Титоскэ

Шэро 1

¹ Па́вло, слуга́ Дэвлэ́ско, и апо́столо Иисусо́ско Христо́ско, апо́столо пир патябэ́н, савэ́н выкэдыя́ Дэвэ́л, и откэрдо чячибэн, сыр тэ пхирас ангил Дэвлэстэ и кай тэ джинас чячибэ́н сыр тэ джива́с пир Лэ́ско Лав, ² саво́ лыджя́л кэ ве́чно джиипэ́н, пал саво́ ракирэ́лас Дэвэ́л, сыр ничи на сыс по свэто и Ёв на парувэл пэскиро лав, ³ и сыр явья́ одова́ дэвэ́с, то откэрдя́ Пэ́скиро Лав саво́ мэ лыджя́в манушэ́нгэ, со пхэндя́ ма́нгэ амаро́ Зракхипнарё Дэвэ́л, ⁴ Тито́скэ, чячюнэ́скэ чявэ́скэ пир екх патябэ́н: бахт лачипэн тукэ и ми́ро Дэвлэ́стыр Дадэ́стыр и Иисусо́стыр Христо́стыр, Саво амэн зракхья. ⁵ Ваш дава́ ачядём тут дэ Кри́то, соб ту тэ докэрэ́с, со нанэ докэрдо и тэ чивэ́с пир фо́ры пхурэдырэ́н пшалэ́н рашаенса, сыр мэ ту́кэ прыпхэндём: ⁶ сыр исы́н одова́ пшал, саво́ би доша́киро, екхэ́ ромня́ко ром, чяворэ́ лэ́стэ кандунэ́, нанэ́ шундо́ пал лэ́ндэ дылыно́ лав. ⁷ Пал дова́ со пхурэды́р пшал, савэс выкэдэн, трэ́би тэ авэ́л би доша́киро, сыр дэ Дэвлэ́скиро кхэ́р хула́й, ёв на сыкавэ́л холы́, на кошэ́лпэ, на пьел бравинта, на захалпэ манушэнса и на родэ́л сыр тэ хохавэ́л манушэ́н, ⁸ нэ ёв илэ́са прылэ́л манушэ́н, камэ́л лачипэн, ґодяви́р, патывало́, чячюно́, пхирэ́л анги́л Дэвлэ́стэ, рикирэ́л пэс до васта́, ⁹ пририкирэ́лпэ кэ чячюно́ лав, саво́ ракирэ́л Дэвэ́л, соб тэ авэ́л зор тэ сыклякирэ́л адя́кэ сыр трэ́би манушэ́н, и тэ вракирэ́л одолэ́н савэ́ на прылэ́н лав. ¹⁰ Дя́кэ сыр бут исы́н манушэ́н савэ́ на камэ́н тэ шунэ́н, ракирэ́н бут, хоханэ́, буты́р сарэ́ндыр ада́ иуде́и обчиндэ́, ¹¹ савэ́нгэ трэ́би тэ закэрэ́ муй, пал дова, со ёнэ́ улыджя́н се́мьи Дэвлэ́стыр, сыклякирэ́н одова́, со на трэ́би, ёнэ́ закэрэ́н пэ дава́ и на ладжя́н. ¹² Варико́н лэ́ндыр савэ́с ёнэ́ ґинэ́н пророко́са пхэндя́, со критя́ни сы́н хоханэ́, захалэ́ сыр джюкэла́, накамэ́н тэ кэрэ́н буты́. ¹³ И ада́ сы́н чячибэ́н. Пал адава́ ра́кир лэ́нгэ на́дар, соб ёнэ́ тэ патя́н, ¹⁴ на́шун иуде́йска ба́сни и со прыпхэнэ́н мануша́, савэ́ отгинэ́ чячибнастыр. ¹⁵ Кон жужо́ илэ́са, ваш лэ́нгэ саро́ жужо́, а кон дживэ́л до бэзэха́ и на патя́л, ваш лэ́нгэ саро́ нанэ́ лачё, пал одова, со лэ́ндэ нанэ́ ни лач, ни паты́в. ¹⁶ Ёнэ́ ракирэ́н со джинэ́н Дэвлэ́с, а кокорэ́ на́лаче и лэ́нгиро джиипэ́н ракирэ́л ави́р, со ёнэ́ на джинэ́н и накандэ́н Дэвлэ́с, и лачипэ́н тэ кэрэ́н лэ́ндэ адава́ нанэ́.

