സദൃശവാക്യങ്ങൾ

Chapter 1

¹ യിസ്രായേൽ രാജാവായിരുന്ന ദാവീദിന്റെ മകനായ ശലോമോന്റെ സദൃശവാക്യങ്ങൾ.

     ² ജ്ഞാനവും പ്രബോധനവും പ്രാപിക്കുവാനും

     വിവേകവചനങ്ങളെ ഗ്രഹിക്കുവാനും

     ³ പരിജ്ഞാനം, നീതി, ന്യായം, സത്യം എന്നിവയ്ക്കായി പ്രബോധനം ലഭിക്കുവാനും

     ⁴ അല്പബുദ്ധികൾക്ക് സൂക്ഷ്മബുദ്ധിയും

     ബാലന് പരിജ്ഞാനവും വകതിരിവും നല്കുവാനും

     ⁵ ജ്ഞാനി കേട്ടിട്ട് വിദ്യാഭിവൃദ്ധി പ്രാപിക്കുവാനും,

     ബുദ്ധിമാൻ സദുപദേശം സമ്പാദിക്കുവാനും

     ⁶ സദൃശവാക്യങ്ങളും അലങ്കാരവചനങ്ങളും

     ജ്ഞാനികളുടെ മൊഴികളും കടങ്കഥകളും ഗ്രഹിക്കുവാനും അവ ഉപകരിക്കുന്നു.

     ⁷ യഹോവാഭക്തി ജ്ഞാനത്തിന്റെ ആരംഭമാകുന്നു;

     ഭോഷന്മാർ ജ്ഞാനവും പ്രബോധനവും നിരസിക്കുന്നു.

     ⁸ മകനേ, അപ്പന്റെ പ്രബോധനം കേൾക്കുക;

     അമ്മയുടെ ഉപദേശം ഉപേക്ഷിക്കുകയും അരുത്;

     ⁹ അവ നിന്റെ ശിരസ്സിന് അലങ്കാരമാലയും

     നിന്റെ കഴുത്തിന് ആഭരണവും ആയിരിക്കും.

     ¹⁰ മകനേ, പാപികൾ നിന്നെ വശീകരിച്ചാൽ അവർക്കു വഴങ്ങരുത്.

     ¹¹ “ഞങ്ങളോടുകൂടി വരുക; നാം രക്തത്തിനായി പതിയിരിക്കുക;

     നിർദ്ദോഷിയെ കാരണം കൂടാതെ പിടിക്കുവാൻ ഒളിച്ചിരിക്കുക.

     ¹² പാതാളംപോലെ അവരെ ജീവനോടെയും

     കുഴിയിൽ ഇറങ്ങുന്നവരെപ്പോലെ അവരെ സർവ്വാംഗമായും വിഴുങ്ങിക്കളയുക.

     ¹³ നമുക്ക് വിലയേറിയ സമ്പത്തൊക്കെയും കിട്ടും;

     നമ്മുടെ വീടുകളെ കൊള്ളകൊണ്ട് നിറയ്ക്കാം.

     ¹⁴ നിനക്ക് ഞങ്ങളോടൊപ്പം തുല്യഓഹരി കിട്ടും;

     നമുക്ക് എല്ലാവർക്കും സഞ്ചി ഒന്നായിരിക്കും” എന്നിങ്ങനെ അവർ പറഞ്ഞാൽ,

     ¹⁵ മകനേ, നീ അവരുടെ വഴിക്ക് പോകരുത്;

     നിന്റെ കാല് അവരുടെ പാതയിൽ വയ്ക്കുകയും അരുത്.

     ¹⁶ അവരുടെ കാല് ദോഷം ചെയ്യുവാൻ ഓടുന്നു;

     രക്തം ചൊരിയിക്കുവാൻ അവർ ബദ്ധപ്പെടുന്നു.

     ¹⁷ പക്ഷി കാൺകെ വലവിരിക്കുന്നത് വ്യർത്ഥമല്ലയോ.

     ¹⁸ അവർ സ്വന്ത രക്തത്തിനായി പതിയിരിക്കുന്നു;

     സ്വന്തപ്രാണഹാനിക്കായി ഒളിച്ചിരിക്കുന്നു.

     ¹⁹ ദുരാഗ്രഹികളായ എല്ലാരുടെയും വഴികൾ അങ്ങനെ തന്നെ;

     അത് അവരുടെ ജീവനെ എടുത്തുകളയുന്നു.

     ²⁰ ജ്ഞാനം വീഥിയിൽ ഘോഷിക്കുന്നു;

     അവൾ വിശാലസ്ഥലത്ത് സ്വരം കേൾപ്പിക്കുന്നു.

     ²¹ അവൾ ആരവമുള്ള തെരുക്കളുടെ തലയ്ക്കൽനിന്ന് വിളിക്കുന്നു;

     നഗരകവാടങ്ങളിലും നഗരത്തിനകത്തും പ്രസ്താവിക്കുന്നത്:

     ²² “ബുദ്ധിഹീനരേ, നിങ്ങൾ ബുദ്ധീഹിനതയിൽ രസിക്കുകയും

     പരിഹാസികളേ, നിങ്ങൾ പരിഹാസത്തിൽ സന്തോഷിക്കുകയും

     ഭോഷന്മാരേ, നിങ്ങൾ പരിജ്ഞാനത്തെ വെറുക്കുകയും ചെയ്യുന്നത് എത്രത്തോളം?

     ²³ എന്റെ ശാസനയ്ക്ക് തിരിഞ്ഞുകൊള്ളുവിൻ;

     ഞാൻ എന്റെ മനസ്സ് നിങ്ങൾക്ക് പകർന്നുതരും;

     എന്റെ വചനങ്ങൾ നിങ്ങളെ അറിയിക്കും.

     ²⁴ ഞാൻ വിളിച്ചിട്ട് നിങ്ങൾ ശ്രദ്ധിക്കാതെയും

     ഞാൻ കൈ നീട്ടിയിട്ട് ആരും കൂട്ടാക്കാതെയും

     ²⁵ നിങ്ങൾ എന്റെ ആലോചന എല്ലാം ത്യജിച്ചുകളയുകയും

     എന്റെ ശാസനയെ ഒട്ടും അനുസരിക്കാതിരിക്കുകയും ചെയ്തതുകൊണ്ട്

     ²⁶ ഞാനും നിങ്ങളുടെ അനർത്ഥദിവസത്തിൽ ചിരിക്കും;

     നിങ്ങൾ ഭയപ്പെടുന്നത് നിങ്ങൾക്ക് ഭവിക്കുമ്പോൾ പരിഹസിക്കും.

     ²⁷ നിങ്ങൾ ഭയപ്പെടുന്നത് നിങ്ങൾക്ക് കൊടുങ്കാറ്റുപോലെയും

     നിങ്ങളുടെ ആപത്ത് ചുഴലിക്കാറ്റുപോലെയും വരുമ്പോൾ,

     കഷ്ടവും സങ്കടവും നിങ്ങൾക്ക് വരുമ്പോൾ തന്നേ.

     ²⁸ അപ്പോൾ അവർ എന്നെ വിളിക്കും;

     ഞാൻ ഉത്തരം പറയുകയില്ല.

     എന്നെ ജാഗ്രതയോടെ അന്വേഷിക്കും; കണ്ടെത്തുകയുമില്ല.

     ²⁹ അവർ പരിജ്ഞാനത്തെ വെറുത്തുവല്ലോ;

     യഹോവാഭക്തിയെ തിരഞ്ഞെടുത്തതുമില്ല.

     ³⁰ അവർ എന്റെ ആലോചന അനുസരിക്കാതെ

     എന്റെ ശാസന എല്ലാം നിരസിച്ച് കളഞ്ഞതുകൊണ്ട്

     ³¹ അവർ സ്വന്തവഴിയുടെ ഫലം അനുഭവിക്കുകയും

     അവരുടെ ആലോചനകളാൽ തൃപ്തി പ്രാപിക്കുകയും ചെയ്യും.

     ³² ബുദ്ധിഹീനരുടെ പിന്മാറ്റം അവരെ കൊല്ലും;

     ഭോഷന്മാരുടെ അലസത അവരെ നശിപ്പിക്കും.

     ³³ എന്റെ വാക്ക് കേൾക്കുന്നവനോ നിർഭയം വസിക്കുകയും

     ദോഷഭയം കൂടാതെ സ്വൈരമായിരിക്കുകയും ചെയ്യും”.

അദ്ധ്യായം.1 2

¹ മകനേ, ജ്ഞാനത്തിന് ചെവികൊടുക്കുകയും

     ബോധത്തിന് നിന്റെ ഹൃദയം ചായിക്കുകയും ചെയ്യേണ്ടതിന്

     ² എന്റെ വചനങ്ങളെ കൈക്കൊണ്ട്

     എന്റെ കല്പനകളെ നിന്റെ ഉള്ളിൽ സംഗ്രഹിച്ചാൽ,

     ³ നീ ബോധത്തിനായി വിളിച്ച്

     വിവേകത്തിനായി ശബ്ദം ഉയർത്തുന്നു എങ്കിൽ,

     ⁴ അതിനെ വെള്ളിയെപ്പോലെ അന്വേഷിച്ച്

     നിക്ഷേപങ്ങളെപ്പോലെ തിരയുന്നു എങ്കിൽ,

     ⁵ നീ യഹോവാഭക്തി ഗ്രഹിക്കുകയും

     ദൈവപരിജ്ഞാനം കണ്ടെത്തുകയും ചെയ്യും.

     ⁶ യഹോവയല്ലയോ ജ്ഞാനം നല്കുന്നത്;

     അവന്റെ വായിൽനിന്ന് പരിജ്ഞാനവും വിവേകവും വരുന്നു.

     ⁷ അവൻ നേരുള്ളവർക്ക് രക്ഷ സംഗ്രഹിച്ചുവയ്ക്കുന്നു:

     നഷ്കളങ്കമായി നടക്കുന്നവർക്ക് അവൻ ഒരു പരിച തന്നെ.

     ⁸ അവൻ ന്യായത്തിന്റെ പാതകളെ കാക്കുന്നു;

     തന്റെ വിശുദ്ധന്മാരുടെ വഴിയെ സൂക്ഷിക്കുന്നു.

     ⁹ അങ്ങനെ നീ നീതിയും ന്യായവും സത്യവും

     സകലസന്മാർഗ്ഗവും ഗ്രഹിക്കും.

     ¹⁰ ജ്ഞാനം നിന്റെ ഹൃദയത്തിൽ പ്രവേശിക്കും;

     പരിജ്ഞാനം നിന്റെ മനസ്സിന് ഇമ്പമായിരിക്കും.

     ¹¹ വകതിരിവ് നിന്നെ കാക്കും;

     വിവേകം നിന്നെ സൂക്ഷിക്കും.

     ¹² അത് നിന്നെ ദുഷ്ടന്റെ വഴിയിൽനിന്നും

     വക്രത പറയുന്നവരുടെ കൂട്ടത്തിൽനിന്നും വിടുവിക്കും.

     ¹³ അവർ ഇരുട്ടുള്ള വഴികളിൽ നടക്കേണ്ടതിന്

     നേരെയുള്ള പാത വിട്ടുകളയുകയും

     ¹⁴ ദോഷപ്രവൃത്തിയിൽ സന്തോഷിക്കുകയും

     ദുഷ്ടന്റെ വക്രതയിൽ ആനന്ദിക്കുകയും ചെയ്യുന്നു.

     ¹⁵ അവർ വളഞ്ഞവഴിക്ക് പോകുന്നവരും

     നേരെയല്ലാത്ത പാതയിൽ നടക്കുന്നവരും ആകുന്നു.

     ¹⁶ അത് നിന്നെ പരസ്ത്രീയുടെ കയ്യിൽനിന്നും

     ചക്കരവാക്ക് പറയുന്ന അന്യസ്ത്രീയുടെ വശത്തുനിന്നും വിടുവിക്കും.

     ¹⁷ അവൾ തന്റെ യൗവനകാന്തനെ ഉപേക്ഷിച്ച്

     തന്റെ ദൈവത്തിന്റെ നിയമം മറന്നുകളഞ്ഞിരിക്കുന്നു.

     ¹⁸ അവളുടെ വീട് മരണത്തിലേക്കും

     അവളുടെ പാതകൾ മരിച്ചവരുടെ അടുക്കലേക്കും ചാഞ്ഞിരിക്കുന്നു.

     ¹⁹ അവളുടെ അടുക്കൽ ചെല്ലുന്ന ഒരുത്തനും മടങ്ങിവരുന്നില്ല;

     ജീവന്റെ പാതകളെ പ്രാപിക്കുന്നതുമില്ല.

     ²⁰ അതുകൊണ്ട് നീ സജ്ജനത്തിന്റെ വഴിയിൽ നടന്ന്

     നീതിമാന്മാരുടെ പാതകളെ പ്രമാണിച്ചുകൊള്ളുക.

     ²¹ നേരുള്ളവർ ദേശത്ത് വസിക്കും;

     നിഷ്കളങ്കന്മാർ അതിൽ ശേഷിച്ചിരിക്കും.

     ²² എന്നാൽ ദുഷ്ടന്മാർ ദേശത്തുനിന്ന് ഛേദിക്കപ്പെടും;

     ദ്രോഹികൾ അതിൽനിന്ന് നിർമ്മൂലമാകും.

അദ്ധ്യായം.2 3

¹ മകനേ, എന്റെ ഉപദേശം മറക്കരുത്;

     നിന്റെ ഹൃദയം എന്റെ കല്പനകൾ കാത്തുകൊള്ളട്ടെ.

     ² അവ ദീർഘായുസ്സും ജീവകാലവും

     സമാധാനവും നിനക്ക് വർദ്ധിപ്പിച്ചുതരും.

     ³ ദയയും വിശ്വസ്തതയും നിന്നെ വിട്ടുപോകരുത്;

     അവയെ നിന്റെ കഴുത്തിൽ കെട്ടിക്കൊള്ളുക;

     നിന്റെ ഹൃദയത്തിന്റെ പലകയിൽ എഴുതിക്കൊള്ളുക.

     ⁴ അങ്ങനെ നീ ദൈവത്തിന്റെയും മനുഷ്യരുടെയും ദൃഷ്ടിയിൽ

     ലാവണ്യവും സൽബുദ്ധിയും പ്രാപിക്കും.

     ⁵ പൂർണ്ണഹൃദയത്തോടെ യഹോവയിൽ ആശ്രയിക്കുക;

     സ്വന്ത വിവേകത്തിൽ ആശ്രയിക്കരുത്.

     ⁶ നിന്റെ എല്ലാവഴികളിലും അവിടുത്തെ അംഗീകരിച്ചുകൊള്ളുക;

     അവിടുന്ന് നിന്റെ പാതകളെ നേരെയാക്കും;

     ⁷ നിനക്ക് തന്നെ നീ ജ്ഞാനിയായി തോന്നരുത്;

     യഹോവയെ ഭയപ്പെട്ട് ദോഷം വിട്ടകലുക.

     ⁸ അതു നിന്റെ നാഭിക്ക് ആരോഗ്യവും

     അസ്ഥികൾക്ക് തണുപ്പും ആയിരിക്കും.

     ⁹ യഹോവയെ നിന്റെ ധനംകൊണ്ടും

     എല്ലാ വിളവിന്റെയും ആദ്യഫലംകൊണ്ടും ബഹുമാനിക്കുക.

     ¹⁰ അങ്ങനെ നിന്റെ കളപ്പുരകൾ സമൃദ്ധിയായി നിറയും;

     നിന്റെ ചക്കുകളിൽ വീഞ്ഞ് കവിഞ്ഞൊഴുകും.

     ¹¹ മകനേ, യഹോവയുടെ ശിക്ഷ നിരസിക്കരുത്;

     അവിടുത്തെ ശാസനയിൽ മുഷിയുകയും അരുത്.

     ¹² അപ്പൻ ഇഷ്ടപുത്രനോട് ചെയ്യുന്നതുപോലെ

     യഹോവ താൻ സ്നേഹിക്കുന്നവനെ ശിക്ഷിക്കുന്നു.

     ¹³ ജ്ഞാനം പ്രാപിക്കുന്ന മനുഷ്യനും

     വിവേകം ലഭിക്കുന്ന മനുഷ്യനും ഭാഗ്യവാൻ.

     ¹⁴ അതിന്റെ ആദായം വെള്ളിയെക്കാളും

     അതിന്റെ ലാഭം തങ്കത്തെക്കാളും നല്ലത്.

     ¹⁵ അത് മുത്തുകളിലും വിലയേറിയത്;

     നിന്റെ മനോഹരവസ്തുക്കൾ ഒന്നും അതിന് തുല്യമാകുകയില്ല.

     ¹⁶ അതിന്റെ വലങ്കയ്യിൽ ദീർഘായുസ്സും

     ഇടങ്കയ്യിൽ ധനവും മാനവും ഇരിക്കുന്നു.

     ¹⁷ അതിന്റെ വഴികൾ സന്തുഷ്ടവും

     അതിന്റെ പാതകളെല്ലാം സമാധാനവും ആകുന്നു.

     ¹⁸ അതിനെ പിടിച്ചുകൊള്ളുന്നവർക്ക് അത് ജീവ വൃക്ഷം;

     അതിനെ കരസ്ഥമാക്കുന്നവർ ഭാഗ്യവാന്മാർ.

     ¹⁹ ജ്ഞാനത്താൽ യഹോവ ഭൂമിയെ സ്ഥാപിച്ചു;

     വിവേകത്താൽ അവിടുന്ന് ആകാശത്തെ ഉറപ്പിച്ചു.

     ²⁰ അവിടുത്തെ പരിജ്ഞാനത്താൽ ആഴങ്ങൾ പിളർന്നു;

     മേഘങ്ങൾ മഞ്ഞ് പൊഴിക്കുന്നു.

     ²¹ മകനേ, ജ്ഞാനവും വകതിരിവും കാത്തുകൊള്ളുക;

     അവ നിന്റെ ദൃഷ്ടിയിൽനിന്ന് മാറിപ്പോകരുത്.

     ²² അവ നിനക്ക് ജീവനും

     നിന്റെ കഴുത്തിന് അലങ്കാരവും ആയിരിക്കും.

     ²³ അങ്ങനെ നീ നിർഭയമായി വഴിയിൽ നടക്കും;

     നിന്റെ കാല് ഇടറുകയുമില്ല.

     ²⁴ നീ കിടക്കുവാൻ പോകുമ്പോൾ നിനക്ക് പേടി ഉണ്ടാകുകയില്ല;

     കിടക്കുമ്പോൾ നിന്റെ ഉറക്കം സുഖകരമായിരിക്കും.

     ²⁵ പെട്ടെന്നുള്ള വിപത്ത് ഹേതുവായും

     ദുഷ്ടന്മാർക്ക് വരുന്ന നാശംനിമിത്തവും നീ ഭയപ്പെടുകയില്ല.

     ²⁶ യഹോവ നിന്റെ ആശ്രയമായിരിക്കും;

     അവിടുന്ന് നിന്റെ കാല് കെണിയിൽപ്പെടാതെ കാക്കും.

     ²⁷ നന്മ ചെയ്യുവാൻ നിനക്ക് പ്രാപ്തിയുള്ളപ്പോൾ

     അതിന് യോഗ്യന്മാരായിരിക്കുന്നവർക്ക് ചെയ്യാതിരിക്കരുത്.

     ²⁸ നിന്റെ കയ്യിൽ ഉള്ളപ്പോൾ കൂട്ടുകാരനോട്:

     “പോയിവരുക, നാളെത്തരാം ” എന്ന് പറയരുത്.

     ²⁹ കൂട്ടുകാരൻ സമീപത്ത് നിർഭയം വസിക്കുമ്പോൾ,

     അവന്റെ നേരെ ദോഷം നിരൂപിക്കരുത്.

     ³⁰ നിനക്ക് ഒരു ദോഷവും ചെയ്യാത്ത മനുഷ്യനോട്

     നീ വെറുതെ കലഹിക്കരുത്.

     ³¹ സാഹസക്കാരനോട് നീ അസൂയപ്പെടരുത്;

     അവന്റെ വഴികൾ ഒന്നും തിരഞ്ഞെടുക്കുകയുമരുത്.

     ³² വക്രതയുള്ളവൻ യഹോവയ്ക്ക് വെറുപ്പാകുന്നു;

     നീതിമാന്മാരോട് അവിടുത്തേയ്ക്ക് സഖ്യത ഉണ്ട്.

     ³³ യഹോവയുടെ ശാപം ദുഷ്ടന്റെ വീട്ടിൽ ഉണ്ട്;

     നീതിമാന്മാരുടെ വാസസ്ഥലത്തെയോ അവിടുന്ന് അനുഗ്രഹിക്കുന്നു.

     ³⁴ പരിഹാസികളെ അവിടുന്ന് പരിഹസിക്കുന്നു;

     എളിയവർക്കോ അവിടുന്ന് കൃപ നല്കുന്നു.

     ³⁵ ജ്ഞാനികൾ ബഹുമാനത്തെ അവകാശമാക്കും;

     ഭോഷന്മാരുടെ ഉയർച്ചയോ അപമാനം തന്നേ.

അദ്ധ്യായം.3 4

¹ മക്കളേ, അപ്പന്റെ പ്രബോധനം കേട്ട്

     വിവേകം പ്രാപിക്കേണ്ടതിന് ശ്രദ്ധിക്കുവിൻ.

     ² ഞാൻ നിങ്ങൾക്ക് സൽബുദ്ധി ഉപദേശിച്ചുതരുന്നു;

     എന്റെ ഉപദേശം നിങ്ങൾ ഉപേക്ഷിക്കരുത്.

     ³ ഞാൻ എന്റെ അപ്പന് മകനും

     എന്റെ അമ്മയ്ക്ക് ഓമനയും ഏകപുത്രനും ആയിരുന്നു;

     ⁴ അവൻ എന്നെ പഠിപ്പിച്ച്, എന്നോട് പറഞ്ഞത്:

     “എന്റെ വചനങ്ങളെ ഹൃദയത്തിൽ സംഗ്രഹിച്ചുകൊള്ളുക;

     എന്റെ കല്പനകളെ പ്രമാണിച്ച് ജീവിക്കുക.

     ⁵ ജ്ഞാനം സമ്പാദിക്കുക: വിവേകം നേടുക; മറക്കരുത്;

     എന്റെ വചനങ്ങളെ വിട്ടുമാറുകയും അരുത്.

     ⁶ അതിനെ ഉപേക്ഷിക്കരുത്; അത് നിന്നെ കാക്കും;

     അതിൽ പ്രിയം വയ്ക്കുക; അത് നിന്നെ സൂക്ഷിക്കും;

     ⁷ ജ്ഞാനംതന്നെ പ്രധാനം; ജ്ഞാനം സമ്പാദിക്കുക;

     നിന്റെ സകലസമ്പാദ്യം കൊണ്ടും വിവേകം നേടുക.

     ⁸ അതിനെ ഉയർത്തുക; അത് നിന്നെ ഉയർത്തും;

     അതിനെ ആലിംഗനം ചെയ്താൽ അത് നിനക്ക് മാനം വരുത്തും.

     ⁹ അത് നിന്റെ തലയെ അലങ്കാരമാല അണിയിക്കും;

     അത് നിന്നെ ഒരു മഹത്വകിരീടം ചൂടിക്കും.

     ¹⁰ മകനേ കേട്ട് എന്റെ വചനങ്ങളെ കൈക്കൊള്ളുക;

     എന്നാൽ നിനക്ക് ദീർഘായുസ്സുണ്ടാകും.

     ¹¹ ജ്ഞാനത്തിന്റെ മാർഗ്ഗം ഞാൻ നിന്നെ ഉപദേശിക്കുന്നു;

     നേരെയുള്ള പാതയിൽ ഞാൻ നിന്നെ നടത്തുന്നു.

     ¹² നടക്കുമ്പോൾ നിന്റെ കാലടികൾ തടസ്സം നേരിടുകയില്ല ;

     ഓടുമ്പോൾ നീ ഇടറുകയുമില്ല.

     ¹³ പ്രബോധനം മുറുകെ പിടിക്കുക; വിട്ടുകളയരുത്;

     അതിനെ കാത്തുകൊള്ളുക, അത് നിന്റെ ജീവനല്ലയോ.

     ¹⁴ ദുഷ്ടന്മാരുടെ പാതയിൽ നീ ചെല്ലരുത്;

     ദുർജ്ജനത്തിന്റെ വഴിയിൽ നടക്കുകയും അരുത്;

     ¹⁵ അതിനോട് അകന്നുനില്ക്കുക; അതിൽ നടക്കരുത്;

     അത് വിട്ടുമാറി കടന്നുപോകുക.

     ¹⁶ അവർ ദോഷം ചെയ്തിട്ടല്ലാതെ ഉറങ്ങുകയില്ല;

     ആരെയെങ്കിലും വീഴിച്ചിട്ടല്ലാതെ അവർക്ക് ഉറക്കം വരുകയില്ല.

     ¹⁷ ദുഷ്ടതയുടെ ആഹാരംകൊണ്ട് അവർ ഉപജീവിക്കുന്നു;

     ബലാല്ക്കാരത്തിന്റെ വീഞ്ഞ് അവർ പാനം ചെയ്യുന്നു.

     ¹⁸ നീതിമാന്മാരുടെ പാതയോ പ്രഭാതത്തിന്റെ വെളിച്ചംപോലെ;

     അത് നട്ടുച്ചവരെ അധികമധികം ശോഭിച്ചുവരുന്നു.

     ¹⁹ ദുഷ്ടന്മാരുടെ വഴി അന്ധകാരംപോലെയാകുന്നു;

     ഏതിൽ തട്ടി വീഴും എന്ന് അവർ അറിയുന്നില്ല.

     ²⁰ മകനേ, എന്റെ വചനങ്ങൾക്ക് ശ്രദ്ധതരുക;

     എന്റെ മൊഴികൾക്ക് നിന്റെ ചെവി ചായിക്കുക.

     ²¹ അവ നിന്റെ ദൃഷ്ടിയിൽനിന്ന് മാറിപ്പോകരുത്;

     നിന്റെ ഹൃദയത്തിന്റെ നടുവിൽ അവയെ സൂക്ഷിച്ചുവയ്ക്കുക.

     ²² അവയെ കിട്ടുന്നവർക്ക് അവ ജീവനും

     അവരുടെ മുഴുവൻശരീരത്തിനും സൗഖ്യവും ആകുന്നു.

     ²³ സകലജാഗ്രതയോടുംകൂടി നിന്റെ ഹൃദയത്തെ കാത്തുകൊള്ളുക;

     ജീവന്റെ ഉത്ഭവം അതിൽനിന്നല്ലയോ ആകുന്നത്.

     ²⁴ വായുടെ വക്രത നിന്നിൽനിന്ന് നീക്കിക്കളയുക;

     അധരങ്ങളുടെ വികടം നിന്നിൽനിന്ന് അകറ്റുക.

     ²⁵ നിന്റെ കണ്ണ് നേരെ നോക്കട്ടെ;

     നിന്റെ ദൃഷ്ടി മുമ്പോട്ട് തന്നെ ആയിരിക്കട്ടെ.

     ²⁶ നിന്റെ കാലുകളുടെ പാത നിരപ്പാക്കുക;

     നിന്റെ വഴികളെല്ലാം സ്ഥിരമായിരിക്കട്ടെ.

     ²⁷ ഇടത്തോട്ടോ വലത്തോട്ടോ തിരിയരുത്;

     നിന്റെ കാലുകൾ തിന്മയിൽനിന്ന് അകലുമാറാക്കുക.

അദ്ധ്യായം.4 5

¹ മകനേ, വകതിരിവ് കാത്തുകൊള്ളേണ്ടതിനും

     നിന്റെ അധരങ്ങൾ പരിജ്ഞാനം പാലിക്കേണ്ടതിനും

     ² ജ്ഞാനം ശ്രദ്ധിച്ച്

     എന്റെ തിരിച്ചറിവിലേക്ക് ചെവി ചായിക്കുക.

     ³ പരസ്ത്രീയുടെ അധരങ്ങളിൽനിന്ന് തേൻ ഇറ്റിറ്റ് വീഴുന്നു;

     അവളുടെ അണ്ണാക്ക് എണ്ണയെക്കാൾ മൃദുവാകുന്നു.

