സങ്കീർത്തനങ്ങൾ

Chapter 1

    

¹ ദുഷ്ടന്മാരുടെ ആലോചനപ്രകാരം നടക്കാതെയും

     പാപികളുടെ വഴിയിൽ നില്ക്കാതെയും

     പരിഹാസികളുടെ ഇരിപ്പിടത്തിൽ ഇരിക്കാതെയും

     ² യഹോവയുടെ ന്യായപ്രമാണത്തിൽ സന്തോഷിച്ച്

     അവന്റെ ന്യായപ്രമാണം രാവും പകലും ധ്യാനിക്കുന്ന മനുഷ്യൻ ഭാഗ്യവാൻ.

     ³ അവൻ, നദീതീരത്ത് നട്ടിരിക്കുന്നതും

     തക്കകാലത്ത് ഫലം കായ്ക്കുന്നതും

     ഇലവാടാത്തതുമായ വൃക്ഷംപോലെ ഇരിക്കും;

     അവൻ ചെയ്യുന്നതെല്ലാം അഭിവൃദ്ധി പ്രാപിക്കും.

     ⁴ ദുഷ്ടന്മാർ അങ്ങനെയല്ല;

     അവർ കാറ്റു പറത്തിക്കളയുന്ന പതിരു പോലെയാകുന്നു.

     ⁵ ആകയാൽ ദുഷ്ടന്മാർ ന്യായവിസ്താരത്തിലും

     പാപികൾ നീതിമാന്മാരുടെ സഭയിലും നിവിർന്നുനില്ക്കുകയില്ല.

     ⁶ യഹോവ നീതിമാന്മാരുടെ വഴി അറിയുന്നു;

     ദുഷ്ടന്മാരുടെ വഴിയോ നാശകരം ആകുന്നു.

സങ്കീർത്തനം.1 2

     ¹ ജനതകൾ കലഹിക്കുന്നതും

     വംശങ്ങൾ വ്യർത്ഥമായത് നിരൂപിക്കുന്നതും എന്ത്?

     ² യഹോവയ്ക്കും അവന്റെ അഭിഷിക്തനും വിരോധമായി

     ഭൂമിയിലെ രാജാക്കന്മാർ എഴുന്നേല്ക്കുകയും

     അധിപതികൾ തമ്മിൽ ആലോചിക്കുകയും ചെയ്യുന്നത്:

     ³ “നാം അവരുടെ കെട്ടുകൾ പൊട്ടിച്ച്

     അവരുടെ കയറുകൾ എറിഞ്ഞുകളയുക.”

     ⁴ സ്വർഗ്ഗത്തിൽ വസിക്കുന്നവൻ ചിരിക്കുന്നു;

     കർത്താവ് അവരെ പരിഹസിക്കുന്നു.

     ⁵ അന്ന് അവൻ കോപത്തോടെ അവരോട് അരുളിച്ചെയ്യും;

     ക്രോധത്തോടെ അവരെ ഭ്രമിപ്പിക്കും.

     ⁶ “എന്റെ വിശുദ്ധപർവ്വതമായ സീയോനിൽ

     ഞാൻ എന്റെ രാജാവിനെ വാഴിച്ചിരിക്കുന്നു.”

     ⁷ ഞാൻ ഒരു തീർപ്പ് കല്പിക്കുന്നു;

     യഹോവ എന്നോട് അരുളിച്ചെയ്തത്:

     “നീ എന്റെ പുത്രൻ; ഇന്നു ഞാൻ നിന്നെ ജനിപ്പിച്ചിരിക്കുന്നു.

     ⁸ എന്നോട് ചോദിച്ചുകൊള്ളുക;

     ഞാൻ നിനക്കു ജനതകളെ അവകാശമായും

     ഭൂമിയുടെ അറുതികളെ കൈവശമായും തരും;

     ⁹ ഇരിമ്പുകോൽകൊണ്ട് നീ അവരെ തകർക്കും;

     കുശവന്റെ പാത്രംപോലെ അവരെ ഉടയ്ക്കും.”

     ¹⁰ ആകയാൽ രാജാക്കന്മാരേ, ബുദ്ധി പഠിക്കുവിൻ;

     ഭൂമിയിലെ ന്യായാധിപന്മാരേ, ഉപദേശം കൈക്കൊള്ളുവീൻ.

     ¹¹ ഭയത്തോടെ യഹോവയെ സേവിക്കുവിൻ;

     വിറയലോടെ ഘോഷിച്ചുല്ലസിക്കുവിൻ.

     ¹² അവൻ കോപിച്ചിട്ട് നിങ്ങൾ വഴിയിൽവച്ചു

     നശിക്കാതിരിക്കുവാൻ പുത്രനെ ചുംബിക്കുവിൻ.

     അവന്റെ കോപം ക്ഷണനേരത്തേക്കേ ഉള്ളു.

     അവനെ ശരണം പ്രാപിക്കുന്ന എല്ലാവരും ഭാഗ്യവാന്മാർ.

സങ്കീർത്തനം.2 3

     ¹ യഹോവേ, എന്റെ വൈരികൾ എത്ര പെരുകിയിരിക്കുന്നു!

     എന്നോട് എതിർക്കുന്നവർ അനേകം പേർ ആകുന്നു.

     ² “അവന് ദൈവത്തിങ്കൽ രക്ഷയില്ല” എന്ന്

     എന്നെക്കുറിച്ച് പലരും പറയുന്നു. സേലാ.

     ³ നീയോ യഹോവേ, എനിക്കു ചുറ്റും പരിചയും

     എന്റെ മഹത്വവും എന്റെ തല ഉയർത്തുന്നവനും ആകുന്നു.

     ⁴ ഞാൻ യഹോവയോട് ഉച്ചത്തിൽ നിലവിളിക്കുന്നു;

     അവൻ തന്റെ വിശുദ്ധപർവ്വതത്തിൽനിന്ന് ഉത്തരം അരുളുകയും ചെയ്യുന്നു. സേലാ.

     ⁵ ഞാൻ കിടന്നുറങ്ങി;

     യഹോവ എന്നെ താങ്ങുകയാൽ ഉണർന്നുമിരിക്കുന്നു.

     ⁶ എനിക്കു വിരോധമായി ചുറ്റും പാളയമിറങ്ങിയിരിക്കുന്ന

     ആയിരം ആയിരം ജനങ്ങളെ ഞാൻ ഭയപ്പെടുകയില്ല.

     ⁷ യഹോവേ, എഴുന്നേല്ക്കണമേ; എന്റെ ദൈവമേ, എന്നെ രക്ഷിക്കണമേ.

     നീ എന്റെ ശത്രുക്കളെ ഒക്കെയും ചെകിട്ടത്തടിച്ചു;

     നീ ദുഷ്ടന്മാരുടെ പല്ല് തകർത്തുകളഞ്ഞു.

     ⁸ രക്ഷ യഹോവയ്ക്കുള്ളതാകുന്നു;

     നിന്റെ അനുഗ്രഹം നിന്റെ ജനത്തിന്മേൽ വരുമാറാകട്ടെ. സേലാ.

സങ്കീർത്തനം.3 4

     ¹ എന്റെ നീതിയായ ദൈവമേ, ഞാൻ വിളിക്കുമ്പോൾ ഉത്തരം അരുളേണമേ;

     ഞാൻ ഞെരുക്കത്തിൽ ഇരുന്നപ്പോൾ നീ എനിക്ക് വിശാലത വരുത്തി;

     എന്നോടു കൃപതോന്നി എന്റെ പ്രാർത്ഥന കേൾക്കണമേ.

     ² മനുഷ്യപുത്രന്മാരേ, നിങ്ങൾ എത്രത്തോളം എന്റെ മാനത്തെ നിന്ദിച്ച്,

     മായയെ ഇച്ഛിച്ച് വ്യാജത്തെ അന്വേഷിക്കും? സേലാ.

     ³ യഹോവ തന്റെ ഭക്തനെ തനിക്കായി വേർതിരിച്ചിരിക്കുന്നു എന്നറിയുവിൻ;

     ഞാൻ യഹോവയെ വിളിച്ചപേക്ഷിക്കുമ്പോൾ അവൻ കേൾക്കും.

     ⁴ കോപിച്ചാൽ പാപം ചെയ്യാതിരിക്കുവിൻ;

     നിങ്ങളുടെ കിടക്കമേൽ ഹൃദയത്തിൽ ധ്യാനിച്ച് സ്വസ്ഥമായിരിക്കുവിൻ. സേലാ.

     ⁵ നീതിയാഗങ്ങൾ അർപ്പിക്കുവിൻ;

     യഹോവയിൽ ആശ്രയം വയ്ക്കുവിൻ.

     ⁶ “നമുക്ക് ആര് നന്മയായത് കാണിച്ചുതരും?” എന്ന് പലരും പറയുന്നു;

     യഹോവേ, നിന്റെ മുഖപ്രകാശം ഞങ്ങളുടെ മേൽ ഉദിപ്പിക്കണമേ.

     ⁷ ധാന്യവും വീഞ്ഞും വർദ്ധിച്ചപ്പോൾ അവർക്കുണ്ടായതിലും

     അധികം സന്തോഷം നീ എന്റെ ഹൃദയത്തിൽ നല്കിയിരിക്കുന്നു.

     ⁸ ഞാൻ സമാധാനത്തോടെ കിടന്നുറങ്ങും;

     നീയല്ലോ യഹോവേ, എന്നെ നിർഭയം വസിക്കുമാറാക്കുന്നത്.

സങ്കീർത്തനം.4 5

¹ യഹോവേ, എന്റെ വാക്കുകൾ കേൾക്കണമേ;

     എന്റെ ധ്യാനം ശ്രദ്ധിക്കണമേ;

     ² എന്റെ രാജാവും എന്റെ ദൈവവുമേ,

     എന്റെ കരച്ചിലിന്റെ ശബ്ദം കേൾക്കണമേ;

     നിന്നോടല്ലോ ഞാൻ പ്രാർത്ഥിക്കുന്നത്.

     ³ യഹോവേ, രാവിലെ എന്റെ പ്രാർത്ഥന കേൾക്കണമേ;

     രാവിലെ ഞാൻ നിനക്കായി ഒരുക്കി കാത്തിരിക്കുന്നു.

     ⁴ നീ ദുഷ്ടതയിൽ പ്രസാദിക്കുന്ന ദൈവമല്ല;

     ദുഷ്ടൻ നിന്നോടുകൂടി പാർക്കുകയില്ല.

     ⁵ അഹങ്കാരികൾ നിന്റെ സന്നിധിയിൽ നില്ക്കുകയില്ല;

     നീതികേടു പ്രവർത്തിക്കുന്നവരെ നീ പകയ്ക്കുന്നു.

     ⁶ ഭോഷ്ക്കു പറയുന്നവരെ നീ നശിപ്പിക്കും;

     രക്തപാതകവും ചതിവുമുള്ളവൻ യഹോവയ്ക്ക് വെറുപ്പാകുന്നു;

     ⁷ ഞാനോ, നിന്റെ കൃപയുടെ ബഹുത്വത്താൽ നിന്റെ ആലയത്തിലേക്ക് ചെന്ന്

     നിന്റെ വിശുദ്ധമന്ദിരത്തിനു നേരെ നിന്നോടുള്ള ഭക്തിയിൽ ആരാധിക്കും.

     ⁸ യഹോവേ, എന്റെ ശത്രുക്കൾനിമിത്തം നിന്റെ നീതിയാൽ എന്നെ നടത്തണമേ;

     എന്റെ മുമ്പിലുള്ള നിന്റെ വഴി നിരപ്പാക്കിത്തരണമേ.

     ⁹ അവരുടെ വായിൽ ഒട്ടും നേരില്ല;

     അവരുടെ അന്തരംഗം നാശകൂപം തന്നെ;

     അവരുടെ തൊണ്ട തുറന്ന ശവക്കുഴിയാകുന്നു;

     നാവുകൊണ്ട് അവർ മധുരവാക്കു പറയുന്നു.

     ¹⁰ ദൈവമേ അവരെ കുറ്റംവിധിക്കണമേ;

     അവരുടെ ആലോചനകളാൽ തന്നെ അവർ വീഴട്ടെ;

     അവരുടെ അതിക്രമങ്ങളുടെ ബഹുത്വം നിമിത്തം അവരെ തള്ളിക്കളയണമേ;

     നിന്നോടല്ലയോ അവർ മത്സരിച്ചിരിക്കുന്നത്.

     ¹¹ എന്നാൽ നിന്നെ ശരണംപ്രാപിക്കുന്നവരെല്ലാവരും സന്തോഷിക്കും;

     നീ അവരെ പാലിക്കുന്നതുകൊണ്ട് അവർ എപ്പോഴും ആനന്ദിച്ചാർക്കും;

     നിന്റെ നാമത്തെ സ്നേഹിക്കുന്നവർ നിന്നിൽ ഉല്ലസിക്കും;

     ¹² യഹോവേ, നീ നീതിമാനെ അനുഗ്രഹിക്കും;

     പരിചകൊണ്ടെന്നപോലെ നീ ദയകൊണ്ട് അവനെ മറയ്ക്കും.

സങ്കീർത്തനം.5 6

     ¹ യഹോവേ, നിന്റെ കോപത്തിൽ എന്നെ ശിക്ഷിക്കരുതേ;

     നിന്റെ ക്രോധത്തിൽ എന്നെ ദണ്ഡിപ്പിക്കരുതേ.

     ² യഹോവേ, ഞാൻ തളർന്നിരിക്കുന്നു; എന്നോട് കരുണയുണ്ടാകണമേ;

     യഹോവേ, എന്റെ അസ്ഥികൾ ഭ്രമിച്ചിരിക്കുന്നു;

     എന്നെ സൗഖ്യമാക്കണമേ.

     ³ എന്റെ പ്രാണനും അത്യന്തം ഭ്രമിച്ചിരിക്കുന്നു;

     അല്ലയോ, യഹോവേ, എത്രത്തോളം താമസിക്കും?

     ⁴ യഹോവേ,മടങ്ങിവന്ന് എന്റെ പ്രാണനെ വിടുവിക്കണമേ.

     നിന്റെ കാരുണ്യം നിമിത്തം എന്നെ രക്ഷിക്കണമേ.

     ⁵ മരണത്തിൽ നിന്നെക്കുറിച്ച് ഓർമ്മയില്ലല്ലോ;

     പാതാളത്തിൽ ആര് നിനക്കു സ്തോത്രം ചെയ്യും?

     ⁶ എന്റെ ഞരക്കംകൊണ്ട് ഞാൻ തളർന്നിരിക്കുന്നു;

     രാത്രിമുഴുവനും എന്റെ കിടക്കയിൽ മിഴിനീർ ഒഴുക്കി;

     കണ്ണുനീർകൊണ്ട് ഞാൻ എന്റെ കട്ടിൽ നനയ്ക്കുന്നു.

     ⁷ ദുഃഖംകൊണ്ട് എന്റെ കണ്ണ് കുഴിഞ്ഞിരിക്കുന്നു;

     എന്റെ സകല ശത്രുക്കളും നിമിത്തം ക്ഷീണിച്ചുമിരിക്കുന്നു.

     ⁸ നീതികേടു പ്രവർത്തിക്കുന്ന ഏവരുമേ എന്നെ വിട്ടുപോകുവിൻ;

     യഹോവ എന്റെ കരച്ചിലിന്റെ ശബ്ദം കേട്ടിരിക്കുന്നു.

     ⁹ യഹോവ എന്റെ അപേക്ഷ കേട്ടിരിക്കുന്നു;

     യഹോവ എന്റെ പ്രാർത്ഥന കൈക്കൊള്ളും.

     ¹⁰ എന്റെ ശത്രുക്കൾ എല്ലാവരും ലജ്ജിച്ചു ഭ്രമിച്ചുപോകും;

     അവർ പിന്തിരിഞ്ഞ് പെട്ടെന്ന് നാണിച്ചു പോകും.

സങ്കീർത്തനം.6 7

     ¹ എന്റെ ദൈവമായ യഹോവേ, നിന്നെ ഞാൻ ശരണം പ്രാപിക്കുന്നു;

     എന്നെ ഉപദ്രവിക്കുന്ന എല്ലാവരുടെയും കൈയിൽ നിന്ന് എന്നെ രക്ഷിച്ചു വിടുവിക്കണമേ.

     ² അവൻ സിംഹത്തെപ്പോലെ എന്നെ കീറിക്കളയരുതേ;

     വിടുവിക്കുവാൻ ആരും ഇല്ലാതെയിരിക്കുമ്പോൾ എന്നെ ചീന്തിക്കളയരുതേ.

     ³ എന്റെ ദൈവമായ യഹോവേ, ഞാൻ ഇത് ചെയ്തിട്ടുണ്ടെങ്കിൽ,

     എന്റെ പക്കൽ നീതികേടുണ്ടെങ്കിൽ,

     ⁴ എന്നോട് സമാധാനമായിരുന്നവനോട് ഞാൻ ദോഷം ചെയ്തിട്ടുണ്ടെങ്കിൽ,-

     കാരണം കൂടാതെ എന്നോട് ശത്രുവായിരുന്നവനെ ഞാൻ വിടുവിച്ചുവല്ലോ-

     ⁵ ശത്രു എന്റെ പ്രാണനെ പിന്തുടർന്നു പിടിക്കട്ടെ;

     അവൻ എന്റെ ജീവനെ നിലത്തിട്ടു ചവിട്ടട്ടെ;

     എന്റെ മാനത്തെ പൂഴിയിൽ തള്ളിയിടട്ടെ. സേലാ.

     ⁶ യഹോവേ, കോപത്തോടെ എഴുന്നേല്ക്കണമേ;

     എന്റെ വൈരികളുടെ ക്രോധത്തോട് എതിർത്തുനില്ക്കണമേ;

     എനിക്കു വേണ്ടി നീ കല്പിച്ച ന്യായവിധിക്കായി ഉണരണമേ; .

     ⁷ ജാതികളുടെ സംഘം നിന്നെ ചുറ്റിനില്ക്കട്ടെ;

     നീ അവർക്കു മേൽ വാഴുന്നവനായി ഉയരത്തിലേക്കു മടങ്ങണമേ.

     ⁸ യഹോവ ജാതികളെ ന്യായംവിധിക്കുന്നു;

     യഹോവേ, എന്റെ നീതിക്കും പരമാർത്ഥതയ്ക്കും തക്കവണ്ണം എന്നെ വിധിക്കണമേ;

     ⁹ ദുഷ്ടന്റെ ദുഷ്ടത അവസാനിക്കട്ടെ; നീതിമാനെ നീ ഉറപ്പിക്കണമേ.

     നീതിമാനായ ദൈവം ഹൃദയങ്ങളെയും മനസ്സുകളെയും ശോധനചെയ്യുന്നുവല്ലോ.

     ¹⁰ എന്റെ പരിച ദൈവത്തിന്റെ പക്കൽ ഉണ്ട്;

     അവൻ ഹൃദയപരമാർത്ഥതയുള്ളവരെ രക്ഷിക്കുന്നു.

     ¹¹ ദൈവം നീതിയുള്ള ന്യായാധിപതിയാകുന്നു;

     ദൈവം ദിവസംപ്രതി ദുഷ്ടനോട് കോപിക്കുന്നു.

     ¹² മനം തിരിയുന്നില്ലെങ്കിൽ അവൻ തന്റെ വാളിന് മൂർച്ചകൂട്ടും;

     അവൻ തന്റെ വില്ലു കുലച്ച് ഒരുക്കിയിരിക്കുന്നു.

     ¹³ അവൻ മരണാസ്ത്രങ്ങളെ അവന്റെ നേരെ തൊടുത്ത്,

     തന്റെ ശരങ്ങളെ തീയമ്പുകളാക്കി തീർത്തിരിക്കുന്നു.

     ¹⁴ ഇതാ, അവന് നീതികേടിനാൽ നോവു കിട്ടുന്നു;

     അവൻ കഷ്ടത്തെ ഗർഭം ധരിച്ച് വഞ്ചനയെ പ്രസവിക്കുന്നു.

     ¹⁵ അവൻ ഒരു കുഴി കുഴിച്ചുണ്ടാക്കി,

     കുഴിച്ച കുഴിയിൽ താൻ തന്നെ വീണു.

     ¹⁶ അവന്റെ ദുഷ്പ്രവർത്തികൾ അവന്റെ തലയിലേക്കു തന്നെ തിരിയും;

     അവന്റെ ബലാല്ക്കാരം അവന്റെ നെറുകയിൽ തന്നെ പതിക്കും.

     ¹⁷ ഞാൻ യഹോവയെ അവന്റെ നീതിക്കു തക്കവണ്ണം സ്തുതിക്കും;

     അത്യുന്നതനായ യഹോവയുടെ നാമത്തിന് സ്തോത്രം പാടും.

സങ്കീർത്തനം.7 8

     ¹ ഞങ്ങളുടെ കർത്താവായ യഹോവേ, നിന്റെ നാമം ഭൂമിയിൽ എല്ലായിടവും എത്ര ശ്രേഷ്ഠമായിരിക്കുന്നു!

     നീ ആകാശത്തിനു മീതെ നിന്റെ തേജസ്സു വച്ചിരിക്കുന്നു.

     ² നിന്റെ വൈരികൾനിമിത്തം,

     ശത്രുവിനെയും പ്രതിയോഗിയെയും നിശ്ശബ്ദരാക്കുവാൻ ,

     നീ ശിശുക്കളുടെയും മുലകുടിക്കുന്നവരുടെയും വായിൽനിന്ന് ബലം നിയമിച്ചിരിക്കുന്നു.

     ³ നിന്റെ വിരലുകളുടെ പണിയായ ആകാശത്തെയും

     നീ ഉണ്ടാക്കിയ ചന്ദ്രനെയും നക്ഷത്രങ്ങളെയും നോക്കുമ്പോൾ,

     ⁴ മർത്യനെ നീ ഓർക്കേണ്ടതിന് അവൻ എന്തുള്ളു?

     മനുഷ്യപുത്രനെ സന്ദർശിക്കേണ്ടതിന് അവൻ എന്തുമാത്രം?

     ⁵ നീ അവനെ ദൈവത്തെക്കാൾ അല്പം മാത്രം താഴ്ത്തി,

     തേജസ്സും ബഹുമാനവും അവനെ അണിയിച്ചിരിക്കുന്നു.

     ⁶ നിന്റെ കൈകളുടെ പ്രവൃത്തികൾക്ക് നീ അവനെ അധിപതിയാക്കി,

     സകലത്തെയും അവന്റെ കാൽക്കീഴാക്കിയിരിക്കുന്നു;

     ⁷ ആടുകളെയും കാളകളെയും

     കാട്ടിലെ മൃഗങ്ങളെയും

     ⁸ ആകാശത്തിലെ പക്ഷികളെയും സമുദ്രത്തിലെ മത്സ്യങ്ങളെയും

     സമുദ്രമാർഗ്ഗങ്ങളിൽ സഞ്ചരിക്കുന്ന സകലത്തെയും തന്നെ.

     ⁹ ഞങ്ങളുടെ കർത്താവായ യഹോവേ,

     നിന്റെ നാമം ഭൂമിയിലൊക്കെയും എത്ര ശ്രേഷ്ഠമായിരിക്കുന്നു!

സങ്കീർത്തനം.8 9

     ¹ ഞാൻ പൂർണ്ണഹൃദയത്തോടെ യഹോവയെ സ്തുതിക്കും;

     നിന്റെ അത്ഭുതങ്ങളെയെല്ലാം ഞാൻ വർണ്ണിക്കും.

     ² ഞാൻ നിന്നിൽ സന്തോഷിച്ചുല്ലസിക്കും;

     അത്യുന്നതനായുള്ള യഹോവേ, ഞാൻ നിന്റെ നാമത്തെ കീർത്തിക്കും.

     ³ എന്റെ ശത്രുക്കൾ പിൻവാങ്ങുമ്പോൾ,

     നിന്റെ സന്നിധിയിൽ ഇടറിവീണ് നശിച്ചു പോകും.

     ⁴ നീ എന്റെ കാര്യവും വ്യവഹാരവും നടത്തിയിരിക്കുന്നു;

     നീ നീതിയോടെ വിധിച്ചുകൊണ്ട് സിംഹാസനത്തിൽ ഇരിക്കുന്നു;

     ⁵ നീ ജനതതികളെ ശാസിച്ച്, ദുഷ്ടനെ നശിപ്പിച്ചിരിക്കുന്നു;

     അവരുടെ നാമംപോലും നീ സദാകാലത്തേക്കും മായിച്ചുകളഞ്ഞു.

     ⁶ ശത്രുക്കൾ സദാകാലത്തേക്കും നശിച്ചിരിക്കുന്നു;

     അവരുടെ പട്ടണങ്ങളെയും നീ മറിച്ചുകളഞ്ഞിരിക്കുന്നു;

     അവയുടെ ഓർമ്മയും ഇല്ലാതെയായിരിക്കുന്നു.

     ⁷ എന്നാൽ യഹോവ എന്നേക്കും വാഴുന്നു;

     ന്യായവിധിക്കായി അവൻ സിംഹാസനം ഒരുക്കിയിരിക്കുന്നു.

     ⁸ അവൻ ലോകത്തെ നീതിയോടെ വിധിക്കും;

     ജനതതികൾക്ക് നേരോടെ ന്യായപാലനം ചെയ്യും.

     ⁹ യഹോവ പീഡിതന് ഒരു അഭയസ്ഥാനം;

     കഷ്ടകാലത്ത് ഒരഭയസ്ഥാനം തന്നെ.

     ¹⁰ നിന്റെ നാമത്തെ അറിയുന്നവർ നിന്നിൽ ആശ്രയിക്കും;

     യഹോവേ, നിന്നെ അന്വേഷിക്കുന്നവരെ നീ ഉപേക്ഷിക്കുന്നില്ലല്ലോ.

     ¹¹ സീയോനിൽ വസിക്കുന്ന യഹോവയ്ക്ക് സ്തോത്രം പാടുവീൻ;

     അവന്റെ പ്രവൃത്തികളെ ജനതതിയുടെ ഇടയിൽ ഘോഷിപ്പീൻ.

     ¹² രക്തപാതകത്തിന് പ്രതികാരം ചെയ്യുന്നവൻ അവരെ ഓർക്കുന്നു;

     എളിയവരുടെ നിലവിളി അവൻ മറക്കുന്നതുമില്ല.

     ¹³ യഹോവേ, എന്നോട് കരുണയുണ്ടാകണമേ;

     മരണവാതിലുകളിൽനിന്ന് എന്നെ ഉദ്ധരിക്കുന്നവനേ,

     എന്നെ പകയ്ക്കുന്നവരാൽ എനിക്കു നേരിടുന്ന കഷ്ടം നോക്കണമേ.

     ¹⁴ ഞാൻ സീയോൻപുത്രിയുടെ പടിവാതിലുകളിൽ നിന്നെ സ്തുതിച്ച്

     നിന്റെ രക്ഷയിൽ സന്തോഷിക്കേണ്ടതിനു തന്നെ.

     ¹⁵ ജനതകൾ അവർ ഉണ്ടാക്കിയ കുഴിയിൽ താണുപോയി;

     അവർ ഒളിച്ചുവെച്ച വലയിൽ അവരുടെ കാൽ തന്നെ അകപ്പെട്ടിരിക്കുന്നു.

     ¹⁶ യഹോവ തന്നെത്താൻ വെളിപ്പെടുത്തി ന്യായവിധി നടത്തിയിരിക്കുന്നു;

     ദുഷ്ടൻ സ്വന്തകൈകളുടെ പ്രവൃത്തിയിൽ കുടുങ്ങിയിരിക്കുന്നു. തന്ത്രിനാദം. സേലാ.

     ¹⁷ ദുഷ്ടന്മാരും ദൈവത്തെ മറക്കുന്ന സകലജനതതിയും

     പാതാളത്തിലേക്കു തിരിയും.

     ¹⁸ ദരിദ്രനെ എന്നേക്കും മറന്നു പോകുകയില്ല;

     സാധുക്കളുടെ പ്രത്യാശയ്ക്ക് എന്നും ഭംഗം വരുകയുമില്ല.

     ¹⁹ യഹോവേ, എഴുന്നേല്ക്കണമേ, മർത്യൻ പ്രബലനാകരുതേ;

     ജനതതികൾ നിന്റെ സന്നിധിയിൽ വിധിക്കപ്പെടുമാറാകട്ടെ.

     ²⁰ യഹോവേ, തങ്ങൾ കേവലം മർത്യരാകുന്നു എന്ന് ജനതതികൾ അറിയേണ്ടതിന്

     അവർക്ക് ഭയം വരുത്തണമേ. സേലാ.

സങ്കീർത്തനം.9 10

     ¹ യഹോവേ, നീ ദൂരത്തു നില്ക്കുന്നതെന്ത്?

     കഷ്ടകാലത്ത് നീ മറഞ്ഞുകളയുന്നതും എന്ത്?

     ² ദുഷ്ടൻ അഹങ്കാരത്തോടെ എളിയവനെ പീഡിപ്പിക്കുന്നു;

     അവൻ നിരൂപിച്ച ഉപായങ്ങളിൽ അവൻ തന്നെ പിടിക്കപ്പെടട്ടെ.

     ³ ദുഷ്ടൻ തന്റെ മനോരഥത്തിൽ പ്രശംസിക്കുന്നു;

     ദുരാഗ്രഹി യഹോവയെ ത്യജിച്ച് നിന്ദിക്കുന്നു.

     ⁴ ഉന്നതഭാവമുള്ള ദുഷ്ടൻ ദൈവത്തെ അന്വേഷിക്കുന്നില്ല;

     ‘ദൈവം ഇല്ല” എന്നാകുന്നു അവന്റെ നിരൂപണം ഒക്കെയും.

     ⁵ അവന്റെ വഴികൾ എല്ലായ്പോഴും സഫലമാകുന്നു;

     നിന്റെ ന്യായവിധികൾ അവൻ കാണാത്തവണ്ണം ഉന്നതമാകുന്നു;

     തന്റെ സകലശത്രുക്കളോടും അവൻ ചീറുന്നു.

     ⁶ “ഞാൻ കുലുങ്ങുകയില്ല, ഒരുനാളും അനർത്ഥത്തിൽ വീഴുകയുമില്ല”

     എന്ന് അവൻ തന്റെ ഹൃദയത്തിൽ പറയുന്നു.

     ⁷ അവന്റെ വായിൽ ശാപവും വ്യാജവും സാഹസവും നിറഞ്ഞിരിക്കുന്നു;

     അവന്റെ നാവിൻ കീഴിൽ ദോഷവും അതിക്രമവും ഇരിക്കുന്നു.

     ⁸ അവൻ ഗ്രാമങ്ങളുടെ ഒളിവിടങ്ങളിൽ പതിയിരിക്കുന്നു;

     മറവിടങ്ങളിൽവെച്ച് അവൻ നിഷ്ക്കളങ്കനെ കൊല്ലുന്നു;

     അവൻ രഹസ്യമായി അഗതിയുടെമേൽ കണ്ണു വച്ചിരിക്കുന്നു.

     ⁹ സിംഹം മുറ്റുകാട്ടിൽ ഇര പിടിക്കാൻ പതുങ്ങുന്നതുപോലെ;

     എളിയവനെ പിടിക്കുവാൻ അവൻ പതിയിരിക്കുന്നു;

     എളിയവനെ തന്റെ വലയിൽ ചാടിച്ച് പിടിക്കുന്നു.

     ¹⁰ അവൻ കുനിഞ്ഞ് പതുങ്ങിക്കിടക്കുന്നു;

     അഗതികൾ അവന്റെ ബലത്താൽ വീണു പോകുന്നു.

     ¹¹ “ദൈവം മറന്നിരിക്കുന്നു, അവൻ തന്റെ മുഖം മറച്ചിരിക്കുന്നു;

     അവൻ ഒരുനാളും കാണുകയില്ല” എന്ന് അവൻ ഹൃദയത്തിൽ പറയുന്നു.

     ¹² യഹോവേ, എഴുന്നേല്ക്കണമേ, ദൈവമേ, തൃക്കൈ ഉയർത്തണമേ;

     എളിയവരെ മറക്കരുതേ.

     ¹³ ദുഷ്ടൻ ദൈവത്തെ നിന്ദിക്കുന്നതും “ നീ കണക്ക് ചോദിക്കുകയില്ല” എന്ന് തന്റെ ഉള്ളിൽ പറയുന്നതും എന്തിന്?

     ¹⁴ നീ അതു കണ്ടിരിക്കുന്നു, തൃക്കൈകൊണ്ട് പകരം ചെയ്യുവാൻ

     ദോഷത്തെയും പകയെയും നീ നോക്കിക്കണ്ടിരിക്കുന്നു;

     അഗതി സ്വയം നിങ്കൽ ഏല്പിക്കുന്നു;

     അനാഥന് നീ സഹായി ആകുന്നു.

     ¹⁵ ദുഷ്ടന്റെ ഭുജത്തെ നീ ഒടിക്കണമേ;

     ദോഷിയുടെ ദുഷ്ടത ഇല്ലാതെയാകുംവരെ അതിന് പ്രതികാരം ചെയ്യണമേ.

     ¹⁶ യഹോവ എന്നെന്നേക്കും രാജാവാകുന്നു;

     ജനതതികൾ അവന്റെ ദേശത്തുനിന്ന് നശിച്ചു പോയിരിക്കുന്നു.

     ¹⁷ ഭൂമിയിലെ മനുഷ്യൻ ഇനി ഭയപ്പെടുത്താതിരിക്കുവാൻ

     നീ അനാഥനും പീഡിതനും ന്യായപാലനം ചെയ്യേണ്ടതിന്

     ¹⁸ യഹോവേ, നീ സാധുക്കളുടെ അപേക്ഷ കേട്ടിരിക്കുന്നു;

     അവരുടെ ഹൃദയത്തെ നീ ഉറപ്പിക്കുകയും നിന്റെ ചെവി ചായിച്ചു കേൾക്കുകയും ചെയ്യുന്നു.

സങ്കീർത്തനം.10 11

     ¹ ഞാൻ യഹോവയെ ശരണമാക്കിയിരിക്കുന്നു;

     “പക്ഷികളേപ്പോലെ, നിങ്ങളുടെ പർവ്വതത്തിലേക്ക് പറന്നുപോകൂ" എന്ന് നിങ്ങൾ എന്നോട് പറയുന്നതെങ്ങനെ?

     ² ഇതാ, ദുഷ്ടന്മാർ ഹൃദയപരമാർത്ഥികളെ ഇരുട്ടത്ത് എയ്യേണ്ടതിന്

     വില്ലു കുലച്ച് അസ്ത്രം ഞാണിന്മേൽ തൊടുക്കുന്നു.

     ³ അടിസ്ഥാനങ്ങൾ മറിഞ്ഞുപോയാൽ നീതിമാൻ എന്തുചെയ്യും?”എന്നിങ്ങനെ നിങ്ങൾ എന്നോട് പറയുന്നതെങ്ങനെ?

     ⁴ യഹോവ തന്റെ വിശുദ്ധമന്ദിരത്തിൽ ഉണ്ട്;

     യഹോവയുടെ സിംഹാസനം സ്വർഗ്ഗത്തിൽ ആകുന്നു;

     അവന്റെ കണ്ണുകൾ ദർശിക്കുന്നു;

     അവന്റെ കൺപോളകൾ മനുഷ്യപുത്രന്മാരെ പരിശോധന ചെയ്യുന്നു.

     ⁵ യഹോവ നീതിമാനെ പരിശോധിക്കുന്നു;

     ദുഷ്ടനെയും സാഹസപ്രിയനെയും അവന്റെ ഉള്ളം വെറുക്കുന്നു.

     ⁶ ദുഷ്ടന്മാരുടെമേൽ അവൻ തീക്കട്ട വർഷിപ്പിക്കും;

     തീയും ഗന്ധകവും ഉഷ്ണക്കാറ്റും അവരുടെ പാനപാത്രത്തിലെ ഓഹരിയായിരിക്കും.

     ⁷ യഹോവ നീതിമാൻ; അവൻ നീതിയെ ഇഷ്ടപ്പെടുന്നു;

     നേരുള്ളവർ അവന്റെ മുഖം കാണും.

സങ്കീർത്തനം.11 12

     ¹ യഹോവേ, രക്ഷിക്കണമേ; ഭക്തന്മാർ ഇല്ലാതെപോകുന്നു;

     വിശ്വസ്തന്മാർ മനുഷ്യപുത്രന്മാരിൽ കുറഞ്ഞിരിക്കുന്നു;

     ² ഓരോരുത്തൻ അവനവന്റെ കൂട്ടുകാരനോട് വ്യാജം സംസാരിക്കുന്നു;

     കപടമുള്ള അധരത്തോടും ഇരുമനസ്സോടും കൂടി അവർ സംസാരിക്കുന്നു.

     ³ കപടമുള്ള അധരങ്ങളെ ഒക്കെയും

     വമ്പു പറയുന്ന നാവിനെയും യഹോവ ഛേദിച്ചുകളയും.

     ⁴ “ഞങ്ങളുടെ നാവുകൊണ്ടു ഞങ്ങൾ ജയിക്കും;

     ഞങ്ങളുടെ അധരങ്ങൾ ഞങ്ങൾക്കു തുണ;

     ഞങ്ങൾക്കു യജമാനൻ ആര്?” എന്ന് അവർ പറയുന്നു.

     ⁵ “എളിയവരുടെ പീഡയും ദരിദ്രന്മാരുടെ നെടുവീർപ്പും നിമിത്തം

     ഇപ്പോൾ ഞാൻ എഴുന്നേല്ക്കും; രക്ഷയ്ക്കായി കാംക്ഷിക്കുന്നവനെ

     ഞാൻ സംരക്ഷിക്കും” എന്ന് യഹോവ അരുളിച്ചെയ്യുന്നു.

     ⁶ യഹോവയുടെ വചനങ്ങൾ നിർമ്മല വചനങ്ങൾ ആകുന്നു;

     നിലത്ത് ഉലയിൽ ഉരുക്കി ഏഴുപ്രാവശ്യം ശുദ്ധിചെയ്ത വെള്ളിപോലെ തന്നെ.

     ⁷ യഹോവേ, നീ അവരെ കാത്തുകൊള്ളും;

     ഈ തലമുറയിൽനിന്ന് നീ അവരെ എന്നും സൂക്ഷിക്കും.

     ⁸ മനുഷ്യപുത്രന്മാരുടെ ഇടയിൽ വഷളത്തം പ്രബലപ്പെടുമ്പോൾ

     ദുഷ്ടന്മാർ എല്ലായിടവും സഞ്ചരിക്കുന്നു.

സങ്കീർത്തനം.12 13

     ¹ യഹോവേ, എത്രത്തോളം നീ എന്നെ മറന്നുകൊണ്ടിരിക്കും?

     നീ എത്രത്തോളം നിന്റെ മുഖം ഞാൻ കാണാത്ത വിധം മറയ്ക്കും?

     ² എത്രത്തോളം ഞാൻ എന്റെ ഉള്ളിൽ ചിന്താകുലനായി

     എന്റെ ഹൃദയത്തിൽ ദിനംപ്രതി ദുഃഖം അനുഭവിക്കേണ്ടിവരും?

     എത്രത്തോളം എന്റെ ശത്രു എന്റെമേൽ ഉയർന്നിരിക്കും?

     ³ എന്റെ ദൈവമായ യഹോവേ, കടാക്ഷിക്കണമേ; എനിക്ക് ഉത്തരം അരുളണമേ;

     ഞാൻ മരണനിദ്ര പ്രാപിക്കാതിരിക്കുവാൻ എന്റെ കണ്ണുകളെ പ്രകാശിപ്പിക്കണമേ.

     ⁴ “ഞാൻ അവനെ തോല്പിച്ചുകളഞ്ഞു” എന്ന് എന്റെ ശത്രു പറയരുതേ;

     ഞാൻ ഭ്രമിച്ചുപോകുന്നതിനാൽ എന്റെ വൈരികൾ ഉല്ലസിക്കുകയും അരുതേ.

     ⁵ ഞാൻ നിന്റെ കരുണയിൽ ആശ്രയിക്കുന്നു;

     എന്റെ ഹൃദയം നിന്റെ രക്ഷയിൽ ആനന്ദിക്കും.

     ⁶ യഹോവ എനിക്കു നന്മ ചെയ്തിരിക്കുകകൊണ്ട്

     ഞാൻ അവന് പാട്ടു പാടും.

സങ്കീർത്തനം.13 14

     ¹ “ദൈവം ഇല്ല” എന്ന് മൂഢൻ തന്റെ ഹൃദയത്തിൽ പറയുന്നു;

     അവർ വഷളന്മാരായി മ്ലേച്ഛത പ്രവർത്തിക്കുന്നു;

     നന്മചെയ്യുന്നവൻ ആരുമില്ല.

     ² ദൈവത്തെ അന്വേഷിക്കുന്ന ബുദ്ധിമാനുണ്ടോ എന്നു കാണുവാൻ

     യഹോവ സ്വർഗ്ഗത്തിൽനിന്ന് മനുഷ്യപുത്രന്മാരെ നോക്കുന്നു.

     ³ എല്ലാവരും വഴിതെറ്റി ഒരുപോലെ കൊള്ളരുതാത്തവരായിത്തീർന്നു;

     നന്മ ചെയ്യുന്നവനില്ല; ഒരുത്തൻ പോലുമില്ല.

     ⁴ നീതികേടു പ്രവർത്തിക്കുന്നവർ ആരും അത് അറിയുന്നില്ലയോ?

     അപ്പം തിന്നുന്നതുപോലെ അവർ എന്റെ ജനത്തെ തിന്നുകളയുന്നു;

     യഹോവയോട് അവർ പ്രാർത്ഥിക്കുന്നില്ല.

     ⁵ അവർ അവിടെ അത്യന്തം ഭയപ്പെട്ടു;

     യഹോവ നീതിമാന്മാരുടെ തലമുറയോടുകൂടി ഉണ്ട്

     ⁶ ദുഷ്കർമ്മികൾ എളിയവന്റെ ആലോചനയ്ക്ക് ഭംഗം വരുത്തുന്നു.

     എന്നാൽ യഹോവ അവന്റെ സങ്കേതമാകുന്നു.

     ⁷ സീയോനിൽനിന്ന് യിസ്രായേലിന്റെ രക്ഷ വന്നെങ്കിൽ കൊള്ളാമായിരുന്നു!

     യഹോവ തന്റെ ജനത്തിന്റെ സ്ഥിതി മാറ്റുമ്പോൾ

     യാക്കോബ് സന്തോഷിക്കുകയും യിസ്രായേൽ ആനന്ദിക്കുകയും ചെയ്യും.

സങ്കീർത്തനം.14 15

     ¹ യഹോവേ, നിന്റെ കൂടാരത്തിൽ ആര് പാർക്കും?

     നിന്റെ വിശുദ്ധപർവ്വതത്തിൽ ആര് വസിക്കും?

     ² നിഷ്കളങ്കനായി നടന്ന് നീതി പ്രവർത്തിക്കുകയും

     ഹൃദയപൂർവ്വം സത്യം സംസാരിക്കുകയും ചെയ്യുന്നവൻ.

     ³ നാവുകൊണ്ട് ഏഷണി പറയാതെയും

     തന്റെ കൂട്ടുകാരന് ദോഷം ചെയ്യാതെയും

     കൂട്ടുകാരന് അപമാനം വരുത്താതെയും ഇരിക്കുന്നവൻ;

     ⁴ വഷളനെ നിന്ദ്യനായി എണ്ണുകയും

     യഹോവാഭക്തന്മാരെ ബഹുമാനിക്കുകയും ചെയ്യുന്നവൻ;

     സത്യംചെയ്തിട്ട് നഷ്ടം വന്നാലും വാക്കു മാറാത്തവൻ;

     ⁵ തന്റെ ദ്രവ്യം പലിശയ്ക്കു കൊടുക്കാതെയും

     കുറ്റമില്ലാത്തവന് വിരോധമായി കൈക്കൂലി വാങ്ങാതെയും ഇരിക്കുന്നവൻ;

     ഇങ്ങനെ ചെയ്യുന്നവൻ ഒരുനാളും കുലുങ്ങിപ്പോകുകയില്ല.

സങ്കീർത്തനം.15 16

     ¹ ദൈവമേ, ഞാൻ നിന്നെ ശരണം ആക്കിയിരിക്കുകയാൽ

     എന്നെ കാത്തുകൊള്ളണമേ,

     ² ഞാൻ യഹോവയോട് പറഞ്ഞത്: “നീ എന്റെ കർത്താവാകുന്നു;

     നിന്നെക്കൂടാതെ എനിക്ക് ഒരു നന്മയും ഇല്ല.

     ³ ഭൂമിയിലെ വിശുദ്ധന്മാരോ, അവർ, എനിക്ക് ഏറ്റവും പ്രമോദം നൽകുന്ന ശ്രേഷ്ഠന്മാർ തന്നെ.

     ⁴ അന്യദേവനെ കൈക്കൊള്ളുന്നവരുടെ വേദനകൾ വർദ്ധിക്കും;

     അവരുടെ രക്തപാനീയബലികളെ ഞാൻ അർപ്പിക്കുകയില്ല;

     അവരുടെ നാമങ്ങളെ എന്റെ നാവിന്മേൽ എടുക്കുകയുമില്ല.

     ⁵ എന്റെ അവകാശത്തിന്റെയും പാനപാത്രത്തിന്റെയും പങ്ക് യഹോവ ആകുന്നു;

     നീ എനിക്കുള്ള ഓഹരിയെ പരിപാലിക്കുന്നു.

     ⁶ അളവുനൂൽ എനിക്കായി മനോഹരദേശത്ത് വീണിരിക്കുന്നു;

     അതേ, എനിക്ക് നല്ല ഒരു അവകാശം ലഭിച്ചിരിക്കുന്നു.

     ⁷ എനിക്ക് ബുദ്ധി ഉപദേശിച്ചുതന്ന യഹോവയെ ഞാൻ വാഴ്ത്തും;

     രാത്രികാലങ്ങളിലും എന്റെ അന്തരംഗം എന്നെ ഉപദേശിക്കുന്നു.

     ⁸ ഞാൻ യഹോവയെ എപ്പോഴും എന്റെ മുമ്പിൽ വച്ചിരിക്കുന്നു;

     അവൻ എന്റെ വലത്തുഭാഗത്തുള്ളതുകൊണ്ട് ഞാൻ കുലുങ്ങിപ്പോകുകയില്ല.

     ⁹ അതുകൊണ്ട് എന്റെ ഹൃദയം സന്തോഷിച്ച് എന്റെ മനസ്സ് ആനന്ദിക്കുന്നു;

     എന്റെ ജഡവും നിർഭയമായി വസിക്കും.

     ¹⁰ നീ എന്റെ പ്രാണനെ പാതാളത്തിൽ വിടുകയില്ല.

     നിന്റെ പരിശുദ്ധനെ ദ്രവത്വം കാണ്മാൻ സമ്മതിക്കുകയുമില്ല.

     ¹¹ ജീവന്റെ വഴി നീ എനിക്കു കാണിച്ചുതരും;

     നിന്റെ സന്നിധിയിൽ സന്തോഷപരിപൂർണ്ണതയും

     നിന്റെ വലത്തുഭാഗത്ത് എന്നും പ്രമോദങ്ങളും ഉണ്ട്.

സങ്കീർത്തനം.16 17

     ¹ യഹോവേ, ന്യായമായ കാര്യം കേൾക്കണമേ,

     എന്റെ നിലവിളി ശ്രദ്ധിക്കണമേ.

     കപടമില്ലാത്ത അധരങ്ങളിൽനിന്നുള്ള എന്റെ പ്രാർത്ഥന ചെവിക്കൊള്ളണമേ.

     ² എനിക്കുള്ള ന്യായമായ വിധി നിന്റെ സന്നിധിയിൽ നിന്ന് പുറപ്പെടട്ടെ;

     നിന്റെ കണ്ണുകൾ നേരായ കാര്യങ്ങൾ കാണുമാറാകട്ടെ.

     ³ നീ എന്റെ ഹൃദയം പരിശോധിച്ചു; രാത്രിയിൽ എന്നെ സന്ദർശിച്ചു;

     നീ എന്നെ പരീക്ഷിച്ചു; ദുരുദ്ദേശമൊന്നും കണ്ടെത്തുന്നില്ല;

     എന്റെ അധരങ്ങൾകൊണ്ട് ലംഘനം ചെയ്യുകയില്ല എന്ന് ഞാൻ ഉറച്ചിരിക്കുന്നു.

     ⁴ മനുഷ്യരുടെ പ്രവൃത്തികൾ കണ്ടിട്ട് ഞാൻ നിന്റെ വായിൽനിന്നു പുറപ്പെടുന്ന വചനത്താൽ

     നിഷ്ഠൂരന്റെ പാതകളെ വിട്ടൊഴിഞ്ഞിരിക്കുന്നു.

     ⁵ എന്റെ നടപ്പ് നിന്റെ ചുവടുകളിൽ തന്നെ ആയിരുന്നു;

     എന്റെ കാല് വഴുതിയതുമില്ല.

     ⁶ ദൈവമേ, ഞാൻ നിന്നോട് അപേക്ഷിച്ചിരിക്കുന്നു; നീ എനിക്ക് ഉത്തരമരുളുമല്ലോ;

     നിന്റെ ചെവി എങ്കലേക്ക് ചായിച്ചു എന്റെ അപേക്ഷ കേൾക്കണമേ.

     ⁷ നിന്നെ ശരണമാക്കുന്നവരെ അവരോട് എതിർക്കുന്നവരുടെ കയ്യിൽനിന്നു

     നിന്റെ വലങ്കയ്യാൽ രക്ഷിക്കുന്ന യഹോവേ,

     നിന്റെ അത്ഭുതകാരുണ്യം കാണിക്കണമേ.

     ⁸ കണ്ണിന്റെ കൃഷ്ണമണിപോലെ എന്നെ കാക്കണമേ;

     എന്നെ കൊള്ളയിടുന്ന ദുഷ്ടന്മാരും

     ⁹ എന്നെ വളയുന്ന പ്രാണശത്രുക്കളും എന്നെ പിടിക്കാതെ

     നിന്റെ ചിറകിന്റെ നിഴലിൽ എന്നെ മറച്ചുകൊള്ളണമേ.

     ¹⁰ അവർ അവരുടെടെ ഹൃദയം അടച്ചിരിക്കുന്നു;

     വായ് കൊണ്ട് അവർ വമ്പു പറയുന്നു.

     ¹¹ അവർ ഇപ്പോൾ ഞങ്ങളുടെ കാലടികളെ പിന്തുടർന്ന് ഞങ്ങളെ വളഞ്ഞിരിക്കുന്നു;

     ഞങ്ങളെ നിലത്തു തള്ളിയിടുവാൻ ദൃഷ്ടിവയ്ക്കുന്നു.

     ¹² കടിച്ചുകീറുവാൻ കൊതിക്കുന്ന സിംഹം പോലെയും

     മറവിടങ്ങളിൽ പതിയിരിക്കുന്ന ബാലസിംഹംപോലെയും തന്നെ.

     ¹³ യഹോവേ, എഴുന്നേറ്റ് അവനോട് എതിർത്ത് അവനെ തള്ളിയിടണമേ.

     യഹോവേ, എന്റെ പ്രാണനെ നിന്റെ വാൾകൊണ്ട് ദുഷ്ടന്റെ കൈയിൽനിന്ന് രക്ഷിക്കണമെ.

     ¹⁴ തൃക്കൈകൊണ്ട് ലൗകികപുരുഷന്മാരിൽ നിന്നും വിടുവിക്കണമേ;

     അവരുടെ ഓഹരി ഈ ആയുസ്സിൽ അത്രേ;

     നിന്റെ സമ്പത്തുകൊണ്ട് നീ അവരുടെ വയറു നിറയ്ക്കുന്നു;

     അവർക്കു പുത്രസമ്പത്ത് ധാരാളം ഉണ്ട്;

     അവരുടെ സമ്പത്ത് അവർ കുഞ്ഞുങ്ങൾക്കായി സൂക്ഷിക്കുന്നു.

     ¹⁵ ഞാനോ, നീതിയിൽ നിന്റെ മുഖം കാണും;

     ഞാൻ ഉണരുമ്പോൾ നിന്റെ രൂപം കണ്ട് തൃപ്തനാകും.

സങ്കീർത്തനം.17 18

     ¹ എന്റെ ബലമായ യഹോവേ, ഞാൻ നിന്നെ സ്നേഹിക്കുന്നു.

     ² യഹോവ എന്റെ ശൈലവും കോട്ടയും എന്റെ രക്ഷകനും

     ദൈവവും ഞാൻ ശരണമാക്കുന്ന പാറയും

     എന്റെ പരിചയും എന്റെ രക്ഷയുടെ കൊമ്പും ഗോപുരവും ആകുന്നു.

     ³ സ്തുത്യനായ യഹോവയെ ഞാൻ വിളിച്ചപേക്ഷിക്കുകയും

     എന്റെ ശത്രുക്കളുടെ കയ്യിൽനിന്ന് രക്ഷപ്രാപിക്കുകയും ചെയ്യും.

     ⁴ മരണപാശങ്ങൾ എന്നെ ചുറ്റി;

     അഗാധപ്രവാഹങ്ങൾ എന്നെ ഭ്രമിപ്പിച്ചു.

     ⁵ പാതാളപാശങ്ങൾ എന്നെ വളഞ്ഞു;

     മരണത്തിന്റെ കെണികളും എന്നെ പിൻതുടർന്ന് പിടിച്ചു.

     ⁶ എന്റെ കഷ്ടതയിൽ ഞാൻ യഹോവയെ വിളിച്ചപേക്ഷിച്ചു,

     എന്റെ ദൈവത്തോട് നിലവിളിച്ചു;

     അവൻ തന്റെ മന്ദിരത്തിൽ ഇരുന്ന് എന്റെ അപേക്ഷ കേട്ടു;

     എന്റെ നിലവിളിയും തിരുമുമ്പിൽ ഞാൻ കഴിച്ച പ്രാർത്ഥനയും അവന്റെ ചെവിയിൽ എത്തി.

     ⁷ ഭൂമി ഞെട്ടിവിറച്ചു; മലകളുടെ അടിസ്ഥാനങ്ങൾ ഇളകി;

     അവൻ കോപിക്കുകയാൽ അവ കുലുങ്ങിപ്പോയി.

     ⁸ അവന്റെ മൂക്കിൽനിന്ന് പുക പൊങ്ങി;

     അവന്റെ വായിൽനിന്ന് തീ പുറപ്പെട്ട് ദഹിപ്പിച്ചു;

     തീക്കനൽ അവനിൽനിന്ന് ജ്വലിച്ചു.

     ⁹ അവൻ ആകാശം ചായിച്ചിറങ്ങി;

     കൂരിരുൾ അവന്റെ കാല്ക്കീഴിലുണ്ടായിരുന്നു.

     ¹⁰ അവൻ കെരൂബിനെ വാഹനമാക്കി പറന്നു;

     അവൻ കാറ്റിന്റെ ചിറകിന്മേൽ ഇരുന്നു സഞ്ചരിച്ചു.

     ¹¹ അവൻ അന്ധകാരത്തെ തന്റെ മറവും

     ജലതമസ്സിനെയും മഴമേഘങ്ങളെയും തനിക്കു ചുറ്റും കൂടാരവുമാക്കി.

     ¹² അവന്റെ മുമ്പിലുള്ള പ്രകാശത്താൽ

     ആലിപ്പഴവും തീക്കനലും മേഘങ്ങളിൽനിന്ന് പൊഴിഞ്ഞു.

     ¹³ യഹോവ ആകാശത്തിൽ ഇടി മുഴക്കി,

     അത്യുന്നതൻ തന്റെ നാദം കേൾപ്പിച്ചു,

     ആലിപ്പഴവും തീക്കനലും പൊഴിഞ്ഞു.

     ¹⁴ അവൻ അസ്ത്രം എയ്ത് ശത്രുവിനെ ചിതറിച്ചു;

     മിന്നൽ അയച്ച് അവരെ തോല്പിച്ചു.

     ¹⁵ യഹോവേ, നിന്റെ ശാസനയാലും

     നിന്റെ മൂക്കിലെ ശ്വാസത്തിന്റെ പ്രവാഹത്തിന്റെ ശക്തിയാലും

     സമുദ്രപാതകൾ തെളിഞ്ഞുവന്നു; ഭൂമിയുടെ അടിസ്ഥാനങ്ങൾ വെളിപ്പെട്ടു.

     ¹⁶ അവൻ ഉയരത്തിൽനിന്ന് കൈ നീട്ടി എന്നെ പിടിച്ചു,

     പെരുവെള്ളത്തിൽനിന്ന് എന്നെ വലിച്ചെടുത്തു.

     ¹⁷ എന്റെ ബലമുള്ള ശത്രുവിന്റെ കയ്യിൽനിന്നും

     എന്നെ വെറുത്തവരുടെ പക്കൽനിന്നും അവൻ എന്നെ വിടുവിച്ചു;

     അവർ എന്നിലും ബലവാന്മാരായിരുന്നു.

     ¹⁸ എന്റെ അനർത്ഥദിവസത്തിൽ അവർ എന്നെ ആക്രമിച്ചു;

     എന്നാൽ യഹോവ എനിക്ക് തുണയായിരുന്നു.

     ¹⁹ അവൻ എന്നെ ഒരു വിശാലസ്ഥലത്തേക്ക് കൊണ്ടുവന്നു;

     എന്നിൽ പ്രമോദിച്ചിരുന്നതുകൊണ്ട് എന്നെ വിടുവിച്ചു.

     ²⁰ യഹോവ എന്റെ നീതിക്കു തക്കവിധം എനിക്ക് പ്രതിഫലം നല്കി;

     എന്റെ കൈകളുടെ വെടിപ്പിനൊത്തവിധം എനിക്ക് പകരം തന്നു.

     ²¹ ഞാൻ യഹോവയുടെ വഴികളിൽ നടന്നു;

     എന്റെ ദൈവത്തോട് ദ്രോഹം ചെയ്തതുമില്ല.

     ²² അവന്റെ വിധികൾ ഒക്കെയും എന്റെ മുമ്പിൽ ഉണ്ട്;

     അവന്റെ ചട്ടങ്ങൾ വിട്ട് ഞാൻ നടന്നിട്ടുമില്ല.

     ²³ ഞാൻ അവന്റെ മുമ്പാകെ നിഷ്കളങ്കനായിരുന്നു;

     അകൃത്യം ചെയ്യാതെ എന്നെത്തന്നെ കാത്തു.

     ²⁴ യഹോവ എന്റെ നീതിക്കു തക്കവണ്ണവും

     അവന്റെ ദൃഷ്ടിയിൽ എന്റെ കൈകളുടെ

     വെടിപ്പിൻപ്രകാരവും എനിക്ക് പകരം നല്കി.

     ²⁵ ദയാലുവോട് നീ ദയാലു ആകുന്നു;

     നഷ്കളങ്കനോട് നീ നിഷ്കളങ്കൻ;

     ²⁶ നിർമ്മലനോട് നീ നിർമ്മലനാകുന്നു;

     വക്രനോട് നീ വക്രത കാണിക്കുന്നു.

     ²⁷ എളിയജനത്തെ നീ രക്ഷിക്കും;

     നിഗളിച്ചു നടക്കുന്നവരെ നീ താഴ്ത്തും.

     ²⁸ നീ എന്റെ ദീപം കത്തിക്കും;

     എന്റെ ദൈവമായ യഹോവ എന്റെ അന്ധകാരത്തെ പ്രകാശമാക്കും.

     ²⁹ നിന്നാൽ ഞാൻ പടക്കൂട്ടത്തിന്റെ നേരെ പാഞ്ഞുചെല്ലും;

     എന്റെ ദൈവത്താൽ ഞാൻ മതിൽ ചാടിക്കടക്കും.

     ³⁰ ദൈവത്തിന്റെ വഴി തികവുള്ളത്;

     യഹോവയുടെ വചനം നിർമലമായത്;

     തന്നെ ശരണമാക്കുന്ന ഏവർക്കും അവൻ പരിചയാകുന്നു.

     ³¹ യഹോവയല്ലാതെ ദൈവം ആരുണ്ട്?

     നമ്മുടെ ദൈവം ഒഴികെ പാറ ആരുണ്ട്?

     ³² എന്നെ ശക്തികൊണ്ട് അരമുറുക്കുകയും

     എന്റെ വഴി സുരക്ഷിതമാക്കുകയും ചെയ്യുന്ന ദൈവം തന്നെ.

     ³³ അവൻ എന്റെ കാലുകളെ പേടമാന്റെ കാലുകൾക്ക് തുല്യമാക്കി,

     ഉന്നതങ്ങളിൽ എന്നെ നിർത്തുന്നു.

     ³⁴ അവൻ എന്റെ കൈകളെ യുദ്ധം അഭ്യസിപ്പിക്കുന്നു;

     എന്റെ ഭുജങ്ങൾ താമ്രചാപം കുലയ്ക്കുന്നു.

     ³⁵ നിന്റെ രക്ഷ എന്ന പരിച നീ എനിക്ക് തന്നിരിക്കുന്നു;

     നിന്റെ വലങ്കൈ എന്നെ താങ്ങി

     നിന്റെ സൗമ്യത എന്നെ വലിയവനാക്കിയിരിക്കുന്നു.

     ³⁶ ഞാൻ കാലടി വയ്ക്കേണ്ടതിന് നീ എന്റെ വഴികൾക്ക് വിശാലതവരുത്തി;

     എന്റെ നരിയാണികൾ വഴുതിപ്പോയതുമില്ല.

     ³⁷ ഞാൻ എന്റെ ശത്രുക്കളെ പിന്തുടർന്ന് പിടിച്ചു;

     അവരെ നശിപ്പിക്കുവോളം ഞാൻ പിന്തിരിഞ്ഞില്ല.

     ³⁸ അവർ എഴുന്നേല്ക്കാത്തവണ്ണം ഞാൻ അവരെ തകർത്തു;

     അവർ എന്റെ കാല്ക്കീഴിൽ വീണിരിക്കുന്നു.

     ³⁹ യുദ്ധത്തിനായി നീ എന്റെ അരയ്ക്ക് ശക്തി കെട്ടിയിരിക്കുന്നു;

     എന്നോട് എതിർത്തവരെ എനിക്കു കീഴടക്കിത്തന്നിരിക്കുന്നു.

     ⁴⁰ എന്നെ വെറുക്കുന്നവരെ ഞാൻ സംഹരിക്കേണ്ടതിന്

     നീ എന്റെ ശത്രുക്കളെ പിന്തിരിഞ്ഞ് ഓടുമാറാക്കി.

     ⁴¹ അവർ നിലവിളിച്ചു; രക്ഷിക്കുവാൻ ആരും ഉണ്ടായിരുന്നില്ല;

     യഹോവയോട് നിലവിളിച്ചു; അവൻ ഉത്തരം അരുളിയതുമില്ല.

     ⁴² ഞാൻ അവരെ കാറ്റിൽ പറക്കുന്ന പൊടിപോലെ പൊടിച്ചു;

     വീഥികളിലെ ചെളി പോലെ ഞാൻ അവരെ എറിഞ്ഞുകളഞ്ഞു.

     ⁴³ ജനത്തിന്റെ കലഹങ്ങളിൽനിന്ന് നീ എന്നെ വിടുവിച്ചു;

     ജനതതികൾക്ക് എന്നെ തലവനാക്കിയിരിക്കുന്നു;

     ഞാൻ അറിയാത്ത ജനം എന്നെ സേവിക്കുന്നു.

     ⁴⁴ അവർ എന്നെക്കുറിച്ച് കേൾക്കുമ്പോൾ തന്നെ അനുസരിക്കും;

     അന്യജനതകൾ എന്നോട് വിധേയത്വം കാണിക്കും.

     ⁴⁵ അന്യജനതകൾ ക്ഷയിച്ചുപോകുന്നു;

     അവരുടെ ഒളിയിടങ്ങളിൽനിന്ന് അവർ വിറച്ചുകൊണ്ട് വരുന്നു.

     ⁴⁶ യഹോവ ജീവിക്കുന്നു; എന്റെ പാറ വാഴ്ത്തപ്പെട്ടവൻ;

     എന്റെ രക്ഷയുടെ ദൈവം ഉന്നതൻ തന്നെ.

     ⁴⁷ ദൈവം എനിക്കു വേണ്ടി പ്രതികാരം ചെയ്യുകയും

     ജനതകളെ എനിക്കു കീഴടക്കിത്തരുകയും ചെയ്യുന്നു.

     ⁴⁸ അവൻ ശത്രുവിന്റെ കൈയിൽ നിന്ന് എന്നെ വിടുവിക്കുന്നു;

     എന്നോട് എതിർക്കുന്നവർക്കുമേൽ നീ എന്നെ ഉയർത്തുന്നു;

     സാഹസക്കാരന്റെ കയ്യിൽ നിന്ന് നീ എന്നെ വിടുവിക്കുന്നു.

     ⁴⁹ അതുകൊണ്ടു യഹോവേ, ഞാൻ ജനതതികളുടെ മദ്ധ്യത്തിൽ നിനക്കു സ്തോത്രം ചെയ്യും;

     നിന്റെ നാമത്തെ ഞാൻ കീർത്തിക്കും.

     ⁵⁰ അവൻ തന്റെ രാജാവിന് മഹാരക്ഷ നല്കുന്നു;

     തന്റെ അഭിഷിക്തനോട് ദയ കാണിക്കുന്നു;

     ദാവീദിനും അവന്റെ സന്തതിക്കും എന്നെന്നേക്കും തന്നെ.

സങ്കീർത്തനം.18 19

     ¹ ആകാശം ദൈവത്തിന്റെ മഹത്വം വർണ്ണിക്കുന്നു;

     ആകാശവിതാനം അവന്റെ കൈവേല വെളിപ്പെടുത്തുന്നു.

     ² ഒരു പകൽ മറ്റൊരു പകലിനോട് സംസാരിക്കുന്നു;

     രാത്രി രാത്രിക്ക് ജ്ഞാനം പകർന്നു കൊടുക്കുന്നു.

     ³ സംഭാഷണമില്ല, വാക്കുകളില്ല, ശബ്ദം കേൾക്കുവാനും ഇല്ല.

     ⁴ ഭൂമിയിൽ എല്ലായിടവും അതിന്റെ അളവുനൂലും

     ഭൂതലത്തിന്റെ അറ്റത്തോളം അതിന്റെ വചനങ്ങളും ചെല്ലുന്നു;

     അവിടെ അവൻ സൂര്യന് ഒരു കൂടാരം അടിച്ചിരിക്കുന്നു.

     ⁵ അത് മണവറയിൽനിന്ന് പുറപ്പെടുന്ന മണവാളന് തുല്യം;

     വീരനെപ്പോലെ അതിന്റെ ഓട്ടം ഓടുവാൻ സന്തോഷിക്കുന്നു.

     ⁶ ആകാശത്തിന്റെ ഒരറ്റത്തുനിന്ന് അതിന്റെ ഉദയവും

     അറുതിവരെ അതിന്റെ അയനവും ആകുന്നു;

     അതിന്റെ ഉഷ്ണം ഏല്ക്കാതെ മറഞ്ഞിരിക്കുന്നത് ഒന്നുമില്ല.

     ⁷ യഹോവയുടെ ന്യായപ്രമാണം തികവുള്ളത്;

     അത് പ്രാണനെ തണുപ്പിക്കുന്നു.

     യഹോവയുടെ സാക്ഷ്യം വിശ്വാസ യോഗ്യമാകുന്നു;

     അത് അല്പബുദ്ധിയെ ജ്ഞാനിയാക്കുന്നു.

     ⁸ യഹോവയുടെ ആജ്ഞകൾ നേരുള്ളവ;

     അവ ഹൃദയത്തെ സന്തോഷിപ്പിക്കുന്നു;

     യഹോവയുടെ കല്പന നിർമ്മലമായത്;

     അത് കണ്ണുകളെ പ്രകാശിപ്പിക്കുന്നു.

     ⁹ യഹോവാഭക്തി നിർമ്മലമായത്;

     അത് എന്നേക്കും നിലനില്ക്കുന്നു;

     യഹോവയുടെ വിധികൾ സത്യമാകുന്നു;

     അവ ഒന്നൊഴിയാതെ നീതിയുള്ളവയാകുന്നു.

     ¹⁰ അവ പൊന്നിനെക്കാളും വളരെ തങ്കത്തെക്കാളും ആഗ്രഹിക്കത്തക്കവ;

     തേനിനേക്കാളും തേങ്കട്ടയേക്കാളും മധുരമുള്ളവ.

     ¹¹ അടിയനും അവയാൽ പ്രബോധനം ലഭിക്കുന്നു;

     അവയെ പ്രമാണിക്കുന്നതിനാൽ വളരെ പ്രതിഫലം ഉണ്ട്.

     ¹² തന്റെ തെറ്റുകൾ ഗ്രഹിക്കുന്നവൻ ആര്?

     മറഞ്ഞിരിക്കുന്ന തെറ്റുകൾ പോക്കി എന്നെ കുറ്റവിമുക്തനാക്കണമേ.

     ¹³ സ്വമേധാപാപങ്ങളിൽ നിന്ന് അടിയനെ കാക്കേണമേ;

     അവ എന്റെമേൽ വാഴരുതേ; എന്നാൽ ഞാൻ നിഷ്കളങ്കനും മഹാപാപത്തിൽ നിന്നും ഒഴിഞ്ഞവനും ആയിരിക്കും.

     ¹⁴ എന്റെ പാറയും എന്റെ വീണ്ടെടുപ്പുകാരനുമായ യഹോവേ,

     എന്റെ വായിലെ വാക്കുകളും എന്റെ ഹൃദയത്തിലെ ധ്യാനവും

     അങ്ങയ്ക്കു പ്രസാദമായിരിക്കട്ടെ.

സങ്കീർത്തനം.19 20

     ¹ യഹോവ കഷ്ടകാലത്ത് നിനക്ക് ഉത്തരമരുളുമാറാകട്ടെ;

     യാക്കോബിന്റെ ദൈവത്തിന്റെ നാമം നിന്നെ ഉയർത്തുമാറാകട്ടെ.

     ² അവൻ വിശുദ്ധമന്ദിരത്തിൽനിന്ന് നിനക്ക് സഹായം അയയ്ക്കുമാറാകട്ടെ;

     സീയോനിൽനിന്ന് നിന്നെ താങ്ങുമാറാകട്ടെ.

     ³ നിന്റെ വഴിപാടുകൾ ഒക്കെയും അവൻ ഓർക്കട്ടെ;

     നിന്റെ ഹോമയാഗം കൈക്കൊള്ളുമാറാകട്ടെ. സേലാ.

     ⁴ നിന്റെ ഹൃദയത്തിലെ ആഗ്രഹം അവൻ നിനക്ക് നല്കട്ടെ;

     നിന്റെ താത്പര്യങ്ങൾ എല്ലാം നിവർത്തിക്കട്ടെ.

     ⁵ ഞങ്ങൾ നിന്റെ ജയത്തിൽ ഘോഷിച്ചുല്ലസിക്കും;

     ഞങ്ങളുടെ ദൈവത്തിന്റെ നാമത്തിൽ കൊടി ഉയർത്തും;

     യഹോവ നിന്റെ അപേക്ഷകളെല്ലാം നിവർത്തിക്കുമാറാകട്ടെ.

     ⁶ യഹോവ തന്റെ അഭിഷിക്തനെ രക്ഷിക്കുന്നു എന്ന് ഞാൻ ഇപ്പോൾ അറിയുന്നു;

     അവൻ തന്റെ വിശുദ്ധസ്വർഗ്ഗത്തിൽനിന്ന് തന്റെ വലങ്കൈയുടെ രക്ഷാകരമായ വീര്യപ്രവൃത്തികളാൽ അവന് ഉത്തരമരുളും.

     ⁷ ചിലർ രഥങ്ങളിലും ചിലർ കുതിരകളിലും ആശ്രയിക്കുന്നു;

     ഞങ്ങളോ ഞങ്ങളുടെ ദൈവമായ യഹോവയുടെ നാമത്തിൽ ആശ്രയിക്കും.

     ⁸ അവർ കുനിഞ്ഞ് വീണുപോയി;

     എന്നാൽ ഞങ്ങൾ എഴുന്നേറ്റ് നിവർന്നുനില്ക്കുന്നു.

     ⁹ യഹോവേ, രാജാവിനെ രക്ഷിക്കണമേ;

     ഞങ്ങൾ അപേക്ഷിക്കുമ്പോൾ ഉത്തരമരുളണമേ.

സങ്കീർത്തനം.20 21

     ¹ യഹോവേ, രാജാവ് നിന്റെ ബലത്തിൽ സന്തോഷിക്കുന്നു;

     നിന്റെ രക്ഷയിൽ അവൻ ഏറ്റവും ഉല്ലസിക്കുന്നു.

     ² അവന്റെ ഹൃദയത്തിലെ ആഗ്രഹം നീ അവന് നല്കി;

     അവന്റെ അധരങ്ങളുടെ യാചന നിഷേധിച്ചതുമില്ല. സേലാ.

     ³ സമൃദ്ധമായ അനുഗ്രഹങ്ങളാൽ നീ അവനെ എതിരേറ്റ്,

     തങ്കക്കിരീടം അവന്റെ തലയിൽ വയ്ക്കുന്നു.

     ⁴ അവൻ നിന്നോട് ജീവൻ ചോദിച്ചു; നീ അവനു കൊടുത്തു; എന്നെന്നേക്കുമുള്ള ദീർഘായുസ്സ് തന്നെ.

     ⁵ നിന്റെ രക്ഷയാൽ അവന്റെ മഹത്വം വലിയത്;

     ബഹുമാനവും തേജസ്സും നീ അവനെ അണിയിച്ചു.

     ⁶ നീ അവനെ എന്നേക്കും അനുഗ്രഹസമൃദ്ധിയുള്ളവനാക്കുന്നു;

     നിന്റെ സന്നിധിയിലെ സന്തോഷംകൊണ്ട് അവനെ ആനന്ദിപ്പിക്കുന്നു.

     ⁷ രാജാവ് യഹോവയിൽ ആശ്രയിക്കുന്നു;

     അത്യുന്നതന്റെ കാരുണ്യംകൊണ്ട് അവൻ കുലുങ്ങാതെയിരിക്കും.

     ⁸ നിന്റെ കൈ നിന്റെ സകലശത്രുക്കളെയും കണ്ടുപിടിക്കും;

     നിന്റെ വലങ്കൈ നിന്നെ വെറുക്കുന്നവരെ പിടികൂടും.

     ⁹ നീ പ്രത്യക്ഷപ്പെടുമ്പോൾ നീ അവരെ തീച്ചൂളപോലെയാക്കും;

     യഹോവ തന്റെ ക്രോധത്തിൽ അവരെ വിഴുങ്ങിക്കളയും;

     തീ അവരെ ദഹിപ്പിക്കും.

     ¹⁰ നീ അവരുടെ ഉദരഫലത്തെ ഭൂമിയിൽനിന്നും

     അവരുടെ സന്തതിയെ മനുഷ്യപുത്രന്മാരുടെ ഇടയിൽനിന്നും നശിപ്പിക്കും.

     ¹¹ അവർ നിനക്കു വിരോധമായി ദോഷം വിചാരിച്ചു;

     അവരാൽ കഴിയാത്ത ഒരു ഉപായം നിരൂപിച്ചു.

     ¹² നീ അവരെ പുറംതിരിഞ്ഞ് ഓടുമാറാക്കും;

     അവരുടെ മുഖത്തിനുനേരെ അസ്ത്രം ഞാണിന്മേൽ തൊടുക്കും.

     ¹³ യഹോവേ, നിന്റെ ശക്തിയിൽ ഉയർന്നിരിക്കണമേ;

     ഞങ്ങൾ പാടി നിന്റെ ബലത്തെ സ്തുതിക്കും..

സങ്കീർത്തനം.21 22

     ¹ എന്റെ ദൈവമേ, എന്റെ ദൈവമേ, നീ എന്നെ കൈവിട്ടതെന്ത്?

     എന്നെ രക്ഷിക്കാതെയും എന്റെ ഞരക്കത്തിന്റെ വാക്കുകൾ കേൾക്കാതെയും അകന്നുനില്ക്കുന്നതെന്ത്?

     ² എന്റെ ദൈവമേ, ഞാൻ പകൽസമയത്ത് നിലവിളിക്കുന്നു; എങ്കിലും നീ ഉത്തരമരുളുന്നില്ല;

     രാത്രികാലത്തും ഞാൻ വിളിക്കുന്നു; എനിക്ക് ഒട്ടും സ്വസ്ഥതയില്ല.

     ³ യിസ്രായേലിന്റെ സ്തുതികളിൽ വസിക്കുന്നവനേ,

     നീ പരിശുദ്ധനാകുന്നുവല്ലോ.

     ⁴ ഞങ്ങളുടെ പിതാക്കന്മാർ നിന്നിൽ ആശ്രയിച്ചു;

     അവർ ആശ്രയിക്കുകയും നീ അവരെ വിടുവിക്കുകയും ചെയ്തു.

     ⁵ അവർ നിന്നോട് നിലവിളിച്ചു രക്ഷപ്രാപിച്ചു;

     അവർ നിന്നിൽ ആശ്രയിച്ചു, ലജ്ജിച്ചുപോയില്ല.

     ⁶ ഞാനോ മനുഷ്യനല്ല, ഒരു കൃമിയത്രേ;

     മനുഷ്യരുടെ പരിഹാസപാത്രവും ജനത്താൽ നിന്ദിതനും തന്നെ.

     ⁷ എന്നെ കാണുന്നവരെല്ലാം എന്നെ പരിഹസിക്കുന്നു;

     അവർ അധരം മലർത്തി തല കുലുക്കി പറയുന്നു:

     ⁸ “യഹോവയിൽ നിന്നെത്തന്നെ സമർപ്പിക്ക! അവൻ നിന്നെ രക്ഷിക്കട്ടെ!

     അവൻ നിന്നെ വിടുവിക്കട്ടെ! അവന് നിന്നിൽ പ്രസാദമുണ്ടല്ലോ.”

     ⁹ നീയല്ലയോ എന്നെ ഉദരത്തിൽനിന്ന് പുറപ്പെടുവിച്ചവൻ;

     എന്റെ അമ്മയുടെ മുല കുടിക്കുമ്പോൾ നീ എന്നെ നിന്നിൽ ആശ്രയിക്കുമാറാക്കി.

     ¹⁰ ജനിച്ച ഉടൻ തന്നെ ഞാൻ നിങ്കൽ ഏല്പിക്കപ്പെട്ടു;

     എന്റെ അമ്മയുടെ ഉദരംമുതൽ നീ എന്റെ ദൈവം.

     ¹¹ കഷ്ടം അടുത്തിരിക്കുകയാൽ എന്നെ വിട്ടകന്നിരിക്കരുതേ;

     സഹായിക്കുവാൻ മറ്റാരുമില്ലല്ലോ.

     ¹² അനേകം കാളകൾ എന്നെ വളഞ്ഞു;

     ബാശാനിൽ നിന്നുള്ള കാളകൂറ്റന്മാർ എന്നെ ചുറ്റിയിരിക്കുന്നു.

     ¹³ ബുഭുക്ഷയോടെ അലറുന്ന സിംഹംപോലെ

     അവർ എന്റെ നേരെ വായ് പിളർക്കുന്നു.

     ¹⁴ ഞാൻ വെള്ളംപോലെ തൂകിപ്പോകുന്നു;

     എന്റെ അസ്ഥികളെല്ലാം ബന്ധം വിട്ടിരിക്കുന്നു;

     എന്റെ ഹൃദയം മെഴുകുപോലെ ആയി; എന്റെ ഉള്ളിൽ ഉരുകിയിരിക്കുന്നു.

     ¹⁵ എന്റെ ശക്തി ഓട്ടുകഷണംപോലെ ഉണങ്ങിയിരിക്കുന്നു;

     എന്റെ നാവ് അണ്ണാക്കോട് പറ്റിയിരിക്കുന്നു.

     നീ എന്നെ മരണത്തിന്റെ പൊടിയിൽ ഇട്ടുമിരിക്കുന്നു.

     ¹⁶ നായ്ക്കൾ എന്നെ വളഞ്ഞു; ദുഷ്ടന്മാരുടെ കൂട്ടം എന്നെ ചുറ്റിയിരിക്കുന്നു;

     അവർ എന്റെ കൈകളെയും കാലുകളെയും തുളച്ചു.

     ¹⁷ എന്റെ അസ്ഥികളെല്ലാം എനിക്ക് എണ്ണാം;

     അവർ എന്നെ തുറിച്ച് നോക്കുന്നു.

     ¹⁸ എന്റെ വസ്ത്രം അവർ പകുത്തെടുത്തു,

     എന്റെ അങ്കിക്കായി അവർ ചീട്ടിടുന്നു.

     ¹⁹ നീയോ, യഹോവേ, അകന്നിരിക്കരുതേ;

     എന്റെ തുണയായുള്ളോവേ, എന്നെ സഹായിക്കുവാൻ വേഗം വരേണമേ.

     ²⁰ വാളിൽനിന്ന് എന്റെ പ്രാണനെയും

     നായയുടെ കയ്യിൽനിന്ന് എന്റെ ജീവനെയും വിടുവിക്കണമേ.

     ²¹ സിംഹത്തിന്റെ വായിൽനിന്ന് എന്നെ രക്ഷിക്കണമേ;

     കാട്ടുപോത്തുകളുടെ കൊമ്പുകൾക്കിടയിൽ നീ എനിക്ക് ഉത്തരമരുളുന്നു.

     ²² ഞാൻ നിന്റെ നാമത്തെ എന്റെ സഹോദരന്മാരോട് കീർത്തിക്കും;

     സഭാമദ്ധ്യത്തിൽ ഞാൻ നിന്നെ സ്തുതിക്കും.

     ²³ യഹോവാഭക്തന്മാരേ, അവനെ സ്തുതിക്കുവിൻ;

     യാക്കോബിന്റെ സകലസന്തതികളുമേ, അവനെ മഹത്വപ്പെടുത്തുവിൻ;

     യിസ്രായേലിന്റെ സർവ്വസന്തതികളുമേ, അവനെ ഭയപ്പെടുവിൻ.

     ²⁴ അരിഷ്ടന്റെ അരിഷ്ടത അവൻ നിരസിച്ചില്ല, വെറുത്തതുമില്ല;

     തന്റെ മുഖം അവന് മറച്ചതുമില്ല;

     തന്നെ വിളിച്ചപേക്ഷിച്ചപ്പോൾ കേൾക്കുകയത്രേ ചെയ്തത്.

     ²⁵ മഹാസഭയിൽ എന്റെ പ്രശംസ നിന്നെക്കുറിച്ചാകുന്നു.

     അവന്റെ ഭക്തന്മാരുടെ കൺ മുമ്പിൽ ഞാൻ എന്റെ നേർച്ചകൾ കഴിക്കും.

     ²⁶ എളിയവർ ഭക്ഷിച്ച് തൃപ്തരാകും;

     യഹോവയെ അന്വേഷിക്കുന്നവർ അവനെ സ്തുതിക്കും.

     നിങ്ങളുടെ ഹൃദയം എന്നേക്കും സുഖമായിരിക്കട്ടെ.

     ²⁷ ഭൂമിയുടെ അറുതികളിൽ ഉള്ളവർ ഒക്കെയും ഇതോർത്ത് യഹോവയിലേക്ക് തിരിയും;

     സകല വംശങ്ങളും നിന്റെ മുമ്പാകെ നമസ്കരിക്കും.

     ²⁸ രാജത്വം യഹോവയ്ക്കുള്ളതല്ലയോ;

     അവൻ ജനതതിയെ ഭരിക്കുന്നു.

