Mga Taga-Epeso

Chapter 1

¹ Si Pablo, apostol ni Cristo Jesus pinaagi sa kabubut-on sa Dios, alang sa mga gilain sa Dios sa Epeso nga matinumanon sa pagsalig kang Cristo Jesus -- ² Hinaot nga ang grasya ug kalinaw sa atong Dios nga Amahan ug Ginoong Jesu Cristo maana kaninyo. ³ Hinaot nga ang Dios ug Amahan sa atong Ginoong Hesu Cristo mapadayawan, kaniya nga nagpanalangin kanato ug matag espirituhanong panalangin sa kalangitan kang Cristo. ⁴ Kay gipili kita sa Dios nga mga mituo kang Cristo bisan pa sa wala pa mahimo ang kalibutan. Gipili ta niya para mahimong balaan ug putli sa iyang panan-aw. ⁵ Sa gugma sa Dios daan na tang gitakda nga gi-ampon isip iyang mga anak pinaagi kang Jesu Cristo. Gibuhat ni niya tungod kay nalipay siya nga buhaton ang iyang tinguha kanato. ⁶ Kining tanan nahitabo aron ang Dios madayeg tungod sa iyang himayang grasya, nga gihatag niya nga walay bayad pinaagi sa iyang hinigugma. ⁷ Kay tungod sa iyang hinigugma, naa tay kaluwasan paagi sa iyang dugo, kapasayluan sa sala, pinaagi sa kadako sa iyang grasya. ⁸ Kini nga grasya gihatag nga sobrasobra kanato sa tanang kaalam ug salabutan. ⁹ Gipasabot kanato sa Dios ang mga nakatago nga kamatuoran sa plano, sumala sa iyang kagustuhan nga iyang gipakita kang Cristo: ¹⁰ nga pag-abot sa sakto nga higayon aron matuman ang iyang plano, iyang dad-on ang tanan sa langit ug sa yuta nga panguluhan ni Cristo. ^{11 12} Napili kita kang Cristo ug gilain niadto pa, sumala sa nakaplano kaniya nga naghimo sa tanang mga butang pinaagi sa iyang kabubut-on, para kita unta mabuhi aron magdayeg sa iyang himaya, kita nga mga unang nagsalig kang Cristo. ¹³ Ug gikan pud kang Cristo nga kamo nakadungog sa pulong sa kamatuoran, ang maayong balita sa kaluwasan kang Cristo, nga inyo pud gituohan ug giselyuhan sa saad nga Espiritu Santo. ¹⁴ Ang Espiritu mao ang pagsalig sa atong pamana, hantod nga ang pag-angkon makuha, para sa pagdayeg sa iyang himaya. ¹⁵ Tungod niini, sukad sa dihang nakadungog ko bahin sa inyong pagtuo sa atong Ginoong Jesus, ug sa inyong gugma para sa tanan nga gilain para niya, ¹⁶ wala ko niundang ug pagpasalamat sa Dios kaninyo ug paghinumdom kaninyo sa akong mga pag-ampo. ¹⁷ Nag-ampo ko nga ang Dios sa atong Ginoong Jesu Cristo nga Amahan sa himaya, maghatag kaninyo sa Espiritu sa kaalam ug magpadayag sa iyang panghunahuna, ¹⁸ aron ang mata sa inyong kasingkasing maiwagan aron makahibalo mo kung unsa ang pagsalig sa among pagkatawag, kung unsa ang bahandi sa himaya sa iyang gipamana kaniadtong mga gilain para kaniya-- ¹⁹ ug unsa kadako sa iyang gahum nga anaa kanato nga mituo, basi sa paglihok sa iyang kusog nga gahum. ²⁰ Kini ang gahum nga milihok kang Cristo sa dihang gibanhaw siya sa Dios ug gipalingkod dapit sa iyang tuong kamot diha sa kalangitan, ²¹ nga labaw pa sa tanang mga gamando, ug mga naay gahum, ug mga gamhanan, ug mga ginsakupan, ug sa mga ngalan nga ginganlan, dili lang sa karong panahon, apan usab sa panahon nga umaabot. ²² Ang Dios gipasakop niya ang tanang mga butang ubos sa mga tiil ni Cristo, ug gihimo niya siya nga pangulo sa tanang mga butang diha sa Iglesia, ²³ nga mao ang lawas niya, nga ang kahingpit niya nga nagpuno sa tanang mga butang sa tanang pamaagi.