     ⁴ പിന്നീട് അവൾ കാഞ്ഞിരംപോലെ കയ്പും

     ഇരുവായ്ത്തലവാൾപോലെ മൂർച്ചയും ഉള്ളവൾ തന്നെ.

     ⁵ അവളുടെ കാലുകൾ മരണത്തിലേക്ക് ഇറങ്ങിച്ചെല്ലുന്നു;

     അവളുടെ കാലടികൾ പാതാളത്തിലേക്ക് ഓടുന്നു.

     ⁶ ജീവന്റെ മാർഗ്ഗത്തിൽ ചെല്ലാത്തവിധം

     അവളുടെ പാതകൾ അസ്ഥിരമായിരിക്കുന്നു; അവൾ അത് അറിയുന്നതുമില്ല.

     ⁷ ആകയാൽ മക്കളേ, എന്റെ വാക്ക് കേൾക്കുവിൻ;

     എന്റെ വായിലെ മൊഴികൾ വിട്ടുമാറരുത്.

     ⁸ നിന്റെ വഴി അവളിൽ നിന്ന് അകറ്റുക;

     അവളുടെ വീടിന്റെ വാതിലിനോട് അടുക്കരുത്.

     ⁹ നിന്റെ യൗവനശക്തി അന്യന്മാർക്കും

     നിന്റെ ആണ്ടുകൾ ക്രൂരനും കൊടുക്കരുത്.

     ¹⁰ അന്യർ നിന്റെ സമ്പത്ത് തിന്നുകളയരുത്;

     നിന്റെ പ്രയത്നഫലം അന്യരുടെ വീട്ടിലേക്ക് പോകുകയുമരുത്.

     ¹¹ നിന്റെ മാംസവും ദേഹവും ക്ഷയിച്ചിട്ട്

     നീ ഒടുവിൽ നെടുവീർപ്പിട്ടുകൊണ്ട്:

     ¹² “അയ്യോ! ഞാൻ പ്രബോധനം വെറുക്കുകയും

     എന്റെ ഹൃദയം ശാസന നിരസിക്കുകയും ചെയ്തുവല്ലോ!.

     ¹³ എന്റെ ഉപദേഷ്ടാക്കന്മാരുടെ വാക്ക് ഞാൻ അനുസരിച്ചില്ല;

     എന്നെ പ്രബോധിപ്പിച്ചവർക്ക് ഞാൻ ചെവികൊടുത്തില്ല.

     ¹⁴ സഭയുടെയും സംഘത്തിന്റെയും മദ്ധ്യത്തിൽ ഞാൻ ഏകദേശം സകലദോഷത്തിലും അകപ്പെട്ടുപോയല്ലോ”

     എന്നിങ്ങനെ പറയുവാൻ സംഗതിവരരുത്.

     ¹⁵ നിന്റെ സ്വന്തം ജലാശയത്തിലെ ജലവും

     സ്വന്തം കിണറ്റിൽനിന്ന് ഒഴുകുന്ന വെള്ളവും കുടിക്കുക.

     ¹⁶ നിന്റെ ഉറവുകൾ വെളിയിലേക്കും

     നിന്റെ നീരൊഴുക്കുകൾ വീഥിയിലേക്കും ഒഴുകിപ്പോകണമോ?

     ¹⁷ അവ നിനക്കും അന്യന്മാർക്കും കൂടെയല്ല

     നിനക്ക് മാത്രമേ ഇരിക്കാവു.

     ¹⁸ നിന്റെ ഉറവ് അനുഗ്രഹിക്കപ്പെട്ടിരിക്കട്ടെ;

     നിന്റെ യൗവനത്തിലെ ഭാര്യയിൽ സന്തോഷിച്ചുകൊള്ളുക.

     ¹⁹ കൗതുകമുള്ള പേടമാനും മനോഹരമായ ഇളമാൻപേടയുംപോലെ

     അവളുടെ സ്തനങ്ങൾ എല്ലാകാലത്തും നിന്നെ രമിപ്പിക്കട്ടെ;

     അവളുടെ പ്രേമത്താൽ നീ എല്ലായ്പോഴും മത്തനായിരിക്കുക.

     ²⁰ മകനേ, നീ പരസ്ത്രീയെ കണ്ട് ഭ്രമിക്കുന്നതും

     അന്യസ്ത്രീയുടെ മാറിടം തഴുകുന്നതും എന്ത്?

     ²¹ മനുഷ്യന്റെ വഴികൾ യഹോവയുടെ ദൃഷ്ടിയിൽ ഇരിക്കുന്നു;

     അവന്റെ നടപ്പ് എല്ലാം അവൻ ശോധന ചെയ്യുന്നു.

     ²² ദുഷ്ടന്റെ അകൃത്യങ്ങൾ അവനെ പിടികൂടും;

     തന്റെ പാപപാശങ്ങളാൽ അവൻ പിടിക്കപെടും.

     ²³ പ്രബോധനം കേൾക്കായ്കയാൽ അവൻ മരിക്കും;

     മഹാഭോഷത്തത്താൽ അവൻ വഴിതെറ്റിപ്പോകും.

അദ്ധ്യായം.5 6

¹ മകനേ, കൂട്ടുകാരനു വേണ്ടി നീ ജാമ്യം നില്ക്കുകയോ

     അന്യനു വേണ്ടി കൈയടിച്ച് ഉറപ്പ് നൽകുകയോ ചെയ്തിട്ടുണ്ടെങ്കിൽ,

     ² നിന്റെ വായിലെ വാക്കുകളാൽ നീ ചതിക്കപ്പെട്ടു;

     നിന്റെ വായിലെ മൊഴികളാൽ നീ കെണിയിലായി.

     ³ ആകയാൽ മകനേ, ഇത് ചെയ്യുക; നിന്നെത്തന്നെ വിടുവിക്കുക;

     കൂട്ടുകാരന്റെ കൈകളിൽ നീ അകപ്പെട്ടുപോയല്ലോ;

     നീ ചെന്ന്, താണുവീണ് കൂട്ടുകാരനോട് മുട്ടിപ്പായി അപേക്ഷിക്കുക.

     ⁴ നിന്റെ കണ്ണിന് ഉറക്കവും

     നിന്റെ കൺപോളകൾക്ക് നിദ്രയും കൊടുക്കരുത്.

     ⁵ മാൻ നായാട്ടുകാരന്റെ കൈയിൽനിന്നും

     പക്ഷി വേട്ടക്കാരന്റെ കൈയിൽനിന്നും

     എന്നപോലെ നീ നിന്നെത്തന്നെ വിടുവിക്കുക,

     ⁶ മടിയാ, ഉറുമ്പിന്റെ അടുക്കൽ ചെല്ലുക;

     അതിന്റെ വഴികൾ നോക്കി ബുദ്ധിപഠിക്കുക.

     ⁷ അതിന് നായകനും മേൽവിചാരകനും

     അധിപതിയും ഇല്ലാതിരുന്നിട്ടും

     ⁸ വേനല്ക്കാലത്ത് തന്റെ ആഹാരം ഒരുക്കുന്നു;

     കൊയ്ത്തുകാലത്ത് തന്റെ ഭക്ഷണം ശേഖരിക്കുന്നു.

     ⁹ മടിയാ, നീ എത്രനേരം കിടന്നുറങ്ങും?

     എപ്പോൾ ഉറക്കത്തിൽ നിന്നെഴുന്നേല്ക്കും?

     ¹⁰ കുറേക്കൂടെ ഉറക്കം; കുറേക്കൂടെ നിദ്ര;

     കുറേക്കൂടെ കൈകെട്ടിക്കിടപ്പ്.

     ¹¹ അങ്ങനെ നിന്റെ ദാരിദ്ര്യം വഴിപോക്കനെപ്പോലെയും

     നിന്റെ ബുദ്ധിമുട്ട് ആയുധധാരിയെപ്പോലെയും വരും.

     ¹² നിസ്സാരനും ദുഷ്കർമ്മിയുമായവൻ

     വായുടെ വക്രതയോടെ നടക്കുന്നു.

     ¹³ അവൻ കണ്ണിമയ്ക്കുന്നു; കാൽകൊണ്ട് തോണ്ടുന്നു;

     വിരൽകൊണ്ട് ആംഗ്യം കാണിക്കുന്നു.

     ¹⁴ അവന്റെ ഹൃദയത്തിൽ വക്രതയുണ്ട്;

     അവൻ എല്ലായ്പോഴും ദോഷം നിരൂപിച്ച് വഴക്കുണ്ടാക്കുന്നു.

     ¹⁵ അതുകൊണ്ട് അവന്റെ ആപത്ത് പെട്ടെന്ന് വരും;

     ക്ഷണത്തിൽ അവൻ തകർന്നുപോകും; പരിഹാരമുണ്ടാകുകയുമില്ല.

     ¹⁶ ആറു കാര്യം യഹോവ വെറുക്കുന്നു;

     ഏഴു കാര്യം അവന് അറപ്പാകുന്നു:

     ¹⁷ ഗർവ്വമുള്ള കണ്ണും വ്യാജമുള്ള നാവും

     കുറ്റമില്ലാത്ത രക്തം ചൊരിയുന്ന കൈയും

     ¹⁸ ദുരുപായം നിരൂപിക്കുന്ന ഹൃദയവും

     ദോഷത്തിനു ബദ്ധപ്പെട്ട് ഓടുന്ന കാലും

     ¹⁹ ഭോഷ്ക് പറയുന്ന കള്ളസാക്ഷിയും

     സഹോദരന്മാരുടെ ഇടയിൽ വഴക്കുണ്ടാക്കുന്നവനും തന്നെ.

     ²⁰ മകനേ, നിന്റെ അപ്പന്റെ കല്പന പ്രമാണിക്കുക;

     അമ്മയുടെ ഉപദേശം ഉപേക്ഷിക്കുകയുമരുത്.

     ²¹ അത് എല്ലായ്പോഴും നിന്റെ ഹൃദയത്തോട് ബന്ധിച്ചുകൊള്ളുക;

     നിന്റെ കഴുത്തിൽ അത് കെട്ടിക്കൊള്ളുക.

     ²² നീ നടക്കുമ്പോൾ അത് നിനക്ക് വഴികാണിക്കും.

     നീ ഉറങ്ങുമ്പോൾ അത് നിന്നെ കാക്കും;

     നീ ഉണരുമ്പോൾ അത് നിന്നോട് സംസാരിക്കും.

     ²³ കല്പന ഒരു ദീപവും ഉപദേശം ഒരു വെളിച്ചവും

     പ്രബോധനത്തിന്റെ ശാസനകൾ ജീവന്റെ മാർഗ്ഗവും ആകുന്നു.

     ²⁴ അവ ദുഷ്ടസ്ത്രീയുടെ വശീകരണത്തിൽ നിന്നും

     പരസ്ത്രീയുടെ ചക്കരവാക്കുകളിൽനിന്നും നിന്നെ രക്ഷിക്കും.

     ²⁵ അവളുടെ സൗന്ദര്യത്തെ നിന്റെ ഹൃദയത്തിൽ മോഹിക്കരുത്;

     അവൾ കണ്ണിമകൊണ്ട് നിന്നെ വശീകരിക്കുകയുമരുത്.

     ²⁶ വേശ്യാസ്ത്രീനിമിത്തം പുരുഷൻ ഉണങ്ങിയ അപ്പക്കഷണം പോലെയായിപ്പോകും;

     വ്യഭിചാരിണി വിലയേറിയ ജീവനെ വേട്ടയാടുന്നു.

     ²⁷ ഒരു മനുഷ്യനു തന്റെ വസ്ത്രം വെന്തുപോകാതെ

     മടിയിൽ തീ കൊണ്ടുവരാമോ?

     ²⁸ ഒരുത്തനു കാൽ പൊള്ളാതെ

     തീക്കനലിന്മേൽ നടക്കാമോ?

     ²⁹ കൂട്ടുകാരന്റെ ഭാര്യയുടെ അടുക്കൽ ചെല്ലുന്നവൻ ഇങ്ങനെ തന്നെ;

     അവളെ തൊടുന്ന ഒരുത്തനും ശിക്ഷ വരാതെയിരിക്കുകയില്ല.

     ³⁰ കള്ളൻ വിശന്നിട്ട് വിശപ്പടക്കുവാൻ മാത്രം മോഷ്ടിച്ചാൽ

     ആരും അവനെ നിന്ദിക്കുന്നില്ല.

     ³¹ അവൻ പിടിക്കപ്പെട്ടാൽ അവൻ ഏഴിരട്ടി മടക്കിക്കൊടുക്കണം;

     തന്റെ വീട്ടിലെ വസ്തുവക ഒക്കെയും കൊടുക്കേണ്ടിവരാം;

     ³² സ്ത്രീയോട് വ്യഭിചാരം ചെയ്യുന്നവനോ, ബുദ്ധിഹീനൻ;

     അങ്ങനെ ചെയ്യുന്നവൻ സ്വന്തപ്രാണനെ നശിപ്പിക്കുന്നു.

     ³³ പ്രഹരവും അപമാനവും അവനു ലഭിക്കും;

     അവന്റെ നിന്ദ മാഞ്ഞുപോകുകയുമില്ല.

     ³⁴ ജാരശങ്ക പുരുഷന് ക്രോധഹേതുവാകുന്നു;

     പ്രതികാരദിവസത്തിൽ അവൻ ഇളവ് നൽകുകയില്ല.

     ³⁵ അവൻ യാതൊരു നഷ്ടപരിഹാരവും സ്വീകരിക്കുകയില്ല;

     എത്ര സമ്മാനം കൊടുത്താലും അവൻ തൃപ്തിപ്പെടുകയുമില്ല.

അദ്ധ്യായം.6 7

¹ മകനേ, എന്റെ വചനങ്ങൾ പ്രമാണിച്ച്

     എന്റെ കല്പനകൾ നിന്റെ ഉള്ളിൽ സംഗ്രഹിച്ചുകൊള്ളുക.

     ² നീ ജീവിച്ചിരിക്കേണ്ടതിന് എന്റെ കല്പനകളെയും ഉപദേശത്തെയും

     നിന്റെ കണ്ണിന്റെ കൃഷ്ണമണിപോലെ കാത്തുകൊള്ളുക.

     ³ നിന്റെ വിരലിന്മേൽ അവയെ കെട്ടുക;

     ഹൃദയത്തിന്റെ പലകയിൽ എഴുതുക.

     ⁴ ജ്ഞാനത്തോട്: “നീ എന്റെ സഹോദരി” എന്ന് പറയുക;

     വിവേകത്തെ സഖി എന്ന് വിളിക്കുക.

     ⁵ അവ നിന്നെ പരസ്ത്രീയുടെ കൈയിൽ നിന്നും

     ചക്കരവാക്ക് പറയുന്ന അന്യസ്ത്രീയുടെ വശത്തുനിന്നും കാക്കും.

     ⁶ ഞാൻ എന്റെ വീടിന്റെ കിളിവാതില്ക്കൽ

     അഴികൾക്ക് ഇടയിലൂടെ നോക്കിക്കൊണ്ടിരിക്കുമ്പോൾ

     ⁷ ഭോഷന്മാരുടെ ഇടയിൽ ഒരുവനെ കണ്ടു;

     യൗവനക്കാരുടെ കൂട്ടത്തിൽ ബുദ്ധിഹീനനായ ഒരു യുവാവിനെ കണ്ടറിഞ്ഞു.

     ⁸ അവൻ വൈകുന്നേരം, സന്ധ്യാസമയത്ത്,

     ഇരുട്ടും അന്ധകാരവുമുള്ള ഒരു രാത്രിയിൽ,

     ⁹ അവളുടെ വീടിന്റെ കോണിനരികെ വീഥിയിൽകൂടി കടന്ന്,

     അവളുടെ വീട്ടിലേക്കുള്ള വഴിയിൽ കൂടിനടന്നുചെല്ലുന്നു.

     ¹⁰ പെട്ടെന്ന് ഇതാ ഒരു സ്ത്രീ, വേശ്യാവസ്ത്രം ധരിച്ചും,

     ഹൃദയത്തിൽ ഉപായം നിരൂപിച്ചും, അവനെ എതിരേറ്റുവരുന്നു.

     ¹¹ അവൾ മോഹപരവശയും തന്നിഷ്ടക്കാരിയും ആകുന്നു;

     അവളുടെ കാല് വീട്ടിൽ അടങ്ങിയിരിക്കുകയില്ല.

     ¹² ഇപ്പോൾ അവളെ വീഥിയിലും പിന്നെ വിശാലസ്ഥലത്തും കാണാം;

     ഓരോ കോണിലും അവൾ പതിയിരിക്കുന്നു.

     ¹³ അവൾ അവനെ പിടിച്ചുചുംബിച്ച്,

     ലജ്ജകൂടാതെ അവനോട് പറയുന്നത്

     ¹⁴ “എനിക്ക് സമാധാനയാഗങ്ങൾ ഉണ്ടായിരുന്നു;

     ഇന്ന് ഞാൻ എന്റെ നേർച്ചകൾ കഴിച്ചിരിക്കുന്നു.

     ¹⁵ അതുകൊണ്ട് ഞാൻ നിന്നെ കാണുവാൻ ആഗ്രഹിച്ച്

     നിന്നെ എതിരേല്ക്കുവാൻ പുറപ്പെട്ട് നിന്നെ കണ്ടെത്തിയിരിക്കുന്നു.

     ¹⁶ ഞാൻ എന്റെ കട്ടിലിന്മേൽ പരവതാനികളും

     ഈജിപ്റ്റിലെ നൂൽകൊണ്ടുള്ള വർണ്ണവിരികളും വിരിച്ചിരിക്കുന്നു.

     ¹⁷ മൂറും അകിലും ലവംഗവുംകൊണ്ട്

     ഞാൻ എന്റെ മെത്ത സുഗന്ധമാക്കിയിരിക്കുന്നു.

     ¹⁸ വരുക; വെളുക്കുംവരെ നമുക്ക് പ്രേമത്തിൽ രമിക്കാം;

     കാമവിലാസങ്ങളാൽ നമുക്ക് സുഖിക്കാം.

     ¹⁹ പുരുഷൻ വീട്ടിൽ ഇല്ല;

     ദൂരയാത്ര പോയിരിക്കുന്നു;

     ²⁰ പണമടിശ്ശീല കൂടെ കൊണ്ടുപോയിട്ടുണ്ട്;

     പൗർണ്ണമാസിയിലേ വീട്ടിൽ തിരിച്ചെത്തുകയുള്ളു”.

     ²¹ ഇങ്ങനെ ഏറിയോരു ഇമ്പവാക്കുകളാൽ അവൾ അവനെ വശീകരിച്ച്

     അധരമാധുര്യംകൊണ്ട് അവനെ നിർബ്ബന്ധിക്കുന്നു.

     ²² അറക്കുന്നേടത്തേക്ക് കാളയും ചങ്ങലയിലേക്ക് ഭോഷനും പോകുന്നതുപോലെയും,

     ²³ പക്ഷി ജീവഹാനിക്കുള്ളതെന്ന് അറിയാതെ

     കെണിയിലേക്ക് ബദ്ധപ്പെടുന്നതുപോലെയും

     കരളിൽ അസ്ത്രം തറയ്ക്കുവോളം അവൻ അവളുടെ പിന്നാലെ ചെല്ലുന്നു.

     ²⁴ ആകയാൽ മക്കളേ, എന്റെ വാക്ക് കേൾക്കുവിൻ;

     എന്റെ വായിലെ വചനങ്ങളെ ശ്രദ്ധിക്കുവിൻ.

     ²⁵ നിന്റെ മനസ്സ് അവളുടെ വഴിയിലേക്ക് ചായരുത്;

     അവളുടെ പാതകളിലേക്ക് നീ തെറ്റിച്ചെല്ലുകയുമരുത്.

     ²⁶ അവൾ വീഴിച്ച ഹതന്മാർ അനേകം പേർ;

     അവൾ കൊന്നുകളഞ്ഞവർ ആകെ വലിയ ഒരു കൂട്ടം ആകുന്നു.

     ²⁷ അവളുടെ വീട് പാതാളത്തിലേക്കുള്ള വഴിയാകുന്നു;

     അത് മരണത്തിന്റെ അറകളിലേക്ക് ചെല്ലുന്നു.

അദ്ധ്യായം.7 8

¹ ജ്ഞാനമായവൾ വിളിച്ചുപറയുന്നില്ലയോ?

     ബുദ്ധിയായവൾ തന്റെ സ്വരം ഉയർത്തുന്നില്ലയോ?

     ² അവൾ വഴിയരികിൽ കുന്നുകളുടെ മുകളിൽ,

     പാതകൾ കൂടുന്നേടത്ത് നില്ക്കുന്നു.

     ³ അവൾ പടിവാതിലുകളുടെ അരികത്തും പട്ടണവാതില്ക്കലും

     ഗോപുരദ്വാരത്തിങ്കലും ഘോഷിക്കുന്നത്: ⁴ “പുരുഷന്മാരേ, ഞാൻ നിങ്ങളോട് വിളിച്ചുപറയുന്നു;

     എന്റെ സ്വരം മനുഷ്യപുത്രന്മാരുടെ അടുക്കലേക്ക് വരുന്നു.

     ⁵ അല്പബുദ്ധികളേ, സൂക്ഷ്മബുദ്ധി ഗ്രഹിച്ചുകൊള്ളുവിൻ;

     മൂഢന്മാരേ, വിവേകഹൃദയന്മാരാകുവിൻ.

     ⁶ കേൾക്കുവിൻ, ഞാൻ ഉൽകൃഷ്ടമായത് സംസാരിക്കും;

     എന്റെ അധരങ്ങൾ തുറക്കുന്നത് നേരിന് ആയിരിക്കും.

     ⁷ എന്റെ വായ് സത്യം സംസാരിക്കും;

     ദുഷ്ടത എന്റെ അധരങ്ങൾക്ക് അറപ്പാകുന്നു.

     ⁸ എന്റെ വായിലെ മൊഴി സകലവും നീതിയാകുന്നു;

     അവയിൽ വക്രവും വികടവുമായത് ഒന്നുമില്ല.

     ⁹ അവയെല്ലാം ബുദ്ധിമാന് തെളിവും

     പരിജ്ഞാനം ലഭിച്ചവർക്ക് നേരും ആകുന്നു.

     ¹⁰ വെള്ളിയെക്കാൾ എന്റെ പ്രബോധനവും

     മേൽത്തരമായ പൊന്നിനെക്കാൾ പരിജ്ഞാനവും കൈക്കൊള്ളുവിൻ.

     ¹¹ ജ്ഞാനം മുത്തുകളെക്കാൾ നല്ലതാകുന്നു;

     ഒരുവൻ ആഗ്രഹിക്കുന്നതൊന്നും അതിന് തുല്യമാകുകയില്ല.

     ¹² ജ്ഞാനം എന്ന ഞാൻ സൂക്ഷ്മബുദ്ധിയോടൊപ്പം വസിക്കുന്നു;

     പരിജ്ഞാനവും വകതിരിവും ഞാൻ കണ്ടെത്തുന്നു.

     ¹³ യഹോവാഭക്തി ദോഷത്തെ വെറുക്കുന്നതാകുന്നു;

     ഡംഭം, അഹങ്കാരം, ദുർമാർഗ്ഗം, വക്രതയുള്ള വായ് എന്നിവ ഞാൻ പകയ്ക്കുന്നു.

     ¹⁴ ആലോചനയും പരിജ്ഞാനവും എനിക്കുള്ളത്;

     ഞാൻ തന്നെ വിവേകം; എനിക്ക് വീര്യബലം ഉണ്ട്.

     ¹⁵ ഞാൻ മുഖാന്തരം രാജാക്കന്മാർ വാഴുന്നു;

     പ്രഭുക്കന്മാർ നീതി നടത്തുന്നു.

     ¹⁶ ഞാൻ മുഖാന്തരം അധിപതിമാരും പ്രധാനികളും

     ഭൂമിയിലെ ന്യായാധിപന്മാരൊക്കെയും ആധിപത്യം നടത്തുന്നു.

     ¹⁷ എന്നെ സ്നേഹിക്കുന്നവരെ ഞാൻ സ്നേഹിക്കുന്നു;

     എന്നെ ജാഗ്രതയോടെ അന്വേഷിക്കുന്നവർ എന്നെ കണ്ടെത്തും.

     ¹⁸ എന്റെ പക്കൽ ധനവും മാനവും

     പുരാതനസമ്പത്തും നീതിയും ഉണ്ട്.

     ¹⁹ എന്റെ ഫലം പൊന്നിലും തങ്കത്തിലും

     എന്റെ ആദായം മേല്ത്തരമായ വെള്ളിയിലും നല്ലത്.

     ²⁰ എന്നെ സ്നേഹിക്കുന്നവർക്ക് വസ്തുവക അവകാശമാക്കിക്കൊടുക്കുകയും

     അവരുടെ ഭണ്ഡാരങ്ങളെ നിറയ്ക്കുകയും ചെയ്യേണ്ടതിന്

     ²¹ ഞാൻ നീതിയുടെ മാർഗ്ഗത്തിലും

     ന്യായത്തിന്റെ പാതകളിലും നടക്കുന്നു.

     ²² യഹോവ പണ്ടുപണ്ടേ തന്റെ വഴിയുടെ ആരംഭമായി,

     തന്റെ പ്രവൃത്തികളുടെ ആദ്യമായി എന്നെ ഉളവാക്കി.

     ²³ ഞാൻ പുരാതനമേ, ആദിയിൽ തന്നെ,

     ഭൂമിയുടെ ഉല്പത്തിക്ക് മുമ്പ് നിയമിക്കപ്പെട്ടിരിക്കുന്നു.

     ²⁴ ആഴങ്ങൾ ഇല്ലാതിരുന്നപ്പോൾ ഞാൻ ജനിച്ചിരിക്കുന്നു;

     വെള്ളം നിറഞ്ഞ ഉറവുകൾ ഇല്ലാതിരുന്നപ്പോൾ തന്നെ.

     ²⁵ പർവ്വതങ്ങൾ സ്ഥാപിച്ചതിനു മുമ്പെയും

     കുന്നുകൾക്കു മുമ്പെയും ഞാൻ ജനിച്ചിരിക്കുന്നു.

     ²⁶ അവിടുന്ന് ഭൂമിയെയും വയലുകളെയും

     ഭൂതലത്തിന്റെ പൊടിയുടെ തുകയെയും

     ഉണ്ടാക്കിയിട്ടില്ലാത്ത സമയത്ത് തന്നെ.

     ²⁷ അവിടുന്ന് ആകാശത്തെ ഉറപ്പിച്ചപ്പോൾ ഞാൻ അവിടെ ഉണ്ടായിരുന്നു;

     അവിടുന്ന് ആഴത്തിന്റെ ഉപരിഭാഗത്ത് വൃത്തം വരച്ചപ്പോഴും

     ²⁸ അവിടുന്ന് മീതെ മേഘങ്ങളെ ഉറപ്പിച്ചപ്പോഴും

     ആഴത്തിന്റെ ഉറവുകളെ ബലപ്പെടുത്തിയപ്പോഴും

     ²⁹ വെള്ളം അവിടുത്തെ കല്പനയെ അതിക്രമിക്കാത്തവണ്ണം

     അവിടുന്ന് സമുദ്രത്തിന് അതിരിട്ടപ്പോഴും

     ഭൂമിയുടെ അടിസ്ഥാനം ഇട്ടപ്പോഴും

     ³⁰ ഞാൻ അവിടുത്തെ അടുക്കൽ ശില്പി ആയിരുന്നു;

     ഇടവിടാതെ അവിടുത്തെ മുമ്പിൽ വിനോദിച്ചുകൊണ്ട്

     ദിനംപ്രതി അവിടുത്തെ പ്രമോദമായിരുന്നു.

     ³¹ അവിടുത്തെ ഭൂതലത്തിൽ ഞാൻ വിനോദിച്ചുകൊണ്ടിരുന്നു;

     എന്റെ പ്രമോദം മനുഷ്യപുത്രന്മാരോടുകൂടി ആയിരുന്നു.

     ³² ആകയാൽ മക്കളേ, എന്റെ വാക്ക് കേട്ടുകൊള്ളുവിൻ;

     എന്റെ വഴികളെ പ്രമാണിക്കുന്നവർ ഭാഗ്യവാന്മാർ.

