10. Hripui Sawmka Hei chu

Mosia nih Arona chu Farawa hniangah an va a. A hnianga chun Israel hei Pathian chun, “Ki mihei inkaltir rawh,” a tih, ti in an hril a. Changhomsiala, an thu hril chu Farawa chun an ngaisak naw a. Israel hei chu insuaktir hnêk hmanin an sin thawhei chu ân tak tir hlek hlek zawk a.

Farawa chun Israel mipui hei chu a lân suaktir awi naw leiin Pathianin Aigupta rama chun hripui nânsa fêka sawmka ân lêngtir ta a. Ma hripui hmang hin Pathianin Aigupta rama lal Farawa nih an pathian hei hnêka thil a thaw thei zia an langtir a.

Pathianin Nile tuidung hei chu thisenin ân luangtir a, changhomsiala Farawa chun Israel hei chu a lan suaktir awi ta vu naw a.

Maleiachun Pathianin Aigupta ram sûng kapaia chun Uṭok a hong tir a. Farawa chun Uṭok hei chu la suak dingin Mosia chu a ngên ta a. Uṭok a lak suak pêk rit hnung hom chun Farawa chun a lungril chu ân khirtir nawk a, Israel hei chu ân suaktir awi chuang nawk naw a.

Kachun Pathianin Phirsit a hong inlêngtir a. Farawa chun Mosia nih Arona chu a koia, Phirsit hei chu ân tawptir phot chun Israelhei chu Aigupta ram aṭang chun suak thei tâng an tih ti a hril a. Kachun Mosia chu a ṭonginṭaia Pathianin Aigupta rama ṭang chun phirsit kapaihei chu ân boitir pêk a, changhomsiala, Farawa chun a lungril ân khirtir nawk a, mipuihei chu ân suaktir awi nawk naw a.

Ma zoia chun Pathianin Aigupta rama ran hei kapai an thi theina dingin hripui a hong inlêngtir nawk a. Mahoma chun Farawa lungril chu a la khir rêt leiin Israel hei chu a lân suaktir awi naw a.

Manka chun Pathianin Mosia hnianga chun Farawa hmakung ngeia chun rivân tiang pilvut hang inthek dingin a ti a. Kachun rivân tiang a hang thek chun Aigupta mihei chunga chun vun natna, sakhuai hripui nafêka chu a hong om a. Israelhei rawchun ma sakhuai chu an voi ve naw a. Pathianin Farawa lungril chu ân khir tir nawk a, Israel mipuihei chu ân suaktir awi nawk naw a.

Ma hnunga chun Pathianin Aigupta rama chun rial hripui nânsa vaikan an thlâktir a, thil kapai a deng siat rit a, loia, sin thaw kapai hei chu a sep that rît a. Farawa chun Mosia nih Arona chu a koi a, “Ki loi insual tak zet a chang, kal suak thei tâng nin tih,” a ti a. Kachun Mosa chu a ṭonginṭaia, rial chu a thlâk tak naw a.

Changhomsiala, Farawa chu a lân sual ta vu nai a, a lungril ân khirtir mai a, kachun Israel hei chu ân suaktir awi nawk naw a.

Maleiachun Pathianin Aigupta ram sûng kapaia chun khâi ân tamtir a. Khâi hei chun rialin a isiat hmabak kapai thlai hei chu an fâk pêk rît a.

Ma zoi chun Pathianin Aigupta ram kapaia chun izîng insa mupka hi ân omtir a. A zîng fe leiin Aigupta mihei chu tual an suak thei tak naw a. Israel hei omna rawchu a zîng ve naw a, a vâr mai a.

Hremna hripui kuaka zet ân tuartir hnung hom chun Farawa chun Israel mipuhei chu a rama ṭang chun a lan suaktir awi ta vu naw a. Farawa chu a la hel vu nai leiin Pathianin hripui hremna khatka la hong tir a tum ta a. Ma hremna hripui raw hi chun Farawa lungril chu a tawn ta fe a.

Bible chanchin aṭanga lâksuak: Exodus bung 5-10