Chapter 2

¹ Kay kaniadto mga patay kamo sa inyong mga kalapasan og kasal-anan ² nga diin, niadto nagalakaw kamo sa kinalibutanong pamaagi, basi sa nagmando sa kagamhanan sa kahanginan, ug sa espiritu nya nga naglihok sa mga anak nga masinupakon. ³ Kitang tanan kaniadto kauban niadtong dili magtutuo ug gihimo nato ang dautan nga pangandoy sa atong mga lawas, nga gihimo ang kabubut-on sa lawas ug sa huna-huna ug sa atong pagkatawhanon mga anak kita sa kapungot sama kanila. ⁴ Apan kay dato sa kalo-oy ang Dios tungod sa kadako sa iyang gugma nga gihigugma ta niya, ⁵ kani-adto nga kita patay pa sa kalapasan, gidala ta niya sa bag-ong kinabuhi uban kang Cristo- pinaagi sa grasya naluwas kamo- ug gibanhaw ta niya ⁶ ug gipalingkod sab ta niya sa kalangitan kauban ni Cristo Jesus. ⁷ Gihimo niya kini aron nga sa umaabot nga panahon iya gayod nga ipakita kanato kung unsa ka dako ang bahandi sa iyang grasya tungod sa iyang kalo-oy diha kang Cristo Jesus. ⁸ Kay tungod sa grasya naluwas kamo pinaagi sa pagtoo. Ug kini wala miabot gikan kanamo; kondili grasa gikan sa Dios, ⁹ dili sa atong nahimo aron walay bisan kinsa nga makapanghambog. ¹⁰ Kay kita mga binuhat sa Dios, binuhat diha kang Cristo Jesus sa pagbuhat ug mga maayong buluhaton nga dugay na kaayong plano sa Dios nga atong sundun. ¹¹ Busa hunumdomi ninyo nga kaniadto mga Gintel kamo sa unod, nga gitawag adtong mga tuli sa unod nga gibuhat sa mga tawo nga "mga paganong dili tuli." ¹² Kay niadtong panahona nahimulag kamo kang Cristo, nga nahimulag sa katawhan sa Israel, ug mga stranghero sa mga kasabotan sa saad, nga walay paglaom sa kaugmaon, ug walay Dios sa kalibutan. ¹³ Apan karon tungod kang Cristo Jesus kamo nga kaniadto layo sa Dios nahiduol na sa Dios pinaagi sa dugo ni Kristo. ¹⁴ Kay siya ang atong kalinaw tungod kay gihimo niya nga ang mga Judio ug Gintel usa na ka katawhan. Ug sa iyang lawas giguba niya ang paril sa kasuko nga nagabulag nato sa usag'usa. ¹⁵ Diin nga, gitang-tang niya ang balaod sa mga sugo ug mga kalagdaan aron mahimo niya ang bag-ong katawhan gikan sa duha ka katawhan, us sa ingon adunay pakigdait. ¹⁶ Gihimo kini niya aron pagusahon ang duha nga katawhan ingon nga usa ka lawas sa Dios pinaagi sa krus, nga undangon ang ilang kasuko sa usag'usa. ¹⁷ Si Jesus mianhi ug nagsangyaw sa maayong balita ug ang iyang kalinaw sa mga layo kaniya ug sa mga duol kaniya. ¹⁸ Kay tungod kang Jesus makaduol tang tanan pinaagi sa usa ka Espiritu didto sa Amahan. ¹⁹ Busa karon kamo nga mga Gentil dili na gayod kamo mga stranghero ug langyaw, kondili kamo mga isig kalungsod sa mga gilain sa Dios, nga kadtong sakop sa panimalay sa Dios. ²⁰ Sila gitukod sa pondasyon sa mga apostoles ug mga propeta, si Kristo mismo ang bato nga tugkaranan. ²¹ Pinaagi sa kagamhanan ni Jesus ang tibuok nga balay sa iyang pamilya magkasigo ug mo daghan sama sa templo nga gilain para sa Ginoo, ²² nga diin giapil mo gihimo lakip sa uban nga mahimong puloy-anan sa Dios pinaagi sa Espiritu.

