́14. ŋen ŋəđacəbənṯia eđəiñwa
ŋen rəmwa rəlwaɽəṯo leđa lisrayil ŋen iŋi ṯa aɽrrəmoṯe ŋəɽo dərrëiđia eŋen eŋen, laṯəđo aiyen isina. Rəmwa ṯəŋəlemamo ṯa aɽrəmaṯe alo isi rəŋəcilo, alo is yəbarnia Kanan. Đaba đafo đabərldalo nëiñwəŋ đəmiñia alo yəkanan na ṯaɽəteṯo.
Rəmwa ndrəɽəṯe Ibraiym, Isag na Yagob ŋen ṯa ređi arəŋonice alo ṯa đələŋa đëləɽəŋu aŋofeṯe, orn leđa lwaiña ŋoɽa alo isi . Lənəŋulu labərenia kananiyen. Kananiyen yaber yəbuŋəṯia na yero yeđəñəđatia rəmwa eŋen. Yënəŋulu yabuŋəṯia imwa yeicia na yabəđia ŋen ŋwaiña ŋeicia.
Rəmwa ndrəlwëɽeṯe leđa lisrayil," ŋgəicur leđa ildi lə-cananiyian alo isi igẽnəjənda. Ñerṯe ñagəbëđialda đawuətaralo na eđa aŋerṯe gəmađia iŋulu gənəŋ. ŋen ŋarəjađəṯo ta ñagere imwa yeicia esën pređ.Ndə ñagəber ñəgəna ŋen ŋələɽiñi, ñagiđi ñabuŋəṯe imwa yeicia orn gerṯa ñi."
̇ŋen leđa lisrayil lerəmaṯo nṯəɽiŋ đəkanan, musa nəŋoṯe ləmmia ređ nəlëɽijan, eđa gonṯo gonṯo isur eleđa pređ lisraiyil. na nəŋələnaice ŋen ṯa aɽe alənwana alo gaɽe yaɽo ṯau. labəɽo com ṯa alənwane gaɽe leđa ləkanan lonṯəṯo walla lopano .
ləmmia ildi leɽo ređ nəlɽəjan lerldo alo yəkanan ndređia marldwan na loɽəbëđia. lënəŋulu ldaṯi leđa ṯa," alo yaɽo alo yələŋa kaiñ na laŋge pređ lobəđa alo!" Orn leđa ildi ləɽo ređ nəlaṯa," irnuŋ gonṯəṯo na leđa loɽa aŋəno! ndə đəbəwañiđia đəfo liđ aləndəbëlađar na aləndəɽəñar!"
Na taltal Galeb na Jasua, leđa lëɽəjan leŋamɽa, ldaṯa," ŋen ŋafo đəṯam leđa ləkanan lwala na lonṯəṯo, orn ləgiđir aldəđamər , ŋen ŋanṯa Rəmwa riđi arndəbəđeiđr!"
Orn leđa lerṯe lənaṯa Galeb na Jasua . Nəṯia lënəŋulu ldiceiṯi Musa na Aron ano na laṯa," ŋen ŋənṯëu iŋi ñagəmamiṯənde alo isi yeica? ŋen ŋafo ŋarjađəṯo ṯa ñaɽəŋe alo yə-Masir ŋəməñiaṯo ŋen ṯa ñaiyeṯe eđəpwəñiđia na ləwasañanda na ñere ñagiđenu ñagəɽo lëbai."Na leđa ṯalonaṯo ṯa aləwuëṯe eđa gerto gəɽënda aŋəloɽəbiace alo yə-masir.
Rəmwa rafo raceino na neŋeṯa rṯaeg isi yəđërrəriđia.Rəmwa ndraṯa, ŋen ŋarno ṯia agəgëñe," ŋen ŋiđi aŋəjëbənṯi leđa pređ alo isi eđëiñwa.Orn gerṯa Jasua na Galeb, na leđa pređ ildi lerṯo nəṯəlaŋ eređia gaɽəjan na loɽra liđi alaiyeṯe tu na laber liđi alənṯi eləbate ildi ləmajin."