     ²⁹ ഭൂമിയിൽ പുഷ്ടിയുള്ളവരെല്ലാം ഭക്ഷിച്ച് ആരാധിക്കും;

     തന്റെ പ്രാണനെ രക്ഷിക്കുവാൻ കഴിയാതെ പൊടിയിലേക്ക് മടങ്ങിച്ചേരുന്നവരും അവന്റെ മുമ്പാകെ കുമ്പിടും.

     ³⁰ വരുവാനുള്ള ഒരു സന്തതി അവനെ സേവിക്കും;

     വരുന്ന തലമുറയോട് യഹോവയെക്കുറിച്ച് കീർത്തിക്കും.

     ³¹ അവർ വന്ന്, ജനിക്കുവാനുള്ള തലമുറയോട് “അവൻ ഇത് നിവർത്തിച്ചിരിക്കുന്നു” എന്ന് അവന്റെ നീതിയെ വർണ്ണിക്കും.

സങ്കീർത്തനം.22 23

     ¹ യഹോവ എന്റെ ഇടയനാകുന്നു;

     എനിക്ക് ഒരു കുറവും ഉണ്ടാകുകയില്ല..

     ² പച്ചയായ മേച്ചിൽപുറങ്ങളിൽ അവൻ എന്നെ കിടത്തുന്നു;

     സ്വഛമായ ജലാശയത്തിനരികിലേക്ക് എന്നെ നടത്തുന്നു.

     ³ എന്റെ പ്രാണനെ അവൻ തണുപ്പിക്കുന്നു;

     തിരുനാമംനിമിത്തം എന്നെ നീതിപാതകളിൽ നടത്തുന്നു.

     ⁴ മരണനിഴലിൻ താഴ്വരയിൽ കൂടിനടന്നാലും

     ഞാൻ ഒരു അനർത്ഥവും ഭയപ്പെടുകയില്ല;

     നീ എന്നോടുകൂടി ഇരിക്കുന്നുവല്ലോ;

     നിന്റെ വടിയും കോലും എന്നെ ആശ്വസിപ്പിക്കുന്നു.

     ⁵ എന്റെ ശത്രുക്കളുടെ കൺ മുമ്പിൽ നീ എനിക്ക് വിരുന്നൊരുക്കുന്നു;

     എന്റെ തലയെ എണ്ണകൊണ്ട് അഭിഷേകം ചെയ്യുന്നു;

     എന്റെ പാനപാത്രം നിറഞ്ഞ് കവിയുന്നു.

     ⁶ നന്മയും കരുണയും നിശ്ചയമായി ആയുഷ്കാലം മുഴുവൻ എന്നെ പിന്തുടരും;

     ഞാൻ യഹോവയുടെ ആലയത്തിൽ ദീർഘകാലം വസിക്കും.

സങ്കീർത്തനം. 23 24

     ¹ ഭൂമിയും അതിന്റെ പൂർണ്ണതയും

     ഭൂതലവും അതിലെ നിവാസികളും യഹോവയ്ക്കുള്ളതാകുന്നു.

     ² സമുദ്രങ്ങളുടെ മേൽ അവൻ അതിനെ സ്ഥാപിച്ചു;

     നദികളുടെമേൽ അവൻ അതിനെ ഉറപ്പിച്ചു.

     ³ യഹോവയുടെ പർവ്വതത്തിൽ ആര് കയറും?

     അവന്റെ വിശുദ്ധസ്ഥലത്ത് ആര് നില്ക്കും?

     ⁴ വെടിപ്പുള്ള കൈയും നിർമ്മലഹൃദയവും ഉള്ളവൻ.

     വ്യാജത്തിന് മനസ്സുവയ്ക്കാതെയും കള്ളസത്യം ചെയ്യാതെയും ഇരിക്കുന്നവൻ:

     ⁵ അവൻ യഹോവയോട് അനുഗ്രഹവും

     തന്റെ രക്ഷയുടെ ദൈവത്തോട് നീതിയും പ്രാപിക്കും.

     ⁶ ഇങ്ങനെയുള്ളവർ ആകുന്നു അവനെ അന്വേഷിക്കുന്നവരുടെ തലമുറ;

     യാക്കോബിന്റെ ദൈവമേ, തിരുമുഖം അന്വേഷിക്കുന്നവർ ഇവർ തന്നെ. സേലാ.

     ⁷ വാതിലുകളേ, നിങ്ങളുടെ തലകൾ ഉയർത്തുവിൻ;

     പുരാതനമായ കതകുകളേ, ഉയർന്നിരിക്കുവിൻ;

     മഹത്വത്തിന്റെ രാജാവ് പ്രവേശിക്കട്ടെ.

     ⁸ മഹത്വത്തിന്റെ രാജാവ് ആര് ?

     ബലവാനും വീരനുമായ യഹോവ, യുദ്ധവീരനായ യഹോവ തന്നെ.

     ⁹ വാതിലുകളേ, നിങ്ങളുടെ തലകൾ ഉയർത്തുവിൻ;

     പുരാതനമായ കതകുകളേ, ഉയർന്നിരിക്കുവിൻ;

     മഹത്വത്തിന്റെ രാജാവ് പ്രവേശിക്കട്ടെ.

     ¹⁰ മഹത്വത്തിന്റെ രാജാവ് ആര് ?

     സൈന്യങ്ങളുടെ യഹോവ തന്നെ;

     അവനാകുന്നു മഹത്വത്തിന്റെ രാജാവ്. സേലാ.

സങ്കീർത്തനം.24 25

     ¹ യഹോവേ, നിങ്കലേക്ക് ഞാൻ മനസ്സ് ഉയർത്തുന്നു;

     ² എന്റെ ദൈവമേ, നിന്നിൽ ഞാൻ ആശ്രയിക്കുന്നു;

     ഞാൻ ലജ്ജിച്ചു പോകരുതേ;

     എന്റെ ശത്രുക്കൾ എന്റെമേൽ ജയം ഘോഷിക്കരുതേ.

     ³ നിനക്കായി കാത്തിരിക്കുന്ന ഒരുവനും ലജ്ജിച്ചു പോകുകയില്ല;

     വെറുതെ ദ്രോഹിക്കുന്നവർ ലജ്ജിച്ചുപോകും.

     ⁴ യഹോവേ, നിന്റെ വഴികൾ എന്നെ അറിയിക്കണമേ;

     നിന്റെ പാതകൾ എനിക്ക് ഉപദേശിച്ചു തരണമേ!

     ⁵ നിന്റെ സത്യത്തിൽ എന്നെ നടത്തി പഠിപ്പിക്കണമേ;

     നീ എന്റെ രക്ഷയുടെ ദൈവമാകുന്നുവല്ലോ;

     ദിവസം മുഴുവൻ ഞാൻ നിനക്കായി കാത്തിരിക്കുന്നു.

     ⁶ യഹോവേ, നിന്റെ കരുണയും ദയയും ഓർക്കണമേ;

     അവ പണ്ടുപണ്ടേയുള്ളവയല്ലോ.

     ⁷ എന്റെ യൗവ്വനത്തിലെ പാപങ്ങളും ലംഘനങ്ങളും ഓർക്കരുതേ;

     യഹോവേ, നിന്റെ കൃപമൂലം, നിന്റെ ദയനിമിത്തം തന്നെ,എന്നെ ഓർക്കണമേ.

     ⁸ യഹോവ നല്ലവനും നേരുള്ളവനും ആകുന്നു.

     അതുകൊണ്ട് അവൻ പാപികളെ നേർവ്വഴിയിൽ പഠിപ്പിക്കുന്നു.

     ⁹ സൗമ്യതയുള്ളവരെ അവൻ ന്യായത്തിൽ നടത്തുന്നു;

     സൗമ്യതയുള്ളവർക്ക് തന്റെ വഴി പഠിപ്പിച്ചു കൊടുക്കുന്നു.

     ¹⁰ യഹോവയുടെ നിയമവും സാക്ഷ്യങ്ങളും പ്രമാണിക്കുന്നവർക്ക്

     അവന്റെ വഴികളെല്ലാം ദയയും സത്യവും ആകുന്നു.

     ¹¹ യഹോവേ, എന്റെ അകൃത്യം വലിയത്;

     നിന്റെ നാമംനിമിത്തം അത് ക്ഷമിക്കണമേ.

     ¹² യഹോവാഭക്തനായ പുരുഷൻ ആര്?

     അവൻ തിരഞ്ഞെടുക്കേണ്ട വഴി താൻ അവന് കാണിച്ചുകൊടുക്കും.

     ¹³ അവൻ മനോസുഖത്തോടെ വസിക്കും;

     അവന്റെ സന്തതി ദേശം അവകാശമാക്കും.

     ¹⁴ യഹോവയുടെ സഖിത്വം തന്റെ ഭക്തന്മാർക്ക് ഉണ്ടാകും;

     അവൻ തന്റെ നിയമം അവരെ അറിയിക്കുന്നു.

     ¹⁵ എന്റെ കണ്ണ് എപ്പോഴും യഹോവയിങ്കലേക്കാകുന്നു;

     അവൻ എന്റെ കാലുകളെ വലയിൽനിന്ന് വിടുവിക്കും.

     ¹⁶ എന്നിലേക്ക് തിരിഞ്ഞ് എന്നോട് കരുണയുണ്ടാകണമേ;

     ഞാൻ ഏകാകിയും അരിഷ്ടനും ആകുന്നു.

     ¹⁷ എന്റെ മനഃപീഡകൾ വർദ്ധിച്ചിരിക്കുന്നു;

     എന്റെ സങ്കടങ്ങളിൽനിന്ന് എന്നെ വിടുവിക്കണമേ.

     ¹⁸ എന്റെ അരിഷ്ടതയും അതിവേദനയും നോക്കണമേ;

     എന്റെ സകലപാപങ്ങളും ക്ഷമിക്കണമേ.

     ¹⁹ എന്റെ ശത്രുക്കൾ എത്രയെന്ന് നോക്കണമേ; അവർ പെരുകിയിരിക്കുന്നു;

     അവർ കഠിനദ്വേഷത്തോടെ എന്നെ ദ്വേഷിക്കുന്നു;

     ²⁰ എന്റെ പ്രാണനെ കാത്ത് എന്നെ വിടുവിക്കണമേ;

     നിന്നെ ശരണമാക്കിയിരിക്കുകയാൽ ഞാൻ ലജ്ജിച്ചുപോകരുതേ.

     ²¹ നിഷ്കളങ്കതയും നേരും എന്നെ പരിപാലിക്കുമാറാകട്ടെ;

     ഞാൻ നിന്നിൽ പ്രത്യാശവച്ചിരിക്കുന്നുവല്ലോ.

     ²² ദൈവമേ, യിസ്രായേലിനെ

     അവന്റെ സകലകഷ്ടങ്ങളിൽനിന്നും വീണ്ടെടുക്കണമേ.

സങ്കീർത്തനം.25 26

     ¹ യഹോവേ, എനിക്ക് ന്യായം പാലിച്ചു തരണമേ;

     ഞാൻ എന്റെ നിഷ്കളങ്കതയിൽ നടക്കുന്നു;

     ഞാൻ ഇളകാതെ യഹോവയിൽ ആശ്രയിക്കുന്നു.

     ² യഹോവേ, എന്നെ പരീക്ഷിച്ച് ശോധന ചെയ്യണമേ;

     എന്റെ മനസ്സും എന്റെ ഹൃദയവും പരിശോധിക്കണമേ.

     ³ നിന്റെ ദയ എന്റെ കണ്മുമ്പിൽ ഇരിക്കുന്നു;

     നിന്റെ സത്യത്തിൽ ഞാൻ നടന്നിരിക്കുന്നു.

     ⁴ വഞ്ചകന്മാരോടുകൂടി ഞാൻ ഇരുന്നിട്ടില്ല;

     കപടഹൃദയമുള്ളവരുടെ അടുക്കൽ ഞാൻ ചെന്നിട്ടുമില്ല.

     ⁵ ദുഷ്പ്രവൃത്തിക്കാരുടെ സംഘത്തെ ഞാൻ വെറുത്തിരിക്കുന്നു;

     ദുഷ്ടന്മാരോടുകൂടി ഞാൻ ഇരിക്കുകയുമില്ല.

     ⁶ സ്തോത്രസ്വരം കേൾപ്പിക്കേണ്ടതിനും

     നിന്റെ അത്ഭുതപ്രവൃത്തികളെ വർണ്ണിക്കേണ്ടതിനും

     ⁷ ഞാൻ നിഷ്ക്കളങ്കതയിൽ എന്റെ കൈകൾ കഴുകുന്നു;

     യഹോവേ, ഞാൻ നിന്റെ യാഗപീഠം വലംവയ്ക്കുന്നു.

     ⁸ യഹോവേ, നിന്റെ ആലയമായ വാസസ്ഥലവും

     നിന്റെ മഹത്വത്തിന്റെ നിവാസവും എനിക്ക് പ്രിയമാകുന്നു.

     ⁹ പാപികളോടുകൂടി എന്റെ പ്രാണനെയും

     രക്തദാഹികളോടുകൂടി എന്റെ ജീവനെയും സംഹരിച്ചുകളയരുതേ.

     ¹⁰ അവരുടെ കൈകളിൽ ദുഷ്കർമ്മം ഉണ്ട്;

     അവരുടെ വലങ്കൈ കോഴ വാങ്ങാൻ ഒരുങ്ങിയിരിക്കുന്നു.

     ¹¹ ഞാനോ, എന്റെ നിഷ്കളങ്കതയിൽ നടക്കും;

     എന്നെ വീണ്ടെടുത്ത് എന്നോടു കൃപ ചെയ്യണമേ.

     ¹² എന്റെ കാലടി സമഭൂമിയിൽ നില്ക്കുന്നു;

     സഭകളിൽ ഞാൻ യഹോവയെ വാഴ്ത്തും.

സങ്കീർത്തനം.26 27

     ¹ യഹോവ എന്റെ വെളിച്ചവും എന്റെ രക്ഷയും ആകുന്നു; ഞാൻ ആരെ ഭയപ്പെടും?

     യഹോവ എന്റെ ജീവന്റെ ബലം; ഞാൻ ആരെ പേടിക്കും?

     ² എന്റെ വൈരികളും ശത്രുക്കളുമായ ദുഷ്കർമ്മികൾ

     എന്റെ മാംസം തിന്നുവാൻ എന്നോട് അടുക്കുമ്പോൾ ഇടറിവീഴും.

     ³ ഒരു സൈന്യം എന്റെ നേരെ പാളയമിറങ്ങിയാലും

     എന്റെ ഹൃദയം ഭയപ്പെടുകയില്ല;

     എനിക്കു യുദ്ധം നേരിട്ടാലും ഞാൻ നിർഭയമായിരിക്കും.

     ⁴ ഞാൻ യഹോവയോട് ഒരു കാര്യം അപേക്ഷിച്ചു; അതു തന്നെ ഞാൻ ആഗ്രഹിക്കുന്നു;

     യഹോവയുടെ സൗന്ദര്യം കാണുവാനും അവന്റെ മന്ദിരത്തിൽ ധ്യാനിക്കുവാനും

     എന്റെ ആയുഷ്കാലമെല്ലാം ഞാൻ യഹോവയുടെ ആലയത്തിൽ വസിക്കേണ്ടതിനു തന്നെ.

     ⁵ അനർത്ഥദിവസത്തിൽ അവൻ തന്റെ കൂടാരത്തിൽ എന്നെ ഒളിപ്പിക്കും;

     തിരുനിവാസത്തിന്റെ മറവിൽ എന്നെ മറയ്ക്കും;

     പാറമേൽ എന്നെ ഉയർത്തും.

     ⁶ ഇപ്പോൾ എന്റെ ചുറ്റുമുള്ള ശത്രുക്കളേക്കാൾ എന്റെ തല ഉയർന്നിരിക്കും;

     ഞാൻ അവന്റെ കൂടാരത്തിൽ ജയഘോഷയാഗങ്ങൾ അർപ്പിക്കും;

     ഞാൻ യഹോവയ്ക്ക് പാടി കീർത്തനം ചെയ്യും.

     ⁷ യഹോവേ, ഞാൻ വിളിക്കുമ്പോൾ കേൾക്കണമേ;

     എന്നോട് കൃപചെയ്ത് എനിക്ക് ഉത്തരമരുളണമേ.

     ⁸ “എന്റെ മുഖം അന്വേഷിക്കുക” എന്ന് നിന്നിൽനിന്ന് കല്പന വന്നു എന്ന് എന്റെ ഹൃദയം പറയുന്നു;

     യഹോവേ, ഞാൻ നിന്റെ മുഖം അന്വേഷിക്കുന്നു.

     ⁹ നിന്റെ മുഖം എനിക്ക് മറയ്ക്കരുതേ;

     അടിയനെ കോപത്തോടെ തള്ളിക്കളയരുതേ;

     നീ എനിക്ക് തുണയായിരിക്കുന്നു;

     എന്റെ രക്ഷയുടെ ദൈവമേ, എന്നെ തള്ളിക്കളയരുതേ; ഉപേക്ഷിക്കുകയും അരുതേ.

     ¹⁰ എന്റെ അപ്പനും അമ്മയും എന്നെ ഉപേക്ഷിച്ചാലും

     യഹോവ എന്നെ ചേർത്തുകൊള്ളും.

     ¹¹ യഹോവേ, നിന്റെ വഴി എന്നെ പഠിപ്പിക്കണമേ;

     എന്റെ ശത്രുക്കൾനിമിത്തം നേരെയുള്ള പാതയിൽ എന്നെ നടത്തണമേ.

     ¹² എന്റെ വൈരികളുടെ ഇഷ്ടത്തിന് എന്നെ ഏല്പിച്ചുകൊടുക്കരുതേ;

     ക്രൂരത നിശ്വസിക്കുന്ന കള്ളസാക്ഷികൾ എന്നോട് എതിർത്തുനില്ക്കുന്നു.

     ¹³ ഞാൻ ജീവനുള്ളവരുടെ ദേശത്ത്

     യഹോവയുടെ നന്മ കാണും എന്ന് വിശ്വസിച്ചില്ലായിരുന്നുവെങ്കിൽ കഷ്ടം!

     ¹⁴ യഹോവയിൽ പ്രത്യാശവയ്ക്കുക; ധൈര്യപ്പെട്ടിരിക്കുക;

     നിന്റെ ഹൃദയം ഉറച്ചിരിക്കട്ടെ;

     അതേ, യഹോവയിൽ പ്രത്യാശവയ്ക്കുക.

സങ്കീർത്തനം.27 28

     ¹ യഹോവേ, ഞാൻ നിന്നെ വിളിച്ചപേക്ഷിക്കുന്നു;

     എന്റെ പാറയായ കർത്താവേ, അങ്ങ് മൗനമായി ഇരിക്കരുതേ;

     നീ മിണ്ടാതിരുന്നിട്ട് ഞാൻ കുഴിയിൽ ഇറങ്ങുന്നവരെപ്പോലെ ആകാതിരിക്കുവാൻ തന്നെ.

     ² ഞാൻ എന്റെ കൈകൾ വിശുദ്ധമന്ദിരത്തിലേക്ക് ഉയർത്തി

     നിന്നോട് നിലവിളിക്കുമ്പോൾ എന്റെ യാചനകളുടെ ശബ്ദം കേൾക്കണമേ.

     ³ ദുഷ്ടന്മാരോടും അകൃത്യം ചെയ്യുന്നവരോടും കൂടി എന്നെ വലിച്ചു കൊണ്ടുപോകരുതേ;

     അവർ കൂട്ടുകാരോട് സമാധാനം സംസാരിക്കുന്നു;

     എങ്കിലും അവരുടെ ഹൃദയത്തിൽ ദുഷ്ടത ഉണ്ട്.

     ⁴ അവരുടെ പ്രവൃത്തിക്കു തക്കവണ്ണവും ദുഷ്ടതയ്ക്ക് തക്കവണ്ണവും അവർക്ക് കൊടുക്കണമേ;

     അവരുടെ കൈകളുടെ പ്രവൃത്തിപോലെ അവരോട് ചെയ്യണമേ;

     അവർക്ക് തക്ക പ്രതിഫലം കൊടുക്കണമേ;

     ⁵ യഹോവയുടെ പ്രവൃത്തികളെയും അവന്റെ കൈവേലയെയും

     അവർ തിരിച്ചറിയായ്കകൊണ്ട് അവൻ അവരെ പണിയാതെ ഇടിച്ചുകളയും.

     ⁶ യഹോവ വാഴ്ത്തപ്പെട്ടവനാകട്ടെ;

     അവൻ എന്റെ യാചനകളുടെ ശബ്ദം കേട്ടിരിക്കുന്നു.

     ⁷ യഹോവ എന്റെ ബലവും എന്റെ പരിചയും ആകുന്നു;

     എന്റെ ഹൃദയം അവനിൽ ആശ്രയിച്ചു; എനിക്ക് സഹായം ലഭിച്ചു;

     അതുകൊണ്ട് എന്റെ ഹൃദയം ഉല്ലസിക്കുന്നു;

     ഗാനങ്ങളോടെ ഞാൻ അവനെ സ്തുതിക്കുന്നു.

     ⁸ യഹോവ തന്റെ ജനത്തിന്റെ ബലമാകുന്നു;

     തന്റെ അഭിഷിക്തന് അവൻ രക്ഷാദുർഗ്ഗം തന്നെ.

     ⁹ നിന്റെ ജനത്തെ രക്ഷിച്ചു നിന്റെ അവകാശത്തെ അനുഗ്രഹിക്കണമേ;

     അവരെ മേയിച്ച് എന്നേക്കും അവരെ വഹിക്കണമേ.

സങ്കീർത്തനം.28 29

     ¹ ദൈവപുത്രന്മാരേ, യഹോവയ്ക്ക് കൊടുക്കുവിൻ,

     യഹോവയ്ക്ക് മഹത്ത്വവും ശക്തിയും കൊടുക്കുവിൻ.

     ² യഹോവയ്ക്ക് അവന്റെ നാമത്തിന് യോഗ്യമായ മഹത്ത്വം കൊടുക്കുവിൻ;

     വിശുദ്ധിയുടെ സൗന്ദര്യത്തോടെ യഹോവയെ ആരാധിക്കുവിൻ.

     ³ യഹോവയുടെ ശബ്ദം വെള്ളത്തിൻമീതെ മുഴങ്ങുന്നു;

     പെരുവെള്ളത്തിൻമീതെ യഹോവ,

     മഹത്ത്വത്തിന്റെ ദൈവം തന്നെ, ഇടിമുഴക്കുന്നു.

     ⁴ യഹോവയുടെ ശബ്ദം ശക്തിയോടെ മുഴങ്ങുന്നു;

     യഹോവയുടെ ശബ്ദം മഹിമയോടെ മുഴങ്ങുന്നു.

     ⁵ യഹോവയുടെ ശബ്ദം ദേവദാരുക്കളെ തകർക്കുന്നു;

     യഹോവ ലെബാനോനിലെ ദേവദാരുക്കളെ പിളർക്കുന്നു.

     ⁶ അവൻ അവയെ കാളക്കുട്ടിയെപ്പോലെയും

     ലെബാനോനെയും സിര്യോനെയും കാട്ടുപോത്തിൻ കുട്ടിയെപ്പോലെയും തുള്ളിക്കുന്നു.

     ⁷ യഹോവയുടെ ശബ്ദം അഗ്നിജ്വാലകളെ ചിന്നിക്കുന്നു.

     ⁸ യഹോവയുടെ ശബ്ദം മരുഭൂമിയെ നടുക്കുന്നു;

     യഹോവ കാദേശ് മരുഭൂമിയെ നടുക്കുന്നു.

     ⁹ യഹോവയുടെ ശബ്ദം മാൻപേടകളെ പ്രസവിക്കുമാറാക്കുന്നു;

     അതു വനങ്ങളെ തോലുരിക്കുന്നു;

     അവന്റെ മന്ദിരത്തിൽ സകലരും “മഹത്ത്വം” എന്ന് ചൊല്ലുന്നു.

     ¹⁰ യഹോവ ജലപ്രളയത്തിനു മീതെ ഇരുന്നു;

     യഹോവ എന്നേക്കും രാജാവായി ഭരിക്കുന്നു.

     ¹¹ യഹോവ തന്റെ ജനത്തിന് ശക്തി നല്കും;

     യഹോവ തന്റെ ജനത്തെ സമാധാനം നല്കി അനുഗ്രഹിക്കും.

സങ്കീർത്തനം.29 30

     ¹ യഹോവേ, ഞാൻ നിന്നെ പുകഴ്ത്തുന്നു; നീ എന്നെ ഉദ്ധരിച്ചിരിക്കുന്നു;

     എന്റെ ശത്രുക്കൾ എന്നെക്കുറിച്ച് സന്തോഷിക്കുവാൻ നീ സന്ദർഭം ഉണ്ടാക്കിയതുമില്ല.

     ² എന്റെ ദൈവമായ യഹോവേ, ഞാൻ നിന്നോട് നിലവിളിച്ചു;

     നീ എന്നെ സൗഖ്യമാക്കുകയും ചെയ്തു.

     ³ യഹോവേ, നീ എന്റെ പ്രാണനെ പാതാളത്തിൽനിന്ന് കയറ്റിയിരിക്കുന്നു;

     കുഴിയിൽ ഇറങ്ങി പോകുന്നവരുടെ ഇടയിൽനിന്ന് നീ എനിക്ക് ജീവരക്ഷ വരുത്തിയിരിക്കുന്നു.

     ⁴ യഹോവയുടെ വിശുദ്ധന്മാരേ, അവന് സ്തുതിപാടുവിൻ;

     അവന്റെ വിശുദ്ധനാമത്തിന് സ്തോത്രം ചെയ്‌വിൻ.

     ⁵ അവന്റെ കോപം ക്ഷണനേരത്തേക്കേയുള്ളു;

     അവന്റെ പ്രസാദമോ ജീവപര്യന്തമുള്ളത്;

     സന്ധ്യയ്ക്ക് കരച്ചിൽ വന്ന് രാത്രിയിൽ വസിക്കും;

     ഉഷസ്സിലാകട്ടെ ആനന്ദഘോഷം വരുന്നു.

     ⁶ “ഞാൻ ഒരുനാളും കുലുങ്ങിപ്പോകുകയില്ല” എന്ന് എന്റെ സുരക്ഷിതകാലത്ത് ഞാൻ പറഞ്ഞു.

     ⁷ യഹോവേ, നിന്റെ പ്രസാദത്താൽ നീ എന്റെ പർവ്വതത്തെ ഉറച്ചു നില്ക്കുമാറാക്കി;

     നീ നിന്റെ മുഖം മറച്ചു, ഞാൻ ഭ്രമിച്ചുപോയി.

     ⁸ യഹോവേ, ഞാൻ നിന്നോട് നിലവിളിച്ചു;

     യഹോവയോട് ഞാൻ യാചിച്ചു.

     ⁹ ഞാൻ കുഴിയിൽ ഇറങ്ങിപ്പോയാൽ എന്റെ രക്തംകൊണ്ട് എന്ത് ലാഭമാണുള്ളത്?

     ധൂളി നിന്നെ സ്തുതിക്കുമോ? അത് നിന്റെ സത്യം പ്രസ്താവിക്കുമോ?

     ¹⁰ യഹോവേ, കേൾക്കണമേ; എന്നോടു കരുണയുണ്ടാകണമേ;

     യഹോവേ, എന്റെ രക്ഷകനായിരിക്കണമേ.

     ¹¹ നീ എന്റെ വിലാപത്തെ നൃത്തമാക്കിത്തീർത്തു;

     എന്റെ ചണവസ്ത്രം നീ അഴിച്ച് എന്നെ സന്തോഷം ധരിപ്പിച്ചിരിക്കുന്നു;

     ¹² ഞാൻ മൗനമായിരിക്കാതെ നിനക്ക് സ്തുതി പാടേണ്ടതിനു തന്നെ.

     എന്റെ ദൈവമായ യഹോവേ, ഞാൻ എന്നേക്കും നിനക്ക് സ്തോത്രം ചെയ്യും.

സങ്കീർത്തനം.30 31

     ¹ യഹോവേ, ഞാൻ നിന്നെ ശരണം പ്രാപിക്കുന്നു;

     ഞാൻ ഒരുനാളും ലജ്ജിച്ചുപോകരുതേ;

     നിന്റെ നീതിനിമിത്തം എന്നെ വിടുവിക്കണമേ.

     ² നിന്റെ ചെവി എന്നിലേക്ക് ചായിച്ച് എന്നെ വേഗം വിടുവിക്കണമേ.

     നീ എനിക്കു ഉറപ്പുള്ള പാറയായും എന്നെ രക്ഷിക്കുന്ന കോട്ടയായും ഇരിക്കണമേ.

     ³ നീ എന്റെ പാറയും എന്റെ കോട്ടയുമല്ലോ;

     നിന്റെ നാമംനിമിത്തം എന്നെ നടത്തി പരിപാലിക്കണമേ.

     ⁴ അവർ എനിക്കായി ഒളിച്ചുവച്ചിരിക്കുന്ന വലയിൽനിന്ന് എന്നെ വിടുവിക്കണമേ;

     നീ എന്റെ അഭയസ്ഥാനമാകുന്നുവല്ലോ.

     ⁵ നിന്റെ കൈയിൽ ഞാൻ എന്റെ ആത്മാവിനെ ഭരമേല്പിക്കുന്നു;

     വിശ്വസ്തദൈവമായ യഹോവേ, നീ എന്നെ വീണ്ടെടുത്തിരിക്കുന്നു.

     ⁶ മിഥ്യാമൂർത്തികളെ സേവിക്കുന്നവരെ ഞാൻ പകയ്ക്കുന്നു;

     ഞാനോ യഹോവയിൽ ആശ്രയിക്കുന്നു.

     ⁷ ഞാൻ നിന്റെ ദയയിൽ ആനന്ദിച്ച് സന്തോഷിക്കുന്നു;

     നീ എന്റെ അരിഷ്ടത കണ്ട് എന്റെ പ്രാണസങ്കടങ്ങൾ അറിഞ്ഞിരിക്കുന്നു.

     ⁸ ശത്രുവിന്റെ കയ്യിൽ നീ എന്നെ ഏല്പിച്ചിട്ടില്ല;

     എന്റെ കാലുകൾ നീ വിശാലസ്ഥലത്ത് നിർത്തിയിരിക്കുന്നു.

     ⁹ യഹോവേ, എന്നോട് കൃപയുണ്ടാകണമേ; ഞാൻ കഷ്ടത്തിലായിരിക്കുന്നു;

     വ്യസനംകൊണ്ട് എന്റെ കണ്ണും പ്രാണനും ശരീരവും ക്ഷയിച്ചിരിക്കുന്നു.

     ¹⁰ എന്റെ ആയുസ്സ് ദുഃഖത്തിലും എന്റെ സംവത്സരങ്ങൾ നെടുവീർപ്പിലും കഴിഞ്ഞുപോയിരിക്കുന്നു;

     എന്റെ അകൃത്യംനിമിത്തം എന്റെ ബലം നഷ്ടപ്പെട്ടും എന്റെ അസ്ഥികൾ ക്ഷയിച്ചും ഇരിക്കുന്നു.

     ¹¹ എന്റെ സകലവൈരികളാലും ഞാൻ നിന്ദിതനായിത്തീർന്നു;

     എന്റെ അയല്ക്കാർക്ക് അതിനിന്ദിതൻ തന്നെ;

     എന്റെ മുഖപരിചയക്കാർക്ക് ഞാൻ ഭയഹേതുവാകുന്നു.

     എന്നെ വെളിയിൽ കാണുന്നവർ എന്നെ വിട്ട് ഓടിപ്പോകുന്നു.

     ¹² മരിച്ചുപോയവനെപ്പോലെ എന്നെ മറന്നുകളഞ്ഞിരിക്കുന്നു;

     ഞാൻ ഒരു ഉടഞ്ഞ പാത്രംപോലെ ആയിരിക്കുന്നു.

     ¹³ “ചുറ്റും ഭീതി” എന്ന അപശ്രുതി ഞാൻ പലരുടെയും വായിൽനിന്ന് കേട്ടിരിക്കുന്നു;

     അവർ എനിക്ക് വിരോധമായി കൂടി ആലോചന കഴിക്കുന്നു,

     എന്റെ ജീവൻ എടുത്തുകളയുവാൻ നിരൂപിക്കുന്നു.

     ¹⁴ എങ്കിലും യഹോവേ, ഞാൻ നിന്നിൽ ആശ്രയിച്ചു;

     “നീ എന്റെ ദൈവം” എന്ന് ഞാൻ പറഞ്ഞു.

     ¹⁵ എന്റെ കാലഗതികൾ നിന്റെ കൈയിൽ ഇരിക്കുന്നു;

     എന്റെ ശത്രുക്കളുടെയും എന്നെ പീഡിപ്പിക്കുന്നവരുടെയും കൈയിൽനിന്ന് എന്നെ വിടുവിക്കണമേ.

     ¹⁶ അടിയന്റെമേൽ തിരുമുഖം പ്രകാശിപ്പിക്കണമേ;

     നിന്റെ ദയയാൽ എന്നെ രക്ഷിക്കണമേ.

     ¹⁷ യഹോവേ, നിന്നെ വിളിച്ചപേക്ഷിച്ചിരിക്കുകയാൽ ഞാൻ ലജ്ജിച്ചുപോകരുതേ;

     ദുഷ്ടന്മാർ ലജ്ജിച്ച് പാതാളത്തിൽ മൗനമായിരിക്കട്ടെ.

     ¹⁸ നീതിമാന് വിരോധമായി ഡംഭത്തോടും നിന്ദയോടും കൂടി

     ധാർഷ്ട്യം സംസാരിക്കുന്ന വ്യാജമുള്ള അധരങ്ങൾ നിശ്ശബ്ദമായി പോകട്ടെ.

     ¹⁹ നിന്റെ ഭക്തന്മാർക്കു വേണ്ടി നീ സംഗ്രഹിച്ചതും

     നിന്നിൽ ആശ്രയിക്കുന്നവർക്കു വേണ്ടി മനുഷ്യപുത്രന്മാർ കാൺകെ

     നീ പ്രവർത്തിച്ചതുമായ നിന്റെ നന്മ എത്ര വലിയതാകുന്നു.

     ²⁰ നീ അവരെ മനുഷ്യരുടെ ഗൂഢാലോചനയിൽ നിന്ന് വിടുവിച്ച്

     നിന്റെ സാന്നിധ്യത്തിന്റെ സുരക്ഷിതത്വത്തിൽ മറയ്ക്കും.

     നീ അവരെ നാവുകളുടെ സ്പർദ്ധയിൽനിന്ന് രക്ഷിച്ച്

     ഒരു കൂടാരത്തിനകത്ത് ഒളിപ്പിക്കും.

     ²¹ യഹോവ വാഴ്ത്തപ്പെട്ടവൻ; അവൻ ഉറപ്പുള്ള പട്ടണത്തിൽ

     തന്റെ ദയ എനിക്ക് അത്ഭുതകരമായി കാണിച്ചിരിക്കുന്നു.

     ²² “ഞാൻ നിന്റെ ദൃഷ്ടിയിൽനിന്ന് ഛേദിക്കപ്പെട്ടുപോയി” എന്ന് ഞാൻ എന്റെ പരിഭ്രമത്തിൽ പറഞ്ഞു;

     എങ്കിലും ഞാൻ നിന്നെ വിളിച്ചപേക്ഷിച്ചപ്പോൾ എന്റെ യാചനയുടെ ശബ്ദം നീ കേട്ടു.

     ²³ യഹോവയുടെ സകലവിശുദ്ധന്മാരുമായുള്ളോരേ, അവനെ സ്നേഹിക്കുവിൻ;

     യഹോവ വിശ്വസ്തന്മാരെ കാക്കുന്നു;

     അഹങ്കാരം പ്രവർത്തിക്കുന്നവന് ധാരാളം പകരം കൊടുക്കുന്നു.

     ²⁴ യഹോവയിൽ പ്രത്യാശയുള്ള ഏവരുമേ, ധൈര്യപ്പെട്ടിരിക്കുവിൻ;

     നിങ്ങളുടെ ഹൃദയം ഉറച്ചിരിക്കട്ടെ.

സങ്കീർത്തനം.31 32

     ¹ ലംഘനം ക്ഷമിച്ചും

     പാപം മറച്ചും കിട്ടിയവൻ ഭാഗ്യവാൻ.

     ² യഹോവ അകൃത്യം കണക്കിടാതെയും

     ആത്മാവിൽ കാപട്യം ഇല്ലാതെയും ഇരിക്കുന്ന മനുഷ്യൻ ഭാഗ്യവാൻ.

     ³ ഞാൻ മിണ്ടാതെയിരുന്നപ്പോൾ നിരന്തരമായ ഞരക്കത്താൽ

     എന്റെ അസ്ഥികൾ ക്ഷയിച്ചുപോയി;

     ⁴ രാവും പകലും നിന്റെ കൈ എന്റെമേൽ ഭാരമായിരുന്നു;

     എന്റെ മജ്ജ വേനല്ക്കാലത്തെ ഉഷ്ണത്താൽ എന്നപോലെ വറ്റിപ്പോയി. സേലാ.

     ⁵ ഞാൻ എന്റെ പാപം നിന്റെ മുമ്പാകെ ഏറ്റു പറഞ്ഞു; എന്റെ അകൃത്യം മറച്ചതുമില്ല.

     “എന്റെ ലംഘനങ്ങൾ യഹോവയോട് ഏറ്റു പറയും” എന്ന് ഞാൻ പറഞ്ഞു;

     അപ്പോൾ നീ എന്റെ പാപത്തിന്റെ കുറ്റം ക്ഷമിച്ചുതന്നു. സേലാ.

     ⁶ ഇതുനിമിത്തം ഓരോ ഭക്തനും കണ്ടെത്താകുന്ന കാലത്ത് നിന്നോട് പ്രാർത്ഥിക്കും;

     പെരുവെള്ളം കവിഞ്ഞുവരുമ്പോൾ അത് അവന്റെ അടുക്കൽ എത്തുകയില്ല.

     ⁷ നീ എനിക്കു മറവിടമാകുന്നു; നീ എന്നെ കഷ്ടത്തിൽനിന്നു സൂക്ഷിക്കും;

     രക്ഷയുടെ ഉല്ലാസഘോഷംകൊണ്ട് നീ എന്നെ ചുറ്റിക്കൊള്ളും. സേലാ.

     ⁸ ഞാൻ നിന്നെ ഉപദേശിച്ച്, നടക്കേണ്ട വഴി നിനക്ക് കാണിച്ചുതരും;

     ഞാൻ നിന്റെമേൽ ദൃഷ്ടിവെച്ച് നിനക്ക് ആലോചന പറഞ്ഞുതരും.

     ⁹ നിങ്ങൾ തിരിച്ചറിവില്ലാത്ത കുതിരയെയും കോവർകഴുതയെയും പോലെ ആകരുത്;

     കടിഞ്ഞാണും മുഖപ്പട്ടയും കൊണ്ട് അവയെ അടക്കിവരുന്നു;

     അല്ലെങ്കിൽ അവ നിനക്ക് സ്വാധീനമാകുകയില്ല.

     ¹⁰ ദുഷ്ടന് വളരെ വേദനകൾ ഉണ്ട്;

     എന്നാൽ യഹോവയിൽ ആശ്രയിക്കുന്നവനെ ദയ സംരക്ഷിച്ചുകൊള്ളും.

     ¹¹ നീതിമാന്മാരേ, യഹോവയിൽ സന്തോഷിച്ചാനന്ദിക്കുവിൻ;

     ഹൃദയപരമാർത്ഥികൾ എല്ലാവരുമേ, ഘോഷിച്ചുല്ലസിക്കുവിൻ.

സങ്കീർത്തനം.32 33

     ¹ നീതിമാന്മാരേ, യഹോവയിൽ ഘോഷിച്ചുല്ലസിക്കുവിൻ;

     സ്തുതിക്കുന്നത് നേരുള്ളവർക്ക് ഉചിതമല്ലയോ?.

     ² കിന്നരംകൊണ്ട് യഹോവയ്ക്ക് സ്തോത്രം ചെയ്യുവിൻ;

     പത്തു കമ്പിയുള്ള വീണകൊണ്ട് അവന് സ്തുതി പാടുവിൻ.

     ³ അവന് പുതിയ പാട്ടു പാടുവിൻ;

     ഘോഷസ്വരത്തോടെ നന്നായി വാദ്യം വായിക്കുവിൻ.

     ⁴ യഹോവയുടെ വചനം നേരുള്ളത്;

     അവന്റെ സകലപ്രവൃത്തികളും വിശ്വസ്തതയുള്ളത്.

     ⁵ അവൻ നീതിയും ന്യായവും ഇഷ്ടപ്പെടുന്നു;

     യഹോവയുടെ ദയകൊണ്ട് ഭൂമി നിറഞ്ഞിരിക്കുന്നു.

     ⁶ യഹോവയുടെ വചനത്താൽ ആകാശവും

     അവന്റെ വായിലെ ശ്വാസത്താൽ അതിലെ സകലസൈന്യവും ഉളവായി;

     ⁷ അവൻ സമുദ്രത്തിലെ വെള്ളം കൂമ്പാരമായി കൂട്ടുന്നു;

     അവൻ ആഴികളെ ഭണ്ഡാരഗൃഹങ്ങളിൽ സംഗ്രഹിക്കുന്നു.

     ⁸ സകലഭൂവാസികളും യഹോവയെ ഭയപ്പെടട്ടെ;

     ഭൂതലത്തിൽ വസിക്കുന്നവരെല്ലാം അവനെ ശങ്കിക്കട്ടെ.

     ⁹ അവൻ അരുളിച്ചെയ്തു; ലോകം സൃഷ്ടിക്കപ്പെട്ടു;

     അവൻ കല്പിച്ചു; എല്ലാം പ്രത്യക്ഷമായി.

     ¹⁰ യഹോവ ജനതതികളുടെ ആലോചന വ്യർത്ഥമാക്കുന്നു;

     വംശങ്ങളുടെ പദ്ധതികൾ നിഷ്ഫലമാക്കുന്നു.

     ¹¹ യഹോവയുടെ ആലോചന ശാശ്വതമായും

     അവന്റെ ഹൃദയവിചാരങ്ങൾ തലമുറതലമുറയായും നിലകൊള്ളുന്നു.

     ¹² യഹോവ ദൈവമായിരിക്കുന്ന ജനങ്ങളും

     അവൻ തനിക്ക് അവകാശമായി തിരഞ്ഞെടുത്ത സമൂഹവും ഭാഗ്യമുള്ളത്.

     ¹³ യഹോവ സ്വർഗ്ഗത്തിൽനിന്ന് നോക്കുന്നു;

     മനുഷ്യപുത്രന്മാരെ എല്ലാം കാണുന്നു.

     ¹⁴ അവൻ സിംഹാസനസ്ഥനായിരിക്കുന്ന സ്ഥലത്തുനിന്ന് സർവ്വഭൂവാസികളെയും നോക്കുന്നു.

     ¹⁵ അവൻ അവരുടെ ഹൃദയങ്ങളെ ഒരുപോലെ മനഞ്ഞിരിക്കുന്നു;

     അവരുടെ പ്രവൃത്തികൾ സകലവും അവൻ ഗ്രഹിക്കുന്നു.

     ¹⁶ സൈന്യബഹുത്വത്താൽ രാജാവ് ജയം പ്രാപിക്കുന്നില്ല;

     ബലാധിക്യം കൊണ്ട് വീരൻ രക്ഷപെടുന്നതുമില്ല.

     ¹⁷ ജയത്തിന് കുതിര വ്യർത്ഥമാകുന്നു;

     തന്റെ ബലാധിക്യം കൊണ്ട് അത് വിടുവിക്കുന്നതുമില്ല.

     ¹⁸ യഹോവയുടെ ദൃഷ്ടി തന്റെ ഭക്തന്മാരുടെമേലും

     തന്റെ ദയയ്ക്കായി പ്രത്യാശിക്കുന്നവരുടെമേലും ഇരിക്കുന്നു;

     ¹⁹ അവരുടെ പ്രാണനെ മരണത്തിൽനിന്ന് വിടുവിക്കുവാനും

     ക്ഷാമത്തിൽ അവരെ ജീവനോടെ രക്ഷിക്കുവാനും തന്നെ.

     ²⁰ നമ്മുടെ ഉള്ളം യഹോവയ്ക്കായി കാത്തിരിക്കുന്നു;

     അവൻ നമ്മുടെ സഹായവും പരിചയും ആകുന്നു.

     ²¹ അവന്റെ വിശുദ്ധനാമത്തിൽ നാം ആശ്രയിക്കുകയാൽ

     നമ്മുടെ ഹൃദയം അവനിൽ സന്തോഷിക്കും.

     ²² യഹോവേ, ഞങ്ങൾ നിന്നിൽ പ്രത്യാശവയ്ക്കുന്നതുപോലെ

     നിന്റെ ദയ ഞങ്ങളുടെമേൽ ഉണ്ടാകുമാറാകട്ടെ.

സങ്കീർത്തനം.33 34

     ¹ ഞാൻ യഹോവയെ എല്ലാകാലത്തും വാഴ്ത്തും;

     അവന്റെ സ്തുതി എപ്പോഴും എന്റെ അധരങ്ങളിൽ ഉണ്ടായിരിക്കും.

     ² എന്റെ ഹൃദയം യഹോവയിൽ പ്രശംസിക്കുന്നു;

     താഴ്മയുള്ളവർ അത് കേട്ട് സന്തോഷിക്കും.

     ³ എന്നോടൊപ്പം യഹോവയുടെ മഹത്വത്തെ ഘോഷിക്കുവിൻ ;

     നാം ഒന്നിച്ച് അവന്റെ നാമത്തെ സ്തുതിക്കുക.

     ⁴ ഞാൻ യഹോവയോട് അപേക്ഷിച്ചു; അവൻ എനിക്ക് ഉത്തരമരുളി;

     എന്റെ സകല ഭയങ്ങളിൽനിന്നും എന്നെ വിടുവിച്ചു.

     ⁵ അവങ്കലേക്കു നോക്കിയവർ പ്രകാശിതരായി;

     അവരുടെ മുഖം ലജ്ജിച്ചുപോയതുമില്ല.

     ⁶ ഈ എളിയവൻ നിലവിളിച്ചു; യഹോവ കേട്ടു;

     അവന്റെ സകലകഷ്ടങ്ങളിൽനിന്നും അവനെ രക്ഷിച്ചു.

     ⁷ യഹോവയുടെ ദൂതൻ അവന്റെ ഭക്തന്മാരുടെ ചുറ്റും

     പാളയമിറങ്ങി അവരെ വിടുവിക്കുന്നു.

     ⁸ യഹോവ നല്ലവൻ എന്ന് രുചിച്ചറിയുവിൻ;

     അവനെ ശരണംപ്രാപിക്കുന്ന പുരുഷൻ ഭാഗ്യവാൻ.

     ⁹ യഹോവയുടെ വിശുദ്ധന്മാരേ, അവനെ ഭയപ്പെടുവിൻ;

     അവന്റെ ഭക്തന്മാർക്ക് ഒരു കുറവും ഇല്ലല്ലോ.

     ¹⁰ ബാലസിംഹങ്ങൾ പോലും ഇരകിട്ടാതെ വിശന്നിരിക്കാം;

     യഹോവയെ അന്വേഷിക്കുന്നവർക്കോ ഒരു നന്മയ്ക്കും കുറവുണ്ടാകുകയില്ല.

     ¹¹ മക്കളേ, വന്ന് എനിക്ക് ചെവിതരുവിൻ;

     യഹോവാഭക്തി ഞാൻ നിങ്ങൾക്ക് ഉപദേശിച്ചുതരാം.

     ¹² ജീവനെ ആഗ്രഹിക്കുകയും

     ദീർഘായുസ്സോടെയിരുന്ന് നന്മ കാണുവാൻ ഇച്ഛിക്കുകയും ചെയ്യുന്നവൻ ആര്?

     ¹³ ദോഷം ചെയ്യാതെ നിന്റെ നാവിനെയും

     വ്യാജം പറയാതെ നിന്റെ അധരത്തെയും കാത്തുകൊള്ളുക;

     ¹⁴ ദോഷം വിട്ടകന്ന് നന്മ ചെയ്യുക;

     സമാധാനം അന്വേഷിച്ച് അതിനെ പിന്തുടരുക.

     ¹⁵ യഹോവയുടെ കണ്ണ് നീതിമാന്മാരുടെ മേലും

     അവന്റെ ചെവി അവരുടെ നിലവിളിക്കും തുറന്നിരിക്കുന്നു.

     ¹⁶ ദുഷ്പ്രവൃത്തിക്കാരുടെ ഓർമ്മയെ ഭൂമിയിൽനിന്ന് മായിച്ചു കളയേണ്ടതിന്

     യഹോവയുടെ മുഖം അവർക്ക് പ്രതികൂലമായിരിക്കുന്നു.

     ¹⁷ നീതിമാന്മാർ നിലവിളിച്ചു; യഹോവ കേട്ടു,

     സകലകഷ്ടങ്ങളിൽനിന്നും അവരെ വിടുവിച്ചു.

     ¹⁸ ഹൃദയം നുറുങ്ങിയവർക്ക് യഹോവ സമീപസ്ഥൻ;

     മനസ്സു തകർന്നവരെ അവൻ രക്ഷിക്കുന്നു.

     ¹⁹ നീതിമാന്റെ അനർത്ഥങ്ങൾ അസംഖ്യമാകുന്നു;

     അവയിൽനിന്നെല്ലാം യഹോവ അവനെ വിടുവിക്കുന്നു.

     ²⁰ അവന്റെ അസ്ഥികൾ എല്ലാം അവൻ സൂക്ഷിക്കുന്നു;

     അവയിൽ ഒന്നും ഒടിഞ്ഞുപോകുകയില്ല.

     ²¹ തിന്മ ദുഷ്ടനെ കൊല്ലുന്നു;

     നീതിമാനെ വെറുക്കുന്നവർ ശിക്ഷ അനുഭവിക്കും.

     ²² യഹോവ തന്റെ ദാസന്മാരുടെ പ്രാണനെ രക്ഷിക്കുന്നു;

     അവനെ ശരണമാക്കുന്നവർ ആരും ശിക്ഷ അനുഭവിക്കുകയില്ല.

സങ്കീർത്തനം.34 35

     ¹ യഹോവേ, എന്നോട് മത്സരിക്കുന്നവരോട് വാദിക്കണമേ;

     എന്നോട് പൊരുതുന്നവരോട് പെരുതണമേ.

     ² നീ കവചവും പരിചയും ധരിച്ച്

     എന്റെ സഹായത്തിനായി എഴുന്നേല്ക്കണമേ.

     ³ നീ കുന്തം ഊരി എന്നെ പിന്തുടരുന്നവരുടെ വഴി അടച്ചുകളയണമേ;

     “ഞാൻ നിന്റെ രക്ഷയാകുന്നു” എന്ന് എന്റെ പ്രാണനോട് പറയണമേ.

     ⁴ എനിക്ക് ജീവഹാനി വരുത്തുവാൻ നോക്കുന്നവർക്ക് ലജ്ജയും അപമാനവും വരട്ടെ;

     എനിക്ക് അനർത്ഥം ചിന്തിക്കുന്നവർ പിന്തിരിഞ്ഞ് ലജ്ജിച്ചു പോകട്ടെ.

     ⁵ അവർ കാറ്റത്തെ പതിരുപോലെ ആകട്ടെ;

     യഹോവയുടെ ദൂതൻ അവരെ ഓടിക്കട്ടെ.

     ⁶ അവരുടെ വഴി ഇരുട്ടും വഴുവഴുപ്പും ഉള്ളതാകട്ടെ;

     യഹോവയുടെ ദൂതൻ അവരെ പിന്തുടരട്ടെ.

     ⁷ കാരണം കൂടാതെ അവർ എനിക്കായി വല ഒളിച്ചുവച്ചു;

     കാരണം കൂടാതെ അവർ എന്റെ പ്രാണനായി കുഴി കുഴിച്ചിരിക്കുന്നു.

     ⁸ അവൻ വിചാരിക്കാത്ത സമയത്ത് അവന് അപായം ഭവിക്കട്ടെ;

     അവൻ ഒളിച്ചുവച്ച വലയിൽ അവൻ തന്നെ കുടുങ്ങട്ടെ;

     അവൻ അപായത്തിൽ അകപ്പെട്ടുപോകട്ടെ.

     ⁹ എന്റെ ഉള്ളം യഹോവയിൽ ആനന്ദിക്കും;

     അവന്റെ രക്ഷയിൽ സന്തോഷിക്കും;

     ¹⁰ യഹോവേ, നിനക്കു തുല്യൻ ആര്?

     “എളിയവനെ തന്നിലും ബലമേറിയവന്റെ കൈയിൽനിന്നും

     എളിയവനും ദരിദ്രനുമായവനെ കവർച്ചക്കാരന്റെ കൈയിൽനിന്നും

     നീ രക്ഷിക്കുന്നു” എന്ന് എന്റെ അസ്ഥികൾ എല്ലാം പറയും.

     ¹¹ കള്ളസാക്ഷികൾ എഴുന്നേറ്റ്

     ഞാൻ അറിയാത്ത കാര്യം എന്നോട് ചോദിക്കുന്നു.

     ¹² അവർ എനിക്കു നന്മയ്ക്കു പകരം തിന്മ ചെയ്ത്,

     എന്റെ പ്രാണന് അനാഥത്വം വരുത്തുന്നു.

     ¹³ ഞാനോ, അവർ ദീനമായി കിടന്നപ്പോൾ ചണവസ്ത്രം ധരിച്ചു;

     ഉപവാസം കൊണ്ട് ഞാൻ എളിമപ്പെട്ടു.

     എന്റെ പ്രാർത്ഥന വീണ്ടും എന്റെ ഹൃദയത്തിലേക്ക് മടങ്ങിവന്നു.

     ¹⁴ ഒരു സ്നേഹിതനോ സഹോദരനോ എന്നപോലെ ഞാൻ അവനോട് പെരുമാറി;

     അമ്മയെക്കുറിച്ച് വിലപിക്കുന്നവനെപ്പോലെ ഞാൻ ദുഃഖിച്ച് കുനിഞ്ഞുനടന്നു.

     ¹⁵ അവരോ എന്റെ കഷ്ടതയിൽ സന്തോഷിച്ച് കൂട്ടം കൂടി;

     ഞാൻ അറിയാത്ത അക്രമികൾ എനിക്ക് വിരോധമായി കൂടിവന്നു,

     അവർ ഇടവിടാതെ എന്നെ പഴിച്ചുപറഞ്ഞു.

     ¹⁶ വിരുന്നു വീട്ടിലെ പരിഹാസികളായ വഷളന്മാരെപ്പോലെ

     അവർ എന്റെ നേരെ പല്ലു കടിക്കുന്നു.

     ¹⁷ കർത്താവേ, നീ എത്രത്തോളം നോക്കിക്കൊണ്ടിരിക്കും?

     അവരുടെ നാശകരമായ പ്രവൃത്തിയിൽനിന്ന് എന്റെ പ്രാണനെയും

     ബാലസിംഹങ്ങളിൽ നിന്ന് എന്റെ ജിവനെയും വിടുവിക്കണമേ.

     ¹⁸ ഞാൻ മഹാസഭയിൽ നിനക്ക് സ്തോത്രം ചെയ്യും;

     ബഹുജനത്തിന്റെ നദുവിൽ നിന്നെ സ്തുതിക്കും.

     ¹⁹ വെറുതെ എനിക്ക് ശത്രുക്കളായവർ എന്നെക്കുറിച്ച് സന്തോഷിക്കരുതേ;

     കാരണംകൂടാതെ എന്നെ പകയ്ക്കുന്നവർ പരിഹാസത്തോടെ കണ്ണിമയ്ക്കുകയും അരുതേ.

     ²⁰ അവർ സമാധാനവാക്കുകൾ സംസാരിക്കാതെ

     ദേശത്തിലെ സാധുക്കളുടെ നേരെ വ്യാജകാര്യങ്ങളെ നിരൂപിക്കുന്നു.

     ²¹ അവർ എന്റെ നേരെ വായ് പിളർന്നു: “ “നന്നായി, ഞങ്ങൾ സ്വന്തകണ്ണാൽ കണ്ടു” എന്ന് പറഞ്ഞു.

     ²² യഹോവേ, നീ കണ്ടുവല്ലോ; മൗനമായിരിക്കരുതേ;

     കർത്താവേ, എന്നോട് അകന്നിരിക്കരുതേ,

     ²³ എന്റെ ദൈവവും എന്റെ കർത്താവുമായുള്ള യഹോവേ,

     ഉണർന്ന് എന്റെ ന്യായത്തിനും വ്യവഹാരത്തിനും വേണ്ടി ജാഗരിക്കണമേ.

     ²⁴ എന്റെ ദൈവമായ യഹോവേ, നിന്റെ നീതി നിമിത്തം എനിക്ക് ന്യായം പാലിച്ചു തരണമേ;

     അവർ എന്നെക്കുറിച്ച് സന്തോഷിക്കരുതേ.

     ²⁵ അവർ അവരുടെ ഹൃദയത്തിൽ: “നന്നായി, ഞങ്ങളുടെ ആഗ്രഹം സാധിച്ചു” എന്ന് പറയരുതേ;

     “ഞങ്ങൾ അവനെ വിഴുങ്ങിക്കളഞ്ഞു” എന്നും പറയരുതേ.

     ²⁶ എന്റെ അനർത്ഥത്തിൽ സന്തോഷിക്കുന്നവർ എല്ലാം ലജ്ജിച്ചു ഭ്രമിച്ചുപോകട്ടെ;

     എന്റെ നേരെ വമ്പുപറയുന്നവർ ലജ്ജയും അപമാനവും ധരിക്കട്ടെ.

     ²⁷ എന്റെ നീതിയിൽ പ്രസാദിക്കുന്നവർ ഘോഷിച്ചാനന്ദിക്കട്ടെ;

     “തന്റെ ദാസന്റെ ശ്രേയസ്സിൽ പ്രസാദിക്കുന്ന യഹോവ മഹത്വമുള്ളവൻ”

     എന്നിങ്ങനെ അവർ എപ്പോഴും പറയട്ടെ.

     ²⁸ എന്റെ നാവ് നിന്റെ നീതിയെയും ദിവസം മുഴുവൻ

     നിന്റെ സ്തുതിയെയും വർണ്ണിക്കും.

സങ്കീർത്തനം.35 36

     ¹ ദുഷ്ടന്റെ ഹൃദയത്തിൽ പാപ ഉദ്ദേശ്യമുണ്ട്;

     അവന്റെ ദൃഷ്ടിയിൽ ദൈവഭയമില്ല.

     ² “എന്റെ കുറ്റം തെളിയുകയും വെറുക്കപ്പെടുകയും ചെയ്യുകയില്ല”

     എന്നിങ്ങനെ അവൻ തന്നോടു തന്നെ മധുരവാക്ക് പറയുന്നു.

     ³ അവന്റെ വായിലെ വാക്കുകളിൽ വേണ്ടാതനവും വഞ്ചനയും ഉണ്ട്;

     ജ്ഞാനിയായിരിക്കുന്നതും നന്മചെയ്യുന്നതും അവൻ വിട്ടുകളഞ്ഞിരിക്കുന്നു.

     ⁴ അവൻ തന്റെ കിടക്കമേൽ അകൃത്യം ചിന്തിക്കുന്നു;

     തിന്മയുടെ വഴിയിൽ അവൻ നില്ക്കുന്നു;

     ദോഷം വെറുക്കുന്നതുമില്ല.

     ⁵ യഹോവേ, നിന്റെ ദയ ആകാശത്തോളവും

     നിന്റെ വിശ്വസ്തത മേഘങ്ങളോളവും എത്തുന്നു.

     ⁶ നിന്റെ നീതി മഹാപർവ്വതങ്ങളെപ്പോലെയും

     നിന്റെ ന്യായവിധികൾ ആഴികളെപ്പോലെയും ആകുന്നു;

     യഹോവേ, നീ മനുഷ്യരെയും മൃഗങ്ങളെയും രക്ഷിക്കുന്നു.

     ⁷ ദൈവമേ, നിന്റെ ദയ എത്ര വിലയേറിയത്!

     മനുഷ്യപുത്രന്മാർ നിന്റെ ചിറകിൻ നിഴലിൽ ശരണം പ്രാപിക്കുന്നു.

     ⁸ നിന്റെ ആലയത്തിലെ സമൃദ്ധി അനുഭവിച്ച് അവർ തൃപ്തി പ്രാപിക്കുന്നു;

     നിന്റെ ആനന്ദനദി നീ അവരെ കുടിപ്പിക്കുന്നു.

     ⁹ നിന്റെ പക്കൽ ജീവന്റെ ഉറവുണ്ടല്ലോ;

     നിന്റെ പ്രകാശത്തിൽ ഞങ്ങൾ പ്രകാശം കാണുന്നു.

     ¹⁰ നിന്നെ അറിയുന്നവർക്ക് നിന്റെ ദയയും

     പരമാർത്ഥഹൃദയമുള്ളവർക്ക് നിന്റെ നീതിയും നിലനിർത്തേണമേ.

     ¹¹ നിഗളികളുടെ കാല് എന്റെ നേരെ വരരുതേ;

     ദുഷ്ടന്മാരുടെ കൈ എന്നെ ഓടിച്ചുകളയരുതേ.

     ¹² ദുഷ്പ്രവൃത്തിക്കാർ അവിടെത്തന്നെ വീഴുന്നു:

     അവർ മറിഞ്ഞു വീഴുന്നു; എഴുന്നേല്ക്കുവാൻ കഴിയുന്നതുമില്ല.

സങ്കീർത്തനം.36 37

     ¹ ദുഷ്പ്രവൃത്തിക്കാർ നിമിത്തം നീ ദുഃഖിക്കരുത്;

     നീതികേട് പ്രവർത്തിക്കുന്നവരോട് അസൂയപ്പെടുകയുമരുത്.

     ² അവർ പുല്ലു പോലെ വേഗത്തിൽ ഉണങ്ങി

     പച്ചച്ചെടിപോലെ വാടിപ്പോകുന്നു.

     ³ യഹോവയിൽ ആശ്രയിച്ച് നന്മചെയ്യുക;

     ദേശത്ത് വസിച്ച് അവന്റെ വിശ്വസ്തത പാലിക്കുക.

     യഹോവയിൽ തന്നെ രസിച്ചുകൊള്ളുക;

     ⁴ അവൻ നിന്റെ ഹൃദയത്തിലെ ആഗ്രഹങ്ങൾ നിനക്ക് തരും.

     ⁵ നിന്റെ വഴി യഹോവയെ ഭരമേല്പിക്കുക;

     അവനിൽ തന്നെ ആശ്രയിക്കുക; അവൻ അത് നിവർത്തിക്കും.

     ⁶ അവൻ നിന്റെ നീതിയെ പ്രഭാതം പോലെയും

     നിന്റെ ന്യായത്തെ മദ്ധ്യാഹ്നംപോലെയും പ്രകാശിപ്പിക്കും.

     ⁷ യഹോവയുടെ മുമ്പാകെ ക്ഷമയോടെയിരുന്ന് അവനായി പ്രത്യാശിക്കുക; സ്വന്ത വഴിയിൽ അഭിവൃദ്ധിപ്പെടുന്നവനെക്കുറിച്ചും

     ദുരുപായം പ്രയോഗിക്കുന്നവനെക്കുറിച്ചും നീ മുഷിയരുത്.

     ⁸ കോപം കളഞ്ഞ് ക്രോധം ഉപേക്ഷിക്കുക;

     മുഷിഞ്ഞുപോകരുത്; അത് ദോഷത്തിന് കാരണമായിത്തീരും.

     ⁹ ദുഷ്പ്രവൃത്തിക്കാർ ഛേദിക്കപ്പെടും;

     യഹോവയിൽ പ്രത്യാശിക്കുന്നവരോ ഭൂമിയെ കൈവശമാക്കും.

     ¹⁰ അല്പം കഴിഞ്ഞാൽ ദുഷ്ടൻ ഉണ്ടാകുകയില്ല;

     നീ അവന്റെ ഇടം സൂക്ഷിച്ചുനോക്കും; അവനെ കാണുകയില്ല.

     ¹¹ എന്നാൽ സൗമ്യതയുള്ളവർ ഭൂമിയെ അവകാശമാക്കും;

     സമാധാനസമൃദ്ധിയിൽ അവർ ആനന്ദിക്കും.

     ¹² ദുഷ്ടൻ നീതിമാന് ദോഷം നിരൂപിക്കുന്നു;

     അവന്റെ നേരെ അവൻ പല്ല് കടിക്കുന്നു.

     ¹³ കർത്താവ് അവനെ നോക്കി ചിരിക്കും;

     അവന്റെ ദിവസം വരുന്നു എന്നു അവൻ കാണുന്നു.

     ¹⁴ എളിയവനെയും ദരിദ്രനെയും വീഴിക്കുവാനും സന്മാർഗ്ഗികളെ കൊല്ലുവാനും

     ദുഷ്ടന്മാർ വാളൂരി, വില്ല് കുലച്ചിരിക്കുന്നു.

     ¹⁵ അവരുടെ വാൾ അവരുടെ ഹൃദയത്തിൽ തന്നെ കടക്കും;

     അവരുടെ വില്ലുകൾ ഒടിഞ്ഞുപോകും.

     ¹⁶ അനേകം ദുഷ്ടന്മാർക്കുള്ള സമൃദ്ധിയെക്കാൾ നീതിമാനുള്ള അല്പം ഏറ്റവും നല്ലത്.

     ¹⁷ ദുഷ്ടന്മാരുടെ ഭുജങ്ങൾ ഒടിഞ്ഞുപോകും;

     എന്നാൽ നീതിമാന്മാരെ യഹോവ താങ്ങും.

     ¹⁸ യഹോവ നിഷ്കളങ്കരായവരുടെ നാളുകൾ അറിയുന്നു;

     അവരുടെ അവകാശം ശാശ്വതമായിരിക്കും.

     ¹⁹ ദുഷ്ക്കാലത്ത് അവർ ലജ്ജിച്ചു പോകുകയില്ല;

     ക്ഷാമകാലത്ത് അവർ തൃപ്തരായിരിക്കും.

     ²⁰ എന്നാൽ ദുഷ്ടന്മാർ നശിച്ചുപോകും;

     യഹോവയുടെ ശത്രുക്കൾ പുല്പുറത്തിന്റെ ഭംഗിപോലെയത്രെ;

     അവർ ക്ഷയിച്ചുപോകും; പുകപോലെ ക്ഷയിച്ചുപോകും.

     ²¹ ദുഷ്ടൻ വായ്പ വാങ്ങിയിട്ട്, തിരികെ കൊടുക്കുന്നില്ല;

     നീതിമാനോ ദയതോന്നി ദാനം ചെയ്യുന്നു.

     ²² യഹോവയാൽ അനുഗ്രഹിക്കപ്പെട്ടവർ ഭൂമിയെ കൈവശമാക്കും.

     അവനാൽ ശപിക്കപ്പെട്ടവരോ ഛേദിക്കപ്പെടും.

     ²³ ഒരു മനുഷ്യന്റെ വഴിയിൽ പ്രസാദം തോന്നിയാൽ

     യഹോവ അവന്റെ ഗമനം സ്ഥിരമാക്കുന്നു.

     ²⁴ അവൻ വീണാലും നിലംപരിചാകുകയില്ല;

     യഹോവ അവനെ കൈ പിടിച്ച് താങ്ങുന്നു.

     ²⁵ ഞാൻ ബാലനായിരുന്നു,ഇപ്പോൾ വൃദ്ധനായിരിക്കുന്നു;

     നീതിമാൻ തുണയില്ലാതിരിക്കുന്നതും

     അവന്റെ സന്തതി ആഹാരം ഇരക്കുന്നതും ഞാൻ കണ്ടിട്ടില്ല.

     ²⁶ അവൻ നിത്യവും ദയ തോന്നി വായ്പ കൊടുക്കുന്നു;

     അവന്റെ സന്തതി അനുഗ്രഹിക്കപ്പെടുന്നു.

     ²⁷ ദോഷം വിട്ടൊഴിഞ്ഞ് ഗുണം ചെയ്യുക;

     എന്നാൽ നീ സദാകാലം സുഖമായി ജീവിച്ചിരിക്കും.

     ²⁸ യഹോവ ന്യായപ്രിയനാകുന്നു; തന്റെ വിശുദ്ധന്മാരെ ഉപേക്ഷിക്കുന്നതുമില്ല;

     അവർ എന്നേക്കും പരിപാലിക്കപ്പെടുന്നു;

     ദുഷ്ടന്മാരുടെ സന്തതിയോ ഛേദിക്കപ്പെടും.

     ²⁹ നീതിമാന്മാർ ഭൂമിയെ അവകാശമാക്കി എന്നേക്കും അതിൽ വസിക്കും;

     ³⁰ നീതിമാന്റെ വായ് ജ്ഞാനം പ്രസ്താവിക്കുന്നു;

     അവന്റെ നാവ് ന്യായം സംസാരിക്കുന്നു.

     ³¹ തന്റെ ദൈവത്തിന്റെ ന്യായപ്രമാണം അവന്റെ ഹൃദയത്തിൽ ഉണ്ട്;

     അവന്റെ കാലടികൾ വഴുതുകയില്ല.

     ³² ദുഷ്ടൻ നീതിമാനെ കൊല്ലുവാനായി പതിയിരിക്കുന്നു,

     ³³ യഹോവ അവനെ അവന്റെ കയ്യിൽ വിട്ടുകൊടുക്കുകയില്ല;

     ന്യായവിസ്താരത്തിൽ അവനെ കുറ്റം വിധിക്കുകയുമില്ല.

     ³⁴ യഹോവയ്ക്കായി പ്രത്യാശിച്ച് അവന്റെ വഴി പ്രമാണിച്ച് നടക്കുക;

     എന്നാൽ ഭൂമിയെ അവകാശമാക്കുവാൻ അവൻ നിന്നെ ഉയർത്തും;

     ദുഷ്ടന്മാർ ഛേദിക്കപ്പെടുന്നത് നീ കാണും.

     ³⁵ ദുഷ്ടൻ പ്രബലനായിരിക്കുന്നതും;

     സ്വദേശത്തുള്ള പച്ചവൃക്ഷം പോലെ തഴച്ചുവളരുന്നതും ഞാൻ കണ്ടിട്ടുണ്ട്.

     ³⁶ ഞാൻ പിന്നെ അതിലെ പോയപ്പോൾ അവൻ ഇല്ല;

     ഞാൻ അന്വേഷിച്ചു, അവനെ കണ്ടതുമില്ല.

     ³⁷ നിഷ്കളങ്കനെ ശ്രദ്ധിക്കുക; നേരുള്ളവനെ നോക്കിക്കൊള്ളുക;

     സമാധാനപുരുഷന് സന്തതി ഉണ്ടാകും.

     ³⁸ എന്നാൽ അതിക്രമക്കാർ പൂർണ്ണമായി മുടിഞ്ഞുപോകും;

     അവരുടെ പിൻഗാമികൾ നശിപ്പിക്കപ്പെടും.

     ³⁹ നീതിമാന്മാരുടെ രക്ഷ യഹോവയിൽ നിന്ന് വരുന്നു;

     കഷ്ടകാലത്ത് അവൻ അവരുടെ ദുർഗ്ഗം ആകുന്നു.

     ⁴⁰ യഹോവ അവരെ സഹായിച്ച് വിടുവിക്കുന്നു;

     അവർ അവനിൽ ആശ്രയിക്കയാൽ

     അവൻ അവരെ ദുഷ്ടന്മാരുടെ കയ്യിൽനിന്ന് വിടുവിച്ച് രക്ഷിക്കുന്നു.

സങ്കീർത്തനം.37 38

     ¹ യഹോവേ, കോപത്തോടെ എന്നെ ശാസിക്കരുതേ.

     ക്രോധത്തോടെ എന്നെ ശിക്ഷിക്കുകയും അരുതേ.

     ² നിന്റെ അസ്ത്രങ്ങൾ എന്റെ ഉള്ളിലേക്ക് തറച്ചുകയറിയിരിക്കുന്നു;

     നിന്റെ കൈ എന്റെമേൽ ഭാരമായിരിക്കുന്നു.

     ³ നിന്റെ നീരസം മൂലം എന്റെ ദേഹത്തിന് സൗഖ്യമില്ല;

     എന്റെ പാപം നിമിത്തം എന്റെ അസ്ഥികളിൽ സ്വസ്ഥതയുമില്ല.

     ⁴ എന്റെ അകൃത്യങ്ങൾ എന്റെ തലയ്ക്കുമീതെ കവിഞ്ഞിരിക്കുന്നു;

     ഭാരമുള്ള ചുമടുപോലെ അവ എനിക്ക് അതിഘനമായിരിക്കുന്നു.

     ⁵ എന്റെ ഭോഷത്തം ഹേതുവായി എന്റെ വ്രണങ്ങൾ ചീഞ്ഞ് നാറുന്നു.

     ⁶ ഞാൻ കുനിഞ്ഞ് നിലത്തോളം താണിരിക്കുന്നു;

     ഞാൻ ഇടവിടാതെ ദുഃഖിച്ച് നടക്കുന്നു.

     ⁷ എന്റെ അരയിൽ വരൾച്ച നിറഞ്ഞിരിക്കുന്നു;

     എന്റെ ദേഹത്തിന് സൗഖ്യമില്ല.

     ⁸ ഞാൻ ക്ഷീണത്താൽ അത്യന്തം തകർന്നിരിക്കുന്നു;

     എന്റെ ഹൃദയത്തിലെ അസ്വസ്ഥത നിമിത്തം ഞാൻ ഞരങ്ങുന്നു.

     ⁹ കർത്താവേ, എന്റെ ആഗ്രഹം എല്ലാം നിന്റെ മുമ്പിൽ ഇരിക്കുന്നു.

     എന്റെ ഞരക്കം നിനക്ക് മറഞ്ഞിരിക്കുന്നതുമില്ല.

     ¹⁰ എന്റെ നെഞ്ചിടിക്കുന്നു; ഞാൻ ശക്തിഹീനനായിരിക്കുന്നു;

     എന്റെ കണ്ണിന്റെ വെളിച്ചവും ഇല്ലാതെയായി.

     ¹¹ എന്റെ സ്നേഹിതന്മാരും സഖാക്കളും എന്റെ ബാധ കണ്ട് അകന്ന് നില്ക്കുന്നു;

     എന്റെ അടുത്ത ബന്ധുക്കളും അകന്ന് നില്ക്കുന്നു.

     ¹² എനിക്ക് പ്രാണഹാനി വരുത്തുവാൻ നോക്കുന്നവർ കെണി വയ്ക്കുന്നു;

     എന്റെ അനർത്ഥം കാംക്ഷിക്കുന്നവർ അനാവശ്യമായി സംസാരിക്കുന്നു;

     അവർ ഇടവിടാതെ ചതിവ് ചിന്തിക്കുന്നു.

     ¹³ എങ്കിലും ഞാൻ ചെകിടനെപ്പോലെ കേൾക്കാതെ ഇരുന്നു;

     വായ് തുറക്കാതെ ഊമനെപ്പോലെ ആയിരുന്നു.

     ¹⁴ ഞാൻ, കേൾക്കാത്ത മനുഷ്യനെപ്പോലെയും

     വായിൽ ശകാരം ഇല്ലാത്തവനെപ്പോലെയും ആയിരുന്നു.

     ¹⁵ യഹോവേ, നിന്നിൽ ഞാൻ പ്രത്യാശ വച്ചിരിക്കുന്നു;

     എന്റെ ദൈവമായ കർത്താവേ, നീ ഉത്തരം അരുളും.

     ¹⁶ “അവർ എന്നെക്കുറിച്ച് സന്തോഷിക്കരുതേ” എന്ന് ഞാൻ പറഞ്ഞു;

     എന്റെ കാൽ വഴുതുമ്പോൾ അവർ എന്റെ നേരെ വമ്പ് പറയുമല്ലോ.

     ¹⁷ ഞാൻ കാൽ ഇടറി വീഴുവാൻ തുടങ്ങുന്നു;

     എന്റെ ദുഃഖം എപ്പോഴും എന്റെ മുമ്പിൽ ഇരിക്കുന്നു.

     ¹⁸ ഞാൻ എന്റെ അകൃത്യം ഏറ്റുപറയുന്നു;

     എന്റെ പാപത്തെക്കുറിച്ച് ദുഃഖിക്കുന്നു.

     ¹⁹ എന്റെ ശത്രുക്കൾ വീറും ബലവുമുള്ളവർ,

     എന്നെ വെറുതെ ദ്വേഷിയ്ക്കുന്നവർ പെരുകിയിരിക്കുന്നു.

     ²⁰ ഞാൻ നന്മ പിന്തുടരുകയാൽ അവർ എനിക്ക് വിരോധികളായി

     നന്മയ്ക്കു പകരം തിന്മ ചെയ്യുന്നു.

     ²¹ യഹോവേ, എന്നെ കൈ വിടരുതേ;

     എന്റെ ദൈവമേ, എന്നോട് അകന്നിരിക്കരുതേ.

     ²² എന്റെ രക്ഷയാകുന്ന കർത്താവേ,

     എന്റെ സഹായത്തിനായി വേഗം വരണമേ.

സങ്കീർത്തനം.38 39

     ¹ നാവ് കൊണ്ട് പാപം ചെയ്യാതിരിക്കുവാൻ

     ഞാൻ എന്റെ വഴികളെ സൂക്ഷിക്കുമെന്നും, ദുഷ്ടൻ എന്റെ മുമ്പിൽ ഇരിക്കുമ്പോൾ

     എന്റെ അധരം കടിഞ്ഞാണിട്ട് അടക്കിവയ്ക്കും എന്നും ഞാൻ പറഞ്ഞു.

     ² ഞാൻ സംസാരിക്കാതെ ഊമനായിരുന്നു;

     നന്മയായ കാര്യങ്ങൾ പോലും ഉച്ചരിയ്ക്കാതെ മൗനമായിരുന്നു; എന്റെ ഉള്ളിൽ സങ്കടം പൊങ്ങിവന്നു.

     ³ എന്റെ ഹൃദയത്തിന് ചൂട് പിടിച്ചു, എന്റെ ധ്യാനത്തിൽ തീ കത്തി;

     അപ്പോൾ ഞാൻ നാവെടുത്ത് സംസാരിച്ചു.

     ⁴ യഹോവേ, എന്റെ അവസാനത്തെക്കുറിച്ചും, എന്റെ ആയുസ്സ് എത്ര എന്നതും എന്നെ അറിയിക്കണമേ;

     ഞാൻ എത്ര ക്ഷണികൻ എന്ന് ഞാൻ അറിയട്ടെ.

     ⁵ ഇതാ, നീ എന്റെ നാളുകൾ നാലുവിരൽ നീളമാക്കിയിരിക്കുന്നു;

     എന്റെ ആയുസ്സ് നിന്റെ മുമ്പാകെ ഏതുമില്ല;

     ഏതു മനുഷ്യനും ഉറച്ച് നിൽക്കുമ്പോഴും ഒരു ശ്വാസം മാത്രമാകുന്നു. സേലാ.

     ⁶ നിശ്ചയമായും മനുഷ്യരെല്ലാം വെറും നിഴൽ പോലെ നടക്കുന്നു;

     അവർ വ്യർത്ഥമായി പരിശ്രമിക്കുന്നു;

     അവർ ധനം സമ്പാദിക്കുന്നു; ആര് അനുഭവിക്കും എന്നറിയുന്നില്ല.

     ⁷ എന്നാൽ കർത്താവേ, ഞാൻ എന്തിനായി കാത്തിരിക്കുന്നു?

     എന്റെ പ്രത്യാശ നിന്നിൽ വച്ചിരിക്കുന്നു.

     ⁸ എന്റെ സകല പാപങ്ങളിൽ നിന്നും എന്നെ രക്ഷിക്കണമേ;

     എന്നെ ഭോഷന് നിന്ദയാക്കി വയ്ക്കരുതേ.

     ⁹ ഞാൻ വായ് തുറക്കാതെ മൗനമായിരുന്നു;

     നീയല്ലോ അങ്ങനെ വരുത്തിയത്.

     ¹⁰ നിന്റെ ബാധ എന്നിൽനിന്ന് നീക്കണമേ;

     നിന്റെ അടിയേറ്റ് ഞാൻ ക്ഷയിച്ചിരിക്കുന്നു.

     ¹¹ പാപം ചെയ്യുന്ന മനുഷ്യനെ നീ ദണ്ഡനത്താൽ ശിക്ഷിക്കുമ്പോൾ

     നീ അവന്റെ സൗന്ദര്യത്തെ പുഴുപോലെ ക്ഷയിപ്പിക്കുന്നു;

     ഏതു മനുഷ്യനും ഒരു ശ്വാസം മാത്രം ആകുന്നു. സേലാ.

     ¹² യഹോവേ, എന്റെ പ്രാർത്ഥന കേട്ട് എന്റെ അപേക്ഷ ചെവിക്കൊള്ളണമേ.

     എന്റെ കണ്ണുനീർ കണ്ട് മിണ്ടാതിരിക്കരുതേ;

     ഞാൻ എന്റെ സകല പിതാക്കന്മാരെയും പോലെ

     നിന്റെ സന്നിധിയിൽ അന്യനും പരദേശിയും ആകുന്നുവല്ലോ.

     ¹³ ഞാൻ ഇവിടെനിന്ന് പോയി ഇല്ലാതെയാകുന്നതിന് മുമ്പ്

     ഉന്മേഷം പ്രാപിക്കേണ്ടതിന് നിന്റെ നോട്ടം എന്നിൽനിന്ന് മാറ്റണമേ.

സങ്കീർത്തനം.39 40

     ¹ ഞാൻ യഹോവയ്ക്കായി ക്ഷമയോടെ കാത്തിരുന്നു;

     അവൻ എന്നിലേക്ക് ചാഞ്ഞ് എന്റെ നിലവിളി കേട്ടു.

     ² നാശകരമായ കുഴിയിൽ നിന്നും കുഴഞ്ഞ ചേറ്റിൽനിന്നും അവൻ എന്നെ കയറ്റി;

     എന്റെ കാലുകളെ ഒരു പാറമേൽ നിർത്തി, എന്റെ ചുവടുകളെ സ്ഥിരമാക്കി.

     ³ അവൻ എന്റെ വായിൽ ഒരു പുതിയ പാട്ട് തന്നു,

     നമ്മുടെ ദൈവത്തിന് സ്തുതി തന്നെ;

     പലരും അത് കണ്ട് ഭയപ്പെട്ട് യഹോവയിൽ ആശ്രയിക്കും.

     ⁴ യഹോവയെ തന്റെ ആശ്രയമാക്കുകയും

     നിഗളികളെയും വ്യാജത്തിലേക്ക് തിരിയുന്നവരെയും ആദരിക്കാതിരിക്കുകയും ചെയ്യുന്ന മനുഷ്യൻ ഭാഗ്യവാൻ.

     ⁵ എന്റെ ദൈവമായ യഹോവേ, നീ ചെയ്ത അത്ഭുതപ്രവൃത്തികളും

     ഞങ്ങൾക്കു വേണ്ടിയുള്ള നിന്റെ വിചാരങ്ങളും അനവധി ആകുന്നു;

     നിനക്ക് തുല്യൻ ആരുമില്ല;

     ഞാൻ അവയെപ്പറ്റി വിവരിച്ച് പ്രസ്താവിക്കുമായിരുന്നു; എന്നാൽ അവ എണ്ണിക്കൂടാത്തവിധം അധികമാകുന്നു.

