sa abog nga anaa sa timbangan. Mahimo niya nga timbangon ang mga isla nga dili molabaw sa tipik sa abog. ¹⁶ Walay paigo nga gidaghanon sa kahoy nga gikan sa kakahoyan sa Lebanon aron makahimo ug sugnod nga dili mapalong aron sa paghalad ug mga mananap ngadto kaniya, ug dili paigo ang mga mananap sa Lebanon aron igasa ingon nga mga halad ngadto kaniya. ¹⁷ Dili gayod mahinungdanon ang kanasoran sa kalibotan alang kaniya; giila niya nga wala silay bili. ¹⁸ Busa kang kinsa man nimo ikatandi ang Dios? Unsa man nga dagway ang nagpaila kaniya? ¹⁹ Maitandi ba nimo siya sa usa ka diosdios nga gikulit, ug unya gihaplakan ug nipis nga bulawan ug pagkahuman gidayandayanan ug plata nga kadena? ²⁰ Dili makapalit ug plata o bulawan ang tawo nga kabos alang sa iyang diosdios; busa nagpili siya ug kahoy nga dili magabok, ug gihatag niya kini sa magkukulit aron kuliton ang diosdios nga dili matumba! ²¹ Wala ka ba nakadungog niini? Wala ba nimo kini nasabtan? Dili ka ba makadungog sa gisulti sa Dios sa dugay na nga panahon— ang mga mensahe nga iyang gihatag sa wala pa niya gibuhat ang kalibotan? ²² Naglingkod ang Dios sa iyang trono nga anaa sa ibabaw sa kalibotan, ug ang katawhan sa ubos sama lamang ka gamay sa mga apan-apan. Gibukhad niya ang kawanangan sama sa tabil; sama kini sa tolda aron iyang pagapuy-an. ²³ Gihimo niya nga mawad-an ug gahom ang mga hari, ug gihimo niya nga walay bili ang mga magmamando. ²⁴ Nagsugod sila sa pagdumala, sama sa gagmayng mga tanom nga nagsugod sa pagtubo ug pagpanggamot; apan mipalayo siya kanila sama nga nalawos sila sa dihang huypan niya sila, sama sa uhot nga gipalid sa hangin. ²⁵ Nangutana ang Balaang Dios, "Kang kinsa man ninyo ako ikatandi? Aduna bay usa nga sama kanako?" ²⁶ Hangad sa kalangitan: hunahunaa kung kinsa ang naghimo sa tanang mga bituon. Si Yahweh ang naghimo kanila, ug siya ang mopakita panahon sa kagabhion; gitawag niya sila sumala sa ilang mga ngalan. Tungod kay gamhanan kaayo siya, anaa ang mga kabituonan didto sa dihang iya silang gitawag sumala sa ilang mga ngalan. ²⁷ Kamo nga katawhan sa Israel, nganong nagbagubol man kamo nga wala nakita ni Yahweh ang mga pag-antos nga inyong nasinatian? Nganong nag-ingon man kamo nga dili siya makiangayon kaninyo? ²⁸ Wala ba kamo nakadungog ug wala ba kamo nakasabot nga si Yahweh mao ang walay kataposang Dios? Siya mao ang nagbuhat sa kalibotan, bisan ang kinalayoang mga dapit sa kalibotan. Dili siya kapoyan o maluya, ug walay masayod kung unsa kadako ang iyang kahibalo. ²⁹ Gilig-on niya kadtong mibati ug kaluya ug kakapoy. ³⁰ Bisan ang batan-on kapoyan ug kabsag kusog, ug ang batan-ong mga lalaki matumba sa dihang kapoyan na sila. ³¹ Apan kadtong nagsalig kang Yahweh malig-on pag-usab; manglupad sila nga sama sa agila. Modagan sila ug dugay apan dili sila kapoyan; maglakaw sila sa lagyong mga dapit apan dili sila maluya.

Chapter 41

¹ Miingon si Yahweh, "Kamong katawhan nga nagpuyo sa mga isla sa kadagatan, paghilom sa akong atubangan samtang mangutana ako kaninyo sa pipila ka mga pangutana! Unya mahimo kamong maisogon ug makig-isturya kanako. Mag-abot kita aron mahukman kung kinsa ang husto kanatong duha. ² Kinsa man ang nagtuboy niini nga hari gikan sa sidlakan? Siya mao ang nagbuhat ug mga lakang nga husto. Gitugyan niya ang mga kanasoran ngadto kaniya ug gipukan sila, ug yatakyatakan niya ang ilang hari pinaagi sa iyang mga tiil. Gipangtigbas niya ang ilang mga kaaway ug mangapukan sila sama sa abog, ug gipangpana sa iyang mga sundalo ang iyang mga kaaway busa nahisama sila sa uhot nga gipalid sa hangin. ³ Bisan tuod anaa sila sa kakuyaw, paspas silang naglakaw samtang gigukod nila ang ilang mga kaaway, ug walay makapahunong kanila. ⁴ Kinsa man nga mga pangulo ang nakahimo ug sama niana kadako nga mga buluhaton? Kinsa man ang nakahimo niana sa tanang kaliwatan? Ako lamang, si Yahweh! Ako lang ang bugtong nagbuhat sa mga butang nga sama niana, ug ako lamang ang katapusang nagbuhat niini kanila. ⁵ Nangahadlok ang mga nagpuyo nga katawhan sa mga isla sa kadagatan samtang nagtan-aw. Nalisang ang katawhan sa mga hilit nga dapit ug nagtigom. ⁶ Nagdinasigay sila sa matag-usa ug miingon, 'Pagmalig-on!' ⁷ Ang tigpanday nagdasig niadtong tighimog mga butang nga gikan sa bulawan, ug ang tawo nga tighulma sa puthaw nagdasig niadtong tigdukdok sa salsalan. Miingon silang tanan, 'Nindot ang pagkahimo sa diosdios!' Unya gihinayhinay nila nga gilansangan ang diosdios aron dili kini mahagbong!" ⁸ Nagpadayon pagsulti si Yahweh, "Kamong katawhan sa Israel kamo akong mga sulugoon; mga kaliwat kamo ni Jacob, nga akong gipili; kaliwat kamo ni Abraham, nga akong giingon nga akong higala. ⁹ Gipatawag ko kamo gikan pa sa layong mga dapit sa kalibotan, ug miingon ako, 'buot ko nga moalagad kamo kanako.' Gipili ko kamo, ug dili ko kamo isalikway. ¹⁰ Ayaw kahadlok, kay magauban ako kaninyo, ayaw kaluya, tungod kay ako ang inyong Dios. Himoon ko kamong kusgan, ug tabangan; Ituboy ko kamo uban sa akong gamhanan nga bukton pinaagi niana luwason ko kamo, ug ako lamang ang hingpit nga makabuhat niana! ¹¹ Matuod gayod nga maulawan ang tanang nangasuko kaninyo mga Israelita. Mangawagtang kadtong nagsupak kaninyo; ug mangamatay. ¹² Kung mangita kamo niadtong misulay sa pagpakig-away kaninyo, dili kamo makakaplag kanila, tungod kay mangahanaw man silang tanan. Mawagtang kadtong moataki kaninyo, ¹³ tungod kay sama nga gituboy ko kamo pinaagi sa inyong tuong kamot. Ako si Yahweh, ang inyong Dios, moingon kaninyo, 'Ayaw kahadlok, tungod kay tabangan ko kamo.' ¹⁴ Bisan tuod kamong mga Israelita giisip sa uban nga sama sa mga ulod, ayaw kahadlok sa inyong mga kaaway, tungod kay tabangan ko kamo!" Mao kini ang matinud-anon nga saad ni Yahweh—ang moluwas kaninyo, ang Labing Balaan sa Israel. ¹⁵ Nagpadayon siya sa pag-ingon, "Bag-ohon ko kamo sama sa karas, nga labihan ka hait ug adunay duha ka sulab nga molain sa uhot. Giukon ninyo ang inyong mga kaaway ug himoon sila nga sama sa dinugmok nga mga uhot sa kabukiran. ¹⁶ Ipang-itsa ninyo sila diha sa kahanginan, ug ang kusog nga hangin mopadpad kanila sa layo. Sa dihang mahitabo kana, magmalipayon gayod kamo mahitungod sa buhaton ko kaninyo; magadayeg kamo kanako, si Yahweh, ang Labing Balaan sa Israel. ¹⁷ Sa dihang manginahanglan ug tubig ang kabos nga katawhan, ug ang ilang mga dila mangauga tungod sa tumang kauhaw, Ako, si Yahweh moabot ug motabang kanila. Ako, ang Dios sa mga Israelita, nga dili mosalikway kanila. ¹⁸ Himoon ko ang kasapaan nga modagayday alang kanila diha sa umaw nga mga kabungtoran. Paagason ko ang mga tubod diha sa mga walog. Pun-on ko ug tubig ang disyerto. Modagayday ang mga tubod paingon ngadto sa kasapaan, ug ang mga sapa modagayday ngadto sa nauga nga yuta. ¹⁹ Motanom ako ug mga sedro, mga akasya, ug mga mirtol, sa kamingawan—ug tamnan ko ug mga kahoy nga olibo ang disyerto—mga sipres, ug mga palo tsina, ug uban pang kahoy. ²⁰ Buhaton ko kana sa tuyo nga aron ang mga tawo nga makakita maghunahuna mahitungod niini, ug masayod sila ug makasabot nga ako, si Yahweh, ang nagbuhat niini; Ako kini, ang Labing Balaan sa Israel. ²¹ Ako, si Yahweh, ang hari sa Israel nakig-sulti kaninyo nga mga kanasoran: Duol ug isulti kung unsa ang gibuhat sa inyong diosdios alang kaninyo! Pakiglalis pag-ayo aron pagdapig kanila. ²² Dad-a sila nganhi aron pagsulti kanamo kung unsa ang mahitabo! Ingna sila nga sultihan kami kung unsa ang nahitabo kaniadto, aron makahunahuna kami mahitungod niadtong mga butanga, ug masayran kung kadtong mga butang nga ilang gitagna nahitabo ba gayod. O ingna sila nga sultihan kami mahitungod sa umaabot, sa tuyo nga aron masayod kami kung unsa ang mahitabo. ²³ Oo, kinahanglan nga sultihan kami niadtong mga diosdios aron masayod kami kung unsa ang mahitabo sa umaabot. Kung buhaton nila kana, masayran namo nga mga dios gayod sila. Pabuhata sila sa pipila ka mga butang—maayo o kaha daotang butang! Pabuhata sila sa mga katingalahan nga mga butang nga makapahibulong kanamo ug makapahadlok! ²⁴ Apan imposible kana, tungod kay sa pagkatinuod ang mga diosdios walay pulos; Wala silay mahimo, ug gikasilagan ko kadtong nakahukom nga mosimba sa mga diosdios." ²⁵ "Apan giawhag ko ang usa ka pangulo nga moabot uban sa iyang mga sundalo gikan sa amihan. Gipatawag ko siya gikan sa iyang nasod, nga anaa nahimutang sa sidlakang bahin sa Israel, ug mangayo siyag panabang nganhi kanako. Tugotan ko nga lupigon sa iyang mga sundalo ang ubang mga magmamando; tamakan nila kadtong mga pangulo sama sa tawo nga naghimo ug kulon nga tamaktamakan una niya kini ug pagkahuman ibutang sa kalayo. ²⁶ Karon kinsa man ang nagsulti kaninyo kaniadto nga mahitabo gayod kini? Kinsa man ang nagtagna niini, mao nga makaingon kita, "Unsa man ang iyang gitagna nga husto!"? Walay mitubag bisan kinsa nga kini nahitabo. ²⁷ Ako mao ang unang miingon sa katawhan sa Jerusalem: 'Paminaw niini! Nagpili ako ug mensahero aron pagsulti kaninyo sa maayong balita!' ²⁸ Walay usa sa inyong diosdios ang misulti niana. Ug sa dihang gipangutana ko sila, walay usa kanila nga makahatag kanakog bisan unsang mga tubag. ²⁹ Hunahunaa ang bahin niini: Kawang kadtong tanan nga mga diosdios, walay bili nga mga butang. Sama sila sa hangin nga dili na makita."

Chapter 42

¹ Miingon si Yahweh, "Buot ko nga kamong mga katawhan masayod mahitungod sa akong alagad, nga akong gidasig. Gipili ko siya, ug nalipay ako kaniya, gihatag ko kaniya ang akong Espiritu, ug nakasiguro ako nga buhaton niya sa tanang katawhan kung unsa ang matarong. ² Dili niya ipakita ang iyang gahom pinaagi sa pagsinggit o pinaagi sa labihan ka kusog nga pag-istorya.. ³ Dili siya mopahilayo kang bisan kinsa nga naluya sama sa usa ka gipalidpalid nga bugang, ug dili niya tapuson ang kinabuhi ni bisan kinsa nga pinasagdan, sama sa lana sa suga nga magkapalong. Siguradohon niya nga mohukom sa patas ang mga maghuhukom. ⁴ Dili siya kapuyon o maluya sa tanang panahon sa dihang mamuhat siya nga makiangayon sa tanang butang sa tibuok kalibotan. Bisan ang katawhan nga nagpuyo sa mga isla sa kadagatan masaligon nga mohulat kaniya aron maminaw sa iyang mga balaod." ⁵ Gibuhat ni Yahweh nga atong Dios ang kawanangan ug gihan-ay kini. Siya usab ang naghimo sa kalibotan ug sa tanang butang nga anaa niini. Mihatag siyag gininhawa sa tanan nga katawhan sa kalibotan ug naghimo kanilang buhi. Ug siya lamang ang bugtong nagsulti sa iyang alagad, ⁶ "Ako, si Yahweh, nagpili kanimo aron ipakita sa katawhan nga kanunay akong nagbuhat sa pagkamatarong. Gunitan ko ikaw ug panalipdan, ug ipaila ko ikaw sa akong katawhan nga Israelita aron mahimong usa nga mopatuman sa akong saad kanila. Mahimo kang kahayag sa ubang kanasoran. ⁷ Tungod kanimo mahimong makakita ang katawhan nga nangabuta, himoon mong gawasnon ang mga katawhan nga binilanggo ug mopahigawas niadtong anaa sa kangitngit nga mga presohan. ⁸ Ako si Yahweh; mao kana ang akong ngalan. Dili ko tugotan si bisan kinsa nga modawat sa pagdayeg nga angay lamang kanako. Ug dili ko tugotan ang uban nga modayeg sa mga diosdios, tungod kay kinahanglan ako lamang ang ilang simbahon. ⁹ Ang tanang butang nga akong gitagna nahitabo, ug karon isulti ko ang ubang mga butang nga mahitabo. Isulti ko ang mga butang nga mahitabo sa dili pa kini mahitabo." ¹⁰ Pag-awit ug bag-ong awit alang kang Yahweh! Pag-awit ug pagdayeg kaniya tanang kalibotan! Kamong tanang katawhan nga nagalayag sa mga kadagatan, ug kamong tanan nga mga binuhat nga nagpuyo sa lapad nga kadagatan, ug katawhan nga nagpuyo sa mga lagyo nga mga isla pag-awit sa makusog! ¹¹ Kamong mga katawhan nga nagpuyo sa mga lungsod sa mga disyerto, pag-awit sa makusog! Kamong mga katawhan nga nagpuyo sa rehiyon sa Kedar nga anaa sa amihang dapit sa Arabia, paglipay usab kamo! Kamong mga katawhan sa siyudad sa Sela dapit sa Edom, kinahanglan nga mag-awit usab kamo sa kalipay; pagsinggit sa makusog alang kaniya gikan sa kinatumyan sa mga kabukiran! ¹² Bisan ang mga katawhan nga nagpuyo sa lagyo nga mga isla kinahanglan nga mopasidungog kang Yahweh ug moawit sa pagdayeg kaniya. ¹³ Mahitabo kini ingon nga si Yahweh molakaw sama sa kusgan nga sundalo; ipakita niya ang iyang labihan nga kasuko. Mosinggit siya sa gubat, ug unya pildihon niya nga tanan niyang mga kaaway. ¹⁴ Moingon siya, "Nagpabilin akong hilom sa dugayng panahon; nagpugong ako sa akong kaugalingon sa pagbuhat sa kung unsa ang angay kong buhaton. Apan karon, sama ako sa babaye nga manganak, mohilak, moutong ug mohangos. ¹⁵ Patagon ko ang mga bukid ug kabungtoran, ug palayaon ko ang tanang mga tanom ug mga kakahoyan. Himoon ko nga ang mga kasapaan sama sa gagmay nga mga tubod, ug motungha ang gagmay nga mga isla, ug pahubsan ko ang mga linaw. ¹⁶ Ang akong mga katawhan nga binihag mahisama sa tawong buta, apan tultolan ko sila sa dalan nga wala pa gayod nila sukad naagian, ni dalan nga wala pa nila nakita bisan kanus-a. Nawad-an na sila ug paglaom, ingon nga naglakaw sila sa kangitngit, apan kuhaon ko ang kangitngit ug mahimong sayon ang dalan nga ilang pagalaktan. Mao kadto ang mga butang nga buhaton ko alang kanila; dili ko sila isalikway. ¹⁷ Apan kadtong misalig sa kinulit nga mga diosdios, ug moingon sa mga kinulit nga hulagway, 'kamo mao ang among diosdios,' mapaulawan gayod sa hingpit." ¹⁸ Kamong mga Israelita nga nagpabungolbungol atubangan sa Dios, paminaw sa isulti ni Yahweh!" Nahisama kamo sa tawong buta, tan-awa! ¹⁹ Walay tawo nga sama ka buta sa akong katawhan, nga kinahanglan moalagad unta kanako. Walay tawo nga sama ka bungol sa katawhan sa Israel, nga mga mensahero ko man unta. Walay tawo nga sama ka buta sa katawhan nga akong gipili aron sa pagsilbi kanako sa usa ka saad. ²⁰ Nakakita kamo ug nasayod kung unsa ang butang nga husto ug angay buhaton, apan wala ninyo kini buhata. Nakadungog kamo kung unsa ang akong gisulti kanimo, apan wala ninyo kini hatagig pagtagad." ²¹ Tungod kay matarong si Yahweh, gipasidunggan niya ang iyang mahimayaong mga balaod. ²² Apan giguba sa mga sundalo ang Jerusalem ug gihurot sa pagpanguha ang mahinungdanong mga butang, ug gidakop ang mga katawhan ni Yahweh ug naghimo kanilang mga binilanggo. Sayon lang kaayo silang nadakpan, tungod kay wala may usa nga nanalipod kanila; walay usa nga misulti nga sila gitugotan nga mopauli sa balay. ²³ Kinsa man kaninyo ang naminaw niining mga butanga? Kinsa man ang nagpatabang niini gikan karon? ²⁴ Kinsa man ang nagtugot nga makawat ang bililhong mga butang sa mga katawhang Israel? Si Yahweh gayod, tungod kay kaniya lamang kita nakabuhat ug sala; wala kita nagkinabuhi sama sa buot niya nga atong buhaton, ug wala kita mituman sa iyang mga balaod. ²⁵ Busa dayag kaayo nga nasuko siya kanato, ug gihimo niya nga mapukan ang atong mga kasundalohan sa mga gubat. Kini ingon nga gipalibotan niya kita ug kalayo, apan wala kita nakasabot sa buot niya nga isulti kanato. Ang iyang kasuko nganhi kanato sama sa kalayo nga nisunog kanato, apan wala gihapon kita mihatag ug pagtagad.

