Capítulo 1 Ñymarãndu Colosape'õre pevarã

Chapter 1

¹ She Pablo, Hesukristo Apostol, Ñanderu Tumpa potava rupii ñandy ryvy Timoteo hãndi, ² ambypara ko kuatia ñeẽ shyvy reta Colosape õre, Ñanderu Tumpa ryhevare, haereka Hesukristore jyrojava. Tumpa Ñanderu tiñono pyrehe mbaikavi haereka tymẽ pee pyavapy. ³ Opa ara ñoĩ me ẽha yry vy akue Ñanderu Tumpape, Ñanderu Hesukristo Tuupe, jurureha i pyndy reherã. ⁴ Henduha rãnga piroja jyve Kristo Hesu reherã, haereka pyhaihu opaite Ñanderu Tumpa ña ãpova reherã, ⁵ voka jyrojakue rupii natũhama pee pa ãpõrã vate arapy. Pee rãnga pyhendu maĩ voka pyhãrõ pẽĩva, pyhẽnduma ñeẽ ãñeteva pyrỹ mondojepeva ryhevarã. ⁶ Voka ñeẽ rãnga mbe uha maĩ pee, haereka opa rupii ko yvy ĩãrẽ jerekue puã haere ñymby heta oho, voka jehuva raĩmi pyny mbytepe pyhẽndu haereka pikua rãvaĩ Ñanderu Tumpa jyhaihu ãñẽteva. ⁷ Kova mbai rehe rãnga pynymboi he Epafras, ñandy raihurã, orendie mba'apo vekua, hai rãnga jyroja kaviva; Kristo jokueva opaite pee pevarã. ⁸ Hai mbeu jyve ore voka jyhaihu Espiritu Santo ñono vekua pyndy pyape rupii, pyhaihu papishare. ⁹ Hãrã ore, voka kuaaha ararã vaĩ, pẽnte mba hasa yryheviva jurureha i pyndy reherã; haereka jurureha Ñanderu Tumpape kuaaka kavi pee verã hai potava, haere meẽ pe verã opaishava ãrãndu hãndi mbai kuaa Espiritu Santoivi ouva. ¹⁰ Jurureha pee piko verã Ñanderu Tumpa ryhevare iko verã raĩmi, haereka pijapo ñõĩ verã hai mby horyshuva, hetave pijapo peho mbaikavi hãndi pikuaa kaviveshu Ñanderu Tumpa. ¹¹ Jurureha hai, pynymy pyrãta verã ñymbaikatu tivishava rupii, hãrãpo opava pijepyhe ñyhãrõkuaa rupii haereka vyape, ¹² hãrã pymeẽshu Ñanderu Tumpa pyndy rorykue, shara pini ñono kavi mẽ eã pe verã ñana ãporã Ñanderu Tumpa meẽshu verã hai ryhevare ẽvã himbipeape. ¹³ Ñanderu Tumpa rãnga ñany nohe pỹntuivi, hama ñani ñono Tay haihuva ẽvãpe. ¹⁴ Hai rãnga ñany mondojepe huvy rupii, haereka hejarei ñandy hevi mbai porãmba jajapo vekua. ¹⁵ Ñande rãnga katuã jaheja Ñanderu Tumpape, tẽvã, hai ou jaheshashu verã Tay rupii, opaite ẽvã Ñanderu Tumpa japo vekua ĩãrẽ. ¹⁶ Hai rupii rãnga Ñanderu Tumpa japo opaite arare õ haereka yvy ĩãrẽ õre, opaite mbai heshava haereka heshamba vare; mburuvisha vasure, espiriture vate arapy õre opaite rekova ipope haereka pỹrãntava, opa mbai japoha Kristo rupii, haereka hai pevarã. ¹⁷ Kristo rãnga iko maĩ hai ndei teri maĩ nungare ẽrã, hãrã hai rupii opa mba'e hendape kavi