Təsurnat

Chapter 1

¹ Awa nak Buləs, imosan amaskasaw fəl əddəlil n Ǝlməsix ɣaysa, nak d əmidi-nana daɣ əzəgzan Timotay, ənnanen əhulan-in əməri-nana Filemona n əmadhal-nana, ² d Ǝlkənisat ta tətamanayat daɣ ahan-nak. Nəhul-in deɣ təmidit-nana daɣ əzəgzan Affəya d Arxifus əmadhal-nana daɣ təbəllant. ³ Izazzabbat-du fall-awan a Məššina di n Abba-nana əd ɣaysa Ǝlməsix, Ǝməli-nana, arraxmat d alxer. ⁴ Ǝmidi-nin filemona faw id əggaza šin igi ən təwatriwen a kay daɣ-asnat d-əkatta ətigudəya y Ǝməli-nin. ⁵ Fəlas əslêɣ tara ta təgeɣ y aytedan ku win əlkamnen y Ǝməli ɣaysa, d əzəgzan wa sər-əs təge. ⁶ šiwatriwen-in ətaggaq-qanat fəl ad təgrəwa s əlləllu-kul, wa d-igmadan əzəgzan-nak, əgərri iknan tənəddawt, n albaraka kul wa nəla daɣ ənəmənnak-nana əs ləkkum y Ǝlməsix. ⁷ Tara ta kay-təhat amidi-nin teway-du sər-i tədəwit agget d allam fəl man, təssismada deɣ iwallan n aytedan kul win əlkamnen i ɣaysa Ǝlməsix ⁸ Awen daɣ a fəlas kud imos as tartəyt-in d Ǝlməsix təkf-i fərrəgat n a kay-aməra s arat wa ihoran, ⁹ da əssofaɣ ad imos as agamay ɣas a daɣ-ak z'aga a di-taga tənəfust fəl əddəlil n ənəmər ¹⁰ əgmâya daɣ-ak a di-taga tənəfust daɣ talɣa n Onesim, wa ɣur-ək d-iddərragan, ¹¹ imosan barar-in daɣ əzəgzan fəlas tarayt ta n ɣaysa Ǝlməsix a daɣ t-əge harwa a ɣur-i illa da da daɣ kasaw. ¹² Kala a dak-ku-wər-təha tənfa mišan əmərədda təh-anaq-qu, gər za i kay wala i nak. ¹³ Ǝmərədda əssoɣalaɣ-ak-k-in imos aganna-nin. Ǝsidarana a ɣur-i illa da da iket əhe kasaw fəl əddəlil n Ǝlinjil, a di-ilal daɣ adag-nak. ¹⁴ Mišan wər areɣ igi n adi ar əs turagat-nak fəlas wər areɣ a kay-əšəhhəššəla əmazal a, olaɣan a, əssofa a tu-taga gar-ek əd man-nak. ¹⁵ Mijas Onesim wər dak-iga arat n afel, ar fəlas as kay-in-iqqal, a ɣur-ək aqqam har faw,. əmərədda wər imos akli ɣas, ogar akli, əmidi-nin daɣ əzəgzan n əməri-nin a imos. ¹⁶ Wala nak əknêq-qu tara wellen əngəm za kay a das-issərtayan tara ta n as imos akli-nak imos deɣ əmidi-nak daɣ əzəgzan s Ǝməli ¹⁷ Daɣ adi kud amidi-nak daɣ əzəgzan a əmosa wədi əqbəl-tu təttəfaq- qu daɣ adag wa daɣ-i təttafa. ¹⁸ As imos as iɣšâd-ak arat made tərwâsaɣ-as-tu wədi nak a daq-qu təssana. ¹⁹ Arat wa əfus wa-nu nak Buləs as t-əktaba nak a dak-z-irzəman. kud ira wər kay-d-əssəktaɣ as kay təməddurt-nak iman-net a daɣ-ak əle. Ǝgmâya daɣ-ak əmidi-nin a di-taga tənəfust ta fəl udəm n Ǝməli. ²⁰ As di-təgeɣ adi fəl əddəlil ən tartəyt ta nəga daɣ Ǝlməsix a di-taləma fəl man. ²¹ As dak-in-əkattaba širawt ta əkkasaɣ aššak as arat wa daɣ-ak in-əgammaya da a di-tu-taga ənta madeɣ a t-ogaran. ²² Ǝgmâya daɣ-ak deɣ a din-təsəmmutəga edag ən təɣimit fəlas ordêɣ as a kawan-in-ətəwəsuɣəla as iqbal Məššina šiwatriwen-nawan. ²³ Ebafras wa n əmidi-nin daɣ kasaw fəl əddəlil n Ǝlməsix ɣaysa,issislam-in fall-ak, ²⁴ ənta əd Markus d Aristarxus əd Demas əd luqa əmosnen imadhalan-in daɣ əššəɣəl. ²⁵ Izazzabbar-du fall-awan Ǝməli ɣaysa Ǝlməsix arraxmat-net. front