Chapter 43

¹ Apan karon, kamong mga Israelita, paminw kang Yahweh, ang naghimo sa inyong nasod. Ang usa nga nagpili kaninyo nga mahimong usa ka nasod nag-sulti niini: "Ayaw kahadlok, tungod kay luwason ko kamo. Tawgon ko kamo pinaagi sa inyong ngalan, sa tuyo nga mahisakop kamo kanako. Karon gipanag-iya ko gayod kamo. ² Sa dihang masinati ninyo ang makuyaw nga kahimtang, ug adunay kalisod nga sama kakuyaw ug kalawom sa mga suba nga labangon, magauban ako kaninyo. Sa dihang makasinati kamo ug labihang kasakit nga kalisdanan, nga sama kainit sa kalayo, makasugakod kamo niini, ug dili na sila makapasakit kaninyo, ³ tungod kay ako si Yahweh, ang inyong Dios, ang Labing Balaan sa Israel, ang moluwas kaninyo. Ihatag ko ang Ehipto ingon nga inyong dapit; ug Etiopia ug Seba ingon nga baylo alang kaninyo. ⁴ Himoon kong mabihag ang uban nga mga nasod nga unta ang inyong nasod; Ibaylo ko sila kaninyo, sa tuyo nga aron dili kamo mamatay, tungod kay labihan kamo ka bililhon kanako ug tungod kay gihigugma ko kamo pag-ayo. ⁵ Ayaw kahadlok, tungod kay magauban ako kaninyo. Moabot ang adlaw nga tigomon ko ang inyong kaliwatan gikan sa sidlakan ug sa kasadpan. ⁶ Mandoan ko ang mga tigdumala gikan sa amihan ug habagatan, 'Ug tugotan ko ang katawhan sa Israel nga mobalik sa ilang nasod, gikan sa pinaka layo nga bahin sa kalibotan. ⁷ Ug tugotan ko kadtong nahisakop kanako nga mobalik kanako, tungod kay himoon ko silang usa ka nasod sa tuyo nga pasidunggan nila ako; Ako lamang ang mibuhat niana.' ⁸ Ipatawag kadtong katawhan nga adunay mga mata apan namuhat ingon nga buta; ipatawag kadtong adunay mga dalungan apan nagpakabungol. ⁹ Tigoma ang katawhan sa tibuok nga kanasoran, silang tanan nga gikan sa pundok sa tanang katawhan, ug pangutan-a sila niini: 'Nagapanagna ba ang ilang mga diosdios sa mga butang nga nagapanghitabo karon? ug makasulti ba sila sa mga butang nga mahitabo sa umaabot?' Unya pagdala ug tawo nga mopamatuod ug moingon 'Nadunggan ko sila nga nagtagna sa mga butang, ug unsa man ang ilang gitagna nahitabo ba,' apan namakak lang sila." ¹⁰ Apan miingon si Yahweh, "Kamong mga Israelita kamo ang akong mga saksi, ug kamo ang usa nga moalagad kanako. Gipili ko kamo aron makaila kanako, tuo kanako, ug sabta nga ako lamang ang bugtong ug tinuod nga Dios. Wala nay laing tinuod nga Dios. Walay laing tinuod nga Dios kaniadto pa, ug wala nay laing tinuod nga Dios. ¹¹ Ako, ako lamang, si Yahweh, ug wala nay uban nga makaluwas kaninyo. ¹² Miingon ako nga luwason ko ang inyong mga katigulangan, ug unya giluwas ko sila, ug gipahayag ko nga nabuhat ko kini. Walay langyaw nga mga diosdios diha kaninyo ang nakabuhat niana! Ug makapamatuod ka nga bugtong ako lamang, si Yahweh, ang Dios. ¹³ Ako ang Dios, ang milungtad sukad pa kaniadto ug hangtod sa kahangtoran; ug walay makaagaw sa katawhan gikan sa akong mga kamot, ug walay makausab sa akong gibuhat." ¹⁴ Si Yahweh, ang Labing Balaan sa Israel, ang miluwas kaninyo, ug mao kini ang iyang giingon: "Alang sa inyong kaayohan, magpadala ako ug sundalo aron mosulong sa Babilonia. Pugson nila ang katawhan sa siyudad aron mokalagyo gikan sa ilang siyudad, ug magbangutan pinaagi sa awit nga unta pag-awit sa kalipay. ¹⁵ Ako si Yahweh, ang inyong Labing Balaan, ang naghimo sa Israel nga mahimong usa ka nasod, ug ang tinuod ninyong hari. ¹⁶ Ako si Yahweh, ang naghimog dalan diha sa tubig, ang naghimo ug dalan sa Pulang Dagat. ¹⁷ Unya ipatawag ko ang bantogan nga mga sundalo sa Ehipto nga moanhi uban sa ilang mga karwahe ug mga kabayo. Apan sa dihang gisulayan nila sa paggukod ang akong katawhan, Gianod ko sila sa mga balod ug nangalumos sila; ang ilang kinabuhi natapos sama sa siga sa kandila nga napalong. ¹⁸ Apan ayaw lamang ug hunahunaa kung unsa ang nahitabo sa nangagi, sa dugay na nga panahon. ¹⁹ Hinoon, hunahunaa ang bag-ong mga butang nga akong pagabuhaton. Gisugdan ko na kini sa pagbuhat; nakita mo ba kini? Magbuhat ako ug dalan sa disyerto. Ug paagason ko ang mga tubod diha sa kamingawan. ²⁰ Ang mga ihalas nga iro ug mga ostrits ug ang uban pang mga ihalas nga mananap magpasalamat kanako tungod sa paghatag ko kanilag tubig sa disyerto. Pabugwakon ko ang mga tubod sa nag-uga nga disyerto sa tuyo nga ang akong katawhan, nga akong gipili, makabaton ug tubig; ²¹ Buhaton ko kana alang sa akong katawhan nga akong gipili nga nahisakop kanako, aron ipamalita nila sa uban ang mga nindot nga mga butang nga akong nabuhat alang kanila. ²² Apan karon, kamong mga kaliwatan ni Jacob, milikay paghangyo sa akong tabang. Napul-an na kamo sa pagsimba kanako kamong mga katawhan sa Israel. ²³ Wala na kamo nagdala kanako ug karnero ug mga kanding aron ihalad ug sunogon diha sa akong halaran; wala na kamo nagtahod kanako uban sa bisan unsa nga halad, bisan ang mga halad sa trigo ug insenso nga akong gipangayo kaninyo nga dalahon nganhi kanako dili ingon nga palas-anon ninyo. ²⁴ Wala na kamo nagdala alang kanako ug pahumot sa pagpatugbaw, ug wala ninyo gibubo alang kanako ang kahumot sa tambok gikan sa halad nga mga mananap. Apan hinuon gihasol ninyo ako alang sa tanan ninyong gibuhat nga mga sala, ug nakapakapoy kanako ang tanan ninyong mga daotang binuhatan. ²⁵ Ako lamang ang makahimo sa pagpasaylo sa tanan ninyong kasal-anan; ako lamang ang makahimo niana, ug human niana dili ko na kini hinumdoman pa pag-usab. ²⁶ Sultihi ako kung unsa ang akong nahimo nga wala ninyo nauyonan. Nakahunahuna ba kamo nga sa dihang mapasaka ninyo ang inyong sumbong, makapamatuod kamo nga dili kamo sad-an? ²⁷ Dili, unsa man ang nahitabo sa mga nauna kaninyo nga mga kaliwatan nga Israelita nakasala sila batok kanako, ug tungod kay nagsupak ang inyong mga pangulo batok kanako. ²⁸ Kana ang hinungdan nga gipakaulawan ko ang inyong mga pari; tugotan ko ang uban nga molaglag masilag kaninyo mga katawhan sa Israel."

Chapter 44

¹ Apan karon, paminaw kamo kanako, kamo nga katawhan sa Israel nga gipili ni Yahweh nga moalagad kaniya. ² Si Yahweh, nga inyong magbubuhat, nagsud-ong ug nagtabang kaninyo, samtang gipakatawo kamo, misulti niini: "Kamong hinigugma nako nga katawhan sa Israel nga akong gipili, kamo nga nag-alagad kanako, ayaw kahadlok. ³ Ibubo ko ang tubig diha sa uga ninyo nga yuta ug tugotan ko nga modagayday ang mga sapa. Ug Ibubo ko ang akong Espiritu diha sa inyong mga kaliwatan ug panalanginan ko sila pag-ayo. ⁴ Motubo sila sama sa sagbot nga nanubo diha sa katubigan, sama sa tambo nga maayo ang pagtubo diha sa daplin sa suba. ⁵ Moingon ang pipila kanila, 'iya ako ni Yahweh,' ug moingon ang uban, 'Mga kaliwat kami ni Jacob,' ug ang uban mosulat diha sa ilang mga kamot, 'Iya kami ni Yahweh,' ug ang uban moingon, 'Mga Israelita kami, ug iya kami ni Yahweh."' ⁶ Miingon niini si Yahweh, nga hari sa Israel, nga nagluwas kanato, ang pangulo sa kasundalohang anghel, "Ako ang nagsugod sa tanang butang ug ang magtapos sa tanang butang; walay laing Dios. ⁷ Kung adunay sama kanako, angay niya kining ipahibalo! Angay siyang motingog ug sultihan ako karon! Angay niyang isulti kung unsa ang nahitabo sukad sa akong pagtugot nga mamahimong nasod ang Israel kaniadto; angay usab niyang ipasabot nganong nahitabo man ang mga panghitabo kaniadto sa maong paagi, ug angay niyang isulti kung unsa ang mahitabo sa umaabot. ⁸ Ayaw kahadlok, akong katawhan. Gisultihan ko na kamo kaniadto sa mga butang nga mahitabo, nakahibalo kamo nga gipanagna ko na kini, ug makapamatuod kamo nga gibuhat ko kana. Walay laing Dios nga makahimo sa pagpanalipod kaninyo." ⁹ Buangbuang ang tanan nga nagahimo ug mga diosdios, ug walay pulos ang mga diosdios nga giisip nila nga halangdon. Ug ang katawhan nga nagasimba niadtong mga diosdios—daw sama sila sa buta, ug maulawan sila tungod sa ilang pagsimba niadtong maong mga diosdios. ¹⁰ Ang mga buangbuang lamang nga katawhan ang maghimo ug diosdios nga hinulma, mga diosdios nga dili gayod makatabang kanila. ¹¹ Maulawan kadtong nagahimo ug mga diosdios ug kadtong nagasimba niini. Kadtong nagabuhat ug mga diosdios mga tawo lamang, apan nag-angkon nga nagahimo sila ug mga dios! Angay silang mobarog atubangan sa Dios diha sa hukmanan, ug sa dihang madunggan nila ang iyang isulti, malisang, ug maulawan silang tanan. ¹² Mobarog diha atubangan sa init nga baga ang mga panday sa puthaw aron sa pagbuhat ug mga diosdios. Dokdukon nila kini ug hulmahon pinaagi sa mga martilyo. Tungod kay nagtrabaho sila pag-ayo, gutomon sila ug maluya; uhawon sila pag-ayo ug mawad-ag kusog. ¹³ Unya ang magkukulit sa kahoy mokuha ug dakong tipak sa kahoy ug sukdon niya kini; unya butangan niya ug timailhan kung asa niya kini putlon. Mogamit siya ug tigib ug uban pang galamiton sa pagkulit ug hulagway sa tawo. Himoon niya kining maanindot kaayo nga diosdios, ug ibutang niya kini sa pinasahi nga balay, kung diin siya magayukbo niini. ¹⁴ Sa dili pa siya mokulit ug diosdios nga gikan sa tipak sa kahoy, nagputol na siya daan ug kahoy nga sedro, o nagpili na siya ug kahoy nga sepros o kahoy nga tugas ug tugotan niya kini nga manurok ug manag-as diha sa kalasangan. O nagtanom na siya ug kahoy nga palo-china, ug nabisbisan kini sa ulan ug nanag-as. ¹⁵ Human niya gamita ang bahin sa kahoy sa pagbuhat ug diosdios, gigamit niya ang ubang bahin nga sugnod, alang sa pagpainit sa iyang kaugalingon o sa pagluto ug pan. Apan gigamit niya ang bahin sa susamang kahoy aron sa pagbuhat ug diosdios alang sa iyang kaugalingon aron simbahon! Nagbuhat siya ug diosdios, ug unya miyukbo siya sa pagsimba niini. ¹⁶ Gisugnod niya ang ubang bahin sa maong kahoy aron sa pagluto ug karne, gikaon niya kini ug nabusog siya, ug gisugnod niya ang uban niini aron painitan ang iyang kaugalingon, ug miingon siya, "Nainitan ako samtang nagtan-aw sa siga sa kalayo." ¹⁷ Unya gikuha niya ang nahibilin nga kahoy ug gihimo niyang dios. Moyukbo siya nagpasidungog, ug nag-ampo niini ug moingon, "Ikaw ang akong dios, busa luwasa ako" ¹⁸ Kadtong katawhan nga hilabihan ang pagkabuangbuang ug pagka walay alamag. Daw sama sila sa mga buta, daw sama nga nasirad-an ang ilang mga hunahuna ug dili makahunahuna ug maayo. ¹⁹ Wala sila maghunahuna kung unsa ang ilang ginabuhat, nga nagakuha sila ug tipak sa kahoy ug gisugnod ang katunga niini aron nga mainitan ang ilang mga kaugalingon ug ang uban gigamit aron sa pagluto ug pan ug sa pagsugba sa karne! Wala sila maghunahuna nga, "Binuang ang pagkuha sa nahibiling tipak sa kahoy aron himoong ngil-ad nga diosdios! Walay pulos ang pagyukbo ngadto sa tipak sa kahoy!" ²⁰ Tingali ug gikaon usab nila ang mga abo nga gikan sa kalayo! Misalig sila sa butang nga dili makaluwas kanila; dili nila angkonon, "Sa akong kamot nagkupot ako ug dili tinuod nga dios! " ²¹ Miingon si Yahweh, "Kamo nga mga kaliwat ni Jacob, kamo nga katawhan sa Israel nga angay unta nga moalagad kanako, gibuhat ko kamo, ug dili ko kamo kalimtan. ²² Giwagtang ko ang inyong mga sala sama sa hangin nga mopadpad sa panganod. Ang inyong mga kalapasan daw sama sa gabon nga akong gipadpad. Balik kamo kanako kay giluwas ko kamo." ²³ Angay nga mag-awit ang adlaw ang bulan ug ang mga kabitoonan diha sa kawanangan, ug magmaya ang kinahiladmang dapit sa kalibotan! Angay nga moawit sa makusog, ang tanang kabukiran ug kalasangan, ug ang tanang mga kahoy, tungod kay giluwas ni Yahweh ang mga kaliwat ni Jacob, ug pagadaygon siya sa katawhan sa Israel. ²⁴ Misulti niini si Yahweh, nga nagbuhat ug nagluwas kaninyo: "Ako si Yahweh, ang nagbuhat sa tanang butang. Ako lamang ang nagmugna sa kawanangan. Walay si bisan kinsa nga anaa uban kanako sa dihang gibuhat ko ang kalibotan. ²⁵ Gipakita ko nga mga bakakon ang mga mini nga mga propeta, ug gipakita ko nga buangbuang ang mga nanagna sa umaabot. Naghunahuna ang ubang tawo nga maalamon sila ug nagsulti nga daghan silag nahibaloan, apan gipakita ko nga mga buangbuang sila. ²⁶ Apan kanunay kong tugotan nga mahitabo ang mga panagna sa akong mga propeta. Giingnan ko sila nga sultihan ang katawhan sa Jerusalem, 'Sa umaabot nga adlaw mamuyo pagbalik ang katawhan dinhi.' Ug gisultihan ko sila nga ingnon ang katawhan sa laing mga lungsod sa Juda nga ako, si Yahweh, nag-ingon, 'Matukod pagbalik ang inyong mga lungsod.' ²⁷ Sa dihang moingon ako sa mga suba, 'Mauga ka!' manga-uga sila. ²⁸ Sa dihang mosulti ako mahitungod kang Haring Cyrus, ''Atimanon niya ang akong katawhan sama sa magbalantay sa karnero nga moatiman sa iyang mga karnero, buhaton niya ang tanan nakong gusto nga ipabuhat kaniya,' moingon siya mahitungod sa Jerusalem, 'Angay nato kining tukoron pagbalik!' ug moingon usab siya, 'Angay natong tukoron pagbalik ang templo!"'

