49. Dərreiđia eŋen đəmaijən đə-Rəmwa
Na Məlaiyəka nađiṯi ŋere iŋi ŋajiba eđa gəɽora ŋabërnia Mariam ṯa giđi aŋələŋe iđia gə-Rəmwa. Iliga ŋen gënəŋu gajiba eđa gəɽora kwai kwai usila gətəɽe naŋəmauwanṯi na naŋonḏaice. Gënəŋu naŋələŋe ŋere na nəŋanaici Yesu. ŋen ŋarno ṯia, Yesu gaɽo Rəmwa na aŋəno.
Yesu giđu aŋwara isi ywaiña yibaŋiđia ŋen ṯa gënəŋu gaɽo Rəmwa. gënəŋu gerldo nəŋau, naŋiđuri đəbera, naŋagiđi leđa lwaiña lwuma, nǝŋəməñaci leđa nusila nano neicia, nəŋətuđi leđa laiyo ləmṯe, na nəŋiđi ragifi đenəŋ na lemme laɽijan ləɽeṯe aciəba gwaiña eleđa ndređe eređa đenəŋ.
Yesu gafo gaɽo eđa goɽra com gəbërrəŋaiđia ŋen, na gënəŋu gaɽwata ŋələŋeŋa ŋen ŋanṯa gënəŋu gaɽo iđia gə-Rəmwa. Gënəŋu gërrəŋaiđu ŋen ṯa ñabwiṯi leđala ŋen ŋarno ñagubwa ntəmna enalo.
Gënəŋu nəŋërrəŋiđi ŋen com ṯa ñabwiṯi Rəmwara ñagəmañaiji laŋge pređ, garno đwalla eđalo com.
Yesu gaṯa ṯa ŋələŋe ŋə-Rəmwa ŋaɽo ŋaiyo-aŋəno ŋəməñaṯo laŋge pređ ildi ləfo alo ləŋəra. ŋen ŋame ṯa leđa pređ alɽaŋađaṯe ŋələŋe nano ŋə-Rəmwa. Ta ŋanṯi eŋələŋe ŋə-Rəmwa, ŋen ŋanainiaŋa ṯa ŋəbərni eŋen ŋëləɽəŋa ŋeicia.
Yesu gërrəŋaiđu ŋen ṯa leđa ləmaṯan liđi alməŋənṯi na alëbərni, orn ləmaṯan laber liđi alëbərni. Gënəŋu gaṯa ṯa leđa ləmaṯan larno đuđa iđi đəŋəra. Lënəŋulu ləŋənṯu ŋen ŋǝŋǝra ŋəmajen ŋə-Yesu na ldabərni. leđa ləmaṯan larno đuđa đəpɽaŋəno đəfo eđađ, alo isi ŋəlwa ŋole gə-Rəmwa gero gəlofia na gero ŋəlwa ŋəđwanṯa. Leđa ildi ləneđo ole gəṯwainu eŋen ŋi-Yesu na gaber giđi aŋənḏi eŋələŋe ŋëləɽəŋu.
Yesu gërrəŋaiđu ŋen ṯa Rəmwa rabwa leđala ildi leicia kaiñ. Rënəŋu ronaṯa ṯa arəldəŋgađeici ŋen ŋeicia na arliđi ñere ñələɽəŋu.
Yesu galwaɽəṯəndr com ṯa Rəmwa rage ŋen ŋeicia. ŋen Aḏam na Awa liđu ŋen ŋeicia, ŋen nəŋənti eđələŋe pređ eđen. Garno ŋen ŋiđeinu ṯia, leđa pređ liđu ŋen ŋeicia na ndəlađini ano Rəmwara. Nṯia, leđa pređ laɽo ëməcu gə-Rəmwa.
Orn Rəmwa rabwa leđala pređ lalo kaiñ rënəŋu ndrənaiđe iđia gëləɽəŋu gonto ŋen ŋanṯa eđa gənəŋ gëndu ŋen ŋə-Yesu gaber giđi aŋəneini ŋen ŋubwa ŋeicia, orn liđi aləfeṯe Rəmwa-ra bəɽəbəte.
ŋen ŋanṯa ŋen ŋeicia ŋëləɽəŋa, agadrənu nano na nëŋarəjađaṯe ṯa ŋaiye. Rəmwa riđi arəŋaciṯiano, orn rënəŋu ndrərace đëceiano i-yesu gabanṯa ṯa fǝŋa .Iliga yesu gaiṯo iđuɽi, gənëŋu gamo ŋen ŋəbuwa ŋǝlaɽəŋa.
