38.ŋen Yesu gabəlajinu
Inṯilaŋ jaica jaica, leđa lal yawuḏ lafo labəđia đəŋəra nano đacəba gəđaburnia nano. Đəŋəra nano iđi đafo đabaŋaiđia ŋen iŋi ṯau Rəmwa rafo rəbëri leđa ləpapanda ləpənde əllëɽəŋu eŋəbai ŋəleđa lə-Masir garəno nṯəliaŋ ndređia ređ. Yesu naŋətođe ŋəmaɽiaŋa gəbarəŋacia leđa na ṯaŋələɽwaɽiṯu nṯəliaŋ niɽijin, Yesu naŋəlwaɽiṯi Ṯaləmis yëləɽəŋu ṯa ganəŋu gonaṯa ṯa aləɽe eđəŋəra nano đəmđiya gəđəsa acəba gəđeburniya nano alo Yurəsalim, na ṯa ganəŋu giđi aŋəɽiñini.
Orn maje gənəŋ i-Ṯaləmis I-Yesu ganṯa Yauđa. Yauđa gafo ganainu leđa ildi lafo ləṯwainu narwëna naləgurus, orn gënəŋu naŋəbwiṯi aləgurusiya na naŋəlaləbce igëru. Ndə Yesu ldɽrəmaṯo Ṯaləmisiya yëləɽəŋu alo Yurəsalim, Yauđa naŋəɽe nələŋe nano nəkanna na naŋəneiđe Yesu eŋen ŋaləgurus. Gënəŋu gafo galəŋeṯo ŋen ṯa nələŋ nəkanna nabəlacema ṯa Yesu gaɽo Almasiya na ṯa lafo labëgəɽia ŋen ṯa aləmaɽeiñe.
Orn nələŋ nəkanna, ini nafo nəđwainu eləga goɽra kəkanna, naləɽe Yauđa nano ləmance gəris ndređia niɽijin ṯa aŋabəlace Yesu. ŋen iŋi ŋiđənu garno Anëbi yəlwaɽo.Yauđa naŋaŋənṯi ŋen, naŋəme algəris, na naŋəɽe aləsoŋ. Na lanəŋulu ṯaləkagondo liga ləŋəra ṯa alëndi Yesu.
Yesu naŋəɽe alo Yurəsalim Ṯaləmisiya yëləɽəŋu ṯa aliđi ëmđia gəđaburniya nano. Iliga lđəđəsa acəba gəđaburniya nano, Yesu naŋəme acəba nagere ano, Ganəŋu naŋaṯa, "mər na ñiase, fəŋu aŋəno yəlaɽiñi, isi yineinde, iđur ṯia, ṯəñiañəuwlaldəŋəđeinu. "Nṯia Yesu naŋaṯa aŋəno yəlaɽeiñi yaɽo điɽəđənia eđalo.
Nṯia Yesu naŋabe aləfiñjan naŋaṯa, mər na ñiëṯi. ŋəfini iŋi ŋəlaɽiñi ŋaɽo đəreiđia eŋen đəmajen iđi đəreinu alo ŋen ŋanṯa đəŋgəđəcia ŋen ŋeica. Iđur ṯia na ṯəñiañuwəlaldəŋəđeinu ñoman pređ ndə ñiagəṯia."
Orn Yesu naŋəlwaɽiṯi Ṯaləmis yëləɽəŋu ṯa, "eđa gənəŋ giđi aŋəñiabəlace. "Orn Ṯaləmis niyoɽəđaṯe elo, na yanəŋulu naiyeɽəđe bəɽan ṯa əsëgi giđi aŋiđi ṯia. Yesu naŋaṯa, "eđa igi egəŋəmanaica acəba ganəŋu giđi aŋəñiablace. Orn ganəŋu naŋənace Yauđa acəba.
Ndə Yesu gemo acəba, Iɽindia nayəmanṯi egare gëləɽaŋu.Yauđa naŋətođe na naŋëɽe ṯa aŋamađaṯe nələŋ nəkanna ṯa alëndi Yesu. Nṯia Uləŋgi gafo gaɽo.