ẽ. ¹⁸ Kristo haijy tyrete ñaka, voka hai tupao. Hai rãnga mbai oñepyrũ hea, hãndi tynonde puãjya manovare pãũivi, kỹrã hai tynonde ẽvẽrã opa mba'eivi. ¹⁹ Ñanderu Tumpa potaivi opaite ẽ Kristore Tumpa heko. ²⁰ Hãma hai rupii Ñanderu Tumpa mbi iko kavijy hãndi reta opaite ẽvã yvy ĩãrẽ haereka vate arapy, hãrã ñono kavijy hãndi Kristo huvy rupii ñohẽ vekua kurusure. ²¹ Pee rãnga aryka'e hai tẽnta mbyryva, haereka pyheshatã Ñanderu Tumpa pyndy pyape, mbai porãmba pijapo vekuarehe; tẽvã ã'ẽ Ñanderu Tumpa pinimbi iko kavijy; ²² Kristo hasa asy rupii ñymanope, tapyy raĩmi. Vokava japo pyndy veru verã hỹnonde heko kaviva, pyndy ky ãã haereka mbai porãmba pijapoa mbavape. ²³ Kỹrã verã piñimy hãtapo pirojakuepe, avy pyheja ñyhãrõ kua pyrekova ñeẽ kavi pyhẽndu vekua rupii. Voka hai ñeẽ kavi mbe uhava opa rupii, hãrã she Pablo, ambory aiva mbe ua verã. ²⁴ Ã'ẽ avy a aĩ ahasa asy pyndy reherã, shara kỹrãrã opa añono araha shy retere, Kristo jyhasa asy hemby teri õ jy tupaore, haiva hete. ²⁵ Mbai haikaviva pee pevarã Ñanderu Tumpa japo shyrehe tupao ambory verã, Ñanderu Tumpa hei sheva raĩmi opa rupii ambeu verã ĩñẽẽ. ²⁶ He iseva, mbai ñemi heta ara haereka aryka'eite vaĩ Ñanderu Tumpa ñomi rea, hãrã ã'ẽ kuaakashu hai ryhevare. ²⁷ Ñanderu Tumpa potaĩ kuaakashu haimba Judio vare mbai hetava himbipea, mbai ñemiape õ kova hai: Kristo ẽvã pyndy mbytepe, hãrã haiteiva pyharõ pẽĩva tykove himbipeva pyreko verã. ²⁸ Ore rãnga mbe uha Kristo ĩñẽẽ. Mbe uhashu opa vare, kuaa kavi verãre mãrãrapo iko, hãrãpo pepentẽĩ pyny pyrãta piñymy pẽnteva Kristo hãndi. ²⁹ Kỹrã verã rãnga she amba'apo aĩ, añehãã mbarete haereka pyrãta Kristo meẽ sheva rupii.

Capítulo 2 2

¹ Aipota pikua she aĩrãrõ mbarete aĩ pyndy rehe, haereka Laodiceape õre hãndi opaiteva shykua mba teri vare. ² Hãrã aipota haire pyape ñymykyrẽy, tiñymy pẽnte reta jyhaihupe, tytynyhẽ reta jyroja kueivi, haereka ouva mbaikuaa rupii, kuaa verãre Ñanderu Tumpa ñemĩãpe reva kuaa mbava, vokava rãnga hai Kristo teiva; ³ shara haipy opaite natũhã ẽ mbai kuaa haereka arãndu. ⁴ Kova hai pee potãã mbava pyny mbytavy py ñeẽ mashyã ovarã. ⁵ She teiva aĩme mbate aĩ pene ndieva, espiritu rupii aĩme penendie, hãrã avy a hekope kavi pime pẽĩrã haereka pyny pyrãta pẽĩ pirojava Kristore. ⁶ Hãrã pee pymy vahẽva raĩmi Hesukristo, kỹrãipo piko piñymy pẽnte hãndi; ⁷ piñymbyhapo po pyy, haereka piñimy pyrãta pohe piroja rupii, shara kỹrã