Kubbatuka kwa 2

Chapter 1

¹ Simone Pitorosi, o mwika kame mu apositora wa Jeso Kiresite, kwabo niba tambura entumero endotu ifwana shina omo nitwa itambwira, entumero yoku chena kwa Nyambe, kame muhazi wetu. ² Echishemo ne mpore liwezwe kubunene ku nzunu ya Nyambe ne Jeso Kiresite o Nfumu. ³ Ezintu zonshe ze ngamu zichenete zo buharo ne zywi lya Nyambe niza hewa kwetu ke nzunu ya Nyambe, ozyo natukuwa ke tubo yakwe ne ngamu. ⁴ Kezi, natuha e nsepiso endotu enene, ye namube kukuli bbatwila mwezo niza tendwa, shake na mushehe mububbi bwe fasi. ⁵ Kabulyaho, mutende ezirotu kokuweza kwi ngamu ke ntumero, ke ngamu, enzunu. ⁶ Ke nzunu yenu, muweze kukuli kuteka, mi kokuli kuteka, muweze kuku zyimana koku gora, kuku zyimana koku gora muweze ko chirumeli. ⁷ Ku chirumeli, muweze ko erato lyo bundambo, kwi rato lyo bundambo, muweze ko erato. ⁸ Heba ezi zintu zina kwenu noku kulira kwenu, kali namube ba zyanguli be nzunu yo Nfumu Jeso Kiresite. ⁹ Kono yenshe ozyo azya ezi zintu abona bulyo za fwihi; mofu. Na zibara zoku cheneswa mububbi bwakare. ¹⁰ Kabulyaho, bakwangu, mutende hawa ye oku kuyiwa kwenu noku sharurwa kwenu. Heba na mutenda ezi zintu, kali namuwe. ¹¹ Mwi njira eyi echizyi choku kabila mu mubuso wa Nyambe o muhazi Jeso Kiresite nazila hewa kwenu. ¹² Kobulyaho ndili bakanyite oku mikumburusa ezi zintu, noko muzizyi, noko mugorete mwi niti hanu. ¹³ Ndi azyara ye kwina nenja kwangu kumibusa ne ngazyaro ye zintu, aho ndishi kere mwi tente. ¹⁴ Kakuli ndizyi ye hahanu nandira zwisa e tente yangu, omo Nfumu Jeso Kiresite nandi sunda. ¹⁵ Nandira mitendera hawa okutiye nimwa ku azyara ezi zintu eme shendi neti. ¹⁶ Shina omo kali nitwa humpa ko butali etangu zokuli pangira aho katu misumwina zokezya ko Nfumu Jeso Kiresite. Kabulyaho, nitwa bona zo bunene bwa Nyambe. ¹⁷ Kakuli na tambura kwa Nyambe ekute lya Shwetu ne tubo enene eyo niya retwa ezywi nalita ye, "Ozyu ndi Mwanangu, ozyo ndishaka, kakwe ndili temba." ¹⁸ Nitwa shuwa ezywi elyo nilyazwa kwi wiru, aho katu kere neye he rundu lichenete. ¹⁹ Tukwesi eli zywi lyechi porofita elyo nilya tendwa koku gora. Mutenda nenja kubika ko engazyaro. Shina nji rambi i munika mwina kansikwe mbita kezya kwa masikusiku kame nokuzwa koru tungwezi masikusiku mu myezyo yenu. ²⁰ Muzyibe ezi tango, Kwaazya o muporofita ozyo a toroka zakwe. ²¹ Kakuli kwaazya echi porofita nicha kezya koku shaka ko muntu. Kabulyaho, a bantu kaba hinditwa ko Ruho ruchenete kaba amba kuzwa kwa Nyambe.

