Ang Ikaduhang Sulat ni Pablo alang sa mga Taga-Tesalonica

Chapter 1

¹ Pablo, Silvanus, ug ni Timoteo, dinha sa Iglesia nga taga-Tesalonica nga iya sa Dios nga atong Amahan ug kang Ginoong Jesu Cristo. ² Hinaut nga anaa kaninyo ang grasya ug kalinaw nga gikan sa Dios nga atong Amahan ug kang Ginoong Jesu Cristo. ³ Mga igsoon, kinahanglan magpasalamat kami kanunay sa Dios, tungod kaninyo, kay angay kini sa inyong pagtuo nga galambo kaayo ug misamot ang gugma ninyo sa matag usa ngadto sa usa'g usa. ⁴ Mao nga kami nagapasigarbo nga nagasulti kaninyo mahitungod sa inyong pasensya ug pagtuo taliwala sa tanan nga paglutos ug pasakit nga inyong giagwanta. ⁵ Kini ang klaro nga tima-an sa tarong nga paghukom sa Diyos, nga naghimo ka ninyo nga takos sa ginharian sa Diyos nga tungod niini mag-antos pod mo. ⁶ Matarong ang Dios nga ibalik niya ang pasakit kadtong nagpasakit kaninyo, ⁷ ug pahuwasan niya kadtong nakadawat ug pasakit uban kanamo, sa panahon nga ipadayag ang Ginoong Jesu Cristo gikan sa langit uban sa mga anghel sa iyang gahum. ⁸ Pinaagi sa gadilaab nga kalayo, siya ang manimalos sa mga wala nakaila sa Dios ug sa mga wala nagtuman sa maayong balita sa atong Ginoong Jesus. ⁹ Nga sila mag-antos sa silot sa walay katapusang paghukom nga mao ang pagkalayo sa presensya sa Ginoo ug sa himaya sa iyang gahum, ¹⁰ sa dihang mobalik siya sa adlaw nga himayaon sa iyang katawhan, nga mahibulong ang tanan nga mga tumutuo tungod kay gituohan ang among pasidungog kaninyo. ¹¹ Mao kini ang hinungdan nga kanunay kaming nag-ampo alang kaninyo, nga ang atong Dios himoon mong takos nga ingon nga iyang tinawag, ug tumanon ang matag handom sa kaayuhan ug matag lihok sa pagtuo nga naay gahum, ¹² aron himayaon ninyo ang ngalan sa atong Ginoong Jesus, ug mahimaya pod kamo niya, tungod sa grasya sa atong Dios ug ang Ginoong Jesu Cristo.

Chapter 2

¹ Karon, mga igsoon, nagahangyo kami kaninyo, mahitungod sa pagbalik sa atong Ginoo nga si Jesu Cristo ug sa pagtigum kanatong tanan kaniya, ² aron dili kamo dali malibog sa inyong mga hunahuna o mabalaka, pinaagi man sa espiritu o sa pulong o sa sulat nga gikan kanamo -- aron dili kamo motuo nga ang adlaw sa atong Ginoo niabot. ³ Ayaw kamo palimbong ni bisang kinsa o sa bisang unsang pamaagi, kay dili moabot ning adlaw hangtod dili pa moabot ang pagkahulog ug maipadayag ang tawo nga masinupakon, nga mao ang anak sa kadautan. ⁴ Mao ni siya ang mobatok ug nidayeg sa iyang kaugalingon batok sa tanan nga gitawag nga Dios o ginasimba, aron siya maglingkod didto sa templo sa Dios ug iyang gipahulagway iyang kaugalingon nga Diyos. ⁵ Wala ba ninyo nahinumduman kadtong diha pa ko ninyo nga gisultihan namo nako aning mga butanga? ⁶ Karon nahibal-an na ninyo kung kinsa ang gapugong kaniya, aron maipadayag lang sya sa iksaktong panahon. ⁷ Kay ang misteryo sa pagkamasinupakon nagsugod na, apan adunay nagpugong kaniya karon samtang dili pa siya mapahawa sa dalan. ⁸ Diha pa dayon maipadayag ang masinupakon, nga patyon ni Ginoong Jesus pinaagi sa ginhawa sa iyang baba ug iyang dad-on sa pagkawalay pulos pinaagi sa pagpadayag sa iyang pagbalik. ⁹ Ang masinupakon moanhi pinaagi kang Satanas nga puno ug gahum, mga timaan, ug mga bakak nga katingalahan. ¹⁰ Ug limbungan niya sa tanang dautan nga pamaagi kadtong mga laglagonon, kay wala nila gidawat ang gugma sa kamatuoran nga mao untay kaluwasan nila. ¹¹ Tungod niini nga rason, ang Diyos nagpadala kanila sa sayop nga bulohaton aron tohuan nila ang bakak, ¹² aron unta mahukman silang tanan, nga wala motuo sa kamatuoran apan ang ilang kalipay ang dili matuod. ¹³ Apan angay kaming magpasalamat sa Dios kanunay para kaninyo, mga igsoon nga hinigugma sa Ginoo, kay kamo ang gipili sa Dios nga maoy unang bunga sa kaluwasan nga gilain niya pinaagi sa Espiritu ug sa pagtuo sa kamatuoran, ¹⁴ nga diin gitawag kamo niya pinaagi sa maayong balita aron maambit ninyo ang himaya sa atong Ginoong Jesu Cristo. ¹⁵ Busa, mga igsoon, lig-ona inyong mga kaugalingon ug guniti pag-ayo ang naandan nga pamaagi nga naitudlo kaninyo pinaagi sa pagsulti o sa among sulat. ¹⁶ Hinaut karon nga ang atong Ginoo nga si Jesu Cristo mismo, ug ang atong Dios Amahan nga naghigugma kanato ug naghatag kanato sa walay hupay nga katapusan ug maayong pagsalig sa umaabot nga panahon pinaagi sa grasya, ¹⁷ maghupay ug magmalig-on ang inyong kasingkasing sa tanang maayong buluhaton ug sinultihan.

