Tite

Chapter 1

¹ Paulusi, omwika wa Nyambe no mwa positora wa Jesu Chresite, ketumelo Nyambe na keta abantu no kuba zyibisa obu niti obu buyenderela ne Nyambe. ² Ezi nje sepo yabo kubuharo ka bumani bwa Nyambe, ozyu ka homi, na sepisa amasika oshe. ³ Kenako iswanela, na bonisa amazywi akwe keñusa kwa ba sepete no kurukuruha. Nindasumwinwa bulyaho kwa Nyambe ozyu atuhaza. ⁴ Kwa Tite, omwana we cikwame mumukwa wetu we tumero. Cishemo ne nkozo kuzwa kwa Nyambe Shwetu ne kwa Jesu Chreste muhazi wetu. ⁵ Kebaka lili ne nda misiya mwa Crete, kutee mu bike nenja ezintu kutee ozimane no ku bika aba kulu boshe amanja mu munzi bulyaho na nda kusunda. ⁶ Omukulu yeshe ashabi ne nyaso, mukwame we mukentu yenke, ne bana aba basepahala kali aba ba nyaziwa no kubure kute. ⁷ Kuhoreseka okuyendesa nenja enjuwo yakwe kutee kwashabi nekunyazahala. A swanezi oba muntuzyu kakakumusi kapa we kacimacima. Kaswaneli okuba muntu zyo aki bengela bulyo, kapa ecidakwa co bucwala kapa ozyu afuma kokuhomenena kapa omunyimi. ⁸ A swanezi kuba omuntu ataha, omushere we zirotu. A swanezi ku zyibahala, no kucena, no ku hala cina Nyambe no kuba nobwiswaro. ⁹ A swanezi kukwatisa e zywi eli lisepahala, kutee asusumeze aba mwinya ke ntuto ndotu no kutengurula aba abamunyansa. ¹⁰ Kwina abantu bangi aba ba tuzokele, sihuli aba ne baya kumupato. A mazywi abo azya entuso. Ba lya nganisa abantu no ku bazwisa munjila. ¹¹ Kuswanezi kuba zyimika. Ba kwesi baruta ezikazi swaneli kurutiwa ezi zi fwishe neshoni nezaazya ne ntuso no kukauhanya amasika. ¹² Zyumwinya, omukwame wa kwabo ozyu kali muporofita, akuamba, "Macreta be kaswau, buhata ne zi batana zibbi ezizitiiza, nezi bele zikata." ¹³ I ntaba nja niti, muba nyase caha kutae babe ne ntumero no ku haziwa. ¹⁴ Mwasha ba teezi Majuda kapa okushuwe emilaho yabo bantu ba ba zora obu niti. ¹⁵ Kwaba aba bena nenja, ezintu zoshe zina nenja. Kono kwaba ka ba shuwi no kuzumina kwazya eci cina nenja. Engana zabo ne mihupulro yabo izokete. ¹⁶ Ba porofita kwa Nyambe kono neba mu bengisa kezi tentantu zabo. Mbayanga hape bazya nekute. Bazyibehere no ku bura ezitentantu zirotu.