Chapter 45

¹ Si Cyrus mao ang gituboy ni Yahweh nga mamahimong emperador sa Persia ug pagahatagan niya kini ug dakong kabantog; tugotan siya ni Yahweh nga pildihon ang ubang mga nasod ug ilogon ang gahom sa ilang mga hari. Tugotan niya nga mangaabri ang ganghaan sa mga siyudad, ug walay si bisan kinsa nga makahimo sa pagsira niini. ² Mao kini ang gisulti ni Yahweh kaniya: "Cyrus, mag-una ako kanimo ug patagon ko ang mga kabukiran. Dugmokon ko ang mga bronsi nga ganghaan ug pamutlon ang mga puthaw nga babag niini. ³ Ihatag ko kanimo ang mga bahandi nga gitagoan sa katawhan diha sa mangitngit nga mga dapit. Buhaton ko kana aron imong mahibaloan nga ako si Yahweh, ang Dios nga nanag-iya sa mga Israelita, ang Dios nga nagtawag kanimo sa imong ngalan. ⁴ Gipatawag ko ikaw, ug gitawag sa imong ngalan, alang sa katawhan sa Israel nga akong gipili, nga moalagad kanako. Bisan ug wala nimo ako mailhi, hatagan ko ikaw ug dakong kadungganan. ⁵ Ako si Yahweh, ug walay laing Dios. Bisan ug wala nimo ako mailhi, hatagan ko ikaw ug kusog sa pagpakiggubat aron nga ang matag usa diri sa kalibotan, gikan sa sidlakan ngadto sa kasadpan, ⁶ masayod nga walay laing Dios. Ako si Yahweh, ug walay laing Dios. ⁷ Gibuhat ko ang kahayag ug ang kangitngit. Gitugotan ko nga adunay kalinaw ug mga katalagman. Ako, si Yahweh, ang nagbuhat niining tanan." ⁸ Miingon usab si Yahweh, " Sama sa ulan nga mahulog diha sa yuta aron sa pagtabang niini, tabangan ug luwason ko ang akong katawhan; tugotan ko nga tagdon sila nga adunay pagkamakiangayon. Ako, si Yahweh, ang nagtugot niadtong tanang mga butang nga mahitabo. ⁹ Mahitabo ang mga makalilisang nga mga butang niadtong nakigbatok kanako, tungod kay ako ang nagbuhat kanila. Sama sila sa mga kolon nga nakiglalis sa magkukolon nga nagbuhat kanila; sama lamang sila sa ubang mga kolon nga gibuhat, apan nakiglalis sila sa Magbubuhat nga naghimo ug naghulma kanila gikan sa lapok. Makasulti ba ang tinapok nga lapok ngadto sa nagbuhat kaniya, ''Nganong gibuhat mo man ako sama niini?' Dili maka-ingon ang kolon, 'Unsa man imong gihunahuna nga buhaton, ang paghimo kanako sa ingon niini nga paagi?" o "Wala kay katakos ug walay pulos ang imong kolon!" ¹⁰ Ug makalilisang kini kung ang usa ka bata nga wala pa matawo moingon ngadto sa iyang amahan, 'Nganong tugotan mo man ako nga matawo?' o moingon ngadto sa iyang inahan, 'Mamahimong walay pulos imong mga pag-antos."' ¹¹ Miingon niini ngadto kanila, si Yahweh, ang Balaang Dios sa mga Israelita, nga nagbuhat sa Israel: "Nganong nangutana man kamo mahitungod sa akong gibuhat alang kaninyo, akong mga anak? Nganong pahimangnoan man ninyo ako mahitungod sa mga bulohaton nga angay nakong himoon? ¹² Ako ang nagbuhat sa kalibotan ug ang nagbuhat sa katawhan nga namuyo niini. Gimugna ko ang kawanangan pinaagi sa akong mga kamot, ug gipahimutang ko ang kabitoonan diha sa ilang mga dapit. ¹³ Ug gihimo ko nga tinguhaon ni Cyrus ang pagbuhat sa hustong mga butang, ug tugotan ko nga sayon lamang alang kaniya ang pagbuhat niadtong mga butanga. Walay si bisan kinsa ang makapugong kaniya. Tukoron pagbalik sa iyang mga trabahanti ang akong siyudad, ug himoon niyang gawasnon ang akong mga binihag nga katawhan. Ug buhaton niya kini nga walay ganti gikan kanako!" Mao kini ang gisulti ni Yahweh, nga pangulo sa kasundalohang anghel. ¹⁴ Ug mao usab kini ang akong isulti, kaninyo, akong katawhan: "Dumalahan ninyo ang katawhan sa Ehipto ug sa Etiopia, ug mahimo ninyong mga sulugoon ang tag-as nga mga tawo sa Seba. Mangadto sila kaninyo nga magdala sa tanang mga butang nga ilang gibaligya, ug maangkon ninyo kining tanan. Kinadinahan ang ilang mga bukton samtang magsunod sila kaninyo. Moyukbo sila sa inyong atubangan ug moingon, 'Ang Dios nag-uban kaninyo ug siya lamang ang Dios; wala nay laing Dios."' ¹⁵ O Dios, bisan dili ka namo makita, kanimo lamang kami nahisakop, ug ikaw ang nagluwas kanamo. ¹⁶ Maulawan ang tanan nga nagbuhat ug mga diosdios. Maulawan silang tanan. ¹⁷ Apan ikaw, Yahweh, ang magluwas kanamo, nga mga Israelita, ug mamahimo kaming gawasnon hangtod sa kahangtoran. Dili na gayod kami, maulawan pag-usab, hangtod sa umaabot. ¹⁸ Dios si Yahweh; siya ang nagmugna sa kawanangan ug ang nagbuhat sa kalibotan. Dili niya buot nga magpabilin kini nga walay magpuyo; buot niya nga puy-an kini sa katawhan. Miingon siya, "Ako si Yahweh; ug wala nay laing Dios. ¹⁹ Wala ko gisulti sa tago, ang akong gisulti; wala ko gitago ang akong gisulti pinaagi sa pagsulti niini diha sa ngitngit nga dapit. Sa dihang nakigsulti ako sa mga kaliwat ni Jacob, wala ako moingon kanila 'Walay pulos ang inyong pagpangita kanako!' Ako, si Yahweh, nagsulti lamang ako kung unsa ang matuod ug kung unsa ang husto. ²⁰ Kamong katawhan nga nagpabilin gihapon nga buhi human makasinati ug dakong katalagman, angay nga moanhi ug magtapok kamong tanan ug maminaw niini: Buangbuang ang katawhan nga nagadala ug mga diosdios nga kahoy ug nag-ampo kanila, tungod kay dili makaluwas kanila kadtong maong mga diosdios! ²¹ Pagsabot kamo ug paghukom kung unsa ang inyong isulti aron sa pagpamatuod nga angay kamong mag-ampo ngadto sa mga diosdios. Ug kung buhaton ninyo kana, mangutana ako kaninyo, "Kinsa man ang nanagna kaniadto kung unsa ang nahitabo karon? Aduna bay usa sa mga diosdios nga misulti kaninyo nga mahitabo kadtong mga butanga?' Wala, ako lamang, nga si Yahweh, ang nagsulti kaninyo, tungod kay ako lamang ang Dios; ug wala nay laing Dios. Ako ang Dios nga nagapamuhat diha sa pagkamatarong ug magluwas sa katawhan; walay laing nagbuhat niining tanan. ²² Maghangyo kanako ang matag usa diri sa kalibotan nga luwason ko sila, tungod kay ako lamang ang Dios nga makahimo niana; wala nay lain pa. ²³ Matinud-anon ko kining gipamulong, pinaagi sa akong ngalan; gisulti ko kung unsa ang matuod, ug dili ko na gayod usbon kung unsa ang akong gisulti: Sa umaabot nga adlaw, moyukbo ang matag usa sa akong atubangan, ug matinud-anon silang tanan nga mosaad nga magmaunongon kanako. ²⁴ Isulti nila nga, 'si Yahweh ang nagtugot kanato nga magkinabuhi sa pagkamatarong ug sa pagkamalig-on."' Ug kadtong tanan nga nasuko kang Yahweh moadto kaniya, ug maulawan sila sa ilang pagkasuko kaniya. ²⁵ Si Yahweh lamang ang nagtugot kanatong mga katawhan sa Israel nga mopildi sa atong mga kaaway sa umaabot nga mga kapanahonan, ug unya ipasigarbo nato ang iyang nabuhat alang kanato.

Chapter 46

¹ Sama nga si Bel ug si Nebo, ang mga estatuwa sa mga dios sa Babilonia, nagyukbo samtang gipas-an sa mga mananap ang mga diosdios! Bug-at ang mga estatuwa mao nga gipangkapoy ang mga mananap! ² Managsama nga nagbuy-od ang mga dios ug mga mananap; dili makaluwas ang mga dios sa ilang kaugalingon ni ang mga hayop nga tigpas-an; ang mga diosdios mismo palayason! ³ Miingon si Yahweh, "Kamo nga mga kaliwat ni Jacob nga mga binihag, dili ako sama sa mga dios sa Babilonia nga kinahanglan pas-anon; hinuon, sama nga ako mao ang nagpas-an kaninyo sukad nga ikaw nahimong nasod. Gipas-an ko ikaw sa wala ka pa nahimong nasod. ⁴ Mahimo mo ako nga imong Dios, ug pas-anon ko ikaw sa daghan nga mga katuigan, hangtod nga matigulang ang imong kanasoran. Ako ang naghimo kanimo, lig-onon ug luwason ko ikaw. ⁵ Wala gayoy bisan usa nga ikatandi kanako. Wala gayoy sama kanako. ⁶ Busa binuang gayod ang gibuhat sa ubang mga tawo nga nagbubo ug bulawan ug plata gikan sa ilang mga sudlanan ug gitimbang kini. Unya magkuha sila ug usa ka tawo nga makahimo ug mga butang nga gikan sa bulawan aron maghimo ug diosdios gikan niini. Human siya makahimo ug diosdios, miyukbo sila ug misimba niini! ⁷ Gialsa nila kini ug gipas-an. Gibutang nila kini sa pinasahi nga dapit, ug nagpabilin kini didto. Dili kini makalihok! Ug sa dihang adunay mag-ampo niini, dili kini makatubag. Busa klaro kaayo nga dili kini makaluwas kang bisan kinsa gikan sa iyang mga kalisdanan! ⁸ Kamong katawhan sa Juda, ayaw kini hikalimti; hunahunaa kini kanunay, kamo nga makasasala nga katawhan! ⁹ Hunahunaa ang mga butang nga akong gihimo sa dugay na nga panahon. Ako lamang ang Dios; Dios ako, ug walay bisan usa nga sama kanako. ¹⁰ Ako lamang ang makasulti kung unsa ang mahitabo sa umaabot una kini moabot; isulti ko kini sa dili pa kini mahitabo. Tumanon ko ang tanan kong gilaraw, ug buhaton ko ang tanan nga buot kong buhaton. ¹¹ Busa ipatawag ko si Cyrus nga moadto sa sidlakan sama sa sayaw ug sa gamhanang agila; moabot siya gikan sa layong nasod. Tumanon niya ang buot ko nga ipabuhat kaniya. Siya mao ang mobuhat sa akong gisulti, ug sa akong giplano. ¹² Kamo nga gahi ug ulo nga katawhan sa Israel, kamo nga dili makahimo ug matarong, ¹³ luwason ko kamo, ug dili na kana madugay pa. Hapit ko na kana buhaton. Luwason ko ang Jerusalem ug ipakita ko kaninyo nga mga Israelita nga mahimayaon ako."

Chapter 47

¹ Miingon usab si Yahweh, "Kamong katawhan sa Babilonia, angay kamong moadto ug molingkod diha sa abog, tungod kay hapit na matapos ang inyong higayon sa pagdumala sa ubang mga nasod. Dili na gayod moingon pagbalik ang katawhan nga maanindot ang Babilonia sama sa batan-ong babaye nga makadani pag-ayo. ² Mahimo kamong mga ulipon, busa pagkuha ug bug-at nga mga bato ug paggaling ug trigo sama sa gibuhat sa babayeng ulipon. Huboa ang imong maanindot nga purong ug huboa ang imong bisti samtang mangandam ka sa pagtabok sa kasapaan aron sa pag-adto sa dapit nga ipugos kanimo sa pagpaadto. ³ Mahuboan ka ug maulawan pag-ayo. Panimaslan ko ikaw ug dili kaluy-an." ⁴ Ang nagpalingkawas sa katawhan sa Juda, nga among gitawag ug 'Yahweh nga Pangulo sa kasundalohang anghel.' ang Balaang Dios sa Israel. ⁵ Miingon si Yahweh, "Kamong katawhan sa Babilonia, lingkod kamo diha sa kangitngit, tungod kay wala nay si bisan kinsa nga mosulti pag--usab nga sama sa rayna nga nagdumala sa daghang gingharian ang inyong siyudad. ⁶ Nasuko ako sa katawhan nga nahisakop kanako, ug gisilotan ko sila. Gitugotan ko kamong katawhan sa Babilonia nga sakopon sila. Apan sa dihang gisakop ninyo sila, wala ninyo sila kaluy-i. Gidaugdaog ninyo bisan ang mga tigulang. ⁷ Nag-ingon kamo, 'Dumalahan nato ang ubang mga nasod hangtod sa kahangtoran; daw sama kini nga ang among siyudad ang maoy mahimong rayna sa kalibotan hangtod sa kahangtoran!' Apan wala ka maghunahuna mahitungod sa mga butang nga imong ginabuhat, o maghunahuna kung unsa ang mamahimong sangpotanan. ⁸ Paminaw kamo niini, kamong katawhan sa Babilonia nga nagmaya sa kalipay ug nagpuyo sa kaadunahan: Namuhat kamo ingon nga mga dios, sa pag-ingon, "Pinasahi ako, ug wala nay mas maayo pa labaw kanako," Walay bisan usa sa among kababayen-an ang mabiyuda, ug dili mamatay sa gubat ang among mga anak.' ⁹ Apan kadtong tanang butang mahitabo diha kaninyo sa pinakalit: daghan sa inyong kababayen-an ang mabiyuda ug daghan sa inyong mga anak ang mangamatay, bisan pa kung nagahimo kamo ug daghan nga pagpanagna ug daghang matang sa mga salamangka aron sa pagpakgang sa mga daotang butang nga mahitabo kaninyo. ¹⁰ Gibati ninyo nga luwas kamo bisan pa ug nagabuhat kamo ug daotang mga butang, ug nag-ingon nga, 'Walay makakita sa atong ginabuhat!' Naghunahuna kamo nga maalamon kaayo kamo ug nahibalo sa daghang mga butang, ug miingon kamo, 'Mga dios kami, ug walay sama kanamo,' apan gilimbongan ninyo ang inyong mga kaugalingon. ¹¹ Busa makasinati kamo ug makalilisang nga mga butang, ug dili ninyo kini mapugngan pinaagi sa mga salamangka. Makasinati kamo ug mga katalagman, ug dili kamo makahimo sa pagsuhol ni bisan kinsa nga salamangkiro sa pagpugong niadtong mga butanga nga mahitabo. Sa kalit lang modangat kaninyo ang katalagman, butang nga wala ninyo hunahunaa nga mahitabo. ¹² Busa padayon kamo sa pagbuhat sa inyong mga salamangka! Padayon kamo sa pagbuhat sa tanang matang sa pagpamarang nga ginabuhat ninyo sa daghang katuigan! Tingali ug magmalamposon kamo sa inyong pagbuhat niadtong mga butanga; tingali ug mahadlok kaninyo ang inyong mga kaaway! ¹³ Apan ang tanan niana resulta sa pagbuhat ninyo sa tanang mga butang nga gipabuhat kaninyo sa mga salamangkiro ug nakapakapoy kaninyo! Kinahanglan nga moanha ug moluwas kaninyo gikan sa mga katalagman nga hapit na ninyong masinati, ang mga kalalakin-an nga maalamon mahitungod sa mga bituon ug nagapahibalo sa matag bag-ong bulan, ug ang nagapanagna sa umaabot. ¹⁴ Apan dili sila makabuhat niana, tungod kay sama sila sa mga uhot nga nasunog sa kalayo; dili sila makaluwas sa ilang mga kaugalingon gikan sa pagkasunog sa nagsiga nga kalayo. Dili sila makahimo sa pagtabang kaninyo; wala silay pulos sama sa dagami nga nasunog, apan ang maong kalayo mougdaw kanila imbis nga malipay sila sa kainit niini. ¹⁵ Ug pakyason kamo nila, kadtong matinud-anon ninyong gitrabahoan ug gikuyogan sa mga panaw ug sa pagpamatigayon sa dihang batan-on ka pa, ug sa gihapon padayon silang tanan nga nagabuhat sa daotang mga butang; ug sa dihang magpakitabang ka, walay bisan usa nga makatabang kanimo."

Chapter 48

¹ Paminaw kang Yahweh, kamong mga kaliwat ni Jacob, nga mga kaliwat usab ni Juda nga karon gitawag na nga katawhan sa Israel! Naghimo kamo ug maligdong nga mga saad gamit ang ngalan ni Yahweh, ug naghangyo kamo nga maminaw kaninyo ang Dios kung diin nahisakop ang katawhang Israelita, apan wala kamo magmatinud-anon sa pagbuhat ninyo niini. ² Nag-ingon kamo nga nagpuyo kamo sa balaang siyudad sa Jerusalem ug dili kamo matinud-anon sa pagsulti nga nagasalig kamo sa Dios nga nanag-iya kaninyo nga mga Israelita, nga mao si Yahweh, nga pangulo sa kasundalohang anghel. ³ Gisulti ko na kaniadto kung unsa ang mahitabo. Ug unya sa kalit lang, gitugotan ko kadtong mga butanga nga mahitabo. ⁴ Nasayod ako nga masinupakon kamo nga katawhan; nasayod ako nga gahi kamog ulo sama sa bronsi o tumbaga. ⁵ Mao nga gisulti ko na kaninyo kaniadto kadtong mga butanga. Sa wala pa kini mahitabo, gipahibalo ko na kini nga daan, aron nga kung mahitabo na kini dili kamo makasulti nga 'Gibuhat kini sa among mga diosdios; ang among mga larawan nga kinulit gikan sa kahoy o ang among diosdios nga hinimo gikan sa puthaw ang hinungdan nganong nahitabo kini.' ⁶ Nadunggan ninyo kadto nga mga butang nga akong gisulti kaniadto, ug karon nakita ninyo nga nahitabo na kining tanan, busa nganong dili man ninyo kini angkonon? Karon sultihan ko kamog mga bag-ong butang, mga butang nga wala pa ninyo mahibaloi kaniadto. ⁷ Tugotan ko nga mahitabo kini karon; dili kini ang mga butang nga akong gibuhat kaniadto. Busa dili kamo maka-ingon nga, 'Nakabalo na kaming daan mahitungod niadtong mga butanga.' ⁸ Sultihan ko kamo sa mga butang nga wala pa gayod ninyo madunggi o masabti kaniadto. Bisan pa kaniadto wala kamo nagpakita ug pagtagad kanako. Nasayod ako nga limbongan kaayo kamo; nakigbatok kamo kanako sukad pa sa pagkahimo ninyo nga nasod. ⁹ Apan tungod ug alang kanako, aron nga pasidunggan ako, dili ko kamo silotan dihadiha dayon ug dili ako hingpit nga magpalayo kaninyo. ¹⁰ Giputli ko kamo, apan dili sama sa paagi sa mga tawo nga magputli sa plata. Hinuon, tugotan ko nga mag-antos kamo sa hilabihan aron nga mawagtang ang inyong daotan nga pamatasan, ¹¹ Apan tungod ug alang kanako langanon ko ang akong pagsilot kaninyo; langanon ko kini alang kanako, aron nga dili maguba ang akong dungog. Dili ko tugotan ang si bisan kinsa o bisan kinsa nga diosdios nga mapasidunggan sama sa pagpasidungog kanako." ¹² Paminaw kamo kanako, kamong mga kaliwat ni Jacob, kamong katawhan sa Israel nga akong gipili! Ako lamang ang Dios; Ako ang nagsugod sa tanang butang ug ang magtapos sa tanang butang. ¹³ Ako ang nagpahimutang sa pasukaranan sa kalibotan. Gibuhat ko ang kawanangan pinaagi sa akong mga kamot. Ug sa dihang misulti ako nga motungha ang mga bituon, nanungha silang tanan. ¹⁴ Pagtigom kamong tanan ug paminaw kamo kanako. Walay si bisan kinsa sa inyong mga diosdios ang nagsulti niini kaninyo: ako, si Yahweh, ang nagpili kang Cyrus nga motabang kanako, ug buhaton niya ngadto sa Babilonia ang buot nako nga ipabuhat kaniya, ug pamatyon sa iyang mga kasundalohan ang kasundalohan sa Babilonia. ¹⁵ Gisulti ko kini; gipatawag ko si Cyrus. Gituboy ko siya, ug himoon niya ang tanang butang nga buot niyang buhaton. ¹⁶ Paduol kanako ug paminawa kung unsa ang akong isulti. Kaniadto gisultihan ko na kamo kung unsa ang mahitabo, ug sa dihang nahitabo na kadtong mga butanga, gitugotan ko kadto nga mahitabo."' Ug karon si Yahweh nga Ginoo ug ang iyang Espiritu nagpadala kanako, ang propeta nga si Isaias, sa paghatag kaninyo ug mensahe. ¹⁷ Mao kini ang giingon ni Yahweh, ang nagluwas kaninyo, ang Balaang Dios sa mga Israelita: "Ako si Yahweh, nga inyong Dios; tudloan ko kamo kung unsa ang mahinungdanon alang kaninyo aron nga magmalamposon kamo; gigiyahan ko kamo ug gitultolan ngadto sa mga butang nga angay ninyong buhaton. ¹⁸ Nanghinaot ako nga nagpakita kamo ug pagtagad sa akong mga sugo! Kung gibuhat ninyo kana, mahitabo ang mga maayong butang diha kaninyo sama sa suba nga maanindot ang pagdagayday; magmalamposon unta kamo sa kanunay, sama sa balod nga walay pag-undang. ¹⁹ Ang imong mga kaliwatan mamahimo unta nga sama kadaghan sa mga balas sa baybayon nga walay bisan usa nga maka-ihap. Dili na unta kinahanglan nga laglagon ko sila; dili unta malaglag ang nasod sa Israel. ²⁰ Bisan paman, sultihan ko kamo karon, biya gikan sa Babilonia! Kalagiw gikan sa pagka-ulipon sa katawhan sa Babilonia! Isulti kini nga mensahe nga adunay hilabihan nga pagmaya; ipadala kini ngadto sa labing suok nga mga dapit sa kalibotan: 'Gipalingkawas ni Yahweh ang katawhan sa Israel gikan sa pagka-ulipon sa Ehipto.' ²¹ Wala sila uhawa sa dihang gigiyahan niya sila didto sa disyerto, tungod kay mibugwak ang tubig nga mainom alang kanila gikan sa bato nga iyang gipaliki.' ²² Apan nag-ingon si Yahweh, dili mamahimong hapsay ang mga butang alang niadtong mga tawo nga daotan.

