10. ŋen ŋəđəbəɽwa iđi đeɽo ređ
Musa na Aron ləɽe Fero nano. ldəmaiṯi ṯa,"fəŋu ŋen iŋi rəmwa risrayil rəlwaɽo, ŋgiṯu leđa laləɽəñe aləmiñe! "" Fero naŋəreṯe galəŋənṯia. Ṯa gənəŋu aŋgiṯi leđa lisrayil ṯa aləmiñe bipi, gənəŋu ṯaŋələṯẽṯərenaṯu eŋen ṯa aliđi ŋəməɽra ŋəbəɽaŋano kañ.
Fero naŋənađe gəŋgiṯia leđa ṯa aləmiñe, nṯia Rəmwa ndrəmapuɽi ŋenəŋa iŋi ŋəɽo ređ, Rəmwa ndraŋaice Feroŋ ŋen ṯa rənəŋu rerṯo ŋabəɽa ŋoɽra ŋəməñaṯo orəba gəlëɽəŋu na imwa pređ yəlëɽəŋu isi yə-masr
Rəmwa ndrerëiđi ŋawa ŋeđəbarlda đənil naŋəɽeṯe ŋəfəni, orn məldin Fero nəŋerəṯe gabaŋənṯia leđa lisrayil ṯa aləmiñe.
Rəmwa ndrađwaṯe ñulu alo pređ yə-masr. Fero nəŋəɽeđe musaŋ ŋəbiaŋa ṯa aŋgəice ñulu. Nṯia ŋen ñulu ñaiyo pređ đəge, Fero naŋiđi ara gəlëɽəŋu gəbəɽaŋəno kañ na naŋereṯe gabaŋəntia ŋen ṯa leđa lisrayil aləmiñe alo yə-masr
Nṯia Rəmwa ndrađwaṯe laŋge ildi leɽo đəgəmia ldrəsi leṯo elo. Nṯia cum ndrađwaṯa laŋge ildi ləɽo đəgəmia lərno lai. Fero nəŋəwəndəđi Musaŋ na Aron na nəŋəlaiṯi ṯa ndə ñagəro ñagəđuria laŋge ildi leɽo đernḏacia, israyil yaber iđi ayəmiñe kwai kwai. ŋen musa geɽəđo Rəmwa, ndrəŋgace lai pređ alo yə-masr. Na Fero nəŋəb əɽeṯe ara aŋəno gələɽëŋu na naŋereṯe gəŋgiṯia leđa ṯa aləmiñe məɽeməɽeñ.
Təŋ, Rəmwa ndrəboɽi đwala pređ iđi đəleđa lə-masr ṯa ađumeiṯi na ađaiye. Orn ara gə-Fero nəŋəbëɽeṯe aŋəno kañ na naŋəreṯe gabaŋənṯia ŋen ṯa leđa lisrayil aləmiñe.
Nṯia Rəmwa ndralwaɽəṯe musaŋ ṯa aŋəwëṯi fəuna elo eđeber Fero nəñwaŋ. ŋen giđu ṯia, ŋen ŋəbwa ŋəŋəɽañ ŋəldɽi eđəpe ŋeɽo đagəmia eleđa lə-masr, orn gerṯa eleđa lisrayil. Rəmwa ndriṯi Fero ara gələɽëŋu gəbəɽëŋəno kañ na Fero naŋəreṯe gaŋgiṯia leđa lisrayil ṯa aləmiñe bipia.
ŋen ŋarno ṯia, Rəmwa ndrađwaṯe laŋge ildi ldrẽjəinia alo ŋen ŋarno ŋawa ŋəđənian naŋgere ŋəsa pređ ŋalo yə-masr na naŋəɽəñe leđa pređ ildi lafo ndəwëur. Fero naŋǝwëndëđi Musaŋ na Aron naŋəlaṯi ṯa," igiđu ŋen ŋëcia kañ. ŋen ŋaŋəra ṯa ñaɽe."Nṯia musa nəŋabuŋṯi Rəmwa na laŋge ildi lafo ldrëjəinia alo ldəđəri đəge.
Orn Fero nəŋiđi ŋen ŋëcia təŋ na nəŋiđi ara gələɽëŋu gəbëɽaŋəno. Nṯia nəŋereṯe gaŋgiṯia leđa lisrayil ṯa aləmiñe məɽẽməɽeñ.
Nṯia Rəmwa ndriđi ŋëɽwa ŋəyam alo nano pređ yə-masr.Yam isi ndəse ŋwana pređ iŋi ŋafo ŋəṯəđəno ŋero ŋəsina laŋgala ildi lafo ldrëjəino.
Nṯia Rəmwa ndrađwaṯe ŋərəmia alo pređ ñoman ñəɽijin. Alo yafo yaɽo ŋərəm kañ orn leđa lə-masr lderəṯe laɽəwađəṯia laməña eneɽa enen. Orn arere naŋəfeṯe alo isi israyil yefau
Iliga đəđəbəɽua đəŋəɽañ iđi đeɽo đen mwarldwan, Fero məldin nəŋənađe gəbaŋənṯia leđa lisrayil ṯa aləmiñe məɽəmëɽeñ. ŋen ŋarno Fero gəneđo gəna, Rəmwa ndraɽe ŋen ṯa arəđwaṯe đəbuɽua đonto iđi đeɽəñađiđo. ŋen iŋi ŋiđi aŋəməlađi ŋətəɽa ŋə-Fero.
Đumëđənia egađam: gəđəmaiña 5-10