50. Ɖoɽəbəđia đi-Yesu
Garno nṯəlia 2,000, leđa lafo lwaiña ildi ləna ŋen ŋəmaijən ŋə-Yesu Almasiya alo nano pređ. Kənisa đafo đaməñađaṯa nëiñwa. Yesu naŋaṯa ṯa gënəŋu giđi aŋoɽəbəđia iliga lənḏurṯu alo. Orn ŋen ŋarno gënəŋu gero goɽəbəđo məldin, gënəŋu giđi aŋiđi ŋen ŋarno gəɽu.
ŋen ŋarno ləgəṯurṯiar Yesu ṯa aŋoɽəbəđia, Rəmwa rwonaṯa ṯa aɽəŋr eŋen ŋəŋəra na iŋi ŋəmiđia gəŋəra nano. Gënəŋu com gwonaṯa ṯa aləɽwatiṯr leđa ŋen ŋəŋələŋe ŋëləɽəŋu. ŋen Yesu gafo alo gënəŋu gaṯa," Ṯaləmis əllëɽəñi yiđi ayərəŋaiđi ŋen ŋəŋəra ŋəŋələŋe ŋə-Rəmwa eleđa pređ lalo təmətəm, Orn na ṯia liga lənḏurṯu liđi alela."
Leđa lwaiña məldin ildi lero ləna ŋen ŋə-Yesu. ŋen gënəŋu gəmulu goɽəbaṯa elo, Yesu galwaɽəṯu leđa ildi lëndu ŋen ŋëləɽəŋu ṯa alərəŋaiđi ŋen ŋəmaijən eleđa ildi lero ləna ŋen ŋëləɽəŋu kwai kwai. Gënəŋu naŋaṯa," mbər na ñiđi ṯaləmis ŋoɽwa ŋəleđa pređ!" na," nii nore nwonaṯa ṯa anwanḏəni!"
Yesu naŋaṯa com ṯa," ebai gero goɽra gaməñaṯo eləŋ gëləɽəŋu. Garno ŋələŋe ŋalo ŋəgeiñe, lënəŋulu liđi alndənace ŋen ŋubwa na alndəɽəñe ŋen ŋanṯa ñi. Orn ṯia eŋen ŋalo isi ñagiđi ñafeṯe eŋen ŋubwa kaiñ, bǝɽeṯor nano ŋen ŋanṯa egađəmo seṯan, isi yəbərndiya alo. Ndə ñagerṯo đwonaṯa iñi, nṯia Rəmwa riđi arndəbri!"
Yesu naŋəlwaɽiṯi Ṯaləmis ilëɽəŋu đumëđəniađa eŋen iŋi ŋiđi aŋəfeṯe iliga lənḏurṯu alo. Gënəŋu naŋaṯa," maje gəwađo ŋwana ŋəŋəra igii gəlëɽəŋu. ŋen gafo iŋuriđ, eđa gəgeiyema nəŋela na nəŋəwađe ṯoɽwar eŋwana , na gënəŋu gabəla."
" Ndə nuɽi nobəđo, ləbai ləmaje ldela ldəmalwaɽəṯi ṯa,'ya eləŋ, gerṯe agawađo ləđia ləŋəra igii. Orn ṯoɽwar đeṯo ŋga?' eləŋ naŋuɽəbiṯi eŋen ṯa,' eđa igi gəgeiyeiñe gəwađalo.'''
"Ləbai luɽəbiṯi eləŋ eŋen ṯa,' agwonaṯa ṯa ñəcəđaṯe ṯoɽwar alo?' Ndo. Ndə ñagiđu ṯia, ñagiđi ñaləcəđaṯe alo ŋwanaŋa com. Đərur liga alela ildi ləđwanḏa na ṯia igiđi ireiđi ṯoɽwar alo ñakase ṯa ađuɽəni, Orn mər ŋwana ñalëɽi eđwarra đəlëɽəñi.'''
Orn ṯaləmis niyərǝṯe yələŋeṯa ŋen ŋəđumëđənia, nṯia yanëŋulu niyeɽəđe Yesu ṯa aŋələgirṯi ŋenano. Yesu naŋaṯa," eđa igi gwađo ŋwana ŋaŋəra gënəŋu garno almasiya. Gi gaɽo alo. ŋwana ŋaŋəra ŋaɽo liđia ləŋələŋe ŋə-Rəmwa."