     ⁶ ഹനനയാഗവും ഭോജനയാഗവും നീ ഇച്ഛിച്ചില്ല;

     നീ എന്റെ ചെവികൾ തുറന്നിരിക്കുന്നു.

     ഹോമയാഗവും പാപയാഗവും നീ ചോദിച്ചില്ല.

     ⁷ അപ്പോൾ ഞാൻ പറഞ്ഞു:“ ഇതാ, ഞാൻ വരുന്നു;

     പുസ്തകച്ചുരുളിൽ എന്നെക്കുറിച്ച് എഴുതിയിരിക്കുന്നു;

     ⁸ എന്റെ ദൈവമേ, നിന്റെ ഇഷ്ടം ചെയ്യുവാൻ ഞാൻ പ്രിയപ്പെടുന്നു;

     നിന്റെ ന്യായപ്രമാണം എന്റെ ഉള്ളിൽ ഇരിക്കുന്നു.”

     ⁹ ഞാൻ മഹാസഭയിൽ നീതിയുടെ സുവാർത്ത പ്രസംഗിച്ചു;

     അധരങ്ങൾ ഞാൻ അടക്കിവച്ചില്ല;

     യഹോവേ, നീ അറിയുന്നു.

     ¹⁰ ഞാൻ നിന്റെ നീതി എന്റെ ഹൃദയത്തിൽ മറച്ചു വച്ചില്ല;

     നിന്റെ വിശ്വസ്തതയും രക്ഷയും ഞാൻ പ്രസ്താവിച്ചു;

     നിന്റെ ദയയും സത്യവും ഞാൻ മഹാസഭയിൽ മറച്ചുവച്ചതുമില്ല.

     ¹¹ യഹോവേ, നിന്റെ കരുണ നീ എനിക്കു അടച്ചുകളയുകയില്ല;

     നിന്റെ ദയയും സത്യവും എന്നെ നിത്യം പരിപാലിക്കും.

     ¹² അസംഖ്യം അനർത്ഥങ്ങൾ എന്നെ ചുറ്റിയിരിക്കുന്നു; മേല്പോട്ടു

     നോക്കുവാൻ കഴിയാത്തവിധം എന്റെ അകൃത്യങ്ങൾ എന്നെ എത്തിപ്പിടിച്ചിരിക്കുന്നു;

     അവ എന്റെ തലയിലെ രോമങ്ങളിലും അധികം;

     ഞാൻ ധൈര്യഹീനനായിത്തീർന്നിരിക്കുന്നു.

     ¹³ യഹോവേ, എന്നെ വിടുവിക്കുവാൻ ഇഷ്ടം തോന്നണമേ;

     യഹോവേ, എന്നെ സഹായിക്കുവാൻ വേഗം വരണമേ.

     ¹⁴ എനിക്ക് ജീവഹാനി വരുത്തുവാൻ നോക്കുന്നവർ ലജ്ജിച്ച് ഭ്രമിച്ചുപോകട്ടെ;

     എന്റെ അനർത്ഥത്തിൽ സന്തോഷിക്കുന്നവർ പിന്തിരിഞ്ഞ് അപമാനം ഏല്ക്കട്ടെ.

     ¹⁵ “നന്നായി, നന്നായി” എന്ന് എന്നോട് പറയുന്നവർ

     അവരുടെ ലജ്ജ നിമിത്തം സ്തംഭിച്ചുപോകട്ടെ.

     ¹⁶ നിന്നെ അന്വേഷിക്കുന്ന എല്ലാവരും നിന്നിൽ ആനന്ദിച്ച് സന്തോഷിക്കട്ടെ;

     നിന്റെ രക്ഷയിൽ പ്രിയപ്പെടുന്നവർ “യഹോവ എത്ര മഹത്വമുള്ളവൻ” എന്ന് എപ്പോഴും പറയട്ടെ.

     ¹⁷ ഞാൻ എളിയവനും ദരിദ്രനും ആകുന്നു;

     എങ്കിലും കർത്താവ് എന്നെക്കുറിച്ച് വിചാരിക്കുന്നു;

     നീ തന്നെ എന്റെ സഹായവും എന്നെ വിടുവിക്കുന്നവനും ആകുന്നു;

     എന്റെ ദൈവമേ, താമസിക്കരുതേ.

സങ്കീർത്തനം.40 41

     ¹ എളിയവനെ ആദരിക്കുന്നവൻ ഭാഗ്യവാൻ;

     അനർത്ഥദിവസത്തിൽ യഹോവ അവനെ വിടുവിക്കും.

     ² യഹോവ അവനെ സംരക്ഷിച്ച് ജീവനോടെ പരിപാലിക്കും;

     അവൻ ഭൂമിയിൽ അനുഗൃഹീതനായിരിക്കും;

     അവന്റെ ശത്രുക്കളുടെ ഇഷ്ടത്തിന് നീ അവനെ ഏല്പിച്ചുകൊടുക്കുകയില്ല.

     ³ യഹോവ അവനെ രോഗശയ്യയിൽ സഹായിക്കും;

     രോഗം മാറ്റി നീ അവനെ കിടക്കയിൽനിന്ന് എഴുന്നേല്പിക്കും.

     ⁴ “യഹോവേ, എന്നോട് കൃപ തോന്നി എന്നെ സൗഖ്യമാക്കണമേ;

     നിന്നോട് ഞാൻ പാപം ചെയ്തിരിക്കുന്നു” എന്ന് ഞാൻ പറഞ്ഞു.

     ⁵ “അവൻ എപ്പോൾ മരിച്ച് അവന്റെ പേര് നശിക്കും?” എന്ന് എന്റെ ശത്രുക്കൾ എന്നെക്കുറിച്ച് ദോഷം പറയുന്നു.

     ⁶ ഒരുത്തൻ എന്നെ കാണുവാൻ വരുമ്പോൾ കപടവാക്കുകൾ പറയുന്നു;

     അവൻ ഹൃദയത്തിൽ നീതികേട് ചിന്തിക്കുകയും

     പുറത്തുപോയി അത് പ്രസ്താവിക്കുകയും ചെയ്യുന്നു.

     ⁷ എന്നെ പകയ്ക്കുന്നവർ എനിക്ക് വിരോധമായി തമ്മിൽ മന്ത്രിക്കുന്നു;

     അവർ എനിക്കെതിരെ ദോഷം ചിന്തിക്കുന്നു.

     ⁸ “ഒരു ദുർവ്യാധി അവനെ പിടിച്ചിരിക്കുന്നു; അവൻ കിടപ്പിലായി;

     ഇനി എഴുന്നേല്ക്കുകയില്ല” എന്ന് അവർ പറയുന്നു.

     ⁹ ഞാൻ വിശ്വസിച്ചവനും എന്റെ ഭക്ഷണം പങ്കുവച്ചവനുമായ

     എന്റെ പ്രാണസ്നേഹിതൻ പോലും എന്റെ നേരെ കുതികാൽ ഉയർത്തിയിരിക്കുന്നു.

     ¹⁰ ഞാൻ അവരോട് പകരം ചെയ്യേണ്ടതിന്

     യഹോവേ, കൃപ തോന്നി എന്നെ എഴുന്നേല്പിക്കണമേ.

     ¹¹ എന്റെ ശത്രു എന്നെക്കുറിച്ച് ജയഘോഷം കൊള്ളാതിരിക്കുന്നതിനാൽ

     നിനക്ക് എന്നോട് പ്രസാദമുണ്ടെന്ന് ഞാൻ അറിയുന്നു.

     ¹² നീ എന്റെ നിഷ്കളങ്കത്വം നിമിത്തം എന്നെ താങ്ങുന്നു,

     നിന്റെ മുമ്പിൽ എന്നേക്കും എന്നെ നിർത്തുന്നു.

     ¹³ യിസ്രായേലിന്റെ ദൈവമായ യഹോവ

     എന്നും എന്നേക്കും വാഴ്ത്തപ്പെടുമാറാകട്ടെ. ആമേൻ, ആമേൻ.

സങ്കീർത്തനം.41 42

     ¹ മാൻ നീർത്തോടുകളിലേക്ക് ചെല്ലുവാൻ കാംക്ഷിക്കുന്നതുപോലെ

     ദൈവമേ, എന്റെ ആത്മാവ് നിന്നോട് ചേരുവാൻ കാംക്ഷിക്കുന്നു.

     ² എന്റെ ആത്മാവ് ദൈവത്തിനായി, ജീവനുള്ള ദൈവത്തിനായി തന്നെ, ദാഹിക്കുന്നു;

     ഞാൻ എപ്പോൾ ദൈവസന്നിധിയിൽ ചെല്ലുവാനിടയാകും?.

     ³ “നിന്റെ ദൈവം എവിടെ?” എന്ന് അവർ എന്നോട് നിരന്തരം ചോദിക്കുന്നതുകൊണ്ട്

     എന്റെ കണ്ണുനീർ രാവും പകലും എനിക്ക് ആഹാരമായി തീർന്നിരിക്കുന്നു.

     ⁴ ഉത്സവം ആചരിക്കുന്ന ജനസമൂഹത്തോടൊപ്പം സന്തോഷത്തോടും ഉച്ചത്തിൽ ദൈവത്തെ സ്തുതിച്ചും

     ഞാൻ ദൈവാലയത്തിലേക്ക് പോകുന്നത് ഓർക്കുമ്പോൾ

     എന്റെ ഹൃദയം തരളിതമാകുന്നു.

     ⁵ എന്റെ ആത്മാവേ, നീ വിഷാദിച്ച് ഞരങ്ങുന്നതെന്തിന്?

     ദൈവത്തിൽ പ്രത്യാശ വയ്ക്കുക;

     അവൻ എന്റെ മേൽ മുഖം പ്രകാശിപ്പിച്ച് രക്ഷിക്കുന്ന ദൈവവുമാകുന്നു

     എന്ന് ഞാൻ ഇനിയും അവനെ സ്തുതിക്കും.

     ⁶ എന്റെ ദൈവമേ, എന്റെ ആത്മാവ് എന്റെ ഉള്ളിൽ വിഷാദിച്ചിരിക്കുന്നു;

     അതുകൊണ്ട് യോർദ്ദാൻ പ്രദേശത്തും ഹെർമ്മോൻപർവ്വതങ്ങളിലും

     മിസാർമലയിലുംവച്ച് ഞാൻ നിന്നെ ഓർക്കുന്നു;

     ⁷ നിന്റെ വെള്ളച്ചാട്ടങ്ങളുടെ ഇരമ്പലിൽ ആഴി ആഴത്തെ വിളിക്കുന്നു;

     നിന്റെ ഓളങ്ങളും തിരമാലകളുമെല്ലാം എന്റെ മുകളിലൂടെ കടന്നുപോകുന്നു.

     ⁸ യഹോവ പകൽനേരത്ത് തന്റെ ദയ കാണിക്കും;

     രാത്രിസമയത്ത് ഞാൻ അവന് പാട്ട് പാടിക്കൊണ്ടിരിക്കും;

     എന്റെ ജീവന്റെ ദൈവത്തോടുള്ള പ്രാർത്ഥന തന്നെ.

     ⁹ “നീ എന്നെ മറന്നത് എന്തുകൊണ്ട്? ശത്രുവിന്റെ ഉപദ്രവത്താൽ

     ഞാൻ ദുഃഖിച്ച് നടക്കേണ്ടി വന്നത് എന്തുകൊണ്ട്?”

     എന്ന് ഞാൻ എന്റെ പാറയായ ദൈവത്തോട് ചോദിക്കും.

     ¹⁰ “നിന്റെ ദൈവം എവിടെ?” എന്ന് എന്റെ ശത്രുക്കൾ ഇടവിടാതെ എന്നോട് ചോദിച്ചു കൊണ്ട്

     എന്റെ അസ്ഥികൾ തകരും വിധം എന്നെ നിന്ദിക്കുന്നു.

     ¹¹ എന്റെ ആത്മാവേ, നീ വിഷാദിച്ച് ഞരങ്ങുന്നത് എന്തിന്?

     ദൈവത്തിൽ പ്രത്യാശവയ്ക്കുക;

     അവൻ തന്റെ മുഖപ്രകാശത്താൽ എന്നെ രക്ഷിക്കുന്ന ദൈവവുമാകുന്നു

     എന്ന് ഞാൻ ഇനിയും അവനെ സ്തുതിക്കും.

സങ്കീർത്തനം.42 43

     ¹ ദൈവമേ, എനിക്ക് ന്യായം നടത്തി തരണമേ;

     ഭക്തികെട്ട ജനതയോടുള്ള എന്റെ വ്യവഹാരം നടത്തണമേ;

     വഞ്ചനയും അനീതിയുമുള്ള മനുഷ്യരിൽനിന്ന് എന്നെ വിടുവിക്കണമേ.

     ² നീ എന്റെ ശരണമായ ദൈവമാണല്ലോ;

     നീ എന്നെ ഉപേക്ഷിക്കുന്നതെന്ത്?

     ശത്രുവിന്റെ ഉപദ്രവം മൂലം ഞാൻ ദുഃഖിച്ച് നടക്കേണ്ടിവരുന്നത് എന്തുകൊണ്ട്?

     ³ നിന്റെ പ്രകാശവും സത്യവും അയയ്ക്കേണമേ; അവ എന്നെ നടത്തട്ടെ;

     നിന്റെ വിശുദ്ധപർവ്വതത്തിലേക്കും

     തിരുനിവാസത്തിലേക്കും അവ എന്നെ എത്തിക്കട്ടെ.

     ⁴ ഞാൻ ദൈവത്തിന്റെ യാഗപീഠത്തിലേക്ക്,

     എന്റെ പരമാനന്ദമായ ദൈവത്തിങ്കലേക്ക് ചെല്ലും;

     ദൈവമേ, എന്റെ ദൈവമേ, കിന്നരം കൊണ്ട് ഞാൻ നിന്നെ സ്തുതിക്കും.

     ⁵ എന്റെ ആത്മാവേ, നീ വിഷാദിച്ച് ഉള്ളിൽ ഞരങ്ങുന്നത് എന്തിന്?

     ദൈവത്തിൽ പ്രത്യാശ വയ്ക്കുക;

     അവൻ എന്റെ മുഖപ്രകാശത്താൽ എന്നെ രക്ഷിക്കുന്ന എന്റെ ദൈവവുമാകുന്നു

     എന്ന് ഞാൻ ഇനിയും അവനെ സ്തുതിക്കും.

സങ്കീർത്തനം.43 44

     ¹ ദൈവമേ, പൂർവ്വകാലത്ത് ഞങ്ങളുടെ പിതാക്കന്മാരുടെ നാളുകളിൽ

     നീ ചെയ്ത പ്രവൃത്തികൾ അവർ ഞങ്ങളോട് വിവരിച്ചിരിക്കുന്നു;

     ഞങ്ങളുടെ ചെവികൊണ്ട് ഞങ്ങൾ കേട്ടുമിരിക്കുന്നു;

     ² നിന്റെ കൈകൊണ്ട് നീ ജനതകളെ പുറത്താക്കി അവരെ നട്ടു;

     നീ വംശങ്ങളെ നശിപ്പിച്ച്, അവരെ ദേശത്ത് സ്വതന്ത്രരായി വിട്ടു.

     ³ അവരുടെ വാളുകൾ കൊണ്ടല്ല അവർ ദേശം കൈവശമാക്കിയത്;

     സ്വന്ത ഭുജബലം കൊണ്ടല്ല അവർ ജയം നേടിയത്;

     നിന്റെ വലങ്കൈയും നിന്റെ ഭുജവും നിന്റെ മുഖപ്രകാശവും കൊണ്ടാകുന്നു;

     നിനക്ക് അവരോട് പ്രിയമുണ്ടായിരുന്നുവല്ലോ.

     ⁴ ദൈവമേ, നീ എന്റെ രാജാവാകുന്നു;

     യാക്കോബിന് രക്ഷ ഉറപ്പാക്കണമേ.

     ⁵ നിന്നാൽ ഞങ്ങൾ ശത്രുക്കളെ തള്ളിയിടും;

     ഞങ്ങളോട് എതിർക്കുന്നവരെ നിന്റെ നാമത്തിൽ ചവിട്ടിക്കളയും.

     ⁶ ഞാൻ എന്റെ വില്ലിൽ ആശ്രയിക്കുകയില്ല;

     എന്റെ വാൾ എന്നെ രക്ഷിക്കുകയുമില്ല.

     ⁷ അങ്ങാകുന്നു ഞങ്ങളെ വൈരികളുടെ കൈയിൽ നിന്ന് രക്ഷിച്ചത്;

     ഞങ്ങളെ വെറുത്തവരെ അങ്ങ് ലജ്ജിപ്പിച്ചുമിരിക്കുന്നു;

     ⁸ ദൈവത്തിൽ ഞങ്ങൾ നിത്യം പ്രശംസിക്കുന്നു;

     നിന്റെ നാമത്തിന് എന്നും സ്തോത്രം ചെയ്യുന്നു. സേലാ.

     ⁹ എന്നാൽ, നീ ഞങ്ങളെ തള്ളിക്കളഞ്ഞ് ലജ്ജിപ്പിച്ചിരിക്കുന്നു;

     ഞങ്ങളുടെ സൈന്യങ്ങളോടുകൂടി പുറപ്പെടുന്നതുമില്ല.

     ¹⁰ വൈരിയുടെ മുമ്പിൽ നീ ഞങ്ങളെ പുറം തിരിഞ്ഞ് ഓടുമാറാക്കുന്നു;

     ഞങ്ങളെ പകയ്ക്കുന്നവർ ഞങ്ങളെ കൊള്ളയിടുന്നു.

     ¹¹ ഭക്ഷണത്തിനുവേണ്ടി കൊല്ലുവാനുള്ള ആടുകളെപ്പോലെ നീ ഞങ്ങളെ ഏല്പിച്ചുകൊടുത്തു;

     ജനതകളുടെ ഇടയിൽ ഞങ്ങളെ ചിതറിച്ചിരിക്കുന്നു.

     ¹² നീ നിന്റെ ജനത്തെ തുഛമായ വിലയ്ക്ക് വില്ക്കുന്നു.

     അവരുടെ വിലകൊണ്ട് സമ്പത്ത് വർദ്ധിക്കുന്നതുമില്ല.

     ¹³ നീ ഞങ്ങളെ അയല്ക്കാർക്ക് അപമാനവിഷയവും

     ചുറ്റുമുള്ളവർക്ക് നിന്ദയും പരിഹാസവും ആക്കുന്നു.

     ¹⁴ നീ ജനതകളുടെ ഇടയിൽ ഞങ്ങളെ പഴഞ്ചൊല്ലിനും

     വംശങ്ങളുടെ നടുവിൽ പരിഹാസത്തിനും വിഷയം ആക്കുന്നു.

     ¹⁵ നിന്ദിക്കുകയും ദുഷിക്കുകയും ചെയ്യുന്നവന്റെ വാക്കുകൾ ഹേതുവായും

     ശത്രുവിന്റെയും പ്രതികാരകന്റെയും നിമിത്തവും

     ¹⁶ ഞാൻ ഇടവിടാതെ അപമാനം അനുഭവിക്കുന്നു;

     ലജ്ജ എന്റെ മുഖത്തെ മൂടിയിരിക്കുന്നു.

     ¹⁷ ഇവയെല്ലാം ഞങ്ങൾക്ക് സംഭവിച്ചു എങ്കിലും ഞങ്ങൾ നിന്നെ മറന്നിട്ടില്ല;

     നിന്റെ നിയമത്തോട് അവിശ്വസ്തത കാണിച്ചിട്ടുമില്ല.

     ¹⁸ നീ ഞങ്ങളെ കുറുക്കന്മാരുടെ സ്ഥലത്തുവച്ച് തകർത്തുകളയുവാനും

     മരണത്തിന്റെ നിഴൽ കൊണ്ട് ഞങ്ങളെ മൂടുവാനും തക്കവണ്ണം

     ¹⁹ ഞങ്ങളുടെ ഹൃദയം പിന്തിരിയുകയോ

     ഞങ്ങളുടെ കാലടികൾ നിന്റെ വഴി വിട്ടുമാറുകയോ ചെയ്തിട്ടില്ല.

     ²⁰ ദൈവത്തിന്റെ നാമം ഞങ്ങൾ മറക്കുകയോ

     ഞങ്ങളുടെ കൈകൾ അന്യദൈവങ്ങളിലേക്ക് സഹായത്തിനായി നീട്ടുകയോ ചെയ്തിട്ടുണ്ടെങ്കിൽ

     ²¹ ദൈവം അത് ശോധന ചെയ്യാതിരിക്കുമോ?

     അവൻ ഹൃദയ രഹസ്യങ്ങൾ അറിയുന്നുവല്ലോ.

     ²² നിന്റെ നിമിത്തം ഞങ്ങളെ ദിവസംപ്രതി കൊല്ലുന്നു;

     അറുക്കുവാനുള്ള ആടുകളെപ്പോലെ ഞങ്ങളെ എണ്ണുന്നു.

     ²³ കർത്താവേ, ഉണരണമേ; നീ ഉറങ്ങുന്നത് എന്ത്?

     എഴുന്നേല്ക്കണമേ; ഞങ്ങളെ എന്നേക്കും തള്ളിക്കളയരുതേ.

     ²⁴ നീ നിന്റെ മുഖം മറയ്ക്കുന്നതും

     ഞങ്ങളുടെ കഷ്ടതയും പീഡയും മറന്നുകളയുന്നതും എന്ത്?

     ²⁵ ഞങ്ങൾ നിലത്തോളം കുനിഞ്ഞിരിക്കുന്നു;

     ഞങ്ങളുടെ ശരീരം നിലം പറ്റിയിരിക്കുന്നു.

     ²⁶ ഞങ്ങളുടെ സഹായത്തിനായി എഴുന്നേല്ക്കണമേ;

     നിന്റെ ദയനിമിത്തം ഞങ്ങളെ വീണ്ടെടുക്കണമേ;

സങ്കീർത്തനം.44 45

     ¹ എന്റെ ഹൃദയം ശുഭവചനത്താൽ കവിയുന്നു;

     “എന്റെ കൃതി രാജാവിന് വേണ്ടിയുള്ളത്” എന്ന് ഞാൻ പറയുന്നു.

     എന്റെ നാവ് സമർത്ഥനായ ലേഖകന്റെ എഴുത്തുകോൽ ആകുന്നു.

     ² നീ മനുഷ്യപുത്രന്മാരിൽ അതിസുന്ദരൻ;

     ലാവണ്യം നിന്റെ അധരങ്ങളിൽ പകർന്നിരിക്കുന്നു;

     അതുകൊണ്ട് ദൈവം നിന്നെ എന്നേക്കും അനുഗ്രഹിച്ചിരിക്കുന്നു.

     ³ അല്ലയോ വീരാ, നിന്റെ വാൾ അരയ്ക്ക് കെട്ടുക; അത്

     നിന്റെ തേജസ്സും നിന്റെ മഹിമയും തന്നെ.

     ⁴ സത്യവും സൗമ്യതയും നീതിയും പാലിക്കേണ്ടതിന്

     നീ മഹിമയോടെ കൃതാർത്ഥനായി വാഹനമേറി എഴുന്നെള്ളുക;

     നിന്റെ വലങ്കൈ ഭയങ്കരകാര്യങ്ങൾ നിനക്ക് ഉപദേശിച്ചുതരട്ടെ.

     ⁵ നിന്റെ അസ്ത്രങ്ങൾ മൂർച്ചയുള്ളവയാകുന്നു;

     രാജാവിന്റെ ശത്രുക്കളുടെ നെഞ്ചത്ത് അവ തറയ്ക്കുന്നു;ജനതകൾ നിന്റെ മുമ്പിൽ വീഴുന്നു.

     ⁶ ദൈവമേ, നിന്റെ സിംഹാസനം എന്നും എന്നേക്കും ഉള്ളതാകുന്നു;

     നിന്റെ രാജത്വത്തിന്റെ ചെങ്കോൽ നീതിയുള്ള ചെങ്കോലാകുന്നു.

     ⁷ നീ നീതി ഇഷ്ടപ്പെട്ട് ദുഷ്ടത വെറുക്കുന്നു;

     അതുകൊണ്ട് ദൈവം, നിന്റെ ദൈവം തന്നെ, നിന്റെ കൂട്ടുകാരിൽ അധികമായി

     നിന്നെ ആനന്ദതൈലം കൊണ്ട് അഭിഷേകം ചെയ്തിരിക്കുന്നു.

     ⁸ നിന്റെ വസ്ത്രമെല്ലാം മൂറും ചന്ദനവും ലവംഗവും കൊണ്ട് സുഗന്ധപൂരിതമായിരിക്കുന്നു;

     ദന്തമന്ദിരങ്ങളിൽനിന്ന് കമ്പിനാദം നിന്നെ സന്തോഷിപ്പിക്കുന്നു.

     ⁹ നിന്റെ സ്ത്രീരത്നങ്ങളുടെ കൂട്ടത്തിൽ രാജകുമാരികൾ ഉണ്ട്;

     നിന്റെ വലത്തുഭാഗത്ത് രാജ്ഞി ഓഫീർതങ്കം അണിഞ്ഞുകൊണ്ട് നില്ക്കുന്നു.

     ¹⁰ അല്ലയോ കുമാരീ, കേൾക്കുക; നോക്കുക; ചെവിചായിക്കുക.

     സ്വജനത്തെയും നിന്റെ പിതൃഭവനത്തെയും മറക്കുക.

     ¹¹ അപ്പോൾ രാജാവ് നിന്റെ സൗന്ദര്യത്തിൽ ആകൃഷ്ടനാകും;

     അവൻ നിന്റെ നാഥനാകയാൽ നീ അവനെ നമസ്കരിയ്ക്കുക.

     ¹² ജനത്തിലെ ധനവാന്മാരായ സോർനിവാസികൾ സമ്മാനങ്ങളുമായി

     നിന്റെ മുഖപ്രസാദം തേടും.

     ¹³ അന്തഃപുരത്തിലെ രാജകുമാരി ശോഭാപരിപൂർണ്ണയാകുന്നു;

     അവളുടെ വസ്ത്രം പൊൻകസവുകൊണ്ടുള്ളത്.

     ¹⁴ അവളെ ചിത്രത്തയ്യലുള്ള വസ്ത്രം ധരിപ്പിച്ച് രാജസന്നിധിയിൽ കൊണ്ടുവരും;

     അവളെ അനുഗമിക്കുന്ന കന്യകമാരായ തോഴിമാരെയും നിന്റെ അടുക്കൽ കൊണ്ടുവരും.

     ¹⁵ സന്തോഷത്തോടും ഉല്ലാസത്തോടും കൂടി അവരെ കൊണ്ടുവരും;

     അവർ രാജമന്ദിരത്തിൽ പ്രവേശിക്കും.

     ¹⁶ നിന്റെ പുത്രന്മാർ പിതാക്കന്മാർക്കു പകരം ഇരിക്കും;

     സർവ്വഭൂമിയിലും നീ അവരെ പ്രഭുക്കന്മാരാക്കും.

     ¹⁷ ഞാൻ നിന്റെ നാമത്തെ എല്ലാ തലമുറകളിലും ഓർക്കുമാറാക്കും.

     അതുകൊണ്ട് ജനതകൾ എന്നും എന്നേക്കും നിനക്ക് സ്തോത്രം ചെയ്യും.

സങ്കീർത്തനം.45 46

     ¹ ദൈവം നമ്മുടെ സങ്കേതവും ബലവും ആകുന്നു;

     കഷ്ടസമയത്ത് അവൻ ഏറ്റവും അടുത്ത സഹായമായിരിക്കുന്നു.

     ² അതുകൊണ്ട്, ഭൂമി മാറിപ്പോയാലും,

     പർവ്വതങ്ങൾ നീങ്ങി സമുദ്രമദ്ധ്യേ വീണാലും,

     ³ അതിലെ വെള്ളം ഇരമ്പലോടെ കലങ്ങിയാലും

     പ്രളയത്താൽ പർവ്വതങ്ങൾ കുലുങ്ങിയാലും, നാം ഭയപ്പെടുകയില്ല.

     ⁴ ഒരു നദി ഉണ്ട്; അതിന്റെ തോടുകൾ ദൈവനഗരത്തെ,

     അത്യുന്നതന്റെ വിശുദ്ധനിവാസത്തെ തന്നെ, സന്തോഷിപ്പിക്കുന്നു.

     ⁵ ദൈവം അതിന്റെ മദ്ധ്യത്തിൽ ഉണ്ട്; അത് നീങ്ങിപ്പോകുകയില്ല;

     ദൈവം അതികാലത്തു തന്നെ അതിനെ സഹായിക്കും.

     ⁶ ജനതകൾ ക്രുദ്ധിച്ചു; രാജ്യങ്ങൾ കുലുങ്ങി;

     അവൻ തന്റെ ശബ്ദം കേൾപ്പിച്ചു; ഭൂമി ഉരുകിപ്പോയി.

     ⁷ സൈന്യങ്ങളുടെ യഹോവ നമ്മോടുകൂടി ഉണ്ട്;

     യാക്കോബിന്റെ ദൈവം നമ്മുടെ സങ്കേതം ആകുന്നു. സേലാ.

     ⁸ വന്ന് യഹോവയുടെ പ്രവൃത്തികൾ നോക്കുവിൻ;

     അവൻ ഭൂമിയിൽ എത്ര വലിയ ശൂന്യത വരുത്തിയിരിക്കുന്നു!

     ⁹ അവൻ ഭൂമിയുടെ അറുതികൾ വരെ യുദ്ധങ്ങൾ നിർത്തൽചെയ്യുന്നു;

     അവൻ വില്ലൊടിച്ച് കുന്തം മുറിച്ച് രഥങ്ങൾ തീയിൽ ഇട്ട് ചുട്ടുകളയുന്നു.

     ¹⁰ മിണ്ടാതെയിരുന്ന്, ഞാൻ ദൈവമാണെന്ന് അറിഞ്ഞുകൊള്ളുവിൻ;

     ഞാൻ ജനതകളുടെ ഇടയിൽ ഉന്നതൻ ആകും; ഞാൻ ഭൂമിയിൽ ഉന്നതൻ ആകും.

     ¹¹ സൈന്യങ്ങളുടെ യഹോവ നമ്മോടുകൂടി ഉണ്ട്;

     യാക്കോബിന്റെ ദൈവം നമ്മുടെ സങ്കേതം ആകുന്നു. സേലാ.

സങ്കീർത്തനം.46 47

     ¹ സകല ജനതകളുമേ, കൈ കൊട്ടുവിൻ;

     ജയഘോഷത്തോടെ ദൈവസന്നിധിയിൽ ആർക്കുവിൻ.

     ² അത്യുന്നതനായ യഹോവ മഹത്വമുള്ളവൻ;

     അവൻ സർവ്വഭൂമിയുടെയും മഹാരാജാവാകുന്നു.

     ³ അവൻ ജനതകളെ നമ്മുടെ കീഴിലും വംശങ്ങളെ നമ്മുടെ കാൽകീഴിലും ആക്കുന്നു.

     ⁴ അവൻ നമ്മുടെ ഓഹരി തിരഞ്ഞെടുത്ത് തന്നു;

     താൻ സ്നേഹിച്ച യാക്കോബിന്റെ പ്രശംസയായ ഭൂമി തന്നെ.

     ⁵ ദൈവം ജയഘോഷത്തോടും യഹോവ

     കാഹളനാദത്തോടും കൂടി ആരോഹണം ചെയ്യുന്നു.

     ⁶ ദൈവത്തിന് സ്തുതി പാടുവിൻ, സ്തുതി പാടുവിൻ;

     നമ്മുടെ രാജാവിന് സ്തുതി പാടുവിൻ, സ്തുതി പാടുവിൻ.

     ⁷ ദൈവം സർവ്വഭൂമിക്കും രാജാവാകുന്നു;

     ഒരു സങ്കീർത്തനത്തോടെ സ്തുതി പാടുവിൻ.

     ⁸ ദൈവം ജനതകളെ ഭരിക്കുന്നു;

     ദൈവം തന്റെ വിശുദ്ധസിംഹാസനത്തിൽ ഇരിക്കുന്നു.

     ⁹ വംശങ്ങളുടെ പ്രഭുക്കന്മാർ അബ്രാഹാമിന്റെ ദൈവത്തിന്റെ ജനമായി ഒന്നിച്ചുകൂടുന്നു;

     ഭൂമിയിലെ പരിചകൾ ദൈവത്തിന്റേതല്ലോ;

     അവൻ ഏറ്റവും ഉന്നതനായിരിക്കുന്നു.

സങ്കീർത്തനം.47 48

     ¹ നമ്മുടെ ദൈവത്തിന്റെ നഗരത്തിൽ, അവന്റെ വിശുദ്ധപർവ്വതത്തിൽ

     യഹോവ വലിയവനും അത്യന്തം സ്തുത്യനും ആകുന്നു.

     ² മഹാരാജാവിന്റെ നഗരമായ ഉത്തരദിശയിലുള്ള സീയോൻപർവ്വതം

     ഉയരംകൊണ്ട് മനോഹരവും സർവ്വഭൂമിയുടെയും ആനന്ദവുമാകുന്നു.

     ³ അതിന്റെ അരമനകളിൽ ദൈവം ഒരു ദുർഗ്ഗമായി വെളിപ്പെട്ട് വന്നിരിക്കുന്നു.

     ⁴ ഇതാ, രാജാക്കന്മാർ കൂട്ടം കൂടി;

     അവർ ഒന്നിച്ച് കടന്നുപോയി.

     ⁵ അവർ അത് കണ്ട് അമ്പരന്നു,

     അവർ പരിഭ്രമിച്ച് ഓടിപ്പോയി.

     ⁶ അവർക്ക് അവിടെ വിറയൽ പിടിച്ചു;

     നോവു കിട്ടിയവളെപ്പോലെ വേദന പിടിച്ചു.

     ⁷ നീ കിഴക്കൻകാറ്റുകൊണ്ട് തർശീശ് കപ്പലുകൾ തകർത്ത് കളയുന്നു.

     ⁸ നാം കേട്ടതുപോലെ തന്നെ സൈന്യങ്ങളുടെ യഹോവയുടെ നഗരത്തിൽ,

     നമ്മുടെ ദൈവത്തിന്റെ നഗരത്തിൽ കണ്ടിരിക്കുന്നു;

     ദൈവം അതിനെ സദാകാലത്തേക്കും ഉറപ്പിക്കുന്നു. സേലാ.

     ⁹ ദൈവമേ, നിന്റെ മന്ദിരത്തിൽ വച്ച് ഞങ്ങൾ നിന്റെ ദയയെക്കുറിച്ച് ചിന്തിക്കുന്നു.

     ¹⁰ ദൈവമേ, നിന്റെ നാമംപോലെ തന്നെ നിന്റെ സ്തുതിയും ഭൂമിയുടെ അറ്റങ്ങളോളം എത്തുന്നു;

     നിന്റെ വലങ്കയ്യിൽ നീതി നിറഞ്ഞിരിക്കുന്നു.

     ¹¹ നിന്റെ ന്യായവിധികൾനിമിത്തം സീയോൻപർവ്വതം സന്തോഷിക്കുകയും

     യെഹൂദാപുത്രിമാർ ആനന്ദിക്കുകയും ചെയ്യുന്നു.

     ¹² സീയോനെ ചുറ്റിനടക്കുവിൻ; അതിനെ പ്രദക്ഷിണം ചെയ്യുവിൻ;

     അതിന്റെ ഗോപുരങ്ങൾ എണ്ണുവിൻ.

     ¹³ വരുവാനുള്ള തലമുറയോട് അറിയിക്കേണ്ടതിന്

     അതിന്റെ കൊത്തളങ്ങൾ ശ്രദ്ധിച്ച് അരമനകൾ നടന്ന് നോക്കുവിൻ.

     ¹⁴ ഈ ദൈവം എന്നും എന്നേക്കും നമ്മുടെ ദൈവം ആകുന്നു;

     അവൻ നമ്മെ ജീവപര്യന്തം വഴിനടത്തും.

സങ്കീർത്തനം.48 49

     ¹ സകല ജനതകളുമേ, ഇത് കേൾക്കുവിൻ;

     സകലഭൂവാസികളുമേ, ശ്രദ്ധിക്കുവിൻ.

     ² സാമാന്യജനവും ശ്രേഷ്ഠജനവും ധനവാന്മാരും ദരിദ്രന്മാരും തന്നെ.

     ³ എന്റെ അധരം ജ്ഞാനം പ്രസ്താവിക്കും;

     എന്റെ ഹൃദയത്തിലെ ധ്യാനം വിവേകം തന്നെ ആയിരിക്കും.

     ⁴ ഞാൻ സദൃശവാക്യത്തിന് എന്റെ ചെവിചായിക്കും;

     കിന്നരനാദത്തോടെ എന്റെ കടങ്കഥ കേൾപ്പിക്കും.

     ⁵ ആപത്തുകാലത്ത്, ശത്രുക്കൾ എന്റെ ചുറ്റും കൂടുമ്പോൾ ഞാൻ ഭയപ്പെടുകയില്ല.

     ⁶ തന്റെ സമ്പത്തിൽ ആശ്രയിക്കുകയും

     ധനസമൃദ്ധിയിൽ പ്രശംസിക്കുകയും ചെയ്യുന്ന ഒരുവനും തന്റെ

     ⁷ സഹോദരൻ ശവക്കുഴി കാണാതെ

     എന്നേക്കും ജീവിച്ചിരിക്കേണ്ടതിന്

     ⁸ അവനെ വീണ്ടെടുക്കുവാനോ

     ദൈവത്തിന് വീണ്ടെടുപ്പുവില കൊടുക്കുവാനോ കഴിയുകയില്ല.

     ⁹ അവരുടെ പ്രാണന്റെ വീണ്ടെടുപ്പ് വിലയേറിയത്;

     അത് ഒരുനാളും സാധിക്കുകയില്ല.

     ¹⁰ ജ്ഞാനികൾ മരിക്കുകയും മൂഢനും മൃഗപ്രായനും ഒരുപോലെ നശിക്കുകയും

     അവരുടെ സമ്പാദ്യം മറ്റുള്ളവർക്ക് വിട്ടിട്ട് പോകുകയും ചെയ്യുന്നത് കാണുന്നുവല്ലോ.

     ¹¹ തങ്ങളുടെ ഭവനങ്ങൾ ശാശ്വതമായും

     അവരുടെ വാസസ്ഥലങ്ങൾ തലമുറതലമുറയായും നില്ക്കും

     എന്നാകുന്നു അവരുടെ വിചാരം;

     അവരുടെ നിലങ്ങൾക്ക് അവർ അവരുടെ പേരിടുന്നു.

     ¹² എന്നാൽ മനുഷ്യൻ ബഹുമാനത്തിൽ നിലനില്ക്കുകയില്ല.

     അവൻ നശിച്ചുപോകുന്ന മൃഗങ്ങൾക്ക് തുല്യൻ.

     ¹³ ഇത് സ്വാശ്രയക്കാരുടെ ഭവിഷ്യത്താകുന്നു;

     അവരുടെ വാക്കുകൾ അനുസരിക്കുന്ന അവരുടെ പിൻതലമുറക്കാരുടെയും ഗതി ഇതു തന്നെ. സേലാ.

     ¹⁴ അവരെ ആടുകളെപ്പോലെ പാതാളത്തിന് ഏല്പിച്ചിരിക്കുന്നു;

     മൃത്യു അവരെ മേയിക്കുന്നു;

     നേരുള്ളവർ പ്രഭാതത്തിൽ അവരുടെമേൽ വാഴും;

     അവരുടെ സൗന്ദര്യം ഇല്ലാതെയാകും;

     പാതാളം അവരുടെ പാർപ്പിടം.

     ¹⁵ എങ്കിലും എന്റെ പ്രാണനെ ദൈവം പാതാളത്തിന്റെ അധികാരത്തിൽനിന്ന് വീണ്ടെടുക്കും;

     അവൻ എന്നെ കൈക്കൊള്ളും. സേലാ.

     ¹⁶ ഒരുവൻ ധനവാനായി ഭവിച്ചാലും

     അവന്റെ ഭവനത്തിന്റെ മഹത്വം വർദ്ധിച്ചാലും നീ ഭയപ്പെടരുത്.

     ¹⁷ അവൻ മരിക്കുമ്പോൾ യാതൊന്നും കൊണ്ടുപോകുകയില്ല;

     അവന്റെ മഹത്വം അവനെ അനുഗമിക്കുകയുമില്ല.

     ¹⁸ അവൻ ജീവനോടിരുന്നപ്പോൾ താൻ ഭാഗ്യവാൻ എന്ന് സ്വയം പറഞ്ഞു;

     നീ നിനക്കു തന്നെ നന്മ ചെയ്യുമ്പോൾ മനുഷ്യർ നിന്നെ പുകഴ്ത്തും.

     ¹⁹ അവൻ തന്റെ പിതാക്കന്മാരുടെ തലമുറയോട് ചേരും;

     അവർ ഒരുനാളും വെളിച്ചം കാണുകയില്ല.

     ²⁰ ആദരവ് നേടിയ മനുഷ്യൻ വിവേക ശൂന്യനായാൽ

     നശിച്ചുപോകുന്ന മൃഗങ്ങൾക്ക് തുല്യനാകുന്നു.

സങ്കീർത്തനം. 49 50

     ¹ സർവ്വശക്തനായ ദൈവം, യഹോവയായ ദൈവം തന്നെ, തന്റെ വാക്കിനാൽ,

     സൂര്യന്റെ ഉദയംമുതൽ അസ്തമയംവരെ ഭൂമിയെ വിളിക്കുന്നു.

     ² സൗന്ദര്യത്തിന്റെ പൂർണ്ണതയായ

     സീയോനിൽനിന്ന് ദൈവം പ്രകാശിക്കുന്നു.

     ³ നമ്മുടെ ദൈവം വരുന്നു; നിശ്ശബ്ദനായിരിക്കുകയില്ല;

     അവന്റെ മുമ്പിൽ തീ ദഹിപ്പിക്കുന്നു;

     അവന്റെ ചുറ്റും വലിയ കൊടുങ്കാറ്റടിക്കുന്നു.

     ⁴ തന്റെ ജനത്തെ ന്യായം വിധിക്കേണ്ടതിന്

     അവൻ ഉയരത്തിൽനിന്ന് ആകാശത്തെയും ഭൂമിയെയും വിളിക്കുന്നു.

     ⁵ യാഗം കഴിച്ച് എന്നോട് ഉടമ്പടി ചെയ്തവരായ

     എന്റെ വിശുദ്ധന്മാരെ എന്റെ അടുക്കൽ കൂട്ടുവിൻ.

     ⁶ ദൈവം തന്നെ ന്യായാധിപതി ആയിരിക്കുകയാൽ

     ആകാശം അവന്റെ നീതിയെ ഘോഷിക്കും. സേലാ.

     ⁷ എന്റെ ജനമേ, കേൾക്കുക; ഞാൻ സംസാരിക്കും.

     യിസ്രായേലേ, ഞാൻ നിങ്ങൾക്കെതിരെ സാക്ഷ്യം പറയും:

     ദൈവമായ ഞാൻ നിന്റെ ദൈവമാകുന്നു.

     ⁸ നിന്റെ ഹനനയാഗങ്ങളെക്കുറിച്ച് ഞാൻ നിന്നെ ശാസിക്കുന്നില്ല;

     നിന്റെ ഹോമയാഗങ്ങൾ എപ്പോഴും എന്റെ മുമ്പാകെ ഉണ്ടല്ലോ.

     ⁹ നിന്റെ വീട്ടിൽനിന്ന് ഒരു കാളയെയോ

     നിന്റെ തൊഴുത്തുകളിൽനിന്ന് ഒരു കോലാട്ടുകൊറ്റനെയോ ഞാൻ എടുക്കുകയില്ല.

     ¹⁰ കാട്ടിലെ സകലമൃഗങ്ങളും

     ആയിരം കുന്നുകളിലെ കന്നുകാലികളും എനിക്കുള്ളവയാകുന്നു.

     ¹¹ മലകളിലെ പക്ഷികളെ എല്ലാം ഞാൻ അറിയുന്നു;

     വയലിലെ വന്യമൃഗങ്ങളും എനിക്കുള്ളവ തന്നെ.

     ¹² എനിക്ക് വിശക്കുമ്പോൾ ഞാൻ നിന്നോട് പറയുകയില്ല;

     ലോകവും അതിലുള്ള സകലവും എന്റെയാകുന്നു.

     ¹³ ഞാൻ കാളകളുടെ മാംസം തിന്നുമോ?

     കോലാട്ടുകൊറ്റന്മാരുടെ രക്തം കുടിക്കുമോ?

     ¹⁴ ദൈവത്തിന് സ്തോത്രയാഗം അർപ്പിക്കുക;

     അത്യുന്നതന് നിന്റെ നേർച്ചകൾ കഴിക്കുക.

     ¹⁵ കഷ്ടകാലത്ത് എന്നെ വിളിച്ചപേക്ഷിക്കുക;

     ഞാൻ നിന്നെ വിടുവിക്കുകയും നീ എന്നെ മഹത്വപ്പെടുത്തുകയും ചെയ്യും.

     ¹⁶ എന്നാൽ ദുഷ്ടനോട് ദൈവം അരുളിച്ചെയ്യുന്നത്:

     “ എന്റെ ചട്ടങ്ങൾ അറിയിക്കുവാനും എന്റെ നിയമം നിന്റെ വായിൽ എടുക്കുവാനും നിനക്ക് എന്ത് കാര്യം?

     ¹⁷ നീ ശാസന വെറുത്ത്

     എന്റെ വചനങ്ങൾ നിന്റെ പിറകിൽ എറിഞ്ഞുകളയുന്നുവല്ലോ.

     ¹⁸ കള്ളനെ കണ്ടാൽ നീ അവന്റെ പക്ഷം ചേരുന്നു;

     വ്യഭിചാരികളോട് നീ കൂട്ട് കൂടുന്നു.

     ¹⁹ നിന്റെ വായ് നീ ദോഷത്തിന് വിട്ടുകൊടുക്കുന്നു;

     നിന്റെ നാവ് വഞ്ചനയ്ക്ക് രൂപം നൽകുന്നു.

     ²⁰ നീ ഇരുന്ന് നിന്റെ സഹോദരന് വിരോധമായി സംസാരിക്കുന്നു;

     നിന്റെ അമ്മയുടെ മകനെക്കുറിച്ച് അപവാദം പറയുന്നു.

     ²¹ ഇപ്രകാരം നീ ചെയ്യുകയും ഞാൻ മിണ്ടാതിരിക്കുകയും ചെയ്തപ്പോൾ

     ഞാനും നിന്നെപ്പോലെയുള്ളവനെന്ന് നീ വിചാരിച്ചു;

     എന്നാൽ ഞാൻ നിന്നെ ശാസിച്ച് നിന്റെ കണ്ണിന്റെ മുമ്പിൽ അവയെല്ലാം നിരത്തിവയ്ക്കും”.

     ²² ദൈവത്തെ മറക്കുന്നവരേ, ഇത് ഓർത്തുകൊള്ളുവീൻ;

     അല്ലെങ്കിൽ ഞാൻ നിങ്ങളെ കീറിക്കളയും; വിടുവിക്കുവാൻ ആരും ഉണ്ടാകുകയുമില്ല.

     ²³ സ്തോത്രമെന്ന യാഗം അർപ്പിക്കുന്നവൻ എന്നെ മഹത്വപ്പെടുത്തുന്നു;

     തന്റെ നടപ്പ് ക്രമപ്പെടുത്തുന്നവന് ഞാൻ ദൈവത്തിന്റെ രക്ഷ കാണിച്ചുകൊടുക്കും.

സങ്കീർത്തനം.50 51

     ¹ ദൈവമേ, നിന്റെ ദയയ്ക്ക് തക്കവണ്ണം എന്നോട് കൃപയുണ്ടാകണമേ;

     നിന്റെ ബഹുവിധമായ കാരുണ്യപ്രകാരം

     എന്റെ ലംഘനങ്ങൾ മായിച്ചുകളയണമേ.

     ² എന്നെ നന്നായി കഴുകി എന്റെ അകൃത്യം പോക്കണമേ;

     എന്റെ പാപം നീക്കി എന്നെ വെടിപ്പാക്കണമേ.

     ³ എന്റെ ലംഘനങ്ങൾ ഞാൻ അറിയുന്നു;

     എന്റെ പാപം എപ്പോഴും എന്റെ മുമ്പിൽ ഇരിക്കുന്നു.

     ⁴ നിന്നോടു തന്നെ ഞാൻ പാപം ചെയ്തു;

     നിനക്ക് അനിഷ്ടമായത് ഞാൻ ചെയ്തിരിക്കുന്നു.

     സംസാരിക്കുമ്പോൾ നീ നീതിമാനായും

     വിധിക്കുമ്പോൾ നിർമ്മലനായും ഇരിയ്ക്കുന്നുവല്ലോ.

     ⁵ ഇതാ, ഞാൻ അകൃത്യത്തിൽ ഉരുവായി;

     പാപത്തിൽ എന്റെ അമ്മ എന്നെ ഗർഭം ധരിച്ചു.

     ⁶ അന്തർഭാഗത്തെ സത്യമല്ലോ നീ ഇച്ഛിക്കുന്നത്;

     അന്തരംഗത്തിൽ എന്നെ ജ്ഞാനം ഗ്രഹിപ്പിക്കേണമേ.

     ⁷ ഞാൻ നിർമ്മലനാകേണ്ടതിന് ഈസോപ്പുകൊണ്ട് എന്നെ ശുദ്ധീകരിക്കണമേ;

     ഞാൻ ഹിമത്തെക്കാൾ വെണ്മയാകേണ്ടതിന് എന്നെ കഴുകണമേ.

     ⁸ സന്തോഷവും ആനന്ദവും എന്നെ കേൾപ്പിക്കണമേ;

     നീ ഒടിച്ച അസ്ഥികൾ ഉല്ലസിക്കട്ടെ.

     ⁹ എന്റെ പാപങ്ങൾ കാണാത്തവിധം നിന്റെ മുഖം മറയ്ക്കണമേ;

     എന്റെ അകൃത്യങ്ങളെല്ലാം മായിച്ചു കളയണമേ.

     ¹⁰ ദൈവമേ, നിർമ്മലമായ ഒരു ഹൃദയം എന്നിൽ സൃഷ്ടിച്ച്

     സ്ഥിരതയുള്ള ഒരു ആത്മാവ് എന്നിൽ പുതുക്കണമേ.

     ¹¹ നിന്റെ സന്നിധിയിൽനിന്ന് എന്നെ തള്ളിക്കളയരുതേ

     നിന്റെ പരിശുദ്ധാത്മാവിനെ എന്നിൽനിന്ന് എടുക്കുകയുമരുതേ.

     ¹² നിന്റെ രക്ഷയുടെ സന്തോഷം എനിക്ക് തിരികെ തരണമേ;

     മനസ്സൊരുക്കമുള്ള ആത്മാവിനാൽ എന്നെ താങ്ങണമേ.

     ¹³ അപ്പോൾ ഞാൻ അതിക്രമക്കാരോട് നിന്റെ വഴികൾ ഉപദേശിക്കും;

     പാപികൾ നിങ്കലേക്ക് മനം തിരിഞ്ഞുവരും.

     ¹⁴ ദൈവമേ,എന്റെ രക്ഷയുടെ ദൈവമേ!

     രക്തം ചിന്തിയ പാപത്തിൽനിന്ന് എന്നെ മോചിപ്പിക്കണമേ;

     എന്നാൽ എന്റെ നാവ് നിന്റെ നീതിയെ ഘോഷിക്കും.

     ¹⁵ കർത്താവേ, എന്റെ അധരങ്ങളെ തുറക്കണമേ;

     എന്നാൽ എന്റെ വായ് നിനക്ക് സ്തുതി പാടും.

     ¹⁶ ഹനനയാഗം നീ ഇച്ഛിക്കുന്നില്ല; അല്ലെങ്കിൽ ഞാൻ അർപ്പിക്കുമായിരുന്നു;

     ഹോമയാഗത്തിൽ നിനക്ക് പ്രസാദവുമില്ല.

     ¹⁷ ദൈവത്തിന്റെ ഹനനയാഗങ്ങൾ തകർന്നിരിക്കുന്ന മനസ്സല്ലയോ?

     തകർന്നും നുറുങ്ങിയുമിരിക്കുന്ന ഹൃദയത്തെ, ദൈവമേ, നീ നിരസിക്കുകയില്ല.

     ¹⁸ നിന്റെ പ്രസാദപ്രകാരം സീയോന് നന്മ ചെയ്യണമേ;

     യെരൂശലേമിന്റെ മതിലുകൾ പണിയണമേ;

     ¹⁹ അപ്പോൾ നീ നീതിയാഗങ്ങളിലും ഹോമയാഗങ്ങളിലും സർവ്വാംഗഹോമങ്ങളിലും പ്രസാദിക്കും;

     അപ്പോൾ അവർ നിന്റെ യാഗപീഠത്തിൽ കാളകളെ അർപ്പിക്കും.

സങ്കീർത്തനം.51 52

     ¹ അല്ലയോ വീര പുരുഷാ! നീ ദുഷ്ടതയിൽ പ്രശംസിക്കുന്നതെന്തിന്?

     ദൈവത്തിന്റെ ദയ ശാശ്വതമാകുന്നു.

     ² ചതിയനായ നിന്റെ നാവ്, മൂർച്ചയുള്ള ക്ഷൗരക്കത്തിപോലെ

     ദുഷ്ടത വകഞ്ഞുണ്ടാക്കുന്നു.

     ³ നീ നന്മയെക്കാൾ തിന്മയെയും

     നീതി സംസാരിക്കുന്നതിനെക്കാൾ വ്യാജത്തെയും ഇഷ്ടപ്പെടുന്നു. സേലാ.

     ⁴ നിന്റെ വഞ്ചനയുള്ള നാവ്

     നാശകരമായ വാക്കുകൾ ഇഷ്ടപ്പെടുന്നു.

     ⁵ ദൈവം നിന്നെ എന്നേക്കും നശിപ്പിക്കും;

     നിന്റെ കൂടാരത്തിൽനിന്ന് അവൻ നിന്നെ പറിച്ചുകളയും.

     ജീവനുള്ളവരുടെ ദേശത്തുനിന്ന് നിന്നെ നിർമ്മൂലമാക്കും. സേലാ.

     ⁶ നീതിമാന്മാർ അത് കണ്ട് ഭയപ്പെടും;

     അവർ അവനെച്ചൊല്ലി ചിരിക്കും.

     ⁷ “ദൈവത്തെ ശരണമാക്കാതെ

     തന്റെ ധനസമൃദ്ധിയിൽ ആശ്രയിക്കുകയും

     ദുഷ്ടതയിൽ തന്നെത്താൻ ഉറപ്പിക്കുകയും ചെയ്ത മനുഷ്യൻ അതാ” എന്ന് പറയും,

     ⁸ ഞാനോ, ദൈവത്തിന്റെ ആലയത്തിൽ തഴച്ചുവളരുന്ന ഒലിവുവൃക്ഷംപോലെ ആകുന്നു;

     ഞാൻ ദൈവത്തിന്റെ ദയയിൽ എന്നും എന്നേക്കും ആശ്രയിക്കുന്നു.

     ⁹ നീ അത് ചെയ്തിരിക്കുകകൊണ്ട് ഞാൻ എന്നും നിനക്ക് സ്തോത്രം ചെയ്യും;

     ഞാൻ നിന്റെ നാമത്തിൽ പ്രത്യാശവയ്ക്കും;

     നിന്റെ ഭക്തന്മാരുടെ മുമ്പാകെ അത് ഉചിതമല്ലയോ?

സങ്കീർത്തനം.52 53

     ¹ “ദൈവം ഇല്ല” എന്ന് മൂഢൻ തന്റെ ഹൃദയത്തിൽ പറയുന്നു;

     വഷളന്മാരായ അവർ, മ്ലേച്ഛമായ നീതികേട് പ്രവർത്തിക്കുന്നു;

     നന്മ ചെയ്യുന്നവൻ ആരുമില്ല.

     ² ദൈവത്തെ അന്വേഷിക്കുന്ന ബുദ്ധിമാൻ ഉണ്ടോ എന്ന് കാണുവാൻ

     ദൈവം സ്വർഗ്ഗത്തിൽനിന്ന് മനുഷ്യപുത്രന്മാരെ നോക്കുന്നു.

     ³ എല്ലാവരും ഒരുപോലെ പിൻമാറി മലിനരായിത്തീർന്നു;

     നന്മചെയ്യുന്നവനില്ല; ഒരുത്തൻപോലും ഇല്ല.

     ⁴ നീതികേടു പ്രവർത്തിക്കുന്നവർ അറിയുന്നില്ലയോ?

     അപ്പം പോലെ അവർ എന്റെ ജനത്തെ തിന്നുകളയുന്നു;

     ദൈവത്തോട് അവർ പ്രാർത്ഥിക്കുന്നില്ല.

     ⁵ ഭയമില്ലാതിരുന്നപ്പോൾ അവർക്ക് മഹാഭയമുണ്ടായി;

     നിന്റെ നേരെ പാളയമിറങ്ങിയവന്റെ അസ്ഥികളെ ദൈവം ചിതറിച്ചുവല്ലോ.

     ദൈവം അവരെ തള്ളിക്കളഞ്ഞതുകൊണ്ട് നീ അവരെ ലജ്ജിപ്പിച്ചു.

     ⁶ സീയോനിൽനിന്ന് യിസ്രായേലിന്റെ രക്ഷ വന്നെങ്കിൽ!

     ദൈവം തന്റെ ജനത്തിന്റെ സ്ഥിതി മാറ്റുമ്പോൾ

     യാക്കോബ് സന്തോഷിക്കുകയും യിസ്രായേൽ ആനന്ദിക്കുകയും ചെയ്യും.

സങ്കീർത്തനം.53 54

     ¹ ദൈവമേ, നിന്റെ നാമത്താൽ എന്നെ രക്ഷിക്കണമേ;

     നിന്റെ ശക്തിയാൽ എനിക്ക് ന്യായം പാലിച്ചുതരണമേ.

     ² ദൈവമേ, എന്റെ പ്രാർത്ഥന കേൾക്കണമേ;

     എന്റെ വായിലെ വാക്കുകൾ ശ്രദ്ധിക്കണമേ.

     ³ അന്യജാതിക്കാർ എന്നോട് എതിർത്തിരിക്കുന്നു;

     ഘോരന്മാർ എനിക്ക് ജീവഹാനി വരുത്തുവാൻ നോക്കുന്നു;

     അവർ ദൈവത്തെ അവരുടെ മുമ്പിൽ നിർത്തിയിട്ടില്ല.

     ⁴ ഇതാ, ദൈവം എന്റെ സഹായകനാകുന്നു;

     കർത്താവ് എന്റെ പ്രാണനെ താങ്ങുന്നവരോടു കൂടി ഉണ്ട്.

     ⁵ അവൻ എന്റെ ശത്രുക്കൾക്ക് തിന്മ പകരം ചെയ്യും;

     നിന്റെ വിശ്വസ്തതയാൽ അവരെ സംഹരിച്ചുകളയണമേ.

     ⁶ സ്വമേധാദാനത്തോടെ ഞാൻ നിനക്ക് ഹനനയാഗം കഴിക്കും;

     “യഹോവേ, നിന്റെ നാമം നല്ലത്” എന്നു ചൊല്ലി ഞാൻ സ്തോത്രം ചെയ്യും.

     ⁷ അവൻ എന്നെ സകലകഷ്ടത്തിൽനിന്നും വിടുവിച്ചിരിക്കുന്നു;

     എന്റെ കണ്ണ് എന്റെ ശത്രുക്കളെ കണ്ട് രസിക്കും.

സങ്കീർത്തനം. 54 55

     ¹ ദൈവമേ, എന്റെ പ്രാർത്ഥന ശ്രദ്ധിക്കണമേ;

     എന്റെ യാചനയ്ക്ക് മറഞ്ഞിരിക്കരുതേ.

     ² എനിക്ക് ചെവിതന്ന് ഉത്തരമരുളണമേ;

     ശത്രുവിന്റെ കൂക്കുവിളി നിമിത്തവും ദുഷ്ടന്റെ പീഡ നിമിത്തവും

     ഞാൻ എന്റെ സങ്കടത്തിൽ പൊറുതിയില്ലാതെ ഞരങ്ങുന്നു.

     ³ അവർ എന്റെ മേൽ നീതികേട് ചുമത്തുന്നു;

     കോപത്തോടെ എന്നെ ഉപദ്രവിക്കുന്നു.

     ⁴ എന്റെ ഹൃദയം എന്റെ ഉള്ളിൽ വേദനപ്പെട്ടിരിക്കുന്നു;

     മരണഭീതിയും എന്റെമേൽ വീണിരിക്കുന്നു.

     ⁵ ഭയവും വിറയലും എന്നെ പിടിച്ചിരിക്കുന്നു;

     പരിഭ്രമം എന്നെ മൂടിയിരിക്കുന്നു.

     ⁶ “പ്രാവിനെപ്പോലെ

     എനിക്ക് ചിറകുണ്ടായിരുന്നുവെങ്കിൽ!

     എന്നാൽ ഞാൻ പറന്നുപോയി വിശ്രമിക്കുമായിരുന്നു” എന്ന് ഞാൻ പറഞ്ഞു.

     ⁷ അതേ, ഞാൻ ദൂരത്ത് സഞ്ചരിച്ച്,

     മരുഭൂമിയിൽ പാർക്കുമായിരുന്നു! സേലാ.

     ⁸ ഞാൻ കൊടുങ്കാറ്റിൽനിന്നും പെരുങ്കാറ്റിൽനിന്നും ബദ്ധപ്പെട്ട്

     ഒരു സങ്കേതത്തിലേക്ക് ഓടിപ്പോകുമായിരുന്നു!

     ⁹ കർത്താവേ, അവരുടെ നാവുകളെ നശിപ്പിച്ച് വികലമാക്കണമേ.

     ഞാൻ നഗരത്തിൽ അതിക്രമവും കലഹവും കണ്ടിരിക്കുന്നു.

     ¹⁰ രാവും പകലും അവർ അതിന്റെ മതിലുകളിന്മേൽ ചുറ്റി സഞ്ചരിക്കുന്നു;

     നീതികേടും കഷ്ടവും അതിന്റെ അകത്തുണ്ട്.

     ¹¹ ദുഷ്ടത അതിന്റെ നടുവിൽ ഉണ്ട്;

     ചതിവും വഞ്ചനയും അതിന്റെ വീഥികളെ വിട്ടുമാറുന്നതുമില്ല.

     ¹² എന്നെ നിന്ദിച്ചത് ഒരു ശത്രുവല്ല; അങ്ങനെയെങ്കിൽ ഞാൻ സഹിക്കുമായിരുന്നു;

     എന്റെ നേരെ വമ്പ് പറഞ്ഞത് എന്നെ വെറുക്കുന്നവനല്ല;

     അങ്ങനെയെങ്കിൽ ഞാൻ മറഞ്ഞുകൊള്ളുമായിരുന്നു.

     ¹³ നീയോ എന്നോടു സമനായ മനുഷ്യനും എന്റെ സഖിയും

     എന്റെ പ്രാണസ്നേഹിതനുമായിരുന്നു.

     ¹⁴ നാം തമ്മിൽ മധുരസമ്പർക്കം ചെയ്ത്

     പുരുഷാരവുമായി ദൈവാലയത്തിലേക്ക് പോയിരുന്നല്ലോ.

     ¹⁵ മരണം പെട്ടെന്ന് അവരെ പിടിക്കട്ടെ;

     അവർ ജീവനോടെ പാതാളത്തിലേക്ക് ഇറങ്ങട്ടെ;

     ദുഷ്ടത അവരുടെ വാസസ്ഥലത്തും അവരുടെ ഉള്ളിലും ഉണ്ട്.

     ¹⁶ ഞാൻ ദൈവത്തെ വിളിച്ചപേക്ഷിക്കും;

     യഹോവ എന്നെ രക്ഷിക്കും.

     ¹⁷ ഞാൻ വൈകുന്നേരത്തും കാലത്തും ഉച്ചയ്ക്കും സങ്കടം ബോധിപ്പിച്ച് കരയും;

     അവൻ എന്റെ പ്രാർത്ഥന കേൾക്കും.

     ¹⁸ എന്നോടു എതിർത്തു നിന്നവർ അനേകം പേരായിരുന്നു. അവർ ആരും എന്നോട് അടുക്കാത്തവിധം അവൻ

     എന്റെ പ്രാണനെ വീണ്ടെടുത്ത് സമാധാനത്തിലാക്കി;

     ¹⁹ കാലം ആരംഭിക്കുന്നതിനുമുമ്പ് സിംഹാസനസ്ഥനായ ദൈവം എന്റെ നിലവിളികേട്ട് അവരെ തോല്പിക്കും. സേലാ.

     അവർക്ക് മാനസാന്തരമില്ല; അവർ ദൈവത്തെ ഭയപ്പെടുന്നതുമില്ല.

     ²⁰ തന്നോട് സമാധാനമായിരിക്കുന്നവരെ കയ്യേറ്റം ചെയ്ത്

     തന്റെ സഖ്യത അവൻ ലംഘിച്ചിരിക്കുന്നു.

     ²¹ അവന്റെ വായ് വെണ്ണപോലെ മൃദുവായത്;

     ഹൃദയത്തിലോ യുദ്ധമത്രേ.

     അവന്റെ വാക്കുകൾ എണ്ണയെക്കാൾ മയമുള്ളവ;

     എങ്കിലും അവ ഊരിയ വാളുകൾ ആയിരുന്നു.

     ²² നിന്റെ ഭാരം യഹോവയുടെമേൽ വച്ചുകൊള്ളുക;

     അവൻ നിന്നെ പുലർത്തും;

     നീതിമാൻ കുലുങ്ങിപ്പോകുവാൻ അവൻ ഒരുനാളും സമ്മതിക്കുകയില്ല.

     ²³ ദൈവമേ, നീ അവരെ നാശത്തിന്റെ കുഴിയിലേക്ക് ഇറക്കും;

     കൊലപാതകവും കാപട്യവും ഉള്ളവർ ആയുസ്സിന്റെ പകുതിയോളം ജീവിക്കുകയില്ല;

     എന്നാൽ ഞാൻ അങ്ങയിൽ ആശ്രയിക്കും.

സങ്കീർത്തനം.55 56

     ¹ ദൈവമേ, എന്നോട് കൃപയുണ്ടാകണമേ;

     മനുഷ്യർ എന്നെ വിഴുങ്ങുവാൻ പോകുന്നു;

     അവർ ഇടവിടാതെ പൊരുതി എന്നെ ഞെരുക്കുന്നു.

     ² എന്റെ ശത്രുക്കൾ ഇടവിടാതെ എന്നെ വേട്ടയാടുവാൻ ഭാവിക്കുന്നു;

     ഗർവ്വത്തോടെ എന്നോട് പൊരുതുന്നവർ അനേകരാണല്ലോ.

     ³ ഞാൻ ഭയപ്പെടുമ്പോൾ നാളിൽ നിന്നിൽ ആശ്രയിക്കും.

     ⁴ ഞാൻ ദൈവത്തിൽ അവന്റെ വചനത്തെ പുകഴ്ത്തും;

     ഞാൻ ദൈവത്തിൽ ആശ്രയിക്കുന്നു; ഞാൻ ഭയപ്പെടുകയില്ല.

     ജഡികമനുഷ്യന് എന്നോട് എന്തു ചെയ്യുവാൻ കഴിയും?

     ⁵ ഇടവിടാതെ അവർ എന്റെ വാക്കുകൾ വളച്ചൊടിക്കുന്നു;

     അവരുടെ വിചാരങ്ങളെല്ലാം എന്റെ നേരെ തിന്മയ്ക്കായിട്ടാകുന്നു.

     ⁶ അവർ കൂട്ടംകൂടി ഒളിച്ചിരിക്കുന്നു;

     എന്റെ പ്രാണനായി പതിയിരിക്കുന്നതുപോലെ

     അവർ എന്റെ കാലടികളെ നോക്കിക്കൊണ്ടിരിക്കുന്നു.

     ⁷ നീതികേടിനാൽ അവർ രക്ഷപെടുമോ?

     ദൈവമേ, നിന്റെ കോപത്തിൽ ജനതകളെ തള്ളിയിടണമേ.

     ⁸ എന്റെ ലക്ഷ്യമില്ലാത്ത നടപ്പുകൾ നീ എണ്ണുന്നു;

     എന്റെ കണ്ണുനീർ നിന്റെ തുരുത്തിയിൽ സൂക്ഷിക്കണമേ;

     അത് നിന്റെ പുസ്തകത്തിൽ ഇല്ലയോ?

     ⁹ ഞാൻ വിളിച്ചപേക്ഷിക്കുമ്പോൾ തന്നെ എന്റെ ശത്രുക്കൾ പിന്തിരിയുന്നു;

     ദൈവം എനിക്ക് അനുകൂലമെന്ന് ഞാൻ അറിയുന്നു.

     ¹⁰ ഞാൻ ദൈവത്തിൽ, അവന്റെ വചനത്തിൽ തന്നെ പുകഴും;

     ഞാൻ യഹോവയിൽ അവന്റെ വചനത്തിൽ പ്രശംസിക്കും.

     ¹¹ ഞാൻ ദൈവത്തിൽ ആശ്രയിക്കുന്നു; ഞാൻ ഭയപ്പെടുകയില്ല.

     മനുഷ്യന് എന്നോട് എന്തു ചെയ്യുവാൻ കഴിയും?

     ¹² ദൈവമേ, നിനക്കുള്ള നേർച്ചകൾ കഴിക്കുവാൻ ഞാൻ കടമ്പെട്ടിരിക്കുന്നു;

     ഞാൻ നിനക്ക് സ്തോത്രയാഗങ്ങൾ അർപ്പിക്കും.

     ¹³ ഞാൻ ദൈവമുമ്പാകെ ജീവന്റെ പ്രകാശത്തിൽ നടക്കേണ്ടതിന്

     നീ എന്റെ പ്രാണനെ മരണത്തിൽ നിന്നും

     എന്റെ കാലുകളെ ഇടർച്ചയിൽനിന്നും വിടുവിച്ചുവല്ലോ.

സങ്കീർത്തനം.56 57

     ¹ ദൈവമേ, എന്നോട് കൃപയുണ്ടാകണമേ;

     എന്നോട് കൃപയുണ്ടാകണമേ;

     ഞാൻ നിന്നെ ശരണം പ്രാപിക്കുന്നു;

     അതേ, ഈ ആപത്തുകൾ ഒഴിഞ്ഞുപോകുംവരെ

     ഞാൻ നിന്റെ ചിറകിൻ നിഴലിൽ ശരണം പ്രാപിക്കുന്നു.

     ² അത്യുന്നതനായ ദൈവത്തെ ഞാൻ വിളിച്ചപേക്ഷിക്കുന്നു;

     എനിക്കുവേണ്ടി സകലവും നിർവ്വഹിക്കുന്ന ദൈവത്തെ തന്നെ.

     ³ എന്നെ വിഴുങ്ങുവാൻ ഭാവിക്കുന്നവർ എന്നെ നിന്ദിക്കുമ്പോൾ

     അവൻ സ്വർഗ്ഗത്തിൽനിന്ന് കൈനീട്ടി എന്നെ രക്ഷിക്കും. സേലാ.

     ദൈവം തന്റെ ദയയും വിശ്വസ്തതയും അയയ്ക്കുന്നു.

     ⁴ എന്റെ പ്രാണൻ സിംഹങ്ങളുടെ ഇടയിൽ ഇരിക്കുന്നു;

     അഗ്നിജ്വലിക്കുന്നവരുടെ നടുവിൽ ഞാൻ കിടക്കുന്നു;

     പല്ലുകൾ കുന്തങ്ങളോ അസ്ത്രങ്ങളോ, നാവ് മൂർച്ചയുള്ള വാളോ ആയിരിക്കുന്ന മനുഷ്യപുത്രന്മാരുടെ ഇടയിൽ തന്നെ.

     ⁵ ദൈവമേ, നീ ആകാശത്തിന് മീതെ ഉയർന്നിരിക്കണമേ;

     നിന്റെ മഹത്വം സർവ്വഭൂമിയിലും പരക്കട്ടെ.

     ⁶ അവർ എന്റെ കാലടികൾക്ക് മുമ്പിൽ ഒരു വല വിരിച്ചു;

     എന്റെ മനസ്സ് ഇടിഞ്ഞിരിക്കുന്നു;

     അവർ എന്റെ മുമ്പിൽ ഒരു കുഴി കുഴിച്ചു;

     അതിൽ അവർ തന്നെ വീണു. സേലാ.

     ⁷ എന്റെ മനസ്സ് ഉറച്ചിരിക്കുന്നു;

     ദൈവമേ, എന്റെ മനസ്സ് ഉറച്ചിരിക്കുന്നു;

     ഞാൻ പാടും; ഞാൻ കീർത്തനം ചെയ്യും.

     ⁸ എൻ സ്തുതിയേ, ഉണരുക;

     വീണയും കിന്നരവുമേ, ഉണരുവിൻ!

     ഞാൻ തന്നെ പ്രഭാതകാലത്ത് ഉണരും.

     ⁹ കർത്താവേ, വംശങ്ങളുടെ ഇടയിൽ ഞാൻ നിനക്ക് സ്തോത്രം ചെയ്യും;

     ജനതകളുടെ മദ്ധ്യേ ഞാൻ നിനക്ക് കീർത്തനം ചെയ്യും.

     ¹⁰ നിന്റെ ദയ ആകാശത്തോളവും

     നിന്റെ വിശ്വസ്തത മേഘങ്ങളോളം വലുതല്ലയോ?.

     ¹¹ ദൈവമേ, നീ ആകാശത്തിന് മീതെ ഉയർന്നിരിക്കണമേ;

     നിന്റെ മഹത്വം സർവ്വഭൂമിയ്ക്കും ഉപരിയായി പരക്കട്ടെ.

സങ്കീർത്തനം.57 58

     ¹ ദേവന്മാരേ, നിങ്ങൾ വാസ്തവമായി നീതി പ്രസ്താവിക്കുന്നുവോ?

     മനുഷ്യപുത്രന്മാരേ, നിങ്ങൾ പരമാർത്ഥമായി വിധിക്കുന്നുവോ?

     ² നിങ്ങൾ ഹൃദയത്തിൽ ദുഷ്ടത പ്രവർത്തിക്കുന്നു;

     ഭൂമിയിൽ നിങ്ങളുടെ കൈകളുടെ നിഷ്ഠൂരത തൂക്കിക്കൊടുക്കുന്നു.

     ³ ദുഷ്ടന്മാർ ഗർഭംമുതൽ ഭ്രഷ്ടന്മാരായിരിക്കുന്നു;

     അവർ ജനനംമുതൽ ഭോഷ്കു പറഞ്ഞ് തെറ്റിനടക്കുന്നു.

     ⁴ അവരുടെ വിഷം സർപ്പവിഷംപോലെ;

     അവർ ചെവിയടച്ചുകളയുന്ന പൊട്ടയണലിപോലെയാകുന്നു.

     ⁵ എത്ര സാമർത്ഥ്യത്തോടെ മകുടി ഊതിയാലും പാമ്പാട്ടിയുടെ

     ശബ്ദം അത് കേൾക്കുകയില്ല.

     ⁶ ദൈവമേ, അവരുടെ വായിലെ പല്ലുകൾ തകർക്കണമേ;

     യഹോവേ, ബാലസിംഹങ്ങളുടെ അണപ്പല്ലുകൾ തകർത്തുകളയണമേ.

     ⁷ ഒഴുകിപ്പോകുന്ന വെള്ളംപോലെ അവർ ഉരുകിപ്പോകട്ടെ;

     അവൻ തന്റെ അമ്പുകൾ തൊടുക്കുമ്പോൾ അവ ഒടിഞ്ഞുപോയതുപോലെ ആകട്ടെ.

     ⁸ അലിഞ്ഞു പോകുന്ന ഒച്ചു പോലെ അവർ ആകട്ടെ;

     ഗർഭം അലസിപ്പോയ സ്ത്രീയുടെ ചാപിള്ളപോലെ അവർ സൂര്യനെ കാണാതിരിക്കട്ടെ.

     ⁹ നിങ്ങളുടെ കലങ്ങൾക്ക് മുൾതീയുടെ ചൂട് തട്ടുന്നതിനു മുമ്പ് പച്ചയും വെന്തതുമായ മാംസമെല്ലാം ഒരുപോലെ അവൻ ചുഴലിക്കാറ്റിനാൽ പാറ്റിക്കളയും.

     ¹⁰ നീതിമാൻ പ്രതിക്രിയ കണ്ട് ആനന്ദിക്കും;

     അവൻ തന്റെ കാലുകൾ ദുഷ്ടന്മാരുടെ രക്തത്തിൽ കഴുകും.

     ¹¹ ആകയാൽ, “നീതിമാന് പ്രതിഫലം ഉണ്ട് നിശ്ചയം;

     ഭൂമിയിൽ ന്യായംവിധിക്കുന്ന ഒരു ദൈവം ഉണ്ട് നിശ്ചയം”

     എന്ന് മനുഷ്യർ പറയും.

സങ്കീർത്തനം.58 59

     ¹ എന്റെ ദൈവമേ, എന്റെ ശത്രുക്കളുടെ കൈയിൽനിന്ന് എന്നെ വിടുവിക്കണമേ;

     എനിയ്ക്ക് എതിരെ എഴുന്നേറ്റിരിക്കുന്നവരിൽ നിന്ന് എനിക്ക് സംരക്ഷണം നൽകണമേ.

     ² നീതികേട് പ്രവർത്തിക്കുന്നവരുടെ കൈയിൽ നിന്ന് എന്നെ മോചിപ്പിച്ച്

     രക്തദാഹികളുടെ പക്കൽനിന്ന് എന്നെ രക്ഷിക്കണമേ.

     ³ ഇതാ, അവർ എന്റെ പ്രാണനുവേണ്ടി പതിയിരിക്കുന്നു;

     യഹോവേ, ബലവാന്മാർ എന്റെ നേരെ കൂട്ടം കൂടുന്നത്

     എന്റെ അതിക്രമം നിമിത്തമല്ല, എന്റെ പാപം ഹേതുവായിട്ടുമല്ല.

     ⁴ എന്റെ പക്കൽ അകൃത്യം ഇല്ലെങ്കിലും അവർ എനിക്കെതിരെ ഓടി ഒരുങ്ങുന്നു;

     എന്നെ സഹായിക്കുവാൻ ഉണർന്ന് കടാക്ഷിക്കണമേ.

     ⁵ സൈന്യങ്ങളുടെ ദൈവമായ യഹോവേ, യിസ്രായേലിന്റെ ദൈവമേ,

     സകല ജനതകളെയും സന്ദർശിക്കേണ്ടതിന് നീ ഉണരണമേ;

     നീതികെട്ട ദ്രോഹികളിൽ ആരോടും കൃപ തോന്നരുതേ. സേലാ.

     ⁶ സന്ധ്യാസമയത്ത് അവർ മടങ്ങിവരുന്നു;

     നായെപ്പോലെ കുരച്ചുകൊണ്ട് അവർ പട്ടണത്തിന് ചുറ്റും നടക്കുന്നു.

     ⁷ അവർ അവരുടെ വായ്കൊണ്ട് ശകാരിക്കുന്നു;

     വാളുകൾ അവരുടെ അധരങ്ങളിൽ ഉണ്ട്;

     “ആര് കേൾക്കും” എന്ന് അവർ പറയുന്നു.

     ⁸ എങ്കിലും യഹോവേ, നീ അവരെ നോക്കി ചിരിക്കും;

     നീ സകലജാതികളെയും പരിഹസിക്കും.

     ⁹ എന്റെ ബലമായുള്ള യഹോവേ, ഞാൻ നിന്നെ കാത്തിരിക്കും;

     ദൈവം എന്റെ ഗോപുരമാകുന്നു.

     ¹⁰ എന്റെ ദൈവം തന്റെ കരുണയിൽ എന്നെ എതിരേല്ക്കും;

     ഞാൻ എന്റെ ശത്രുക്കളെ കണ്ട് രസിക്കുവാൻ ദൈവം ഇടയാക്കും.

     ¹¹ അവരെ കൊന്നുകളയരുതേ; എന്റെ ജനം മറക്കാതിരിക്കേണ്ടതിന് തന്നെ;

     ഞങ്ങളുടെ പരിചയാകുന്ന കർത്താവേ,

     നിന്റെ ശക്തികൊണ്ട് അവരെ ചിതറിച്ച് താഴ്ത്തണമേ.

     ¹² അവരുടെ വായിലെ പാപവും അധരങ്ങളിലെ വാക്കുകളും നിമിത്തം

     അവർ അവരുടെ അഹങ്കാരത്തിൽ പിടിക്കപ്പെടട്ടെ.

     ¹³ അവർ പറയുന്ന ശാപവാക്കുകളും ഭോഷ്ക്കും നിമിത്തം കോപത്തോടെ അവരെ സംഹരിക്കണമേ;

     അവർ ഇല്ലാതെയാകുംവണ്ണം അവരെ സംഹരിച്ചുകളയണമേ;

     ദൈവം യാക്കോബിൽ വാഴുന്നു

     എന്ന് ഭൂമിയുടെ അറ്റംവരെ അറിയുമാറാകട്ടെ. സേലാ.

     ¹⁴ സന്ധ്യാസമയത്ത് അവർ മടങ്ങിവരുന്നു;

     നായെപ്പോലെ കുരച്ചുകൊണ്ട് അവർ നഗരത്തിന് ചുറ്റും നടക്കുന്നു.

     ¹⁵ അവർ ആഹാരത്തിനായി അലഞ്ഞു നടക്കുന്നു;

     തൃപ്തിയായില്ലെങ്കിൽ അവർ രാത്രിമുഴുവനും കാത്തിരിക്കുന്നു.

     ¹⁶ ഞാൻ നിന്റെ ബലത്തെക്കുറിച്ച് പാടും;

     അതികാലത്ത് ഞാൻ നിന്റെ ദയയെക്കുറിച്ച് ഘോഷിച്ചാനന്ദിക്കും.

     കഷ്ടകാലത്ത് നീ എന്റെ ഗോപുരവും അഭയസ്ഥാനവും ആയിരുന്നു.

     ¹⁷ എന്റെ ബലമായുള്ള യഹോവേ, ഞാൻ നിനക്ക് സ്തുതിപാടും;

     എന്റെ ഗോപുരവും എന്നോട് ദയകാണിക്കുകയും ചെയ്യുന്ന ദൈവത്തിനു തന്നെ.

സങ്കീർത്തനം.59 60

     ¹ ദൈവമേ, നീ ഞങ്ങളെ തള്ളിക്കളഞ്ഞ് ചിതറിച്ചിരിക്കുന്നു;

     നീ കോപിച്ചിരിക്കുന്നു; ഞങ്ങളെ യഥാസ്ഥാനത്താക്കണമേ.

     ² നീ ഭൂമിയെ നടുക്കി ഭിന്നിപ്പിച്ചിരിക്കുന്നു;

     അത് കുലുങ്ങുകയാൽ അതിന്റെ വിള്ളലുകളെ നന്നാക്കണമേ.

     ³ നീ നിന്റെ ജനത്തെ കാഠിന്യം അനുഭവിപ്പിച്ചു;

     പരിഭ്രമത്തിന്റെ വീഞ്ഞ് നീ ഞങ്ങളെ കുടിപ്പിച്ചിരിക്കുന്നു.

     ⁴ സത്യം നിമിത്തം ഉയർത്തേണ്ടതിന്

     നീ നിന്റെ ഭക്തന്മാർക്ക് ഒരു കൊടി നല്കിയിരിക്കുന്നു. സേലാ.

