46. ŋen Bulus gëndu ŋen ŋəlmasiya

Sawul gafo gaɽo maji gëta igi gerəmëṯa yar yəleđa ildi leɽəño Isṯəfanus. Gënəŋu gero gəbëndia ŋen ŋəyesu, nṯia ṯaŋənanaico leđa ŋen ŋəbwa ildi lëndu ŋen. Gënəŋu gënṯu eneɽa pređ alo Ursalim nəŋakëndi leđa ɽrwa na ɽrlda na nəŋaləkëɽi egaraŋ. Orn eđa goɽra gəkana naŋëŋənḏi Sawul ṯa aŋəɽe irnuŋ galo iḏimiska ṯa aŋəgëndi leđa ɽrəmwa na aŋaleɽe alo Ursalim.

Orn ndə Sawul gafo eđađ alo iḏimiska, arrerre nəŋirəwa elo nəŋamawađe nano, na nəŋiɽəṯi iđuđa. Sawul nəŋəne eđa gəbaṯa, "Sawul! Sawul! Agaiñənanaicia ŋen ŋubwa eđa?" Sawul nəŋeɽəđe, "agaɽo esegi, ya eləŋ?" Yesu nəŋəmuɽəbiṯi eŋen ṯa, "fiñi Yesu. Ñiŋgi agaiñənanaicia ŋen ŋubwa!"

ŋen Sawul gatwođo, gënəŋu ŋerəṯe gasiđia. Orn rappa rëləɽəŋu lmakëndi eraŋ ldamaiyəṯe alo iḏimiska. Sawul gero gasa walla gəṯia ñoman ñiɽijin

Na ṯaləmis yëni yənəŋ alo iđimiska yəbarnia Ananiya. Na Rəmwa ndrəmalwaɽəṯi ṯa, "mbu ŋaɽe egeɽa igi Sawul gëɽaŋau. Aɽëma rəŋ nano ŋen ŋanṯa aŋəsiđi təŋ. "Orn Ananiya nəŋəmuɽəbiṯi eŋen ṯa, "ya eləŋ, igano eŋen ŋəmaji igi gənanaica leđa ŋen ŋubwa ildi əllaɽəŋa ltəɽe." Orn Rəmwa ndrəmeiṯi ṯa, "mbu ŋen ŋanṯa egawoṯoma ṯa aŋarəŋeiđi irəŋ gəlëɽəñi eleđa lal yawuḏ na eleđa lǝmaṯan iŋulu. Gënəŋu giđi aŋənaneini ŋen ŋubwa igəirəŋ gəlëɽəñi."

So Ananiya gabəɽo Sawul nano, nəŋëməɽi raŋ nano, nəŋaṯa, "Yesu, igi gaməñiṯiŋa eđađ ndə ageṯo ëli, gađwaṯiñi ŋa nano ŋen ŋanṯa iŋiđi agasiđia na ṯa ŋunḏeini usilaga gatəɽe." Nṯia ram Sawul nəŋəɽəwađǝṯe gasiđia təŋ, na Ananiya nəŋǝmanaci mamuḏiya. Orn Sawul nǝŋase ŋǝsa đəge na nǝŋafiđi ŋabəɽa.

Nṯia, Sawul ŋəṯwođe ṯaŋërrəŋaicu al yawuḏ ŋen alo iḏimiska, nəŋaṯa, "Yesu gaɽo iđia gərəmwa!" Na al yawuḏ pređ nirǝwano ṯa gerṯa fəmaji igi gəfo gonaṯa gegəra leđa ildi lëndu ŋen na gëndu ŋen ŋəyesu! Orn Sawul ṯaŋəsiđu eŋen leđala lal yawuḏ, ṯaŋəlërrəŋaicu ṯa Yesu gaɽo al masiya.

Orn eñoman ñwaiña, al yawuḏ niyəɽwataiđe eŋen ṯa aiyəɽiñe Sawul. Lënəŋulu ləđwaṯe leđa ṯaɽrəmoṯo ëuwer yirnuŋ ṯa almaɽiñe. Orn Sawul nəŋëne ŋen iŋi, na rappa rëləɽəŋu ndrəmađətəma na ndrəmëñəma. Ulǝŋgi gənəŋ ldəmëɽi egone ldəmirǝwi nuṯa. ŋen Sawul gəmëño alo iḏimisk, ṯaŋəməñađaṯu nəñwaŋ iđërəŋiđia ŋen ŋəyesu.

Sawul gabəɽo alo Ursalim ṯa alobəđiđe leđala ləđweinu, orn lafo lađəñəma. Orn eđa gəneŋ igi gëndu ŋen gəbarnia Barnaba gaməma na geṯomaiya leđa nano lǝđweinu na nəŋəlwaɽəṯe fəṯu Sawul garəŋiđu ŋen alo iḏimisk. Naṯia, leđa ildi letateṯa Yesu lëndi ŋen ŋəsawul.

Orn leđa ildi lalaldəđənu alo ŋen ŋanṯa ŋen ŋubwa ŋatwođo alo Ursalim labəɽo nwandəŋ irnuŋ kanṯakiya na lərëŋaiđi ŋen ŋəyesu. Orn leđa ləmaṯan alo yanṯakiya lero leɽia al yawuḏ, orn iliga lənəñwaŋ, lwaiña iŋulu com ildi lëndu ŋen, Barnaba na Sawul labəɽo ṯu ṯa alarəŋiđi ŋen ŋəmajan eleđa ildi lëndu ŋen ŋəyesu na alonḏəce kanisa. Na fəŋu alo isi Yanṯakiya leđa ildi lëndu ŋen lënjənu "leđa letateṯa ŋen ŋəyesu."

Iliga lənaŋ, ŋen leđa ildi lëndu ŋen alo Yanṯakiya lafo laɽaŋa ŋorwaṯaŋa na laṯurṯia Rəmwa, orn usila gatəɽe nəŋəluwaɽəṯi ṯa, "ëɽr Barnaba na Sawul aləsoŋ ṯa aləñiṯi ŋəmëɽria iŋi igwundəđeiculu ṯa aləñiṯi." Nṯia kanisa đalo Yanṯakiya đəṯurṯia Rəmwa eŋen ŋəbarnaba na ŋəsawul na nəŋaɽəlo raŋ nano. Na nəŋələđwaṯe ṯa alərəŋiđi ŋen ŋeŋəra ŋəyesu egal ywaiña təmətəm. Nṯia Barnaba na Sawul lərëŋaicu leđa ŋen ləŋoɽa ŋwaiña, na leđa lwaiña ildi lëndu ŋen ŋəyesu.

Đumëđənia ig-ađam: Amal ar rasul 8:3; 9:1-31; 11:19-26; 13:1-3