نامه اول پطرس

Chapter 1

فصل اول

آزمايش ايمون

¹ ازطرف پطرس ، رسول و فرستاده عيسي مسيح به مسيحيوني كه خارج از اورشليم در تمومِ استانِ پونتس ، غلاطيه ، كپدوكيه ، اسيا و بيتينيه ،پراكنده هسنه و اين دنياي دِله غريب هسنه . ² از درگاه الهي شمه وسه ، رحمت و ارامش خوامه ، اي عزيزون ، خداي پدر ، از مدتهاي پيش شماره انتخاب هاكرده ، چون وِه از پيش دونسه كه شما به وِه ايمون ايارنني ، روح خدا هم شماره با خون عيسي مسيح پاك هاكرده ، تا بتونين طبق خواست مسيح زندگي هاكنين . ³ شكر بر خدا بوشه ، بر خدا كه ، پدرِخداوند اما عيسي مسيح هسه ، وِه به دليل لطف و محبتِ عظيم خودش از اول اماره متولد هاكرده و عضو خانوادهِ خودش هاكرده ، اينسه اما الان به اميد حيات جاودوني زينه هسمي چون مسيح هم بعد از بٓمردن ، حيات پيدا هاكرده . ⁴ خدا هم شمسه اتا ارثِ بي فساد و الودگي و مرگ ره ، اسمون دِله دارنه، يعني حيات جاودوني ،ره. ⁵ و از اونجه اي خدا ره توكل و اعتماد هاكردني ، وِه هم با قدرت عظيمِ خودش ، شماره بسلامتي به اسمون وٓرنِه تا اين ارث ره بي رين ، اره در روز قيامت شما وارث حيات جاودون بونني . ⁶ پس الان كه همچين ارثي دارمي ، واقعا شاد بوشيم ، حتي اگه لازم بوشه در اين دنيا مدتي زحمت و سختي ره تحمل هاكنيم . ⁷ اين سختي ها بخاطر ازمايش شمه ايمون پيش اِنِه ، همونجوري كه با ، تٓش ، طلاره امتحان و پاك كننه ، شمه ايمون هم بعد از اينكه امتحان بيه و سالم بيرون بيمو ، باعث بونه كه در روز باز گشت عيسي مسيح . مورد تحسين و تمجيد و تكريم ، قرار بيره . ⁸ با اينكه شما تا الان مسيح نٓديني ، ولي وره دوس دارنني الان هم گرچه وره نٓوينني ، ولي به وِه ايمون دارنني ، و اين ايمون چنون شادي عظيمي شمه قلب دِله به وجود بياده كه قابل وصف نيه . ⁹ همين ايمون هم عاقبت باعث ، شمه نجات بونه. ¹⁰ اين نجات ، رازي بيه كه حتي انبيا هم ونه جا كاملا اگاه نٓي نِننه ، هرچند ونه خٓوِري ، شه كتاب دله نِويشتنه اما مسايل زيادي وجود داشته كه وشونسه مبهم بيه . ¹¹ وشون نتونسنه درك هاكنن كه روح مسيح در وجود وشون از چي حرف زنه ؟ چون روح وشونه الهام كرده كه ، چيزايي ره بنويسن كه مسيحِ وِسه اتفاق كٓفنه ، و به رنج هايي كه وه كٓشنه ، و به جلالي كه وِه پيدا كنه ، اشره هاكنن ، ولي وشون ندوسنه اين اتفاق ها كِنِه وسه و در چه زموني اتفاق كٓفِنه . ¹² تا اينكه خدا وشونه الهام هاكرده كه اين وقايع در عمرِ وشون اتفاق نٓكفنه ، بلكه خله سال ها بعد از مرگِ وشون واقع بونه و بالاخره در دوره اي كه الان اما زندگي كمي ، بٓرسيه ، و اين پيغوم نجات بخش يعني پيغوم انجيل اينجور اشكار و روشن به همه اعلام بيه ، اونايي كه اين پيغوم ره به شما برسيننه ، با قدرت روح القدس ، وره بيان هاكردنه ، همون روح القدس اسموني كه با انبيا سخن گِته . اين پيغوم چنون عظيم و عالي هسه كه فرشتگون اسمون هم مشتاق هسنه در باره وه بيشتر بدونن .