Шэро 2

¹ А ту ра́кир манушэ́нгэ одова́, со чиндо́ до Лав Дэвлэ́ско, ² соб пхурэды́р мурша тэ авэ́н ґодяви́р, патывалэ́, тэ рикирэ́н пэс до васта́, тэ патя́н дэ Дэвлэ́ско Лав, до камлыпэ́н и вырикирибэ́н. ³ Адя́кэ и пхурэды́р джювля — тэ дживэ́н сыр свэ́нта мануша́: тэ на́ хохавэн, тэ на́ прыдчюрдэнпэ кэ ви́но, а тэ сыклякирэ́н лачипнаскэ, ⁴ и тэдэ́н ґоды́ тэрнэнгэ́, соб ёнэ́ тэ камэ́н пэ́скирэн ромэ́н, пэ́скирэн чяворэ́н, ⁵ годявир пэс тэ лыджян, тэ на́ кэрэн бэзэ́х, и сыр хуланя тэ дыкхэ́н па́ло кхэ́р, тэ авэ́н ковлэ́ илытка, тэ кандэ́н пэ́скирэн ромэ́н, соб ни кон тэ на́пхэнэл дылныпэ́н пэ Дэвлэ́скиро Лав. ⁶ Адя́кэ и тэрнэ́н чявэ́н сыкля́кир годяса тэ лыджян пэскиро джиипэн и тэ рикирэ́н пэс до васта́. ⁷ Кокоро́ сыка́в дэ саро́ сыр трэ́би тэ лыджя́ пэс: сыр сыклякирэ́с кэр адя́кэ, соб тэ авэ́л пир Дэвлэ́скиро Лав, патыва́са, ⁸ и тэ авэ́л дэ саро́ лав здраво и тэ на авэл дэ лэстэ дош, соб одова́ кон на́лачэстыр тэ авэ́л ладжя́кирдо, соб лэ́скэ тэ на́ авэл со тэ пхэнэ́л пал амэ́ндэ на́лачё. ⁹ Бутярнэ́нгэ прыпхэ́н тэ авэ́н кандунэ́ пэ́скирэ хулае́нгэ, тэ кэрэ́н саро́ сыр ёнэ́ камэ́н и тэ на́ обракирэнпэ лэ́нса, ¹⁰ тэ на́ чёрэн кэ ёнэ́, нэ дя́кэ сыр трэ́би тэ кэрэ́н буты́, соб дэ саро́ тэ авэ́л душло́ гожипэ́н Дэвлэ́ско сыр сыклякирэ́л амэ́н Зракхипнарё Дэвэ́л. ¹¹ Пал дова́ со явья́ Дэвлэ́скири бахт, сави́ зракхэ́л сарэ́н манушэ́н ¹² и сыклякирэ́л амэ́н, тэ ачява́с бэзэха́, и со камэ́л адава́ свэ́то, тэ джива́с до джиипэн ґодяса, до чячибэн и дэ дар Дэвлэ́ски ¹³ и тэ дужакира́с бахт Дэвлэ́ски, сави́ явэ́ла сы́го, сави Ёв сыкавэ́ла дэ бари́ Дэвлэ́скири и Зракхипнарёскири Христо́скири сла́ва. ¹⁴ Ёв отдыя́ Пэс па́л амэ́ндэ, соб тэ выкинэ́л амэ́н сарэ́ндыр бэзэхэ́ндыр и тэ выморэ́л амэ́н ваш Пэ́скэ, соб тэ кэрэ́л амэ́н авирэ́нса манушэ́нса, савэ́ дрыва́н камэ́н тэ кэрэ́н лачипэ́н. ¹⁵ Адава́ ра́кир и припхэн, ладжякир сарэ зорьяса. Мэк никон на чурдэлпэ туса.