     ³³ പ്രബോധനം കേട്ട് ബുദ്ധിമാന്മാരായിരിക്കുവിൻ;

     അതിനെ ത്യജിച്ചുകളയരുത്.

     ³⁴ ദിവസംപ്രതി എന്റെ പടിവാതില്ക്കൽ ജാഗരിച്ചും

     എന്റെ വാതില്ക്കൽ കാത്തുകൊണ്ടും

     എന്റെ വാക്ക് കേട്ടനുസരിക്കുന്ന മനുഷ്യൻ ഭാഗ്യവാൻ.

     ³⁵ എന്നെ കണ്ടെത്തുന്നവൻ ജീവനെ കണ്ടെത്തുന്നു;

     അവൻ യഹോവയുടെ കടാക്ഷം പ്രാപിക്കുന്നു.

     ³⁶ എന്നോടു പാപം ചെയ്യുന്നവനോ തനിക്ക് പ്രാണഹാനി വരുത്തുന്നു;

     എന്നെ ദ്വേഷിക്കുന്നവരൊക്കെയും മരണത്തെ ഇച്ഛിക്കുന്നു”.

അദ്ധ്യായം.8 9

¹ ജ്ഞാനമായവൾ തനിക്ക് ഒരു വീട് പണിതു;

     അതിന് ഏഴ് തൂണുകൾ തീർത്തു.

     ² അവൾ മൃഗങ്ങളെ അറുത്ത്, വീഞ്ഞ് കലക്കി,

     തന്റെ മേശ ഒരുക്കിയിരിക്കുന്നു.

     ³ അവൾ തന്റെ ദാസികളെ അയച്ച്

     പട്ടണത്തിലെ ഉന്നതസ്ഥലങ്ങളിൽ നിന്ന് വിളിച്ച് പറയിക്കുന്നത്:

     ⁴ “അല്പബുദ്ധിയായവൻ ഇങ്ങോട്ട് വരട്ടെ”;

     ബുദ്ധിഹീനനോട് അവൾ പറയിക്കുന്നത്;

     ⁵ “വരുവിൻ, എന്റെ അപ്പം തിന്നുകയും

     ഞാൻ കലക്കിയ വീഞ്ഞ് കുടിക്കുകയും ചെയ്യുവിൻ!

     ⁶ ബുദ്ധിഹീനരേ, ബുദ്ധിഹീനത വിട്ട് ജീവിക്കുവിൻ!

     വിവേകത്തിന്റെ മാർഗ്ഗത്തിൽ നടന്നുകൊള്ളുവിൻ”.

     ⁷ പരിഹാസിയെ ശാസിക്കുന്നവൻ ലജ്ജ സമ്പാദിക്കുന്നു;

     ദുഷ്ടനെ ഭർത്സിക്കുന്നവന് ഉപദ്രവം ഉണ്ടാകുന്നു.

     ⁸ പരിഹാസി നിന്നെ പകയ്ക്കാതിരിക്കേണ്ടതിന് അവനെ ശാസിക്കരുത്;

     ജ്ഞാനിയെ ശാസിക്കുക; അവൻ നിന്നെ സ്നേഹിക്കും.

     ⁹ ജ്ഞാനിയെ പ്രബോധിപ്പിക്കുക, അവന്റെ ജ്ഞാനം വർദ്ധിക്കും;

     നീതിമാനെ ഉപദേശിക്കുക, അവൻ വിദ്യാഭിവൃദ്ധി പ്രാപിക്കും.

     ¹⁰ യഹോവാഭക്തി ജ്ഞാനത്തിന്റെ ആരംഭവും

     പരിശുദ്ധനെക്കുറിച്ചുള്ള പരിജ്ഞാനം വിവേകവും ആകുന്നു.

     ¹¹ ഞാൻ മുഖാന്തരം നിന്റെ നാളുകൾ പെരുകും;

     നിനക്ക് ദീർഘായുസ്സ് ഉണ്ടാകും.

     ¹² നീ ജ്ഞാനിയാകുന്നുവെങ്കിൽ നിനക്കുവേണ്ടി തന്നെ ജ്ഞാനിയായിരിക്കും;

     പരിഹസിക്കുന്നു എങ്കിലോ, നീ തന്നെ സഹിക്കേണ്ടിവരും”.

     ¹³ ഭോഷത്വമായവൾ മോഹപരവശയായിരിക്കുന്നു;

     അവൾ ബുദ്ധിഹീന തന്നെ, ഒന്നും അറിയുന്നതുമില്ല.

     ¹⁴ തങ്ങളുടെ പാതയിൽ നേരെ നടക്കുന്നവരായി,

     കടന്നുപോകുന്നവരെ വിളിക്കേണ്ടതിന്

     ¹⁵ അവൾ പട്ടണത്തിലെ ഉന്നതസ്ഥാനങ്ങളിൽ

     തന്റെ വീട്ടുവാതില്ക്കൽ ഒരു പീഠത്തിന്മേൽ ഇരിക്കുന്നു.

     ¹⁶ “അല്പബുദ്ധിയായവൻ ഇങ്ങോട്ട് വരട്ടെ”;

     ബുദ്ധിഹീനനോട് അവൾ പറയുന്നത്;

     ¹⁷ “മോഷ്ടിച്ച വെള്ളം മധുരവും

     ഒളിച്ചുതിന്നുന്ന അപ്പം രുചികരവും ആകുന്നു”.

     ¹⁸ എങ്കിലും മൃതന്മാർ അവിടെ ഉണ്ടെന്നും

     അവളുടെ വിരുന്നുകാർ പാതാളത്തിന്റെ ആഴത്തിൽ

     ഇരിക്കുന്നു എന്നും അവൻ അറിയുന്നില്ല.

അദ്ധ്യായം.9 10

¹ ശലോമോന്റെ സദൃശവാക്യങ്ങൾ:

     ജ്ഞാനമുള്ള മകൻ അപ്പനെ സന്തോഷിപ്പിക്കുന്നു;

     ഭോഷനായ മകൻ അമ്മയ്ക്കു വ്യസനം ഉളവാക്കുന്നു.

     ² ദുഷ്ടതയാൽ സമ്പാദിച്ച നിക്ഷേപങ്ങൾ പ്രയോജനപ്പെടുന്നില്ല;

     നീതിയോ മരണത്തിൽനിന്ന് വിടുവിക്കുന്നു.

     ³ യഹോവ നീതിമാനെ പട്ടിണി കിടത്തുകയില്ല;

     ദുഷ്ടന്മാരുടെ മോഹത്തെയോ അവിടുന്ന് തള്ളിക്കളയുന്നു.

     ⁴ മടിയുള്ള കൈകൊണ്ട് പ്രവർത്തിക്കുന്നവൻ ദരിദ്രനായിത്തീരുന്നു;

     ഉത്സാഹിയുടെ കൈയോ സമ്പത്തുണ്ടാക്കുന്നു.

     ⁵ വേനല്ക്കാലത്ത് ശേഖരിച്ചുവയ്ക്കുന്നവൻ ബുദ്ധിയുള്ള മകൻ;

     കൊയ്ത്തുകാലത്ത് ഉറങ്ങുന്നവനോ നാണംകെട്ട മകൻ.

     ⁶ നീതിമാന്റെ ശിരസ്സിന്മേൽ അനുഗ്രഹങ്ങൾ വരുന്നു;

     എന്നാൽ ദുഷ്ടന്മാരുടെ വായെ സാഹസം മൂടുന്നു.

     ⁷ നീതിമാന്റെ ഓർമ്മ അനുഗ്രഹിക്കപ്പെട്ടത്;

     ദുഷ്ടന്മാരുടെ പേരോ ദുഷിച്ചുപോകും.

     ⁸ ജ്ഞാനഹൃദയൻ കല്പനകൾ കൈക്കൊള്ളുന്നു;

     വിടുവായനായ ഭോഷനോ വീണുപോകും.

     ⁹ നേരായി നടക്കുന്നവൻ നിർഭയമായി നടക്കുന്നു;

     നടപ്പിൽ വക്രതയുള്ളവന്റെ വഴികൾ വെളിപ്പെട്ടുവരും.

     ¹⁰ കണ്ണുകൊണ്ട് ആംഗ്യം കാട്ടുന്നവൻ ദുഃഖം വരുത്തുന്നു;

     തുറന്നു ശാസിക്കുന്നവനോ സമാധാനം ഉണ്ടാക്കുന്നു.

     ¹¹ നീതിമാന്റെ വായ് ജീവന്റെ ഉറവാകുന്നു.

     എന്നാൽ ദുഷ്ടന്മാരുടെ അധരത്തെ സാഹസം മൂടുന്നു.

     ¹² പക വഴക്കുകൾക്ക് കാരണം ആകുന്നു;

     സ്നേഹമോ, സകല ലംഘനങ്ങളെയും മൂടുന്നു.

     ¹³ വിവേകിയുടെ അധരങ്ങളിൽ ജ്ഞാനം ഉണ്ട്;

     ബുദ്ധിഹീനന്റെ മുതുകിലോ വടി വീഴും.

     ¹⁴ ജ്ഞാനികൾ പരിജ്ഞാനം അടക്കിവയ്ക്കുന്നു;

     ഭോഷന്റെ വായ്ക്കോ നാശം അടുത്തിരിക്കുന്നു.

     ¹⁵ ധനവാന്റെ സമ്പത്ത്, അവന് ഉറപ്പുള്ള ഒരു പട്ടണം;

     എളിയവരുടെ നാശമോ അവരുടെ ദാരിദ്ര്യം തന്നെ.

     ¹⁶ നീതിമാന്റെ സമ്പാദ്യം ജീവഹേതുവും

     ദുഷ്ടന്റെ ആദായം പാപകാരണവും ആകുന്നു.

     ¹⁷ പ്രബോധനം പ്രമാണിക്കുന്നവൻ ജീവമാർഗ്ഗത്തിൽ ഇരിക്കുന്നു;

     ശാസന ത്യജിക്കുന്നവനോ വഴി തെറ്റിപ്പോകുന്നു;

     ¹⁸ പക മറച്ചുവയ്ക്കുന്നവൻ വ്യാജമുള്ളവൻ;

     ഏഷണി പറയുന്നവൻ ഭോഷൻ.

     ¹⁹ വാക്ക് പെരുകിയാൽ ലംഘനം ഇല്ലാതിരിക്കുകയില്ല;

     അധരങ്ങളെ അടക്കുന്നവനോ ബുദ്ധിമാൻ.

     ²⁰ നീതിമാന്റെ നാവ് മേല്ത്തരമായ വെള്ളി;

     ദുഷ്ടന്മാരുടെ ഹൃദയമോ നിസ്സാരം.

     ²¹ നീതിമാന്റെ അധരങ്ങൾ അനേകം പേരെ പോഷിപ്പിക്കും;

     ഭോഷന്മാരോ ബുദ്ധിഹീനതയാൽ മരിക്കുന്നു.

     ²² യഹോവയുടെ അനുഗ്രഹത്താൽ സമ്പത്തുണ്ടാകുന്നു;

     അദ്ധ്വാനത്താൽ അതിനോട് ഒന്നും കൂടുന്നില്ല.

     ²³ ദോഷം ചെയ്യുന്നത് ഭോഷന് കളിയാകുന്നു;

     വിവേകി ജ്ഞാനത്തിൽ സന്തോഷിക്കുന്നു.

     ²⁴ ദുഷ്ടൻ പേടിക്കുന്നത് അവന് ഭവിക്കും;

     നീതിമാന്മാരുടെ ആഗ്രഹമോ സാധിക്കും.

     ²⁵ ചുഴലിക്കാറ്റ് കടന്നുപോകുമ്പോൾ ദുഷ്ടൻ ഇല്ലാതെയായി;

     നീതിമാനോ ശാശ്വതമായ അടിസ്ഥാനം ഉള്ളവൻ.

     ²⁶ ചൊറുക്ക പല്ലിനും പുക കണ്ണിനും എങ്ങനെയോ,

     അങ്ങനെയാകുന്നു മടിയൻ തന്നെ അയയ്ക്കുന്നവർക്ക് .

     ²⁷ യഹോവാഭക്തി ആയുസ്സ് ദീർഘമാക്കുന്നു;

     ദുഷ്ടന്മാരുടെ സംവത്സരങ്ങൾ കുറഞ്ഞുപോകും.

     ²⁸ നീതിമാന്മാരുടെ പ്രത്യാശ സന്തോഷമാകുന്നു;

     ദുഷ്ടന്മാരുടെ പ്രതീക്ഷയ്ക്ക് ഭംഗം വരും.

     ²⁹ യഹോവയുടെ വഴി നേരുള്ളവന് ഒരു ദുർഗ്ഗം;

     ദുഷ്പ്രവൃത്തിക്കാർക്ക് അത് നാശകരം.

     ³⁰ നീതിമാൻ ഒരുനാളും കുലുങ്ങിപ്പോകുകയില്ല;

     ദുഷ്ടന്മാർ ദേശത്ത് വസിക്കുകയില്ല.

     ³¹ നീതിമാന്റെ വായ് ജ്ഞാനം പുറപ്പെടുവിക്കുന്നു;

     വക്രതയുള്ള നാവ് ഛേദിക്കപ്പെടും.

     ³² നീതിമാന്റെ അധരങ്ങൾ പ്രസാദകരമായത് അറിയുന്നു;

     ദുഷ്ടന്മാരുടെ വായ് വക്രതയുള്ളതാകുന്നു.

അദ്ധ്യായം.10 11

¹ കള്ളത്തുലാസ്സ് യഹോവയ്ക്ക് വെറുപ്പ്;

     ശരിയായ തൂക്കം അവിടുത്തേക്ക് പ്രസാദകരം.

     ² അഹങ്കാരം വരുമ്പോൾ ലജ്ജയും വരുന്നു;

     താഴ്മയുള്ളവരുടെ പക്കൽ ജ്ഞാനമുണ്ട്.

     ³ നേരുള്ളവരുടെ സത്യസന്ധത അവരെ വഴിനടത്തും;

     ദ്രോഹികളുടെ വക്രത അവരെ നശിപ്പിക്കും.

     ⁴ ക്രോധദിവസത്തിൽ സമ്പത്ത് ഉപകരിക്കുന്നില്ല;

     നീതിയോ മരണത്തിൽനിന്ന് വിടുവിക്കുന്നു.

     ⁵ നിഷ്കളങ്കന്റെ നീതി അവന് നേർവഴി ഒരുക്കും;

     ദുഷ്ടൻ തന്റെ ദുഷ്ടതകൊണ്ട് വീണുപോകും.

     ⁶ നേരുള്ളവരുടെ നീതി അവരെ വിടുവിക്കും;

     ദ്രോഹികൾ അവരുടെ ദുർമ്മോഹത്താൽ പിടിക്കപ്പെടും.

     ⁷ ദുഷ്ടൻ മരിക്കുമ്പോൾ അവന്റെ പ്രതീക്ഷ നശിക്കുന്നു;

     നീതികെട്ടവരുടെ ആശയ്ക്ക് ഭംഗം വരുന്നു.

     ⁸ നീതിമാൻ കഷ്ടത്തിൽനിന്ന് രക്ഷപെടുന്നു;

     ദുഷ്ടൻ അവന് പകരം അകപ്പെടുന്നു.

     ⁹ വഷളൻ വായ്കൊണ്ട് കൂട്ടുകാരനെ നശിപ്പിക്കുന്നു;

     നീതിമാന്മാർ പരിജ്ഞാനത്താൽ വിടുവിക്കപ്പെടുന്നു.

     ¹⁰ നീതിമാന്മാർ ശുഭമായിരിക്കുമ്പോൾ പട്ടണം സന്തോഷിക്കുന്നു;

     ദുഷ്ടന്മാർ നശിക്കുമ്പോൾ ആർപ്പുവിളി ഉണ്ടാകുന്നു.

     ¹¹ നേരുള്ളവരുടെ അനുഗ്രഹംകൊണ്ട് പട്ടണം ഉയർച്ച പ്രാപിക്കുന്നു;

     ദുഷ്ടന്മാരുടെ വായ്കൊണ്ടോ അത് ഇടിഞ്ഞുപോകുന്നു.

     ¹² കൂട്ടുകാരനെ നിന്ദിക്കുന്നവൻ ബുദ്ധിഹീനൻ;

     വിവേകമുള്ളവൻ മിണ്ടാതിരിക്കുന്നു.

     ¹³ ഏഷണിക്കാരനായി നടക്കുന്നവൻ രഹസ്യം വെളിപ്പെടുത്തുന്നു;

     വിശ്വസ്തമാനസൻ കാര്യം മറച്ചുവയ്ക്കുന്നു.

     ¹⁴ മാർഗ്ഗനിർദ്ദേശം ഇല്ലാത്തയിടത്ത് ജനം അധോഗതി പ്രാപിക്കുന്നു;

     മന്ത്രിമാരുടെ ബഹുത്വത്തിലോ രക്ഷയുണ്ട്.

     ¹⁵ അന്യനുവേണ്ടി ജാമ്യം നില്ക്കുന്നവൻ അത്യന്തം വ്യസനിക്കും!

     ജാമ്യം നിൽക്കാത്തവൻ നിർഭയനായിരിക്കും.

     ¹⁶ കൃപാലുവായ സ്ത്രീ മാനം സംരക്ഷിക്കുന്നു;

     കരുണയില്ലാത്തവർ സമ്പത്ത് സൂക്ഷിക്കുന്നു.

     ¹⁷ ദയാലുവായവൻ സ്വന്തപ്രാണന് നന്മ ചെയ്യുന്നു;

     ക്രൂരനോ സ്വന്തജഡത്തെ ഉപദ്രവിക്കുന്നു.

     ¹⁸ ദുഷ്ടൻ വൃഥാലാഭം ഉണ്ടാക്കുന്നു;

     നീതി വിതയ്ക്കുന്നവന് വാസ്തവമായ പ്രതിഫലം കിട്ടും.

     ¹⁹ നീതിയിൽ സ്ഥിരപ്പെട്ടിരിക്കുന്നവൻ ജീവനെ പ്രാപിക്കുന്നു;

     ദോഷത്തെ പിന്തുടരുന്നവൻ തന്റെ മരണത്തിനായി പ്രവർത്തിക്കുന്നു.

     ²⁰ വക്രബുദ്ധികൾ യഹോവയ്ക്ക് വെറുപ്പ്;

     നിഷ്കളങ്കമാർഗ്ഗികൾ അവിടുത്തേക്ക് പ്രസാദമുള്ളവർ.

     ²¹ നിശ്ചയമായും ദുഷ്ടനു ശിക്ഷ വരാതിരിക്കുകയില്ല ;

     നീതിമാന്മാരുടെ സന്തതിയോ രക്ഷിക്കപ്പെടും.

     ²² വിവേകമില്ലാത്ത ഒരു സുന്ദരി

     പന്നിയുടെ മൂക്കിൽ പൊൻമൂക്കുത്തിപോലെ.

     ²³ നീതിമാന്മാരുടെ ആഗ്രഹം നന്മ തന്നെ;

     ദുഷ്ടന്മാരുടെ പ്രതീക്ഷയോ ക്രോധമത്രേ.

     ²⁴ ഒരുവൻ വാരിവിതറിയിട്ടും വർദ്ധിച്ചുവരുന്നു;

     മറ്റൊരുവൻ അന്യായമായി സമ്പാദിച്ചിട്ടും ദാരിദ്ര്യത്തിൽ എത്തുന്നു.

     ²⁵ ഔദാര്യമാനസൻ പുഷ്ടി പ്രാപിക്കും;

     തണുപ്പിക്കുന്നവന് തണുപ്പ് കിട്ടും.

     ²⁶ ധാന്യം പൂട്ടിയിട്ടുകൊണ്ടിരിക്കുന്നവനെ ജനങ്ങൾ ശപിക്കും;

     അത് വില്ക്കുന്നവന്റെ തലമേൽ അനുഗ്രഹം വരും.

     ²⁷ നന്മയ്ക്കായി ഉത്സാഹിക്കുന്നവൻ പ്രീതി സമ്പാദിക്കുന്നു;

     തിന്മ തേടുന്നവന് അത് തന്നെ ലഭിക്കും.

     ²⁸ തന്റെ സമ്പത്തിൽ ആശ്രയിക്കുന്നവൻ വീഴും;

     നീതിമാന്മാർ പച്ചയിലപോലെ തഴയ്ക്കും.

     ²⁹ സ്വഭവനത്തെ വലയ്ക്കുന്നവന്റെ അവകാശം വായുവത്രെ;

     ഭോഷൻ ജ്ഞാനഹൃദയന് ദാസനായിത്തീരും.

     ³⁰ നീതിമാന് ജീവവൃക്ഷം പ്രതിഫലം;

     ജ്ഞാനിയായവൻ ആത്മാക്കളെ നേടുന്നു.

     ³¹ നീതിമാന് ഭൂമിയിൽ പ്രതിഫലം കിട്ടുന്നു എങ്കിൽ

     ദുഷ്ടനും പാപിക്കും എത്ര അധികം?

അദ്ധ്യായം.11 12

¹ പ്രബോധനം ഇഷ്ടപ്പെടുന്നവൻ പരിജ്ഞാനം ഇഷ്ടപ്പെടുന്നു;

     ശാസന വെറുക്കുന്നവനോ മൂഢൻ.

     ² ഉത്തമൻ യഹോവയിൽ നിന്ന് പ്രസാദം പ്രാപിക്കുന്നു;

     ദുരുപായിക്ക് അവിടുന്ന് ശിക്ഷ വിധിക്കുന്നു.

     ³ ഒരു മനുഷ്യനും ദുഷ്ടതകൊണ്ട് സ്ഥിരപ്പെടുകയില്ല;

     നീതിമാന്മാരുടെ വേര് ഇളകിപ്പോകുകയില്ല.

     ⁴ സാമർത്ഥ്യമുള്ള സ്ത്രീ ഭർത്താവിന് ഒരു കിരീടം;

     നാണംകെട്ടവൾ അവന്റെ അസ്ഥികൾക്ക് ദ്രവത്വം.

     ⁵ നീതിമാന്മാരുടെ വിചാരങ്ങൾ ന്യായം;

     ദുഷ്ടന്മാരുടെ നിരൂപണങ്ങളോ ചതിവത്രെ.

     ⁶ ദുഷ്ടന്മാർ പ്രാണഹാനി വരുത്തുവാൻ കൂടിയാലോചിക്കുന്നു;

     നേരുള്ളവരുടെ വാക്ക് അവരെ വിടുവിക്കുന്നു.

     ⁷ ദുഷ്ടന്മാർ മറിഞ്ഞുവീണ് ഇല്ലാതെയാകും;

     നീതിമാന്മാരുടെ ഭവനം നിലനില്ക്കും.

     ⁸ മനുഷ്യൻ തന്റെ ജ്ഞാനത്തിനനുസരിച്ച് പ്രശംസിയ്ക്കപ്പെടുന്നു;

     വക്രബുദ്ധിയോ നിന്ദിയ്ക്കപ്പെടുന്നു.

     ⁹ മാന്യഭാവം നടിച്ചിട്ടും ഉപജീവനത്തിന് വകയില്ലാത്തവനെക്കാൾ

     നിസ്സാരനായി ഗണിക്കപ്പെട്ടിട്ടും ഒരു ഭൃത്യനുള്ളവൻ ശ്രേഷ്ഠൻ ആകുന്നു.

     ¹⁰ നീതിമാൻ തന്റെ മൃഗത്തിന്റെ ജീവനെക്കുറിച്ച് ശ്രദ്ധിയ്ക്കുന്നു;

     ദുഷ്ടന്മാരുടെ മനസ്സ് ക്രൂരമത്രെ.

     ¹¹ നിലം കൃഷി ചെയ്യുന്നവന് ആഹാരം സമൃദ്ധിയായി കിട്ടും;

     നിസ്സാരന്മാരെ പിൻചെല്ലുന്നവൻ ബുദ്ധിഹീനൻ.

     ¹² ദുഷ്ടൻ ദോഷികളുടെ കവർച്ച മോഹിക്കുന്നു;

     നീതിമാന്മാരുടെ വേരോ ഫലം നല്കുന്നു.

     ¹³ ദുഷ്ടൻ തന്റെ അധരങ്ങളുടെ ലംഘനത്താൽ വല്ലാത്ത കെണിയിൽപ്പെടും;

     നീതിമാൻ കഷ്ടത്തിൽനിന്ന് ഒഴിഞ്ഞുപോകും.

     ¹⁴ തന്റെ വായുടെ ഫലത്താൽ മനുഷ്യൻ നന്മ അനുഭവിച്ച് തൃപ്തനാകും;

     തന്റെ കൈകളുടെ പ്രവൃത്തിക്കു തക്കവണ്ണം അവന് പ്രതിഫലം കിട്ടും.

     ¹⁵ ഭോഷന് തന്റെ വഴി ചൊവ്വായി തോന്നുന്നു;

     ജ്ഞാനി ആലോചന കേട്ട് അനുസരിക്കുന്നു.

     ¹⁶ ഭോഷന്റെ നീരസം തൽക്ഷണം വെളിപ്പെടുന്നു;

     വിവേകമുള്ളവൻ ലജ്ജ അടക്കിവയ്ക്കുന്നു.

     ¹⁷ സത്യം പറയുന്നവൻ നീതി അറിയിക്കുന്നു;

     കള്ളസാക്ഷിയോ വഞ്ചന അറിയിക്കുന്നു.

     ¹⁸ വാളുകൊണ്ട് കുത്തുന്നതുപോലെ മൂർച്ചയായി സംസാരിക്കുന്നവർ ഉണ്ട്;

     ജ്ഞാനികളുടെ നാവോ സുഖപ്രദം.

     ¹⁹ സത്യം പറയുന്ന അധരം എന്നേക്കും നിലനില്ക്കും;

     വ്യാജം പറയുന്ന നാവോ ക്ഷണികമത്രേ.

     ²⁰ ദോഷം നിരൂപിക്കുന്നവരുടെ ഹൃദയത്തിൽ ചതിവ് ഉണ്ട്;

     സമാധാനകാംക്ഷികൾക്ക് സന്തോഷം ഉണ്ട്.

     ²¹ നീതിമാന് ഒരു തിന്മയും ഭവിക്കുകയില്ല;

     ദുഷ്ടന്മാർ അനർത്ഥംകൊണ്ട് നിറയും.

     ²² വ്യാജമുള്ള അധരങ്ങൾ യഹോവയ്ക്ക് വെറുപ്പ്;

     സത്യം പ്രവർത്തിക്കുന്നവർ അവിടുത്തേയ്ക്ക് പ്രസാദം.

     ²³ വിവേകമുള്ള മനുഷ്യൻ പരിജ്ഞാനം അടക്കിവയ്ക്കുന്നു;

     ഭോഷന്മാരുടെ ഹൃദയം ഭോഷത്തം പ്രസിദ്ധമാക്കുന്നു.

     ²⁴ ഉത്സാഹികളുടെ കൈ അധികാരം നടത്തും;

     മടിയൻ അടിമവേലയ്ക്കു പോകേണ്ടിവരും.

     ²⁵ മനോവ്യസനം നിമിത്തം മനുഷ്യന്റെ മനസ്സ് ക്ഷീണിക്കുന്നു;

     ഒരു നല്ല വാക്ക് അതിനെ സന്തോഷിപ്പിക്കുന്നു.

     ²⁶ നീതിമാൻ കൂട്ടുകാരന് വഴികാട്ടിയാകുന്നു;

     ദുഷ്ടന്മാരുടെ വഴിയോ അവരെ തെറ്റി നടക്കുമാറാക്കുന്നു.

     ²⁷ മടിയൻ ഒന്നും വേട്ടയാടിപ്പിടിക്കുന്നില്ല;

     ഉത്സാഹമോ മനുഷ്യന് വിലയേറിയ സമ്പത്താകുന്നു.

     ²⁸ നീതിയുടെ മാർഗ്ഗത്തിൽ ജീവനുണ്ട്;

     അതിന്റെ പാതയിൽ മരണം ഇല്ല.

അദ്ധ്യായം.12 13

¹ ജ്ഞാനമുള്ള മകൻ അപ്പന്റെ പ്രബോധനം കൈക്കൊള്ളുന്നു;

     പരിഹാസിയോ ശാസന കേട്ടനുസരിക്കുന്നില്ല.