پاكي و تقدس مومنين

¹³ بنا بر اين اماده و هوشيار بوشين ، مثل كسي كه اماده هسه هر اتفاقي ونسه دٓكِفه ، منتظر بازگشت عيسي مسيح بوشين ، چونكه در اون روز لطف و فيضِ خٓله عظيمي نصيب شما بونه . ¹⁴ خداي جا اطاعت هاكنين چون ونه ، وٓچون ، هسني ، پس اي دوباره به طرف گناهوني كه قبلا اسير بي ني نشويين ، چون اون زمون ، نٓدونسني چي كار كنني . ¹⁵ همينسه در تموم ، شه ، رفتار و اعمال ، پاك و مقدس بوشين ، چون خداوند هم پاك و مقدس هسه ، همون خداوندي كه شما ره بخونسه ، تا ونه ،وٓچه ، بوشين . ¹⁶ وِه شٍه بفرما ؛ پاك بوشين ، چون من پاك هسمه . ¹⁷ در ضمن ياد دارين ، پدر ،اسموني شما كه دست دعا ره ونه سو ، دراز كنني ، در روز جزا ، از كسي طرفداري نكنه ، بلكه اعمال هر كس ره عادلانه داوري كنه ، همينسه تا زموني كه در اين دتيا درني ، با خدا ترسي زندگي هاكنين . ¹⁸ خدا شمه نجات وسه ، بهايي هادا ، تا شما ره از اون روش پوچ و باطل زندگي كه ، شه ، اجدادِ جا ، ارث بـٓوِردني ، ازاد هاكنه ، بهايي كه خدا براي ازادي از اسارت شما ، هادا ، طلا و نقره نٓيه ' ¹⁹ بلكه خون گرونبهاي مسيح بيه ، كه مثل اتا ، وٓره ، بي گناه و بي عيب ، قربوني بيه . ²⁰ همينسه خدا ، وِره ، پيش از افرينش جهان ، قرار هادا ، اما در اين زمون هاي اخر ، وِره به جهان راهي هاكرده ، تا شما ره رستگار هاكنه . ²¹ توسط وِه هسه كه شما به خدا ايمون بياردني ، به خدايي كه مسيح ره بعد ازبٓمردن ، زينه هاكرده و ، وره سرافراز هاكرده ، و الان ايمون و اميد شما ، بر خدا هسه . ²² الان بتونني همديگه ره واقعا دوس دارين ، چون از زموني كه به مسيح ايمون بياردني و نجات بي تني ، شمه وجود از خود خواهي و تنفر پاك بيه ، بنا بر اين همديگه ره از صميم قلب دوس دارين . ²³ چون الان زندگي تازه اي دارنني ، اين زندگي تازه ره شه ، پِر و ماره جا ، نٓي تني ، آگرنا ، بعد از مدتي تباه بي ني ، اين زندگي تازه تا ابد باقي مونه ، چون مسيح وره حاصل هاكرده ، يعني از پيغوم هميشه زينه . خدا ، انسونهاي وسه . ²⁴ اره ، زندگي عادي اما از بين شونه ، مثل علف كه زرد و خشك بونه و از ميون شونه ، تموم ، آمِه عزت و افتخارات اما مثل اتا ، گُل ، هسه كه پلاس ، بونه و بِنِه ، كٓفِنِه . ²⁵ اما كلام خدا تا ابد برجا مونه ، اين كلام همون پيغوم نجاتبخش ، انجيل هسه كه شماره هم بشارت ، هادانه . سنگهاي زينه ، خداي دٓسِ دِله