     ⁵ നിനക്ക് പ്രിയമുള്ളവർ വിടുവിക്കപ്പെടേണ്ടതിന്

     നിന്റെ വലങ്കൈകൊണ്ട് രക്ഷിച്ച് ഞങ്ങൾക്ക് ഉത്തരമരുള ണമേ.

     ⁶ ദൈവം തന്റെ വിശുദ്ധിയിൽ അരുളിച്ചെയ്തു: “ഞാൻ ആഹ്ലാദിക്കും; ഞാൻ ശെഖേമിനെ വിഭാഗിച്ച് സുക്കോത്ത് താഴ്വര അളക്കും.

     ⁷ ഗിലെയാദ് എനിക്കുള്ളത്; മനശ്ശെയും എനിക്കുള്ളത്;

     എഫ്രയീം എന്റെ ശിരോകവചവും യെഹൂദാ എന്റെ ചെങ്കോലും ആകുന്നു.

     ⁸ മോവാബ് എനിക്ക് കഴുകുവാനുള്ള വട്ടക;

     ഏദോമിന്മേൽ ഞാൻ എന്റെ ചെരിപ്പ് എറിയും;

     ഫെലിസ്ത്യദേശമേ, നീ എന്റെനിമിത്തം ജയഘോഷം കൊള്ളുക!”

     ⁹ ഉറപ്പുള്ള നഗരത്തിലേക്ക് എന്നെ ആര് കൊണ്ടുപോകും?

     ഏദോമിലേക്ക് എന്നെ ആര് വഴി നടത്തും?

     ¹⁰ ദൈവമേ, നീ ഞങ്ങളെ തള്ളിക്കളഞ്ഞില്ലയോ?

     ദൈവമേ നീ ഞങ്ങളുടെ സൈന്യങ്ങളോടു കൂടി പുറപ്പെടുന്നതുമില്ല.

     ¹¹ വൈരിയുടെ നേരെ ഞങ്ങൾക്ക് സഹായം ചെയ്യണമേ;

     മനുഷ്യന്റെ സഹായം വ്യർത്ഥമല്ലോ.

     ¹² ദൈവത്താൽ നാം വീര്യം പ്രവർത്തിക്കും;

     അവൻ തന്നെ നമ്മുടെ വൈരികളെ മെതിച്ചുകളയും.

സങ്കീർത്തനം.60 61

     ¹ ദൈവമേ, എന്റെ നിലവിളി കേൾക്കണമേ;

     എന്റെ പ്രാർത്ഥന ശ്രദ്ധിക്കണമേ.

     ² എന്റെ ഹൃദയം ക്ഷീണിക്കുമ്പോൾ

     ഞാൻ ഭൂമിയുടെ അറ്റത്തുനിന്ന് നിന്നെ വിളിച്ചപേക്ഷിക്കും;

     എനിക്ക് അത്യുന്നതമായ പാറയിലേക്ക് എന്നെ നടത്തണമേ.

     ³ നീ എനിക്കൊരു സങ്കേതവും ശത്രുവിന്റെ നേരെ

     ഉറപ്പുള്ള ഗോപുരവും ആയിരിക്കുന്നുവല്ലോ.

     ⁴ ഞാൻ നിന്റെ കൂടാരത്തിൽ എന്നേക്കും വസിക്കും;

     നിന്റെ ചിറകിൻ മറവിൽ ഞാൻ ശരണം പ്രാപിക്കും. സേലാ.

     ⁵ ദൈവമേ, നീ എന്റെ നേർച്ചകൾ കേട്ട്,

     നിന്റെ നാമത്തെ ഭയപ്പെടുന്നവരുടെ അവകാശം എനിക്ക് തന്നിരിക്കുന്നു.

     ⁶ നീ രാജാവിന്റെ ആയുസ്സിനെ ദീർഘമാക്കും;

     അവന്റെ സംവത്സരങ്ങൾ തലമുറതലമുറയോളം ഇരിക്കും.

     ⁷ അവൻ എന്നേക്കും ദൈവസന്നിധിയിൽ വസിക്കും;

     അവനെ പരിപാലിക്കേണ്ടതിന് ദയയും വിശ്വസ്തതയും കല്പിക്കണമേ,

     ⁸ അങ്ങനെ ഞാൻ തിരുനാമത്തെ എന്നേക്കും കീർത്തിക്കുകയും

     എന്റെ നേർച്ചകളെ നാൾതോറും കഴിക്കുകയും ചെയ്യും.

സങ്കീർത്തനം.61 62

     ¹ എന്റെ ഉള്ളം ദൈവത്തെ നോക്കി മൗനമായിരിക്കുന്നു;

     എന്റെ രക്ഷ അവനിൽനിന്ന് വരുന്നു.

     ² അവൻ തന്നെ എന്റെ പാറയും എന്റെ രക്ഷയും ആകുന്നു;

     എന്റെ ഗോപുരം അവൻ തന്നെ; ഞാൻ ഏറെ കുലുങ്ങുകയില്ല.

     ³ നിങ്ങൾ എല്ലാവരും ചാഞ്ഞ മതിലും ആടുന്ന വേലിയുംപോലെ

     ഒരു മനുഷ്യനെ കൊല്ലുവാൻ എത്രത്തോളം അവനെ ആക്രമിക്കും?

     ⁴ അവന്റെ ഉന്നത പദവിയിൽനിന്ന് അവനെ തള്ളിയിടുവാനത്രേ അവർ നിരൂപിക്കുന്നത്;

     അവർ ഭോഷ്കിൽ ഇഷ്ടപ്പെടുന്നു; വായ്കൊണ്ടു അവർ അനുഗ്രഹിക്കുന്നു;

     എങ്കിലും ഉള്ളംകൊണ്ട് അവർ ശപിക്കുന്നു. സേലാ.

     ⁵ എന്റെ ഉള്ളമേ, ദൈവത്തെ നോക്കി മൗനമായിരിക്കുക;

     എന്റെ പ്രത്യാശ അവനിൽനിന്ന് വരുന്നു.

     ⁶ എന്റെ പാറയും എന്റെ രക്ഷയും അവൻ തന്നെ ആകുന്നു;

     എന്റെ ഗോപുരം അവൻ തന്നെ; ഞാൻ കുലുങ്ങുകയില്ല.

     ⁷ ദൈവം എന്റെ രക്ഷയും, മഹത്വവും, എന്റെ ബലത്തിന്റെ പാറയും ആകുന്നു;

     എന്റെ രക്ഷാസങ്കേതവും അവൻ തന്നെ.

     ⁸ ജനമേ, എല്ലാകാലത്തും അവനിൽ ആശ്രയിക്കുവിൻ;

     നിങ്ങളുടെ ഹൃദയം അവന്റെ മുമ്പിൽ പകരുവിൻ;

     ദൈവം നമുക്ക് സങ്കേതമാകുന്നു. സേലാ.

     ⁹ സാമാന്യജനം ഒരു ശ്വാസവും ശ്രേഷ്ഠജനം ഭോഷ്കുമത്രേ;

     തുലാസിന്റെ തട്ടിൽ അവർ പൊങ്ങിപ്പോകും;

     അവർ ഒരു ശ്വാസത്തേക്കാൾ ലഘുവാകുന്നു.

     ¹⁰ പീഡനത്തിൽ ആശ്രയിക്കരുത്; കവർച്ചയിൽ മയങ്ങിപ്പോകരുത്;

     സമ്പത്ത് വർദ്ധിച്ചാൽ അതിൽ മനസ്സ് വയ്ക്കരുത്;

     ¹¹ “ശക്തി ദൈവത്തിനുള്ളത്”എന്ന് ദൈവം ഒരിക്കൽ അരുളിച്ചെയ്തു,

     ഞാൻ രണ്ടുപ്രാവശ്യം കേട്ടുമിരിക്കുന്നു.

     ¹² കർത്താവേ, ദയയും നിനക്കുള്ളതാകുന്നു;

     നീ ഓരോരുത്തന് അവനവന്റെ പ്രവൃത്തിക്കു തക്കവണ്ണം പകരം നല്കുന്നു.

സങ്കീർത്തനം.62 63

     ¹ ദൈവമേ, നീ എന്റെ ദൈവം; അതികാലത്ത് ഞാൻ നിന്നെ അന്വേഷിക്കും;

     വെള്ളമില്ലാതെ ഉണങ്ങി വരണ്ട ദേശത്ത് എന്റെ ഉള്ളം നിനക്കായി ദാഹിക്കുന്നു;

     എന്റെ ദേഹം നിനക്കായി കാംക്ഷിക്കുന്നു.

     ² അങ്ങനെ നിന്റെ ബലവും മഹത്വവും കാണുവാൻ

     ഞാൻ വിശുദ്ധമന്ദിരത്തിൽ നിന്നെ കാത്തിരിക്കുന്നു.

     ³ നിന്റെ ദയ ജീവനെക്കാൾ നല്ലതാകുന്നു;

     എന്റെ അധരങ്ങൾ നിന്നെ സ്തുതിക്കും.

     ⁴ എന്റെ ജീവകാലം മുഴുവൻ ഞാൻ അങ്ങനെ നിന്നെ വാഴ്ത്തും;

     നിന്റെ നാമത്തിൽ ഞാൻ എന്റെ കൈകളെ മലർത്തും.

     ⁵ എന്റെ കിടക്കയിൽ നിന്നെ ഓർക്കുകയും

     രാത്രിയാമങ്ങളിൽ നിന്നെ ധ്യാനിക്കുകയും ചെയ്യുമ്പോൾ

     ⁶ എന്റെ പ്രാണന് മജ്ജയും മേദസ്സുംകൊണ്ട് എന്നപോലെ തൃപ്തിവരുന്നു;

     എന്റെ വായ് സന്തോഷമുള്ള അധരങ്ങളാൽ നിന്നെ സ്തുതിക്കുന്നു.

     ⁷ നീ എനിക്ക് സഹായമായിത്തീർന്നുവല്ലോ;

     നിന്റെ ചിറകിൻ നിഴലിൽ ഞാൻ ഘോഷിച്ചാനന്ദിക്കുന്നു.

     ⁸ എന്റെ ഉള്ളം നിന്നോട് പറ്റിയിരിക്കുന്നു;

     നിന്റെ വലങ്കൈ എന്നെ താങ്ങുന്നു.

     ⁹ എന്നാൽ എനിക്ക് പ്രാണഹാനി വരുത്തുവാൻ നോക്കുന്നവർ

     ഭൂമിയുടെ അധോഭാഗങ്ങളിലേക്ക് ഇറങ്ങിപ്പോകും.

     ¹⁰ അവരെ വാളിന്റെ ശക്തിക്ക് ഏല്പിക്കും;

     കുറുനരികൾക്ക് അവർ ഇരയായിത്തീരും.

     ¹¹ എന്നാൽ രാജാവ് ദൈവത്തിൽ സന്തോഷിക്കും;

     അവന്റെ നാമത്തിൽ സത്യം ചെയ്യുന്നവനെല്ലാം പ്രശംസിക്കപ്പെടും ;

     എങ്കിലും ഭോഷ്കു പറയുന്നവരുടെ വായ് അടഞ്ഞുപോകും.

സങ്കീർത്തനം.63 64

     ¹ ദൈവമേ, എന്റെ സങ്കടത്തിൽ ഞാൻ കഴിക്കുന്ന അപേക്ഷ കേൾക്കണമേ;

     ശത്രുഭയത്തിൽനിന്ന് എന്റെ ജീവനെ പാലിക്കണമേ;

     ² ദുഷ്കർമ്മികളുടെ ഗൂഢാലോചനയിലും

     നീതികേട് പ്രവർത്തിക്കുന്നവരുടെ കൂട്ടത്തിലും ഞാൻ അകപ്പെടാതെ എന്നെ മറച്ചു കൊള്ളണമേ.

     ³ അവർ അവരുടെ നാവിനെ വാൾപോലെ മൂർച്ചയാക്കുന്നു;

     നിഷ്കളങ്കനെ ഒളിച്ചിരുന്ന് എയ്യേണ്ടതിന്

     ⁴ അവർ കൈപ്പുള്ള വാക്കായ അസ്ത്രം തൊടുക്കുകയും

     ശങ്കിക്കാതെ പെട്ടെന്ന് അവനെ എയ്തുകളയുകയും ചെയ്യുന്നു.

     ⁵ തിന്മയായ കാര്യത്തിൽ അവർ അവരെത്തന്നെ ഉറപ്പിക്കുന്നു;

     ഒളിച്ച് കെണിവയ്ക്കുവാൻ തമ്മിൽ ആലോചിക്കുന്നു;

     “നമ്മെ ആര് കാണും” എന്ന് അവർ പറയുന്നു.

     ⁶ അവർ ദ്രോഹസൂത്രങ്ങൾ കണ്ടുപിടിക്കുന്നു;

     നാം ഒരു സൂക്ഷ്മസൂത്രം കണ്ടുപിടിച്ചു എന്ന് പറയുന്നു;

     മനുഷ്യന്റെ അന്തരംഗവും ഹൃദയവും അഗാധം തന്നെ.

     ⁷ എന്നാൽ ദൈവം അവരെ എയ്യും;

     അമ്പുകൊണ്ട് അവർ പെട്ടന്ന് മുറിവേല്ക്കും.

     ⁸ അങ്ങനെ സ്വന്തനാവ് അവർക്ക് വിരോധമായിരിക്കുകയാൽ

     അവർ ഇടറിവീഴുവാൻ ഇടയാകും;

     അവരെ കാണുന്നവരെല്ലാം പരിഹാസത്തോടെ തല കുലുക്കുന്നു.

     ⁹ അങ്ങനെ സകലമനുഷ്യരും ഭയപ്പെട്ട് ദൈവത്തിന്റെ പ്രവൃത്തിയെപ്പറ്റി പ്രസ്താവിക്കും;

     അവന്റെ പ്രവൃത്തിയെപ്പറ്റി അവർ ചിന്തിക്കും.

     ¹⁰ നീതിമാൻ യഹോവയിൽ ആനന്ദിച്ച് അവനെ ശരണമാക്കും;

     ഹൃദയപരമാർത്ഥികൾ എല്ലാവരും പ്രശംസിക്കപ്പെടും .

സങ്കീർത്തനം.64 65

     ¹ ദൈവമേ, സീയോനിൽ നിന്നെ സ്തുതിക്കുന്നത് യോഗ്യം തന്നെ;

     നിനക്കു തന്നെ നേർച്ച കഴിക്കുന്നു.

     ² പ്രാർത്ഥന കേൾക്കുന്ന ദൈവമേ,

     സകലജഡവും നിന്റെ അടുക്കലേക്ക് വരുന്നു.

     ³ എന്റെ അകൃത്യങ്ങൾ എന്റെ നേരെ പ്രബലമായിരിക്കുന്നു;

     അങ്ങ് ഞങ്ങളുടെ അതിക്രമങ്ങൾക്ക് പരിഹാരം വരുത്തും.

     ⁴ നിന്റെ പ്രാകാരങ്ങളിൽ വസിക്കേണ്ടതിന് നീ തിരഞ്ഞെടുത്ത് അടുപ്പിക്കുന്ന മനുഷ്യൻ ഭാഗ്യവാൻ;

     ഞങ്ങൾ നിന്റെ വിശുദ്ധമന്ദിരമായ നിന്റെ ആലയത്തിലെ നന്മകൊണ്ട് തൃപ്തരാകും.

     ⁵ ഭൂമിയുടെ അറുതികൾക്കും ദൂരത്തുള്ള സമുദ്രത്തിനും

     ആശ്രയമായിരിക്കുന്ന ഞങ്ങളുടെ രക്ഷയായ ദൈവമേ,

     നീ ഭയങ്കരകാര്യങ്ങളാൽ നീതിയോടെ ഞങ്ങൾക്ക് ഉത്തരമരുളുന്നു.

     ⁶ അവൻ ബലം അരയ്ക്ക് കെട്ടിക്കൊണ്ട് തന്റെ ശക്തിയാൽ പർവ്വതങ്ങളെ ഉറപ്പിക്കുന്നു.

     ⁷ അവൻ സമുദ്രങ്ങളുടെ മുഴക്കവും തിരമാലകളുടെ കോപവും

     ജനതകളുടെ കലഹവും ശമിപ്പിക്കുന്നു.

     ⁸ ഭൂസീമാവാസികളും നിന്റെ അടയാളങ്ങൾ നിമിത്തം ഭയപ്പെടുന്നു;

     ഉദയത്തിന്റെയും അസ്തമയത്തിന്റെയും ദിക്കുകളെ നീ ഘോഷിച്ചുല്ലസിക്കുമാറാക്കുന്നു.

     ⁹ നീ ഭൂമിയെ സന്ദർശിച്ച് നനയ്ക്കുന്നു; നീ അതിനെ അത്യന്തം പുഷ്ടിയുള്ളതാക്കുന്നു;

     ദൈവത്തിന്റെ നദിയിൽ വെള്ളം നിറഞ്ഞിരിക്കുന്നു;

     ഇങ്ങനെ നീ ഭൂമിയെ ഒരുക്കി അവർക്ക് ധാന്യം കൊടുക്കുന്നു.

     ¹⁰ നീ അതിന്റെ ഉഴവുചാലുകളെ നനയ്ക്കുന്നു;

     നീ അതിന്റെ കട്ട ഉടച്ച് നിരത്തുന്നു;

     മഴയാൽ നീ അതിനെ കുതിർക്കുന്നു;

     അതിലെ മുളയെ നീ അനുഗ്രഹിക്കുന്നു.

     ¹¹ നീ സംവത്സരത്തെ നിന്റെ നന്മകൊണ്ട് അലങ്കരിക്കുന്നു;

     നിന്റെ പാതകൾ പുഷ്ടിപൊഴിക്കുന്നു.

     ¹² മരുഭൂമിയിലെ പുല്പുറങ്ങൾ പുഷ്ടിപൊഴിക്കുന്നു;

     കുന്നുകൾ ഉല്ലാസം ധരിക്കുന്നു.

     ¹³ മേച്ചല്പുറങ്ങൾ ആട്ടിൻകൂട്ടങ്ങൾകൊണ്ട് നിറഞ്ഞിരിക്കുന്നു;

     താഴ്വരകൾ ധാന്യംകൊണ്ട് മൂടിയിരിക്കുന്നു;

     അവ ആർക്കുകയും പാടുകയും ചെയ്യുന്നു.

സങ്കീർത്തനം.65 66

     ¹ സർവ്വഭൂമിയും, ദൈവത്തെ ആഘോഷിക്കട്ടെ;

     ² അവന്റെ നാമത്തിന്റെ മഹത്വം കീർത്തിക്കുവിൻ;

     അവന്റെ സ്തുതി മഹത്വപൂർണമാക്കുവിൻ.

     ³ “നിന്റെ പ്രവൃത്തികൾ എത്ര ഭയങ്കരം;

     നിന്റെ ശക്തിയുടെ വലിപ്പത്താൽ ശത്രുക്കൾ നിനക്ക് കീഴടങ്ങും;

     ⁴ സർവ്വഭൂമിയും നിന്നെ നമസ്കരിച്ച് പാടും;

     അവർ നിന്റെ നാമത്തിന് കീർത്തനം പാടും” എന്നിങ്ങനെ ദൈവത്തോട് പറയുവിൻ. സേലാ.

     ⁵ വന്ന് ദൈവത്തിന്റെ പ്രവൃത്തികളെ നോക്കുവിൻ;

     അവൻ മനുഷ്യപുത്രന്മാരോടുള്ള തന്റെ പ്രവൃത്തിയിൽ ഭയങ്കരൻ.

     ⁶ അവൻ സമുദ്രത്തെ ഉണങ്ങിയ നിലമാക്കി;

     അവർ കാൽനടയായി നദി കടന്നുപോയി;

     അവിടെ നാം അവനിൽ സന്തോഷിച്ചു.

     ⁷ അവൻ തന്റെ ശക്തിയാൽ എന്നേക്കും വാഴുന്നു;

     അവന്റെ കണ്ണ് ജനതകളെ നോക്കുന്നു;

     മത്സരക്കാർ സ്വയം ഉയർത്തരുതേ. സേലാ.

     ⁸ വംശങ്ങളേ, നമ്മുടെ ദൈവത്തെ വാഴ്ത്തുവിൻ;

     അവന്റെ സ്തുതി ഉച്ചത്തിൽ കേൾപ്പിക്കുവിൻ.

     ⁹ അവൻ നമ്മെ ജീവനോടെ കാക്കുന്നു;

     നമ്മുടെ കാലടികൾ വഴുതുവാൻ സമ്മതിക്കുന്നതുമില്ല.

     ¹⁰ ദൈവമേ, നീ ഞങ്ങളെ പരിശോധിച്ചിരിക്കുന്നു;

     വെള്ളി ഊതിക്കഴിക്കും പോലെ നീ ഞങ്ങളെ ഊതിക്കഴിച്ചിരിക്കുന്നു.

     ¹¹ നീ ഞങ്ങളെ വലയിൽ അകപ്പെടുത്തി;

     ഞങ്ങളുടെ മുതുകത്ത് ഒരു വലിയ ഭാരം വച്ചിരിക്കുന്നു.

     ¹² നീ മനുഷ്യരെ ഞങ്ങളുടെ തലമേൽ കയറി ഓടിക്കുമാറാക്കി;

     ഞങ്ങൾ തീയിലും വെള്ളത്തിലും കൂടി കടക്കേണ്ടിവന്നു;

     എങ്കിലും നീ ഞങ്ങളെ സമൃദ്ധിയിലേക്കു കൊണ്ടുവന്നിരിക്കുന്നു.

     ¹³ ഞാൻ ഹോമയാഗങ്ങളുമായി നിന്റെ ആലയത്തിലേക്ക് വരും;

     നിനക്കുള്ള എന്റെ നേർച്ചകളെ ഞാൻ കഴിക്കും.

     ¹⁴ ഞാൻ കഷ്ടത്തിൽ ആയിരുന്നപ്പോൾ

     അവ എന്റെ അധരങ്ങളാൽ ഉച്ചരിച്ചു, എന്റെ വായാൽ നേർന്നു.

     ¹⁵ ഞാൻ ആട്ടുകൊറ്റന്മാരുടെ സൗരഭ്യവാസനയോടു കൂടി

     തടിച്ച മൃഗങ്ങളെ നിനക്ക് ഹോമയാഗം കഴിക്കും;

     ഞാൻ കാളകളെയും കോലാട്ടുകൊറ്റന്മാരെയും അർപ്പിക്കും. സേലാ.

     ¹⁶ സകലഭക്തന്മാരുമേ, വന്ന് കേൾക്കുവിൻ;

     അവൻ എന്റെ പ്രാണനു വേണ്ടി ചെയ്തത് ഞാൻ വിവരിക്കാം.

     ¹⁷ ഞാൻ എന്റെ അധരം കൊണ്ട് അവനോട് നിലവിളിച്ചു;

     എന്റെ നാവിന്മേൽ അവന്റെ പുകഴ്ച ഉണ്ടായിരുന്നു.

     ¹⁸ ഞാൻ എന്റെ ഹൃദയത്തിൽ അകൃത്യം കരുതിയിരുന്നുവെങ്കിൽ

     കർത്താവ് കേൾക്കുകയില്ലായിരുന്നു.

     ¹⁹ എന്നാൽ ദൈവം കേട്ടിരിക്കുന്നു;

     എന്റെ പ്രാർത്ഥനാശബ്ദം ശ്രദ്ധിച്ചിരിക്കുന്നു;

     ²⁰ എന്റെ പ്രാർത്ഥന തള്ളിക്കളയാതെയും

     തന്റെ ദയ എന്നിൽനിന്ന് എടുത്തുകളയാതെയും ഇരിക്കുന്ന ദൈവം വാഴ്ത്തപ്പെടുമാറാകട്ടെ.

സങ്കീർത്തനം.66 67

     ¹ ദൈവം നമ്മളോട് കൃപ ചെയ്ത് നമ്മളെ അനുഗ്രഹിക്കുമാറാകട്ടെ;

     അവൻ തന്റെ മുഖം നമ്മുടെമേൽ പ്രകാശിപ്പിക്കുമാറാകട്ടെ. സേലാ.

     ² നിന്റെ വഴി ഭൂമിയിലും നിന്റെ രക്ഷ സകല ജനതകളുടെ ഇടയിലും

     അറിയേണ്ടതിനു തന്നെ.

     ³ ദൈവമേ, ജനതകൾ നിന്നെ സ്തുതിക്കും;

     സകല ജനതകളും നിന്നെ സ്തുതിക്കും.

     ⁴ ജനതകൾ സന്തോഷിച്ച് ഘോഷിച്ചുല്ലസിക്കും;

     നീ വംശങ്ങളെ നേരോടെ വിധിച്ച്

     ഭൂമിയിലെ ജനതകളെ ഭരിക്കുന്നുവല്ലോ. സേലാ.

     ⁵ ദൈവമേ ജനതകൾ നിന്നെ സ്തുതിക്കും;

     സകല ജനതകളും നിന്നെ സ്തുതിക്കും.

     ⁶ ഭൂമി അതിന്റെ അനുഭവം തന്നിരിക്കുന്നു;

     ദൈവം, നമ്മുടെ ദൈവം തന്നെ, നമ്മെ അനുഗ്രഹിക്കും.

     ⁷ ദൈവം നമ്മെ അനുഗ്രഹിക്കും;

     ഭൂമിയുടെ അറുതികൾ എല്ലാം അവനെ ഭയപ്പെടും.

സങ്കീർത്തനം.67 68

     ¹ ദൈവം എഴുന്നേല്ക്കുമ്പോൾ അവന്റെ ശത്രുക്കൾ ചിതറിപ്പോകുന്നു;

     അവനെ വെറുക്കുന്നവരും അവന്റെ മുമ്പിൽ നിന്ന് ഓടിപ്പോകുന്നു.

     ² പുക പാറിപ്പോകുന്നതുപോലെ നീ അവരെ പാറിക്കുന്നു;

     തീയിൽ മെഴുക് ഉരുകുന്നതുപോലെ ദുഷ്ടന്മാർ ദൈവസന്നിധിയിൽ നശിക്കുന്നു.

     ³ എങ്കിലും നീതിമാന്മാർ സന്തോഷിച്ച് ദൈവ സന്നിധിയിൽ ഉല്ലസിക്കും;

     അതേ, അവർ സന്തോഷത്തോടെ ആനന്ദിക്കും.

     ⁴ ദൈവത്തിന് പാടുവിൻ, അവന്റെ നാമത്തിന് സ്തുതി പാടുവിൻ;

     മരുഭൂമിയിൽകൂടി വാഹനമേറി വരുന്നവന് വഴി നിരത്തുവിൻ;

     യാഹ് എന്നാകുന്നു അവന്റെ നാമം; അവന്റെ മുമ്പിൽ ഉല്ലസിക്കുവിൻ.

     ⁵ ദൈവം തന്റെ വിശുദ്ധനിവാസത്തിൽ

     അനാഥന്മാർക്ക് പിതാവും വിധവമാർക്ക് ന്യായപാലകനും ആകുന്നു.

     ⁶ ദൈവം ഏകാകികളെ കുടുംബത്തിൽ വസിക്കുമാറാക്കുന്നു;

     അവൻ ബദ്ധന്മാരെ വിടുവിച്ച് സൗഭാഗ്യത്തിലാക്കുന്നു;

     എന്നാൽ മത്സരികൾ വരണ്ട ദേശത്ത് വസിക്കും.

     ⁷ ദൈവമേ, നീ നിന്റെ ജനത്തിന് മുമ്പായി പുറപ്പെട്ട്

     മരുഭൂമിയിൽകൂടി എഴുന്നെള്ളിയപ്പോൾ - സേലാ -

     ⁸ ഭൂമി കുലുങ്ങി, ആകാശം ദൈവസന്നിധിയിൽ മഴ ചൊരിഞ്ഞു.

     ഈ സീനായി, യിസ്രായേലിന്റെ ദൈവത്തിന്റെ മുമ്പിൽ കുലുങ്ങിപ്പോയി.

     ⁹ ദൈവമേ, നീ ധാരാളം മഴ പെയ്യിച്ച്

     ക്ഷീണിച്ചിരുന്ന നിന്റെ അവകാശത്തെ തണുപ്പിച്ചു.

     ¹⁰ നിന്റെ ജനമായ ആട്ടിൻകൂട്ടം അതിൽ വസിച്ചു;

     ദൈവമേ, നിന്റെ ദയയാൽ നീ അത് എളിയവർക്കുവേണ്ടി ഒരുക്കിവച്ചു.

     ¹¹ കർത്താവ് ആജ്ഞ കൊടുക്കുന്നു;

     അത് വിളംബരം ചെയ്യുന്നവർ വലിയോരു കൂട്ടമാകുന്നു.

     ¹² സൈന്യങ്ങളുടെ രാജാക്കന്മാർ ഓടുന്നു, അതെ അവർ ഓടുന്നു;

     വീട്ടിൽ പാർക്കുന്നവൾ കവർച്ച പങ്കിടുന്നു.

     ¹³ നിങ്ങൾ തൊഴുത്തുകളുടെ ഇടയിൽ കിടന്നാലും

     പ്രാവിന്റെ ചിറക് വെള്ളികൊണ്ടും അതിന്റെ തൂവലുകൾ പൊന്നു കൊണ്ടും

     പൊതിഞ്ഞിരിക്കുന്നതുപോലെ ആകുന്നു.

     ¹⁴ സർവ്വശക്തൻ അവിടെ രാജാക്കന്മാരെ ചിതറിച്ചപ്പോൾ

     സല്മോനിൽ ഹിമം പെയ്യുകയായിരുന്നു.

     ¹⁵ ബാശാൻപർവ്വതം ദൈവത്തിന്റെ പർവ്വതമാകുന്നു.

     ബാശാൻ പർവ്വതം കൊടുമുടികളേറിയ പർവ്വതമാകുന്നു.

     ¹⁶ കൊടുമുടികളേറിയ പർവ്വതങ്ങളേ,

     ദൈവം വസിക്കുവാൻ ഇച്ഛിക്കുന്ന പർവ്വതത്തെ

     നിങ്ങൾ സ്പർദ്ധിച്ചുനോക്കുന്നത് എന്ത്?

     യഹോവ അതിൽ എന്നേക്കും വസിക്കും.

     ¹⁷ ദൈവത്തിന്റെ രഥങ്ങൾ ആയിരമായിരവും കോടി കോടിയുമാകുന്നു;

     കർത്താവ് അവരുടെ ഇടയിൽ,

     സീനായിൽ, വിശുദ്ധമന്ദിരത്തിൽ തന്നെ ഉണ്ട്.

     ¹⁸ നീ ഉയരത്തിലേക്കു കയറി, ബദ്ധന്മാരെ പിടിച്ചു കൊണ്ടുപോയി;

     യാഹ് എന്ന ദൈവം അവിടെ വസിക്കേണ്ടതിന്

     നീ മനുഷ്യരോട്, മത്സരികളോടു തന്നെ, കാഴ്ച വാങ്ങിയിരിക്കുന്നു.

     ¹⁹ നമ്മുടെ രക്ഷയാകുന്ന ദൈവമായി,

     നാൾതോറും നമ്മുടെ ഭാരങ്ങൾ ചുമക്കുന്ന കർത്താവ് വാഴ്ത്തപ്പെടുമാറാകട്ടെ. സേലാ.

     ²⁰ നമ്മുടെ ദൈവം നമുക്ക് രക്ഷയുടെ ദൈവം ആകുന്നു;

     മരണത്തിൽനിന്നുള്ള നീക്കുപോക്കുകൾ കർത്താവായ യഹോവയ്ക്കുള്ളവ തന്നെ.

     ²¹ അതേ, ദൈവം തന്റെ ശത്രുക്കളുടെ തലയും

     തന്റെ അകൃത്യത്തിൽ നടക്കുന്നവന്റെ രോമാവൃതമായ ശിരസ്സും തകർത്തുകളയും.

     ²² നീ നിന്റെ ശത്രുക്കളുടെ രക്തത്തിൽ കാല് മുക്കേണ്ടതിനും

     അവരുടെ മാംസത്തിൽ നിന്റെ നായ്ക്കളുടെ നാവിന് ഓഹരി കിട്ടേണ്ടതിനും

     ²³ ഞാൻ അവരെ ബാശാനിൽനിന്ന് മടക്കിവരുത്തും;

     സമുദ്രത്തിന്റെ ആഴങ്ങളിൽനിന്ന് അവരെ മടക്കിവരുത്തും.

     ²⁴ ദൈവമേ, അവർ നിന്റെ എഴുന്നെള്ളത്ത് കണ്ടു;

     എന്റെ ദൈവവും രാജാവുമായവന്റെ വിശുദ്ധമന്ദിരത്തിലേക്കുള്ള എഴുന്നെള്ളത്തു തന്നേ.

     ²⁵ സംഗീതക്കാർ മുമ്പിൽ നടന്നു; വീണക്കാർ പിമ്പിൽ നടന്നു;

     തപ്പുകൊട്ടുന്ന കന്യകമാർ ഇരുപുറവും നടന്നു.

     ²⁶ യിസ്രായേലിന്റെ ഉറവിൽനിന്നുള്ള ഏവരുമേ,

     സഭായോഗങ്ങളിൽ നിങ്ങൾ കർത്താവായ ദൈവത്തെ വാഴ്ത്തുവിൻ.

     ²⁷ അവിടെ അവരുടെ നായകനായ ഇളയ ബെന്യാമീനും

     യെഹൂദാപ്രഭുക്കന്മാരും അവരുടെ സംഘവും

     സെബൂലൂൻപ്രഭുക്കന്മാരും നഫ്താലിപ്രഭുക്കന്മാരും ഉണ്ട്.

     ²⁸ നിന്റെ ദൈവം നിനക്കായി ബലം കല്പിച്ചിരിക്കുന്നു;

     ദൈവമേ, നീ ഞങ്ങൾക്കു വേണ്ടി പ്രവർത്തിച്ചതിനെ സ്ഥിരപ്പെടുത്തണമേ.

     ²⁹ യെരൂശലേമിലുള്ള നിന്റെ മന്ദിരംനിമിത്തം

     രാജാക്കന്മാർ നിനക്ക് കാഴ്ച കൊണ്ടുവരും.

     ³⁰ ഞാങ്ങണയുടെ ഇടയിലെ ദുഷ്ടജന്തുവിനെയും

     ജനതകൾ വെള്ളിവാളങ്ങളോടുകൂടി വന്ന് കീഴടങ്ങുംവരെ

     അവരുടെ കാളക്കൂട്ടത്തെയും പശുക്കിടാക്കളെയും ശാസിക്കണമേ;

     യുദ്ധതല്പരന്മാരായ ജനതകളെ ചിതറിക്കണമേ.

     ³¹ ഈജിപ്റ്റിൽനിന്ന് മഹത്തുക്കൾ വരും;

     കൂശ് വേഗത്തിൽ തന്റെ കൈകളെ ദൈവത്തിങ്കലേക്ക് നീട്ടും.

     ³² ഭൂമിയിലെ രാജ്യങ്ങളെ, ദൈവത്തിന് പാട്ടുപാടുവിൻ;

     കർത്താവിന് കീർത്തനം ചെയ്യുവിൻ. സേലാ.

     ³³ പുരാതനമായ സ്വർഗ്ഗാധിസ്വർഗ്ഗങ്ങളിൽ വാഹനമേറുന്നവന് പാടുവിൻ!

     ഇതാ, അവൻ തന്റെ ശബ്ദത്തെ,

     ബലമേറിയ ശബ്ദത്തെ കേൾപ്പിക്കുന്നു.

     ³⁴ ദൈവത്തിന്റെ ശക്തി അംഗീകരിക്കുവിൻ;

     അവന്റെ മഹിമ യിസ്രായേലിന്മേലും അവന്റെ ബലം മേഘങ്ങളിലും വിളങ്ങുന്നു.

     ³⁵ ദൈവമേ, നിന്റെ വിശുദ്ധമന്ദിരത്തിൽ നിന്ന് നീ ഭയങ്കരനായി ശോഭിക്കുന്നു;

     യിസ്രായേലിന്റെ ദൈവം തന്റെ ജനത്തിന് ശക്തിയും ബലവും കൊടുക്കുന്നു.

     ദൈവം വാഴ്ത്തപ്പെടുമാറാകട്ടെ.

സങ്കീർത്തനം.68 69

     ¹ ദൈവമേ, എന്നെ രക്ഷിക്കണമേ;

     വെള്ളം എന്റെ പ്രാണനോളം എത്തിയിരിക്കുന്നു.

     ² ഞാൻ നിലയില്ലാത്ത ആഴമുള്ള ചേറ്റിൽ താഴുന്നു;

     ആഴമുള്ള വെള്ളത്തിൽ ഞാൻ മുങ്ങിപ്പോകുന്നു;

     പ്രവാഹങ്ങൾ എന്റെ മീതെ കവിഞ്ഞൊഴുകുന്നു.

     ³ എന്റെ നിലവിളികൊണ്ട് ഞാൻ തളർന്നിരിക്കുന്നു;

     എന്റെ തൊണ്ട വരണ്ടിരിക്കുന്നു;

     ദൈവത്തെ കാത്തിരുന്ന് എന്റെ കണ്ണ് മങ്ങിപ്പോകുന്നു.

     ⁴ കാരണംകൂടാതെ എന്നെ വെറുക്കുന്നവർ എന്റെ തലയിലെ രോമങ്ങളേക്കാളും അധികമാകുന്നു;

     വൃഥാ എന്റെ ശത്രുക്കളായി എന്നെ സംഹരിക്കുവാൻ ഭാവിക്കുന്നവർ പെരുകിയിരിക്കുന്നു;

     ഞാൻ മോഷ്ടിക്കാത്തത് തിരികെ കൊടുക്കേണ്ടിവരുന്നു.

     ⁵ ദൈവമേ, നീ എന്റെ ഭോഷത്തം അറിയുന്നു;

     എന്റെ അകൃത്യങ്ങൾ നിനക്ക് മറഞ്ഞിരിക്കുന്നില്ല.

     ⁶ സൈന്യങ്ങളുടെ യഹോവയായ കർത്താവേ,

     നിന്നിൽ പ്രത്യാശ വയ്ക്കുന്നവർ എന്റെ നിമിത്തം ലജ്ജിച്ചുപോകരുതേ;

     യിസ്രായേലിന്റെ ദൈവമേ, നിന്നെ അന്വേഷിക്കുന്നവർ എന്റെ നിമിത്തം നാണിച്ചുപോകരുതേ.

     ⁷ നിന്റെനിമിത്തം ഞാൻ നിന്ദ സഹിച്ചു;

     ലജ്ജ എന്റെ മുഖത്തെ മൂടിയിരിക്കുന്നു.

     ⁸ എന്റെ സഹോദരന്മാർക്ക് ഞാൻ പരദേശിയും

     എന്റെ അമ്മയുടെ മക്കൾക്ക് അന്യനും ആയി തീർന്നിരിക്കുന്നു.

     ⁹ നിന്റെ ആലയത്തെക്കുറിച്ചുള്ള എരിവ് എന്നെ തിന്നുകളഞ്ഞു;

     നിന്നെ നിന്ദിക്കുന്നവരുടെ നിന്ദ എന്റെമേൽ വീണിരിക്കുന്നു.

     ¹⁰ ഞാൻ കരഞ്ഞുകൊണ്ട് ഉപവാസത്താൽ ആത്മതപനം ചെയ്തു.

     അതും എനിക്ക് നിന്ദയായി തീർന്നു;

     ¹¹ ഞാൻ ചണവസ്ത്രം എന്റെ ഉടുപ്പാക്കി;

     ഞാൻ അവർക്ക് പഴഞ്ചൊല്ലായിതീർന്നു.

     ¹² പട്ടണവാതില്ക്കൽ ഇരിക്കുന്നവർ എന്നെക്കുറിച്ചു സംസാരിക്കുന്നു;

     ഞാൻ മദ്യപന്മാരുടെ പാട്ടായിരിക്കുന്നു.

     ¹³ ഞാനോ യഹോവേ, പ്രസാദകാലത്ത് നിന്നോട് പ്രാർത്ഥിക്കുന്നു;

     ദൈവമേ, നിന്റെ ദയയുടെ ബഹുത്വത്താൽ,

     നിന്റെ വിശ്വസ്തതയാൽ തന്നെ, എന്നെ രക്ഷിച്ച് ഉത്തരമരുളണമേ.

     ¹⁴ ചേറ്റിൽനിന്ന് എന്നെ കയറ്റണമേ; ഞാൻ താണുപോകരുതേ;

     എന്നെ വെറുക്കുന്നവരുടെ കയ്യിൽനിന്നും ആഴമുള്ള വെള്ളത്തിൽനിന്നും എന്നെ രക്ഷിക്കണമേ.

     ¹⁵ ജലപ്രവാഹം എന്റെ മീതെ കവിയരുതേ;

     ആഴം എന്നെ വിഴുങ്ങരുതേ;

     കുഴിയിൽ ഞാൻ അടയ്ക്കപ്പെട്ടുപോകരുതെ.

     ¹⁶ യഹോവേ, എനിക്കുത്തരമരുളണമേ;

     നിന്റെ ദയ നല്ലതല്ലോ;

     നിന്റെ കരുണയുടെ ബഹുത്വപ്രകാരം എന്നിലേക്ക് തിരിയണമേ;

     ¹⁷ അടിയന് തിരുമുഖം മറയ്ക്കരുതേ;

     ഞാൻ കഷ്ടത്തിൽ ഇരിക്കുകയാൽ വേഗത്തിൽ എനിക്ക് ഉത്തരമരുളണമേ.

     ¹⁸ എന്റെ പ്രാണനോട് അടുത്തുവന്ന് അതിനെ വീണ്ടുകൊള്ളണമേ;

     എന്റെ ശത്രുക്കൾനിമിത്തം എന്നെ വീണ്ടെടുക്കണമേ.

     ¹⁹ എന്റെ നിന്ദയും ലജ്ജയും അപമാനവും നീ അറിയുന്നു;

     എന്റെ വൈരികൾ എല്ലാവരും നിന്റെ ദൃഷ്ടിയിൽ ഇരിക്കുന്നു.

     ²⁰ നിന്ദ എന്റെ ഹൃദയത്തെ തകർത്തു,

     ഞാൻ ഏറ്റവും വിഷാദിച്ചിരിക്കുന്നു;

     ആർക്കെങ്കിലും സഹതാപം തോന്നുമോ എന്ന് ഞാൻ നോക്കിക്കൊണ്ടിരുന്നു; ആർക്കും തോന്നിയില്ല;

     ആശ്വസിപ്പിക്കുന്നവരുണ്ടോ എന്നും നോക്കിക്കൊണ്ടിരുന്നു; ആരെയും കണ്ടില്ലതാനും.

     ²¹ അവർ എനിക്ക് തിന്നുവാൻ കൈപ്പു തന്നു;

     എന്റെ ദാഹത്തിന് അവർ എനിക്കു ചൊറുക്ക കുടിക്കുവാൻ തന്നു.

     ²² അവരുടെ മേശ അവരുടെ മുമ്പിൽ കെണിയായും

     അവർ സമാധാനത്തോടിരിക്കുമ്പോൾ കുടുക്കായും തീരട്ടെ.

     ²³ അവരുടെ കണ്ണു കാണാത്തവണ്ണം ഇരുണ്ടുപോകട്ടെ;

     അവരുടെ അര എപ്പോഴും വിറയ്ക്കുമാറാകട്ടെ..

     ²⁴ നിന്റെ ക്രോധം അവരുടെമേൽ പകരണമേ;

     നിന്റെ ഉഗ്രകോപം അവരെ പിടിക്കുമാറാകട്ടെ.

     ²⁵ അവരുടെ വാസസ്ഥലം ശൂന്യമായിപ്പോകട്ടെ;

     അവരുടെ കൂടാരങ്ങളിൽ ആരും പാർക്കാതിരിക്കട്ടെ.

     ²⁶ നീ ദണ്ഡിപ്പിച്ചവനെ അവർ വീണ്ടും ഉപദ്രവിക്കുന്നു;

     നീ മുറിവേല്പിച്ചവരുടെ വേദന അവർ വിവരിക്കുന്നു.

     ²⁷ അവരുടെ അകൃത്യത്തോട് അകൃത്യം കൂട്ടണമേ;

     നിന്റെ നീതി അവർ പ്രാപിക്കരുതേ.

     ²⁸ ജീവന്റെ പുസ്തകത്തിൽനിന്ന് അവരെ മായിച്ചുകളയണമേ;

     നീതിമാന്മാരോടുകൂടി അവരെ എഴുതരുതേ.

     ²⁹ ഞാനോ എളിയവനും ദുഃഖിതനും ആകുന്നു;

     ദൈവമേ, നിന്റെ രക്ഷ എന്നെ ഉയർത്തുമാറാകട്ടെ.

     ³⁰ ഞാൻ പാട്ടോടെ ദൈവത്തിന്റെ നാമത്തെ സ്തുതിക്കും;

     സ്തോത്രത്തോടെ അവനെ മഹത്വപ്പെടുത്തും.

     ³¹ അത് യഹോവയ്ക്ക് കാളയെക്കാളും

     കൊമ്പും കുളമ്പും ഉള്ള മൂരിയെക്കാളും പ്രസാദകരമാകും.

     ³² സൗമ്യതയുള്ളവർ അതു കണ്ട് സന്തോഷിക്കും;

     ദൈവത്തെ അന്വേഷിക്കുന്നവരേ, നിങ്ങളുടെ ഹൃദയം ജീവിക്കട്ടെ.

     ³³ യഹോവ ദരിദ്രന്മാരുടെ പ്രാർത്ഥന കേൾക്കുന്നു;

     തന്റെ ബദ്ധന്മാരെ നിന്ദിക്കുന്നതുമില്ല;

     ³⁴ ആകാശവും ഭൂമിയും സമുദ്രങ്ങളും

     അവയിൽ ചരിക്കുന്ന സകലവും അവനെ സ്തുതിക്കട്ടെ.

     ³⁵ ദൈവം സീയോനെ രക്ഷിക്കും; അവൻ യെഹൂദാനഗരങ്ങളെ പണിയും;

     അവർ അവിടെ പാർത്ത് അതിനെ കൈവശമാക്കും.

     ³⁶ അവന്റെ ദാസന്മാരുടെ സന്തതി അതിനെ അവകാശമാക്കും;

     അവന്റെ നാമത്തെ സ്നേഹിക്കുന്നവർ അതിൽ വസിക്കും.

സങ്കീർത്തനം.69 70

     ¹ ദൈവമേ, എന്നെ വിടുവിക്കുവാൻ,

     യഹോവേ, എന്നെ സഹായിക്കുവാൻ വേഗം വരണമേ.

     ² എനിക്കു പ്രാണഹാനി വരുത്തുവാൻ നോക്കുന്നവർ ലജ്ജിച്ച് ഭ്രമിച്ചുപോകട്ടെ;

     എന്റെ അനർത്ഥത്തിൽ സന്തോഷിക്കുന്നവർ പിന്തിരിഞ്ഞ് അപമാനം ഏല്ക്കട്ടെ.

     ³ “നന്നായി നന്നായി” എന്നു പറയുന്നവർ അവരുടെ ലജ്ജ നിമിത്തം പിന്തിരിഞ്ഞു പോകട്ടെ.

     ⁴ നിന്നെ അന്വേഷിക്കുന്ന സകലരും നിന്നിൽ ആനന്ദിച്ചു സന്തോഷിക്കട്ടെ;

     നിന്റെ രക്ഷയെ പ്രിയപ്പെടുന്നവർ: “ദൈവം മഹത്വമുള്ളവൻ”എന്ന് എപ്പോഴും പറയട്ടെ.

     ⁵ ഞാൻ എളിയവനും ദരിദ്രനും ആകുന്നു;

     ദൈവമേ, എന്റെ അടുക്കൽ വേഗം വരണമേ;

     നീ തന്നെ എന്റെ സഹായവും എന്നെ വിടുവിക്കുന്നവനും ആകുന്നു;

     യഹോവേ, താമസിക്കരുതേ.

സങ്കീർത്തനം.70 71

     ¹ യഹോവേ, ഞാൻ നിന്നിൽ ആശ്രയിക്കുന്നു;

     ഞാൻ ഒരുനാളും ലജ്ജിച്ചുപോകരുതേ.

     ² നിന്റെ നീതിനിമിത്തം എന്നെ ഉദ്ധരിച്ച് വിടുവിക്കണമേ;

     നിന്റെ ചെവി എന്നിലേക്ക് ചായിച്ച് എന്നെ രക്ഷിക്കണമേ.

     ³ ഞാൻ എപ്പോഴും വന്ന് പാർക്കേണ്ടതിന് നീ എനിക്ക് ഉറപ്പുള്ള പാറയായിരിക്കണമേ;

     എന്നെ രക്ഷിക്കുവാൻ നീ കല്പിച്ചിരിക്കുന്നു;

     നീ എന്റെ പാറയും എന്റെ കോട്ടയും ആകുന്നുവല്ലോ.

     ⁴ എന്റെ ദൈവമേ, ദുഷ്ടന്റെ കൈയിൽ നിന്നും

     നീതികേടും ക്രൂരതയും ഉള്ളവന്റെ കൈയിൽ നിന്നും എന്നെ വിടുവിക്കണമേ.

     ⁵ യഹോവയായ കർത്താവേ, നീ എന്റെ പ്രത്യാശയാകുന്നു;

     ബാല്യംമുതൽ നീ എന്റെ ആശ്രയം തന്നേ.

     ⁶ ഗർഭംമുതൽ നീ എന്നെ താങ്ങിയിരിക്കുന്നു;

     എന്റെ അമ്മയുടെ ഉദരത്തിൽനിന്ന് എന്നെ എടുത്തവൻ നീ തന്നെ;

     എന്റെ സ്തുതി എപ്പോഴും നിന്നെക്കുറിച്ചാകുന്നു;

     ⁷ ഞാൻ പലർക്കും ഒരത്ഭുതം ആയിരിക്കുന്നു;

     നീ എന്റെ ബലമുള്ള സങ്കേതമാകുന്നു.

     ⁸ എന്റെ വായ് നിന്റെ സ്തുതികൊണ്ടും ഇടവിടാതെ നിന്റെ പ്രശംസകൊണ്ടും നിറഞ്ഞിരിക്കുന്നു.

     ⁹ വാർദ്ധക്യകാലത്ത് നീ എന്നെ തള്ളിക്കളയരുതേ;

     ബലം ക്ഷയിക്കുമ്പോൾ എന്നെ ഉപേക്ഷിക്കുകയുമരുതേ.

     ¹⁰ എന്റെ ശത്രുക്കൾ എന്നെക്കുറിച്ച് സംസാരിക്കുന്നു;

     എന്റെ പ്രാണഹാനിക്കായി കാത്തിരിക്കുന്നവർ ഗൂഢാലോചന നടത്തുന്നു..

     ¹¹ “ദൈവം അവനെ ഉപേക്ഷിച്ചിരിക്കുന്നു; പിന്തുടർന്ന് പിടിക്കുവിൻ;

     വിടുവിക്കുവാൻ ആരുമില്ല” എന്ന് അവർ പറയുന്നു.

     ¹² ദൈവമേ, എന്നോട് അകന്നിരിക്കരുതേ;

     എന്റെ ദൈവമേ, എന്നെ സഹായിക്കുവാൻ വേഗം വരണമേ.

     ¹³ എന്റെ പ്രാണന് വിരോധികളായവർ ലജ്ജിച്ച് നശിച്ചുപോകട്ടെ;

     എനിക്ക് അനർത്ഥം അന്വേഷിക്കുന്നവർ നിന്ദകൊണ്ടും ലജ്ജകൊണ്ടും മൂടിപ്പോകട്ടെ.

     ¹⁴ ഞാൻ എപ്പോഴും പ്രത്യാശിക്കും;

     ഞാൻ മേല്ക്കുമേൽ നിന്നെ സ്തുതിക്കും.

     ¹⁵ എന്റെ വായ് ഇടവിടാതെ നിന്റെ നീതിയെയും രക്ഷയെയും വർണ്ണിക്കും;

     അവയുടെ സംഖ്യ എനിക്ക് അറിഞ്ഞുകൂടാ.

     ¹⁶ ഞാൻ യഹോവയായ കർത്താവിന്റെ വീര്യപ്രവൃത്തികളോടുകൂടി വരും;

     നിന്റെ നീതിയെ മാത്രം ഞാൻ കീർത്തിക്കും.

     ¹⁷ ദൈവമേ, എന്റെ ബാല്യംമുതൽ നീ എന്നെ ഉപദേശിച്ചിരിക്കുന്നു;

     ഇന്നുവരെ ഞാൻ നിന്റെ അത്ഭുതപ്രവൃത്തികളെ അറിയിച്ചുമിരിക്കുന്നു.

     ¹⁸ ദൈവമേ, അടുത്ത തലമുറയോട് ഞാൻ നിന്റെ ഭുജബലത്തെയും

     വരുവാനുള്ള എല്ലാവരോടും നിന്റെ വീര്യപ്രവൃത്തിയെയും അറിയിക്കുവോളം

     വാർദ്ധക്യവും നരയും ഉള്ള കാലത്തും എന്നെ ഉപേക്ഷിക്കരുതേ.

     ¹⁹ ദൈവമേ, നിന്റെ നീതിയും അത്യുന്നതമായിരിക്കുന്നു;

     മഹാകാര്യങ്ങൾ പ്രവർത്തിച്ചിട്ടുള്ള ദൈവമേ,

     നിന്നോട് തുല്യൻ ആരാണുള്ളത്?

     ²⁰ അനവധി കഷ്ടങ്ങളും അനർത്ഥങ്ങളും ഞങ്ങളെ കാണുമാറാക്കിയവനേ,

     നീ ഞങ്ങളെ വീണ്ടും ജീവിപ്പിക്കും;

     ഭൂമിയുടെ ആഴങ്ങളിൽനിന്ന് ഞങ്ങളെ തിരികെ കയറ്റും.

     ²¹ നീ എന്റെ മഹത്വം വർദ്ധിപ്പിച്ച് എന്നെ വീണ്ടും ആശ്വസിപ്പിക്കണമേ.

     ²² എന്റെ ദൈവമേ, ഞാൻ വീണകൊണ്ട് നിന്നെയും നിന്റെ വിശ്വസ്തതയെയും സ്തുതിക്കും;

     യിസ്രായേലിന്റെ പരിശുദ്ധനേ, ഞാൻ കിന്നരം കൊണ്ട് നിനക്ക് സ്തുതിപാടും.

     ²³ ഞാൻ നിനക്ക് സ്തുതിപാടുമ്പോൾ എന്റെ അധരങ്ങളും

     നീ വീണ്ടെടുത്ത എന്റെ പ്രാണനും ഘോഷിച്ചാനന്ദിക്കും.

     ²⁴ എന്റെ നാവും ഇടവിടാതെ നിന്റെ നീതിയെക്കുറിച്ച് സംസാരിക്കും;

     എനിക്ക് ആപത്ത് അന്വേഷിക്കുന്നവർ ലജ്ജിച്ച് ഭ്രമിച്ചുപോയിരിക്കുന്നു.

സങ്കീർത്തനം.71 72

     ¹ ദൈവമേ, രാജാവിന് നിന്റെ ന്യായവും

     രാജകുമാരന് നിന്റെ നീതിയും നല്കണമേ.

     ² അവൻ നിന്റെ ജനത്തെ നീതിയോടും

     നിന്റെ എളിയജനത്തെ ന്യായത്തോടും കൂടി പരിപാലിക്കട്ടെ.

     ³ നീതിയാൽ പർവ്വതങ്ങളിലും കുന്നുകളിലും ജനത്തിന് സമാധാനം വിളയട്ടെ.

     ⁴ ജനത്തിലെ എളിയവർക്ക് അവൻ ന്യായം പാലിച്ചുകൊടുക്കട്ടെ;

     ദരിദ്രജനത്തെ അവൻ രക്ഷിക്കുകയും പീഡിപ്പിക്കുന്നവനെ തകർത്തുകളയുകയും ചെയ്യട്ടെ;

     ⁵ സൂര്യചന്ദ്രന്മാരുള്ള കാലത്തോളം

     അവർ തലമുറതലമുറയായി നിന്നെ ഭയപ്പെടട്ടെ.

     ⁶ അരിഞ്ഞ പുല്പുറത്ത് പെയ്യുന്ന മഴപോലെയും

     ഭൂമിയെ നനയ്ക്കുന്ന വന്മഴപോലെയും അവൻ ഇറങ്ങിവരട്ടെ.

     ⁷ അവന്റെ കാലത്ത് നീതിമാന്മാർ തഴയ്ക്കട്ടെ;

     ചന്ദ്രനുള്ളേടത്തോളം സമാധാനസമൃദ്ധി ഉണ്ടാകട്ടെ.

     ⁸ അവൻ സമുദ്രംമുതൽ സമുദ്രംവരെയും

     നദിമുതൽ ഭൂമിയുടെ അറ്റങ്ങൾവരെയും ഭരിക്കട്ടെ.

     ⁹ മരുഭൂമിയിൽ വസിക്കുന്നവർ അവന്റെ മുമ്പിൽ വണങ്ങട്ടെ;

     അവന്റെ ശത്രുക്കൾ നിലത്തെ പൊടിമണ്ണ് നക്കട്ടെ.

     ¹⁰ തർശീശിലെയും ദ്വീപുകളിലെയും രാജാക്കന്മാർ കാഴ്ച കൊണ്ടുവരട്ടെ;

     ശെബയിലെയും സെബയിലെയും രാജാക്കന്മാർ കപ്പം കൊടുക്കട്ടെ.

     ¹¹ സകലരാജാക്കന്മാരും അവനെ നമസ്കരിക്കട്ടെ;

     സകല ജനതകളും അവനെ സേവിക്കട്ടെ.

     ¹² അവൻ നിലവിളിക്കുന്ന ദരിദ്രനെയും

     സഹായമില്ലാത്ത എളിയവനെയും രക്ഷിക്കുമല്ലോ.

     ¹³ എളിയവനെയും ദരിദ്രനെയും അവൻ ആദരിക്കും;

     ദരിദ്രന്മാരുടെ ജീവനെ അവൻ രക്ഷിക്കും.

     ¹⁴ അവരുടെ പ്രാണനെ അവൻ പീഡയിൽ നിന്നും സാഹസത്തിൽനിന്നും വീണ്ടെടുക്കും;

     അവരുടെ രക്തം അവന് വിലയേറിയതായിരിക്കും.

     ¹⁵ അവൻ ജീവിച്ചിരിക്കും; ശെബയിൽ നിന്നുള്ള പൊന്ന് അവന് കാഴ്ചയായി കൊണ്ടു വരും;

     അവനുവേണ്ടി എപ്പോഴും പ്രാർത്ഥന കഴിക്കും;

     ഇടവിടാതെ അവനെ അനുഗ്രഹിക്കും.

     ¹⁶ ദേശത്ത് പർവ്വതങ്ങളുടെ മുകളിൽ ധാന്യസമൃദ്ധിയുണ്ടാകും;

     അതിന്റെ വിളവ് ലെബാനോനെപ്പോലെ ഉലയും;

     നഗരവാസികൾ ഭൂമിയിലെ സസ്യം പോലെ തഴയ്ക്കും.

     ¹⁷ അവന്റെ നാമം എന്നേക്കും നിലനില്ക്കും;

     അവന്റെ നാമം സൂര്യൻ ഉള്ളേടത്തോളം നിലനില്ക്കും;

     മനുഷ്യർ അവന്റെ പേര് ചൊല്ലി അന്യോന്യം അനുഗ്രഹിക്കും;

     സകലജാതികളും അവനെ ‘ഭാഗ്യവാൻ’ എന്നു പറയും.

     ¹⁸ താൻ മാത്രം അത്ഭുതങ്ങൾ ചെയ്യുന്നവനായി

     യിസ്രായേലിന്റെ ദൈവമായി യഹോവയായ ദൈവം വാഴ്ത്തപ്പെടുമാറാകട്ടെ.

     ¹⁹ അവന്റെ മഹത്വമുള്ള നാമം എന്നേക്കും വാഴ്ത്തപ്പെടുമാറാകട്ടെ;

     ഭൂമി മുഴുവനും അവന്റെ മഹത്വംകൊണ്ട് നിറയുമാറാകട്ടെ. ആമേൻ, ആമേൻ.

     ²⁰ യിശ്ശായിയുടെ പുത്രനായ ദാവീദിന്റെ പ്രാർത്ഥനകൾ അവസാനിച്ചിരിക്കുന്നു.

സങ്കീർത്തനം.72 73

     ¹ ദൈവം യിസ്രായേലിന്, നിർമ്മലഹൃദയം ഉള്ളവർക്കു തന്നെ,

     നിശ്ചയമായും നല്ലവൻ ആകുന്നു.

     ² എന്നാൽ എന്റെ കാലുകൾ ഏകദേശം ഇടറി;

     എന്റെ കാലടികൾ ഏറെക്കുറെ വഴുതിപ്പോയി.

     ³ ദുഷ്ടന്മാരുടെ സമൃദ്ധി കണ്ടിട്ട്

     എനിക്ക് അഹങ്കാരികളോട് അസൂയ തോന്നി.

     ⁴ അവർക്ക് ജീവപര്യന്തം വേദന ഒട്ടുമില്ല;

     അവരുടെ ദേഹം തടിച്ചുകൊഴുത്തിരിക്കുന്നു.

     ⁵ അവർ മർത്യരെപ്പോലെ കഷ്ടത്തിൽ ആകുന്നില്ല;

     മറ്റു മനുഷ്യരെപ്പോലെ രോഗത്താൽ ബാധിക്കപ്പെടുന്നതുമില്ല.

     ⁶ അതിനാൽ ഡംഭം അവർക്ക് മാലയായിരിക്കുന്നു;

     ബലാല്ക്കാരം വസ്ത്രംപോലെ അവരെ ചുറ്റിയിരിക്കുന്നു.

     ⁷ അവരുടെ കണ്ണുകൾ പുഷ്ടികൊണ്ട് ഉന്തിനില്ക്കുന്നു;

     അവരുടെ ഹൃദയത്തിലെ ഭോഷത്തമായ നിരൂപണങ്ങൾ കവിഞ്ഞൊഴുകുന്നു.

     ⁸ അവർ പരിഹസിച്ച് ദുഷ്ടതയോടെ ഭീഷണി പറയുന്നു;

     ഉന്നതഭാവത്തോടെ സംസാരിക്കുന്നു.

     ⁹ അവർ വായ് ആകാശത്തോളം ഉയർത്തുന്നു;

     അവരുടെ നാവ് ഭൂമിയിൽ സഞ്ചരിക്കുന്നു.

     ¹⁰ അതുകൊണ്ടു അവൻ തന്റെ ജനത്തെ ഇവിടേക്ക് കൊണ്ടുവരുന്നു.

     അവർ ധാരാളം വെള്ളം വലിച്ചുകുടിക്കുന്നു.

     ¹¹ “ദൈവം എങ്ങനെ അറിയുന്നു?

     അത്യുന്നതന് അറിവുണ്ടോ?” എന്ന് അവർ പറയുന്നു.

     ¹² ഇങ്ങനെ ആകുന്നു ദുഷ്ടന്മാർ;

     അവർ നിരന്തരം സ്വസ്ഥത അനുഭവിച്ച് സമ്പത്ത് വർദ്ധിപ്പിക്കുന്നു.

     ¹³ ആകയാൽ ഞാൻ എന്റെ ഹൃദയത്തെ ശുദ്ധീകരിച്ചതും

     എന്റെ കൈകൾ നിഷ്ക്കളങ്കതയിൽ കഴുകിയതും വ്യർത്ഥമത്രേ.

     ¹⁴ ഞാൻ ദിവസം മുഴുവൻ ബാധിതനായിരുന്നു;

     ഉഷസ്സുതോറും ദണ്ഡിക്കപ്പെട്ടും ഇരുന്നു.

     ¹⁵ ഞാൻ ഇപ്രകാരം സംസാരിക്കുവാൻ വിചാരിച്ചെങ്കിൽ,

     നിന്റെ മക്കളുടെ തലമുറയോട് ദ്രോഹം ചെയ്യുമായിരുന്നു.

     ¹⁶ ഞാൻ ഇത് സ്വയം ഗ്രഹിക്കുവാൻ നിരൂപിച്ചപ്പോൾ എനിക്ക് പ്രയാസമായി തോന്നി;

     ¹⁷ ഒടുവിൽ ഞാൻ ദൈവത്തിന്റെ വിശുദ്ധ മന്ദിരത്തിൽ ചെന്ന്

     അവരുടെ അന്ത്യം എന്താകും എന്ന് ചിന്തിച്ചു.

     ¹⁸ നിശ്ചയമായും നീ അവരെ വഴുവഴുപ്പിൽ നിർത്തുന്നു;

     നീ അവരെ നാശത്തിൽ തള്ളിയിടുന്നു.

     ¹⁹ എത്ര ക്ഷണത്തിൽ അവർ ശൂന്യമായിപ്പോയി!

     അവർ ഭയാനകമായ കാര്യങ്ങളാൽ അശേഷം മുടിഞ്ഞുപോയിരിക്കുന്നു.

     ²⁰ ഉണരുമ്പോൾ ഒരു സ്വപ്നം പോലെ, കർത്താവേ, അവർ ഉണരുമ്പോൾ നീ അവരുടെ രൂപത്തെ തുച്ഛീകരിക്കും.

     ²¹ ഇങ്ങനെ എന്റെ ഹൃദയം വ്യസനിക്കുകയും എന്റെ അന്തരംഗത്തിൽ കുത്തുകൊള്ളുകയും ചെയ്തപ്പോൾ

     ²² ഞാൻ ഭോഷനും ഒന്നും അറിയാത്തവനും ആയിരുന്നു;

     നിന്റെ മുമ്പിൽ മൃഗംപോലെ ആയിരുന്നു.

     ²³ എങ്കിലും ഞാൻ ഇപ്പോഴും നിന്റെ അടുക്കൽ ഇരിക്കുന്നു;

     നീ എന്നെ വലങ്കൈയ്ക്ക് പിടിച്ചിരിക്കുന്നു.

     ²⁴ നിന്റെ ആലോചനയാൽ നീ എന്നെ നടത്തും;

     പിന്നത്തേതിൽ മഹത്വത്തിലേക്ക് എന്നെ കൈക്കൊള്ളും.

     ²⁵ സ്വർഗ്ഗത്തിൽ നീ ഒഴികെ എനിക്ക് ആരാണുള്ളത്?

     ഭൂമിയിലും നിന്നെയല്ലാതെ ഞാൻ ഒന്നും ആഗ്രഹിക്കുന്നില്ല.

     ²⁶ എന്റെ മാംസവും ഹൃദയവും ക്ഷയിച്ചുപോകുന്നു;

     ദൈവം എന്നേക്കും എന്റെ ഹൃദയത്തിന്റെ പാറയും എന്റെ ഓഹരിയും ആകുന്നു.

     ²⁷ ഇതാ, നിന്നോട് അകന്നിരിക്കുന്നവർ നശിച്ചുപോകും;

     നിന്നെ വിട്ട് പരസംഗം ചെയ്യുന്ന എല്ലാവരെയും നീ സംഹരിക്കും.

     ²⁸ എന്നാൽ ദൈവത്തോട് അടുത്തിരിക്കുന്നത് എനിക്ക് നല്ലത്;

     നിന്റെ സകലപ്രവൃത്തികളെയും വർണ്ണിക്കേണ്ടതിന്

     ഞാൻ യഹോവയായ കർത്താവിനെ എന്റെ സങ്കേതമാക്കിയിരിക്കുന്നു.

സങ്കീർത്തനം.73 74

     ¹ ദൈവമേ, നീ ഞങ്ങളെ സദാകാലത്തേക്കും തള്ളിക്കളഞ്ഞത് എന്ത്?

     നിന്റെ മേച്ചില്പുറത്തെ ആടുകളുടെ നേരെ നിന്റെ കോപം പുകയുന്നത് എന്ത്?

     ² നീ പണ്ടുപണ്ടേ സമ്പാദിച്ച നിന്റെ സഭയെയും

     നീ വീണ്ടെടുത്ത നിന്റെ അവകാശഗോത്രത്തെയും

     നീ വസിച്ചിരുന്ന സീയോൻ പർവ്വതത്തെയും ഓർക്കണമേ.

     ³ നിത്യശൂന്യങ്ങളിലേക്ക് നിന്റെ കാലടി വയ്ക്കണമേ;

     ശത്രു വിശുദ്ധമന്ദിരത്തിൽ സകലവും നശിപ്പിച്ചിരിക്കുന്നു.

     ⁴ നിന്റെ വൈരികൾ നിന്റെ സമാഗമന സ്ഥലത്തിന്റെ നടുവിൽ അലറുന്നു;

     അവരുടെ കൊടികൾ അവർ അടയാളങ്ങളായി നാട്ടിയിരിക്കുന്നു.

     ⁵ അവർ മരക്കൂട്ടത്തിന്മേൽ കോടാലി ഓങ്ങുന്നതുപോലെ തോന്നി.

     ⁶ ഇതാ, അവർ മഴുകൊണ്ടും ചുറ്റിക കൊണ്ടും

     അതിന്റെ ചിത്രപ്പണികൾ മുഴുവനും തകർത്തുകളയുന്നു.

     ⁷ അവർ നിന്റെ വിശുദ്ധമന്ദിരം തീവച്ചു;

     തിരുനാമത്തിന്റെ നിവാസത്തെ അവർ ഇടിച്ചുനിരത്തി അശുദ്ധമാക്കി.

     ⁸ “നാം അവരെ നശിപ്പിച്ചുകളയുക” എന്ന് അവരുടെ ഹൃദയത്തിൽ പറഞ്ഞു,

     ദേശത്തിൽ ദൈവത്തിന്റെ ആലയങ്ങളെല്ലാം ചുട്ടുകളഞ്ഞു.

     ⁹ ഞങ്ങൾ ഒരു അടയാളവും കാണുന്നില്ല;

     യാതൊരു പ്രവാചകനും ശേഷിച്ചിട്ടില്ല;

     ഇത് എത്രത്തോളം എന്നറിയുന്നവൻ ആരും ഞങ്ങളുടെ ഇടയിൽ ഇല്ല.

     ¹⁰ ദൈവമേ, വൈരി എത്രത്തോളം നിന്ദിക്കും?

     ശത്രു നിന്റെ നാമത്തെ എന്നേക്കും ദുഷിക്കുമോ?

     ¹¹ നിന്റെ കൈ, നിന്റെ വലങ്കൈ നീ പിൻവലിച്ചുകളയുന്നത് എന്ത്?

     നിന്റെ മാറിൽ നിന്ന് അത് എടുത്ത് അവരെ നശിപ്പിക്കണമേ.

     ¹² ദൈവം പുരാതനമേ എന്റെ രാജാവാകുന്നു;

     ഭൂമിയുടെ മദ്ധ്യത്തിൽ അവൻ രക്ഷ പ്രവർത്തിക്കുന്നു.

     ¹³ നിന്റെ ശക്തികൊണ്ട് നീ സമുദ്രത്തെ വിഭാഗിച്ചു;

     വെള്ളത്തിലുള്ള തിമിംഗലങ്ങളുടെ തല ഉടച്ചുകളഞ്ഞു.

     ¹⁴ ലിവ്യാഥാന്റെ തലകളെ നീ തകർത്തു;

     മരുഭൂവാസികളായ ജനത്തിന് അതിനെ ആഹാരമായി കൊടുത്തു.

     ¹⁵ നീ ഉറവും ഒഴുക്കും തുറന്നുവിട്ടു,

     മഹാനദികളെ നീ വറ്റിച്ചുകളഞ്ഞു.

     ¹⁶ പകൽ നിനക്കുള്ളത്; രാവും നിനക്കുള്ളത്;

     വെളിച്ചത്തെയും സൂര്യനെയും നീ ഉണ്ടാക്കിയിരിക്കുന്നു.

     ¹⁷ ഭൂസീമകൾ എല്ലാം നീ സ്ഥാപിച്ചു;

     നീ ഉഷ്ണകാലവും ശീതകാലവും നിയമിച്ചു.

     ¹⁸ യഹോവേ, ശത്രു നിന്ദിച്ചതും

     മൂഢജനത തിരുനാമത്തെ ദുഷിച്ചതും ഓർക്കണമേ.

     ¹⁹ നിന്റെ കുറുപ്രാവിനെ ദുഷ്ടമൃഗത്തിന് ഏല്പിക്കരുതേ;

     നിന്റെ എളിയവരുടെ ജീവനെ എന്നേക്കും മറക്കരുതേ.

     ²⁰ നിന്റെ നിയമത്തെ മാനിക്കണമേ;

     ഭൂമിയിലെ അന്ധകാരസ്ഥലങ്ങൾ സാഹസനിവാസങ്ങൾകൊണ്ട് നിറഞ്ഞിരിക്കുന്നു.

     ²¹ പീഡിതൻ ലജ്ജിച്ച് പിന്തിരിയരുതേ;

     എളിയവനും ദരിദ്രനും നിന്റെ നാമത്തെ സ്തുതിക്കട്ടെ.

     ²² ദൈവമേ, എഴുന്നേറ്റ് നിന്റെ വ്യവഹാരം നടത്തണമേ;

     മൂഢൻ ഇടവിടാതെ നിന്നെ നിന്ദിക്കുന്നത് ഓർക്കണമേ.

     ²³ നിന്റെ വൈരികളുടെ ആരവം മറക്കരുതേ;

     നിന്റെ എതിരാളികളുടെ കലഹം എപ്പോഴും വർധിച്ചുകൊണ്ടിരിക്കുന്നു..

സങ്കീർത്തനം.74 75

     ¹ ദൈവമേ, ഞങ്ങൾ നിനക്ക് സ്തോത്രം ചെയ്യുന്നു;

     ഞങ്ങൾ നിനക്ക് സ്തോത്രം ചെയ്യുന്നു; നിന്റെ നാമം അടുത്തിരിക്കുന്നു;

     ഞങ്ങൾ നിന്റെ അതിശയപ്രവൃത്തികളെ ഘോഷിക്കുന്നു.

     ² സമയം വരുമ്പോൾ ഞാൻ നേരോടെ വിധിക്കും.

     ³ ഭൂമിയും അതിലെ സകല നിവാസികളും ഉരുകിപ്പോകുമ്പോൾ

     ഞാൻ അതിന്റെ തൂണുകളെ ഉറപ്പിക്കുന്നു. സേലാ.

     ⁴ ഡംഭം കാട്ടരുതെന്ന് ഡംഭികളോടും

     കൊമ്പുയർത്തരുതെന്ന് ദുഷ്ടന്മാരോടും ഞാൻ പറയുന്നു.

     ⁵ നിങ്ങളുടെ കൊമ്പ് മേലോട്ട് ഉയർത്തരുത്;

     ശാഠ്യത്തോടെ സംസാരിക്കുകയുമരുത്.

     ⁶ കിഴക്കുനിന്നല്ല, പടിഞ്ഞാറുനിന്നല്ല,

     തെക്കുനിന്നുമല്ല ഉയർച്ചവരുന്നത്.

     ⁷ ദൈവം ന്യായാധിപതിയാകുന്നു;

     അവൻ ഒരുത്തനെ താഴ്ത്തുകയും മറ്റൊരുത്തനെ ഉയർത്തുകയും ചെയ്യുന്നു.

     ⁸ യഹോവയുടെ കയ്യിൽ ഒരു പാനപാത്രം ഉണ്ട്; അതിൽ

     വീഞ്ഞു നുരയ്ക്കുന്നു; അത് മദ്യംകൊണ്ട് നിറഞ്ഞിരിക്കുന്നു;

     അവൻ അതിൽനിന്ന് പകരുന്നു;

     ഭൂമിയിലെ സകലദുഷ്ടന്മാരും അതിന്റെ മട്ട് വലിച്ചുകുടിക്കും.

     ⁹ ഞാനോ എന്നേക്കും പ്രസ്താവിക്കും;

     യാക്കോബിന്റെ ദൈവത്തിന് സ്തുതിപാടും.

     ¹⁰ ദുഷ്ടന്മാരുടെ കൊമ്പുകളെല്ലാം ഞാൻ മുറിച്ചുകളയും;

     നീതിമാന്മാരുടെ കൊമ്പുകളോ ഉയർന്നിരിക്കും.

സങ്കീർത്തനം.75 76

     ¹ ദൈവം യെഹൂദയിൽ പ്രസിദ്ധനാകുന്നു;

     അവന്റെ നാമം യിസ്രായേലിൽ വലിയതാകുന്നു.

     ² അവന്റെ കൂടാരം ശാലേമിലും

     അവന്റെ വാസസ്ഥലം സീയോനിലും ഇരിക്കുന്നു.

     ³ അവിടെവച്ച് അവൻ മിന്നുന്ന അമ്പുകളും,യുദ്ധായുധങ്ങളായ

     പരിചയും വാളും തകർത്തുകളഞ്ഞു. സേലാ.

     ⁴ ശാശ്വതപർവ്വതങ്ങളെക്കാൾ നീ

     തേജസ്സും മഹിമയും ഉള്ളവനാകുന്നു.

     ⁵ ധൈര്യശാലികളെ കൊള്ളയിട്ടു; അവർ നിദ്രപ്രാപിച്ചു;

     പരാക്രമശാലികളായ ആർക്കും കൈക്കരുത്തില്ലാതെ പോയി.

     ⁶ യാക്കോബിന്റെ ദൈവമേ, നിന്റെ ശാസനയാൽ

     തേരും കുതിരയും ഗാഢനിദ്രയിൽ വീണു.

     ⁷ നീ ഭയങ്കരനാകുന്നു;

     നീ കോപിച്ചാൽ തിരുമുമ്പാകെ നില്ക്കാൻ കഴിയുന്നവൻ ആര്?

     ⁸ സ്വർഗ്ഗത്തിൽനിന്ന് നീ വിധി കേൾപ്പിച്ചു;

     ഭൂമിയിലെ സാധുക്കളെയെല്ലാം രക്ഷിക്കുവാൻ

     ⁹ ദൈവം ന്യായവിസ്താരത്തിന് എഴുന്നേറ്റപ്പോൾ

     ഭൂമി ഭയപ്പെട്ട് നിശ്ശബ്ദമായിരുന്നു. സേലാ.

     ¹⁰ മനുഷ്യന്റെ ക്രോധം നിന്നെ സ്തുതിക്കും നിശ്ചയം;

     ശേഷിക്കുന്ന ക്രോധം നീ അരയ്ക്ക് കെട്ടും.

     ¹¹ നിങ്ങളുടെ ദൈവമായ യഹോവയ്ക്ക് നേരുകയും നിവർത്തിക്കുകയും ചെയ്യുവിൻ;

     അവന്റെ ചുറ്റുമുള്ള എല്ലാവരും ഭയപ്പെടേണ്ടവന് കാഴ്ചകൊണ്ടുവരട്ടെ.

     ¹² അവൻ പ്രഭുക്കന്മാരുടെ പ്രാണനെ ഛേദിച്ചുകളയും;

     ഭൂമിയിലെ രാജാക്കന്മാർക്ക് അവൻ ഭയങ്കരനാകുന്നു.

സങ്കീർത്തനം.76 77

     ¹ ഞാൻ എന്റെ ശബ്ദം ഉയർത്തി ദൈവത്തോട്,

     എന്റെ ശബ്ദം ഉയർത്തി ദൈവത്തോടു തന്നെ നിലവിളിക്കും;

     അവൻ എന്റെ നിലവിളി ശ്രദ്ധിക്കും.

     ² കഷ്ടദിവസത്തിൽ ഞാൻ യഹോവയെ അന്വേഷിച്ചു,

     രാത്രിയിൽ എന്റെ കൈ തളരാതെ മലർത്തിയിരുന്നു;

     എന്റെ ഉള്ളം ആശ്വാസം നിരസിച്ചു.

     ³ ഞാൻ ദൈവത്തെ ഓർത്ത് നെടുവീർപ്പിടുന്നു.

     ഞാൻ ധ്യാനിക്കുമ്പോൾ, എന്റെ ആത്മാവ് വിഷാദിക്കുന്നു. സേലാ.

     ⁴ നീ എന്റെ കണ്ണിന് ഉറക്കം നിഷേധിച്ചിരിക്കുന്നു;

     സംസാരിക്കുവാൻ കഴിയാത്തവിധം ഞാൻ വ്യാകുലപ്പെട്ടിരിക്കുന്നു.

     ⁵ ഞാൻ പൂർവ്വദിവസങ്ങളെയും

     പണ്ടത്തെ സംവത്സരങ്ങളെയും ഓർക്കുന്നു.

     ⁶ രാത്രിയിൽ ഞാൻ എന്റെ സംഗീതം ഓർക്കുന്നു;

     എന്റെ ഹൃദയംകൊണ്ട് ഞാൻ ധ്യാനിക്കുന്നു;

     എന്റെ ആത്മാവും ശോധന കഴിക്കുന്നു.

     ⁷ കർത്താവ് എന്നേക്കും തള്ളിക്കളയുമോ?

     അവൻ ഇനി ഒരിക്കലും അനുകൂലമായിരിക്കുകയില്ലയോ?

     ⁸ അവന്റെ ദയ സദാകാലത്തേക്കും മറഞ്ഞു പോയോ?

     അവന്റെ വാഗ്ദാനം തലമുറതലമുറയോളം നിലനില്ക്കാതെ പോയോ?

     ⁹ ദൈവം കൃപ കാണിക്കുവാൻ മറന്നിരിക്കുന്നുവോ?

     അവൻ കോപത്തിൽ തന്റെ കരുണ അടച്ചുകളഞ്ഞിരിക്കുന്നുവോ? സേലാ.

     ¹⁰ “എന്നാൽ അത് എന്റെ കഷ്ടതയാകുന്നു;

     അത്യുന്നതന്റെ വലങ്കൈ വരുത്തിയ സംവത്സരങ്ങൾ തന്നെ” എന്ന് ഞാൻ പറഞ്ഞു.

     ¹¹ ഞാൻ യഹോവയുടെ പ്രവൃത്തികളെ വർണ്ണിക്കും;

     പണ്ടേയുള്ള നിന്റെ അത്ഭുതങ്ങളെ ഞാൻ ഓർക്കും.

     ¹² ഞാൻ നിന്റെ സകലപ്രവൃത്തികളെയും ധ്യാനിക്കും;

     നിന്റെ ക്രിയകളെക്കുറിച്ച് ഞാൻ ചിന്തിക്കും.

     ¹³ ദൈവമേ, നിന്റെ വഴി വിശുദ്ധമാകുന്നു;

     നമ്മുടെ ദൈവത്തെപ്പോലെ വലിയ ദൈവം ആരുള്ളു?

     ¹⁴ നീ അത്ഭുതം പ്രവർത്തിക്കുന്ന ദൈവം ആകുന്നു;

     നിന്റെ ബലത്തെ നീ ജനതകളുടെ ഇടയിൽ വെളിപ്പെടുത്തിയിരിക്കുന്നു.

     ¹⁵ തൃക്കൈകൊണ്ട് നീ നിന്റെ ജനത്തെ വീണ്ടെടുത്തിരിക്കുന്നു;

     യാക്കോബിന്റെയും യോസേഫിന്റെയും മക്കളെ തന്നെ. സേലാ.

     ¹⁶ ദൈവമേ, വെള്ളങ്ങൾ നിന്നെ കണ്ടു,

     വെള്ളങ്ങൾ നിന്നെ കണ്ടു ഭ്രമിച്ചു,

     ആഴികളും വിറച്ചുപോയി.

