30. ŋen Yesu gəsi leđa ndređia eređia ređ.
Yesu nəŋəđwaṯe leđa lənëɽəŋu ildi ləđweinu ta alërəŋaicəđi irəŋ Gərəmwa na alərëŋaice leđa lwaiña irnuŋ ɽetəɽeteo. ŋen loɽəbaṯo Yesuaŋ nano, na ldəmalwaɽəṯi ŋen iŋi lənëŋulu liđu. Na Yesu nəŋələme ldabəṯe alo yəneŋ yero ŋəɽëlia ano ṯa aluëməñiniano iliga lətəfr. Nṯia lanəṯi iđəpundr na ləwëɽəđaṯi nëṯənḏaŋ gəđəbrlda.
Orn leđa lafo lwaiña ildi lesaicu Yesu na leđa ildi leɽo ređ lefəlda iđəpundr. Na leđa ildi ṯaləldaləño đəbarlda nano ŋen ŋanṯa aləbrugwađaṯe nəñwa. Orn Yesu na leđa ildi leɽo ređ ldrëmaṯe, leđa lafo lwaiña ŋoɽa kaiñ ildi lerəmaṯo, ildi leləṯaṯurəṯia.
Leđa lafo lwaiña leməñaṯo ndređia eređia ređ ildi laɽroa, lerṯe lumaṯa leđa ɽəlda na ñere com. Orn Yesu gafo gerṯo ŋəpaino eleđa. I-Yesu, leđa lafo larno yaŋala isi yero ummia nano. Nṯia nəŋəlarəŋaice na neŋəiđi leđa lefo eŋulo lumma.
Na erregano eloman, leđa ildi leɽo ređ ləṯi Yesuaŋ ṯa," erregano gaɽo na irnuŋ gero gefo ṯwaiñ. Đwaṯo leđa alɽe ṯa alpwañe laŋge ləmen ṯa aldəse.
Na Yesu nəŋuɽəbiṯi leđa ildi leɽo ređ eŋen ṯa," ñaganəñaŋ naicərldo laŋge ləman ṯa aldəse!" ləŋuɽəbiṯi eŋen," ñagiđ ñiđi ṯia ṯau? ñagerṯo ragifi đenəŋ na ləmme liɽijan ikərəŋ."
Na Yesu nəŋəlwaɽəṯi leđa ildi leɽo ređ ṯa alwaɽəṯi leđa alɽaŋe alo eŋəña, eŋəɽo eređia đenəŋ.
Na Yesu nəŋape ragifi đenəŋ na ləmme liɽijan, nəŋənwanəđe elo, na nəŋəbuŋṯi Rəmwa ŋen ŋanṯa aicəba.
Nṯia Yesu nəŋgere ragifi na omme gərase. Nəŋələnaice leđ ildi leɽo ređ ṯa alənaice leđa. Nṯia leđa ildi leɽo ređ talənanaico leđa aicəba, na aicəba nəŋerṯe gəməndađa! Leđa pređ laso na ldəbeṯe.
Nṯia đəge, leđ ildi leɽo ređ ldərərreiđi ŋəsa iŋi ŋero ŋəsnia na ŋafo ŋwaiña ṯa aŋunḏəjaice ŋuməra! ŋəsa pređ ŋeṯo iragif đenəŋ na ləmme liɽijan.
Đumëđənia ig-ñjil: Maṯṯa 14:13-21; Margus 6:31-44; Luka 9:10-17; Yuanna 6:5-15