4. Abrama hnianga Pathian thutiam
Tuilian hnung, kum tamka hnung chun khawvela hin mi an hong tam nawk ta a, ṭong khatkan an ṭonga. Changhomsiala Pathianin thu a pêk angkataka luasip hnêkin hmunkan an om khawma, khawpui an siam ta zawka.
Mihriam hei chu anin uang fê a, Pathian thu hom an ngaisak tâk naw a. Rivân phâk daika khopin tlîrna in insâng fêka an bawl ṭan ta a. Hmunkan an om hoia, sin an thaw lai chun thil ṭhaloi tamka thawngan tih ti Pathianin a hawi a.
Kachun an ṭong chu Pathianin ân dang tira, ṭong dang dangin an ṭong tira, khawvel pumpuia ân dartir ta a. Khawpui an ibawl chu a rihming Babel an saka, a omzia chu ‘lunginzîngna, buaina, ramna’ tina a chang.
Kum riza tamka hnung chun Pathianin Abrama hnianga chun thu a hril a. Pathianin, “Ni khua nih ni suapui hei aṭang chun suak inla, Ram nang kilan entir ding tiang chun kal rawh. Mal nang sawm ki ti a, hnam roiinpui fêkan nang siam ki ti a, ni rihming roiinpuitir ke tih. Mal nang sawmpu hei phot chu mal sawm ki ti a, ṭongsia nang inpêlpu chu ṭongsia inpêl ke tih. Nangma a chun hnamtin la thoveng an tih,” a ti a.
Kachun Abrama chun Pathianin a hnianga thu a hril chu a zawm ta a. A nupui Saraii nih a siahlaw hei kapai nih a thil nei kapai ni chun Pathianin ram a inentir, Kanan ram tiang chun a kal ta a.
Abrama chun Kanan ram a tlung kani chun Pathianin a hniangah, “Tlîr inla, hei en vêl ta, Ram ni hmu phâk kapai ari chu nang nih ni thlahei hniangah roi dingin nangni pêng ke tih,” a ti a. Abrama chun ma rama chun omhmun a khuar ta a.
Nika chu Abraman Melkisedeka, Pathian thiampu chu ân tongpuia. Melkisedeka chun Abrama chu mal a sawm a; “Pathian chunginung chem rinêng nih rivân neipu chun Abrama chu mal sawm rise,” a ti a. Kachun Abrama chun a thil nei kapai aṭang chun sawmapakhat chu Melkisedeka hniangah a pe ta a.
Kum tamka a ral hnung hom chun Abrama nih Saraii chun nâi ipa an la nei nai naw a. Pathianin Abrama hniangah nâi ipa nei niti a, rivâna arsi zâka ni thla hei la chang an tih ti in a tharin ân tiam nawka. Pathian thutiam chu Abraman a ringa. Pathian thutiam Abraman a ring leiin Pathianin Abrama chu mifelin a ruat ta a.
Kachun Abrama hniangah Pathianin thuthlung a siam ta a. Thuthlung hi pawl inhnika karah siam a chang thina. Pathianin, “Ni ṭhalbe aṭang ngêiin nâipa nang pêng ke tih. Kanan ram chu ni thla hei hniangah pêng ke tih,” a ti a. Changhomsiala, Abrama chun nâi ipa ala nei naw a.
Bible chanchin aanga lak suak Genesis bung 11-15