Echigabi

Chapter 1

¹ Kufunulirwa, kwa ba Israeli omwazi gwa Nahano na Malaki. ² Nambasima mwabo, Nahano aderha. Nenyu mwa derha : Abarhusimire omu bichi ? Esau arhaliri mwene wabo Yakobo ? Nahano aderhere. Che charhumaga nasima Yakobo, ³ na gaya Esau, na jira entondo zage buzira kuyera, n'akashambala kage na kaha banyambwe bw'omu mpinga. ⁴ Na nkaba Edomu aderhere : Rhwashandwirwe, rhwashubi yumbak'ahashandwirwe ! Intyo kuna Nahano w'enfola miherho aderhere : Bayumbake, nani nashandula, nji banabahamagala chihugo chabanya bukali, lubaga Nahano abagayir'esiku zoshi. ⁵ Amesho genyu nji gabona, nji mwana derha : Mukulu ye Nahano w'enyanya w'embibi ze Israeli! ⁶ Omwana akeng'eshe, n'omukozi akenge nahamwabo, ngah'eobuba baherh'enyanya zani ? Nahano w'enfola miherho ababwirrire, badahwa, mw'omu bonerera ezino lyani, munaderha : Omu bichi rhwabonerere mw'ezino lyawe ? ⁷ Munarhul'oku lurhamba lwani ebilyo bibi, mwana derha : Omu bichi rhwakubihizyemo ? Omukuderha : Ameza ga Nahano gali ga kubonererwa ! ⁸ Amango mwarhulag'entulo y'enyama y'empurha, kurhali kubi ? Amango mwarhulag'envune changw'echirema, kurhali kubi ? Muyirhulire omurhegesi wenyu ! Aka kuyankirira bwinja, akushegera bwinja ? Nahano w'enfola miherho kwa derhere. ⁹ Mujage mwahuna Nyamuzinda, mpu yaja arhuberh'obonjo ! Ebyo biyinjire enyanya wenyu : Njaj'abayankirira bwinja ? Nahano w'enfola miherho kwa derhere. ¹⁰ Nde mu mwabo nji mwa chingir'enyunvi, yimurha chanaga bwinja omuliro oku lurhamba lwani ? Ntaka nasimiswa n'enyu chiro, ku Nahano w'enfola miherho aderhere, n'entulo z'efune zenyu zirhakwirir'emunda ndi. ¹¹ Bulala kurheng'okushoshoka kw'ezuba kugera lilyame, ezino lyani liri likulu omu bukoo boshi, n'omu hantu hoshi banayosez'obuku omu kusimis'ezino lyani n'okuleh'entulo zinja; bulal'ezino lyani liri likulu omu bukoo bunene, Nahano w'enfola miherho aderhere. ¹² Aliko mwabo, mwabo munayibonerera, omu kuderha: Ameza ga Nahano gazingire, bula gaherh'ebilyo bibonererwe. ¹³ Munaderha : murhamo guchi ! N'oku habonerera, Nahano w'enfola miherho aderhere; Na ntyo munalerha ebya yibwaga, ebivunikire changw'ebirema, n'ezo z;entulo munajira ! Na kaziyemer'omu fune zenyu ? ku Nahano aderhere. ¹⁴ Akagwe ola orhebekana ogwerhe omu buso bwage empanzi, n'oku jira echiragane, mpu arhulire Nahano echirhungano chibi ! Bulala nyono mba mwami mukulu, Nahano w'enfola miherho aderhere, n'ezino lyani liba liyubahirwe omu bukoo boshi.

