35. Đumëđinia epapa gerəṯo ŋəbaiyano
Eloman lənəŋ,Yesu gafo gabarəŋacia leđa ŋen ildi leḏəmëcia ṯoləba na leđa ləmaṯan ildi liđu ŋen ŋeica ldərariđo.
Eleđa ləmaṯan ildi leṯo ldəsëci Yesu ləɽaŋa leđala ildi ləceia garno rappa rəllëɽəŋu, Na lanəŋulu lətođe ləmagiya. Na Yesu naŋəluwəɽiṯi ŋenəŋa ŋəđumëđinia.
"Na maje gafo gənəŋ gerəṯo ñere ñəɽəjian ñəɽorra. Na ŋere iŋi ŋəta naŋeiṯi eṯen ṯa, 'Papa, egonaṯa laŋge əllëɽiñi đeiñiđi' Nṯia eṯen naŋəlagarənəṯi laŋge ano ntəm."
"Na taltal iđia igi gəta naŋərarayiđi laŋge pređ əllëɽiŋu naŋəɽe alo nəwaldaŋ na naŋgere algurus yəlaɽiŋu eŋen ŋeica."
"Ndə liga ləbɽo đəge, ŋərwada naŋədođe irənuŋ gakəl alo isi iđia gafo gəbëɽau, na ganəŋu gafo gero gəbərṯa algrus ṯa aŋiliđi ŋəsa. Na ganəŋu naŋənaini ŋəmaɽria iŋi gəfiđu, ṯa aŋəsi əlḏrwa. Ganəŋu gafo gobano na gacoñia ṯaŋonaṯo ŋen ṯa aŋəse acəba igi əlḏur ləusa."
"Orn nṯia đəge, iđia igi gəta naŋaṯa, Igəbəđia ṯau ṯa? ləbai pređ ləpapa gəlaɽiñi alerəṯi laŋge lwaiña lələsa, na məldin ṯəñaiṯo arra ëli. Igiđi ñoɽəbaṯe papa nano gəlaɽiñi na emeɽəđe ṯa eɽeṯe ibai gəlaɽiŋu."'
"Nṯia iđia igi gəta naŋətođe nagabəla egeɽa gəpapa gəlaɽiŋu. ŋen gafo nwaldaŋ məldin, papa gəlaɽiŋu naŋəmanwane na naŋəmaɽeṯe ŋəbaiyaŋəno. Naŋobəđaṯe iđia nano naŋəmaiyariđi na naŋəməɽwëṯi ëñua egorb.
"Orn iđia naŋəmaiṯi ṯa, 'Papa, igiđu ŋen ŋəgia Rəmwa na ŋa. Egero egərəciađaṯa ṯa eɽeṯe iđia gəlaɽeŋa."'
"Orn Eṯen naŋəlwaɽəṯi ibai gənəŋ elorb ṯa, mbu taltal na ŋame ndrenia ini neŋəra na ñialanci ŋere ŋəlaɽiñi! ëncimar ləbɽentəŋia ldoman na nṯəbina erəmanŋ. Nṯia ñiamaɽiñiṯi ŋənṯri ŋəđwo na aləŋreṯər nano, ŋen ŋanṯa iđia gəlaɽiñi gafo gaiyo, orn điñeiđi gamṯo!ganəŋu gafo gaṯo, điñiđi gafiđənu!"'
"Nṯia leđa lədođe ŋenŋa ŋəđəŋəra nano. Iliga lobəlano, iđia goɽra gafo gađaŋa egeɽa. Ganəŋu naŋəne ole na leđa ldərṯia nṯia ŋen naŋəmajibinṯi iŋi ŋəbiđiniya."
"ŋen iđia goɽra geno ṯa leđa labəđia đəŋəra nano ŋen ŋanṯa ṯa orba goɽəbaṯo egeɽa, ganəŋu naŋeiciṯi ano kaiñ naŋerəṯe gəbənṯia egeɽa. Eṯen gəlaɽiŋu naŋəmeɽəđe đətađa egare ṯa alɽe egeɽa na ṯa aləŋəreṯe nano, orn ganəŋu naŋəneđe."
"Orn iđia gëləɽəŋu igi goɽra naŋaṯi eṯen ṯa, 'Inṯliaŋ ini pređ igiđu ŋəmɽria ŋəlaɽəŋa đuwanaṯađa! Egero egəŋađam, na məldin nəŋerəṯe agəñənacia rëldo rənəŋ gerta ṯa ñiđi đəŋəra nano rappara rəlaɽiñi. Orn ndə iđia geṯo gəlaɽeŋa igi gəsaṯaŋa algrus yəlaɽeŋa eŋen ŋeica naŋeṯa egeɽa, namaɽeiñiṯi ŋəmpɽo ŋeŋəra!"'
"Na eṯen naŋəmuɽibiṯi eŋen ṯa, ya iđia gəlaɽiñi, lagafo caicia, na laŋge pređ egerəṯəlo lalaɽəŋa. Orn ŋen ŋafo ŋobe ṯa aləŋəreṯər nano, ŋen ŋanṯa oralo gafo gaiyo, orn điñiđi gaməṯo. Ganəŋu gafo gaṯo, orn điñiđi gafiđinu!"'
Đumëđənia egađam:Gə-Luka 15:11-32