32. Yesu geiđi maje igi nusila neicia nanṯəmawu na wuji gǝɽǝbwa guma.

Eloman lənəŋ, Yesu na Ṯaləmis yəllëɽəŋu nəlënṯi iđəpundr ṯa aluɽəđëṯi alo nëṯəndia gomən gađəbarnda đirnuŋ igi leđa ləfo Ləgarasayin.

ŋen luɽəđëṯu eđǝbarnda nëṯəndi gomən, eđa gənəŋ igi usila gënṯəmawu geicia nəŋeṯa Yesu nano gəlëldiñia.

Maje igi gafo gonṯoṯo eđa gero gənəŋ gaɽëwađaṯomau ṯa aŋəmariđi. Leđa lafo lakasəma rəŋ na rəmanəña nduriđəna na naŋëluguɽiđi ano.

Maje igi gafo gafo alo yəndərlnda. Maje igi gafo gǝrəjaica ole jaica ëđəñëđəñin na uləŋgələŋ. Gënəŋu gafo gero gəbaɽənia ndrenia nano na ṯaŋgəlnu aŋəno guguɽəbainia nano ŋwandraŋa bəɽan.

Ndǝ maje geṯo Yesu nano, naŋəmiɽiṯi ndrianalo ŋu nëñua.Yesu naŋaiṯi usila geicia ṯa,"məñiaŋ emaje igi!"

Maje igi gerṯo usila nano neicia naŋarce ole pəlelo,"agañonaṯa wande nano,Yesu, Iđia Gǝ-Rəmwa irri Roɽra Elo? Egaŋeɽəđia ṯa ŋerṯe agǝñəmwađialo!" Orn Yesu naŋeɽəđe usila geicia ṯa, "agëbərnia əsëgi?" na gënəŋu nəŋəmuɽəbiṯi eŋen ṯa,"igëbərnia Lijun, ŋen ŋanṯa ñagwañia."("Lijun"gafo gaɽo loɽo lasəkari garəno aləf ndređia nwaiña eleđa Ləroma.)

Nusila neicia neɽəđe Yesu,"ŋəbaiyəŋa ṯa ŋerṯe gəlëđwaṯa ndëuwr alo irnuŋ igi!" Lṯura lafo lasa ndëɽo aiyən nano. Nṯia, nusila neicia leɽəđe Yesu ŋəbaiyəŋa ṯa,"Ɖwaḏənde ilṯura garano ñagonaṯa!" Yesu naŋaṯa,"mbur!"

Nusila neicia nəməñe emaje nəlënṯi ilṯura. Lṯura ndandəñəṯe egal yoleno eđəparnda na ŋau naŋəlape. Lṯrua lafo laɽo aləf eređia gǝɽijan.

leđa ildi lafo lərəmoṯua lṯrua ldəseci ŋen iŋi ŋiđənu, ldobəđaṯe alo irnuŋ ldəlwaɽəṯi leđa pređ ŋen iŋi Yesu giđu. Leđa lirnuŋ gakəl ndela ldǝseci maje igi nusila neicia niđima ŋađəna. Gënəŋu gafo gaɽaŋa alo aten, gancinu ndrenia nano, na ṯaŋiđu ŋen ŋarəno eđa gipi.

Leđa lafo lǝđəñia alo kaiñ na leɽəđe Yesu ṯa aŋəɽe. Nṯia Yesu naŋënṯi iđəpundr na naŋəṯuɽəđaini ṯa aŋəɽe. Maje igi gafo gerṯo nusila nano necia naŋeɽəđe Yesu ṯa aləgəɽe.

Orn Yesu nəŋəmaṯi ṯa, "Ndo, egaŋonaṯa ṯa ŋaɽe eɽa na ŋəlwaɽəṯi rappa na leđa egeɽa gəllaɽəŋa eŋen pređ iŋi Rəmwa riṯiaŋa na ŋəbaiya iŋi rënəŋu rerəṯo eŋa."

Nṯia maje nagabəla naŋǝluwaɽəṯi leđa pređ ŋen iŋi Yesu giṯəma. Leđa pređ ildi ləno đumađənia đəlëɽəŋu naloɽəđaṯe elo na ŋen nəŋəlajəbinṯi kaiñ.

Yesu naŋoɽəbaṯe alo yomən aṯəndi nano. Ndə gënəŋu gərmaṯo tu, leđa lwañia ldǝmarraiđe nano na ṯaləmabərndađo ŋu nano. Na wuji gafo gənəŋ gəɽəbwa ŋəfəni ŋəmuruwa nano garəno nṯəlia ređ na nəɽajan. Naŋəbəɽəđe algurus isi nəgerəṯəlo pređ eleđa ildi ləbərnṯainia ŋenŋa ṯa aləmeiđi geŋəra təŋ. Orn ganəŋu ṯaŋəməñiađaṯo nañua ŋenŋa ŋeicia.

Gënəŋu naŋəne ṯa Yesu gafo gaiđi leđa luma lwaiña na eŋəṯəɽa, "igaŋənṯu ŋen đeṯam ṯa ndə egəbra erenia pipi Gi-Yesu, nṯia igiđi ñabərđi, com!" Nṯia naŋeleđeṯa Yesu ilaɽwaŋ na nəŋəmabəraṯe ntrenia nəlëɽəŋu nano. Na taltal ŋǝƒǝni ŋiruwa naŋəđuri!.

Na taltal, Yesu naŋələŋəđini nano ṯa ŋabəɽa ŋaməñəmau ŋǝđeiđia. Nṯia naŋəređe alo na naŋeɽəđe,"əsëgi gabəriñe?" Na Ṯaləmis yəlëɽəŋu nayoɽəbace ŋen ṯa, leđa lwaiña laɽəđaṯaŋa eɽo na ṯalŋaṯərnaiđo, ŋen ŋauwante nabeɽəđia ṯa, fəsëgi gebəraŋa?"

Na wuji naŋwođəñiṯe Yesu nañua ndrianalo, gǝgëđia aŋəno kaiñ na gəđiñia alo. Na wuji naŋəluwaɽəṯi Yesu ŋen iŋi giđu, na ti̱a fəṯau geiđinu.Yesu naŋəmaṯi ṯa,"đonaṯa đəlaɽəŋa đeiđiaŋa. Mbu iđëuṯaralo."

Ɖumađənia igañjil E_Maṯṯa 8:28-34;9:20-22;Margos 5:1-20;5:24b-34;Luka 8:26-39;8:42b-48