Chapter 2

فصل دوم

¹ اينسه شه ، وجود ره از كينه و دشمني ، فريب و دو رويي ، حسادت و بد گويي پاك هاكنين . ² شما كه مهر و محبت خداوند ره شه زندگي دله ، مِزِه ، هاكردني . ³ مثل اتا كِچكِه ، وٓچِه ، مشتاق شير روحاني خالص بوشين ، تا وره ، خِر نني ، در اين نجاتي كه به دٓس بياردني ، گد بوشين . ⁴ همه دومي كه مسيح ، اون سنگ زينه اي هسه كه خدا قرار هادا تا شه عمارت روحاني ره ونه رو بنا هاكنه ، گرچه ، ادم ها دست رٓد ، به سينه وِه بٓدونه ، اما وِه خداي پيش ، عزيز و مُكٓرم هسه ،پسونه ، وٓر ، بين . ⁵ تا شما هم مثل سنگ هاي زينه ، خداي دٓس ، در بناي اون عبادتگاه و عمارت روحاني ، به كار بورين ، مهم تر اينكه اين عبادتگاه دِله ، شما كاهن مقدس هم هسني ، پس قربوني هاي مقبول و مورد پسندِ خدا ره توسط عيسي مسيح ، تقديم هاكنين . ⁶ در كتاب اسموني تورات ، بنويشته كه ؛ خدا مسيح ره راهي كنه ، تا ونه خِنِه دِلِه ، سنگِ زاويه گرونبها بوشه ، وهر كي بِه وِه ايمون بياره نا اميد و پشيمون نٓووشه . ⁷ اين سنگ براي شما كه ايمون دارنني ، خٓله با ارزش هسه ، اما بي ايمون هاي وسه ، همون سنگي هسه كه ونه خٓوِري باتنه : سنگي كه معمارون وِره قبول نداشتنه ، سنگ اصليِ ساختمون ، بيه . ⁸ همچنين در كتاب اسموني تورات بٓنويشته ؛ وِه اون سنگي هسه كه بعضي هاي لينگ، ونه كٓش ، خِرنه ، و كٓفِننه ، و تخته سنگي هسه كه بعضي از وِه سقوط كننه و وشونه حٓق هٓسه كه دٓكِفن و سقوط هاكنن ، چونكه از كلام خدا اطاعت نـكِننه . ⁹ اما شما وشونه جور ني ني ، شما برگزيدگون و پادشاهونِ عيسي و قوم مقدس و خاص ِ خدا هسني ، تا اينجوري ، ديگرون ره نشون هادين كه خدا ، چتي شماره از تاريكي به نور عجيب خودش ، دعوت هاكرده . ¹⁰ زموني شما هيچ كٓسي نٓي بيني ، اما الان فرزندون خدا هسني ، زموني ازرحمت و مهربوني خدا ،بي بهره بي ني ، اما الان مورد لطف و رحمتِ وِه قرار بي تني .