Chapter 2

¹ Lero, mw'omu habirw'elyo rhegeko, mwe badahwa ! ² Akaba murhayunvirhe, akaba murhabirholere oku murhima okuhan'obukuzwe oku zino lyani, kwa derhere Nahano w'enfola miherho, njina rhuma obuhanya mu mwabo, n'oku koma emigisho yenyu; nechi, njina yikoma, bulala murhabiherhe omu murhima. ³ Lolaga , njina bihya emburho zenyu, n'oku bakabula amazi omu malanga genyu, amazi g'emifu y'entulo zenyu, n'oku baheka haguma nayo. ⁴ Nji mwamenya oku muna rhumiraga lila rhegeko, mpu y'echihango chani haguma na Lawi chigendekera, ku Nahano ww'enfola miherho aderhere. ⁵ Echihugo chani haguma naye chali chihango ch'akalamo n'omurhula, china muhaga mpu ya nyubahe; aba n'obuba bwani, adirhimana emalangambere g'ezino lyani. ⁶ Erhegeko ly'okuli lya liri omu bunu bwage, na nta bubi bwa bonekere oku bunu bwage, alambagiraga haguma nani omu murhula n'omu kuli, n'okuleka amabi g'abantu banene. ⁷ Bulala obunu bw'omudahwa bu kwanene okulanga enyigirizo, n'oku bunu bwage kubahuna erhegeko, bulala eri ntumwa ya Nahano w'enfola miherho. ⁸ Aliko mwabo, mw'omwa chikulaga omu njira, mwajirir'erhegeko nka y'enjira y'oku heza banene, mwabihiz'echihango cha Lawi, ku Nahano w'enfola miherho aderhere. ⁹ Nani, njina bajira bakubonererwa n'oku bonekana oku mesho g'abantu boshi, bulala murhalangag'enjira zani, n'oku bonekana nk'abantu amango gw'oku shubulul'erhegeko. ¹⁰ Rhurha jira darha muguma rhweshi ? Arhali Nyamuzinda muguma ye wa rhulemaga ? Chakarhuma rhwaba banya bahya omuntu n'owabo; omu kubihya echihango cha badarha ? ¹¹ Yuda achiyerekana mubi, n'obubi bwajirika e Israeli n'omu Yerusalemu; bulala Yuda abihyaga okuli kwa Nahano, echi Nahano alisimire, chiheba haguman'omunyere w'omuhisi wa lyangombe w'omuhisi. ¹² Nahano nja lahir'oyo muntu ojira ebyo, olala ojira amesho gw'oku yiriza n'okushuza, n'oku balahira omu mahema ga Yakobo, nja lahira n'olala nji wa yinja n'entulo emwa Nahano w'enfola miherho. ¹³ Mulole kandi ebi mujira : Muna shukira olurhamba lwa Nahano n'emiziga, n'okulaka haguma n'oburhindibuke, na nta kuchilola entulo, na ntacho akachirhola ch'omu fune zenyu. ¹⁴ Nenyu mwana derha : Buno gurhe ?...Bulala Nahano aliri muhamiriza ahagarhi kawe n'omukazi w'omu busole bwawe, olal'orhali muchesibwa emwage, nechi chiro akaba ali wawe na mukawe w'endagano yawe. ¹⁵ Ntacho chijir'ebyo, buzir'omurhima gwinja; muguma abijirire, enyanya wabichi ? Bulala alemag'ashonda eburha Nyamuzinda amulaganyaga. Ochilange bwinja enyanya wa Muka wawe, na ntaye nj'obage mugomi wa mukage w'obusole bwage ! ¹⁶ Bulala nta sima okulekana, aderhere Nahano, Nyamuzinda we Israeli, m'olala oshukira obubi emyambalo yage, aderhere Nahano w'enfola miherho. Mulange bwinja emirhima yenyu na nta kuba bagomi ! ¹⁷ Mwarhamisa Nahano n'emyazi yenyu, n'oku derha : Rhwamurhamisize na bichi ? Omu kuderha : Ngasi yeshi ojira amabi ali mwinja omu mesho ga Nahano, n'oyo ya sima bwinja ! Changwa : Ngahe Nyamuzinda w'okuli aba ?