Chapter 2

¹ Ba porofita bahoma nabakezya kuba ntu, bazyii be mbuzi nibana kezya nebana kwenu.Nebareta ntuto zi kauhanya, niba kana Nfumu ozyo naaba wura. Bareta kusinyeha mukati kwabo. ² Bangi nabara chilira zo bushahi,kabo enjira yoniti niyina nyanswa. ³ Kobunyimi nabawana mupuzo hawiru lyenu ka mazywi o kuhoma. Kuhoma kwabo kakuliyehi nako nde kusinyeha kwabo kakulali. ⁴ Kakuli Nyambe kali na rekelela mangiroi ana tenda zibbi. Kabulyaho na hewa kwa Tatarasi kuti abikiwe muma wenge muchibaka cho kusiha mbita e nkatulo. ⁵ Kali naa rekerela efasi lyo kale. Kono nahaza Nuwe ozyu ka rukite, niba mwinya bo anja netobire, aho nareta mashanjiba mufasi lyabo kabatenda kali Nyambe. ⁶ Nyambe na manisa minzi ya Sodoma ne Gomora kureka bulyo e nzuliya kutwara ku ma maninikizo, kuti ibe mutara kwezo nazi tendahare kwabena kabatendi za Nyambe. ⁷ Kono Lota ozyo ka chenete, ozyo ka lyatilirwe ko mukaliro wabena kali kaba chilire nobushahi, Nyambe naba ramwina. ⁸ Okuti mukwame arukite ozyo kahara mukati kabo mu zyuba mu zyuba kakatazitwe muruho lwakwe lo ku chena kezi kabona noku shuwa. ⁹ Nfumu azyi moku hazikisa bantu ba nyambe mumiliko nokuhwa nkoto kwabena baazya ku ruka mwi zyuba lyo nkaturo. ¹⁰ Eyi nji niti kwabena ba bazwira habuso mwi ngazyaro zo mubili nokusa kutika nkamaiso.Kabatiyi mi batenda zabo. Kabatiyi ku nyansa bena barukite. ¹¹ Mangiroyi akwesi hawa ngamu na manta, kono ka reteli matuka enkatulo kwa Nfumu. ¹² Kono zipau zaazya nzunu naza tendelwa ku kwatiwa noku yaiwa.Kabazyi ezo batuka. ¹³ Nabana maniswa. Nabana wana mupuzo wabo kezitendantu zabo zibbi .Bahazyara ye kuhara nenja kamwi mburotu hawa. Ezibata zabo ne mirandu. Balikora ezitendantu zibbi nabazana nenwe ze mikiti. ¹⁴ Bakwesi mensho azwyire bushahi bwa bakentu; kaba kalikolwisi ne zibbi. Bahambiliza e myuzya yaazya kuliketete mukutenda zibbi, e myezyo yabo ina kutenda ezzibi. Mbana be chikuto! ¹⁵ Niba reka njira endotu. Neba zyoba ne bahumpite njira ya Balamu mwana Beore, kashaka ku hora kuzintu kazikere nenja. ¹⁶ Kono Nawana kukanwa koku shotoka murao. E mbongoro kai ambi kezywi lyo muntu niya siya obu purupuru bo porofita. ¹⁷ Aba bantu bafwana mbwe ndiziba lyaazya menji. Bafwana mbwe mazyuba ayendishwa ku ruho. Kansike kanene kabikirwa abo. ¹⁸ Baamba kobubbi. Ba jingiza bantu ke ntakazo yo mubili. Ba jingiza bantu bashaka ku rendera mwabena bahara mukusha tenda zirotu. ¹⁹ Ba sepisa entukuruho kwabo, kono kwabo beni mbeka bachora mirao. Kakuli o muntu mwika kuzintu zimuwora. ²⁰ Yenshe ozyo azwa mububbi bwe fasi ke nzunu yo Nfumu muhazi Jeso Kiresite, aboola kwabena kame batenda izintu zibbi, mazyimo obubbi bwabo a maninikizo ahita a matatikizo. ²¹ Nakura ba nenja kwabo kusha zyiba enjira endotu yoku ruka kapa kusha izyiba noku zoka ku mirao ichenete eyo niya hewa kwabo. ²² Ezi ntangu nzeniti kwabo:" Ombwa aboora ku burusi bwakwe. Echi gurube echo chazazywa chiboola kwi tapa."