" Ṯoɽwar đaɽo leđa ildi lə-seṯan. Eđa gageñe igi gwađo ŋwana garno seṯan. Đwanḏa đarno liga lađəməndëđənia đənḏurṯu alo, na leđa ildi lwanḏa larno Məlaiyəka yə-Rəmwa."
" Ndə liga leṯo lađəməndëđa alo, Məlaiyəka yiđi ayərarreiđi leđa pređ ildi ləseṯan na yiđ aiyəlëuwəṯi isia yibuwa, alo isi lënəŋu liđi alarre na aləsaṯe eŋađ eŋen ŋubwa kaiñ. Orn leđa ildi luđərwaṯu eŋen liđi aləwađialo larno ëđəñina eŋələŋ ŋeṯen Rəmwa."
Yesu naŋaṯa com ṯa igiđi ñoɽəbaṯa alo ŋen liga ləđəɽəñiađaiđia alo ləmulu leṯo. Gënəŋu giđi aŋoɽəbəđia ŋen ŋarno gafo gəbeinu elo,nṯia, aŋəno yëləɽəŋu yiđi aiyəseini na aŋela isbwoɽu elo. Iliga ildi Yesu giđi aŋoɽəbəđia, leđa pređ ildi laiyo eŋen igal Masiya liđi altwođe eŋəɽaiñ na alobəđiđelda elo.
Na leđa ildi laməṯia məldin igal Masiya liđ altwođe na aɽreiđi leđala ildi lafo igal masiya ildi ltwođo eŋəɽaiñ. Lënəŋulu pređ liđ alfeṯe Yesu ŋəla. Nṯia đəge, Yesu giđi aŋfeṯe leđala lënəɽəŋu eđëuṯaralo na iđərreiđia ŋen đəbəɽəbəte.
Yesu gëɽu ŋen ṯa giđi aŋanaice eđa gənëŋ ṯaj ndə gëndu ŋen ŋəlëɽəŋu. lənëŋulu liđi alfeṯe Rəmwara na aɽəŋe eđëuṯaralo bəɽəbəte.
Orn Rəmwa riđi arakəme leđa pređ ildi lero ləbëndia ŋen ŋəyesu. Rënəŋu riđi aŋəlawəṯi egəṯa goɽra goliano, alo isi liđi ṯalaro na ṯaləsaṯo eŋađ eŋen ŋubwa bəɽəbəte. Isia isi yəber yabəiṯia yiđi ṯayəluɽu, na luđua laber liđi aləŋgiṯi kwai kwai ṯa aldəse.
Ndə Yesu goɽəbaṯo alo, gënəŋu giđi aŋəmandađe Seṯan na ŋələŋe ŋëləɽəŋu. Gënəŋu giđi aŋawəṯi seṯan egəṯa goliano igi gerṯo isiano isi ywoɽa bəɽəbəte, leđala pređ ildi laŋənṯu ŋen ṯa lətateṯa na lero lađəñiađəṯa Rəmwa eŋen.
ŋen ŋanṯa Aḏam na Awa lero lađañəđəṯia Rəmwa eŋen na ləmaṯo ŋen ŋeicia alo, Rəmwa ndrəlabuŋe na ndraɽi ŋen ṯa aŋələmëndađe. Orn iliga lənŋ Rəmwa riđi ariđi elo gəmajan na alo yəmajan isi yiđi ayərəjađaṯe.
Yesu na leđa əllëɽəŋu liđi aləfeṯe alo yəmajan, na gënəŋu giđi aŋirldi ŋələŋe bəɽəbəte elaŋge pređ ildi ləmaṯia. Na gënəŋu giđi aŋəlɽređeṯe ŋwal isi na ŋen ŋəbuwa, đəjano, đara, ŋen ŋeicia, ŋen ŋeɽeno walla ŋəɽaiñ laber liđi aləfeṯe. Yesu giđi aŋirəldi ŋələŋe ŋëləɽəŋu iđëuṯəralo na eđəɽwaiciđia,na gënəŋu giđi aləfeṯe leđala əllëɽəŋu bəɽəbəte.
Đumëđənia ig-ñjil: Maṯṯa 24:14; 28:18; Yuanna 15:20, 16:33; Ruiya 2:10; Maṯṯa 13:24-30, 36-42; 1Ṯasəluniki 4:13-5:11; Yagub 1:12; Maṯṯa 22:13; Ruiya 20:10, 21:1-22:21