رفتار مسيحي ، مردم ميون

¹¹ اي برارون عزيز ، شما اين دنياي دِلِه مثل اتا مسافر هسني . و شمه خِنِه اصلي ، اسمون دِلِه هسه اينسه خواهش كمه ، شه خود ره از لذت هاي گناه الود اين دنيا ، دور هاكنين ، شما براي اينجور اميال و هوسها ، بساط ني نني ، همينسه هسه كه وشون با روح و جان شما ، جنگ و جدال كننه . ¹² جلوي بي ايمون ها و اطرافيون شه رفتارِ مواظب بوشين ، براي اينكه ، اگر چه وشون شماره متهم به بد كاري هاكنن ، اما درزمون بازگشت مسيح ، خداره براي كارهاي خوب شما تمجيد كننه . ¹³ براي رضايت خدا ، از مقامات كشور اطاعت هاكنين ،چه رهبر بوشه ، چه مامورين دولت. ¹⁴ كه رهبر وشونه انتخاب هاكرده تا خلاف كارون ره مجازات هاكنن و درستكارون ره پاداش هادن . ¹⁵ خواست خدا اينه كه شما درستكار بوشين تا اينجوري ، اشخاص نادوني كه شمه جا ايراد گيرننه ، دهون ره دٓوِنين . ¹⁶ راس هسه كه شما از قيد و بند احكام مذهبي ازاد بي نني ، اما ونه معني اين نيه كه شما اجازه دارنني هر كار نادِرِس ره انجام هادين ، بلكه شه ازادي ره براي اجراي خواست خدا بكار بٓوِرين . ¹⁷ همه ره احترام هاكنين ، ايمان دارون ره دوس دارين ، خدايِجا بٓترسين ، رهبٓرونِ مملكت ره احترام هاكنين . ¹⁸ شما ، خدمتكارون ، ونه شه اربابون ره اطاعت هاكنين، و وشونه احترام بِلين ، نا فقط اربابون مهربون و با ملاحظه ، بلكه اونايي كه سختگير و بد اخلاق هسنه . ¹⁹ اگه بخاطر انجام اراده خدا ، به ناحق رنج و زحمت بٓكِشين ، خدا شما ره ، آجر دنه . ²⁰ اگه بخاطر اعمال بٓد و نا دِرِس مجازات بووشين ، چي افتخاري دارنه؟ اما اگه بخاطر دِرِس كاري و نيكوكاري رنج و زحمت بٓوينين و شكايت نكنين ، اونوقت خدا ره راضي هاكردني . از مسيح سرمشق بي رين. ²¹ اين رنج و زحمت جزعي از خدمتي هسه كه خدا ، شمه جا خوانه و سرمشق شما مسيح هسه ، كه در راه شما زحمت بٓكشيه ، پس ونه راه ره ادامه هادين . ²² وِه ، هرگز گناهي نكرد و ونه دِهونه جا هيچوقت ، دِرو ، دٓرً ، نيمو . ²³ وقتي وِره ناسزا گِتِنه ، جواب نِدا و زموني كه وره عذاب دانه ، تهديد به انتقام نٓكرده ، بلكه شه زندگي ره به خدايي واگذار هاكرده كه داور با انصاف و عادل هسه . ²⁴ وِه صليبِ بالا بار گناهون اما ره شه دوش بيته ، تا اما بٓتونيم از چنگال گناه ازاد بٓووشيم و زندگي پاكي داريم ، ونه زخم ها هم امه دردهاي ، دِوا بيه . ²⁵ شما مثل كسفن هايي بي ني كه شه راه ره گوم هاكردنه ، ولي الان شه چٓپونِ پلي ، دٓگِرِسِنِه. چپوني كه نگهبان جانِ شما هسه و شما ره از خطر ها حفظ كِنه .

