23. ŋen ŋəđələŋənia đəyesu.
Mariam gafo gaməđajənu maje guđərwaṯo eŋen gəbernia Yusəf. ŋen geno ṯa mariam gwondaico, naŋələŋaṯe ŋen ŋanṯa ŋere gerṯa ŋənəɽəŋu. Na gaber gwonaṯa ṯa mariam aŋələŋijini ṯa giđu mənna, nṯia ṯaŋwonaṯo gǝmaneđa ŋaməɽa. ŋen gəmulu gəbəđia ṯia, orn məlaikyəka ndəmeṯa nano iŋuriđ.
Na Məlaiyəka nəŋaṯa,"Yusəf, ŋerṯe agiđəñalo ṯa agəma Mariam wasalo gəlẽɽəŋa. ŋere iŋi ŋafo iŋuŋ ŋeto egusila gəteɽe. Giđ aŋələŋe ŋere ŋaɽorra. Na aləmënci yesu (ŋen ŋënənu ṯia rəmwa ndrabəri), ŋen ŋanṯa gënəŋu giđ aŋëbəri leđa eŋen eŋen ŋeicia.
Nṯia Yusəf naŋəme Mariam na naŋəmaiṯe egeɽa garno wasen gənəɽəŋu, orn gənəŋu naŋerṯe gəmaindra iliga gəmulo gələŋa.
ŋen liga lafo ṯwaiñ ildi ləđëləŋa đəmariam, eləŋ gəroma naŋəlwaɽəṯi leđa pređ ṯa alwërđəni irnuŋ igi gəleđa elden ləpənde lafo. Yusəf na mariam ləṯođe irnuŋ gəbernia Nasiraṯ na labəṯa irnuŋ gəḏawuḏ gəbernia beṯəlam
ŋen ɽrəmaṯo alo yəbeṯəlam, lerṯe lafiđia alo ṯa alwëɽaŋe. Alo isi lëfiđu fəŋu alo isi đwala đeɽəŋau. Naŋələŋe ŋere na laŋgen nəŋəməndaici ŋere nəŋəndri alo isi đwala đəwsaṯa, ŋen ŋanṯa lənəŋulu lero lëberəṯa eɽaŋgar. ldəmanici yesu.
Na uləŋgi, leđa lafo eđəñwa ɽrəmoṯa yaŋala . Ram ram məlaiyəka đəwađalo na đələmñiṯi, na lənəŋulu ldəđəñiṯialo kaiñ. Məlaiyəka ndəđəlaṯi ṯa," ñerṯe ñagiđiñalo, ŋen ŋanṯa egerṯo ŋen ŋəđəŋra nano ŋen ŋanṯa ñaŋ. Almasiya, eləŋ gələŋənṯənde alo yəbeṯəlam.
Mbər ñegeɽəđe ŋen đurri ŋəŋere, na ñagiđi ñafiđi ŋəməndeinu erenəga nəŋəndrini alo eđwala." Na taltal, leđa lwaiña lelo lafo məlaiyəkaiya lanənaica rəmwa đamia, ldaṯa," rəmwa arnanëini ŋaɽrwa elo na alo eleđa ildi rənəŋu roṯəlo ṯa alənanëini đëuṯəralo!"
Na leđa ildi ləsia yaŋala leto alo isi yesu gəfau na ləmafiđi alo isi đwala đəwësəṯa, ŋen ŋarno Məlaiyəka đafo đəlwëɽəṯəlo. Na lafo laŋəra nano kaiñ. Leđa ildi ləsia yaŋala loɽwaṯe alo isi yaŋala yəfau na ldənanaice rəmwa ŋaɽwa eŋen pređ lənəŋulu leno na lasëicu.
Iliga laṯəfr, leđa ildi leləŋeṯo ŋen nisi lalo yanəŋ nwaldaŋ endele ṯaləsëicu đoppa gerṯa đəcaica elo. lənəŋulu lələŋaṯe ŋen ṯa ŋabəŋiđia eləŋ gal yawuḏ igi galəŋəno. Nṯia ldernde egal yəwalano ŋen ŋanṯa alənwane eləŋ. Na ldeṯe irnuŋ gəbeṯəlam na ləfiđi eɽa igi yesu na eṯənanta lefau.
ŋen leđa ildi leləŋeṯo ŋen nəsi lisaicu ŋere ləŋganəga, lukwuđiñəṯialo na lənaice đəmia. Na ldənanice yesuaŋ đənəja iđi đwaiña iliano kaiñ. Nṯia loɽwaṯe eneɽa enen.
Đumëiđənia iga-ađam igi : Maṯṯa; 1 Luka 2