Yesu gero gəbiđia ŋen ŋǝnǝŋ ŋeicia, orn gënǝŋu gëŋənəṯu ŋen ŋəbwa na naŋaiye ŋen ŋanṯa aŋəɽeṯe điɽəđənia đəŋgaica ŋen ŋeicia ŋəlëɽəŋa na ŋeicia ŋǝleđa pređ ildi lǝfo alo,ŋen ŋanṯa Yesu ganaiđo aŋəno yëləɽəŋu, Rəmwa rəŋgaica ŋen ŋeicia pređ, na ŋen ŋeicia iŋi ŋǝđeiñinu com.
ŋəmaɽria iŋi ŋəŋəra ŋaber ŋiđi aŋəbri. ŋen ŋero ŋənəŋ ṯa agiđi ŋiđi ŋen ŋanṯa ñerṯe đërraiđia eŋen Rəmwara .Yesu bɽan giđi aŋəwase ŋeicia ŋëləɽəŋa. Aganəŋa ëndu ŋen ṯa Yesu gaɽo iđia gə-Rəmwa, ŋen ŋanṯa gënəŋu gaiyo iđuɽi eŋen ŋëləɽəŋa, na ṯia Rəmwa ndrəmatuđi eŋəɽaiñ təŋ gəmṯo.
Rəmwa riđi arəbri leđa pređ ildi ləfo egaləmasiya na ildi laŋənṯəma ṯa gaɽo eləŋ egen . Orn gënəŋu gaber giđi aŋəbri eđa igi gero gəbëndia ŋen ŋəlëɽəŋu. Gerṯa ṯa agwaiña laŋge walla agəɽo ŋəbaiyaŋəno, ummia walla ŋere, agoɽra walla agəta walla alo isi agəfau. Rəmwa rabwaŋaiya na ronaṯa ṯa ŋëndi ŋen ŋəyesu ŋen ŋanṯa gənëŋu alerṯe đërreiđia eŋen ṯwaiñ ŋu ləga.
Rəmwa rëwndəđəndər ṯa alëndr ŋen ŋəlëɽəŋu na ṯa alələŋënər lagəmajan. Ñagëndu ŋen đeṯəm ṯa Yesu gaɽo Almasiya, iđia gə-Rəmwa gonto? Ñagëndu ŋen đeṯəm ṯa ñagiđu məna na ñagonaṯa ṯa ŋen ṯa Rəmwa randagəme? ̃Ñagëndu ŋen ṯa Yesu gaiyo iđuɽi ŋen ŋanṯa aŋgeici ŋen ŋeicia eŋalo?
Ndə ñagëndu ŋen i-yesu na ŋen iŋi gënəŋu giṯinde, ñagəɽo leđa ildi lëndu ŋen ŋaləmasiya! Rəmwa ramənde iŋərəm ŋəŋələŋe ŋǝseṯan na ŋəndəɽr egarrerre gəŋələŋe ŋə-Rəmwa. Rəmwa ramo ŋen ŋəbətəŋəɽan, ŋeicia iŋi ñagəbəđia na ndrənaice ŋen ŋəmajan, ŋətəɽia ŋəđiđia ŋen.
Ndə ñagëndu ŋen ŋaləmasiya, Rəmwa rəŋgađeicinde ŋen ŋeicia eŋalo ŋen ŋanṯa ŋen iŋi Yesu giđu. Đəñiđi, Rəmwa raŋënṯiŋa ṯa ŋaɽeṯe đappa ṯwaiñ gerṯa ëməcu.
Ndə agəɽo đappa đǝ-Rəmwa na yəbai gə-Yesu igi gəɽo eləŋ, agiđi ŋwonaṯe ŋen ṯa ŋëndi ŋen iŋi Yesu gəbërrəŋaiđia. Ndə ñagëndu ŋen ŋaləmasiya, ñagiđi ñirnḏeini. Orn Rəmwa raɽo đwonaṯa eŋen na raṯaṯa ndə agəlwaɽo ëiñwaya eŋen ŋeicia ŋëləɽəŋa, rënəŋu riđi arəŋaŋgađeici ŋen ŋeicia ŋëləɽəŋa. Rënəŋu riđi arəŋabɽe ano ṯa ñabwaiñđe ŋenŋa ŋeicia.
Rəmwa rəlwaɽəṯəndr ṯa alṯəterṯir, ŋen ŋanṯa alëndr ole gëləɽəŋu, na ṯa aləmukwuđəñiṯir alo leđala ildi lëndu ŋen ŋa-Ləmasiya, na ñalwaɽiṯi leđa ŋen rënəŋu riṯinde. ŋen iŋi pređ ŋandəmađaṯar ṯa alerṯər đërreiđia eŋen ŋobe ŋu ləga.
Đumëđənia ig-njil: Rumiya 3:21-26, 5:1-11; Yuanna 3:16; Margus 16:16; Kolosi 1:13-14; 2 kərunđus 5:17-21; 1 Yuanna 1:5-10