Chapter 3

¹ Busa tungod niini, ako si Pablo, ang binilanggo diha kang Cristo Jesus alang kaninyo nga mga Gentil -- ² kung nakadunggog namo mahitungod sa pagdumala sa gasa sa Dios nga iyang gihatag kanako para kaninyo. ³ Basi sa pinadayag nga gipakita kanako, ang tinago nga kamatuoran nga naa koy dyutay nga gisulat sauna. ⁴ Kung makabasa mo mahitungod niini, makasabot mo sa akong panan- aw sa tinago nga kamatuoran bahin ni Cristo, ⁵ nga sa uban nga henerasyon wala kini gibutyag sa mga katawhan, apan karon kini naipadayag sa iyang apostoles ug mga propeta nga gilain pinaagi sa Espirito: ⁶ Nga ang mga Gentil mga kabahin sa mana ug kabahin sa lawas ug kabahin sa pag-ambit sa saad ni Cristo Jesus pinaagi sa maayong balita. ⁷ Tungod niini nahimo akong sulugoon tungod sa grasya sa Dios nga gihatag niya kanako pinaagi sa paglihok sa iyang gahom. ⁸ Sa ako gihatag ni nga gasa, bisan pa ako ang labing ubos sa pinakaubos sa mga gilain sa Dios, para isangyaw sa mga Gentil ang maayong balita mahitungod sa dili masukod nga bahandi ni Cristo ⁹ ug aron maiwagan ang tanan kung unsa ang plano sa Dios, ang tinago nga kamatuoran nga gitago sa Dios sa dugay nga panahon, nga maoy nagbuhat sa tanang butang. ¹⁰ Mao nga masayran sa mga gamando ug mga naay gahum sa kalangitan pinaagi sa Iglesia ang kinalainlain nga kaalam sa Diyos, ¹¹ subay sa way kahangturang plano nga iyang natuman kang Cristo Jesus nga atong Ginoo. ¹² Kay diha kang Cristo nakadawat kita ug kaisug ug makaadto kita kaniya tungod sa atong pagtuo. ¹³ Busa nagahangyo ako ka ninyo ayaw mo kawad-i ug paglaum sa akong mga pag-antos alang kaninyo, kay mao ni ang inyong kahimayaan. ¹⁴ Tungod niini, nagluhod ako sa Amahan, ¹⁵ nga gikan kaniya ginganlan ug nahimo ang matag usa ka pamilya sa langit o sa yuta, ¹⁶ nga kamo iyang tagaan, basi sa bahandi sa iyang himaya, para malig-on nga adunay gahum pinaagi sa iyang Espiritu nga anaa kaninyo; ¹⁷ aron si Cristo magpuyo sa inyong kasingkasing pinaagi sa pagtuo ug aron kamo mugamot ug malig-on sa iyang gugma, ¹⁸ aron makasabot kamo, apil sa tanan nga gilain para sa Dios, kung unsa ka lapad ug kataas ug kahabog ug kalawom ang gugma ni Cristo, ¹⁹ aron inyong mahibal-an ang dili matungkad nga kadako sa gugma ni Cristo, aron mapuno kamo sa tanan nga kahingpit sa Diyos. ²⁰ Karon, sa iya nga makabuhat sa labaw sa tanan, labaw pa sa tanan nga atong gipangayo o gihunahuna, basi sa iyang gahom nga galihok kanato, ²¹ sa iya ang himaya sa Iglesia ug kang Cristo Jesus sa tanan nga mga henerasyon hangtod sa kahangturan. Amen.