     ² തന്റെ വായുടെ ഫലത്താൽ മനുഷ്യൻ നന്മ അനുഭവിക്കും;

     ദ്രോഹികളുടെ ആഗ്രഹമോ സാഹസം തന്നെ.

     ³ അധരങ്ങളെ കാത്തുകൊള്ളുന്നവൻ പ്രാണനെ സൂക്ഷിക്കുന്നു;

     അധരങ്ങളെ നിയന്ത്രിക്കാത്തവന് നാശം ഭവിക്കും.

     ⁴ മടിയൻ കൊതിച്ചിട്ടും ഒന്നും കിട്ടുന്നില്ല;

     ഉത്സാഹികളുടെ പ്രാണന് പുഷ്ടിയുണ്ടാകും.

     ⁵ നീതിമാൻ വ്യാജം വെറുക്കുന്നു;

     ദുഷ്ടൻ ലജ്ജയും നിന്ദയും വരുത്തുന്നു.

     ⁶ നീതി സന്മാർഗ്ഗിയെ കാക്കുന്നു;

     ദുഷ്ടത പാപിയെ മറിച്ചുകളയുന്നു.

     ⁷ ഒന്നും ഇല്ലാഞ്ഞിട്ടും ധനികൻ എന്ന് നടിക്കുന്നവൻ ഉണ്ട്;

     വളരെ ധനം ഉണ്ടായിട്ടും ദരിദ്രൻ എന്ന് നടിക്കുന്നവനും ഉണ്ട്;

     ⁸ മനുഷ്യന്റെ ജീവന് മറുവില അവന്റെ സമ്പത്ത് തന്നെ;

     ദരിദ്രന് ഒരു ഭീഷണിയും കേൾക്കേണ്ടിവരുന്നില്ല.

     ⁹ നീതിമാന്റെ വെളിച്ചം പ്രകാശിക്കുന്നു;

     ദുഷ്ടന്മാരുടെ വിളക്ക് കെട്ടുപോകും.

     ¹⁰ അഹങ്കാരംകൊണ്ട് കലഹം മാത്രം ഉണ്ടാകുന്നു;

     ആലോചന കേൾക്കുന്നവരുടെ പക്കൽ ജ്ഞാനം ഉണ്ട്;

     ¹¹ അന്യായമായി സമ്പാദിച്ച ധനം കുറഞ്ഞുകുറഞ്ഞ് പോകും;

     അദ്ധ്വാനിച്ച് സമ്പാദിക്കുന്നവനോ വർദ്ധിച്ചുവർദ്ധിച്ച് വരും.

     ¹² ആഗ്രഹനിവൃത്തിയുടെ താമസം ഹൃദയത്തെ ക്ഷീണിപ്പിക്കുന്നു;

     ഇച്ഛാനിവൃത്തിയോ ജീവവൃക്ഷം തന്നെ.

     ¹³ വചനത്തെ നിന്ദിക്കുന്നവൻ അതിന് ഉത്തരവാദി;

     കല്പനയെ ഭയപ്പെടുന്നവൻ പ്രതിഫലം പ്രാപിക്കുന്നു.

     ¹⁴ ജ്ഞാനിയുടെ ഉപദേശം ജീവന്റെ ഉറവാകുന്നു;

     അതിനാൽ മരണത്തിന്റെ കെണികളെ ഒഴിഞ്ഞുപോകും.

     ¹⁵ സൽബുദ്ധിയാൽ പ്രീതിയുണ്ടാകുന്നു;

     ദ്രോഹിയുടെ വഴിയോ ദുർഘടം.

     ¹⁶ സൂക്ഷ്മബുദ്ധിയുള്ള ഏവനും പരിജ്ഞാനത്തോടെ പ്രവർത്തിക്കുന്നു;

     ഭോഷനോ തന്റെ ഭോഷത്തം തെളിവായി കാണിക്കുന്നു.

     ¹⁷ ദുഷ്ടദൂതൻ ദോഷത്തിൽ അകപ്പെടുന്നു;

     വിശ്വസ്തനായ സ്ഥാനാപതിയോ സുഖം നല്കുന്നു.

     ¹⁸ പ്രബോധനം ത്യജിക്കുന്നവന് ദാരിദ്ര്യവും ലജ്ജയും വരും;

     ശാസന കൂട്ടാക്കുന്നവന് ബഹുമാനം ലഭിക്കും.

     ¹⁹ ആഗ്രഹനിവൃത്തി മനസ്സിന് മധുരമാകുന്നു;

     ദോഷം വിട്ടകലുന്നത് ഭോഷന്മാർക്ക് വെറുപ്പ്.

     ²⁰ ജ്ഞാനികളോടുകൂടി നടക്കുക; നീയും ജ്ഞാനിയാകും;

     ഭോഷന്മാർക്ക് കൂട്ടാളിയായവൻ വ്യസനിക്കേണ്ടിവരും.

     ²¹ ദോഷം പാപികളെ പിന്തുടരുന്നു;

     നീതിമാന്മാർക്ക് നന്മ പ്രതിഫലമായി വരും.

     ²² ഗുണവാൻ മക്കളുടെ മക്കൾക്ക് അവകാശം നീക്കിവയ്ക്കുന്നു;

     പാപിയുടെ സമ്പത്തോ നീതിമാന് വേണ്ടി സംഗ്രഹിക്കപ്പെടുന്നു.

     ²³ സാധുക്കളുടെ കൃഷി വളരെ ആഹാരം നല്കുന്നു;

     എന്നാൽ അന്യായം മൂലം അത് നശിച്ചുപോകുവാൻ ഇടയാകും.

     ²⁴ വടി ഉപയോഗിക്കാത്തവൻ തന്റെ മകനെ പകയ്ക്കുന്നു;

     അവനെ സ്നേഹിക്കുന്നവൻ ചെറുപ്പത്തിലേ അവനെ ശിക്ഷിയ്ക്കുന്നു.

     ²⁵ നീതിമാൻ വേണ്ടുവോളം ഭക്ഷിക്കുന്നു;

     ദുഷ്ടന്മാരുടെ വയറോ വിശന്നുകൊണ്ടിരിക്കും.

അദ്ധ്യായം.13 14

¹ സ്ത്രീകളിൽ ജ്ഞാനമുള്ളവൾ തന്റെ വീട് പണിയുന്നു;

     ഭോഷത്തമുള്ളവളോ അത് സ്വന്തകൈകളാൽ പൊളിച്ചുകളയുന്നു.

     ² നേരായി നടക്കുന്നവൻ യഹോവയെ ഭയപ്പെടുന്നു;

     നടപ്പിൽ വക്രതയുള്ളവൻ അവിടുത്തെ നിന്ദിക്കുന്നു.

     ³ ഭോഷന്റെ വായിൽ ഡംഭത്തിന്റെ വടിയുണ്ട്;

     ജ്ഞാനികളുടെ അധരങ്ങൾ അവരെ കാത്തുകൊള്ളുന്നു.

     ⁴ കാളകൾ ഇല്ലാത്തിടത്ത് തൊഴുത്ത് വെടിപ്പുള്ളത്;

     കാളയുടെ ശക്തികൊണ്ട് വളരെ ആദായം ഉണ്ട്.

     ⁵ വിശ്വസ്തസാക്ഷി ഭോഷ്കു പറയുകയില്ല;

     കള്ളസ്സാക്ഷി ഭോഷ്കു പറയുന്നു.

     ⁶ പരിഹാസി ജ്ഞാനം അന്വേഷിച്ചിട്ടും കണ്ടെത്തുന്നില്ല;

     വിവേകമുള്ളവന് പരിജ്ഞാനം എളുപ്പം.

     ⁷ മൂഢന്റെ മുമ്പിൽനിന്ന് മാറിപ്പോകുക;

     പരിജ്ഞാനമുള്ള അധരങ്ങൾ നീ അവനിൽ കാണുകയില്ല.

     ⁸ വഴി തിരിച്ചറിയുന്നത് വിവേകിയുടെ ജ്ഞാനം;

     ചതിക്കുന്നതോ ഭോഷന്മാരുടെ ഭോഷത്തം.

     ⁹ ഭോഷന്മാർ അകൃത്യയാഗത്തെ പരിഹസിക്കുന്നു;

     നേരുള്ളവർക്ക് തമ്മിൽ പ്രീതി ഉണ്ട്.

     ¹⁰ ഹൃദയം സ്വന്തദുഃഖത്തെ അറിയുന്നു;

     അതിന്റെ സന്തോഷവും അന്യൻ പങ്കിടുന്നില്ല.

     ¹¹ ദുഷ്ടന്മാരുടെ വീട് നശിച്ചുപോകും;

     നീതിമാന്റെ കൂടാരമോ തഴയ്ക്കും.

     ¹² ചിലപ്പോൾ ഒരു വഴി മനുഷ്യന് ചൊവ്വായി തോന്നും;

     അതിന്റെ അവസാനം മരണവഴികൾ അത്രേ.

     ¹³ ചിരിക്കുമ്പോഴും ഹൃദയം ദുഃഖിച്ചിരിക്കാം;

     സന്തോഷത്തിന്റെ അവസാനം ദുഃഖമായിരിക്കാം.

     ¹⁴ ഹൃദയത്തിൽ പിന്മാറ്റമുള്ളവന് തന്റെ നടപ്പിൽ മടുപ്പുവരും;

     നല്ല മനുഷ്യന് തന്റെ പ്രവൃത്തിയാൽ സംതൃപ്തി വരും.

     ¹⁵ അല്പബുദ്ധി ഏത് വാക്കും വിശ്വസിക്കുന്നു;

     സൂക്ഷ്മബുദ്ധിയോ തന്റെ നടപ്പ് സൂക്ഷിച്ചുകൊള്ളുന്നു.

     ¹⁶ ജ്ഞാനി ഭയപ്പെട്ട് ദോഷം അകറ്റിനടക്കുന്നു;

     ഭോഷൻ ധിക്കാരംപൂണ്ട് നിർഭയനായി നടക്കുന്നു.

     ¹⁷ മുൻകോപി ഭോഷത്തം പ്രവർത്തിക്കുന്നു;

     ദുരുപായി വെറുക്കപ്പെടും.

     ¹⁸ അല്പബുദ്ധികൾ ഭോഷത്തം അവകാശമാക്കുന്നു;

     സൂക്ഷ്മബുദ്ധികളോ പരിജ്ഞാനം അണിയുന്നു.

     ¹⁹ ദുർജ്ജനം സജ്ജനത്തിന്റെ മുമ്പിലും

     ദുഷ്ടന്മാർ നീതിമാന്മാരുടെ വാതില്ക്കലും വണങ്ങിനില്ക്കുന്നു.

     ²⁰ ദരിദ്രനെ കൂട്ടുകാരൻ പോലും പകയ്ക്കുന്നു;

     ധനവാനോ വളരെ സ്നേഹിതന്മാർ ഉണ്ട്.

     ²¹ കൂട്ടുകാരനെ നിന്ദിക്കുന്നവൻ പാപം ചെയ്യുന്നു;

     എളിയവരോട് കൃപകാണിക്കുന്നവൻ ഭാഗ്യവാൻ.

     ²² ദോഷം നിരൂപിക്കുന്നവർ വഴിവിട്ട് പോകുന്നില്ലയോ?

     നന്മ നിരൂപിക്കുന്നവർക്ക് ദയയും വിശ്വസ്തതയും ലഭിക്കുന്നു.

     ²³ എല്ലാ തൊഴിലുംകൊണ്ട് ലാഭം വരും;

     വ്യർത്ഥഭാഷണംകൊണ്ട് ദാരിദ്ര്യമേ വരുകയുള്ളു.

     ²⁴ ജ്ഞാനികളുടെ ധനം അവർക്ക് കിരീടം;

     മൂഢന്മാരുടെ ഭോഷത്വമോ ഭോഷത്തം തന്നെ.

     ²⁵ സത്യസാക്ഷി പ്രാണരക്ഷ ചെയ്യുന്നു;

     ഭോഷ്കു പറയുന്നവനോ വഞ്ചന ചെയ്യുന്നു.

     ²⁶ യഹോവാഭക്തന് ഉറച്ചധൈര്യം ഉണ്ട്;

     അവന്റെ മക്കൾക്കും അഭയം ഉണ്ടാകും.

     ²⁷ യഹോവാഭക്തി ജീവന്റെ ഉറവാകുന്നു;

     അതിനാൽ മരണത്തിന്റെ കെണികൾ ഒഴിഞ്ഞുപോകും.

     ²⁸ പ്രജാബാഹുല്യം രാജാവിന് ബഹുമാനം;

     പ്രജാന്യൂനത പ്രഭുവിന് നാശം.

     ²⁹ ദീർഘക്ഷമയുള്ളവൻ മഹാബുദ്ധിമാൻ;

     മുൻകോപിയോ ഭോഷത്തം ഉയർത്തുന്നു.

     ³⁰ ശാന്തമനസ്സ് ദേഹത്തിന് ജീവൻ;

     അസൂയയോ അസ്ഥികൾക്ക് ദ്രവത്വം.

     ³¹ എളിയവനെ പീഡിപ്പിക്കുന്നവൻ അവന്റെ സ്രഷ്ടാവിനെ നിന്ദിക്കുന്നു;

     ദരിദ്രനോട് കൃപ കാണിക്കുന്നവൻ അവിടുത്തെ ബഹുമാനിക്കുന്നു.

     ³² ദുഷ്ടന് തന്റെ ദുഷ്ടതയാൽ വീഴ്ച വരുന്നു;

     നീതിമാന് മരണത്തിലും പ്രത്യാശയുണ്ട്.

     ³³ വിവേകമുള്ളവന്റെ ഹൃദയത്തിൽ ജ്ഞാനം അടങ്ങിപ്പാർക്കുന്നു;

     മൂഢന്മാരുടെ അന്തരംഗത്തിൽ ഉള്ളത് വെളിപ്പെട്ടുവരുന്നു.

     ³⁴ നീതി രാജ്യത്തെ ഉയർത്തുന്നു;

     പാപം ജനതയ്ക്ക് അപമാനം.

     ³⁵ ബുദ്ധിമാനായ ദാസന് രാജാവിന്റെ പ്രീതി ലഭിക്കുന്നു;

     നാണംകെട്ടവൻ അവന്റെ കോപത്തെ നേരിടും.

അദ്ധ്യായം.14 15

¹ മൃദുവായ ഉത്തരം ക്രോധത്തെ ശമിപ്പിക്കുന്നു;

     കഠിനവാക്കോ കോപത്തെ ജ്വലിപ്പിക്കുന്നു.

     ² ജ്ഞാനിയുടെ നാവ് നല്ല പരിജ്ഞാനം പ്രസ്താവിക്കുന്നു;

     മൂഢന്മാരുടെ വായ് ഭോഷത്തം വർഷിക്കുന്നു.

     ³ യഹോവയുടെ കണ്ണ് എല്ലായിടവും ഉണ്ട്;

     ദുഷ്ടന്മാരെയും നല്ലവരെയും നോക്കിക്കൊണ്ടിരിക്കുന്നു.

     ⁴ നാവിന്റെ ശാന്തത ജീവവൃക്ഷം;

     അതിന്റെ വക്രതയോ മനോവ്യസനം.

     ⁵ ഭോഷൻ അപ്പന്റെ പ്രബോധനം നിരസിക്കുന്നു;

     ശാസനയെ സ്വീകരിക്കുന്നവൻ വിവേകിയായിത്തീരും.

     ⁶ നീതിമാന്റെ വീട്ടിൽ വളരെ നിക്ഷേപം ഉണ്ട്;

     ദുഷ്ടന്റെ ആദായത്തിലോ അനർത്ഥം.

     ⁷ ജ്ഞാനികളുടെ അധരങ്ങൾ പരിജ്ഞാനം വിതറുന്നു;

     മൂഢന്മാരുടെ ഹൃദയം നേരുള്ളതല്ല.

     ⁸ ദുഷ്ടന്മാരുടെ യാഗം യഹോവയ്ക്ക് വെറുപ്പ്;

     നേരുള്ളവരുടെ പ്രാർത്ഥനയോ അവന് പ്രസാദം.

     ⁹ ദുഷ്ടന്മാരുടെ വഴി യഹോവയ്ക്ക് വെറുപ്പ്;

     എന്നാൽ നീതിയെ പിന്തുടരുന്നവനെ അവിടുന്ന് സ്നേഹിക്കുന്നു.

     ¹⁰ സന്മാർഗ്ഗം ത്യജിക്കുന്നവന് കഠിനശിക്ഷ വരും;

     ശാസന വെറുക്കുന്നവൻ മരിക്കും.

     ¹¹ പാതാളവും നരകവും യഹോവയുടെ ദൃഷ്ടിയിൽ തുറന്നിരിക്കുന്നുവെങ്കിൽ

     മനുഷ്യപുത്രന്മാരുടെ ഹൃദയങ്ങൾ എത്ര അധികം!

     ¹² പരിഹാസി ശാസന ഇഷ്ടപ്പെടുന്നില്ല;

     ജ്ഞാനികളുടെ അടുക്കൽ ചെല്ലുന്നതുമില്ല.

     ¹³ സന്തോഷമുള്ള ഹൃദയം മുഖപ്രസാദമുണ്ടാക്കുന്നു;

     ഹൃദയത്തിലെ വ്യസനംകൊണ്ടോ ധൈര്യം നഷ്ടപ്പെടുന്നു.

     ¹⁴ വിവേകമുള്ളവന്റെ ഹൃദയം പരിജ്ഞാനം അന്വേഷിക്കുന്നു;

     മൂഢന്മാരുടെ വായ് ഭോഷത്തം ആകുന്നു.

     ¹⁵ പീഡിതന്റെ ജീവനാൾ എല്ലാം കഷ്ടകാലം;

     സന്തുഷ്ടഹൃദയനോ നിത്യം ഉത്സവം.

     ¹⁶ ബഹു നിക്ഷേപവും അതിനോടുകൂടി കഷ്ടതയും ഉള്ളതിനെക്കാൾ

     യഹോവാഭക്തിയോടുകൂടി അല്പധനം ഉള്ളത് നന്ന്.

     ¹⁷ വിദ്വേഷമുള്ളേടത്തെ തടിപ്പിച്ച കാളയെക്കാൾ

     സ്നേഹമുള്ളേടത്തെ സസ്യഭോജനം നല്ലത്.

     ¹⁸ ക്രോധമുള്ളവൻ കലഹം ഉണ്ടാക്കുന്നു;

     ദീർഘക്ഷമയുള്ളവൻ കലഹം ശമിപ്പിക്കുന്നു.

     ¹⁹ മടിയന്റെ വഴി മുള്ളുവേലിപോലെയാകുന്നു;

     നീതിമാന്മാരുടെ പാതയോ പെരുവഴി തന്നെ.

     ²⁰ ജ്ഞാനമുള്ള മകൻ അപ്പനെ സന്തോഷിപ്പിക്കുന്നു;

     മൂഢനോ അമ്മയെ നിന്ദിക്കുന്നു.

     ²¹ ഭോഷത്തം ബുദ്ധിഹീനന് സന്തോഷം;

     വിവേകിയോ ചൊവ്വായി നടക്കുന്നു.

     ²² ആലോചന ഇല്ലാഞ്ഞാൽ ഉദ്ദേശ്യങ്ങൾ സാധിക്കാതെ പോകുന്നു;

     ആലോചനക്കാരുടെ ബഹുത്വത്താൽ അവ സാധിക്കുന്നു.

     ²³ താൻ പറയുന്ന ഉത്തരം ഹേതുവായി മനുഷ്യന് സന്തോഷം വരും;

     തക്കസമയത്ത് പറയുന്ന വാക്ക് എത്ര മനോഹരം!

     ²⁴ ബുദ്ധിമാന്റെ ജീവയാത്ര ഉയരത്തിലേയ്ക്കാകുന്നു;

     കീഴെയുള്ള പാതാളത്തെ അവൻ ഒഴിഞ്ഞുപോകും.

     ²⁵ അഹങ്കാരിയുടെ വീട് യഹോവ പൊളിച്ചുകളയും;

     വിധവയുടെ അതിര് അവിടുന്ന് ഉറപ്പിക്കും.

     ²⁶ ദുരുപായങ്ങൾ യഹോവയ്ക്ക് വെറുപ്പ്;

     ദയാവാക്കോ നിർമ്മലം.

     ²⁷ ദുരാഗ്രഹി തന്റെ ഭവനത്തെ വലയ്ക്കുന്നു;

     കോഴ വെറുക്കുന്നവൻ ജീവിച്ചിരിക്കും.

     ²⁸ നീതിമാൻ മനസ്സിൽ ആലോചിച്ച് ഉത്തരം പറയുന്നു;

     ദുഷ്ടന്മാരുടെ വായ് ദോഷങ്ങൾ വർഷിക്കുന്നു.

     ²⁹ യഹോവ ദുഷ്ടന്മാരോട് അകന്നിരിക്കുന്നു;

     നീതിമാന്മാരുടെ പ്രാർത്ഥനയോ അവൻ കേൾക്കുന്നു.

     ³⁰ കണ്ണിന്റെ ശോഭ ഹൃദയത്തെ സന്തോഷിപ്പിക്കുന്നു;

     നല്ല വർത്തമാനം അസ്ഥികളെ തണുപ്പിക്കുന്നു.

     ³¹ ജീവദായകമായ ശാസന കേൾക്കുന്ന ചെവിയുള്ളവൻ

     ജ്ഞാനികളുടെ മദ്ധ്യേ വസിക്കും.

     ³² പ്രബോധനം ത്യജിക്കുന്നവൻ തന്റെ പ്രാണനെ നിരസിക്കുന്നു;

     ശാസന കേട്ട് അനുസരിക്കുന്നവൻ വിവേകം സമ്പാദിക്കുന്നു.

     ³³ യഹോവാഭക്തി ജ്ഞാനോപദേശമാകുന്നു;

     മാനത്തിന് വിനയം മുന്നോടിയാകുന്നു.

അദ്ധ്യായം.15 16

¹ ഹൃദയത്തിലെ നിരൂപണങ്ങൾ മനുഷ്യനുള്ളവ;

     നാവിന്റെ ഉത്തരം യഹോവയിൽ നിന്ന് വരുന്നു.

     ² മനുഷ്യന് തന്റെ വഴികളൊക്കെയും നിർമ്മലമായി തോന്നുന്നു;

     യഹോവയോ ആത്മാക്കളെ തൂക്കിനോക്കുന്നു.

     ³ നിന്റെ പ്രവൃത്തികളെ യഹോവയ്ക്കു സമർപ്പിക്കുക;

     എന്നാൽ നിന്റെ ഉദ്ദേശ്യങ്ങൾ സാധിക്കും.

     ⁴ യഹോവ സകലത്തെയും തന്റെ ഉദ്ദേശ്യത്തിനായി ഉണ്ടാക്കിയിരിക്കുന്നു;

     അനർത്ഥദിവസത്തിനായി ദുഷ്ടനെയും സൃഷ്ടിച്ചിരിക്കുന്നു.

     ⁵ നിഗളഹൃദയമുള്ള ഏവനും യഹോവയ്ക്കു വെറുപ്പ്;

     അവന് നിശ്ചയമായും ശിക്ഷ വരാതിരിക്കുകയില്ല .

     ⁶ ദയയും വിശ്വസ്തതയുംകൊണ്ട് അകൃത്യം പരിഹരിക്കപ്പെടുന്നു;

     യഹോവാഭക്തികൊണ്ട് മനുഷ്യർ ദോഷം വിട്ടകലുന്നു.

     ⁷ ഒരുത്തന്റെ വഴികൾ യഹോവയ്ക്കു പ്രസാദകരമായിരിക്കുമ്പോൾ

     അവിടുന്ന് അവന്റെ ശത്രുക്കളെപ്പോലും അവനുമായി സമാധാനത്തിലാക്കുന്നു.

     ⁸ ന്യായരഹിതമായ വലിയ വരവിനെക്കാൾ

     നീതിയോടെയുള്ള അല്പം നല്ലത്.

     ⁹ മനുഷ്യന്റെ ഹൃദയം തന്റെ വഴിയെക്കുറിച്ച് ആലോചിച്ചുറയ്ക്കുന്നു;

     അവന്റെ കാലടികളെയോ യഹോവ ക്രമപ്പെടുത്തുന്നു.

     ¹⁰ രാജാവിന്റെ അധരങ്ങളിൽ അരുളപ്പാടുണ്ട്;

     ന്യായവിധിയിൽ അവന്റെ വായ് തെറ്റിപ്പോകുന്നതുമില്ല.

     ¹¹ ശരിയായ അളവുകോലും ത്രാസും യഹോവയ്ക്കുള്ളവ;

     സഞ്ചിയിലെ പടി ഒക്കെയും അവിടുത്തെ പ്രവൃത്തിയാകുന്നു.

     ¹² ദുഷ്ടത പ്രവർത്തിക്കുന്നത് രാജാക്കന്മാർക്ക് വെറുപ്പ്;

     നീതികൊണ്ടല്ലയോ സിംഹാസനം സ്ഥിരപ്പെടുന്നത്.

     ¹³ നീതിയുള്ള അധരങ്ങൾ രാജാക്കന്മാർക്ക് പ്രസാദം;

     സത്യം പറയുന്നവനെ അവർ സ്നേഹിക്കുന്നു.

     ¹⁴ രാജാവിന്റെ ക്രോധം മരണദൂതന് തുല്യം;

     ജ്ഞാനമുള്ള മനുഷ്യനോ അതിനെ ശമിപ്പിക്കും.

     ¹⁵ രാജാവിന്റെ മുഖപ്രകാശത്തിൽ ജീവൻ ഉണ്ട്;

     അവന്റെ പ്രസാദം പിന്മഴയ്ക്കുള്ള മേഘംപോലെയാകുന്നു.

     ¹⁶ തങ്കത്തെക്കാൾ ജ്ഞാനം സമ്പാദിക്കുന്നത് എത്ര നല്ലത്!

     വെള്ളിയെക്കാൾ വിവേകം സമ്പാദിക്കുന്നത് എത്ര ഉത്തമം!

     ¹⁷ ദോഷം വിട്ടുനടക്കുന്നത് നേരുള്ളവരുടെ പെരുവഴി;

     തന്റെ വഴി സൂക്ഷിക്കുന്നവൻ തന്റെ പ്രാണനെ കാത്തുകൊള്ളുന്നു.

     ¹⁸ നാശത്തിന് മുമ്പ് ഗർവ്വം;

     വീഴ്ചയ്ക്ക് മുമ്പ് ഉന്നതഭാവം.

     ¹⁹ ഗർവ്വികളോടുകൂടെ കവർച്ച പങ്കിടുന്നതിനെക്കാൾ

     താഴ്മയുള്ളവരോടുകൂടി താഴ്മയുള്ളവനായിരിക്കുന്നത് നല്ലത്.

     ²⁰ തിരുവചനം പ്രമാണിക്കുന്നവൻ നന്മ കണ്ടെത്തും;

     യഹോവയിൽ ആശ്രയിക്കുന്നവൻ ഭാഗ്യവാൻ.

     ²¹ ജ്ഞാനഹൃദയൻ വിവേകി എന്ന് വിളിക്കപ്പെടും;

     അധരമാധുര്യം വിദ്യയെ വർദ്ധിപ്പിക്കുന്നു.

     ²² വിവേകം വിവേകിക്ക് ജീവന്റെ ഉറവാകുന്നു;

     ഭോഷന്മാരുടെ പ്രബോധനമോ ഭോഷത്തം തന്നെ.

     ²³ ജ്ഞാനിയുടെ ഹൃദയം അവന്റെ വായെ പഠിപ്പിക്കുന്നു;

     അവന്റെ അധരങ്ങൾക്ക് വിദ്യ വർദ്ധിപ്പിക്കുന്നു.

     ²⁴ ഇമ്പമുള്ള വാക്ക് തേൻകട്ടയാകുന്നു;

     മനസ്സിന് മധുരവും അസ്ഥികൾക്ക് ഔഷധവും തന്നെ;

     ²⁵ ചിലപ്പോൾ ഒരു വഴി മനുഷ്യന് ചൊവ്വായി തോന്നുന്നു;

     അതിന്റെ അവസാനമോ മരണവഴികൾ അത്രേ.

     ²⁶ പണിക്കാരന്റെ വിശപ്പ് അവനെക്കൊണ്ടു പണി ചെയ്യിക്കുന്നു;

     അവന്റെ വായ് അവനെ അതിനായി നിർബ്ബന്ധിക്കുന്നു.

