6. Apã Wachu bue me gatu Isaakpe

Abraham chuepurãmbu, dja tay kbuchuwe Isaak yma wachu rõma. Go buare Abraham buema mondo etakrã dja buetygi, owã emi dja irõndy wywy ekõandype, gope eruwã dja tay Isaak brekorã.

Go buetygi wata tarãmbu, wẽma Abraham irõndy ekõandype. Gobu Apã Wachu idjape ra gatuma Rebeka endape. Go rõ etakrã Abraham pawe kmino kudjã.

Rebeka inama, wedjawerã idja pawe wywy, Abraham buetygi rupi owã emi Isaak chupape. Gobu Isaak llambatype wẽmbu, go warõllã idjape idja breko rekowã.

Tarã ruy wachabu, Abraham manoma. Gobu Apã Wachu djawu mewe, emi djawu membyre Abrahampe, wachama Isaakpe. Apã Wachu inawe Abrahampe, dja irõndy tarã buchãwerã. Isaak breko Rebeka rõ memby machĩllã.

Isaak Rebekadji krandobuãma, gobu brawoma. Apã Wachu idjape mema krumi tarã. Go tarãngi djuka reko edji, idja ai’i krape ĩmbu wyche. Go buare Rebeka inama Apã Wachupe, bue buare go nonga ekõ.

Apã Wachu kiuma Rebekape: “Go mirõ krumi dje kra pua wẽwerã mirõ ekõandy, edji djuka rekowerã. Go dorogi rõ idja pawe tywypurãngi buetygiwerã.”

Rebeka memby kbe’e machĩmbu, go dorogi rõ eche pirã, eche a’a emi. Idja pawe tywypurã opobu, kawãma dorogi pychã atadji, go buare dja apã, dja ai’i idjape bykuama Jakob.

Kiupyre Moise parawe Génesis, djawupuku 24:1-25:26, Biblia parapyrepe