Ndə ləso đəge,Yesu na Ṯaləmis Yëləɽəŋu nalëɽe Naiyen Y-saiḏun. Yesu naŋaleiṯi ṯa, "ñiagiđi ñiañəṯađe alo ñiaŋ pređ. ŋen ŋauwërđənu ṯa, 'igiđi ñipəɽi eđa gəsia na yaŋala pređ yiđi ayilaldəđəniano."'
Buṯrus naŋəmuɽəbiṯi eŋen ṯa,"ndə leđa ləŋaṯađa alo pređ, egaber igiđi eŋaṯađe!" Nṯia Yesu naŋeiṯi Buṯrus ṯa, "Seṯan yonaṯa yəndëndia ñiaŋ pređ, orn igiṯaṯurṯu Rəmwa ŋen ŋanṯa ŋa, Buṯrus, ŋen ŋanṯa đuwanaṯa đëləɽəŋa ađerəṯe đəpiɽia. Nṯia. uləŋgi igëi, ŋen đowaḏa đimulu đəbara, agiđi ŋañiabəlace iliga liɽijin ŋen ṯa agero agəñələŋeṯa."
Orn Buṯrus naŋaṯi Yesu ṯa, "Ndə ŋəɽaiñ ŋəđaiya, Egaber igiđi eŋabəlace!" Nṯia Ṯaləmis yəmaṯan elorb nayəlwaɽe ṯia com.
Yesu naŋəɽe Ṯaləmisiya yëləɽəŋu alo yə-Jiasđəman. Yesu naŋəluɽiṯi Ṯaləmis yëləɽəŋu ṯa alṯaṯurṯi ŋen ṯa alerəṯe ləbanṯia iđirənṯëcia. Orn Yesu naŋëɽe ŋuŋ bəɽan ṯa aŋəṯurṯi Rəmwa.
Yesu naŋəṯurṯi Rəmwa ñoman ñiɽijin,"Ya Pappa gəlaɽiñi, ndə ŋen ŋərəjiađaṯo, egaŋeɽədia ṯa ŋerəṯe agəñiŋgiṯia ṯa ñiṯi fiñjian isi yəŋen ŋubwa, Orn ndə đađ đero đənəŋ ṯa ŋen ŋeica ŋəleđa aləŋgađaini, Nṯia aŋənṯu ŋen ṯa aŋiđəni."Yesu gafo eŋen ŋəbɽaŋəno na aŋal ṯaŋiru nano garəno ŋəfini. Rəmwa ndrəđwaṯe maliyəka ṯa ayəmabəɽe nano.
Iŋiga pređ iŋi gəbɽo iđəṯurṯia, Yesu naŋoɽəbaṯe Ṯaləmis nano, orn naŋələfiđi yəndro, Ndə goɽəbəđo iliga laɽo ləɽijin, Yesu naŋaṯa, "Dođər! Eđa gañəneiđia gani ëli."
Yauđa naŋela nələŋəna nal yawuḏ, Ṯruwa na leđa lwaiña. Lanəŋulu larapo yoberre na nëɽi. Yauđa naŋeṯa Yesu nano naŋaṯa, "đeuṯaralo, ya irəŋeiđia," na naŋəmaɽwëṯi ëñua egorb. fəŋu ŋaməla iŋi ŋabaŋaiđia ŋen ŋənələŋ nəkanna aləŋeṯe əsëgi gəbəntiniya. Yesu naŋamiṯi ṯa, "Yauđa, agañiabəlcia đëɽwaṯađa ëñua egorb?"
ŋen ṯruwa đantu Yesu, Buṯrus naŋəbleđe đoperra đëləɽəŋu na naŋəṯəpe ibai geləŋ gəkanna ënŋ. Yesu naŋaṯa, "ëɽu đoperre nuwaldaŋ! Gabanṯa ṯa egeɽəđo Pappa ṯurrwa đ-malaiyəka ŋen ŋanṯa ađəñiamađaṯe. Orn ŋen ŋarəjiađaṯo ṯa iđiñađəṯi Pappa eŋen. "Ndə Yesu gandənu, Ṯaləmis yëləɽəŋu pređ naiyəlaltəñe.
Đumëđənia egađam:Gə-Maṯṯa 26:14-56; Margus 14:10-50; Luka 22:1-53; Yuanna 12:6;18:1-11