Chapter 49

¹ Kamong tanang katawhan nga nagpuyo sa mga isla sa kadagatan ug sa ubang halayong mga dapit, hatagig pagtagad ang akong isulti kaninyo! Gitawag na ako ni Yahweh sa wala pa ako natawo; gipili na niya ako sa dihang anaa pa ako sa sabakan sa akong inahan. ² Sa dihang midako na ako, gihimo niyang hait ang akong mga mensahe sama sa espada. Gipanalipdan niya ako pinaagi sa iyang mga kamot. Gipanalipdan niya ako sama sa tawo nga nagtipig sa mahait nga mga udyong sa sudlanan niini. ³ Miingon siya kanako, "Mag-alagad ka sa akong katawhan nga mga Israelita, ug himoon mo nga magpasidungog kanako ang katawhan." ⁴ Mitubag ako, "Kawang lamang ang akong gibuhat; gigamit ko ang akong kusog, apan wala akoy bililhon nga nahuman; kawang lamang ang tanan kong gibuhat. Apan bisan pa man, pasidunggan ako ni Yahweh kung siya mahimuot; ang akong Dios mao ang moganti sa angay kanako." ⁵ Giumol ako ni Yahweh sa dihang atua pa ako sa sabakan sa akong inahan aron nga mag-alagad ako kaniya; gipili niya ako aron ipasig-uli kaniya ang katawhan sa Israel. Gipasidunggan ako ni Yahweh, ug siya mao ang hinungdan nga nagmalig-on ako. ⁶ Miingon siya kanako, "Dili pa kini igo alang kanimo nga mag-alagad kanako pinaagi sa pagpahibalik sa mga kaliwat ni Jacob aron mosimba kanako pag-usab; buot ko usab nga mahimo kang kahayag alang sa mga dili-Israelita; buot ko nga dad-on mo ang akong mensahe mahitungod kung unsaon maluwas ang tanang katawhan sa tibuok kalibotan." ⁷ Si Yahweh, ang Dios nga nagluwas kanato, nga mga Israelita, ang atong Balaang Dios, miingon ngadto sa gitamay ug sa sinalikway sa katawhan sa daghang kanasoran, ngadto sa giulipon sa mga tigdumala, "Moabot ang adlaw nga motindog ang mga hari aron motahod kanimo sa dihang makita ka nila, ug moyukbo ang mga prinsipe sa imong atubangan tungod kay nag-alagad ka man kanako, nga mao si Yahweh, ang Dios nga matinumanong mobuhat sa akong gisaad. Ako ang Balaang Dios nga nanag-iya kanimo nga usa ka Israelita, nga mao ang nagpili kanimo." ⁸ Mao usab kini ang gisulti ni Yahweh: "Sa takna nga makapahimuot kini kanako, tubagon ko ang imong mga pag-ampo. Sa adlaw nga luwason ko ikaw gikan sa mga nagdaugdaog kanimo, tabangan ko ikaw. Panalipdan ko ikaw ug hatagan ug katakos nga matuman ang kasabotan tali sa ubang mga nasod. Ug pinaagi sa imong pagabuhaton, tukoron ko pag-usab ang imong nasod sa Israel ug tugotan ko ikaw nga makapuyo pag-usab sa imong yuta nga gibiyaan. ⁹ Magaingon ka ngadto sa mga dinakpan ug binihag, 'Biya sa Babilonia ug balik sa kaugalingon ninyong siyudad!' Ug magaingon ka niadtong atua sa mangitngit nga mga prisohan, 'Gawas kamo nganhi sa kahayag!' Sa dihang mahitabo kana, mahimo na usab silang mga karnero nga mosabsab sa mga sagbot sa lunhaw nga sabsabanan, sa kabungtoran nga umaw kaniadto. ¹⁰ Dili na sila gutomon o uhawon; dili na mopaso kanila pag-usab ang kainit sa adlaw. Ako si Yahweh, magmaluluy-on kanila ug mogiya kanila; giyahan ko sila sa dapit nga adunay bugnaw nga tubig. ¹¹ Ug patagon ko ang kabukiran, ug andaman ko ug maayong mga dalan ang akong katawhan nga ilang agian, aron sa pagbalik sa Jerusalem. ¹² Mobalik ang akong katawhan gikan sa halayo; moabot ang uban gikan sa amihan, ang uban maggikan sa kasadpan, ang uban maggikan sa habagatang bahin sa Ehipto." ¹³ Tungod sa gisaad ni Yahweh nga iyang pagabuhaton, kinahanglan magsinggit ang tanan sa kalipay—magaawit ang langit ug ang kalibotan ug ang kabukiran, tungod kay hupayon man ni Yahweh ang iyang katawhan, ug kaluy-an niya kadtong nagaantos. ¹⁴ Miingon ang katawhan sa Jerusalem, "Gipasagdan na kita ni Yahweh; gikalimtan na niya kita." ¹⁵ Apan mitubag si Yahweh, "Dili kana tinuod! Makalimot ba ang inahan sa pagpasuso sa iyang masusong anak? Mohunong ba siya sa pag-atiman sa bata nga iyang gipakatawo? Apan bisan pa ug mahikalimot ang babaye sa pagbuhat niana, dili ko kamo hikalimtan! ¹⁶ Hunahunaa nga nasulat ko na ang inyong mga ngalan sa akong mga palad; nagbantay ako kanunay sa mga pader sa inyong siyudad. ¹⁷ Sa dili madugay mobalik ang inyong mga anak didto, ug mobiya ang tanan nga miguba sa inyong siyudad. ¹⁸ Motan-aw kamo sa palibot ug makita ninyo ang tanan ninyong mga anak nga mobalik diha kaninyo. Ingon nga buhi ako, magauban sila kaninyo aron ipakita ninyo ngadto sa katawhan sama sa pangasaw-onon nga nagpakita sa iyang mga dayandayan sa kasal! ¹⁹ Naguba ang inyong yuta ug nahimong awaaw, apan moabot ang adlaw nga malukop kini sa katawhan, ug mokalagiw kadtong misakop kaninyo. ²⁰ Mobalik sa Jerusalem ang mga kabataan nga natawo samtang gipangbihag kamo ug moingon, 'Gamay kaayo kining siyudara alang kanamo; Kinahanglan namo ug dugang pa nga dapit aron kapuy-an!' ²¹ Unya maghunahuna kamo sa inyong mga kaugalingon, 'Pagkahibulongan nga aduna kitay daghang mga kabataan! Daghan ang nangamatay sa atong mga anak, ug gipangbihag ang uban. Nahibilin kita dinhi nga nag-inusara; busa wala kita mahibalo kung asa gikan kining tanang mga kabataan nga miabot! Kinsa ba ang nagpadako kanila?'" ²² Mao kini ang gisulti ni Yahweh nga atong Dios; "Tan-awa! Sama nga iisa ko ang akong kamot aron sinyasan kadtong dili mga Israelita. Ug pas-anon nila ang inyong gagmay nga mga anak nga lalaki ug mga anak nga babaye ug dad-on nila pagbalik diha kaninyo. ²³ Moalagad kaninyo ang mga hari ug tudloan ang inyong mga anak, ug ang ilang mga rayna maoy mag-atiman sa gagmay ninyong kabataan. Mohapa sila sa inyong atubangan ug tilapan ang abog sa inyong mga tiil. Sa dihang mahitabo kana, mahibaloan ninyo nga ako mao si Yahweh; ug kadtong mosalig kanako dili gayod mapakyas." ²⁴ Walay makailog sa bililhong mga butang gikan sa usa ka sundalo nga mikuha niadtong mga butanga panahon sa gubat; walay bisan usa nga makapugos sa usa ka madaogdaogon aron pagpalingkawas sa iyang binihag. ²⁵ Apan miingon si Yahweh niini: "Moabot ang adlaw, nga mahimong gawasnon ang mga binihag, ug mahibalik ang mga bililhong mga butang nga nailog gikan sa uban, tungod kay makig-away ako batok niadtong nakig-away kaninyo, ug luwason ko ang inyong mga anak. ²⁶ Ug himoon ko ang inyong mga kaaway nga mopukan sa ilang mga kaugalingon imbis nga patyon ang uban. Sa dihang mahitabo kana, mahibaloan sa tibuok kalibotan nga ako, si Yahweh, mao ang nagluwas kaninyo, nga mao ang nagluwas kaninyo gikan sa inyong mga kaaway; mahibaloan sa tanan nga ako mao ang gamhanang Dios nga maoy nanag-iya kaninyo nga mga kaliwat ni Jacob."

Chapter 50

¹ Mao usab kini ang gisulti ni Yahweh: "Kamong mga Israelita, ayaw ninyo hunahunaa nga gipugos ko ang inyong mga ginikanan nga bihagon sa Babilonia sama sa ubang kalalakin-an nga nagpapahawa sa ilang mga asawa ug human gihatagan nila ug kasulatan nga makigbulag sila kanila! Wala ko kamo gipalayas sama sa tawo nga nagbaligya sa iyang mga anak aron makakuha ug kuwarta aron ibayad sa iyang utang. Dili, ang hinungdan nga napugos ako sa pagpabihag kaninyo aron nga silotan kamo tungod sa mga sala nga inyong nahimo. ² Sa dihang mianha ako kaninyo aron luwason kamo, nganong wala may bisan usa nga mitubag kanako sa dihang nagtawag ako kaninyo? Wala bay usa nga atua didto aron mopalit kaninyo pag-usab ug dad-on kamo pagbalik? Naghunahuna ba kamo nga wala akoy gahom aron pagluwas kaninyo? Hunahunaa kini: Makahimo ako sa pagsulti ngadto sa dagat ug pahubason kini! Mahimo kong mga disyerto ang kasapaan nga maoy hinungdan nga mangamatay ang mga isda ug mangalata. ³ Makahimo ako sa pagpangitngit sa kalangitan, nga daw magbisti kini ug itom tungod sa pagbangotan niini tungod kay adunay namatay." ⁴ Gitudloan ako ni Yahweh nga atong Dios sa pagsulti alang kaniya, aron madasig ko kadtong nangaluya. Gipukaw niya ako sa matag buntag, aron nga paminawon ko kung unsa ang iyang itudlo kanako. ⁵ Gisultihan ako ni Yahweh nga akong Dios, ug wala nako gisalikway kung unsa ang iyang gisulti kanako; gidawat ko kini. ⁶ Gitugotan ko nga bun-ogon ang akong likod sa katawhan ug labnoton ang akong bungot tungod sa ilang pagdumot kanako. Wala ko sila gitalikdan sa dihang gikataw-an nila ako ug giluwaan. ⁷ Apan tungod kay gitabangan man ako ni Yahweh nga Ginoo, dili gayod ako maulawan. Busa matinguhaon ako nga atubangon ang mga kalisdanan, ug nahibalo ako nga dili ako maulawan. ⁸ Haduol kanako ang Dios; ipakita niya sa uban nga husto nga ako siyang gisaligan, busa kung adunay moatubang kanako ug mokiha kanako sa hukmanan, dili siya makahimo sa pagpamatuod nga sad-an ako. ⁹ Si Yahweh nga Ginoo maoy modapig kanako sa hukmanan, busa walay bisan usa ang maghukom kanako. Mangahanaw ang tanan nga magbutangbutang kanako sama sa daan nga mga bisti nga anayon. ¹⁰ Kung tahuron nimo si Yahweh ug buhaton ang gisulti sa iyang alagad, bisan kung magalakaw ka man sa kangitngit, ug daw walay kahayag, saligi si Yahweh nga inyong Dios nga maoy motabang kaninyo; salig kaniya. ¹¹ Apan kamong katawhan nga misupak kanako pinaagi sa pagdagkot sa kaugalingon ninyong kalayo, ug pinaagi sa pagdala sa kaugalingon ninyong mga nagsigang sulo: lakaw ug pagkinabuhi uyon sa kaugalingon ninyong kahibalo, sumala sa inyong gihunahuna nga maayo. Isulti ni Yahweh kung unsa ang mahitabo kaninyo: tugotan niya nga mamatay kamo sa dakong kasakitan!

Chapter 51

¹ Miingon si Yahweh, "Kamong katawhan nga nagtinguha sa pagbuhat ug matarong, nga buot mobuhat kung unsa ang akong gitinguha nga inyong buhaton, paminaw kanako! Hunahunaa si Abraham! Ingon nga siya mao ang dakong bato sa pangpang; ug sa dihang kamong katawhan sa Israel mahimong usa ka nasod, sama kini nga gitipak ko kamo gikan sa mga bato sa batoong pangpang. ² Hunahunaa si Abraham nga inyong katigulangan ug si Sara nga iyang asawa, nga mga kaliwat ninyong tanan. Sa una nakong pakigsulti kang Abraham, wala pa siyay mga anak. Apan human nga ako siyang gipanalanginan, nakabaton siya ug daghang kaliwatan. ³ Moabot ang adlaw nga ako, si Yahweh, modasig pag-usab sa mga kaliwat ni Abraham, ug pagahupayon ko ang tanang katawhan nga nagpuyo sa mga nagun-ob sa Jerusalem. Ang disyerto nianang dapita mahimong sama sa Eden; mahisama kini sa tanaman ni Yahweh. Magkalipay ang tanang katawhan nga atua didto; magpasalamat sila kanako ug mag-awit. ⁴ Akong katawhan sa Juda, paminawa ako pag-ayo, tungod kay sugoon ko kamo sa pagmantala sa akong mga balaod; ang matarong nga mga butang nga akong pagabuhaton mahimong sama sa kahayag alang sa katawhan sa tanang kanasoran. ⁵ Luwason ko kamo sa dili madugay; pinaagi sa akong gahom dumalahan ko ang tanang katawhan sa kalibotan ug panalanginan sila. Maghulat sa akong tabang ang mga tawo nga nagpuyo sa layong mga dapit sa kalibotan. ⁶ Tan-awa ang kalangitan, ug tan-awa ang kalibotan; tan-awa kung sa unsa sila nahisama karon, tungod kay moabot ang adlaw nga mahanaw ang langit sama sa aso, ug magun-ob ang kalibotan sama sa daang bisti nga magisi, ug mangamatay ang katawhan sa kalibotan sama sa mga langaw. Apan luwason ko kamo, ug magpabilin kamong gawasnon hangtod sa kahangtoran, ug mahibaloan sa tanan kung unsa ang akong gibuhat ug buhaton ko kanunay kung unsa ang matarong. ⁷ Kamong katawhan nga nahibalo kung unsang mga butanga ang husto nga buhaton, ug nahibalo sa inyong kinasuloran kung unsa ang nahisulat sa akong mga balaod, paminaw kanako! Ayaw kahadloki ang mga tawo nga nagtamay kaninyo; ayaw kahasol kung butangbutangan kamo sa katawhan, ⁸ kay moabot ang adlaw nga mapukan sila sama sa mga panapton nga uloron. Mahibaloan sa tanan kung unsa ang akong buhaton ug kanunay kong buhaton kung unsa ang matarong; ug luwason ko kamo, ug maluwas kamo hangtod sa kahangtoran." ⁹ Pagmata Yahweh, ug pamuhat nganhi kanamo! Ipakita kanamo kung unsa ka kakusgan! Buhata ang dagkong mga butang sama sa imong gibuhat kaniadto, sa dihang gitigbas nimo si Rahab, ang mapintas nga mananap sa dagat, ug gitagudtagod kini. ¹⁰ Ikaw gayod ang nagpahubas sa dagat, ug naghimo ug agianan sa kinahiladman sa dagat aron makatabok niini ang imong katawhan! ¹¹ Ug kadtong mga giluwas ni Yahweh gikan sa pagkabihag sa Babilonia mobalik sa Jerusalem uban ang panag-awit. Ang walay kataposan nilang kalipay mahisama sa korona sa ilang mga ulo. Dili na sila magsubo o magbangotan; mahingpit na gayod ang ilang kalipay. ¹² Miingon si Yahweh, "Ako mao ang nagdasig kaninyo. Busa nganong mahadlok man kamo sa mga tawo nga mangalaya ug mangahanaw lamang sama sa sagbot? ¹³ Ayaw gayod ninyo ako kalimti, ako si Yahweh, nga maoy nagbuhat sa inyong kanasoran, nga maoy nag-inat sa langit ug nagpahimutang sa mga patukoranan sa kalibotan. Dili kamo angay nga mahadlok niadtong magdumot kaninyo ug buot nga mopatay kaninyo. Dili kamo angay nga mahadlok kanila karon, tungod kay nangahanaw na karon kadtong mapintas nga mga tawo! ¹⁴ Sa dili madugay kamong katawhan, nga giulipon sa inyong mga kaaway sa Babilonia, mahimo nang gawasnon! Dili na kamo magpabilin sa prisohan, ug dili na mamatay sa kagutom, ¹⁵ tungod kay ako man si Yahweh, nga inyong Dios, nga maoy nagkutaw sa dagat ug nagpadahunog sa mga balod; ako mao si Yahweh, ang pangulo sa kasundalohang mga anghel! ¹⁶ Gihatag ko kaninyo ang akong mensahe aron imantala kini, ug gipanalipdan ko kamo sa akong mga kamot. Gibuhat ko kini aron akong mainat ang langit ug mapahimutang ang mga patukoranan sa kalibotan. Ug gibuhat ko kini aron sultihan kamong mga Israelita nga, 'Kamo ang akong katawhan!'" ¹⁷ Pagmata, kamong katawhan sa Jerusalem! Nasinatian ninyo ang tumang pagsilot ni Yahweh kaninyo. Gipaantos kamo pag-ayo ni Yahweh ug gipatagamtaman ug tumang kalisdanan. Gihatagan kamo ni Yahweh niini nga kopa aron kamo makainom, apan mao kini ang kopa ni Yahweh! Gipugos niya kamo sa pag-inom sa matag tulo niining dakong kopa, hangtod matilok ang panaksan. Ug nakapabarag kana kaninyo sama nga nakainom kamo sa isog nga bino. Kining isog nga bino nagpaila sa kasuko sa Dios, ug kinahanglan nga inomon ninyo kining tanan! ¹⁸ Karon wala gayod kamoy mga anak nga moagak ug mogiya kaninyo. Dili kamo makatabang sa inyong kaugalingon. ¹⁹ Nasinatian na ninyo kining mga katalagman; Nahimo nang awaaw ang inyong nasod; nagun-ob na ang inyong mga siyudad; daghan nang mga tawo ang nangamatay sa kagutom; daghan nang mga tawo ang gipatay sa mga espada sa inyong mga kaaway. Karon wala nay bisan usa ang maghilak uban kaninyo ug mounong kaninyo. ²⁰ Nangakuyapan ug nanghigda sa kadalanan ang inyong mga anak; wala silay mahimo sama sa binaw nga nalit-ag sa pukot. Nahitabo kana kanila tungod kay nasuko pag-ayo si Yahweh kanila; gikastigo niya sila pag-ayo. ²¹ Busa karon, kamong katawhan nga nag-antos pag-ayo, kamong nagpahubog-hubog tungod kay miinom kamo sa iyang kopa. Apan sa pagkatinuod, dili tungod sa pag-inom ninyo sa kopa nga puno sa bino, apan tungod sa laing butang nga buhaton ni Yahweh. ²² Si Yahweh, nga inyong Ginoo ug inyong Dios, nga maoy nakiglantugi sa inyong kahimtang aron sa pagdapig kaninyo, miingon siya niini: "Gihatag ko kaninyo ang kopa nga puno sa akong kasuko, ug gipasinati ko kamo sa akong kasuko sa dihang gipainom ko kamo gikan sa maong kopa. Apan karon gikuha ko na kini gikan kaninyo aron dili na kamo makainom niini pag-usab. ²³ Hinuon, paantuson ko kadtong mga naglutos kaninyo; paantuson ko pag-ayo kadtong nagsulti kaninyo nga, 'Higda aron nga makalakaw kami diha kaninyo; panghapa kamo aron mahimo namong agianan ang inyong mga likod."