Chapter 4

¹ Busa, isip binihag para sa Ginoo, giawhag mo nako nga manginamuhi nga takos sa pagtawag sa Dios kaninyo, ² nga naay dakong pagpaubos ug kaligdong ug pasensiya, nga gadawat sa usa'g usa sa gugma. ³ Buhata ang labing maayo aron mapadayon ang panaghiusa sa Espiritu paagi sa bugkos sa kalinaw. ⁴ Naay usa ka lawas, ug usa ka Espiritu, sama nga gitawag mo sa usa ka masaligon nga pagdahum sa inyong tawag; ⁵ ug naay usa ka Ginoo, usa ka pagtuo, usa ka bawtismo, ⁶ usa ka Dios ug Amahan sa tanan, nga labaw sa tanan ug pinaagi sa tanan ug anaa sa tanan. ⁷ Ang matag usa gihatagan ug gasa sumala sa sukod sa gasa ni Cristo. ⁸ Sama sa gisulti sa Kasulatan, Pagsaka niya sa kahitas-an, gidala niya ang mga dinakpan ngadto sa pagkabinihag, ug gihatagan niya ug gasa ang mga katawhan. ⁹ Unsa may pasabot aning pamahayag nga "Misaka siya," gawas nga minaog usab siya paingon sa kinailawman sa kalibutan? ¹⁰ Siya nga minaog mao usab siya nga misaka labaw pa sa tanang kalangitan, aron pun-on niya ang tanang butang. ¹¹ Naghatag si Cristo ug mga gasa sama ani: apostoles, propeta, ebanghelista, pastor ug manunudlo, ¹² aron andamon kadtong mga gilain ngadto sa Dios para sa trabaho sa serbisyo, aron mapalig-on ang lawas ni Cristo, ¹³ hangtod maabot nato ang panaghiusa sa pagtuo ug kasayoran sa Anak sa Dios, ug maabot ang hingpit nga kahamtong isip mga nakakab-ot sa tibuok nga sukdanan ni Cristo. ¹⁴ Kini ingani tungod kay dili na ta angay nga mura pag bata, mabandabanda ug madala sa bisan unsang klase sa pagtudlo pinaagi sa pagpanglimbong sa mga tawo gamit ang makasayop nga pangilad. ¹⁵ Hinuon, isulti nato ang kamatuoran nga naay gugma ug motubo sa tanang paagi ngadto kaniya, nga mao ang ulo, si Cristo. ¹⁶ Gikan kaniya mosibo ang tibuok lawas sa mga tumutuo ug gihawiran sa matag lutahan, nga mitabang sumala sa paglihok sa sukdanan sa matag bahin sa pagtubo sa lawas, aron mapalig-on ang matag usa sa gugma. ¹⁷ Busa gisulti ni nako, ug giawhag mo nako diha sa Ginoo, nga dili na mo maglakaw sama sa mga Gentil, sa walay kapuslanan sa ilang mga hunahuna, ¹⁸ kay ngitngit ang ilang panan-aw, nga nahibulag sa kinabuhi sa Dios tungod sa ilang pagka-ignorante, ug sa kagahi sa ilang kasingkasing. ¹⁹ Gihatag na nila ang ilang kaugalingon ngadto sa kauwag diha sa mga hugaw nga binuhatan, sa matag klase nga kahakog. ²⁰ Pero dili ingon ana ang inyong nakat-unan bahin kang Cristo. ²¹ Kung nakadungog na mo bahin kaniya ug natudluan bahin kaniya, nga mao kini ang kamatuoran bahin kang Jesus, ²² kinahanglan ninyo isalikway ang daang tawo--kadtong mitukma sa inyong daang pamatasan, nga gidaot tungod sa mga makalinlang nga kaibog, ²³ aron mabag-o mo sa espiritu sa inyong hunahuna, ²⁴ ug aron inyong isul-ob ang bag-o nga tawo, nga gihimo sa Dios sa pagkamatarong ug pagkabalaan sa kamatuoran. ²⁵ Busa isalikway ang bakak. "Isulti ang kamatuoran, ang kada usa sa iyang silingan," tungod kay bahin nato ang usa'g usa. ²⁶ "Masuko, pero dili makasala." Ayaw pasalopa ang adlaw sa imong kasuko, ²⁷ ug ayaw hatagi ug higayon ang demonyo. ²⁸ Ang nangawat dili na angay mangawat, kondili, kinahanglan maningkamot siya sa pagtrabaho, aron naa siyay ikahatag sa tawong nanginahanglan. ²⁹ Walay makadaot nga sinultihan ang angay nga mogawas sa inyong baba, kondili ang mga pulong nga mapuslanon sa pagdasig sa uban, matod sa ilang panginahanglan, aron maghatag ug grasya sa mga namati. ³⁰ Ug ayaw pagbuhat ug makaguol sa Espiritu Santo sa Dios, nga paagi kaniya giselyohan kamo para sa adlaw sa kaluwasan. ³¹ Tangtanga ang tanang kaligutgot ug kapungot ug kasuko, ug sininggitay ug pag-insulto, uban ang tanan nga dautan; ³² ug magmaayohon mo sa usa'g usa, maluluy-on, nagapasaylo sa usa'g usa sama sa gawasnong pagpasaylo kaninyo sa Dios diha kang Cristo.