     ¹⁷ മേഘങ്ങൾ വെള്ളം ചൊരിഞ്ഞു;

     ആകാശം ഇടിനാദം മുഴക്കി;

     നിന്റെ അസ്ത്രങ്ങൾ പരക്കെ പറന്നു.

     ¹⁸ നിന്റെ ഇടിമുഴക്കം ചുഴലിക്കാറ്റിൽ മുഴങ്ങി;

     മിന്നലുകൾ ഭൂതലത്തെ പ്രകാശിപ്പിച്ചു;

     ഭൂമി കുലുങ്ങി നടുങ്ങിപ്പോയി.

     ¹⁹ നിന്റെ വഴി സമുദ്രത്തിലും നിന്റെ പാതകൾ പെരുവെള്ളത്തിലും ആയിരുന്നു;

     നിന്റെ കാൽചുവടുകളെ അറിയാതെയുമിരുന്നു.

     ²⁰ മോശെയുടെയും അഹരോന്റെയും കൈയാൽ നീ നിന്റെ ജനത്തെ ഒരു ആട്ടിൻകൂട്ടത്തെ പോലെ നടത്തി.

സങ്കീർത്തനം.77 78

     ¹ എന്റെ ജനമേ, എന്റെ ഉപദേശം ശ്രദ്ധിക്കുവിൻ;

     എന്റെ വായിലെ മൊഴികൾക്ക് നിങ്ങളുടെ ചെവി ചായിക്കുവിൻ.

     ² ഞാൻ ഉപമ പ്രസ്താവിക്കുവാൻ വായ് തുറക്കും;

     പുരാതനകടങ്കഥകളെ ഞാൻ പറയും.

     ³ നാം അവയെ കേട്ടറിഞ്ഞിരിക്കുന്നു;

     നമ്മുടെ പിതാക്കന്മാർ നമ്മളോട് പറഞ്ഞിരിക്കുന്നു.

     ⁴ നാം നമ്മുടെ മക്കളോട് അവയെ മറച്ചുവയ്ക്കാതെ

     വരുവാനുള്ള തലമുറയോട് യഹോവയുടെ സ്തുതിയും ബലവും

     അവൻ ചെയ്ത അത്ഭുതപ്രവൃത്തികളും വിവരിച്ചുപറയും.

     ⁵ അവൻ യാക്കോബിൽ ഒരു സാക്ഷ്യം സ്ഥാപിച്ചു;

     യിസ്രായേലിൽ ഒരു ന്യായപ്രമാണം നിയമിച്ചു;

     അവയെ അവരുടെ മക്കളെ അറിയിക്കുവാൻ നമ്മുടെ പിതാക്കന്മാരോട് കല്പിച്ചു.

     ⁶ വരുവാനുള്ള തലമുറ, ജനിക്കുവാനിരിക്കുന്ന മക്കൾ തന്നെ,

     അവയെ ഗ്രഹിക്കുകയും എഴുന്നേറ്റ് തങ്ങളുടെ മക്കളോട് അറിയിക്കുകയും ചെയ്യും.

     ⁷ അവർ അവരുടെ ആശ്രയം ദൈവത്തിൽ വയ്ക്കുകയും

     അവന്റെ പ്രവൃത്തികളെ മറന്നുകളയാതെ

     അവന്റെ കല്പനകൾ പ്രമാണിച്ചുനടക്കുകയും

     ⁸ അവരുടെ പിതാക്കന്മാരെപോലെ

     ശാഠ്യവും മത്സരവും ഉള്ള തലമുറയായി

     ഹൃദയത്തെ സ്ഥിരമാക്കാതെ,

     ദൈവത്തോട് അവിശ്വസ്തമനസ്സുള്ള ഒരു തലമുറയായി തീരാതിരിക്കുകയും ചെയ്യേണ്ടതിനു തന്നെ.

     ⁹ ആയുധം ധരിച്ച വില്ലാളികളായ എഫ്രയീമ്യർ

     യുദ്ധദിവസത്തിൽ പിന്തിരിഞ്ഞുപോയി.

     ¹⁰ അവർ ദൈവത്തിന്റെ നിയമം പ്രമാണിച്ചില്ല;

     അവന്റെ ന്യായപ്രമാണം ഉപേക്ഷിച്ചു നടന്നു.

     ¹¹ അവർ അവന്റെ പ്രവൃത്തികളും

     അവരെ കാണിച്ച അത്ഭുതങ്ങളും മറന്നുകളഞ്ഞു.

     ¹² അവൻ ഈജിപ്റ്റ്ദേശത്ത്, സോവാൻ വയലിൽവച്ച്

     അവരുടെ പിതാക്കന്മാരുടെ കൺ മുമ്പിൽ, അത്ഭുതം പ്രവർത്തിച്ചു.

     ¹³ അവൻ സമുദ്രത്തെ വിഭാഗിച്ച്, അതിൽകൂടി അവരെ കടത്തി;

     അവൻ വെള്ളത്തെ ചിറപോലെ നില്ക്കുമാറാക്കി.

     ¹⁴ പകൽസമയത്ത് അവൻ മേഘംകൊണ്ടും

     രാത്രി മുഴുവനും അഗ്നിപ്രകാശംകൊണ്ടും അവരെ നടത്തി.

     ¹⁵ അവൻ മരുഭൂമിയിൽ പാറകളെ പിളർന്നു

     ആഴികളാൽ എന്നപോലെ അവർക്ക് ധാരാളം കുടിക്കുവാൻ കൊടുത്തു.

     ¹⁶ പാറയിൽനിന്ന് അവൻ അരുവികളെ പുറപ്പെടുവിച്ചു;

     വെള്ളം നദികളെപ്പോലെ ഒഴുകുമാറാക്കി.

     ¹⁷ എങ്കിലും അവർ അവനോട് പാപം ചെയ്തു;

     അത്യുന്നതനോട് മരുഭൂമിയിൽവച്ച് മത്സരിച്ചുകൊണ്ടിരുന്നു.

     ¹⁸ അവർ കൊതിക്കുന്ന ഭക്ഷണം ചോദിച്ചു കൊണ്ട്

     അവർ ഹൃദയത്തിൽ ദൈവത്തെ പരീക്ഷിച്ചു.

     ¹⁹ അവർ ദൈവത്തിനു വിരോധമായി സംസാരിച്ചു:

     “മരുഭൂമിയിൽ മേശ ഒരുക്കുവാൻ ദൈവത്തിനു കഴിയുമോ?”

     ²⁰ അവൻ പാറയെ അടിച്ചു, വെള്ളം പുറപ്പെട്ടു,

     തോടുകളും കവിഞ്ഞൊഴുകി, സത്യം;

     “എന്നാൽ അപ്പംകൂടി തരുവാൻ അവന് കഴിയുമോ?

     തന്റെ ജനത്തിന് അവൻ മാംസം വരുത്തി കൊടുക്കുമോ?” എന്ന് പറഞ്ഞു.

     ²¹ ആകയാൽ യഹോവ അതു കേട്ട് കോപിച്ചു;

     യാക്കോബിന്റെ നേരെ തീ ജ്വലിച്ചു;

     യിസ്രായേലിന്റെ നേരെ കോപവും പൊങ്ങി.

     ²² അവർ ദൈവത്തിൽ വിശ്വസിക്കുകയും

     അവന്റെ രക്ഷയിൽ ആശ്രയിക്കുകയും ചെയ്യായ്കയാൽ തന്നെ.

     ²³ അവൻ മീതെ മേഘങ്ങളോടു കല്പിച്ചു;

     ആകാശത്തിന്റെ വാതിലുകളെ തുറന്നു.

     ²⁴ അവർക്കു തിന്നുവാൻ മന്ന വർഷിപ്പിച്ചു;

     സ്വർഗ്ഗീയധാന്യം അവർക്കു കൊടുത്തു.

     ²⁵ മനുഷ്യർ ദൂതന്മാരുടെ അപ്പം തിന്നു;

     അവൻ അവർക്ക് തൃപ്തിയാകുംവണ്ണം ആഹാരം അയച്ചു.

     ²⁶ അവൻ ആകാശത്തിൽ കിഴക്കൻകാറ്റ് അടിപ്പിച്ചു;

     തന്റെ ശക്തിയാൽ കിഴക്കൻ കാറ്റുവരുത്തി.

     ²⁷ അവൻ അവർക്കു പൊടിപോലെ മാംസത്തെയും

     കടൽപുറത്തെ മണൽപോലെ പക്ഷികളെയും വർഷിപ്പിച്ചു;

     ²⁸ അവരുടെ പാളയത്തിന്റെ നടുവിലും പാർപ്പിടങ്ങളുടെ ചുറ്റിലും അവയെ പൊഴിച്ചു.

     ²⁹ അങ്ങനെ അവർ തിന്ന് തൃപ്തരായി.

     അവർ ആഗ്രഹിച്ചത് അവൻ അവർക്കു കൊടുത്തു.

     ³⁰ അവരുടെ കൊതിക്കു മതിവന്നില്ല;

     ഭക്ഷണം അവരുടെ വായിൽ ഇരിക്കുമ്പോൾ തന്നെ,

     ³¹ ദൈവത്തിന്റെ കോപം അവരുടെമേൽ വന്നു;

     അവരുടെ അതിശക്തന്മാരിൽ ചിലരെ കൊന്നു

     യിസ്രായേലിലെ യൗവനക്കാരെ സംഹരിച്ചു.

     ³² ഇതെല്ലാമായിട്ടും അവർ പിന്നെയും പാപം ചെയ്തു;

     അവന്റെ അത്ഭുതപ്രവൃത്തികളെ വിശ്വസിച്ചതുമില്ല.

     ³³ അതുകൊണ്ട് അവൻ അവരുടെ നാളുകളെ ശ്വാസം പോലെയും

     അവരുടെ സംവത്സരങ്ങളെ അതിവേഗത്തിലും കഴിയുമാറാക്കി.

     ³⁴ അവൻ അവരെ കൊല്ലുമ്പോൾ അവർ അവനെ അന്വേഷിക്കും;

     അവർ തിരിഞ്ഞ് ജാഗ്രതയോടെ ദൈവത്തെ തിരയും.

     ³⁵ ദൈവം അവരുടെ പാറ എന്നും

     അത്യുന്നതനായ ദൈവം അവരുടെ വീണ്ടെടുപ്പുകാരൻ എന്നും അവർ ഓർക്കും.

     ³⁶ എങ്കിലും അവർ വായ്കൊണ്ട് അവനോട് കപടം സംസാരിക്കും

     നാവുകൊണ്ട് അവനോട് ഭോഷ്ക് പറയും.

     ³⁷ അവരുടെ ഹൃദയം അവനിൽ സ്ഥിരമായിരുന്നില്ല;

     അവന്റെ നിയമത്തോട് അവർ വിശ്വസ്തത കാണിച്ചതുമില്ല.

     ³⁸ എങ്കിലും അവൻ കരുണയുള്ളവനാകുകകൊണ്ട്

     അവരെ നശിപ്പിക്കാതെ അവരുടെ അകൃത്യം ക്ഷമിച്ചു;

     തന്റെ ക്രോധം മുഴുവനും ജ്വലിപ്പിക്കാതെ

     തന്റെ കോപം പലപ്പോഴും അടക്കിക്കളഞ്ഞു.

     ³⁹ അവർ കേവലം ജഡം അത്രെ എന്നും

     മടങ്ങിവരാതെ കടന്നുപോകുന്ന കാറ്റുപോലെ എന്നും അവൻ ഓർത്തു.

     ⁴⁰ മരുഭൂമിയിൽ അവർ എത്ര തവണ അവനോട് മത്സരിച്ചു!

     ശൂന്യദേശത്ത് എത്ര പ്രാവശ്യം അവനെ ദുഃഖിപ്പിച്ചു!

     ⁴¹ അവർ വീണ്ടും വീണ്ടും ദൈവത്തെ പരീക്ഷിച്ചു;

     യിസ്രായേലിന്റെ പരിശുദ്ധനെ മുഷിപ്പിച്ചു.

     ⁴² ഈജിപ്റ്റിൽ അടയാളങ്ങളും

     സോവാൻവയലിൽ അത്ഭുതങ്ങളും ചെയ്ത അവന്റെ കൈയും

     ⁴³ അവൻ ശത്രുവിന്റെ കൈയിൽ നിന്ന്

     അവരെ വിടുവിച്ച ദിവസവും അവർ ഓർമ്മിച്ചില്ല.

     ⁴⁴ അവൻ അവരുടെ നദികളെയും തോടുകളെയും

     അവർക്കു കുടിക്കുവാൻ കഴിയാത്ത വിധം രക്തമാക്കിത്തീർത്തു.

     ⁴⁵ അവൻ അവരുടെ ഇടയിൽ ഈച്ചയെ അയച്ചു;

     അവ അവരെ അരിച്ചുകളഞ്ഞു: തവളയെയും അയച്ചു അവ അവർക്കു നാശം ചെയ്തു.

     ⁴⁶ അവരുടെ വിള അവൻ തുള്ളനും

     അവരുടെ പ്രയത്നം വെട്ടുക്കിളിക്കും കൊടുത്തു.

     ⁴⁷ അവൻ അവരുടെ മുന്തിരിവള്ളികളെ കന്മഴകൊണ്ടും

     അവരുടെ കാട്ടത്തിവൃക്ഷങ്ങളെ ആലിപ്പഴം കൊണ്ടും നശിപ്പിച്ചു.

     ⁴⁸ അവൻ അവരുടെ കന്നുകാലികളെ കന്മഴക്കും

     അവരുടെ ആട്ടിൻകൂട്ടങ്ങളെ ഇടിത്തീയ്ക്കും ഏല്പിച്ചു.

     ⁴⁹ അവൻ അവരുടെ ഇടയിൽ തന്റെ കോപാഗ്നിയും

     ക്രോധവും രോഷവും കഷ്ടവും അയച്ചു;

     അനർത്ഥദൂതന്മാരുടെ ഒരു ഗണത്തെ തന്നെ.

     ⁵⁰ അവൻ തന്റെ കോപത്തിന് ഒരു പാത ഒരുക്കി,

     അവരുടെ പ്രാണനെ മരണത്തിൽനിന്നു വിടുവിക്കാതെ

     അവരുടെ ജീവനെ മഹാവ്യാധിക്ക് ഏല്പിച്ചുകളഞ്ഞു.

     ⁵¹ അവൻ ഈജിപ്റ്റിലെ എല്ലാ കടിഞ്ഞൂലിനെയും

     ഹാമിന്റെ കൂടാരങ്ങളിലുള്ളവരുടെ വീര്യത്തിന്റെ ആദ്യഫലത്തെയും സംഹരിച്ചു.

     ⁵² എന്നാൽ തന്റെ ജനത്തെ അവൻ ആടുകളെപ്പോലെ പുറപ്പെടുവിച്ചു;

     മരുഭൂമിയിൽ ആട്ടിൻകൂട്ടത്തെപ്പോലെ അവരെ നടത്തി.

     ⁵³ അവൻ അവരെ നിർഭയമായി നടത്തുകയാൽ അവർക്ക് ഭയമുണ്ടായില്ല;

     അവരുടെ ശത്രുക്കളെ സമുദ്രം മൂടിക്കളഞ്ഞു.

     ⁵⁴ അവൻ അവരെ തന്റെ വിശുദ്ധദേശത്തിലേക്കും

     തന്റെ വലങ്കൈ സമ്പാദിച്ച ഈ പർവ്വതത്തിലേക്കും കൊണ്ടുവന്നു.

     ⁵⁵ അവരുടെ മുമ്പിൽനിന്നു അവൻ ജനതകളെ നീക്കിക്കളഞ്ഞു;

     ചരടുകൊണ്ട് അളന്ന് അവർക്ക് അവകാശം പകുത്തുകൊടുത്തു;

     യിസ്രായേലിന്റെ ഗോത്രങ്ങളെ അവരവരുടെ കൂടാരങ്ങളിൽ താമസിപ്പിച്ചു.

     ⁵⁶ എങ്കിലും അവർ അത്യുന്നതനായ ദൈവത്തെ പരീക്ഷിച്ച് മത്സരിച്ചു;

     അവന്റെ സാക്ഷ്യങ്ങൾ പ്രമാണിച്ചതുമില്ല.

     ⁵⁷ അവർ അവരുടെ പിതാക്കന്മാരെപ്പോലെ പിന്തിരിഞ്ഞ് ദ്രോഹം ചെയ്തു;

     വഞ്ചനയുള്ള വില്ലുപോലെ അവർ മാറിക്കളഞ്ഞു.

     ⁵⁸ അവർ അവരുടെ പൂജാഗിരികളെക്കൊണ്ട് അവനെ കോപിപ്പിച്ചു;

     വിഗ്രഹങ്ങളെക്കൊണ്ട് അവന് തീക്ഷ്ണത ജനിപ്പിച്ചു.

     ⁵⁹ ദൈവം അത് കേട്ട് ക്രുദ്ധിച്ചു; യിസ്രായേലിനെ ഏറ്റവും വെറുത്തു.

     ⁶⁰ അതുകൊണ്ട് അവൻ ശീലോവിലെ തിരുനിവാസവും

     താൻ മനുഷ്യരുടെ ഇടയിൽ അടിച്ചിരുന്ന കൂടാരവും ഉപേക്ഷിച്ചു.

     ⁶¹ തന്റെ ബലത്തെ പ്രവാസത്തിലും

     തന്റെ മഹത്വത്തെ ശത്രുവിന്റെ കയ്യിലും ഏല്പിച്ചുകൊടുത്തു.

     ⁶² അവൻ തന്റെ അവകാശത്തോട് കോപിച്ചു;

     തന്റെ ജനത്തെ വാളിന് വിട്ടുകൊടുത്തു.

     ⁶³ അവരുടെ യൗവനക്കാർ തീയ്ക്ക് ഇരയായിത്തീർന്നു;

     അവരുടെ കന്യകമാർക്ക് വിവാഹഗീതം ഉണ്ടായതുമില്ല.

     ⁶⁴ അവരുടെ പുരോഹിതന്മാർ വാൾകൊണ്ടു വീണു;

     അവരുടെ വിധവമാർ വിലാപം കഴിച്ചതുമില്ല.

     ⁶⁵ അപ്പോൾ കർത്താവ് ഉറക്കത്തിൽനിന്ന് ഉണർന്നുവരുന്നവനെപ്പോലെയും

     വീഞ്ഞുകുടിച്ച് അട്ടഹസിക്കുന്ന വീരനെപ്പോലെയും ഉണർന്നു.

     ⁶⁶ അവൻ തന്റെ ശത്രുക്കളെ പിന്നിലേക്ക് ഓടിച്ചുകളഞ്ഞു;

     അവർക്ക് നിത്യനിന്ദ വരുത്തുകയും ചെയ്തു.

     ⁶⁷ എന്നാൽ അവൻ യോസേഫിന്റെ കൂടാരത്തെ ത്യജിച്ചു;

     എഫ്രയീംഗോത്രത്തെ തിരഞ്ഞെടുത്തതുമില്ല.

     ⁶⁸ അവൻ യെഹൂദാഗോത്രത്തെയും

     താൻ പ്രിയപ്പെട്ട സീയോൻപർവ്വതത്തെയും തിരഞ്ഞെടുത്തു.

     ⁶⁹ താൻ സദാകാലത്തേക്കും സ്ഥാപിച്ചിരിക്കുന്ന ഭൂമിയെപ്പോലെയും

     സ്വർഗ്ഗോന്നതികളെപ്പോലെയും അവൻ തന്റെ വിശുദ്ധമന്ദിരത്തെ പണിതു.

     ⁷⁰ അവൻ തന്റെ ദാസനായ ദാവീദിനെ തെരഞ്ഞെടുത്തു;

     ആട്ടിൻതൊഴുത്തുകളുടെ ഇടയിൽനിന്ന് അവനെ വരുത്തി.

     ⁷¹ തന്റെ ജനമായ യാക്കോബിനെയും തന്റെ അവകാശമായ യിസ്രായേലിനെയും

     മേയിക്കേണ്ടതിന് യഹോവ അവനെ തള്ളയാടുകളെ നോക്കുന്ന വേലയിൽനിന്നു കൊണ്ടുവന്നു.

     ⁷² അങ്ങനെ അവൻ പരമാർത്ഥഹൃദയത്തോടെ അവരെ മേയിച്ചു;

     കൈകളുടെ സാമർഥ്യത്തോടെ അവരെ നടത്തി.

സങ്കീർത്തനം.78 79

     ¹ ദൈവമേ, ജനതതികൾ നിന്റെ അവകാശത്തിലേക്ക് കടന്നിരിക്കുന്നു;

     അവർ നിന്റെ വിശുദ്ധമന്ദിരത്തെ അശുദ്ധമാക്കുകയും

     യെരൂശലേമിനെ കൽകുന്നുകളാക്കുകയും ചെയ്തിരിക്കുന്നു.

     ² അവർ നിന്റെ ദാസന്മാരുടെ ശവങ്ങളെ ആകാശത്തിലെ പക്ഷികൾക്കും

     നിന്റെ വിശുദ്ധന്മാരുടെ മാംസത്തെ കാട്ടുമൃഗങ്ങൾക്കും ഭക്ഷണമായി കൊടുത്തിരിക്കുന്നു.

     ³ അവരുടെ രക്തം വെള്ളംപോലെ അവർ യെരൂശലേമിന് ചുറ്റും ചിന്തിക്കളഞ്ഞു;

     അവരെ കുഴിച്ചിടുവാൻ ആരും ഉണ്ടായിരുന്നില്ല.

     ⁴ ഞങ്ങൾ ഞങ്ങളുടെ അയല്ക്കാർക്ക് അപമാനവും

     ചുറ്റുമുള്ളവർക്ക് നിന്ദയും പരിഹാസവും ആയി തീർന്നിരിക്കുന്നു.

     ⁵ യഹോവേ, നീ സദാ കോപിക്കുന്നതും

     നിന്റെ തീക്ഷ്ണത തീപോലെ ജ്വലിക്കുന്നതും എത്രത്തോളം?

     ⁶ നിന്നെ അറിയാത്ത ജനതകളുടെമേലും നിന്റെ നാമം വിളിച്ചപേക്ഷിക്കാത്ത രാജ്യങ്ങളുടെമേലും

     നിന്റെ ക്രോധം പകരണമേ.

     ⁷ അവർ യാക്കോബിനെ വിഴുങ്ങിക്കളയുകയും

     അവന്റെ വാസസ്ഥലം ശൂന്യമാക്കുകയും ചെയ്തുവല്ലോ.

     ⁸ ഞങ്ങളുടെ പൂർവ്വികരുടെ അകൃത്യങ്ങൾ ഞങ്ങളോട് കണക്കിടരുതേ;

     നിന്റെ കരുണ വേഗത്തിൽ ഞങ്ങളെ എതിരേല്ക്കുമാറാകട്ടെ;

     ഞങ്ങൾ ഏറ്റവും എളിമപ്പെട്ടിരിക്കുന്നു.

     ⁹ ഞങ്ങളുടെ രക്ഷയായ ദൈവമേ,

     നിന്റെ നാമമഹത്വത്തിനായി ഞങ്ങളെ സഹായിക്കണമേ;

     നിന്റെ നാമംനിമിത്തം ഞങ്ങളെ രക്ഷിച്ച്,

     ഞങ്ങളുടെ പാപങ്ങൾക്ക് പ്രായശ്ചിത്തം ചെയ്യണമെ.

     ¹⁰ “അവരുടെ ദൈവം എവിടെ?” എന്ന് ജനതകൾ പറയുന്നത് എന്തിന്?

     നിന്റെ ദാസന്മാരുടെ രക്തം ചിന്തിയതിന് പ്രതികാരം

     ഞങ്ങളുടെദൃഷ്ടിയിൽ, ജനതകളുടെ ഇടയിൽ വെളിപ്പെടുമാറാകട്ടെ.

     ¹¹ ബദ്ധന്മാരുടെ നെടുവീർപ്പ് നിന്റെ മുമ്പാകെ വരുമാറാകട്ടെ;

     മരണത്തിന് വിധിക്കപ്പെട്ടിരിക്കുന്നവരെ നീ നിന്റെ മഹാശക്തിയാൽ രക്ഷിക്കണമേ.

     ¹² കർത്താവേ, ഞങ്ങളുടെ അയല്ക്കാർ നിന്നെ നിന്ദിച്ച നിന്ദ

     ഏഴിരട്ടിയായി അവരുടെ മാർവ്വിടത്തിലേക്ക് പകരം കൊടുക്കണമേ.

     ¹³ എന്നാൽ നിന്റെ ജനവും നിന്റെ മേച്ചില്പുറത്തെ ആടുകളുമായ ഞങ്ങൾ

     എന്നേക്കും നിനക്ക് സ്തോത്രം ചെയ്യും.

     തലമുറതലമുറയോളം ഞങ്ങൾ നിന്റെ സ്തുതിയെ പ്രസ്താവിക്കും.

സങ്കീർത്തനം.79 80

     ¹ ആട്ടിൻകൂട്ടത്തെപ്പോലെ യോസേഫിനെ നടത്തുന്ന

     യിസ്രായേലിന്റെ ഇടയനായുള്ള യഹോവേ, ചെവിക്കൊള്ളണമേ;

     കെരൂബുകളിന്മേൽ അധിവസിക്കുന്നവനേ, പ്രകാശിക്കണമേ.

     ² എഫ്രയീമും ബെന്യാമീനും മനശ്ശെയും കാണത്തക്കവിധം

     നിന്റെ വീര്യബലം ഉണർത്തി ഞങ്ങളുടെ രക്ഷയ്ക്കായി വരണമേ.

     ³ ദൈവമേ, ഞങ്ങളെ യഥാസ്ഥാനപ്പെടുത്തണമേ;

     ഞങ്ങൾ രക്ഷപ്പെടേണ്ടതിന് തിരുമുഖം പ്രകാശിപ്പിക്കണമേ.

     ⁴ സൈന്യങ്ങളുടെ ദൈവമായ യഹോവേ,

     നിന്റെ ജനത്തിന്റെ പ്രാർത്ഥനയ്ക്കു നേരെ എത്രത്തോളം നീ കോപിക്കും?

     ⁵ നീ അവർക്ക് കണ്ണുനീരിന്റെ അപ്പം തിന്നുവാൻ കൊടുത്തിരിക്കുന്നു;

     ധാരാളം കണ്ണുനീർ അവർക്ക് കുടിക്കുവാനും കൊടുത്തിരിക്കുന്നു.

     ⁶ നീ ഞങ്ങളെ ഞങ്ങളുടെ അയല്ക്കാർക്ക് വഴക്കാക്കിത്തീർക്കുന്നു;

     ഞങ്ങളുടെ ശത്രുക്കൾ തമ്മിൽ പറഞ്ഞു പരിഹസിക്കുന്നു.

     ⁷ സൈന്യങ്ങളുടെ ദൈവമേ, ഞങ്ങളെ യഥാസ്ഥാനപ്പെടുത്തണമേ;

     ഞങ്ങൾ രക്ഷപ്പെടേണ്ടതിന് തിരുമുഖം പ്രകാശിപ്പിക്കണമേ.

     ⁸ നീ ഈജിപ്റ്റിൽ നിന്ന് ഒരു മുന്തിരിവള്ളി കൊണ്ടു വന്നു;

     ജനതതികളെ നീക്കിക്കളഞ്ഞ് അതിനെ നട്ടു.

     ⁹ നീ അതിന് തടം എടുത്തു

     അത് വേരൂന്നി ദേശത്ത് പടർന്നു.

     ¹⁰ അതിന്റെ നിഴൽകൊണ്ട് പർവ്വതങ്ങൾ മൂടിയിരുന്നു;

     അതിന്റെ കൊമ്പുകൾ ദിവ്യദേവദാരുക്കൾപോലെയും ആയിരുന്നു.

     ¹¹ അത് കൊമ്പുകളെ സമുദ്രം വരെയും

     ചില്ലികളെ നദിവരെയും നീട്ടിയിരുന്നു.

     ¹² വഴിപോകുന്നവർ എല്ലാം അത് പറിക്കുവാൻ തക്കവണ്ണം

     നീ അതിന്റെ വേലികൾ പൊളിച്ചുകളഞ്ഞത് എന്ത്?

     ¹³ കാട്ടുപന്നി അതിനെ മാന്തിക്കളയുന്നു;

     വയലിലെ മൃഗങ്ങൾ അത് തിന്നുകളയുന്നു.

     ¹⁴ സൈന്യങ്ങളുടെ ദൈവമേ, തിരിഞ്ഞുവരണമേ;

     സ്വർഗ്ഗത്തിൽനിന്നു കടാക്ഷിച്ച്

     ഈ മുന്തിരിവള്ളിയെ സന്ദർശിക്കണമേ.

     ¹⁵ നിന്റെ വലങ്കൈ നട്ടതും

     നീ നിനക്കായി വളർത്തിയതുമായ ഈ തൈയെയും പരിപാലിക്കണമേ.

     ¹⁶ അതിനെ തീ വച്ചു ചുടുകയും വെട്ടിക്കളയുകയും ചെയ്തിരിക്കുന്നു;

     നിന്റെ മുഖത്തുനിന്നുള്ള ഭർസനത്താൽ അവർ നശിച്ചുപോകുന്നു.

     ¹⁷ നിന്റെ കൈ നിന്റെ വലത്തുഭാഗത്തെ പുരുഷന്റെമേൽ

     നീ നിനക്കായി വളർത്തിയ മനുഷ്യപുത്രന്റെ മേൽതന്നെ ഇരിക്കട്ടെ.

     ¹⁸ എന്നാൽ ഞങ്ങൾ നിന്നെ വിട്ടു പിന്മാറുകയില്ല;

     ഞങ്ങളെ ജീവിപ്പിക്കണമേ, എന്നാൽ ഞങ്ങൾ നിന്റെ നാമത്തെ വിളിച്ചപേക്ഷിക്കും.

     ¹⁹ സൈന്യങ്ങളുടെ ദൈവമായ യഹോവേ, ഞങ്ങളെ യഥാസ്ഥാനപ്പെടുത്തണമേ;

     ഞങ്ങൾ രക്ഷപ്പെടേണ്ടതിന് തിരുമുഖം പ്രകാശിപ്പിക്കണമേ.

സങ്കീർത്തനം.80 81

     ¹ നമ്മുടെ ബലമായ ദൈവത്തിന് ഘോഷിക്കുവിൻ;

     യാക്കോബിന്റെ ദൈവത്തിന് ആർപ്പിടുവിൻ.

     ² തപ്പും ഇമ്പമുള്ള കിന്നരവും

     വീണയും എടുത്ത് സംഗീതം തുടങ്ങുവിൻ.

     ³ അമാവാസ്യയിലും നമ്മുടെ ഉത്സവദിവസമായ

     പൗർണ്ണമാസിയിലും കാഹളം ഊതുവിൻ.

     ⁴ ഇത് യിസ്രായേലിന് ഒരു ചട്ടവും

     യാക്കോബിന്റെ ദൈവം നൽകിയ ഒരു പ്രമാണവും ആകുന്നു.

     ⁵ ഈജിപ്റ്റ് ദേശത്തിനു നേരെ പുറപ്പെട്ടപ്പോൾ

     ദൈവം അത് യോസേഫിന് ഒരു സാക്ഷ്യമായി നിയമിച്ചു;

     അവിടെ ഞാൻ അറിയാത്ത ഒരു ഭാഷ കേട്ടു.

     ⁶ ഞാൻ അവന്റെ തോളിൽനിന്ന് ചുമടു നീക്കി; അവന്റെ കൈകൾ കൊട്ട വിട്ട് ഒഴിഞ്ഞു.

     ⁷ കഷ്ടകാലത്ത് നീ വിളിച്ചു, ഞാൻ നിന്നെ വിടുവിച്ചു;

     ഇടിമുഴക്കത്തിന്റെ മറവിൽനിന്ന് ഞാൻ നിനക്ക് ഉത്തരമരുളി;

     മെരീബാവെള്ളത്തിൽ ഞാൻ നിന്നെ പരീക്ഷിച്ചു. സേലാ.

     ⁸ എന്റെ ജനമേ, കേൾക്കുക, ഞാൻ നിന്നോട് സാക്ഷ്യം പറയും.

     യിസ്രായേലേ, നീ എന്റെ വാക്ക് കേട്ടെങ്കിൽ കൊള്ളാമായിരുന്നു.

     ⁹ അന്യദൈവം നിനക്ക് ഉണ്ടാകരുത്;

     യാതൊരു അന്യദൈവത്തെയും നീ നമസ്കരിക്കരുത്.

     ¹⁰ ഈജിപ്റ്റ്ദേശത്തുനിന്ന് നിന്നെ കൊണ്ടുവന്ന

     യഹോവയായ ഞാൻ നിന്റെ ദൈവം ആകുന്നു;

     നിന്റെ വായ് വിസ്താരമായി തുറക്കുക; ഞാൻ അതിനെ നിറയ്ക്കും.

     ¹¹ എന്നാൽ എന്റെ ജനം എന്റെ വാക്ക് കേട്ടനുസരിച്ചില്ല;

     യിസ്രായേൽ എന്നെ കൂട്ടാക്കിയതുമില്ല.

     ¹² അതുകൊണ്ട് അവർ സ്വന്ത ആലോചനപ്രകാരം നടക്കേണ്ടതിന്

     ഞാൻ അവരെ ഹൃദയകാഠിന്യത്തിന് ഏല്പിച്ചുകളഞ്ഞു.

     ¹³ അയ്യോ! എന്റെ ജനം എന്റെ വാക്കു കേൾക്കുകയും

     യിസ്രായേൽ എന്റെ വഴികളിൽ നടക്കുകയും ചെയ്തെങ്കിൽ കൊള്ളാമായിരുന്നു.

     ¹⁴ എന്നാൽ ഞാൻ വേഗത്തിൽ അവരുടെ ശത്രുക്കളെ കീഴടക്കുമായിരുന്നു;

     അവരുടെ വൈരികളുടെ നേരെ എന്റെ കൈ തിരിക്കുമായിരുന്നു.

     ¹⁵ യഹോവയെ പകയ്ക്കുന്നവർ അവന് കീഴടങ്ങുമായിരുന്നു;

     എന്നാൽ അവരുടെ ശുഭകാലം എന്നേക്കും നില്ക്കുമായിരുന്നു.

     ¹⁶ അവൻ മേത്തരമായ ഗോതമ്പുകൊണ്ട് അവരെ പോഷിപ്പിക്കുമായിരുന്നു;

     ഞാൻ പാറയിൽനിന്നുള്ള തേൻകൊണ്ട് നിനക്ക് തൃപ്തിവരുത്തുമായിരുന്നു.

സങ്കീർത്തനം.81 82

     ¹ ദൈവം ദേവസഭയിൽ നില്ക്കുന്നു;

     അവൻ ദേവന്മാരുടെ ഇടയിൽ ന്യായം വിധിക്കുന്നു.

     ² നിങ്ങൾ എത്രത്തോളം നീതികേടായി വിധിക്കുകയും

     ദുഷ്ടന്മാരുടെ പക്ഷം പിടിക്കുകയും ചെയ്യും? സേലാ.

     ³ എളിയവനും അനാഥനും ന്യായം പാലിച്ചുകൊടുക്കുവിൻ;

     പീഡിതനും അഗതിക്കും നീതി നടത്തിക്കൊടുക്കുവിൻ.

     ⁴ എളിയവനെയും ദരിദ്രനെയും രക്ഷിക്കുവിൻ;

     ദുഷ്ടന്മാരുടെ കയ്യിൽനിന്ന് അവരെ വിടുവിക്കുവിൻ.

     ⁵ അവർക്ക് അറിവും ബോധവുമില്ല; അവർ ഇരുട്ടിൽ നടക്കുന്നു;

     ഭൂമിയുടെ അടിസ്ഥാനങ്ങൾ എല്ലാം ഇളകിയിരിക്കുന്നു.

     ⁶ “നിങ്ങൾ ദേവന്മാർ ആകുന്നു” എന്നും

     “നിങ്ങൾ എല്ലാവരും അത്യുന്നതന്റെ പുത്രന്മാർ” എന്നും ഞാൻ പറഞ്ഞു.

     ⁷ എങ്കിലും നിങ്ങൾ മനുഷ്യരെപ്പോലെ മരിക്കും;

     പ്രഭുക്കന്മാരിൽ ഒരുത്തനെപ്പോലെ ഹതരാകും.

     ⁸ ദൈവമേ, എഴുന്നേറ്റ് ഭൂമിയെ വിധിക്കണമേ;

     നീ സകല ജനതതികളെയും അവകാശമാക്കികൊള്ളുമല്ലോ.

സങ്കീർത്തനം.82 83

     ¹ ദൈവമേ, നിശ്ശബ്ദമായിരിക്കരുതേ;

     ദൈവമേ, മൗനമായും സ്വസ്ഥമായും ഇരിക്കരുതേ.

     ² ഇതാ, നിന്റെ ശത്രുക്കൾ കലഹിക്കുന്നു;

     നിന്നെ വെറുക്കുന്നവർ തല ഉയർത്തുന്നു.

     ³ അവർ നിന്റെ ജനത്തിന്റെ നേരെ ഉപായം വിചാരിക്കുകയും

     നിനക്ക് വിലയേറിയവരുടെ നേരെ ദുരാലോചന കഴിക്കുകയും ചെയ്യുന്നു.

     ⁴ “വരുവിൻ, യിസ്രായേൽ ഒരു ജനതയായിരിക്കാത്തവിധം നാം അവരെ മുടിച്ചുകളയുക.

     അവരുടെ പേര് ഇനി ആരും ഓർക്കരുത്” എന്ന് അവർ പറഞ്ഞു.

     ⁵ അവർ ഇങ്ങനെ ഏകമനസ്സോടെ ആലോചിച്ചു,

     നിനക്കു വിരോധമായി സഖ്യം ചെയ്യുന്നു.

     ⁶ ഏദോമ്യരുടെയും യിശ്മായേല്യരുടെയും കൂടാരങ്ങളും

     മോവാബ്യരും ഹഗര്യരും ,

     ⁷ ഗെബാലും അമ്മോനും അമാലേക്കും,

     ഫെലിസ്ത്യദേശവും സോർനിവാസികളും;

     ⁸ അശ്ശൂരും അവരോട് യോജിച്ചു;

     അവർ ലോത്തിന്റെ മക്കൾക്ക് സഹായമായിരുന്നു. സേലാ.

     ⁹ മിദ്യാന്യരോട് ചെയ്തതുപോലെ അവരോടു ചെയ്യണമേ;

     കീശോൻതോട്ടിനരികിൽ വച്ച് സീസരയോടും യാബീനോടും ചെയ്തതുപോലെ തന്നെ.

     ¹⁰ അവർ എൻദോരിൽവച്ച് നശിച്ചുപോയി;

     അവർ നിലത്തിന് വളമായിത്തീർന്നു.

     ¹¹ അവരുടെ കുലീനന്മാരെ ഓരേബ്, സേബ് എന്നിവരെപ്പോലെയും

     അവരുടെ സകലപ്രഭുക്കന്മാരെയും സേബഹ്, സല്മൂന്നാ എന്നിവരെപ്പോലെയും ആക്കണമേ.

     ¹² “നാം ദൈവത്തിന്റെ നിവാസങ്ങളെ

     നമുക്ക് അവകാശമാക്കിക്കൊള്ളുക” എന്ന് അവർ പറഞ്ഞുവല്ലോ.

     ¹³ എന്റെ ദൈവമേ, അവരെ ചുഴലിക്കാറ്റിൽ പൊടിപോലെയും

     കാറ്റത്തു പാറുന്ന പതിർപോലെയും ആക്കണമേ.

     ¹⁴ വനത്തെ ദഹിപ്പിക്കുന്ന തീപോലെയും

     പർവ്വതങ്ങളെ ചുട്ടുകളയുന്ന അഗ്നിജ്വാലപോലെയും

     ¹⁵ നിന്റെ കൊടുങ്കാറ്റുകൊണ്ട് അവരെ പിന്തുടരണമേ;

     നിന്റെ ചുഴലിക്കാറ്റുകൊണ്ട് അവരെ ഭ്രമിപ്പിക്കണമേ.

     ¹⁶ യഹോവേ, അവർ തിരുനാമത്തെ അന്വേഷിക്കേണ്ടതിന്

     നീ അവരുടെ മുഖത്തെ ലജ്ജാപൂർണ്ണമാക്കണമേ.

     ¹⁷ അവർ എന്നേക്കും ലജ്ജിച്ച് ഭ്രമിക്കുകയും

     നാണിച്ച് നശിച്ചുപോകുകയും ചെയ്യട്ടെ.

     ¹⁸ അങ്ങനെ അവർ യഹോവ എന്ന് നാമമുള്ള നീ മാത്രം

     സർവ്വഭൂമിക്കുംമീതെ അത്യുന്നതൻ എന്ന് അറിയും.

സങ്കീർത്തനം.83 84

     ¹ സൈന്യങ്ങളുടെ യഹോവേ,

     തിരുനിവാസം എത്ര മനോഹരം!

     ² എന്റെ ഉള്ളം യഹോവയുടെ പ്രാകാരങ്ങളെ വാഞ്ഛിച്ചു മോഹാലസ്യപ്പെട്ടു പോകുന്നു;

     എന്റെ ഹൃദയവും എന്റെ മാംസവും ജീവനുള്ള ദൈവത്തെ നോക്കി ഘോഷിക്കുന്നു.

     ³ കുരികിൽ ഒരു വീടും, മീവൽപക്ഷി കുഞ്ഞുങ്ങൾക്ക് ഒരു കൂടും കണ്ടെത്തിയിരിക്കുന്നു;

     എന്റെ രാജാവും എന്റെ ദൈവവുമായ സൈന്യങ്ങളുടെ യഹോവേ, നിന്റെ യാഗപീഠങ്ങളെ തന്നെ.

     ⁴ നിന്റെ ആലയത്തിൽ വസിക്കുന്നവർ ഭാഗ്യവാന്മാർ;

     അവർ നിന്നെ നിത്യം സ്തുതിച്ചുകൊണ്ടിരിക്കും. സേലാ.

     ⁵ ബലം നിന്നിൽ ഉള്ള മനുഷ്യൻ ഭാഗ്യവാൻ;

     ഇങ്ങനെയുള്ളവരുടെ മനസ്സിൽ സീയോനിലേക്കുള്ള പെരുവഴികൾ ഉണ്ട്.

     ⁶ കണ്ണുനീർ താഴ്വരയിൽകൂടി കടക്കുമ്പോൾ അവർ അതിനെ ജലാശയമാക്കിത്തീർക്കുന്നു.

     മുന്മഴയാൽ അത് അനുഗ്രഹപൂർണ്ണമായിത്തീരുന്നു.

     ⁷ അവർ മേല്ക്കുമേൽ ബലം പ്രാപിക്കുന്നു;

     എല്ലാവരും സീയോനിൽ ദൈവസന്നിധിയിൽ ചെന്നെത്തുന്നു.

     ⁸ സൈന്യങ്ങളുടെ ദൈവമായ യഹോവേ, എന്റെ പ്രാർത്ഥന കേൾക്കണമേ;

     യാക്കോബിന്റെ ദൈവമേ, ചെവിക്കൊള്ളണമേ. സേലാ.

     ⁹ ഞങ്ങളുടെ പരിചയായ ദൈവമേ, നോക്കണമേ;

     നിന്റെ അഭിഷിക്തന്റെ മുഖത്തെ കടാക്ഷിക്കണമേ;

     ¹⁰ നിന്റെ പ്രാകാരങ്ങളിൽ കഴിക്കുന്ന ഒരു ദിവസം

     വേറെ ആയിരം ദിവസത്തെക്കാൾ ഉത്തമമല്ലയോ?;

     ദുഷ്ടന്മാരുടെ കൂടാരങ്ങളിൽ വസിക്കുന്നതിനെക്കാൾ

     എന്റെ ദൈവത്തിന്റെ ആലയത്തിൽ വാതിൽ കാവല്ക്കാരനായിരിക്കുന്നതാണ് എനിക്ക് ഏറെ ഇഷ്ടം.

     ¹¹ യഹോവയായ ദൈവം സൂര്യനും പരിചയും ആകുന്നു;

     യഹോവ കൃപയും മഹത്വവും നല്കുന്നു;

     നേർബുദ്ധിയോടെ നടക്കുന്നവർക്ക് അവൻ ഒരു നന്മയും മുടക്കുകയില്ല.

     ¹² സൈന്യങ്ങളുടെ യഹോവേ,

     നിന്നിൽ ആശ്രയിക്കുന്ന മനുഷ്യൻ ഭാഗ്യവാൻ.

സങ്കീർത്തനം.84 85

     ¹ യഹോവേ, നീ നിന്റെ ദേശത്തെ കടാക്ഷിച്ചിരിക്കുന്നു;

     യാക്കോബിന്റെ പ്രവാസികളെ മടക്കി വരുത്തിയിരിക്കുന്നു.

     ² നിന്റെ ജനത്തിന്റെ അകൃത്യം നീ മോചിച്ചു;

     അവരുടെ പാപം സകലവും നീ മൂടിക്കളഞ്ഞു. സേലാ.

     ³ നിന്റെ ക്രോധത്തിന്റെ ഭയാനകതയിൽ നിന്ന് നീ പിന്മാറിയിരിക്കുന്നു.

     ⁴ ഞങ്ങളുടെ രക്ഷയുടെ ദൈവമേ, ഞങ്ങളെ യഥാസ്ഥാനപ്പെടുത്തണമേ;

     ഞങ്ങളോടുള്ള നിന്റെ നീരസം മതിയാക്കണമേ.

     ⁵ നീ സദാകാലവും ഞങ്ങളോട് കോപിക്കുമോ?

     തലമുറതലമുറയോളം നിന്റെ കോപം നിലനില്ക്കുമോ?

     ⁶ നിന്റെ ജനം നിന്നിൽ ആനന്ദിക്കേണ്ടതിന്

     നീ ഞങ്ങളെ വീണ്ടും ജീവിപ്പിക്കുകയില്ലയോ?

     ⁷ യഹോവേ,ഞങ്ങളോട് ദയ കാണിക്കണമേ;

     നിന്റെ രക്ഷ ഞങ്ങൾക്ക് നല്കണമേ.

     ⁸ യഹോവയായ ദൈവം അരുളിച്ചെയ്യുന്നത് ഞാൻ കേൾക്കും;

     അവൻ തന്റെ ജനത്തിനും തന്റെ ഭക്തന്മാർക്കും സമാധാനം അരുളും.അവർ ഭോഷത്തത്തിലേക്ക് വീണ്ടും തിരിയാതിരിക്കട്ടെ.

     ⁹ തിരുമഹത്വം നമ്മുടെ ദേശത്തിൽ വസിക്കേണ്ടതിന്

     അവന്റെ രക്ഷ അവന്റെ ഭക്തന്മാർക്ക് സമീപമായിരിക്കുന്നു, നിശ്ചയം.

     ¹⁰ ദയയും വിശ്വസ്തതയും തമ്മിൽ എതിരേറ്റിരിക്കുന്നു.

     നീതിയും സമാധാനവും തമ്മിൽ ചുംബിച്ചിരിക്കുന്നു.

     ¹¹ വിശ്വസ്തത ഭൂമിയിൽനിന്ന് മുളയ്ക്കുന്നു;

     നീതി സ്വർഗ്ഗത്തിൽനിന്ന് നോക്കുന്നു.

     ¹² യഹോവ നന്മ നല്കുകയും

     നമ്മുടെ ദേശം വിളവ് തരുകയും ചെയ്യും.

     ¹³ നീതി അവന് മുമ്പായി നടക്കുകയും

     അവന്റെ കാൽചുവടുകൾ നമുക്ക് പാതയാകുകയും ചെയ്യും.

സങ്കീർത്തനം.85 86

     ¹ യഹോവേ, ചെവി ചായിക്കണമേ; എനിക്കുത്തരമരുളണമേ;

     ഞാൻ എളിയവനും ദരിദ്രനും ആകുന്നു.

     ² എന്റെ പ്രാണനെ കാക്കണമേ;

     ഞാൻ നിന്റെ ഭക്തനാകുന്നുവല്ലോ;

     എന്റെ ദൈവമേ, നിന്നിൽ ആശ്രയിക്കുന്ന അടിയനെ രക്ഷിക്കണമേ.

     ³ കർത്താവേ, എന്നോട് കൃപയുണ്ടാണമേ;

     ഇടവിടാതെ ഞാൻ നിന്നോട് നിലവിളിക്കുന്നു.

     ⁴ അടിയന്റെ ഉള്ളത്തെ സന്തോഷിപ്പിക്കണമേ;

     യഹോവേ, നിങ്കലേക്ക് ഞാൻ എന്റെ ഉള്ളം ഉയർത്തുന്നു.

     ⁵ കർത്താവേ, നീ നല്ലവനും ക്ഷമിക്കുന്നവനും

     നിന്നോട് അപേക്ഷിക്കുന്ന എല്ലാവരോടും മഹാദയാലുവും ആകുന്നു.

     ⁶ യഹോവേ, എന്റെ പ്രാർത്ഥന ചെവിക്കൊള്ളണമേ;

     എന്റെ യാചനകൾ ശ്രദ്ധിക്കണമേ.

     ⁷ നീ എനിക്ക് ഉത്തരമരുളുകയാൽ

     എന്റെ കഷ്ടദിവസത്തിൽ ഞാൻ നിന്നെ വിളിച്ചപേക്ഷിക്കുന്നു.

     ⁸ കർത്താവേ, ദേവന്മാരിൽ നിനക്ക് തുല്യനായി ആരുമില്ല.

     നിന്റെ പ്രവൃത്തികൾക്കു തുല്യമായി ഒരു പ്രവൃത്തിയുമില്ല.

     ⁹ കർത്താവേ, നീ ഉണ്ടാക്കിയ സകലജനതതികളും തിരുമുമ്പിൽ വന്ന് നമസ്കരിക്കും;

     അവർ നിന്റെ നാമത്തെ മഹത്വപ്പെടുത്തും.

     ¹⁰ നീ വലിയവനും അത്ഭുതങ്ങൾ പ്രവർത്തിക്കുന്നവനുമല്ലയോ?;

     നീ മാത്രം ദൈവമാകുന്നു.

     ¹¹ യഹോവേ, നിന്റെ വഴി എന്നെ പഠിപ്പിക്കണമെ;

     എന്നാൽ ഞാൻ നിന്റെ സത്യത്തിൽ നടക്കും;

     നിന്റെ നാമത്തെ ഭയപ്പെടുവാൻ എന്റെ ഹൃദയത്തെ ഏകാഗ്രമാക്കണമേ.

     ¹² എന്റെ ദൈവമായ കർത്താവേ, ഞാൻ പൂർണ്ണഹൃദയത്തോടെ നിന്നെ സ്തുതിക്കും;

     നിന്റെ നാമത്തെ എന്നേക്കും മഹത്വപ്പെടുത്തും.

     ¹³ എന്നോടുള്ള നിന്റെ ദയ വലിയതാണല്ലോ;

     നീ എന്റെ പ്രാണനെ പാതാളത്തിന്റെ ആഴത്തിൽ നിന്ന് രക്ഷിച്ചിരിക്കുന്നു.

     ¹⁴ ദൈവമേ, അഹങ്കാരികൾ എന്നോട് എതിർത്തിരിക്കുന്നു.

     നീചന്മാരുടെ കൂട്ടം എനിക്ക് പ്രാണഹാനി വരുത്തുവാൻ നോക്കുന്നു.

     അവർ നിന്നെ ശ്രദ്ധിക്കുന്നതുമില്ല.

     ¹⁵ കർത്താവേ, അങ്ങ് കരുണയും കൃപയും നിറഞ്ഞ ദൈവമാകുന്നു;

     ദീർഘക്ഷമയും മഹാദയയും വിശ്വസ്തതയുമുള്ളവൻ തന്നെ.

     ¹⁶ എന്നിലേക്കു തിരിഞ്ഞ് എന്നോടു കൃപയുണ്ടാകണമേ;

     നിന്റെ ദാസന് നിന്റെ ശക്തി തന്ന്,

     നിന്റെ ദാസിയുടെ പുത്രനെ രക്ഷിക്കണമേ.

     ¹⁷ എന്നെവെറുക്കുന്നവർ കണ്ട് ലജ്ജിക്കേണ്ടതിന്

     നന്മയ്ക്കായി ഒരു അടയാളം എനിക്ക് തരണമേ;

     യഹോവേ, നീ എന്നെ സഹായിച്ച് ആശ്വസിപ്പിച്ചിരിക്കുന്നുവല്ലോ.

സങ്കീർത്തനം.86 87

     ¹ യഹോവ തന്റെ നഗരത്തെ വിശുദ്ധപർവ്വതത്തിൽ സ്ഥാപിച്ചിരിക്കുന്നു.

     ² യഹോവ സീയോന്റെ പടിവാതിലുകളെ ,

     യാക്കോബിന്റെ സകലനിവാസങ്ങളെക്കാളും അധികം സ്നേഹിക്കുന്നു.

     ³ ദൈവത്തിന്റെ നഗരമേ, നിന്നെക്കുറിച്ച് മഹത്ത്വമുള്ള കാര്യങ്ങൾ അരുളിച്ചെയ്തിരിക്കുന്നു. സേലാ.

     ⁴ ഞാൻ എന്റെ പരിചയക്കാരുടെ കൂട്ടത്തിൽ രഹബിനെയും ബാബേലിനെയും ഫെലിസ്ത്യർ, സോർ, കൂശ് എന്നിവരെയും കുറിച്ച് പ്രസ്താവിക്കും; “ഇവൻ അവിടെ ജനിച്ചു.

     ⁵ ഇവനും അവനും അവിടെ ജനിച്ചു” എന്ന് സീയോനെക്കുറിച്ച് പറയും;

     അത്യുന്നതൻ തന്നെ അതിനെ സ്ഥാപിച്ചിരിക്കുന്നു.

     ⁶ യഹോവ വംശങ്ങളെ എഴുതുമ്പോൾ:

     “ഇവൻ അവിടെ ജനിച്ചു” എന്നിങ്ങനെ എണ്ണും സേലാ.

     ⁷ “എന്റെ ഉറവുകൾ എല്ലാം നിന്നിൽ ആകുന്നു” എന്ന്

     സംഗീതക്കാരും നൃത്തം ചെയ്യുന്നവരും ഒരുപോലെ പറയും.

സങ്കീർത്തനം.87 88

     ¹ എന്റെ രക്ഷയുടെ ദൈവമായ യഹോവേ,

     ഞാൻ രാവും പകലും തിരുസന്നിധിയിൽ നിലവിളിക്കുന്നു;

     ² എന്റെ പ്രാർത്ഥന നിന്റെ മുമ്പിൽ വരുമാറാകട്ടെ;

     എന്റെ നിലവിളിക്കു ചെവി ചായിക്കണമേ.

     ³ എന്റെ പ്രാണൻ കഷ്ടതകൊണ്ട് നിറഞ്ഞിരിക്കുന്നു;

     എന്റെ ജീവൻ പാതാളത്തോട് സമീപിക്കുന്നു.

     ⁴ കുഴിയിൽ ഇറങ്ങുന്നവരുടെ കൂട്ടത്തിൽ എന്നെ എണ്ണിയിരിക്കുന്നു;

     ഞാൻ ബലഹീനനായ മനുഷ്യനെപ്പോലെയാകുന്നു.

     ⁵ ശവക്കുഴിയിൽ കിടക്കുന്ന ഹതന്മാരെപ്പോലെ എന്നെ മരിച്ചവരുടെ കൂട്ടത്തിൽ ഉപേക്ഷിച്ചിരിക്കുന്നു;

     അവരെ നീ പിന്നെ ഓർക്കുന്നില്ല;

     അവർ നിന്റെ കൈയിൽനിന്ന് ഛേദിക്കപ്പെട്ടുപോയിരിക്കുന്നു.

     ⁶ നീ എന്നെ ഏറ്റവും താണകുഴിയിലും ഇരുട്ടിലും ആഴങ്ങളിലും ഇട്ടിരിക്കുന്നു.

     ⁷ നിന്റെ ക്രോധം എനിക്ക് ഭാരമായിരിക്കുന്നു;

     നിന്റെ എല്ലാ തിരകളുംകൊണ്ട് നീ എന്നെ വലച്ചിരിക്കുന്നു. സേലാ.

     ⁸ എന്റെ പരിചയക്കാരെ നീ എന്നോട് അകറ്റി,

     അവർക്ക് എന്നോട് വെറുപ്പായിരിക്കുന്നു;

     പുറത്തിറങ്ങുവാൻ കഴിയാത്തവിധം എന്നെ അടച്ചിരിക്കുന്നു.

     ⁹ എന്റെ കണ്ണ് കഷ്ടതഹേതുവായി ക്ഷയിച്ചുപോകുന്നു;

     യഹോവേ, ഞാൻ ദിവസംപ്രതി നിന്നെ വിളിച്ചപേക്ഷിക്കുകയും

     എന്റെ കൈകളെ നിങ്കലേക്ക് മലർത്തുകയും ചെയ്യുന്നു.

     ¹⁰ നീ മരിച്ചവർക്ക് വേണ്ടി അത്ഭുതങ്ങൾ ചെയ്യുമോ?

     മൃതന്മാർ എഴുന്നേറ്റ് നിന്നെ സ്തുതിക്കുമോ? സേലാ.

     ¹¹ ശവക്കുഴിയിൽ നിന്റെ ദയയെയും

     വിനാശത്തിൽ നിന്റെ വിശ്വസ്തതയെയും വർണ്ണിക്കുമോ?

     ¹² അന്ധകാരത്തിൽ നിന്റെ അത്ഭുതങ്ങളും

     വിസ്മൃതിയുടെ ദേശത്ത് നിന്റെ നീതിയും വെളിപ്പെടുമോ?

     ¹³ എന്നാൽ യഹോവേ, ഞാൻ നിന്നോട് നിലവിളിക്കുന്നു;

     രാവിലെ എന്റെ പ്രാർത്ഥന തിരുസന്നിധിയിൽ വരുന്നു.

     ¹⁴ യഹോവേ, നീ എന്റെ പ്രാണനെ തള്ളിക്കളയുന്നതെന്തിന്?

     നിന്റെ മുഖത്തെ എനിക്ക് മറയ്ക്കുന്നതും എന്തിന്?

     ¹⁵ ബാല്യം മുതൽ ഞാൻ അരിഷ്ടനും മൃതപ്രായനും ആകുന്നു;

     ഞാൻ നിന്റെ ഭീകരതകൾ സഹിച്ച് വലഞ്ഞിരിക്കുന്നു.

     ¹⁶ നിന്റെ ഉഗ്രകോപം എന്റെ മീതെ കവിഞ്ഞിരിക്കുന്നു;

     നിന്റെ ഭീകരത എന്നെ സംഹരിച്ചിരിക്കുന്നു.

     ¹⁷ അവ ഇടവിടാതെ വെള്ളംപോലെ എന്നെ ചുറ്റുന്നു;

     അവ ഒരുപോലെ എന്നെ വളയുന്നു.

     ¹⁸ സ്നേഹിതനെയും കൂട്ടാളിയെയും നീ എന്നോട് അകറ്റിയിരിക്കുന്നു;

     എന്റെ സ്നേഹിതന്മാർ അന്ധകാരമത്രേ.

സങ്കീർത്തനം.88 89

     ¹ യഹോവയുടെ കൃപകളെക്കുറിച്ച് ഞാൻ എന്നേക്കും പാടും;

     തലമുറതലമുറയോളം എന്റെ വായ് കൊണ്ടു നിന്റെ വിശ്വസ്തതയെ അറിയിക്കും.

     ² “ദയ എന്നേക്കും ഉറച്ചുനില്ക്കും” എന്ന് ഞാൻ പറയുന്നു;

     നിന്റെ വിശ്വസ്തതയെ നീ സ്വർഗ്ഗത്തിൽ സ്ഥിരമാക്കിയിരിക്കുന്നു.

     ³ എന്റെ വൃതനോട് ഞാൻ ഒരു നിയമവും

     എന്റെ ദാസനായ ദാവീദിനോട് സത്യവും ചെയ്തിരിക്കുന്നു.

     ⁴ “നിന്റെ സന്തതിയെ ഞാൻ എന്നേക്കും സ്ഥിരപ്പെടുത്തും;

     നിന്റെ സിംഹാസനത്തെ തലമുറതലമുറയോളം ഉറപ്പിക്കും.” സേലാ.

     ⁵ യഹോവേ, സ്വർഗ്ഗം നിന്റെ അത്ഭുതങ്ങളെയും

     വിശുദ്ധന്മാരുടെ സഭയിൽ നിന്റെ വിശ്വസ്തതയെയും വർണ്ണിക്കും.

     ⁶ സ്വർഗ്ഗത്തിൽ യഹോവയോട് സദൃശനായവൻ ആര്?

     ദേവപുത്രന്മാരിൽ യഹോവയ്ക്ക് തുല്യനായവൻ ആർ?

     ⁷ ദൈവം വിശുദ്ധന്മാരുടെ സംഘത്തിൽ ഏറ്റവും ഭയപ്പെടേണ്ടവനും

     അവന്റെ ചുറ്റുമുള്ള എല്ലാവരും ഭയപ്പെടുവാൻ യോഗ്യനും ആകുന്നു.

     ⁸ സൈന്യങ്ങളുടെ ദൈവമായ യഹോവേ, നിന്നെപ്പോലെ ബലവാൻ ആരാണുള്ളത്?

     യഹോവേ, നിന്റെ വിശ്വസ്തത നിന്നെ ചുറ്റിയിരിക്കുന്നു.

     ⁹ നീ സമുദ്രത്തിന്റെ ഗർവ്വത്തെ അടക്കിവാഴുന്നു;

     അതിലെ തിരകൾ പൊങ്ങുമ്പോൾ നീ അവയെ അമർത്തുന്നു.

     ¹⁰ നീ രഹബിനെ ഒരു ഹതനെപ്പോലെ തകർത്തു;

     നിന്റെ ബലമുള്ള ഭുജംകൊണ്ട് നിന്റെ ശത്രുക്കളെ ചിതറിച്ചുകളഞ്ഞു.

     ¹¹ ആകാശം നിനക്കുള്ളത്, ഭൂമിയും നിനക്കുള്ളത്;

     ഭൂതലവും അതിന്റെ പൂർണ്ണതയും നീ സ്ഥാപിച്ചിരിക്കുന്നു.

     ¹² ദക്ഷിണോത്തരദിക്കുകളെ നീ സൃഷ്ടിച്ചിരിക്കുന്നു;

     താബോരും ഹെർമ്മോനും നിന്റെ നാമത്തിൽ ആനന്ദിക്കുന്നു;

     ¹³ നിന്റെ ഭുജം വീര്യമുള്ളത് ;

     നിന്റെ കൈ ബലമുള്ളതും നിന്റെ വലങ്കൈ ഉന്നതവും ആകുന്നു.

     ¹⁴ നീതിയും ന്യായവും നിന്റെ സിംഹാസനത്തിന്റെ അടിസ്ഥാനമാകുന്നു;

     ദയയും വിശ്വസ്തതയും നിനക്കു മുമ്പായി നടക്കുന്നു.

     ¹⁵ ജയഘോഷം അറിയുന്ന ജനം ഭാഗ്യമുള്ളത്;

     യഹോവേ, അവർ നിന്റെ മുഖപ്രകാശത്തിൽ നടക്കും.

     ¹⁶ അവർ ഇടവിടാതെ നിന്റെ നാമത്തിൽ ഘോഷിച്ചുല്ലസിക്കുന്നു;

     നിന്റെ നീതിയിൽ അവർ ഉയർന്നിരിക്കുന്നു.

     ¹⁷ നീ അവരുടെ ബലത്തിന്റെ മഹത്ത്വമാകുന്നു;

     നിന്റെ പ്രസാദത്താൽ ഞങ്ങളുടെ കൊമ്പ് ഉയർന്നിരിക്കുന്നു.

     ¹⁸ നമ്മുടെ പരിച യഹോവയ്ക്കുള്ളതും

     നമ്മുടെ രാജാവ് യിസ്രായേലിന്റെ പരിശുദ്ധനുള്ളവനും ആകുന്നു.

     ¹⁹ അന്ന് നീ ദർശനത്തിൽ നിന്റെ ഭക്തന്മാരോട് അരുളിച്ചെയ്തത്;

     “ഞാൻ വീരനായ ഒരുത്തന് സഹായം നല്കുകയും

     ജനത്തിൽനിന്ന് ഒരു വൃതനെ ഉയർത്തുകയും ചെയ്തു.

     ²⁰ ഞാൻ എന്റെ ദാസനായ ദാവീദിനെ കണ്ടെത്തി;

     എന്റെ വിശുദ്ധതൈലംകൊണ്ട് അവനെ അഭിഷേകം ചെയ്തു.

     ²¹ എന്റെ കൈ അവനോടുകൂടി സ്ഥിരമായിരിക്കും;

     എന്റെ ഭുജം അവനെ ബലപ്പെടുത്തും.

     ²² ശത്രു അവനെ തോല്പിക്കുകയില്ല;

     വഷളൻ അവനെ പീഡിപ്പിക്കുകയും ഇല്ല.

     ²³ ഞാൻ അവന്റെ വൈരികളെ അവന്റെ മുമ്പിൽ തകർക്കും;

     അവനെ വെറുക്കുന്നവരെ സംഹരിക്കും,

     ²⁴ എന്നാൽ എന്റെ വിശ്വസ്തതയും ദയയും അവനോടുകൂടി ഇരിക്കും;

     എന്റെ നാമത്തിൽ അവന്റെ കൊമ്പ് ഉയർന്നിരിക്കും.

     ²⁵ അവന്റെ കൈ ഞാൻ സമുദ്രത്തിന്മേലും

     അവന്റെ വലങ്കൈ നദികളുടെമേലും നീട്ടുമാറാക്കും.

     ²⁶ അവൻ എന്നോട്: ‘നീ എന്റെ പിതാവ്, എന്റെ ദൈവം,

     എന്റെ രക്ഷയുടെ പാറ’ എന്നിങ്ങനെ വിളിച്ചുപറയും.

     ²⁷ ഞാൻ അവനെ ആദ്യജാതനും

     ഭൂരാജാക്കന്മാരിൽ ശ്രേഷ്ഠനുമാക്കും.

     ²⁸ ഞാൻ അവന് എന്റെ ദയ എന്നേക്കും കാണിക്കും;

     എന്റെ നിയമം അവനുവേണ്ടി സ്ഥിരമായി നില്ക്കും.

     ²⁹ ഞാൻ അവന്റെ സന്തതിയെ ശാശ്വതമായും

     അവന്റെ സിംഹാസനത്തെ ആകാശമുള്ള കാലത്തോളവും നിലനിർത്തും.

     ³⁰ അവന്റെ പുത്രന്മാർ എന്റെ ന്യായപ്രമാണം ഉപേക്ഷിക്കുകയും

     എന്റെ വിധികൾ അനുസരിച്ചുനടക്കാതിരിക്കുകയും

     ³¹ എന്റെ ചട്ടങ്ങൾ ലംഘിക്കുകയും

     എന്റെ കല്പനകൾ പ്രമാണിക്കാതിരിക്കുകയും ചെയ്താൽ

     ³² ഞാൻ അവരുടെ ലംഘനത്തെ വടികൊണ്ടും

     അവരുടെ അകൃത്യത്തെ ദണ്ഡനംകൊണ്ടും സന്ദർശിക്കും.

     ³³ എങ്കിലും എന്റെ ദയ ഞാൻ അവനിൽ നിന്നു നീക്കിക്കളയുകയില്ല;

     എന്റെ വിശ്വസ്തതയ്ക്ക് ഭംഗം വരുത്തുകയുമില്ല.

     ³⁴ ഞാൻ എന്റെ നിയമം ലംഘിക്കുകയോ

     എന്റെ അധരങ്ങളിൽനിന്നു പുറപ്പെട്ടതിന് മാറ്റം വരുത്തുകയോ ചെയ്യുകയില്ല.

     ³⁵ ഞാൻ ഒരിക്കൽ എന്റെ വിശുദ്ധിയിൽ സത്യം ചെയ്തിരിക്കുന്നു;

     ദാവീദിനോട് ഞാൻ ഭോഷ്കുപറയുകയില്ല.

     ³⁶ അവന്റെ സന്തതി ശാശ്വതമായും

     അവന്റെ സിംഹാസനം എന്റെ മുമ്പിൽ സൂര്യനെപ്പോലെയും ഇരിക്കും.

     ³⁷ അതു ചന്ദ്രനെപ്പോലെയും

     ആകാശത്തിലെ വിശ്വസ്തസാക്ഷിയെപ്പോലെയും

     എന്നേക്കും സ്ഥിരമായിരിക്കും.” സേലാ.

     ³⁸ എങ്കിലും നീ ഉപേക്ഷിച്ച് തള്ളിക്കളയുകയും നിന്റെ അഭിഷിക്തനോട് കോപിക്കുകയും ചെയ്തു.

     ³⁹ നിന്റെ ദാസനോടുള്ള നിയമത്തെ നീ തള്ളിക്കളഞ്ഞു;

     അവന്റെ കിരീടത്തെ നീ നിലത്തിട്ട് അശുദ്ധമാക്കിയിരിക്കുന്നു.

     ⁴⁰ നീ അവന്റെ വേലി എല്ലാം പൊളിച്ചു;

     അവന്റെ കോട്ടകളെയും ഇടിച്ചുകളഞ്ഞു.

     ⁴¹ വഴിപോകുന്ന എല്ലാവരും അവനെ കൊള്ളയിടുന്നു;

     തന്റെ അയല്ക്കാർക്ക് അവൻ നിന്ദ ആയിത്തീർന്നിരിക്കുന്നു.

     ⁴² നീ അവന്റെ വൈരികളുടെ വലം കൈ ഉയർത്തി;

     അവന്റെ സകലശത്രുക്കളെയും സന്തോഷിപ്പിച്ചു.

     ⁴³ അവന്റെ വാളിന്റെ വായ്ത്തല നീ മടക്കി;

     യുദ്ധത്തിൽ അവനെ നില്ക്കുമാറാക്കിയതുമില്ല.

     ⁴⁴ അവന്റെ തേജസ്സ് നീ ഇല്ലാതെയാക്കി;

     അവന്റെ സിംഹാസനം നിലത്ത് തള്ളിയിട്ടു.

     ⁴⁵ അവന്റെ യൗവനത്തെ നീ ചുരുക്കി;

     നീ അവനെ ലജ്ജകൊണ്ട് മൂടിയിരിക്കുന്നു. സേലാ.

     ⁴⁶ യഹോവേ, നീ നിത്യം മറഞ്ഞുകളയുന്നതും

     നിന്റെ ക്രോധം തീപോലെ ജ്വലിക്കുന്നതും എത്രത്തോളം?

     ⁴⁷ എന്റെ ആയുസ്സ് എത്രചുരുക്കം എന്ന് ഓർക്കണമേ;

     എന്തു വ്യർത്ഥതയ്ക്കായി നീ മനുഷ്യപുത്രന്മാരെ ഒക്കെയും സൃഷ്ടിച്ചു?

     ⁴⁸ ജീവിച്ചിരുന്ന് മരണം കാണാതെയിരിക്കുന്ന മനുഷ്യൻ ആര്?

     തന്റെ പ്രാണനെ പാതാളത്തിന്റെ കയ്യിൽ നിന്ന് വിടുവിക്കുന്നവനും ആരാണ്? സേലാ.

     ⁴⁹ കർത്താവേ, നിന്റെ വിശ്വസ്തതയിൽ നി ദാവീദിനോട്

     സത്യംചെയ്ത നിന്റെ പുരാതനകൃപകൾ എവിടെ?

     ⁵⁰ കർത്താവേ, അടിയങ്ങളുടെ നിന്ദ ഓർക്കണമേ;

     എന്റെ മാർവ്വിടത്തിൽ ഞാൻ സകല ജനതതിയുടെയും നിന്ദ വഹിക്കുന്നതു തന്നെ.

     ⁵¹ യഹോവേ, നിന്റെ ശത്രുക്കൾ നിന്ദിക്കുന്നുവല്ലോ;

     അവർ നിന്റെ അഭിഷിക്തന്റെ കാലടികളെ നിന്ദിക്കുന്നു.

     ⁵² യഹോവ എന്നുമെന്നേക്കും വാഴ്ത്തപ്പെടുമാറാകട്ടെ. ആമേൻ, ആമേൻ.

സങ്കീർത്തനം.89 90

     ¹ കർത്താവേ, നീ തലമുറതലമുറയായി ഞങ്ങളുടെ സങ്കേതമായിരിക്കുന്നു;

     ² പർവ്വതങ്ങൾ ഉണ്ടായതിനും

     നീ ഭൂമിയെയും ഭൂമണ്ഡലത്തെയും നിർമ്മിച്ചതിനും മുൻപ്

     നീ അനാദിയായും ശാശ്വതമായും ദൈവം ആകുന്നു.

     ³ നീ മർത്യനെ പൊടിയിലേക്ക് മടങ്ങിച്ചേരുമാറാക്കുന്നു;

     “മനുഷ്യപുത്രന്മാരേ, തിരികെ വരുവിൻ” എന്നും അരുളിച്ചെയ്യുന്നു.

     ⁴ ആയിരം സംവത്സരം നിന്റെ ദൃഷ്ടിയിൽ

     ഇന്നലെ കഴിഞ്ഞുപോയ ദിവസം പോലെയും

     രാത്രിയിലെ ഒരു യാമംപോലെയും മാത്രം ആകുന്നു.

     ⁵ നീ അവരെ ഒഴുക്കിക്കളയുന്നു; അവർ ഉറക്കംപോലെ അത്രേ;

     അവർ രാവിലെ മുളച്ചുവരുന്ന പുല്ലുപോലെ ആകുന്നു.

     ⁶ അത് രാവിലെ തഴച്ചുവളരുന്നു;

     വൈകുന്നേരം അത് വാടി കരിഞ്ഞുപോകുന്നു.

     ⁷ ഞങ്ങൾ നിന്റെ കോപത്താൽ ക്ഷയിച്ചും നിന്റെ ക്രോധത്താൽ ഭ്രമിച്ചുംപോകുന്നു.

     ⁸ നീ ഞങ്ങളുടെ അകൃത്യങ്ങൾ നിന്റെ മുമ്പിലും

     ഞങ്ങളുടെ രഹസ്യപാപങ്ങൾ നിന്റെ മുഖപ്രകാശത്തിലും വച്ചിരിക്കുന്നു.

     ⁹ ഞങ്ങളുടെ നാളുകൾ എല്ലാം നിന്റെ ക്രോധത്തിൽ കഴിഞ്ഞുപോയി;

     ഞങ്ങളുടെ സംവത്സരങ്ങൾ ഞങ്ങൾ ഒരു നെടുവീർപ്പുപോലെ കഴിക്കുന്നു.

     ¹⁰ ഞങ്ങളുടെ ആയുഷ്കാലം എഴുപത് സംവത്സരം;

     ഏറെ ആയാൽ എൺപത്;

     അതിന്റെ പ്രതാപം പ്രയാസവും ദുഃഖവുമത്രേ;

     അത് വേഗം തീരുകയും ഞങ്ങൾ പറന്നു പോകുകയും ചെയ്യുന്നു.

     ¹¹ നിന്നെ ഭയപ്പെടുവാൻ തക്കവണ്ണം നിന്റെ കോപത്തിന്റെ ശക്തിയെയും

     നിന്റെ ക്രോധത്തെയും ഗ്രഹിക്കുന്നവൻ ആര്?

     ¹² ഞങ്ങൾ ജ്ഞാനമുള്ള ഒരു ഹൃദയം പ്രാപിക്കത്തക്കവണ്ണം

     ഞങ്ങളുടെ നാളുകളെ എണ്ണുവാൻ ഞങ്ങളെ ഉപദേശിക്കണമേ.

     ¹³ യഹോവേ, മടങ്ങിവരണമേ; എത്രത്തോളം താമസം?

     അടിയങ്ങളോട് സഹതാപം തോന്നണമേ.

     ¹⁴ കാലത്തു തന്നെ ഞങ്ങളെ നിന്റെ ദയകൊണ്ട് തൃപ്തരാക്കണമേ;

     എന്നാൽ ഞങ്ങളുടെ ആയുഷ്കാലമെല്ലാം ഞങ്ങൾ ഘോഷിച്ചാനന്ദിക്കും.

     ¹⁵ നീ ഞങ്ങളെ ക്ലേശിപ്പിച്ച ദിവസങ്ങൾക്കും ഞങ്ങൾ അനർത്ഥം അനുഭവിച്ച സംവത്സരങ്ങൾക്കും

     തക്കവണ്ണം ഞങ്ങളെ സന്തോഷിപ്പിക്കണമേ.

     ¹⁶ നിന്റെ ദാസന്മാർക്ക് നിന്റെ പ്രവൃത്തിയും

     അവരുടെ മക്കൾക്ക് നിന്റെ മഹത്വവും വെളിപ്പെടുമാറാകട്ടെ.

     ¹⁷ ഞങ്ങളുടെ ദൈവമായ യഹോവയുടെ പ്രസാദം ഞങ്ങളുടെമേൽ ഇരിക്കുമാറാകട്ടെ;

     ഞങ്ങളുടെ കൈകളുടെ പ്രവൃത്തികൾ സാദ്ധ്യമാക്കി തരണമേ;

     അതേ, ഞങ്ങളുടെ കൈകളുടെ പ്രവൃത്തികൾ സാദ്ധ്യമാക്കി തരണമേ.

സങ്കീർത്തനം.90 91

     ¹ അത്യുന്നതന്റെ മറവിൽ വസിക്കുകയും

     സർവ്വശക്തന്റെ നിഴലിൻ കീഴിൽ വസിക്കുകയും ചെയ്യുന്നവൻ

     ² യഹോവയെക്കുറിച്ച്: “അവൻ എന്റെ സങ്കേതവും കോട്ടയും

     ഞാൻ ആശ്രയിക്കുന്ന എന്റെ ദൈവവും” എന്ന് പറയുന്നു.

     ³ അവൻ നിന്നെ വേട്ടക്കാരന്റെ കെണിയിൽ നിന്നും

     മാരകമായ മഹാവ്യാധിയിൽനിന്നും വിടുവിക്കും.

     ⁴ തന്റെ തൂവലുകൾകൊണ്ട് അവൻ നിന്നെ മറയ്ക്കും;

     അവന്റെ ചിറകിൻ കീഴിൽ നീ ശരണം പ്രാപിക്കും;

     അവന്റെ വിശ്വസ്തത നിനക്ക് പരിചയും കവചവും ആകുന്നു.

     ⁵ രാത്രിയിലെ ഭീകരതയും

     പകൽ പറന്നുവരുന്ന അമ്പുകളും

     ⁶ ഇരുളിൽ മറഞ്ഞിരിക്കുന്ന മഹാവ്യാധിയും

     ഉച്ചയ്ക്കു നശിപ്പിക്കുന്ന സംഹാരകനും നിന്നെ ഭയപ്പെടുത്തുകയില്ല.

     ⁷ നിന്റെ വശത്ത് ആയിരം പേരും

     നിന്റെ വലത്തുഭാഗത്ത് പതിനായിരം പേരും വീഴാം,

     എങ്കിലും ഇതൊന്നും നിന്നോട് അടുത്തുവരുകയില്ല.

     ⁸ നിന്റെ കണ്ണുകൊണ്ടു തന്നെ നീ നോക്കി ദുഷ്ടന്മാർക്ക് ലഭിക്കുന്ന പ്രതിഫലം കാണും.

     ⁹ എന്റെ സങ്കേതമായ യഹോവയെ,

     അത്യുന്നതനായവനെത്തന്നെ,നീ നിന്റെ വാസസ്ഥലമാക്കി ഇരിക്കുന്നതിനാൽ,

     ¹⁰ ഒരു അനർത്ഥവും നിനക്ക് ഭവിക്കുകയില്ല;

     ഒരു ബാധയും നിന്റെ കൂടാരത്തിന് അടുത്തു വരുകയില്ല.

     ¹¹ നിന്റെ എല്ലാ വഴികളിലും നിന്നെ കാക്കേണ്ടതിന്

     അവൻ നിന്നെക്കുറിച്ച് തന്റെ ദൂതന്മാരോട് കല്പിക്കും;

     ¹² നിന്റെ കാൽ കല്ലിൽ തട്ടാതിരിക്കേണ്ടതിന്

     അവർ നിന്നെ കൈകളിൽ വഹിച്ചു കൊള്ളും.

     ¹³ സിംഹത്തെയും അണലിയെയും നീ ചവിട്ടും;

     ബാലസിംഹത്തെയും പെരുമ്പാമ്പിനെയും നീ മെതിച്ചുകളയും.

     ¹⁴ “അവൻ സ്നേഹപൂർവം എന്നോട് പറ്റിയിരിക്കുകയാൽ ഞാൻ അവനെ വിടുവിക്കും;

     അവൻ എന്റെ നാമത്തെ അറിയുകയാൽ ഞാൻ അവനെ ഉയർത്തും.

     ¹⁵ അവൻ എന്നെ വിളിച്ചപേക്ഷിക്കും; ഞാൻ അവന് ഉത്തരമരുളും;

     കഷ്ടകാലത്ത് ഞാൻ അവനോടുകൂടി ഇരിക്കും;

     ഞാൻ അവനെ വിടുവിച്ച് മഹത്വീകരിക്കും.

     ¹⁶ ദീർഘായുസ്സുകൊണ്ട് ഞാൻ അവനെ തൃപ്തനാക്കും;

     എന്റെ രക്ഷയെ അവന് കാണിച്ചുകൊടുക്കും.

സങ്കീർത്തനം.91 92

     ¹ യഹോവയ്ക്ക് സ്തോത്രം ചെയ്യുന്നതും

     അത്യുന്നതനായ യഹോവേ, നിന്റെ നാമത്തെ കീർത്തിക്കുന്നതും

     ² പത്തു കമ്പിയുള്ള വാദിത്രം കൊണ്ടും വീണ കൊണ്ടും

     ഗംഭീരസ്വരമുള്ള കിന്നരം കൊണ്ടും

     ³ രാവിലെ നിന്റെ ദയയും

     രാത്രിയിൽ നിന്റെ വിശ്വസ്തതയും വർണ്ണിക്കുന്നതും നല്ലത്.

     ⁴ യഹോവേ, നിന്റെ പ്രവൃത്തികൊണ്ട് നീ എന്നെ സന്തോഷിപ്പിക്കുന്നു;

     ഞാൻ നിന്റെ കൈകളുടെ പ്രവൃത്തികളെക്കുറിച്ച് ഘോഷിച്ചുല്ലസിക്കുന്നു.

     ⁵ യഹോവേ, നിന്റെ പ്രവൃത്തികൾ എത്രമാത്രം വലിയവയാകുന്നു!

     നിന്റെ വിചാരങ്ങൾ അത്യന്തം അഗാധമായവ തന്നെ.

     ⁶ ബുദ്ധിഹീനനായ മനുഷ്യൻ അത് അറിയുന്നില്ല;

     മൂഢൻ അത് ഗ്രഹിക്കുന്നതും ഇല്ല.

     ⁷ ദുഷ്ടന്മാർ പുല്ലുപോലെ മുളയ്ക്കുന്നതും

     നീതികേട് പ്രവർത്തിക്കുന്നവരെല്ലാം തഴയ്ക്കുന്നതും

     എന്നേക്കും നശിച്ചുപോകേണ്ടതിനാകുന്നു.

     ⁸ യഹോവേ, നീ എന്നേക്കും അത്യുന്നതനാകുന്നു.

     ⁹ യഹോവേ, ഇതാ, നിന്റെ ശത്രുക്കൾ, ഇതാ, നിന്റെ ശത്രുക്കൾ നശിച്ചുപോകുന്നു;

     നീതികേട് പ്രവർത്തിക്കുന്ന ഏവരും ചിതറിപ്പോകും.