Chapter 3

فصل سوم

¹ اما شما زن ها ره گِمه ، شه مردم ره اطاعت هاكنين تا اگه بعضي از وشون هم كه به انجيل ايمون نيارده بوشن ، وقتي شمه رفتار ره بدينه ، ايمون بيارن . ² چون رفتار خوب و با احترام يك زن ، بهتر از ونه حرفا در باره مسيح ، ونه مٓرديِ دِلِ دِلِه اثر كنه . ³ براي قشنگي ، به ارايش ظاهري و طلا و لباس و ارايش و گيسِه بِبافتن ، متوسل نٓووشين . ⁴ بلكه بِلين شمه باطن و سيرت قشنگ بوشه ، شه باطن ره با قشنگيِ دايمي يعني با روحيه ارام و ملايم ،زينت هاكنين كه مورد پسندِ خدا هسه . ⁵ زٓن هاي مقدس قديم ، اينجوري اخلاق داشتنه ، وشون خدا ره ايمون داشتنه و شه مٓردم ره ، مطيع بي نه . ⁶ ابراهيمِ زنا ، سارا هم اينجور بيه ، وه شه مردي ره اطاعت كرده و وره مثل رييس خانواده احترام اشته ، شما هم اگه اون بانوي بزرگوار كيجا هسني و ونه راه خوب ره ، پيش گيرنني ، ديگه ترس و نگروني ناي نني كه شمه مردا ، از شما ناراحت بوشن. ⁷ و شما اي مردها ، شمه رفتار با شمه همسرا، ونه با ملاحظه و احنرام بوشه ، چونكه وشون از شما ظريفتر هسنه ، در ضمن ياد نكنين وشون شريك زندگيِ روحاني و بركات الهي شما هسنه ، اينسه اگه با وشون رفتار شايسته نِدارين ، شمه دعاها مستجاب نوونه ، رنج و زحمت بخاطر نيكوكاري. ⁸ اين چند كامه ره هم شمه همه وِسه نِويسمه مثل اعضاي اتا خانواده ، همديگرِجا مهربون و فروتن بوشين و از ته دِل ، همديگه ره دوس دارين. ⁹ اگه كسي شمه جا بدي هاكرده ، شما ونه جا بدي نٓكنين ، و اگه كسي شما ره فاش هادا ، شما وره فاش نٓدين . بلكه وشونه سه دعاي خير و بركت هاكنين ، چونكه اما ونه با ديگرون مهربون بوشيم . اونوقت خدا اما ره بركت دنه . ¹⁰ اگه خانني اتا زندگي خوب و خوش دارين ، از حرف هاي بٓد و دروغ ، پرهيز هاكنين . ¹¹ ازبٓدي هاكردن دوري هاكنين و همهِ جا خوبي هاكنين ، سعي هاكنين با همه مردم در صلح و صفا زندگي هاكنين . ¹² چون خداوند نيكوكارا ره دوس دارنه و وشونه دعا ره گوش دِنه ، اما بد كارايِ جا روگردون هسه . ¹³ معمولا هيچكي بخاطر خوبي هاكردن ، ازار و اذيت ، نٓوينه . ¹⁴ اما حتي اگه شما ره ازار و اذيت هاكردنه ، خوش بحال شما ، پس نگرون نٓووشين ، چون خداوند شما ره اجر دِنِه . ¹⁵ بلكه خاطر جمع بوشين و شه خود ره به شه خداوند مسيح بسپارين ، اگه كسي دليل اين اعتماد و ايمون ره سوال هاكرده ، اماده بوشين ، با كمال ادب و احترام ، وره سه توضيح هادين . ¹⁶ شما مردِمِ توهين و بد گويي ره نِشين ، و اونچه كه راستي و دِرِسي هسه ره انجام هادين ، چون وقتي بفهمن كه شما درستكار هسني ، شه كارِ جا پشيمون بونن. ¹⁷ اگه خدا خوانه كه شما زحمت بٓوينين ، بهتر هسه كه براي خوبي زحمت بٓكشين تا برايِ بدكاري . ¹⁸ مسيح هم زحمت بديه ، با اينكه از هر گناهي پاك بيه ، اما اتا كٓش شه جان ره ، گناهكارون وسه فدا هاكرده تا اما ره به حضورِ خدا بياره ، دموني كه بدن مسيح ره قبر دِلِه بِشتنه ، ونه روح ، زينه بمونسه . ¹⁹ وٓ ، ونه روح بيه كه بورده ارواحِ زندوني پٓلي و شه ازاديِ مژده ره به وشون بشارت هادا . ²⁰ يعني به روح اونكسوني كه در قديم ، در زمون نوح ، از خدا نا فرموني هاكرده بينه ، گرچه اونوقت كه مشغول بساتن كشتي بيه ، با صبر منتظر بيه كه وشون ، توبه هاكنن ، با اين حال فقط هشت نفر از اون طوفان وحشتناك نجات بي تنه و غرق ني ننه . ²¹ الان اون طوفان ،مثل غسل تعميدِ اما ره مونه ، وقتي غسل تعميد گيرمي ، نشون دمي كه بوسيله زينه بِٓيٓنِ مسيح ، از بٓمردن و هلاكت نجات بي تمي ، هدف از غسل تعميد ، بٓشوردن و تميزي بٓدن نيه ، بلكه با غسل تعميد خوامي شه دلها ره از گناهون پاك هاكنيم . ²² الان مسيح اسمون دره و در مقامي بلند ، در دست راست خدا ، نيشته ، و تموم فرشتگون و قدرتهاي اسمون ، ونه جلو تعظيم كننه و تحت فرمون وه درنه .

