39.ŋen ŋəđirənṯacia đi-Yesu

Nṯia uləŋgano gafo gaɽo. Ṯruwa naŋəbɽe Yesuga egeɽa geləŋ goɽra gəkana ŋen ŋanṯa aŋəmegeɽəđe. Buṯrus ṯaŋəmaiyətateṯo alo nuwaltaŋ ilëɽwəŋ. ŋen Yesu gəmamaiyənu egeɽa, Buṯrus naŋəṯađəni ndëur gəbana sia.

Leđa ləkanna nalənji Yesu iđirənṯacia alo egeɽa. Lanəŋulu lnaiđe ŋen ŋwaiña ŋəpiano ŋəɽo ŋəɽuwain iŋu. Orn nṯia, ŋəɽwata eŋen naŋerəṯe ŋəɽuwaṯa elorb, nṯia nələŋ nəkanna nanerəṯe nəfiđia ŋen ŋənəŋ ŋəfo məna iŋu. Orn Yesu naŋerəṯe gəlwaɽa ŋen ŋənəŋ.

Orn đəge, eləŋ gəkanna igi goɽra naŋəseici Yesu siano naŋəmaiṯi ṯa,"lwaɽəṯənde, aganəŋa agaɽo Aləmasiya, iđia gə-Rəmwa iri rəmaṯia?"

Yesu naŋaṯa,"egaɽo, na ñiagiđi ñiañəseici egəɽaŋalo eŋələŋe ŋə-Rəmwa na igiruw elo."Eləŋ goɽra gəkanna naŋuɽi erenia ŋenəŋa ŋeɽiano na lanəŋulu nalɽrijiṯi nələŋe ole nəmaṯan nalaṯa,"ñiagaber ñiagonaṯa ŋen ŋənəŋ təŋ ṯa aŋəlwaɽini! Ñiagano ñiaŋ bəɽan gəlwaɽo ṯa ganəŋu gaɽo iđia gə-Rəmwa. Đakəmiya eđalo điđi ađəɽeṯe ṯau?"

ŋen nələŋ nəkanna nuɽəbəjiṯo eləŋ ole igi goɽra,"Lanəŋulu ləmakəme ŋəɽañiŋa!" Lanəŋulu ləmatatëri isi, ləmaṯabṯe nano, lëmapi, na ləmananace ŋen ŋubwa.

Ndə Buṯrus gafo gəđaṯurṯia alo eɽia ndëur, ibai naŋəmanuwane gənəŋ gəɽbwa naŋəmaiṯi ṯa,"Aganəŋa com ñiagafo Yesuga!" Orn Buṯrus naŋəmablaje. Na ŋere ŋomən ŋəɽbwa naŋəlwaɽe ŋen ŋəɽuwaṯo, Orn Buṯrus naŋəmablaje təŋ. Orn iliga lənṯurṯu, leđa naləmaiṯi ṯa,"Ñiagaləŋeṯo ŋen ṯa aganəŋ ñiagafo Yesuga ŋen ŋanṯa ñiageṯo alo i-Jalil."

Orn Buṯrus naŋəlwaɽe đeṯəmđa, naŋaṯa, "Rəmwa riđi arəñiaboŋe ndə egələŋeṯo maje igi!" Na taltal, Đwaṯa nađare, na Yesu naŋəređe alo naŋənwane Buṯrus.

Nṯia Buṯrus naŋëɽe aləsoŋ na naŋare kaiñ. Iliga lopəlano, Yauđa, igi gəneiđəma, naŋəseci ŋen ṯa nələŋ nəkanna nalwaɽo eŋen ṯa Yesu aŋaiye. Yauđa naŋəɽeṯe giruwano kaiñ na ganəŋu naŋëɽe ndëur na naŋəɽiñini bəɽan.

Ilwaldiṯano gomən ram, Nələŋ nəkanna naləmamaṯa Yesu Bilaṯus nañua, ŋələŋe iŋi ŋəleđa leɽo Roma. Lanəŋulu ldəđaṯurṯi ŋen ŋənəŋ iŋi ŋafo məna ṯa liđi alɽəmaɽeiñe. Bilaṯus naŋeɽəđe Yesu ṯa, Aganəŋa agaɽo eləŋ gal yawuḏ?"

Yesu naŋəluɽəbiṯi eŋen ṯa, "ñiagalwaɽo ṯia, orn ŋələŋe ŋəlaɽiñi gerəṯa ŋalo. Ndə ŋen ŋafo ŋaɽo ṯia, ləbai əllëɽiñi gabanṯa ṯa labəđeiđiñi. Egeṯo alo ṯa elwaɽe đeṯəmđa đə-Rəmwa. Leđa pređ ildi lubwa đeṯəmđa na ṯalno ŋen ŋəlaɽiñi. "Bilaṯus naŋəmaiṯi ṯa, "đeṯəm đaɽo wande?"

ŋen ləɽəñiađaṯo đəɽwata eđen Yesu ŋəla, Bilaṯus naŋëɽe leđa nano ndëur naŋəleiṯi ṯa,"egero igəfiđia məna emaje igi."Orn nələŋe nəkanna narəjiace ole nalaṯa,"aɽrəma iđuɽi!" Bilaṯus naŋəluɽibiṯi eŋen naŋaṯa,"ganəŋu gero ŋen ŋənəŋ ŋəfo məna."Orn lanəŋulu naɽrjiace ole kaiñ. Nṯia Bilaṯus naŋəlwaɽe iliga liɽijin naŋaṯa,"Ganŋu gero ŋen ŋəfo məna!"

Bilaṯus naŋəđiñiṯi leđa ṯa liđi alinṯaini, nṯia ganəŋu naŋonaṯe ŋen ṯa aŋəlnaje ṯruwa ṯa aləri Yesu iđuɽi. Ṯruwa đəroma naləɽi Yesu đar đəŋələŋ na naləmari rri nenda rarəno ləbərneṯe ləŋələŋe. Lanəŋulu naləmađaməje eŋen nalaṯa ṯa, "Səcur, eləŋ gal Yawuḏ!"

Đumëđinia egađam gə-Maṯṯa 26:57-27:26; Markos 14:53-15:15; Luka 22:54-23:25; Yuanna 18:12-19:16