16. E osloboditeljura

Kad mulo o Isus Navin, e Izraelcura sesa neposlušna e Devlese thaj ni ikalde averen Kanaancuren niti čerde e Devlese zakonura. E Izraelcura lije te klanjinpe e kanaanskone devlenđe umesto e Jahve, pravone Devle. E Izraelcuren naj sasa kraljo, thaj čerde so mislisade kaj si šukar lenđe.

Pošto e Izraelcura nastavisade te na ašunen e Devle, Vov kaznisadalen gija so mukljalen te pobedin len lenđe dušmanura. Kala dušmanura čorde but stvara tare Izraelcura, uništisade sa lengo posed, thaj buten mudarde. Pale but berša so ni ašunde e Devle thaj sesa but potlačime tare pire dušmaja, e Izraelcura pokaisajle i rodije o Dol te ikalolen.

Tegani o Dol araklja osloboditelje savo spasisadelen tare lenđe dušmanura thaj anda mir ki phuv. A o narodo opet zabistarda po Dol i opet klanjisajle e idolenđe. Pa o Dol mukhlja e Midijancurenđe, o dušmansko narodo savo sesa paše lende, te pobedin len.

E Midijancura efta berš lije sa o usev (kova so barilo lenđe tari phuv) tare Izraelcura. E Izraelcura gija darajle, garadepe ane pećine te ma bi aračhenlen e Midijancura. Napokon, rodije e Devle te spasil len.

Jekh đive, jekh izraelsko murš leso alav sasa Gedeon čalavola čorale o điv te ma bi e Medijancura čorena la. O meleko e Jahveso avilo e Gedeonese thaj vačarda: „O Dol tusa, zuralea ratnikona. Đa thaj spasi o Izrael tare Midijancura.“

E Gedeonese dade sasale žrtveniko posvetimo jekhe idolese. O Dol vačarda e Gedeonese te srušil gova žrtveniko. A vov darajlo tare manuša, thaj ađučarda te perol mrako. Tegani rušisada gova žrtveniko thaj phaglja ane kotora. Pašo thand kaj sasa o žrtveniko e idolese vazdija nevo žrtveniko e Devlese i žrtvuisada žrtva pe leste e Devlese.

Aver sabalje e manuša dikhlje kaj neko perada thaj phaglja o žrtveniko, but holajle. Đele e Gedeonese ko čher te mudaren le, a e Gedeoneso dad vačarda: „Sose pokušin te pomognin tumare devlese? Ako si čače dol, korkore nek aračholpe.“ Kad vačarda kava, e manuša ni mudarde e Gedeone.

E Midijancura opet avile te čoren tare Izraelcura. Sesa gači but neštine te đinenpe. O Gedeon dija vika e Izraelcuren lesa te borinpe. O Gedeon rodija taro Dol duj znakura te bi avola sigurno da o Dol ka koristil le te spasil o Izrael.

Angluno znako, o Gedeon čuta e bakresi morćhi pi phuv i rodija taro Dol te mučhol i sabalutni rosa te perol samo pe bakresi morćhi, a na ki phuv. O Dol čerda gova. Aver rat, rodija te avol i phuv činđi, a e bakresi morćhi šuči. O Dol i gova čerda. Kala duj znakura uverisade e Gedeone kaj o Dol ka koristil le te spasil e Izraelcuren tare Medijancura.

32.000 izraelska vojnikura avile e Gedeonese, a o Dol vačarda kaj si gova but. O Gedeon bičhalda čhere 22.000 save darajle te marenpe. O Dol vačarda e Gedeonese da si opet gova but manuša. Thaj o Gedeon bičhalda savoren čhere, ačhada 300 vojnikuren.

Goja rat o Dol vačarda e Gedeonese: „Ulji ano midijansko logori thaj kad šune so von vačaren, ni ka dara više.“ I gija goja rat o Gedeon ulilo ano logori thaj kad šunda o midijansko vojniko so vačarol pe amalese so diklja ano suno. E manušeso amal vačarda: „Kava suno značil kaj e Gedeonesi vojska ka pobedil e midijanskone vojska!“ A kad šunda kava o Gedeon, proslavisada e Devle.

O Gedeon irisajlo ke pire vojnikura i svakonese dija šing, khoro taj baklja. Okolisade o logori kaj sute e midijanska vojnikura. E Gedeonese 300 vojnikura čute pe baklje ane khore te ma bi dičhena o svetlo tare baklje.

Tegani sa e Gedeonese vojnikura phaglje pe khore ano isto trenutko, tari jekh drom sikade i jag tare baklje. Trubisade ane pire šinga i dije vika: „Mačo e Jahvese thaj e Gedeonese!“

O Dol zabunisada e Midijancuren, gija so lije te napadin thaj te mudarenpe maškar peste. Sigate, avere Izraelcuren dije vika andare lenđe čhera te pomognin te ikalen e Midijancuren. Buten mudarde a averen ikalde andari Izraelska phuva. 120.000 Midijancura mudardile gova đive. O Dol spasisada o Izrael.

O narodo manglja te čerol e Gedeone pire kraljo. O Gedeon ni dija gova te čeren, al manglja angrustika taro sumnakaj save lije tare Midijancura. E manuša dije e Gedeone but sumnakaj.

O Gedeon koristisada o sumnakaj te čerolpese šeja savo o angluno svešteniko sasale. Thaj e manuša lije te klanjinpe sar idolese. Golese o Dol opet kaznisada o Izrael golese so klanjisajle e idolenđe. O Dol muklja lenđe dušmanenđe te porazin len. Von vađi jekh drom rodije te pomožil lenđe o Dol, thaj o Dol bičhalda lenđe vađi jekh osloboditelje.

Kava ponovisajlo but droma: e Izraelcura grešisade, o Dol kaznilen, von pokainpe, a o Dol bičhalol osloboditelje te spasilen. But berša, O Dol bičhalda buten osloboditeljuren save spasina e Izraelcuren tare dušmaja.

Konačno, o narodo molisada e Devle zako kraljo sar savo sasa avere narodo. Manglje kraljo savo ka avol baro thaj zuralo, savo ka šaj inđarolen ane bitke. E Devlese ni sviđisajlo gasavo zahtev, al dijalen kraljo, save von manglje.

Biblisko paramič andaro: Sudije 1-3; 6-8