Chapter 2

¹ Kono ewe, oambe ziyenderera ne ntaero zisepahara. ² Bakwame bakuru baswanera kuba no buiswaro, kuki kutika, ne nkutwisiso, nentumero irukite, ne rato ne tundamo. ³ Abakentu bakulwana nabo nji nto iswana baswanera kubona kuti nako yonshe ba kikutika, kali kushebeka. Kaba swaneli kunywa caha bujwara. Baswanera kuruta zirotu ⁴ kuti abakazana bazyibe kuha erato ke nkutwisiso ku bakwame babo ne bana bo. ⁵ Baswanera kuba ruta ku shuwisisa, kucena ko kuki babarera, no kubabarera marapa abo, no kukutika abakwame babo. Baswanezi kutenda ezi zintu ye ezywi lya Nyambe lya shauliwa. ⁶ Kenjira iswana mu ereze banenu be cikwame babe ne nkutwisiso. ⁷ Muzonshe, muhare ko mutara omisebezi mirotu, hape entuto yenu isunde kucena ne kute. ⁸ Oambe eñusa ligorete lyazya mafosisa kuti enshe ozyo arwisa aswabe, kakuli kali kawane chimango cho kuamba. ⁹ Abatanga ba swanezi kuki bika kwinshi yi banfumu babo muzintu zonshe. Baba tabise kali kuba kakana. ¹⁰ Bashahibi. Kono, basunde entumero yonshe ndotu, kuti yee muzintu zonshe bakutike entuto yetu ya Nyambe mupulusi wetu. ¹¹ Kakuli echishemo cha Nyambe cha bonahali ku bantu bonshe. ¹² Chitu ruta okukana bumango ne ntakazo zefasi. Chitu ruta okuhara ke kutwisiso, ko kucena, mane ni ke chirumeli moinu nako, ¹³ netu lindire okutambura ensepo yetu ifuyaulitwe, kusunda okucena kwa Nyambe wetu omunene ne mupulusi Jesu Kireste. ¹⁴ Jesu nakiha yemwini kwetu ko kutu rukurura kuzintu zonshe zaazya murao, noku cenesa, kebaka lyakwe, abantu bobutokwa aba kitakaleza kutenda misebezi mirotu. ¹⁵ Ambe no kususueza kezi zintu. Usikulure ke manta onshe. Kwashabi ozyo akana kuku shuwa.

Chapter 3

¹ Bahupulise ku kibika munshi ya babusi neba nfumu, batende mirao yabo, nokuki tukiseza kutenda misebezi mirotu yonshe. ² Bahupulise ee bashaambi bubi kuamana no muntu, bazwe ku nkani, kusiyilila bantu bamwi batende omu bashakira, nokulikokobeza kubantu bonshe. ³ Kakuli neswe kali katwina engana hape katu coranga omurawo. Katu zyobete hape katuli ezikombwa zentakazo zishutana ne minyaka mingi. Katu haranga mu cibi ne nkumbu. Katukwesi orunya hape katu kitoyete. ⁴ Kono aha ecishemo ca Nyambe oMuhazi wetu ne rato lyakwe ku bantu, aha nezakezya kubonahara, ⁵ kali ke misebezi yo kucena kwetu eyi netwa tenda, kono ke cishemo cakwe aha natuhaza. Natuhaza koku sanza ko rupepo ruya ne njafazo yo Ruho Rucena. ⁶ Nyambe natutilira Ruho Rucena kobungi ko Muhazi wetu Jesu Kiresite. ⁷ Natenda bulyaho kuta ee, aha shanatu cenesi ke cishemo cakwe, tube aba bajobora ke nsepo yo buharo obo kabumani. ⁸ Eli ñusa lisepahara. Ndishaka ee muambe ka manta ne nsepo kuamana nezi zintu, kuta e bena ba sepa Nyambe bakwatise emisebezi mirotu eyi naabaha. Ezi zintu zirotu hape zitusa bantu bonshe. ⁹ Kono muzwe ku nkani zobusiru, ne mikowa, kurwa ne mizeko iamana no murao. Ezo zintu zobusiru hape zaazya ntuso. ¹⁰ Mukane yenshe ozyo areta enkauhanyo hakati kenu, heba shimwamu sikuruli lyonke kapa kobire, ¹¹ hape muzyibe ye ozyo muntu shana zwi munjira irukite, imi a tenda ecibi hape aki nyansa yemwine. ¹² Shaka nendi tumine Atemasi, kapa Takikasi kwenu, mutende wangu mukezye kwangu kwa Nikopolisi, koko ndakiteli kukara ha anu maliha. ¹³ Mutende wangu mutume Zenasi, omucaziba wo murao, ne Apolosi, mubone kuta e kali mboba shake cintu. ¹⁴ Abantu betu baswanera kukituta kutenda emisebezi mirotu eyi itusa wangu ye bashabi bantu baazya emisero. ¹⁵ Bonshe abo ndikere nabo bami meresa. Mumerese bena batushaka mu ntumero. Cishemo cibe nenwe mwenshe.