Chapter 3

¹ Hanu, ndimiñorera enwe bashakiwa, eli eñoro lichilira nji nkupuzo yoku nyunga engana zenu ze niti, ² kuti ye mwara hupure a mazyi ao niya ambiwa ku mapolofita bachena ne ntaero yo Nfumu ne Muhazi kuma apositola benu. ³ Muzyibe echi tango, abashauli bara kezya mu mazyuba amanikizo. Bara shaura mi bayenda kubuso kuya ke ntakazo yabo. ⁴ Bara amba ye, "E nsepiso yoka boora kwakwe njeyi? Kuzwaho barara beshwetu, ezintu zonshe zishi swana, kuzwa ku matatikiro oku bumba." ⁵ Bazibara kokushaka kuti ye ewiru ne chishi zakezyi kubako kuzwa mu menji ni ka menji, karee oko, ke ntaero ya Nyambe, ⁶ nokuti ye kazezi zintu, efasi lye ina e nako nilya shinyiwa, nilya mina mu menji. ⁷ Kono hanu ewiru ne chishi zibikirwe omuliro ke ntaero iswana. Zibikirwe e zyuba lye nkaturo nensinyeho ya bantu abo kaba zumini kwa Nyambe. ⁸ Mwasha kangwi oku shuwisisa, bashakiwa, kuti ye ezyuba lyonke ne Nyambe lifwana mbwe e mwyaka yoli 1000, mi e mywaka yoli 1000 ifwana mbwe ezyuba lyonke. ⁹ O Nfumu kayendi ko kuliyeha kuamana ne nsepiso zakwe, shina kamo bazyibire kuliyeha bamwi. Kono a liketete kwenu. Katabeli ye zyumwinya kwenu ashinyehe, kono muntu yenshe atende echibaka chokubaka. ¹⁰ Kono, ezyuba lya Nyambe lyara kezya mbo musa: E wiru lyara mana ke rata enene. Ezintu zonshe zizyaka efasi zara hiswa no muliro, mi e fasi ne zitendantu zalyo zara bonahazwa. ¹¹ Kakuli ezi zintu zonshe zara shinyeha mweinu e njira, mbantu munji shaka ne mube? Mu hare obuharo buchena ni bwe chirumeli. ¹² Muli tukiseze noku hweresa okukezya kwe zyuba lya Nyambe. Helyo zyuba, ewiru lyara hisiwa mu muliro,mi nezintu zibumba e fasi zara nyanyumunwa mukuhisa kunene. ¹³ Kono kuya ke nsepiso yakwe, tulindire mawiru maya ne fasi nja, omu nemu kare kuchena. ¹⁴ Mi cware, bashakiwa, shina aho muziliberere ezi zintu, mutende komo muworera muwaniwe mwazya e zibbata nokusa waninwa mafosisa habuso bwakwe, mwi mpore. ¹⁵ Kame, muazyare omozyo mure wakwe ube empuruso, shina mu namiñorera mushakiwa wetu Paulusi, kuya kobutali obu nibwa hewa kwakwe. ¹⁶ Paulusi a amba kezi zintu mu mañoro akwe onshe, omu mwina e zintu zi kababu kuku shuwisisa. Bakwame abo kabatwali ko mozyo nokusa ba nenja bazyonaura ezi zintu, shina mu batendera entimana zimwinya, ku nshinyeho yabo bene. ^{17 18} Cware, bashakiwa, shina aho muzyi ezi zintu, muli babarere mubeni kuti ye mwasha zwi munjira ko buhomi bwa bantu ba azya omurawo mi mu zyoberwa o kusepahara kwenu. Kono mukure mu chisemo ne nzunu yo Nfumu ne Muhazi Jeso Kiresite. E tubo yibe kwakwe kuzwa hanu mbita o koo. Amen!