     ¹⁰ എങ്കിലും എന്റെ കൊമ്പ് നീ കാട്ടുപോത്തിന്റെ കൊമ്പുപോലെ ഉയർത്തുന്നു;

     പുതിയ എണ്ണ എന്നെ തേപ്പിക്കുന്നു.

     ¹¹ എന്റെ കണ്ണ് എന്റെ ശത്രുക്കളുടെ പതനം കണ്ടു;

     എന്റെ ചെവി എന്നോട് എതിർക്കുന്ന ദുഷ്കർമ്മികളെക്കുറിച്ച് കേട്ടു.

     ¹² നീതിമാൻമാർ പനപോലെ തഴയ്ക്കും;

     ലെബാനോനിലെ ദേവദാരുപോലെ വളരും.

     ¹³ യഹോവ തന്റെ ആലയത്തിൽ നട്ടിരിക്കുന്ന ഇവർ

     നമ്മുടെ ദൈവത്തിന്റെ പ്രാകാരങ്ങളിൽ തഴച്ചുവളരും.

     ¹⁴ വാർദ്ധക്യത്തിലും അവർ ഫലം കായിച്ചുകൊണ്ടിരിക്കും;

     അവർ പുഷ്ടിവച്ചും പച്ചപിടിച്ചും ഇരിക്കും.

     ¹⁵ യഹോവ നേരുള്ളവൻ, അവൻ എന്റെ പാറ, അവനിൽ നീതികേടില്ല എന്ന് കാണിക്കേണ്ടതിനു തന്നെ.

സങ്കീർത്തനം.92 93

     ¹ യഹോവ വാഴുന്നു; അവൻ മഹിമ ധരിച്ചിരിക്കുന്നു;

     യഹോവ ശക്തികൊണ്ട് അര മുറുക്കിയിരിക്കുന്നു.

     ഭൂലോകം ഇളകാതെ ഉറച്ചുനില്ക്കുന്നു.

     ² നിന്റെ സിംഹാസനം പുരാതനമേ സ്ഥാപിക്കപ്പെട്ടിരിക്കുന്നു;

     നീ അനാദിയായുള്ളവൻ തന്നെ.

     ³ യഹോവേ, പ്രവാഹങ്ങൾ ഉയർത്തുന്നു;

     പ്രവാഹങ്ങൾ ശബ്ദം ഉയർത്തുന്നു;

     പ്രവാഹങ്ങൾ തിരമാലകൾ ഉയർത്തുന്നു.

     ⁴ സമുദ്രത്തിലെ വൻതിരകളുടെ ശബ്ദത്തെക്കാളും പെരുവെള്ളങ്ങളുടെ മുഴക്കത്തെക്കാളും

     ഉയരത്തിൽ യഹോവ മഹിമയുള്ളവൻ.

     ⁵ നിന്റെ സാക്ഷ്യങ്ങൾ എത്രയും ഉറപ്പുള്ളവ;

     യഹോവേ, വിശുദ്ധി നിന്റെ ആലയത്തെ എന്നേക്കും അലങ്കരിക്കുന്നു.

സങ്കീർത്തനം.93 94

     ¹ പ്രതികാരത്തിന്റെ ദൈവമായ യഹോവേ,

     പ്രതികാരം ചെയ്യുവാൻ അധികാരമുള്ള ദൈവമേ, പ്രകാശിക്കണമേ.

     ² ഭൂമിയുടെ ന്യായാധിപതിയേ എഴുന്നേല്ക്കണമേ;

     ഡംഭികൾക്ക് നീ പ്രതികാരം ചെയ്യണമേ.

     ³ യഹോവേ, ദുഷ്ടന്മാർ എത്രത്തോളം,

     ദുഷ്ടന്മാർ എത്രത്തോളം ഘോഷിച്ചുല്ലസിക്കും?

     ⁴ അവർ ധാർഷ്ട്യത്തോടെ ശകാരിച്ച് സംസാരിക്കുന്നു;

     നീതികേട് പ്രവർത്തിക്കുന്ന ഏവരും വൻപ് പറയുന്നു.

     ⁵ യഹോവേ, അവർ നിന്റെ ജനത്തെ തകർത്തുകളയുന്നു;

     നിന്റെ അവകാശത്തെ പീഡിപ്പിക്കുന്നു.

     ⁶ അവർ വിധവയെയും പരദേശിയെയും കൊല്ലുന്നു;

     അനാഥരെ അവർ ഹിംസിക്കുന്നു.

     ⁷ “യഹോവ കാണുകയില്ല;

     യാക്കോബിന്റെ ദൈവം ഗ്രഹിക്കുകയില്ല” എന്ന് അവർ പറയുന്നു.

     ⁸ ജനത്തിൽ ബുദ്ധിഹീനരേ, ചിന്തിച്ചുകൊൾവിൻ;

     ഭോഷന്മാരേ, നിങ്ങൾക്ക് എപ്പോൾ ബുദ്ധി ഉദിക്കും?

     ⁹ ചെവിയെ നട്ടവൻ കേൾക്കുകയില്ലയോ?

     കണ്ണ് നിർമ്മിച്ചവൻ കാണുകയില്ലയോ?

     ¹⁰ ജനതതികളുടെ മേൽ ശിക്ഷണം നടത്തുന്നവൻ ശാസിക്കുകയില്ലയോ?

     അവൻ മനുഷ്യർക്ക് ജ്ഞാനം ഉപദേശിച്ചുകൊടുക്കുന്നില്ലയോ?

     ¹¹ മനുഷ്യരുടെ വിചാരങ്ങൾ മായ എന്ന് യഹോവ അറിയുന്നു.

     ¹² യഹോവേ, ദുഷ്ടനെ മറവു ചെയ്യുവാൻ കുഴി കുഴിക്കുവോളം

     അനർത്ഥദിവസത്തിൽ വിശ്രമം നൽകേണ്ടതിന്

     ¹³ നീ ശിക്ഷിക്കുകയും നിന്റെ ന്യായപ്രമാണം

     ഉപദേശിക്കുകയും ചെയ്യുന്ന മനുഷ്യൻ ഭാഗ്യവാൻ.

     ¹⁴ യഹോവ തന്റെ ജനത്തെ തള്ളിക്കളയുകയില്ല;

     തന്റെ അവകാശത്തെ കൈവിടുകയുമില്ല.

     ¹⁵ നീതിപൂർവമായ ന്യായവിധികൾ മടങ്ങിവരും;

     പരമാർത്ഥഹൃദയമുള്ളവരെല്ലാം അതിനോട് യോജിക്കും.

     ¹⁶ ദുഷ്കർമ്മികൾക്കെതിരെ ആര് എനിക്കു വേണ്ടി എഴുന്നേല്ക്കും?

     നീതികേട് പ്രവർത്തിക്കുന്നവരോട് ആര് എനിക്കു വേണ്ടി എതിർത്തുനില്ക്കും?

     ¹⁷ യഹോവ എനിക്കു സഹായമായിരുന്നില്ലെങ്കിൽ

     എന്റെ പ്രാണൻ വേഗം മൗനവാസം ചെയ്യുമായിരുന്നു.

     ¹⁸ “എന്റെ കാൽ വഴുതുന്നു” എന്ന് ഞാൻ പറഞ്ഞപ്പോൾ

     യഹോവേ, നിന്റെ ദയ എന്നെ താങ്ങി.

     ¹⁹ എന്റെ ഉള്ളിൽ ആകുലചിന്തകൾ പെരുകുമ്പോൾ

     നിന്നിൽ നിന്നുള്ള ആശ്വാസം എന്റെ പ്രാണനെ തണുപ്പിക്കുന്നു.

     ²⁰ നിയമം മൂലം തിന്മയ്ക്ക് വഴിയൊരുക്കുന്ന

     ദുഷ്ടസിംഹാസനത്തിന് നിന്നോട് സഖ്യം ഉണ്ടാകുമോ?

     ²¹ നീതിമാന്റെ പ്രാണന് വിരോധമായി അവർ കൂട്ടംകൂടുന്നു;

     നിരപരാധിയെ അവർ ശിക്ഷയ്ക്ക് വിധിക്കുന്നു.

     ²² എങ്കിലും യഹോവ എനിക്ക് രക്ഷാഗോപുരവും

     എന്റെ ശരണശൈലവും എന്റെ ദൈവവും ആകുന്നു.

     ²³ അവൻ അവരുടെ നീതികേടു കൊണ്ട് തന്നെ അവരുടെമേൽ ശിക്ഷവരുത്തും;

     അവരുടെ ദുഷ്ടതയിൽ തന്നെ അവരെ സംഹരിക്കും;

     നമ്മുടെ ദൈവമായ യഹോവ അവരെ ഛേദിച്ചുകളയും.

സങ്കീർത്തനം.94 95

     ¹ വരുവിൻ, നാം യഹോവയ്ക്കു പാടുക;

     നമ്മുടെ രക്ഷയുടെ പാറയ്ക്ക് ആനന്ദത്തോടെ ആർപ്പിടുക.

     ² നാം സ്തോത്രത്തോടെ അവന്റെ സന്നിധിയിൽ ചെല്ലുക;

     സങ്കീർത്തനങ്ങളോടെ അവന്റെ മുമ്പാകെ ഘോഷിക്കുക.

     ³ യഹോവ മഹാദൈവമല്ലോ;

     അവൻ സകലദേവന്മാർക്കും മീതെ മഹാരാജാവു തന്നെ.

     ⁴ ഭൂമിയുടെ അധോഭാഗങ്ങൾ അവന്റെ കയ്യിൽ ആകുന്നു;

     പർവ്വതങ്ങളുടെ ശിഖരങ്ങളും അവനുള്ളവ.

     ⁵ സമുദ്രം അവനുള്ളത്; അവൻ അതിനെ ഉണ്ടാക്കി;

     കരയെയും അവന്റെ കൈകൾ മനഞ്ഞിരിക്കുന്നു.

     ⁶ വരുവിൻ, നാം വണങ്ങി നമസ്കരിക്കുക;

     നമ്മെ നിർമ്മിച്ച യഹോവയുടെ മുമ്പിൽ മുട്ടുകുത്തുക.

     ⁷ അവൻ നമ്മുടെ ദൈവമാകുന്നു;

     നാമോ അവൻ മേയിക്കുന്ന ജനവും അവന്റെ കൈക്കീഴിലെ ആടുകളും തന്നെ.

     ⁸ ഇന്ന് നിങ്ങൾ അവന്റെ ശബ്ദം കേൾക്കുന്നു എങ്കിൽ,

     മെരീബയിലെപ്പോലെയും മരുഭൂമിയിൽ മസ്സാനാളിലെപ്പോലെയും

     നിങ്ങളുടെ ഹൃദയം കഠിനമാക്കരുത്.

     ⁹ അവിടെവച്ച് നിങ്ങളുടെ പിതാക്കന്മാർ എന്നെ പരീക്ഷിച്ചു;

     എന്റെ പ്രവൃത്തി അവർ കണ്ടിട്ടും എന്നെ ശോധന ചെയ്തു.

     ¹⁰ നാല്പത് വർഷം ഞാൻ ആ തലമുറയെക്കുറിച്ച് ദു:ഖിച്ചു.

     “അവർ തെറ്റിപ്പോകുന്ന ഹൃദയമുള്ള ഒരു ജനം എന്നും

     എന്റെ വഴികൾ അറിഞ്ഞിട്ടില്ലാത്തവർ”എന്നും ഞാൻ പറഞ്ഞു.

     ¹¹ “ആകയാൽ അവർ എന്റെ സ്വസ്ഥതയിൽ പ്രവേശിക്കുകയില്ല” എന്ന്

     ഞാൻ എന്റെ ക്രോധത്തിൽ സത്യം ചെയ്തു.

സങ്കീർത്തനം.95 96

     ¹ യഹോവയ്ക്ക് ഒരു പുതിയ പാട്ട് പാടുവിൻ;

     സകലഭൂവാസികളുമേ, യഹോവയ്ക്ക് പാടുവിൻ.

     ² യഹോവയ്ക്കു പാടി അവന്റെ നാമത്തെ വാഴ്ത്തുവിൻ;

     നാൾതോറും അവന്റെ രക്ഷ പ്രസിദ്ധമാക്കുവിൻ.

     ³ ജനതതികളുടെ ഇടയിൽ അവന്റെ മഹത്വവും

     സകലവംശങ്ങളുടെയും ഇടയിൽ അവന്റെ അത്ഭുതങ്ങളും വിളംബരം ചെയ്യുവിൻ.

     ⁴ യഹോവ വലിയവനും സ്തുതികൾക്ക് ഏറ്റവും യോഗ്യനും ആകുന്നു;

     അവൻ സകലദേവന്മാരെക്കാളും ഭയപ്പെടുവാൻ യോഗ്യൻ.

     ⁵ ജനതകളുടെ ദേവന്മാരൊക്കെയും മിഥ്യാമൂർത്തികളത്രേ;

     യഹോവയോ ആകാശത്തെ ഉണ്ടാക്കിയിരിക്കുന്നു.

     ⁶ ബഹുമാനവും തേജസ്സും അവന്റെ മുമ്പിലും

     ബലവും ശോഭയും അവന്റെ വിശുദ്ധമന്ദിരത്തിലും ഉണ്ട്.

     ⁷ ജനതകളുടെ കുലങ്ങളേ, യഹോവയ്ക്ക് കൊടുക്കുവിൻ;

     മഹത്വവും ബലവും യഹോവയ്ക്ക് കൊടുക്കുവിൻ.

     ⁸ യഹോവയ്ക്ക് അവന്റെ നാമത്തിന് തക്കതായ മഹത്വം കൊടുക്കുവിൻ;

     തിരുമുൽകാഴ്ചയുമായി അവന്റെ പ്രാകാരങ്ങളിൽ ചെല്ലുവിൻ.

     ⁹ വിശുദ്ധിയുടെ അലങ്കാരത്തോടെ യഹോവയെ നമസ്കരിക്കുവിൻ;

     സകല ഭൂവാസികളുമേ, അവന്റെ മുമ്പിൽ നടുങ്ങുവിൻ.

     ¹⁰ “യഹോവ വാഴുന്നു;

     ഭൂലോകവും ഇളകാതെ ഉറച്ചുനില്ക്കുന്നു; അവൻ ജനതകളെ നേരോടെ വിധിക്കും”എന്ന് ജനതകളുടെ ഇടയിൽ പറയുവിൻ.

     ¹¹ ആകാശം സന്തോഷിക്കുകയും ഭൂമി ആനന്ദിക്കുകയും

     സമുദ്രവും അതിലുള്ളതും ആർത്തു ഘോഷിക്കുകയും ചെയ്യട്ടെ.

     ¹² വയലും അതിലുള്ള സകലവും ആഹ്ലാദിക്കട്ടെ;

     അപ്പോൾ കാട്ടിലെ സകലവൃക്ഷങ്ങളും യഹോവയുടെ സന്നിധിയിൽ ഉല്ലസിച്ചുഘോഷിക്കും.

     ¹³ യഹോവയുടെ സന്നിധിയിൽ തന്നെ;

     അവൻ വരുന്നുവല്ലോ; അവൻ ഭൂമിയെ വിധിക്കുവാൻ വരുന്നു;

     അവൻ ഭൂലോകത്തെ നീതിയോടും ജനതതികളെ വിശ്വസ്തതയോടും കൂടി വിധിക്കും.

സങ്കീർത്തനം.96 97

     ¹ യഹോവ വാഴുന്നു; ഭൂമി ഘോഷിച്ചാനന്ദിക്കട്ടെ;

     ദ്വീപസമൂഹവും സന്തോഷിക്കട്ടെ.

     ² മേഘവും അന്ധകാരവും അവന്റെ ചുറ്റും ഇരിക്കുന്നു;

     നീതിയും ന്യായവും അവന്റെ സിംഹാസനത്തിന്റെ അടിസ്ഥാനമാകുന്നു.

     ³ തീ അവന് മുമ്പായി പോകുന്നു;

     ചുറ്റുമുള്ള അവന്റെ വൈരികളെ ദഹിപ്പിക്കുന്നു.

     ⁴ അവന്റെ മിന്നലുകൾ ഭൂതലത്തെ പ്രകാശിപ്പിക്കുന്നു;

     ഭൂമി അത് കണ്ട് വിറയ്ക്കുന്നു.

     ⁵ യഹോവയുടെ സന്നിധിയിൽ, സർവ്വഭൂമിയുടെയും കർത്താവിന്റെ സന്നിധിയിൽ,

     പർവ്വതങ്ങൾ മെഴുകുപോലെ ഉരുകുന്നു.

     ⁶ ആകാശം അവന്റെ നീതി പ്രസിദ്ധമാക്കുന്നു;

     സകലജനതകളും അവന്റെ മഹത്വം കാണുന്നു.

     ⁷ വിഗ്രഹങ്ങളെ സേവിക്കുകയും ബിംബങ്ങളിൽ പ്രശംസിക്കുകയും ചെയ്യുന്നവരെല്ലാം ലജ്ജിച്ചുപോകും;

     സകലദേവന്മാരുമേ, അവനെ നമസ്കരിക്കുവിൻ.

     ⁸ സീയോൻ കേട്ടു സന്തോഷിക്കുന്നു;

     യഹോവേ, നിന്റെ ന്യായവിധികൾ ഹേതുവായി യെഹൂദാപുത്രിമാർ ഘോഷിച്ചാനന്ദിക്കുന്നു.

     ⁹ യഹോവേ, നീ സർവ്വഭൂമിക്കും മീതെ അത്യുന്നതൻ;

     സകലദേവന്മാർക്കും മീതെ ഉയർന്നവൻ തന്നെ.

     ¹⁰ യഹോവയെ സ്നേഹിക്കുന്നവരേ, തിന്മ വെറുക്കുവിൻ;

     അവൻ തന്റെ ഭക്തന്മാരുടെ പ്രാണനെ കാക്കുന്നു;

     ദുഷ്ടന്മാരുടെ കയ്യിൽനിന്ന് അവരെ വിടുവിക്കുന്നു.

     ¹¹ നീതിമാന് പ്രകാശവും പരമാർത്ഥഹൃദയമുള്ളവർക്ക് സന്തോഷവും ഉദിക്കും.

     ¹² നീതിമാന്മാരേ, യഹോവയിൽ സന്തോഷിക്കുവിൻ;

     അവന്റെ വിശുദ്ധനാമത്തിന് സ്തോത്രം ചെയ്യുവിൻ.

സങ്കീർത്തനം.97 98

     ¹ യഹോവയ്ക്ക് ഒരു പുതിയ പാട്ടു പാടുവിൻ;

     അവൻ അത്ഭുതകാര്യങ്ങൾ പ്രവർത്തിച്ചിരിക്കുന്നു;

     അവന്റെ വലങ്കയ്യും അവന്റെ വിശുദ്ധഭുജവും

     അവന് ജയം നേടിയിരിക്കുന്നു.

     ² യഹോവ തന്റെ രക്ഷ അറിയിച്ചും ജനതകളുടെ കാഴ്ചയിൽ തന്റെ നീതി വെളിപ്പെടുത്തിയുമിരിക്കുന്നു.

     ³ അവൻ യിസ്രായേൽഗൃഹത്തോടുള്ള തന്റെ ദയയും വിശ്വസ്തതയും ഓർമ്മിച്ചിരിക്കുന്നു;

     ഭൂമിയുടെ അറുതികളിലുള്ളവരും നമ്മുടെ ദൈവത്തിന്റെ രക്ഷ കണ്ടിരിക്കുന്നു.

     ⁴ സകല ഭൂവാസികളുമേ, യഹോവയ്ക്ക് ആർപ്പിടുവിൻ;

     ആനന്ദഘോഷത്തോടെ കീർത്തനം ചെയ്യുവിൻ.

     ⁵ കിന്നരത്തോടെ യഹോവയ്ക്കു കീർത്തനം ചെയ്യുവിൻ;

     കിന്നരത്തോടും സംഗീതസ്വരത്തോടും കൂടി തന്നെ.

     ⁶ കൊമ്പും കാഹളവും ഊതി രാജാവായ യഹോവയുടെ സന്നിധിയിൽ ഘോഷിക്കുവിൻ!

     ⁷ സമുദ്രവും അതിലുള്ളതും

     ഭൂതലവും അതിൽ വസിക്കുന്നവരും ആരവം മുഴക്കട്ടെ.

     ⁸ നദികൾ കൈ കൊട്ടട്ടെ;

     പർവ്വതങ്ങൾ ഒരുപോലെ യഹോവയുടെ മുമ്പാകെ ഉല്ലസിച്ചുഘോഷിക്കട്ടെ.

     ⁹ അവൻ ഭൂമിയെ ന്യായം വിധിക്കുവാൻ വരുന്നു;

     ഭൂലോകത്തെ നീതിയോടും ജനതകളെ നേരോടുംകൂടി വിധിക്കും.

സങ്കീർത്തനം.98 99

     ¹ യഹോവ വാഴുന്നു; ജനതതികൾ വിറയ്ക്കട്ടെ;

     അവൻ കെരൂബുകളുടെ മീതെ വസിക്കുന്നു; ഭൂമി കുലുങ്ങട്ടെ.

     ² യഹോവ സീയോനിൽ വലിയവനും

     സകല ജനതകൾക്കും മീതെ ഉന്നതനും ആകുന്നു.

     ³ “അവൻ പരിശുദ്ധൻ” എന്നിങ്ങനെ

     അവർ നിന്റെ മഹത്തും ഭയങ്കരവുമായ നാമത്തെ സ്തുതിക്കട്ടെ.

     ⁴ ബലവാനായ രാജാവ് ന്യായത്തെ ഇഷ്ടപ്പെടുന്നു

     നീ നീതിയെ സ്ഥിരപ്പെടുത്തിയിരിക്കുന്നു;

     നീ യാക്കോബിൽ നീതിയും ന്യായവും നടത്തിയിരിക്കുന്നു.

     ⁵ നമ്മുടെ ദൈവമായ യഹോവയെ പുകഴ്ത്തുവിൻ;

     അവന്റെ പാദപീഠത്തിങ്കൽ നമസ്കരിക്കുവിൻ;

     അവൻ പരിശുദ്ധൻ ആകുന്നു.

     ⁶ മോശെയും അഹരോനും അവന്റെ പുരോഹിതന്മാരായിരുന്നു,

     അവന്റെ നാമം വിളിച്ചപേക്ഷിക്കുന്നവരിൽ ശമൂവേലും ഉണ്ടായിരുന്നു.

     ഇവർ യഹോവയോട് അപേക്ഷിച്ചു; അവൻ അവർക്ക് ഉത്തരമരുളി.

     ⁷ മേഘസ്തംഭത്തിൽ നിന്ന് അവൻ അവരോട് സംസാരിച്ചു;

     അവർ അവന്റെ സാക്ഷ്യങ്ങളും അവൻ കൊടുത്ത ചട്ടവും പ്രമാണിച്ചു.

     ⁸ ഞങ്ങളുടെ ദൈവമായ യഹോവേ, നീ അവർക്കുത്തരമരുളി;

     നീ അവരോട് ക്ഷമ കാണിക്കുന്ന ദൈവം എങ്കിലും അവരുടെ പ്രവൃത്തികൾക്ക് തക്കവണ്ണം ന്യായം വിധിക്കുന്നവനും ആയിരുന്നു.

     ⁹ നമ്മുടെ ദൈവമായ യഹോവയെ പുകഴ്ത്തുവിൻ;

     അവന്റെ വിശുദ്ധപർവ്വതത്തിൽ നമസ്കരിക്കുവിൻ;

     നമ്മുടെ ദൈവമായ യഹോവ പരിശുദ്ധനല്ലയോ?.

സങ്കീർത്തനം.99 100

     ¹ സകല ഭൂവാസികളുമേ, യഹോവയ്ക്ക് ആർപ്പിടുവിൻ.

     ² സന്തോഷത്തോടെ യഹോവയെ സേവിക്കുവിൻ;

     സംഗീതത്തോടെ അവന്റെ സന്നിധിയിൽ വരുവിൻ.

     ³ യഹോവ തന്നെ ദൈവം എന്നറിയുവിൻ;

     അവൻ നമ്മെ ഉണ്ടാക്കി; നാം അവനുള്ളവർ ആകുന്നു;

     അവന്റെ ജനവും അവൻ മേയിക്കുന്ന ആടുകളും തന്നെ.

     ⁴ അവന്റെ വാതിലുകളിൽ സ്തോത്രത്തോടും അവന്റെ പ്രാകാരങ്ങളിൽ സ്തുതിയോടും കൂടി വരുവിൻ;

     അവന് സ്തോത്രം ചെയ്ത് അവന്റെ നാമത്തെ വാഴ്ത്തുവിൻ.

     ⁵ യഹോവ നല്ലവനല്ലയോ,

     അവന്റെ ദയ എന്നേക്കുമുള്ളത്;

     അവന്റെ വിശ്വസ്തത തലമുറതലമുറയായി നിലനില്ക്കുന്നു.

സങ്കീർത്തനം.100 101

     ¹ ഞാൻ ദയയെയും ന്യായത്തെയും കുറിച്ച് പാടും;

     യഹോവേ, ഞാൻ നിനക്ക് കീർത്തനം പാടും.

     ² ഞാൻ നിഷ്കളങ്കമാർഗ്ഗത്തിൽ ശ്രദ്ധവയ്ക്കും;

     എപ്പോൾ നീ എന്റെ അടുക്കൽ വരും?

     ഞാൻ എന്റെ വീട്ടിൽ നിഷ്കളങ്കഹൃദയത്തോടെ പെരുമാറും.

     ³ ഞാൻ ഒരു നീചകാര്യവും എന്റെ കണ്ണിനു മുമ്പിൽ വയ്ക്കുകയില്ല;

     ക്രമം കെട്ടവരുടെ പ്രവൃത്തി ഞാൻ വെറുക്കുന്നു;

     ഞാൻ അതിൽ പങ്കുചേരുകയില്ല..

     ⁴ വക്രഹൃദയം എന്നോട് അകന്നിരിക്കും;

     ദുഷ്ടത ഞാൻ അറിയുകയില്ല.

     ⁵ കൂട്ടുകാരനെക്കുറിച്ച് ഏഷണി പറയുന്നവനെ ഞാൻ നശിപ്പിക്കും;

     ഉന്നതഭാവവും നിഗളഹൃദയവും ഉള്ളവനെ ഞാൻ സഹിക്കുകയില്ല.

     ⁶ ദേശത്തിലെ വിശ്വസ്തന്മാർ എന്നോടുകൂടി വസിക്കേണ്ടതിന്

     എന്റെ കണ്ണുകൾ അവരെ അന്വേഷിക്കുന്നു;

     നിഷ്കളങ്കമാർഗ്ഗത്തിൽ നടക്കുന്നവൻ എന്നെ ശുശ്രൂഷിക്കും.

     ⁷ വഞ്ചനചെയ്യുന്നവൻ എന്റെ വീട്ടിൽ വസിക്കുകയില്ല;

     ഭോഷ്കു പറയുന്നവൻ എന്റെ മുമ്പിൽ ഉറച്ചുനില്ക്കുകയില്ല.

     ⁸ യഹോവയുടെ നഗരത്തിൽനിന്ന് സകല ദുഷ്പ്രവൃത്തിക്കാരെയും ഛേദിച്ചുകളയും വരെ

     ദേശത്തിലെ ദുഷ്ടന്മാരെ എല്ലാം ഞാൻ ദിനംപ്രതി നശിപ്പിക്കും.

സങ്കീർത്തനം.101 102

     ¹ യഹോവേ, എന്റെ പ്രാർത്ഥന കേൾക്കണമേ;

     എന്റെ നിലവിളി തിരുസന്നിധിയിൽ വരുമാറാകട്ടെ.

     ² കഷ്ടദിവസത്തിൽ നിന്റെ മുഖം എനിക്കു മറയ്ക്കരുതേ;

     നിന്റെ ചെവി എങ്കലേക്ക് ചായിക്കണമേ;

     ഞാൻ വിളിക്കുന്ന നാളിൽ വേഗത്തിൽ എനിക്ക് ഉത്തരമരുളണമേ.

     ³ എന്റെ നാളുകൾ പുകപോലെ കഴിഞ്ഞുപോകുന്നു;

     എന്റെ അസ്ഥികൾ തീക്കൊള്ളിപോലെ വെന്തിരിക്കുന്നു.

     ⁴ എന്റെ ഹൃദയം അരിഞ്ഞ പുല്ലുപോലെ ഉണങ്ങിയിരിക്കുന്നു;

     ഞാൻ ഭക്ഷണം കഴിക്കുവാൻ മറന്നുപോകുന്നു.

     ⁵ എന്റെ ഞരക്കത്തിന്റെ ഒച്ചനിമിത്തം എന്റെ അസ്ഥികൾ മാംസത്തോടു പറ്റുന്നു.

     ⁶ ഞാൻ മരുഭൂമിയിലെ വേഴാമ്പൽപോലെ ആകുന്നു;

     ശൂന്യസ്ഥലത്തെ മൂങ്ങാപോലെ തന്നെ.

     ⁷ ഞാൻ ഉറക്കം ഇളച്ചിരിക്കുന്നു;

     വീട്ടിന്മുകളിൽ തനിച്ചിരിക്കുന്ന കുരികിൽ പോലെ ആകുന്നു.

     ⁸ എന്റെ ശത്രുക്കൾ ഇടവിടാതെ എന്നെ നിന്ദിക്കുന്നു;

     എന്നോടു ചീറുന്നവർ എന്റെ പേര് ചൊല്ലി ശപിക്കുന്നു.

     ⁹ ഞാൻ അപ്പംപോലെ ചാരം തിന്നുന്നു;

     എന്റെ പാനീയത്തിൽ കണ്ണുനീർ കലക്കുന്നു;

     ¹⁰ നിന്റെ കോപവും ക്രോധവും ഹേതുവായി തന്നെ;

     നീ എന്നെ എടുത്ത് എറിഞ്ഞുകളഞ്ഞുവല്ലോ.

     ¹¹ എന്റെ ആയുസ്സ് ചാഞ്ഞുപോകുന്ന നിഴൽ പോലെയാകുന്നു;

     ഞാൻ പുല്ലുപോലെ ഉണങ്ങിപ്പോകുന്നു.

     ¹² നീയോ, യഹോവേ, എന്നേക്കുമുള്ളവൻ;

     നിന്റെ നാമം തലമുറതലമുറയായി നിലനില്ക്കുന്നു.

     ¹³ നീ എഴുന്നേറ്റ് സീയോനോട് കരുണ കാണിക്കും;

     അവളോടു കൃപ കാണിക്കുവാനുള്ള കാലം, അതേ, അതിനുള്ള സമയം വന്നിരിക്കുന്നു.

     ¹⁴ നിന്റെ ദാസന്മാർക്ക് അവളുടെ കല്ലുകളോടു താത്പര്യവും

     അവളുടെ പൂഴിയോട് അലിവും തോന്നുന്നു.

     ¹⁵ യഹോവ സീയോനെ പണിയുകയും തന്റെ മഹത്വത്തിൽ പ്രത്യക്ഷനാകുകയും ചെയ്യും

     ¹⁶ അവൻ അഗതികളുടെ പ്രാർത്ഥന കടാക്ഷിക്കുകയും

     അവരുടെ പ്രാർത്ഥന നിരസിക്കാതെയിരിക്കുകയും ചെയ്തതുകൊണ്ട്

     ¹⁷ ജനതകൾ യഹോവയുടെ നാമത്തെയും

     ഭൂമിയിലെ സകലരാജാക്കന്മാരും നിന്റെ മഹത്വത്തെയും ഭയപ്പെടും.

     ¹⁸ വരുവാനിരിക്കുന്ന തലമുറയ്ക്കു വേണ്ടി ഇത് എഴുതിവയ്ക്കും;

     സൃഷ്ടിക്കപ്പെടുവാനുള്ള ജനം യഹോവയെ സ്തുതിക്കും.

     ¹⁹ യഹോവയെ സേവിക്കുവാൻ ജനതകളും രാജ്യങ്ങളും കൂടി വന്നപ്പോൾ

     ²⁰ സീയോനിൽ യഹോവയുടെ നാമത്തെയും

     യെരൂശലേമിൽ അവന്റെ സ്തുതിയെയും പ്രസ്താവിക്കേണ്ടതിനും

     ²¹ ബദ്ധന്മാരുടെ ഞരക്കം കേൾക്കുവാനും

     മരണത്തിന് നിയമിക്കപ്പെട്ടവരെ വിടുവിക്കുവാനും

     ²² യഹോവ ഉയരത്തിൽ, വിശുദ്ധമന്ദിരത്തിൽനിന്നു നോക്കി;

     സ്വർഗ്ഗത്തിൽനിന്ന് ഭൂമിയെ തൃക്കൺപാർത്തുവല്ലോ.

     ²³ അവൻ വഴിയിൽവച്ച് എന്റെ ബലം ക്ഷയിപ്പിച്ചു;

     അവൻ എന്റെ നാളുകൾ ചുരുക്കിയിരിക്കുന്നു.

     ²⁴ “എന്റെ ദൈവമേ, ആയുസ്സിന്റെ മദ്ധ്യത്തിൽ എന്നെ എടുത്തുകളയരുതേ” എന്ന് ഞാൻ പറഞ്ഞു;

     നിന്റെ സംവത്സരങ്ങൾ തലമുറതലമുറയായി ഇരിക്കുന്നു.

     ²⁵ പൂർവ്വകാലത്ത് നീ ഭൂമിക്ക് അടിസ്ഥാനമിട്ടു;

     ആകാശം നിന്റെ കൈകളുടെ പ്രവൃത്തി ആകുന്നു.

     ²⁶ അവ നശിക്കും നീയോ നിലനില്ക്കും;

     അവയെല്ലാം വസ്ത്രംപോലെ പഴകിപ്പോകും;

     ഉടുപ്പുപോലെ നീ അവയെ മാറ്റും; അവ മാറിപ്പോകുകയും ചെയ്യും.

     ²⁷ നീയോ അനന്യനാകുന്നു;

     നിന്റെ സംവത്സരങ്ങൾ അവസാനിക്കുകയുമില്ല.

     ²⁸ നിന്റെ ദാസന്മാരുടെ മക്കൾ നിർഭയം വസിക്കും;

     അവരുടെ സന്തതി നിന്റെ സന്നിധിയിൽ നിലനില്ക്കും.

സങ്കീർത്തനം.102 103

     ¹ എൻ മനമേ, യഹോവയെ വാഴ്ത്തുക;

     എന്റെ സർവ്വാന്തരംഗവുമേ, അവന്റെ വിശുദ്ധനാമത്തെ വാഴ്ത്തുക.

     ² എൻ മനമേ, യഹോവയെ വാഴ്ത്തുക;

     അവന്റെ ഉപകാരങ്ങൾ ഒന്നും മറക്കരുത്.

     ³ അവൻ നിന്റെ എല്ലാ അകൃത്യങ്ങളും മോചിക്കുന്നു;

     നിന്റെ സകലരോഗങ്ങളും സൗഖ്യമാക്കുന്നു;

     ⁴ അവൻ നിന്റെ ജീവനെ നാശത്തിൽനിന്ന് വീണ്ടെടുക്കുന്നു;

     അവൻ ദയയും കരുണയും നിന്നെ അണിയിക്കുന്നു.

     ⁵ നിന്റെ യൗവനം കഴുകനെപ്പോലെ പുതുക്കപ്പെടുവാനായി

     അവൻ നിന്റെ വായെ നന്മകൊണ്ടു തൃപ്തിപ്പെടുത്തുന്നു.

     ⁶ യഹോവ സകല പീഡിതന്മാർക്കും വേണ്ടി നീതിയും ന്യായവും നടത്തുന്നു.

     ⁷ അവൻ തന്റെ വഴികൾ മോശെയെയും

     തന്റെ പ്രവൃത്തികൾ യിസ്രായേൽമക്കളെയും അറിയിച്ചു.

     ⁸ യഹോവ കരുണയും കൃപയും നിറഞ്ഞവൻ ആകുന്നു;

     ദീർഘക്ഷമയും മഹാദയയും ഉള്ളവൻ തന്നെ.

     ⁹ അവൻ എല്ലായ്പോഴും ഭർത്സിക്കുകയില്ല;

     എന്നേക്കും കോപം സൂക്ഷിക്കുകയുമില്ല.

     ¹⁰ അവൻ നമ്മുടെ പാപങ്ങൾക്കു തക്കവണ്ണം നമ്മളോടു ചെയ്യുന്നില്ല;

     നമ്മുടെ അകൃത്യങ്ങൾക്കു തക്കവണ്ണം നമ്മളെ ശിക്ഷിക്കുന്നുമില്ല.

     ¹¹ ആകാശം ഭൂമിക്കുമീതെ ഉയർന്നിരിക്കുന്നതു പോലെ

     അവന്റെ ദയ അവന്റെ ഭക്തന്മാരോട് വലുതായിരിക്കുന്നു.

     ¹² ഉദയം അസ്തമയത്തോട് അകന്നിരിക്കുന്നതുപോലെ

     അവൻ നമ്മുടെ ലംഘനങ്ങളെ നമ്മോട് അകറ്റിയിരിക്കുന്നു.

     ¹³ അപ്പന് മക്കളോട് കരുണ തോന്നുന്നതുപോലെ

     യഹോവയ്ക്ക് തന്റെ ഭക്തന്മാരോട് കരുണ തോന്നുന്നു.

     ¹⁴ അവൻ നമ്മുടെ പ്രകൃതം അറിയുന്നുവല്ലോ;

     നാം കേവലം പൊടി മാത്രം എന്ന് അവൻ ഓർക്കുന്നു.

     ¹⁵ മനുഷ്യന്റെ ആയുസ്സ് പുല്ലുപോലെയാകുന്നു;

     വയലിലെ പൂപോലെ അവൻ പൂക്കുന്നു.

     ¹⁶ കാറ്റ് അതിന്മേൽ അടിക്കുമ്പോൾ അത് ഇല്ലാതെപോകുന്നു;

     അത് നിന്ന സ്ഥലം പിന്നീട് അതിനെ അറിയുകയുമില്ല.

     ¹⁷ യഹോവയുടെ ദയ എന്നും എന്നേക്കും അവന്റെ ഭക്തന്മാർക്കും

     അവന്റെ നീതി മക്കളുടെ മക്കൾക്കും ഉണ്ടാകും.

     ¹⁸ അവന്റെ നിയമം പ്രമാണിക്കുന്നവർക്കും

     അവന്റെ കല്പനകൾ ഓർത്ത് ആചരിക്കുന്നവർക്കും തന്നെ.

     ¹⁹ യഹോവ തന്റെ സിംഹാസനം സ്വർഗ്ഗത്തിൽ സ്ഥാപിച്ചിരിക്കുന്നു;

     അവന്റെ രാജത്വം സകലത്തെയും അടക്കി ഭരിക്കുന്നു.

     ²⁰ അവന്റെ വാക്കുകളുടെ ശബ്ദം കേട്ട് അവന്റെ ആജ്ഞ അനുസരിക്കുന്ന ശക്തന്മാരായ

     അവന്റെ ദൂതന്മാരേ, യഹോവയെ വാഴ്ത്തുവിൻ.

     ²¹ അവന്റെ ഇഷ്ടം ചെയ്യുന്ന ശുശ്രൂഷക്കാരായി

     അവന്റെ സകലസൈന്യങ്ങളുമേ, യഹോവയെ വാഴ്ത്തുവിൻ;

     ²² അവന്റെ അധികാരത്തിന്റെ കീഴിലുള്ള

     അവന്റെ കൈവേലയായ ഏവരുമേ, യഹോവയെ വാഴ്ത്തുവിൻ;

     എൻ മനമേ, യഹോവയെ വാഴ്ത്തുക.

സങ്കീർത്തനം.103 104

     ¹ എൻ മനമേ, യഹോവയെ വാഴ്ത്തുക;

     എന്റെ ദൈവമായ യഹോവേ, നീ ഏറ്റവും വലിയവൻ;

     മഹത്വവും തേജസ്സും നീ ധരിച്ചിരിക്കുന്നു;

     ² വസ്ത്രം ധരിക്കുന്നതുപോലെ നീ പ്രകാശം ധരിക്കുന്നു;

     തിരശ്ശീലപോലെ നീ ആകാശത്തെ വിരിക്കുന്നു.

     ³ അവൻ തന്റെ മാളികകളുടെ തുലാങ്ങൾ വെള്ളത്തിന്മേൽ നിരത്തുന്നു;

     മേഘങ്ങളെ തന്റെ തേരാക്കി, കാറ്റിൻ ചിറകിന്മേൽ സഞ്ചരിക്കുന്നു.

     ⁴ അവൻ കാറ്റുകളെ തന്റെ ദൂതന്മാരും അഗ്നിജ്വാലയെ തന്റെ ശുശ്രൂഷകന്മാരും ആക്കുന്നു.

     ⁵ അവൻ ഭൂമി ഒരിക്കലും ഇളകിപ്പോകാതെ

     അതിന്റെ അടിസ്ഥാനത്തിന്മേൽ സ്ഥാപിച്ചിരിക്കുന്നു.

     ⁶ നീ ഭൂമിയെ വസ്ത്രംകൊണ്ടെന്നപോലെ ആഴികൊണ്ടു മൂടി;

     വെള്ളം പർവ്വതങ്ങൾക്കു മീതെ നിന്നിരുന്നു.

     ⁷ അവ നിന്റെ ശാസനയാൽ ഓടിപ്പോയി;

     നിന്റെ ഇടിമുഴക്കത്താൽ അവ തിടുക്കത്തിൽ നീങ്ങിപ്പോയി -

     ⁸ മലകൾ പൊങ്ങി, താഴ്വരകൾ താണു -

     നീ അവയ്ക്കു നിശ്ചയിച്ച സ്ഥലത്തേക്ക് നീങ്ങിപ്പോയി;

     ⁹ ഭൂമിയെ മൂടിക്കളയുവാൻ മടങ്ങിവരാതിരിക്കേണ്ടതിന്

     നീ അവയ്ക്ക് ലംഘിക്കാൻ കഴിയാത്ത ഒരു അതിര് ഇട്ടു.

     ¹⁰ അവൻ ഉറവുകളെ താഴ്വരകളിലേക്ക് അയയ്ക്കുന്നു;

     അവ മലകളുടെ ഇടയിൽകൂടി ഒഴുകുന്നു.

     ¹¹ അവയിൽനിന്ന് വയലിലെ സകലമൃഗങ്ങളും കുടിക്കുന്നു;

     കാട്ടുകഴുതകൾ അവയുടെ ദാഹം തീർക്കുന്നു;

     ¹² അവയുടെ തീരങ്ങളിൽ ആകാശത്തിലെ പറവകൾ വസിക്കുകയും

     കൊമ്പുകളുടെ ഇടയിൽ പാടുകയും ചെയ്യുന്നു.

     ¹³ അവൻ തന്റെ മാളികകളിൽ നിന്ന് മലകളെ നനയ്ക്കുന്നു;

     ഭൂമിക്ക് നിന്റെ പ്രവൃത്തികളുടെ ഫലത്താൽ തൃപ്തിവരുന്നു.

     ¹⁴ അവൻ മൃഗങ്ങൾക്ക് പുല്ലും

     മനുഷ്യന്റെ ഉപയോഗത്തിനായി സസ്യവും മുളപ്പിക്കുന്നു;

     ¹⁵ അവൻ ഭൂമിയിൽനിന്ന് ആഹാരവും

     മനുഷ്യന്റെ ഹൃദയത്തെ സന്തോഷിപ്പിക്കുന്ന വീഞ്ഞും

     അവന്റെ മുഖം മിനുക്കുവാൻ എണ്ണയും

     മനുഷ്യന്റെ ഹൃദയത്തെ ബലപ്പെടുത്തുന്ന അപ്പവും ഉത്ഭവിപ്പിക്കുന്നു.

     ¹⁶ യഹോവയുടെ വൃക്ഷങ്ങൾക്ക് തൃപ്തിവരുന്നു;

     അവൻ നട്ടിട്ടുള്ള ലെബാനോനിലെ ദേവദാരുക്കൾക്കു തന്നെ.

     ¹⁷ അവിടെ പക്ഷികൾ കൂടുണ്ടാക്കുന്നു;

     പെരുഞാറയ്ക്ക് സരളവൃക്ഷങ്ങൾ പാർപ്പിടമാകുന്നു.

     ¹⁸ ഉയർന്നമലകൾ കാട്ടാടുകൾക്കും

     പാറകൾ കുഴിമുയലുകൾക്കും സങ്കേതമാകുന്നു.

     ¹⁹ അവൻ കാലനിർണ്ണയത്തിനായി ചന്ദ്രനെ നിയമിച്ചു;

     സൂര്യൻ തന്റെ അസ്തമയം അറിയുന്നു.

     ²⁰ നീ ഇരുട്ടു വരുത്തുന്നു; രാത്രി ഉണ്ടാകുന്നു;

     അപ്പോൾ കാട്ടുമൃഗങ്ങൾ എല്ലാം സഞ്ചാരം തുടങ്ങുന്നു.

     ²¹ ബാലസിംഹങ്ങൾ ഇരയ്ക്കായി അലറുന്നു;

     അവ ദൈവത്തോട് അവയുടെ ആഹാരം ചോദിക്കുന്നു.

     ²² സൂര്യൻ ഉദിക്കുമ്പോൾ അവ മടങ്ങുന്നു;

     അവയുടെ ഗുഹകളിൽ ചെന്നു കിടക്കുന്നു.

     ²³ മനുഷ്യൻ തന്റെ പണിക്കായി പുറപ്പെടുന്നു;

     സന്ധ്യവരെയുള്ള തന്റെ വേലയ്ക്കായി തന്നെ.

     ²⁴ യഹോവേ, നിന്റെ പ്രവൃത്തികൾ എത്ര പെരുകിയിരിക്കുന്നു!

     ജ്ഞാനത്തോടെ നീ അവയെല്ലാം ഉണ്ടാക്കിയിരിക്കുന്നു;

     ഭൂമി നിന്റെ സൃഷ്ടികളാൽ നിറഞ്ഞിരിക്കുന്നു.

     ²⁵ വലിപ്പവും വിസ്താരവും ഉള്ള സമുദ്രം അതാ കിടക്കുന്നു!

     അതിൽ സഞ്ചരിക്കുന്ന ചെറിയതും വലിയതുമായ അസംഖ്യജന്തുക്കൾ ഉണ്ട്.

     ²⁶ അതിൽ കപ്പലുകൾ ഓടുന്നു;

     അതിൽ കളിക്കുവാൻ നീ ഉണ്ടാക്കിയ ലിവ്യാഥാൻ ഉണ്ട്.

     ²⁷ തക്കസമയത്ത് ഭക്ഷണം കിട്ടേണ്ടതിന്

     ഇവ എല്ലാം നിന്നെ കാത്തിരിക്കുന്നു.

     ²⁸ നീ കൊടുക്കുന്നത് അവ പെറുക്കുന്നു

     തൃക്കൈ തുറക്കുമ്പോൾ

     അവയ്ക്ക് നന്മകൊണ്ട് തൃപ്തിവരുന്നു.

     ²⁹ തിരുമുഖം മറയ്ക്കുമ്പോൾ അവ ഭ്രമിച്ചു പോകുന്നു;

     നീ അവയുടെ ശ്വാസം എടുക്കുമ്പോൾ

     അവ ചത്ത് പൊടിയിലേക്ക് തിരികെ ചേരുന്നു;

     ³⁰ നീ നിന്റെ ശ്വാസം അയയ്ക്കുമ്പോൾ അവ സൃഷ്ടിക്കപ്പെടുന്നു;

     നീ ഭൂമിയുടെ മുഖം പുതുക്കുന്നു.

     ³¹ യഹോവയുടെ മഹത്വം എന്നേക്കും നിലനില്ക്കട്ടെ;

     യഹോവ തന്റെ പ്രവൃത്തികളിൽ സന്തോഷിക്കട്ടെ.

     ³² അവൻ ഭൂമിയെ നോക്കുന്നു, അത് വിറയ്ക്കുന്നു;

     അവൻ മലകളെ തൊടുന്നു, അവ പുകയുന്നു.

     ³³ എന്റെ ആയുഷ്ക്കാലമൊക്കെയും ഞാൻ യഹോവയ്ക്കു പാടും;

     ഞാൻ ഉള്ള കാലത്തോളം എന്റെ ദൈവത്തിന് കിർത്തനം പാടും.

     ³⁴ എന്റെ ധ്യാനം അവന് പ്രസാദകരമായിരിക്കട്ടെ;

     ഞാൻ യഹോവയിൽ സന്തോഷിക്കും.

     ³⁵ പാപികൾ ഭൂമിയിൽനിന്ന് നശിച്ചുപോകട്ടെ;

     ദുഷ്ടന്മാർ ഇല്ലാതെയാകട്ടെ;

     എൻ മനമേ, യഹോവയെ വാഴ്ത്തുക;

     യഹോവയെ സ്തുതിക്കുവിൻ.

സങ്കീർത്തനം.104 105

     ¹ യഹോവയ്ക്കു സ്തോത്രം ചെയ്യുവിൻ; അവന്റെ നാമം വിളിച്ചപേക്ഷിക്കുവിൻ;

     അവന്റെ പ്രവൃത്തികൾ ജനതകളുടെ ഇടയിൽ അറിയിക്കുവിൻ.

     ² അവന് പാടുവിൻ; അവന് കീർത്തനം പാടുവിൻ;

     അവന്റെ സകല അത്ഭുതങ്ങളെയും കുറിച്ച് സംസാരിക്കുവിൻ.

     ³ അവന്റെ വിശുദ്ധനാമത്തിൽ പ്രശംസിക്കുവിൻ;

     യഹോവയെ അന്വേഷിക്കുന്നവരുടെ ഹൃദയം സന്തോഷിക്കട്ടെ.

     ⁴ യഹോവയെയും അവന്റെ ബലത്തെയും തിരയുവിൻ;

     അവന്റെ മുഖം ഇടവിടാതെ അന്വേഷിക്കുവിൻ.

     ⁵ അവന്റെ ദാസനായ അബ്രഹാമിന്റെ സന്തതിയും

     അവൻ തിരഞ്ഞെടുത്ത യാക്കോബിന്റെ മക്കളുമേ,

     ⁶ അവൻ ചെയ്ത അത്ഭുതങ്ങളും അവന്റെ അടയാളങ്ങളും

     അവന്റെ വായിൽ നിന്നുള്ള ന്യായവിധികളും ഓർത്തുകൊള്ളുവിൻ.

     ⁷ അവൻ നമ്മുടെ ദൈവമായ യഹോവയാകുന്നു;

     അവന്റെ ന്യായവിധികൾ സർവ്വഭൂമിയിലും ഉണ്ട്.

     ⁸ അവൻ തന്റെ നിയമം ശാശ്വതമായും

     താൻ കല്പിച്ച വചനം ആയിരം തലമുറ വരെയും ഓർമ്മിക്കുന്നു.

     ⁹ അവൻ അബ്രാഹാമിനോട് ചെയ്ത നിയമവും

     യിസ്ഹാക്കിനോടു ചെയ്ത സത്യവും തന്നെ.

     ¹⁰ അതിനെ അവൻ യാക്കോബിന് ഒരു ചട്ടമായും

     യിസ്രായേലിന് ഒരു നിത്യനിയമമായും നിയമിച്ചു.

     ¹¹ “നിന്റെ അവകാശത്തിന്റെ ഓഹരിയായി

     ഞാൻ നിനക്ക് കനാൻദേശം തരും” എന്നരുളിച്ചെയ്തു.

     ¹² അവർ അന്ന് എണ്ണത്തിൽ കുറഞ്ഞവരും ആൾബലത്തിൽ ചുരുങ്ങിയവരും

     പരദേശികളും ആയിരുന്നു.

     ¹³ അവർ ഒരു ജനതയെ വിട്ട് മറ്റൊരു ജനതയുടെ അടുക്കലേക്കും

     ഒരു രാജ്യം വിട്ട് മറ്റൊരു ജനത്തിന്റെ അടുക്കലേക്കും പോയിരുന്നു.

     ¹⁴ അവരെ പീഡിപ്പിക്കുവാൻ അവൻ ആരെയും സമ്മതിച്ചില്ല;

     അവരുടെനിമിത്തം അവൻ രാജാക്കന്മാരെ ശാസിച്ചു:

     ¹⁵ “എന്റെ അഭിഷിക്തന്മാരെ തൊടരുത്,

     എന്റെ പ്രവാചകന്മാർക്ക് ഒരു ദോഷവും ചെയ്യരുത്” എന്നു പറഞ്ഞു.

     ¹⁶ അവൻ ദേശത്ത് ഒരു ക്ഷാമം വരുത്തി;

     ഭക്ഷണമില്ലാതെ ജനം വലഞ്ഞു.

     ¹⁷ അവർക്കു മുമ്പായി അവൻ ഒരുവനെ അയച്ചു;

     യോസേഫിനെ അവർ ദാസനായി വിറ്റുവല്ലോ.

     ¹⁸ യഹോവയുടെ വചനം നിവൃത്തിയാകുകയും

     അവന്റെ വചനത്താൽ അവന് ശോധന വരുകയും ചെയ്യുവോളം

     ¹⁹ അവർ അവന്റെ കാലുകൾ വിലങ്ങുകൊണ്ട് ബന്ധിക്കുകയും

     അവൻ ഇരിമ്പു ചങ്ങലയിൽ കുടുങ്ങുകയും ചെയ്തു.

     ²⁰ രാജാവ് ആളയച്ച് അവനെ സ്വതന്ത്രനാക്കി;

     ജനത്തിന്റെ അധിപതി അവനെ വിട്ടയച്ചു.

     ²¹ അവന്റെ പ്രഭുക്കന്മാരെ ഏതുസമയത്തും ബന്ധനസ്ഥരാക്കുവാനും

     അവന്റെ മന്ത്രിമാർക്ക് ജ്ഞാനം ഉപദേശിച്ചുകൊടുക്കുവാനും

     ²² തന്റെ ഭവനത്തിന് അവനെ കർത്താവായും

     തന്റെ സർവ്വസമ്പത്തിനും അധിപതിയായും നിയമിച്ചു.

     ²³ അപ്പോൾ യിസ്രായേൽ ഈജിപ്റ്റിലേക്ക് ചെന്നു;

     യാക്കോബ് ഹാമിന്റെ ദേശത്ത് വന്നു പാർത്തു.

     ²⁴ ദൈവം തന്റെ ജനത്തെ ഏറ്റവും വർദ്ധിപ്പിക്കുകയും

     അവരുടെ വൈരികളെക്കാൾ അവരെ ബലവാന്മാരാക്കുകയും ചെയ്തു.

     ²⁵ തന്റെ ജനത്തെ പകയ്ക്കുവാനും തന്റെ ദാസന്മാരോട് ഉപായം പ്രയോഗിക്കുവാനും

     അവൻ അവരുടെ ഹൃദയത്തെ മറിച്ചുകളഞ്ഞു.

     ²⁶ അവൻ തന്റെ ദാസനായ മോശെയെയും

     താൻ തിരഞ്ഞെടുത്ത അഹരോനെയും അയച്ചു.

     ²⁷ ഇവർ അവരുടെ ഇടയിൽ അവന്റെ അടയാളങ്ങളും

     ഹാമിന്റെ ദേശത്ത് അത്ഭുതങ്ങളും പ്രവർത്തിച്ചു.

     ²⁸ അവൻ ഇരുൾ അയച്ച് ദേശത്തെ അന്ധകാരത്തിലാക്കി;

     അവർ അവന്റെ വചനത്തോട് മറുത്തുനിന്നു;

     ²⁹ അവൻ അവരുടെ വെള്ളം രക്തമാക്കി,

     അവരുടെ മത്സ്യങ്ങളെ കൊന്നുകളഞ്ഞു.

     ³⁰ അവരുടെ ദേശത്ത് തവള വ്യാപിച്ച്, രാജാക്കന്മാരുടെ പള്ളിയറകളിൽപോലും നിറഞ്ഞു.

     ³¹ അവൻ കല്പിച്ചപ്പോൾ നായീച്ചയും

     അവരുടെ ദേശം മുഴുവനും നിറഞ്ഞു;

     ³² അവൻ അവർക്ക് മഴയ്ക്കു പകരം കൽമഴയും

     അവരുടെ ദേശത്ത് അഗ്നിജ്വാലയും അയച്ചു.

     ³³ അവൻ അവരുടെ മുന്തിരിവള്ളികളും അത്തിവൃക്ഷങ്ങളും തകർത്തു;

     അവരുടെ ദേശത്തെ സകലവൃക്ഷങ്ങളും നശിപ്പിച്ചു.

     ³⁴ അവൻ കല്പിച്ചപ്പോൾ വെട്ടുക്കിളിയും തുള്ളനും അനവധിയായി വന്ന്,

     ³⁵ അവരുടെ ദേശത്തെ സകല സസ്യങ്ങളും അവരുടെ വയലിലെ വിളയും തിന്നുകളഞ്ഞു.

     ³⁶ അവൻ അവരുടെ ദേശത്തെ എല്ലാ കടിഞ്ഞൂലിനെയും

     അവരുടെ സർവ്വവീര്യത്തിന്റെ ആദ്യഫലത്തെയും സംഹരിച്ചു.

     ³⁷ അവൻ അവരെ വെള്ളിയോടും പൊന്നിനോടും കൂടി പുറപ്പെടുവിച്ചു;

     അവരുടെ ഗോത്രങ്ങളിൽ ഒരു ബലഹീനനും ഉണ്ടായിരുന്നില്ല.

     ³⁸ അവർ പുറപ്പെട്ടപ്പോൾ ഈജിപ്റ്റ് സന്തോഷിച്ചു;

     അവരെക്കുറിച്ചുള്ള ഭയം അവരുടെമേൽ വീണിരുന്നു.

     ³⁹ അവൻ തണലിനായി ഒരു മേഘം വിരിച്ചു;

     രാത്രിയിൽ വെളിച്ചത്തിനായി തീ നിറുത്തി.

     ⁴⁰ അവർ ചോദിച്ചപ്പോൾ അവൻ കാടകളെ കൊടുത്തു;

     സ്വർഗ്ഗീയഭോജനംകൊണ്ട് അവർക്ക് തൃപ്തിവരുത്തി.

     ⁴¹ അവൻ പാറ പിളർന്നു, വെള്ളം ചാടി പുറപ്പെട്ടു;

     അത് ഉണങ്ങിയ നിലത്തുകൂടി നദിയായി ഒഴുകി.

     ⁴² അവൻ തന്റെ വിശുദ്ധവാഗ്ദത്തത്തെയും തന്റെ ദാസനായ അബ്രഹാമിനെയും ഓർത്തു.

     ⁴³ അവൻ തന്റെ ജനത്തെ സന്തോഷത്തോടും

     താൻ തിരഞ്ഞെടുത്തവരെ ഘോഷത്തോടും കൂടി പുറപ്പെടുവിച്ചു.

     ⁴⁴ അവർ തന്റെ ചട്ടങ്ങൾ പ്രമാണിക്കുകയും

     തന്റെ ന്യായപ്രമാണങ്ങൾ ആചരിക്കുകയും ചെയ്യേണ്ടതിന്

     ⁴⁵ അവൻ ജനതകളുടെ ദേശങ്ങൾ അവർക്കു കൊടുത്തു;

     അവർ വംശങ്ങളുടെ അദ്ധ്വാനഫലം കൈവശമാക്കുകയും ചെയ്തു.

     യഹോവയെ സ്തുതിക്കുവിൻ.

സങ്കീർത്തനം.105 106

     ¹ യഹോവയെ സ്തുതിക്കുവിൻ; യഹോവയ്ക്കു സ്തോത്രം ചെയ്യുവിൻ;

     അവൻ നല്ലവനല്ലയോ;

     അവന്റെ ദയ എന്നേക്കും ഉള്ളത്.

     ² യഹോവയുടെ വീര്യപ്രവൃത്തികളെ ആര് വർണ്ണിക്കും?

     അവന്റെ സ്തുതിയെപ്പറ്റി എല്ലാം ആര് വിവരിക്കും?

     ³ ന്യായം പ്രമാണിക്കുന്നവരും

     എല്ലായ്പോഴും നീതി പ്രവർത്തിക്കുന്നവരും ഭാഗ്യവാന്മാർ.

     ⁴ യഹോവേ, നീ തിരഞ്ഞെടുത്തവരുടെ നന്മ ഞാൻ കാണേണ്ടതിനും

     നിന്റെ ജനത്തിന്റെ സന്തോഷത്തിൽ സന്തോഷിക്കേണ്ടതിനും

     നിന്റെ അവകാശത്തോടുകൂടി പുകഴേണ്ടതിനും

     ⁵ നിന്റെ ജനത്തോടുള്ള കടാക്ഷപ്രകാരം എന്നെ ഓർത്ത്,

     നിന്റെ രക്ഷകൊണ്ട് എന്നെ സന്ദർശിക്കണമേ.

     ⁶ ഞങ്ങൾ ഞങ്ങളുടെ പിതാക്കന്മാരെപ്പോലെ പാപം ചെയ്തു;

     ഞങ്ങൾ അകൃത്യവും ദുഷ്ടതയും പ്രവർത്തിച്ചു.

     ⁷ ഞങ്ങളുടെ പിതാക്കന്മാർ ഈജിപ്റ്റിൽവച്ച് നിന്റെ അത്ഭുതങ്ങളെ ഗ്രഹിക്കാതെയും

     നിന്റെ മഹാദയയെ ഓർമ്മിക്കാതെയും കടല്ക്കരയിൽ, ചെങ്കടല്ക്കരയിൽവച്ചു തന്നെ, മത്സരിച്ചു.

     ⁸ എന്നിട്ടും അവൻ തന്റെ മഹാശക്തി വെളിപ്പെടുത്തേണ്ടതിന്

     തന്റെ നാമംനിമിത്തം അവരെ രക്ഷിച്ചു.

     ⁹ അവൻ ചെങ്കടലിനെ ശാസിച്ചു, അത് ഉണങ്ങിപ്പോയി;

     അവൻ അവരെ മരുഭൂമിയിൽക്കൂടി എന്നപോലെ ആഴിയിൽക്കൂടി നടത്തി.

     ¹⁰ പകയ്ക്കുന്നവരുടെ കൈയിൽനിന്ന് അവൻ അവരെ രക്ഷിച്ചു;

     ശത്രുവിന്റെ കൈയിൽനിന്ന് അവരെ വീണ്ടെടുത്തു.

     ¹¹ വെള്ളം അവരുടെ വൈരികളെ മൂടിക്കളഞ്ഞു;

     അവരിൽ ഒരുത്തനും ശേഷിച്ചില്ല.

     ¹² അപ്പോൾ അവർ അവന്റെ വചനങ്ങൾ വിശ്വസിച്ചു;

     അവന് സ്തുതിപാടുകയും ചെയ്തു.

     ¹³ എങ്കിലും അവർ വേഗത്തിൽ അവന്റെ പ്രവൃത്തികളെ മറന്നു;

     അവന്റെ ആലോചനയ്ക്കായി കാത്തിരുന്നതുമില്ല.

     ¹⁴ മരുഭൂമിയിൽവച്ച് അവർ ഏറ്റവും മോഹിച്ചു;

     നിർജ്ജനപ്രദേശത്ത് അവർ ദൈവത്തെ പരീക്ഷിച്ചു.

     ¹⁵ അവർ അപേക്ഷിച്ചത് അവൻ അവർക്ക് കൊടുത്തു;

     എങ്കിലും അവരുടെ പ്രാണന് ക്ഷയം അയച്ചു.

     ¹⁶ പാളയത്തിൽവച്ച് അവർ മോശെയോടും

     യഹോവയുടെ വിശുദ്ധനായ അഹരോനോടും അസൂയപ്പെട്ടു.

     ¹⁷ ഭൂമി പിളർന്ന് ദാഥാനെ വിഴുങ്ങി;

     അബീരാമിന്റെ കൂട്ടത്തെയും മൂടിക്കളഞ്ഞു.

     ¹⁸ അവരുടെ കൂട്ടത്തിൽ തീ കത്തി;

     അഗ്നിജ്വാല ദുഷ്ടന്മാരെ ദഹിപ്പിച്ചുകളഞ്ഞു.

     ¹⁹ അവർ ഹോരേബിൽവച്ച് ഒരു കാളക്കുട്ടിയെ ഉണ്ടാക്കി;

     വാർത്തുണ്ടാക്കിയ വിഗ്രഹത്തെ നമസ്കരിച്ചു.

     ²⁰ ഇങ്ങനെ അവർ അവരുടെ മഹത്വമായവനെ

     പുല്ലു തിന്നുന്ന കാളയോട് സദൃശനാക്കി മാറ്റി .

     ²¹ ഈജിപ്റ്റിൽ വലിയ കാര്യങ്ങളും

     ഹാമിന്റെ ദേശത്ത് അത്ഭുതപ്രവൃത്തികളും

     ²² ചെങ്കടലിൽ ഭയങ്കരകാര്യങ്ങളും ചെയ്തവനായ

     അവരുടെ രക്ഷിതാവായ ദൈവത്തെ അവർ മറന്നു.

     ²³ ആകയാൽ അവരെ നശിപ്പിക്കുമെന്ന് അവൻ അരുളിച്ചെയ്തു;

     അവന്റെ വൃതനായ മോശെ കോപത്തെ ശമിപ്പിക്കുവാൻ

     അവന്റെ സന്നിധിയിൽ പിളർപ്പിൽ നിന്നില്ലായിരുന്നെങ്കിൽ

     അവൻ അവരെ നശിപ്പിച്ചുകളയുമായിരുന്നു.

     ²⁴ അവർ മനോഹരദേശത്തെ നിരസിച്ചു;

     അവന്റെ വചനം വിശ്വസിച്ചതുമില്ല.

     ²⁵ അവർ അവരുടെ കൂടാരങ്ങളിൽവച്ച് പിറുപിറുത്തു;

     യഹോവയുടെ വചനം കേൾക്കാതെയിരുന്നു.

     ²⁶ അതുകൊണ്ട് അവൻ, മരുഭൂമിയിൽ അവരെ വീഴിക്കുമെന്നും

     അവരുടെ സന്തതിയെ ജനതകളുടെ ഇടയിൽ നശിപ്പിക്കുമെന്നും

     ²⁷ അവരെ ദേശങ്ങളിൽ ചിതറിച്ചുകളയുമെന്നും

     അവർക്കു വിരോധമായി തന്റെ കൈ ഉയർത്തി സത്യംചെയ്തു.

     ²⁸ അനന്തരം അവർ പെയോരിലെ ബാലിനോട് ചേർന്നു;

     മരിച്ചവർക്കുള്ള ബലികൾ തിന്നു.

     ²⁹ ഇങ്ങനെ അവർ അവരുടെ ക്രിയകളാൽ അവനെ കോപിപ്പിച്ചു;

     പെട്ടെന്ന് അവർക്ക് ഒരു ബാധ തട്ടി.

     ³⁰ അപ്പോൾ ഫീനെഹാസ് എഴുന്നേറ്റ് ശിക്ഷ നടത്തി;

     ബാധ നിന്നുപോകുകയും ചെയ്തു.

     ³¹ അത് തലമുറതലമുറയായി എന്നേക്കും അവന് നീതിയായിഎണ്ണിയിരിക്കുന്നു.

     ³² മെരീബാവെള്ളത്തിങ്കലും അവർ അവനെ കോപിപ്പിച്ചു;

     അവരുടെനിമിത്തം മോശെക്കും ദോഷം ഭവിച്ചു.

     ³³ അവർ അവനെ കോപിപ്പിച്ചതുകൊണ്ട്

     അവൻ അധരങ്ങളാൽ അവിവേകം സംസാരിച്ചുപോയി.

     ³⁴ യഹോവ അവരോടു കല്പിച്ചതുപോലെ

     അവർ ജനതകളെ നശിപ്പിച്ചില്ല.

     ³⁵ അവർ ജനതകളോട് ഇടകലർന്ന് അവരുടെ പ്രവൃത്തികൾ പഠിച്ചു.

     ³⁶ അവരുടെ വിഗ്രഹങ്ങളെ സേവിച്ചു;

     അവ അവർക്കൊരു കെണിയായിത്തീർന്നു.

     ³⁷ തങ്ങളുടെ പുത്രന്മാരെയും പുത്രിമാരെയും

     അവർ ഭൂതങ്ങൾക്ക് ബലികഴിച്ചു.

     ³⁸ അവർ കുറ്റമില്ലാത്ത രക്തം,

     പുത്രീപുത്രന്മാരുടെ രക്തം തന്നെ, ചൊരിഞ്ഞു;

     അവരെ അവർ കനാന്യവിഗ്രഹങ്ങൾക്ക് ബലികഴിച്ചു,

     ദേശം രക്തപാതകംകൊണ്ട് അശുദ്ധമായിത്തീർന്നു.

     ³⁹ ഇങ്ങനെ അവർ അവരുടെ ക്രിയകളാൽ മലിനപ്പെട്ടു,

     അവരുടെ കർമ്മങ്ങളാൽ പരസംഗം ചെയ്തു.

     ⁴⁰ അതുകൊണ്ട് യഹോവയുടെ കോപം തന്റെ ജനത്തിന്റെ നേരെ ജ്വലിച്ചു;

     അവൻ തന്റെ അവകാശത്തെ വെറുത്തു.

     ⁴¹ അവൻ അവരെ ജനതകളുടെ കൈയിൽ ഏല്പിച്ചു;

     അവരെ വെറുത്തവർ അവരെ ഭരിച്ചു.

     ⁴² അവരുടെ ശത്രുക്കൾ അവരെ ഞെരുക്കി;

     അവർ അവർക്ക് കീഴടങ്ങേണ്ടിവന്നു.

     ⁴³ പലപ്പോഴും അവൻ അവരെ വിടുവിച്ചു;

     എങ്കിലും അവർ അവരുടെ ആലോചനയാൽ അവനെ പ്രകോപിപ്പിച്ചു;

     അവരുടെ അകൃത്യം നിമിത്തം അധോഗതി പ്രാപിച്ചു.

     ⁴⁴ എന്നാൽ അവരുടെ നിലവിളി കേട്ടപ്പോൾ

     അവൻ അവരുടെ കഷ്ടത കടാക്ഷിച്ചു.

     ⁴⁵ അവൻ അവർക്കുവേണ്ടി തന്റെ നിയമം ഓർത്തു;

     തന്റെ മഹാദയയാൽ മനസ്സുമാറ്റി.

     ⁴⁶ അവരെ ബദ്ധരാക്കി കൊണ്ടുപോയവർക്കെല്ലാം

     അവരോട് കനിവു തോന്നുമാറാക്കി.

     ⁴⁷ ഞങ്ങളുടെ ദൈവമായ യഹോവേ, ഞങ്ങളെ രക്ഷിക്കണമേ;

     നിന്റെ വിശുദ്ധനാമത്തിന് സ്തോത്രം ചെയ്യുവാനും നിന്റെ സ്തുതിയിൽ പ്രശംസിക്കുവാനും

     ജനതകളുടെ ഇടയിൽനിന്ന് ഞങ്ങളെ ശേഖരിക്കണമേ.

     ⁴⁸ യിസ്രായേലിന്റെ ദൈവമായ യഹോവ എന്നും എന്നേക്കും വാഴ്ത്തപ്പെടുമാറാകട്ടെ;

     ജനമെല്ലാം ആമേൻ എന്നു പറയട്ടെ.

     യഹോവയെ സ്തുതിക്കുവിൻ.

സങ്കീർത്തനം.106 107

     ¹ യഹോവയ്ക്കു സ്തോത്രം ചെയ്യുവിൻ;

     അവൻ നല്ലവനല്ലോ അവന്റെ ദയ എന്നേക്കുമുള്ളത്!

     ² യഹോവ വൈരിയുടെ കയ്യിൽനിന്നു വീണ്ടെടുക്കുകയും

     കിഴക്കും പടിഞ്ഞാറും വടക്കും കടലിലും ഉള്ള

     ³ ദേശങ്ങളിൽനിന്ന് കൂട്ടിച്ചേർക്കുകയും ചെയ്തവരായ

     അവന്റെ വിമുക്തന്മാർ അങ്ങനെ പറയട്ടെ.

     ⁴ അവർ മരുഭൂമിയിൽ ജനസഞ്ചാരമില്ലാത്ത വഴിയിൽ അലഞ്ഞുനടന്നു;

     പാർക്കുവാൻ ഒരു പട്ടണവും അവർ കണ്ടെത്തിയില്ല.

     ⁵ അവർ വിശന്നും ദാഹിച്ചും ഇരുന്നു;

     അവരുടെ പ്രാണൻ അവരുടെ ഉള്ളിൽ തളർന്നു.

     ⁶ അവർ അവരുടെ കഷ്ടതയിൽ യഹോവയോട് നിലവിളിച്ചു;

     അവൻ അവരെ അവരുടെ ഞെരുക്കങ്ങളിൽ നിന്നു വിടുവിച്ചു.

     ⁷ അവർ പാർക്കുവാൻ തക്ക പട്ടണത്തിൽ ചെല്ലേണ്ടതിന്

     അവൻ അവരെ ശരിയായ വഴിയിൽ നടത്തി.

     ⁸ അവർ യഹോവയെ അവന്റെ നന്മയെചൊല്ലിയും

     മനുഷ്യപുത്രന്മാരിൽ ചെയ്ത അത്ഭുതങ്ങളെ ചൊല്ലിയും സ്തുതിക്കട്ടെ.

     ⁹ അവൻ ആർത്തിയുള്ളവന് തൃപ്തിവരുത്തുകയും

     വിശപ്പുള്ളവനെ നന്മകൊണ്ടു നിറയ്ക്കുകയും ചെയ്യുന്നു.

     ¹⁰ ദൈവത്തിന്റെ വചനങ്ങളോട് മത്സരിക്കുകയും

     അത്യുന്നതന്റെ ആലോചന നിരസിക്കുകയും ചെയ്ത് അവർ

     ഇരുളിലും അന്ധതമസ്സിലും ഇരുന്നു.

     ¹¹ അരിഷ്ടതയാലും ഇരുമ്പുചങ്ങലയാലും ബന്ധിക്കപ്പെട്ടവർ -

     ¹² അവരുടെ ഹൃദയത്തെ അവൻ കഷ്ടതകൊണ്ട് താഴ്ത്തി;

     അവർ ഇടറിവീണു; സഹായിക്കുവാൻ ആരും ഉണ്ടായിരുന്നില്ല.

     ¹³ അവർ അവരുടെ കഷ്ടതയിൽ യഹോവയോട് നിലവിളിച്ചു;

     അവൻ അവരുടെ ഞെരുക്കങ്ങളിൽനിന്ന് അവരെ രക്ഷിച്ചു.

     ¹⁴ അവൻ അവരെ ഇരുട്ടിൽനിന്നും മരണനിഴലിൽനിന്നും പുറപ്പെടുവിച്ചു;

     അവരുടെ ബന്ധനങ്ങൾ അറുത്തുകളഞ്ഞു.

     ¹⁵ അവർ യഹോവയെ, അവന്റെ നന്മയെ ചൊല്ലിയും

     മനുഷ്യപുത്രന്മാരിൽ ചെയ്ത അത്ഭുതങ്ങളെ ചൊല്ലിയും സ്തുതിക്കട്ടെ.

     ¹⁶ അവൻ താമ്രകതകുകൾ തകർത്തു,

     ഇരിമ്പോടാമ്പലുകൾ മുറിച്ചുകളഞ്ഞിരിക്കുന്നു.

     ¹⁷ ഭോഷന്മാർ അവരുടെ ലംഘനങ്ങൾ ഹേതുവായും

     തങ്ങളുടെ അകൃത്യങ്ങൾനിമിത്തവും കഷ്ടപ്പെട്ടു.

     ¹⁸ അവർക്ക് സകലവിധ ഭക്ഷണത്തോടും വെറുപ്പുതോന്നി;

     അവർ മരണവാതിലുകളോട് സമീപിച്ചിരുന്നു.

     ¹⁹ അവർ അവരുടെ കഷ്ടതയിൽ യഹോവയോട് നിലവിളിച്ചു;

     അവൻ അവരെ അവരുടെ ഞെരുക്കങ്ങളിൽനിന്നു രക്ഷിച്ചു. ²⁰ അവൻ തന്റെ വചനം അയച്ച് അവരെ സൗഖ്യമാക്കി;

     അവരുടെ കുഴികളിൽനിന്ന് അവരെ വിടുവിച്ചു.

     ²¹ അവർ യഹോവയെ അവന്റെ നന്മയെചൊല്ലിയും

     മനുഷ്യപുത്രന്മാരിൽ ചെയ്ത അത്ഭുതങ്ങളെ ചൊല്ലിയും സ്തുതിക്കട്ടെ.

     ²² അവർ സ്തോത്രയാഗങ്ങൾ കഴിക്കുകയും

     സംഗീതത്തോടുകൂടി അവന്റെ പ്രവൃത്തികളെ വർണ്ണിക്കുകയും ചെയ്യട്ടെ.

     ²³ കപ്പൽ കയറി സമുദ്രത്തിൽ ഓടിയവർ,

     പെരുവെള്ളങ്ങളിൽ വ്യാപാരം ചെയ്തവർ,

     ²⁴ അവർ യഹോവയുടെ പ്രവൃത്തികളും

     ആഴിയിൽ അവന്റെ അത്ഭുതങ്ങളും കണ്ടു.

     ²⁵ അവൻ കല്പിച്ച് കൊടുങ്കാറ്റടിപ്പിച്ചു,

     സമുദ്രം അതിലെ തിരകളെ പൊങ്ങുമാറാക്കി.

     ²⁶ അവർ ആകാശത്തിലേക്ക് ഉയർന്നു,

     വീണ്ടും ആഴത്തിലേക്ക് താണു,

     അവരുടെ പ്രാണൻ കഷ്ടത്താൽ ഉരുകിപ്പോയി.

     ²⁷ അവർ ലഹരിപിടിച്ചവനെപ്പോലെ തുള്ളി ചാഞ്ചാടി നടന്നു;

     അവരുടെ ബുദ്ധി കെട്ടുപോയിരുന്നു.

     ²⁸ അവർ അവരുടെ കഷ്ടതയിൽ യഹോവയോട് നിലവിളിച്ചു;

     അവൻ അവരെ അവരുടെ ഞെരുക്കങ്ങളിൽ നിന്ന് വിടുവിച്ചു.

     ²⁹ അവൻ കൊടുങ്കാറ്റിനെ ശാന്തമാക്കി; തിരമാലകൾ അടങ്ങി.

     ³⁰ ശാന്തത വന്നതുകൊണ്ട് അവർ സന്തോഷിച്ചു;

     അവർ ആഗ്രഹിച്ച തുറമുഖത്ത് അവൻ അവരെ എത്തിച്ചു.

     ³¹ അവർ യഹോവയെ അവന്റെ നന്മയെ ചൊല്ലിയും

     മനുഷ്യപുത്രന്മാരിൽ ചെയ്ത അത്ഭുതങ്ങളെ ചൊല്ലിയും സ്തുതിക്കട്ടെ.

     ³² അവർ ജനത്തിന്റെ സഭയിൽ അവനെ പുകഴ്ത്തുകയും

     മൂപ്പന്മാരുടെ സംഘത്തിൽ അവനെ സ്തുതിക്കുകയും ചെയ്യട്ടെ.

     ³³ നിവാസികളുടെ ദുഷ്ടതനിമിത്തം

     അവൻ നദികളെ മരുഭൂമിയും

     ³⁴ നീരുറവുകളെ വരണ്ട നിലവും

     ഫലപ്രദമായ ഭൂമിയെ ഊഷരനിലവും ആക്കി.

     ³⁵ അവൻ മരുഭൂമിയെ ജലതടാകവും

     വരണ്ട നിലത്തെ നീരുറവുകളും ആക്കി.

     ³⁶ വിശന്നവരെ അവൻ അവിടെ താമസിപ്പിച്ചു;

     അവർ വസിക്കുവാൻ പട്ടണം ഉണ്ടാക്കുകയും

     നിലം വിതയ്ക്കുകയും ³⁷ മുന്തിരിത്തോട്ടം നട്ടുണ്ടാക്കുകയും

     സമൃദ്ധിയായി ഫലങ്ങൾ അനുഭവിക്കുകയും ചെയ്തു.

     ³⁸ അവൻ അനുഗ്രഹിച്ചിട്ട് അവർ അത്യന്തം പെരുകി;

     അവരുടെ കന്നുകാലികൾ കുറഞ്ഞുപോകുവാൻ അവൻ ഇടവരുത്തിയില്ല.

     ³⁹ പീഡനവും കഷ്ടതയും സങ്കടവും ഹേതുവായി

     അവർ പിന്നെയും കുറഞ്ഞു താണുപോയി.

     ⁴⁰ അവൻ പ്രഭുക്കന്മാരുടെമേൽ നിന്ദ പകരുകയും

     വഴിയില്ലാത്ത ശൂന്യപ്രദേശത്ത് അവരെ അലയുന്നവരായും ചെയ്യുന്നു.

     ⁴¹ അവൻ ദരിദ്രനെ പീഡയിൽനിന്നുയർത്തി

     അവന്റെ കുലങ്ങളെ ആട്ടിൻ കൂട്ടംപോലെ ആക്കി.

     ⁴² നേരുള്ളവർ ഇതു കണ്ട് സന്തോഷിക്കും;

     നീതികെട്ടവർ എല്ലാവരും വായ്പൊത്തും.

     ⁴³ ജ്ഞാനമുള്ളവർ ഇവ ശ്രദ്ധിക്കും;

     അവർ യഹോവയുടെ കൃപകളെക്കുറിച്ച് ചിന്തിക്കും.

സങ്കീർത്തനം.107 108

     ¹ ദൈവമേ, എന്റെ മനസ്സ് ഉറച്ചിരിക്കുന്നു;

     ഞാൻ പാടും; എന്റെ ഉള്ളം കൊണ്ട് ഞാൻ കീർത്തനം പാടും.

     ² വീണയും കിന്നരവുമേ, ഉണരുവിൻ;

     അതിരാവിലെ ഞാൻ തന്നെ ഉണരും.

     ³ യഹോവേ, വംശങ്ങളുടെ ഇടയിൽ ഞാൻ നിനക്കു സ്തോത്രം ചെയ്യും;

     ജനതകളുടെ മദ്ധ്യേ ഞാൻ നിനക്ക് കീർത്തനം പാടും.

     ⁴ നിന്റെ ദയ ആകാശത്തിന് മീതെ വലുതാകുന്നു;

     നിന്റെ വിശ്വസ്തത മേഘങ്ങളോളം എത്തുന്നു.

     ⁵ ദൈവമേ, നീ ആകാശത്തിനു മീതെ ഉയർന്നിരിക്കണമേ;

     നിന്റെ മഹത്വം സർവ്വഭൂമിക്കും മീതെ തന്നെ.

     ⁶ നിനക്കു പ്രിയമുള്ളവർ വിടുവിക്കപ്പെടേണ്ടതിന്

     നിന്റെ വലങ്കൈകൊണ്ട് രക്ഷിച്ച് ഞങ്ങൾക്ക് ഉത്തരമരുളണമേ.

     ⁷ ദൈവം തന്റെ വിശുദ്ധിയിൽ അരുളിച്ചെയ്തത്: “ഞാൻ ആനന്ദത്തോടെ

     ശേഖേമിനെ വിഭാഗിച്ച് സുക്കോത്ത് താഴ്വരയെ അളക്കും.

