9. Pathianin Mosia a koina

Josefa chu a thi hnungin, a unâi hei chu Aigupta rama chun anla om ta mai a. An thla hei rêk chun anla oma, nâi hom an nei tir a. Te nih nâi hom tamka an neia, mahei chu Israela thla hei tia ihawi nih koi an chang.

Kum riza tamka a liam hnung chun, Aigupta rama chun Josefa hawi loi lal thar Farawa a hong inlal ta a. Kachun Aigupta mihei chun Josefa nih anmanihei a ṭangpuina zong zong hei ha inhnilin an hawi tâk naw a. Changhomsiala Israel mihei chu an hong punga, an hong tam tâk fe leiin Aigupta mhei chun an ṭi ta a. Kachun Aigupta lal Farawa chun chun Israel hei chu salin an siam ta a.

Aigupta mihei chun Israel hei chu an thu loiin in nih khawpui lian fe fêka tamka anin bawltir a. Sin an thaw nansat leiin an sawl fe a, an riang êm êm a, an nun a sawlinngham thei naw a. Changhomsiala Pathianin mal a sawma, tu nih te tamka an hong nei a, an hong pung ta tual tual a.

Farawa chun Israel hei chu nâi an hong neia, an hong pung tual tual ti a hmu chun Israel hei laiah nâi ipate piang taphot chu Nile tuidunga pai dingin thu a pe ta a.

Israel nupang khatka chun nâi ipate a nei a, a pasal rêk chun theitawp insua in an thup ta a.

A nu nih a pa chun an thup thei tâk naw hnung chun phairuangin rilong an siama, Nile tuidung kawla phairuang bila chun an thup ta a. Nâite unu chun imawh a chang hrim ti hawi dingin a enrûk mai a.

Farawa nâinu tui insil chun ma rilongte chu a hmu a, i hrim mawh a chang ti a zuk ena. Nâite chu a hmu chun a zuk lâka, a nâi dingin a la ta a. Ma nâite chu a enkolpu dingin a nu a chang ti hawi loiin a nu chia chu a enkol dingin a pêka. Nâite chu a hong thlei hnung chun Farawa nâinu hnianga chun a thak khir ta a. Nâite rihming chu Mosia tiin a loi saka. Mosia rihming omzia chu “Tuia ṭanga lâksuak” tina a chang.

Nika chu Mosia chu a hong tlanginvâl chun Aigupta miin Israel mi suak khatka hi a vuak lai a hmu a, Mosia chun Israel mi chu a san a tuma.

Tuhmanin an hmu nawh a son a, Aigupta mi chu a that a, rinênga a phûma, changhomsiala mi khatka chun a loi hmu a.

Farawan ma chu a loi hawiin Mosia chu that tumin a zong ṭan ta a. Kachun Mosia chu Farawa saip heiin an that thei loina ding hmuna thlaler tiang chun Aigupta rama ṭang chun a suak ta a.

Mosia chu Aigupta ram aṭanga ram hla fekatia chun thlalera bera vêngpu, bera vêngin ava om ta a. Ma hmuna chun nupui ava neia, nâi ipate inhnika ava nei a.

Nika chu Mosia chun bera a vêng laiin hruichîmbûka chun mei chok lai hi a hmu a. Changhomsiala, hruichîmbûk chu meiin a kâng nghal naw a. Mosia chun chiang fêka hmu tumin a va hnâi ta a, kachun ava hnâi chun Pathianin rawlin, “Mosi, ni pheia inthokin ni pheikhok hei ha hlîp rawh, ni ngîrna ha hmun thianginhlim a chang,” a hong ti a.

Pathianin, “Ki mihei tuarzia chu ki hmu a, Aigupta rama chun kimi Israelhei chu sal an tângna aṭangin ne hruaisuak theina dingin Farawa hniangah nang tir ke tih, Abrahama, Isaka nih Jakopa hei hnianga ram pêk dinga ki intiam ha nang pêng ke tih,” a ti a.

Mosia chun, “Miin ane tirpu chu tumawh a chang, a rihming imawh a chang ti annen don chun imawh tîng kiti?” a ti a. Pathian chun, “KEIMA CHU KE CHANG” a ti a. “ ‘KEIMA han nin hniangah ani hong itir ke chang,’ ti rawh. Chun Yahweh, nin thlatuhei Abrahama, Isaka nih Jakopa Pathian ke chang. Ma hi chatuana ki rihming chu a changti hril sa rawh,” a ti a.

Mosia chun thu chu a hril thei ân ring naw leiin a awi naw a, kachun a ṭangpuipu dingin a unâipa Arona chu Pathianin a tir a. Pathianin Mosia nih Arona hnianga chun Farawa lungril chu khir fêng a tih ti a hril sa dên a.

Bible chanchin aanga lak suak: Exodas bung 1-4