Chapter 5

¹ Busa managsunod kamo sa Dios, sama sa mga anak nga hinigugma. ² Ug mangabuhi kamo sa paghigugma sama kang Cristo nga gahigugma kanato ug naghatag sa iyang kaugalingon alang kanato isip usa ka halad, ug sakripisyo nga humot sa Dios. ³ Ang lawasnong imoralidad o ang tanang kahugaw o kaibog ayaw gyud ninyo paghisguti, kay dili angay sa mga gilain sa Dios. ⁴ Bisan ang pagkabastos, binuang nga pag-istorya, o yagayaga nga dili angay, kondili himoa ang pagpasalamat. ⁵ Kay kamo nahibalo nga walay lawasnong imoralidad, dili limpyo, o lamot nga tawo, nga nagahimaya sa diosdiosan, nga madawat sa gingharian sa Ginoo ug Dios. ⁶ Ayaw kamo pagpalimbog sa mga pulong nga walay pulos. Kay tungod niining mga butanga ang kasuko sa Dios muabot sa mga anak nga dili matumanon. ⁷ Busa dili kamo makiuban sa kanila. ⁸ Kay kaniadto mga kangitngit kamo, apan karon kamo mao ang kahayag sa Ginoo. Busa maglakaw mo ingon nga mga anak sa kahayag - ⁹ kay ang bunga sa kahayag anaa sa kaayo, pagkamatarong ug sa kamatuoran, ¹⁰ --nagapakita kung unsay makahimuot sa Ginoo. ¹¹ Dili kamo makiuban sa mga walay bunga nga mga buhat sa kangitngit, kondili ipadayag ninyo. ¹² Kay ang mga butang nabuhat nila sa tago labihan nga makauulaw kung ihulagway. ¹³ Ang tanang gipadayag sa kahayag, kay ang kahayag gipasundayag sa tanan. ¹⁴ Tungod niini siya nagaingon, "Pagmata, ikaw nga nakatulog, ug mubangon gikan sa kamatayon ug si Cristo magahayag kaninyo." ¹⁵ Busa ampinga ninyo ang inyong kinabuhi nga dili sama sa mga dili maalamon kondili sama sa mga maalamon. ¹⁶ Pahimuslan ang oras kay ang mga adlaw dautan. ¹⁷ Dili kamo magpakabuang, kondili sabton ninyo kung unsa ang kabubut-on sa Ginoo. ¹⁸ Ug dili kamo maghubog sa bino, kay kini magdala kaninyo sa dautan, kondili mapuno sa Espiritu Santo. ¹⁹ Magsinultihay kamo sa salmo ug mga awit, ug mga alawiton nga espirituhanon, nga magaawit ug magahimaya uban ang inyong kasingkasing ngadto sa Ginoo. ²⁰ Magpasalamat kanunay sa tanang mga butang sa ngalan sa atong Ginoong Jesu Cristo sa Dios nga Amahan; ²¹ magapasakop kamo sa usa'g usa alang sa pagtahod kang Cristo. ²² Mga asawa magapasakop kamo sa inyong kaugalingong mga bana, sama sa Ginoo. ²³ Kay ang bana mao ang ulo sa asawa sama nga si Cristo usab nga ulo sa Iglesia, ug siya ang Manunubos sa atong lawas. ²⁴ Apan sama sa Iglesia magapasakop kang Cristo, magapasakop usab ang mga asawa sa iyang bana sa tanang butang. ²⁵ Mga bana, higugmaa ang inyong mga asawa sama kang Cristo nga naghigugma sa Iglesia ug naghatag sa iyang kaugalingon alang kaniya, ²⁶ aron mahimo niyang balaan kay gihinluan kita niya sa paghugas sa tubig pinaagi sa pulong. ²⁷ Aron maipakita sa iyang kaugalingon ang Iglesia nga mahimayaon, nga walay mantsa o kunot o bisan unsa nga sama nga butang, kondili balaan ug walay sayop. ²⁸ Sa parehong pagkasulti, mga bana higugmaa gyud ninyo ang iyong kaugalingong asawa sama sa inyong kaugalingong lawas. Ikaw nga nagagugma sa imong kaugalingong asawa nahigugma sad sa iyang kaugalingon. ²⁹ Walay bisan kinsa nga makasuko sa iyang kaugalingong lawas, apan iya kining gimatuto ug gihigugma, sama kang Cristo usab nga nagahigugma sa Iglesia, ³⁰ tungod kay myembro kita sa iyang lawas. ³¹ Tungod niini ang lalaki mobiya sa iyang amahan ug inahan ug siya makig-usa sa iyang asawa; ug ang duha mahimong usa ka lawas. ³² Kini dako nga nakatago nga kamatuoran, apan ako nagasulti bahin kang Cristo ug sa iyang Iglesia. ³³ Bisan pa niana, ang matag usa kaninyo kinahanglan higugmaon ang iyang kaugalingong asawa sama sa iyang kaugalignon ug ang asawa kinahanglan morespeto sa iyang bana.