pyny mbo eha. Pymeẽshu pyndy rorykue Ñanderu Tumpa. ⁸ Pingareko kavi; avy pirahakashu pota pyny mbytavyva kuaretare mbai kuaa rupii. Shara haire eããhe Kristo, hãndi japo jyre tynonde vare mboi hevekua, haereka mbaikatu ẽvã ko yvy ĩãrẽ õ hama ha eã Kristo rehe. ⁹ Hãrã opaite Ñanderu Tumpa heko ẽhe Kristo; ¹⁰ hãma pee opaite ĩme pyre shara piñymy pẽnte hãndi. Hai opaite ĩmere mbaikatu haereka pyrãta, yvy hãndi arapy õre, ẽ hai ipope. ¹¹ Kristo rupii pee papia chĩchĩama jyve, tẽvã ha eã ñichĩchĩ japoava tyretere, peho jepe rãvekua rãnga pyndy reko porãmba vekuaivi. Kova hai ñichĩchĩ ouva Kristoivi. ¹² Pee pimyngarai marã, piñyñoty hãndi Kristo, kỹrãijy pykuerarã pupuãrã pykuerajy manovare pãũivi, shara pyroja Ñanderu Tumpa ñymbaikatukue mupuã jyva Hesu manovare pãũivi. ¹³ Pee rãnga aryka'e pymano mbai porãmba pijapo vekuapy, haereka pyhekyã pijuhuvi mbai porãmba vekuarã; ã'ẽ ny Ñanderu Tumpa pyny mby hykovejy piroja Kristo rerã, opaite heky pyhevi pyndy reko porãmba vekua. ¹⁴ Ñanderu Tumpa hejarei ñandy hevi ñamby hepy tẽvẽrã ñandopy ẽ vẽkua, opaite heky ñandy hevi porãmba ñani ñono vekua, mby opa raha kuturã vekua kurusure. ¹⁵ Kristo mano kurusurerã opa ity espiritu rekova mbaikatu haereka pyrãta hejashu reta heshaha verã, mbytyryry rahashu reta haykue heshaka verã mbaikatuve haiva. ¹⁶ Hãrã avy mbava tĩnjeta põrã pyndy rehe peuva haereka pimbyuva rehe, ti arete, jasy py ahurã ti putu'uava jy arare. ¹⁷ Opaite kova ou verã ha angai rãnga, tẽvã ãñeteva hai Kristo. ¹⁸ Avy pyma ẽĩhe tyheky pyndy hevi jopoi piñani pehova ryheva, ko ñymby pya kavi rã ãnga iare haereka omombai vasu iare Tumpa jokuevare, hei ia maĩ nunga heshahakashua haereka jyroja ijehe shara ñãkape ñandu ẽ tapyyre raĩmi. ¹⁹ Haire ñymy pẽnteã hãndi Kristo, hai rãnga tupao ñãka mbykuakuava opaite tyrete, myngarurã haereka mboja ijehe, Ñanderu Tumpa potava raĩmi. ²⁰ Pee rãnga pymano Kristo hãndi, hãrã peĩ veãma espiritu porãmba ñymbaikatu ipe, ẽvã ko yvy ĩãrẽ. Marã ĩrãra akuãrã, piko teri espiritu porãmba ipope pinĩñonopi ĩñeẽ potava raĩmi? ²¹ Haire hei pee: “Avy pokohe vokava, avy heu kova, avy javyky." ²² Opaite kova japoa verã rãnga poryamarã opaĩjy, vokava reta rãnga hai tapyy japova haereka pỹrymboihe verã. ²³ Ãẽte rãnga kova mbaire haĩte haikaviva, shara ñymby heko kavi haereka hykove ñimimishĩ ia rãnga, hãndi ñandy rete mbyhasy, tẽvã kova mbai mba'eã joko verã ñandy rete pota japova.