     ²⁷ നിസ്സാരമനുഷ്യൻ ദോഷം എന്ന കുഴികുഴിയ്ക്കുന്നു;

     അവന്റെ അധരങ്ങളിൽ കത്തുന്ന തീ ഉണ്ട്.

     ²⁸ വക്രതയുള്ള മനുഷ്യൻ വഴക്ക് ഉണ്ടാക്കുന്നു;

     ഏഷണിക്കാരൻ മിത്രങ്ങളെ ഭേദിപ്പിക്കുന്നു.

     ²⁹ സാഹസക്കാരൻ കൂട്ടുകാരനെ വശീകരിക്കുകയും

     കൊള്ളരുതാത്ത വഴിയിൽ നടത്തുകയും ചെയ്യുന്നു.

     ³⁰ കണ്ണിറുക്കുന്നവൻ വക്രത നിരൂപിക്കുന്നു;

     വപ്പ് കടിക്കുന്നവൻ ദോഷം ചെയ്യുന്നു.

     ³¹ നരച്ച തല ശോഭയുള്ള കിരീടമാകുന്നു;

     നീതിയുടെ മാർഗ്ഗത്തിൽ അതിനെ പ്രാപിക്കാം.

     ³² ദീർഘക്ഷമയുള്ളവൻ യുദ്ധവീരനിലും

     മനോനിയന്ത്രണമുള്ളവൻ പട്ടണം പിടിക്കുന്നവനിലും ശ്രേഷ്ഠൻ.

     ³³ ചീട്ട് മടിയിൽ ഇടുന്നു;

     അതിന്റെ തീരുമാനമോ യഹോവയിൽ നിന്ന് വരുന്നു.

അദ്ധ്യായം.16 17

¹ കലഹത്തോടുകൂടി ഒരു വീടു നിറയെ യാഗഭോജനത്തിലും

     സ്വസ്ഥതയോടുകൂടി ഒരു കഷണം ഉണങ്ങിയ അപ്പം ഏറ്റവും നല്ലത്.

     ² നാണംകെട്ട മകന്റെമേൽ ബുദ്ധിമാനായ ദാസൻ ഭരണം നടത്തും;

     സഹോദരന്മാരുടെ ഇടയിൽ അവകാശം പ്രാപിക്കും.

     ³ വെള്ളിക്ക് പുടം, പൊന്നിന് മൂശ;

     ഹൃദയങ്ങളെ ശോധന ചെയ്യുന്നതോ യഹോവ തന്നെ.

     ⁴ ദുഷ്ക്കർമ്മി നീതികെട്ട അധരങ്ങൾക്ക് ശ്രദ്ധകൊടുക്കുന്നു;

     വ്യാജം പറയുന്നവൻ വഷളത്തമുള്ള നാവിന് ചെവികൊടുക്കുന്നു.

     ⁵ ദരിദ്രനെ പരിഹസിക്കുന്നവൻ അവന്റെ സ്രഷ്ടാവിനെ നിന്ദിക്കുന്നു;

     ആപത്തിൽ സന്തോഷിക്കുന്നവന് ശിക്ഷ വരാതിരിക്കുകയില്ല.

     ⁶ മക്കളുടെ മക്കൾ വൃദ്ധന്മാർക്ക് കിരീടമാകുന്നു;

     മക്കളുടെ മഹത്വം അവരുടെ അപ്പന്മാർ തന്നെ.

     ⁷ സുഭാഷിതം പറയുന്ന അധരം ഭോഷന് യോഗ്യമല്ല;

     വ്യാജമുള്ള അധരം ഒരു പ്രഭുവിന് ഒട്ടും ഉചിതമല്ല.

     ⁸ സമ്മാനം വാങ്ങുന്നവന് അത് രത്നമായി തോന്നും;

     അവൻ ചെല്ലുന്നേടത്തെല്ലാം കാര്യം സാധിക്കും.

     ⁹ സ്നേഹം തേടുന്നവൻ ലംഘനം മറച്ചുവയ്ക്കുന്നു;

     കാര്യം പാട്ടാക്കുന്നവനോ മിത്രങ്ങളെ ഭേദിപ്പിക്കുന്നു.

     ¹⁰ ഭോഷനെ നൂറ് അടിക്കുന്നതിനെക്കാൾ

     ബുദ്ധിമാനെ ഒന്ന് ശാസിക്കുന്നത് അധികം ഫലിക്കും.

     ¹¹ മത്സരക്കാരൻ ദോഷം മാത്രം അന്വേഷിക്കുന്നു;

     ക്രൂരനായ ഒരു ദൂതനെ അവന്റെ നേരെ അയയ്ക്കും.

     ¹² മൂഢനെ അവന്റെ ഭോഷത്തത്തിൽ എതിരിടുന്നതിനെക്കാൾ

     കുട്ടികൾ കാണാതെപോയ കരടിയെ എതിരിടുന്നത് ഭേദം.

     ¹³ ഒരുത്തൻ നന്മയ്ക്കു പകരം തിന്മ ചെയ്യുന്നു എങ്കിൽ

     അവന്റെ ഭവനത്തെ തിന്മ വിട്ടുമാറുകയില്ല.

     ¹⁴ കലഹത്തിന്റെ ആരംഭം മടവെട്ടി വെള്ളം വിടുന്നതുപോലെ;

     ആകയാൽ കലഹമാകുംമുമ്പ് തർക്കം നിർത്തിക്കളയുക.

     ¹⁵ ദുഷ്ടനെ നീതീകരിക്കുന്നവനും നീതിമാനെ കുറ്റം വിധിക്കുന്നവനും

     രണ്ടുപേരും യഹോവയ്ക്ക് വെറുപ്പ്.

     ¹⁶ മൂഢന് ജ്ഞാനം

     സമ്പാദിക്കുവാൻ ബുദ്ധിയില്ലാതിരിക്കുമ്പോൾ അത് വാങ്ങുവാൻ അവന്റെ കയ്യിൽ പണം എന്തിന്?

     ¹⁷ സ്നേഹിതൻ എല്ലാകാലത്തും സ്നേഹിക്കുന്നു;

     അനർത്ഥകാലത്ത് അവൻ സഹോദരനായിത്തീരുന്നു.

     ¹⁸ ബുദ്ധിഹീനനായ മനുഷ്യൻ കയ്യടിച്ച്

     കൂട്ടുകാരനു വേണ്ടി ജാമ്യം നില്ക്കുന്നു.

     ¹⁹ കലഹപ്രിയൻ ലംഘനപ്രിയൻ ആകുന്നു;

     പടിവാതിൽ ഉയർത്തിപ്പണിയുന്നവൻ നാശം ഇച്ഛിക്കുന്നു.

     ²⁰ വക്രഹൃദയമുള്ളവൻ നന്മ കാണുകയില്ല;

     വികടനാവുള്ളവൻ ആപത്തിൽ അകപ്പെടും.

     ²¹ ഭോഷനെ ജനിപ്പിച്ചവന് അത് ഖേദകാരണമാകും;

     മൂഢന്റെ അപ്പന് സന്തോഷം ഉണ്ടാകുകയില്ല.

     ²² സന്തുഷ്ടഹൃദയം നല്ലൊരു ഔഷധമാകുന്നു;

     തകർന്ന മനസ്സോ അസ്ഥികളെ ഉണക്കുന്നു.

     ²³ ദുഷ്ടൻ ന്യായത്തിന്റെ വഴികളെ മറിക്കേണ്ടതിന്

     ഒളിച്ചുകൊണ്ടുവരുന്ന സമ്മാനം വാങ്ങുന്നു.

     ²⁴ ജ്ഞാനം ബുദ്ധിമാന്റെ മുമ്പിൽ ഇരിക്കുന്നു;

     മൂഢന്റെ കണ്ണോ ഭൂമിയുടെ അറുതികളിലേക്ക് നോക്കുന്നു.

     ²⁵ മൂഢനായ മകൻ അപ്പന് വ്യസനവും, തന്നെ

     പ്രസവിച്ചവൾക്ക് കൈപ്പും ആകുന്നു.

     ²⁶ നീതിമാന് പിഴ കല്പിക്കുന്നതും

     ശ്രേഷ്ഠന്മാരെ സത്യസന്ധത നിമിത്തം അടിക്കുന്നതും നല്ലതല്ല.

     ²⁷ വാക്ക് അടക്കിവയ്ക്കുന്നവൻ പരിജ്ഞാനമുള്ളവൻ;

     ശാന്തമാനസൻ ബുദ്ധിമാൻ തന്നെ.

     ²⁸ മിണ്ടാതിരുന്നാൽ ഭോഷനെപ്പോലും ജ്ഞാനിയായും

     നാവടക്കിയാൽ വിവേകിയായും എണ്ണും.

അദ്ധ്യായം.17 18

¹ കൂട്ടംവിട്ടു നടക്കുന്നവൻ സ്വന്തം താത്പര്യം അന്വേഷിക്കുന്നു;

     സകലജ്ഞാനത്തോടും അവൻ കയർക്കുന്നു.

     ² തന്റെ മനസ്സ് വെളിപ്പെടുത്തുന്നതിൽ അല്ലാതെ

     മൂഢന് വിവേകത്തിൽ താത്പര്യമില്ല.

     ³ ദുഷ്ടനോടുകൂടി അപമാനവും

     ദുഷ്ക്കീർത്തിയോടുകൂടി നിന്ദയും വരുന്നു.

     ⁴ മനുഷ്യന്റെ വായിലെ വാക്ക് ആഴമുള്ള വെള്ളവും

     ജ്ഞാനത്തിന്റെ ഉറവ് ഒഴുക്കുള്ള തോടും ആകുന്നു.

     ⁵ നീതിമാനെ ന്യായവിസ്താരത്തിൽ തോല്പിക്കേണ്ടതിന്

     ദുഷ്ടന്റെ പക്ഷം പിടിക്കുന്നത് നല്ലതല്ല.

     ⁶ മൂഢന്റെ അധരങ്ങൾ വഴക്കിന് ഇടയാക്കുന്നു;

     അവന്റെ വായ് തല്ല് വിളിച്ചുവരുത്തുന്നു.

     ⁷ മൂഢന്റെ വായ് അവന് നാശം;

     അവന്റെ അധരങ്ങൾ അവന്റെ പ്രാണന് കെണി.

     ⁸ ഏഷണിക്കാരന്റെ വാക്ക് സ്വാദുഭോജനംപോലെയിരിക്കുന്നു;

     അത് ശരീരത്തിന്റെ ഉള്ളറകളിലേക്ക് ചെല്ലുന്നു.

     ⁹ വേലയിൽ മടിയനായവൻ

     മുടിയന്റെ സഹോദരൻ.

     ¹⁰ യഹോവയുടെ നാമം ബലമുള്ള ഗോപുരം;

     നീതിമാൻ അതിലേയ്ക്ക് ഓടിച്ചെന്ന് അഭയം പ്രാപിക്കുന്നു.

     ¹¹ ധനവാന് തന്റെ സമ്പത്ത് ഉറപ്പുള്ള പട്ടണം;

     അത് അവന് ഉയർന്ന മതിൽ ആയിത്തോന്നുന്നു.

     ¹² നാശത്തിന് മുമ്പ് മനുഷ്യന്റെ ഹൃദയം നിഗളിക്കുന്നു;

     മാനത്തിന് മുമ്പെ താഴ്മ.

     ¹³ കേൾക്കുന്നതിനു മുമ്പ് ഉത്തരം പറയുന്നവന്

     അത് ഭോഷത്തവും ലജ്ജയും ആയിത്തീരുന്നു.

     ¹⁴ പുരുഷന്റെ ധീരത രോഗത്തിൽ അവന് സഹിഷ്ണുത നൽകുന്നു;

     തകർന്ന മനസ്സിനെയോ ആർക്ക് സഹിക്കാം?

     ¹⁵ ബുദ്ധിമാന്റെ ഹൃദയം പരിജ്ഞാനം സമ്പാദിക്കുന്നു;

     ജ്ഞാനികളുടെ ചെവി പരിജ്ഞാനം അന്വേഷിക്കുന്നു.

     ¹⁶ മനുഷ്യൻ നൽകുന്ന സമ്മാനം മൂലം അവന് പ്രവേശനം ലഭിക്കും;

     അവൻ മഹാന്മാരുടെ സന്നിധിയിൽ ചെല്ലുവാൻ ഇടയാകും.

     ¹⁷ തന്റെ അന്യായം ആദ്യം ബോധിപ്പിക്കുന്നവൻ നീതിമാൻ എന്ന് തോന്നും;

     എന്നാൽ അവന്റെ പ്രതിയോഗി അവനെ പരിശോധിക്കുന്നതുവരെ മാത്രം.

     ¹⁸ നറുക്ക് തർക്കങ്ങൾ തീർക്കുകയും

     ബലവാന്മാർക്കിടയിൽ തീർപ്പുണ്ടാക്കുകയും ചെയ്യുന്നു.

     ¹⁹ ദ്രോഹിക്കപ്പെട്ട സഹോദരനെ ഇണക്കുന്നത് ഉറപ്പുള്ള പട്ടണത്തെ ജയിക്കുന്നതിനെക്കാൾ ബുദ്ധിമുട്ടാകുന്നു;

     അങ്ങനെയുള്ള പിണക്കം അരമനയുടെ ഓടാമ്പൽപോലെ ആകുന്നു.

     ²⁰ വായുടെ ഫലത്താൽ മനുഷ്യന്റെ ഉദരം നിറയും;

     അധരങ്ങളുടെ വിളവുകൊണ്ട് അവന് തൃപ്തിവരും;

     ²¹ മരണവും ജീവനും നാവിന്റെ അധികാരത്തിൽ ഇരിക്കുന്നു;

     അതിൽ ഇഷ്ടപ്പെടുന്നവർ അതിന്റെ ഫലം അനുഭവിക്കും.

     ²² ഭാര്യയെ കിട്ടുന്നവന് നന്മ കിട്ടുന്നു;

     യഹോവയോട് പ്രസാദം ലഭിച്ചുമിരിക്കുന്നു.

     ²³ ദരിദ്രൻ യാചനാരീതിയിൽ സംസാരിക്കുന്നു;

     ധനവാനോ കഠിനമായി ഉത്തരം പറയുന്നു.

     ²⁴ വളരെ സ്നേഹിതന്മാരുള്ള മനുഷ്യന് നാശം വരും;

     എന്നാൽ സഹോദരനെക്കാളും പറ്റിച്ചേരുന്ന സ്നേഹിതന്മാരും ഉണ്ട്.

അദ്ധ്യായം.18 19

¹ വികടാധരം ഉള്ള മൂഢനെക്കാൾ

     പരമാർത്ഥതയിൽ നടക്കുന്ന ദരിദ്രൻ ഉത്തമൻ.

     ² പരിജ്ഞാനമില്ലാത്ത മനസ്സ് നല്ലതല്ല;

     തിടുക്കത്തോടെ ചുവട് വയ്ക്കുന്നവൻ തെറ്റിപ്പോകുന്നു.

     ³ മനുഷ്യന്റെ ഭോഷത്തം അവന്റെ വഴിയെ മറിച്ചുകളയുന്നു;

     അവന്റെ ഹൃദയം യഹോവയോട് കോപിക്കുന്നു.

     ⁴ സമ്പത്ത് സ്നേഹിതന്മാരെ വർദ്ധിപ്പിക്കുന്നു;

     എളിയവന്റെ കൂട്ടുകാരനോ അവനോട് അകന്നിരിക്കുന്നു.

     ⁵ കള്ളസ്സാക്ഷിക്ക് ശിക്ഷ വരാതിരിക്കുകയില്ല;

     ഭോഷ്ക്ക് പറയുന്നവൻ രക്ഷപെടുകയുമില്ല.

     ⁶ പ്രഭുവിന്റെ പ്രീതി സമ്പാദിക്കുവാൻ പലരും നോക്കുന്നു;

     ദാനം ചെയ്യുന്നവന് ഏവനും സ്നേഹിതൻ.

     ⁷ ദരിദ്രന്റെ സഹോദരന്മാരെല്ലാം അവനെ പകയ്ക്കുന്നു;

     അവന്റെ സ്നേഹിതന്മാർ എത്രയധികം അകന്നുനില്ക്കും?

     അവൻ വാക്കുകൾ പറഞ്ഞ് അവരെ പിന്തുടർന്നാലും അവർ അവനെ ഉപേക്ഷിക്കുന്നു.

     ⁸ ബുദ്ധി സമ്പാദിക്കുന്നവൻ തന്റെ പ്രാണനെ സ്നേഹിക്കുന്നു;

     വിവേകം കാത്തുകൊള്ളുന്നവൻ നന്മ പ്രാപിക്കും.

     ⁹ കള്ളസ്സാക്ഷിക്ക് ശിക്ഷ വരാതിരിക്കുകയില്ല;

     ഭോഷ്ക്ക് പറയുന്നവൻ നശിച്ചുപോകും.

     ¹⁰ സുഖജീവിതം ഭോഷന് യോഗ്യമല്ല;

     പ്രഭുക്കന്മാരുടെമേൽ ദാസൻ എങ്ങനെ ഭരണം നടത്തും?

     ¹¹ വിവേകബുദ്ധിയാൽ മനുഷ്യന് ദീർഘക്ഷമ വരുന്നു;

     ലംഘനം ക്ഷമിക്കുന്നത് അവന് ഭൂഷണം.

     ¹² രാജാവിന്റെ ക്രോധം സിംഹഗർജ്ജനത്തിനു തുല്യം;

     അവന്റെ പ്രസാദമോ പുല്ലിന്മേലുള്ള മഞ്ഞുപോലെ.

     ¹³ മൂഢനായ മകൻ അപ്പന് നിർഭാഗ്യം;

     ഭാര്യയുടെ കലഹം തീരാത്ത ചോർച്ച പോലെ.

     ¹⁴ ഭവനവും സമ്പത്തും പിതാക്കന്മാരിൽ നിന്ന് ലഭിക്കുന്ന അവകാശം;

     ബുദ്ധിയുള്ള ഭാര്യയോ യഹോവയുടെ ദാനം.

     ¹⁵ മടി ഗാഢനിദ്രയിൽ വീഴിക്കുന്നു;

     അലസചിത്തൻ പട്ടിണികിടക്കും.

     ¹⁶ കല്പന പ്രമാണിക്കുന്നവൻ പ്രാണനെ കാക്കുന്നു;

     നടപ്പ് സൂക്ഷിക്കാത്തവൻ മരണശിക്ഷ അനുഭവിക്കും.

     ¹⁷ എളിയവനോട് കൃപ കാണിക്കുന്നവൻ യഹോവയ്ക്ക് വായ്പ കൊടുക്കുന്നു;

     അവൻ ചെയ്ത നന്മയ്ക്ക് അവിടുന്ന് പകരം കൊടുക്കും.

     ¹⁸ പ്രത്യാശയുള്ളേടത്തോളം നിന്റെ മകനെ ശിക്ഷിക്കുക;

     എങ്കിലും അവനെ കൊല്ലുവാൻ തക്കവണ്ണം ഭാവിക്കരുത്.

     ¹⁹ മുൻകോപി പിഴ കൊടുക്കേണ്ടിവരും;

     നീ അവനെ വിടുവിച്ചാൽ അത് പിന്നെയും ചെയ്യേണ്ടിവരും.

     ²⁰ പില്ക്കാലത്ത് നീ ജ്ഞാനിയാകേണ്ടതിന്

     ആലോചന കേട്ട് പ്രബോധനം കൈക്കൊള്ളുക.

     ²¹ മനുഷ്യന്റെ ഹൃദയത്തിൽ പല വിചാരങ്ങളും ഉണ്ട്;

     യഹോവയുടെ ആലോചനയോ നിലനില്ക്കും.

     ²² ഒരു മനുഷ്യനിൽ പ്രതീക്ഷിക്കുന്നത് ദയയാണ് ;

     ഭോഷ്ക്ക് പറയുന്നവനെക്കാൾ ദരിദ്രൻ ഉത്തമൻ.

     ²³ യഹോവാഭക്തി ജീവനിലേയ്ക്ക് നയിക്കുന്നു;

     അതുള്ളവൻ തൃപ്തനായി വസിക്കും;

     അനർത്ഥം അവന് നേരിടുകയില്ല.

     ²⁴ മടിയൻ തന്റെ കൈ തളികയിൽ പൂഴ്ത്തുന്നു;

     വായിലേക്ക് തിരികെ കൊണ്ടുവരുകയില്ല.

     ²⁵ പരിഹാസിയെ അടിച്ചാൽ അല്പബുദ്ധി വിവേകം പഠിക്കും;

     ബുദ്ധിമാനെ ശാസിച്ചാൽ അവൻ പരിജ്ഞാനം പ്രാപിക്കും.

     ²⁶ അപ്പനോട് അതിക്രമം കാണിക്കുകയും അമ്മയെ ഓടിച്ചുകളയുകയും ചെയ്യുന്നവൻ

     ലജ്ജയും അപമാനവും വരുത്തുന്ന മകനാകുന്നു.

     ²⁷ മകനേ, പ്രബോധനം കേൾക്കുന്നത് മതിയാക്കിയാൽ നീ പരിജ്ഞാനത്തിന്റെ വചനങ്ങളിൽ നിന്ന്

     അകന്നുപോകും.

     ²⁸ അയോഗ്യനായ സാക്ഷി ന്യായത്തെ പരിഹസിക്കുന്നു;

     ദുഷ്ടന്മാരുടെ വായ് അകൃത്യത്തെ വിഴുങ്ങുന്നു.

     ²⁹ പരിഹാസികൾക്കായി ശിക്ഷാവിധിയും

     മൂഢന്മാരുടെ മുതുകിന് തല്ലും ഒരുങ്ങിയിരിക്കുന്നു.

അദ്ധ്യായം.19 20

¹ വീഞ്ഞ് പരിഹാസിയും മദ്യം കലഹക്കാരനും ആകുന്നു;

     അവയാൽ ചാഞ്ചാടി നടക്കുന്ന ആരും ജ്ഞാനിയാകുകയില്ല.

     ² രാജാവിന്റെ ക്രോധം സിംഹഗർജ്ജനംപോലെ;

     അവനെ കോപിപ്പിക്കുന്നവൻ തന്റെ പ്രാണനോട് ദ്രോഹം ചെയ്യുന്നു.

     ³ കലഹം ഒഴിഞ്ഞിരിക്കുന്നത് പുരുഷന് മാനം;

     എന്നാൽ ഏത് ഭോഷനും ശണ്ഠ കൂടും.

     ⁴ മടിയൻ ശീതം നിമിത്തം നിലം ഉഴുന്നില്ല;

     കൊയ്ത്തുകാലത്ത് അവൻ ഇരക്കും; ഒന്നും കിട്ടുകയുമില്ല.

     ⁵ മനുഷ്യന്റെ ഹൃദയത്തിലെ ആലോചന ആഴമുള്ള വെള്ളം;

     വിവേകമുള്ള പുരുഷൻ അത് കോരി എടുക്കും.

     ⁶ മിക്ക മനുഷ്യരും തങ്ങളോട് ദയാലുവായ ഒരുത്തനെ കാണും;

     എന്നാൽ വിശ്വസ്തനായ ഒരുത്തനെ ആർക്ക് കണ്ടെത്താനാകും?

     ⁷ പരമാർത്ഥതയിൽ നടക്കുന്നവൻ നീതിമാൻ;

     അവന്റെ ശേഷം, അവന്റെ മക്കളും ഭാഗ്യവാന്മാർ.

     ⁸ ന്യായാസനത്തിൽ ഇരിക്കുന്ന രാജാവ്

     തന്റെ കണ്ണുകൊണ്ട് സകലദോഷത്തെയും പാറ്റിക്കളയുന്നു.

     ⁹ ഞാൻ എന്റെ ഹൃദയത്തെ ശുദ്ധീകരിച്ച്

     പാപം ഒഴിഞ്ഞ് നിർമ്മലനായിരിക്കുന്നു എന്ന് ആർക്ക് പറയാം?

     ¹⁰ രണ്ടുതരം തൂക്കവും രണ്ടുതരം അളവും

     രണ്ടും ഒരുപോലെ യഹോവയ്ക്ക് വെറുപ്പ്.

     ¹¹ ബാല്യത്തിലെ ക്രിയകളാൽ തന്നെ ഒരുത്തന്റെ പ്രവൃത്തി

     വെടിപ്പും നേരുമുള്ളതും ആകുമോ എന്ന് അറിയാം.

     ¹² കേൾക്കുന്ന ചെവി, കാണുന്ന കണ്ണ്,

     ഇവ രണ്ടും യഹോവ ഉണ്ടാക്കി.

     ¹³ ദരിദ്രനാകാതെയിരിക്കേണ്ടതിന് നിദ്രാപ്രിയനാകരുത്;

     നീ കണ്ണു തുറക്കുക; നിനക്ക് വേണ്ടുവോളം ആഹാരം ഉണ്ടാകും.

     ¹⁴ വിലയ്ക്കു വാങ്ങുന്നവൻ ചീത്തചീത്ത എന്ന് പറയുന്നു;

     വാങ്ങി തന്റെ വഴിക്ക് പോകുമ്പോൾ അവൻ പ്രശംസിക്കുന്നു.

     ¹⁵ പൊന്നും അനവധി മുത്തുകളും ഉണ്ടല്ലോ;

     പരിജ്ഞാനമുള്ള അധരങ്ങൾ വിലയേറിയ ആഭരണം.

     ¹⁶ അന്യനുവേണ്ടി ജാമ്യം നില്ക്കുന്നവന്റെ വസ്ത്രം എടുത്തുകൊൾക;

     അന്യജാതിക്കാരനുവേണ്ടി ഉത്തരവാദി ആകുന്നവനോട് പണയം വാങ്ങുക.

     ¹⁷ വ്യാജത്താൽ നേടിയ ആഹാരം മനുഷ്യന് മധുരം;

     പിന്നത്തേതിൽ അവന്റെ വായിൽ ചരൽ നിറയും.

     ¹⁸ പദ്ധതികൾ ആലോചനകൊണ്ട് സാധിക്കുന്നു;

     ആകയാൽ ഭരണസാമർത്ഥ്യത്തോടെ യുദ്ധം ചെയ്യുക.

     ¹⁹ നുണയനായി നടക്കുന്നവൻ രഹസ്യം വെളിപ്പെടുത്തുന്നു;

     ആകയാൽ വിടുവായനോട് ഇടപെടരുത്.

     ²⁰ ആരെങ്കിലും അപ്പനെയോ അമ്മയെയോ ദുഷിച്ചാൽ

     അവന്റെ വിളക്ക് കൂരിരുട്ടിൽ കെട്ടുപോകും.

     ²¹ ആദിയിൽ ഒരു അവകാശം ബദ്ധപ്പെട്ട് കൈവശമാക്കാം;

     അതിന്റെ അവസാനമോ അനുഗ്രഹിക്കപ്പെടുകയില്ല.

     ²² ഞാൻ ദോഷത്തിന് പ്രതികാരം ചെയ്യുമെന്ന് നീ പറയരുത്;

     യഹോവയെ കാത്തിരിക്കുക; അവിടുന്ന് നിന്നെ രക്ഷിക്കും.

     ²³ രണ്ടുതരം തൂക്കം യഹോവയ്ക്ക് വെറുപ്പ്;

     കള്ളത്തുലാസും നല്ലതല്ല.

     ²⁴ മനുഷ്യന്റെ പാതകൾ യഹോവയാൽ നിയമിക്കപ്പെടുന്നു;

     പിന്നെ മനുഷ്യന് തന്റെ വഴി എങ്ങനെ ഗ്രഹിക്കാം?

     ²⁵ “ഇത് നിവേദിതം” എന്ന് തിടുക്കത്തിൽ നേരുന്നതും

     നേർന്നശേഷം പുനർചിന്തനം നടത്തുന്നതും മനുഷ്യന് ഒരു കെണി.

     ²⁶ ജ്ഞാനമുള്ള രാജാവ് ദുഷ്ടന്മാരെ പാറ്റിക്കളയുന്നു;

     അവരുടെ മേൽ അവൻ മെതിവണ്ടി ഉരുട്ടുന്നു.