Chapter 4

فصل چهارم

¹ همونجوري كه مسيح متحمل رنج و زحمت بيه ، شما هم شه خودره اماده زحمت ها و رنج ها هاكنين ، چون هر موقع بٓدنِ ادم، متحمل درد و رنج بٓووشه ، ديگه گناه نٓتونه قدرتي ونه رو داره . ² اينجوري شما بتونني بقيه عمر ره در انجام خواست خدا ، طِي هاكنين نا انجام خواهش هاي گناه الود خودتون . ³ چونكه در گذشته بقدر كافي شه وقت ره به همراه خدانشناسا ، صٓرف كارهاي نا پاك هاكردني ، و يك عمر ره در بي بندو باري و شهوت راني و مستي و عيش و نوش و گناهون شرم اور تلف هاكردني . ⁴ الان شمه رٓفِقونِ قديمي تعجب كننه كه چي سه وشونه همراه دنبال هرزگي ، نٓشونني ، اينسه شما ره مسخره كننه . ⁵ اما وشون اتا روز ، خداي پيش حساب پس دِننه ، به خدايي كه مردگون و زندگون ره داوري كنه . ⁶ همينسه پيغوم انجيل ، حتي به مردگون ، يعني به كسوني كه موقع طوفان نوح بٓمردنه ، اعلام بيه تا به اين وسيله وشونه روح بٓتونه مثل خدا زينه بوشه ، گرچه جسما به مجازات بٓمردن بٓرسينه . ⁷ اين دنيا خله زود تموم بونه ، پس شه فكر ها ره پاك هاكنين و شه خودره حفظ هامنين تا بتونين دعا هاكنين . ⁸ از همه مهمتر ، همديگه ره با تموم وجود محبت هاكنين ، چون محبت باعث بونه ، تقصير هاي بيشمار همديگه ره نا ديده بيرين . ⁹ باخوشرويي و بدون قُر قُر بٓزوعٓن ، شه خِنِه دٓر ره ، همديگه وسه ، وا ، هاكنين . ¹⁰ خداوند به هركدوم از شما اتا عطاي مخصوص هادا ، اين عطايا ره براي كمك هاكردن به همديگه استفاده هاكنين ، اينجوري همديگه ره از بركات و مواهبِ مختلف خدا بهره مند هاكنين . ¹¹ كسي كه عطاي موعظه دارنه ، شه پيغومِ موعظه ره از خدا بٓيره ، كسي كه عطاي خدمت دارنه ، مطابق اون قدرتي كه خدا وره دنه ، خدمت هاكنه ، تا خدا بوسيله عيسي مسيح جلال و تمجيد بٓووشه . چونكه جلال و قدرت تا ابد ، برازنده خدا هسه ، رنج و زحمت مسيحيون ¹² اي عزيزون ، از زحمتها وآزمايش هايي كه شما ره درگير هاكرده ، تعجب نكنين و حيرون ، نٓووشين و فكر نكنين كه چيزِ عجيبي اتفاق دكته ، چون اين سختي ها براي ازمايشِ، شمه ايمون هسه . ¹³ شاد بوشين كه اينجوري بتونني در در رنج و زحمت مسيح ، شريك بٓووشين ، اين جوري در روز بازگشتِ پر جلال مسيح ، شمه شادي كامل بونه . ¹⁴ اگه شما ره بخاطر مسيحي بٓي يٓن ، شما ره فاش و نفرين هاكنن ، شاد بوشين ، چون اينجوري ، گرمي روحِ پرجلالِ خدا ره احساس كنني ، كه تموم وجود شما ره پُر ، كنه . ¹⁵ اما مواظب بوشين ، هيچكدوم از شما ره به جرم ، قتل و دزدي و خراب كاري ، و دخالت در زندگي ديگرون ، رنج و زحمت نٓوينِه . ¹⁶ اما اگه به جرم مسيحي بٓيٓن ، شما ره اذيت و ازار هاكردنه ، خجالت نكشين ، بلكه افتخار هاكنين كه اسم مسيح ، شمه رو دٓرِه و اينسه ، خدا ره شكر هاكنين . ¹⁷ چون زمان داوري بٓرِسيه و اول فرزندون خدا داوري بوننه ، پس اگه اما كه فرزندون خدا هسمي . مورد داوري قرار گيرمي ، چه سرنوشت وحشتناكي ذر انتظار كسوني ، دره كه به انجيل خداوند ايمون نياردنه . ¹⁸ و اگه اشخاص درستكار به زحمت نجات گيرننه ، پس بي دينون و گناه كارونِ سٓر چه بلايي اِنِه ؟ ¹⁹ بنا بر اين اگه به خواست خدا ، دچار رنج و زحمت بونني ، اشكالي ندارنه ، شما شه كارهاي خوب ره ادامه هادين و به خدا اعتماد هاكنين كه خالق شما هسه ، چون وِه هيچوقت شما ره وِل نكنه .