Capítulo 3 3

¹ Hãrã pee pyndy kovejy Kristo rupii, hãma pyheka mbai vate araivi ouva, Kristo vapy õpe Tumpa jakata kyty. ² Pypya pimbijetahe mbai vate arapy õ, ha eã yvyipi õre. ³ Pee rãnga pymanõ matẽ, tẽvã Tumpa nãtu ẽpe pee pevarã, piko hãndi verã Kristo. ⁴ Kristo teiva rãnga pyndy rykove. Hãrã hai ou jymarã, pee peipojyve hãndikui pyny tynyhẽva himbipe kueivi. ⁵ Hãrã pijuka pyndy pyape, ẽvã ko yvy ĩãrẽ õ ryheva: Avy mbava tinjeta porãshu taupe, avy tijapo mbai pyrỹ myngyava, avy toho hete potava haykue haereka mbai potakueivi. Avy tijyrahakashu tykatẽ ỹkue. ⁶ Kova mbai rehe rãnga ou Ñanderu Tumpa ñunupa pohyva ñeẽ hẽndumbashuare ĩãrẽ, ⁷ hãma pyndy rykovepe aryka'e vekuape pijapopi. ⁸ Tẽvã ã'ẽ opa pyheja kova mbai: Poshyrei, mbai pipota raivi, porãmba vekua, ijaka haereka juru porãmba. ⁹ Avy piñymby tavy, pyheky marãnga pijuhuvi pyndy rykove arykai vekua, haereka porãmba pijapi vekua, ¹⁰ hãma pikopo tykove py'ahuvape, tapyy hykove py ahu vape, ñymby py ahu ohova ova verã Tumpa japo vekua, pikuaa kavishu verã. ¹¹ He ise veama ndera hai Greciape õ ti Judiora, ndera ndapia chinchiha ti chinchihãra, ndera mbyryivi reiva, ti mba'eãra rikuaa, haira nde jokuearea ti ha eãra. Kristo hai opa mba'e haereka opavape ẽ. ¹² Ñanderu Tumpa rãnga pyndy raihu haereka pyny pyhyrõ, piko verã hai ña ãpova rãimi. Pyñimi monde jypareko kuepe haereka pya kavi kuepy, jyroja mba ijeheva, poshymba haereka ñyhãrõ kuaape. ¹³ Pyma ẽĩ pijehe, pyheja rei ijuhuvi mbai porãmba vekua. Kyrã Ñanderu Tumpa hejarei pyheviva rãimi pyheja rei ijuhuvi. ¹⁴ Tynonde, piñimi monde jypareko kuepe, mbai pyry mypente kavi vape. ¹⁵ Hãrã Kristo pya sỹmyĩkue tymy tynyhe pyndy pya, ha ẽrã rãnga pyny rẽno aryka'e Ñanderu Tumpa piko verã pentẽĩva rãimi. Hãma py meẽshu pyndy rorykue. ¹⁶ Kristo ĩñeẽ tõĩ pyndy pyape opa ara, haikavi haereka heta. Piñymbara kuaa haereka pere pijupe mbai kuaakuepe. Pyndy pyaivive pymeẽshu Ñanderu Tumpa pyndy rory, pypyrahe salmope õ mbyrahe haikaviva rupii haereka mbyrahe Espiritu rupii ĩmereva. ¹⁷ Hãma opa mba'e pijapova haereka pereva, pijapo Ñanderu Hesukristo heepe, py meẽ pyndy rory Ñanderu Tumpa, hai rupii. ¹⁸ Tỹrekore piko pemere ĩñeẽre, vokava rãnga hai pijapo verã Ñanderu Tumpa jyrojahea heko. ¹⁹ Tẽmere pyhaihushu pyndy reko, avy piko porã hãndi reta. ²⁰ Sanjayre, opa mba'epe pini ñeẽ rẽndushu perure, shara vokava mby vya Ñanderu Tumpa. ²¹ Hãma terure, avy pymby poshyka pyny sanjayre, mãhẽ pya kangy retakui. ²² Jokueareare, opa mba'epe pini ñeẽ rẽndushu pokue õre ko yvy ĩãrẽ, ha eã maĩ ẽ pyrehe rãmẽĩ, piko kavi hãndi verãre, pyndy pyapeny pykyjeshi Ñanderu Tumpa. ²³ Opa mba'e pijapova, pijapo vy ape, Ñanderu Tumpape pijapova raĩmi, ha eã kuaretare. ²⁴ Pikuaama rãnga, voka hekovia Ñanderu Tumpa meẽ pope hai meẽ verã, pymba'apopi Kristo pevarãrã, pindi Ijaite vape. ²⁵ Ko mbai porãmba japoha õpeny, mby hekoviapo jypyshu mbai porãmba japo vekua. Ñanderu Tumpa rãnga pirĩmbi vache hekope kavi.