Chapter 52

¹ Kamong katawhan nga nagpuyo sa balaang siyudad sa Jerusalem, pagmata! Pagmalig-on pag-usab! Ipakita kung unsa katahom ug kamahimayaon ang inyong siyudad; ang mga langyaw nga dili mga tinuli, kadtong wala nagtahod kang Yahweh, dili na gayod makasulod pag-usab sa inyong siyudad aron mosulong kaninyo. ² Katawhan sa Jerusalem, tindog sa imong gilingkoran nga abog, ug tarong sa paglingkod! Kamong katawhan nga nahibalik gikan sa pagkabihag, tanggala ang mga kadena nga gihigot sa mga taga-Babilonia sa inyong mga liog, ³ kay mao kini ang gisulti ni Yahweh: "Sa dihang gipangbihag kamo ngadto sa Babilonia, walay nagbayad aron mahitabo kana. Busa karon dad-on kamo pagbalik, ug walay kuwarta nga ikabayad kang bisan kinsa alang sa inyong kagawasan." ⁴ Miingon usab niini si Yahweh nga atong Ginoo, "Kaniadto, miadto ang akong katawhan sa Ehipto ug nagpuyo didto. Sa wala madugay gidaogdaog sila sa mga sundalo sa Asiria. ⁵ Apan karon hunahunaa ang mga nagakahitabo: Niining higayona gipugos sa mga taga-Babilonia nga maulipon pag-usab ang akong katawhan. Gidala nila palayo ang akong katawhan, apan wala silay igong katarungan sa pagbihag kanila. Ug nagpasigarbo ang mga tigdumala sa Babilonia ug gitamay sila (sama sa akong gisulti nga buhaton nila), ug ang ubang pundok sa katawhan nagpasipala man sa akong ngalan. ⁶ Apan human niana, higugmaon ako sa akong katawhan ug pasidunggan ako; kung mahitabo kana, mahibaloan nila nga ako ang nagsulti nga mahitabo gayod kana. Ako mao ang nagsulti, ug ang nag-ingon, 'Oo, mao kini si Yahweh ang nakigsulti kaninyo.' ⁷ Pagkaanindot nga moabot ang mga mensahero gikan sa tabok sa kabukiran ug magdala sa maayong mga balita, ang balita mahitungod sa Dios nga maghatag kanato ug kalinaw ug magluwas kanato, ang balita nga ang Dios nga nanag-iya kanato nga mga Israelita magpakita karon sa iyang gahom nganhi kanatong tanan ingon nga hari! ⁸ Magasinggit ug mag-awit sa kalipay ang mga magbalantay sa siyudad, tungod kay samtang magbantay sila, makita nilang tanan ang pagbalik ni Yahweh sa Jerusalem. ⁹ Nagun-ob na ang Jerusalem, apan magsugod sa pag-awit sa kalipay ang katawhan nga atua didto, kay dasigon ni Yahweh ang iyang katawhan; hatagan niya ug kagawasan ang iyang katawhan ug dad-on niya sila pagbalik sa Jerusalem. ¹⁰ Ipakita ni Yahweh sa tanang kanasoran nga siya balaan ug gamhanan. Mahibaloan sa katawhan nga atua sa suok nga mga dapit sa kalibotan nga siya mao ang nagluwas sa iyang katawhan. ¹¹ Busa biyai ang mga dapit diin kamo gidala sa dihang gipangbihag kamo, kung diin ang tanang butang dili angayan sa Dios. Kamong mga tawo nga nagdala sa mga butang nga gigamit sa templo ni Yahweh, biya kamo dinha ug balik sa Jerusalem, ug putlia ang inyong mga kaugalingon aron mahimong angayan sa pagsimba sa Dios. ¹² Apan dili ninyo kinahanglan nga magdali sa pagbiya, nga mokalagiw nga magkaguliyang, tungod kay mag-una si Yahweh kaninyo; ug panalipdan usab niya kamo gikan sa pagsulong sa luyo samtang kamo magapanaw. ¹³ Paminaw pag-ayo! Magmanggialamon ang akong alagad ug buhaton niya ang tanan nga ipabuhat ni Yahweh kaniya, ug pasidunggan siya labaw sa tanan. ¹⁴ Apan daghang katawhan ang mahadlok sa dihang makita nila ang mahitabo kaniya. Tungod kay pagabun-ogon siya pag-ayo, mausab ang iyang nawong; maglisod sa pag-ila ang katawhan nga siya usa ka tawo. ¹⁵ Apan putlion niya ang katawhan sa daghang kanasoran pinaagi sa paghugas kanila; manghilom ang mga hari sa dihang motindog sila sa iyang atubangan, tungod kay ilang makita ang tawo nga walay bisan usa kaniadto ang nagsugilon kanila, ug masabtan nila ang mga butang nga wala pa nila sukad nadungog.

Chapter 53

¹ Kinsa ba ang motuo sa atong nadungog mahitungod sa alagad sa Dios? Kinsa ba ang makakita sa pagabuhaton ni Yahweh pinaagi sa iyang dakong gahom? ² Samtang magtan-aw ang Dios, motubo nga huyang ang iyang alagad sama sa linghod nga kahoy, sama sa pagturok sa linghod nga tanom, ang punoan nga motubo sa ugang yuta. Wala siyay katahom o kahalangdon, walay hinungdan nga magtinguha kita sa pagtan-aw kaniya. ³ Tamayon siya sa katawhan ug isalikway siya. Antoson niya ang tumang kasakit, ug mag-antos siya pag-ayo. Tungod kay maguba pag-ayo ang iyang nawong, dili magtinguha ang katawhan sa pagtan-aw kaniya; dili na gani siya sama sa tawo kung tan-awon; biaybiayon siya sa katawhan ug isipon nga dili siya angay nga tagdon. ⁴ Apan silotan siya tungod sa mga balatian sa atong kinabuhi; antoson niya ang hilabihang kasakit alang kanato. Apan isipon nato nga gisilotan siya sa Dios, gisakit sa kaugalingon niyang mga sala. ⁵ Apan pagasamaran siya sa katawhan ug patyon siya tungod sa daotang mga butang nga atong nahimo; samaran nila siya tungod sa atong mga sala. Bun-ogon nila siya aron makabaton kita ug kaayohan; tungod sa pagbunal nila kaniya, mangaayo kita. ⁶ Nahisalaag kitang tanan gikan sa Dios sama sa mga karnero nga nahilayo gikan sa ilang magbalantay. Mibiya kita gikan sa pagbuhat ug mga butang nga gitinguha sa Dios aron mobuhat sa mga butang nga atong gitinguha. Angay kitang pagasilotan, apan silotan siya ni Yahweh alang sa tanan natong kasal-anan. ⁷ Dagmalan siya ug paantoson, apan dili siya mobagutbot. Ihatod nila siya ngadto sa dapit kung diin siya pagahukman, sama sa ilang paghatod sa nating karnero ngadto sa ihawanan. Ug sama sa karnero nga dili motiyabaw sa dihang gupiton sa manggugupit ang mga balhibo niini, dili siya mosulti ug bisan unsa aron panalipdan ang iyang kaugalingon sa dihang patyon siya. ⁸ Human siya dakpon ug itugyan sa hukmanan, kuhaon siya ug pagapatyon. Ug nianang taknaa walay bisan usa ang makahunahuna kaniya. Kay mamatay siya; mahiagoman niya ang tanang pagsilot gumikan sa mga tunglo nga ania kanato tungod sa mga sayop nga mga butang nga atong nahimo. ⁹ Bisan tuod nga wala siyay nahimo nga sayop o nakapanglimbong kang bisan kinsa, ibutang sa mga tawo ang iyang patay nga lawas sa lubnganan sa mga tawong daotan, ug sa tawong dato. ¹⁰ Apan mao kini ang kabubut-on ni Yahweh nga pagasakiton siya ug paantoson. Sa dihang mamatay siya ingon nga halad sa kaugalingon ninyong mga sala, alang kini sa kaayohan sa tanan, sa daghang katawhan, ingon nga mga anak niya sila; mabuhi siya sa hataas nga panahon human siya mamatay ug mabuhi pag-usab, ug matapos niya ang tanan nga giplano ni Yahweh. ¹¹ Sa dihang makita niya nga matapos niya ang tanan tungod sa iyang pag-antos, makabaton siya ug katagbawan. Ug tungod sa mahitabo kaniya, ang matarong nga alagad ni Yahweh, motapos sa kasal-anan sa daghang katawhan, tungod kay pas-anon niya ang ilang mga sala. ¹² Busa ipaambit ni Yahweh sa daghang katawhan ang mga butang nga iyang gidaug gikan sa iyang mga kaaway. Ang iyang alagad mahisama sa hari nga mobahin sa mga butang taliwala sa iyang mga kasundalohan, tungod kay gitugyan niya ang iyang kaugalingon sa kamatayon ug namatay gayod siya. Bisan tuod ug giisip siya sa katawhan nga usa ka makasasala, gipapas niya ang mga sala sa daghang katawhan, ug nag-ampo siya alang niadtong mga nagbuhat ug sayop nga mga butang.

Chapter 54

¹ Miingon si Yahweh, "Sugod sa pag-awit kamong katawhan sa Jerusalem! Kamong sama sa mga babaye nga wala pa gayod makabaton ug mga anak, pag-awit sa makusog ug pagsinggit nga malipayon, tungod kay kamo nga sama sa babayeng walay anak nga gibiyaan sa ilang mga bana, sa dili madugay makabaton kamo ug daghang mga anak kay sa mga babaye nga wala pa gayoy mga anak. ² Padakoa ang inyong mga tolda; palapda kini, ug hugti kini sa mga ugsok. ³ Kinahanglan nga padakoon ninyo ang inyong siyudad tungod kay sa dili madugay kamo ug ang inyong kaliwat mokaylap sa tibuok kayutaan. Pugson nila sa pagpapahawa ang katawhan sa ubang kanasoran diin sila nagpuyo, ug magpuyo kamo pag-usab sa mga siyudad nga biniyaan sa katawhan kaniadto. ⁴ Ayaw kahadlok; dili na kamo maulawan pa. Naulawan kamo kaniadto tungod kay nabuntog kamo sa inyong mga kaaway ug maoy hinungdan nga nahisama sa balo ang inyong nasod, apan sa dili madugay dili na ninyo kini mahinumdoman pa. ⁵ Ako si Yahweh, ang pangulo sa kasundalohang anghel, ang Balaan sa Israel, nga nagmando sa tibuok kalibotan, nga maoy nagbuhat kaninyo, mahimo siyang sama sa usa ka bana diha kaninyo. ⁶ Ang inyong nasod nahisama sa babayeng gibiyaan sa iyang bana, ug nakapaguol pag-ayo kaninyo; mahisama kamo sa batan-ong babaye nga nagminyo sa dihang batan-on pa lamang siya, ug unya gibiyaan siya sa iyang bana. ⁷ Gibiyaan ko kamo sa makadiyot katawhan sa Israel, apan sultihan ko kamo karon, 'Kuhaon ko kamo pagbalik.' ⁸ Nasuko ako pag-ayo kaninyo sa makadiyot, ug gitalikdan ko kamo. Apan magmaluluy-on ako nganha kaninyo ug magmatinud-anon akong mahigugma diha kaninyo hangtod sa kahangtoran. Mao kana ang akong gisulti, si Yahweh, nga inyong manluluwas. ⁹ Sa panahon nga buhi pa si Noa, maligdong akong nagsaad nga dili ko na palunopan pa ang kalibotan. Busa karon maligdong akong mosaad nga dili na ako masuko ug mobadlong kaninyo. ¹⁰ Bisan matay-og ug matumpag man ang mga kabukiran ug kabungtoran, dili ako mohunong sa paghigugma nga matinud-anon diha kaninyo, ug dili ko papason ang akong kasabotan aron mahapsay ang inyong kahimtang. Mao kana ang akong gisulti, si Yahweh, nga nagmaluluy-on kaninyo. ¹¹ Kamong katawhan sa Jerusalem, gidaogdaog kamo sa inyong mga kaaway; daw sama nga gikusokuso sa dakong unos ang inyong siyudad, ug walay mitabang kaninyo. Apan karon, tukoron ko pag-usab ang inyong siyudad gamit ang mahalon nga mga batong torquise, ug hinimo sa mga batong safiro ang mga sukaranan sa siyudad. ¹² Himoon ko nga mga batong rubi ang tore sa pader sa inyong siyudad, ug ang tanang mga ganghaan ug ang gawas nga bahin sa mga kuta sa siyudad hinimo sa ubang mga bililhong mga bato. ¹³ Tudloan ko ang inyong mga anak ug magmaayo ang inyong kahimtang. ¹⁴ Mahimong lig-on ang inyong panggamhanan tungod kay magbuhat kini ug matarong; wala nay modaogdaog kaninyo; dili na kamo mangahadlok, tungod kay wala nay moduol nga makapahadlok kaninyo. ¹⁵ Kung adunay kasundalohan nga mosulong kaninyo, dili kini tungod kay gi-awhag ko sila sa pagbuhat niana, ug pagabuntogon ninyo ang tanan nga mosulong kaninyo. ¹⁶ Hunahunaa kini: Ang mga panday mohuyop sa baga aron moinit pa ang kalayo nga maoy mobuhat sa hinagiban nga gamiton sa pagpakiggubat apan ako mismo ang naghatag sa mga panday! Ug ako usab mao ang nagbuhat sa katawhan nga naglaglag sa ubang katawhan ug sa mga siyudad. ¹⁷ Dili kamo mabuntog sa kasundalohan gamit ang ilang mga hinagiban nga ilang gibuhat aron pagsulong kaninyo, ug sa dihang butangbutangan kamo sa uban, mapamatud-an ninyo nga nasayop sila, ug hukman ninyo sila sa silot. Mao kana ang ganti sa katawhan nga nag-alagad kang Yahweh. Molaban ako kanila ug ipakita sa tanan nga husto gayod nga misalig sila kanako; mao kana ang akong gisaad, ako nga mao si Yahweh."

Chapter 55

¹ "Dali dinhi! Kamong tanan nga gipangbihag, ug paminaw kanako! Kung giuhaw kamo, karon na ang higayon alang kaninyo nga moduol kanako ug mokuha sa inyong tubig! Karon kadtong walay mga kuwarta, makaduol kamo ug makapalit sa bino ug gatas gikan kanako, ang labing maayong bino ug gatas! Makakuha kamo sa tanan ninyong gikinahanglan gikan kanako, ug makapalit kamo niini karon! Mapalit ninyo kini bisan wala kamoy mga salapi, ug bisan pa nga dili kamo makapalit niini! ² Nganong naggasto man kamo ug kuwarta sa pagpalit sa mga butang nga dili makapatagbo sa matuod ninyong panginahanglan? Nganong naghago man kamo nga makakuwarta aron lamang sa pagpalit sa mga butang nga dili gayod makatagbaw kaninyo? Patalinghogi ang akong isulti ug batoni kung unsa ang maayo! Kung moduol kamo kanako, nan magmalipayon gayod ang inyong kasingkasing. ³ Paminaw ug duol kanako; patalinghogi ako, ug kung buhaton ninyo kana, mabatonan ninyo ang bag-ong kinabuhi sa inyong kinasuloran. Buhaton ko ang kasabotan tali kaninyo nga molungtad hangtod sa kahangtoran nga higugmaon kamo nga matinud-anon sama sa akong paghigugma kang Haring David. ⁴ Pinaagi sa iyang gihimo, gipakita ko ang akong gahom ngadto sa mga pundok sa katawhan; gihimo ko siyang pangulo ug komandante sa katawhan sa daghang kanasoran. ⁵ Ug sa samang paagi, ipatawag ninyo ang katawhan sa ubang kanasoran aron moduol kaninyo, mga kanasoran nga wala pa sukad ninyo madungog, ug wala pa usab sila makadungog mahitungod kaninyo; ug manganha dayon sila kaninyo tungod kay nadungog nila nga gipasidunggan ko kamo nga si Yahweh, nga inyong Dios, ang Balaan sa Israel. ⁶ Pangita aron mailhan si Yahweh samtang mahimo pa ninyo kana; tawaga si Yahweh samtang haduol pa siya! ⁷ Ang mga tawong daotan kinahanglan mobiya sa ilang daotang pagkinabuhi, ug ang makasasala kinahanglan moundang na sa paghunahuna sa pagpakasala. Kinahanglan nga mobalik na sila kang Yahweh, ug kung buhaton nila kana, magmaluluy-on siya kanila, kinahanglan mobalik gayod sila kang Yahweh nga ilang Dios, tungod kay mopasaylo gayod siya sa tanang mga daotang butang nga ilang nahimo. ⁸ Gipahayag ni Yahweh nga ang iyang gihunahuna dili sama sa inyong gihunahuna, ug ang iyang gibuhat lahi ra gayod sa inyong binuhatan. ⁹ Sama ra nga kamong katawhan sa kalibotan dili makakab-ot sa langit, kay ang hunahuna ni Yahweh mas labaw pa kay kaninyo. Ang iyang mga pamaagi lahi ra gayod sa inyong ginabuhat. Ug busa, makasiguro gayod kamo nga dili ninyo masabtan kung unsa ang paagi sa hunahuna ni Yahweh o masayran ang hinungdan sa mga gibuhat ni Yahweh. ¹⁰ Nagpadalag ulan ug niyebe si Yahweh gikan sa langit, ug gibasa niini ang yuta. Sa dihang mabasa na kini, makapaturok ug makapatubo kini sa mga tanom, maoy hinungdan nga makahatag ug binhi ngadto sa mga mag-uuma aron mapugas ug makaani sa trigo aron mahimong harina nga maoy himoong tinapay nga makaon sa katawhan. ¹¹ Ug sa samang paagi, ang mga butang nga akong gisaad nga buhaton, tumanon ko gayod sa kanunay; kanunay gayod nga matuman ang akong mga saad. Matuman gayod ang mga butang nga akong gisulti kanila. ¹² Mao kini ang hinungdan nga mobiya kamong malipayon sa Babilonia; magmalinawon kamong mogawas samtang giyahan kamo ni Yahweh. Sama nga ang kabungtoran ug kabukiran malipayong moawit, ug mamalakpak ang mga kahoy sa kaumahan. ¹³ Imbis nga sampinit ug mga tunokong sagbot ang motubo sa inyong kayutaan, ang mga kahoy nga sipres ug mirto ang motubo. Tungod niana, magpasidungog pa gayod ang katawhan kang Yahweh; ug ang gibuhat ni Yahweh maoy magpahinumdom sa tanan kung unsa ang iyang gisaad, ug pasidunggan nila siya."