Chapter 5

فصل پنجم

چن كلمه با كشيشان كليسا و جوانون

¹ اِسا اتا خواهش از كشيشان كليسا دارمه ؛ چون مِن شه ، كليساي دِلِه همين مقام ره دارمه ، من شاهد . بمردن مسيح ، بالاي صليب ، بيمه ، همچنين در روز بازگشت مسيح ، ونه جلال ره شريك بومه . ² مِه خواهش اينه كه اون ، رٓمه اي كه خدا شمه دٓس ، بسپارسه ره خوراك هادين ، با ميل و اشتياق ، وشون ره مراغبت هاكنين ، و نا از مجبوري و نا بخاطر دٓسمِزي ، بلكه بخاطر اينكه خوانني به خدا خدمت هاكنين . ³ رياست طلب نٓووشين ، بلكه وشونه سه سرمشق خوب بوشين . ⁴ تا اون روزي كه شيان اعظم ، اِنِه شما ره جايزه هاده ، و در جلال و شكوهِ بي پايانِ خودش شريك هاكنه . ⁵ شما جوانون ره گمه ؛ مطيع ، بِزِرگون بوشين ، همينجوري همگي شما با روحي فروتن ، همديگه ره خدمت هاكنين ، چونكه خداوند ، فروتنون ره جا عنايتِ خاصي دارنه ، اما با متكبرون و مغرورايِ جا ، مخالفت كِنه . ⁶ پس اگه شِه خودره زير دستِ قوي خدا ، فروتن هاكنين ، خدا هم در زمون مناسب شما ره سرافراز كنه . ⁷ اجازه هادين خداوند تموم نگروني و غم و غصهِ شما ره ، شه دوش بي ره ، چون وِه هميشه به فكر شما دره . ⁸ هوشيار و مراقب بوشين ، چون شمه دشمن ، شيطون ، مثل اتا شير ، وِشنا ، هرسو شونه و غُرِش كنِه ، تا اتا طعمه پيدا هاكنه و ، قورت هاده . ⁹ پس ونه حمله جلو ، به خدا تٓكيه هادين و استوار بوشين و هِرِسين ، بدونين كه اين زحمت ها فقط شمه سه نيه ، بلكه مسيحيون در تموم دنيا هم چنين مشگلاتي دارننه . ¹⁰ بنا براين بعد از اونكه مدت كمي اين زحمت ها ره تحمل هاكردني ، خودِ خدا شما ره كامل و توانا و استوار كنه ، خدا پُر مهر و رحمت هسه ، و بخاطر شمه ايمون به عيسي مسيح ، اما ره بخونسه تا در جلال و شكوه مسيح شريك بوشيم . ¹¹ جلال و قدرت تا ابد مالِ خدا هسه ، امين . ¹² اين نامه مختصر ره با كمك سيلاس بٓنويشتمه به نظر من وِه اتا برار قابل اعتماد هسه ٫ اميد دارمه با اين نامه ، شما ره تشويق هاكرده بوشيم ، چونكهِ راهِ بٓي تٓن بركات خدا ره شما ره نشون هادامه ، اونچه بنويشتمه ، شما ره كمك كنه تا در بركات خدا ، استوار بٓمونين . ¹³ اعضاي كليساي شهرِ ، روم ، كه مثل شما برگزيده خدا هسنه ، شما ره سلام رٓسِنِنِه ، مِه ، پِسٓر ، مرقس هم سلام ، رٓسِنِه . ¹⁴ عٓوٓضِ من همديگه ره با محبت مسيحي ماچ ها كنين . ارامش بر همه شما كه مسيحي هسني بوشه.