Шэро 3

¹ Ра́кир лэ́нгэ кай тэ авэ́н кандунэ́ пэ́скирэ раенгэ и шэралэнгэ, соб дэ саро́ тэ кэрэ́н лачипэ́н, ² никонэ́с тэ на́ кошэн, тэ на заханпэ, тэ на гадэн пэскири глос, а тэ сыкавэн пэскиро ковло ило сарэ́нгэ манушэ́нгэ. ³ Пал дова́ со и амэ́ варико́ли сы́с нанэ́ ґодяви́р, нанэ́ кандунэ́, на пола́сас нисо́, кэра́сас со камэ́ласпэ и со амэ́нгэ чялёлас, джива́сас до хохаибэ́н и дэ холы́, исы́с якхалэ́ пэ чю́жо, екх екхэ́с на камьям тэ дыкха́с. ⁴ Нэ сыр явья́ лачипэ́н и камлыпэ́н амарэ́ Зракхипнарёско Дэвлэ́ско, ⁵ Ёв зракхья́ амэ́н нанэ́ пал амарэ́ лаче рынды, савэ амэ́ кэра́сас, нэ пир Пэ́скири ми́лость, вымордя́ и бияндя́ амэ́н нэвэ́ манушэ́нса до Свэнто Духо. ⁶ Савэ́с Ёв вычюдя́ пэ амэ́ндэ пал Иисусо́стэ Христо́стэ, Саво зракхья́ амэн, ⁷ дякэ сыр Лэ́скири ми́лость злыя амэ́ндыр бангипэ́н, и соб амэ́ пал одова́ со патя́с, тэ ава́с наследникэ́нса дэ ве́чно джиипэ́н. ⁸ Лав адава́ чячё, и мэ кама́в, соб ту лав адава́ тэ ракирэ́с, соб долэ́ кон пятя́н дэ Дэвлэ́стэ тэ причивэн зор ко лаче рынды тэ авэ́н патывалэ́ до лачипэ́н, саво́ камэ́н тэ кэрэ́н, пал одова́ со ада́ куч и трэ́би ва́ш манушэ́нгэ. ⁹ А дылынэ ракирибна́стыр, кон савэ́ родо́стыр, кошибэ́н па́ло зако́но, саво лыджял ко сканда́ло, ада́ ту́кэ на трэ́би, уджя́ далэ́стыр, ада́ нисо́ лачё на дэ́л. ¹⁰ Ману́ш, саво́ лыджял хохано сыклярибэн, е́кхвар ави́р мо́ло лэ́скэ прыпхэ́н, а тэ́нче отджя́ лэ́стыр, ¹¹ джи́н, со ада́саво ману́ш отгия чячибнастыр ёв до бэзэх и ёв сындякирдо́ кокоро́ дэ пэ́стэ. ¹² Сыр бичява́ва кэ ту Артемо́с или Тихико́с сыгэды́р яв кэ мэ дэ Ни́кополё, адя́кэ сыр мэ кама́в тэ пролыджя́в одо́й мра́зы. ¹³ Дыкх тэ пролыджя́с джинглэ́с дэ зако́но Зина́с и Аполосо́с дя́кэ, соб лэ́ндэ саро́ тэ вхтылэ́л. ¹⁴ Мэк и амарэ́ сыклён тэ кэрэ́н лачипэ́н, соб тэ подрикирэ́н ек екхэ́с сыр пхаро́, соб ёнэ́ тэ на́дживэн йивья́. ¹⁵ Приве́тствуют тут сарэ́ кон ма́нса. Приве́тствуй долэ́н кон амэ́н полэ́л дэ пятябэ́н. Тэ авэ́л сарэ́нса тумэ́нса Дэвлэ́скири бахт.