3. Tui lian

Chun, hun sawtka hnungin manka hi a hog changa, rinênga hin mihriam an hong punga. An insualin, inpawngnêkna a nânsat êm êma, an insual êem leiin rinêng kapai hi Pathianin tui inliantira inboiraltir a tum ta a.

Changhomsiala,Nova chu Pathian mithmu a chun ditsakna a donga. Misual hei hnianga khawsa homsiala ani chu mifel fêka a changa. Pathianin khawvel pumpuia tui an liantir ding thu chu Nova hnianga chun a hril a. Chun, Nova hnianga chun rilong lian fêka tuk dingin a hril sa dêna.

Pathianin Nova hnianga chun rilong chu a dung mitar 140 vêl, a khang mitar 23 vêl, ân sang dân chu mitar 13.5 vêl tuk dingin a hril a. Rilong chu thinga siam chang a ti a, sawng inthumka, pindan hei hom siamsa in, inchung om a ti a, tukver hom a om sa dên ding a chang. Rilong sûnga chun Nova nih a insûng hei, ramsa kapai dama hring taphot laia mi inhnika tuilian sûng kapai chu an om ding a chang.

Nova chun Pathian thuhril chu a ringa. Pathianin a hril angka tak chun a nâipa inthumka hei rek chun rilong chu an tuk ta a. Rilong tuk dinga riruang a pêk chu a lian fe leiin ma tuk zoi ding chun kum tamka a ngaia. Nova chun mihei hnianga chun tui hong lian ding thu chu a hril a, Pathian hnianga kîr nawk dingin a hril ṭhin a, changhomsiala a thuhril chu tuhomin a tak an son naw a.

Pathianin Nova nih a insûnghei hnianga chun anmani nih ramsa hei ta dingin an khop tawk fâk ding siakhawl dingin a hril sa a. Thil thaw ding ipai a rêl rît hnungin Pathianin Nova hnianga chun ama nih a nupui, a nâi ipa inthumka hei nih an nupui hei chu rilong sûnga lût ta dingin a hril a. An rêngka chun mi riatka an chang.

Tuilian sûng kapai an him theina dingin ramsa tinreng a pui nih a chal chu Pathianin Nova hniangah a tir a. Chun inthawina dingin Pathianin ramsa inthiang kapai a pui nih a chal sarika ṭiang a tir sa dên a. An rengkan rilong sûnga an lût kip hnung chun Pathianin rilong kot chu a khâr ta a.

Kachun rua intak fêka chu a sûr ta chur chura. Ni sawm inlîka nih zân sawm inlîka sûng chu tawp riai loiin a sûr ta chiama. Rinêng chung kapaia chun tui a hong liama, a chîm ta rît a. Rinêng kapaia thil tinrêng chu tuiin a khûm rîta, tlâng insâng kapai hom a khûm rît ta a.

Mihriam nih ramsa rilong sûnga om ti chai loi chu thil tinreng khawhmuala om taphot hei chu an thi rît a. Rilong ha chu tui chunga an kângtir a, thil tinreng rilong sûnga om hei ha chu himvaikan an om a.

Rua sûr chu a tawp ta a, changhomsiala rilong ha chu thla ringaka sûng chu tui chunga a la lêng ta maia. Malai chun tui hei chu a hong kang ta tial tiala. Nika chu tlang insâng fêka tia rilong ha ân nghat ta a, changrawchu rinêng chu tuiin a la chîm ta maia. Thla inthumka hnung chun tlâng sîphei chu a hong lang ta a.

Chun ni sawm inlîka hnung chun Nova chun vaak khatka hi rinênga tyi a kang ni kang loi en dingin rilonga inthok chun ân vuangtira. Vaak chun rinêng hulna a zong a zonga a hmu tâk naw leiin a hong kîr nawk ta a.

Hun nawka chun Nova’n vaṭhu ân vuang suaktir a. Changhomsiala rinêng hul fûkna ding hrim a hmu naw leiin a hnianga a hong kir nawka. Haptaka hnungin vaṭhu chu ân vuang suaktir nawka. A hmûra chun Olive thing ṭang inputin a hong kîr nawk ta a. Tui chu a hong kang dap dapa, thing nih rua hei chu an hong mawng nawk ta a.

Nova chun ni sari dan a nghak hnung chun vaṭhu khatka a voi inthumkana dingin a tir nawka. Ma ṭum hi chun vaṭhu chun fûkna ding a va hmu tâk leiin a hong kîr nawk tâk naw a. Tui chu a kang ta tir a.

Thla inhnika a ral hnung chun Pathianin Nova hniangah, “Nang nih ni insûnghei nih ramsa kapai rêk tun chun rilong aṭangin suak thei ta nin tih. Nâi tamka nih tu tamka neiin rinêng hi lua sip roi,” a ti a. Kachun Nova nih a insûng hei chun rilong chu an suak khal ta a.

Nova chu rilonga inthokin a suak hnung chun mâichâm a siama, inthawina dingin sa chitinreng laia mi ân hlân paka. Pathian chu inthawina a chun a lawm a, Nova nih a insûng hei chu mala sawm ta a.

Pathianin, “Mihriam hei hi an vânglai ni aṭangin loi insual homsiala, mihriam hei leiin tui inliantirin rinêng hi ise ta naw ning, rinêng hi ṭongsia inpêl ta riai naw ning ti in ken tiam,” a ti a.

Pathianin a thutiam sininsiana dingin sûmrisang hmasak chem. chu ân zâmtir a. Sûmrisang ân zâm zâkan Pathianin a mihei hninanga a thaw dinga a intiam ha a hawisuakna dingin a chang.

A Bible story from: Genesis 6-8