     ⁸ ഗിലെയാദ് എനിക്കുള്ളത്; മനശ്ശെയും എനിക്കുള്ളത്;

     എഫ്രയീം എന്റെ ശിരോകവചവും യെഹൂദാ എന്റെ ചെങ്കോലും ആകുന്നു.

     ⁹ മോവാബ് എനിക്കു കഴുകുവാനുള്ള പാത്രം;

     ഏദോമിന്മേൽ ഞാൻ എന്റെ ചെരിപ്പ് എറിയും;

     ഫെലിസ്തദേശത്തിന്മേൽ ഞാൻ ജയഘോഷംകൊള്ളും.”

     ¹⁰ ഉറപ്പുള്ള നഗരത്തിലേക്ക് എന്നെ ആര് കൊണ്ടുപോകും?

     ഏദോമിലേക്ക് എന്നെ ആര് വഴിനടത്തും?

     ¹¹ ദൈവമേ, നീ ഞങ്ങളെ തള്ളിക്കളഞ്ഞില്ലയോ?

     ദൈവമേ, നീ ഞങ്ങളുടെ സൈന്യങ്ങളോടു കൂടി പുറപ്പെടുന്നതുമില്ല.

     ¹² വൈരിയുടെ നേരെ ഞങ്ങൾക്കു സഹായം ചെയ്യണമേ;

     മനുഷ്യന്റെ സഹായം വ്യർത്ഥമല്ലയോ?.

     ¹³ ദൈവത്താൽ നാം വീര്യം പ്രവർത്തിക്കും;

     അവൻ തന്നെ നമ്മുടെ വൈരികളെ മെതിച്ചുകളയും.

സങ്കീർത്തനം.108 109

     ¹ എന്റെ പുകഴ്ചയായ ദൈവമേ, മൗനമായിരിക്കരുതേ.

     ² ദുഷ്ടന്റെ വായും വഞ്ചകന്റെ വായും എന്റെ നേരെ തുറന്നിരിക്കുന്നു;

     ഭോഷ്കുള്ള നാവുകൊണ്ട് അവർ എന്നോട് സംസാരിച്ചിരിക്കുന്നു.

     ³ അവർ വിദ്വേഷവാക്കുകൾകൊണ്ട് എന്നെ വളഞ്ഞ്

     കാരണംകൂടാതെ എന്നോട് പോരാടിയിരിക്കുന്നു.

     ⁴ എന്റെ സ്നേഹത്തിനു പകരം അവർ എന്നെ കുറ്റം ചുമത്തുന്നു;

     എന്നാൽ ഞാൻ പ്രാർത്ഥിച്ചുകൊണ്ടിരിക്കുന്നു.

     ⁵ നന്മയ്ക്കു പകരം തിന്മയും സ്നേഹത്തിനു പകരം ദ്വേഷവും

     അവർ എന്നോടു കാണിച്ചിരിക്കുന്നു.

     ⁶ നീ അവന്റെമേൽ ഒരു ദുഷ്ടനെ നിയമിക്കണമേ;

     സാത്താൻ അവന്റെ വലത്തുഭാഗത്തു നില്ക്കട്ടെ.

     ⁷ അവനെ വിസ്തരിക്കുമ്പോൾ അവൻ കുറ്റക്കാരനെന്നു തെളിയട്ടെ;

     അവന്റെ പ്രാർത്ഥന പാപമായിത്തീരട്ടെ.

     ⁸ അവന്റെ നാളുകൾ ചുരുങ്ങിപ്പോകട്ടെ;

     അവന്റെ സ്ഥാനം മറ്റൊരുത്തൻ ഏല്ക്കട്ടെ.

     ⁹ അവന്റെ മക്കൾ അനാഥരും അവന്റെ ഭാര്യ വിധവയും ആയിത്തീരട്ടെ.

     ¹⁰ അവന്റെ മക്കൾ അലഞ്ഞ് തെണ്ടിനടക്കട്ടെ;

     അവരുടെ ശൂന്യഭവനങ്ങൾ വിട്ട് ഇരന്നു നടക്കട്ടെ;

     ¹¹ കടക്കാരൻ അവനുള്ളതൊക്കെയും കൊണ്ടുപോകട്ടെ;

     അപരിചിതർ അവന്റെ പ്രയത്നഫലം കൊള്ളയിടട്ടെ.

     ¹² അവനോട് ദയ കാണിക്കുവാൻ ആരും ഉണ്ടാകരുതേ;

     അനാഥരായ അവന്റെ മക്കളോട് ആർക്കും കരുണ തോന്നരുതേ.

     ¹³ അവന്റെ സന്തതി മുടിഞ്ഞുപോകട്ടെ;

     അടുത്ത തലമുറയിൽ തന്നേ അവരുടെ പേര് മാഞ്ഞു പോകട്ടെ;

     ¹⁴ അവന്റെ പിതാക്കന്മാരുടെ അകൃത്യം യഹോവ ഓർക്കുമാറാകട്ടെ;

     അവന്റെ അമ്മയുടെ പാപം മാഞ്ഞുപോകയുമരുതേ.

     ¹⁵ അവ എല്ലായ്പോഴും യഹോവയുടെ മുമ്പാകെ ഇരിക്കട്ടെ;

     അവരുടെ ഓർമ്മ ഭൂമിയിൽനിന്നു ഛേദിച്ചുകളയേണ്ടതിനു തന്നേ.

     ¹⁶ അവൻ ദയ കാണിക്കുവാൻ മറന്നുകളഞ്ഞുവല്ലോ;

     എളിയവനെയും ദരിദ്രനെയും മനംതകർന്നവനെയും മരണപര്യന്തം ഉപദ്രവിച്ചു.

     ¹⁷ ശാപം അവന് പ്രിയമായിരുന്നു; അത് അവന് ഭവിക്കട്ടെ;

     അനുഗ്രഹം അവന് അപ്രിയമായിരുന്നു; അത് അവനെ വിട്ടകന്നുപോകട്ടെ.

     ¹⁸ അവൻ വസ്ത്രംപോലെ ശാപം ധരിച്ചു;

     അവ വെള്ളംപോലെ അവന്റെ ഉള്ളിലും എണ്ണപോലെ അവന്റെ അസ്ഥികളിലും പ്രവേശിക്കട്ടെ.

     ¹⁹ ശാപം അവന് പുതയ്ക്കുന്ന വസ്ത്രംപോലെയും

     നിത്യം അരയ്ക്കു കെട്ടുന്ന കച്ചപോലെയും ആയിരിക്കട്ടെ.

     ²⁰ ഇത് എന്നെ കുറ്റം ചുമത്തുന്നവർക്കും എനിക്കു വിരോധമായി ദോഷം പറയുന്നവർക്കും യഹോവ കൊടുക്കുന്ന പ്രതിഫലം ആകട്ടെ.

     ²¹ നീയോ കർത്താവായ യഹോവേ, നിന്റെ നാമം നിമിത്തം എന്നോട് ചെയ്യണമേ;

     നിന്റെ ദയ നല്ലതാകയാൽ എന്നെ വിടുവിക്കണമേ.

     ²² ഞാൻ അരിഷ്ടനും ദരിദ്രനും ആകുന്നു;

     എന്റെ ഹൃദയത്തിന് മുറിവേറ്റിരിക്കുന്നു.

     ²³ ചാഞ്ഞുപോകുന്ന നിഴൽപോലെ ഞാൻ കടന്നുപോകുന്നു;

     വെട്ടുക്കിളിയെപ്പോലെ എന്നെ കുടഞ്ഞുകളയുന്നു.

     ²⁴ എന്റെ മുഴങ്കാലുകൾ ഉപവാസംകൊണ്ടു വിറയ്ക്കുന്നു.

     എന്റെ ദേഹം പുഷ്ടിയില്ലാതെ ക്ഷയിച്ചിരിക്കുന്നു.

     ²⁵ ഞാൻ അവർക്ക് പരിഹാസപാത്രമായിത്തീർന്നിരിക്കുന്നു;

     എന്നെ കാണുമ്പോൾ അവർ തല കുലുക്കുന്നു.

     ²⁶ എന്റെ ദൈവമായ യഹോവേ, എന്നെ സഹായിക്കണമേ;

     നിന്റെ ദയയ്ക്കു തക്കവണ്ണം എന്നെ രക്ഷിക്കണമേ.

     ²⁷ യഹോവേ, ഇതു നിന്റെ കൈ എന്നും നീ ഇതു ചെയ്തു എന്നും അവർ അറിയേണ്ടതിനു തന്നെ.

     ²⁸ അവർ ശപിക്കട്ടെ; നീയോ അനുഗ്രഹിക്കണമേ;

     അവർ എതിർക്കുമ്പോൾ ലജ്ജിച്ചുപോകട്ടെ; നിന്റെ ദാസനായ

     അടിയനോ സന്തോഷിക്കും;

     ²⁹ എന്റെ എതിരാളികൾ നിന്ദ ധരിക്കട്ടെ;

     പുതപ്പ് പുതയ്ക്കുന്നതുപോലെ അവർ ലജ്ജ പുതയ്ക്കും.

     ³⁰ ഞാൻ എന്റെ വായ് കൊണ്ട് യഹോവയെ അത്യന്തം സ്തുതിക്കും;

     അതെ, ഞാൻ പുരുഷാരത്തിന്റെ നടുവിൽ അവനെ പുകഴ്ത്തും.

     ³¹ അവൻ ശിക്ഷയ്ക്കു വിധിക്കുന്നവരുടെ കൈയിൽനിന്ന് എളിയവരെ രക്ഷിക്കുവാൻ

     അവന്റെ വലത്തുഭാഗത്തു നില്ക്കുന്നു.

സങ്കീർത്തനം.109 110

     ¹ യഹോവ എന്റെ കർത്താവിനോട് അരുളിച്ചെയ്യുന്നത്:

     “ഞാൻ നിന്റെ ശത്രുക്കളെ നിന്റെ പാദപീഠമാക്കുവോളം

     നീ എന്റെ വലത്തുഭാഗത്തിരിക്കുക”.

     ² നിന്റെ ബലമുള്ള ചെങ്കോൽ യഹോവ സീയോനിൽനിന്നു നീട്ടും;

     നീ നിന്റെ ശത്രുക്കളുടെ മദ്ധ്യത്തിൽ വാഴുക.

     ³ നീ സേനാദിവസം നിന്റെ ജനം സ്വമേധയാ നിനക്ക് വിധേയപ്പെട്ടിരിക്കും;

     വിശുദ്ധ വസ്ത്രാലങ്കാരത്തോടുകൂടി ഉഷസ്സിന്റെ ഉദരത്തിൽനിന്ന് പുറപ്പെടുന്ന

     മഞ്ഞുപോലെ യുവാക്കൾ നിനക്കുവേണ്ടി പുറപ്പെട്ടുവരും.

     ⁴ “നീ മല്ക്കീസേദെക്കിന്റെ ക്രമപ്രകാരം എന്നേക്കും ഒരു പുരോഹിതൻ ആകുന്നു”

     എന്ന് യഹോവ സത്യം ചെയ്തു; അതിന് മാറ്റമില്ല.

     ⁵ നിന്റെ വലത്തുഭാഗത്തിരിക്കുന്ന കർത്താവ് തന്റെ ക്രോധദിവസത്തിൽ രാജാക്കന്മാരെ തകർത്തുകളയും.

     ⁶ അവൻ ജനതകളുടെ ഇടയിൽ ന്യായംവിധിക്കും;

     അവൻ എല്ലാ സ്ഥലങ്ങളും ശവങ്ങൾകൊണ്ട് നിറയ്ക്കും;

     അവൻ അനേകം ദേശങ്ങളുടെ തലവന്മാരെ തകർത്തുകളയും.

     ⁷ അവൻ വഴിയരികിലുള്ള അരുവിയിൽനിന്നു കുടിക്കും;

     അതുകൊണ്ട് അവൻ തല ഉയർത്തും.

സങ്കീർത്തനം.110 111

     ¹ യഹോവയെ സ്തുതിക്കുവിൻ.

     ഞാൻ നേരുള്ളവരുടെ സംഘത്തിലും സഭയിലും

     പൂർണ്ണഹൃദയത്തോടുകൂടി യഹോവയ്ക്കു സ്തോത്രം ചെയ്യും.

     ² യഹോവയുടെ പ്രവൃത്തികൾ വലിയവയും

     അവ ഇഷ്ടപ്പെടുന്നവർ എല്ലാവരും പഠിക്കേണ്ടതും ആകുന്നു.

     ³ അവന്റെ പ്രവൃത്തി മഹത്വവും തേജസ്സും ഉള്ളത്;

     അവന്റെ നീതി എന്നേക്കും നിലനില്ക്കുന്നു.

     ⁴ അവൻ തന്റെ അത്ഭുതപ്രവൃത്തികൾ ഓർമ്മിക്കപ്പെടുവാൻ ഉണ്ടാക്കിയിരിക്കുന്നു;

     യഹോവ കൃപയും കരുണയും ഉള്ളവൻ തന്നെ.

     ⁵ തന്റെ ഭക്തന്മാർക്ക് അവൻ ആഹാരം കൊടുക്കുന്നു;

     അവൻ തന്റെ ഉടമ്പടി എന്നേക്കും ഓർമ്മിക്കുന്നു.

     ⁶ ജനതകളുടെ അവകാശം അവൻ സ്വജനത്തിന് കൊടുത്തതിനാൽ

     തന്റെ പ്രവൃത്തികളുടെ ശക്തി അവർക്കു വെളിപ്പെടുത്തിയിരിക്കുന്നു.

     ⁷ അവന്റെ കൈകളുടെ പ്രവൃത്തികൾ സത്യവും ന്യായവും ആകുന്നു;

     അവന്റെ പ്രമാണങ്ങൾ എല്ലാം വിശ്വാസ്യം തന്നെ.

     ⁸ അവ എന്നെന്നേക്കും സ്ഥിരമായിരിക്കുന്നു;

     അവ വിശ്വസ്തതയോടും നേരോടുംകൂടി അനുഷ്ഠിക്കപ്പെടുന്നു.

     ⁹ അവൻ തന്റെ ജനത്തിന് വീണ്ടെടുപ്പ് അയച്ച്,

     തന്റെ ഉടമ്പടി എന്നേക്കുമായി കല്പിച്ചിരിക്കുന്നു;

     അവന്റെ നാമം വിശുദ്ധവും ഭയങ്കരവും ആകുന്നു.

     ¹⁰ യഹോവാഭക്തി ജ്ഞാനത്തിന്റെ ആരംഭമാകുന്നു;

     അവന്റെ കല്പനകൾ ആചരിക്കുന്ന എല്ലാവർക്കും നല്ല ബുദ്ധി ഉണ്ട്;

     അവന്റെ സ്തുതി എന്നേക്കും നിലനില്ക്കുന്നു.

സങ്കീർത്തനം.111 112

     ¹ യഹോവയെ സ്തുതിക്കുവിൻ;

     യഹോവയെ ഭയപ്പെട്ട്, അവന്റെ കല്പനകൾ

     ഏറ്റവും ഇഷ്ടപ്പെടുന്ന മനുഷ്യൻ ഭാഗ്യവാൻ.

     ² അവന്റെ സന്തതി ഭൂമിയിൽ ബലപ്പെട്ടിരിക്കും;

     നേരുള്ളവരുടെ തലമുറ അനുഗ്രഹിക്കപ്പെടും.

     ³ ഐശ്വര്യവും സമ്പത്തും അവന്റെ വീട്ടിൽ ഉണ്ടാകും;

     അവന്റെ നീതി എന്നേക്കും നിലനില്ക്കുന്നു.

     ⁴ നേരുള്ളവർക്ക് ഇരുട്ടിൽ വെളിച്ചം ഉദിക്കുന്നു;

     അവൻ കൃപയും കരുണയും നീതിയും ഉള്ളവനാകുന്നു.

     ⁵ കൃപതോന്നി വായ്പകൊടുക്കുന്നവൻ ശുഭമായിരിക്കും;

     വിവേകത്തോടെ അവൻ തന്റെ കാര്യം നടത്തും.

     ⁶ അവൻ ഒരു നാളും കുലുങ്ങിപ്പോകുകയില്ല;

     നീതിമാൻ എന്നേക്കും സ്മരിക്കപ്പെടും.

     ⁷ ദുർവ്വർത്തമാനംനിമിത്തം അവൻ ഭയപ്പെടുകയില്ല;

     അവന്റെ ഹൃദയം യഹോവയിൽ ആശ്രയിച്ച് ഉറച്ചിരിക്കും.

     ⁸ അവന്റെ ഹൃദയം ഭയപ്പെടാതെ സ്ഥിരമായിരിക്കുന്നു;

     അവൻ ശത്രുക്കളിൽ തന്റെ ആഗ്രഹം നിവർത്തിച്ചുകാണും.

     ⁹ അവൻ വാരി വിതറി ദരിദ്രന്മാർക്കു കൊടുക്കുന്നു;

     അവന്റെ നീതി എന്നേക്കും നിലനില്ക്കുന്നു;

     അവന്റെ കൊമ്പ് ബഹുമാനത്തോടെ ഉയർന്നിരിക്കും.

     ¹⁰ ദുഷ്ടൻ അതു കണ്ട് വ്യസനിക്കും;

     അവൻ പല്ലുകടിച്ച് ഉരുകിപ്പോകും;

     ദുഷ്ടന്റെ ആശ നശിച്ചുപോകും.

സങ്കീർത്തനം.112 113

     ¹ യഹോവയെ സ്തുതിക്കുവിൻ;

     യഹോവയുടെ ദാസന്മാരെ സ്തുതിക്കുവിൻ;

     യഹോവയുടെ നാമത്തെ സ്തുതിക്കുവിൻ.

     ² യഹോവയുടെ നാമം വാഴ്ത്തപ്പെടുമാറാകട്ടെ;

     ഇന്നുമുതൽ എന്നെന്നേക്കും തന്നെ.

     ³ സൂര്യന്റെ ഉദയംമുതൽ അസ്തമയം വരെ

     യഹോവയുടെ നാമം സ്തുതിക്കപ്പെടുമാറാകട്ടെ.

     ⁴ യഹോവ സകലജനതകൾക്കും മീതെയും

     അവന്റെ മഹത്വം ആകാശത്തിന് മീതെയും ഉയർന്നിരിക്കുന്നു.

     ⁵ ഉന്നതത്തിൽ അധിവസിക്കുന്നവനായ

     നമ്മുടെ ദൈവമായ യഹോവയ്ക്കു സദൃശൻ ആരുണ്ട്?

     ⁶ ആകാശത്തിലും ഭൂമിയിലും ഉള്ളവ അവൻ കുനിഞ്ഞുനോക്കുന്നു.

     ⁷ അവൻ എളിയവനെ പൊടിയിൽനിന്ന് എഴുന്നേല്പിക്കുകയും

     ദരിദ്രനെ കുപ്പയിൽനിന്ന് ഉയർത്തുകയും ചെയ്തു;

     ⁸ പ്രഭുക്കന്മാരോടുകൂടി,

     തന്റെ ജനത്തിന്റെ പ്രഭുക്കന്മാരോടുകൂടിത്തന്നെ അവരെ ഇരുത്തുന്നു.

     ⁹ അവൻ മച്ചിയായവളെ,

     മക്കളുടെ അമ്മയായി, സന്തോഷത്തോടെ വീട്ടിൽ വസിക്കുമാറാക്കുന്നു.

സങ്കീർത്തനം.113 114

     ¹ യിസ്രായേൽ ഈജിപ്റ്റിൽനിന്നും

     യാക്കോബിൻ ഗൃഹം ഇതരഭാഷയുള്ള ജനതയുടെ ഇടയിൽനിന്നും പുറപ്പെട്ടപ്പോൾ

     ² യെഹൂദാ അവന്റെ വിശുദ്ധമന്ദിരവും

     യിസ്രായേൽ അവന്റെ ആധിപത്യദേശവുമായിത്തീർന്നു.

     ³ സമുദ്രം അത് കണ്ട് ഓടിപ്പോയി; യോർദ്ദാൻ പിൻവാങ്ങി.

     ⁴ പർവ്വതങ്ങൾ മുട്ടാടുകളെപ്പോലെയും

     കുന്നുകൾ കുഞ്ഞാടുകളെപ്പോലെയും തുള്ളി.

     ⁵ സമുദ്രമേ, നീ ഓടുന്നതെന്ത്?

     യോർദ്ദാനേ, നീ പിൻവാങ്ങുന്നതെന്ത്?

     ⁶ പർവ്വതങ്ങളേ; നിങ്ങൾ മുട്ടാടുകളെപ്പോലെയും

     കുന്നുകളേ, നിങ്ങൾ കുഞ്ഞാടുകളെപ്പോലെയും തുള്ളുന്നത് എന്ത്?.

     ⁷ ഭൂമിയേ, നീ കർത്താവിന്റെ സന്നിധിയിൽ,

     യാക്കോബിന്റെ ദൈവത്തിന്റെ സന്നിധിയിൽ വിറയ്ക്കുക.

     ⁸ അവൻ പാറയെ ജലതടാകവും

     തീക്കല്ലിനെ നീരുറവും ആക്കിയിരിക്കുന്നു.

സങ്കീർത്തനം.114 115

     ¹ ഞങ്ങൾക്കല്ല, യഹോവേ, ഞങ്ങൾക്കല്ല,

     നിന്റെ ദയയും വിശ്വസ്തതയും നിമിത്തം നിന്റെ നാമത്തിനു തന്നെ മഹത്വം വരുത്തണമേ.

     ² “അവരുടെ ദൈവം എവിടെ?” എന്ന് ജനതകൾ പറയുന്നതെന്തിന്?

     ³ നമ്മുടെ ദൈവം സ്വർഗ്ഗത്തിൽ ഉണ്ട്;

     തനിക്ക് ഇഷ്ടമുള്ളതെല്ലാം അവൻ ചെയ്യുന്നു.

     ⁴ അവരുടെ വിഗ്രഹങ്ങൾ പൊന്നും വെള്ളിയും ആകുന്നു;

     മനുഷ്യരുടെ കൈവേല തന്നെ.

     ⁵ അവയ്ക്കു വായുണ്ടെങ്കിലും സംസാരിക്കുന്നില്ല;

     കണ്ണുണ്ടെങ്കിലും കാണുന്നില്ല.

     ⁶ അവയ്ക്കു ചെവിയുണ്ടെങ്കിലും കേൾക്കുന്നില്ല;

     മൂക്കുണ്ടെങ്കിലും മണക്കുന്നില്ല.

     ⁷ അവയ്ക്കു കൈയുണ്ടെങ്കിലും സ്പർശിക്കുന്നില്ല;

     കാലുണ്ടെങ്കിലും നടക്കുന്നില്ല; തൊണ്ട കൊണ്ട് സംസാരിക്കുന്നതുമില്ല.

     ⁸ അവയെ ഉണ്ടാക്കുന്നവർ അവയെപ്പോലെ ആകുന്നു;

     അവയിൽ ആശ്രയിക്കുന്ന ഏവനും അങ്ങനെ തന്നെ.

     ⁹ യിസ്രായേലേ, യഹോവയിൽ ആശ്രയിക്കുക;

     അവൻ അവരുടെ സഹായവും പരിചയും ആകുന്നു;

     ¹⁰ അഹരോൻഗൃഹമേ, യഹോവയിൽ ആശ്രയിക്കുക;

     അവൻ അവരുടെ സഹായവും പരിചയും ആകുന്നു.

     ¹¹ യഹോവാഭക്തന്മാരേ, യഹോവയിൽ ആശ്രയിക്കുക;

     അവൻ അവരുടെ സഹായവും പരിചയും ആകുന്നു.

     ¹² യഹോവ നമ്മെ ഓർത്തിരിക്കുന്നു; അവൻ അനുഗ്രഹിക്കും;

     അവൻ യിസ്രായേൽഗൃഹത്തെ അനുഗ്രഹിക്കും;

     അവൻ അഹരോൻഗൃഹത്തെ അനുഗ്രഹിക്കും.

     ¹³ അവൻ യഹോവാഭക്തന്മാരായ ചെറിയവരെയും വലിയവരെയും അനുഗ്രഹിക്കും.

     ¹⁴ യഹോവ നിങ്ങളെ മേല്ക്കുമേൽ വർദ്ധിപ്പിക്കട്ടെ;

     നിങ്ങളെയും നിങ്ങളുടെ മക്കളെയും തന്നെ.

     ¹⁵ ആകാശത്തെയും ഭൂമിയെയും ഉണ്ടാക്കിയ യഹോവയാൽ

     നിങ്ങൾ അനുഗ്രഹിക്കപ്പെട്ടവർ ആകുന്നു.

     ¹⁶ സ്വർഗ്ഗം യഹോവയുടെ സ്വർഗ്ഗമാകുന്നു;

     ഭൂമിയെ അവൻ മനുഷ്യർക്ക് കൊടുത്തിരിക്കുന്നു.

     ¹⁷ മരിച്ചവരും മൗനതയിൽ ഇറങ്ങിയവരും

     യഹോവയെ സ്തുതിക്കുന്നില്ല.

     ¹⁸ നാമോ, ഇന്നുമുതൽ എന്നേക്കും യഹോവയെ വാഴ്ത്തും.

     യഹോവയെ സ്തുതിക്കുവിൻ.

സങ്കീർത്തനം.115 116

     ¹ യഹോവ എന്റെ പ്രാർത്ഥനയും യാചനകളും കേട്ടതുകൊണ്ട്

     ഞാൻ അവനെ സ്നേഹിക്കുന്നു.

     ² അവൻ തന്റെ ചെവി എങ്കലേക്കു ചായിച്ചതുകൊണ്ട്

     ഞാൻ ജീവിതകാലമെല്ലാം അവനെ വിളിച്ചപേക്ഷിക്കും

     ³ മരണപാശങ്ങൾ എന്നെ ചുറ്റി, പാതാള വേദനകൾ എന്നെ പിടിച്ചു;

     ഞാൻ കഷ്ടവും സങ്കടവും അനുഭവിച്ചു.

     ⁴ “അയ്യോ, യഹോവേ, എന്റെ പ്രാണനെ രക്ഷിക്കണമേ”

     എന്ന് ഞാൻ യഹോവയുടെ നാമം വിളിച്ചപേക്ഷിച്ചു.

     ⁵ യഹോവ കൃപയും നീതിയും ഉള്ളവൻ;

     നമ്മുടെ ദൈവം കരുണയുള്ളവൻ തന്നെ.

     ⁶ യഹോവ അല്പബുദ്ധികളെ സംരക്ഷിക്കുന്നു;

     അവൻ എന്നെ എളിയവനാക്കി, എന്നെ രക്ഷിക്കുകയും ചെയ്തു.

     ⁷ എൻ മനമേ, നീ വീണ്ടും സ്വസ്ഥമായിരിക്കുക;

     എന്തെന്നാൽ യഹോവ എനിക്കു നന്മ ചെയ്തിരിക്കുന്നു.

     ⁸ നീ എന്റെ പ്രാണനെ മരണത്തിൽനിന്നും

     എന്റെ കണ്ണിനെ കണ്ണുനീരിൽനിന്നും

     എന്റെ കാലിനെ വീഴ്ചയിൽനിന്നും രക്ഷിച്ചിരിക്കുന്നു.

     ⁹ ഞാൻ ജീവനുള്ളവരുടെ ദേശത്ത്

     യഹോവയുടെ മുമ്പാകെ നടക്കും.

     ¹⁰ “ഞാൻ വലിയ കഷ്ടതയിൽ ആയി”

     എന്ന് പറഞ്ഞത് ഞാൻ അത് വിശ്വസിച്ചതുകൊണ്ടാണ്.

     ¹¹ “സകലമനുഷ്യരും ഭോഷ്ക്കു പറയുന്നു”

     എന്ന് ഞാൻ എന്റെ പരിഭ്രമത്തിൽ പറഞ്ഞു.

     ¹² യഹോവ എനിക്കു ചെയ്ത സകല ഉപകാരങ്ങൾക്കും

     ഞാൻ അവന് എന്ത് പകരം കൊടുക്കും?

     ¹³ ഞാൻ രക്ഷയുടെ പാനപാത്രം എടുത്ത് യഹോവയുടെ നാമം വിളിച്ചപേക്ഷിക്കും.

     ¹⁴ യഹോവയ്ക്ക് ഞാൻ എന്റെ നേർച്ചകൾ അവന്റെ സകലജനവും കാൺകെ കഴിക്കും.

     ¹⁵ തന്റെ ഭക്തന്മാരുടെ മരണം

     യഹോവയ്ക്കു വിലയേറിയതാകുന്നു.

     ¹⁶ യഹോവേ, ഞാൻ നിന്റെ ദാസൻ ആകുന്നു;

     നിന്റെ ദാസനും നിന്റെ ദാസിയുടെ മകനും തന്നെ;

     നീ എന്റെ ബന്ധനങ്ങൾ അഴിച്ചിരിക്കുന്നു.

     ¹⁷ ഞാൻ നിനക്ക് സ്തോത്രയാഗം അർപ്പിച്ച്

     യഹോവയുടെ നാമം വിളിച്ചപേക്ഷിക്കും.

     ¹⁸ യഹോവയുടെ ആലയത്തിന്റെ പ്രാകാരങ്ങളിലും

     യെരൂശലേമേ, നിന്റെ നടുവിലും

     ¹⁹ ഞാൻ യഹോവയ്ക്ക് എന്റെ നേർച്ചകൾ അവന്റെ സകലജനവും കാൺകെ കഴിക്കും.

     യഹോവയെ സ്തുതിക്കുവിൻ.

സങ്കീർത്തനം.116 117

     ¹ സകല ജനതതികളുമേ, യഹോവയെ സ്തുതിക്കുവിൻ;

     സകല വംശങ്ങളുമേ, അവനെ പുകഴ്ത്തുവിൻ.

     ² നമ്മളോടുള്ള അവന്റെ ദയ വലിയതായിരിക്കുന്നു;

     യഹോവയുടെ വിശ്വസ്തത എന്നേക്കും ഉള്ളത്.

     യഹോവയെ സ്തുതിക്കുവിൻ.

സങ്കീർത്തനം.117 118

     ¹ യഹോവയ്ക്ക് സ്തോത്രം ചെയ്യുവിൻ; അവൻ നല്ലവനല്ലയോ;

     അവന്റെ ദയ എന്നേക്കുമുള്ളത്.

     ² അവന്റെ ദയ എന്നേക്കുമുള്ളത്

     എന്ന് യിസ്രായേൽ പറയട്ടെ.

     ³ അവന്റെ ദയ എന്നേക്കുമുള്ളത്

     എന്ന് അഹരോൻഗൃഹം പറയട്ടെ.

     ⁴ അവന്റെ ദയ എന്നേക്കുമുള്ളത്

     എന്ന് യഹോവാഭക്തർ പറയട്ടെ.

     ⁵ ഞെരുക്കത്തിൽ ഞാൻ യഹോവയെ വിളിച്ചപേക്ഷിച്ചു,

     യഹോവ ഉത്തരമരുളി എന്നെ വിശാലസ്ഥലത്താക്കി.

     ⁶ യഹോവ എന്റെ പക്ഷത്തുണ്ട്; ഞാൻ ഭയപ്പെടുകയില്ല;

     മനുഷ്യൻ എന്നോട് എന്തു ചെയ്യും?

     ⁷ എന്നെ സഹായിക്കുവാനായി യഹോവ എന്റെ പക്ഷത്തുണ്ട്;

     എന്റെ ശത്രുക്കൾ പരാജയപ്പെടുന്നതു ഞാൻ കാണും.

     ⁸ മനുഷ്യനിൽ ആശ്രയിക്കുന്നതിനേക്കാൾ

     യഹോവയിൽ ആശ്രയിക്കുന്നത് നല്ലത്.

     ⁹ പ്രഭുക്കന്മാരിൽ ആശ്രയിക്കുന്നതിനേക്കാൾ

     യഹോവയിൽ ആശ്രയിക്കുന്നത് നല്ലത്.

     ¹⁰ സകലജനതകളും എന്നെ ചുറ്റിവളഞ്ഞു;

     യഹോവയുടെ നാമത്തിൽ ഞാൻ അവരെ ഛേദിച്ചുകളയും.

     ¹¹ അവർ എന്നെ വളഞ്ഞു; അതേ, അവർ എന്നെ വളഞ്ഞു;

     യഹോവയുടെ നാമത്തിൽ ഞാൻ അവരെ ഛേദിച്ചുകളയും.

     ¹² അവർ തേനീച്ചപോലെ എന്നെ പൊതിഞ്ഞു;

     മുൾതീപോലെ അവർ കെട്ടുപോയി;

     യഹോവയുടെ നാമത്തിൽ ഞാൻ അവരെ ഛേദിച്ചുകളയും.

     ¹³ ഞാൻ വീഴുവാൻ തക്കവണ്ണം നീ എന്നെ തള്ളി;

     എങ്കിലും യഹോവ എന്നെ സഹായിച്ചു.

     ¹⁴ യഹോവ എന്റെ ബലവും എന്റെ കീർത്തനവും ആകുന്നു;

     അവൻ എനിക്ക് രക്ഷയായും തീർന്നു.

     ¹⁵ ഉല്ലാസത്തിന്റെയും ജയത്തിന്റെയും ഘോഷം നീതിമാന്മാരുടെ കൂടാരങ്ങളിൽ ഉണ്ട്;

     യഹോവയുടെ വലങ്കൈ വീര്യം പ്രവർത്തിക്കുന്നു.

     ¹⁶ യഹോവയുടെ വലങ്കൈ ഉയർന്നിരിക്കുന്നു;

     യഹോവയുടെ വലങ്കൈ വീര്യം പ്രവർത്തിക്കുന്നു.

     ¹⁷ ഞാൻ മരിക്കുകയില്ല; ഞാൻ ജീവനോടെയിരുന്ന് യഹോവയുടെ പ്രവൃത്തികൾ വർണ്ണിക്കും.

     ¹⁸ യഹോവ എന്നെ കഠിനമായി ശിക്ഷിച്ചു;

     എങ്കിലും അവൻ എന്നെ മരണത്തിന് ഏല്പിച്ചിട്ടില്ല.

     ¹⁹ നീതിയുടെ വാതിലുകൾ എനിക്ക് തുറന്നു തരുവിൻ;

     ഞാൻ അവയിൽകൂടി കടന്ന് യഹോവയ്ക്കു സ്തോത്രം ചെയ്യും.

     ²⁰ യഹോവയുടെ വാതിൽ ഇതു തന്നെ;

     നീതിമാന്മാർ അതിൽകൂടി കടക്കും.

     ²¹ നീ എനിക്ക് ഉത്തരമരുളി എന്റെ രക്ഷയായി തീർന്നിരിക്കുകയാൽ

     ഞാൻ നിനക്കു സ്തോത്രം ചെയ്യും.

     ²² വീടുപണിയുന്നവർ തള്ളിക്കളഞ്ഞ കല്ല് മൂലക്കല്ലായി തീർന്നിരിക്കുന്നു.

     ²³ ഇത് യഹോവയാൽ സംഭവിച്ചു

     നമ്മുടെ ദൃഷ്ടിയിൽ ആശ്ചര്യം ആയിരിക്കുന്നു.

     ²⁴ ഇത് യഹോവ ഉണ്ടാക്കിയ ദിവസം;

     ഇന്ന് നാം സന്തോഷിച്ച് ആനന്ദിക്കുക.

     ²⁵ യഹോവേ, ഞങ്ങളെ രക്ഷിക്കണമേ;

     യഹോവേ, ഞങ്ങൾക്ക് ജയം നല്കണമേ.

     ²⁶ യഹോവയുടെ നാമത്തിൽ വരുന്നവൻ വാഴ്ത്തപ്പെട്ടവൻ;

     ഞങ്ങൾ യഹോവയുടെ ആലയത്തിൽനിന്ന് നിങ്ങളെ അനുഗ്രഹിക്കുന്നു.

     ²⁷ യഹോവ തന്നെ ദൈവം; അവൻ നമുക്ക് പ്രകാശം തന്നിരിക്കുന്നു;

     യാഗപീഠത്തിന്റെ കൊമ്പുകളിൽ

     യാഗമൃഗത്തെ കയറുകൊണ്ട് കെട്ടുവിൻ.

     ²⁸ നീ എന്റെ ദൈവമാകുന്നു; ഞാൻ നിനക്കു സ്തോത്രം ചെയ്യും;

     നീ എന്റെ ദൈവമാകുന്നു; ഞാൻ നിന്നെ പുകഴ്ത്തും.

     ²⁹ യഹോവയ്ക്കു സ്തോത്രം ചെയ്യുവിൻ;

     അവൻ നല്ലവനല്ലയോ; അവന്റെ ദയ എന്നേക്കും ഉള്ളതാകുന്നു.

സങ്കീർത്തനം.118 119

ആലേഫ്.

     ¹ യഹോവയുടെ ന്യായപ്രമാണം അനുസരിച്ച്

     നടപ്പിൽ നിഷ്കളങ്കരായവർ ഭാഗ്യവാന്മാർ.

     ² അവന്റെ സാക്ഷ്യങ്ങൾ പ്രമാണിച്ച്

     പൂർണ്ണഹൃദയത്തോടെ അവനെ അന്വേഷിക്കുന്നവർ ഭാഗ്യവാന്മാർ.

     ³ അവർ നീതികേടു പ്രവർത്തിക്കാതെ

     അവന്റെ വഴികളിൽതന്നെ നടക്കുന്നു.

     ⁴ നിന്റെ പ്രമാണങ്ങൾ കൃത്യമായി ആചരിക്കേണ്ടതിന്

     നീ അവ കല്പിച്ചുതന്നിരിക്കുന്നു.

     ⁵ നിന്റെ ചട്ടങ്ങൾ ആചരിക്കേണ്ടതിന്

     എന്റെ നടപ്പ് സ്ഥിരതയുള്ളതായെങ്കിൽ കൊള്ളാമായിരുന്നു.

     ⁶ നിന്റെ സകലകല്പനകളും ശ്രദ്ധിക്കുന്ന കാലത്തോളം

     ഞാൻ ലജ്ജിച്ചുപോകുകയില്ല.

     ⁷ നിന്റെ നീതിയുള്ള വിധികൾ പഠിച്ചിട്ട്

     ഞാൻ പരമാർത്ഥഹൃദയത്തോടെ നിനക്കു സ്തോത്രം ചെയ്യും.

     ⁸ ഞാൻ നിന്റെ ചട്ടങ്ങൾ ആചരിക്കും;

     എന്നെ അശേഷം ഉപേക്ഷിക്കരുതേ.

ബേത്ത്.

     ⁹ ഒരു ബാലൻ തന്റെ നടപ്പ് നിർമ്മലമായി സൂക്ഷിക്കുന്നത് എങ്ങനെ?

     നിന്റെ വചനപ്രകാരം തന്റെ നടപ്പ് ശ്രദ്ധിക്കുന്നതിനാൽ തന്നെ.

     ¹⁰ ഞാൻ പൂർണ്ണഹൃദയത്തോടെ നിന്നെ അന്വേഷിക്കുന്നു;

     നിന്റെ കല്പനകൾ വിട്ടുനടക്കുവാൻ എനിക്ക് ഇടവരരുതേ.

     ¹¹ ഞാൻ നിന്നോട് പാപം ചെയ്യാതിരിക്കേണ്ടതിന്

     നിന്റെ വചനം എന്റെ ഹൃദയത്തിൽ സംഗ്രഹിക്കുന്നു.

     ¹² യഹോവേ, നീ വാഴ്ത്തപ്പെട്ടവൻ;

     നിന്റെ ചട്ടങ്ങൾ എനിക്ക് ഉപദേശിച്ചു തരണമേ.

     ¹³ ഞാൻ എന്റെ അധരങ്ങൾകൊണ്ട്

     നിന്റെ വായിൽ നിന്നുള്ള വിധികളെ ഒക്കെയും വർണ്ണിക്കുന്നു.

     ¹⁴ ഞാൻ സർവ്വസമ്പത്തിലും എന്നപോലെ

     നിന്റെ സാക്ഷ്യങ്ങളുടെ വഴിയിൽ ആനന്ദിക്കുന്നു.

     ¹⁵ ഞാൻ നിന്റെ പ്രമാണങ്ങൾ ധ്യാനിക്കുകയും

     നിന്റെ വഴികളെ ശ്രദ്ധിച്ചുനോക്കുകയും ചെയ്യുന്നു.

     ¹⁶ ഞാൻ നിന്റെ ചട്ടങ്ങളിൽ പ്രമോദിക്കും;

     നിന്റെ വചനം മറക്കുകയുമില്ല.

ഗീമെൽ.

     ¹⁷ ജീവിച്ചിരുന്ന് നിന്റെ വചനം പ്രമാണിക്കേണ്ടതിന് അടിയന് നന്മ ചെയ്യണമേ.

     ¹⁸ നിന്റെ ന്യായപ്രമാണത്തിലെ അത്ഭുതകാര്യങ്ങൾ കാണേണ്ടതിന്

     എന്റെ കണ്ണുകളെ തുറക്കേണമേ.

     ¹⁹ ഞാൻ ഭൂമിയിൽ പരദേശിയാകുന്നു;

     നിന്റെ കല്പനകൾ എനിക്ക് മറച്ചുവയ്ക്കരുതേ.

     ²⁰ നിന്റെ വിധികൾക്കുവേണ്ടിയുള്ള നിരന്തരവാഞ്ഛകൊണ്ട്

     എന്റെ മനസ്സു തകർന്നിരിക്കുന്നു.

     ²¹ നിന്റെ കല്പനകൾ വിട്ട് തെറ്റി നടക്കുന്നവരായ

     ശപിക്കപ്പെട്ട അഹങ്കാരികളെ നീ ഭർസിക്കുന്നു.

     ²² നിന്ദയും അപമാനവും എന്നോട് അകറ്റണമേ;

     ഞാൻ നിന്റെ സാക്ഷ്യങ്ങൾ പ്രമാണിക്കുന്നു.

     ²³ പ്രഭുക്കന്മാരും കൂടിയിരുന്ന് എനിക്കു വിരോധമായി സംസാരിക്കുന്നു;

     എങ്കിലും അടിയൻ നിന്റെ ചട്ടങ്ങളെ ധ്യാനിക്കുന്നു.

     ²⁴ നിന്റെ സാക്ഷ്യങ്ങൾ എന്റെ പ്രമോദവും

     എന്റെ ആലോചനക്കാരും ആകുന്നു.

ദാലെത്ത്.

     ²⁵ എന്റെ പ്രാണൻ പൊടിയോടു പറ്റിയിരിക്കുന്നു;

     തിരുവചനപ്രകാരം എന്നെ ജീവിപ്പിക്കണമേ.

     ²⁶ എന്റെ വഴികളെ ഞാൻ വിവരിച്ചപ്പോൾ നീ എനിക്ക് ഉത്തരമരുളി;

     നിന്റെ ചട്ടങ്ങൾ എനിക്ക് ഉപദേശിച്ചുതരണമേ.

     ²⁷ നിന്റെ പ്രമാണങ്ങളുടെ വഴി എന്നെ ഗ്രഹിപ്പിക്കണമേ;

     എന്നാൽ ഞാൻ നിന്റെ അത്ഭുതങ്ങളെ ധ്യാനിക്കും.

     ²⁸ എന്റെ പ്രാണൻ വിഷാദംകൊണ്ട് ഉരുകുന്നു;

     നിന്റെ വചനപ്രകാരം എന്നെ ശക്തീകരിക്കണമേ.

     ²⁹ ഭോഷ്കിന്റെ വഴി എന്നോട് അകറ്റണമേ;

     നിന്റെ ന്യായപ്രമാണം എനിക്ക് കൃപയോടെ നല്കണമേ.

     ³⁰ വിശ്വസ്തതയുടെ മാർഗ്ഗം ഞാൻ തിരഞ്ഞെടുത്തിരിക്കുന്നു;

     നിന്റെ വിധികൾ എന്റെ മുമ്പിൽ വച്ചിരിക്കുന്നു.

     ³¹ ഞാൻ നിന്റെ സാക്ഷ്യങ്ങളോടു പറ്റിയിരിക്കുന്നു;

     യഹോവേ, എന്നെ ലജ്ജിപ്പിക്കരുതേ.

     ³² നീ എന്റെ ഹൃദയത്തെ വിശാലമാക്കുമ്പോൾ

     ഞാൻ നിന്റെ കല്പനകളുടെ വഴിയിൽ ഓടും.

ഹേ.

     ³³ യഹോവേ, നിന്റെ ചട്ടങ്ങളുടെ വഴി എന്നെ ഉപദേശിക്കണമേ;

     ഞാൻ അത് അവസാനത്തോളം പ്രമാണിക്കും.

     ³⁴ ഞാൻ നിന്റെ ന്യായപ്രമാണം കാക്കേണ്ടതിനും

     അത് പൂർണ്ണഹൃദയത്തോടെ പ്രമാണിക്കേണ്ടതിനും എനിക്ക് ബുദ്ധി നല്കണമേ.

     ³⁵ നിന്റെ കല്പനകളുടെ പാതയിൽ എന്നെ നടത്തണമേ;

     ഞാൻ അത് ഇഷ്ടപ്പെടുന്നുവല്ലോ.

     ³⁶ ദുരാദായത്തിലേക്കല്ല, നിന്റെ സാക്ഷ്യങ്ങളിലേക്കു തന്നെ

     എന്റെ ഹൃദയം ചായുമാറാക്കണമേ.

     ³⁷ വ്യാജത്തിലേക്കു നോക്കാതെ എന്റെ കണ്ണുകൾ തിരിച്ച്

     നിന്റെ വഴികളിൽ എന്നെ ജീവിപ്പിക്കണമേ.

     ³⁸ നിന്നോടുള്ള ഭക്തി വർദ്ധിപ്പിക്കുന്ന

     നിന്റെ വചനം അടിയന് ഉറപ്പിച്ചുതരണമേ.

     ³⁹ ഞാൻ പേടിക്കുന്ന നിന്ദ എന്നോട് അകറ്റിക്കളയണമേ;

     നിന്റെ വിധികൾ നല്ലവയല്ലയോ?.

     ⁴⁰ ഇതാ, ഞാൻ നിന്റെ പ്രമാണങ്ങളെ വാഞ്ഛിക്കുന്നു;

     നിന്റെ നീതിയാൽ എന്നെ ജീവിപ്പിക്കണമേ.

വൗ.

     ⁴¹ യഹോവേ, നിന്റെ വചനപ്രകാരം നിന്റെ ദയയും

     നിന്റെ രക്ഷയും എന്നിലേക്ക് വരുമാറാകട്ടെ.

     ⁴² ഞാൻ നിന്റെ വചനത്തിൽ ആശ്രയിക്കുന്നതുകൊണ്ട്

     എന്നെ നിന്ദിക്കുന്നവനോട് ഉത്തരം പറയുവാൻ ഞാൻ പ്രാപ്തനാകും.

     ⁴³ ഞാൻ നിന്റെ വിധികൾക്കായി കാത്തിരിക്കുകയാൽ

     സത്യത്തിന്റെ വചനം എന്റെ വായിൽ നിന്ന് നീക്കിക്കളയരുതേ.

     ⁴⁴ അങ്ങനെ ഞാൻ നിന്റെ ന്യായപ്രമാണം

     ഇടവിടാതെ എന്നേക്കും പ്രമാണിക്കും.

     ⁴⁵ നിന്റെ പ്രമാണങ്ങൾ ആരായുന്നതുകൊണ്ട്

     ഞാൻ വിശാലതയിൽ നടക്കും.

     ⁴⁶ ഞാൻ ലജ്ജിക്കാതെ രാജാക്കന്മാരുടെ മുമ്പിലും

     നിന്റെ സാക്ഷ്യങ്ങളെക്കുറിച്ചു സംസാരിക്കും.

     ⁴⁷ ഞാൻ നിന്റെ കല്പനകളിൽ പ്രമോദിക്കുന്നു;

     അവ എനിക്ക് പ്രിയമായിരിക്കുന്നു.

     ⁴⁸ എനിക്കു പ്രിയമായിരിക്കുന്ന നിന്റെ കല്പനകളിലേക്ക് ഞാൻ കൈകൾ ഉയർത്തുന്നു;

     നിന്റെ ചട്ടങ്ങൾ ഞാൻ ധ്യാനിക്കുന്നു.

സയിൻ.

     ⁴⁹ എനിക്ക് പ്രത്യാശ നൽകുവാൻ കാരണമായ

     അടിയനോടുള്ള നിന്റെ വചനത്തെ ഓർക്കണമേ.

     ⁵⁰ നിന്റെ വചനം എന്നെ ജീവിപ്പിച്ചിരിക്കുന്നത്

     എന്റെ കഷ്ടതയിൽ എനിക്ക് ആശ്വാസമാകുന്നു.

     ⁵¹ അഹങ്കാരികൾ എന്നെ അത്യന്തം പരിഹസിച്ചു;

     എന്നാൽ ഞാൻ നിന്റെ ന്യായപ്രമാണം വിട്ടുമാറിയിട്ടില്ല.

     ⁵² യഹോവേ, പുരാതനമായ നിന്റെ വിധികൾ ഓർത്ത്

     ഞാൻ എന്നെത്തന്നെ ആശ്വസിപ്പിക്കുന്നു.

     ⁵³ നിന്റെ ന്യായപ്രമാണം ഉപേക്ഷിക്കുന്ന ദുഷ്ടന്മാർനിമിത്തം

     എനിക്ക് ഉഗ്രകോപം പിടിച്ചിരിക്കുന്നു.

     ⁵⁴ ഞാൻ പരദേശിയായി പാർക്കുന്ന വീട്ടിൽ നിന്റെ ചട്ടങ്ങൾ എന്റെ കീർത്തനം ആകുന്നു.

     ⁵⁵ യഹോവേ, രാത്രിയിൽ ഞാൻ തിരുനാമം ഓർക്കുന്നു;

     നിന്റെ ന്യായപ്രമാണം ഞാൻ ആചരിക്കുന്നു.

     ⁵⁶ നിന്റെ പ്രമാണങ്ങൾ അനുസരിക്കുന്നത്

     എനിക്ക് അനുഗ്രഹമായിരിക്കുന്നു.

ഹേത്ത്.

     ⁵⁷ യഹോവേ, നീ എന്റെ ഓഹരിയാകുന്നു;

     ഞാൻ നിന്റെ വചനങ്ങൾ പ്രമാണിക്കും എന്നു ഞാൻ പറഞ്ഞു.

     ⁵⁸ പൂർണ്ണഹൃദയത്തോടെ ഞാൻ നിന്റെ കൃപയ്ക്കായി അപേക്ഷിക്കുന്നു;

     നിന്റെ വാഗ്ദാനപ്രകാരം എന്നോടു കൃപയുണ്ടാകണമേ.

     ⁵⁹ ഞാൻ എന്റെ വഴികളെക്കുറിച്ച് ചിന്തിച്ച്,

     എന്റെ കാലുകൾ നിന്റെ സാക്ഷ്യങ്ങളിലേക്കു തിരിക്കുന്നു.

     ⁶⁰ നിന്റെ കല്പനകൾ പ്രമാണിക്കുവാൻ

     ഞാൻ ഒട്ടും വൈകാതെ ബദ്ധപ്പെടുന്നു;

     ⁶¹ ദുഷ്ടന്മാരുടെ കയറുകൾ എന്നെ ചുറ്റിയിരിക്കുന്നു;

     എങ്കിലും ഞാൻ നിന്റെ ന്യായപ്രമാണം മറക്കുന്നില്ല.

     ⁶² നിന്റെ നീതിയുള്ള ന്യായവിധികൾ നിമിത്തം

     നിനക്കു സ്തോത്രം ചെയ്യുവാൻ ഞാൻ അർദ്ധരാത്രിയിൽ എഴുന്നേല്ക്കും.

     ⁶³ നിന്നെ ഭയപ്പെടുകയും നിന്റെ പ്രമാണങ്ങൾ അനുസരിക്കുകയും

     ചെയ്യുന്ന എല്ലാവർക്കും ഞാൻ സ്നേഹിതനാകുന്നു.

     ⁶⁴ യഹോവേ, ഭൂമി നിന്റെ ദയകൊണ്ടു നിറഞ്ഞിരിക്കുന്നു;

     നിന്റെ ചട്ടങ്ങൾ എനിക്ക് ഉപദേശിച്ചു തരണമേ.

തേത്ത്.

     ⁶⁵ യഹോവേ, തിരുവചനപ്രകാരം

     നീ അടിയന് നന്മ ചെയ്തിരിക്കുന്നു.

     ⁶⁶ നിന്റെ കല്പനകൾ ഞാൻ വിശ്വസിച്ചിരിക്കുകയാൽ

     എനിക്കു നല്ലബുദ്ധിയും പരിജ്ഞാനവും ഉപദേശിച്ചുതരണമേ.

     ⁶⁷ കഷ്ടതയിൽ ആകുന്നതിനു മുമ്പ് ഞാൻ തെറ്റിപ്പോയി;

     ഇപ്പോൾ ഞാൻ നിന്റെ വചനം പ്രമാണിക്കുന്നു.

     ⁶⁸ നീ നല്ലവനും നന്മ ചെയ്യുന്നവനും ആകുന്നു;

     നിന്റെ ചട്ടങ്ങൾ എനിക്ക് ഉപദേശിച്ചുതരണമേ.

     ⁶⁹ അഹങ്കാരികൾ എന്നെക്കുറിച്ച് നുണ പറഞ്ഞുണ്ടാക്കി;

     ഞാൻ പൂർണ്ണഹൃദയത്തോടെ നിന്റെ പ്രമാണങ്ങൾ അനുസരിക്കും.

     ⁷⁰ അവരുടെ ഹൃദയം കൊഴുപ്പുപോലെ തടിച്ചിരിക്കുന്നു;

     ഞാൻ നിന്റെ ന്യായപ്രമാണത്തിൽ രസിക്കുന്നു.

     ⁷¹ നിന്റെ ചട്ടങ്ങൾ പഠിക്കുവാൻ തക്കവണ്ണം

     ഞാൻ കഷ്ടതയിൽ ആയിരുന്നത് എനിക്കു ഗുണമായി.

     ⁷² ആയിരം ആയിരം പൊൻവെള്ളി നാണ്യങ്ങളെക്കാൾ

     നിന്റെ വായിൽനിന്നുള്ള ന്യായപ്രമാണം എനിക്കുത്തമം.

യോദ്.

     ⁷³ തൃക്കൈകൾ എന്നെ സൃഷ്ടിക്കുകയും രൂപപ്പെടുത്തുകയും ചെയ്തിരിക്കുന്നു;

     നിന്റെ കല്പനകൾ പഠിക്കുവാൻ എനിക്കു ബുദ്ധി നല്കണമേ.

     ⁷⁴ തിരുവചനത്തിൽ ഞാൻ പ്രത്യാശ വച്ചിരിക്കുകയാൽ

     നിന്റെ ഭക്തന്മാർ എന്നെ കണ്ട് സന്തോഷിക്കുന്നു.

     ⁷⁵ യഹോവേ, നിന്റെ വിധികൾ നീതിയുള്ളവയെന്നും

     വിശ്വസ്തതയോടെ നീ എന്നെ താഴ്ത്തിയിരിക്കുന്നു എന്നും ഞാൻ അറിയുന്നു.

     ⁷⁶ അടിയനോടുള്ള നിന്റെ വാഗ്ദാനപ്രകാരം

     നിന്റെ ദയ എന്നെ ആശ്വസിപ്പിക്കട്ടെ .

     ⁷⁷ ഞാൻ ജീവിച്ചിരിക്കേണ്ടതിന് എന്നോട് കരുണ തോന്നണമേ;

     നിന്റെ ന്യായപ്രമാണത്തിൽ ഞാൻ പ്രമോദിക്കുന്നു.

     ⁷⁸ കാരണം കൂടാതെ എന്നെ വെറുതെ ഉപദ്രവിക്കുന്ന അഹങ്കാരികൾ ലജ്ജിച്ചുപോകട്ടെ;

     ഞാൻ നിന്റെ കല്പനകൾ ധ്യാനിക്കുന്നു.

     ⁷⁹ നിന്റെ ഭക്തന്മാരും നിന്റെ സാക്ഷ്യങ്ങൾ അറിയുന്നവരും

     എന്റെ അടുക്കൽ വരട്ടെ.

     ⁸⁰ ഞാൻ ലജ്ജിച്ചു പോകാതിരിക്കേണ്ടതിന്

     എന്റെ ഹൃദയം നിന്റെ ചട്ടങ്ങളിൽ നിഷ്കളങ്കമായിരിക്കട്ടെ.

കഫ്.

     ⁸¹ ഞാൻ നിന്റെ രക്ഷയ്ക്കായി കാത്തിരുന്ന് തളർന്നുപോകുന്നു;

     നിന്റെ വാഗ്ദാനം ഞാൻ പ്രതീക്ഷിച്ചുകൊണ്ടിരിക്കുന്നു.

     ⁸² എപ്പോൾ നീ എന്നെ ആശ്വസിപ്പിക്കും എന്ന് ചിന്തിച്ച്

     എന്റെ കണ്ണ് നിന്റെ വാഗ്ദാനം കാത്തിരുന്ന് ക്ഷീണിക്കുന്നു.

     ⁸³ ഞാൻ പുകയത്തു വച്ച തോൽതുരുത്തിപോലെ ആകുന്നു.

     എങ്കിലും നിന്റെ ചട്ടങ്ങൾ മറക്കുന്നില്ല.

     ⁸⁴ അടിയന്റെ ജീവകാലം എത്രനാൾ?

     എന്നെ ഉപദ്രവിക്കുന്നവരുടെമേൽ നീ എപ്പോൾ ന്യായവിധി നടത്തും?

     ⁸⁵ നിന്റെ ന്യായപ്രമാണം അനുസരിക്കാത്ത

     അഹങ്കാരികൾ എനിക്കായി കുഴി കുഴിച്ചിരിക്കുന്നു.

     ⁸⁶ നിന്റെ കല്പനകളെല്ലം വിശ്വാസ്യമാകുന്നു;

     അവർ എന്നെ വെറുതെ ഉപദ്രവിക്കുന്നു;

     എന്നെ സഹായിക്കണമേ.

     ⁸⁷ അവർ ഭൂമിയിൽ എന്നെ മിക്കവാറും ഇല്ലാതെയാക്കിയിരിക്കുന്നു;

     നിന്റെ പ്രമാണങ്ങൾ ഞാൻ ഉപേക്ഷിച്ചില്ലതാനും.

     ⁸⁸ നിന്റെ ദയയ്ക്കു തക്കവണ്ണം എന്നെ ജീവിപ്പിക്കണമേ;

     ഞാൻ നിന്റെ വായിൽനിന്നുള്ള സാക്ഷ്യങ്ങൾ പ്രമാണിക്കും.

ലാമെദ്.

     ⁸⁹ യഹോവേ, നിന്റെ വചനം

     സ്വർഗ്ഗത്തിൽ എന്നേക്കും സ്ഥിരമായിരിക്കുന്നു.

     ⁹⁰ നിന്റെ വിശ്വസ്തത തലമുറതലമുറയോളം ഇരിക്കുന്നു;

     നീ ഭൂമിയെ സ്ഥാപിച്ചു, അതു നിലനില്ക്കുന്നു.

     ⁹¹ അവ ഇന്നുവരെ നിന്റെ നിയമപ്രകാരം നിലനില്ക്കുന്നു;

     സർവ്വസൃഷ്ടികളും നിന്റെ ദാസരല്ലോ.

     ⁹² നിന്റെ ന്യായപ്രമാണം എന്റെ പ്രമോദം ആയിരുന്നില്ലെങ്കിൽ

     ഞാൻ എന്റെ കഷ്ടതയിൽ നശിച്ചുപോകുമായിരുന്നു.

     ⁹³ ഞാൻ ഒരുനാളും നിന്റെ പ്രമാണങ്ങൾ മറക്കുകയില്ല;

     അവയാൽ നീ എന്നെ ജീവിപ്പിച്ചിരിക്കുന്നു.

     ⁹⁴ ഞാൻ നിനക്കുള്ളവനത്രെ; എന്നെ രക്ഷിക്കണമേ;

     ഞാൻ നിന്റെ പ്രമാണങ്ങൾ അന്വേഷിക്കുന്നു.

     ⁹⁵ ദുഷ്ടന്മാർ എന്നെ നശിപ്പിക്കുവാൻ കാത്തിരുന്നു;

     എന്നാൽ ഞാൻ നിന്റെ സാക്ഷ്യങ്ങൾ ചിന്തിച്ചുകൊള്ളും.

     ⁹⁶ സകല പൂർണ്ണതയ്ക്കും ഞാൻ ഒരു പര്യവസാനം കണ്ടിരിക്കുന്നു;

     നിന്റെ കല്പനയോ അത്യന്തം വിശാലമായിരിക്കുന്നു.

മേം.

     ⁹⁷ നിന്റെ ന്യായപ്രമാണം എനിക്ക് എത്രയോ പ്രിയം;

     ദിവസം മുഴുവനും അത് എന്റെ ധ്യാനമാകുന്നു.

     ⁹⁸ നിന്റെ കല്പനകൾ എന്നെ എന്റെ ശത്രുക്കളെക്കാൾ ബുദ്ധിമാനാക്കുന്നു;

     അവ എപ്പോഴും എന്റെ പക്കൽ ഉണ്ട്.

     ⁹⁹ നിന്റെ സാക്ഷ്യങ്ങൾ എന്റെ ധ്യാനമായിരിക്കുകകൊണ്ട്

     എന്റെ സകല ഗുരുക്കന്മാരെക്കാളും ഞാൻ വിവേകമുള്ളവനാകുന്നു.

     ¹⁰⁰ നിന്റെ പ്രമാണങ്ങൾ അനുസരിക്കുകയാൽ

     ഞാൻ വൃദ്ധന്മാരിലും വിവേകമുള്ളവനാകുന്നു.

     ¹⁰¹ നിന്റെ വചനം പ്രമാണിക്കേണ്ടതിന്

     ഞാൻ സകല ദുർമാർഗ്ഗത്തിൽനിന്നും കാലുകളെ വിലക്കുന്നു.

     ¹⁰² നീ എന്നെ ഉപദേശിച്ചിരിക്കുകയാൽ

     ഞാൻ നിന്റെ വിധികൾ വിട്ടുമാറിയിട്ടില്ല.

     ¹⁰³ തിരുവചനം എന്റെ നാവിന് എത്ര മധുരം!

     അവ എന്റെ വായ്ക്ക് തേനിലും നല്ലത്.

     ¹⁰⁴ നിന്റെ പ്രമാണങ്ങളാൽ ഞാൻ വിവേകമുള്ളവനാകുന്നു.

     അതുകൊണ്ട് ഞാൻ സകലവ്യാജമാർഗ്ഗവും വെറുക്കുന്നു.

നൂൻ.

     ¹⁰⁵ നിന്റെ വചനം എന്റെ കാലിന് ദീപവും

     എന്റെ പാതയ്ക്കു പ്രകാശവും ആകുന്നു.

     ¹⁰⁶ നിന്റെ നീതിയുള്ള വിധികൾ പ്രമാണിക്കുമെന്ന്

     ഞാൻ സത്യം ചെയ്തു; അതു ഞാൻ നിവർത്തിക്കും.

     ¹⁰⁷ ഞാൻ മഹാകഷ്ടത്തിലായിരിക്കുന്നു;

     യഹോവേ, നിന്റെ വാഗ്ദാനപ്രകാരം എന്നെ ജീവിപ്പിക്കണമേ.

     ¹⁰⁸ യഹോവേ, എന്റെ വായുടെ സ്വമേധാദാനങ്ങളിൽ പ്രസാദിക്കണമേ;

     നിന്റെ വിധികൾ എനിക്ക് ഉപദേശിച്ചു തരണമേ.

     ¹⁰⁹ ഞാൻ പ്രാണത്യാഗം ചെയ്യുവാൻ എല്ലായ്പോഴും ഒരുങ്ങിയിരിക്കുന്നു;

     എങ്കിലും നിന്റെ ന്യായപ്രമാണം ഞാൻ മറക്കുന്നില്ല.

     ¹¹⁰ ദുഷ്ടന്മാർ എനിക്കു കെണി വച്ചിരിക്കുന്നു;

     എങ്കിലും ഞാൻ നിന്റെ പ്രമാണങ്ങൾ ഉപേക്ഷിക്കുന്നില്ല.

     ¹¹¹ ഞാൻ നിന്റെ സാക്ഷ്യങ്ങളെ എന്റെ ശാശ്വതാവകാശമാക്കിയിരിക്കുന്നു;

     അവ എന്റെ ഹൃദയത്തിന്റെ ആനന്ദമാകുന്നു.

     ¹¹² നിന്റെ ചട്ടങ്ങളെ ഇടവിടാതെ എന്നേക്കും ആചരിക്കുവാൻ

     ഞാൻ എന്റെ ഹൃദയം ചായിച്ചിരിക്കുന്നു.

സാമെക്.

     ¹¹³ ഇരുമനസ്സുള്ളവരെ ഞാൻ വെറുക്കുന്നു;

     എന്നാൽ നിന്റെ ന്യായപ്രമാണം എനിക്കു പ്രിയമാകുന്നു.

     ¹¹⁴ നീ എന്റെ മറവിടവും എന്റെ പരിചയും ആകുന്നു;

     ഞാൻ തിരുവചനത്തിൽ പ്രത്യാശ വച്ചിരിക്കുന്നു.

     ¹¹⁵ എന്റെ ദൈവത്തിന്റെ കല്പനകൾ ഞാൻ പ്രമാണിക്കേണ്ടതിന്

     ദുഷ്കർമ്മികളേ, എന്നെ വിട്ടു പോകുവിൻ.

     ¹¹⁶ ഞാൻ ജീവിച്ചിരിക്കേണ്ടതിന് നിന്റെ വചനപ്രകാരം എന്നെ താങ്ങണമേ;

     എന്റെ പ്രത്യാശയിൽ ഞാൻ ലജ്ജിച്ചുപോകരുതേ.

     ¹¹⁷ ഞാൻ രക്ഷപെടേണ്ടതിന് എന്നെ താങ്ങണമേ;

     നിന്റെ ചട്ടങ്ങൾ ഞാൻ നിരന്തരം അനുസരിക്കും.

     ¹¹⁸ നിന്റെ ചട്ടങ്ങൾ ഉപേക്ഷിക്കുന്ന സകലരേയും നീ നിരസിക്കുന്നു;

     അവരുടെ വഞ്ചന വ്യർത്ഥമാകുന്നു.

     ¹¹⁹ ഭൂമിയിലെ സകലദുഷ്ടന്മാരെയും നീ മാലിന്യം പോലെ നീക്കിക്കളയുന്നു;

     അതുകൊണ്ട് നിന്റെ സാക്ഷ്യങ്ങൾ എനിക്കു പ്രിയമാകുന്നു.

     ¹²⁰ നിന്നെക്കുറിച്ചുള്ള ഭയം നിമിത്തം എന്റെ ദേഹം വിറയ്ക്കുന്നു;

     നിന്റെ വിധികൾനിമിത്തം ഞാൻ ഭയപ്പെടുന്നു.

അയിൻ.

     ¹²¹ ഞാൻ നീതിയും ന്യായവും പ്രവർത്തിക്കുന്നു;

     എന്റെ പീഡകന്മാർക്ക് എന്നെ ഏല്പിച്ചുകൊടുക്കരുതേ.

     ¹²² അടിയന്റെ നന്മയ്ക്കുവേണ്ടി ഉത്തരവാദി ആയിരിക്കണമേ;

     അഹങ്കാരികൾ എന്നെ പീഡിപ്പിക്കരുതേ.

     ¹²³ എന്റെ കണ്ണ് നിന്റെ രക്ഷയെയും

     നിന്റെ നീതിയുടെ വചനത്തെയും കാത്തിരുന്ന് ക്ഷീണിക്കുന്നു.

     ¹²⁴ നിന്റെ ദയക്കു തക്കവണ്ണം അടിയനോടു പ്രവർത്തിച്ച്,

     നിന്റെ ചട്ടങ്ങൾ എനിക്ക് ഉപദേശിച്ചുതരണമേ.

     ¹²⁵ ഞാൻ നിന്റെ ദാസൻ ആകുന്നു;

     നിന്റെ സാക്ഷ്യങ്ങൾ ഗ്രഹിക്കുവാൻ എനിക്കു ബുദ്ധി നല്കണമേ.

     ¹²⁶ യഹോവേ, ഇത് നിനക്കു പ്രവർത്തിക്കുവാനുള്ള സമയമാകുന്നു;

     അവർ നിന്റെ ന്യായപ്രമാണം ദുർബ്ബലമാക്കിയിരിക്കുന്നു.

     ¹²⁷ അതുകൊണ്ട് നിന്റെ കല്പനകൾ

     എനിക്ക് പൊന്നിലും തങ്കത്തിലും അധികം പ്രിയമാകുന്നു.

     ¹²⁸ അതുകൊണ്ട് നിന്റെ സകലപ്രമാണങ്ങളും സത്യമെന്ന് കരുതി,

     ഞാൻ സകലവ്യാജമാർഗ്ഗങ്ങളും വെറുക്കുന്നു.

പേ.

     ¹²⁹ നിന്റെ സാക്ഷ്യങ്ങൾ അതിശയകരമാകയാൽ

     എന്റെ മനസ്സ് അവ പ്രമാണിക്കുന്നു.

     ¹³⁰ നിന്റെ വചനങ്ങളുടെ പ്രവേശനം പ്രകാശം പ്രദാനം ചെയ്യുന്നു;

     അത് അല്പബുദ്ധികളെ ബുദ്ധിമാന്മാരാക്കുന്നു.

     ¹³¹ നിന്റെ കല്പനകൾക്കായി വാഞ്ഛിക്കുകയാൽ

     ഞാൻ വായ് തുറന്ന് കിതയ്ക്കുന്നു.

     ¹³² തിരുനാമത്തെ സ്നേഹിക്കുന്നവർക്ക് നീ ചെയ്യുന്നതുപോലെ

     എങ്കലേക്കു തിരിഞ്ഞ് എന്നോടു കൃപ ചെയ്യണമേ.

     ¹³³ എന്റെ കാലടികൾ നിന്റെ വചനത്തിൽ സ്ഥിരമാക്കണമേ;

     യാതൊരു നീതികേടും എന്നെ ഭരിക്കരുതേ.

     ¹³⁴ മനുഷ്യന്റെ പീഡനത്തിൽനിന്ന് എന്നെ വിടുവിക്കണമേ;

     എന്നാൽ ഞാൻ നിന്റെ പ്രമാണങ്ങൾ അനുസരിക്കും.

     ¹³⁵ അടിയന്റെമേൽ നിന്റെ മുഖം പ്രകാശിപ്പിച്ച്

     നിന്റെ ചട്ടങ്ങൾ എനിക്ക് ഉപദേശിച്ചു തരണമേ.

     ¹³⁶ അവർ നിന്റെ ന്യായപ്രമാണം അനുസരിക്കാത്തതിനാൽ

     എന്റെ കണ്ണിൽനിന്ന് ജലനദികൾ ഒഴുകുന്നു.

സാദെ.

     ¹³⁷ യഹോവേ, നീ നീതിമാനാകുന്നു;

     നിന്റെ വിധികൾ നേരുള്ളവ തന്നെ.

     ¹³⁸ നീ നീതിയോടും അത്യന്തം വിശ്വസ്തതയോടും കൂടി

     നിന്റെ സാക്ഷ്യങ്ങളെ കല്പിച്ചിരിക്കുന്നു.

     ¹³⁹ എന്റെ വൈരികൾ തിരുവചനങ്ങൾ മറക്കുന്നതുകൊണ്ട്

     എന്റെ എരിവ് എന്നെ സംഹരിക്കുന്നു.

     ¹⁴⁰ നിന്റെ വചനം അത്യന്തം വിശുദ്ധമാകുന്നു;

     അതുകൊണ്ട് അടിയന് അത് പ്രിയമാകുന്നു.

     ¹⁴¹ ഞാൻ എളിയവനും നിന്ദിതനും ആകുന്നു;

     എങ്കിലും ഞാൻ നിന്റെ പ്രമാണങ്ങൾ മറക്കുന്നില്ല.

     ¹⁴² നിന്റെ നീതി ശാശ്വതനീതിയും

     നിന്റെ ന്യായപ്രമാണം സത്യവുമാകുന്നു.

     ¹⁴³ കഷ്ടവും സങ്കടവും എന്നെ പിടിച്ചിരിക്കുന്നു;

     എങ്കിലും നിന്റെ കല്പനകൾ എന്റെ പ്രമോദമാകുന്നു.

     ¹⁴⁴ നിന്റെ സാക്ഷ്യങ്ങൾ എന്നേക്കും നീതിയുള്ളവ;

     ഞാൻ ജീവിച്ചിരിക്കേണ്ടതിന് എനിക്കു ബുദ്ധി നല്കണമേ.

കോഫ്.

     ¹⁴⁵ ഞാൻ പൂർണ്ണഹൃദയത്തോടെ വിളിച്ചപേക്ഷിക്കുന്നു; എനിക്ക് ഉത്തരം അരുളണമേ;

     യഹോവേ, ഞാൻ നിന്റെ ചട്ടങ്ങൾ പ്രമാണിക്കും.

     ¹⁴⁶ ഞാൻ നിന്നെ വിളിച്ചപേക്ഷിക്കുന്നു; എന്നെ രക്ഷിക്കണമേ;

     ഞാൻ നിന്റെ സാക്ഷ്യങ്ങളെ പ്രമാണിക്കും.

     ¹⁴⁷ ഞാൻ ഉദയത്തിനു മുമ്പ് എഴുന്നേറ്റ് പ്രാർത്ഥിക്കുന്നു;

     നിന്റെ വചനത്തിൽ ഞാൻ പ്രത്യാശവയ്ക്കുന്നു.

     ¹⁴⁸ തിരുവചനം ധ്യാനിക്കേണ്ടതിന്

     എന്റെ കണ്ണ് യാമങ്ങളെ നോക്കിക്കൊണ്ടിരിക്കുന്നു.

     ¹⁴⁹ നിന്റെ ദയയ്ക്കു തക്കവണ്ണം എന്റെ അപേക്ഷ കേൾക്കണമേ;

     യഹോവേ, നിന്റെ ന്യായപ്രകാരം എന്നെ ജീവിപ്പിക്കണമേ.

     ¹⁵⁰ ദുഷ്ടതയെ പിന്തുടരുന്നവർ സമീപിച്ചിരിക്കുന്നു;

     നിന്റെ ന്യായപ്രമാണത്തോട് അവർ അകന്നിരിക്കുന്നു.

     ¹⁵¹ യഹോവേ, നീ സമീപസ്ഥനാകുന്നു;

     നിന്റെ കല്പനകൾ സകലവും സത്യം തന്നെ.

     ¹⁵² നിന്റെ സാക്ഷ്യങ്ങൾ നീ എന്നേക്കും സ്ഥാപിച്ചിരിക്കുന്നു

     എന്ന് ഞാൻ പണ്ടുതന്നെ അറിഞ്ഞിരിക്കുന്നു.

രേശ്.

     ¹⁵³ എന്റെ അരിഷ്ടത കടാക്ഷിച്ച് എന്നെ വിടുവിക്കണമേ;

     ഞാൻ നിന്റെ ന്യായപ്രമാണം മറക്കുന്നില്ല.

     ¹⁵⁴ എന്റെ വ്യവഹാരം നടത്തി എന്നെ വീണ്ടെടുക്കണമേ;

     നിന്റെ വാഗ്ദാനപ്രകാരം എന്നെ ജീവിപ്പിക്കണമേ.

     ¹⁵⁵ രക്ഷ ദുഷ്ടന്മാരോട് അകന്നിരിക്കുന്നു;

     അവർ നിന്റെ ചട്ടങ്ങളെ അന്വേഷിക്കുന്നില്ലല്ലോ.

     ¹⁵⁶ യഹോവേ, നിന്റെ കരുണ വലിയതാകുന്നു;

     നിന്റെ ന്യായപ്രകാരം എന്നെ ജീവിപ്പിക്കണമേ.

     ¹⁵⁷ എന്നെ ഉപദ്രവിക്കുന്നവരും എന്റെ വൈരികളും വളരെയാകുന്നു;

     എങ്കിലും ഞാൻ നിന്റെ സാക്ഷ്യങ്ങളെ വിട്ടുമാറുന്നില്ല.

     ¹⁵⁸ ഞാൻ ദ്രോഹികളെ കണ്ട് വ്യസനിച്ചു;

     അവർ നിന്റെ വചനം പ്രമാണിക്കുന്നില്ലല്ലോ.

     ¹⁵⁹ നിന്റെ പ്രമാണങ്ങൾ എനിക്ക് എത്ര പ്രിയം എന്നു കണ്ട്,

     യഹോവേ, നിന്റെ ദയയ്ക്കു തക്കവണ്ണം എന്നെ ജീവിപ്പിക്കണമേ.

     ¹⁶⁰ നിന്റെ വചനത്തിന്റെ സാരം സത്യം തന്നെ;

     നിന്റെ നീതിയുള്ള വിധികൾ എല്ലാം എന്നേക്കുമുള്ളവ.

ശീൻ.

     ¹⁶¹ പ്രഭുക്കന്മാർ വെറുതെ എന്നെ ഉപദ്രവിക്കുന്നു;

     എങ്കിലും നിന്റെ വചനത്തെ എന്റെ ഹൃദയം ഭയപ്പെടുന്നു.

     ¹⁶² വലിയ കൊള്ള കണ്ടെത്തിയവനെപ്പോലെ

     ഞാൻ നിന്റെ വചനത്തിൽ ആനന്ദിക്കുന്നു.

     ¹⁶³ ഞാൻ ഭോഷ്കു വെറുത്ത് അറയ്ക്കുന്നു;

     എന്നാൽ നിന്റെ ന്യായപ്രമാണം എനിക്കു പ്രിയമാകുന്നു.

     ¹⁶⁴ നിന്റെ നീതിയുള്ള വിധികൾനിമിത്തം

     ഞാൻ ദിവസം ഏഴു പ്രാവശ്യം നിന്നെ സ്തുതിക്കുന്നു.

     ¹⁶⁵ നിന്റെ ന്യായപ്രമാണത്തോട് പ്രിയം ഉള്ളവർക്ക് മഹാസമാധാനം ഉണ്ട്;

     അവർ ഒന്നിനാലും ഇടറിപ്പോകുകയില്ല.

     ¹⁶⁶ യഹോവേ, ഞാൻ നിന്റെ രക്ഷയിൽ പ്രത്യാശ വയ്ക്കുന്നു;

     നിന്റെ കല്പനകൾ ഞാൻ ആചരിക്കുന്നു.

     ¹⁶⁷ എന്റെ മനസ്സ് നിന്റെ സാക്ഷ്യങ്ങൾ പ്രമാണിക്കുന്നു;

     അവ എനിക്ക് അത്യന്തം പ്രിയമാകുന്നു.

     ¹⁶⁸ ഞാൻ നിന്റെ പ്രമാണങ്ങളും സാക്ഷ്യങ്ങളും പ്രമാണിക്കുന്നു;

     എന്റെ വഴികളെല്ലാം നിന്റെ മുമ്പാകെ ഇരിക്കുന്നു.

തൗ.

     ¹⁶⁹ യഹോവേ, എന്റെ നിലവിളി തിരുസന്നിധിയിൽ വരുമാറാകട്ടെ;

     നിന്റെ വചനപ്രകാരം എനിക്കു ബുദ്ധി നല്കണമേ.

     ¹⁷⁰ എന്റെ യാചന തിരുസന്നിധിയിൽ വരുമാറാകട്ടെ;

     നിന്റെ വാഗ്ദാനപ്രകാരം എന്നെ വിടുവിക്കണമേ.

     ¹⁷¹ നിന്റെ ചട്ടങ്ങൾ എനിക്ക് ഉപദേശിച്ചുതരുന്നതുകൊണ്ട്

     എന്റെ അധരങ്ങൾ സ്തുതി പൊഴിക്കട്ടെ.

     ¹⁷² നിന്റെ കല്പനകൾ എല്ലാം നീതിയായിരിക്കുകയാൽ

     എന്റെ നാവ് നിന്റെ വാഗ്ദാനത്തെക്കുറിച്ച് പാടട്ടെ.

     ¹⁷³ നിന്റെ കല്പനകളെ ഞാൻ തിരഞ്ഞെടുത്തിരിക്കുകയാൽ

     നിന്റെ കൈ എനിക്കു തുണയായിരിക്കട്ടെ.

     ¹⁷⁴ യഹോവേ, ഞാൻ നിന്റെ രക്ഷയ്ക്കായി വാഞ്ഛിക്കുന്നു;

     നിന്റെ ന്യായപ്രമാണം എന്റെ പ്രമോദം ആകുന്നു.

     ¹⁷⁵ നിന്നെ സ്തുതിക്കേണ്ടതിന് എന്റെ പ്രാണൻ ജീവിച്ചിരിക്കട്ടെ;

     നിന്റെ വിധികൾ എനിക്കു തുണയായിരിക്കട്ടെ.

     ¹⁷⁶ കാണാതെപോയ ആടുപോലെ ഞാൻ തെറ്റിപ്പോയിരിക്കുന്നു;

     അടിയനെ അന്വേഷിക്കണമേ; നിന്റെ കല്പനകൾ ഞാൻ മറക്കുന്നില്ല.

സങ്കീർത്തനം.119 120

     ¹ എന്റെ കഷ്ടതയിൽ ഞാൻ യഹോവയോടു നിലവിളിച്ചു;

     അവൻ എനിക്ക് ഉത്തരം അരുളുകയും ചെയ്തു.

     ² യഹോവേ, വ്യാജമുള്ള അധരങ്ങളിൽനിന്നും

     വഞ്ചനയുള്ള നാവിൽനിന്നും എന്റെ പ്രാണനെ രക്ഷിക്കണമേ.

     ³ വഞ്ചനയുള്ള നാവേ, നിനക്ക് എന്ത് ലഭിക്കും?

     നിന്നോട് ഇനി എന്ത് ചെയ്യും?

     ⁴ വീരന്റെ മൂർച്ചയുള്ള അസ്ത്രങ്ങളും

     പൂവത്തിൻ കനലും തന്നെ.

     ⁵ ഞാൻ മേശെക്കിൽ പ്രവാസം ചെയ്യുന്നതുകൊണ്ടും

     കേദാർകൂടാരങ്ങളിൽ പാർക്കുന്നതുകൊണ്ടും എനിക്ക് അയ്യോ കഷ്ടം!

     ⁶ സമാധാനദ്വേഷിയോടുകൂടി വസിക്കുന്നത്

     എനിക്കു മതിയായി.

     ⁷ ഞാൻ സമാധാനപ്രിയനാകുന്നു;

     എന്നാൽ ഞാൻ സംസാരിക്കുമ്പോൾ അവർ കലശൽ തുടങ്ങുന്നു.

സങ്കീർത്തനം.120 121

     ¹ ഞാൻ എന്റെ കണ്ണുകൾ പർവ്വതങ്ങളിലേക്ക് ഉയർത്തുന്നു;

     എനിക്ക് സഹായം എവിടെനിന്നു വരും?

     ² എന്റെ സഹായം ആകാശത്തെയും ഭൂമിയെയും

     ഉണ്ടാക്കിയ യഹോവയിൽനിന്നു വരുന്നു.

     ³ നിന്റെ കാൽ വഴുതിപ്പോകുവാൻ അവൻ സമ്മതിക്കുകയില്ല;

     നിന്നെ കാക്കുന്നവൻ മയങ്ങുകയുമില്ല.

     ⁴ യിസ്രായേലിന്റെ പരിപാലകൻ

     മയങ്ങുകയില്ല, ഉറങ്ങുകയുമില്ല.