     ²⁷ മനുഷ്യന്റെ ആത്മാവ് യഹോവയുടെ ദീപം;

     അത് അവന്റെ അന്തരംഗത്തെയെല്ലാം ശോധനചെയ്യുന്നു.

     ²⁸ ദയയും വിശ്വസ്തതയും രാജാവിനെ കാക്കുന്നു;

     ദയകൊണ്ട് അവൻ തന്റെ സിംഹാസനത്തെ ഉറപ്പിക്കുന്നു.

     ²⁹ യൗവനക്കാരുടെ ശക്തി അവരുടെ പ്രശംസ;

     വൃദ്ധന്മാരുടെ നര അവരുടെ ഭൂഷണം.

     ³⁰ ഹൃദയത്തിന്റെ ഉള്ളിലേക്ക് ചെല്ലുന്ന തല്ലും

     പൊട്ടിപ്പോകത്തക്ക അടിയും ദോഷത്തെ അടിച്ചുവാരിക്കളയുന്നു.

അദ്ധ്യായം.20 21

¹ രാജാവിന്റെ ഹൃദയം യഹോവയുടെ കയ്യിൽ നീർത്തോട് പോലെ ഇരിക്കുന്നു;

     തനിക്ക് ഇഷ്ടമുള്ളേടത്തേക്കൊക്കെയും അവിടുന്ന് അതിനെ തിരിക്കുന്നു.

     ² മനുഷ്യന്റെ വഴി ഒക്കെയും അവന് ചൊവ്വായിത്തോന്നുന്നു;

     യഹോവയോ ഹൃദയങ്ങളെ തൂക്കിനോക്കുന്നു.

     ³ നീതിയും ന്യായവും പ്രവർത്തിക്കുന്നത്

     യഹോവയ്ക്ക് ഹനനയാഗത്തെക്കാൾ സ്വീകാര്യം.

     ⁴ ഗർവ്വമുള്ള കണ്ണും അഹങ്കാരഹൃദയവും

     ദുഷ്ടന്മാരുടെ ദീപവും പാപം തന്നെ.

     ⁵ ഉത്സാഹിയുടെ വിചാരങ്ങൾ സമൃദ്ധിയിലേയ്ക്ക് നയിക്കുന്നു;

     തിടുക്കം കൂട്ടുന്നവരൊക്കെയും ദാരിദ്ര്യത്തിലേയ്ക്ക് പോകുവാൻ ബദ്ധപ്പെടുന്നു.

     ⁶ കള്ളനാവുകൊണ്ട് ധനം സമ്പാദിക്കുന്നത് പാറിപ്പോകുന്ന ആവിയാകുന്നു;

     അതിനെ അന്വേഷിക്കുന്നവർ മരണത്തെ അന്വേഷിക്കുന്നു.

     ⁷ ദുഷ്ടന്മാരുടെ അതിക്രമം അവർക്ക് നാശകാരണമാകുന്നു;

     ന്യായം ചെയ്യുവാൻ അവർക്ക് മനസ്സില്ലല്ലോ.

     ⁸ അകൃത്യഭാരം ചുമക്കുന്നവന്റെ വഴി വളഞ്ഞിരിക്കുന്നു;

     നിർമ്മലന്റെ പ്രവൃത്തിയോ ചൊവ്വുള്ളത് തന്നെ.

     ⁹ ശണ്ഠകൂടുന്ന സ്ത്രീയോടുകൂടി വീടിനുള്ളിൽ പാർക്കുന്നതിനെക്കാൾ

     മേൽപുരയുടെ ഒരു കോണിൽ പാർക്കുന്നത് നല്ലത്.

     ¹⁰ ദുഷ്ടന്റെ മനസ്സ് ദോഷത്തെ ആഗ്രഹിക്കുന്നു;

     അവന് കൂട്ടുകാരനോട് ദയ തോന്നുന്നതുമില്ല.

     ¹¹ പരിഹാസിയെ ശിക്ഷിച്ചാൽ അല്പബുദ്ധി ജ്ഞാനിയായിത്തീരും;

     ജ്ഞാനിയെ ഉപദേശിച്ചാൽ അവൻ പരിജ്ഞാനം പ്രാപിക്കും.

     ¹² നീതിമാനായ ദൈവം ദുഷ്ടന്റെ ഭവനത്തിന്മേൽ ദൃഷ്ടിവയ്ക്കുന്നു;

     ദുഷ്ടന്മാരെ നാശത്തിലേക്ക് മറിച്ചുകളയുന്നു.

     ¹³ എളിയവന്റെ നിലവിളിക്ക് ചെവി പൊത്തിക്കളയുന്നവൻ

     വിളിച്ചപേക്ഷിക്കുമ്പോൾ തനിക്കും ഉത്തരം ലഭിക്കുകയില്ല.

     ¹⁴ രഹസ്യത്തിൽ കൊടുക്കുന്ന സമ്മാനം കോപത്തെയും

     മടിയിൽ കൊണ്ടുവരുന്ന കോഴ ഉഗ്രകോപത്തെയും ശമിപ്പിക്കുന്നു.

     ¹⁵ ന്യായം പ്രവർത്തിക്കുന്നത് നീതിമാന് സന്തോഷവും

     ദുഷ്പ്രവൃത്തിക്കാർക്ക് ഭയങ്കരവും ആകുന്നു.

     ¹⁶ വിവേകമാർഗ്ഗം വിട്ടുനടക്കുന്നവൻ

     മൃതന്മാരുടെ കൂട്ടത്തിൽ വിശ്രമിക്കും.

     ¹⁷ ഉല്ലാസപ്രിയൻ ദരിദ്രനായിത്തീരും;

     വീഞ്ഞും തൈലവും പ്രിയപ്പെടുന്നവൻ ധനവാനാകുകയില്ല.

     ¹⁸ ദുഷ്ടൻ നീതിമാന് മറുവിലയാകും;

     അവിശ്വസ്തൻ നേരുള്ളവർക്ക് പകരമായിത്തീരും.

     ¹⁹ ശണ്ഠയും ദുശ്ശീലവുമുള്ള സ്ത്രീയോടുകൂടി പാർക്കുന്നതിലും

     നിർജ്ജനപ്രദേശത്ത് പോയി പാർക്കുന്നത് നല്ലത്.

     ²⁰ ജ്ഞാനിയുടെ പാർപ്പിടത്തിൽ വിലയേറിയ നിക്ഷേപവും തൈലവും ഉണ്ട്;

     മൂഢൻ അവയെ ദുരുപയോഗം ചെയ്തുകളയുന്നു.

     ²¹ നീതിയും ദയയും പിന്തുടരുന്നവൻ

     ജീവനും നീതിയും മാനവും കണ്ടെത്തും.

     ²² ജ്ഞാനി വീരന്മാരുടെ പട്ടണത്തിൽ കയറുകയും

     അതിന്റെ ആശ്രയമായ കോട്ട ഇടിച്ചുകളയുകയും ചെയ്യുന്നു.

     ²³ വായും നാവും സൂക്ഷിക്കുന്നവൻ

     തന്റെ പ്രാണനെ കഷ്ടങ്ങളിൽനിന്ന് സൂക്ഷിക്കുന്നു.

     ²⁴ നിഗളവും ഗർവ്വവും ഉള്ളവന് പരിഹാസി എന്ന് പേരാകുന്നു;

     അവൻ ഗർവ്വത്തിന്റെ അഹങ്കാരത്തോടെ പ്രവർത്തിക്കുന്നു.

     ²⁵ മടിയന്റെ കൊതി അവന് മരണകാരണം;

     വേലചെയ്യുവാൻ അവന്റെ കൈകൾ മടിക്കുന്നുവല്ലോ.

     ²⁶ ചിലർ നിത്യവും അത്യാഗ്രഹത്തോടെ ഇരിക്കുന്നു;

     എന്നാൽ നീതിമാൻ ലോഭിക്കാതെ കൊടുത്തുകൊണ്ടിരിക്കുന്നു.

     ²⁷ ദുഷ്ടന്മാരുടെ യാഗം വെറുപ്പാകുന്നു;

     അവൻ ദുഷ്ടതാത്പര്യത്തോടെ അത് അർപ്പിച്ചാൽ എത്ര അധികം!

     ²⁸ കള്ളസ്സാക്ഷി നശിച്ചുപോകും;

     ശ്രദ്ധിച്ചുകേൾക്കുന്നവന് എപ്പോഴും സംസാരിക്കാം.

     ²⁹ ദുഷ്ടൻ മുഖധാർഷ്ട്യം കാണിക്കുന്നു;

     നേരുള്ളവൻ തന്റെ വഴി നന്നാക്കുന്നു.

     ³⁰ യഹോവയ്ക്കെതിരെ ജ്ഞാനവുമില്ല,

     ബുദ്ധിയുമില്ല, ആലോചനയുമില്ല.

     ³¹ കുതിരയെ യുദ്ധദിവസത്തേക്ക് ചമയിക്കുന്നു;

     ജയം യഹോവയിൽ നിന്ന് വരുന്നു.

അദ്ധ്യായം.21 22

¹ അനവധി സമ്പത്തിനെക്കാൾ സൽക്കീർത്തിയും

     വെള്ളിയേക്കാളും പൊന്നിനെക്കാളും കൃപയും ഏറെ നല്ലത്.

     ² ധനവാനും ദരിദ്രനും ഒരു കാര്യത്തിൽ തുല്യരാണ്;

     അവരുടെ സൃഷ്ടാവ് യഹോവ തന്നെ.

     ³ വിവേകമുള്ളവൻ അനർത്ഥം കണ്ട് ഒളിച്ചുകൊള്ളുന്നു;

     അല്പബുദ്ധികൾ നേരെ ചെന്ന് അനർത്ഥത്തിൽ അകപ്പെടുന്നു.

     ⁴ താഴ്മയ്ക്കും യഹോവാഭക്തിക്കും ഉള്ള പ്രതിഫലം

     ധനവും മാനവും ജീവനും ആകുന്നു.

     ⁵ വക്രന്റെ വഴിയിൽ മുള്ളും കെണിയും ഉണ്ട്;

     തന്റെ പ്രാണനെ സൂക്ഷിക്കുന്നവൻ അവയോട് അകന്നിരിക്കട്ടെ.

     ⁶ ബാലൻ നടക്കേണ്ട വഴിയിൽ അവനെ അഭ്യസിപ്പിക്കുക;

     അവൻ വൃദ്ധനായാലും അത് വിട്ടുമാറുകയില്ല.

     ⁷ ധനവാൻ ദരിദ്രന്മാരെ ഭരിക്കുന്നു;

     കടം മേടിക്കുന്നവൻ കടം കൊടുക്കുന്നവന് ദാസൻ.

     ⁸ നീതികേട് വിതയ്ക്കുന്നവൻ ആപത്ത് കൊയ്യും;

     അവന്റെ കോപത്തിന്റെ വടി വിഫലമാകും.

     ⁹ ദയാകടാക്ഷമുള്ളവൻ അനുഗ്രഹിക്കപ്പെടും;

     കാരണം അവൻ തന്റെ ആഹാരത്തിൽനിന്ന് അഗതിക്ക് കൊടുക്കുന്നുവല്ലോ.

     ¹⁰ പരിഹാസിയെ നീക്കിക്കളയുക; അപ്പോൾ പിണക്കം ഒഴിഞ്ഞുപോകും;

     കലഹവും നിന്ദയും നിന്നുപോകും.

     ¹¹ ഹൃദയശുദ്ധി ഇഷ്ടപ്പെടുന്നവന് അധരലാവണ്യം ഉണ്ട്;

     രാജാവ് അവന്റെ സ്നേഹിതൻ.

     ¹² യഹോവയുടെ കണ്ണുകൾ പരിജ്ഞാനമുള്ളവനെ കാക്കുന്നു;

     ദ്രോഹികളുടെ വാക്ക് അവിടുന്ന് മറിച്ചുകളയുന്നു.

     ¹³ “വെളിയിൽ സിംഹം ഉണ്ട്,

     വീഥിയിൽ എനിക്ക് ജീവഹാനി വരും” എന്ന് മടിയൻ പറയുന്നു.

     ¹⁴ പരസ്ത്രീയുടെ വായ് ആഴമുള്ള കുഴി ആകുന്നു;

     യഹോവയാൽ ത്യജിക്കപ്പെട്ടവൻ അതിൽ വീഴും.

     ¹⁵ ബാലന്റെ ഹൃദയത്തോട് ഭോഷത്തം പറ്റിയിരിക്കുന്നു;

     ശിക്ഷയ്ക്കുള്ള വടി അതിനെ അവനിൽ നിന്ന് അകറ്റിക്കളയും.

     ¹⁶ ആദായം ഉണ്ടാക്കേണ്ടതിന് എളിയവനെ പീഡിപ്പിക്കുന്നവനും

     ധനവാനു കൊടുക്കുന്നവനും ദരിദ്രനായിത്തീരും.

     ¹⁷ ജ്ഞാനികളുടെ വചനങ്ങൾ ചെവിചായിച്ച് കേൾക്കുക;

     എന്റെ പരിജ്ഞാനത്തിന് മനസ്സുവയ്ക്കുക.

     ¹⁸ അവയെ നിന്റെ ഉള്ളിൽ സൂക്ഷിക്കുന്നതും

     നിന്റെ അധരങ്ങളിൽ അവ ഉറച്ചിരിക്കുന്നതും മനോഹരം.

     ¹⁹ നിന്റെ ആശ്രയം യഹോവയിൽ ആയിരിക്കേണ്ടതിന്

     ഞാൻ ഇന്ന് നിന്നോട്, നിന്നോടു തന്നെ, ഉപദേശിച്ചിരിക്കുന്നു.

     ²⁰ നിന്നെ അയച്ചവർക്ക് നീ നേരുള്ള മറുപടി നൽകുവാൻ തക്കവണ്ണം

     നിനക്ക് നേരുള്ള മറുപടിയുടെ നിശ്ചയം അറിയിച്ചുതരുവാൻ

     ²¹ ആലോചനയും പരിജ്ഞാനവും അടങ്ങിയ ഉത്തമവാക്യങ്ങൾ

     ഞാൻ നിനക്ക് എഴുതിയിട്ടുണ്ടല്ലോ.

     ²² എളിയവനോട് അവൻ എളിയവനാകുകകൊണ്ട് കവർച്ച ചെയ്യരുത്;

     അരിഷ്ടനെ പടിവാതില്ക്കൽവച്ചു പീഡിപ്പിക്കുകയും അരുത്.

     ²³ യഹോവ അവരുടെ വ്യവഹാരം നടത്തും;

     അവരെ കൊള്ളയിട്ടവരുടെ ജീവനെ കൊള്ളയിടും.

     ²⁴ കോപശീലനോടു സഖിത്വമരുത്;

     ക്രോധമുള്ള മനുഷ്യനോടുകൂടി നടക്കുകയും അരുത്.

     ²⁵ നീ അവന്റെ വഴികളെ പഠിക്കുവാനും

     നിന്റെ പ്രാണൻ കെണിയിൽ അകപ്പെടുവാനും സംഗതി വരരുത്.

     ²⁶ നീ കൈയടിച്ച് ഉറപ്പിക്കുന്നവരുടെ കൂട്ടത്തിലും

     കടത്തിന് ജാമ്യം നില്ക്കുന്നവരുടെ കൂട്ടത്തിലും ആയിപ്പോകരുത്.

     ²⁷ വീട്ടുവാൻ നിനക്ക് വകയില്ലാതെ വന്നിട്ട്

     നിന്റെ കീഴിൽനിന്ന് നിന്റെ മെത്ത എടുത്തുകളയുവാൻ ഇടവരുത്തുന്നത് എന്തിന്?

     ²⁸ നിന്റെ പിതാക്കന്മാർ ഇട്ടിരിക്കുന്ന

     പണ്ടത്തെ അതിര് നീ മാറ്റരുത്.

     ²⁹ പ്രവൃത്തിയിൽ സാമർത്ഥ്യമുള്ള പുരുഷനെ നീ കാണുന്നുവോ?

     അവൻ രാജാക്കന്മാരുടെ മുമ്പിൽ നില്ക്കും;

     നീചന്മാരുടെ മുമ്പിൽ അവൻ നില്ക്കുകയില്ല.

അദ്ധ്യായം.22 23

¹ നീ അധിപതിയോടുകൂടെടി ഭക്ഷണത്തിന് ഇരിക്കുമ്പോൾ

     നിന്റെ മുമ്പിൽ ഇരിക്കുന്നവൻ ആരെന്ന് കരുതിക്കൊള്ളുക.

     ² നീ ഭോജനപ്രിയൻ ആകുന്നുവെങ്കിൽ

     നിന്റെ തൊണ്ടയ്ക്ക് ഒരു കത്തി വച്ചുകൊള്ളുക.

     ³ അവന്റെ സ്വാദുഭോജനങ്ങൾ കൊതിക്കരുത്;

     അവ വഞ്ചിക്കുന്ന ഭോജനമത്രേ.

     ⁴ ധനവാനാകേണ്ടതിന് ബദ്ധപ്പെടരുത്;

     അതിനായുള്ള ബുദ്ധി വിട്ടുകളയുക.

     ⁵ നിന്റെ ദൃഷ്ടി ധനത്തിന്മേൽ പതിക്കുന്നത് എന്തിന്?

     അത് ഇല്ലാതെയായിപ്പോകുമല്ലോ.

     കഴുകൻ ആകാശത്തേക്ക് എന്നപോലെ

     അത് ചിറകെടുത്ത് പറന്നുകളയും.

     ⁶ കണ്ണുകടിയുള്ളവന്റെ അപ്പം തിന്നരുത്;

     അവന്റെ സ്വാദുഭോജ്യങ്ങൾ ആഗ്രഹിക്കുകയുമരുത്.

     ⁷ അവൻ തന്റെ മനസ്സിൽ കണക്ക് കൂട്ടുന്നതുപോലെ ആകുന്നു;

     ‘തിന്നു കുടിച്ചുകൊള്ളുക’ എന്ന് അവൻ നിന്നോട് പറയും;

     അവന്റെ ഹൃദയമോ നിനക്ക് അനുകൂലമല്ല.

     ⁸ നീ തിന്ന കഷണം ഛർദ്ദിച്ചുപോകും;

     നിന്റെ മാധുര്യവാക്ക് നഷ്ടമായെന്നും വരും.

     ⁹ ഭോഷൻ കേൾക്കെ നീ സംസാരിക്കരുത്;

     അവൻ നിന്റെ വാക്കുകളുടെ ജ്ഞാനം നിരസിച്ചുകളയും.

     ¹⁰ പണ്ടേയുള്ള അതിര് നീക്കരുത്;

     അനാഥരുടെ നിലം ആക്രമിക്കുകയുമരുത്.

     ¹¹ അവരുടെ പ്രതികാരകൻ ബലവാനല്ലയോ;

     അവർക്ക് നിന്നോടുള്ള വ്യവഹാരം അവിടുന്ന് നടത്തും.

     ¹² നിന്റെ ഹൃദയം പ്രബോധനത്തിനും

     നിന്റെ ചെവി പരിജ്ഞാനവചനങ്ങൾക്കും സമർപ്പിക്കുക.

     ¹³ ബാലന് ശിക്ഷ കൊടുക്കാതിരിക്കരുത്;

     വടികൊണ്ട് അടിച്ചാൽ അവൻ ചത്തുപോകുകയില്ല.

     ¹⁴ വടികൊണ്ട് അവനെ അടിക്കുന്നതിനാൽ

     നീ അവന്റെ പ്രാണനെ പാതാളത്തിൽനിന്ന് വിടുവിക്കും.

     ¹⁵ മകനേ, നിന്റെ ഹൃദയം ജ്ഞാനം പഠിച്ചാൽ

     എന്റെ ഹൃദയവും സന്തോഷിക്കും.

     ¹⁶ നിന്റെ അധരം നേര് സംസാരിച്ചാൽ

     എന്റെ അന്തരംഗങ്ങൾ ആനന്ദിക്കും.

     ¹⁷ നിന്റെ ഹൃദയം പാപികളോട് അസൂയപ്പെടരുത്;

     നീ എല്ലായ്പോഴും യഹോവഭക്തിയോടിരിക്കുക.

     ¹⁸ ഒരു പ്രതിഫലം ഉണ്ടാകും നിശ്ചയം;

     നിന്റെ പ്രത്യാശയ്ക്ക് ഭംഗം വരുകയുമില്ല.

     ¹⁹ മകനേ, കേട്ട് ജ്ഞാനം പഠിക്കുക;

     നിന്റെ ഹൃദയത്തെ നേർവഴിയിൽ നടത്തിക്കൊള്ളുക.

     ²⁰ നീ വീഞ്ഞു കുടിക്കുന്നവരുടെ കൂട്ടത്തിലും

     മാംസഭോജനപ്രിയരുടെ ഇടയിലും ഇരിക്കരുത്.

     ²¹ കുടിയനും അമിതഭോജകനും ദരിദ്രരായ്തീരും;

     ആലസ്യം പഴന്തുണി ഉടുക്കുമാറാക്കും.

     ²² നിന്നെ ജനിപ്പിച്ച അപ്പന്റെ വാക്ക് കേൾക്കുക;

     നിന്റെ അമ്മ വൃദ്ധയായിരിക്കുമ്പോൾ അവളെ നിന്ദിക്കരുത്.

     ²³ നീ സത്യം വില്ക്കുകയല്ല വാങ്ങുകയാണ് വേണ്ടത്;

     ജ്ഞാനവും പ്രബോധനവും വിവേകവും അങ്ങനെ തന്നെ.

     ²⁴ നീതിമാന്റെ അപ്പൻ ഏറ്റവും ആനന്ദിക്കും;

     ജ്ഞാനിയുടെ ജനകൻ അവനിൽ സന്തോഷിക്കും.

     ²⁵ നിന്റെ അമ്മയപ്പന്മാർ സന്തോഷിക്കട്ടെ;

     നിന്നെ പ്രസവിച്ചവൾ ആനന്ദിക്കട്ടെ.

     ²⁶ മകനേ, നിന്റെ ഹൃദയം എനിക്ക് തരുക;

     എന്റെ വഴി നിന്റെ കണ്ണിന് ഇമ്പമായിരിക്കട്ടെ.

     ²⁷ വേശ്യാസ്ത്രീ ആഴമുള്ള കുഴിയും

     പരസ്ത്രീ ഇടുക്കമുള്ള കിണറും ആകുന്നു.

     ²⁸ അവൾ പിടിച്ചുപറിക്കാരനെപ്പോലെ പതിയിരിക്കുന്നു;

     മനുഷ്യരിൽ അവിശ്വസ്തരെ വർദ്ധിപ്പിക്കുന്നു.

     ²⁹ ആർക്ക് കഷ്ടം, ആർക്ക് സങ്കടം, ആർക്ക് കലഹം?

     ആർക്ക് ആവലാതി, ആർക്ക് അനാവശ്യമായ മുറിവുകൾ, ആർക്ക് കൺചുവപ്പ്?

     ³⁰ വീഞ്ഞു കുടിച്ചുകൊണ്ട് നേരം വൈകിക്കുന്നവർക്കും

     മദ്യം രുചിനോക്കുവാൻ പോകുന്നവർക്കും തന്നെ.

     ³¹ വീഞ്ഞു ചുവന്നു പാത്രത്തിൽ തിളങ്ങുന്നതും

     രസമായി ഇറക്കുന്നതും നീ നോക്കരുത്.

     ³² ഒടുവിൽ അത് സർപ്പംപോലെ കടിക്കും;

     അണലിപോലെ കൊത്തും.

     ³³ നിന്റെ കണ്ണുകൾ പരസ്ത്രീകളെ നോക്കും;

     നിന്റെ ഹൃദയം വക്രത പറയും.

     ³⁴ നീ നടുക്കടലിൽ ശയിക്കുന്നവനെപ്പോലെയും

     പാമരത്തിന്റെ മുകളിൽ ഉറങ്ങുന്നവനെപ്പോലെയും ആകും.

     ³⁵ “അവർ എന്നെ അടിച്ചു എനിക്കു നൊന്തില്ല;

     അവർ എന്നെ തല്ലി, ഞാൻ അറിഞ്ഞതുമില്ല.

     ഞാൻ എപ്പോൾ ഉണരും? ഞാൻ ഇനിയും അതു തന്നെ തേടും” എന്ന് നീ പറയും.

അദ്ധ്യായം.23 24

¹ ദുഷ്ടന്മാരോട് അസൂയപ്പെടരുത്;

     അവരോടുകൂടി ഇരിക്കുവാൻ ആഗ്രഹിക്കുകയുമരുത്.

     ² അവരുടെ ഹൃദയം അക്രമം മെനയുന്നു;

     കലഹം ഉണ്ടാക്കുവാൻ അവരുടെ അധരങ്ങൾ ഉപയോഗിക്കുന്നു.

     ³ ജ്ഞാനംകൊണ്ട് ഭവനം പണിയുന്നു;

     വിവേകംകൊണ്ട് അത് സ്ഥിരമായിവരുന്നു.

     ⁴ പരിജ്ഞാനംകൊണ്ട് അതിന്റെ മുറികളിൽ

     വിലയേറിയതും മനോഹരവുമായ സകല സമ്പത്തും നിറഞ്ഞുവരുന്നു.

     ⁵ ജ്ഞാനിയായ പുരുഷൻ ബലവാനാകുന്നു;

     പരിജ്ഞാനമുള്ളവൻ ബലം വർദ്ധിപ്പിക്കുന്നു.

     ⁶ ബുദ്ധിയുള്ള ആലോചനയാൽ നീ യുദ്ധം നടത്തി ജയിക്കും;

     മന്ത്രിമാരുടെ ബഹുത്വത്തിൽ രക്ഷയുണ്ട്.

     ⁷ ജ്ഞാനം ഭോഷന് അപ്രാപ്യമായിരിക്കുന്നു;

     അവൻ പട്ടണവാതില്ക്കൽ വായ് തുറക്കുന്നില്ല.

     ⁸ ദോഷം ചെയ്യുവാൻ നിരൂപിക്കുന്നവനെ

     ദുഷ്ക്കർമ്മി എന്ന് പറഞ്ഞുവരുന്നു;

     ⁹ ഭോഷന്റെ നിരൂപണം പാപം തന്നെ;

     പരിഹാസി മനുഷ്യർക്ക് വെറുപ്പാകുന്നു.

     ¹⁰ കഷ്ടകാലത്ത് നീ പതറിപ്പോയാൽ

     നിന്റെ ബലം കുറഞ്ഞുപോകും.

     ¹¹ മരണത്തിന് കൊണ്ടുപോകുന്നവരെ വിടുവിക്കുക;

     കൊലക്കളത്തിലേക്ക് വിറച്ച് ചെല്ലുന്നവരെ രക്ഷിക്കുവാൻ ശ്രമിക്കുക.

     ¹² “ഞങ്ങൾ അറിഞ്ഞില്ലല്ലോ” എന്ന് നീ പറഞ്ഞാൽ

     ഹൃദയങ്ങളെ തൂക്കിനോക്കുന്നവൻ ഗ്രഹിക്കുകയില്ലയോ?

     നിന്റെ പ്രാണനെ കാക്കുന്നവൻ അറിയുകയില്ലയോ?

     അവിടുന്ന് മനുഷ്യന് പ്രവൃത്തിക്ക് തക്കവണ്ണം പകരം കൊടുക്കുകയില്ലയോ?

     ¹³ മകനേ, തേൻ തിന്നുക; അത് നല്ലതല്ലോ;

     തേങ്കട്ട നിന്റെ അണ്ണാക്കിന് മധുരമത്രേ.

     ¹⁴ ജ്ഞാനവും നിന്റെ ഹൃദയത്തിന് അങ്ങനെ തന്നെ എന്നറിയുക;

     നീ അത് പ്രാപിച്ചാൽ പ്രതിഫലം ഉണ്ടാകും;

     നിന്റെ പ്രത്യാശയ്ക്ക് ഭംഗം വരികയുമില്ല.

     ¹⁵ ദുഷ്ടാ, നീ നീതിമാന്റെ പാർപ്പിടത്തിന് പതിയിരിക്കരുത്;

     അവന്റെ വിശ്രാമസ്ഥലത്തെ നശിപ്പിക്കുകയുമരുത്.

     ¹⁶ നീതിമാൻ ഏഴുപ്രാവശ്യം വീണാലും എഴുന്നേല്ക്കും;

     ദുഷ്ടന്മാരോ അനർത്ഥത്തിൽ നശിച്ചുപോകും.

