47. ŋen Bulus na Sila lafo alo y-Filibi
Ndə Bulus gebëɽo alo eneləŋe n-Roma, gënəŋu naŋanəjini irəŋ gə-leđa l-Roma, "Bulus. " E-Loman lənəŋ, Bulus na đappa đëləɽəŋuŋ Sila labəṯe irənuŋ g-Filibi ṯa alərəŋiđi ŋen ŋəmaijən iŋi ŋəŋəra ŋ-Yesu. Lënəŋulu labəṯe alo đəbarlda nano alo isi leđa luwərariđia iđəṯurṯia Rəmwa. Lënəŋulu lobəđiđo wuji ga gəbarniya Liḏiya igi gafo gəbirldiđicia leđa laŋge. Gënəŋu gafo gubwa ŋenəŋa ŋə-Rəmwa na ṯaŋukwuđəñiṯu alo.
Rəmwa narigiđi arra gə-Liḏiya ṯa aŋəne ŋen ŋi-Yesu, gënəŋu na leđa leɽa lənini Mamuḏiya. Gënəŋu naŋeɽəđe Bulus na Sila ṯa alɽaŋe lda egeɽa gəlëɽəŋu, naṯia lënəŋulu ləɽaŋe ŋuŋ na leđa leɽa gëləɽəŋu.
Bulus na Sila lafo lorəbəđiđia ciacia leđala alo isi yađəṯaṯurṯia Rəmwa. Ñoman pređ ndə lënəŋulu labərndeṯa alo isia, ŋere ŋaɽo ibai giɽəndiya taŋəɽəteṯo alo. Garno ŋen pređ iŋi ŋənusila neica ŋënəŋu naŋəlwaɽəṯi leđa ŋen iŋi ŋiđi aŋela, nəŋiđi gurus ywaiña garəno ŋen ŋëləɽəŋu gəɽwato.
ŋere iŋi ŋaɽo ibai ŋafo ŋarəjiaca ole ŋen ləbərnda, "Majande ildi lafo laɽo ləbai ɽ-Rəmwa iri roɽra rafo elo. Lënəŋulu latwatiṯia leđa fəṯu liđi aləbərni! "ŋere iŋi ṯaŋiđu ṯia ciacia ṯa Bulus aŋəciṯiano.
Naṯia eloman lənəŋ ndə ŋere iŋi ŋaɽo ibai gənusila neica ŋerəciacia ole, Bulus naŋəređe alo na naŋeiṯi nusila ini nafo eŋere ṯa, "Irəŋga gi-Yesu, məñəŋ eŋere iŋi. "Na taltal nusila neica nanəŋəməñe eŋere.
Maje igi gəfo giđu ŋere ŋaɽo ibai naŋeiciṯi ano kaiñ! Lënəŋulu naləŋeini nano ṯa ndə nusila neica nero, ŋere iŋi ŋəɽo ibai ŋaber ŋiđi aŋəlwaɽəṯi leđa ŋen iŋi ŋiđi aŋəfeṯe. Naṯia iliga ildi leđa laber liđ aləniđe algrus esen ŋen ŋanṯa ŋënəŋu ŋiđ aŋəlwaɽəṯi ŋen iŋi ŋiđi aŋəfeṯe.
Naṯia leđa idi ləŋere iŋi ŋandənu ŋenəŋa ŋeica naləndi Bulus na Sila alo eŋələŋ ŋə-Roma, lëbəlo na nəlaɽi egarəŋ.
Lënəŋulu laɽi Bulus na Sila egal isi yeŋəra ŋobe na com lënəŋulu naləgagəsini rəmanəŋa. Naṯia məldin uləŋgi ano gakəl, Lënəŋulu lafo labaləŋa ŋələŋa ŋəđənanacia Rəmwa đamia.
Na taltal, ləbate nalədasëni lwaiña ŋəma! Nauwər pređ nənarra nanəgagiđini, na nuriđa pređ ini ləfo ləgaseiniliya naluguɽi.
Eđa igi gənwanđia egarra naŋətođe iŋuriđ, na ŋen gəseicu ṯa nauwər pređ nagagiđənu, ŋen nəŋëmajəbənṯi! Gënəŋu naŋəɽi ŋen eŋəṯɽa ṯa aŋgace leđa laməño, naṯia gënəŋu naŋəɽi ŋen ṯa aŋəɽaiñini bɽan. (Gënəŋu galəŋeṯo ŋələŋe ŋə-Roma ndə gəŋgiṯu leđa ldobəđe giđi aŋəɽaiñini.) Orn Bulus naŋəmanwane naŋərace ole naŋaṯa, đ̱ruŋ! "ŋerəṯe agagera aŋəno. ñëgəni ëli pređ."
Eđa igi gəbagəndia leđa naŋəbɽe Bulus na Sila nano na naŋəmeɽəđe ṯa, "Igəbəđia ṯau ṯa ñiabərni?" Bulus naŋəmuɽibiṯi eŋen ṯa,"Ëndu ŋen ŋə-Yesu, igi gəɽo eləŋ, ŋa na eɽa gəlëɽeŋa ñagiđi ñiabərni. "Naṯia eđa naŋəmamaṯe Bulus na Sila egeɽa gəlëɽəŋu na naŋəlwasaje irëɽi. Bulus naŋəlarəŋeici ŋen ŋəmaijən ŋə-Yesu egeɽa egen.
Maje igi gəfo gənwanəđia egaraŋ na eɽa gəlëɽəŋu nələndi ŋen ŋi-Yesu na lënəŋulu lənanini Mamuḏiya. Ganəŋu naŋənaje Bulus na Sila acəba lënəŋulu ləse na ləŋəreṯe nano eɽo.
Eloman lomən nələŋe nalo yirənuŋ gakəl naləŋeini nano ṯa Bulus na Sila ildi ləfo landənu ṯa aləŋgaṯe alo yə-Filibi. Lënəŋulu naləfəldëiṯi Liḏiya na rappa rəmaṯan iri rəlëɽəŋu naṯia lənəŋulu naləŋgaṯe alo irənuŋ gakəl. Naṯia ŋen ŋəmaijən ŋi-Yesu nəŋəlalađəni ano, na kənisa tađeməñađaṯo nəñwaŋ.
Bulus na nələŋe nǝŋəɽwa ŋəleđa ildi lëndu ŋen ŋal masiya laɽe alo irənuŋ gwaiña, ṯalɽwaɽiṯu leđa na ṯaldërrəŋeicu ŋen ŋəmaijǝn ŋi-Yesu. Lënəŋulu naləwërđi nabređa nwaiña ṯa aləbɽe leđa nano na aldërrǝŋeici ŋen ildi ləndu ŋen ŋi-Yesu ekal yəkəl. Nabređa ini nəmaṯan naɽo ađam getəɽe.
Đumëđənia egađam:Gəŋəmaɽria 16:11-40