1. Thilsiam

Thil tinrêng hong insiam dan chu mangka hi a chang. Pathianin khawvel nih thil siam kapai hi ni rukka sûngin a siam a. Pathianin rinêng a siam zoi chun a rongin a zîng mupa, i hom a lân siam naw a. Pathian Thlarau chun tui chung hei chu a op rêt a.

Chun Pathianin, “Êng hong om rise!” a ti a. Kachun êng chu a hong om ta a. Pathianin êng chu a en a, ṭha a ti fe a, êng chu “Sûn” a sak a. Kachun Pathianin sûn nih zîng chu a ṭhena, izîng chu "zân" a sak a. Pathianin thilsiam ni hmasak chema a siam chu sûn a chang.

Thilsiam a ni hni ni chun Pathianin rinêng chung tiang chun rivân a siam a. Hnuai tianga tui nih chung tianga tui chu ṭhenin a kâra chun rivân a siam a.

Ni thum ni chun Pathianin hnuai hul aṭang chun tui chu a ṭhen a. Hnuai hul chu "khawvel" a sak a, tui chu "tufinriat" a sak a. Pathianin a thilsiamhei chu a ena ṭha a ti êm êm a.

Kachun Pathianin, "Rinêng hin thlâi chi nih thingkung chi tinrêng hei chu isua rise," a tia, mangkatak chun a hong om a. Pathianin a thilsiamhei chu a ena, ṭha a ti êm êm a.

Ni li ni chun Pathianin ni nih thla nih arsihei khi a siam a. Pathianin sûn nih zân, kum nih hunbihei hawi chiangna dingin khawvela hin êng a siam a. Kachun Pathianin a thilsiam hei chu a ena, ṭha a ti êm êm a.

A ni ringa ni chun Pathianin thil chi tinrêng tuia inhliai thei kapai nih va chi tinrêng chu a siam a. Kachun Pathianin a ena, ṭha a ti êm êm a, mal a sawm hoi ta a.

Thilsiam ni rukka ni chun, Pathianin, "Ramsa nih ran chi hrang hrang hong om rise!" a ti a. Kachun a ti angka tak chun a hong om ta a. Ṭhenka chu vul chi nih rinênga vokinvâk chi hei an hong chang a. Mahei chu a ena, ṭha a ti hoi êm êm a.

Pathianin, “Eimani in angpuiin, ei angka chia in mihriam siam ei tih. Anni chu rinêng nih ran hei chunga chun thu an neina dingin,” a ti a.

Kachun Pathianin pil a lâka, mihriam a siam a, ân thuak khuma nunna a pêk a. A rihming chu Adama a chang. Pathianin rihuan a siam a, a enkol theina dingin Adama chu machun ân omtir a.

Rihuan inlâina taka chun Patianin thingkung danginlam tak inhnika-nunna thing nih sia nih ṭha hawina thing chu a phuna. Pathianin Adama chu rihuana theira kapai chu nin fa thei, sia nih ṭha hawina theira hin rawchu nin fâk ding a chang nawh, nin fâk chun thi nghâl nin tih, a ti a.

Pathianin, “Mihriam chu a mân khât chaia om chu a ṭha nawh,” a ti a. Changhomsiala ran laia khatka hom chu Adama inpawlpui thei an om naw a.

Kachun Pathianin Adama chu imu inhnik fêkan ân initir a. Adama nâkru chu a lâk a, nupang a siamna ta a, chun a hniangah a hong ṭhui a.

Adama chun a hmu chun, “E khai! Ma hi chu ki angka chia a chang.’Nupang’ ti chang rise a san chu ipa aṭanga mi a chang leiin” a ti a. Maleiachun ipa in a nupui tum a ti a, a nu nih pa kal khal a tih.

Pathianin ama in angpuiin ipa nih nupang a siam a. Mal a sawm a, an hniangah, “Nâi nih tu tamka nei ula, rinêng hi lua sip roi,” a ti a. Pathianin a thilsiam kapai hei chu a en a, ṭha ati êm êm a. Mahei hi a ni rukna a a siam an chang.

Ni sari ni a hong tlung chun, Pathianin a thilsiam chu a zoi ta a. A sinthaw kapai aṭang chun ân ngham ta a. Ni sari ni chu mal a sawm a, a thianginhlimtir ta a, asan chu ma ni hi Pathianin a sina inthokin ân nghamna ni a chang leiin. Mangka hi a chang Pathianin khawvel nih a sûnga om kapaihei chu a siam dân.

Genesis 1-2 sûng aṭanga Bible thu lâk suak a chang.