44. ŋen Buṯrus na Yuanna leiđi eđa igi gətəməđeici leđa laŋge

Eloman lənəŋ, Buṯrus na Yuanna lafo labɽa alo egeɽe gə-Rəmwa. Ndə lɽrəmaṯo ig-ëur yal yakəl, lənëŋulu ldənwane maje igi gəfo gətəməđeiṯia algrus.

Buṯrus naŋəseici maje igi gəɽo ebəjo naŋaṯa,"Egero aləgurus ṯa eŋanaje. Orn igiđi eŋanaje waŋge igi egerəṯo. Igərəŋ gə-Yesu, tođo na ŋerənde!"

Na taltal, Rəmwa nareiđi maje igi guma, na gənəŋu naŋətođe ṯaŋerəndo na ṯaŋagaporṯo elo, na naŋənaje Rəmwa đamiya. ŋen naŋajibinṯi leđa egal yakəl.

Leđa nalela lwaiñia eɽo ŋen ŋanṯa aləseici maje igi gaiyiđinu. Buṯrus naŋəleiṯi ṯa,"Ñiagoɽəđaṯo elo eđa ŋen ŋanṯa maje igi gaiyiđinua? Ñiagero ñiagəŋəmeiđi ŋabɽaŋa eŋaiñ walla đəŋrađa eđaiñ, Orn ŋabɽaŋa na đowanaṯađa i-Yesu iđi đeiđi maje."

"Ñiaganəñiaŋ ñiagaɽo leđa idi ṯruwa đəroma iđi đəlwaɽo ṯa ađəɽeiñe Yesu. Ñiagaɽeiño eđa igi gənanaeđia đəmṯia, orn Rəmwa ratuđima eŋəɽaiñ. ŋen ñiagero ñiamaləŋeṯa na ṯa ñiagabəđia ṯau, Rəmwa raɽəñiađaṯo ŋəmëɽria eŋalo egal nabiya ŋen yaṯa Masiya giđi aŋənaneini ŋen ŋubwa na aŋaiye. Nṯia, ŋgiṯur ŋen eŋalo ŋeica aŋwësini na ñoɽəbaṯe Rəmwa nano."

Nələŋ naliyayəkəl nafo naceiano eŋen iŋi Buṯrus na Yuanna ləɽwato.Na lanəŋulu naləgəndi na naləɽi egara. Orn leđa lwaiñia ləndi ŋen iŋi Buṯrus garəŋëjilo, Na leđa ləndi ŋen ŋi-Yesu Elaina garəno 5,000.

Ilwaldɽiṯano gomən, nələŋ nəgana naləmamaṯe Buṯrus na Yuanna eləŋ nano kaləkana na leđa ləmaṯan enələŋ. Lanəŋulu naleɽəđe Buṯrus na Yuanna,"Ñiageiđi maje igi gəgəro aŋəno ŋabɽaŋa ŋəsëgi?"

Buṯrus naŋəluɽəbiṯi eŋen ṯa,"Maje igi gəndəđaṯrwa nëñua gëiđinu ŋabɽaŋa ŋi-Yesu Al-əmasiya. Ñiaganəñiaŋ ñiagəɽu Yesu nṯuɽi, orn Rəmwa narëmaduđi eŋəɽaiñ gəməṯo təŋ! ñiaganeiñiaŋ ñiaganeđəma, orn ŋen ŋero ñiagiđi ñaiyabərni ilda ŋabɽaŋa ŋi-Yesu!"

Nələŋe nəmajəma naloɽəđaṯe elo ŋen Buṯrus na Yuanna ləɽwata đawṯađaralo ŋen ŋanṯa lënəŋulu ləseicu ŋen ṯa majande ildi lero lələŋeṯa ŋen. Orn lënəŋulu nalalɽəŋəđeini eŋen ṯa majande ildi lafo lafo Yesuŋula. Iliga ləgərəñiaṯalo Buṯrus na Yuanna, lënəŋulu naləŋgiṯi naləbɽe.

Đumëđinia eg-ađam:G-Amal 3:1-4:22