3 Иоаностыр

Шэро 1

¹ Пхуро́м — дро́го миро́ Гайо, савэ́с мэ кама́м до чачибэ́н. ² Дро́го миро́, буты́р сарэ́стыр манга́впэ, соб ту тэ авэ́с састо́ и бахтало́ дя́кэ сыр ту зоралэ́с полэ́с Дэвлэ́с дэ ило́. ³ Мэ лошало́ дрыва́н кай явнэ́ пшала́ и роспхэндэ́ пал тыро́ джиипэ́н, сыр пхирэс ту до чачибэ́н. ⁴ Мэ дрыва́н лошало́ тэ шуна́в кай мирэ́ чаворэ́ пхирэ́н до чачибэ́н. ⁵ Дро́го миро́, тыри́ буты́ бари́, ту куч кэрэ́с ва́шэ пшалэ́нгэ и авирэ́ манушэ́нгэ. ⁶ Ёнэ́ роспхэндэ́ дэ кхангири́ пал тыро́ камлыпэ́н. Ту куч кэрэ́са сыр пролыджя́са лэн до дро́м сыр трэ́би Дэвлэ́стыр. ⁷ Пал одова, со ёнэ́ ґинэ́ ваш Дэвлэ́ско Лав и нисо́ на лынэ́ чюжонэ́ манушэ́ндыр. ⁸ И дасавэ́н амэ́ трэ́би тэ прыла́с, соб тэ ава́с лэ́нса дэ ек Дэвлэ́ски буты́ до чачибэ́н. ⁹ Мэ чиндём лыл кхангиря́кэ, нэ Диотре́фо саво́ камэ́л саро́ тэ рикирэ́л дэ пэ́скирэ васта́, на прылэ́л амэ́н. ¹⁰ Пал одова́, сыр мэ ява́ва, мэ зрипира́ва лэ́скэ, со ёв кэрэ́л и со ёв пэ амэ́ндэ пхэнэл на́лаче лава. Лэ́скэ адава́ нафтылэ́л так ёв кокоро́ на прылэ́л пшалэ́н, савэ́н амэ́ бичявдя́м и одолэ́нгэ кон камэ́л лэн тэ прылэ́л запхэнэ́л, а кон прылэ́л лэн ёв вытрадэ́л кхангиря́тыр. ¹¹ Миро́ дро́го! На дыкх пэ да́савэндэ манушэ́ндэ, савэ́ кэрэ́н на́лачипэн и на кэр адя́кэ, а кэр лачипэ́н. Кон кэрэ́л лачипэ́н — одова́ Дэвлэ́стыр, а кон кэрэ́л на лаче́ рынды — одова́ на дыкхья́ Дэвлэ́с. ¹² Па́ло Димитростэ всарэ́нса роспхэндо́ лачипэ́н, чачибна́са и амэ́ ракира́с пал лэ́стэ и ту джинэ́с амаро́ ракирибэ́н чячюно́ исы́н. ¹³ Бут камьём тэ чина́в ту́кэ до лыл, нэ на кама́в тэ чина́в вастэ́са, ¹⁴ нэ думина́в, со сы́го дыкхасампэ и поракира́сам як пэ як. ¹⁵ Бахт ту́кэ Дэвлэ́стыр! Приве́тствуют тут пшала́. Приве́тствуй пшалэ́н пир лэ́нгиро лав.