     ⁵ യഹോവ നിന്റെ പരിപാലകൻ;

     യഹോവ നിന്റെ വലത്തുഭാഗത്ത് നിനക്കു തണൽ.

     ⁶ പകൽ സൂര്യനോ

     രാത്രി ചന്ദ്രനോ നിന്നെ ദോഷമായി ബാധിക്കുകയില്ല.

     ⁷ യഹോവ ഒരു ദോഷവും തട്ടാതെ നിന്നെ പരിപാലിക്കും.

     അവൻ നിന്റെ പ്രാണനെ പരിപാലിക്കും.

     ⁸ യഹോവ നിന്റെ ഗമനത്തെയും ആഗമനത്തെയും

     ഇന്നുമുതൽ എന്നേക്കും പരിപാലിക്കും.

സങ്കീർത്തനം.121 122

     ¹ “യഹോവയുടെ ആലയത്തിലേക്ക് നമുക്കു പോകാം” എന്ന്

     അവർ എന്നോടു പറഞ്ഞപ്പോൾ ഞാൻ സന്തോഷിച്ചു.

     ² യെരൂശലേമേ, ഞങ്ങളുടെ കാലുകൾ

     നിന്റെ വാതിലുകളുടെ ഉള്ളിൽ നില്ക്കുന്നു.

     ³ തമ്മിൽ ഇണക്കിയ നഗരമായി

     പണിതിരിക്കുന്ന യെരൂശലേമേ!

     ⁴ അവിടേക്ക്, ഗോത്രങ്ങൾ, യഹോവയുടെ ഗോത്രങ്ങൾ തന്നെ,

     യിസ്രായേലിന് സാക്ഷ്യത്തിനായി

     യഹോവയുടെ നാമത്തിന് സ്തോത്രം ചെയ്യുവാൻ കയറിച്ചെല്ലുന്നു.

     ⁵ അവിടെ ന്യായാസനങ്ങൾ,

     ദാവീദുഗൃഹത്തിന്റെ ന്യായാസനങ്ങൾ തന്നെ ഇരിക്കുന്നു.

     ⁶ യെരൂശലേമിന്റെ സമാധാനത്തിനായി പ്രാർത്ഥിക്കുവിൻ;

     “നിന്നെ സ്നേഹിക്കുന്നവർ സുരക്ഷിതരായിരിക്കട്ടെ.

     ⁷ നിന്റെ കൊത്തളങ്ങളിൽ സമാധാനവും

     നിന്റെ അരമനകളിൽ സ്വൈരവും ഉണ്ടാകട്ടെ.

     ⁸ എന്റെ സഹോദരന്മാരും സ്നേഹിതരും നിമിത്തം

     നിന്നിൽ സമാധാനം ഉണ്ടാകട്ടെ” എന്ന് ഞാൻ പറയും.

     ⁹ നമ്മുടെ ദൈവമായ യഹോവയുടെ ആലയംനിമിത്തം

     ഞാൻ നിന്റെ നന്മ അന്വേഷിക്കും.

സങ്കീർത്തനം.122 123

     ¹ സ്വർഗ്ഗത്തിൽ വസിക്കുന്നവനായ യഹോവേ,

     നിങ്കലേക്ക് ഞാൻ എന്റെ കണ്ണുകൾ ഉയർത്തുന്നു.

     ² ദാസന്മാരുടെ കണ്ണുകൾ യജമാനന്റെ കൈയിലേക്കും

     ദാസിയുടെ കണ്ണുകൾ യജമാനത്തിയുടെ കൈയിലേക്കും എന്നപോലെ

     ഞങ്ങളുടെ കണ്ണുകൾ ഞങ്ങളുടെ ദൈവമായ യഹോവയിങ്കലേക്ക്,

     അവൻ ഞങ്ങളോട് കൃപചെയ്യുവോളം നോക്കിക്കൊണ്ടിരിക്കുന്നു.

     ³ യഹോവേ, ഞങ്ങളോടു കൃപ ചെയ്യണമേ, ഞങ്ങളോടു കൃപ ചെയ്യണമേ;

     ഞങ്ങൾ നിന്ദ സഹിച്ചു മടുത്തിരിക്കുന്നു.

     ⁴ സുഖിമാൻന്മാരുടെ പരിഹാസവും

     അഹങ്കാരികളുടെ നിന്ദയും സഹിച്ച്

     ഞങ്ങളുടെ മനസ് ഏറ്റവും മടുത്തിരിക്കുന്നു.

സങ്കീർത്തനം 123 124

     ¹ യിസ്രായേൽ ഇപ്പോൾ പറയേണ്ടത്

     “യഹോവ നമ്മളുടെ പക്ഷത്തില്ലായിരുന്നുവെങ്കിൽ,

     ² അതേ, യഹോവ നമ്മളുടെ പക്ഷത്തില്ലായിരുന്നുവെങ്കിൽ, മനുഷ്യർ നമ്മളോട് എതിർത്തപ്പോൾ

     ³ അവരുടെ കോപം നമ്മളുടെ നേരെ ജ്വലിച്ചപ്പോൾ,

     അവർ നമ്മളെ ജീവനോടെ വിഴുങ്ങിക്കളയുമായിരുന്നു;

     ⁴ വെള്ളം നമ്മളെ ഒഴുക്കിക്കളയുമായിരുന്നു,

     നദി നമ്മളുടെ പ്രാണനു മീതെ കവിയുമായിരുന്നു;

     ⁵ പ്രളയജലം

     നമ്മളുടെ പ്രാണനു മീതെ കവിയുമായിരുന്നു.

     ⁶ നമ്മളെ അവരുടെ പല്ലുകൾക്ക് ഇരയായി കൊടുക്കായ്കയാൽ

     യഹോവ വാഴ്ത്തപ്പെടുമാറാകട്ടെ.”

     ⁷ വേട്ടക്കാരുടെ കെണിയിൽനിന്ന് രക്ഷപെടുന്ന പക്ഷിയെപ്പോലെ

     നമ്മളുടെ പ്രാണൻ വഴുതിപ്പോന്നിരിക്കുന്നു;

     കെണി പൊട്ടി നാം വഴുതിപ്പോന്നിരിക്കുന്നു.

     ⁸ നമ്മളുടെ സഹായം ആകാശവും ഭൂമിയും

     ഉണ്ടാക്കിയ യഹോവയുടെ നാമത്തിൽ ഇരിക്കുന്നു.

സങ്കീർത്തനം.124 125

     ¹ യഹോവയിൽ ആശ്രയിക്കുന്നവർ കുലുങ്ങാതെ

     എന്നേക്കും നില്ക്കുന്ന സീയോൻ പർവ്വതം പോലെയാകുന്നു.

     ² പർവ്വതങ്ങൾ യെരൂശലേമിനെ ചുറ്റിയിരിക്കുന്നതുപോലെ

     യഹോവ ഇന്നുമുതൽ എന്നേക്കും തന്റെ ജനത്തെ ചുറ്റിയിരിക്കുന്നു.

     ³ നീതിമാന്മാർ നീതികേടിലേക്കു കൈ നീട്ടാതിരിക്കേണ്ടതിന്

     ദുഷ്ടന്മാരുടെ ചെങ്കോൽ നീതിമാന്മാരുടെ അവകാശത്തിന്മേൽ ഇരിക്കുകയില്ല.

     ⁴ യഹോവേ, ഗുണവാന്മാർക്കും

     ഹൃദയപരമാർത്ഥികൾക്കും നന്മ ചെയ്യണമേ.

     ⁵ എന്നാൽ വളഞ്ഞവഴികളിലേക്കു തിരിയുന്നവരെ

     യഹോവ ദുഷ്പ്രവൃത്തിക്കാരോടുകൂടി പോകുമാറാക്കട്ടെ.

     യിസ്രായേലിന്മേൽ സമാധാനം വരുമാറാകട്ടെ.

സങ്കീർത്തനം. 125 126

     ¹ യഹോവ സീയോന്റെ പ്രവാസികളെ മടക്കിവരുത്തിയപ്പോൾ

     ഞങ്ങൾ സ്വപ്നം കാണുന്നവരെപ്പോലെ ആയിരുന്നു.

     ² അന്ന് ഞങ്ങളുടെ വായിൽ ചിരിയും

     ഞങ്ങളുടെ നാവിന്മേൽ ആർപ്പും നിറഞ്ഞിരുന്നു.

     “യഹോവ അവർക്കുവേണ്ടി വൻ കാര്യങ്ങൾ ചെയ്തിരിക്കുന്നു”

     എന്ന് ജനതകളുടെ ഇടയിൽ അന്ന് പറയപ്പെട്ടു.

     ³ യഹോവ ഞങ്ങൾക്കുവേണ്ടി വൻ കാര്യങ്ങൾ ചെയ്തിരിക്കുന്നു;

     അതുകൊണ്ട് ഞങ്ങൾ സന്തോഷിക്കുന്നു.

     ⁴ യഹോവേ, തെക്കെനാട്ടിലെ അരുവികളെപ്പോലെ

     ഞങ്ങളുടെ പ്രവാസികളെ മടക്കിവരുത്തണമേ.

     ⁵ കണ്ണുനീരോടെ വിതയ്ക്കുന്നവർ

     ആർപ്പോടെ കൊയ്യും.

     ⁶ കരഞ്ഞുകൊണ്ട് വിതക്കുവാനുള്ള വിലയേറിയ വിത്ത് ചുമന്ന് നടക്കുന്നവൻ വീണ്ടും

     ആർപ്പോടെ കറ്റ ചുമന്നുകൊണ്ട് വരും, സംശയമില്ല.

സങ്കീർത്തനം.126 127

     ¹ യഹോവ വീടു പണിയാതിരുന്നാൽ

     പണിയുന്നവർ വൃഥാ അദ്ധ്വാനിക്കുന്നു;

     യഹോവ പട്ടണം കാക്കാതിരുന്നാൽ

     കാവല്ക്കാരൻ വൃഥാ ജാഗരിക്കുന്നു.

     ² നിങ്ങൾ അതിരാവിലെ എഴുന്നേല്ക്കുന്നതും

     വളരെ താമസിച്ച് ഉറങ്ങുവാൻ പോകുന്നതും

     കഠിനപ്രയത്നം ചെയ്ത് ഉപജീവനം കഴിക്കുന്നതും വ്യർത്ഥമത്രെ;

     തന്റെ പ്രിയനോ, അവൻ അത് ഉറക്കത്തിൽ കൊടുക്കുന്നു.

     ³ മക്കൾ, യഹോവ നല്കുന്ന അവകാശവും

     ഉദരഫലം, അവൻ തരുന്ന പ്രതിഫലവും തന്നെ.

     ⁴ വീരന്റെ കൈയിലെ അസ്ത്രങ്ങൾ എങ്ങനെയോ

     അങ്ങനെയാകുന്നു യൗവനത്തിലെ മക്കൾ.

     ⁵ അവരെക്കൊണ്ട് തന്റെ ആവനാഴിക

     നിറച്ചിരിക്കുന്ന പുരുഷൻ ഭാഗ്യവാൻ;

     നഗരവാതില്ക്കൽവച്ച് ശത്രുക്കളോടു സംസാരിക്കുമ്പോൾ

     അങ്ങനെയുള്ളവർ ലജ്ജിച്ചുപോകുകയില്ല.

സങ്കീർത്തനം.127 128

     ¹ യഹോവയെ ഭയപ്പെട്ട്, അവന്റെ വഴികളിൽ നടക്കുന്ന ഏവനും ഭാഗ്യവാൻ;

     ² നിന്റെ കൈകളുടെ അദ്ധ്വാനഫലം നീ തിന്നും;

     നീ ഭാഗ്യവാൻ; നിനക്കു നന്മ വരും.

     ³ നിന്റെ ഭാര്യ നിന്റെ വീടിനകത്ത് ഫലപ്രദമായ മുന്തിരിവള്ളി പോലെയും

     നിന്റെ മക്കൾ നിന്റെ മേശയ്ക്കു ചുറ്റും ഒലിവുതൈകൾ പോലെയും ഇരിക്കും.

     ⁴ യഹോവാഭക്തനായ പുരുഷൻ ഇങ്ങനെ അനുഗ്രഹിക്കപ്പെട്ടവനാകും.

     ⁵ യഹോവ സീയോനിൽനിന്ന് നിന്നെ അനുഗ്രഹിക്കും;

     നിന്റെ ആയുഷ്കാലമെല്ലാം നീ യെരൂശലേമിന്റെ നന്മ കാണും.

     ⁶ നിന്റെ മക്കളുടെ മക്കളെയും നീ കാണും.

     യിസ്രായേലിന്മേൽ സമാധാനം ഉണ്ടാകട്ടെ.

സങ്കീർത്തനം.128 129

     ¹ യിസ്രായേൽ പറയേണ്ടത്:

     “അവർ എന്റെ ബാല്യംമുതൽ പലപ്പോഴും എന്നെ ഉപദ്രവിച്ചു;

     ² അതെ,അവർ എന്റെ ബാല്യംമുതൽ പലപ്പോഴും എന്നെ ഉപദ്രവിച്ചു;

     എങ്കിലും അവർ എന്നെ ജയിച്ചില്ല.

     ³ ഉഴവുകാർ എന്റെ മുതുകിന്മേൽ ഉഴുതു;

     ഉഴവു ചാലുകൾ അവർ നീളത്തിൽ കീറി.”

     ⁴ യഹോവ നീതിമാനാകുന്നു;

     അവൻ ദുഷ്ടന്മാരുടെ കയറുകൾ അറുത്തുകളഞ്ഞിരിക്കുന്നു.

     ⁵ സീയോനെ വെറുക്കുന്നവരെല്ലാം

     ലജ്ജിച്ച് പിന്തിരിഞ്ഞുപോകട്ടെ.

     ⁶ വളരുന്നതിനുമുമ്പ് ഉണങ്ങിപ്പോകുന്ന

     പുരപ്പുറത്തെ പുല്ലുപോലെ അവർ ആകട്ടെ.

     ⁷ കൊയ്യുന്നവൻ അത്തരം പുല്ലുകൊണ്ട് തന്റെ കൈയോ

     കറ്റ കെട്ടുന്നവൻ തന്റെ ഭുജങ്ങളോ നിറയ്ക്കുകയില്ല.

     ⁸ “യഹോവയുടെ അനുഗ്രഹം നിങ്ങൾക്കുണ്ടാകട്ടെ;

     യഹോവയുടെ നാമത്തിൽ ഞങ്ങൾ നിങ്ങളെ അനുഗ്രഹിക്കുന്നു”

     എന്നിങ്ങനെ വഴിപോകുന്നവർ പറയുന്നതും ഇല്ല.

സങ്കീർത്തനം.129 130

     ¹ യഹോവേ, ആഴത്തിൽനിന്ന് ഞാൻ നിന്നോടു നിലവിളിക്കുന്നു;

     ² കർത്താവേ, എന്റെ ശബ്ദം കേൾക്കണമേ;

     നിന്റെ ചെവി എന്റെ യാചനകളെ ശ്രദ്ധിക്കണമേ.

     ³ യഹോവേ, നീ അകൃത്യങ്ങൾ ഓർമ്മവച്ചാൽ

     കർത്താവേ, ആര് നിലനില്ക്കും?

     ⁴ എങ്കിലും നിന്നെ ഭയപ്പെടുവാൻ തക്കവണ്ണം

     നിന്റെ പക്കൽ പാപക്ഷമ ഉണ്ട്.

     ⁵ ഞാൻ യഹോവയ്ക്കായി കാത്തിരിക്കുന്നു;

     എന്റെ ഉള്ളം കാത്തിരിക്കുന്നു;

     അവന്റെ വചനത്തിൽ ഞാൻ പ്രത്യാശ വച്ചിരിക്കുന്നു.

     ⁶ ഉഷസ്സിനായി കാത്തിരിക്കുന്നവരെക്കാൾ,

     അതെ, ഉഷസ്സിനായി കാത്തിരിക്കുന്നവരെക്കാൾ

     എന്റെ ഉള്ളം യഹോവയ്ക്കായി കാത്തിരിക്കുന്നു.

     ⁷ യിസ്രായേലേ, യഹോവയിൽ പ്രത്യാശ വച്ചുകൊള്ളുക;

     യഹോവയുടെ പക്കൽ കൃപയും

     അവന്റെ പക്കൽ ധാരാളം വിടുതലും ഉണ്ട്.

     ⁸ അവൻ യിസ്രായേലിനെ അവന്റെ സകല

     അകൃത്യങ്ങളിൽ നിന്നും വീണ്ടെടുക്കും.

സങ്കീർത്തനം.130 131

     ¹ യഹോവേ, എന്റെ ഹൃദയം ഗർവ്വിച്ചിരിക്കുന്നില്ല;

     ഞാൻ നിഗളിച്ചുനടക്കുന്നില്ല;

     എന്റെ ബുദ്ധിക്ക് എത്തിപ്പിടിക്കുവാൻ കഴിയാത്ത വൻ കാര്യങ്ങളിലും

     അത്ഭുതവിഷയങ്ങളിലും ഞാൻ ഇടപെടുന്നതുമില്ല.

     ² ഞാൻ എന്റെ പ്രാണനെ താലോലിച്ച് നിശ്ശബ്ദമാക്കിയിരിക്കുന്നു;

     അമ്മയുടെ അടുക്കൽ മുലകുടി മാറിയ പൈതൽ എന്നപോലെ

     എന്റെ പ്രാണൻ എന്റെ അടുക്കൽ

     മുലകുടി മാറിയതുപോലെ ആകുന്നു.

     ³ യിസ്രായേലേ, ഇന്നുമുതൽ എന്നേക്കും

     യഹോവയിൽ പ്രത്യാശ വച്ചുകൊള്ളുക.

സങ്കീർത്തനം.131 132

     ¹ യഹോവേ, ദാവീദിനെയും

     അവന്റെ സകലകഷ്ടതയെയും ഓർക്കണമേ.

     ² അവൻ യഹോവയോടു സത്യം ചെയ്ത്

     യാക്കോബിന്റെ വല്ലഭന് നേർന്നത് എന്തെന്നാൽ:

     ³ “ യഹോവയ്ക്ക് ഒരു സ്ഥലം,

     യാക്കോബിന്റെ വല്ലഭന് ഒരു നിവാസം കണ്ടെത്തുംവരെ

     ⁴ ഞാൻ എന്റെ കൂടാര വീട്ടിൽ കടക്കുകയില്ല;

     എന്റെ ശയ്യമേൽ കയറി കിടക്കുകയുമില്ല.

     ⁵ ഞാൻ എന്റെ കണ്ണിന് ഉറക്കവും

     എന്റെ കൺപോളയ്ക്ക് മയക്കവും കൊടുക്കുകയില്ല.”

     ⁶ നാം എഫ്രാത്തയിൽ അതിനെക്കുറിച്ചു കേട്ട്

     വനപ്രദേശത്ത് അത് കണ്ടെത്തിയല്ലോ.

     ⁷ നാം അവന്റെ തിരുനിവാസത്തിലേക്കു ചെന്ന്

     അവന്റെ പാദപീഠത്തിൽ നമസ്കരിക്കുക.

     ⁸ യഹോവേ, നീ നിന്റെ ബലത്തിന്റെ പെട്ടകവുമായി

     നിന്റെ വിശ്രാമത്തിലേക്ക് എഴുന്നള്ളണമേ.

     ⁹ നിന്റെ പുരോഹിതന്മാർ നീതി ധരിക്കുകയും

     നിന്റെ ഭക്തന്മാർ ഘോഷിച്ചുല്ലസിക്കുകയും ചെയ്യട്ടെ.

     ¹⁰ നിന്റെ ദാസനായ ദാവീദിനെ ഓർത്ത്

     നിന്റെ അഭിഷിക്തന്റെ മുഖത്തെ തിരസ്ക്കരിക്കരുതേ.

     ¹¹ “ഞാൻ നിന്റെ ഉദരഫലത്തെ

     നിന്റെ സിംഹാസനത്തിൽ ഇരുത്തും;

     ¹² നിന്റെ മക്കൾ എന്റെ നിയമവും

     ഞാൻ അവർക്കു ഉപദേശിച്ച സാക്ഷ്യവും പ്രമാണിക്കുമെങ്കിൽ

     അവരുടെ മക്കളും എന്നേക്കും നിന്റെ സിംഹാസനത്തിൽ ഇരിക്കും” എന്ന്

     യഹോവ ദാവീദിനോട് ആണയിട്ടു സത്യം; അവൻ അതിൽനിന്നു മാറുകയില്ല.

     ¹³ യഹോവ സീയോനെ തിരഞ്ഞെടുക്കുകയും

     അതിനെ തന്റെ വാസസ്ഥലമായി ഇച്ഛിക്കുകയും ചെയ്തു.

     ¹⁴ “അത് എന്നേക്കും എന്റെ വിശ്രാമം ആകുന്നു;

     ഞാൻ അതിനെ ഇച്ഛിച്ചിരിക്കുകയാൽ ഞാൻ അവിടെ വസിക്കും;

     ¹⁵ അതിലെ ആഹാരം ഞാൻ സമൃദ്ധിയായി അനുഗ്രഹിക്കും;

     അതിലെ ദരിദ്രന്മാർക്ക് അപ്പംകൊണ്ടു തൃപ്തി വരുത്തും.

     ¹⁶ അതിലെ പുരോഹിതന്മാരെ രക്ഷ ധരിപ്പിക്കും;

     അതിലെ ഭക്തന്മാർ ഘോഷിച്ചുല്ലസിക്കും.

     ¹⁷ അവിടെ ഞാൻ ദാവീദിന് ഒരു കൊമ്പു മുളപ്പിക്കും;

     എന്റെ അഭിഷിക്തന് ഒരു ദീപം ഒരുക്കിയിട്ടുമുണ്ട്.

     ¹⁸ ഞാൻ അവന്റെ ശത്രുക്കളെ ലജ്ജ ധരിപ്പിക്കും;

     അവന്റെ തലയിലോ കിരീടം ശോഭിക്കും.”

സങ്കീർത്തനം.132 133

     ¹ ഇതാ, സഹോദരന്മാർ ഒത്തൊരുമിച്ചു വസിക്കുന്നത്

     എത്ര ശുഭവും എത്ര മനോഹരവും ആകുന്നു!

     ² അത്, വസ്ത്രത്തിന്റെ വിളുമ്പിലേക്ക് നീണ്ടു കിടക്കുന്ന അഹരോന്റെ താടിയിലേക്ക്,

     ഒഴുകുന്ന

     അവന്റെ തലയിലെ വിശേഷതൈലം പോലെയും

     ³ സീയോൻ പർവ്വതത്തിൽ പെയ്യുന്ന ഹെർമ്മോന്യമഞ്ഞുപോലെയും ആകുന്നു;

     അവിടെയല്ലയോ യഹോവ അനുഗ്രഹവും

     ശാശ്വതമായ ജീവനും കല്പിച്ചിരിക്കുന്നത്.

സങ്കീർത്തനം.133 134

     ¹ അല്ലയോ, രാത്രികാലങ്ങളിൽ യഹോവയുടെ ആലയത്തിൽ നില്ക്കുന്ന

     യഹോവയുടെ സകല ദാസന്മാരുമേ, യഹോവയെ വാഴ്ത്തുവിൻ.

     ² വിശുദ്ധമന്ദിരത്തിലേക്ക് കൈ ഉയർത്തി യഹോവയെ വാഴ്ത്തുവിൻ.

     ³ ആകാശവും ഭൂമിയും ഉണ്ടാക്കിയ യഹോവ

     സീയോനിൽനിന്ന് നിന്നെ അനുഗ്രഹിക്കുമാറാകട്ടെ.

സങ്കീർത്തനം.134 135

     ¹ യഹോവയെ സ്തുതിക്കുവിൻ; യഹോവയുടെ നാമത്തെ സ്തുതിക്കുവിൻ;

     യഹോവയുടെ ദാസന്മാരേ, അവനെ സ്തുതിക്കുവിൻ.

     ² യഹോവയുടെ ആലയത്തിലും

     നമ്മുടെ ദൈവത്തിന്റെ ആലയത്തിന്റെ പ്രാകാരങ്ങളിലും നില്ക്കുന്നവരേ,

     ³ യഹോവയെ സ്തുതിക്കുവിൻ; യഹോവ നല്ലവൻ അല്ലയോ;

     അവന്റെ നാമത്തിനു കീർത്തനം ചെയ്യുവിൻ; അത് മനോഹരമല്ലയോ.

     ⁴ യഹോവ യാക്കോബിനെ തനിക്കായും

     യിസ്രായേലിനെ തന്റെ നിക്ഷേപമായും തിരഞ്ഞെടുത്തിരിക്കുന്നു.

     ⁵ യഹോവ വലിയവൻ എന്നും നമ്മുടെ കർത്താവ്

     സകലദേവന്മാരിലും ശ്രേഷ്ഠൻ എന്നും ഞാൻ അറിയുന്നു.

     ⁶ ആകാശത്തിലും ഭൂമിയിലും സമുദ്രങ്ങളുടെ ആഴങ്ങളിലും

     യഹോവ തനിക്കിഷ്ടമുള്ളതെല്ലാം ചെയ്യുന്നു.

     ⁷ അവൻ ഭൂമിയുടെ അറ്റത്തുനിന്ന് നീരാവി പൊങ്ങുമാറാക്കുന്നു;

     അവൻ മഴയ്ക്കായി മിന്നലുകൾ ഉണ്ടാക്കുന്നു;

     തന്റെ ഭണ്ഡാരങ്ങളിൽ നിന്ന് കാറ്റ് പുറപ്പെടുവിക്കുന്നു.

     ⁸ അവൻ ഈജിപ്റ്റിൽ,

     മനുഷ്യരുടെയും മൃഗങ്ങളുടെയും കടിഞ്ഞൂലുകളെ ഒരുപോലെ സംഹരിച്ചു.

     ⁹ ഈജിപ്റ്റ്ദേശമേ, നിന്റെ മദ്ധ്യത്തിൽ അവൻ ഫറവോന്റെമേലും

     അവന്റെ സകലഭൃത്യന്മാരുടെമേലും

     അടയാളങ്ങളും അത്ഭുതങ്ങളും അയച്ചു.

     ¹⁰ അവൻ വലിയ ജനതകളെ സംഹരിച്ചു;

     ബലമുള്ള രാജാക്കന്മാരെ നിഗ്രഹിച്ചു.

     ¹¹ അമോര്യരുടെ രാജാവായ സീഹോനെയും

     ബാശാൻരാജാവായ ഓഗിനെയും

     സകല കനാന്യരാജ്യങ്ങളെയും തന്നെ.

     ¹² അവരുടെ ദേശത്തെ അവൻ അവകാശമായി,

     തന്റെ ജനമായ യിസ്രായേലിന് അവകാശമായി കൊടുത്തു.

     ¹³ യഹോവേ, നിന്റെ നാമം ശാശ്വതമായും

     യഹോവേ, നിന്റെ ജ്ഞാപകം തലമുറതലമുറയായും ഇരിക്കുന്നു.

     ¹⁴ യഹോവ തന്റെ ജനത്തിന് ന്യായപാലനം ചെയ്യും;

     അവൻ തന്റെ ദാസന്മാരോടു സഹതപിക്കും.

     ¹⁵ ജനതകളുടെ വിഗ്രഹങ്ങൾ പൊന്നും വെള്ളിയും

     മനുഷ്യരുടെ കൈവേലയും ആകുന്നു.

     ¹⁶ അവയ്ക്കു വായുണ്ടെങ്കിലും സംസാരിക്കുന്നില്ല;

     കണ്ണുണ്ടെങ്കിലും കാണുന്നില്ല;

     ¹⁷ അവയ്ക്കു ചെവിയുണ്ടെങ്കിലും കേൾക്കുന്നില്ല;

     അവയുടെ വായിൽ ശ്വാസവുമില്ല.

     ¹⁸ അവ ഉണ്ടാക്കുന്നവർ അവയെപ്പോലെയാകുന്നു;

     അവയിൽ ആശ്രയിക്കുന്ന ഏതൊരുവനും അങ്ങനെ തന്നെ.

     ¹⁹ യിസ്രായേൽഗൃഹമേ, യഹോവയെ വാഴ്ത്തുക;

     അഹരോൻ ഗൃഹമേ, യഹോവയെ വാഴ്ത്തുക.

     ²⁰ ലേവിഗൃഹമേ, യഹോവയെ വാഴ്ത്തുക;

     യഹോവാഭക്തന്മാരേ, യഹോവയെ വാഴ്ത്തുക.

     ²¹ യെരൂശലേമിൽ അധിവസിക്കുന്ന യഹോവ

     സിയോനിൽനിന്നു വാഴ്ത്തപ്പെടുമാറാകട്ടെ.

     യഹോവയെ സ്തുതിക്കുവിൻ.

സങ്കീർത്തനം.135 136

     ¹ യഹോവയ്ക്കു സ്തോത്രം ചെയ്യുവിൻ;

     അവൻ നല്ലവനല്ലോ; അവന്റെ ദയ എന്നേക്കുമുള്ളത്.

     ² ദൈവാധിദൈവത്തിന് സ്തോത്രം ചെയ്യുവിൻ;

     അവന്റെ ദയ എന്നേക്കുമുള്ളത്.

     ³ കർത്താധികർത്താവിന് സ്തോത്രം ചെയ്യുവിൻ;

     അവന്റെ ദയ എന്നേക്കുമുള്ളത്.

     ⁴ ഏകനായി മഹാത്ഭുതങ്ങൾ പ്രവർത്തിക്കുന്നവന് -

     അവന്റെ ദയ എന്നേക്കുമുള്ളത്.

     ⁵ ജ്ഞാനത്തോടെ ആകാശങ്ങൾ ഉണ്ടാക്കിയവന് -

     അവന്റെ ദയ എന്നേക്കുമുള്ളത്.

     ⁶ ഭൂമിയെ വെള്ളത്തിന്മേൽ സ്ഥാപിച്ചവന്-

     അവന്റെ ദയ എന്നേക്കുമുള്ളത്.

     ⁷ വലിയ വെളിച്ചങ്ങൾ ഉണ്ടാക്കിയവന് -

     അവന്റെ ദയ എന്നേക്കുമുള്ളത്.

     ⁸ പകൽ വാഴുവാൻ സൂര്യനെ ഉണ്ടാക്കിയവന്-

     അവന്റെ ദയ എന്നേക്കുമുള്ളത്.

     ⁹ രാത്രി വാഴുവാൻ ചന്ദ്രനെയും നക്ഷത്രങ്ങളെയും ഉണ്ടാക്കിയവന് -

     അവന്റെ ദയ എന്നേക്കുമുള്ളത്.

     ¹⁰ ഈജിപ്റ്റിലെ കടിഞ്ഞൂലുകളെ സംഹരിച്ചവന് -

     അവന്റെ ദയ എന്നേക്കുമുള്ളത്.

     ¹¹ അവരുടെ ഇടയിൽനിന്ന് യിസ്രായേൾജനത്തെ പുറപ്പെടുവിച്ചവന് -

     അവന്റെ ദയ എന്നേക്കുമുള്ളത്.

     ¹² ബലമുള്ള കൈകൊണ്ടും നീട്ടിയ ഭുജംകൊണ്ടും തന്നെ-

     അവന്റെ ദയ എന്നേക്കുമുള്ളത്.

     ¹³ ചെങ്കടലിനെ രണ്ടായി വിഭാഗിച്ചവന് -

     അവന്റെ ദയ എന്നേക്കുമുള്ളത്.

     ¹⁴ അതിന്റെ നടുവിൽകൂടി യിസ്രായേലിനെ കടത്തിയവന് -

     അവന്റെ ദയ എന്നേക്കുമുള്ളത്.

     ¹⁵ ഫറവോനെയും സൈന്യത്തെയും ചെങ്കടലിൽ തള്ളിയിട്ടവന് -

     അവന്റെ ദയ എന്നേക്കുമുള്ളത്.

     ¹⁶ തന്റെ ജനത്തെ മരുഭൂമിയിൽകൂടി നടത്തിയവന് -

     അവന്റെ ദയ എന്നേക്കുമുള്ളത്.

     ¹⁷ മഹാരാജാക്കന്മാരെ സംഹരിച്ചവന് -- അവന്റെ ദയ എന്നേക്കുമുള്ളത്.

     ¹⁸ ശ്രേഷ്ഠരാജാക്കന്മാരെ നിഗ്രഹിച്ചവന് -

     അവന്റെ ദയ എന്നേക്കുമുള്ളത്.

     ¹⁹ അമോര്യരുടെ രാജാവായ സീഹോനെയും -

     അവന്റെ ദയ എന്നേക്കുമുള്ളത്.

     ²⁰ ബാശാൻ രാജാവായ ഓഗിനെയും -

     അവന്റെ ദയ എന്നേക്കുമുള്ളത്.

     ²¹ അവരുടെ ദേശം അവകാശമായി കൊടുത്തു -

     അവന്റെ ദയ എന്നേക്കുമുള്ളത്.

     ²² തന്റെ ദാസനായ യിസ്രായേലിന് അവകാശമായി തന്നെ -

     അവന്റെ ദയ എന്നേക്കുമുള്ളത്.

     ²³ നമ്മുടെ താഴ്ചയിൽ നമ്മെ ഓർത്തവന് -

     അവന്റെ ദയ എന്നേക്കുമുള്ളത്.

     ²⁴ നമ്മുടെ വൈരികളുടെ കൈയിൽനിന്ന് നമ്മെ വിടുവിച്ചവന് -

     അവന്റെ ദയ എന്നേക്കുമുള്ളത്.

     ²⁵ സകലജഡത്തിനും ആഹാരം കൊടുക്കുന്നവന് -

     അവന്റെ ദയ എന്നേക്കുമുള്ളത്.

     ²⁶ സ്വർഗ്ഗസ്ഥനായ ദൈവത്തിനു സ്തോത്രം ചെയ്യുവിൻ;

     അവന്റെ ദയ എന്നേക്കുമുള്ളത്.

സങ്കീർത്തനം.136 137

     ¹ ബാബേൽനദികളുടെ തീരത്ത് ഞങ്ങൾ ഇരുന്നു,

     സീയോനെ ഓർമ്മിച്ചപ്പോൾ ഞങ്ങൾ കരഞ്ഞു.

     ² അതിന്റെ നടുവിലുള്ള അലരിവൃക്ഷങ്ങളിന്മേൽ

     ഞങ്ങൾ ഞങ്ങളുടെ കിന്നരങ്ങൾ തൂക്കിയിട്ടു.

     ³ ഞങ്ങളെ ബദ്ധരാക്കിക്കൊണ്ടുപോയവർ:

     “സീയോൻഗീതങ്ങളിൽ ഒന്നു പാടുവിൻ” എന്ന് പറഞ്ഞു;

     ഞങ്ങളെ പീഡിപ്പിച്ചവർ ഗീതങ്ങളും സന്തോഷവും ഞങ്ങളോടു ചോദിച്ചു.

     ⁴ ഞങ്ങൾ യഹോവയുടെ ഗീതം അന്യദേശത്ത് പാടുന്നതെങ്ങനെ?

     ⁵ യെരൂശലേമേ, നിന്നെ ഞാൻ മറക്കുന്നു എങ്കിൽ

     എന്റെ വലങ്കൈ മറന്നുപോകട്ടെ.

     ⁶ നിന്നെ ഞാൻ ഓർമ്മിക്കാതെ പോയാൽ,

     യെരൂശലേമിനെ എന്റെ മുഖ്യസന്തോഷത്തെക്കാൾ വിലമതിക്കാതെ പോയാൽ,

     എന്റെ നാവ് അണ്ണാക്കിനോടു പറ്റിപ്പോകട്ടെ.

     ⁷ “ഇടിച്ചുകളയുവിൻ, അടിസ്ഥാനംവരെ അതിനെ ഇടിച്ചുകളയുവിൻ!”

     എന്നിങ്ങനെ പറഞ്ഞ ഏദോമ്യർക്കായി

     യഹോവേ, യെരൂശലേമിന്റെ നാൾ ഓർമ്മിക്കണമേ.

     ⁸ നാശം അടുത്തിരിക്കുന്ന ബാബേൽപുത്രിയേ,

     നീ ഞങ്ങളോടു ചെയ്തതുപോലെ നിന്നോടു ചെയ്യുന്നവൻ ഭാഗ്യവാൻ.

     ⁹ നിന്റെ കുഞ്ഞുങ്ങളെ പിടിച്ച്

     പാറമേൽ അടിച്ചുകളയുന്നവൻ ഭാഗ്യവാൻ.

സങ്കീർത്തനം.137 138

     ¹ ഞാൻ പൂർണ്ണഹൃദയത്തോടെ നിനക്കു സ്തോത്രം ചെയ്യും;

     ദേവന്മാരുടെ മുമ്പാകെ ഞാൻ നിന്നെ കീർത്തിക്കും.

     ² ഞാൻ നിന്റെ വിശുദ്ധമന്ദിരത്തെ നോക്കി നമസ്കരിച്ച്,

     നിന്റെ ദയയും വിശ്വസ്തതയും നിമിത്തം തിരുനാമത്തിനു സ്തോത്രം ചെയ്യും;

     നിന്റെ നാമത്തിനു മീതെ എല്ലാം നീ

     നിന്റെ വചനത്തെ മഹത്ത്വപ്പെടുത്തിയിരിക്കുന്നു.

     ³ ഞാൻ വിളിച്ചപേക്ഷിച്ച നാളിൽ നീ എനിക്ക് ഉത്തരം അരുളി;

     എന്റെ ഉള്ളിൽ ബലം നല്കി എന്നെ ധൈര്യപ്പെടുത്തിയിരിക്കുന്നു.

     ⁴ യഹോവേ, ഭൂമിയിലെ സകലരാജാക്കന്മാരും

     നിന്റെ വായിലെ വചനങ്ങൾ കേട്ടിട്ട് നിനക്കു സ്തോത്രം ചെയ്യും.

     ⁵ അതേ, അവർ യഹോവയുടെ വഴികളെക്കുറിച്ചു പാടും;

     യഹോവയുടെ മഹത്ത്വം വലിയതാകുന്നുവല്ലോ.

     ⁶ യഹോവ ഉന്നതനെങ്കിലും താഴ്മയുള്ളവനെ കടാക്ഷിക്കുന്നു;

     ഗർവ്വിഷ്ഠനെ അവൻ ദൂരത്തുനിന്ന് അറിയുന്നു.

     ⁷ ഞാൻ കഷ്ടതയുടെ നടുവിൽ നടന്നാലും നീ എന്നെ ജീവിപ്പിക്കും;

     എന്റെ ശത്രുക്കളുടെ ക്രോധത്തിനു നേരെ നീ കൈ നീട്ടും;

     നിന്റെ വലങ്കൈ എന്നെ രക്ഷിക്കും.

     ⁸ യഹോവ എന്നെക്കുറിച്ചുള്ള ഉദ്ദേശ്യം പൂർത്തികരിക്കും;

     യഹോവേ, നിന്റെ ദയ എന്നേക്കുമുള്ളത്;

     തൃക്കൈകളുടെ പ്രവൃത്തിയെ ഉപേക്ഷിക്കരുതേ.

സങ്കീർത്തനം.138 139

     ¹ യഹോവേ, നീ എന്നെ പരിശോധന ചെയ്ത് അറിഞ്ഞിരിക്കുന്നു;

     ² ഞാൻ ഇരിക്കുന്നതും എഴുന്നേല്ക്കുന്നതും നീ അറിയുന്നു.

     എന്റെ ചിന്തകൾ നീ ദൂരത്തുനിന്നു ഗ്രഹിക്കുന്നു.

     ³ എന്റെ നടപ്പും കിടപ്പും നീ പരിശോധിക്കുന്നു;

     എന്റെ വഴികളെല്ലാം നിനക്കു മനസ്സിലായിരിക്കുന്നു.

     ⁴ യഹോവേ, നീ മുഴുവനും അറിയാതെ ഒരു വാക്കും എന്റെ നാവിൽ ഇല്ല.

     ⁵ നീ എന്റെ മുമ്പും പിമ്പും അടച്ച്

     നിന്റെ കൈ എന്റെമേൽ വച്ചിരിക്കുന്നു.

     ⁶ ഈ പരിജ്ഞാനം എനിക്ക് അത്യത്ഭുതമാകുന്നു;

     അത് എനിക്കു ഗ്രഹിച്ചുകൂടാത്തവിധം ഉന്നതമായിരിക്കുന്നു.

     ⁷ നിന്റെ ആത്മാവിനെ ഒളിച്ച് ഞാൻ എവിടെ പോകും?

     തിരുസന്നിധി വിട്ട് ഞാൻ എവിടേക്ക് ഓടും?

     ⁸ ഞാൻ സ്വർഗ്ഗത്തിൽ കയറിയാൽ നീ അവിടെ ഉണ്ട്;

     പാതാളത്തിൽ എന്റെ കിടക്ക വിരിച്ചാൽ നീ അവിടെ ഉണ്ട്.

     ⁹ ഞാൻ ഉഷസ്സിന്റെ ചിറകു ധരിച്ച്,

     സമുദ്രത്തിന്റെ അറ്റത്തു ചെന്നു വസിച്ചാൽ

     ¹⁰ അവിടെയും നിന്റെ കൈ എന്നെ നടത്തും;

     നിന്റെ വലങ്കൈ എന്നെ പിടിക്കും.

     ¹¹ “ഇരുട്ട് എന്നെ മൂടിക്കളയട്ടെ;

     വെളിച്ചം എന്റെ ചുറ്റും രാത്രിയായിത്തീരട്ടെ” എന്നു ഞാൻ പറഞ്ഞാൽ

     ¹² ഇരുട്ടിൽപോലും നിനക്ക് ഒന്നും മറഞ്ഞിരിക്കുകയില്ല;

     രാത്രി പകൽപോലെ പ്രകാശിക്കും;

     ഇരുട്ടും വെളിച്ചവും നിനക്ക് തുല്യം തന്നെ.

     ¹³ നീയല്ലയോ എന്റെ ആന്തരിക അവയവങ്ങൾ നിർമ്മിച്ചത്;

     എന്റെ അമ്മയുടെ ഉദരത്തിൽ നീ എന്നെ മനഞ്ഞു.

     ¹⁴ ഭയങ്കരവും അത്ഭുതകരവുമായി എന്നെ സൃഷ്ടിച്ചിരിക്കുകയാൽ

     ഞാൻ നിനക്കു സ്തോത്രം ചെയ്യുന്നു;

     നിന്റെ പ്രവൃത്തികൾ അത്ഭുതകരമാകുന്നു;

     അത് എന്റെ ഉള്ളം നല്ലവണ്ണം അറിയുന്നു.

     ¹⁵ ഞാൻ രഹസ്യത്തിൽ നിർമ്മിക്കപ്പെടുകയും

     ഭൂമിയുടെ അധോഭാഗങ്ങളിൽ സൃഷ്ടിക്കപ്പെടുകയും ചെയ്തപ്പോൾ

     എന്റെ അസ്ഥികൂടം നിനക്ക് മറഞ്ഞിരുന്നില്ല.

     ¹⁶ ഞാൻ പിണ്ഡാകാരമായിരുന്നപ്പോൾ നിന്റെ കണ്ണ് എന്നെ കണ്ടു;

     എനിക്കുവേണ്ടി നിയമിക്കപ്പെട്ട നാളുകൾ ഒന്നും ഇല്ലാതിരുന്നപ്പോൾ

     അവയെല്ലാം നിന്റെ പുസ്തകത്തിൽ എഴുതിയിരുന്നു;

     ¹⁷ ദൈവമേ, എന്നെക്കുറിച്ചുള്ള നിന്റെ വിചാരങ്ങൾ എത്ര ഘനമായവ!

     അവയുടെ ആകെത്തുകയും എത്ര വലിയത്!

     ¹⁸ അവ എണ്ണിയാൽ മണലിനെക്കാൾ അധികം;

     ഞാൻ ഉണരുമ്പോൾ ഇനിയും ഞാൻ നിന്റെ അടുക്കൽ ഇരിക്കുന്നു.

     ¹⁹ ദൈവമേ, നീ ദുഷ്ടനെ നിഗ്രഹിച്ചെങ്കിൽ കൊള്ളാമായിരുന്നു;

     രക്തപാതകന്മാരേ, എന്നെ വിട്ടുപോകുവിൻ.

     ²⁰ അവർ ദ്രോഹമായി നിന്നെക്കുറിച്ചു സംസാരിക്കുന്നു;

     നിന്റെ ശത്രുക്കൾ നിന്റെ നാമം വൃഥാ എടുക്കുന്നു.

     ²¹ യഹോവേ, നിന്നെ വെറുക്കുന്നവരെ ഞാൻ വെറുക്കേണ്ടതല്ലയോ?

     നിന്നോട് എതിർത്തുനില്ക്കുന്നവരെ ഞാൻ എതിർക്കേണ്ടതല്ലയോ?

     ²² ഞാൻ പൂർണ്ണദ്വേഷത്തോടെ അവരെ ദ്വേഷിക്കുന്നു;

     അവരെ എന്റെ ശത്രുക്കളായി എണ്ണുന്നു.

     ²³ ദൈവമേ, എന്നെ പരിശോധന ചെയ്ത് എന്റെ ഹൃദയത്തെ അറിയണമേ;

     എന്നെ പരീക്ഷിച്ച് എന്റെ വിചാരങ്ങൾ അറിയണമേ.

     ²⁴ വ്യസനത്തിനുള്ള വഴികൾ എന്നിൽ ഉണ്ടോ എന്ന് നോക്കി,

     ശാശ്വതമാർഗ്ഗത്തിൽ എന്നെ നടത്തണമേ.

സങ്കീർത്തനം.139 140

     ¹ യഹോവേ, ദുഷ്ടമനുഷ്യരുടെ കൈയിൽ നിന്ന് എന്നെ വിടുവിച്ച്

     സാഹസക്കാരുടെ പക്കൽനിന്ന് എന്നെ പരിപാലിക്കണമേ.

     ² അവർ ഹൃദയത്തിൽ തിന്മ നിരൂപിക്കുന്നു;

     അവർ ഇടവിടാതെ പോരാട്ടത്തിനായി കൂട്ടം കൂടുന്നു;

     ³ അവർ സർപ്പംപോലെ അവരുടെ നാവുകൾക്ക് മൂർച്ചകൂട്ടുന്നു;

     അവരുടെ അധരങ്ങൾക്കു കീഴിൽ അണലിവിഷം ഉണ്ട്. സേലാ.

     ⁴ യഹോവേ, ദുഷ്ടന്റെ കൈയിൽനിന്ന് എന്നെ കാക്കണമേ;

     സാഹസക്കാരനിൽനിന്ന് എന്നെ പരിപാലിക്കണമേ;

     അവർ എന്റെ കാലടികൾ മറിച്ചുകളയുവാൻ ഭാവിക്കുന്നു.

     ⁵ ഗർവ്വിഷ്ഠന്മാർ എനിക്കായി കെണിയും കയറും മറച്ചുവച്ചിരിക്കുന്നു;

     വഴിയരികിൽ അവർ വല വിരിച്ചിരിക്കുന്നു;

     അവർ എനിക്കായി കുടുക്കുകൾ വച്ചിരിക്കുന്നു. സേലാ.

     ⁶ “നീ എന്റെ ദൈവം” എന്ന് ഞാൻ യഹോവയോടു പറഞ്ഞു;

     യഹോവേ, എന്റെ യാചനകൾ കേൾക്കണമേ.

     ⁷ എന്റെ രക്ഷയുടെ ബലമായ കർത്താവായ യഹോവേ,

     യുദ്ധദിവസത്തിൽ നീ എന്റെ തലയിൽ ശിരസ്ത്രം വയ്ക്കുന്നു.

     ⁸ യഹോവേ, ദുഷ്ടന്റെ ആഗ്രഹങ്ങൾ നടത്തരുതേ;

     നിഗളിച്ചുപോകാതിരിക്കേണ്ടതിന്

     അവന്റെ ദുരുപായം സാധിപ്പിക്കുകയും അരുതേ. സേലാ.

     ⁹ എന്നെ വളഞ്ഞിരിക്കുന്നവരുടെ തലയോ, -

     അവരുടെ അധരങ്ങളുടെ തിന്മ അവരെ മൂടിക്കളയട്ടെ.

     ¹⁰ തീക്കനൽ അവരുടെ മേൽ വീഴട്ടെ;

     അവൻ അവരെ തീയിലും

     എഴുന്നേല്ക്കാത്തവിധം കുഴിയിലും ഇട്ടുകളയട്ടെ.

     ¹¹ വാവിഷ്ഠാണക്കാരൻ ഭൂമിയിൽ നിലനില്ക്കുകയില്ല;

     സാഹസക്കാരനെ അനർത്ഥം നായാടി ഉന്മൂലനാശം വരുത്തും.

     ¹² യഹോവ പീഡിതന്റെ വ്യവഹാരവും

     ദരിദ്രന്മാരുടെ ന്യായവും നടത്തും എന്ന് ഞാൻ അറിയുന്നു.

     ¹³ അതേ, നീതിമാന്മാർ നിന്റെ നാമത്തിനു സ്തോത്രം ചെയ്യും;

     നേരുള്ളവർ നിന്റെ സന്നിധിയിൽ വസിക്കും.

സങ്കീർത്തനം.140 141

     ¹ യഹോവേ, ഞാൻ നിന്നെ വിളിച്ചപേക്ഷിക്കുന്നു;

     എന്റെ അടുക്കലേക്ക് വേഗം വരണമേ;

     ഞാൻ നിന്നോട് അപേക്ഷിക്കുമ്പോൾ

     എന്റെ അപേക്ഷ കേൾക്കണമേ.

     ² എന്റെ പ്രാർത്ഥന തിരുസന്നിധിയിൽ ധൂപമായും

     എന്റെ കൈകളെ മലർത്തുന്നത് സന്ധ്യായാഗമായും തീരട്ടെ.

     ³ യഹോവേ, എന്റെ വായ്ക്ക് ഒരു കാവൽ നിർത്തി,

     എന്റെ അധരദ്വാരം കാക്കണമേ.

     ⁴ ദുഷ്പ്രവൃത്തിക്കാരോടുകൂടി ദുഷ്പ്രവൃത്തികളിൽ ഇടപെടുവാൻ

     എന്റെ ഹൃദയത്തെ ദുഷ്ക്കാര്യത്തിന് ചായിക്കരുതേ;

     അവരുടെ സ്വാദുഭോജനം ഞാൻ കഴിക്കുകയുമരുതേ.

     ⁵ നീതിമാൻ എന്നെ അടിക്കുന്നത് ദയ;

     അവൻ എന്നെ ശാസിക്കുന്നത് തലയ്ക്ക് എണ്ണ;

     എന്റെ തല അത് വിലക്കാതിരിക്കട്ടെ;

     ഇനി അവർ ചെയ്യുന്ന ദോഷങ്ങൾക്കെതിരെ എനിക്ക് പ്രാർത്ഥനയേയുള്ളു.

     ⁶ അവരുടെ ന്യായാധിപന്മാരെ പാറമേൽ നിന്ന് തള്ളിയിടും;

     എന്റെ വാക്കുകൾ ഇമ്പമുള്ളവയാകയാൽ അവർ അവ കേൾക്കും.

     ⁷ നിലം ഉഴുതു മറിച്ചിട്ടിരിക്കുന്നതുപോലെ

     ഞങ്ങളുടെ അസ്ഥികൾ പാതാളത്തിന്റെ വാതില്ക്കൽ ചിതറിക്കിടക്കുന്നു.

     ⁸ കർത്താവായ യഹോവേ, എന്റെ കണ്ണുകൾ നിങ്കലേക്കാകുന്നു.

     ഞാൻ നിന്നെ ശരണമാക്കുന്നു; എന്റെ പ്രാണനെ നിരാലംബമാക്കരുതേ.

     ⁹ അവർ എനിക്കായി വച്ചിരിക്കുന്ന കെണിയിലും

     ദുഷ്പ്രവൃത്തിക്കാരുടെ കുടുക്കുകളിലും അകപ്പെടാതെ എന്നെ കാക്കണമേ.

     ¹⁰ ഞാൻ രക്ഷപെടുമ്പോൾ

     ദുഷ്ടന്മാർ സ്വന്തവലകളിൽ അകപ്പെടട്ടെ.

സങ്കീർത്തനം. 141 142

     ¹ ഞാൻ യഹോവയോട് ഉറക്കെ നിലവിളിക്കുന്നു;

     ഞാൻ ഉച്ചത്തിൽ യഹോവയോട് പ്രാർത്ഥിക്കുന്നു.

     ² അവന്റെ സന്നിധിയിൽ ഞാൻ എന്റെ സങ്കടം പകരുന്നു;

     എന്റെ കഷ്ടത ഞാൻ അവനെ ബോധിപ്പിക്കുന്നു.

     ³ എന്റെ ആത്മാവ് എന്റെ ഉള്ളിൽ വിഷാദിച്ചിരിക്കുമ്പോൾ

     നീ എന്റെ പാത അറിയുന്നു.

     ഞാൻ നടക്കുന്ന പാതയിൽ അവർ എനിക്ക് ഒരു കെണി ഒളിച്ചുവച്ചിരിക്കുന്നു.

     ⁴ എന്റെ വലത്തുഭാഗത്തേക്ക് നോക്കി കാണണമേ;

     എന്നെ ശ്രദ്ധിക്കുന്നവൻ ആരുമില്ലല്ലോ.

     ശരണം എനിക്ക് നഷ്ടമായിരിക്കുന്നു;

     എന്റെ പ്രാണനു വേണ്ടി ആരും കരുതുന്നില്ല.

     ⁵ യഹോവേ, ഞാൻ നിന്നോടു നിലവിളിച്ചു;

     “നീ എന്റെ സങ്കേതവും ജീവനുള്ളവരുടെ ദേശത്ത്

     എന്റെ ഓഹരിയും ആകുന്നു” എന്ന് ഞാൻ പറഞ്ഞു.

     ⁶ എന്റെ നിലവിളിക്ക് ചെവി തരണമേ.

     ഞാൻ ഏറ്റവും എളിമപ്പെട്ടിരിക്കുന്നു;

     എന്നെ ഉപദ്രവിക്കുന്നവർ എന്നിലും ബലവാന്മാരാകയാൽ

     അവരുടെ കൈയിൽനിന്ന് എന്നെ വിടുവിക്കണമേ.

     ⁷ ഞാൻ നിന്റെ നാമത്തിനു സ്തോത്രം ചെയ്യുവാൻ

     എന്റെ പ്രാണനെ കാരാഗൃഹത്തിൽനിന്നു പുറപ്പെടുവിക്കണമേ;

     നീ എനിക്ക് ഉപകാരം ചെയ്തിരിക്കുകയാൽ

     നീതിമാന്മാർ എന്റെ ചുറ്റം വന്നുകൂടും.

സങ്കീർത്തനം.142 143

     ¹ യഹോവേ, എന്റെ പ്രാർത്ഥന കേട്ട്, എന്റെ വിനീത അഭ്യർത്ഥനകൾക്ക് ചെവിതരണമേ;

     നിന്റെ വിശ്വസ്തതയാലും നീതിയാലും എനിക്കുത്തരമരുളണമേ.

     ² അടിയനെ ന്യായവിസ്താരത്തിൽ പ്രവേശിപ്പിക്കരുതേ;

     ജീവനുള്ളവൻ ആരും തിരുസന്നിധിയിൽ നീതിമാനാകുകയില്ലല്ലോ.

     ³ ശത്രു എന്റെ പ്രാണനെ ഉപദ്രവിച്ചിരിക്കുന്നു;

     അവൻ എന്നെ നിലത്തിട്ട് തകർത്തിരിക്കുന്നു;

     പണ്ടുതന്നെ മരിച്ചവരെപ്പോലെ അവൻ എന്നെ ഇരുട്ടിൽ പാർപ്പിച്ചിരിക്കുന്നു.

     ⁴ ആകയാൽ എന്റെ മനസ്സ് എന്റെ ഉള്ളിൽ വിഷാദിച്ചിരിക്കുന്നു;

     എന്റെ ഹൃദയം എന്റെ ഉള്ളിൽ സ്തംഭിച്ചിരിക്കുന്നു.

     ⁵ ഞാൻ പണ്ടത്തെ നാളുകൾ ഓർക്കുന്നു;

     നിന്റെ സകലപ്രവൃത്തികളെയും ഞാൻ ധ്യാനിക്കുന്നു;

     നിന്റെ കൈകളുടെ പ്രവൃത്തിയെപ്പറ്റി ഞാൻ ചിന്തിക്കുന്നു.

     ⁶ ഞാൻ എന്റെ കൈകൾ നിങ്കലേക്കു മലർത്തുന്നു;

     വരണ്ട നിലംപോലെ എന്റെ പ്രാണൻ നിനക്കായി ദാഹിക്കുന്നു. സേലാ.

     ⁷ യഹോവേ, വേഗം എനിക്ക് ഉത്തരമരുളണമേ;

     എന്റെ ആത്മാവ് ക്ഷീണിക്കുന്നു.

     ഞാൻ കുഴിയിൽ ഇറങ്ങുന്നവരെപ്പോലെ ആകാതിരിക്കുവാൻ

     നിന്റെ മുഖം എനിക്കു മറയ്ക്കരുതേ.

     ⁸ രാവിലെ നിന്റെ ആർദ്രകരുണയെപ്പറ്റി എന്നെ കേൾപ്പിക്കണമേ;

     ഞാൻ നിന്നിൽ ആശ്രയിക്കുന്നുവല്ലോ;

     ഞാൻ നടക്കേണ്ട വഴി എന്നെ അറിയിക്കണമേ;

     ഞാൻ എന്റെ ഉള്ളം നിങ്കലേക്ക് ഉയർത്തുന്നുവല്ലോ.

     ⁹ യഹോവേ, എന്റെ ശത്രുക്കളുടെ കൈയിൽനിന്ന് എന്നെ വിടുവിക്കണമേ;

     നിന്റെ അടുക്കൽ ഞാൻ സങ്കേതത്തിനായി വരുന്നു.

     ¹⁰ നിന്റെ ഇഷ്ടം ചെയ്യുവാൻ എന്നെ പഠിപ്പിക്കണമേ.

     നീ എന്റെ ദൈവമാകുന്നുവല്ലോ;

     നിന്റെ നല്ല ആത്മാവ് നേരായ മാർഗത്തിൽ എന്നെ നടത്തുമാറാകട്ടെ.

     ¹¹ യഹോവേ, നിന്റെ നാമംനിമിത്തം എന്നെ ജീവിപ്പിക്കണമേ;

     നിന്റെ നീതിയാൽ എന്റെ പ്രാണനെ കഷ്ടതയിൽനിന്ന് ഉദ്ധരിക്കണമേ.

     ¹² നിന്റെ ദയയാൽ എന്റെ ശത്രുക്കളെ സംഹരിക്കണമേ;

     എന്റെ പ്രാണനെ പീഡിപ്പിക്കുന്ന എല്ലാവരെയും നശിപ്പിക്കണമേ;

     ഞാൻ നിന്റെ ദാസൻ ആകുന്നുവല്ലോ.

സങ്കീർത്തനം.143 144

     ¹ എന്റെ പാറയാകുന്ന യഹോവ വാഴ്ത്തപ്പെട്ടവൻ;

     അവൻ യുദ്ധത്തിന് എന്റെ കൈകളെയും

     പോരിന് എന്റെ വിരലുകളെയും അഭ്യസിപ്പിക്കുന്നു.

     ² എന്റെ ദയയും എന്റെ കോട്ടയും

     എന്റെ ഗോപുരവും എന്റെ രക്ഷകനും

     എന്റെ പരിചയും ഞാൻ ശരണമാക്കിയവനും

     എന്റെ ജനത്തെ എനിക്കു വിധേയപ്പെടുത്തിത്തരുന്നവനും അവൻ തന്നെ.

     ³ യഹോവേ, മനുഷ്യനെ നീ ഗണ്യമാക്കുവാൻ അവൻ എന്തുണ്ട്?

     മർത്യപുത്രനെ നീ വിചാരിക്കുവാൻ അവൻ എന്തുമാത്രം?

     ⁴ മനുഷ്യൻ ഒരു ശ്വാസത്തിനു തുല്യമത്രെ.

     അവന്റെ ആയുഷ്കാലം കടന്നുപോകുന്ന നിഴൽപോലെയാകുന്നു.

     ⁵ യഹോവേ, ആകാശം ചായിച്ച് ഇറങ്ങിവരണമേ;

     പർവ്വതങ്ങൾ പുകയുവാൻ തക്കവണ്ണം അവയെ തൊടണമേ.

     ⁶ മിന്നൽ അയച്ച് അവരെ ചിതറിക്കണമേ;

     നിന്റെ അസ്ത്രങ്ങൾ എയ്ത് അവരെ തോല്പിക്കണമേ.

     ⁷ ഉയരത്തിൽനിന്നു തൃക്കൈ നീട്ടി എന്നെ വിടുവിക്കണമേ;

     പെരുവെള്ളത്തിൽനിന്നും അന്യജനതകളുടെ കൈയിൽനിന്നും എന്നെ രക്ഷിക്കണമേ!

     ⁸ അവരുടെ വായ് ഭോഷ്ക് സംസാരിക്കുന്നു;

     അവരുടെ വലങ്കൈ വ്യാജമുള്ള വലങ്കയ്യാകുന്നു.

     ⁹ ദൈവമേ, ഞാൻ നിനക്ക് പുതിയ ഒരു പാട്ടുപാടും;

     പത്തു കമ്പിയുള്ള വീണകൊണ്ട് ഞാൻ നിനക്ക് കീർത്തനം ചെയ്യും.

     ¹⁰ നീ രാജാക്കന്മാർക്കു ജയം നല്കുകയും

     നിന്റെ ദാസനായ ദാവീദിനെ മരണകരമായ വാളിൽനിന്ന്

     രക്ഷിക്കുകയും ചെയ്യുന്നുവല്ലോ.

     ¹¹ അന്യജനതകളുടെ കൈയിൽനിന്ന് എന്നെ വിടുവിച്ച് രക്ഷിക്കണമേ;

     അവരുടെ വായ് ഭോഷ്കു സംസാരിക്കുന്നു;

     അവരുടെ വലങ്കൈ വ്യാജമുള്ള വലങ്കയ്യാകുന്നു.

     ¹² ഞങ്ങളുടെ പുത്രന്മാർ ബാല്യത്തിൽ തഴച്ചു വളരുന്ന തൈകൾപോലെയും

     ഞങ്ങളുടെ പുത്രിമാർ അരമനയ്ക്കായി കൊത്തിയ മൂലത്തൂണുകൾപോലെയും ആയിരിക്കട്ടെ.

     ¹³ ഞങ്ങളുടെ കളപ്പുരകൾ വിവിധ ധാന്യം നല്കുവാന്തക്കവണ്ണം നിറഞ്ഞിരിക്കട്ടെ.

     ഞങ്ങളുടെ ആടുകൾ ഞങ്ങളുടെ പുല്പുറങ്ങളിൽ ആയിരമായും പതിനായിരമായും പെറ്റുപെരുകട്ടെ.

     ¹⁴ ഞങ്ങളുടെ കാളകൾ ചുമടു ചുമക്കട്ടെ;

     മതിൽ തകർക്കുന്നതും പടയ്ക്കു പുറപ്പെടുന്നതും ഞങ്ങളുടെ വീഥികളിൽ നിലവിളിയും ഇല്ലാതെയിരിക്കട്ടെ.

     ¹⁵ ഈ സ്ഥിതിയിൽ ഇരിക്കുന്ന ജനം ഭാഗ്യമുള്ളത്;

     യഹോവ ദൈവമായിരിക്കുന്ന ജനം ഭാഗ്യമുള്ളതു തന്നെ.

സങ്കീർത്തനം.144 145

     ¹ എന്റെ ദൈവമായ രാജാവേ, ഞാൻ നിന്നെ പുകഴ്ത്തും;

     ഞാൻ നിന്റെ നാമത്തെ എന്നെന്നേക്കും വാഴ്ത്തും.

     ² ദിനംതോറും ഞാൻ നിന്നെ വാഴ്ത്തും;

     ഞാൻ നിന്റെ നാമത്തെ എന്നെന്നേക്കും സ്തുതിക്കും.

     ³ യഹോവ വലിയവനും അത്യന്തം സ്തുത്യനും ആകുന്നു;

     അവന്റെ മഹിമ അഗോചരമത്രേ.

     ⁴ ഒരു തലമുറ മറ്റൊരു തലമുറയോട് നിന്റെ ക്രിയകളെ പുകഴ്ത്തി

     നിന്റെ വീര്യപ്രവൃത്തികളെ പ്രസ്താവിക്കും.

     ⁵ നിന്റെ പ്രതാപത്തിന്റെ തേജസ്സുള്ള മഹത്വത്തെയും

     നിന്റെ അത്ഭുതകാര്യങ്ങളെയും ഞാൻ ധ്യാനിക്കും.

     ⁶ മനുഷ്യർ നിന്റെ മഹാപ്രവൃത്തികളുടെ ശക്തിയെപ്പറ്റി പ്രസ്താവിക്കും;

     ഞാൻ നിന്റെ മഹിമ വർണ്ണിക്കും.

     ⁷ അവർ നിന്റെ വലിയ നന്മയുടെ ഓർമ്മ പ്രസിദ്ധമാക്കും;

     നിന്റെ നീതിയെക്കുറിച്ച് ഘോഷിച്ചുല്ലസിക്കും.

     ⁸ യഹോവ കൃപയും കരുണയും

     ദീർഘക്ഷമയും മഹാദയയും ഉള്ളവൻ.

     ⁹ യഹോവ എല്ലാവർക്കും നല്ലവൻ;

     തന്റെ സകലപ്രവൃത്തികളോടും അവന് കരുണ തോന്നുന്നു.

     ¹⁰ യഹോവേ, നിന്റെ സകലപ്രവൃത്തികളും നിനക്കു സ്തോത്രം ചെയ്യും;

     നിന്റെ ഭക്തന്മാർ നിന്നെ വാഴ്ത്തും.

     ¹¹ മനുഷ്യപുത്രന്മാരോട് അവന്റെ വീര്യപ്രവൃത്തികളും

     അവർ നിന്റെ രാജത്വത്തിന്റെ തേജസ്സുള്ള പ്രതാപവും പ്രസ്താവിക്കേണ്ടതിന്

     ¹² അവർ നിന്റെ രാജ്യത്തിന്റെ മഹത്വം പ്രസിദ്ധമാക്കി

     നിന്റെ ശക്തിയെക്കുറിച്ച് സംസാരിക്കും.

     ¹³ നിന്റെ രാജത്വം നിത്യരാജത്വം ആകുന്നു;

     നിന്റെ ആധിപത്യം തലമുറതലമുറയായി ഇരിക്കുന്നു.

     ¹⁴ വീഴുന്നവരെ എല്ലാം യഹോവ താങ്ങുന്നു;

     കുനിഞ്ഞിരിക്കുന്നവരെ എന്റെ അടുക്കൽഅവൻ നിവിർത്തുന്നു.

     ¹⁵ എല്ലാവരുടെയും കണ്ണുകൾ നിന്നെ നോക്കി കാത്തിരിക്കുന്നു;

     നീ തത്സമയത്ത് അവർക്ക് ഭക്ഷണം കൊടുക്കുന്നു.

     ¹⁶ നീ തൃക്കൈ തുറന്ന്

     ജീവനുള്ളതിനെല്ലാം നിന്റെ പ്രസാദം കൊണ്ട് തൃപ്തിവരുത്തുന്നു.

     ¹⁷ യഹോവ തന്റെ സകലവഴികളിലും നീതിമാനും

     തന്റെ സകലപ്രവൃത്തികളിലും ദയാലുവും ആകുന്നു.

     ¹⁸ യഹോവ, തന്നെ വിളിച്ചപേക്ഷിക്കുന്ന ഏവർക്കും,

     സത്യമായി തന്നെ വിളിച്ചപേക്ഷിക്കുന്ന ഏവർക്കും, സമീപസ്ഥനാകുന്നു.

     ¹⁹ തന്റെ ഭക്തന്മാരുടെ ആഗ്രഹം അവൻ സാധിപ്പിക്കും;

     അവരുടെ നിലവിളി കേട്ട് അവരെ രക്ഷിക്കും.

     ²⁰ യഹോവ തന്നെ സ്നേഹിക്കുന്ന ഏവരെയും പരിപാലിക്കുന്നു;

     എന്നാൽ സകല ദുഷ്ടന്മാരെയും അവൻ നശിപ്പിക്കും;

     ²¹ എന്റെ വായ് യഹോവയുടെ സ്തുതി പ്രസ്താവിക്കും;

     സകല ജഡവും അവന്റെ വിശുദ്ധനാമത്തെ എന്നെന്നേക്കും വാഴ്ത്തട്ടെ.

സങ്കീർത്തനം.145 146

     ¹ യഹോവയെ സ്തുതിക്കുവിൻ;

     എൻ മനമേ, യഹോവയെ സ്തുതിക്കുക.

     ² ആയുഷ്ക്കാലം മുഴുവൻ ഞാൻ യഹോവയെ സ്തുതിക്കും;

     ഞാൻ ഉള്ള കാലത്തോളം എന്റെ ദൈവത്തിനു കീർത്തനം ചെയ്യും.

     ³ നിങ്ങൾ പ്രഭുക്കന്മാരിൽ ആശ്രയിക്കരുത്;

     സഹായിക്കുവാൻ കഴിയാത്ത മനുഷ്യപുത്രനിലും അരുത്.

     ⁴ അവന്റെ ശ്വാസം പോകുന്നു; അവൻ മണ്ണിലേക്കു മടങ്ങുന്നു;

     അന്നു തന്നെ അവന്റെ നിരൂപണങ്ങൾ നശിക്കുന്നു.

     ⁵ യാക്കോബിന്റെ ദൈവം സഹായമായി

     തന്റെ ദൈവമായ യഹോവയിൽ പ്രത്യാശയുള്ളവൻ ഭാഗ്യവാൻ.

     ⁶ അവൻ ആകാശവും ഭൂമിയും സമുദ്രവും

     അവയിലുള്ള സകലവും ഉണ്ടാക്കി;

     അവൻ എന്നേക്കും വിശ്വസ്തനായിരിക്കുന്നു.

     ⁷ പീഡിതന്മാർക്ക് അവൻ ന്യായം പാലിച്ചു കൊടുക്കുന്നു;

     വിശപ്പുള്ളവർക്ക് അവൻ ആഹാരം നല്കുന്നു;

     യഹോവ ബദ്ധന്മാർക്ക് സ്വാതന്ത്ര്യം നൽകുന്നു.

     ⁸ യഹോവ കുരുടന്മാർക്ക് കാഴ്ച കൊടുക്കുന്നു;

     യഹോവ കുനിഞ്ഞിരിക്കുന്നവരെ നിവിർത്തുന്നു;

     യഹോവ നീതിമാന്മാരെ സ്നേഹിക്കുന്നു.

     ⁹ യഹോവ പരദേശികളെ പരിപാലിക്കുന്നു;

     അവൻ അനാഥനെയും വിധവയെയും സംരക്ഷിക്കുന്നു;

     എന്നാൽ ദുഷ്ടന്മാരുടെ വഴി അവൻ മറിച്ചുകളയുന്നു.

     ¹⁰ യഹോവ എന്നേക്കും വാഴും;

     സീയോനേ, നിന്റെ ദൈവം തലമുറതലമുറയോളം തന്നെ.

     യഹോവയെ സ്തുതിക്കുവിൻ.

സങ്കീർത്തനം.146 147

     ¹ യഹോവയെ സ്തുതിക്കുവിൻ;

     നമ്മുടെ ദൈവത്തിന് കീർത്തനം പാടുന്നത് നല്ലത്;

     അത് മനോഹരവും സ്തുതി ഉചിതവും തന്നെ.

     ² യഹോവ യെരൂശലേമിനെ പണിയുന്നു;

     അവൻ യിസ്രായേലിന്റെ ഭ്രഷ്ടന്മാരെ കൂട്ടിച്ചേർക്കുന്നു.

     ³ മനം തകർന്നവരെ അവൻ സൗഖ്യമാക്കുകയും

     അവരുടെ മുറിവുകൾ കെട്ടുകയും ചെയ്യുന്നു.

     ⁴ അവൻ നക്ഷത്രങ്ങളുടെ എണ്ണം നോക്കുന്നു;

     അവയ്ക്ക് എല്ലാം പേര് വിളിക്കുന്നു.

     ⁵ നമ്മുടെ കർത്താവ് വലിയവനും ശക്തിയേറിയവനും ആകുന്നു;

     അവന്റെ വിവേകത്തിന് അന്തമില്ല.

     ⁶ യഹോവ താഴ്മയുള്ളവനെ ഉയർത്തുന്നു;

     അവൻ ദുഷ്ടന്മാരെ നിലത്ത് തള്ളിയിടുന്നു.

     ⁷ സ്തോത്രത്തോടെ യഹോവയ്ക്കു പാടുവിൻ;

     കിന്നരത്തോടെ നമ്മുടെ ദൈവത്തിന് കീർത്തനം ചെയ്യുവിൻ;

     ⁸ അവൻ ആകാശത്തെ മേഘംകൊണ്ടു മൂടുന്നു;

     ഭൂമിക്കായി മഴ ഒരുക്കുന്നു;

     അവൻ പർവ്വതങ്ങളിൽ പുല്ലു മുളപ്പിക്കുന്നു.

     ⁹ അവൻ മൃഗങ്ങൾക്കും കരയുന്ന കാക്കക്കുഞ്ഞുങ്ങൾക്കും

     അതതിന്റെ ആഹാരം കൊടുക്കുന്നു.

     ¹⁰ അശ്വബലത്തിൽ അവൻ സന്തോഷിക്കുന്നില്ല;

     പുരുഷന്റെ ശക്തിയിൽ പ്രസാദിക്കുന്നതുമില്ല.

     ¹¹ തന്നെ ഭയപ്പെടുകയും തന്റെ ദയയിൽ പ്രത്യാശ വയ്ക്കുകയും

     ചെയ്യുന്നവരിൽ യഹോവ പ്രസാദിക്കുന്നു.

     ¹² യെരൂശലേമേ, യഹോവയെ പുകഴ്ത്തുക;

     സീയോനേ, നിന്റെ ദൈവത്തെ വാഴ്ത്തുക;

     ¹³ അവൻ നിന്റെ വാതിലുകളുടെ ഓടാമ്പലുകൾ ഉറപ്പിച്ച്

     നിന്റെ അകത്ത് നിന്റെ മക്കളെ അനുഗ്രഹിച്ചിരിക്കുന്നു.

     ¹⁴ അവൻ നിന്റെ ദേശത്ത് സമാധാനം വരുത്തുന്നു;

     വിശേഷമായ ഗോതമ്പുകൊണ്ട് നിനക്കു തൃപ്തിവരുത്തുന്നു.

     ¹⁵ അവൻ തന്റെ ആജ്ഞ ഭൂമിയിലേക്ക് അയയ്ക്കുന്നു;

     അവന്റെ വചനം അതിവേഗം ഓടുന്നു.

     ¹⁶ അവൻ പഞ്ഞിപോലെ മഞ്ഞു പെയ്യിക്കുന്നു;

     ചാരംപോലെ ഹിമകണങ്ങൾ വിതറുന്നു.

     ¹⁷ അവൻ മഞ്ഞുകട്ടകൾ ചരൽ പോലെ എറിയുന്നു;

     അവന്റെ കുളിര് സഹിച്ചു നില്ക്കുന്നവനാര്?

     ¹⁸ അവൻ തന്റെ വാക്കിനാൽ അവ ഉരുക്കുന്നു;

     കാറ്റ് അടിപ്പിച്ച് അതിൽനിന്ന് വെള്ളം ഒഴുക്കുന്നു.

     ¹⁹ അവൻ യാക്കോബിന് തന്റെ വചനവും

     യിസ്രായേലിന് തന്റെ ചട്ടങ്ങളും വിധികളും വെളിപ്പെടുത്തുന്നു.

     ²⁰ അങ്ങനെ യാതൊരു ജനതയ്ക്കും അവൻ ചെയ്തിട്ടില്ല;

     അവന്റെ വിധികൾ അവർ അറിഞ്ഞിട്ടുമില്ല.

     യഹോവയെ സ്തുതിക്കുവിൻ.

സങ്കീർത്തനം.147 148

     ¹ യഹോവയെ സ്തുതിക്കുവിൻ;

     സ്വർഗ്ഗത്തിൽനിന്ന് യഹോവയെ സ്തുതിക്കുവിൻ;

     ഉന്നതങ്ങളിൽ അവനെ സ്തുതിക്കുവിൻ.

     ² അവന്റെ സകല ദൂതന്മാരുമേ, അവനെ സ്തുതിക്കുവിൻ;

     അവന്റെ സർവ്വസൈന്യവുമേ, അവനെ സ്തുതിക്കുവിൻ;

     ³ സൂര്യചന്ദ്രന്മാരെ അവനെ സ്തുതിക്കുവിൻ;

     പ്രകാശമുള്ള സകല നക്ഷത്രങ്ങളുമേ, അവനെ സ്തുതിക്കുവിൻ.

     ⁴ സ്വർഗ്ഗാധിസ്വർഗ്ഗവും ആകാശത്തിനു മീതെയുള്ള വെള്ളവും

     ആയുള്ളവയേ, അവനെ സ്തുതിക്കുവിൻ.

     ⁵ അവൻ കല്പിച്ചിട്ട് അവ സൃഷ്ടിക്കപ്പെട്ടിരിക്കുകയാൽ

     അവ യഹോവയുടെ നാമത്തെ സ്തുതിക്കട്ടെ.

     ⁶ അവൻ അവയെ സദാകാലത്തേക്കും സ്ഥിരമാക്കി;

     ലംഘിക്കരുതാത്ത ഒരു നിയമം വച്ചിരിക്കുന്നു.

     ⁷ തിമിംഗലങ്ങളും എല്ലാ ആഴികളുമേ,

     ഭൂമിയിൽനിന്ന് യഹോവയെ സ്തുതിക്കുവിൻ.

     ⁸ തീയും കല്മഴയും ഹിമവും, കാർമേഘവും

     അവന്റെ വചനം അനുസരിക്കുന്ന കൊടുങ്കാറ്റും,

     ⁹ പർവ്വതങ്ങളും എല്ലാ കുന്നുകളും,

     ഫലവൃക്ഷങ്ങളും സകലദേവദാരുക്കളും,

     ¹⁰ മൃഗങ്ങളും സകല കന്നുകാലികളും,

     ഇഴജന്തുക്കളും പറവജാതികളും,

     ¹¹ ഭൂമിയിലെ രാജാക്കന്മാരും സകലവംശങ്ങളും,

     ഭൂമിയിലെ പ്രഭുക്കന്മാരും സകലന്യായാധിപന്മാരും,

     ¹² യുവാക്കളും യുവതികളും,

     വൃദ്ധന്മാരും ബാലന്മാരും,

     ¹³ ഇവരൊക്കയും യഹോവയുടെ നാമത്തെ സ്തുതിക്കട്ടെ;

     അവന്റെ നാമം മാത്രമാകുന്നു ഉയർന്നിരിക്കുന്നത്.

     അവന്റെ മഹത്വം ഭൂമിക്കും ആകാശത്തിനും മുകളിലായിരിക്കുന്നു.

     ¹⁴ തന്നോട് അടുത്തിരിക്കുന്ന ജനമായി

     യിസ്രായേൽമക്കളായ തന്റെ സകലഭക്തന്മാർക്കും പുകഴ്ചയായി

     അവൻ സ്വജനത്തിന് ഒരു കൊമ്പ് ഉയർത്തിയിരിക്കുന്നു.

     യഹോവയെ സ്തുതിക്കുവിൻ.

സങ്കീർത്തനം.148 149

     ¹ യഹോവയെ സ്തുതിക്കുവിൻ;

     യഹോവയ്ക്ക് ഒരു പുതിയ പാട്ടും

     ഭക്തന്മാരുടെ സഭയിൽ അവന്റെ സ്തുതിയും പാടുവിൻ.

     ² യിസ്രായേൽ അവരെ ഉണ്ടാക്കിയവനിൽ സന്തോഷിക്കട്ടെ;

     സീയോന്റെ മക്കൾ അവരുടെ രാജാവിൽ ആനന്ദിക്കട്ടെ.

     ³ അവർ നൃത്തം ചെയ്തുകൊണ്ട് അവന്റെ നാമത്തെ സ്തുതിക്കട്ടെ;

     തപ്പിനോടും കിന്നരത്തോടും കൂടി അവന് കീർത്തനം ചെയ്യട്ടെ.

     ⁴ യഹോവ തന്റെ ജനത്തിൽ പ്രസാദിക്കുന്നു;

     താഴ്മയുള്ളവരെ അവൻ രക്ഷകൊണ്ട് അലങ്കരിക്കും.

     ⁵ ഭക്തന്മാർ മഹത്വത്തിൽ ആനന്ദിക്കട്ടെ;

     അവർ അവരുടെ ശയ്യകളിൽ ഘോഷിച്ചുല്ലസിക്കട്ടെ.

     ⁶ അവരുടെ വായിൽ ദൈവത്തിന്റെ പുകഴ്ചകളും

     അവരുടെ കൈയിൽ ഇരുവായ്ത്തലയുള്ള വാളും ഉണ്ടായിരിക്കട്ടെ.

     ജനതകൾക്കു പ്രതികാരവും വംശങ്ങൾക്കു ശിക്ഷയും നടത്തേണ്ടതിനും

     ⁷ അവരുടെ രാജാക്കന്മാരെ ചങ്ങലകളാലും

     അവരുടെ പ്രഭുക്കന്മാരെ ഇരിമ്പുവിലങ്ങുകളാലും ബന്ധിക്കേണ്ടതിനും

     ⁸ എഴുതിയിരിക്കുന്ന വിധി അവരുടെമേൽ നടത്തേണ്ടതിനും തന്നെ.

     ⁹ അത് അവന്റെ സർവ്വഭക്തന്മാർക്കും ബഹുമാനം ആകുന്നു.

     യഹോവയെ സ്തുതിക്കുവിൻ.

സങ്കീർത്തനം.149 150

     ¹ യഹോവയെ സ്തുതിക്കുവിൻ;

     ദൈവത്തെ അവന്റെ വിശുദ്ധമന്ദിരത്തിൽ സ്തുതിക്കുവിൻ;

     അവന്റെ ബലമുള്ള ആകാശവിതാനത്തിൽ അവനെ സ്തുതിക്കുവിൻ.

     ² അവന്റെ വീര്യപ്രവൃത്തികൾനിമിത്തം അവനെ സ്തുതിക്കുവിൻ;

     അവന്റെ മഹിമാധിക്യത്തിനു തക്കവണ്ണം അവനെ സ്തുതിക്കുവിൻ.

     ³ കാഹളനാദത്തോടെ അവനെ സ്തുതിക്കുവിൻ;

     വീണയോടും കിന്നരത്തോടും കൂടി അവനെ സ്തുതിക്കുവിൻ.

     ⁴ തപ്പിനോടും നൃത്തത്തോടും കൂടി അവനെ സ്തുതിക്കുവിൻ;

     തന്ത്രിനാദത്തോടും കുഴലിനോടും കൂടി അവനെ സ്തുതിക്കുവിൻ.

     ⁵ ഉച്ചനാദമുള്ള കൈത്താളങ്ങളോടെ അവനെ സ്തുതിക്കുവിൻ;

     അത്യുച്ചനാദമുള്ള കൈത്താളങ്ങളോടെ അവനെ സ്തുതിക്കുവിൻ.

     ⁶ ജീവനുള്ളതൊക്കെയും യഹോവയെ സ്തുതിക്കട്ടെ;

     യഹോവയെ സ്തുതിക്കുവിൻ.