4. Apã Wachu djawu mewe Abrahamdji

Y pirã wachu krampĩmbu, tarã ruy wachabu, ache tarã rõma djo emi kowe ywype, gogi wywy etakrã djawu reko endawe. Apã Wachu idjape kiubu djepe kowe ywy embepawã, etakrã endape noãmba endawe, gope djapo endawe tapytarã.

Ka chidja buã wywy, chingaruwyllã Apã Wachu inawedji. Gobu buãma emi djapowã tapy ywa puku, wẽwã ywadji. Apã Wachu wechã, gogi wywy ury gatupe go rãwe bita rekobu, bue buchã djapowã, go nonga djapowerã wyche bue buchã tarãwe.

Gobu Apã Wachu ruwama ache wywy djawu, idja bychepe duwe djawu wywy ĩwã, emi buema duwe rekuaty wywy. Go tapytarã dja djapowe rõ pukapyty „Babel“. Go rõ inambyty: „Djueipyre“

Tarã wachu ruy wachabu, Apã Wachu djawuma etakrã kbe’epe, idja bykuapyre rõ Abram. Apã Wachu inama idjape: „Wedja ga mondo dje ekõandy, o ga mondo dje irõndy byche puare emi. Amaty kua duwe rekuaty, gope dje wechãwerã go ywy cho inawegi. Cho kuwẽ gatu rekowerã djepe. Cho dje rupi djapowerã ekõandy wachu. Dje bykuapyre neina wachuwerã. Cho kuwẽ gatuwerã go djedji djawu gatugipe, buewerã bue buchã emi go djedji djawu buchãngipe. Dje rupi duwe irõndy wywy kuwẽ gatupawerã kowe ywy llabu.“

Gobu Abram ekõandy Kanaanpe wẽmbu, Apã Wachu inama idja: „Maĩ gatu ga reko dje ruwa mama byre rupi. Cho mẽwerã djepe, dje irõndy wywype emi kowe ywy, dje wechãngi, dje llaporã. Gobu Abram ekõma go ywype.

Gobu Abram ekõandy Kanaanpe wẽmbu, Apã Wachu inama idja: „Maĩ gatu ga reko dje ruwa mama byre rupi. Cho mẽwerã djepe, dje irõndy wywype emi kowe ywy, dje wechãngi, dje llaporã. Gobu Abram ekõma go ywype.

Etakrã kreybu Abram doroma Melkisedek, Apã Wachu ywadjiwaty pa’i. Melkisedek kuwẽ gatu mẽma Abrampe, inama idjape: „Apã Wachu ywadjiwatygi, ywy emi ywadjiwa rekoatygi, ga kuwẽ gatu reko Abrampe.“ Gobu Abram mẽma idjape go diemo bue wywy dja rekogidji.

Tarã ruy wachama djepe, Abram emi Sarai rekollã wyche dja memby. Apã Wachu djawuma Abrampe, mẽma emi idja djawu, go rekowerã dja tay, emi tarãwerã idja irõndy, tata tarãeche nonga ywadji. Abram kua gatu Apã Wachu djawu mẽwe. Apã Wachu djawu gatu Abramdji, go rõ djã praru gatugi, go rõ kua gatu Apã Wachu djawu mẽwe.

Gobu Apã Wachu djawu mẽma Abrampe. Djawu mẽmbyre rõ kua rekowã edji. Apã Wachu ina: “Cho djepe mẽwerã dje tay dje rupi, dje breko Sarai rupi emi. Cho mẽwerã djepe, dje irõndy wywype emi kowe ekõandy Kanaan.” Go Abram rõ rekollã wyche dja tay.

Kiupyre Moise parawe Génesis, djawupuku 11-15, Biblia parapyrepe