ŋen leđa ləno ŋen iŋi,lënəŋulu loɽəbaṯe aŋəno nano kaiñ ŋen ŋanṯa liđu ŋeicia. Na lënəŋulu ldabe laŋge ləđəpwaiñəđa na ləɽe ṯa aləpwaiñiđe leđala lalo yəkanan. Musa naŋəlwuëɽeṯi ṯa alerəṯe lapəla ŋen ŋanṯa Rəmwa rero rəfialda, orn lerṯe ləna ŋen ŋëləɽəŋu.
Na Rəmwa ndrerəṯe rabəla ŋuləla eđəpwaiñəđia, nəṯia lënəŋulu ldəpəlađini na ltaiye lwaiña. Na leđa lisrayil loɽəbeđia alo yəkanan na lerəlde eđəñwəŋ nëṯəlaŋ ndređia marldwan.
Inṯəlaŋ ini neɽo ndrəđia marldwan ŋen leđa lisrayil lefo eđəiñwaŋ, rəmwa ndrnəcilo.ŋələnice rəgifi irri reṯo elo, rebərnia," mənna" na cum nəŋođwaṯa lɽo ləñəwara ( iñi ñeɽəwaṯu aŋəno) egal iligano isi lafau ṯa alerəṯe ëđe aldəse. Iŋiga pređ iŋia, rəmwa ndrərldəmuciṯi ndrenia na ndebina ta anerṯe nəmorwa.
Na cum ŋwaria yərəmwa nŋələnice ŋawa elontər. Orn eŋen pređ, leđa lisrayil lafo ləɽwaṯa ŋen ŋwaiña ŋeicia ŋegia rəmwa na ŋegia Musa.Nəṯia đəge, rəmwa rafo rəbwa ŋenŋa iŋi rəfo raɽəṯu Ibraiyim, Isag na Yagob
Na iliga lomən təŋ ŋen leđa lero lebərṯa ŋawa, Rəmwa ndrəlwaɽəṯi Musa, lwaɽəṯu lwandra, na liđi aŋəməiñia ŋawa ano." Orn Musa nəŋreṯe gəđiñəđaṯa rəmwa eŋen leđa neiñwaŋ pređ naŋəboɽi lwandra ñoman ñaɽəjian lafərala gebənṯa gafo galwəɽëṯia. ŋawa nəŋəmiña elwandr ṯa leđa pređ aləṯi, orn rəmwa ndrəciṯi Musaŋ ano na ndraṯa, "gaber agiđ ŋanṯi alo isi igəneicinde.
ŋen leđa lisrayil lerldo eđəiñwa nṯəlaŋ ndređia marldwan, lënəŋulu pređ ildi ləfo lebiđia ŋen ŋegia Rəmwa ldaiye . Nəṯia Rəmwa ndrəpurkađici leđa đəɽe nano iđi rënəŋu rəŋeicilo ṯa alwəfeṯe. Na Musa gafo goɽra kaiñ, na Rəmwa ndroṯe Jasua ṯa aŋəmamađaṯe aŋirldi leđa. Rəmwa com ndrəlwaɽṯi Musa ṯa iliga lənəŋ, riđi arəđwaṯe Nəbi yomən yarno ŋu.
Na Rəmwa ndraṯi Musa ṯa aŋəpoṯe ayein eđəpe ṯa aŋənwane alo isi giđ aŋəwanici. Musa ŋəɽe ŋənwana orn Rəmwa rero rəbəŋiniṯia ŋen ṯa aŋərəmaṯe alo isia. Orn ṯia Musa nəŋaiye na leđa lisrayil ldəmiṯi đwana ñoman ndređia nəɽijin. Orn Jasua nəŋəɽeṯe eđa kulilo gəɽënda tǝŋ . Jasua gafo gaɽo eləŋ geŋəra ŋen ŋanṯa gađəñia na ganaṯa Rəmwa.
Ađam gi-đuməđinia: đəməñia 16:-17