Chapter 3

¹ Ug karon, mga igsoon, ampo-i kami aron paspas ang pagkaylap ug mapadayag ang pulong sa Dios sama diha sa inyo ² ug aron maluwas kami sa mga dautan nga mga tawo kay dili man tanan naay pagtuo. ³ Apan matinumanon ang Ginoo nga maoy maglig-on sa inyo ug magbantay sa inyo gikan kang Satanas. ⁴ Gasalig kami sa Ginoo mahitungod kaninyo nga gibuhat ninyo ug gapadayon mo ug buhat sa among mga gisugo kaninyo. ⁵ Hinaut unta nga ang Ginoo ang magtultul sa inyong mga kasingkasing didto sa gugma sa Dios ug sa pag-agwanta ni Cristo. ⁶ Karon, mga igsoon, suguon mo namo sa ngalan sa atong Ginoong Jesu Cristo nga likayi ninyo ang mga kaigsuonan nga nagtinapulan ug wala magsunod sa mga naandan nga pamaagi nga nadawat ninyo gikan kanamo. ⁷ Kay kamo mismo nasayod kung unsaon ninyo pagsundog kanamo. Wala mi nagtinapulan diha kaninyo. ⁸ Wala pud namo gikaon ang pagkaon sa uban nga wala gibayri. Hinuon, nagtrabaho ug naghago mi pag-ayo gabii ug adlaw aron bisan kinsa kaninyo dili unta mabug-atan sa amo. ⁹ Dili ingon nga wala mi katungod, apan kami ang inyong ihemplo aron kami ang inyong sundon. ¹⁰ Kadtong diha pa kami sa inyo gisugo mo namo nga, "Kung naay dili ganahan motrabaho, dili siya pakan-on." ¹¹ Kay nakadungog mi nga naay nagtinapulan diha sa inyo, wala sila gatrabaho apan nanghilabot hinoon sa uban. ¹² Kana sila maoy among gisugo ug gi-awhag pinaagi kang Ginoong Jesu Cristo nga hilum ra magtrabaho ug mokaon ra sa ilang kaugalingong pagkaon. ¹³ Apan, mga igsoon, ayaw mo pagkaluya sa pagbuhat ug sakto. ¹⁴ Kung naay dili motuman sa mga gisulti namo ani nga sulat, bantayi na siya ug ayaw mo pakigkuyog ana niya aron maulawan siya. ¹⁵ Ayaw siya isipa nga kaaway apan pasidad-i siya isip igsoon. ¹⁶ Hinaut nga mismo ang Ginoo sa kalinaw maghatag kaninyo ug kalinaw sa tanang panahon ug sa bisan unsa nga pamaagi. ¹⁷ Ang Ginoo mag-uban kaninyong tanan. Ako ni si Pablo mismo ang nagsulat aning pangumusta. Mao ni akong timaan sa matag sulat nako. ¹⁸ Hinaut nga ang grasya sa atong Ginoong Jesu Cristo maanaa kaninyong tanan.