Chapter 56

¹ Miingon si Yahweh sa tanang katawhan sa Juda, "Buhata ang mga butang nga patas ug husto, tungod kay moanha ako sa dili madugay aron sa pagluwas kaninyo; sa dili madugay akong ipakita sa tanan nga husto ang inyong pagsalig kanako. ² Panalanginan ko kadtong nagmatinud-anon sa pagtuman sa akong mga balaod sa Adlaw nga Igpapahulay. Panalanginan ko kadtong nagbalaan sa akong Adlaw nga Igpapahulay ug kadtong wala nagtrabaho nianang mga adlawa, ug kadtong naglikay na sa pagbuhat ug daotan. ³ Ang mga langyaw nga nagtuo kanako dili angay mosulti, "Dili gayod motugot si Yahweh kanako nga mahisakop sa iyang katawhan." Ug ang mga yunuko dili angay nga mosulti, 'Tungod kay baog man ako ug dili makabaton ug mga anak, dili ako mahisakop kang Yahweh; sama ako sa layang kahoy.' ⁴ Dili sila angay nga mosulti niana, tungod kay ako si Yahweh, nagsulti niini ngadto sa mga yunuko nga nagtuman sa akong mga balaod mahitungod sa Adlaw nga Igpapahulay, ug nagpili sa pagbuhat sa mga butang nga makapahimuot kanako, ug nagtuman sa ubang mga balaod sa kasabotan nga akong gibuhat tali sa mga Israelita: ⁵ Buhatan ko ug handomanan ang akong katawhan diha sa mga pader sa sulod sa akong templo; tungod niana nga handomanan pasidunggan sila labaw pa sa ilang mabatian kung aduna silay mga anak; pasidunggan sila hangtod sa kahangtoran. ⁶ Panalanginan ko usab kadtong dili mga Israelita nga nagpasakop nganhi kanako, nga nag-alagad kanako ug nagsimba ug nahigugma kanako, ang nagtuman sa akong mga balaod sa Adlaw nga Igpapahulay, ug matinud-anong nagtuman sa uban kong mga balaod sa kasabotan nga akong gihimo tali sa mga Israelita. ⁷ Dad-on ko sila sa akong balaan nga bungtod sa Jerusalem, ug lipayon sila sa akong templo kung diin mag-ampo kanako ang akong katawhan, ug dawaton ko ang mga halad nga ilang gisunog sa halaran ug uban pang mga halad nga ilang gihalad, tungod kay ang akong templo mao man ang balay alampoanan sa tanang kanasoran. ⁸ Ako si Yahweh, ang Ginoo nga maoy magdala pagbalik sa katawhan sa Israel nga gipugos sa pagpaadto sa ubang kanasoran, misulti niini: Daghan pa ang katawhan nga akong dad-on gikan sa uban pang kanasoran aron motipon niadtong mga Israelita nga akong gidala pagbalik." ⁹ Kamong kasikbit nga kanasoran nga adunay kasundalohan nga sama sa mga mananap sa kalasangan; dali ug sulonga ang Israel! ¹⁰ Kinahanglan nga ang mga pangulo sa mga Israelita mahisama sa iro nga magbalantay aron manalipod sa katawhan, apan daw mga buta sila. Wala silay nasabtan. Sama sila sa mga iro nga dili makapaghot. Ang maayong magbalantay nga iro mopaghot kung adunay moduol nga dumuduong, apan ang mga pangulo sa mga Israelita wala nagpahimangno sa katawhan nga moabotay na ang ilang kaaway. Gusto lamang hinuon nila nga mohigda, matulog ug magdamgo. ¹¹ Ug susama sila sa mga iro nga hakog; dili gayod sila matagbaw. Sila unta ang mangulo sa katawhan, sama sa maayong magbalantay sa karnero nga nangulo sa ilang panon sa karnero, apan wala silay mga alamag, ug ang usag-usa kanila nagbuhat sa gusto nilang pagabuhaton. ¹² Nag-ingnanay sila, 'Dali, manglakaw kita ug manguha ug diyutay nga bino ug ubang ilimnon nga makahubog, ug maghubog kita! Ug ugma maglipay pa gayod kita sa pag-inom!'''

Chapter 57

¹ Mangamatay ang mga tawong matarong, ug walay bisan usa ang nahangawa mahitungod niini. Mangamatay ang mga tawong Diosnon, ug walay nakasabot sa hinungdan niini. Gikuha sila sa Dios aron dili na sila makasinati sa mga katalagman, ² ug karon nabatonan na nila ang kalinaw. Nagkinabuhi silang matarong, ug karon nagpuyo sila nga malinawon sa ilang mga lubnganan. ³ Miingon si Yahweh, "Apan kamo nga mamamarang, duol dinhi! Kamo nga nagsimba sa mga diosdios, paminaw kanako! ⁴ Nahibalo ba kamo kung kinsa ang inyong gibiaybiay, ug si kinsa ang inyong gitamay? Nahibalo ba kamo kung kinsa ang inyong gidiwaldiwalan sa inyong mga dila? Gitamay ninyo ako nga si Yahweh! Kanunay lamang kamong nakigbatok kanako ug nagpunay ug pamakak, sama sa inyong mga katigulangan. ⁵ Nagtinguha kamo nga magdulog ilalom sa tag-as nga mga lunhaw nga kahoy kung diin kamo nagasimba sa inyong mga dios. Gipatay ninyo ang inyong mga anak ingon nga halad sa inyong mga diosdios diha sa hubas nga suba, ug gihalad sila sa inyong mga diosdios sa batohon nga langub. ⁶ Nagkuha kamo ug dagko nga hamis nga mga bato sa mga hubas nga suba ug gisimba ninyo sila ingon nga inyong mga dios. Nagbubo kamo ug mga bino ingon nga halad kanila, ug nagsunog kamog mga trigo ingon nga halad kanila. Naghunahuna ba kamo nga nalipay ako niadtong mga butanga? ⁷ Nakigdulog kamo uban sa mga babayeng nagabaligya ug dungog sa inyong mga diosdios didto sa matag bungtod ug sa kabukiran, ug nangadto kamo didto aron maghalad sa inyong mga dios. ⁸ Nagbutang kamo ug mga butang sa inyong diosdios luyo sa inyong mga pultahan ug sa mga haligi niini, ug gitalikdan ninyo ako. Gihubo ninyo ang inyong mga bisti ug misaka sa inyong higdaanan, ug gidapit ang inyong mga hinigugma nga makigdulog kaninyo. Gibayran ninyo sila aron makigdulog kaninyo, ug nakita ninyo ang ilang mga pribadong bahin sa lawas. ⁹ Gihatagan ninyo sa mahumot nga lana ug daghang mga pahumot ang mga hari, ug gipadala ninyo ang mga sinugo ngadto sa halayo nga kanasoran aron sa pagpangita sa ubang mga dios aron simbahon; gisulayan pa gani ninyo nga magpadala ug mensahero ngadto sa dapit sa mga patay aron sa pagpangita ug bag-ong mga dios. ¹⁰ Gikapoyan kamo tungod sa pagbuhat niadtong mga butanga, apan wala gayod kamo misulti, 'Kawang lang alang kanato ang pagbuhat niana.' Nakaangkon kamo ug bag-ong kusog pinaagi sa pagsimba sa mga diosdios, busa gipadayon gayod ninyo ang pagbuhat. ¹¹ Tungod ba kay nahadlok kamo sa inyong mga diosdios labaw pa sa kahadlok ninyo kanako nga namakak kamo sa inyong gipangbuhat, ug wala man lamang kamo nakahunahuna mahitungod kanako? Tungod ba kay wala ko na kamo gisilotan sa dugay na nga panahon nga dili na kamo mahadlok kanako? ¹² Naghunahuna kamo nga matarong ang inyong gibuhat, apan sultihan ko kamo sa tinuod: Dili gayod makatabang kaninyo kadtong mga butanga, ¹³ Sa dihang magpakitabang kamo sa inyong daghan nga mga diosdios, dili gayod sila moluwas kaninyo. Paliron lamang sila sa hangin palayo; ang usa ka paghuyop ang mopalid kanila. Apan kadtong nagsalig kanako magpuyo sa yuta sa Israel, ug magsimba sila kanako sa bungtod sa Zion, ang akong balaan nga bungtod." ¹⁴ Moingon si Yahweh, "Andama ang inyong kaugalingon sa pagdawat kanako, sama sa katawhan nga nagbuhat ug nag-andam sa dalan alang sa pag-abot sa hari. Likayi ang mga butang nga maoy hinungdan nga makasala kamo. ¹⁵ Tungod kay mao kini ang akong gisulti—Ako mao si Yahweh, balaan ug ginapasidunggan labaw pa kang bisan kinsa, ug buhi hangtod sa kahangtoran: Nagpuyo ako sa hataas nga kalangitan, diin ang tanan balaan, apan mag-uban usab ako niadtong mapainubsanon ug nagbasol sa sala nga ilang nabuhat. Dasigon ko gayod kadtong naghinulsol. ¹⁶ Dili ko na pagahukman ang akong katawhan hangtod sa kahangtoran; dili na ako magpunay ug kasuko ngadto kanila, kay kung buhaton ko kana, mangaluya ang katawhan; ang tanang katawhan nga akong gibuhat ug gitugotan nga mabuhi mangamatay. ¹⁷ Nasuko ako sa akong katawhan tungod kay nakasala sila pinaagi sa pag-ilog sa mga butang sa uban. Tungod kay nasuko man ako, gisilotan ug gitalikdan ko sila, apan nagpadayon sila sa pagpakasala. ¹⁸ Nakita ko ang daotang mga butang nga padayon nilang ginabuhat, apan pabalikon ko sila ug giyahan. Dasigon ko sila. Alang niadtong nagbangotan, ¹⁹ paawiton ko sila sa mga awit aron sa pagdayeg kanako. Pabalikon ko ang tanan kong katawhan, kadtong nagpuyo duol sa Jerusalem ug kadtong nagpuyo sa halayo, ug buhaton ko nga maayo ang ilang kahimtang. ²⁰ Ang mga tawong daotan walay kalinaw sa ilang kasingkasing, sama sila sa dagat nga kanunay nagabalod ug lapok, ²¹ ug Ako mao si Yahweh, ang miingon nga dili gayod mahimong maayo ang kahimtang sa makasasala."

Chapter 58

¹ Miingon si Yahweh kanako, "Singgit sa makusog! Singgit sama sa kakusog sa trumpeta! Singgit aron pahimangnoan ang mga Isrealita mahitungod sa ilang mga sala! ² Nagsimba sila kanako sa adlaw-adlaw; nangadto sila sa akong templo tungod kay misulti sila nga nagtinguha sila nga mahibaloan kung unsa ang akong ipabuhat kanila. Nagbuhat sila ingon nga usa ka nasod nga matarong, nga dili gayod mosalikway sa akong mga sugo, nga ilang Dios. Naghangyo sila nga hukman ko ang mga butang nga makataronganon, ug nagtinguha sila nga moanha ako kanila. ³ Miingon sila, "Nagpuasa kami aron sa pagpahimuot kanimo, apan wala mo namatikdan nga gibuhat namo kana. Nagpaubos kami sa among mga kaugalingon, apan wala ka nanumbaling!' Sultihan ko kamo nganong wala ako nanumbaling. Tungod kay sa dihang magpuasa kamo, gibuhat lamang ninyo kini aron sa pagpahimuot sa inyong mga kaugalingon, ug mapintason kamo sa inyong mga sinuholan. ⁴ Nagpuasa kamo, apan nakig-away sa usag-usa. Sa pagbuhat niana nga mga butang samtang nagpuasa kamo dili ko gayod dunggon ang inyong mga pag-ampo bisan asa pa ako sa taas sa langit. ⁵ Nangyukbo kamo sama sa mga kogon nga nagdungo sa paghuros sa hangin, ug nagsul-ob sa mga gaspang nga sinina ug nagbutang ug abo sa inyong mga ulo sama sa gibuhat sa katawhan nga nagmasulob-on. Mao kana ang inyong gibuhat sa dihang nagpuasa kamo, apan naghunahuna ba gayod kamo nga makapahimuot kana kanako? ⁶ Dili, dili kana mao ang paagi sa puasa nga akong gitinguha. Hinunoa hatagi ninyo ug kagawasan kadtong nangabilanggo nga walay sala, ug dasiga kadtong gidaogdaog; ug ipalingkawas kadtong gidaugdaog sa bisan unsang paagi. ⁷ Pakan-a kadtong gipanggutom ug papuy-a sa inyong balay kadtong walay mga balay. Bistihi kadtong walay mga sapot, ug ayaw ninyo likayi ang inyong kadugo nga nanginahanglan sa inyong mga tabang. ⁸ Kung buhaton ninyo kanang mga butanga, kung unsa ang inyong gibuhat sa uban mahisama sa kahayag nga modan-ag sa kaadlawon. Ang mga kagubot nga hinungdan sa inyong mga sala mahanaw dayon. Mahibaloan sa uban ang inyong pagkamatarong, ug ang mahimayaong presensiya ni Yahweh maoy manalipod kaninyo sama sa akong pagpanalipod sa mga Israelita sa dihang nagbiya sila sa Ehipto. ⁹ Unya motawag kamo kanako, ug dihadiha dayon motubag ako ug magaingon, "Ania ako aron motabang kaninyo.' Hunonga na ang pagdaogdaog sa katawhan; hunonga na ang pagbutangbutang sa katawhan; ug hunonga na ang pagsulti ug daotan sa katawhan. ¹⁰ Pakan-a kadtong gipanggutom, ug hatagi ang katawhan nga gihikawan sa mga butang nga ilang gikinahanglan. Sa pagbuhat ninyo niana mahisama kamo sa kahayag nga modan-ag sa kangitngit; imbis nga magbuhat ug daotan ngadto sa katawhan, ang maayong mga butang nga inyong gibuhat sa katawhan mahisama sa kahayag sa kaudtohon. ¹¹ Magpadayon si Yahweh sa paggiya kaninyo ug ihatag niya kaninyo ang mga butang nga makapatagbaw kaninyo. Palig-onon niya kamo ug pabaskogon. Mahisama kamo sa tanaman nga pinatubigan, sama sa tuboran nga dili gayod mahubas. ¹² Tukoron pag-usab sa inyong katawhan ang mga siyudad nga naguba kaniadto; tukuron nila ang mga balay ibabaw sa karaang mga patukoranan. Mosulti ang katawhan nga kamo ang tigtapak sa mga nabangag nga mga pader sa siyudad, ug ang tig-ayo sa kadalanan kung asa nagpuyo ang katawhan. ¹³ Ayaw kamo pagpanaw sa Adlaw nga Igpapahulay, ug sa Adlaw nga Igpapahulay ayaw lamang ninyo buhata ang mga butang nga makapalipay lamang kaninyo. Paglipay kamo sa Adlaw nga Igpapahulay, ug hunahunaa kini nga malipayon. Ang Adlaw nga Igpapahulay mao ang akong mga balaang adlaw. Pasidunggi ako, si Yahweh, sa tanang butang nga inyong buhaton sa Adlaw nga Igpapahulay. Ayaw paghisgot ug ayaw pagbuhat sa mga butang nga makapahimuot lamang sa inyong mga kaugalingon. Kung buhaton ninyo ang tanang mga butang nga akong gisulti karon; paminaw, ug isulti ko ang akong buhaton alang kaninyo. ¹⁴ Himoon ko nga magmalipayon kamo. Pasidunggan ko kamo; sama nga nagsakay kamo uban kanako ibabaw sa hataas nga mga kabukiran! Ihatag ko kaninyo ang panalangin nga akong gihatag sa inyong katigulangan nga si Jacob. Kadtong mga butanga mahitabo gayod tungod kay ako si Yahweh, ang nagsulti niini."

Chapter 59

¹ Paminawa kini! Dili gamay ang gahom ni Yahweh aron sa pagluwas kaninyo. Dili siya magpakabungol; paminawon gihapon niya kamo kung mangayo kamo ug tabang kaniya. ² Apan gipahimulaag ninyo ang inyong kaugalingon gikan sa inyong Dios pinaagi sa mga sala nga inyong nahimo. Tungod sa inyong mga sala, mitalikod siya diha kaninyo, nga maoy hinungdan nga wala niya tagda ang inyong hangyo ngadto kaniya nga iyang buhaton. ³ Nagbuhat kamo ug kasamok sa inyong isig ka tawo, nga maoy hinungdan nga nalamaan ang inyong mga kamot sa ilang dugo. Kanunay kamong nagapamakak, ug nagsulti ug daotan batok sa inyong isigka tawo. ⁴ Sa dihang namasangil kamo sa inyong isigka tawo sa hukmanan, gisulti ninyo ang dili patas ug dili tinuod. Gipasanginlan ninyo ang katawhan; Nagsalig kamo sa mga bakak nga inyong gisulti. Kanunay kamong nagplano sa pagsamok alang sa inyong isigka tawo, ug gibuhat ang daotang mga butang nga inyong giplano. ⁵ Ang inyong plano sa pagdaot sa katawhan sama sa usa ka malalang bitin nga nangitlog, ug sama sa lawalawa sa damang nga nagsapot sa biktima niini. Lumloman sa malalang bitin kadtong mga itloga, ug mabitik ang mga insikto sa lawalawa sa damang. ⁶ Dili ninyo matago ang daotang mga butang nga inyong nahimo. Kanunay na kamong magbuhat ug kasamok. ⁷ Abtik kaayo kamo sa pag-adto ug sa pagbuhat sa daotang mga butang, ug nagdali kamo sa pagpatay sa katawhan nga dili sad-an. Nagpadayon kamo sa paghunahuna bahin sa pagpakasala. Bisan asa pa kamo moadto, giguba ninyo ang mga butang ug gipaantos ang katawhan. ⁸ Wala kamo mahibalo kung unsaon pagkinabuhi nga malinawon o mahimong patas sa inyong isigka tawo. Kanunay kamong malimbongon, ug kadtong misunod sa inyong mga binuhatan dili gayod makabaton ug kalinaw sa ilang mga kaugalingon. ⁹ Ug tungod niana, dili kita luwason sa Dios gikan sa atong mga kaaway, sama nga dili siya patas nganhi kanato. Naglaom kita nga hatagan kita sa Dios ug kahayag, apan gihatag niya nganhi kanato mao ang kangitngit. ¹⁰ Sama kita sa buta nga nagapangapkap subay sa paril aron makalakaw bisan asa. Nadagma kita sa udtong tutok sama sa nagakahitabo inig kagabhion. Sama kita sa patayng katawhan nga nakig-uban taliwala sa himsog nga katawhan. ¹¹ Nag-agulo kita sama sa mga uso nga gigutom; kanunay kita nga nagabagulbol sama sa mga salampati. Naghangyo kami sa Dios sa pagbuhat kung unsa ang matarong, apan walay nahitabo. Buot namong luwason kami sa Dios, apan sama lamang nga anaa siya sa halayo. ¹² Apan nahitabo kining mga butanga tungod kay daghan na kaayo ang atong mga sala sa atubangan sa Dios, ug mao kini sila ang nagpamatuod batok kanato. Dili nato kini malilong; nasayod kita nga nakahimo kita ug daghang sayop nga mga butang. ¹³ Nasayod kita nga misupak kita batok kang Yahweh; mitalikod kita gikan kaniya. Gidaogdaog nato ang katawhan pinaagi sa atong pagsaksi batok kanila; wala nato sila tugoti nga makuha kung unsa ang angay nilang makuha. Naghunahuna kita mahitungod sa mga bakak nga atong masulti, ug unya isulti nato ngadto kanila. ¹⁴ Sa atong hukmanan, wala naghukom nga patas ang mga maghuhukom; walay usa nga nagbuhat sa matarong. Sa hukmanan diin nagtigom ang katawhan, walay tawo nga nagsulti sa kamatuoran; daw ang katawhan wala gitugotan sa pagsulti kung unsa ang tinuod. ¹⁵ Walay bisan usa nga misulti sa kamatuoran, ug gisulay sa katawhan ang pagguba sa kadungganan niadtong mihunong sa pagbuhat ug daotan. Nagtan-aw si Yahweh sa palibot, ug nakita niya nga wala gayoy bisan usa nga nagbuhat kung unsa ang matarong; ug wala gayod siya nahimuot niini. ¹⁶ Nalagot siya sa dihang nakita niya nga walay bisan usa nga misulay sa pagtabang niadtong mga gidaogdaog. Busa gigamit niya ang iyang kaugalingong gahom aron pagluwas kanila; gibuhat niya kadto tungod kay kanunay man siyang matarong. ¹⁷ Ingon nga sundalo nga nagsul-ob sa iyang hinagiban ug helmet; sama sa iyang kahimanan ang iyang pagpadayon sa pagbuhat kung unsa ang husto, ug sama sa helmet ang iyang katakos sa pagluwas sa katawhan. Sama sa iyang kupo ang naghingapin niyang kasuko ug ang iyang pagpanimalos niadtong mga nagbuhat sa daotan. ¹⁸ Baslan niya ang iyang mga kaaway alang sa tanang daotang mga butang nga ilang nahimo. Silotan gayod niya bisan pa kadtong nagpuyo halayo sa Jerusalem. ¹⁹ Sa dihang mahitabo kana,motahod ug mohimaya ang tanang katawhan kang Yahweh, gikan sa sidlakan hangtod sa kasadpan, tungod kay moabot siya sama sa nagadahunog nga sapa nga gihuypan sa kusog nga hangin nga gipadala ni Yahweh. ²⁰ Ug miingon si Yahweh nga moabot siya sa Jerusalem aron luwason ang iyang katawhan; moabot siya aron pagluwas niadtong anaa sa Juda nga mihunong na sa pagbuhat sa daotang mga butang. ²¹ Mao kini ang gisulti ni Yahweh ngadto sa iyang katawhan: "Mao kini ang kasabotan nga akong himoon tali kaninyo: Dili mobiya ang Akong Espiritu diha kaninyo, ug mabatonan ninyo kanunay ang akong mensahe. Makahimo kamo sa pagpahayag niini, ug makahimo usab sa pagpahayag niini ang inyong kabataan ug ang inyong apo hangtod sa kahangtoran."