Capítulo 4 4

¹ Pee mbai ija ĩme pyre pijokue pyreva, pijapo hãndi reta hekope kaviva pẽntevaĩ. Pymãnduapo jyve pee ĩmẽ pyreva jyve pindi Ĩja vate arapy õ. ² Pirure katu opa arape sapeape pime pẽĩ verã, haereka pymeẽ pyndy vy akue Ñanderu Tumpape. ³ Pirure jyve yryrehe, Ñanderu Tumpa tiñono ore mbe uha verã ko ñeẽ haereka mby kuaaha kavi verã Kristo ña ãmpoa ñemiape õ, hai rehe rãnga she shymby peresoha. ⁴ Pirure shy rehe aikua kavi verã ko ñemiape õ, aikuaaka kavi verã rãimi. ⁵ Piko kavi hãndi Ñanderu Tumpare jyrojamba teriva, pipory kavi voka ara pymba'apo verã. ⁶ Pinjeta kavipo hãrã pyrymby horypo, haereka pikua kavipo mbaivara perepo mãmaĩpi pyrãnduha pee vaipi. ⁷ Tiquiko, ñandy ryvy jahaihuva, ñany mbory ia haereka tãta jyrojava Ñanderu Tumpare, opapo mbeu pekui mãrãra aiko. ⁸ Ha erã amondo pẽĩvape, mbeu pe verã mãrãra ĩmẽha ẽ haereka pyny mykỹrẽy verã. ⁹ Oho jyve hãndi Onésimo ñandy ryvy jahaihuva, haereka pyndy ryheva jyrojava jyve; hai retapo opa mbeu pekui mbaivara koipi iko. ¹⁰ Aristarco, shi ĩrũ ko peresope, pynymỹ mãrãnduka; Marcos haereka jyve Bernabe shy ryvy. Ãmbeuma pee Marcos ryheva, hãrã oho pẽĩvaperã pymỹ vãhẽ kavishukui. ¹¹ Pynymỹ marãnduka jyve Hesu, heko kaviva he'iashua. Kova mbahapy õ reta ñoite rãnga jyroja israelitare mbyteivi mba'apo shendie Ñanderu Tumpa irreino pevarã rehe, hãrã hai reta tivisha shymby pya putuu kavi. ¹² Pynymỹ marãnduka jyve Epafras, Kristo jokueva, hai rãnga jyve pẽnte pyndy ryheva. Hai jurure ñõi pyndy rehe, mbaretepe pẽĩ verã, haereka tãnta ngãtu ryheve pẽĩ pijapo verã Ñanderu Tumpa potava. ¹³ She ahesha marãra Epafras ojepy apy pyndy reherã, hãndi ĩmẽ õva jyve tẽnta reta Laodisea haereka Hierápolispe õre. ¹⁴ Pyrỹ pyhãno ia Lucas haihuhava, pynymỹ mãrãndu, haereka jyve Demas. ¹⁵ Pymy marãndu ñandy ryvy reta ĩmẽ õ Laodiceape. Pymarãndu jyveshu ñanĩĩndy Ninfa, haereka tupao hẽntape ñymbaty hãndia retape. ¹⁶ Kova kuatia ñeẽ mbijetahama ẽ pyny mbyteperã, pyrahaka mbijetaha verã jyve Laodiceape õre tupaope; haereka pimbijeta jyve pee voka kuatia ajaposhu vekua reta. ¹⁷ Kỹrã pere Arquipope: “Maĩ rijapo kavi verã, pijapo verã Ñanderu Tumpa meẽ nde vekua." ¹⁸ She Pablo, añono pee ko kuatiare ñymarãndu shepope tei ambyparava. Pymãndua shyrehe aĩme aĩ pereso perã. Ñanderu Tumpa tiñono peãrẽ mbaikaviva. Amén. front