     ¹⁷ നിന്റെ ശത്രു വീഴുമ്പോൾ സന്തോഷിക്കരുത്;

     അവൻ ഇടറുമ്പോൾ നിന്റെ ഹൃദയം ആനന്ദിക്കരുത്.

     ¹⁸ യഹോവ കണ്ടിട്ട് അവിടുത്തേയ്ക്ക് ഇഷ്ടക്കേടാകുവാനും

     തന്റെ കോപം അവങ്കൽനിന്ന് മാറ്റിക്കളയുവാനും മതി.

     ¹⁹ ദുഷ്പ്രവൃത്തിക്കാർനിമിത്തം മുഷിയരുത്;

     ദുഷ്ടന്മാരോട് അസൂയപ്പെടുകയും അരുത്.

     ²⁰ ദോഷിക്ക് പ്രതിഫലമുണ്ടാകുകയില്ല;

     ദുഷ്ടന്റെ വിളക്ക് കെട്ടുപോകും.

     ²¹ മകനേ, യഹോവയെയും രാജാവിനെയും ഭയപ്പെടുക;

     മത്സരികളോട് ഇടപെടരുത്.

     ²² അവരിൽനിന്ന് ആപത്ത് പെട്ടെന്ന് വരും;

     രണ്ടു കൂട്ടരും വരുത്തുന്ന നാശം ആരറിയുന്നു? ^[1]

²³ ഇവയും ജ്ഞാനികളുടെ വാക്യങ്ങൾ.

     ന്യായവിസ്താരത്തിൽ മുഖപക്ഷം നന്നല്ല.

     ²⁴ ദുഷ്ടനോട് “നീ നീതിമാൻ” എന്ന് പറയുന്നവനെ

     ജനതകൾ ശപിക്കുകയും വംശങ്ങൾ വെറുക്കുകയും ചെയ്യും.

     ²⁵ അവനെ ശാസിക്കുന്നവർക്ക് നന്മ ഉണ്ടാകും;

     വലിയ അനുഗ്രഹം അവരുടെ മേൽ വരും.

     ²⁶ നേരുള്ള ഉത്തരം പറയുന്നവൻ

     അധരങ്ങളെ ചുംബനം ചെയ്യുന്നു.

     ²⁷ വെളിയിൽ നിന്റെ വേല ചെയ്യുക; വയലിൽ എല്ലാം തീർക്കുക;

     പിന്നീട് നിന്റെ വീട് പണിയുക.

     ²⁸ കാരണം കൂടാതെ കൂട്ടുകാരന് വിരോധമായി സാക്ഷിനില്ക്കരുത്;

     നിന്റെ അധരംകൊണ്ട് ചതിക്കുകയും അരുത്.

     ²⁹ “അവൻ എന്നോടു ചെയ്തതുപോലെ ഞാൻ അവനോടു ചെയ്യുമെന്നും

     ഞാൻ അവന് അവന്റെ പ്രവൃത്തിക്ക് പകരം കൊടുക്കും” എന്നും നീ പറയരുത്.

     ³⁰ ഞാൻ മടിയന്റെ നിലത്തിനരികിലും

     ബുദ്ധിഹീനന്റെ മുന്തിരിത്തോട്ടത്തിന് സമീപത്തും കൂടി പോയി

     ³¹ അവിടെ മുള്ള് പടർന്നുപിടിച്ചിരിക്കുന്നതും

     കള നിറഞ്ഞ് നിലം മൂടിയിരിക്കുന്നതും

     അതിന്റെ കന്മതിൽ ഇടിഞ്ഞുകിടക്കുന്നതും കണ്ടു.

     ³² ഞാൻ അത് നോക്കി വിചാരിക്കുകയും

     അതു കണ്ട് ഉപദേശം പ്രാപിക്കുകയും ചെയ്തു.

     ³³ കുറെക്കൂടെ ഉറക്കം, കുറെക്കൂടെ നിദ്ര,

     കുറെക്കൂടെ കൈകെട്ടി കിടപ്പ്.

     ³⁴ അങ്ങനെ നിന്റെ ദാരിദ്ര്യം വഴിപോക്കനെപ്പോലെയും

     നിന്റെ ബുദ്ധിമുട്ട് ആയുധപാണിയെപ്പോലെയും വരും.

അദ്ധ്യായം.24 25

¹ ഇവയും ശലോമോന്റെ സദൃശവാക്യങ്ങൾ;

     യെഹൂദാരാജാവായ ഹിസ്കീയാവിന്റെ ആളുകൾ അവ ശേഖരിച്ചിരിക്കുന്നു.

     ² കാര്യം മറച്ചുവയ്ക്കുന്നത് ദൈവത്തിന്റെ മഹത്വം;

     കാര്യം ആരായുന്നതോ രാജാക്കന്മാരുടെ മഹത്വം.

     ³ ആകാശത്തിന്റെ ഉയരവും ഭൂമിയുടെ ആഴവും

     രാജാക്കന്മാരുടെ ഹൃദയവും അജ്ഞാതം.

     ⁴ വെള്ളിയിൽനിന്ന് മാലിന്യം നീക്കിക്കളഞ്ഞാൽ

     തട്ടാന് പണിത്തരം കിട്ടും.

     ⁵ രാജസന്നിധിയിൽനിന്ന് ദുഷ്ടനെ നീക്കിക്കളഞ്ഞാൽ

     അവന്റെ സിംഹാസനം നീതിയാൽ സ്ഥിരപ്പെടും.

     ⁶ രാജസന്നിധിയിൽ നിന്നെത്തന്നെ പുകഴ്ത്തരുത്;

     മഹാന്മാരുടെ സ്ഥാനത്ത് നില്ക്കുകയും അരുത്.

     ⁷ പ്രഭുവിന്റെ സന്നിധിയിൽ നീ താഴ്ത്തപ്പെടുന്നതിനെക്കാൾ

     “ഇവിടെ കയറിവരുക” എന്ന് അവൻ നിന്നോട് പറയുന്നത് നല്ലത്.

     ⁸ ബദ്ധപ്പെട്ട് വ്യവഹാരത്തിന് പുറപ്പെടരുത്;

     അല്ലെങ്കിൽ ഒടുവിൽ കൂട്ടുകാരൻ നിന്നെ ലജ്ജിപ്പിച്ചാൽ നീ എന്ത് ചെയ്യും?

     ⁹ നിന്റെ വഴക്ക് കൂട്ടുകാരനുമായി പറഞ്ഞു തീർക്കുക;

     എന്നാൽ മറ്റൊരുത്തന്റെ രഹസ്യം വെളിപ്പെടുത്തരുത്.

     ¹⁰ കേൾക്കുന്നവൻ നിന്നെ നിന്ദിക്കുവാനും

     നിനക്ക് തീരാത്ത അപമാനം വരുവാനും ഇടവരരുത്.

     ¹¹ തക്കസമയത്ത് പറയുന്ന വാക്ക്

     വെള്ളിത്താലത്തിൽ പൊൻനാരങ്ങാ പോലെ.

     ¹² കേട്ടനുസരിക്കുന്ന കാതിന് ജ്ഞാനിയുടെ ശാസന

     പൊൻകടുക്കനും തങ്കംകൊണ്ടുള്ള ആഭരണവും ആകുന്നു.

     ¹³ വിശ്വസ്തനായ ദൂതൻ തന്നെ അയക്കുന്നവർക്ക്

     കൊയ്ത്തുകാലത്ത് ഹിമത്തിന്റെ തണുപ്പുപോലെ;

     അവൻ യജമാനന്മാരുടെ ഉള്ളം തണുപ്പിക്കുന്നു.

     ¹⁴ ദാനങ്ങളെച്ചൊല്ലി വെറുതെ പ്രശംസിക്കുന്നവൻ

     മഴയില്ലാത്ത മേഘവും കാറ്റുംപോലെയാകുന്നു.

     ¹⁵ ദീർഘക്ഷമകൊണ്ട് ന്യായാധിപനെ സമ്മതിപ്പിക്കാം;

     മൃദുവായുള്ള നാവ് അസ്ഥിയെ നുറുക്കുന്നു.

     ¹⁶ നിനക്ക് തേൻ കിട്ടിയാൽ വേണ്ടുന്നതേ ഭക്ഷിക്കാവു;

     അധികം ഭക്ഷിച്ചിട്ട് ഛർദ്ദിക്കുവാൻ ഇടവരരുത്.

     ¹⁷ കൂട്ടുകാരൻ നിന്നെക്കൊണ്ട് മടുത്ത് നിന്നെ വെറുക്കാതെയിരിക്കേണ്ടതിന്

     അവന്റെ വീട്ടിൽ കൂടെക്കൂടെ ചെല്ലരുത്.

     ¹⁸ കൂട്ടുകാരന് വിരോധമായി കള്ളസ്സാക്ഷ്യം പറയുന്ന മനുഷ്യൻ

     ഗദയും വാളും കൂർത്ത അമ്പും ആകുന്നു.

     ¹⁹ കഷ്ടകാലത്ത് അവിശ്വസ്തനെ ആശ്രയിക്കുന്നത്

     കേടുള്ള പല്ലും ഉളുക്കിയ കാലുംപോലെ ആകുന്നു.

     ²⁰ വിഷാദമുള്ള ഹൃദയത്തിനായി പാട്ടു പാടുന്നവൻ

     ശീതകാലത്ത് വസ്ത്രം കളയുന്നതുപോലെയും

     യവക്ഷാരത്തിന്മേൽ ചൊറുക്ക പകരുന്നതുപോലെയും ആകുന്നു.

     ²¹ ശത്രുവിന് വിശക്കുന്നു എങ്കിൽ അവന് ഭക്ഷിക്കുവാൻ കൊടുക്കുക;

     ദാഹിക്കുന്നു എങ്കിൽ കുടിക്കുവാൻ കൊടുക്കുക.

     ²² അങ്ങനെ നീ അവന്റെ തലമേൽ തീക്കനൽ കൂട്ടും;

     യഹോവ നിനക്കു പ്രതിഫലം നല്കുകയും ചെയ്യും.

     ²³ വടക്കൻ കാറ്റ് മഴ കൊണ്ടുവരുന്നു;

     ഏഷണിവാക്ക് കോപഭാവം ജനിപ്പിക്കുന്നു;

     ²⁴ ശണ്ഠകൂടുന്ന സ്ത്രീയോടുകൂടി വീടിനുള്ളിൽ പാർക്കുന്നതിനെക്കാൾ

     മേൽപുരയുടെ ഒരു കോണിൽ പാർക്കുന്നത് നല്ലത്.

     ²⁵ ദാഹമുള്ളവന് തണ്ണീർ കിട്ടുന്നതും

     ദൂരദേശത്തുനിന്ന് നല്ല വർത്തമാനം വരുന്നതും ഒരുപോലെ.

     ²⁶ ദുഷ്ടന്റെ മുമ്പിൽ കുലുങ്ങിപ്പോയ നീതിമാൻ

     കലങ്ങിയ കിണറിനും മലിനമായ നീരുറവിനും സമം.

     ²⁷ തേൻ ഏറെ കുടിക്കുന്നത് നല്ലതല്ല;

     സ്വന്തം മഹത്വം ആരായുന്നത് അതുപോലെ തന്നെ.

     ²⁸ ആത്മസംയമനം ഇല്ലാത്ത പുരുഷൻ

     മതിൽ ഇല്ലാതെ ഇടിഞ്ഞുകിടക്കുന്ന പട്ടണംപോലെയാകുന്നു.

അദ്ധ്യായം.25 26

¹ വേനൽകാലത്ത് ഹിമവും കൊയ്ത്തുകാലത്ത് മഴയും എന്നപോലെ

     ഭോഷന് ബഹുമാനം ചേർന്നതല്ല.

     ² പാറിപ്പോകുന്ന കുരികിലും പറന്നുപോകുന്ന മീവൽപക്ഷിയും പോലെ

     കാരണം കൂടാതെ ശാപം ഫലിക്കുകയില്ല.

     ³ കുതിരയ്ക്ക് ചമ്മട്ടി, കഴുതയ്ക്കു കടിഞ്ഞാൺ,

     മൂഢന്മാരുടെ മുതുകിനു വടി.

     ⁴ നീയും മൂഢനെപ്പോലെ ആകാതിരിക്കേണ്ടതിന്

     അവന്റെ ഭോഷത്തംപോലെ അവനോട് ഉത്തരം പറയരുത്.

     ⁵ മൂഢന് താൻ ജ്ഞാനിയെന്ന് തോന്നാതിരിക്കേണ്ടതിന്

     അവന്റെ ഭോഷത്തത്തിനൊത്തവണ്ണം അവനോട് ഉത്തരം പറയുക.

     ⁶ മൂഢന്റെ കൈവശം വർത്തമാനം അയക്കുന്നവൻ

     സ്വന്തകാൽ മുറിച്ചുകളയുകയും അന്യായം കുടിക്കുകയും ചെയ്യുന്നു.

     ⁷ മൂഢന്മാരുടെ വായിലെ സദൃശവാക്യം

     മുടന്തന്റെ കാല് ഞാന്നു കിടക്കുന്നതുപോലെ.

     ⁸ മൂഢന് ബഹുമാനം കൊടുക്കുന്നത്

     കവിണയിൽ കല്ലുകെട്ടി മുറുക്കുന്നതുപോലെ.

     ⁹ മൂഢന്മാരുടെ വായിലെ സദൃശവാക്യം

     മദ്യപന്റെ കയ്യിലെ മുള്ളുപോലെ.

     ¹⁰ എല്ലാവരെയും മുറിവേല്പിക്കുന്ന വില്ലാളിയും,

     മൂഢനെയും

     വഴിപോക്കരെയും കൂലിക്കു നിർത്തുന്നവനും ഒരുപോലെ.

     ¹¹ നായ് ഛർദ്ദിച്ചതിലേക്ക് വീണ്ടും തിരിയുന്നതും

     മൂഢൻ തന്റെ ഭോഷത്തം ആവർത്തിക്കുന്നതും ഒരുപോലെ.

     ¹² തനിക്കുതന്നെ ജ്ഞാനിയെന്ന് തോന്നുന്ന മനുഷ്യനെ നീ കാണുന്നുവോ?

     അവനെക്കുറിച്ചുള്ളതിനെക്കാളും മൂഢനെക്കുറിച്ച് അധികം പ്രത്യാശയുണ്ട്.

     ¹³ “വഴിയിൽ സിംഹം ഉണ്ട്, തെരുവീഥികളിൽ ഉഗ്രസിംഹം ഉണ്ട് ”

     എന്നിങ്ങനെ മടിയൻ പറയുന്നു.

     ¹⁴ കതക് വിജാഗിരിയിൽ എന്നപോലെ

     മടിയൻ തന്റെ കിടക്കയിൽ തിരിയുന്നു.

     ¹⁵ മടിയൻ തന്റെ കൈ തളികയിൽ പൂഴ്ത്തുന്നു;

     വായിലേക്ക് തിരികെ കൊണ്ടുവരുന്നത് അവനു പ്രയാസം.

     ¹⁶ ബുദ്ധിയോടെ ഉത്തരം പറയുവാൻ പ്രാപ്തിയുള്ള ഏഴു പേരിലും

     താൻ ജ്ഞാനി എന്ന് മടിയനു തോന്നുന്നു.

     ¹⁷ തന്നെ സംബന്ധിക്കാത്ത വഴക്കിൽ ഇടപെടുന്നവൻ

     വഴിയെപോകുന്ന നായുടെ ചെവിക്ക് പിടിക്കുന്നവനെപ്പോലെ.

     ¹⁸ കൂട്ടുകാരനെ വഞ്ചിച്ചിട്ട്

     “അത് തമാശ” എന്ന് പറയുന്ന മനുഷ്യൻ

     ¹⁹ തീക്കൊള്ളികളും അമ്പുകളും മരണവും

     എറിയുന്ന ഭ്രാന്തനെപ്പോലെയാകുന്നു.

     ²⁰ വിറക് ഇല്ലാഞ്ഞാൽ തീ കെട്ടുപോകും;

     നുണയൻ ഇല്ലാഞ്ഞാൽ വഴക്കും ഇല്ലാതെയാകും.

     ²¹ കരി കനലിനും വിറക് തീയ്ക്കും എന്നപോലെ

     വഴക്കുകാരൻ കലഹം ജ്വലിക്കുന്നതിനു കാരണം.

     ²² ഏഷണിക്കാരന്റെ വാക്ക് സ്വാദുഭോജനംപോലെ;

     അത് വയറിന്റെ അറകളിലേക്ക് ചെല്ലുന്നു.

     ²³ ദുഷ്ടഹൃദയമുള്ളവന്റെ സ്നേഹം ജ്വലിക്കുന്ന അധരം

     വെള്ളിക്കീടം പൊതിഞ്ഞ മൺകുടംപോലെയാകുന്നു.

     ²⁴ പകയുള്ളവൻ അധരംകൊണ്ട് വേഷം ധരിക്കുന്നു;

     ഉള്ളിൽ അവൻ ചതിവ് സംഗ്രഹിച്ചു വയ്ക്കുന്നു.

     ²⁵ അവൻ ഇമ്പമായി സംസാരിക്കുമ്പോൾ അവനെ വിശ്വസിക്കരുത്;

     അവന്റെ ഹൃദയത്തിൽ ഏഴു വെറുപ്പുണ്ട് .

     ²⁶ അവന്റെ പക കപടംകൊണ്ടു മറച്ചുവച്ചാലും

     അവന്റെ ദുഷ്ടത സഭയുടെ മുമ്പിൽ വെളിപ്പെട്ടുവരും.

     ²⁷ കുഴി കുഴിക്കുന്നവൻ അതിൽ വീഴും;

     കല്ലുരുട്ടുന്നവന്റെമേൽ അത് തിരിഞ്ഞുരുളും.

     ²⁸ ഭോഷ്ക്കു പറയുന്ന നാവ് അതിനിരയായവരെ ദ്വേഷിക്കുന്നു;

     മുഖസ്തുതി പറയുന്ന വായ് നാശം വരുത്തുന്നു.

അദ്ധ്യായം. 26 27

¹ നാളെയെച്ചൊല്ലി പ്രശംസിക്കരുത്;

     ഒരു ദിവസത്തിൽ എന്തെല്ലാം സംഭവിക്കും എന്ന് അറിയുന്നില്ലല്ലോ.

     ² നിന്റെ വായല്ല മറ്റൊരുത്തൻ,

     നിന്റെ അധരമല്ല വേറൊരുത്തൻ നിന്നെ സ്തുതിക്കട്ടെ.

     ³ കല്ല് ഘനമുള്ളതും മണൽ ഭാരമുള്ളതും ആകുന്നു;

     ഒരു ഭോഷന്റെ നീരസം ഇവ രണ്ടിലും ഘനമേറിയത്.

     ⁴ ക്രോധം ക്രൂരവും കോപം പ്രളയവും ആകുന്നു;

     അസൂയയ്ക്കു മുമ്പിൽ ആർക്ക് നില്ക്കാം?

     ⁵ മറഞ്ഞിരിക്കുന്ന സ്നേഹത്തിലും തുറന്ന ശാസനയാണ് നല്ലത്.

     ⁶ സ്നേഹിതൻ വരുത്തുന്ന മുറിവുകൾ വിശ്വസ്തതയുടെ ഫലം;

     ശത്രുവിന്റെ ചുംബനങ്ങൾ വഞ്ചനാപൂർണ്ണം.

     ⁷ തിന്ന് തൃപ്തനായവൻ തേൻകട്ടയും ചവിട്ടിക്കളയുന്നു;

     വിശപ്പുള്ളവന് കൈപ്പുള്ളതൊക്കെയും മധുരം.

     ⁸ കൂടുവിട്ടലയുന്ന പക്ഷിയും

     നാടു വിട്ടുഴലുന്ന മനുഷ്യനും ഒരുപോലെ.

     ⁹ തൈലവും ധൂപവും ഹൃദയത്തെ സന്തോഷിപ്പിക്കുന്നു;

     സ്നേഹിതന്റെ ഹൃദയപൂർവ്വമായ ഉപദേശവും അങ്ങനെ തന്നെ.

     ¹⁰ നിന്റെ സ്നേഹിതനെയും അപ്പന്റെ സ്നേഹിതനെയും ഉപേക്ഷിക്കരുത്;

     നിന്റെ കഷ്ടകാലത്ത് സഹോദരന്റെ വീട്ടിൽ പോകുകയും അരുത്;

     ദൂരത്തെ സഹോദരനിലും സമീപത്തെ അയല്ക്കാരൻ നല്ലത്.

     ¹¹ മകനേ, എന്നെ നിന്ദിക്കുന്നവനോട് ഞാൻ ഉത്തരം പറയേണ്ടതിന്

     നീ ജ്ഞാനിയായി എന്റെ ഹൃദയത്തെ സന്തോഷിപ്പിക്കുക.

     ¹² വിവേകമുള്ളവൻ അനർത്ഥം കണ്ട് ഒളിച്ചുകൊള്ളുന്നു;

     അല്പബുദ്ധികളോ നേരെ ചെന്ന് അനർത്ഥത്തിൽ അകപ്പെടുന്നു.

     ¹³ അന്യനുവേണ്ടി ജാമ്യം നില്ക്കുന്നവന്റെ വസ്ത്രം എടുത്തുകൊള്ളുക;

     പരസ്ത്രീക്കു വേണ്ടി ഉത്തരവാദിയാകുന്നവനോട് പണയം വാങ്ങുക.

     ¹⁴ അതികാലത്ത് എഴുന്നേറ്റ് സ്നേഹിതനെ

     ഉച്ചത്തിൽ അനുഗ്രഹിക്കുന്നവന് അത് ശാപമായി എണ്ണപ്പെടും.

     ¹⁵ പെരുമഴയുള്ള ദിവസത്തിൽ ഇടവിടാത്ത ചോർച്ചയും

     കലഹക്കാരത്തിയായ സ്ത്രീയും ഒരുപോലെ.

     ¹⁶ അവളെ നിയന്ത്രിക്കുവാൻ നോക്കുന്നവൻ കാറ്റിനെ നിയന്ത്രിക്കുവാൻ നോക്കുന്നു;

     തന്റെ വലങ്കൈകൊണ്ട് എണ്ണ പിടിക്കുവാൻ പോകുന്നതുപോലെ.

     ¹⁷ ഇരിമ്പ് ഇരിമ്പിന് മൂർച്ചകൂട്ടുന്നു;

     മനുഷ്യൻ മനുഷ്യന് മൂർച്ചകൂട്ടുന്നു.

     ¹⁸ അത്തികാക്കുന്നവൻ അതിന്റെ പഴം തിന്നും;

     യജമാനനെ സൂക്ഷിക്കുന്നവൻ ബഹുമാനിക്കപ്പെടും.

     ¹⁹ വെള്ളത്തിൽ മുഖത്തിന്റെ രൂപം പ്രതിഫലിച്ചുകാണുന്നതുപോലെ;

     മനുഷ്യൻ തന്റെ ഹൃദയത്തിനൊത്തവണ്ണം മറ്റൊരുവനെ കാണുന്നു.

     ²⁰ പാതാളത്തിനും നരകത്തിനും ഒരിക്കലും തൃപ്തി വരുന്നില്ല;

     മനുഷ്യന്റെ കണ്ണിനും ഒരിക്കലും തൃപ്തിവരുന്നില്ല.

     ²¹ വെള്ളിക്ക് പുടവും പൊന്നിന് മൂശയും ശോധന;

     മനുഷ്യനോ അവന്റെ പ്രശംസ.

     ²² ഭോഷനെ ഉരലിൽ ഇട്ട് ഉലക്കകൊണ്ട് അവൽപോലെ ഇടിച്ചാലും

     അവന്റെ ഭോഷത്തം വിട്ടുമാറുകയില്ല.

     ²³ നിന്റെ ആടുകളുടെ അവസ്ഥ അറിയുവാൻ ജാഗ്രതയായിരിക്കുക;

     നിന്റെ കന്നുകാലികളിൽ നന്നായി ദൃഷ്ടിവയ്ക്കുക.

     ²⁴ സമ്പത്ത് എന്നേക്കും ഇരിക്കുന്നതല്ലല്ലോ;

     കിരീടം തലമുറതലമുറയോളം ഇരിക്കുമോ?

     ²⁵ പുല്ല് ചെത്തി കൊണ്ടുപോകുന്നു; ഇളമ്പുല്ല് മുളച്ചുവരുന്നു;

     പർവ്വതങ്ങളിലെ സസ്യങ്ങളെ ശേഖരിക്കുന്നു.

     ²⁶ കുഞ്ഞാടുകൾ നിനക്ക് ഉടുപ്പിനും

     കോലാടുകൾ നിലത്തിന്റെ വിലയ്ക്കും പ്രയോജനപ്പെടും.

     ²⁷ കോലാടുകളുടെ പാല് നിന്റെ ആഹാരത്തിനും

     നിന്റെ ഭവനക്കാരുടെ അഹോവൃത്തിക്കും

     നിന്റെ ദാസിമാരുടെ ഉപജീവനത്തിനും മതിയാകും.

അദ്ധ്യായം.27 28

¹ ആരും ഓടിക്കാതെ ദുഷ്ടന്മാർ ഓടിപ്പോകുന്നു;

     നീതിമാന്മാർ ബാലസിംഹംപോലെ നിർഭയമായിരിക്കുന്നു.

     ² ദേശത്തിലെ അതിക്രമം നിമിത്തം അതിലെ പ്രഭുക്കന്മാർ അനേകം പേരായിരിക്കുന്നു;

     ബുദ്ധിയും പരിജ്ഞാനവും ഉള്ളവർ മുഖാന്തരം അതിന്റെ വ്യവസ്ഥ ദീർഘമായി നില്ക്കുന്നു.

     ³ അഗതികളെ പീഡിപ്പിക്കുന്ന ദരിദ്രൻ

     വിളവ് ശേഷിപ്പിക്കാതെ ഒഴുക്കിക്കളയുന്ന മഴപോലെയാകുന്നു.

     ⁴ ന്യായപ്രമാണം ഉപേക്ഷിക്കുന്നവർ ദുഷ്ടനെ പ്രശംസിക്കുന്നു;

     ന്യായപ്രമാണം പാലിക്കുന്നവർ അവരോട് എതിർത്തു നില്ക്കുന്നു.

     ⁵ ദുഷ്ടന്മാർ ന്യായം തിരിച്ചറിയുന്നില്ല;

     യഹോവയെ അന്വേഷിക്കുന്നവരോ സകലവും തിരിച്ചറിയുന്നു.

     ⁶ തന്റെ വഴികളിൽ വക്രനായി നടക്കുന്ന ധനവാനെക്കാൾ

     പരമാർത്ഥതയിൽ നടക്കുന്ന ദരിദ്രൻ ഉത്തമൻ.

     ⁷ ന്യായപ്രമാണം പ്രമാണിക്കുന്നവൻ ബുദ്ധിയുള്ള മകൻ;

     ഭോജനപ്രീയന്മാർക്കു സഖിയായവൻ പിതാവിനെ അപമാനിക്കുന്നു.

     ⁸ പലിശയും ലാഭവും വാങ്ങി സമ്പത്ത് വർദ്ധിപ്പിക്കുന്നവൻ

     അഗതികളോട് കൃപാലുവായവനു വേണ്ടി അത് ശേഖരിക്കുന്നു.

     ⁹ ന്യായപ്രമാണം കേൾക്കാതെ ചെവി തിരിച്ചുകളയുന്നവന്റെ

     പ്രാർത്ഥന പോലും വെറുപ്പാകുന്നു.

     ¹⁰ നേരുള്ളവരെ ദുർമ്മാർഗ്ഗത്തിലേക്ക് തെറ്റിക്കുന്നവൻ

     താൻ കുഴിച്ച കുഴിയിൽതന്നെ വീഴും;

     നിഷ്കളങ്കരായവർ നന്മ അവകാശമാക്കും.

     ¹¹ ധനവാന് സ്വയം ജ്ഞാനിയായി തോന്നുന്നു;

     ബുദ്ധിയുള്ള അഗതി അവനെ ശോധന ചെയ്യുന്നു.

     ¹² നീതിമാന്മാർ ആഹ്ളാദിക്കുമ്പോൾ എല്ലാവരും ഉല്ലസിക്കുന്നു;

     ദുഷ്ടന്മാരുടെ ഉയർച്ചയിൽ ആളുകൾ സ്വയം ഒളിക്കുന്നു.