Chapter 60

¹ Tindog! kamong katawhan sa Jerusalem, naghimo si Yahweh ug mahimayaong mga butang alang kaninyo, ug gipakita niya ang iyang gahom alang kaninyo; aron ipakita sa uban nga siya bantogan! ² Apan mitabon ang espirituhanong kangitngit ngadto sa tibuok pundok sa katawhan sa kalibotan, ang tumang kangitngit, apan ipakita ni Yahweh diha kaninyo kung unsa siya kagamhanan, ug makita usab kini sa ubang katawhan. ³ Makita sa katawhan sa tanang pundok sa katawhan nga siya hilabihan kagamhanan pinaagi sa pagtan-aw kung unsa ang iyang nahimo alang kaninyo, ug moabot ang mga hari aron sa pagtan-aw sa kahibulongang mga butang nga nahitabo diha kaninyo. ⁴ Miingon si Yahweh, "Tan-awa ang palibot, ug makita ninyo ang katawhan nga mobalik gikan sa pagkabihag! moabot ang inyong mga anak nga lalaki gikan sa layong mga nasod; ug dad-on pabalik sa lain ang inyong mga batang anak nga babaye. ⁵ Sa dihang makita ninyo kini nga mahitabo, magmalipayon gayod ang inyong mga kasingkasing, tungod kay magdala ang katawhan ug bililhong mga butang diha kaninyo gikan sa tibuok kalibotan. Dad-on nila ang bililhong mga butang pinaagi sa sakyanan nga pangdagat. ⁶ Magdala usab ug bilihong mga butang ang katawhan diha kaninyo sakay sa mga panon sa mga kamelyo: ang mga kamelyo nga gikan sa Midian ug Efa sa dapit sa amihanang bahin sa Arabia. Moabot ug magdala sila ug bulawan ug insenso nga gikan sa Sheba sa habagatang bahin sa Arabia; moabot sila aron sa pagsimba kanako, ako si Yahweh. ⁷ Magdala sila ug mga panon sa karnero ug mga kanding nga gikan sa Kedar sa amihanang bahin sa Arabia ug ihatag kini kaninyo. Magdala usab sila ug mga laking karnero nga gikan sa Nebaioth aron sa paghalad sa akong mga halaran, ug malipayon akong modawat niining tanan. Nianang taknaa, himoon kong maanindot ang akong templo. ⁸ Ug unsa man kadtong mga butanga nga paspas nga milihok sama sa mga panganod? Sama sa mga salampati nga mipauli sa ilang mga salag. ⁹ Apan mga sakayan pangdagat diay kini nga gikan sa Tarshis nga nagdala sa inyong mga katawhan pabalik dinhi. Sa dihang moabot ang inyong katawhan, dad-on nila ang tanang bilihong mga butang nga ilang naangkon, ug buhaton nila kana aron sa paghimaya kanako, ako si Yahweh, nga inyong Dios, ang Balaang Dios sa Israel, tungod kay gipasidunggan ko gayod kamo. ¹⁰ Moabot ang mga langyaw ug tukoron pag-usab ang mga paril sa inyong mga siyudad, ug moalagad ang ilang mga hari diha kaninyo. Bisan pa ug gisilotan ko kamo tungod sa akong kasuko kaninyo, mahitabo kining mga butanga karon tungod kay kaluy-an ko kamo tungod kay maluluy-on man ako. ¹¹ Maabli ang mga ganghaan sa inyong mga siyudad panahon sa adlaw ug panahon sa kagabhion, aron nga makahimo ang katawhan sa pagdala diha sa inyong siyudad sa bililhong mga butang gikan sa daghang mga nasod, uban sa ilang mga hari nga nanguna kaninyo diha sa mga parada. ¹² Mapukan gayod sa hingpit ang mga gingharian ug ang kanasoran nga kansang katawhan midumili sa pagtugot diha kaninyo sa pagdumala kanila. ¹³ Dad-on diha kaninyo ang mahimayaong mga butang sa Lebanon— ang tabla nga gikan sa mga kahoy nga sipres ug mga kahoy nga enebro ug pino— aron gamiton nga mahimong maanindot ang akong templo. Kung mahuman na kana, mahimayaon gayod ang akong templo! ¹⁴ Moadto ug moyukbo diha kaninyo ang mga kaliwat niadtong nagdaogdaog kaninyo; ug mohapa sa inyong mga tiilan kadtong nagsalikway kaninyo. Moingon sila nga ang inyong siyudad sa Bukid sa Zion mao ang Siyudad ni Yahweh, diin nagpuyo ang Balaang Dios sa Israel. ¹⁵ Kaniadto gikasilagan ug gibaliwala kamo sa tanan, apan karon ang inyong siyudad mahimong inyong himaya hangtod sa kahangtoran; ug himuon ko kamo nga magmalipayon hangtod sa kahangtoran. ¹⁶ Malipayong modala ang katawhan sa tanang kanasoran ug ang mga hari sa ilang mga kabtangan diha kaninyo. Sa dihang mahitabo kana, mahibaloan ninyo nga tinuod gayod ako, si Yahweh, ang miluwas kaninyo gikan sa inyong mga kaaway, ug nahisakop kamong katawhan sa Israel kanako ang Dios nga gamhanan. ¹⁷ Imbis mga puthaw nga dili bililhon, sama sa bronse ug puthaw, dad-an ko kamo ug plata ug bulawan. Dad-an ko kamo ug bronse ug puthaw alang sa inyong mga gambalay imbis nga mga kahoy ug mga bato. Magmalinawon ang inyong nasod, ug buhaton sa inyong mga tigdumala kung unsa ang angay. ¹⁸ Dili na mobuhat ug kasamok ang katawhan sa inyong nasod, ug dili na gun-obon sa katawhan ang inyong dapit ug dili na mopapahawa kaninyo gikan niini. Mahimong luwas ang katawhan sa siyudad, ug ang tanan didto mosimba kanako. ¹⁹ Ug dili na ninyo kinahanglan ang adlaw ug bulan aron paghatag kaninyo ug kahayag, tungod kay ako, si Yahweh, mohatag kaninyo ug dakong kahayag labaw pa sa adlaw ug sa bulan; ako ang mahimo ninyong mahimayaong kahayag hangtod sa kahangtoran. ²⁰ Sama sa adlaw ug bulan nga kanunay nga nagsidlak, tungod kay ako, si Yahweh, maoy inyong kahayag sa walay kataposan. Dili na kamo magsubo tungod sa mga butang nga nahitabo diha kaninyo. ²¹ Mahimong matarong ang tanan ninyong katawhan, ug malukop nila ang yuta hangtod sa kahangtoran, tungod kay ako mibutang kaninyo didto sama sa katawhan nga nagtanom ug mga kahoy aron sa pagpakita sa uban nga ako bantogan. ²² Nianang panahona, ang gamayng pundok sa inyong katawhan mahimong usa ka dakong kaliwatan, ug ang gamay nga kaliwat mahimong bantogang kanasoran. Mahitabo kadtong mga butanga tungod kay ako, si Yahweh, himoon ko gayod kadtong mga butanga sa insaktong panahon."

Chapter 61

¹ Ania kanako ang Espiritu ni Yahweh nga atong Ginoo; gipili niya ako aron sa pagdala sa maayong mga balita niadtong mga gipangdaogdaog, sa pagdasig niadtong mga naluya, ug paghatag ug kagawasan niadtong nagapos sa daotang mga butang nga padayon nilang ginahimo. ² Gipadala niya ako aron sa pagsulti niadtong nagmasulob-on nga karon ang panahon nga ipakita ni Yahweh ang iyang kaayo ngadto sa iyang katawhan; karon ang panahon nga manimalos ang atong Dios sa ilang mga kaaway. ³ Kadtong tanan nga anaa sa Jerusalem nga nagsubo, hatagan niya ug nindot nga mga butang nga ilang masul-ob sa ilang mga ulo imbis nga mga abo nga nagpakita nga sila nagmagul-anon; himoon niya silang magmalipayon imbis nga magmasulob-on; lipayon niya sila imbis nga magmaluyahon. Pagatawagon silang 'ang katawhan nga nagpadayon sa paghimo kung unsa ang husto, ang katawhan nga sama sa habog nga mga kahoy nga tugas nga gitanom ni Yahweh' aron pagpakita sa uban nga siya bantogan. ⁴ Tukoron pag-usab niadtong mga namalik gikan sa Babilonia ang mga siyudad nga gilumpag sa mga sundalo gikan sa Babilonia. Bisan pa ug naguba kadtong mga siyudara ug gipasagdan sa daghang mga katuigan, ayohon kini pag-usab. ⁵ Atimanon sa mga langyaw ang panon sa inyong mga karnero ug mga kanding, ug darohon ang inyong mga kaumahan ug atimanon ang inyong mga kaparasan. ⁶ Apan kamo mahisama sa mga pari nga moalagad kang Yahweh, sa pagbuhat alang sa Dios. Magmaya kamo sa bililhong mga butang nga gidala gikan sa laing kanasoran, ug magmalipayon kamo niadtong mga butang nga inyong naangkon. ⁷ Kaniadto naulawan ug gitamay kamo, apan karon makabaton na kamo sa dakong panalangin; kaniadto gipakaubos kamo sa inyong mga kaaway, apan karon aduna na kamoy daghang maayong mga butang; magmalipayon kamo tungod kay nahibalik kamo sa inyong yuta, ug magmaya na kamo hangtod sa kahangtoran. ⁸ Ako si Yahweh, nahimuot pag-ayo niadtong naghukom nga walay pinalabi; gikasilagan ko kadtong mikuha sa mga butang gikan sa ubang katawhan. Panimaslan ko gayod ang akong katawhan sa tanan nilang mga pag-antos kaniadto. Ug maghimo ako ug walay kataposan nga kasabotan tali kanila. ⁹ Pasidunggan sa katawhan sa ubang kanasoran ang ilang kaliwatan; pasidunggan sa tanang kanasoran ang ilang mga anak. Ang tanan nga makakita kanila masayod nga sila ang nasod nga akong gipanalanginan, ako si Yahweh, ang nagpanalangin." ¹⁰ Magmaya ako pag-ayo tungod sa nahimo ni Yahweh! Magmalipayon ako sa tibuok kong kasingkasing, tungod kay giluwas niya ako ug gipahayag nga ako matarong; sama sa kupo kadtong mga panalangin nga gipasul-ob niya kanako. Malipayon ako sama sa pamanhonon nga nagsul-ob sa iyang bisting pangkasal, o sama sa pangasaw-onon nga nagsul-ob sa iyang mga alahas. ¹¹ Sama sa liso nga gitanom sa usa ka tanaman nga mitubo gikan sa yuta ug midako, si Yahweh nga atong Dios maghimo sa katawhan sa tanang kanasoran nga magkinabuhi nga matarong, ug dayegon nila siya alang sa iyang mga nahimo.

Chapter 62

¹ Tungod kay nahangawa ako pag-ayo mahitungod sa katawhan sa Jerusalem, aduna akoy buhaton aron sa pagtabang kanila. Dili ako mohunong sa pag-ampo alang kanila hangtod nga maluwas sila gikan sa mga nagdaogdaog kanila, hangtod nga mapadayag ngadto sa tanan sama sa banagbanag sa sayong kabuntagon, hangtod nga makita kini sa katawhan sama sa pagkakita nila sa nagdan-ag nga kahayag sa usa ka suga sa kagabhion. ² Sa umaabot masayran sa katawhan sa daghang kanasoran nga si Yahweh moluwas kaninyo, nga iyang katawhan. Makita sa ilang mga hari ang inyong siyudad nga usa ka bantogan. Ug hatagan ni Yahweh ug bag-ong ngalan ang inyong siyudad. ³ Sama nga gipataas kamo ni Yahweh aron nga makita kamo sa tanan. Ilalom sa iyang katungod mahisama kamo sa korona nga gigamit sa usa ka hari. ⁴ Dili na tawagon pag-usab ang inyong siyudad nga 'ang sinalikway nga siyudad,' ug dili na tawagon pag-usab ang inyong nasod nga 'awaaw nga yuta'; Pagatawagon kining 'ang yuta nga gikahimut-an ni Yahweh,' ug pagatawagon usab kining 'naminyo kang Yahweh.' Tawagon kini tungod kay nahimuot si Yahweh uban kaninyo, ug sama nga kamo iyang pangasaw-onon. ⁵ Magpuyo kamong katawhan sa tibuok nasod sa Juda sama sa usa ka batan-ong lalaki nga magpuyo uban sa iyang napangasawa. Ug magmalipayon ang atong Dios nga kamo nahisakop kaniya. sama sa malipayong pamanhonon nga iyang napanag-iya ang iyang pangasaw-onon. ⁶ Kamong katawhan sa Jerusalem, gibutangan ko ug tigbantay ang inyong mga paril; padayon silang mag-ampo ngadto kang Yahweh adlaw ug gabii. Kamong tigbantay, kinahanglan nga dili kamo mohunong sa pag-ampo ug pagpahinumdom kang Yahweh mahitungod sa iyang gisaad nga buhaton. ⁷ Ug sultihi si Yahweh nga dili mopahulay hangtod nga himoon ang Jerusalem nga usa ka bantogang siyudad ug ilhon sa tibuok kalibotan. ⁸ Gibayaw ni Yahweh ang iyang tuong kamot aron nga maligdong mosaad sa katawhan sa Jerusalem: "Gamiton ko ang akong gahom ug dili na tugotan nga pildihon kamo sa inyong mga kaaway; dili na usab moanhi ang mga sundalo sa ubang kanasoran aron sa pagkuha sa inyong mga trigo ug ang bino nga inyong gihagoan pag-ayo. ⁹ Kamo mismo ang magtanom sa mga trigo, ug kamo mismo ang mosimba kanako, ako si Yahweh, samtang inyong kaonon ang tinapay nga gihimo gikan sa trigo. Sa sulod sa hawanan sa akong templo, kamo mismo ang moinom sa maong bino nga inyong gihimo gikan sa mga ubas nga inyong napupo." ¹⁰ Gawas sa mga ganghaan sa siyudad! Pag-andam ug lapad nga agianan aron sa pagbalik sa katawhan nga gikan sa ubang mga nasod! Himoang hapsay ang dalan; kuhaa ang tanang mga bato; pagbutang ug bandera aron pagtabang sa pundok sa katawhan aron makit-an ang dalan paingon sa Jerusalem. ¹¹ Mao kini ang mga mensahe nga gipadala ni Yahweh ngadto sa katawhan sa matag kanasoran. Sultihi ang katawhan sa Israel, "Moabot na ang moluwas kaninyo! Tan-awa! Dad-on niya ang inyong ganti; ug mag-una uban kaniya ang tanan niyang gipangluwas." ¹² Pagatawagon sila nga: "Ang kaugalingong katawhan ni Yahweh, ug ang iyang mga linuwas." Ug maila ang Jerusalem ingon nga: "Ang siyudad nga gihigugma ni Yahweh," ug "Ang siyudad nga dili na pagabiyaan."

Chapter 63

¹ Nangutana ako, "Kinsa ba kining miabot gikan sa siyudad sa Bozra sa Edom, nga nalamaan ug dugo ang mga bisti niini? Kinsa ba kining nagbisti ug maanindot nga kupo?" Mitubag siya, "Ako kini, si Yahweh, mipadayag nga akong gipildi ang inyong mga kaaway, ug makahimo ako sa pagluwas kaninyo!" ² Nangutana ako kaniya, "Unsa ba kadtong mga pula nga mantsa sa imong bisti? Nagpakita lamang nga daw nagtunobtunob ka sa mga ubas aron himoong bino." ³ Ug mitubag siya, "Gitunobtunoban ko ang akong mga kaaway ug dili ang mga ubas. Gibuhat ko kini nga nag-inusara; ug walay mitabang kanako. Gisilotan ko sila tungod sa akong hilabihang kasuko batok kanila, ug ang akong bisti nalamaan sa ilang mga dugo. ⁴ Gibuhat ko kana tungod kay panahon ko na kini aron sa pagpanimalos kanila; panahon na kini aron sa pagluwas sa akong katawhan gikan niadtong nagdaogdaog batok kanila. ⁵ Nangita ako ug tawo aron nga motabang sa akong katawhan, apan natingala ako tungod kay wala gayoy bisan usa nga mitabang kanako. Busa gipildi ko ang ilang mga kaaway pinaagi sa akong kaugalingong gahom; Makahimo ako sa pagbuhat niana tungod kay hilabihan ang akong kasuko. ⁶ Gisilotan ko ang katawhan; tungod sa akong hilabihang kasuko, gipabaragbarag ko sila sama sa tawong hubog, ug gibubo ko ang ilang dugo ngadto sa yuta." ⁷ Isulti ko ang tanang mga butang nga nahimo ni Yahweh alang sa iyang katawhan tungod sa iyang matinud-anong gugma alang kanila, ug simbahon ko siya alang sa tanan niyang gihimo. Nakahimo ug maayong mga butang si Yahweh alang kanatong katawhan sa Israel; gipakita niya ang iyang kaluoy ngari kanato ug makanunayon ug matinud-anon niya kitang gihigugma. ⁸ Miingon si Yahweh, "Mao kini ang akong katawhan; dili nila ako linlangon"; busa giluwas niya kami. ⁹ Sa dihang aduna kitay daghang mga kalisdanan, nagsubo usab siya. Gipadala niya ang iyang anghel aron sa pagluwas kanato. Tungod kay nahigugma ug nalooy siya kanato, giluwas kita niya; sama sa pagkuha niya sa atong kaliwatan ug gilukat niadtong mga tuiga sa dihang gidaogdaog sila didto sa Ehipto. ¹⁰ Apan misupak kita batok kaniya, ug gipasubo nato ang iyang Balaang Espiritu. Busa nahisama siya sa usa ka kaaway nga nakig-away batok kanato. ¹¹ Unya naghunahuna kita bahin sa nahitabo kaniadto, sa panahon nga gidumalaan ni Moises ang atong mga katigulangan pagawas sa Ehipto. Ug misinggit kita, "Diin naman kadtong nagpagawas sa atong mga katigulangan sa Dagat sa mga Bugang nga gipangulohan ni Moises? Diin naman kadtong nagpadala sa iyang Balaang Espiritu aron makig-uban sa atong mga katigulangan? ¹² Asa naman kadtong mipakita sa iyang mahimayaong gahom ug mitunga sa tubig sa dihang gipataas ni Moises ang iyang kamot, nga hinungdan nga himayaon siya hangtod sa kahangtoran? ¹³ Diin naman kadtong nangulo sa atong mga katigulangan sa dihang milakaw sila sa dagat? Nahisama sila sa mga kabayo nga naglumba ug wala nahisukamod. ¹⁴ Nahisama sila sa baka nga milugsong ngadto sa walog aron sa pagpahulay, ug gitugotan sila sa Espiritu ni Yahweh nga moadto sa usa ka dapit aron makapahulay. O Yahweh, gipangulohan mo ang imong katawhan, ug gihimo mo nga madayeg ang imong kaugalingon." ¹⁵ O Yahweh, tan-awa kami gikan sa langit, ug tan-awa kami gikan sa imong balaan ug mahimayaong puluy-anan. Gitagad mo kami kaniadto, gipakita mo ang imong gahom ug gitabangan mo kami. Apan daw sa wala mo na gipakita ang imong kaluoy ug wala ka na nagpakabana kanamo. ¹⁶ Amahan ka namo, bisan pa ug wala makahibalo si Abraham kung unsa ang nahitabo kanamo, ug bisan si Jacob walay pagtagad kanamo, apan Yahweh, ikaw ang among amahan; ug giluwas mo kami kaniadto. ¹⁷ O Yahweh, nganong gipasaag mo man kami gikan sa imong dalan? Nganong gipagahi mo man ang among mga kasingkasing, hinungdan nga wala kami nagtahod kanimo? Tabangi kami sama sa imong gihimo kaniadto, tungod kay katawhan kami nga moalagad kanimo ug imong gipanag-iya. ¹⁸ Kami, ang imong balaang katawhan, nanag-iya sa imong balaang templo sulod lamang sa hamubong panahon, ug karon giguba na kini sa among mga kaaway. ¹⁹ Karon sama nga wala mo na kami dumalahi, ingon nga wala na kami nahisakop kanimo."