Chapter 6

¹ Mga anak, tumana ninyo ang inyong mga ginikanan diha sa Ginoo, kay mao kini ang matarong. ² "Tahora imong amahan ug inahan" (mao ni ang unang sugo nga naay saad), ³ aron maayo ang imong kahimtang ug taas ang imong kinabuhi sa kalibutan." Ug, kamo nga mga amahan, ayaw hagita ang inyong mga anak sa kasuko apan hinuon padak-a sila sa disiplina ug sa mga pagtudlo sa Ginoo. ⁵ Mga ulipon, tumana ang inyong mga amo dinhi sa kalibutan, nga naay dakong pagtahod ug kahadlok. Buhata ni nga tininuod nga kinasingkasing, sama nga gibuhat ninyo ni kang Cristo. ⁶ Dili lang ninyo ni buhaton aron malipay sila kung nagtan-aw sila kaninyo, apan ulipon man mo mismo ni Cristo, buhata ang kabubut-on sa Dios nga kinasingkasing, ⁷ nga mag-alagad mo nga magmalipayon alang sa Ginoo ug dili lang alang sa mga tawo, ⁸ nga hinumduma ninyo nga sa kada maayong binuhatan sa usa ka tawo makadawat siya ug ganti gikan sa Ginoo, maulipon man siya o gawasnon. ⁹ Ug kamo nga mga amo, mao pud inyong buhaton sa mga ulipon nga dili ninyo hulgaon sila, kay nahibalo man mo nga siya nga amo nila ug amo pud ninyo anaa sa langit, ug sa kaniya walay pinalabi. ¹⁰ Sa katapusan, magpakabaskog kamo diha sa Ginoo ug diha sa kakusog sa iyang dakong gahum. ¹¹ Sul-uba ninyo ang tibuok armas sa Dios aron makabarog kamo batok sa mga limbonganong plano sa yawa. ¹² Kay ang atong gubat dili batok sa unod ug dugo, kondili batok sa mga espirituhanong mga nangulo ug anaay gahum ug sa mga gamando sa dautang kangitngitan, batok sa mga dautang espiritu sa kalangitan. ¹³ Busa sul-uba ninyo ang tibuok nga armas sa Dios aron makabarog kamo batok sa kadautan sa niining panahon nga dautan. Buhata ang tanan aron makabarog kamo ug hingpit. ^{14 15 16} 14 Busa lig-ona ang inyong kaugalingon, nga magbakus sa kamatuoran ug ang pagkamatarong ang inyong taming sa dughan. 15 Ug ang pagkamaandamon sa pagsangyaw sa maayong balita mahitungod sa kalinao mao ang inyong isapatos. 16 Ug kanunay nga dad-on ninyo nga panagang ang pagtuo nga maoy mopatay sa gadilaab nga mga pana ni Satanas. ¹⁷ Ug gamita ang helmet sa kaluwasan ug ang ispada sa Espiritu nga mao ang pulong sa Dios. ¹⁸ Mag-ampo ug mangamuyo mo kanunay diha sa Espiritu nga maglahutay kamo sa pagpaabot sa iyang mga tubag. Ampo-i ang tanan nga gilahi alang sa Dios. ¹⁹ Ug ampo-i ko nga mahatagan ko ug mensahe nga anaay kaisog inig pagpahibalo nako sa misteryo sa maayong balita, ²⁰ nga tungod niini nahimo kong padala bisan ug nakakadena ko, aron pinaagi sa akong pagkapriso naa koy kaisog nga magsangyaw sumala sa angay nakong buhaton. ²¹ Apan aron makahibalo pud mo kung unsa na akong mga gipangbuhat diri ug unsa na akong kahimtang, si Tiquico nga hinigugmang igsoon ug kasaligan nga alagad sa Ginoo, siya maoy magpahibalo sa inyo sa tanan. ²² Ako siyang gipaanha diha alang aning nga tuyo aron makahibalo mo sa among kahimtang ug iyang hupayon ang inyong mga kasingkasing. ²³ Ang kalinaw ug ang gugma nga naay pagtuo nga gikan sa Dios Amahan ug sa Ginoong Jesu Cristo maanaa sa kaigsuonan. ²⁴ Ang grasya maanaa sa tanang mga naghigugma sa Ginoong Jesu Cristo sa paghigugma nga dili mamatay.