Chapter 3

¹ Lolaga, njina rhuma entumwa yani; njaa kubul'enjira embere zani. Na buzira kulegama njaja omu ka - Nyamuzinda Nahano mulonza; n'entumwa y'endagano musimire, lolaga , ayinjire, aderhere Nahano w'enfola miherho. ² Nde nji walinga olusiku lw'oku yinja kwage ? Nde nji wayorha ayimangire amango gw'oku bonekana kwage ? Bulala njaba nka muliro gwa mulenga byuma, nka sabuni y'okufula. ³ Nja yikala, n'oku kola n'oku kwiza effranga, nja kwiza mwene Lawi, nja bakwiza kulala bakwiza e horo n'efranga, n'oku zilerhera Nahano nka ntulo haguma n'okuli. ⁴ Intyo entulo ya Yuda n'e Yerusalemu nji yaba nyinja emwa Nahano, kuguma n'esiku zamira, kuguma n'emyaka ya gandi mango. ⁵ Nji na bashegerera enyanya w'olubanja, njina na jira dubaduba omu kuhamiriza enyanya w'abafumu n'abahushi, enyanya wa balala bajira endahiro y'olulimi, enyanya wa bala baberana oluhembo lw'abahisi, abarhindibuz'omukana n'efubi, aba jirira abahisi amabi na nta kunyubaha, aderhere Nahano w'enfola miherho. ⁶ Bulala ndi Nahano, nta na hindamuka; na nenyu, bana ba Yakobo, murhanalisirire. ⁷ Kurhenga mira omu mango ga bayisho, mwa chiheba hale n'amarhegeo gani, murhamalangaga. Mungalukire, nani na bagalukira, aderhere Nahano w'enfola miherho. Nenyu mwa derha : Rhukugalukire omu bichi ? ⁸ Omuntu akarhebeka Nyamuzinda ? Bulala yi mwa ntebeka. Nenyu mwa derha : Rhwakurhebekere omu bichi ? Omu chiguma ch'ekumi n'entulo. ⁹ Mwashurhirwe n'obuhanya, yi mwana ntebeka, obukoo boshi ! ¹⁰ Mulerhe eby'ekumi byenyu omunju y'oku bikir'obugale, mpu yi haba ebiryo omunju yani; muntangule ntyo, aderhere Nahano w'enfola miherho. Mwalola nkaba ntaba chingulira amadirisha g'empingu, n'oku bashesherakw'emigisho oku bunene. ¹¹ Enyanya wenyu njina libisya omu lyanyi, na nta kuchibabihizya amalehe g'egulu, n'omu zabibu gurha kachiba ngumba omu bishagala byenyu, aderhere Nahano w'enfola miherho. ¹² Obuko boshi nji bwababwira mugishwe, bulaa nji mwaba chihugo chisimisize, aderhere Nahano w'enfola miherho . ¹³ Emyazi yenyu ekomere emunda ndi, aderhere Nahano. Nenyu mwaderha : Bichi rwaderhe enyanya zawe ? ¹⁴ Mwaderhaga : Buli busha oku kolera Nyamuzinda; Bichi rhwabwene omu kulang'amarhegeko gage, n'oku emwge haguma n'oburhe enyanya za Nahano w'enfola muherho ? ¹⁵ Na ntyo rhwanaderha mpu abanyaburhe babanya migisho; nechi, abakali babagendekera; nechi, banarhangula Nyamuzinda, n'oku libirha ! ¹⁶ Aliko balala bayubaha Nahano bana bwirana muguma oku muguma; Nahano ana yunviriza, n'oku yunva; N'echitabu chiguma ch'okuyibuka chayaandikwa emalangambere gage enyanya wabala bayubaha Nahano n'oku kenga ezino lyage. ¹⁷ Nji baba bani, aderhere Nahano w'enfola miherho, nji baba bani, olusiku yinarheganya; nji baba bugale bwabo, nka kulala omuntu aba bugale bw'omugale omukolera. ¹⁸ Nji mwabona olubero luhyahya luba ahagarhi k'abashinganya n'ababi, ahagarhi kw'olala okolera Nyamuzinda n'olala orhamukolera.

Chapter 4

¹ Bulala olole, olusiku lwayinja, likolerere nka chirimbiko. Abanya buchibone boshi na banya bukali nji baba nka bukere; olusiku lwa yinja kubasireza, aderhere Nahano w'enfola miherho, na nta kubaleker'omuzi changw'omurhabi. Aliko oku mwabo mw'omuyubaha ezino lyani, ezuba ly'okuli nji lya zuka, n'oku fumya ebyubi; nji mwarhenga, n'oku balala nka nyena omu ndalo. ³ N'oku libisya ababi, bulala nji baba nka luvu eshishi w'ebishando by'amagula genyu, olusiku ndi na rheganya, aderhere Nahano w'enfola miherho. ⁴ Muyibukire amarhegeko ga Musa, mukozi wani, olala na bwiraga oku Horebu, enyanya wa Israeli yeshi, amarhegeko na mahano. ⁵ Lolaga, nji na barhumira Eliya, omulebi, embere ousiku lwa Nahano lugere, olo lusiku lukulu na lokuyubahwa. ⁶ Naye nja hindamula emirhima ya badarha oku bana, n'emirhima y'abana oku b'eshe, yinji njayinja kushurh'egulu oku buhanya. front