Chapter 64

¹ "O Yahweh, manghinaot ko nga mokanaog ka gikan sa langit; gipatay-og mo ang mga kabukiran uban sa kahadlok. ² Sama kini sa kalayo nga makasunog sa laya nga mga sanga, o sama sa kalayo nga makapabukal ug tubig. Kanaog aron nga ang imong mga kaaway makaila kung kinsa ka, ug aron mangurog ang katawhan sa ubang kanasoran sa imong presensya. ³ Naghimo ka ug katingalahang mga butang nga wala namo damha nga imong buhaton; natay-og ang kabukiran sa dihang mikanaog ka sa bukid sa Sinai. ⁴ Sukad pa kaniadto walay nakakita o nakadungog mahitungod sa Dios nga sama kanimo; gitabangan mo ang tanan nga misalig kanimo. ⁵ Gitabangan mo kadtong malipayon nga nagbuhat ug matarong, ug kadtong nagkinabuhi sumala sa imong kabubut-on. Apan wala namo kana himoa; nagpadayon kami sa pagpakasala, ug busa nasuko ka kanamo. Nagpakasala kami sa dugay nga panahon. Kung nagpadayon lamang unta kami sa paghimo sa buot mong ipahimo kanamo nga imo kaming luwason. ⁶ Nahimo kaming katawhan nga dili angayan nga mosimba kanimo; ang tanang nahimo namo nga maayong butang sama lamang sa mga trapo nga adunay dugo. Tungod sa among mga sala, sama kami sa nangalaya nga mga dahon ug gipalid lamang sa hangin. ⁷ Wala sa among katawhan ang misimba kanimo, ug walay bisan usa nga misulay sa pagdani kanimo aron tabangan siya. Mitalikod ka kanamo. Sama nga gibiyaan mo kami, mao nga nagpadayon kami sa pagpakasala ug nahimong daotan pag-ayo. ⁸ Apan bisan pa niana, O Yahweh ikaw ang among amahan. Sama kami sa lapok nga gigamit sa magkukolon, ug gihulma mo kami, sama sa magkukolon nga naghimo ug kulon. ⁹ O Yahweh, ayaw na kasuko kanamo; ayaw na hinumdomi ang among mga sala hangtod sa kahangtoran. Ayaw kalimti nga kami imong katawhan. ¹⁰ Nahimong sama sa kamingawan ang tanang lungsod sa Juda; nagun-ob bisan pa ang Jerusalem. ¹¹ Nasunog sa hingpit ang imong mahimayaong templo sa bukid sa Zion, sa diin gisimba ka sa among katigulangan. Ug nagun-ob ang tanang matahom nga mga butang. ¹² O Yahweh, nakita mo ang tanan niadtong mga butanga, apan ingon nga daw nagdumili ka sa paghimo ug bisan unsang butang aron sa pagtabang kanamo. Ingon nga paantoson mo kami sa hilabihan."

Chapter 65

¹ Mao kini ang giingon ni Yahweh, "Andam ako sa pagtubag sa mga pag-ampo sa akong katawhan, apan walay misangpit kanako nga tabangan sila. Andam ako sa pagtabang bisan pa niadtong wala mitawag kanako. Mipadayon ako sa pagsulti, 'Ania ako sa pagtabang kanimo!' ² Sama nga padayon ko nga gituy-od ang akong mga kamot sa pagpakita nga andam ako sa pagtabang sa akong katawhan nga misupak batok kanako, ug nagpadayon sa paghimo ug daotang mga butang nga buot nila nga himoon. ³ Madasigon sila nga nagpadayon sa paghimo sa mga butang nga maoy nakapasuko kanako: naghalad sila ug mga halad sa ilang mga diosdios sa ilang mga tanaman, ug nagsunog sila ug insenso ngadto kanila diha sa halaran nga hinimo pinaagi sa mga tisa. ⁴ Nagtukaw sila sa kagabhion didto sa mga lubnganan, nakigsulti sa mga ispiritu sa nangamatay nga katawhan. Nagkaon sila sa karne sa mga baboy, ug ang ilang lutoanan napuno sa sabaw sa karne nga dili ko dawaton. ⁵ Unya miingon sila sa uban, 'Palayo kamo kanako; ayaw kamo ug duol kanako, tungod kay balaan ako, ug aron nga dili mo ako mahikap.' Ang tawo nga sama niana makapasuko kanako. ⁶ Nagsulat ako ug talaan sa tanang daotang butang nga ilang nahimo. Ug dili ako magpabilin nga magpakahilom mahitungod niadtong mga butanga; Silotan ko gayod kining katawhan ⁷ alang sa mga sala nga ilang nahimo ug sa ilang mga katigulangan. Gibugalbugalan nila ako pinaagi sa pagsunog ug insenso sa ilang mga diosdios didto sa hataas nga kabukiran. Busa silotan ko sila sumala sa angay kanila alang sa paghimo niadtong mga butanga." ⁸ Mao usab kini ang giingon ni Yahweh: "Kung adunay pungpong sa maayong ubas sa punoan, dili kini ilabay sa katawhan tungod kay nahibalo sila nga adunay maayong bino niadtong mga ubas. Sa samang paagi, tungod kay adunay pipila ka katawhan sa Judah nga matinumanon nga nag-alagad kanako, dili ako magpalayo kanila. ⁹ Magbilin ako ug pipila sa kaliwat ni Jacob nga nagpuyo didto sa mga kabukiran sa Juda. Gipili ko sila, ug mapanag-iyahan nila ang yuta; mosimba sila kanako, ug magpuyo sila didto. ¹⁰ Unya mahimo nang sibsibanan ang tanang yuta sa kapatagan sa Sharon duol sa dagat sa Mediterraneo ug sa sidlakan nga bahin sa Walog sa Akor haduol sa Jericho, diin mopahulay ang ilang mga baka ug karnero. ¹¹ Apan lahi alang kaninyo nga mibiya kanako, kamong wala nagsimba kanako didto sa Zion, ang balaan kong bukid, kamo nga nagsimba kang Gad ug Meni, ang mga diosdios nga inyong giingon nga nagdala sa swerte ug maayong kapalaran. ¹² Ako ang maghukom ug dili si Meni, sa mahitabo kaninyo; pamatyon kamong tanan pinaagi sa espada. Mahitabo kana tungod kay wala kamo mitubag sa dihang nagtawag ako kaninyo. Nag-ingon ako kaninyo, apan wala kamo naminaw. Hinuon, naghimo kamo sa mga butang nga akong giingon nga daotan; gipili ninyo ang paghimo sa mga butang nga wala nakapahimuot kanako. ¹³ Ako si Yahweh ang Ginoo, ang maghatag ug pagkaon ug ilimnon niadtong nagsimba ug nagtuman kanako, ug magmalipayon sila; apan pagagutomon ug pagauhawon kamong daotang katawhan, ug masubo kamo ug pakaulawan. ¹⁴ Mag-awit nga malipayon kadtong nagsimba ug nagtuman kanako, apan mohilak sa kusog kaayo kamong daotang katawhan tungod kay mag-antos kamo sa inyong kasingkasing. ¹⁵ Mogamit sa inyong ngalan kadtong akong mga pinili sa dihang tunglohon nila ang katawhan; Ako si Yahweh ang Ginoo, mopahilayo kaninyo. Apan hatagan ko ug bag-ong ngalan kadtong nagsimba ug nagtuman kanako. ¹⁶ Daghang mga kalisod ang mga katawhan niining yutaa, apan dili ko na itugot nga mahitabo pa kadtong mga kalisod. Busa kadtong naghangyo kanako nga panalanginan sila ug kadtong maligdong nga misaad sa paghimo ug usa ka butang dili na gayod makalimot nga ako Dios, nga matinumanon nga mohimo sa akong gisaad nga himoon. ¹⁷ Timan-i kini: Sa umaabot maghimo ako ug bag-ong langit ug bag-ong yuta. Mahimo gayod kining katingalahan, aron nga dili na ninyo hinumdoman ang inyong kasakit kaniadto. ¹⁸ Paglipay ug pagmaya kanunay tungod sa akong himoon. Ang Jerusalem mao ang dapit diin nga magmaya ang katawhan; malipayon kanunay ang katawhan nga magpuyo didto. ¹⁹ Magmaya ako mahitungod sa Jerusalem, ug maglipay ako uban ang akong katawhan. Dili na maghilak o magtu-aw tungod sa ilang kasakit. ²⁰ Walay mamatay nga bata nga masuso pa; magpuyo ang tanang katawhan hangtod matigulang na kaayo sila. Maghunahuna ang katawhan nga si bisan kinsa nga nagpangidaron ug 100 ka tuig isipon pa nga bata-on; ug si bisan kinsa nga mamatay nga bata-on pa niana isipon nga tinunglo. ²¹ Magtukod ug mga balay ang akong katawhan ug magpuyo didto. Magtanom sila ug mga paras ug unya mokaon sa mga paras gikan sa ilang mga kaparasan. ²² Ang gitukod nila nga mga balay, wala nay bisan usa nga mokuha niini gikan kanila ug magpuyo niini. Wala nay mokuha sa mga ubasan gikan sa tag-iya niini. Magpuyo sa dugay nga panahon ang akong pinili nga katawhan, sama sa kahoy, ug maglipay sila sa mga butang nga ilang nahimo—ang mga balay nga ilang gitukod ug ang mga tanom nga ilang gitanom. ²³ Dili na sila maghago pag-ayo nga mahimong kawang, ug dili na mangamatay sa mga katalagman ang ilang mga kabataan. Panalanginan ko ang ilang mga anak ug ang ilang mga apo. ²⁴ Sa dili pa sila motawag kanako aron tabangan sila, motubag na ako; Tubagon ko ang ilang mga pag-ampo samtang nagaampo pa sila alang sa akong himoon kanila. ²⁵ Wala nay madaot o magpasakit sa bisan asa diha sa Zion, ang akong balaan nga bukid: malinawon nga magsalo sa pagkaon ug sagbot ang mga lobo ug mga karnero; mokaon ug dagami ang mga liyon sama sa baka, ug dili na sila modagmal ug tawo. Dili na mamaak ang mga bitin; magkamang sila sa yuta ug mokaon ug abog. Sama niini ang tanan tungod kay ako si Yahweh, ang miingon niini."

Chapter 66

¹ Miingon usab si Yahweh niini: "Ang kalangitan sama sa akong gingharian, ug ang tibuok kalibotan sama sa akong tumbanan. Busa dili ka gayod makatukod ug balay nga alang kanako nga kapuy-an ug kapahulayan! ² Gihimo ko ang tanan; mitungha ang tanang mga butang tungod kay ako naghimo kanila. Tinuod kana tungod kay ako si Yahweh, ang miingon niini. Ang tawo nga akong gikahimut-an pag ayo mao ang mapaubsanon, maantuson nga nagpadayon sa dihang nagkalisud, ug kadtong mangurog sa dihang ila akong madungog nga mobadlong kanila. ³ Gipili ninyo ang pagpadayon sa paghimo sa mga butang nga buot ninyong himoon: pipila kaninyo ang mipatay ug baka aron ihalad kini kanako, apan nagdala usab kamo ug tawhanong mga halad sa inyong mga diosdios! Naghalad kamo ug mga karnero kanako, apan nag-ihaw usab kamo ug mga iro aron ihalad kini sa inyong mga dios. Naghalad kamo ug trigo kanako, apan nagdala usab kamo ug dugo sa baboy sa inyong mga diosdios. Nagsunog kamo ug insenso kanako, apan gidayeg usab ninyo ang inyong diosdios. Nalipay kamo sa paghimo niadtong mga mahugaw nga mga butang. ⁴ Sa dihang mitawag ako kanimo, wala kamo mitubag. Sa dihang misulti ako, wala kamo naminaw. Naghimo kamo sa daghang mga butang nga akong giingon nga daotan, ug gipili ninyo ang paghimo sa mga butang nga wala ko magustohi. Busa silotan ko kamo karon pinaagi sa pagpasinati sa mga butang nga inyong gihimo sa inyong kaugalingon, nga inyong gikahadlokan." ⁵ Apan kamong katawhan nga nangurog sa dihang inyong nadungog ang gisulti ni Yahweh, paminaw sa iyang isulti karon: "Nasilag kaninyo ang pipila sa inyong katawhan ug papahawaon kamo tungod kay nahisakop kamo kanako. Biaybiayon kamo nila, ug miingon sila, "Magpakita si Yahweh sa iyang mahimayaong gahom! Buot namong makita nga maghimo siya ug mga butang nga maoy makahatag ug kalipay kaninyo.' Apan sa umaabot kadtong mga tawhana mahimong maulawan pag-ayo." ⁶ Nianang higayona maminaw kamo sa kasaba sa siyudad. Madungog ninyo ang panagsinggit diha sa templo. Mao kini ang tingog ni Yahweh nga nanimalos sa iyang mga kaaway. ⁷ Wala nay makadungog nga ang usa ka babaye manganak dayon sa dihang mao pa lamang ang pagsugod sa iyang pagbati. ⁸ Dayag nga walay nadungog nga nahitabo niining butanga, ug wala gayoy nakakita nga nahitabo kini. Sa samang paagi, walay nakadungog nga ang nasod nahimo diha-diha dayon, sulod sa usa ka adlaw. Apan ang Jerusalem sama sa babayeng talianak nga nagsugod sa pagbati. ⁹ Ang mga babaye wala gayod nagdala ug mga masuso sa panahon nga andam na sila nga matawo ug unya dili sila tugotan nga matawo. Sa samang paagi, himoon ni Yahweh alang sa Jerusalem ang iyang gisaad nga himoon: pun-on niya pag-usab ug katawhan ang Jerusalem. Mahitabo kana kay miingon si Yahweh niini. ¹⁰ Pagmaya kamong katawhan sa Jerusalem! Ug Maglipay usab kamong katawhan nga nahigugma sa Jerusalem. Paglipay usab kamo katawhan nga nagsubo karon tungod sa nahitabo sa Jerusalem. ¹¹ Maanaa kaninyong mga katawhan sa Jerusalem ang tanan ninyong gikinahanglan, sama sa masuso nga iyang makuha ang tanan niyang gikinahanglan sa dughan sa iyang inahan. Malipay kamo sa tanang kadagaya ug mahimayaon nga mga butang diha sa siyudad. ¹² Misaad si Yahweh, "Pun-on ko ang Jerusalem sa mahinungdanong mga butang nga gikan sa laing mga nasod; ibubo kadtong mga butanga sa Jerusalem; sama kini sa dakong baha. Tipigan ko ang katawhan sa Jerusalem sama sa babaye nga nag-atiman sa iyang anak nga iyang gipasuso. ¹³ Hupayon ko kamong katawhan sa Jerusalem sama sa mga inahan nga naghupay sa ilang mga anak." ¹⁴ Sa dihang makita ninyo kadtong mga butanga nga mahitabo, magmaya kamo. Malig-on pag-usab ang inyong daang mga bukog sama sa tingpamulak, sa dihang motubo ang mga sagbot. Sa dihang mahitabo kana, masayod ang tanan nga adunay gahom si Yahweh sa pagtabang niadtong misimba ug mituman kaniya, apan nasuko siya sa iyang mga kaaway. ¹⁵ Mokanaog si Yahweh uban sa nagdilaab nga kalayo, ug mokanaog ang iyang mga karwahe sama sa alimpulos; masuko siya sa hilabihan, ug silotan niya ang iyang mga kaaway pinaagi sa pagsunog kanila. ¹⁶ Sama nga si Yahweh adunay dakong espada, ug iyang hukman ug patyon ang daghang katawhan. ¹⁷ Miingon si Yahweh, "Mag-andam ang pipila kaninyo sa ilang kaugalingon aron mosulod sa tanaman sa mga diosdios pinaagi sa paghinlo ug sa pinasahi nga pagkaon ug mga bisti, ug mosunod kamo niadtong dapita, kadtong mikaon sa karne sa mga baboy ug ilaga, ug ang laing mga butang nga akong gidili nga inyong kaonon. Misaad ako kaninyo, pahunungon ko sila ug dili na kini nila himoon!" ¹⁸ Nasayod ako sa daotang mga butang nga ilang gihunahuna ug gibuhat. Karon ang takna aron tigomon ko ang katawhan nga nagpuyo sa tanang nasod ug nagsulti sa tanan nga pinulongan, ug aron mapakita kanila nga ako bantogan. ¹⁹ Maghimo ako ug mga butang taliwala kanila aron mapakita sa tanan kung kinsa sila, ug kadtong akong giluwas sa nagkalainlaing mga nasod: ngadto sa Tarshis, sa Pul, sa Lud (kansang katawhan nabantog nga mga mamana) sa Moshech sa Tubal, sa Javan, ug ngadto sa halayo nga mga isla. Ipadala ko sila aron sa pagmantala sa kanasoran nga wala pa masayod mahitungod sa akong pagkabantogan ug pagkamahimayaon. ²⁰ Unya dad-on nila pagbalik dinhi ang inyong kabanay nga nabihag, sama sa mga halad nga naandan nga ihatag sa akong katawhan sa Israel sa hustong pamatasan sa templo. Moadto sila sa Jerusalem, diin nahimutang ang akong balaan nga bukid; moabot sila nga sakay sa mga kabayo, ug mga karwahe, mga karomata, mga mula ug mga kamelyo. ²¹ Maligdong kong gisaad nga magpili ako ug pipila kanila nga mahimong mga pari, ug ang uban maghimo sa buluhaton diha sa akong templo. Mahitabo gayod kana tungod kay ako si Yahweh ang miingon niini. ²² Misaad usab ako nga sama sa bag-ong langit ug bag-ong yuta nga molungtad hangtod sa kahangtoran, kanunay kamong adunay mga kaliwat, ug kanunay kamong pasidunggan. ²³ Moadto ang tanan aron mosimba kanako sa bisan unsang kasaulogan aron sa pagsaulog sa Adlaw nga Igpapahulay matag simana ug matag bag-ong bulan. Mahitabo gayod kana kay ako si Yahweh ang misulti niini. ²⁴ Unya mogawas sila sa Jerusalem ug makita nila ang mga patay nga lawas niadtong misupak batok kanako. Ang mga ulod niadtong mga patayng lawas dili gayod mamatay, dili mapalong ang kalayo nga misunog kanila, ug lud-on si bisan kinsa nga makakita sa ilang patayng lawas." front