     ¹³ തന്റെ ലംഘനങ്ങളെ മറയ്ക്കുന്നവന് ശുഭം വരുകയില്ല;

     അവയെ ഏറ്റുപറഞ്ഞു ഉപേക്ഷിക്കുന്നവന് കരുണ ലഭിക്കും.

     ¹⁴ എപ്പോഴും ഭയഭക്തിയോടിരിക്കുന്ന മനുഷ്യൻ ഭാഗ്യവാൻ;

     ഹൃദയത്തെ കഠിനമാക്കുന്നവൻ അനർത്ഥത്തിൽ അകപ്പെടും.

     ¹⁵ അഗതികളുടെമേൽ അധികാരം നടത്തുന്ന ദുഷ്ടൻ

     ഗർജ്ജിക്കുന്ന സിംഹത്തിനും ഇരതേടി നടക്കുന്ന കരടിക്കും തുല്യൻ.

     ¹⁶ ബുദ്ധിഹീനനായ പ്രഭു മഹാപീഡകൻ ആകുന്നു;

     ദ്രവ്യാഗ്രഹം വെറുക്കുന്നവൻ ദീർഘായുസ്സോടെ ഇരിക്കും.

     ¹⁷ രക്തച്ചൊരിച്ചിലിന്റെ കുറ്റം ചുമക്കുന്നവൻ കുഴിയിലേയ്ക്ക് ബദ്ധപ്പെടും;

     അവനെ ആരും തുണയ്ക്കരുത്.

     ¹⁸ നിഷ്കളങ്കനായി നടക്കുന്നവൻ സുരക്ഷിതനായിരിക്കും;

     നടപ്പിൽ വക്രതയുള്ളവൻ പെട്ടെന്നു വീഴും.

     ¹⁹ നിലം കൃഷിചെയ്യുന്നവന് ആഹാരം സമൃദ്ധിയായി കിട്ടും;

     നിസ്സാരന്മാരെ പിൻചെല്ലുന്നവനോ വേണ്ടുവോളം ദാരിദ്ര്യം അനുഭവിക്കും.

     ²⁰ വിശ്വസ്തപുരുഷൻ അനുഗ്രഹസമ്പൂർണ്ണൻ;

     ധനവാനാകേണ്ടതിനു ബദ്ധപ്പെടുന്നവന് ശിക്ഷ വരാതിരിക്കുകയില്ല.

     ²¹ പക്ഷപാതം കാണിക്കുന്നത് നല്ലതല്ല;

     ഒരു കഷണം അപ്പത്തിനായും മനുഷ്യൻ അന്യായം ചെയ്യും.

     ²² ദുഷ്ടകണ്ണുള്ളവൻ ധനവാനാകുവാൻ ബദ്ധപ്പെടുന്നു;

     ബുദ്ധിമുട്ടു വരുമെന്ന് അവൻ അറിയുന്നതുമില്ല.

     ²³ ചക്കരവാക്ക് പറയുന്നവനെക്കാൾ

     ശാസിക്കുന്നവനു പിന്നീട് പ്രീതി ലഭിക്കും.

     ²⁴ അപ്പനോടോ അമ്മയോടോ പിടിച്ചുപറിച്ചിട്ട്

     ‘അത് അക്രമമല്ല’ എന്നു പറയുന്നവൻ നാശകന്റെ സഖി.

     ²⁵ അത്യാഗ്രഹമുള്ളവൻ വഴക്കുണ്ടാക്കുന്നു;

     യഹോവയിൽ ആശ്രയിക്കുന്നവൻ പുഷ്ടി പ്രാപിക്കും.

     ²⁶ സ്വന്തഹൃദയത്തിൽ ആശ്രയിക്കുന്നവൻ മൂഢൻ;

     ജ്ഞാനത്തോടെ നടക്കുന്നവൻ സുരക്ഷിതനായിരിക്കും.

     ²⁷ ദരിദ്രനു കൊടുക്കുന്നവന് കുറവ് ഉണ്ടാകുകയില്ല;

     കണ്ണ് അടച്ചുകളയുന്നവന് ഏറിയ ശാപം ഉണ്ടാകും.

     ²⁸ ദുഷ്ടന്മാരുടെ ഉയർച്ചയിൽ ആളുകൾ സ്വയം ഒളിക്കുന്നു;

     അവർ നശിക്കുമ്പോൾ നീതിമാന്മാർ വർദ്ധിക്കുന്നു.

അദ്ധ്യായം.28 29

¹ തുടർച്ചയായി ശാസന കേട്ടിട്ടും ശാഠ്യം കാണിക്കുന്നവൻ

     നീക്കുപോക്കില്ലാതെ പെട്ടെന്നു നശിച്ചുപോകും.

     ² നീതിമാന്മാർ വർദ്ധിക്കുമ്പോൾ ജനം സന്തോഷിക്കുന്നു;

     ദുഷ്ടൻ ആധിപത്യം നടത്തുമ്പോൾ ജനം ഞരങ്ങുന്നു.

     ³ ജ്ഞാനം ഇഷ്ടപ്പെടുന്നവൻ തന്റെ അപ്പനെ സന്തോഷിപ്പിക്കുന്നു;

     വേശ്യകളോട് സഹവാസം ചെയ്യുന്നവനോ തന്റെ സമ്പത്ത് നശിപ്പിക്കുന്നു.

     ⁴ രാജാവ് ന്യായപാലനത്താൽ രാജ്യത്തെ നിലനിർത്തുന്നു;

     നികുതി വർദ്ധിപ്പിക്കുന്നവൻ അതിനെ നശിപ്പിക്കുന്നു.

     ⁵ കൂട്ടുകാരനോട് മുഖസ്തുതി പറയുന്നവൻ

     അവന്റെ കാലിന് ഒരു വല വിരിക്കുന്നു.

     ⁶ ദുഷ്ക്കർമ്മി തന്റെ ലംഘനത്തിൽ കുടുങ്ങുന്നു;

     നീതിമാനോ ഘോഷിച്ചാനന്ദിക്കുന്നു.

     ⁷ നീതിമാൻ അഗതികളുടെ കാര്യം അറിയുന്നു;

     ദുഷ്ടനോ പരിജ്ഞാനം ഇന്നതെന്ന് അറിയുന്നില്ല.

     ⁸ പരിഹാസികൾ പട്ടണത്തിൽ കോപാഗ്നി ജ്വലിപ്പിക്കുന്നു;

     ജ്ഞാനികൾ ക്രോധത്തെ ശമിപ്പിക്കുന്നു.

     ⁹ ജ്ഞാനിക്കും ഭോഷനും തമ്മിൽ തർക്കം ഉണ്ടായിട്ട്

     ഭോഷൻ കോപിക്കുകയോ ചിരിക്കുകയോ ചെയ്തേക്കാം; എന്നാൽ അവിടെ ശാന്തത ഉണ്ടാകുകയില്ല.

     ¹⁰ രക്തപാതകന്മാർ നിഷ്ക്കളങ്കനെ ദ്വേഷിക്കുന്നു;

     നേരുള്ളവരോ അവന്റെ പ്രാണരക്ഷ അന്വേഷിക്കുന്നു.

     ¹¹ മൂഢൻ തന്റെ കോപം മുഴുവനും വെളിപ്പെടുത്തുന്നു;

     ജ്ഞാനി അതിനെ അടക്കി ശമിപ്പിക്കുന്നു.

     ¹² അധിപതി നുണ കേൾക്കുവാൻ തുടങ്ങിയാൽ

     അവന്റെ ഭൃത്യന്മാരെല്ലാവരും ദുഷ്ടന്മാരാകും.

     ¹³ ദരിദ്രനും പീഡകനും തമ്മിൽ പൊതുവായി ഒന്നുണ്ട്;

     ഇരുവരുടെയും കണ്ണ് യഹോവ പ്രകാശിപ്പിക്കുന്നു.

     ¹⁴ അഗതികൾക്ക് വിശ്വസ്തതയോടെ ന്യായപാലനം ചെയ്യുന്ന

     രാജാവിന്റെ സിംഹാസനം എന്നേക്കും സ്ഥിരമായിരിക്കും.

     ¹⁵ വടിയും ശാസനയും ജ്ഞാനം നല്കുന്നു;

     തന്നിഷ്ടത്തിനു വിട്ടിരിക്കുന്ന ബാലൻ അമ്മയ്ക്കു ലജ്ജ വരുത്തുന്നു.

     ¹⁶ ദുഷ്ടന്മാർ പെരുകുമ്പോൾ അതിക്രമം പെരുകുന്നു;

     നീതിമാന്മാർ അവരുടെ വീഴ്ച കാണും.

     ¹⁷ നിന്റെ മകനെ ശിക്ഷിക്കുക; അവൻ നിനക്ക് ആശ്വാസമായിത്തീരും;

     അവൻ നിന്റെ മനസ്സിന് പ്രമോദം വരുത്തും.

     ¹⁸ വെളിപ്പാട് ഇല്ലാത്തിടത്തു ജനം മര്യാദവിട്ടു നടക്കുന്നു;

     ന്യായപ്രമാണം കാത്തുകൊള്ളുന്നവനോ ഭാഗ്യവാൻ.

     ¹⁹ ദാസനെ നന്നാക്കുവാൻ വാക്കു മാത്രം പോരാ;

     അവൻ അത് ഗ്രഹിച്ചാലും കൂട്ടാക്കുകയില്ലല്ലോ.

     ²⁰ വാക്കിൽ തിടുക്കമുള്ള മനുഷ്യനെ നീ കാണുന്നുവോ?

     അവനെക്കാൾ മൂഢനെക്കുറിച്ച് അധികം പ്രത്യാശയുണ്ട്.

     ²¹ ദാസനെ ബാല്യംമുതൽ ലാളിച്ചുവളർത്തുന്നവനോട്

     അവൻ ഒടുവിൽ ദുശ്ശാഠ്യം കാണിക്കും.

     ²² കോപമുള്ളവൻ വഴക്കുണ്ടാക്കുന്നു;

     ക്രോധമുള്ളവൻ അതിക്രമം വർദ്ധിപ്പിക്കുന്നു.

     ²³ മനുഷ്യന്റെ ഗർവ്വം അവനെ താഴ്ത്തിക്കളയും;

     മനോവിനയമുള്ളവൻ മാനം പ്രാപിക്കും.

     ²⁴ കള്ളന്റെ പങ്കാളി സ്വന്തം പ്രാണനെ പകയ്ക്കുന്നു;

     അവൻ സത്യം ചെയ്യുന്നു; ഒന്നും വെളിപ്പെടുത്തുന്നതുമില്ല.

     ²⁵ മാനുഷഭയം ഒരു കെണി ആകുന്നു;

     യഹോവയിൽ ആശ്രയിക്കുന്നവൻ രക്ഷപ്രാപിക്കും.

     ²⁶ അനേകം പേർ അധിപതിയുടെ മുഖപ്രസാദം അന്വേഷിക്കുന്നു;

     മനുഷ്യന് നീതി യഹോവയിൽനിന്നു വരുന്നു.

     ²⁷ നീതികെട്ടവൻ നീതിമാന്മാർക്ക് വെറുപ്പ്;

     സന്മാർഗ്ഗി ദുഷ്ടന്മാർക്കും വെറുപ്പ്.

അദ്ധ്യായം.29 30

¹ യാക്കേയുടെ മകനായ ആഗൂരിന്റെ വചനങ്ങൾ;

     ഒരു അരുളപ്പാട്; ആ പുരുഷൻ പ്രസ്താവിച്ചത്:

     “ദൈവമേ, ഞാൻ അദ്ധ്വാനിച്ചു,

     ദൈവമേ, ഞാൻ അദ്ധ്വാനിച്ചു ക്ഷയിച്ചിരിക്കുന്നു.

     ² ഞാൻ സകലമനുഷ്യരിലും ബുദ്ധിഹീനനാകുന്നു;

     മാനുഷീകബുദ്ധി എനിക്കില്ല;

     ³ ഞാൻ ജ്ഞാനം അഭ്യസിച്ചിട്ടില്ല;

     പരിശുദ്ധനായവന്റെ പരിജ്ഞാനം എനിക്കില്ല.

     ⁴ സ്വർഗ്ഗത്തിൽ കയറുകയും ഇറങ്ങിവരുകയും ചെയ്തവൻ ആര്?

     കാറ്റിനെ തന്റെ മുഷ്ടിയിൽ പിടിച്ചടക്കിയവൻ ആര്?

     വെള്ളത്തെ വസ്ത്രത്തിൽ കെട്ടിയവൻ ആര്?

     ഭൂമിയുടെ അറുതികളെയൊക്കെയും നിയമിച്ചവൻ ആര്?

     അവന്റെ പേരെന്ത്? അവന്റെ മകന്റെ പേരെന്ത്? നിനക്കറിയാമോ?

     ⁵ ദൈവത്തിന്റെ സകലവചനവും ശുദ്ധിചെയ്തതാകുന്നു;

     തന്നിൽ ആശ്രയിക്കുന്നവർക്ക് അവിടുന്ന് പരിച തന്നെ.

     ⁶ അവിടുത്തെ വചനങ്ങളോട് നീ ഒന്നും കൂട്ടരുത്;

     അവിടുന്ന് നിന്നെ വിസ്തരിച്ചിട്ട് നീ കള്ളനാകുവാൻ ഇട വരരുത്.

     ⁷ രണ്ട് കാര്യം ഞാൻ അങ്ങയോട് അപേക്ഷിക്കുന്നു;

     ജീവപര്യന്തം അവ എനിക്ക് നിഷേധിക്കരുതേ;

     ⁸ വ്യാജവും ഭോഷ്ക്കും എന്നോട് അകറ്റണമേ;

     ദാരിദ്ര്യവും സമ്പത്തും എനിക്ക് തരാതെ

     നിത്യവൃത്തി തന്ന് എന്നെ പോഷിപ്പിക്കണമേ.

     ⁹ ഞാൻ തൃപ്തനായിത്തീർന്നിട്ട്: ‘യഹോവ ആര്’ എന്ന് അങ്ങയെ നിഷേധിക്കുവാനും

     ദരിദ്രനായിത്തീർന്നിട്ട് മോഷ്ടിച്ച് എന്റെ ദൈവത്തിന്റെ നാമത്തെ ദുഷിക്കുവാനും സംഗതി വരരുതേ.

     ¹⁰ ദാസനെക്കുറിച്ച് യജമാനനോട് ഏഷണി പറയരുത്;

     അവൻ നിന്നെ ശപിക്കുവാനും നീ കുറ്റക്കാരനായിത്തീരുവാനും ഇടവരരുത്.

     ¹¹ അപ്പനെ ശപിക്കുകയും അമ്മയെ അനുഗ്രഹിക്കാതിരിക്കുകയും ചെയ്യുന്നോരു തലമുറ!

     ¹² തങ്ങൾക്ക് തന്നെ നിർമ്മലരായിത്തോന്നുന്നവരും

     അശുദ്ധി കഴുകിക്കളയാത്തവരുമായോരു തലമുറ!

     ¹³ അയ്യോ ഈ തലമുറയുടെ കണ്ണുകൾ എത്ര ഉയർന്നിരിക്കുന്നു -

     അവരുടെ കൺപോളകൾ എത്ര പൊങ്ങിയിരിക്കുന്നു -

     ¹⁴ എളിയവരെ ഭൂമിയിൽനിന്നും

     ദരിദ്രരെ മനുഷ്യരുടെ ഇടയിൽനിന്നും തിന്നുകളയുവാൻ തക്കവണ്ണം

     മുമ്പല്ലുകൾ വാളായും അണപ്പല്ലുകൾ കത്തിയായും ഇരിക്കുന്ന ഒരു തലമുറ!

     ¹⁵ കന്നട്ടയ്ക്കു: ‘തരുക, തരുക’ എന്ന രണ്ടു പുത്രിമാർ ഉണ്ട്;

     ഒരിക്കലും തൃപ്തിവരാത്തത് മൂന്നുണ്ട്;

     ‘മതി’ എന്നു പറയാത്തത് നാലുണ്ട്:

     ¹⁶ പാതാളവും വന്ധ്യയുടെ ഗർഭപാത്രവും

     വെള്ളം കുടിച്ചു തൃപ്തിവരാത്ത ഭൂമിയും

     ‘മതി ’എന്നു പറയാത്ത തീയും തന്നെ.

     ¹⁷ അപ്പനെ പരിഹസിക്കുകയും

     അമ്മയെ അനുസരിക്കാതിരിക്കുകയും ചെയ്യുന്ന കണ്ണിനെ

     തോട്ടരികത്തെ കാക്ക കൊത്തിപ്പറിക്കുകയും

     കഴുകിൻ കുഞ്ഞുങ്ങൾ തിന്നുകയും ചെയ്യും.

     ¹⁸ എനിക്ക് അതിവിസ്മയമായി തോന്നുന്നത് മൂന്നുണ്ട്;

     എനിക്ക് അറിഞ്ഞുകൂടാത്തത് നാലുണ്ട്:

     ¹⁹ ആകാശത്ത് കഴുകന്റെ വഴിയും

     പാറമേൽ സർപ്പത്തിന്റെ വഴിയും

     സമുദ്രമദ്ധ്യത്തിൽ കപ്പലിന്റെ വഴിയും

     കന്യകയോടുകൂടി പുരുഷന്റെ വഴിയും തന്നെ.

     ²⁰ വ്യഭിചാരിണിയുടെ വഴിയും അങ്ങനെ തന്നെ:

     അവൾ തിന്നു വായ് തുടച്ചിട്ട്,

     ‘ഞാൻ ഒരു ദോഷവും ചെയ്തിട്ടില്ല’ എന്നു പറയുന്നു.

     ²¹ മൂന്നിന്റെ നിമിത്തം ഭൂമി വിറയ്ക്കുന്നു;

     നാലിന്റെ നിമിത്തം അതിന് സഹിച്ചു കൂടാ:

     ²² ദാസൻ രാജാവായാൽ അവന്റെ നിമിത്തവും

     ഭോഷൻ തിന്ന് തൃപ്തനായാൽ അവന്റെ നിമിത്തവും

     ²³ വെറുക്കപ്പെട്ട സ്ത്രീയ്ക്കു വിവാഹം കഴിഞ്ഞാൽ അവളുടെ നിമിത്തവും

     ദാസി യജമാനത്തിയുടെ സ്ഥാനം പ്രാപിച്ചാൽ അവളുടെ നിമിത്തവും തന്നെ.

     ²⁴ ഭൂമിയിൽ എത്രയും ചെറിയവയെങ്കിലും

     അത്യന്തം ജ്ഞാനമുള്ളതു നാലുണ്ട്:

     ²⁵ ഉറുമ്പ് ബലഹീനജാതി എങ്കിലും

     അത് വേനല്ക്കാലത്ത് ആഹാരം സമ്പാദിച്ചു വയ്ക്കുന്നു.

     ²⁶ കുഴിമുയൽ ശക്തിയില്ലാത്ത ജാതി എങ്കിലും

     അത് പാറയിൽ പാർപ്പിടം ഉണ്ടാക്കുന്നു.

     ²⁷ വെട്ടുക്കിളിക്ക് രാജാവില്ല എങ്കിലും

     അതൊക്കെയും അണിയണിയായി പുറപ്പെടുന്നു.

     ²⁸ പല്ലിയെ കൈകൊണ്ട് പിടിക്കാം എങ്കിലും

     അവ രാജാക്കന്മാരുടെ അരമനകളിൽ പാർക്കുന്നു.

     ²⁹ ചന്തമായി നടകൊള്ളുന്നത് മൂന്നുണ്ട്;

     ചന്തമായി നടക്കുന്നത് നാലുണ്ട്:

     ³⁰ മൃഗങ്ങളിൽ ശക്തിയേറിയതും

     ഒന്നിനും വഴിമാറാത്തതുമായ സിംഹവും

     ³¹ നായാട്ടുനായും കോലാട്ടുകൊറ്റനും

     സൈന്യസമേതനായ രാജാവും തന്നെ.

     ³² നീ നിഗളിച്ച് ഭോഷത്തം പ്രവർത്തിക്കുകയോ

     ദോഷം നിരൂപിക്കുകയോ ചെയ്തുപോയെങ്കിൽ

     കൈകൊണ്ട് വായ് പൊത്തിക്കൊള്ളുക.

     ³³ പാല് കടഞ്ഞാൽ വെണ്ണയുണ്ടാകും;

     മൂക്കു ഞെക്കിയാൽ ചോര വരും;

     കോപം ഇളക്കിയാൽ വഴക്കുണ്ടാകും.

അദ്ധ്യായം.30 31

¹ ലെമൂവേൽരാജാവിന്റെ വചനങ്ങൾ;

     അവന്റെ അമ്മ അവന് ഉപദേശിച്ചുകൊടുത്ത അരുളപ്പാട്.

     ² മകനേ, എന്ത്? ഞാൻ പ്രസവിച്ച മകനേ എന്ത്?

     എന്റെ നേർച്ചകളുടെ മകനേ, എന്ത്?

     ³ സ്ത്രീകൾക്ക് നിന്റെ ബലത്തെയും

     രാജാക്കന്മാരെ നശിപ്പിക്കുന്നവർക്ക് നിന്റെ വഴികളെയും ഏല്പിച്ചു കൊടുക്കരുത്.

     ⁴ വീഞ്ഞ് കുടിക്കുന്നത് രാജാക്കന്മാർക്ക് ചേർന്നതല്ല;

     ലെമൂവേലേ, രാജാക്കന്മാർക്ക് അതു ചേർന്നതല്ല;

     മദ്യാസക്തി പ്രഭുക്കന്മാർക്ക് ഉചിതവുമല്ല.

     ⁵ അവർ മദ്യപിച്ചിട്ട്, നിയമം മറന്നുപോകുവാനും

     പീഡിതരുടെ ന്യായം മറിച്ചുകളയുവാനും ഇടവരരുത്.

     ⁶ നശിച്ചുകൊണ്ടിരിക്കുന്നവന് മദ്യവും

     മനോവ്യസനമുള്ളവന് വീഞ്ഞും കൊടുക്കുക.

     ⁷ അവൻ മദ്യപിച്ചിട്ട്, തന്റെ ദാരിദ്ര്യം മറക്കുകയും

     തന്റെ അരിഷ്ടത ഓർക്കാതിരിക്കുകയും ചെയ്യട്ടെ.

     ⁸ ഊമനു വേണ്ടി നിന്റെ വായ് തുറക്കുക;

     ക്ഷയിച്ചുപോകുന്ന എല്ലാവരുടെയും കാര്യത്തിൽ തന്നെ.

     ⁹ നിന്റെ വായ് തുറന്ന് നീതിയോടെ ന്യായം വിധിക്കുക;

     എളിയവനും ദരിദ്രനും ന്യായപാലനം ചെയ്തുകൊടുക്കുക.

     ¹⁰ സാമർത്ഥ്യമുള്ള ഭാര്യയെ ആർക്ക് കിട്ടും?

     അവളുടെ വില മുത്തുകളിലും ഏറിയത്.

     ¹¹ ഭർത്താവിന്റെ ഹൃദയം അവളെ വിശ്വസിക്കുന്നു;

     അവന്റെ ലാഭത്തിന് ഒരു കുറവുമില്ല.

     ¹² അവൾ തന്റെ ആയുഷ്ക്കാലമൊക്കെയും

     അവന് തിന്മയല്ല നന്മ തന്നെ ചെയ്യുന്നു.

     ¹³ അവൾ ആട്ടുരോമവും ചണവും സമ്പാദിച്ച്

     താത്പര്യത്തോടെ സ്വന്തം കൈകൊണ്ട് വേലചെയ്യുന്നു.

     ¹⁴ അവൾ കച്ചവടക്കപ്പൽപോലെയാകുന്നു;

     ദൂരത്തുനിന്ന് ആഹാരം കൊണ്ടുവരുന്നു.

     ¹⁵ അവൾ അതിരാവിലെ എഴുന്നേറ്റ്, വീട്ടിലുള്ളവർക്ക് ആഹാരവും

     വേലക്കാരികൾക്ക് ഓഹരിയും കൊടുക്കുന്നു.

     ¹⁶ അവൾ ഒരു നിലത്തിന്മേൽ ദൃഷ്ടിവച്ച് അത് വാങ്ങുന്നു;

     സമ്പാദ്യം കൊണ്ട് അവൾ ഒരു മുന്തിരിത്തോട്ടം നട്ടുണ്ടാക്കുന്നു.

     ¹⁷ അവൾ ബലംകൊണ്ട് അര മുറുക്കുകയും

     ഭുജങ്ങളെ ശക്തീകരിക്കുകയും ചെയ്യുന്നു.

     ¹⁸ തന്റെ വ്യാപാരം ആദായമുള്ളതെന്ന് അവൾ അറിയുന്നു;

     അവളുടെ വിളക്ക് രാത്രിയിൽ കെട്ടുപോകുന്നതുമില്ല.

     ¹⁹ അവൾ നെയ്ത്തുദണ്ഡിന് കൈ നീട്ടുന്നു;

     അവളുടെ വിരൽ തക്ളി പിടിക്കുന്നു.

     ²⁰ അവൾ തന്റെ കൈ എളിയവർക്കുവേണ്ടി തുറക്കുന്നു;

     ദരിദ്രന്മാരുടെ അടുക്കലേക്ക് കൈ നീട്ടുന്നു.

     ²¹ തന്റെ വീട്ടുകാരെക്കുറിച്ച് അവൾ ഹിമകാലത്ത് ഭയപ്പെടുന്നില്ല;

     അവളുടെ വീട്ടിലുള്ള എല്ലാവർക്കും ചുവപ്പു കമ്പിളി ഉണ്ടല്ലോ.

     ²² അവൾ തനിക്ക് പരവതാനി ഉണ്ടാക്കുന്നു;

     ചണപട്ടും ധൂമ്രവസ്ത്രവും അവളുടെ ഉടുപ്പ്.

     ²³ ദേശത്തിലെ മൂപ്പന്മാരോടുകൂടി ഇരിക്കുമ്പോൾ

     അവളുടെ ഭർത്താവ് പട്ടണവാതില്ക്കൽ പ്രസിദ്ധനാകുന്നു.

     ²⁴ അവൾ ചണവസ്ത്രം ഉണ്ടാക്കി വില്ക്കുന്നു;

     അരക്കച്ച ഉണ്ടാക്കി കച്ചവടക്കാരനെ ഏല്പിക്കുന്നു.

     ²⁵ ബലവും മഹിമയും അവളുടെ ഉടുപ്പ്;

     ഭാവികാലം ഓർത്ത് അവൾ പുഞ്ചിരി തൂകുന്നു.

     ²⁶ അവൾ ജ്ഞാനത്തോടെ വായ് തുറക്കുന്നു;

     ദയയുള്ള ഉപദേശം അവളുടെ നാവിന്മേൽ ഉണ്ട്.

     ²⁷ വീട്ടുകാരുടെ പെരുമാറ്റം അവൾ ശ്രദ്ധിച്ചുനോക്കുന്നു;

     അലസതയുടെ ഭക്ഷണം കഴിക്കുന്നതുമില്ല.

     ²⁸ അവളുടെ മക്കൾ എഴുന്നേറ്റ് അവളെ ‘ഭാഗ്യവതി’ എന്ന് പുകഴ്ത്തുന്നു;

     അവളുടെ ഭർത്താവും അവളെ പ്രശംസിക്കുന്നത്:

     ²⁹ “അനേകം തരുണികൾ സാമർത്ഥ്യം കാണിച്ചിട്ടുണ്ട്;

     നീയോ അവരെല്ലാവരിലും ശ്രേഷ്ഠയായിരിക്കുന്നു”.

     ³⁰ ലാവണ്യം വ്യാജവും സൗന്ദര്യം വ്യർത്ഥവും ആകുന്നു;

     യഹോവാഭക്തിയുള്ള സ്ത്രീയോ പ്രശംസിക്കപ്പെടും.

     ³¹ അവളുടെ കൈകളുടെ ഫലം അവൾക്ക് കൊടുക്കുവിൻ;

     അവളുടെ സ്വന്തപ്രവൃത്തികൾ പട്ടണവാതില്ക്കൽ അവളെ പ്രശംസിക്കട്ടെ.